བཙན་བྱོལ།

ཁ་སང་ཕྱི་ཟླ་ ༨ ཚེས་ ༤ སྟེ་བདག་ཅག་གི་སྟོན་པ་རྣམ་འདྲེན་བཞི་པ་ཤཱཀྱ་ཐུབ་པ་མཆོག་གིས་རྒྱ་གར་གྱི་གནས་མཆོག་ཝཱ་རཱ་ཎ་སཱིར་བཀའ་དང་པོ་བདེན་བཞིའི་ཆོས་ཀྱི་འཁོར་ལོ་བསྐོར་གནང་མཛད་པའི་དུས་ཆེན་ཁྱད་འཕགས་ཅན་དང་བསྟུན། ཡུ་རོབ་བྱང་ཕྱོགས་ Finland ནང་རྟེན་གཞི་བྱས་པའི་སྔ་འགྱུར་རྙིང་མའི་དྷ་ན་ཀོ་ཤའི་ཆོས་ཚོགས་ཀྱི་གོ་སྒྲིག་འོག བོད་བརྒྱུད་ནང་བསྟན་གཙོ་ གྱུར་ཆོས་ལུགས་རིས་མེད་ཀྱི་བླ་མ་དང་སྐུ་ཚབ་བཅས་ལྷན་འཛོམས་ཐོག་ཟླ་བ་འདིའི་ཕྱི་ཚེས་ ༣ དང་ ༤ བར་བཅས་ཉིན་གྲངས་གཉིས་ཀྱི་རིང་ཕིར་ལན་ཌིའི་ Jokioinen གྲོང་ཁྱེར་དུ་ཆོས་ལུགས་ལས་འདས་པའི་བཟང་སྤྱོད་དང་འཕགས་པའི་བདེན་བཞིའི་ཐོག་རྒྱལ་སྤྱིའི་བགྲོ་གླེང་ཞིག་ཚོགས་འདུག དྷ་ན་ཀོ་ཤའི་ཆོས་ཚོགས་ཀྱི་ཚོགས་གཙོ་གྲགས་པ་རིན་པོ་ཆེ་མཆོག་གིས་དབུས་པའི་གསུང་བཤད་གནང་མཁན་གཙོ་བོ་འབྲུག་ནང་པའི་སྐུ་ཚབ་འབྲུག་གི་ཡུ་རོབ་གཞུང་ཚབ་པ་ཆེན་མོ་ལྕམ་ Pema Choden ལགས་དང་ས་གནས་ཡི་ཤུའི་ཆོས་དཔོན་ Matti Repo ལགས་རྣམ་གཉིས་གཙོས་བོད་བརྒྱུད་ནང་བསྟན་གྱི་བླ་མ་དང་ས་གནས་དེར་རྟེན་གཞི་བྱས་པའི་ཐེ་ལན་ཌི་དང་ཝེ་ཏི་ནམ་ནང་པའི་མཁན་པོ། ཀོ་རི་ཡ་དང་ཉི་ཧོང་གི་ནང་པའི་ཆོས་དགེ དེ་བཞིན་ཚན་རིག་པ་དང་མཁས་དབང་བཅས་ཁྱོན་མི་གྲངས་བརྒྱ་ལྷག་ཚོགས་བཅར་གནང་འདུག རྒྱལ་སྤྱིའི་བགྲོ་གླེང་ལྷན་ཚོགས་དང་འབྲེལ་བའི་ཐོག་དྷ་ན་ཀོ་ཤའི་ཆོས་ཚོགས་ཀྱི་ཚོགས་གཙོ་གྲགས་པ་རིན་པོ་ཆེ་མཆོག་ལ་བཀའ་འདྲི་ཞུས་པར་ཕིན་ལན་ཌི་ནང་བོད་རྒྱུད་ནང་བསྟན་གྱི་ཆོས་ཚོགས་མང་པོ་མེད་ཀྱང་། ཐེ་ལན་ཌི་དང་ཉི་ཧོང། བྷར་མ་སོགས་ཐེག་པ་ཆེ་ཆུང་གཉིས་ཀྱི་དགོན་པ་མང་པོ་ཡོད་སྟབས་ནང་པ་སངས་རྒྱས་པ་ཚང་མ་གཅིག་གྱུར་ཞིག་ཆགས་ཐུབ་པ་དང་སངས་རྒྱས་ཀྱི་ལྟ་གྲུབ་ཁག་ལ་བསླབ་པ་སློབ་གཉེར་གནང་ནས་དོན་དམ་གྱི་ཉམས་ལེན་ཐུབ་པ་སོགས་ལ་དམིགས་ནས་ལྷན་ཚོགས་དེ་གོ་སྒྲིག་གནང་ཡོད་པ་གསུངས་ཡོད།   ལྷག་དོན་ཚོགས་བཅར་ཡོངས་ནས་ཐུགས་སྣང་ཆེན་པོས་བགྲོ་གླེང་གི་ཤ་ཤས་བཞེས་པ་མ་ཟད་སླད་མར་བགྲོ་གླེང་འདི་ལྟར་མུ་མཐུད་གོ་སྒྲིག་གནང་སྐྱོང་ཡོང་བའི་རེ་སྐུལ་ནན་པོ་གནང་སྐོར་སོགས་གསུངས་སོང་།

ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ David Price ལགས་ཀྱིས་དབུ་ཁྲིད་པའི་གྲོས་ཚོགས་འཐུས་མི་དྲུག་ལས་གྲུབ་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་རྣམ་པ་བདུན་ཕྲག་སྔོན་མའི་རེས་གཟའ་པ་སངས་དང་སྤེན་པ་གཉིས་ཀྱི་རིང་བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་ལྟེ་གནས་ཁག་ལ་འཚམས་གཟིགས་དང་བཙན་བྱོལ་བོད་མིའི་མང་གཙོའི་ལམ་སྲོལ་ཐོག་རྒྱུས་ལོན་སོགས་གནང་ཡོད་པ་རེད། ཁ་ཉིན་རེས་གཟའ་སྤེན་པའི་དགོང་དྲོ་ཆུ་ཚོད་ ༥༌༣༠ ཐོག་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ནས་གངས་སྐྱིད་ཚོགས་ཁང་གསར་པའི་ནང་བོད་མིའི་སྒྲིག་འཛུགས་ཀྱི་སྲི་ཞུ་བ་དང་། བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་ཚོར་མཇལ་འཕྲད་ཀྱིས་གསུང་བཤད་གནང་ཡོད་པ་དང་། སྐབས་དེར་ཆེས་མཐོའི་སྐུ་ཚབ་ཚོགས་ཆུང་གི་སྣེ་ཁྲིད་པ་ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ David Price ལགས་ནས་འཚམས་གཟིགས་འདིའི་ཁྲོད་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་མོལ་གནང་སྐབས་མགོན་པོ་༸གང་ཉིད་མཆོག་གི་༸སྐུ་ཚེའི་མཛད་རྣམ་ཙམ་མ་ཟད། བོད་ཀྱི་ལོ་རྒྱུས་ཐོག་ལའང་རྒྱུས་ལོན་གསར་པ་མང་པོ་བྱུང་སོང་བས་མཇལ་མོལ་གྱི་མྱོང་ཚོར་དེ་ནི་དུས་ནམ་ཡང་བརྗེད་ཐབས་མེད་པ་ཞིག་རེད་ཅེས་གསུངས་འདུག