༸གོང་ས་མཆོག

ཨ་རིའི་གྲོས་ཚོགས་གོང་མིའི་འཐུས་མི་ཁག་ཅིག་གིས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གི་ཚོགས་གཙོ་སྐུ་ཞབས་ Sam Brownback ལགས་ཀྱི་མཚན་ཐོག་ཏུ་ཞུ་སྐུལ་གྱི་ཕྲག་བྲིས་གནང་ནས་བོད་ནང་གི་ཆོས་ལུགས་རང་དབང་དང་སྒོས་༸གོང་ས་མཆོག་གི་༸སྐུའི་ཡང་སྲིད་ངོས་འཛིན་ཞུ་ཕྱོགས་ཐད་ལ་སྲུང་སྐྱོབ་གནང་རྒྱུའི་རེ་འདུན་བཏོན་འདུག ཁ་ཉིན་ཚེས་ ༡༠ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ Jim Risch ལགས་དང་ Bob Menendez ལགས་སོགས་ཀྱིས་ཞུ་སྐུལ་གྱི་ཕྱག་བྲིས་དེར་གྲོས་ཚོགས་ཀྱི་འཐུས་མི་ Marco Rubio ལགས་སོགས་ཀྱིས་རྒྱབ་སྐྱོར་གནང་ཐོག་ཨ་རིའི་ངོས་ནས་རྒྱལ་སྤྱིའི་སྤྱི་ཚོགས་དང་མཉམ་འབྲེལ་གྱི་ཐོག་ནས་ཇི་ལྟར་བོད་ནང་གི་ཆོས་ལུགས་ཀྱི་རང་དབང་གཅེས་སྲུང་གནང་དགོས་བའི་དོགས་འདྲི་ཞུས་པ་བརྒྱུད་ཆོས་ལུགས་ཀྱི་སྲོལ་རྒྱུན་དེ་སྲིད་གཞུང་གི་བཙན་དབང་དུ་འཆོར་རྒྱུ་མེད་པར་མངོན་གསལ་གནང་འདུགརྒྱལ་སྤྱིའི་བོད་དོན་ལས་འགུལ་ཁང་གིས་གོང་གི་ཞུ་སྐུལ་གྱི་ཕྱག་བྲིས་དེ་བརྒྱུད་ཨ་རིའི་གྲོས་ཚོགས་ཀྱི་འཐུས་མི་དག་གིས་རྒྱ་ནག་གི་དབང་སྒྱུར་འོག་གི་བོད་ནང་གི་ཆོས་ལུགས་རང་དབང་ལ་སྲུང་སྐྱོབ་གནང་རྒྱུ་ནི་ཨ་རིའི་ཕྱི་སྲིད་ཀྱི་དཀྱིལ་སྙིང་དུ་འཛིན་དགོས་པར་བརྗོད་ཡོད་པ་དང་ལྷན་དུ་ཨ་རིའི་རྒྱལ་སྤྱིའི་ཆོས་ལུགས་རང་དབང་ལྷན་ཁང་གི་ཚོགས་གཙོ་སྐུ་ཞབས་ Brownback ལགས་ཀྱིས་ཀྱང་བོད་གནད་དོན་དེར་དོ་སྣང་གནང་དགོས་པ་ཞིག་ཆགས་ཡོད་པར་བརྗོད་འདུག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གིས་ཞུ་སྐུལ་གྱི་ཕྱག་ཡིག་དེ་ནི་ཨ་རིའི་ངོས་ནས་བོད་བརྒྱུད་ནང་བསྟན་གྱི་བླ་སྦྲུལ་ལམ་ལུགས་ལ་རྒྱབ་སྐྱོར་གནང་བཞིན་པའི་མངོན་རྟགས་ཤིག་ཡིན་པ་གསལ་བཤད་ཀྱིས་ཞུ་ཡིག་དེའི་ནང་འཁོད་པ་ལྟར་ཨ་རིའི་ངོས་ནས་བོད་ནང་གི་ཆོས་ལུགས་དད་མོས་དང་བླ་སྤྲུལ་ལམ་ལུགས་ལ་ཐེ་གཏོགས་གནང་ཐབས་མེད་ནའང་། ཨ་རིའི་ངོས་ནས་དུས་རྒྱུན་ནས་ཡིད་ཆེས་ཟབ་མོ་གནང་བཞིན་པ་ཞིག་ནི་ཆོས་ལུགས་དད་མོས་ལ་སྲུང་སྐྱོབ་གནང་རྒྱུ་དེ་ཡིན་སྟབས། བོད་བརྒྱུད་ནང་བསྟན་པ་རྣམས་དང་༸གོང་ས་ཏཱ་ལའི་བླ་མ་མཆོག་གིས་སྲིད་གཞུང་གི་ཐེ་གཏོགས་གང་ཡང་མེད་པར་ཡང་སྲིད་ཀྱི་ལམ་ལུགས་དེ་ཐུགས་ཐག་གཅོད་གནང་དགོས་པར་བཀའ་བསྩལ་བ་ལུང་འདྲེན་གནང་འདུགརྒྱ་ནག་སྲིད་གཞུང་གཙོ་གྱུར་སྲིད་གཞུང་གང་ཞིག་གིས་༸གོང་ས་ཏཱ་ལའི་བླ་མ་མཆོག་གི་ཡང་སྲིད་འདེམས་སྒྲིག་ལ་ཐེ་གཏོགས་གནང་ཚེ་དེ་ནི་གུས་བརྩི་ཆེ་བའི་ཏྭ་ལའི་བླ་མའི་སྒྲིག་འཛུགས་ཀྱི་ཁྲིམས་དབང་སྤྱི་དང་འཛམ་གླིང་གི་ས་ཕྱོགས་གང་སར་ཁྱབ་ཡོད་པའི་ནང་པ་ཡོངས་ཀྱི་ཐོབ་ཐང་འཕྲོག་ཡོད་པར་སྦྲགས་ཏེ། ཨ་རིའི་ནང་དུ་བོད་བརྒྱུད་ནང་བསྟན་གྱི་ཁྲིམས་མཐུན་རང་བཞིན་གྱི་དབུ་ཁྲིད་དང་དགེ་རྒན་མང་པོ་ཞིག་ཡོད་པར་བརྟེན་ཨ་རིའི་སྲིད་གཞུང་གི་ངོས་ནས་ཁོང་རྣམས་ཀྱི་ཆོས་ལུགས་དད་མོས་ཀྱི་མངོན་འདོད་ལ་སྲུང་སྐྱོབ་གནང་རྒྱུ་དེ་ནི་གལ་ཆེན་ཞིག་ཏུ་བརྩི་བཞིན་པ་ལྟར། སྲིད་གཞུང་གི་ཐེ་གཏོགས་མེད་པར་རང་དབང་གི་སྒོ་ནས་ཆོས་ལུགས་དད་མོས་དེ་གཙིགས་སུ་འཛིན་རྒྱུར་གུས་བརྩི་བྱེད་ཀྱི་ཡོད་པར་གསུངས་འདུག ཨ་རིའི་གྲོས་ཚོགས་ཀྱི་འཐུས་མི་དེ་དག་གིས་སྐུ་ཞབས་ Brownback ལགས་ཀྱིས་ཨ་རིའི་སྲིད་གཞུང་དང་རྒྱལ་སྤྱིའི་ཚོགས་སྡེ་ཁག་སྣེ་ཁྲིད་དེ་༸གོང་ས་ཏཱ་ལའི་བླ་མ་མཆོག་གི་༸སྐུའི་ཡང་སྲིད་ངོས་འཛིན་ཞུ་རྒྱུར་པེ་ཅིང་གིས་གཙོ་པའི་སྲིད་གཞུང་གང་གིས་ཀྱང་ཐེ་གཏོགས་མེད་པར་སྲོལ་རྒྱུན་གྱི་ལམ་ལུགས་གཞིར་བཞག་གིས་ངོས་འཛིན་ཞུ་ཐུབ་དགོས་པའི་ནན་སྐུལ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་ Matteo Mecacci ལགས་ཀྱིས་རྒྱ་ནག་གི་དབང་འཛིན་པ་དག་གིས་༸གོང་ས་ཏཱ་ལའི་བླ་མ་མཆོག་གི་ཡང་སྲིད་གཙོ་བོར་གྱུར་པའི་བོད་བརྒྱུད་ནང་བསྟན་སྤྱིའི་བླ་སྤྲུལ་ངོས་འཛིན་གྱི་ལམ་ལུགས་ཀྱི་ཐད་ནས་གོམ་གང་མདུན་སྤོས་ཀྱིས་བཏང་འཛིན་བྱེད་ཐབས་ལ་འབད་བརྩོན་བྱེད་བཞིན་པའི་ཁྲོད་ཨ་རིའི་གྲོས་ཚོགས་གོང་མའི་འཐུས་ཚབ་མི་སྣས་ཐེངས་འདིའི་ཞུ་ཡིག་དེ་ཕུལ་ཡོད་པར་དགའ་བསུ་ཞུས་པ་མ་ཟད་ཨ་རི་ནི་མང་གཙོའི་རྒྱལ་རྒྱལ་ཁབ་ཅིག་ཡིན་པར་བརྟེན་མང་གཙོའི་ཆ་ལག་གི་སྤྱོད་སྒོ་ཡོངས་སུ་ཚང་བའི་ཐོག་རྒྱལ་ཁབ་ཕྱི་ནང་གི་ཁྲིམས་སྒྲིག་དང་ཨ་རིའི་ཀུན་སྤྱོད་ཀྱི་རིན་ཐང་གཞིར་བཟུང་གིས་བོད་མི་དག་གི་ཆོས་ལུགས་ཀྱི་གནང་སྒོས་མཚོན་པའི་སྤྱི་ཡོངས་ཀྱི་ཆོས་ལུགས་དད་མོས་ཀྱི་རང་དབང་ལ་བརྩི་སྲུང་དང་གོང་སྤེལ་གནང་རྒྱུ་དེ་གལ་ཆེན་པོ་རེད་ཅེས་གསུངས་འདུག  

