༸གོང་ས་མཆོག

དེ་རིང་རྒྱ་གར་གྱི་སྲིད་བློན་མོ་དྷི་མཆོག་གི་དགུང་གྲངས་དོན་གཅིག་གི་འཁྲུངས་སྐར་དང་བསྟུན་ནས། བོད་ཀྱི་བླ་ན་མེད་པའི་དབུ་ཁྲིད། སྤྱི་ནོར་༸གོང་ས་སྐྱབས་མཆོན་ཆེན་པོ་མཆོག་གིས་འཚམས་འཕྲིན་གྱི་ཕྱག་ཡིག་ཅིག་སྩལ་ཏེ། སྲིད་བློན་མཆོག་སྔར་བཞིན་གཟུགས་གཞི་བདེ་ཐང་དང་ནད་མེད་ཚེ་རིང་ཡོང་བའི་སྨོན་འདུན་ཞུས་འདུགདེ་ཡང་མགོན་པོ་གང་ཉིད་མཆོག་གིས། སྲིད་བློན་མོ་དྷི་མཆོག་ནི་རྒྱ་གར་གྱི་རྒྱལ་ཁབ་ཆེན་མོ་འདིར་བརྩེ་ཞེན་ཡོད་པ་ཞིག་ཡིན་པར་དགོངས་འགྲེལ་དང་ལྷན་དུ། ཏོག་དབྱིབས་གཉན་རིམས་ཀྱིས་རྒྱལ་སྤྱིའི་སྤྱི་ཚོགས་ལ་དོ་ཕོག་ཐེབས་ཡོད་ཀྱང་སྲིད་བློན་མཆོག་གིས་གདེང་སྤོབས་རྒྱ་བསྐྱེད་གནང་བཞིན་པར་རྟེན་འབྲེལ་ཞུས་པ་དང་སྦྲགས།རྒྱ་གར་ནི་རྒྱལ་སྤྱིའི་སྤྱི་ཚོགས་ཁྲོད་མི་འབོར་ཆེས་མང་ཤོས་ཀྱི་མང་གཙོའི་རྒྱལ་ཁབ་ཅིག་ཆགས་ཡོད་སྟབས།   རྒྱལ་གར་རྒྱལ་ཁབ་ཀྱི་བྱ་བཞག་ལེགས་འགྲུབ་ཀྱིས་རྒྱ་གར་ཙམ་དུ་མ་ཟད་རྒྱལ་སྤྱིའི་སྤྱི་ཚོགས་ཁྱོན་ཡོངས་ལ་ཁེ་ཕན་སྒྲུབ་བཞིན་ཡོད་པར་ཆེ་བསྟོད་གནང་འདུགགཞན་ཡང་མགོན་པོ་གང་ཉིད་མཆོག་གིས་རྒྱ་གར་གྱི་སྲོལ་རྒྱུན་རིང་བཞིན་ལྡན་པའི་འཚེ་མེད་ཞི་བ་དང་སྙིང་རྗེ་ལྟ་གྲུབ་དེ་ནི་དེང་གི་སྤྱི་ཚོགས་འདིར་འབྲེལ་བ་ཆེན་པོ་ཆགས་ཡོད་པ་ཙམ་དུ་མ་ཟད། ངེས་བར་དུ་དགོས་ངེས་རང་བཞིན་ཞིག་ཡིན་པར་དགོངས་བཞེས་གནང་གི་ཡོད་པར་བཀའ་སྩལ་དེ། དེ་ལྟ་བུའི་སྲོལ་རྒྱུན་གྱི་ལྟ་གྲུབ་དེ་དེང་རབས་ཀྱི་ཤེས་ཡོན་ལམ་ལུགས་དང་ཟུང་འབྲེལ་གྱིས་རྒྱལ་སྤྱིའི་སྤྱི་ཚོགས་ཀྱི་འགྲོ་བ་མིའི་རིགས་ལ་ཕན་རླབས་སྐྲུན་ཐུབ་པར་ཡིད་ཅེས་གནང་གི་ཡོད་པའི་ལམ་སྟོན་མཛད་འདུག དེ་བཞིན་གང་ཉིད་མཆོག་ལ་གོ་སྐབས་ནམ་བྱུང་གི་སྐབས་སུ། རྒྱ་གར་གྱི་རྒྱལ་ཁབ་ཆེན་མོ་འདིའི་ཡང་དག་པའི་མང་གཙོ་དང་མང་གཙོའི་ལམ་ལུགས་དང་འབྲེལ་བ་གཏིང་ཟབ་ཡོད་པའི་ཆོས་ལུགས་སྣ་མང་གཅིག་འདུས་ཀྱི་ཞི་བདེ་དང་བརྟན་བརླིང་ལ་བསྔགས་བརྗོད་གནང་གི་ཡོད་པར་བཀའ་སྩལ་ཏེ།  བོད་མི་མང་པོ་ཞིག་རྒྱ་གར་དུ་གནས་ཡོད་པ་དང་འབྲེལ་ནས། རྒྱ་གར་ནི་བོད་མི་རྣམས་ཀྱི་ཆོས་ལུགས་ཀྱི་སྐྱབས་བཅོལ་ས་ཁོ་ན་ཙམ་མིན་པར། འདས་བའི་ལོ་ངོ་དྲུག་ཅུ་རེ་གཉིས་ཀྱི་རིང་ལ་རྒྱ་གར་རྒྱལ་ཁབ་ནི་བོད་མི་མང་པོ་ཞིག་གི་ཁྱིམ་གཞས་ཆགས་ཡོད་པར་ལུང་འདྲེན་མཛད་དེ། གོ་སྐབས་འདི་བརྒྱུད་ནས་རྒྱ་གར་གཞུང་མང་གཉིས་ཀྱིས་བོད་མི་རྣམས་ལ་ད་བར་མཐུན་འགྱུར་རོགས་རམ་གནང་བར་བསྐྱར་དུ་ཐུགས་རྗེ་ཆེ་ཞུས་འདུགདེ་རིང་སྲིད་བློན་མོ་དྷི་མཆོག་གི་འཁྲུངས་སྐར་དང་བསྟུན་བཞུགས་སྒར་ཁུལ་གྱི་བདེ་ལེགས་སྨན་ཁང་དང་ཀུན་ཕན་དགེ་རྩ་ཚོགས་པ། དེ་བཞིན་རྡ་ས་ས་གནས་འགོ་འཛིན་ལས་ཁུངས་དང་ཧིན་བོད་མཛའ་འབྲེལ་ཚོགས་པ། གཞན་ཡང་རྒྱ་གར་གྱི་Rotary Club ཞེས་པའི་སྤྱི་ཚོགས་ཞབས་ཞུའི་ཚོགས་པ་སོགས་མཉམ་འབྲེལ་གྱིས་མེག་གྷན་ཉིན་མོ་སློབ་གྲྭའི་ནང་དུ་བཞུགས་སྒར་ཁུལ་གྱི་བོད་མི་དང་ཡུལ་མི་རྣམས་ལ་རིན་མེད་ཀྱིས་རིམས་ནད་སྔོན་ཁབ་སྐྱོན་པ་དང་བརྟག་དཔྱད་སོགས་ཀྱི་ལས་འགུལ་ཞིག་སྤེལ་སོང་།དེ་རིང་གི་ལས་འགུལ་དེའི་ཐོག  བཞུགས་སྒར་ཁུལ་གྱི་ས་གནས་ཀྱི་རྫོང་དཔོན་ལས་རོགས་Rahul Kumar དང་ཀང་ར་རྫོང་ཁོངས་ཀྱི་སྨན་པ་ཁག་ཅིག    དེ་བཞིན་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་དང་ཀུན་ཕན་དགེ་རྩ་ཚོགས་པའི་འགན་འཛིན་ཟླ་བ་ཚེ་རིང་ལགས། གཞན་ཡང་རྡ་ས་ས་གནས་འགོ་འཛིན་ཀུན་དགའ་ཚེ་རིང་ལགས་སོགས་ཀྱི་གཙོ་བྱས་པའི་སྨན་ཁབ་སྐྱོན་མཁན་རྒྱ་གར་ཡུལ་མི་དང་བོད་མི་ལྔ་བརྒྱ་ལྷག་ཅིག་མཉམ་འཛོམས་བྱུང་འདུགསྐབས་དེར་ཀང་ར་རྫོང་ཁོངས་ཀྱིི་ས་གནས་རྫོང་དཔོན་ལས་རོགས་Rahul Kumar ལགས་ཀྱིས་བཞུགས་སྒར་ཁུལ་གྱི་བོད་མིའི་གཞུང་འབྲེལ་མིན་པའི་ཚོགས་སྐྱིད་ཁག་ཅིག་གིས་དེ་རིང་རྒྱ་གར་གྱི་སྲིད་བློན་མོ་དྷི་མཆོག་གི་འཁྲུངས་སྐར་དང་བསྟུན་ནས་རིན་མེད་ཀྱིས་འགོག་ཁབ་སྐྱོན་རྒྱུའི་ལས་གཞི་ཞིག་སྤེལ་བར་བཀའ་དྲིན་ཆེ་ཞུས་ཏེ་འགོག་ཁབ་ཀྱིས་མ་འདང་བ་སོགས་བྱུང་ན་རྫོང་ལས་ཁུངས་ནས་མཁོ་སྤྲོད་གནང་རྒྱུ་ཡིན་པར་གསུངས་སོང་།དེ་བཞིན་སྐབས་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱིས་གསར་འགོད་པ་རྣམས་ལ།  རྒྱ་གར་གཞུང་དང་མི་མང་གིས་སྲིད་བློན་མཆོག་གི་འཁྲུངས་སྐར་སྲུང་བརྩི་ཞུ་བཞིན་པ་དང་བསྟུན་ནས་བཞུགས་སྒར་ཁུལ་དུ་ཡང་རྒྱ་གར་ཡུལ་མི་དང་ས་གནས་བོད་མི་རྣམས་ཀྱི་བར་དུ་མཐུན་ལམ་ཡག་པོ་ཡོངས་ཆེད་དུ་དེ་རིང་གི་རིན་མེད་ཀྱི་འགོག་ཁབ་སྐྱོན་པའི་ལས་གཞི་དེ་གོ་སྒྲིག་ཞུས་པ་ཞིག་ཡིན་པར་འགྲེལ་བརྗོད་གནང་སོང་།རྩ་བའི་བདེ་ལེགས་སྨན་ཁང་གི་མཐུན་འགྱུར་རོགས་རམ་ཁྲོད་ཟླ་བ་གསུམ་པའི་ཚེས་ཉེར་ལྔ་ནས་ཁ་སང་གི་བར་དུ་རྒྱ་གར་དང་བོད་མི་༦༢༣༢ ལྷག་ལ་སྔོན་ཁབ་སྐྱོན་ཡོད་པ་དང་། དེ་དག་ལས་བོད་མི་བཞི་སྟོང་ལྷག་དང་བཞུགས་སྒར་ཁུལ་གྱི་ཡུལ་མི་དྲུག་བརྒྱ་ལྷག་ལ་འགོག་ཁབ་སྐྱོན་ཡོད་འདུག གཞི་རྩའི་ཉེ་སྔོན་མགོན་པོ་གང་ཉིད་མཆོག་གིའདི་ལོའི་སྐུའི་འཁྲུངས་སྐར་གྱི་སྐབས་སུ་ཡང་རྒྱ་གར་གྱི་སྲིད་བློན་མོ་དྷི་མཆོག་གིས་ཞལ་པར་གྱི་ལམ་ནས་མགོན་པོ་གང་ཉིད་ལ་འཚམས་འདྲི་གནང་ཡོད་པ་དང་། དེ་རིང་མགོན་པོ་གང་ཉིད་མཆོག་གིས་་ཀྱང་སྲིད་བློན་མཆོག་གི་འཁྲུངས་སྐར་ལ་འཚམས་འདྲི་གནང་སྟེ་རྒྱ་གར་གཞུང་མང་གཉིས་བོད་མི་རྣམས་ལ་བཀའ་དྲིན་ཆེན་པོ་ཡིན་པར་ཐུགས་རྗེ་ཆེ་ཞུས་ཡོད་པ་རེད།

