བོད་མིའི་བླ་ན་མེད་་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟ་ཨ་རིའི་མི་ནི་སོ་ཊ་མངའ་ཁུལ་གྱི་མཱ་ཡོ་སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་གནང་བཞིན་པ་དང་བསྟུན། མི་ནི་སོ་ཊ་མངའ་ཁུལ་དུ་རྟན་གཞི་བྱས་པའི་བོད་མི་རྣམས་ནས་ཇི་ལྟར་གསོལ་འདེབས་ཞུས་པ་བཞིན་དེ་རིང་ཟླ་ ༩ ཕྱི་ཚེས་ ༣༠ ཉིན་ཁུལ་དེར་བཞུགས་བོད་མི་ཚོར་བླང་དོར་གྱི་བཀའ་སློབ་བཀྲིན་ཆེ་བ་བསྩལ་གཏན་འཁེལ་འདུག 
མགོན་པོ་༸གང་ཉིད་མཆོག་གི་ད་ལྟའི་སྐུ་གཟུགས་ཀྱི་གནས་སྟངས་ཇི་ཡོད་སྐོར་ཨ་རིའི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་ལགས་ཀྱིས་གསུངས་པར་གཞིགས་ན། སྨན་པ་ཁག་གིས་༸སྐུའི་འཕྲོད་བཞེས་བརྟག་དཔྱད་གྲུབ་རྗེས་༸གང་ཉིད་མཆོག་ལ་བདུན་ཕྲག་ཁ་ཤས་རིང་སྐུ་ངལ་གསོ་བཞུགས་གནང་གལ་ཡིན་པའི་ལམ་སྟོན་ཕུལ་བ་ལྟར། མི་ནི་སོ་ཊའི་བོད་མི་རྣམས་ལ་བཀའ་སློབ་བསྩལ་རྒྱུ་ལས་གཞན་མཛད་འཆར་གང་ཡང་གོ་སྒྲིག་གནང་མེད་སྐོར་གསུངས་འདུག དེའི་བར་ན་དེ་རིང་ Belfast Telegraph དང་། Express & Star སོགས་ཨ་རིའི་ནང་གི་བརྒྱུད་ལམ་ཁག་ཅིག་ནས་གནས་ཚུལ་སྤེལ་བར་གཞིགས་ན། ཨ་རིའི་ Queens གཙུག་ལག་སློབ་གཉེར་ཁང་ནང་རྟེན་གཞི་བྱས་པའི་ Adoreboard ཉམས་ཞིབ་སྡེ་ཚན་གྱི་ཚན་རིག་པ་ཁག་ཅིག་གིས། Twitter ལ་སོགས་པའི་སྤྱི་ཚོགས་གླེང་སྟེགས་ཀྱི་དྲ་བའི་ཐོག་མང་ཚོགས་ཀྱི་རྗེས་འབྲང་པ་མང་ཤོས་ཡོད་པའི་མི་སྣ་བརྒྱས་འདས་པའི་ཟླ་བ་བརྒྱད་ཀྱི་ནང་དྲ་ཐོག་ཚིག་བེད་སྤྱོད་བཏང་པ་དང་གནད་དོན་འགྲེལ་བརྗོད་གནང་བ་ཁག་ལ་དཔྱད་ཞིབ་གནང་འདུག དེ་དག་ལས་གང་ཟག་སྒེར་གྱི་སེམས་ཚོར་གྱི་གནས་སྟངས་སོགས་ལ་དམིགས་བསལ་གཉེན་ཆས་བརྒྱུད་ཤེས་རྟོགས་བྱུང་པའི་ཁྲོད་༸གོང་ས་མཆོག་ཐུགས་སྤྲོ་ཤོས་ཀྱི་མི་སྣ་ཨང་ ༡༣ པར་མཚན་བཏོན་གནང་འདུག ཉམས་ཞིབ་གནང་པ་དེའི་ཁྲོད། ཨང་རིམ་དང་པོ་སོན་པ་དབྱིན་ཡུལ་ནང་གི་ཞས་པ་གྲགས་ཅན་ Harry Styles ལགས་འདེམས་སྒྲུག་གནང་འདུག