བལ་ཡུལ་རྒྱལ་ཡོངས་གསར་ཁང་ Rastriya Samachar Samiti ཞེས་པའི་ཨིན་ཇིའི་སྡེ་ཚན་གྱི་གསར་འགོད་པ་ Mohani Risal ལགས་དང་ Somnath Lamichhanne ལགས། དེ་བཞིན་ Jivan Bhandar ལགས་བཅས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་སྐོར་ལ་གནས་ཚུལ་སྤེལ་བར་བརྟེན། བལ་ཡུལ་གཞུང་གིས་བཀོད་ཁྱབ་བཏང་འོག་གསར་འགོད་པ་གསུམ་གྱིས་གནས་ཚུལ་དེ་ལྟར་སྤེལ་བའི་རྒྱུ་མཚན་དང་ཕུགས་ཀྱི་དམིགས་ཡུལ་གང་ཡིན་སོགས་ཀྱི་ཐད་འདྲི་རྩད་བྱས་འདུགཁ་སང་བལ་ཡུལ་གྱི་ Kathmandu Post གསར་ཁང་གི་དྲྭ་གནས་ཐོག་གནས་ཚུལ་སྤེལ་བར་ཟླ་ ༤ ཚེས་ ༢༧ ཉིན་བལ་ཡུལ་གྱི་གསར་འགོད་པ་གསུམ་པོ་དེ་དག་གིས་གསར་ཁང་དེའི་བརྒྱུད་ལམ་ཐོག་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡིར་༸སྐུའི་འཕྲོད་བཞེས་ཀྱི་སྨན་བཅོས་ཁག་ལེགས་གྲུབ་བྱུང་ནས་༸སྐུ་ཁམས་དྭངས་སྐྱེད་ཧ་ཅང་ཡག་པོ་བྱུང་ཡོད་པ་དང་། ལྷག་པར་དུ་མགོན་པོ་༸གང་ཉིད་མཆོག་ལྡི་ལི་ནས་བཞུགས་སྒར་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་མཚམས་སུ་གསར་འགོད་པའི་བཀའ་འདྲིར་བཀའ་ལན་བསྩལ་སྐབས་ཉེ་སྔོན་མགོན་པོ་༸གང་ཉིད་མཆོག་ལ་སྙུན་གཞི་ལྗིད་པོ་བཞེས་ཡོད་ཀྱང་། ད་ལྟ་མགོན་པོ་མཆོག་༸སྐུ་ཁམས་ཧ་ཅང་དྭངས་སྐྱེད་སངས་དྲག་བྱུང་སྟབས་མཛད་དཀའ་གང་ཡང་མི་འདུག་ཅེས་བཀའ་བསྩལ་བའི་གནས་ཚུལ་ཁག་ཞིབ་རྒྱས་སྤེལ་ཡོད་སྟབས། བལ་ཡུལ་གྱི་དྲིལ་བསྒྲགས་དང་འགྲིམ་འགྲུལ་བློན་ཆེན་ Gokul Baskota ལགས་ཀྱིས་གསར་འགོད་པ་གསུམ་ལ་འདྲི་རྩད་གནང་དགོས་པའི་བཀོད་ཁྱབ་བཏང་ཡོད་པ་ཆེད་བཀོད་གནང་འདུགKathmandu Post གསར་ཁང་ནས་དྲིལ་བསྒྲགས་དང་འགྲིམ་འགྲུལ་བློན་ཆེན་ Gokul Baskota ལགས་སུ་གསར་འགོད་པར་འདྲི་རྩད་གནང་དགོས་དོན་སྐོར་བཀའ་འདྲི་ཞུས་པར་བོད་དང་༸གོང་ས་མཆོག་གི་གནས་ཚུལ་རྣམས་རྒྱ་ནག་གི་ཚོར་སྣོའི་གནད་དོན་ཞིག་ཆགས་ཀྱི་ཡོད་སྟབས། བལ་ཡུལ་རྒྱལ་ཡོངས་གསར་ཁང་ནས་བོད་དང་༸གོང་ས་མཆོག་གི་སྐོར་གནས་ཚུལ་སྤེལ་བ་དེ་ནི་བལ་ཡུལ་གཞུང་ནས་ངོས་ལེན་བྱེད་བཞིན་པའི་རྒྱ་ནག་གཅིག་གི་སྲིད་བྱུས་དང་འགལ་ཟླ་ཆགས་ཀྱི་ཡོད་པ་མ་ཟད། ལྷག་པར་དུ་ཐེངས་འདིའི་གནས་ཚུལ་སྤེལ་སྐབས་སུ་བལ་ཡུལ་གྱི་སྲིད་འཛིན་ Bidhya Devi Bhandari ལགས་རྒྱ་ནག་ཏུ་འཚམས་འཟིགས་གནང་བཞིན་པར་དོ་ཕོག་མི་ཐེབས་ཆེད་གསར་འགོད་པ་གསུམ་པོར་འདྲི་རྩད་བྱས་ཡོད་སྐོར་གསུངས་འདུག འོན་ཀྱང་བལ་ཡུལ་རྒྱལ་ཡོངས་ཀྱི་གསར་ཁང་ Rastriya Samachar Samiti ནང་ལ་ཕྱག་ལས་གནང་མཁན་མི་ཉུང་བ་ཞིག་ནས་བློན་ཆེན་ Gokul Baskota ལགས་ཀྱིས་ཐག་གཅོད་གནང་བ་དེ་ནི་བལ་ཡུལ་གྱི་རྒྱལ་ས་ Kathmandu ནང་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་ཀྱི་གནོན་ཤུགས་ལ་བརྟེན་ནས་བྱུང་བ་ཞིག་ཡིན་སྐོར་དང་། གཞན་ཁག་གཅིག་གིས་བལ་ཡུལ་ནང་ཁུལ་གྱི་ཆབ་སྲིད་གནད་དོན་རྐྱེན་པས་ད་རེས་ཀྱི་གནས་ཚུལ་དེ་བྱུང་བ་རེད་ཅེས་སོགས་གསུངས་འདུགལྷག་པར་དུ་འབྲེལ་ཡོད་གསར་འགོད་པ་ Mohani Risal ལགས་དང་ Somnath Lamichhanne ལགས། དེ་བཞིན་ Jivan Bhandar ལགས་བཅས་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་གནང་སྟངས་དེ་བལ་ཡུལ་མི་མང་གིས་གཙོས་པའི་རྒྱལ་སྤྱིའི་མང་ཚོགས་ལ་གལ་ཆེན་པོ་ཆགས་ཡོད་སྟབས་༸སྐུའི་འཕྲོད་བཞེས་དང་འབྲེལ་བའི་གནས་ཚུལ་བདེན་པ་རྣམས་ཕྱོགས་བསྒྲིགས་ཀྱིས་སྤེལ་བ་ཡིན་ཞེས་གསལ་བཤད་འདུག གཞི་རྩའི་བལ་ཡུལ་གྱི་དྲིལ་བསྒྲགས་དང་འགྲིམ་གྲུལ་བློན་ཆེན་ Gokul Baskota ལགས་ཀྱིས་བཀོད་ཁྱབ་བཏང་བ་ལྟར་བལ་ཡུལ་རྒྱལ་ཡོངས་གསར་ཁང་ Rastriya Samachar Samiti ཡི་འགན་འཛིན་ལྷན་ཚོགས་ཀྱི་ཚོགས་མི་ Dilliram Bhattarai ལགས་ནས་སྣེ་ཁྲིད་གནང་ཐོག་གསར་འགོད་པ་གསུམ་ལ་འདྲི་རྩད་གནང་ཡོད་པ་དང་། ད་ལྟའི་ཆར་གསར་འགོད་པ་གསུམ་ལ་མཐའ་མའི་ཐག་གཅོད་གང་གནང་ཡོད་མེད་གསལ་ཁ་གང་ཡང་མེད་པ་རེད།  

ཨུ་རུ་སུའི་ཁྱབ་ཁོངས་སོག་རིགས་དད་ལྡན་མང་ཚོགས་ནས་ཇི་ལྟར་གསོལ་འདེབས་ཞུས་དོན་ལྟར་ཟླ་བ་འདིའི་ཚེས་ ༡༠ ནས་ ༡༢ བར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་མོ་མཆོག་གིས་བཀའ་ཆོས་ཁག་ལེགས་གྲུབ་མཛད་པ་དང་བསྟུན། ཨུ་རུ་སུའི་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་༸གོང་ས་མཆོག་གི་༸སྐུའི་འཕྲོད་བཞེས་དང་དགུང་ནའི་བབ་ཀྱི་ཆ་ནས་སླད་མར་རིན་པོ་ཆེ་༸སྐུ་ཉིད་ཀྱི་ངོས་ནས་ཨུ་རུ་སུའི་ནང་པ་ཚོའི་སླད་དུ་བཀའ་ཆོས་བསྩལ་གནང་ཡོང་བའི་སྐྱབས་འཇུག་གསོལ་འདེབས་ཞུ་རྒྱུ་མཐའ་མ་དེ་ཡིན་ཞེས་གསུངས་སོང་།བཞུགས་སྒར་དུ་ཟླ་ ༥ ཚེས་ ༡༠ དང་ ༡༡ བཅས་ཉིན་གཉིས་ཀྱི་རིང་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱུད་བླ་མ་དང་ལམ་གཙོ་རྣམ་གསུམ་གྱི་བཀའ་ཁྲིད་བསྩལ་བ་དང་། བཀའ་ཆོས་ཀྱི་ཉིན་མཐའ་མ་སྟེ་ཁ་སང་ཕྱི་ཚེས་ ༡༢ ཉིན་༸གོང་ས་མཆོག་གིས་ཨུ་རུ་སུའི་སོག་རིགས་གཙོས་པའི་སེར་སྐྱ་མང་ཚོགས་ཡོངས་ལ་མཇུག་ཏུ་དགེ་བ་སེམས་བསྐྱེད་ཀྱི་སྡོམ་པ་འབོག་ཆོག་བཀྲིན་བསྩལ་ཡོད་པ་རེད།སྐབས་དེར་མགོན་པོ་མཆོག་གིས་ཆོས་ཞུ་བ་ཚོར་བྱང་ཆུབ་ཀྱི་སེམས་ངོ་སྤྲོད་བསྩལ་བ་དང་འབྲེལ། བདེ་སྐྱིད་ཅེས་པ་ནི་གཞན་ཕན་གྱི་བློ་ལ་བརྟེན་ནས་ཡོང་བ་ཞིག་ཡིན་པ་དང་། བདག་ལས་གཞན་གཅེས་བའི་བྱང་ཆུབ་ཀྱི་སེམས་དེ་ཉམས་ལེན་ཡག་པོ་ཞིག་མ་བྱུང་ཚེ་མངོན་མཐོ་དང་ངེས་ལེགས་ཀྱི་གོ་འཕང་ཐོབ་རྒྱུ་དཀའ་བ་མ་ཟད་འཛམ་གླིང་འདིའི་སྟེང་དུ་རྙོག་གྲ་ཤ་སྟག་བཟོ་ནས་བསྡད་ཀྱི་ཡོད་པ་དང་། ད་ཆ་མིའི་ལུས་རྟེན་ཐོབ་ནས་སངས་རྒྱས་པའི་བསྟན་པ་དང་མཇལ་རྒྱུའི་གོ་སྐབས་ཡོད་སྟབས། བདག་ལས་གཞན་གཅེས་བའི་བྱང་ཆུབ་ཀྱི་སེམས་དེ་ཉམས་ལེན་གནང་དགོས་གལ་ཡིན་པར་ལམ་སྟོན་བསྩལ་སོང་།༸གོང་ས་མཆོག་གིས་མགོན་པོ་༸གང་ཉིད་མཆོག་ཐེངས་འདིའི་སེམས་བསྐྱེད་ཀྱི་སྡོམ་པ་བསྩལ་མཁན་གྱི་བླ་མ་ཆགས་ཀྱི་ཡོད་པར་བཀའ་བསྩལ་དང་སྦྲགས། མགོན་པོ་མཆོག་དགུང་ལོ་ ༡༢ ནས་ ༡༣ ལ་ཕེབས་སྐབས་སྟོང་ཉིད་ཀྱི་ལྟ་བར་ཐུགས་སྣང་ཆེན་པོ་མཛད་ཡོད་པ་དང་། དེ་ནས་ཕྱིས་སུ་རྒྱ་གར་ལ་ཕེབས་ནས་སྤྱོད་འཇུག་དབང་ལུང་ཞུས་ཏེ་དེར་ཐུགས་བཞེས་མཛད་སྐབས་རིམ་པས་བདག་ལས་གཞན་གཅེས་པའི་བྱང་ཆུབ་ཀྱི་སེམས་དེ་ཐུགས་རྒྱུད་དུ་འཁྲུངས་བདེ་པོ་ཆགས་སྐོར་བཀའ་བསྩལ་ཡོད།ཨ་རུ་སུའི་ནང་པ་ཚོའི་ངོས་ནས་ལོ་ལྟར་༸གོང་ས་མཆོག་ལ་བཀའ་ཆོས་བསྩལ་གནང་ཡོང་བའི་སྐྱབས་འཇུག་གསོལ་འདེབས་ཞུ་བཞིན་ཡོད་པ་དང། སྤྱི་ཡོངས་ཀྱི་ཆ་ནས་གསུང་ཆོས་གོ་སྒྲིག་ཞུས་སྐབས་བར་ཆད་གང་ཡང་མེད་པར་ཚགས་ཚུད་བྱུང་བ་ནི་གྲུབ་འབྲས་བཟང་པོ་ཞིག་ལ་ངོས་འཛིན་གནང་བཞིན་ཡོད་པ་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས་གསུངས་སོང་།འོན་ཀྱང་རིན་པོ་ཆེ་མཆོག་གིས་༸གོང་ས་མཆོག་གི་༸སྐུའི་འཕྲོད་བཞེས་དང་དགུང་ནའི་བབ་ཀྱི་ཆ་ནས་སླད་མར་རིན་པོ་ཆེ་༸སྐུ་ཉིད་ཀྱི་ངོས་ནས་ཨུ་རུ་སུའི་ནང་པ་ཚོའི་སླད་དུ་བཀའ་ཆོས་བསྩལ་གནང་ཡོང་བའི་སྐྱབས་འཇུག་གསོལ་འདེབས་ཞུ་རྒྱུ་མཐའ་མ་དེ་ཡིན་ཞེས་གསུངས་ཡོད།ཐེངས་འདིའི་བཀའ་ཆོས་ཐོག་ཆེད་བཅར་ཞུས་པའི་ཆོས་ཞུ་བ་ཁག་གཅིག་ལ་ཉིན་གསུམ་གྱི་བཀའ་ཆོས་གང་འདྲ་བྱུང་མིན་སྐོར་བཅར་འདྲི་ཞུས་པར་ཚོར་བ་དགའ་སྐྱོ་ཟུང་འབྲེལ་གྱི་ཐོག་ནས་༸སྐུའི་འཕྲོད་བཞེས་དྭངང་སྐྱེད་ཡོང་བའི་སྨོན་ལམ་ཞུ་བཞིན་འདུགརྩ་བའི་༸དཔལ་ལྡན་དགའ་ལྡན་ཕོ་བྲང་གི་དྲྭ་གནས་ཐོག་མཛད་འཆར་བཀོད་པར་གཞིགས་ན། ཟླ་བ་འདིའི་ཕྱི་ཚེས་ ༡༧ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆོལ་གསུམ་ཆོས་བརྒྱུད་དང་བཅས་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸རྒྱལ་མཆོག་ལྔ་པ་ཆེན་པོའི་དག་སྣང་གསང་བ་རྒྱ་ཅན་གྱི་ཆོས་ཚན་ཁོངས་བཞུགས་ཚེ་དཔག་མེད་དྭགས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་རེད་འདུག

ཁ་སང་ཕྱི་ཟླ་ ༥ ཚེས་ ༡༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷོ་ཨ་ཕི་རི་ཀའི་རྒྱལ་ཡོངས་འོས་བསྡུ་ཆེན་མོའི་ཁྲོད་ ANC ཞེས་སྲིད་འཛིན་སྐུ་ཞབས་ Cyril Ramaphosa མཆོག་གི་ཆབ་སྲིད་ཚོགས་པར་རྒྱལ་ཁ་ཐོབ་པར་འཚམས་འདྲིའི་གསུང་འཕྲིན་ཞིག་བསྩལ་འདུག༸གོང་ས་མཆོག་གིས་འཚམས་འཕྲིན་དེའི་ནང་ལྷོ་ཨ་ཕི་རི་ཀར་མཚོན་ན་ཡར་རྒྱས་དང་གོང་འཕེལ་གྱི་ཕྱོགས་སུ་བསྐྱོད་རྒྱུར་ནུས་པ་ལྡན་ཡོད་པ་གཟིགས་ཚུལ་བྱུང་ཞེས་བཀའ་བསྩལ་བ་དང་འབྲེལ། ལྷོ་ཨ་ཕི་རི་ཀའི་མི་རིགས་ནི་ཞི་བདེ་དང་མང་གཙོ། དྲང་བདེན་སོགས་ལ་ཕྱག་ལས་ལྷོད་མེད་གནང་མཁན་ཞིག་ཡིན་སྟབས། སྲིད་འཛིན་མཆོག་གི་དབུ་ཁྲིད་ལམ་སྟོན་འོག་ལྷོ་ཨ་ཕི་རི་ཀའི་རྒྱལ་ཁབ་དེ་མུ་མཐུད་ཡར་རྒྱས་དང་གོང་འཕེལ་གྱི་ཕྱོགས་སུ་མདུན་སྐྱོད་ཐུབ་པ་མ་ཟད། སྤྱི་ཚོགས་ཁྲོད་ཆེས་ཉམ་ཐག་རྣམས་ཀྱི་འཚོ་བར་ཡར་རྒྱས་གནང་ཐུབ་པར་ཐུགས་རེ་མཛད་བཞིན་ཡོད་པར་བཀའ་བསྩལ་འདུག༸གོང་ས་མཆོག་གིས་སྲིད་འཛིན་མཆོག་ནས་མང་ཚོགས་ཀྱི་བསམ་བློའི་ནང་ཕུགས་ལ་བཟང་ཕྱོགས་ཀྱི་འགྱུར་བ་ཡོང་བའི་རེ་བ་དང་ཡིད་ཆེས་འཕེལ་བ་ཞིག་བཟོ་ཐུབ་པ་དང་། ལྷག་པར་དུ་རྒྱལ་ཁབ་གཞན་ཚོས་ཀྱང་དམིགས་དཔེ་བྱ་འོས་པ་ཞིག་གནང་དགོས་གལ་ཡིན་པར་ལམ་སྟོན་བསྩལ་འདུག སྲིད་འཛིན་མཆོག་གི་ལས་ཡུན་གཉིས་པའི་ནང་འབྱུང་འགྱུར་ངལ་བ་རྣམས་ལ་གདོང་ལེན་གྱིས་བྱ་གཞག་ཐམས་ཅད་ལམ་ལྷོངས་ཡོང་བ་དང་ལྷོ་ཨ་ཕི་རི་ཀའི་མི་མང་གི་མངོན་འདོད་རྣམས་བསྒྲུབ་ཐུབ་པའི་ཐུགས་སྨོན་བཅས་མཛད་འདུག    