ཁ་སང་རྒྱ་གར་གྱི་ The Week གསར་ཁང་གི་དྲ་གནས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་དཔྱད་རྩོམ་ཞིག་འདོན་སྤེལ་གནང་བར་མགོན་པོ་༸གང་ཉིད་མཆོག་གིས་རྒྱ་གར་བ་ཚོས་རྒྱལ་གར་གྱི་གནའ་བོའི་རིག་གནས་དེ་འཛམ་གླིང་ཁྱོན་ལ་དར་སྤེལ་གནང་དགོས་པར་བཀའ་སྩལ་འདུགདཔྱད་རྩོམ་དེའི་ནང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་བདག་ཅག་གི་སྟོན་པ་མཉམ་མེད་ཤཱཀྱ་ཐུབ་པའི་གསུང་དེ་ནི་ང་ཚོའི་དངོས་ཀྱི་ཉམས་ལེན་ལ་ཉེ་བར་མཁོ་བ་ཞིག་དང་། དེ་ནི་གང་ཟག་གཅིག་དང་རྒྱལ་ཁབ་གཅིག་གཅིག་པོའི་ཆེད་དུ་མིན་པར་འགྲོ་བ་མི་ཀུན་ལ་སྨིན་པ་ཞིག་ཡིན་པ་དང་། མི་སུ་འདྲ་ཞིག་ཡིན་རུང་རང་གི་ནུས་པ་དང་འདུན་པ་ལ་གཞིགས་ཏེ་ལམ་དེའི་ཐོག་བསྐྱོད་ཆོག་གི་ཡོད་པ་དང་། མགོན་པོ་༸གང་ཉིད་མཆོག་ལྟ་བུར་ཆ་མཚོན་ན། ༸སྐུ་ན་ཆུང་དུས་ནས་ནང་ཆོས་ཐོག་བསླབ་པ་སློབ་གཉེར་གནང་བ་བཞིན་ད་ལྟ་དགུང་གྲངས་ ༨༦ ལ་ཕེབས་ཡོད་ཀྱང་ནང་པའི་གཞུང་ལུགས་སམ་ལྟ་གྲུབ་ཐོག་སློབ་གཉེར་མུ་མཐུད་ནས་མཛད་བཞིན་ཡོད་སྐོར་དང་སྦྲགས་ཏེ་མགོན་པོ་མཆོག་གིས་གོ་སྐབས་ནམ་བྱུང་ལ་ང་ཚོ་དུས་རབས་ཉེར་གཅིག་པའི་ནང་པ་ཞིག་གནང་བའི་ཐོག་ནས་སངས་རྒྱས་ཀྱི་བཀའ་ལ་ཐོས་བསམ་སྒོམ་གསུམ་གྱི་ཐོག་ནས་ཞིབ་དཔྱོད་ཀྱིས་མྱོང་འདྲིས་ཕུལ་ཕྱིན་ཐོན་པ་ཞིག་གནང་གལ་ཡིན་པར་ལམ་སྟོན་མཛད་བཞིན་ཡོད་པར་བཀའ་སྩལ་ཡོད། མགོན་པོ་མཆོག་གིས་ད་དུང་ང་ཚོའི་འཛམ་གླིང་འདིར་སངས་རྒྱས་སྐུ་དུས་ནས་བཟུང་སྟེ་འགྱུར་ལྡོག་ཆེན་པོ་ཕྱིན་ཡོད་པ་དེ་ལྟར་ཡང་། སངས་རྒྱས་ཀྱིས་དེ་སྔ་ལོ་ངོ་ ༢༥༠༠ ལྷག་གི་སྔོན་ལ་གསུངས་པའི་ལྟ་གྲུབ་རྣམས་དུས་ད་ལྟའང་འབྲེལ་བ་ཆེན་པོ་ཆགས་ཡོད་སྐོར་དང་འབྲེལ། ལེགས་སྦྱར་དང་པཱ་ལི་གཉིས་ཀའི་ནང་དུ་གཏི་མུག་དང་སྡུག་བསྔལ་ལས་བྲལ་ཐབས་གསལ་ཡོད་པ་བཞིན་མདོར་ན་སངས་རྒྱས་ཆོས་ཀྱི་ནང་དུ་གཞན་ལ་གནོད་འཚེ་མི་གནང་བ་དང་ཕན་པ་གང་ཐུབ་སྒྲུབ་དགོས་སྐོར་འཁོད་ཡོད་སྟབས། ང་ཚོའི་ངོས་ནས་ཚང་མ་བདེ་བ་འདོད་པ་དང་སྡུག་བསྔལ་མི་འདོད་མཁན་གྱི་འགྲོ་བ་མི་གཅིག་གྱུར་གྱི་དགོངས་པ་བཞེས་ཏེ་སྡུག་བསྔལ་ལས་ཐར་འདོད་ཀྱིས་བདེ་བ་འཚོལ་རྒྱུ་དེ་ནི་ང་ཚོ་མ་ལས་བཙས་མ་ཉིད་ནས་དབང་བའི་ཐོབ་ཐང་ཞིག་ཡིན་པ་དང་། གང་ཟག་སྒེར་གྱི་བདེ་སྐྱིད་དེ་ང་ཚོས་གཞན་ལ་ཕན་གནོད་ཀྱི་ལས་གང་བྱེད་ཀྱི་ཡོད་མེད་ལ་རག་ལུས་ཡོད་སྟབས། རང་གཅེས་འཛིན་གྱི་བསམ་བློ་དོར་ནས་ཕན་ཚུན་གུས་བརྩི་དང་གཞན་ཕན་གྱི་བློ་སྒོམ་ནས་དཀའ་ངལ་དང་སྡུག་བསྔལ་མང་དག་ཅིག་གི་རྩ་བ་ཡིན་པའི་རང་གཅེས་འཛིན་གྱི་བློ་དེ་དོར་ཐུབ་རྒྱུ་མ་ཟད། དོན་དམ་གྱི་བདེ་སྐྱིད་ཅིག་རྙེད་ཐུབ་རྒྱུ་ཡིན་པར་བཀའ་སྩལ་འདུགལྷག་པར་དུ་༸གོང་ས་མཆོག་གིས་ངས་ནི་ཁྱེད་ལ་ཐར་པའི་ལམ་སྟོན་གྱི། །ཐར་པ་རང་ལ་རག་ལས་ཤེས་པར་བྱ། །ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་འཕོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་མཛད། ཅེས་སངས་རྒྱས་ཀྱི་བཀའ་ལུང་འདྲེན་དང་སྦྲགས། རྩ་བའི་ནང་ཆོས་དེ་ནི་འཛམ་གླིང་ཁྲོད་ཀྱི་ཆོས་འདྲ་མིན་ལས་གཅིག་ཡིན་པ་དང་། ཆོས་ལུགས་ཚང་མས་བྱམས་རྩེའི་བསླབ་བྱ་གཅིག་གྱུར་གནང་གི་ཡོད་ཀྱང་། ནང་ཆོས་ལ་ཆོས་བརྒྱུད་གཞན་ལས་ཐུན་མོང་མ་ཡིན་པའི་ཁྱད་ཆོས་དམིགས་བསལ་བ་ཞིག་ཡོད་པ་ནི་སྟོན་པ་བཅོམ་ལྡན་འདས་ཀྱིས་དགེ་སློང་དག་གམ་མཁས་རྣམས་ཀྱིས། བསྲེག་བཅད་བརྡར་བའི་གསེར་བཞིན་དུ། ལེགས་པར་བརྟག་ལ་ང་ཡི་བཀའ། བླང་བར་བྱ་ཡི་གུས་ཕྱིར་མིན་ཞེས་བཀའ་སྩལ་བ་ལྟར་དཔྱད་པ་དང་བརྟག་པའི་ཐོག་ནས་ཉམས་སུ་ལེན་དགོས་པར་བློ་སྤོབས་སྦྱིན་པ་དེ་ཡིན་སྐོར་བཀའ་སྩལ་བ་དང་ཆབས་ཅིག རྒྱ་གར་ནི་སངས་རྒྱས་ཀྱི་ཞིང་ཁམས་ཡིན་པ་དང་ད་བར་བོད་མིའི་ངོས་ནས་རྒྱ་གར་ལ་དགེ་རྒན་གྱི་འདུ་ཤེས་འཛིན་བཞིན་ཡོད་ཀྱང་། ད་ལྟ་རྒྱ་གར་གྱི་ངོས་ནས་རང་གི་ཁྱད་དུ་འཕགས་པའི་ཤེས་ཡོན་དེ་གོ་ལ་ཁྱོན་ལ་དར་སྤེལ་གནང་རྒྱུའི་དུས་ལ་བབ་ཡོད་པར་བཀའ་སྩལ་བ་དང་འབྲེལ་ནས་དེའང་ཆོས་ལུགས་ལ་མ་བརྟེན་པ་དང་ཤེས་ཡོན་གྱི་ལམ་ལུགས་ཐོག་ནས་རིག་གཞུང་ཀུན་ལ་གུས་བརྩི་ཞུས་ཏེ་ཁྱབ་སྤེལ་གནང་དགོས་པར་ལམ་སྟོན་མཛད་ཡོད།ལྷག་དོན་༸གོང་ས་མཆོག་གིས་ང་ཚོ་ཚང་མས་འགྲོ་བ་མི་གཅིག་གྱུར་གྱི་བསམ་བློའི་ཐོག་ལ་འབད་བརྩོན་དང་དེ་ལྟར་གནང་རྒྱུར་ཡི་རངས་བསྔགས་བརྗོད་གནང་ཚེ་བདེ་ཞིང་སྐྱིད་པའི་འཛམ་གླིང་ཞིག་བསྐྲུན་ཐུབ་པར་ཐུགས་རེ་ཡོད་ཅེས་བཀའ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་དེའི་མཇུག་ཏུ་མགོན་པོ་མཆོག་ཐོག་མར་རྒྱ་གར་ལ་བཙན་བྱོལ་དུ་ཕེབས་སྐོར་དང་འབྲེལ་ནས་རྒྱ་གར་དང་བོད་དབར་དམིགས་བསལ་འབྲེལ་བ་ཞིག་ཡོད་པ་ཐུགས་ཚོར་བྱུང་བ་དྲན་གསོ་མཛད་པ་དང་སྦྲགས། རྒྱ་གར་གྱི་སྲིད་བློན་ Narendra Modi