ལྷག་པར་དུ་ཁོང་གིས་བོད་མི་ཚོས་དཀའ་ངལ་མང་པོར་གདོང་ལེན་གནང་སྟེ་མུ་མཐུད་རང་ཉིད་ཀྱི་ཆོས་དང་རིག་གཞུང་། སྐད་ཡིག་སོགས་མི་ཉམས་རྒྱུན་འཛིན་དང་། བོད་མིའི་སྒྲིག་འཛུགས་དེ་བཞིན་མང་གཙོའི་ལམ་སྲོལ་ཐོག་སྐྱོད་བཞིན་པར་ཡི་རངས་བསྔགས་བརྗོད་དང་སྦྲགས། ཨ་རིའི་གཞུང་ནས་ཨ་རིའི་རོགས་ཚོགས་ USAID དང་། ཨ་རིའི་ཕྱི་སྲིད་ལས་ཁུངས་བརྒྱུད་བོད་མིའི་ངོ་བོ་སྲུང་སྐྱོབ་དང་། འཚོ་ཐབས་སོགས་ཀྱི་ཐད་རྒྱབ་སྐྱོར་མུ་མཐུད་ཞུ་མུས་ཡིན་པ་མ་ཟད། ཨ་རིའི་གྲོས་ནང་ལ་མཚོན་ན་བོད་ཀྱི་རིག་གཞུང་དང་འགྲོ་བ་མིའི་ཐོབ་ཐང་གི་གནད་དོན་ལ་ཐུག་སྐབས་ཆབ་སྲིད་ཚོགས་པ་གཉིས་ཀས་ཞལ་གཅིག་གྲག་ཐོག་ནས་རྒྱབ་སྐྱོར་ཞུ་མུས་ཡིན་ཞེས་གསུངས་འདུག སྐུ་ཞབས་ David Price ལགས་ནས་གསུང་བཤད་མ་གནང་གོང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཆེས་མཐོའི་སྐུ་ཚབ་རྣམ་པར་འཚམས་འདྲི་ཞུ་པ་དང་སྦྲགས། ད་རེས་སྐུ་ཚབ་རྣམ་པ་བཞུགས་སྒར་དུ་ཕེབས་པ་འདི་ནི་རྒྱ་ནག་ལ་གཞུང་ལ་མང་གཙོའི་རིང་ལུགས་ལ་མཐའ་མའི་རྒྱལ་ཁ་ཐོབ་རྒྱུ་ཡིན་པའི་བརྡ་ལན་ཞིག་མཚོན་པ་དང་། ལྷག་པར་དུ་བོད་ནང་གི་བོད་མི་ཚོའི་ལྷག་བསམ་དང་ཞུམ་པ་མེད་པའི་སྙིང་སྟོབས། གཡོ་བ་མེད་པའི་དྲང་བདེན་གྱི་མངོན་འདོད་ལ་རྒྱབ་སྐྱོར་ཡོད་པའི་བརྡ་ལན་བཟང་པོ་ཞིག་གནང་ཐུབ་པ་བྱུང་ཡོད་ཅེས་གསུངས་འདུག གཞི་རྩའི་ཆེས་མཐོའི་སྐུ་ཚབ་རྣམ་པ་བཞུགས་སྒར་དུ་ཉིན་གྲངས་གཉིས་ཀྱི་རིང་བཞུགས་གཞག་གནང་སྐབས་བོད་མིའི་སྒྲིག་འཛུགས་ཀྱི་བཀའ་ཤག་ལྷན་རྒྱས་དང་མཇལ་མོལ་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་དབུས་པའི་སྤྱི་འཐུས་རྒྱུན་ལས་རྣམས་དང་ལྷན་ནང་མོལ་ལྷན་འཛོམས་ཤིག་གནང་ཡོད། ཁྱད་པར་དུ་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་མཇལ་མོལ་དང་ཉིན་དགུང་ལྗགས་སྨིན་ལྷན་བཞེས་གནང་ཡོད་པ་རེད། བོད་མིའི་སྒྲིག་འཛུགས་ཀྱི་སྲི་ཞུ་བ་དང་བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་མི་སྣར་གསུང་བཤད་བཅས་གནང་སྒོ་ཁག་ལེགས་གྲུབ་དང་བསྟུན། ཁ་སང་སྔ་ཐོག་བཞུགས་སྒར་ནས་ཕྱིར་ཕེབས་ཐོན་གནང་ཡོད།

དེ་རིང་སྔ་དྲོའི་ཆུ་ཚོད་ ༡༡ ཡོལ་ཙམ་ལ་ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ David Price ལགས་དང་ཚོགས་གཞོན་གྲོས་ཚོགས་འཐུས་མི་སྐུ་ཞབས་ Vern Buchanan ལགས་རྣམ་གཉིས་ཀྱིས་གཙོས་པའི་གྲོས་ཚོགས་འཐུས་མི་དྲུག་ལས་གྲུབ་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་རྣམ་པ་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་མཇལ་མོལ་གནང་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་མཐོའི་སྐུ་ཚབ་རྣམ་པར་འཚམས་འདྲི་དང་སྦྲགས། མགོན་པོ་༸གང་ཉིད་མཆོག་གི་ཐུགས་བསྐྱེད་དམ་བཅའ་བཞི་པོའི་གལ་གནད་དང་ངོ་སྤྲོད་བསྩལ་བ་མ་ཟད། མགོན་པོ་༸གང་ཉིད་མཆོག་དང་ཨ་རིའི་སྲིད་འཛིན་གོང་མ་ཚོའི་དབར་དམིགས་བསལ་གྱི་འབྲེལ་བ་ཡོད་པའི་སྐོར་སོགས་དྲན་གསོ་མཛད་འདུག སྐབས་དེར་ཨ་རིའི་གྲོས་ཚོགས་ཀྱི་ཚོགས་ཆུང་དེའི་ངོས་ནས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་༸གོང་ས་མཆོག་ལ་ཕུལ་བའི་འཚམས་འདྲིའི་ཕྱག་ཡིག་ཅིག་མགོན་པོ་༸གང་ཉིད་མཆོལ་འབུལ་ལམ་ཞུས་འདུག ༸གོང་ས་མཆོག་དང་མཇལ་མོལ་གྲུབ་མཚམས་སུ་ཆེས་མཐོའི་སྐུ་ཚབ་ཚོགས་ཆུང་གི་སྣེ་ཁྲིད་པ་ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ David Price ལགས་ནས་གསར་འགོད་པར་ད་རེས་བཞུགས་དུ་ཆེད་ཕེབས་ཀྱིས་༸གོང་ས་མཆོག་དང་མཇལ་མོལ་ཞུ་རྒྱུ་བྱུང་བ་དེ་ནི་ཉིན་ཤས་གོང་ལ་ Indonesia