ཁ་སང་ཞོགས་པར་ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གིས་གོ་སྒྲིག་ཞུས་པའི་རྒྱ་ནག་ཉན་ཞིབ་ཀྱི་ཚོགས་འདུ་རིམ་པ་གཉིས་གནང་སྟེ་ཨ་རིས་མི་ལོ་ ༤༠ རིང་རྒྱ་ནག་གི་ཐོག་འཛིན་པའི་ཐབས་བྱུས་དང་། ཨ་རི་དང་ཨེ་ཤ་ཡའི་མངའ་ཁུལ་དུ་འཕེལ་བཞིན་པའི་རྒྱ་ནག་གི་ཤུགས་རྐྱེན་ཞེས་པའི་བརྗོད་གཞིའི་ཐོག་བགྲོ་གླེང་དང་དྲི་བ་དྲིས་ལན་གནང་འདུག ཉན་ཞིབ་ལས་རིམ་དེའི་ཐོག་ཨ་རིའི་ཕྱི་འབྲེལ་ལས་དོན་དང་རྒྱལ་སྤྱིའི་འབྲེལ་ལམ་གྱི་སྲིད་བྱུས་ཐོག་ཞིབ་འཇུག་གནང་མཁན་ Council of Foreign relations ཞེས་པའི་ཨ་རིའི་ཕྱི་འབྲེལ་ལྷན་ཚོགས་ཀྱི་ཨེ་ཤ་ཡའི་སྡེ་ཚན་གྱི་ངེས་སྟོན་པ་ལྕམ་སྐུ་ Elizabeth economy ལགས་ཆེད་ཕེབས་གནང་ཡོད་པ་ལྟར་གྲོས་ཚོགས་འཐུས་མི་སྐུ་ཞབས་ Andy Levin ལགས་ཀྱིས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་སྐོར་དང་འབྲེལ་བོད་ནང་གི་གནད་དོན་གྱི་ཐོག་ལ་བཀའ་འདྲི་ཞུས་པར་ལྕམ་སྐུ་མཆོག་གིས་རྒྱ་ནག་གི་དམ་དྲག་འོག་ཏུ་བོད་ཀྱི་ཆོས་དང་རིག་གཞུང་ཉམས་ཉེས་ཤུགས་ཆེར་འགྲོ་བཞིན་པའི་ཁྲོད་རྒྱ་གཞུང་གིས་༸སྐུའི་ཡང་སྲིད་ཀྱི་གནད་དོན་ལ་ཐེ་གཏོགས་བྱས་ཏེ་མ་འོངས་པར་༸གོང་ས་མཆོག་གི་༸སྐུའི་ཡང་སྲིད་ཞིག་བསྐོ་གཞག་བྱས་ཚེ་བོད་ཀྱི་ཆོས་རིག་ཉམས་ཉེས་སུ་འགྲོ་བཞིན་པ་དེར་འགལ་རྐྱེན་ལྷག་མ་ཞིག་ཏུ་འགྱུར་རྒྱུ་ཡིན་པ་མངོན་གསལ་གནང་ནས་ཡི་ཤུའི་བླ་ཆེན་པོབ་མཆོག་གིས་དབུས་པའི་འཛམ་གླིང་གི་ཆོས་དཔོན་རྣམས་ཁྲིམས་མཐུན་གྱིི་ཐོག་ནས་ཕྱིར་ཐོན་ཏེ་རྒྱ་ནག་དང་མཉམ་དུ་བོད་ནང་གི་ཆོས་རིག་གནས་བབ་ཐོག་བཀའ་མོལ་གནང་དགོས་གལ་ཡིན་པའི་འབོད་སྐུལ་གྱི་ལན་འདེབས་གནང་འདུགདེ་བཞིན་ཚོགས་གཙོ་མཆོག་གིས་རྒྱ་ནག་གིས་ཤིན་ཅང་ནང་དམ་དྲག་བྱེད་བཞིན་པའི་གནས་བབ་དེ་ཛ་དྲག་ཡིན་པར་བརྗོད་དེ་བོད་མི་དག་གི་གནས་སྟངས་ཡང་རྒྱ་ནག་གི་དབང་འོག་ཏུ་དེ་ལྟར་འགྱུར་ཉེན་ཡོད་པ་ཡོངས་གྲགས་གནང་འདུག རྩ་བའི་ཟླ་བ་སྔོན་མའི་ནང་ཨ་རིའི་གྲོས་ཚོགས་གོང་མའི་ཕྱི་འབྲེལ་ཚོགས་ཆུང་གིས་ཨེ་ཤ་ཡའི་མངའ་ཁུལ་གྱི་གནད་དོན་ཐོག་ཉན་ཞིབ་ཀྱི་ཚོགས་འདུ་ཞིག་བསྡུས་ཡོད་པ་དང་། སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་ལགས་ཀྱིས་༸གོང་ས་མཆོག་གི་༸སྐུའི་ཡང་སྲིད་ཀྱི་སྐོར་དང་རྒྱ་ནག་ནང་གི་ཕྱི་རྒྱལ་གྱི་གསར་འགོད་པའི་བོད་དོན་གྱི་ཐོག་འདོན་སྤེལ་གནང་བའི་སྙན་ཐོ། དེ་བཞིན་ཡོ་རོབ་བོད་དོན་རྒྱབ་སྐྱོར་བས་ཨ་རིའི་གྲོས་ཚོགས་ཀྱིས་གཏན་འབེབས་གནང་བའི་བོད་ནང་རང་དབང་ཐོག་ཕར་འགྲོ་ཚུར་ཡོང་གི་ཁྲིགས་གཞི་ལ་རྒྱབ་སྐྱོར་གནང་རྒྱུ་སོགས་ཀྱི་ཐད་ནས་གསུང་བཤད་གནང་རྗེས་ཕྱི་འབྲེལ་ཚོགས་ཆུང་གི་ཚོགས་གཙོ་སྐུ་ཞབས་ Cory Gardner ལགས་ཀྱིས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་དེ་གསལ་པོ་གནང་ན་མ་གཏོགས་ཨ་རིའི་གྲོས་ཚོགས་ཀྱི་ངོས་ནས་ནམ་ཡང་རྒྱ་ནག་གིས་བདམས་པའི་༸གོང་ས་མཆོག་གི་༸སྐུའི་ཡང་སྲིད་ལ་ངོས་ལེན་མེད་པའི་བསྒྲགས་གཏམ་སྤེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ཕྱི་ཚེས་  ༦ ཉིན་སྔ་དྲོ་བཞུགས་སྒར་༸རྒྱལ་བའི་ཕོ་བྲང་དུ་རྒྱ་གར་དང་ཝི་ཏི་ནམ། དེ་བཞིན་ཨུ་རུ་སུའི་ནས་ཆེད་བཅར་ཞུས་པའི་ཚོང་ལས་མགོ་ཁྲིད་དང་ཆེད་ལས་མི་སྣ་ ༩༨ ཙམ་ལ་མཇལ་ཁ་བསྩལ་བ་དང་སྦྲགས། སྐབས་དེར་མི་གང་ཟག་ཅིག་གི་མི་ཚེའི་དགོས་དོན་གཙོ་བོ་དེ་གཞན་ཕན་སྒྲུབ་རྒྱུ་ཡིན་པར་བཀའ་བསྩལ་འདུག༸གོང་ས་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་རྒྱ་གར་ནས་ཆེད་བཅར་བའི་ཚོང་ལས་མགོ་ཁྲིད་དང་ཆེད་ལས་པ་ ༣༥ དང་ཝེ་ཊི་ནམ་ནས་ ༤༥ དེ་བཞིན་ཨུ་རུ་སུ་ནས་ ༡༨ བཅས་ཁྱོན་མི་གྲངས་ ༩༨ ལ་དམིགས་བསལ་མཇལ་ཁ་དང་བཀའ་སློབ། དེ་བཞིན་བཀའ་འདྲི་དགོངས་སྐོར་ཞུས་པར་བཀའ་ལན་བཅས་བསྩལ་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་གིས་མི་གང་ཟག་སྒེར་ཞིག་གི་དགོས་དོན་གཙོ་བོ་དེ་གཞན་ཕན་གང་ཐུབ་ཐུབ་བསྒྲུབ་རྒྱུ་ཡིན་པ་དང། མགོན་པོ་མཆོག་གིས་ཉིན་རེའི་༸སྐུ་ཚེ་ནང་དུའང་སྐུ་གསུང་ཐུགས་གསུམ་གྱི་སྒོ་ནས་གཞན་ཕན་སྒྲུབ་རྒྱུར་ཐུགས་བརྩོན་མཛད་སྐོར་དང་འབྲེལ། དེ་ནི་ཆོས་ཀྱི་གོ་དོན་ངོ་མ་རེད་དམ་ཞེས་བཀའ་འདྲི་གནང་བ་དང་འབྲེལ། ༸གོང་ས་མཆོག་རྒྱ་གར་གྱི་གནའ་བོའི་རིག་གནས་ཀྱི་སློབ་མ་ཞིག་ཡིན་པ་ལྟར་༸སྐུ་ན་ཕྲ་མོའི་དུས་ནས་རྒྱ་གར་གྱི་དཔལ་ནཱ་ལེནྡཱའི་ལྟ་གྲུབ་དང་ཕྱག་དཔེ་ཁག་ལ་བསླབ་པ་སློབ་གཉེར་མཛད་རྗེས་རྒྱུ་མཚན་དང་ཞིབ་འཇུག་གི་ལམ་ནས་དགོངས་དཔྱད་གནང་བས་ཐུགས་ལ་ཞི་བདེ་སྐྲུན་པར་ཧ་ཅང་ཐུགས་ཕན་གསོས་པོ་འདུག་ཅེས་བཀའ་བསྩལ་བ་དང་ཆབས་ཅིག་ཏུ་རྒྱ་གར་གྱི་གཞོན་སྐྱེས་ཁྱེད་རང་ཚོས་རང་རྒྱལ་ཁབ་ཀྱི་ཐུན་མིན་གནའ་བོའི་རིག་གནས་དག་ལ་སློབ་གཉེར་གནང་དགོས་ཞེས་ལམ་སྟོན་མཛད་འདུགམགོན་པོ་༸གང་ཉིད་མཆོག་ལ་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་བསྩལ་བའི་ཁྲོད་ཚོང་གི་ལས་རིགས་ནང་གྲུང་པོ་གནངརྒྱུ་གལ་ཆེན་པོ་ཡིན་ཀྱང་། དྲང་པོ་གནང་རྒྱུ་དེ་བས་ཀྱང་གནད་ཆེ་བ་མ་ཟད་དྲང་པོ་གནང་བ་ཡིན་ན་མི་གཞན་ནས་རང་ལ་ཡིད་ཆེས་གནང་བ་དང་མཛའ་གྲོགས་ཇེ་མང་དུ་འགྲོ་ངེས་ཡིན་སྐོར་སོགས་བཀའ་ལན་བསྩལ་ཡོད་པ་རེད།དེ་བཞིན་མགོན་པོ་མཆོག་གིས་དེང་སྐབས་གོ་ལའི་ཁྲོད་རྙོག་གྲ་བཟོ་མཁན་ཤུགས་ཆེ་བ་སློབ་སྦྱོང་ཡག་པོ་ཡོད་མཁན་ཤ་སྟག་ཆགས་ཡོད་སྐོར་དང་འབྲེལ། དེ་ནི་ཁོང་ཚོར་ནང་སེམས་དང་བཟང་སྤྱོད་ཀྱི་སློབ་སྦྱོང་མེད་པའི་རྐྱེན་གྱིས་དེ་ལྟར་ཡོང་གི་ཡོད་པ་ལྟར། དེང་སྐབས་དགོན་པ་དང་ཆོས་ཀྱི་སློབ་སྦྱོང་ཐོག་ནས་མིན་པར་ང་ཚོའི་ཤེས་ཡོན་སློབ་གསོའི་ནང་བཟང་སྤྱོད་ཀྱི་སློབ་ཚན་ངེས་འཇོག་དགོས་གལ་ལྟར་དེང་གི་ཤེས་ཡོན་སློབ་གསོའི་ནང་ནང་སེམས་ཀྱི་ཞི་བདེ་བསྐྲུན་རྒྱུའི་ཐོག་སློབ་སྦྱོང་གནང་དགོས་གལ་ཡིན་པར་བཀའ་བསྩལ་འདུགལྷག་པར་དུ་༸གོང་ས་མཆོག་གིས་ཝེ་ཏི་ནམ་དང་ཨུ་རུ་སུ་གཉིས་ལོ་རྒྱུས་ཀྱི་ཐོག་ནས་བོད་ཀྱི་ཆོས་དང་རིག་གཞུང་དང་འབྲེལ་བ་ཡོད་མཁན་ཞིག་ཡིན་སྟབས་དཔལ་ནཱ་ལེནྡཱེའི་གནའ་བོའི་རིག་གནས་ཐོག་སྦྱང་བརྩོན་གནང་དགོས་གལ་ཡིན་པ་དང་། དེའི་ཁོངས་ནས་ནང་སེམས་ཀྱི་བདེ་སྐྱིད་དང་ཚོར་བའི་སྐོར་ལ་སློབ་སྦྱོང་གནང་གལ་ཡིན་སྐོར་བཀའ་བསྩལ་བ་མ་ཟད་དེ་དག་གལ་ཇི་ལྟར་ཡིན་ཚུལ་མཚན་རིག་དང་མཐུན་པའི་ཐོག་ནས་དཔྱད་དགོས་པའི་སྐུལ་མ་མཛད་ཡོད།རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ཉེ་ཆར་རྒྱ་གར་རྒྱལ་ས་ལྡི་ལིའི་ནང་ SEE ཤེས་ཡོན་བསླབ་གཞི་གཏན་འབེབས་དང་འབྲེལ་བའི་རྒྱལ་སྤྱིའི་ལྷན་ཚོགས་ཐོག་ཆིབས་བསྒྱུར་མཛད་དེ་བཞུགས་སྒར་དུ་ཕྱིར་ཆིབས་བསྒྱུར་མཛད་མ་ཐག་ཕྱི་ཉིན་དེར་གློ་བུར་དུ་མགུལ་གློར་གཉན་ཕྲན་བཞེས་རྐྱེན་སླར་རྒྱལ་ས་ལྡི་ལིའི་ Max སྨན་ཁང་དུ་སྨན་པ་བསྟེན་གཏུག་གིས་༸སྐུའི་འཕྲོད་བཞེས་བརྟག་དཔྱད་གནང་བ་དང་ཁུལ་དེར་གཟའ་འཁོར་གཉིས་ལྷག་ཙམ་རིང་ལ་༸སྐུ་ངལ་གསོ་བཞུགས་མཛད་དགོས་བྱུང་ཡོད་པ་ལྟར། ༸སྐུའི་འཕྲོད་བཞེས་བརྟག་དཔྱད་དང་༸སྐུ་ཁམས་ཆེས་དྭངས་སྐྱེད་ལེགས་གྲུབ་ཀྱིས་ཟླ་ ༤ ཚེས་ ༢༦ ཉིན་བཞུགས་སྒར་དུ་༸ཞབས་སོར་བདེ་བར་འཁོད་ཡོད་པ་རེད། ཁ་ཉིན་ཕྱི་ཚེས་ ༥ ཉིན་ བཅོམ་ལྡན་འདས་དཔལ་དུས་ཀྱི་འཁོར་ལོ་དང་འབྲེལ་བའི་ཆེས་ཐོག་མའི་རིས་མེད་མཁས་པའི་བགྲོ་གླེང་ཐོག་དབུ་བཞུགས་མཛད་ཡོད་པ་དང་དེའི་རྗེས་སུ་ཁ་སང་བཞུགས་སྒར་༸རྒྱལ་བའི་ཕོ་བྲང་དུ་རྒྱ་གར་དང་ཝེ་ཏི་ནམ། དེ་བཞིན་རུ་སུ་བཅས་ནས་ཆེད་བཅར་ཞུས་པའི་ཚོང་གཉེར་བ་དང་ཆེད་ལས་མགོ་ཁྲིད་ཁག་གཅིག་ལ་བཀའ་སློབ་བཀྲིན་བསྐྱངས་ཡོད་པ་རེད། མཛད་འཆར་སྔོན་སྒྲིག་ལྟར་ན། ༸གོང་ས་མཆོག་ནས་རིང་མིན་ཟླ་བ་འདིའི་ཚེས་ ༡༠ ནས་ ༡༢ ཉིན་གྲངས་གསུམ་རིང་ཨུ་རུ་སུའི་དད་ལྡན་སེར་སྐྱ་མི་མང་གིས་ཇི་ལྟར་གསོལ་བ་བཏབ་པ་ལྟར་བཞུགས་སྒར་དྷ་རྨ་ས་ལར་རྒྱུད་བླ་མ་དང་ལམ་གཙོ་རྣམ་གསུམ་གྱི་བཀའ་ཁྲིད་བཀའ་དྲིན་བསྩལ་གཏན་ཁེལ་ཡོད་པ་རེད།

ཁ་སང་བཞུགས་སྒར་དུ་རྟེན་གཞི་བྱས་པའི་༸སྐུ་བཅར་རྣམ་གྲྭ་ཕན་བདེ་ལེགས་བཤད་གླིང་གི་ཤེས་ཡོན་ལྷན་ཚོགས་ཀྱིས་ འཇམ་མགོན་བླ་མ་ཙོང་ཁ་པ་ཆེན་པོ་མཆོག་གདུལ་བྱ་རྟག་འཛིན་ཅན་གྱི་ངོར་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་མི་ལོ་ཧྲིལ་པོ་ ༦༠༠ འཁོར་བའི་བཀའ་དྲིན་རྗེས་དྲན་དང་འབྲེལ་བའི་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོ་གོ་སྒྲིག་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་བཀའ་སློབ་བཀྲིན་བསྩལ་ཡོད་པ་རེད།དེའང་ཁ་སང་ཕྱི་ཟླ་ ༥ ཚེས་ ༥ ཉིན་གྱི་སྔ་དྲོ་ཚོུད་ ༨ སྟེང་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་ཕོ་བྲང་ནས་རྣམ་གྲྭ་མཁན་རིན་པོ་ཆེ་ཁྲོམ་ཐོག་རིན་པོ་ཆེས་སྤོས་སྣེས་མདུན་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་གི་དུས་འཁོར་ལྷ་ཁང་དུ་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་སུ་རྣམ་གྲྭ་མཁན་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་དང་འབྲེལ་རྒྱུན་ཆགས་གསུམ་པ་དང་། ༸རྒྱལ་བའི་འཁྲུངས་རབས་གསོལ་འདེབས། ལམ་གཙོ་རྣམ་གསུམ། པཎ་གྲུབ་བསྟོད་ཆེན་བཅས་གསུང་འདོན་གནང་སོང་།མཛད་སྒོའི་ཐོག་མར་རྣམ་གྲྭ་ཤེས་ཡོན་ལྷན་ཚོགས་ཀྱི་ཚོགས་གཙོ་ཁྲོམ་ཐོག་རིན་པོ་ཆེ་མཆོག་གིས་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོའི་དགོས་དམིགས་སོགས་ངོ་སྤྲོད་གནང་བ་དང་དེ་བཞིན་རྣམ་གྲྭ་ཤེས་ཡོན་ལྷན་ཚོགས་ཀྱི་འགན་འཛིན་སློབ་སྤྱི་ཐུབ་བསྟན་ཡར་འཕེལ་ལགས་ཀྱིས་ཉིན་གྲངས་གསུམ་རིང་གི་རིས་མེད་མཁས་པའི་བགྲོ་གླེང་གི་བརྗོད་གཞི་དང་གཙོ་སྐྱོང་བ། གསུང་བཤད་གནང་མཁན་སོགས་མཛད་རིམ་ཁག་ངོ་སྤྲོད་གནང་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཀྱི་ཐོག་མར་མགོན་པོ་༸གང་ཉིད་མཆོག་ནས་རྣམ་ཀུན་ནས་དེང་སྐབས་ང་ཚོ་ནང་པ་ཚོ་དུས་རབས་ཉེར་གཅིག་པའི་ནང་པ་ཞིག་བྱེད་དགོས་ཞེས་བཀའ་བསྩལ་སྐོར་དང་། ང་རང་ཚོ་བོད་ལ་མཚོན་ན་ཕལ་ཆེར་ཆོལ་ཁ་གསུམ་རྒྱ་ཁྱབ་ཡོངས་རྫོགས་ནང་པའི་རྗེས་སུ་ཞུགས་མཁན་རེད། བོན་ཡོད་པ་རེད། བོན་ནི་ནང་པའི་གཞུང་དང་འདྲེས་ནས་ནང་པའི་གཞུང་ལ་སློབ་སྦྱོང་བྱེད་ཀྱི་ཡོད་སྟབས། བོད་ལ་སངས་རྒྱས་པའི་ཆོས་ནི་དཀར་འཇམ་ཡུག་གཅིག་ཏུ་ཁྱབ་ཡོད་པ་ཞིག་རེད། འོན་ཀྱང་ང་ཚོ་དད་པའི་ཐོག་ནས་སྨོན་ལམ་བརྒྱབ་པ་དང་ཆོ་ག་ཕྱག་ལེན་བྱེད་པ་ཙམ་མིན་པར་སངས་རྒྱས་ཀྱིས་གསུངས་པའི་རྟེན་འབྱུང་དེ་ཁོ་ཉིད་ཀྱི་དོན་ལ་བསམ་བློ་གཏང་དགོས་གལ་ཡིན་པ་དང་། དེའང་སེམས་མ་ཞི་བ་ཞི་བའི་ཐབས་སུ་རྟེན་འབྱུང་དེ་ཁོ་ཉིད་ཀྱི་གནས་ལུགས་རྟོགས་པའི་ཐོག་ནས་ཡོང་དགོས་པར་ལམ་སྟོན་བསྩལ་སོང་།སངས་རྒྱས་པའི་ཆོས་ཟེར་དུས་བདེན་བཞི་མི་རྟག་སོགས་བཅུ་དྲུག་ནས་བྱང་ཕྱོགས་སོ་བདུན་སོགས་པཱ་ལིའི་གཞུང་དང་ལེགས་སྦྱར་གྱི་གཞུང་ཚང་མ་ཐུན་མོང་པ་རེད། ང་ཚོས་སྐབས་རེར་ང་ཚོ་ཐེག་ཆེན་པོ་རེད། ཁོང་ཚོ་ཐེག་དམན་པ་རེད་ཅེས་བཤད་པ་དེ་ནོར་འཁྲུལ་རེད། དེས་ན་ཐེག་པ་ཆེ་ཆུང་དབྱེ་འབྱེད་མེད་པར་སློབ་གཉེར་གནང་དགོས་པ་མ་ཟད། པཱ་ལིའི་གཞུང་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད་སྟབས། ང་ཚོས་དེར་དོ་སྣང་ཡག་པོ་བྱེད་ན་འཛམ་གླིང་གི་ནང་པའི་གནས་ཚང་མ་གཅིག་གྱུར་ཆགས་ཐུབ་ངེས་ཡིན་པར་བཀའ་བསྩལ་ཡོད།  དེ་བཞིན་༸གོང་ས་མཆོག་གིས་༸རྗེ་རིན་པོ་ཆེ་མཆོག་གིས་འདུལ་བ་ལུང་འདྲེན་གྱིས་དགེ་བའི་བཤེས་གཉེན་བསྟེན་ཚུལ་ཡང་དག་པ་ཞིག་ཇི་ལྟར་བྱེད་དགོས་མིན་བརྟག་དཔྱད་བྱེད་དགོས་གལ་ཡིན་པར་གསུངས་དོན་བཞིན་དེ་ལྟར་འབད་དགོས་པའི་ལམ་སྟོན་མཛད་སོང་།ནང་པ་སངས་རྒྱས་པའི་ལྟ་གྲུབ་འདི་དེང་སྐབས་དུས་རབས་ཉེར་གཅིག་ནང་ཚན་རིག་ཡར་རྒྱས་ཧ་ཅང་ཆེན་པོ་འགྲོ་བཞིན་ཡོད་པ་དང་ད་དུང་ཡང་མུ་མཐུད་དེ་ལྟར་འགྲོ་ངེས་རེད། སངས་རྒྱས་པའི་ལྟ་གྲུབ་ཀྱི་རྣམ་གཞག་འདི་ཚན་རིག་ཡར་རྒྱས་འགྲོ་བ་དང་མཉམ་དུ་དཔུང་པ་མཉམ་གཤིབ་ཀྱི་ཐོག་ནས་འགྲོ་རྒྱུ་ཡིན་པ་ལས་ཚན་རིག་གིས་གནོད་པའི་དོགས་པ་གང་ཡང་ཡོད་པ་མེད་ཅེས་བཀའ་ནན་བསྩལ་བ་ཆབས་ཅིག དབང་རྣོན་ཆོས་ཀྱི་རྗེས་འབྲང་པའི་ཁྱད་ཆོས་ལྡན་པའི་ཐོག་ནས་ཐོས་བསམ་སྒོམ་གསུམ་ཡ་མ་བྲལ་བར་སློབ་སྦྱོང་གནང་ཚེ་ད་དུང་དུས་རབས་བརྒྱ་ཕྲག་གཉིས་གསུམ་བར་སངས་རྒྱས་ཀྱི་བསྟན་པ་གནས་ཐུབ་ངེས་ཡིན་པར་བཀའ་བསྩལ་ཡོད།༸གོང་ས་མཆོག་གིས་དཔལ་དུས་ཀྱི་འཁོར་ལོ་དང་འབྲེལ་ནས་བཀའ་བསྩལ་དོན་རྒྱལ་བ་ཇོ་ནང་པས་དུས་ད་ལྟ་བར་བཤད་སྒྲུབ་གཉིས་ཀྱི་ཐོག་ནས་དུས་འཁོར་གྱི་བསྟན་པ་འཛིན་སྐྱོང་སྤེལ་གསུམ་གནང་ཡོད་པར་ཡི་རངས་བསྔགས་བརྗོད་མཛད་སོང་།རྩ་བའི་འཇམ་མགོན་བླ་མ་ཙོང་ཁ་པ་ཆེན་མོ་དགོངས་པ་མྱ་ངན་ལས་འདས་ནས་མི་ལོ་ཧྲིལ་པོ་ ༦༠༠ འཁོར་བའི་བཀའ་དྲིན་རྗེས་དྲན་དང་འབྲེལ་བའི་དཔལ་དུས་ཀྱི་འཁོར་ལོའི་རིས་མེད་མཁས་པའི་བགྲོ་གླེང་ཆེན་མོའི་ཉིན་གཉིས་པའི་སྐུ་མགྲོན་གཙོ་བོ་བཀའ་ཁྲི་ཟུར་པ་༸སྐྱབས་རྗེ་མཁས་དབང་ཟམ་གདོང་རིན་པོ་མཆོག་དབུ་བཞུགས་གནང་ཡོད་པ་དང་། བགྲོ་གླེང་ཉིན་གསུམ་པའམ་མཇུག་སྡོམས་མཛད་སྒོའི་སྐུ་མགྲོན་གཙོ་བོ་དབུས་བོད་མིའི་སྒྲིག་འཛུགས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཕེབས་ཀྱི་འདུག བགྲོ་གླེང་གི་གསུང་གནང་མཁན་ས་དགེ་བཀའ་རྙིང་དང་རྒྱལ་བ་ཇོ་ནང་པ། དེ་བཞིན་བུ་སྟོན་བཅས་ཀྱི་སྐུ་ཚབ་ཕེབས་ཡོད་པ་རེད།འདི་ག་རླུང་འཕྲིན་ཁང་གིས་རྣམ་གྲྭ་ཕན་བདེ་ལེགས་བཤད་གླིང་གི་ཤེས་ཡོན་ལྷན་ཚོགས་ཀྱི་འགན་འཛིན་སློབ་སྤྱི་གྲྭ་ཐུབ་བསྟན་ཡར་འཕེལ་ལགས་སུ་བགྲོ་གླེང་གི་དགོས་དམིགས་གཙོ་བོ་གང་ཡིན་པ་དང་། རྣམ་གྲྭ་ཕན་བདེ་ལེགས་བཤད་གླིང་དང་དཔལ་དུས་ཀྱི་འཁོར་ལོའི་ཆོ་ག་ཕྱག་ལེན་གནང་སྒོ་ཁག་དང་ཐུན་མིན་གྱི་འབྲེལ་བ། དེ་བཞིན་འཇམ་མགོན་བླ་མ་༸རྗེ་ཙོང་ཁ་པ་ཆེན་པོ་མཆོག་དང་བཅོམ་ལྡན་འདས་དཔལ་དུས་ཀྱི་འཁོར་ལོའི་དབར་ཐུན་མིན་གྱི་འབྲེལ་བ་ཇི་ཡོད་སོགས་ཀྱི་ཐོག་བཅར་འདྲི་ཁག་གཅིག་ཞུས་ཡོད། ལོ་སྔོན་མར་རྣམ་རྒྱལ་གྲྭ་ཚང་གི་འཛིན་རིམ་དགུ་པ་ཡན་གྱི་དགེ་འདུན་པ་རྣམས་ལྷན་འཛོམས་ཀྱིས་རྣམ་རྒྱལ་གྲྭ་ཚང་གི་ཕྱག་ལེན་དང་འབྲེལ་དཔལ་དུས་ཀྱི་འཁོར་ལོའི་དབང་ཆེན་སྐབས་ཐོག་མར་མཆོད་པ་བཞེངས་སྟངས་ནས་དབུ་འཛུགས་ཐོག་སྒྲུབ་མཆོད་དངོས་གཞི་སྐབས་དང་པོ་ས་ཆོག་དང་དཀྱིལ་འཁོར་བཞེངས་སྐྲུན་གྱིས་མཚོན་པའི་གར་སྟེགས་དབྱངས་གསུམ་དང་། དཀྱིལ་འཁོར་བསྡུ་ཆོག་དང་ཀླུ་ཆོག་གནང་སྟངས་སོགས་དང་འབྲེལ་བའི་དགེ་འདུན་པ་ཚོས་ཞིབ་འཇུག་གནང་བའི་བརྗོད་གཞི་ཁག་མི་འདྲ་བ་ཉི་ཤུའི་རྩོམ་ཤོག་ཐད་ལ་བགྲོ་གླེང་གནང་བའི་ཐོག་ནས་དུས་འཁོར་དང་འབྲེལ་བའི་བགྲོ་གླེང་ཐོག་མ་དེ་གནང་ཡོད་པ་རེད།