མཆོག་གིས་ཀྱང་རྒྱ་གར་འདི་ནི་བདག་ཅག་གི་སྟོན་པའི་ཡུལ་ཡིན་ཞེས་གསུངས་ཡོད་སྐོར་བཀའ་སྩལ་བ་དང་། ནང་ཆོས་ཀྱི་མཐར་ཐུག་གི་དམིགས་ཡུལ་ནི་འགྲོ་བ་མིར་ཕན་བདེ་བསྐྲུན་རྒྱུ་ཡིན་པར་བཀའ་སྩལ་འདུག་པ་མ་ཟད། ང་ཚོ་ནང་པ་ཡིན་མིན་ལ་མ་ལྟོས་པར་རྒྱ་གར་གྱི་སྙིང་རྗེ་དང་ཞི་གནས་བཅས་གཞིར་བཞག་པའི་གནའ་བོའི་རིག་གཞུང་སློབ་གཉེར་གནང་ཚེ་བདེ་སྐྱིད་དང་འཛམ་གླིང་འདི་ཡང་ཞི་བདེ་ལྡན་པ་ཞིག་ཡོང་ཐུབ་པར་ཐུགས་རེ་ཡོད་ཅེས་བཀའ་སྩལ་མཛད་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞེས་པ་དེ་འདོན་པ་འདོན་རྒྱུ་དང་སྨོན་ལམ་རྒྱག་རྒྱུ་ཁོ་ན་ཙམ་མིན་པར་གཙོ་བོ་དུག་གསུམ་གྱི་དབང་སྒྱུར་འོག་ཚུད་པའི་རྨོངས་པའི་ཤེས་པ་དེ་དག་སེལ་བར་ཤེས་རབ་ཀྱི་སྣང་བ་འབར་བའི་ཐོག་ནས་སེལ་དགོས་པར་ལམ་སྟོན་སྩལ་སོང་།དེ་རིང་སྔ་དྲོ་ཆུ་ཚོད་ ༩ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་སིངྒ་པོར་ནང་པའི་ཆོས་ཚོགས་གཙོས་པའི་ལྷོ་ཤར་ཨེ་ཤ་ཡའི་ནང་པའི་ཆོས་ཚོགས་ཁག་བཅུས་ཇི་ལྟར་གསོལ་བ་བཏབ་པ་ལྟར་སློབ་དཔོན་ཟླ་བ་གྲགས་པས་མཛད་པའི་དབུ་མ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་མཛད་པ་དེ་འཕྲོ་སྐྱོང་དང་ཆབས་ཅིག ནང་པའི་ཆོས་སྤྱི་དང་ལྷག་པར་དུ་ཤེར་ཕྱིན་གྱི་གཞུང་དེ་དག་གི་དགོས་པ་གང་ཡིན་ཤེས་དགོས་གལ་ཡིན་པ་དང་། ཆོས་ཞེས་པ་དེ་འདོན་པ་འདོན་རྒྱུ་དང་སྨོན་ལམ་རྒྱག་རྒྱུ་ཁོ་ན་ཙམ་མིན་པར་གཙོ་བོ་དུག་གསུམ་གྱི་དབང་སྒྱུར་འོག་ཚུད་པའི་རྨོངས་པའི་ཤེས་པ་དེ་དག་སེལ་བར་ཤེས་རབ་ཀྱི་སྣང་བ་འབར་བའི་ཐོག་ནས་སེལ་དགོས་པར་ལམ་སྟོན་སྩལ་སོང་།མགོན་པོ་༸གང་ཉིད་མཆོག་གིས་སྟོང་ཉིད་དང་བདག་མེད་ཀྱི་རྣམ་གཞག་དང་འབྲེལ་ཤེས་རབ་སྙིང་པོ་ནི་སངས་རྒྱས་ཆོས་ཀྱི་སྙིང་པོ་ཞིག་ཡིན་པ་དང་། དེའང་སྟོང་པ་ཉིད་དང་བདག་མེད་པའི་རྣམ་གཞག་དེ་ནི་སངས་རྒྱས་ཆོས་ཀྱི་གྲུབ་མཐའ་སྨྲ་བ་ཚང་མས་གསུངས་ཡོད་པ་སོགས་ངོ་སྤྲོད་མཛད་པ་མ་ཟད། ལྷག་པར་དུ་སངས་རྒྱས་ཀྱི་ཆོས་ནང་གསུངས་པའི་སྡུག་བསྔལ་དང་བདེ་བ་ཞེས་པ་ནི་རྒྱུ་དང་རྐྱེན་ལ་བརྟེན་ནས་བྱུང་དགོས་པ་དང་། སྡུག་བསྔལ་གྱི་རྒྱུ་གཙོ་བོ་མ་རིག་པ་དེ་ནི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཐོག་ནས་སེལ་དགོས་པ་དང་། ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་བསམ་བློ་ཇི་ཙམ་ཡོད་པ་དེའི་ཚོད་ཀྱིས་བླང་དོར་གྱི་གནས་ཤེས་ཐུབ་པ་སོགས་༸སྐུ་དངོས་ཀྱི་མྱོང་བ་དང་བཅས་ཏེ་བཀའ་སྩལ་ཡོད།དེ་བཞིན་དེ་རིང་གི་བཀའ་ཆོས་རེ་ཞིག་མཇུག་སྒྲིག་དང་བསྟུན་མགོན་པོ་༸གང་ཉིད་མཆོག་གིས་དྲ་ཐོག་ཏུ་ལྷན་ཞུགས་གནང་བའི་དད་ལྡན་ཆོས་ཞུ་བ་ཁག་ཅིག་གིས་དགེ་མི་དགེའི་ལས་དང་སེམས་སྡུག་རིགས་བྱུང་སྐབས་གདོང་ལེན་ཇི་ལྟར་གནང་ཚུལ་སོགས་ཀྱི་ཐད་ལ་བཀའ་འདྲི་དགོངས་སྐོར་ཞུས་ཁག་བཀའ་ལན་མཛད་ཡོད།ལྷག་པར་དུ་ཆོས་ཞུ་བ་རྒན་གྲས་ཤིག་གིས་འཆི་ལ་ཉེ་བའི་སྐབས་སུ་དགོངས་པ་བཞེས་ཕྱོགས་གང་འདྲ་དགོས་མིན་ཐད་ལ་བཀའ་འདྲི་ཞུས་ཡོད་པ་དང་། མགོན་པོ་༸གང་ཉིད་མཆོག་གིས་འཆི་ལ་ཉེ་བའི་སྐབས་སུ་ཆགས་སྡང་དང་འབྲེལ་བའི་དགོངས་པ་མ་བཞེས་པར་རང་ཉིད་ཀྱི་མདུན་དུ་བདག་ཅག་གི་སྟོན་པ་ཐུབ་པའི་དབང་པོའི་སྐུ་བརྙན་དང་། ཡང་ན་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་བཞག་ནས་སོ་སོའི་ཤེས་པ་རགས་པ་དེ་དེར་ཐིམ་པའི་བསམ་བློ་རྩེ་གཅིག་ཏུ་གནས་ཐུབ་ཚེ་དགེ་མཚན་ཆེན་པོ་ཡོད་པ་སོགས་ལམ་སྟོན་བཀའ་དྲིན་ཆེ་བ་སྩལ་ཡོད།ཐེངས་འདིའི་ཉིན་གྲངས་གཉིས་ཀྱི་བཀའ་ཆོས་དང་བཀའ་འདྲི་དགོངས་སྐོར་ཞུ་རྒྱུའི་མཛད་རིམ་ཁག་ལེགས་པར་གྲུབ་མཚམས་སུ་མགོན་པོ་༸གང་ཉིད་མཆོག་གིས་དད་ལྡན་ཆོས་ཞུ་བ་རྣམས་ལ་ཐུགས་བརྩེ་བ་ཆེན་པོའི་ཐོག་ནས་ཐམས་བཅད་རྣལ་འབྱོར་གྱི་སེམས་བསྐྱེད་བཀའ་དྲིན་ཆེ་བ་སྩལ་ཡོད།

རྒྱ་ནག་གི་གཞུང་འབྲེལ་Global Times གསར་ཁང་གིས་དེ་རིང་གནས་ཚུལ་སྤེལ་བའི་ནང་དུ།  རྒྱ་ནག་གི་་ཆིན་རྒྱལ་རབས་ཀྱི་གོང་མ་ཨན་བན་དང་འབྲེལ་བའི་གློག་བརྙན་གསར་བ་ཞིག་མི་འགྱངས་བར་ཕྱིར་འདོན་བྱེད་རྒྱུ་ཡིན་ལུགས་སྦྲགས་ཏེ། ལྟད་མོ་དེའི་བརྗོད་སྙིང་གཙོ་བོ་ནི་རྒྱ་ནག་གི་ཆིན་གོང་མས་བོད་ས་དབང་སྒྱུར་གྱིས་བལ་ཡུལ་གྱི་གོར་ཁ་དམག་འཐབ་ལས་བོད་ས་སྲུང་སྐྱོབ་བྱས་པ་གཙོ་བོར་བསྟན་ཡོད་པ་ཞིག་ཡིན་པར་བསྒྲགས་ཏེ། གློག་བརྙན་དེ་ནི་རྒྱ་ནག་གིས་བོད་ལ་བཅིངས་གྲོལ་ཟེར་བ་བཏང་ནས་མི་ལོ་བདུན་ཅུ་འཁོར་བའི་དུས་སྟོན་གྱི་ཆ་ཤས་ཤིག་ཏུ་སྟོན་རྒྱུ་ཡིན་པར་བསྒྲགས་འདུགགསར་ཤོག་དེའི་ནང་དུ། རྒྱ་ནག་ཕྱི་ལོག་གི་བརྒྱུད་ལམ་ཁག་ཅིག་ནས་གློག་བརྙན་དེ་ནི་རྒྱ་ནག་གིས་ཆེད་དུ་ཏཱ་ལའི་རུ་ཚོགས་ལ་ཉེན་བརྡ་བཏང་བ་ཞིག་ཡིན་པར་འགྲེལ་བརྗོད་བྱེད་མཁན་བྱུང་ཡོད་སྐོར་བརྗོད་པ་མ་ཟད།  རྒྱ་ནག་གི་ཉམས་ཞིབ་པའི་ལྟད་མོ་དེར་སྡོམ་རྒྱབ་པ་ཞིག་ལུང་འདྲེན་བྱས་ཏེ། གློག་བརྙན་དེས་ཏྭ་ལའི་རུ་ཚོགས་ལ་བརྡ་ལན་ཞིག་སྤྲད་ཚེ། དེ་ནི་རྒྱ་ནག་གཞུང་གི་ད་བར་འགྱུར་བ་མེད་པའི་ཐོག་ནས་བཟུང་པའི་ལངས་ཕྱོགས་ཏེ། ཁ་བྲལ་གྱི་ལས་འགུལ་དེ་ནམ་ཡང་ལེགས་འགྲུབ་བྱུང་ཐབས་མེད་པ་དང་། རྒྱ་ནག་གི་ངོས་ནས་རྒྱལ་ཁབ་ཀྱི་བདག་དབང་དང་ས་ཁོངས་གོང་བུ་སྲུང་སྐྱོབ་བྱེད་རྒྱུའི་ཆོད་སེམས་བརྟན་པོ་ཡོད་པ་དེ་རེད་ཅེས་འགྲེལ་བརྗོད་བྱས་འདུག Global Times