གཙོ་གྱུར་རྒྱལ་ཁབ་གཞན་ཁག་ཅིག་ཏུ་ཕེབས་པ་ལས་ལྷག་པ་བྱུང་སོང་བ་དང་། དེ་ཡང་གཙོ་བོ་༸གོང་ས་མཆོག་གི་༸སྐུ་ཚེའི་ལོ་རྒྱུས་དང་མགོན་པོ་༸གང་ཉིད་མཆོག་གི་དགོངས་པ་བཞེས་ཕྱོགས་སོགས་བརྒྱུད་སྐུ་ཚབ་རྣམས་ཙམ་མ་ཟད་ཨ་རིའི་མི་སེར་དང་རྒྱལ་སྤྱིར་སེམས་འགུལ་ཆེན་པོ་ཐེབས་བཞིན་ཡོད་སྟབས་དམིགས་བསལ་གྱི་ཚོར་བ་བཟང་པོ་ཞིག་བྱུང་ཞེས་གསུངས་སོང་། ཁོང་སྐུ་ཚབ་རྣམ་པ་མང་གཙོ་གོང་འཕེལ་གྱི་ཐོག་ཕྱག་ལས་གནང་མཁན་ཞིག་ཡིན་སྟབས་༸གོང་ས་མཆོག་གིས་བཞུགས་སྒར་དུ་མང་གཙོའི་ལམ་སྲོལ་ལྡན་པའི་བཙན་བྱོལ་བོད་མིའི་གཞུང་གི་ལྟེ་གནས་ཤིག་ཆེད་འཛུགས་གནང་བ་དེར་དུས་རྟག་ཏུ་གུས་བརྩི་དང་ཡི་རང་ཞུ་བཞིན་ཡོད་པ་འགྲེལ་བརྗོད་དང་འབྲེལ། ང་ཚོའི་ངོས་ནས་མུ་མཐུད་རྒྱབ་སྐྱོར་དང་དགོས་ངེས་ཀྱི་མཐུན་འགྱུར་ཁག་གནང་གི་ཡིན་ཞེས་གསུངས་སོང་།    དེ་བཞིན་ཨ་རིའི་གྲོས་ཚོགས་ཀྱི་མང་གཙོ་མཉམ་འབྲེལ་ཚོགས་ཆུང་གི་ཚོགས་གཞོན་གྲོས་ཚོགས་འཐུས་མི་སྐུ་ཞབས་ Vern Buchanan ལགས་ནས་འཚམས་གཟིགས་འདི་བརྒྱུད་ཨ་རི་དང་བོད་མིའི་དབར་འབྲེལ་བ་དེ་དག་སྔར་ལྷག་གོང་འཕེལ་ཡོང་རྒྱུ་དང་། ལྷག་པར་དུ་ཨ་རིའི་ཆབ་སྲིད་ཚོགས་པ་གཉིས་ཀའི་འཐུས་མི་ལས་གྲུབ་པའི་གྲོས་ཚོགས་འཐུས་མི་དྲུག་༸གོང་ས་མཆོག་དང་མཇལ་མོལ་གྱིས་མགོན་པོ་༸གང་ཉིད་མཆོག་གི་མ་འོངས་དགོངས་གཞིའི་ཐོག་གྲོས་བསྡུར་གནང་ཡོད་པ་དང་། ༸སྐུའི་དགོངས་བཞེད་ཁག་གྲུབ་ཐབས་སུ་འབད་བརྩོན་ཞུ་ཡི་ཡིན་ཞེས་གསུངས་སོང་།  ཐེངས་འདིའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་རྣམ་པ་དང་༸གོང་ས་མཆོག་གི་མཇལ་མོལ་དེའི་སྐབས་ཆེས་མཐོའི་སྐུ་ཚབ་རྣམ་པའི་སྐུ་ཟླ་གཙོས་པའི་ནང་མི་དང་། རྒྱལ་ས་ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་པ་ཆེན་པོ་དང་གཞུང་འབྲེལ་ལས་བྱེད་བཅས་ཁྱོན་མི་སྣ་སུམ་ཅུ་ཙམ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཨ་རིའི་བོད་ཀྱི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་གཙོ་གྱུར་འབྲེལ་ཡོད་ལས་བྱེད་བཅས་ཕེབས་ཡོད་པ་དང་། ༸གོང་ས་༸སྐྱབས་མགོན་ཆེན་པོ་མཆོག་དང་ལྷན་མཇལ་མོལ་གནང་རྗེས་མགོན་པོ་མཆོག་དང་དགུང་ཚིགས་ལྷན་བཞེས་གནང་ཡོད་པ་མ་ཟད། དེ་བཞིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མཆོད་མཇལ་ལ་ཕེབས་ཡོད་པ་རེད། སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་ཐེངས་འདིའི་འཚམས་གཟིགས་དང་འབྲེལ་ཨ་རིའི་གྲོས་ཚོགས་འཐུས་མི་རྣམས་དགོང་ལོ་བགྲེས་པོར་ཕེབས་མིན་ལ་ལྟོས་མེད་བཞུགས་སྒར་དུ་ཆེད་ཕེབས་གནང་བ་འདི་ནི་ཆབ་སྲིད་ཀྱི་ཐོག་ནས་གལ་ཆེ་མཚོན་གྱི་ཡོད་པ་གསུངས་སོང་། གཞི་རྩའི་ཆེས་མཐོའི་སྐུ་ཚབ་རྣམ་པ་དེ་རིང་སྔ་ཐོག་བོད་མིའི་སྒྲིག་འཛུགས་ཀྱི་བཀའ་ཤག་ལྷན་རྒྱས་དང་མཇལ་མོལ་གནང་ཡོད་པ་དང་སྐབས་དེར་སྐུ་ཞབས་ David Price ལགས་ནས་ཨ་རིའི་ངོས་ནས་བོད་མིའི་རང་དབང་བསྐྱར་གསོ་དང་རིག་གཞུང་སྲུང་སྐྱོབ་གནང་མཁན་གྱི་སྒྲིག་འཛུགས་དང་བོད་མིར་རྒྱབ་སྐྱོར་དང་གདུང་སེམས་མཉམ་བསྐྱེད་ཡོད་ཅེས་གསུངས་ཡོད། ཉིན་རྒྱབ་ཏུ་བོད་མི་མང་སྤྱི་འཐུས་ལྷན་ཁང་ལ་འཚམས་གཟིགས་དང་འབྲེལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྦྲེལ་པོས་དབུས་པའི་སྤྱི་འཐུས་རྒྱུན་ལས་རྣམས་དང་ལྷན་ནང་མོལ་ལྷན་འཛོམས་ཤིག་གནང་ཡོད། གཞི་རྩའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་རྣམ་པ་ཁ་སང་བཞུགས་སྒར་དུ་ཕེབས་འབྱོར་བྱུང་ཡོད་པ་དང་། ཁོང་རྣམ་པའི་བཞུགས་གཞག་ཉིན་གཅིག་ཡོད་པའི་ཁྲོད་བོད་མིའི་སྒྲིག་འཛུགས་ཀྱི་སྲི་ཞུ་བ་དང་བཞུགས་སྒར་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་གི་མི་སྣར་གསུང་བཤད་གནང་ཡོད་པ་རེད།    