ཉེ་ལམ་ཚེས་ ༣ ཉིན་གྱི་ཞོགས་པར་རྒྱ་གར་ཤར་ཕྱོགས་སུ་ཆགས་པའི་ཨོ་ཌི་ཤ་མངའ་སྡེའི་ས་གནས་ཁག་ཅིག་ཏུ་མཚོ་རླབས་དང་ Fani ཞེས་པའི་དྲག་པོའི་རླུང་འཚུབ་ཀྱི་གོད་ཆག་བྱུང་རྐྱེན་ཁུལ་དེར་གནས་བཞུགས་མང་ཚོགས་ཁག་ཅིག་གི་ཚེ་སྲོག་དང་རྒྱུ་ནོར་ལ་གནོད་འཚེ་ཐེབས་ཡོད་སྟབས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཡུལ་དེའི་མང་ཚོགས་ལ་གདུང་སེམས་མཉམ་བསྐྱེད་མཚོན་ཕྱིར་ཐུགས་གསོའི་གསུང་འཕྲིན་ཞིག་ཨོ་ཌི་ཤ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Naveen Patnaik མཆོག་གི་མཚན་ཐོག་ཏུ་བསྩལ་འདུགཁ་སང་ཟླ་ ༥ ཚེས་ ༥ སྔ་དྲོ་བསྩལ་བའི་གསུང་འཕྲིན་དེའི་ནང་མགོན་པོ་༸གང་ཉིད་མཆོག་གིས་ད་རེས་ཀྱི་གོད་ཆག་ཚབས་ཆེན་དེའི་འོག་ཨོ་ཌི་ཤ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Naveen Patnaik མཆོག་གཙོ་གྱུར་དེ་གའི་འཛིན་སྐྱོང་ནས་ཐུགས་ཁུར་བཞེས་ཐོག་ཨོ་ཌི་ཤ་མང་ཚོགས་རྣམས་དེ་མ་ཐག་ཉེན་གཡོལ་གྱི་ལས་གཞི་སྤེལ་རྐྱེན་ཁུལ་དེར་ཛ་དྲག་གི་གོད་ཆག་དེ་ཙམ་བྱུང་མེད་པར་ཡི་རང་བསྔགས་བརྗོད་མཛད་འདུག དེ་བཞིན་༸གོང་ས་མཆོག་གིས་བྱུང་བའི་གོད་ཆག་རྐྱེན་པས་ཚེ་སྲོག་ཤོར་བའི་མང་ཚོགས་དང་རྒྱུ་ནོར་དག་ལ་གནོད་སྐྱོན་ཐེབས་པ། སྒོས་མི་མང་པོ་ཞིག་ལ་དཀའ་ངལ་འཕྲད་པར་ཐུགས་ཕམ་དང་སྦྲགས།  ཤུལ་ལུས་ནང་མི་རྣམས་ལ་ཐུགས་གསོ་དང་ལྷག་པར་དུ་གནོད་འཚེ་ཐེབས་ཡུལ་གྱི་མང་ཚོགས་ཀྱི་བདེ་འཇགས་སླད་ཐུགས་སྨོན་བསྩལ་བ་དང་ཆབས་ཅིག གནོད་འཚེ་ཐེབས་པའི་མང་ཚོགས་ལ་ཛ་དྲག་ངལ་སེལ་གནང་སླད་ཏཱ་ལའི་བླ་མའི་ཐེབས་རྩ་བརྒྱུད་ཧིན་སྒོར་འབུམ་བཅུ་མཐུན་འགྱུར་གསོལ་བསྩལ་མཛད་འདུག གཞི་རྩའི་བརྒྱུད་ལམ་ཁག་ཏུ་ཐོན་པའི་གནས་ཚུལ་ལ་གཞིགས་ཚེ་ད་རེས་རླུང་འཚུབ་ཀྱི་དོན་རྐྱེན་དེའི་འོག་ས་གནས་མི་མང་ ༣༥ ཙམ་དང་སྲོག་ཆགས་མང་པོ་ཞིག་གི་ཚེ་སྲོག་ཤོར་བ་མ་ཟད། ཤིང་སྡོང་དང་སྟོན་ཐོག་མང་དག་ཅིག་སྟོང་ཟད་དུ་གྱུར་བ། དེ་བཞིན་མེ་འཁོར་འགྲུལ་སྐྱོད་སོགས་བཀག་དགོས་པ་བྱུང་འདུག  ད་ལྟའི་ཆར་རླུང་འཚུབ་ཞི་འཇམ་བྱུང་སྟབས་མེ་འཁོར་འགྲུལ་སྐྱོད་གནང་ཆོག་གི་ཡོད་པ་རེད་འདུག སྤྱིར་ཨོ་ཌི་ཤ་མངའ་སྡེའི་ནང་མི་འབོར་ས་ཡ་ ༤༦ ཙམ་ཞིག་གནས་བཞུགས་གནང་གི་ཡོད་པ་དང།  ད་རེས་གནམ་གཤིས་རིག་པའི་ལས་ཁུངས་ཀྱིས་དུས་ཐོག་ཏུ་འཛིན་སྐྱོང་གཞུང་ལ་རླུང་འཚུབ་ཀྱི་དོན་རྐྱེན་ཡོང་རྒྱུའི་གནས་ཚུལ་ཕུལ་ཐུབ་པར་བརྟེན་ཚོུད་ ༢༤ ནང་མི་མང་ས་ཡ་གཅིག་ལྷག་ཙམ་ས་གནས་གཞན་དུ་གནས་སྤོ་གནང་ཐུབ་སྟབས། དེ་ནི་ལོ་རྒྱུས་ཁྲོད་མང་ཚོགས་ཉེན་སྐྱོབ་ཆེ་ཤོས་ཤིག་ཆགས་ཀྱི་ཡོད་པ་དང་།  ད་རེས་ཨོ་ཌི་ཤའི་གཞུང་ནས་མང་ཚོགས་དུ་མའི་ཚེ་སྲོག་སྐྱོབ་ཐུབ་པ་དེར་རྒྱལ་ཚོགས་དང་སྤྱི་ཚོགས་དྲྭ་ལམ་བརྒྱུད་མི་མང་ནས་བསྔགས་བརྗོད་གནང་བཞིན་འདུག དེ་དང་ཕྱོགས་མཚུངས་དོན་རྐྱེན་དེའི་སླད་དེ་རིང་རྒྱ་གར་གྱི་སྲིད་བློན་སྐུ་ཞབས་ Narendra Modi མཆོག་ཐད་འཕུར་གནམ་གྲུ་བརྒྱུད་ཨོ་ཌི་ཤ་ནང་གནོད་སྐྱོན་ཐེབས་ཡུལ་གྱི་ས་གནས་སུ་གཟིགས་ཞིབ་གནང་བ་དང་སྦྲགས། ཨོ་ཌི་ཤ་གཙོས་པའི་གནོད་སྐྱོན་ཐེབས་ཡུལ་གྱི་མངའ་སྡེ་གཞན་ཁག་ཏུ་ངལ་སེལ་དང་བསྐྱར་གསོའི་སླད་སྲིད་བློན་མཆོག་ནས་ཧིན་སྒོར་ཐེར་འབུམ་ ༡༠ ལྷག་གསོལ་བསྩལ་གནང་འདུག རྩ་བའི་ཨོ་ཌི་ཤ་ཁུལ་དུ་རླུང་འཚུབ་ཀྱི་གོད་ཆག་བྱུང་བ་དེ་ཐོག་མ་མིན་པར་དེ་སྔོན་ཕྱི་ལོ་ ༡༩༩༩ ལོར་ས་གནས་དེར་དྲག་ཆར་རླུང་འཚུབ་ཤུགས་ཆེ་བྱུང་བས་མི་མང་ཆིག་ཁྲི་ལྷག་ཙམ་གྱི་ཚེ་སྲོག་ཤོར་བ་དང་། སྙན་ཐོ་ཁག་ལ་གཞིགས་ཚེ་ད་རེས་རླུང་འཚུབ་དེ་ལོ་ངོ་བཅུ་ཕྲག་གཉིས་ཙམ་ནང་རྒྱ་གར་ཤར་ཕྱོགས་སུ་བྱུང་བའི་རླུང་འཚུབ་ཆེ་ཤོས་ཤིག་ཀྱང་ཆགས་ཀྱི་འདུག

ཨ་རིའི་སྲིད་འཛིན་ཟུར་པ་སྐུ་ཞབས་བྷེ་རེཀ་ཨོ་བྷ་མ་མཆོག་གི་སློབ་སྟོན་པ་བགྲེས་པ་ལྕམ་ Valerie Jarrett’s ལགས་ཀྱིས་ཉེ་ལམ་ཟླ་བ་བཞི་པའི་ནང་རང་ཉིད་ཀྱི་དྲན་དེབ་ My Journey to the West Wing and the Path Forward ཞེས་པའི་ཕྱག་དེབ་འདོན་སྤེལ་གནང་བའི་ནང་༸གོང་ས་མཆོག་དང་མཇལ་འཕྲད་ཞུས་པར་བརྟེན་ལྕམ་སྐུ་རང་ཉིད་ཀྱི་མི་ཚེར་འགྱུར་ལྡོག་ཆེན་པོ་བྱུང་སོང་ཞེས་གསུངས་འདུག གཞི་རྩའི་ལྕམ་ Valerie Jarrett ལགས་ནི་སྲིད་འཛིན་ཟུར་པ་ཨོ་བྷ་མ་མཆོག་གི་སློབ་སྟོན་པ་བགྲེས་པ་ཡིན་པ་ཙམ་མ་ཟད་ཁོང་གི་ནང་མི་དང་ཆེས་མཛའ་བའི་གྲོགས་པོ་ཡིད་ཆེས་གནང་ས་ཞིག་ཡིན་པ་དང་། ཨོ་བྷ་མ་མཆོག་སྲིད་འཛིན་གྱི་ངོ་བོའི་ཐོག་རྒྱ་ནག་ལ་གཞུང་འབྲེལ་འཚམས་གཟིགས་མ་གནང་གོང་དུ་ལྕམ་སྐུ་མཆོག་ཆེད་མངགས་བཞུགས་སྒར་དྷ་རྨ་ས་ལར་ཆེད་གཏོང་གིས་༸གོང་ས་མཆོག་གི་མཇལ་ཁ་ཞུས་ཡོད་པ་རེད། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་ལགས་ཀྱིས་ལྕམ་སྐུ་མཆོག་གི་དྲན་དེབ་དེའི་སྐོར་ལ་ཟིན་བྲིས་ཤིག་སྤེལ་ཡོད་པ་དང་། ཟིན་བྲིས་དེར་གཞིགས་ཚེ་དྲན་དེབ་དེའི་ནང་ལྕམ་སྐུ་ Valerie ལགས་ནས་ཕྱི་ལོ་ ༢༠༠༩ ཟླ་ ༩ ཚེས་ ༡༤ ཉིན་བཞུགས་སྒར་དུ་༸གོང་ས་མཆོག་དང་མཇལ་འཕྲད་ཀྱིས་རང་ཉིད་ཀྱི་མི་ཚེར་འགྱུར་ལྡོག་ཐེབས་སྐོར་དང་། དེ་འབྲེལ་ཁོང་ནས་སྲིད་འཛིན་མཆོག་ལ་སྙན་གསེང་ཞུས་པ་མ་ཟད། ༸གོང་ས་མཆོག་རྗེས་སུ་ཕྱི་ལོ་ ༢༠༡༠ ལོར་ཨ་རིའི་རྒྱལ་ས་ཝ་ཤིང་ཊོན་ཌི་སི་ཁུལ་དུ་ཆིབས་བསྒྱུར་མཛད་དེ་སྲིད་འཛིན་མཆོག་དང་མཇལ་འཕྲད་གནང་སྐབས་སྲིད་འཛིན་མཆོག་ནས་དེ་འབྲེལ་མགོན་པོ་༸གང་ཉིད་མཆོག་ལ་སྙན་གསེང་ཞུས་པ་དང་། ༸གོང་ས་མཆོག་ཐུགས་དགྱེས་ཚོར་ཆེན་པོའི་ངང་ནས་བཞད་མོ་བཞེས་པ་སོགས་དྲན་གསོ་བཀོད་འདུག