དེ་རིང་ཕྱི་ཟླ་ ༡༢ ཕྱི་ཚེས་ ༡༡ ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་སྨད་གྲྭ་ཚང་དུ་ཕྱི་ནང་གི་དད་ལྡན་སེར་སྐྱ་མང་ཚོགས་ ༢༠༠༠༠ ལྷག་ལ་དཔལ་གསང་བ་འདུས་པའི་བཀའ་དབང་དངོས་གཞི་དབུ་འཛུགས་མཛ་དཡོད་པ་རེད། བཀའ་ཆོས་ཀྱི་ཆེས་ཐོག་མར་མགོན་པོ་༸གང་ཉིད་མཆོག་གིས་དགེ་བསྙེན་གྱི་སྡོམ་པ་ཞུ་འདོད་ཡོད་པའི་ཆོས་ཞུ་བ་མི་སྐྱ་ཕོ་མོ་ཚོར་བསླབ་པའི་གཞི་ལྔ་དང་འབྲེལ་བའི་དགེ་བསྙེན་གྱི་སྡོམ་པ་སྩལ་གནང་བ་དང་སྦྲགས། གསང་བ་འདུས་པའི་བཀའ་དབང་གི་སྔོན་འགྲོའི་སྤྱི་བཤད་དང་འབྲེལ་ནས་གང་ཟག་རང་ཉིད་ཀྱི་རྒྱུད་ལ་གསང་སྔགས་ཀྱི་ཉམས་ལེན་ཡོང་བ་ལ་ངེས་པར་དུ་སྟོང་པ་ཉིད་ཀྱི་ལྟ་བ་མེད་ཐབས་མེད་པ་ཞིག་དང་དེའི་རྒྱས་རྟེན་དུ་བྱང་ཆུབ་སེམས་ཀྱིས་རྩིས་ཟིན་པ་དགོས་གལ་དང། དེ་ལྟར་ཡོང་བར་དབུ་རྩ་ཤེས་སོགས་དཔེ་ཀློག་གནང་གལ་ཡིན་སྐོར་བཀའ་སྩལ་ཡོད་པ་རེད། ལྷག་དོན་དུ་སྤུས་ལྡན་པའི་བོད་ཀྱི་ནང་པ་སངས་རྒྱས་ཀྱི་བསྟན་པ་དེ་མི་རབས་ནས་མི་རབས་བར་རྒྱུན་འཛིན་བྱར་སྐྱ་སེར་ཁྱད་མེད་པར་ཚང་མར་འགན་ཁུར་ཡོད་སྟབས། ང་ཚོ་ཚང་མས་དེའི་ཐད་ལ་སློབ་སྦྱོང་བྱས་ཏེ་འཛིན་སྐྱོང་སྤེལ་གསུམ་ཞུ་དགོས་གལ་ཡིན་པའི་བཀའ་སློབ་མཛད་ཡོད་པ་རེད། ༸གང་ཉིད་མཆོག་གིས་དེང་སྐབས་བོད་དུའང་ཁྱིམ་པ་ཕོ་མོ་ཚོས་དཔེ་ཆ་ལ་དོ་སྣང་དང་ནང་པའི་གཞུང་ལ་སློབ་སྦྱོང་བྱེད་མཁན་ཉིན་རེ་ཉིན་རེ་བཞིན་ཤུགས་ཇེ་ཆེར་འགྲོ་བཞིན་ཡོད་པར་མགོན་པོ་མཆོག་གིས་ཡི་རངས་བསྔགས་བརྗོད་ཡོད་པ་བཀའ་སྩལ་མཛད་འདུག དེ་བཞིན་མགོན་པོ་མཆོག་གིས་ང་ཚོ་ཚང་མས་ཐོས་བསམ་སྒོམ་གསུམ་གྱི་ཐོག་ནས་སངས་རྒྱས་པའི་ཆོས་ལ་ཤེས་ནས་དད་པ་ཐོབ་པའི་དུས་རབས་ ༢༡ པའི་ཆོས་པ་ཞིག་བྱ་དགོས་གལ་ཆེ་བ་སོགས་ཀྱི་བཀའ་སྩལ་གནང་ཡོད་པ་རེད།