གསར་ཁང་གིས་བརྗོད་པ་ལྟར་ན། གློག་བརྙན་དེ་ནི་རྒྱ་ནག་གི་གོང་མ་ཆིན་ལོང་གི་སྐབས་ཏེ། པཎ་ཆེན་སྐུ་ཕྲེང་དྲུག་པའི་སྤུན་མཆེད་ཀྱིས་ཕྱི་ལོག་གི་སྟོབས་ཤུགས་དང་ཟླ་སྒྲིལ་གྱིས་བོད་ས་དབང་སྒྱུར་བྱེད་ཐབས་ལ་དམིགས་ཏེ་བཀྲ་ཤིས་ལྷུན་པོ་དགོན་པ་ཇག་བཅོམ་བྱས་པའི་སྐབས་སུ། ཆིན་གོང་མས་དམག་སྤྱི་བོད་དུ་བཏང་སྟེ། བོད་དང་མན་ཇུ། དེ་བཞིན་ཧན་མི་རིགས་དང་སོག་པོ་སོགས་ས་ཁོངས་གཅིག་སྒྲིལ་གྱིས་ཕྱི་ལོག་གི་བཙན་འཛུལ་བ་ཕྱིར་ཕུད་བཏང་སྟེ། གྲངས་ཉུང་མི་རིགས་རྣམས་ཀྱི་སྟོབས་ཤུགས་གཅིག་སྒྲིལ་བྱས་པ་མ་ཟད། བོད་ཀྱི་སྲིད་གཞུང་ལ་སྲུང་སྐྱོབ་བྱས་ཏེ། སྐབས་དེ་ནས་བཟུང་བོད་ཏུ་ཡང་སྲིད་ཐག་གཅོད་གནང་སྟངས་ཀྱི་གསེར་བུམ་དཀྲུག་སྲོལ་གསར་དུ་ལག་བསྟར་བྱས་པ་ཞིག་ཡིན་ཚུལ་བརྗོད་འདུག དེ་བཞིན་རྒྱ་ནག་གི་ཉམས་ཞིབ་པས་སྐབས་དེ་ནས་བོད་དུ་གསེར་བུམ་དཀྲུག་སྲོལ་བྱུང་བ་ལྟར། བོད་ཀྱི་རྒྱལ་བ་པཎ་ཆེན་གཉིས་ཀྱི་ཡང་སྲིད་ཀྱང་གསེར་བུམ་དཀྲུག་ནས་ཐག་གཅོད་བྱེད་ཀྱི་ཡོད་ནའང་། ད་ཆ་༸གོང་ས་མཆོག་གི་གཙོ་བྱས་པའི་ཁ་བྲལ་བ་ཚོས་ལམ་ལུགས་དེར་ངོས་ལེན་མ་བྱས་པར་༸གོང་ས་མཆོག་གི་ཡང་སྲིད་དང་འབྲེལ་བའི་དྲིལ་བསྒྲགས་བྱེད་ཀྱི་ཡོད་པར་བརྗོད་པ་མ་ཟད། ༸གོང་ས་ཏཱ་ལའི་བླ་མ་ནི་ཆོས་བ་རྣམ་དག་ཅིག་མིན་པར་བཙན་བྱོལ་དུ་གྱར་བའི་ཁ་བྲལ་བ་ཞིག་ཡིན་པའི་མཚན་སྨོད་བྱས་འདུག གོང་གི་གནས་ཚུལ་དེ་དང་འབྲེལ་ནས་འདི་གའི་གསར་འགོད་པས་ཐེ་ཝན་དོན་གཅོད་དང་སྤྱི་ཟུར་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་རྒྱ་ནག་གི་ཐེངས་འདིའི་གློག་བརྙན་འདི་ནི་ལོ་འགའ་ཤས་ཀྱི་གོང་ནས་འཆར་གཞི་ལྡན་པའི་ཐོག་ནས་བཟོ་སྐྲུན་བྱས་ཏེ། ལོ་རྒྱུས་ཀྱི་ཐོག་ནས་བོད་རྒྱ་ཁོངས་ཡིན་པ་དང་། ཆོས་ལུགས་ཀྱི་ཐོག་ནས་༸གོང་ས་སྐུ་ཕྲེང་༡༤་པ་མཆོག་རྒྱལ་སྤྱིའི་སྟེང་ནས་མཛད་འཕྲིན་རྒྱས་བཞིན་ཡོད་སྟབས་སྐུ་ཕྲེང་བཅོ་ལྔ་བ་དེ་རྒྱ་ནག་རང་གིས་གདམ་ཐབས་སུ་ལོ་རྒྱུས་ཀྱི་ཁྲོད་དུ་ཆོས་ལུགས་ཀྱི་བཀའ་དབང་རྒྱ་ནག་ལ་ཡོད་པ་སོགས་ཀྱི་ལོ་རྒྱུས་ལ་འཁྱོགས་བརྗོད་བྱེད་བཞིན་པའི་གནད་དོན་ཞིག་ཆགས་ཡོད་པར་ངོ་སྤྲོད་གནང་སོང་། དེ་བཞིན་ཁོང་གིས་གོར་ཁ་དམག་མི་མཐར་སྐྲོད་བཏང་ཟིན་པའི་རྗེས་སུ་བོད་དང་འབྲེལ་མཐུད་ཀྱི་ཕྱིར་ཏུ་ཨན་བན་ལས་ཁུངས་བོད་དུ་བཙུགས་པ་དང་དེ་བཞིན་བོད་ཀྱི་ཆབ་སྲིད་ཀྱི་འཛིན་སྐྱོང་དང་ལ་ལེགས་བཅོས་ཀྱི་དོན་ཚན་ཉེར་དགུ་ཅན་གྱི་བསམ་ཚུལ་ཞིག་ཕུལ་བ་ཙམ་ལས་བོད་ཀྱི་བདག་དབང་ཡོངས་སུ་རྫོགས་ལ་རྒྱ་ནག་ལ་ཡོད་པར་བརྗོད་བཞིན་པ་དེ་ནི་ལོ་རྒྱུས་ཐོག་རྩ་བ་ཉིད་ནས་གཞི་རྩ་མེད་པ་ཞིག་ཆགས་ཡོད་པར་འགྲེལ་བརྗོད་གནང་སོང་། དེ་བཞིན་བོད་ཀྱི་སྲིད་བྱིས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་ཚེ་བརྟན་ལགས་ཀྱིས་རྒྱ་ནག་གིས་དུས་རྒྱུས་ནས་རྣམ་པ་འདྲ་མིན་གྱི་ཐོག་ནས་ཆབ་སྲིད་དགོས་མཁོ་ལ་དམིགས་པའི་དྲིལ་བསྒྲགས་ཀྱི་རིགས་བྱེད་ཀྱི་ཡོད་པ་ལྟར། གློག་བརྙན་འདི་ལ་མཚོན་ན་ཡང་གཙོ་བོ་ལོ་རྒྱུས་ཀྱི་ཐོག་བོད་རྒྱལ་ཁོངས་ཡིན་པ་དང་རྒྱ་ནག་ལ་བོད་ཀྱི་བདག་དབང་ཡོད་པར་དྲིལ་བསྒྲགས་བྱེད་ཐབས་དང་། དེ་བཞིན་བོད་དང་ཆིན་གོང་མའི་བར་གྱི་མཆོད་ཡོན་གྱི་འབྲེལ་བ་བརྒྱུད་ནས་སྐུའི་ཡང་སྲིད་ཀྱི་བདག་དབང་ཡང་རྒྱ་ནག་ལ་ཡོད་པར་སྒྲུབ་པར་འབད་བརྩོད་བྱེད་བཞིན་པའི་དྲིལ་བསྒྲགས་ཁོ་ན་ཡིན་པར་ངོ་སྤྲོད་གནང་སོང་། གཞི་རྩའི་ཨན་བན་ཞེས་པའི་གློག་བརྙན་དེ་ནི་ཕྱི་ལོ་ ༢༠༡༦ ལོར་བཟོ་བསྐྲུན་གྱིས་ཕྱི་ལོ་ ༢༠༡༧ ལོར་དངོས་སུ་གཟིགས་འབུལ་ཞུ་རྒྱུར་ཐག་གཅོད་བྱས་ཡོད་ཀྱང་། ཕྱིས་སུ་གློག་བརྙན་དེ་དུས་ཐོག་ཏུ་འདོན་སྤེལ་མ་བྱས་པར་ལོ་བཞིའི་རིང་ལ་ཕྱིར་འགྱངས་བྱས་པ་ཞིག་ཡིན་པ་དང་། འདི་ལོར་རྒྱ་ནག་གི་བོད་ཞི་བའི་བཅིངས་གྲོལ་ཟེར་བ་བཏང་ནས་ལོ་བདུན་ཅུ་འཁོར་བའི་དུས་སྟོན་གྱི་ཆ་ཤས་སུ་ཕྱིར་འདོན་གནང་རྒྱུ་ཡིན་པར་བསྒྲགས་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སིངྒ་པོར་ནང་པའི་ཆོས་ཚོགས་གཙོས་པའི་ལྷོ་ཤར་ཨེ་ཤ་ཡའི་ནང་པའི་ཆོས་ཚོགས་ཁག་བཅུས་ཇི་ལྟར་གསོལ་བ་བཏབ་པ་ལྟར་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་བཀའ་དྲིན་བསྐྱངས་ཡོད།དེ་རིང་སྔ་དྲོ་ཆུ་ཚོད་ ༩ ནས་ ༡༠ བར་༸གོང་ས་༸སྐྱབས་མགོན་ཆེན་པོ་མཆོག་གིས་དྷ་རམ་ས་ལའི་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་དྲྭ་རྒྱ་བརྒྱུད་སིངྒ་པོར་གཙོས་པའི་ལྷོ་ཤར་ཨེ་ཤ་ཡའི་ནང་པའི་ཆོས་ཚོགས་ཁག་བཅུའི་དད་ལྡན་མང་ཚོགས་རྣམས་ལ་དབུ་མ་ལ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་མ་བསྐྱང་གོང་སྔོན་འགྲོའི་ནང་ཆོས་ངོ་སྤྲོད་སྩལ་བ་དང་འབྲེལ་ཏེ་སངས་རྒྱས་ཀྱི་ཆོས་ ནི་དད་པ་དང་ཡིད་ཆེས་ཁོ་ནའི་རྗེས་སུ་འབྲང་རྒྱུ་ཞིག་མིན་པ་དང་། སྟོན་པ་བཅོམ་ལྡན་འདས་ཀྱིས་དགེ་སློང་དག་གམ་མཁས་རྣམས་ཀྱིས། བསྲེག་བཅད་བརྡར་བའི་གསེར་བཞིན་དུ། ལེགས་པར་བརྟག་ལ་ང་ཡི་བཀའ། བླང་བར་བྱ་ཡི་གུས་ཕྱིར་མིན་ཞེས་བཀའ་སྩལ་བ་ལྟར་དཔྱད་པ་དང་བརྟག་པའི་ཐོག་ནས་ཉམས་སུ་ལེན་རྒྱུ་ཞིག་ཡིན་པར་བཀའ་སྩལ་ཡོད།  དེ་བཞིན་༸གོང་ས་མཆོག་གིས་བོད་ཀྱི་སྐད་ཡིག་ཐོག་ཡོད་པའི་ནང་པའི་ཆོས་འདི་དུས་རབས་བདུན་པའི་སྐབས་ནས་ཆོས་རྒྱལ་རྣམ་པ་ཚོས་སྐུ་ལས་བསྐྱོན་པའི་སྐུ་དྲིན་ལ་བརྟེན་ནས་བྱུང་བ་ཞིག་ཡིན་པ་དང་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་དུས་སུ་མཁན་ཆེན་ཞི་བ་འཚོ་བོད་ལ་གདན་ཞུས་ཀྱིས་སངས་རྒྱས་ཀྱི་བཀའ་དང་བསྟན་བཅོས་མང་པོ་ཞིག་བོད་སྒྱུར་གནང་ཡོད་པ་སོགས་ངོ་སྤྲོད་མཛད་ཡོད། འཛམ་གླིང་ཐོག་ཆགས་སྡང་གི་རྐྱེན་གྱིས་དཀའ་ངལ་མང་པོ་ཞིག་འཕྲད་བཞིན་ཡོད་པ་སོགས་བཀའ་སྩལ་བ་དང་འབྲེལ་ཏེ་མགོན་པོ་༸གང་ཉིད་མཆོག་གིས་དཀའ་ངལ་དེ་དག་སེལ་ཐབས་དང་འགྲོ་བ་སྤྱིར་ཕན་ཐོགས་ཡོང་རྒྱུར་དགོངས་པ་ཆེ་བཞེས་ཀྱིས་བྱམས་པ་དང་བརྩེ་བའི་བསམ་པ་སྤེལ་རྒྱུའི་ཐོག་ཐུགས་བརྩོན་མཛད་བཞིན་ཡོད་པ་དང་། སྡུག་བསྔལ་དང་དཀའ་ངལ་དེ་དག་གི་རྒྱུ་གཙོ་བོ་ནི་ཆགས་སྡང་དང་ཁོང་ཁྲོ་ལ་བརྟེན་ནས་ཡོང་གི་ཡོད་སྟབས་བྱམས་བརྩེ་དང་སྙིང་རྗེའི་བསམ་པ་གོང་སྤེལ་གནང་ཐུབ་ཚེ་འགྲོ་བ་ཕན་ཚུན་དབར་བརྩེ་སེམས་དང་འཆམ་མཐུན་ཡོང་ངེས་ཡིན་པ་མ་ཟད་འཛམས་གླིང་འདི་བདེ་ཞིང་སྐྱིད་པ་ཞིག་ཡོང་གི་རེད་ཅེས་ལམ་སྟོན་བཀྲིན་ཆེ་བ་སྩལ་ཡོད། སྔོན་འགྲོའི་ནང་ཆོས་ངོ་སྤྲོད་གྲུབ་མཚམས་སུ་༸གོང་ས་མཆོག་གིས་དད་ལྡན་མང་ཚོགས་རྣམས་ལ་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་བཀའ་དྲིན་བསྐྱངས་པ་དང་། མགོན་པོ་༸གང་ཉིད་མཆོག་ནས་སྙིང་རྗེ་ཉམས་སུ་ལེན་རྒྱུ་ནི་འགྲོ་བ་མི་ཙམ་མིན་པར་སེམས་ཅན་དུད་འགྲོ་ཚུན་ཆད་ལ་ཕན་པ་དང་བདེ་བ་བསྐྲུན་ཐུབ་པའི་རྒྱུ་གལ་ཆེན་པོ་ཞིག་ཡིན་སྐོར་བཀའ་སྩལ་བ་དང་ཆབས་ཅིག སྟོང་པ་ཉིད་ཀྱི་ལྟ་བའི་གལ་ཆེའི་རང་བཞིན་སོགས་ངོ་སྤྲོད་མཛད་ཡོད།དེ་རིང་བཀའ་ཆོས་མཇུག་སྒྲིལ་མ་གནང་གོང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ཐོག་ནས་ལྷན་ཞུགས་གནང་བའི་དད་ལྡན་ཆོས་ཞུ་ཁག་ཅིག་གི་བཀའ་འདྲི་དགོངས་སྐོར་ཞུས་པར་བཀའ་ལན་སྩལ་བའི་ཁྲོད་བཟང་པོའི་ལས་ལ་ཆགས་པ་མེད་པར་ཇི་ལྟར་འཇུག་ཚུལ་དང་། འཛམ་གླིང་ཐོག་སྐྱབས་བཅོལ་བའི་གནས་སྟངས་དང་འབྲེལ་ནས་དཀའ་ངལ་འདྲ་མིན་འཕྲད་བཞིན་པའི་གནད་དོན་སོགས་ཀྱི་ཐོག་བཀའ་འདྲི་ཞུས་དོན་བཞིན་ལམ་སྟོན་མཛད་ཡོད་པ་རེད།ཆོས་ཞུ་བ་ཁག་ཅིག་གིས་ཚན་རིག་དང་ནང་ཆོས་དབར་གྱི་འབྲེལ་བ་དང་ད་ལྟ་འཛམ་གླིང་ཐོག་འཕྲད་བཞིན་པའི་རིམས་ནད་ཀྱི་དཀའ་ངལ་སོགས་དང་འབྲེལ་བའི་བཀའ་འདྲི་ཞུས་པར་༸གོང་ས་མཆོག་གིས་ཚན་རིག་དང་ནང་ཆོས་དབར་འབྲེལ་བའི་ཆ་ཤས་གཙོ་བོ་ནི་སེམས་ཁམས་རིག་པའི་རྣམ་གཞག་ཡིན་པ་དང་། དེའང་ནང་པའི་གཞུང་ལུགས་ཏུ་གསུངས་པའི་སེམས་ཁམས་ཀྱི་རྣམ་གཞག་དེ་དག་གིས་ཚན་རིག་པར་ཕན་ཐོགས་ཆེན་པོ་བྱུང་གི་ཡོད་པ་སོགས་བཀའ་སྩལ་བ་མ་ཟད། ད་ལྟའི་ནད་ཡམས་དང་འབྲེལ་བའི་གནད་དོན་ཐོག་སྨན་པ་དང་ཚན་རིག་མཁས་པ་ཚོས་དཔྱད་ཞིབ་གནང་བའི་གྲུབ་དོན་ལ་ཐུགས་སྣང་གནང་གལ་ཡིན་པ་དང་། ནད་ཡམས་ཀྱི་རྐྱེན་གྱིས་སེམས་མ་སྐྱིད་པའི་གནད་དོན་རིགས་བྱུང་སྐབས་ནང་པའི་གཞུང་ལུགས་ཏུ་གསུངས་པའི་སེམས་ཁམས་རིག་པ་དང་འབྲེལ་བའི་རྣམ་གཞག་ལ་ཐུགས་སྣང་གནང་ན་ཕན་ཐོགས་ཆེན་པོ་ཡོད་པར་ལམ་སྟོན་བཀྲིན་ཆེ་བ་སྩལ་ཡོད།

༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱ་བརྒྱུད་ནས་ཟླ་བ་འདིའི་ཚེས་ ༨ དང་ཚེས་ ༩ དེ་བཞིན་ཚེས་ ༢༢ གཞན་ཡང་ཕྱི་ཟླ་བཅུ་པ་དང་བཅུ་གཅིག བཅུ་གཉིས་བཅས་སོ་སོར་བཀའ་ཆོས་དང་བཀའ་སློབ་ཀྱི་མཛད་འཆར་ཁག་ཅིག་བསྐྱང་གཏན་འཁེལ་འདུག༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་དྷ་རམ་ས་ལའི་བཞུགས་སྒར་༸རྒྱལ་བའི་ཕོ་བྲང་གི་གཟིམ་ཆུང་ནས་དྲྭ་རྒྱ་བརྒྱུད་བཀའ་ཆོས་དང་བཀའ་སློབ་ཁག་ཅིག་སྩལ་གཏན་ཁེལ་དོན་ལྟར་བསྐྱང་རྒྱུའི་མཛད་འཆར་ཁག་ཅིག་ཡོངས་བསྒྲགས་གནང་འདུགཟླ་བ་འདིའི་ཕྱི་ཚེས་ ༨ དང་ཚེས་ ༩ ཉིན་གཉིས་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སིངྒ་པོར་ནང་པའི་ཆོས་ཚོགས་ TBC གཙོས་ལྷོ་ཤར་ཨེ་ཤ་ཡའི་ནང་པའི་ཆོས་ཚོགས་ཁག་བཅུས་ཇི་ལྟར་གསོལ་འདེབས་ཞུས་དོན་ལྟར་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པའི་རང་འགྲེལ་གྱི་བཀའ་ཆོས་དང་། དེ་རྗེས་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་སྩལ་རྒྱུ་བཅས་ཀྱི་དྲྭ་ཐོག་མཛད་འཆར་ཐུགས་གཏན་ཁེལ་འདུག དེ་བཞིན་ཚེས་ ༢༢ ༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིིའི་མོན་མའོ་ཐི་གཙུག་ལག་སློབ་ཆེན་གྱིས་ཇི་ལྟར་གསོལ་བ་བཏབ་པ་བཞིན་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་བཀའ་སློབ་བསྩལ་རྒྱུ་དང་ཚོགས་པའི་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་རྒྱུ་ཡིན་པ་རེད།གཞན་ཡང་ཕྱི་ཟླ་ ༡༠ ཚེས་ ༩ དང་ཚེས་ ༡༠ བཅས་ཉིན་གཉིས་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་གྱི་དད་ལྡན་ཆོས་ཞུ་བ་རྣམས་ཀྱིས་ཇི་ལྟར་གསོལ་འདེབས་ཞུས་པ་ལྟར་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་བཀའ་ཆོས་སྩལ་རྒྱུ་དང་ཆོས་ཞུ་བའི་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་རྒྱུ་མ་ཟད། ཕྱི་ཚེས་ ༢༦  ༸གོང་ས་༸སྐྱབས་མགོན་ཆེན་པོ་མཆོག་གིས་བྷོལ་ཌར་ས་གནས་ཀྱི་ཀོ་ལོ་ར་ཌོ་གཙུག་ལག་སློབ་ཆེན་གྱི་རི་ནི་ཁཱརོན་བདེ་གནས་སློབ་གྲྭ་དང་སེན་ཌིའེ་གོའི་ཁ་ལི་ཕོ་ཉའི་གཙུག་ལག་སློབ་ཆེན་གྱི་བྱམས་བརྩེའི་སློབ་ཁང་གཉིས་ཀྱིས་ཇི་ལྟར་གསོལ་བ་བཏབ་པ་བཞིན་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ བར་བྱམས་བརྩེའི་སྐོར་ལ་བཀའ་སློབ་སྩལ་རྒྱུ་དང་དེ་རྗེས་བཀའ་འདྲི་དགོངས་སྐོར་ཞུས་པ་ཁག་ལ་བཀའ་ལན་སྩལ་རྒྱུ་བཅས་ཀྱི་དྲྭ་ཐོག་མཛད་འཆར་ཐུགས་གཏན་ཁེལ་ཡོད།དེ་བཞིན་ཕྱི་ཟླ་ ༡༡ ཚེས་ ༤ དང་ཚེས་ ༥ ཉིན་གཉིས་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ཨུ་རུ་སུའི་ནང་པའི་རྗེས་འཇུག་པ་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར་ རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་༸རྗེ་བཙུན་བྱམས་པ་མགོན་པོས་མཛད་པའི་མདོ་སྡེ་རྒྱན་གྱི་བཀའ་ཆོས་དང་བཀའ་འདྲི་ཁག་ལ་བཀབའ་ལན་སྩལ་རྒྱུ་དང་། ཕྱི་ཟླ་ ༡༢ ཚེས་ ༡ ཉིན་༸གོང་ས་མཆོག་གིས་འཛམ་གླིང་ཡེ་ཤུའི་སྒོམ་སྒྲུབ་ཚོགས་སྡེ་ World Community of Christian Meditation ཞེས་པ་དབུ་བརྙེས་ནས་ལོ་ངོ་ ༣༠ འཁོར་བའི་དུས་དྲན་དང་བསྟུན་རྒྱ་གར་སྔ་དྲོ་ཆུ་ཚོད་ ༩ ནས་ ༡༠ བར་དྲ་ལམ་བརྒྱུད་ཚོགས་པ་གསར་འཛུགས་གནང་མཁན་དང་དགེ་རྒན་ཡེ་ཤུའི་རབ་བྱུང་བ། Father Laurence Freeman ལགས་དང་ལྷན་དུ་བགྲོ་གླེང་མཛད་གཏན་ཁེལ་འདུག་པ་མ་ཟད། དེ་བཞིན་ཚེས་ ༨ ཉིན་རྒྱ་གར་གྱི་སྔ་དྲོ་ཚོུད་ ༩ ནས་ ༡༠ བར་ཚོུད་གཅིག་རིང་ The Mind and Life Institute ཞེས་པའི་སེམས་དང་སྲོག་གི་ཚོགས་པས་གོ་སྒྲིག་དང་གསོལ་འདེབས་ཞུས་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་ཐོག་ནས་བགྲོ་གླེང་དང་དེ་རྗེས་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་རྒྱུ་བཅས་ཀྱི་དྲྭ་ཐོག་མཛད་འཆར་ཁག་ཅིག་ཐུགས་གཏན་ཁེལ་ཡོད་པ་རེད།གཞི་རྩའི་དྲྭ་ལམ་ཐད་གཏོང་བརྒྱུད་བཀའ་ཆོས་དང་བཀའ་སློབ་དེ་དག་དགའ་ལྡན་ཕོ་བྲང་གི་གཞུང་འབྲེལ་བརྒྱུད་ལམ་ཁག་ནས་བོད་དབྱིན་རྒྱ་སྐད་སོགས་སྐད་རིགས་སྣ་མང་ཐོག་གསུང་བསྒྱུར་གྱིས་ཐད་གཏོང་གནང་གི་ཡོད་པ་དང་། ཏོག་དབྱིབས་གཉན་རིམས་ ༡༩ དེ་ཉིད་རྒྱ་ནག་ནས་ཆེས་ཐོག་མར་ཁྱབ་གདལ་བྱུང་བ་ནས་བཟུང་སྟེ་གསན་གཟིགས་གནང་མཁན་ཚོས་རང་ཉིད་ཀྱི་གནས་ཡུལ་རྒྱལ་ཁབ་དང་དེའི་ས་གནས་སོ་སོར་བཅས་པའི་སྤྱི་ཚོགས་རྒྱང་བཀྱེད་ཀྱི་བཀའ་རྒྱ་ལས་མི་འདའ་བར་གསན་གཟིགས་གནང་དགོས་པའི་གཞེན་སྐུལ་གནང་ཡོད་སྟབས། མང་ཚོགས་ནས་དེ་དོན་དགོངས་འཇགས་ཞུ།།

རྒྱ་གར་བྱང་ཕྱོགས་ཁུལ་དུ་ཆགས་པའི་ Uttar Pradesh མངའ་སྡེ་ནང་གི་སློབ་གྲྭ་ཁག་ཏུ་བདེ་སྐྱིད་སྐྲུན་ཐབས་སམ་ Happiness Curriculum ཞེས་པའི་བསླབ་གཞི་གསར་པ་དེ་ཕྱག་བསྟར་གནང་འཆར་འདུགཁ་སང་རྒྱ་གར་གྱི་ News18 ཞེས་པའི་གསར་ཁང་གིས་གནས་ཚུལ་སྤེལ་བར་སྤྱི་ཁྱབ་བློན་ཆེན་སྐུ་ཞབས་ Yogi-Adityanath མཆོག་གིས་དབུ་ཁྲིད་པའི་ཨུ་ཏྟར་པྲདེཤ་མངའ་སྡེ་གཞུང་གིས་མངའ་སྡེའི་ཁྱབ་ཁོངས་སུ་ཡོད་པའི་རྫོང་ཁག་ ༡༥ ནང་གི་སློབ་གྲྭ་ཁག་ཏུ་བདེ་སྐྱིད་སྐྲུན་ཐབས་ཀྱི་བསླབ་གཞི་དངོས་སུ་ཕྱག་བསྟར་གནང་འཆར་ཡོད་པ་དང་། དེའང་སྔོན་འགྲོའི་ཆ་ལ་རྫོང་ཁག་བཅོ་ལྔ་ནང་ཡོད་པའི་སློན་གྲྭ་བཅུ་རེའི་ནང་ཕྱག་བསྟར་གནང་རྒྱུ་ཡིན་པར་གསུངས་འདུགདེ་བཞིན་ཡུ་པི་མངའ་སྡེའི་བདེ་སྐྱིད་སྐྲུན་ཐབས་ཀྱི་བསླབ་གཞི་གཏན་འབེབས་གནང་མཁན་གྱི་ཚོགས་ཆུང་ཁོངས་སུ་ཡོད་པ་སྐུ་ཞབས་ Ambikesh Tripathi ལགས་ཀྱིས་དེ་སྔ་ཨ་རིའི་སྲིད་འཛིན་སྐུ་ཞབས་ Donald Trump མཆོག་རྒྱ་གར་ནང་འཚམས་གཟིགས་སུ་ཕེབས་ཏེ་རྒྱལ་ས་ལྡི་ལིར་བདེ་སྐྱིད་སྐྲུན་ཐབས་ཀྱི་བསླབ་གཞི་སློབ་ཁྲིད་གནང་ཡུལ་གྱི་སློབ་གྲྭ་ཁག་ལ་གཟིགས་སྐོར་དང་གྲོས་བསྡུར་གྱི་ལས་རིམ་ཁག་ཅིག་གནང་སྐབས་ཨུ་ཏྟར་པྲདེཤ་མངའ་སྡེ་ནས་ཡིན་པའི་དགེ་རྒན་ Shravan Kumar ལགས་དངོས་སུ་མཉམ་ཞུགས་གནང་རྒྱུའི་གོ་སྐབས་བྱུང་དོན་ལྟར་ཁོང་གིས་ཕྱིས་སུ་ཡུ་པི་མངའ་སྡེ་གཞུང་ལ་བདེ་སྐྱིད་སྐྲུན་ཐབས་ཀྱི་བསླབ་གཞི་དེ་མངའ་སྡེའི་སློབ་གྲྭ་ཁག་གི་བསླབ་གཞིའི་ཁོངས་སུ་ངེས་པར་དུ་འཇོག་གནང་ཡོང་བའི་རེ་སྐུལ་ཞུས་པ་བཞིན་ད་རེས་མངའ་སྡེ་གཞུང་གིས་ Happiness Curriculum འམ་བདེ་སྐྱིད་སྐྲུན་ཐབས་ཀྱི་བསླབ་གཞིའི་མིང་ལ་འགྱུར་བ་ཕྲན་བུ་བཏང་སྟེ་  Realization Curriculum འམ་ངེས་ཤེས་ཀྱི་བསླབ་གཞི་ཞེས་མིང་བཏགས་ཏེ་སློབ་གྲྭ་ཁག་གི་སློབ་ཚན་ཁོངས་སུ་སློབ་ཁྲིད་གནང་འཆར་ཡོད་པ་དང་བསླབ་གཞིའི་ནང་དོན་གྱི་ཆ་ནས་བདེ་སྐྱིད་སྐྲུན་ཐབས་གཅིག་མཚུངས་ཡིན་པར་གསུངས་ཡོད།ཁོང་གིས་ད་དུང་ད་ལྟའི་ཆར་བསླབ་གཞི་དེ་འཛིན་རིམ་དང་པོ་ནས་ལྔ་པ་བར་གྱི་སློབ་མ་ཚོར་སློབ་ཁྲིད་གནང་རྒྱུ་དང་བསླབ་གཞི་འདི་སློབ་ཁྲིད་བརྒྱུད་སློབ་མ་རྣམས་ལ་བཟང་ཕྱོགས་ཀྱི་ཤུགས་རྐྱེན་ངེས་ཅན་ཞིག་བསྐྲུན་ཐུབ་པར་ཐུགས་རེ་ཡོད་ཅེས་གསུངས་འདུགགཞི་རྩའི་ Happiness Curriculum ཞེས་བདེ་སྐྱིད་སྐྲུན་ཐབས་ཀྱི་བསླབ་གཞི་དེ་ལྡི་ལིའི་མངའ་སྡེ་གཞུང་གིས་འགན་བཞེས་ཐོག་ཤེས་ཡོན་དང་སློབ་མའི་འཚར་ལོངས་སོགས་ཀྱི་ཐོག་ཕྱག་ལས་གནང་མཁན་གྱི་སྐུ་ཚབ་འདྲ་མིན་བསྡུ་བསྐོང་གིས་གཏན་འབེབས་གནང་བའི་འགྲོ་བ་མིའི་བཟང་སྤྱོད་དང་འབྲེལ་བའི་བསླབ་གཞི་གནད་ཆེ་ཞིག་ཆགས་ཀྱི་ཡོད་པ་དང་། བསླབ་གཞི་དེ་ཐོག་མར་ཕྱི་ལོ་ ༢༠༡༨ ཕྱི་ཟླ་ ༧ པ་ནང་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འབྱེད་བཀའ་དྲིན་བསྐྱངས་ཏེ་ད་ཆ་རྒྱལ་ས་ལྡི་ལི་ནང་ཡོད་པའི་གཞུང་གི་སློབ་གྲྭ་ཆིག་སྟོང་ལྷག་གི་སྔོན་འགྲོ་ནས་འཛིན་རིམ་བརྒྱད་པ་བར་གྱི་སློབ་མ་ཚོར་སློབ་ཁྲིད་གནང་བཞིན་ཡོད་པ་དང་། མགོན་པོ་༸གང་ཉིད་མཆོག་གིས་དེ་སྔ་བདེ་སྐྱིད་སྐྲུན་ཐབས་ཀྱི་བསླབ་གཞི་གསར་པ་དབུ་འབྱེད་མཛད་སྐབས་འགྲོ་བ་མི་རྣམས་ནས་རང་ཉིད་ཀྱི་མི་ཚེའི་ནང་བྱམས་སྙིང་རྗེ་དང་བདེ་སྐྱིད་ཀྱི་བསླབ་བྱ་དེ་དག་ལག་བསྟར་གང་མང་གནང་ཐུབ་ཚེ་ཁོང་ཁྲོ་སོགས་སེམས་ཚོར་དྲག་པོའི་ཆ་དེ་དག་ཉུང་དུ་གཏོང་རྒྱུར་ཕན་ཐོགས་ཡོད་པ་སོགས་ཀྱི་ལམ་སྟོན་སྩལ་བ་དང་ཆབས་ཅིག