ཟླ་ ༧ ཚེས་ ༣ ཙམ་ནས་རྒྱ་གར་བྱང་ཕྱོགས་ཨ་རུ་ནཱ་ཅལ་མངའ་སྡེའི་སློབ་ཕྲུག་ཚོགས་པ་ AAPSU དང་ SUMAA དེ་བཞིན་ས་གནས་གདོད་མའི་མི་རིགས་ཚོགས་པ་སོགས་ནས་མངའ་སྡེའི་ནང་གནས་སྡོད་བྱེད་བཞིན་པའི་བོད་མི་རྣམས་ཕྱིར་ཕུད་གཏོང་དགོས་པའི་ངོ་རྒོལ་སྐད་འབོད་དང་། ས་གནས་འབྲེལ་ཡོད་གཞུང་ལ་ཞུ་གཏུགས་སོགས་ཀྱི་ལས་འགུལ་སྤེལ་བཞིན་ཡོད་པ་རེད།
ཚོགས་པ་དེ་དག་ནས་འདས་པའི་ཉིན་ཤས་ཁྲོད་ས་གནས་སོ་སོའི་རྫོང་དཔོན་གྱི་མཚན་ཐོག་ཏུ་ཞུ་སྙན་ཞིག་ཕུལ་བའི་བརྒྱུད་རྒྱ་གར་དབུས་གཞུང་གིས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པ་དེ་མངའ་སྡེའི་ནང་ལག་བསྟར་གནང་རྒྱུ་མཚམས་འཇོག་དགོས་པ་དང་བོད་མི་རྣམས་ལ་ཚོགས་སྡེའི་ལག་ཁྱེར་ཐོབ་པ་རྣམས་ཕྱིར་བསྡུ་དགོས་པ། དེ་བཞིན་ས་གནས་བོད་མི་རྣམས་ལ་ཚོང་གཉེར་ཆོག་པའི་ལག་ཁྱེར་གནང་ཁག་ཕྱིར་བསྡུ་དགོས་པ། བོད་མི་རྣམས་བཅད་མཚམས་ལྡན་པའི་ས་གནས་གཞན་ལ་ཕྱིར་ཕུད་གཏོང་དགོས་པ་སོགས་ཀྱི་དགོས་འདུན་བཏོན་ཡོད་པ་དང་། ལྷག་པར་དུ་ཚེས་ ༡༢ ཉིན་ཚོགས་པ་དེ་དག་གི་ཚོགས་མི་ཁག་ཅིག་བསྟན་འཛིན་སྒང་བོད་མིའི་གཞིས་ཆགས་ལས་ཁུངས་སུ་བཅར་ནས་བསྟན་འཛིན་སྒང་གཙོས་གྱུར་མོན་ཏ་དབང་དང་། འབུམ་སྡེ་ལ་སོགས་མངའ་སྡེ་དེའི་ནང་གནས་སྡོད་བྱེད་བཞིན་པའི་བོད་མི་རྣམས་ཁྲིམས་འགལ་བ་ཡིན་སྐོར་སོགས་བརྗོད་ནས་ས་གནས་ནས་ཕྱིར་ཐོན་དགོས་པའི་སྡིགས་ར་བསྐུལ་འདུག
ས་གནས་དེར་ད་ལྟའི་ཆར་མུ་མཐུད་ནས་ངོ་རྒོལ་བྱེད་བཞིན་པའི་གནས་སྟངས་དང་འབྲེལ་རླུང་འཕྲིན་ཁང་ནས་ཞལ་པར་བརྒྱུད་བསྟན་འཛིན་སྒང་བོད་མིའི་གཞིས་ཆགས་ལས་ཁུངས་ཀྱི་ལས་དྲུང་ཚེ་རིང་ནོར་བུ་ལགས་སུ་བཀའ་འདྲི་ཁག་ཅིག་ཞུས་པར་ཨ་རུ་ནཱ་ཅལ་སློབ་ཕྲུག་ཚོགས་པ་རྣམས་ནས་དེ་སྔ་དང་མི་འདྲ་བར་ས་གནས་བོད་མིའི་གཞིས་ཆགས་ཁག་གི་ནང་དངོས་སུ་ཡོང་ནས་ངོ་རྒོལ་དང་སྡིགས་ར་རིགས་བསྐུལ་ཡོད་སྟབས། ད་ལྟའི་ཆར་ས་གནས་གཞིས་ཆགས་ཁག་ཏུ་རྒྱ་གར་གཞུང་གི་དམག་མི་དང་ཉེན་རྟོག་མི་སྣ་ ༢༤ ལྷག་སྲུང་སྐྱོབ་ཆེད་བསྐོ་གཞག་གནང་ཡོད་པ་དང་། དཀའ་རྙོག་དེ་གང་མགྱོགས་སེལ་ཐབས་སུ་འཛིན་སྐྱོང་བཀའ་ཤག་དང་ནང་སྲིད་ལས་ཁུངས། ལྡི་ལི་དོན་གཅོད་བཅས་སུ་ས་གནས་ཀྱི་ཛ་དྲག་གནས་སྟངས་འཁོད་པའི་སྙན་ཐོ་ཞིག་ཕུལ་ཡོད་པ་སོགས་གསུངས་སོང་།
གཞི་རྩའི་ཨ་རུ་ནཱ་ཅལ་མངའ་སྡེའི་སློབ་ཕྲུག་ཚོགས་པ་ AAPSU དང་ SUMAA དེ་བཞིན་ས་གནས་གདོད་མའི་མི་རིགས་ཚོགས་པ་ཁག་ནས་ད་རེས་ཙམ་མིན་པར་དེ་སྔ་ས་གནས་བོད་མིའི་ཐོག་ངོ་རྒོལ་སྐད་འབོད་བྱས་ཡོད་པ་དང་། ལྷག་པར་དུ་སྔར་ལོ་ ༢༠༡༧ ཟླ་༨ ཚེས་ ༡༢ ཉིན་ཨ་རུ་ནཱ་ཅལ་མངའ་སྡེའི་འཛིན་སྐྱོང་གི་ཚོགས་འདུའི་ཐོག་ཨ་རུ་ནཱ་ཅལ་ནང་རྒྱ་གར་དབུས་གཞུང་ནས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ ༢༠༡༤ ཞེས་པ་དེ་ལག་བསྟར་གནང་རྒྱུ་ཐག་གཅོད་བྱུང་སྐབས་སློབ་ཕྲུག་ཚོགས་པ་དེ་དག་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ལག་བསྟར་བྱ་རྒྱུར་ཐག་གཅོད་བྱུང་བ་དེ་ཕྱིར་བསྡུ་དགོས་པའི་ངོ་རྒོལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་མྱོང་ཡོད་པ་རེད།