འཇམ་མགོན་༸རྒྱལ་བའི་གདུང་ཚབ་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་མཆོག་དབུ་བཞུགས་ཐོག་ཐེ་ཝན་དུ་དགེ་ལུགས་སྨོན་ལམ་ཆེན་མོ་ཐེངས་གཉིས་པ་དབུ་འཛུགས་གནང་འདུག ཁ་སང་ཟླ་ ༨ ཚེས་ ༢ ཉིན་ཐེ་ཝན་ནང་རྟེན་གཞི་བྱས་པའི་ཐེ་ཝན་དགེ་ལུགས་མཐུན་ཚོགས་ཀྱིས་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་གདུལ་བྱ་རྟག་འཛིན་ཅན་གྱི་ངོར་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ཧྲིལ་པོ་ ༦༠༠ འཁོར་བ་དང་བསྟུན་༸རྗེ་བདག་ཉིད་ཆེན་པོའི་བཀའ་དྲིན་རྗེས་དྲན་ཞུ་སླད་ཡུལ་དེའི་ནང་དགེ་ལྡན་སྨོན་ལམ་ཆེན་མོ་ཐེངས་གཉིས་པ་གོ་སྒྲིག་ཞུས་ཡོད་པ་ལྟར། ཐེངས་འདིའི་སྨོན་ལམ་ཆེན་མོའི་ཐོག་འཇམ་མགོན་༸རྒྱལ་བའི་རྒྱལ་ཚབ་༸དགའ་ལྡན་ཐོག་ ༡༠༤ པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་དབུས་པའི་ཤར་བྱང་གི་ཆོས་རྗེ་རྣམ་གཉིས་མཆོག་དང་། གྲྭ་བཙུན་དང་ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས། དེ་བཞིན་ཐེ་ཝན་དགེ་ལུགས་པའི་ཆོས་པ་དང་དགོན་ཁག་གི་སྐུ་ཚབ། ཚོགས་སྡེ་ཁག་གི་འཐུས་མི་དང་མང་ཚོགས་བཅས་ཁྱོན་ཚོགས་བཅར་བ་མི་གྲངས་ ༡༥༠༠ ལྷག་ནས་ལྷན་ཞུགས་གནང་འདུག མཛད་སྒོའི་ཐོག་མར་དགའ་ལྡན་ཁྲི་རིན་པོ་ཆེ་མཆོག་གིས་དུས་ཚིགས་འདིའི་ཐོག་ནས་ང་ཚོ་འཇམ་མགོན་བླ་མ་ཙོང་ཁ་པ་ཆེན་པོའི་རྗེས་འཇུག་སེར་སྐྱ་ཡོངས་ནས་༸རྗེ་རིན་པོ་ཆེ་མཆོག་ལ་རྗེས་དྲན་ཞུ་སྟངས་གཙོ་བོ་ནི་རིན་པོ་ཆེ་མཆོག་གི་རླབས་ཆེན་མཛད་རྗེས་གང་བསྐྱངས་ཡོད་པ་དེ་ལས་མིག་དཔེ་བླངས་ཏེ་དེའི་ཐད་མདུན་སྐྱོད་གནང་གལ་ཡིན་པ་དང་ལྷག་དོན་ནང་པའི་གཞུང་ལུགས་དག་ལ་ཐོས་བསམ་སྒོམ་གསུམ་ཡ་མ་བྲལ་བར་ཉམས་ལེན་དང་དེ་རྣམས་ཤེས་པའི་སྟེང་ནས་རང་རྒྱུད་ཇེ་བཟང་དུ་གཏང་དགོས་པའི་ལམ་སྟོན་བསྩལ་འདུག ཤར་པ་ཆོས་རྗེ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་གིས་འཇམ་མགོན་བླ་མ་ཙོང་ཁ་པ་ཆེན་པོ་མཆོག་གི་རྗེས་འཇུག་པ་རྣམས་ནས་རིན་པོ་ཆེ་མཆོག་ལ་རྗེས་སུ་ཡི་རང་གི་སྒོ་ནས་འདི་ལྟ་བུའི་སྨོན་ལམ་གོ་སྒྲིག་ཞུས་པར་བསྔགས་བརྗོད་དང་འབྲེལ། དེ་རིང་གི་སྨོན་ལམ་འདི་ནི་གཙོ་བོ་འཇམ་མགོན་བླ་མ་ཙོང་ཁ་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ ༦༠༠ འཁོར་བའི་དུས་ཚིགས་ལ་རྗེས་དྲན་ཞུ་སླད་གོ་སྒྲིག་གནང་བ་ཞིག་ཡིན་སྟབས། སྨོན་ལམ་དེ་ངེས་པར་དུ་གནད་ལ་སྨིན་པ་ཞིག་གནང་གལ་ཡིན་པ་གསུངས་འདུག   བྱང་རྩེ་ཆོས་རྗེ་༸སྐྱབས་རྗེ་སྒོ་སོག་རིན་པོ་ཆེ་ངག་དབང་གསུང་རབས་བསྟན་འཛིན་དགེ་ལེགས་མཆོག་གིས་ཐེ་ཝན་ནང་དགེ་ལུགས་སྨོན་ལམ་ཆེན་མོ་ཐོག་མ་དབུ་འཛུགས་གནང་ཕྱོགས་དང་ཁྱད་པར་དུ་འདི་ལོའི་དགེ་ལྡན་སྨོན་ལམ་འདི་ནི་སྔར་དང་མི་འདྲ་བ་གཙོ་བོ་འཇམ་མགོན་བླ་མ་ཙོང་ཁ་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ཧྲིལ་པོ་ ༦༠༠ འཁོར་བའི་རྗེས་དྲན་དང་འབྲེལ་ཏེ་གནང་བ་ཞིག་ཡིན་སྐོར་གསུངས་པ་དང་སྦྲགས། སྨོན་ལམ་འདི་ལྟ་བུ་ནི་འཇམ་མགོན་བླ་མ་ཙོང་ཁ་པ་ཆེན་པོའི་མཛད་ཆེན་བཞིའི་ནང་ནས་ཡ་གྱལ་གྱི་ཆོས་འཕྲུལ་སྨོན་ལམ་ཆེན་མོ་ཞེས་པ་དེ་ཆགས་ཀྱི་ཡོད་པར་བཀའ་བསྩལ་བ་མ་ཟད། ༸རྗེ་ཙོང་ཁ་པ་ཆེན་པོས་བྱམས་ཆུབ་ཀྱི་སེམས་དེ་ཉམས་ལེན་གྱི་གནད་ཆེར་བཀའ་བསྩལ་དོན་ལྟར་ཉམས་ལེན་གྱི་སྙིང་པོར་བཟུང་ནས་འབད་དགོས་པའི་ནན་སྐུལ་གནང་འདུག རྩ་བའི་ཐེ་ཝན་ནང་སྔ་ལོར་དགེ་ལུགས་སྨོན་ལམ་ཆེན་མོ་གོ་སྒྲིག་གནང་ཡོད་པ་དང་། ད་ལན་འདི་ཐེངས་གཉིས་པ་ཆགས་ཀྱི་ཡོད་པ་རེད། བརྒྱུད་ལག་ཁག་ཏུ་དེའི་སྐོར་གནས་ཚུལ་ཐོན་པར་ད་ལན་ཐེ་ཝན་དུ་ཚོགས་པའི་དགེ་ལུགས་སྨོན་ལམ་ཐེངས་གཉིས་པའི་ཐོག་རྒྱ་གཞུང་གིས་དམ་དྲག་བྱས་པར་བརྟེན་རྒྱ་ནག་རང་ནས་དད་ལྡན་མི་གྲངས་ ༥༠ ལྷག་ཚོགས་བཅར་གནང་ཐུབ་མེད་པ་བཀོད་འདུག དགེ་ལྡན་གྱི་སྨོན་ལམ་ཆེན་མོ་དེ་ཟླ་ ༨ ཚེས་ ༢ ཉིན་ནས་དབུ་འཛུགས་ཀྱིས་ཚེས་ ༤ བར་ཉིན་གྲངས་གསུམ་གྱི་རིང་འཚོགས་གནང་གི་ཡོད་པ་རེད།