བདེ་སྐྱིད་སྐྲུན་ཐབས་ཀྱི་བསླབ་གཞི་དེ་དག་སློབ་ཁྲིད་ཡང་དག་པ་ཞིག་ཐུབ་པར་དགེ་རྒན་གསོ་སྐྱོང་གནང་རྒྱུ་དེ་གལ་ཆེན་པོ་ཡིན་པ་དང་བསླབ་གཞིའི་ཁོངས་སུ་བདེ་སྐྱིད་དང་བྱམས་བརྩེའི་སྐོར་ཙམ་མིན་པར་རྒྱ་གར་གྱི་གནའ་བོའི་རིག་གཞུང་ནང་གསུངས་པའི་སེམས་ཁམས་རིག་པའི་རྣམ་གཞག་དེ་དག་ཀྱང་དེ་མཚུངས་སུ་སློབ་ཁྲིད་གནང་ཐུབ་ཚེ་དགེ་མཚན་ཆེན་པོ་ལྡན་ཡོད་པ་སོགས་བཀའ་སྩལ་ཡོད།ད་ལྟའི་ཆར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་བྱམས་སྙིང་རྗེ་དང་གཞན་ཕན་དང་འབྲེལ་བའི་བཟང་སྤྱོད་ཀྱི་རྣམ་གཞག་དེ་དག་ཆོས་ཀྱི་ངོ་བོ་ཁོ་ནར་མ་བཞག་པར་དེང་དུས་ཀྱི་ཤེས་ཡོན་སློབ་གསོའི་ནང་སློབ་ཁྲིད་གནང་རྒྱུ་གལ་ཆེན་པོ་ཡིན་པར་བཀའ་སློབ་ལམ་སྟོན་མཛད་དོན་ལྟར་ད་ཆ་རྒྱ་གར་གྱི་མངའ་སྡེ་ཆེ་ཁག་གཉིས་ཀྱི་ནང་ལ་བདེ་སྐྱིད་སྐྲུན་ཐབས་ཀྱི་བསླབ་གཞི་དང་། དེ་མིན་རྒྱ་གར་གྱིས་གཙོས་པའི་རྒྱལ་སྤྱིའི་ཡུལ་གྲུ་མང་དག་ཅིག་གི་སློབ་གྲྭར་ཕྱི་ལོ་ ༢༠༡༩ ལོར་༸གོང་ས་མཆོག་གིས་དབུ་འབྱེད་མཛད་པའི་བྱམས་བརྩེ་དང་བློ་གྲོས་གོང་འཕེལ་གྱི་ཤེས་ཡོན་བསླབ་གཞི་ SEE Learning ཞེས་པ་དེ་དངོས་སུ་ཕྱག་བསྟར་གནང་བཞིན་པའི་གནས་སྟངས་བྱུང་ཡོད།

དེ་རིང་སྔ་དྲོ་ཕྱག་ཚོད་༩།༣༠ ཐོག   བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རཱ་ཇཱ་བཱིར་བྷ་དྲ་སིངྷ་ Virbhadra Singh མཆོག་གི་དགོངས་རྫོགས་ཞེ་དགུའི་སྨོན་ལམ་དང་བསྟུན་ཁུ་ནུ་དང་བོད་དབར་འབྲེལ་བའི་ལོ་རྒྱུས་བགྲོ་གླེང་ཞིག་སྐོང་འཚོགས་གནང་སོང་།དེ་རིང་གི་ལས་རིམ་དེའི་ཐོག  སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱི་གཙོ་བྱས་པའི་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཁག་ཅིག་དང་། སཱ་ར་སློབ་གཉེར་ཁང་གི་སློབ་མ་ཁག་ཅིག་གིས་མཉམ་ཞུགས་གནང་བ་མ་ཟད། ཉིན་གཅིག་རིང་གི་ལས་རིམ་དེའི་ཐོག་ཁུ་ནུའི་ཆེད་མཁས་བ་མང་དག་ཅིག་གིས་དྲ་ཐོག་ནས་འཛུལ་ཞུགས་བྱས་པའི་ཐོག   ཁུ་ནུ་བ་བློན་ཆེན་དམ་པ་ཁོང་གི་ལོ་རྒྱུས་ངོ་སྤྲོད་དང་། དུས་རབས་བཅུ་བདུན་པའི་ནང་བོད་དང་ཁུ་ནུའི་བར་གྱི་ཆིངས་ཡིག་སྐོར། ཕྱོགས་གཉིས་ཀྱི་ཚོང་འབྲེལ། དེ་བཞིན་ཁུ་ནུའི་ནང་གི་དགེ་ལུགས་དང་འབྲུག་པ་བཀའ་བརྒྱུད་ཀྱི་དགོན་པ་ཁག་གི་སྐོར་སོགས་བརྗོད་གཞི་སྣ་མང་ཐོག་གཏམ་བཤད་གནང་སོང་།དེ་རིང་གི་མཛད་རིམ་ཐོག་མར་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་ཁུ་ནུ་དང་བོད་བར་གྱི་འབྲེལ་བའི་སྐོར་ནས་ངོ་སྤྲོད་གཏམ་བཤད་གནང་བའི་ནང་དུ།  འདས་བའི་མི་ལོ་དྲུག་ཅུ་ལྷག་གི་ནང་དུ། ཚེ་འདས་དམ་པ། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རཱ་ཇཱ་བཱིར་བྷ་དྲ་སིངྷ་མཆོག་གིས་ཁུ་ནུ་དང་བོད་ཀྱི་མཛའ་མཐུན་འབྲེལ་བ་དེ་མུ་མཐུད་རྒྱུན་སྐྱོང་དང་། ལྷག་པར་༸གོང་ས་མཆོག་ལ་སྙིང་ཉེ་ཞིང་བོད་དོན་རྒྱབ་སྐྱོར་གནང་བ་དང་བཙན་བྱོལ་བོད་མིའི་ལོ་རྒྱུས་ཐོག་ཕན་ཚུན་ཆིག་ཡིག་གཞིར་བཟུང་མཛའ་བརྩེའི་འབྲེལ་ལམ་རྒྱུན་གནས་ཡོང་བ་བཅས་ལ་དམིགས་ནས་དེ་རིང་གི་བརྒྱ་མཆོད་སྨོན་ལམ་དང་བགྲོ་གླེང་གི་ལས་རིམ་དེ་གོ་སྒྲིག་ཞུ་བཞིན་ཡོད་སྐོར་འགྲེལ་བརྗོད་གནང་བ་མ་ཟད།  ཁུ་ནུའི་ནང་བོད་ཀྱི་ཆོས་དང་རིག་གཞུང་གི་མཁས་བ་མང་པོ་བྱུང་ཡོད་པའི་ཁྲོད།  ༸གོང་ས་སྐྱབས་མགོན་ཆེན་པོ་མཆོག་གིས་ཟབ་ཆོས་ཞུ་ས་ཡང་ཁུ་ནུའི་བླ་མ་བསྟན་འཛིན་རྒྱལ་མཚན་མཆོག་ཆགས་སྐོར་སོགས་ཀྱི་གཏམ་བཤད་གནང་སོང་། སྐབས་དེར་ཁུ་ནུ་ཁུལ་གྱི་རྒྱ་གར་གྱི་ཆབ་སྲིད་ཚོགས་པའི་ཚོགས་གཙོ་ཟུར་བ་སྐུ་ཞབས་ Bhagat Singh Kinnar ལགས་ཀྱིས་གཏམ་བཤད་གནང་བའི་ནང་དུ། བོད་རང་དབང་རང་བཙན་སྐབས་ནས་ཁུ་ནུ་དང་བོད་ཀྱི་དབར་ལོ་རྒྱུས་ཡུན་རིང་ལྡན་པའི་དམིགས་བསལ་གྱི་འབྲེལ་བ་ཡོད་པར་འགྲེལ་བརྗོད་ཀྱིས་བོད་ཀྱི་ཁ་འབབ་ཆེན་པོ་བཞི་ལས་གླང་ཆེན་ཁ་འབབ་དེ་བོད་ནས་སྟོད་མངའ་རི་བརྒྱུད་དེ་ཁུ་ནུའི་ཁུལ་དུ་འབབ་ཀྱི་ཡོད་པར་གསུངས་པ་དང་སྦྲགས། ལྷག་དོན་ཁུ་ནུ་ནང་གི་བླ་མ་དང་དགེ་འདུན་པ་མི་ཉུང་བ་ཞིག་བོད་ལ་ཆེད་ཕེབས་ཀྱི་སློབ་གཉེར་གནང་བའི་ཐུན་མིན་གྱི་འབྲེལ་སོགས་ཀྱི་སྐོར་ལ་གསུངས་སོང་།དེ་བཞིན་སྐབས་དེར་སྐྱབས་རྗེ་ལོ་ཆེན་རིན་པོ་ཆེ་མཆོག་གིས་བོད་དང་ཁུ་ནུའི་འབྲེལ་ལམ་གྱི་ལོ་རྒྱུས་སྤྱི་བཤད་ཅེས་པའི་ཐོག་གཏམ་བཤད་གནང་བའི་ནང་དུ། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རཱ་ཇཱ་བཱིར་བྷ་དྲ་སིངྷ་དམ་པ་དེ་ཉིད་མཆོག་ནི་ཁུ་ནུའི་རྒྱལ་རྒྱུད་ཡིན་རབས་དང་འབྲེལ་ནས། ཁུ་ནུ་དང་བོད་ཀྱི་བར་དུ་ལོ་ངོ་མང་པོའི་ནང་དུ་ཆོས་དང་རིག་གཞུང་གི་འབྲེལ་བ་ཡག་པོ་ཡོད་པ་ཟད།  