ཁོང་ནས་༸སྐུ་ཉིད་མཆོག་ནི་རང་ཉིད་ཀྱི་མི་ཚེར་སེམས་འགུལ་བླ་མེད་སྦྱིན་མཁན་ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Nelson Mandela མཆོག་དང་སྙན་གྲགས་ཅན་གྱི་རྩོམ་པ་པོ་དང་སྲིད་དོན་པ་སྐུ་ཞབས་ Elie Wiesel མཆོག་བཅས་སྐྱེས་བུ་དམ་པ་དང་མཚུངས་བསྡུར་གནང་བ་དང་ཕྱོགས་མཚུངས་༸གོང་ས་མཆོག་གཙོས་པའི་སྐྱེས་བུ་དམ་པ་ཁོང་གཉིས་ནས་རང་ཉིད་ཀྱི་སྐུ་ཚེ་ཁྲོད་དཀའ་སྡུག་ཚད་མེད་ནང་ལྷུང་ཡང་། ཁོང་རྣམས་ནས་སེམས་ཤུགས་མི་ཆག་པར་འགྲོ་བ་སྤྱིའི་བདེ་སྐྱིད་སླད་མཛད་པ་འཕྲིན་ལས་བསྐྱངས་པ་དང་། ལྷག་པར་དུ་ཁོང་རྣམས་ནས་རང་ཉིད་ཀྱི་མི་མང་ལ་ཧ་ཅང་བརྩེ་སེམས་ཡོད་པ་ལྟར་བདག་ཉིད་ཆེན་པོ་དེ་དག་བྱམས་པ་དང་སྙིང་རྗེར་འགྱུར་ལྡོག་རྩ་བ་ནས་མེད་པ་བཅས་ལ་མངོན་བསྟོད་ཞུས་ཡོད་པ་རེད། ལྕམ་སྐུ་ Valeirie  ལགས་ནས་༸མགོན་པོ་མཆོག་དང་མཇལ་འཕྲད་ཞུས་པ་དེར་བུ་ཆུང་ལགས་ཀྱིས་རྒྱབ་ལྗོངས་དང་འབྲེལ་ཕྱི་ལོ་ ༢༠༠༩ ཟླ་ ༡ པོའི་ནང་ཨོ་བྷ་མ་མཆོག་སྲིད་འཛིན་གྱི་ལས་གནས་ཐོག་མ་བཞེས་སྐབས་ཀྱི་ལོ་དུས་སུ་བརྒྱུད་ལམ་ཁག་ཏུ་ཁོང་རྒྱ་ནག་ནང་འཚམས་གཟིགས་སུ་ཕེབས་རྒྱུའི་གནད་དོན་ཐོན་ཡོད་པ་དང་། ལོ་དེའི་ཟླ་ ༡༠ པའི་ནང་༸གོང་ས་མཆོག་ Washington DC ནང་ཆིབས་བསྒྱུར་མཛད་འཆར་དང་འབྲེལ་སེམས་དང་སྲོག་གི་ལྟེ་གནས་ཁང་ནས་གོ་སྒྲིག་ཞུས་པའི་ཚན་རིག་པ་དང་ལྷན་དུ་ཚོགས་འདུའི་ཐོག་དབུ་བཞུགས་ཀྱི་སྟ་གོན་གནང་བཞིན་པ་དུས་ཚོད་དང་སྟབས་ཁེལ་བ་ལྟར། ༸གོང་ས་མཆོག་གི་ཨ་རིའི་དམིགས་བསལ་སྐུ་ཚབ་རྒྱ་རི་རིན་པོ་ཆེ་མཆོག་དམ་པ་དེ་ཉིད་ནས་ཆིབས་བསྒྱུར་དེའི་སྐབས་དབུ་ཁྲིད་རྣམ་གཉིས་མཇལ་འཕྲད་ཡོང་བའི་ཞུ་གཏུག་གནང་སྟབས།   སྐབས་དེར་ཨ་རྒྱ་གཉིས་ཀྱི་ཆབ་སྲིད་ཀྱི་གནས་སྟངས་འོག་ཨ་རི་ཕྱོགས་ནས་༸གོང་ས་མཆོག་དང་སྲིད་འཛིན་མཆོག་རྣམ་གཉིས་ཀྱི་མཇལ་འཕྲད་དེ་ཕྱིར་འགྱངས་གནང་རྒྱུར་ཞུ་སྐུལ་དང་སྦྲགས། སྲིད་འཛིན་མཆོག་རྒྱ་ནག་ལ་འཚམས་གཟིགས་སུ་ཕེབས་སྐབས་༸གོང་ས་མཆོག་ལ་རྒྱ་གཞུང་ལ་བརྡ་ལན་གང་ཡོད་མེད་ཀྱི་བཀའ་འདྲི་དགོངས་སྐོར་ཞུ་ཆེད་དུ་ལྕམ་སྐུ་ Valerie ལགས་ཆེད་མངགས་བཞུགས་སྒར་དུ་ཕེབས་དགོས་བྱུང་བར་འགྲེལ་བརྗོད་གནང་འདུག སྤྱིར་ཨ་རི་གྲོས་ཚོགས་དང་དཔྱད་ཞིབ་པ། དེ་བཞིན་གསར་ཁང་སོགས་ནས་ཕོ་བྲང་དཀར་པོར་ཟླ་བ་དེའི་སྐབས་༸གོང་ས་མཆོག་དང་མཇལ་འཕྲད་མི་གནང་བར་སྐྱོན་བརྗོད་ཤུགས་ཆེ་གནང་ཡོད་ཀྱང་།     དྲན་དེབ་དེའི་ནང་ལྕམ་སྐུ་ Valerie Jarrett ལགས་ཀྱིས་ཨ་རིའི་ངོས་ནས་ཨ་རྒྱ་གཉིས་ཀྱི་འབྲེལ་ལམ་ཐད་དོ་ཕོག་མི་འགྲོ་བར་འབད་བརྩོན་བྱེད་བཞིན་ཡོད་སྟབས། རྒྱ་ནག་ནས་ཕོ་བྲང་དཀར་པོར་འཚམས་གཟིགས་མ་གནང་བའི་སྔ་རོལ་དུ་རྒྱ་ནག་གི་དགྲ་བོ་ཞིག་ལ་ངོས་འཛིན་ཞུས་པའི་༸གོང་ས་མཆོག་ཆིབས་བསྒྱུར་མཛད་པ་ཡིན་ན་དེས་ཡུལ་གཉིས་ཀྱི་འབྲེལ་ལམ་ལ་དཀའ་ངལ་འཕྲད་ངེས་ཡིན་པས་སྐབས་དེར་ཨ་རིའི་རྒྱལ་སྲུང་དང་འབྲེལ་བའི་དབུ་ཁྲིད་རྣམ་པའི་ལམ་སྟོན་བཞིན་ཁོང་སྲིད་འཛིན་མཆོག་གིས་གནང་བའི་ཕྱག་བྲིས་ཤིག་བསྣམས་ཏེ་བཞུགས་སྒར་དྷ་རྨ་ས་ལར་ཆེད་ཕེབས་གནང་དགོས་བྱུང་བ་དང་། ཕྱག་བྲིས་དེའི་ནང་༸གོང་ས་མཆོག་ལ་ཟླ་བ་དྲུག་གི་རྗེས་སུ་ཨ་རིར་ཆིབས་བསྒྱུར་གནང་རྒྱུའི་གདན་ཞུ་གསོལ་འདེབས་ཞུས་ཡོད་པ་སོགས་འགྲེལ་བརྗོད་གནང་སྟེ་རྒྱ་ནག་དང་ཨ་རི་དབར་གྱི་འབྲེལ་ལམ་ལ་དོ་ཕོག་མེད་པ་དང་། ༸གོང་ས་མཆོག་ལའང་གུས་བཀུར་གྱི་རྣམ་པ་མཚོན་ཡོད་པར་འགྲེལ་བརྗོད་གནང་འདུག ཕྱི་ལོ་ ༢༠༡༠ ཟླ་ ༢ ཚེས་ ༡༨ ཉིན་སྲིད་འཛིན་ཨོ་བྷ་མ་མཆོག་ནས་ཕོ་བྲང་དཀར་པོའི་ནང་༸གོང་ས་མཆོག་དང་ལྷན་མཇལ་མོལ་གནང་ཡོད་པ་དང་། ཕོ་བྲང་དཀར་པོས་དེ་ཉིན་གསར་འགོད་གསལ་བསྒྲགས་ཤིག་སྤེལ་གསལ་སྲིད་འཛིན་མཆོག་གིས་བོད་མི་ནས་རང་ཉིད་ཀྱི་ཆོས་དང་རིག་གཞུང་དང་།  སྐད་ཡིག་གཅེས་སྲུང་གནང་བཞིན་ཡོད་པ་དང་། བོད་ནང་གི་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་དང་༸གོང་ས་མཆོག་གི་ལམ་སྟོན་འོག་བོད་མི་ནས་རྩོད་བཞིན་པའི་དབུ་མའི་ལམ་གྱི་སྲིད་བྱུས། བོད་རྒྱ་གྲོས་མོལ་བཅས་ལ་རྒྱབ་སྐྱོར་གནང་བ་མ་ཟད། ཨ་རི་དང་རྒྱ་ནག་གཉིས་དབར་འབྲེལ་བ་མུ་མཐུད་དམ་ཟབ་དགོས་པའི་ཐོག་དབུ་ཁྲིད་རྣམ་གཉིས་ནས་མོས་མཐུན་གནང་ཡོད་པr་འགྲེལ་བརྗོད་གནང་ཡོད། རྩ་བའི་ལྕམ་སྐུ་ Valerie Jarrett ལགས་དྷ་སར་ཕེབས་སྐབས་བོད་དང་བོད་མི་གནས་བབས་རྟོགས་ཕྱིར་བོད་ཁྱིམ་དུ་ཡོད་པའི་བོད་པའི་དྭ་ཕྲུག་དང་། ཆབ་སྲིད་བཙོན་ཟུར། དེ་བཞིན་བོད་ནས་བྲོལ་བྱོལ་དུ་ཕེབས་མཁན་གྱི་བོད་མི་སོགས་དང་མཇལ་འཕྲད་གནང་ཡོད་པ་རེད། སྐབས་དེར་ལྕམ་སྐུ་མཆོག་དང་ལྷན་ཨ་རིའི་ཕྱི་སྲིད་ལས་ཁུངས་ཀྱི་བོད་དོན་དམིགས་བསལ་འབྲེལ་མཐུད་པར་བསྐོ་གཞག་བྱུང་མ་ཐག་པའི་ལྕམ་སྐུ་ Mario Otero མཆོག་ཀྱང་ཆེད་ཕེབས་གནང་ཡོད་པ་རེད།