དེ་རིང་འདི་ག་རྒྱ་གར་གྱི་རྒྱལ་ས་ལྡི་ལིར་བོད་ཀྱི་ཁོར་ཡུག་དང་དེའི་ཤུགས་རྐྱེན་སྐོར་གྱི་ཁོར་ཡུག་མཁས་པའི་བགྲོ་གླེང་ལྷན་ཚོགས་ཤིག་ཚོགས་ཡོད་པ་དང་། འཛམ་གླིང་སྣེ་གསུམ་པ་བོད་ཀྱི་ཁོར་ཡུག་ལ་གནམ་གཤིས་འགྱུར་ལྡོག་དང་དེའི་ཤུགས་རྐྱེན་ཞེས་པའི་བརྗོད་གཞིའི་ཐོག་རྒྱ་གར་དང་རྒྱལ་སྤྱི་དེ་བཞིན་བོད་མི་བཅས་ཀྱི་ཁོར་ཡུག་མཁས་པ་མང་པོ་དག་ཅིག་ནས་བཀའ་མོལ་གནང་བའི་ཁྲོད་དེ་སྔོན་རྒྱ་གར་གྱི་ཕྱི་སྲིད་དྲུང་ཆེ་དང་སྲིད་བློན་གྱི་ཁོར་ཡུག་སློབ་སྟོན་པ་བཅས་གནང་མྱོང་མཁན་སྐུ་ཞབས་ Shyam Saran མཆོག་གིས་བོད་ཀྱི་ཁོར་ཡུག་གི་གནད་དོན་དེ་བོད་མི་ཁོ་ནའི་ཁེ་ཕན་ཙམ་མིན་པར་ཨེ་ཤ་ཡ་སྤྱི་དང་ལྷག་པར་དུ་ཧི་མཱ་ལ་ཡའི་རི་རྒྱུད་དུ་གནས་སྡོད་བྱེད་བཞིན་པའི་མང་ཚོགས་ཀྱི་འཚོ་གནས་ལའང་འབྲེལ་བ་ཆགས་ཡོད་པ་སོགས་ཀྱི་སྐོར་ལ་འགྲེལ་བརྗོད་གནང་བ་དང་འབྲེལ། ཁོང་སྐུ་སྒེར་གྱི་ངོས་ནས་ཁོར་ཡུག་དང་འབྲེལ་བའི་འཛམ་གླིང་ཚ་དྲོད་ཀྱི་དཀའ་ངལ་དེ་འགྲོ་བ་མིའི་རང་དབང་དང་འབྲེལ་བའི་གནད་དོན་ཞིག་ཏུ་ངོས་འཛིན་གནང་གི་ཡོད་སྐོར་གསུངས་པ་མ་ཟད་དཀའ་ངལ་དེ་དག་ཚོགས་པ་གཅིག་གམ་གང་ཟག་སྒེར་པ། དེ་མིན་རྒྱལ་ཁབ་སྟོབས་ཆེན་ཁེར་རྐྱང་གི་ངོས་ནས་སེལ་ཐུབ་རྒྱུ་མིན་པར་ང་ཚོས་ཐོག་མར་དཀའ་ངལ་དངོས་ཡོད་པ་ངོས་འཛིན་བྱས་པ་དང་སྦྲགས་ཐུན་མོང་གི་མཉམ་ལས་གནང་ནས་དཀའ་ངལ་ལ་གདོང་ལེན་གནང་དགོས་གལ་ཡིན་སྐོར་བཅས་གསུངས་ཡོད། ཁོར་ཡུག་གི་ལྷན་ཚོགས་དེ་ནི་བོད་ཀྱི་སྲིད་བྱུས་ཉམས་ཞིབ་ཁང་དང་ལྡི་ལིར་རྟེན་གཞི་བྱས་པའི་ Non-Violent Alternatives ཞེས་པའི་ཞི་བདེ་གོང་འཕེལ་ཡོང་ཐབས་ཀྱི་དགེ་རྩ་གཉིས་ཐུན་མོང་གིས་གོ་སྒྲིག་ཞུས་པ་ཞིག་ཡིན་པ་རེད། རྒྱལ་ས་ལྡི་ལིའི་  IIC ཞེས་པའི་རྒྱ་གར་དང་རྒྱལ་སྤྱིའི་ལྟེ་གནས་ཁང་དུ་ཚོགས་པའི་ལྷན་ཚོགས་ཐོག་ Czech སྤྱི་མཐུན་རྒྱལ་ཁབ་ཀྱི་སྲིད་བློན་གཞོན་པ་དང་ཁོར་ཡུག་གི་བློན་ཆེན་བཅས་གནང་མྱོང་ཡོད་པ་སྐུ་ཞབས་ Martin Bursik མཆོག་ནས་ཀྱང་རྒྱ་ནག་གཞུང་གི་ངོས་ནས་གལ་ཏེ་བོད་ཀྱི་ཁོར་ཡུག་ལ་སྲུང་སྐྱོབ་མ་ཞུ་པ་དང་། འབྲོག་པ་ཚོ་རང་སར་མ་བཞག་པ་ཡིན་ན་བོད་ཀྱི་ཁོར་ཡུག་ལ་མ་འོངས་པར་དཀའ་ངལ་ཆེན་པོ་འཕྲད་རྒྱུ་དང་། དེའི་ཤུགས་རྐྱེན་དེ་རིམ་པས་མངོན་རྒྱུ་ཡིན་སྐོར་བཅས་གསུངས་པ་མ་ཟད། ཁོང་སྐུ་སྒེར་གྱི་ངོས་ནས་བོད་མི་ཚོར་མང་གཙོའི་རང་དབང་ལོངས་སུ་སྤྱོད་རྒྱུར་རྒྱབ་སྐྱོར་མུ་མཐུད་ནས་ཞུ་རྒྱུ་ཡིན་ཞེས་སོགས་གསུངས་སོང་།  དེ་རིང་སྔ་དྲོ་ཆུ་ཚོད་ ༡༠ ནས་ཕྱི་དྲོའི་ཆུ་ཚོད་ ༥ བར་གོ་སྒྲིག་ཞུས་པའི་བོད་ཀྱི་ཁོར་ཡུག་དང་འབྲེལ་བའི་ལྷན་ཚོགས་ཐོག་ད་དུང་ཁོར་ཡུག་དང་འབྲེལ་བའི་རྒྱལ་སྤྱིའི་མཁས་དབང་སྐུ་ཞབས་ Ethan Goldings ལགས། Ruth Gamble ལགས། le Anh Tuan ལགས། དེ་བཞིན་རྒྱ་གར་གྱི་སློབ་དཔོན་ Siddiq Wahid ལགས། Milap Chand Sharma ལགས། དེ་བཞིན་ Jayadeva Ranade ལགས་བཅས་ནས་གསུང་བཤད་གནང་ཡོད་པ་མ་ཟད། བོད་མི་ཁོར་ཡུག་ཉམས་ཞིབ་པ་ཁག་གཅིག་བཅས་ཁྱོན་མི་གྲངས་ ༡༢  ནས་གསུང་བཤད་གནང་ཡོད་པ་རེད། ཁོར་ཡུག་གི་ལྷན་ཚོགས་དེའི་ཐོག་གཞན་ཡང་སློབ་ཕྲུག་དང་ཁོར་ཡུག་ཉམས་ཞིབ་པ་མཁས་དབང་སོགས་ཁྱོན་མི་གྲངས་ ༥༠ ལྷག་ཙམ་ཞིག་འདུ་འཛོམས་བྱུང་འདུག འདི་ག་རླུང་འཕྲིན་ཁང་ནས་ཁོར་ཡུག་ལྷན་ཚོགས་གོ་སྒྲིག་གནང་མཁན་བོད་ཀྱི་སྲིད་བྱུས་ཉམས་ཞིབ་ཁང་གི་བསྟན་འཛིན་ལེགས་བཤད་ལགས་སུ་བཅར་འདྲི་ཞུས་པར་དེང་སྐབས་འཛམ་གླིང་ནང་ཁོར་ཡུག་དང་འབྲེལ་བའི་གནད་དོན་ཐོག་མང་ཚོགས་ཀྱི་དོ་སྣང་ཇེ་ཆེར་འགྲོ་བཞིན་པ་དང་བསྟུན། བོད་ཀྱི་ཁོར་ཡུག་གནས་སྟངས་དང་དཀའ་ངལ་བཅས་རྒྱ་གར་གཙོས་པའི་རྒྱལ་སྤྱིའི་ནང་ཕྱིར་བསྒྲགས་ཡོང་ཐབས་གནང་རྒྱུ་དེ་ལྷན་ཚོགས་དེའི་དམིགས་ཡུལ་གཙོ་བོ་ཡིན་པ་སོགས་ཀྱི་ངོ་སྤྲོད་གནང་སོང་།

རྒྱ་གར་གཞུང་གིས་བོད་མི་སྐྱབས་བཅོལ་བ་ཚོར་གནང་བའི་ IC ཞེས་ཕྱི་སྐྱོད་ལག་དེབ་སེར་པོ་གསར་པའི་ཐོག་ NORI ཞེས་རྒྱ་གར་ནང་ཕྱིར་ཕེབས་ཆོག་པའི་ལས་དམ་མེད་པའི་རྐྱེན་གྱིས་ཉེ་ཆར་བོད་མི་མི་ཉུང་བ་ཞིག་ལ་འཇར་མ་ནིར་འགྲུལ་སྐྱོད་ཆོག་པའི་མཐོང་མཆན་མ་རག་པའི་དཀའ་ངལ་འཕྲད་ཡོད་སྟབས་དཀའ་ངལ་དེ་མ་སེལ་བར་དུ་ཡུལ་དེར་མཐོང་མཆན་ཞུ་རྒྱུ་མེད་པའི་ལམ་སྟོན་གནང་འདུག དེའང་བཀའ་དྲུང་ཡིག་ཚང་ནས་དེ་རིང་བོད་མིའི་སྒྲིགས་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པའི་མཚན་ཐོག་ཏུ་བཀོད་ཁྱབ་ཅིག་བཏང་འདུག་པའི་ནང་ཉེ་ཆར་འཇར་མི་ནིའི་གཞུང་ཚབ་ནས་ཕྱི་སྐྱོད་ལག་ཁྱེར་སེར་པོ་གསར་པར་ NORI མེད་རྐྱེན་མཐོང་མཆན་མ་གནང་བའི་གནས་ཚུལ་བྱུང་ཡོད་པ་ལྟར། ལྡི་ལི་སྐུ་ཚབ་དོན་ཁང་གི་ལས་བྱེད་གཞུང་ཚབ་ཏུ་ཆེད་བཅར་གྱིས་ NORI སྐོར་གྱི་གནས་སྟངས་སྙན་གསེང་དང་གྲོས་བསྡུར་གནང་ཡང་གནས་སྐབས་འགྱུར་བ་འགྲོ་འཆར་མེད་ངེས་ལ་སོང་། དཀའ་ངལ་དེ་གཙང་སེལ་མ་བྱུང་བར་དུ་དབུས་བོད་མིའི་སྒྲིག་འཛུགས་ཀྱི་མི་སྣ་གཞུང་འབྲེལ་འཇར་མི་ནིར་ཕྱོགས་སྐྱོད་གནང་འཆར་ཡོད་མཁན་རྣམས་ནས་འཇར་མི་ནིར་མཐོང་མཆན་ཞུ་རྒྱུ་ངང་འཐེན་དགོས་ཞེས་གསལ་འདུག གཞི་རྩའི་ཉེ་ལམ་རྒྱ་གར་ལྷོ་ཕྱོགས་སྦེང་ལོར་དུ་རྟེན་གཞི་བྱས་པའི་བོད་མིའི་ལྷོ་སྤྱི་ལས་ཁུངས་ནས་བརྡ་ཁྱབ་ཅིག་གནང་བའི་ནང་ཉེ་ལམ་ཨ་རི་དང་ཁེ་ན་ཌ་ནང་གཏན་སྡོད་ཆོག་པའི་ལག་ཁྱེར་ཡོད་ཀྱང་ཕྱི་སྐྱོད་སྐབས་ IC ལམ་ཡོངས་གྲགས་སུ་དེབ་སེར་པོ་ཞེས་པ་བེད་སྤྱོད་ཀྱིས་རྒྱ་གར་ལ་ཕེབས་མཁན་བོད་མི་ཁག་གཅིག་གནམ་ཐང་ནས་རང་གནས་སུ་ཕྱིར་ཕེབས་སྐབས་རྒྱ་གར་ནས་ Exit permit ཞེས་ས་གནས་ཕྱི་མི་དེབ་སྐྱེལ་ལས་ཁུངས་ནས་ཕྱིར་ཐོན་ཆོག་པའི་མཐོང་མཆན་ཞུ་མེད་རྐྱེན་ཕྱིར་ཐོན་མ་བཅུག་པའི་དཀའ་ངལ་འཕྲད་ཡོད་པར་བརྟེན་ཕྱི་སྐྱོད་ལག་ཁྱེར་སེར་པོ་བེད་སྤྱོད་གནང་མཁན་ཡིན་ཚེ་རྒྱ་གར་ས་གནས་ཕྱི་མི་དེབ་སྐྱེལ་ལས་ཁུངས་ནས་ཕྱིར་ཐོན་ཆོག་པའི་ཆོག་མཆན་ངེས་པར་དུ་ཞུ་དགོས་པ་མ་ཟད། ཕྱིའི་རྒྱལ་ཁབ་ཁག་ལ་གུང་སེང་དང་སློབ་སྦྱོང་སོགས་ཀྱི་སླད་དུ་སྐྱོད་ཀྱང་ཕྱིར་རྒྱ་གར་དུ་ཕེབས་མཁན་རྣམས་ནས་ཀྱང་ངེས་པར་དུ་རྒྱ་གར་དུ་འཛུལ་ཞུགས་ཆོག་པའི་མཐོང་མཆན་ཞུ་དགོས་པའི་ལམ་སྟོན་གནང་ཡོད་པ་རེད།  

བོད་མིའི་སྒྲིག་འཛུགས་ཀྱི་སྤྱི་ཁྱབ་འཆར་འགོད་འགན་འཛིན་འབུམ་རམས་པ་དཀོན་མཆོག་བརྩོན་འགྲུས་ལགས་དང་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་བཟང་རྡོ་རྗེ་ལགས་རྣམ་གཉིས་ཕྱི་ཟླ་ ༦ ཚེས་ ༢༢ ནས་ཕྱི་ཟླ་ ༧ ཚེས་ ༢༩ བར་ཨ་མི་རི་ཀའི་རྒྱལ་ས་ Washington DC གཙོ་གྱུར་གྲོང་ཁྱེར་ Vancouver དང་ Seattle Portland San Francisco དང་ South California དེ་བཞིན་ Minneapolis New York ཁེ་ན་ཌའི་གྲོང་ཁྱེར་ Toronto བཅས་བོད་རིགས་གནས་སྡོད་བྱེད་སའི་གྲོང་ཁྱེར་ཆེ་ཁག་དགུའི་ནང་གཞུང་འབྲེལ་ཕྱོགས་ཕེབས་གནང་ཡོད་པ་རེད། གཞུང་འབྲེལ་ཕྱོགས་ཕེབས་འདི་བཞིན་གཙོ་ཆེ་ཤོས་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་དགོངས་དོན། བཙན་བྱོལ་བོད་མིའི་སྤྱི་ཚོགས་སྲ་བརྟན་དང་འབྲེལ་བའི་ལས་གཞི་ཆེ་ཁག་གཉིས་ཏེ་གངས་ལྗོངས་དཔལ་འབྱོར་ཞབས་ཞུ་ཁང་དང་། བོད་མིའི་ཁྱད་ལས་དང་བླངས་ཞབས་ཞུ་ཚན་པ་གཉིས་ཀྱི་ལས་གཞིའི་ཐོག་མང་ཚོགས་ལ་གོ་རྟོགས་སྤེལ་ནས་ལས་གཞི་དེ་དག་ནང་མང་ཚོགས་ཚོ་མཉམ་ཞུགས་གང་མང་ཡོང་ཐབས་གནང་རྒྱུ་ཡིན་པ་ལྟར། ཐེངས་འདིའི་འཚམས་གཟིགས་ཁྲོད་བྱང་ཨ་མི་རི་ཀའི་ཁུལ་གྱི་བོད་མི་ ༥༥ ནས་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་གཞིའི་སླད་ཨ་སྒོར་ས་ཡ་གཅིག་མ་འཇོག་གནང་འདུག རླུང་འཕྲིན་ཁང་ནས་བོད་མིའི་སྒྲིག་འཛུགས་ཀྱི་སྤྱི་ཁྱབ་འཆར་འགོད་འགན་འཛིན་དང་གངས་ལྗོངས་དཔལ་འབྱོར་ཞབས་ཞུ་ཁང་གི་འཛིན་སྐྱོང་འགན་འཛིན་འབུམ་རམས་པ་དཀོན་མཆོག་བརྩོན་འགྲུས་ལགས་སུ་སྤྱི་ཡོངས་ནས་ཐེངས་འདིའི་བྱང་ཨ་རི་ནང་གི་འཚམས་གཟིགས་དང་། ལྷག་པར་དུ་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་གཞི་དང་འབྲེལ་བཅར་འདྲི་ཁག་གཅིག་ཞུས་ཡོད།   