ལོ་ལྟར་ཆོ་འཕྲུལ་སྨོན་ལམ་ཆེན་མོའི་སྔ་རྗེས་གང་རུང་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགེ་ཚུལ་སློང་གི་སྡོམ་འབོག་སྩོལ་བཞིན་ཡོད་པ་ལྟར། དེ་རིང་སྔ་དྲོ་མགོན་པོ་༸གང་ཉིད་མཆོག་གིས་རབ་བྱུང་པ་ ༧༣ དགེ་ཚུལ་གྱི་སྡོམ་པ་བཀའ་དྲིན་སྩལ་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་ནས་དགེ་ཚུལ་སློང་གི་སྡོམ་པ་ཞུ་མཁན་གྲྭ་བཙུན་ ༥༠༠ ལྷག་པ་ཡོད་པ་དང་། དགེ་ཚུལ་སློང་གི་སྡོམ་པ་དེ་བཞིན་དེ་རིང་སྟེ་བོད་ཟླ་ ༡ པོའི་ཚེས་ ༡༡ ནས་ ༡༢ བར་རམ་ཕྱི་ལོ་ ༢༠༢༣ ཟླ་ ༣ ཚེས་ ༢ ནས་ ༤ བར་ཉིན་གྲངས་གསུམ་གྱི་རིང་སྒྲུབ་གཏན་འཁེལ་བ་ལྟར་དེ་རིང་སྔ་དྲོ་མགོན་པོ་༸གང་ཉིད་མཆོག་གིས་རབ་བྱུང་པ་ ༧༣ ཐུགས་བརྩེ་བ་ཆེན་པོས་དགེ་ཚུལ་གྱི་སྡོམ་པ་བཀའ་དྲིན་སྩལ་ཡོད་པ་རེད།
རྩ་བའི་དེ་སྔོན་དགའ་ལྡན་ཕོ་བྲང་ཡིག་ཚང་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་མདུན་ནས་དགེ་ཚུལ་སློང་གི་སྡོམ་པ་ཞུ་མཁན་རྣམས་ཀྱི་ཆེད་གསལ་བསྒྲགས་ཤིག་སྤེལ་དོན་ལྟར། ཁ་སང་ཕྱི་ཚེས་ ༡ ཉིན་གྱི་ཉིན་རྒྱབ་ཕྱག་ཚོད་ ༢།༣༠ ཐོག་དེ་འབྲེལ་ཐོ་འགོད་ཟིན་པའི་བསྒྲུབ་བྱ་རྣམས་ཐེག་ཆེན་ཆོས་གླིང་གཙུག་ལག་ཁང་དུ་བསྐོང་ཚོགས་ཀྱིས་སྡོམ་པ་སྤྱིའི་ངོ་སྤྲོད་དང་། སྡོམ་པ་དངོས་གཞི་ཞུ་ཚེ་ཀུན་སློང་འཁྱེར་ཕྱོགས་སོགས་ཀྱི་ཐོག་ལམ་སྟོན་གནང་ཡོད་པ་རེད་འདུག
འདི་ག་རླུང་འཕྲིན་ཁང་ནས་དེ་སྔོན་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་༸རྒྱལ་བའི་གསུང་འབུམ་ཕྱོགས་སྒྲིག་སྡེ་ཚན་གྱི་འགན་འཛིན་ཡང་སྟེང་རིན་པོ་ཆེ་མཆོག་ལ་སྡོམ་པ་གཉིས་ཀྱི་གལ་གནད་དང་འབྲེལ་བཅར་འདྲི་ཞུས་པར་སྡོམ་པ་དེ་གཉིས་ནི་སངས་རྒྱས་ཀྱི་བསྟན་པ་དང་འབྲེལ་བའི་སྡོམ་པ་གལ་ཆེ་ཆགས་ཡོད་པ་མ་ཟད། སངས་རྒྱས་ཀྱི་བསྟན་པ་གནས་དང་མི་གནས་དེ་བསྙེན་རྫོགས་ཀྱི་སྡོམ་པ་ཚུལ་བཞིན་དུ་སྲུང་མཁན་གྱི་འདུལ་བ་འཛིན་པའི་དགེ་སློང་གནས་དང་མི་གནས་ལ་རག་ལུས་ཡོད་པ་གསུངས་ཡོད།