གཞི་རྩའི་གངས་ལྗོངས་དཔལ་འབྱོར་ཞབས་ཞུ་ཁང་འདི་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་ནས་བཙན་བྱོལ་བོད་མིའི་སྒྲིག་འཛུགས་དང་མང་ཚོགས་སྤྱིའི་དཔལ་འབྱོར་གྱི་རྨང་གཞི་ཡར་རྒྱས་གོང་འཕེལ་དང་སྲ་བརྟན་རྒྱུན་གནས་ཡོང་ཐབས་སུ་ཐོག་མར་རིམ་པ་དང་པོའི་འཆར་གཞི་ཐོག་དཔལ་འབྱོར་ལས་ཁུངས་ཀྱི་ཁྱབ་ཁོངས་སུ་དངུལ་ཁང་ལྟ་བུ་ཞེས་པའི་ལས་གཞིའི་ཐོག་དབུ་འཛུགས་གནང་རྗེས། ཕྱི་ལོ་ ༢༠༡༨ ལོ་འགོར་གངས་ལྗོངས་དཔལ་འབྱོར་ཞབས་ཞུ་ཁང་དེ་རྒྱ་གར་གཞུང་གི་ཁྲིམས་སྒྲིག་ལྟར་ཁེ་ཡོད་ཚོང་འབྲེལ་སྡེ་ཚན་ཁོངས་སུ་དངོས་སུ་དེབ་སྐྱེལ་ལེགས་གྲུབ་བྱུང་ཐུབ་པ་མ་ཟད། ལོ་མཇུག་ཙམ་ལ་ Reserve Bank of India ཞེས་རྒྱ་གར་དངུལ་ཁང་ཆེན་མོ་ནས་དངུལ་བུན་གཡར་སོགས་དང་འབྲེལ་བའི་ལས་གཞི་སྤེལ་ཆོག་པའི་ཁྲིམས་མཐུན་གྱི་ལག་ཁྱེར་བཅས་ཐོབ་སྟེ་བོད་པའི་སུད་ཚོང་དང་རྟ་དྲེལ་ཚོང་ལས་སོགས་ཀྱི་ཐོག་བུན་གཡར་གྱི་ལས་གཞི་རྒྱ་མི་ཆུང་བ་ཞིག་སྤེལ་མུས་རེད།

༸ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་༸སྐྱབས་རྗེ་སྨན་རི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་ཨ་རི་ནང་ཐེངས་དང་པོ་ཆོས་འབྲེལ་གྱི་མཛད་འཆར་སྐྱོང་བཞིན་པ་དང་བསྟུན། ཁ་སང་ Minneapolis ནང་རྟེན་གཞི་བྱས་པའི་གཡས་རུ་བོན་ཚོགས་ཀྱི་རིན་པོ་ཆེ་མཆོག་ལ་ཆེ་བསྟོད་ཀྱིས་དམིགས་བསལ་དགོང་མོའི་གསོལ་སྟོན་འདེགས་འབུལ་ཞུས་འདུག གཡས་རུ་བོན་ཚོགས་ཀྱིས་༸སྐྱབས་རྗེ་སྨན་རི་ཁྲི་འཛིན་མཆོག་ཨ་རིའི་མངའ་སྡེ་མི་ནི་སོ་ཊར་གདན་ཞུས་ཀྱིས་  ཁ་སང་ཚེས་ ༣༠ ཉིན་གཡས་རུ་བོན་ཚོགས་ཀྱིས་གོ་སྒྲིག་འོག་ St. Paul དུ་ཡོད་པའི་ Landmark Centre དུ་༸སྐྱབས་རྗེ་སྨན་རི་ཁྲི་འཛིན་དབུ་བཞུགས་ཐོག་མངའ་སྡེའི་གྲོས་ཚོགས་ཀྱི་སྐུ་ཚབ་ཁག་གཅིག་དང་། བྱང་ཨ་རིའི་སྤྱི་འཐུས་ཚེ་དབང་རིག་འཛིན་ལགས། དེ་བཞིན་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་མི་མང་མཉམ་འཛོམས་ཐོག་གཞས་པ་ཕུར་བུ་རྣམ་རྒྱལ་ལགས་གཙོ་གྱུར་གཞས་པ་དང་གཞས་མ་སོགས་ནས་བོད་ཀྱི་ཐུན་མིན་རིག་གཞུང་འཁྲབ་སྟོན་གནང་ནས་ཕེབས་བསུའི་འཚམས་འདྲི་ཞུས་པ་དང་དགོང་མོའི་གསོལ་སྟོན་འདེགས་འབུལ་ཞུས་འདུག སྐབས་དེར་༸སྐྱབས་རྗེ་སྨན་རི་ཁྲི་འཛིན་མཆོག་གིས་མང་ཚོགས་ལ་ཕན་ཚུན་འཆམ་མཐུན་གནང་དགོས་པ་དང་།  དེ་བཞིན་ཆོལ་ཁ་ཆོལ་ལུགས་ཀྱི་དབྱེ་འབྱེད་མེད་པར་ཚང་མ་མཉམ་གནས་དང་། མཐུན་སྒྲིལ་དམ་ཚིག་གཙང་མ་གནང་དགོས་སྐོར། སྒོས་སུ་དེ་ལྟར་མི་གནང་ཚེ་རང་གཞན་གཉིས་ཀར་ཕན་མེད་ཀྱི་ལས་མ་གཏོགས་གཞན་གང་ཡང་མེད་སྐོར་སོགས་ལམ་སྟོན་བསྩལ་འདུག    གཡས་རུ་བོན་ཚོགས་ཆེད་འཛུགས་གནང་མཁན་བླ་ཁྲིད་མཁན་པོ་ཉི་མ་གྲགས་པ་རིན་པོ་ཆེས་སང་ཉིན་༸སྐྱབས་རྗེ་སྨན་རི་ཁྲི་འཛིན་མཆོག་གཡས་རུ་སྒྲུབ་སྡེར་ཆིབས་བསྒྱུར་གྱིས་མང་ཚོགས་ལ་གསུང་ཆོས་དང་བཀའ་སློབ་བསྩལ་རྒྱུ་དང་བཅས་ཟླ་ ༨ ཚེས་ ༤ བར་དུ་དེ་འབྲེལ་མཛད་རིམ་སྣ་མང་བསྐྱང་རྒྱུ་ཡིན་པ་མ་ཟད། ཟླ་ ༨ ཚེས་ ༤ ཉིན་ས་གནས་བོད་རིགས་སྤྱི་མཐུན་ཚོགས་པའི་རེ་སྐུལ་བཞིན་བོད་ཀྱི་ཆོས་དང་རིག་གཞུང་གི་ངོ་སྤྲོད་དང་བར་དོའི་སྐོར་གསུང་ཆོས་བསྩལ་རྒྱུ་ཡིན་པ་གསུངས་སོང་།  གཞི་རྩའི་༸སྨན་རི་ཁྲི་འཛིན་མཆོག་འདི་ལོའི་ཟླ་ ༥ དང་ ༦ པའི་ནང་ཡོ་རོབ་ཁུལ་དུ་ཆོས་འབྲེལ་བསྐྱངས་པ་དང་།  ཆོས་འབྲེལ་གྱི་མཛད་འཆར་དེའི་ཁྲོད་ཕ་རན་སིའི་རྒྱལ་ས་པེ་རིས་ནང་ཕ་རན་སི་བོད་རིགས་ཚོགས་པའི་རིག་པ་ཆོས་ཚོགས་ཀྱི་ཚོགས་ཁང་དུ་གདན་ཞུས་ཀྱིས་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ཕ་རན་སི་བོད་རིགས་སྤྱི་མཐུན་ཚོགས་པ་ནས་མཎྡལ་རྟེན་གསུམ་འདེགས་འབུལ་ཞུས་པ་དང་སྦྲགས།  ཁུལ་དེའི་གནས་བཞུགས་བོད་མི་རྣམས་ལ་བཀའ་སློབ་དང་རྩ་རླུང་སྒོམ་སྒྲུབ་ཀྱི་བཀའ་ཆོས་གནང་ཡོད་པ་རེད།  དེ་རྗེས་ཨ་རིའི་རྒྱལ་ས་ཝ་ཤིན་ཊོན་ནང་༸ཞབས་སོར་འཁོད་པ་དང་འབྲེལ་རྒྱལ་སྤྱིའི་ལིག་མི་རྐྱའི་བོན་ཚོགས་སུ་ཆིབས་བསྒྱུར་བསྐྱངས་ཡོད།

བྷེལ་འཇམ་བོད་རིགས་ཚོགས་པ་གཙོ་གྱུར་ས་གནས་བོད་པའི་ཚོགས་སྐྱིད་ཁག་བརྒྱད་ཐོུང་ནས་ཉེ་སྔོན་བྷེལ་འཇམ་ནང་བྱུང་བའི་འཁྲུགས་འཛིངས་ཀྱི་གནད་དོན་དེ་ས་གནས་ཀྱི་ཁྲིམས་ལྟར་ཐག་གཅོད་གནང་རྒྱུ་སོགས་ཀྱི་དོན་ཚན་ལྔ་ཅན་སྒྲིག་གཞི་གཏན་འབེབས་ཀྱིས་སྤྱིར་བསྒྲགས་སྤེལ་འདུག ཁ་སང་ཕྱི་ཚེས་ ༢༩ ཉིན་བྷེལ་འཇམ་ཚོགས་སྐྱིད་ཁག་བརྒྱད་ཐོུང་གིས་སྤེལ་བའི་དོན་ཚན་ལྔ་ཅན་གྱི་སྒྲིག་གཞི་གཏན་འབེབས་ཀྱི་སྤྱིར་བསྒྲགས་དེའི་ནང་ཕྱི་ལོ་ ༢༠༡༩ ཟླ་ ༧ ཚེས་༢༠ ཉིན་བོད་རིགས་ན་གཞོན་ཁག་གཅིག་དབར་འཁྲུག་འཛིན་ཤོར་བའི་གནས་དོན་དེ་ཁྲིམས་ལུགས་ལྟར་ཐག་གཅོད་གནང་རྒྱུ་དང། མ་འོངས་པར་རྩེད་འགྲན་སྐབས་འཁྲུགས་འཛིངས་ཤོར་ཚེ་ལོ་གཅིག་རིང་ཡོ་རོབ་རྐང་རྩེད་སྤོ་ལོའི་རྩེད་འགྲན་ནང་མཉམ་ཞུགས་གནང་མི་ཆོག་པ་དང་། སླད་མར་ས་གནས་སུ་ལག་འཛིངས་ཤོར་ཏེ་རྨས་སྐྱོན་ཅི་འདྲ་བྱུང་ཡང་བྷེལ་འཇམ་ཉེན་རྟོག་པ་དང་ཁྲིམས་ལུགས་ལྟར་འགྲོ་དགོས་པ་ལས་ཚོགས་པ་གང་གིས་ཀྱང་རོགས་རམ་དང་འགན་ལེན་གནང་རྒྱུ་མིན་ཞིང། དོན་རྐྱེན་དེ་རིགས་ཀྱི་གནད་དོན་ཆ་ཚང་དོ་བདག་རང་ཉིད་ནས་འགན་ཁུར་དགོས་པ་། འདི་ལོ་འཁྲུགས་འཛིངས་ཤོར་བའི་མི་སྣ་དག་ཕྱི་ལོ་ ༢༠༢༠ ལོའི་རྐང་རྩེད་སྤོ་ལོའི་རྩེད་འགྲན་ནང་ཞུགས་མི་ཆོག་པ་དང། དེ་བཞིན་མ་འོངས་པར་གནད་དོན་དེའི་རིགས་བྱུང་ཡང་འཕྲལ་མར་ས་གནས་ཉེན་རྟོག་པར་རྩིས་སྤྲོད་བྱ་རྒྱུ་ཡིན་ཞེས་བཀོད་འདུག འདི་ག་རླུང་འཕྲིན་ཁང་ནས་དེ་རིང་བྷེལ་འཇམ་བོད་རིགས་ཚོགས་པའི་ཚོགས་གཙོ་ཕུར་བུ་དོན་གྲུབ་ལགས་སུ་བཅར་འདྲི་ཞུས་པར་མ་འོངས་པར་གནད་དོན་དེ་རིགས་བྱུང་ཚེ་ས་གནས་བོད་རིགས་ཚོགས་པ་གཙོ་གྱུར་ཚོགས་སྐྱིད་ཁག་ནས་ད་རེས་གཏན་འབེབས་གནང་བའི་སྒྲིག་གཞི་དོན་ཚན་ལྔ་པོ་དེ་དག་ཐོག་ཤར་སྐྱོད་བྱ་རྒྱུ་རེད་ཅེས་གསུངས་སོང་། རྩ་བའི་ཉེ་ཆར་ཡོ་རོབ་རྒྱལ་ཁབ་བྷེལ་འཇམ་ནང་ས་གནས་བོད་ཀྱི་གཞོན་ལྷན་ཚོགས་ཀྱིས་གོ་སྒྲིག་ཞུས་པའི་རྐང་རྩེད་སྤོ་ལོའི་རྩེད་འགྲན་རྗེས་ཀྱི་མཚན་ཚོགས་གྲུབ་རྗེས་བོད་རིགས་གཞོན་སྐྱེས་འགས་ནང་ཁུལ་དབར་འཁྲུགས་འཛིངས་བྱས་པའི་གནས་ཚུལ་ཞིག་བྱུང་ཡོད་པ་དང། སྐབས་དེར་བོད་རིགས་གཞོན་སྐྱེས་ཁག་གཅིག་ནས་བོད་པའི་གཞོན་སྐྱེས་གཅིག་ལ་རུབ་རྡུང་ཚད་མེད་བྱས་པའི་གནས་ཚུལ་བྱུང་བ་ལྟར་གནད་དེའི་ཐོག་འཛམ་གླིང་ས་ཕྱོགས་ཁག་ཏུ་ཡོད་པའི་བོད་མི་ཚོས་སེམས་འཚབ་ཆེན་པོ་གནང་བ་དང་སྦྲགས་ཏེ་འབྲེལ་ཡོད་ལ་སྐྱོན་བརྗོད་ཤུགས་ཆེ་གནང་བ་མ་ཟད་གདན་དོན་ངེས་པར་དུ་ཉེན་རྟོག་པར་རྩིས་སྤྲོད་ཀྱིས་ཁྲིམས་ཐོག་ལ་བསྐྱལ་དགོས་པའི་དགོངས་འཆར་སོགས་དྲྭ་ལམ་བརྒྱུད་ཆེད་བཏོན་གནང་མཁན་བྱུང་ཡོད་པ་རེད། སྐབས་དེར་གནད་དོན་དེ་བྱུང་རྗེས་བྷེལ་འཇམ་ས་གནས་བོད་རིགས་ཚོགས་པའི་ངོས་ནས་དྲྭ་ལམ་ཐོག་བོད་མི་རྒྱ་ཆེ་མང་ཚོགས་ནས་གནས་ཚུལ་དེའི་ཐོག་འགྲེལ་ལོག་མ་གནང་རོགས་ཞེས་འབོད་སྐུལ་ཀྱི་དོན་ཚན་དྲུག་ཅན་ཡོད་པའི་སྤྱིར་བསྒྲགས་ཤིག་སྤེལ་བ་དང།  དེ་རྗེས་བསྐྱར་དུ་ཉེ་ཆར་གནད་དོན་དེ་དང་འབྲེལ་ནས་བྷེལ་འཇམ་བོད་རིགས་ཚོགས་པ་གཙོ་གྱུར་ས་གནས་གཞོན་ནུ་དང་བེུད་ཚོགས་པ། མདོ་ཁམས་ཆུ་བཞི་སྒང་དྲུག དབུས་གཙང་ཆོལ་ཁ། མདོ་སྨད་ཆོལ་ཁ་། དེ་བཞིན་ཤེས་རབ་སྣང་བྱེད་སློབ་གྲྭ་བཅས་ཚོགས་སྐྱིད་ཁག་བརྒྱད་ཀྱི་འགན་ཡོད་ལས་སྣེ་འཛིན་པ་རྣམས་ལྷན་འཛོམས་ཀྱིས་ཚོགས་འདུ་ཞིག་བསྐོང་ཚོགས་གནང་མཐར་སྒྲིག་གཞི་དོན་ཚན་བརྒྱད་ཅན་གཏན་འབེབས་གནང་བ་ཞིག་ཆགས་ཀྱི་འདུག