སྟོད་མངའ་རི་དང་ཁུ་ནུ་གཉིས་ནི་རི་བོ་ཞིག་གི་ཕར་ཚུར་ལ་ཡོད་པ་སོགས་ཀྱི་ལོ་རྒྱུས་དང་འབྲེལ་ནས། ཁུ་ནུའི་ཁུལ་དུ་སྔ་མོའི་བོད་ཀྱི་བོན་ཆོས་ཀྱི་ཆོས་ལུགས་ཀྱི་ཆོ་ག་སྟེ། དམར་མཆོད་བྱེད་སྟངས་དང་དེ་བཞིན་བྲག་རི་ལ་བོན་ཆོས་ཀྱི་ཆོ་གའི་རི་མོ་བྲིས་བཞག་པ་སོགས་དུས་ད་ལྟ་ཡང་མཇལ་རྒྱུ་ཡོད་པ་མ་ཟད། སྔ་མོ་བོད་དང་ཁུ་ནུ་གཉིས་ཀྱི་བར་དུ་གཉེན་སྒྲིག་གི་འབྲེལ་ལམ་ཡང་བྱུང་ཡོད་པ་སོགས་ཀྱི་ལོ་རྒྱུས་ངོ་སྤྲོད་གནང་སོང་། གཞི་རྩའི་དེ་རིང་གི་བགྲོ་གླེང་གི་ལས་རིམ་དེར་ཁུ་ནུའི་རྒྱལ་རྒྱུད་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རཱ་ཇཱ་བཱིར་བྷ་དྲ་སིངྷ་མཆོག་གི་དགོངས་རྫོགས་ཞེ་དགུའི་སྨོན་ལམ་དང་བསྟུན་ནས་གོ་སྒྲིག་ཞུས་པ་ཞིག་ཡིན་ཞིང་། དམ་པ་དེ་ཉིད་ནི་དུས་ཡུན་རིང་པོར་བོད་དོན་ལ་རྒྱབ་སྐྱོར་གནང་མཁན་ཞིག་དང་། ༸གོང་ས་སྐྱབས་མགོན་ཆེན་པོ་མཆོག་ལ་ལོ་མང་གི་རིང་མཛའ་འབྲེལ་ཡོད་པའི་རྒྱ་གར་གྱི་དཔོན་རིགས་ཤིག་ཆགས་ཡོད་པ་དང་། དེ་རིང་གི་ལས་རིམ་ཐོག་ཁུ་ནུའི་ཁུལ་གྱི་མཁས་དབང་བཅུ་གྲངས་ཤིག་གིས་ཁུ་ནུ་དང་བོད་བར་གྱི་ཆོས་དང་རིག་གཞུང་དང་དེ་བཞིན་ཚོང་ལས་དང་ཆིངས་ཡིག་སོགས་ཀྱི་མཛའ་འབྲེལ་གྱི་སྐོར་ནས་དྲ་ཐོག་བརྒྱུད་ནས་གཏམ་བཤད་གནང་ཡོད་པ་རེད།

དེ་རིང་ Tibet Initiative Deutschland ཞེས་ Germany ནང་གི་བོད་དོན་རྒྱབ་སྐྱོར་ཚོགས་པ་ཆེ་ཤོས་ཀྱིས་ཇི་ལྟར་གསོལ་འདེབས་ཞུས་དོན་ལྟར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་དྲོ་ཕྱག་ཚོད་ ༩ ནས་ ༡༠༌༣༠ བར་བོད་ཀྱི་རིག་གཞུང་གིས་འཛམ་གླིང་ཞི་བདེ་ལ་ཞབས་འདེགས་ཀྱི་ནུས་པའི་སྐོར་ལ་བཀའ་སློབ་དང་ཚོགས་བཅར་བའི་བཀའ་འདྲི་དགོངས་སྐོར་ཞུས་ཁག་ལ་བཀའ་ལན་སྩལ་ཡོད་པ་རེད།སྐབས་དེར་མགོན་པོ་༸གང་ཉིད་མཆོག་གིས་བོད་ཀྱི་ཆོས་དང་རིག་གཞུང་དེ་གཙོ་བོ་ཡིད་ཆེས་དང་ལུང་ལ་བརྟེན་པ་མ་ཡིན་པར་རིགས་པར་བརྟེན་ནས་བྱམས་པ་དང་བརྩེ་བ་ཉམས་ལེན་བྱེད་ཀྱི་ཡོད་སྟབས་གཞན་ལའང་རྒྱུ་མཚན་གཙོ་བོ་གཞིར་བཞག་སྟེ་སློབ་སྦྱོང་སྤྲོད་བདེ་པོ་ཡོད་པ་དང་། ལྷག་དོན་སྤྱིར་འཛམ་གླིང་ཞི་བདེ་ཟེར་སྐབས་སུ་ཞི་བདེ་ཐོག་མ་དེ་ནང་སེམས་ཀྱི་ཐོག་ནས་ཡོང་གི་ཡོད་སྟབས། ནང་སེམས་ཀྱི་ཞི་བདེ་བསྐྲུན་ཐབས་ཐོག་འཛམ་གླིང་ལ་བོད་པའི་རིག་གཞུང་ཐོག་ནས་ལེགས་སྐྱེས་དབུལ་རྒྱུའི་ནུས་པ་ཆེན་པོ་ལྡན་ཡོད་ལྟར་དེ་ལྟར་ཡོང་བར་༸གོང་ས་མཆོག་གིས་ཐུགས་བརྩོན་ཆེན་པོ་མཛད་ཀྱི་ཡོད་སྐོར་བཀའ་སྩལ་བ་དང་སྦྲགས། ནང་པའི་གཞུང་ལུགས་དག་ལས་གསུངས་པའི་བསླབ་བྱ་དེ་གོ་ལའི་ཞི་བདེར་སྨན་ཕྱིར་མཛད་འཁུར་བཞེས་མུས་ཡིན་པ་བཀའ་སྩལ་ཡོད།དེ་རིང་གི་བཀའ་སློབ་སྩལ་གྲུབ་མཚམས་སུ་ཚོགས་བཅར་བའི་ཁྲོད་ནས་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་གནང་དོན་ལྟར་བོད་ནང་གི་བོད་མི་ཚོས་རྒྱའི་མནར་སྤྱོད་འོག་ངལ་བ་དུ་མ་མྱོང་བཞིན་ཡོད་སྟབས་བོད་མི་ཚོའི་ངོས་ནས་བོད་ཀྱི་ཆོས་དང་རིག་གཞུང་དེ་དག་གཅེས་འཛིན་ཇི་ལྟར་གནང་ཐུབ་བམ་ཞེས་བཀའ་འདྲི་ཞུས་པར་༸གོང་ས་མཆོག་གིས་དེ་སྔ་མགོན་པོ་༸གང་ཉིད་མཆོག་མའོ་ཙེ་ཏུང་དང་ལྷན་དུ་མཇལ་འཕྲད་སྐབས་མའོས་ཆོས་དུག་རེད་ཅེས་ཞུས་སྐོར་ཐུགས་དྲན་གསོས་པ་དང་འབྲེལ་ཏེ། རྒྱ་མིས་བོད་ཐོག་མར་བཙན་བཟུང་བྱེད་སྐབས་དང་ད་ལྟའི་དུས་ཚོད་དབར་འགྱུར་བ་ཆེན་པོ་ཕྱིན་ཡོད་ཅེས་བཀའ་སྩལ་ཡོད། དེའང་དེང་སྐབས་འཛམ་གླིང་ཁྱོན་ཡོངས་སུ་ནང་པའི་ཆོས་དང་ལྷག་པར་དུ་བོད་བརྒྱུད་ནང་བསྟན་ལ་དོ་སྣང་བྱེད་མཁན་ཇེ་མང་དུ་འགྲོ་མུས་ཡིན་སྟབས། བོད་ནང་ལ་ཡོད་པའི་མཁས་པ་མང་པོས་ཆབ་སྲིད་ཀྱི་ཐོག་ནས་རྒྱ་ནག་གི་བོད་ལ་དབང་སྒྱུར་བྱས་ཡོད་ཀྱང་། ཆོས་ཕྱོགས་ཀྱི་ཐོག་ནས་བོད་པས་ཕར་རྒྱ་ནག་ལ་ཕན་ཐོགས་བྱེད་ཀྱི་ཡོད་པར་གསུང་བཞིན་ཡོད་པ་ལུང་འདྲེན་དང་ཆབས་ཅིག དེང་སྐབས་ནུབ་ཕྱོགས་དང་ཨེ་ཤ་ཡ་རྒྱལ་ཁབ་ཕལ་མོ་ཆེ། ལྷག་པར་དུ་རྒྱལ་སྤྱི་དང་རྒྱ་ནག་ཏུ་བོད་བརྒྱུད་ནང་བསྟན་དར་སྤེལ་ཆེན་པོ་ཕྱིན་ཡོད་པ་དེས་མར་ཁེ་སི་རིང་ལུགས་དེ་ནུས་མེད་དུ་གྱུར་བ་གསལ་པོ་རེད་ཅེས་བཀའ་སྩལ་སོང་།དེ་བཞིན་བཀའ་འདྲི་དགོངས་སྐོར་གྱི་ལས་རིམ་དེའི་ཐོག་མགོན་པོ་༸གང་ཉིད་མཆོག་གིས་བོད་པའི་གཞོན་སྐྱེས་ཚོས་བོད་ཀྱི་སྐད་ཡིག་ཐོག་སློབ་གཉེར་བྱེད་རྒྱུའི་གལ་གནད་སྐོར་ལམ་སྟོན་སྩལ་བ་མ་ཟད་དེང་སྐབས་བོད་པའི་དགོན་སྡེ་ཁག་ཏུ་གྲྭ་བཙུན་ཙམ་མ་ཡིན་པར་མི་སྐྱ་ཕོ་མོ་དབྱེ་མེད་ནས་ནང་ཆོས་ཐད་སློབ་སྦྱོང་བྱེད་རྒྱུའི་གོ་སྐབས་ཡོད་པ་དང་། ལྷག་དོན་བོད་པ་ཙམ་མ་ཡིན་པར་ཧི་མཱ་ལ་ཡའི་རི་རྒྱུད་ཀྱི་ནང་པ་རྣམས་ལའང་སློབ་སྦྱོང་བྱེད་རྒྱུའི་གོ་སྐབས་དང་མཐུན་རྐྱེན་ཡག་པོ་ཡོད་སྟབས། བོད་པའི་སྐད་ཡིག་དེར་སངས་རྒྱས་ཀྱི་ཆོས་ཀྱི་ལྟ་གྲུབ་འགྲེལ་བཤད་རྒྱག་རྒྱུའི་སྐད་ཡིག་ལེགས་ཤོས་དེ་ཆགས་ཡོད་པས་ནང་ཆོས་ལ་དོ་སྣང་ཡོད་མཁན་ཚོས་ངེས་པར་དུ་བོད་ཀྱི་སྐད་ཡིག་གཉིས་པོར་དོ་སྣང་མ་བྱེད་ཐབས་མེད་ཆགས་ཡོད་པར་ལམ་སྟོན་མཛད་ཡོད།རྒྱ་ནག་གིས་དེང་སྐབས་ཕྱི་ནང་གཉིས་དབར་བཙན་འཛུལ་ཤུགས་ཆེ་བྱེད་བཞིན་པའི་སྐབས་སུ་ཆབ་སྲིད་ཀྱི་ཐོག་ནས་རྒྱ་ནག་དང་འབྲེལ་བ་གང་འདྲ་བྱེད་དགོས་སམ་ཞེས་བཀའ་འདྲིར་༸གོང་ས་མཆོག་གིས་རྒྱ་ནག་དེ་རྒྱལ་ཁབ་སྟོབས་ཆེན་པོ་གང་ཡིན་ལ་མ་བལྟོས་པར་འཛམ་གླིང་འདིའི་ཆ་ཤས་ཤིག་ཆགས་ཡོད་སྟབས། ཁྱིམ་མཚེས་རྒྱལ་ཁབ་ཀྱིས་གཙོས་པའི་རྒྱལ་ཁབ་གཞན་དང་ལྷན་དུ་འབྲེལ་བ་བཟང་པོ་བཞག་རྒྱུ་དེ་གལ་ཆེན་པོ་ཡིན་པ་དང་།ལྷག་པར་དུ་རྒྱ་གར་ལྟ་བུའི་ལོ་རྒྱུས་དང་རིག་གཞུང་གི་འབྲེལ་བ་ཡོད་པའི་རྒྱལ་ཁབ་དང་ལྷན་དུ་འབྲེལ་བ་དམ་ཟབ་བཞག་རྒྱུ་གལ་ཆེན་པོ་ཡིན་པ་མ་ཟད། དེ་བཞིན་ཐེ་ཝན་ལྟ་བུར་ཆ་མཚོན་ན་ཆབ་སྲིད་ཀྱི་ཐོག་ནས་འགལ་ཟླ་ཡོད་ཀྱང་། རིག་གཞུང་གི་ཆ་ནས་རྒྱ་ནག་ལས་ལོ་ངོ་སྟོང་ཕྲག་མང་པོའི་སྔོན་ནས་དར་བའི་རིག་གཞུང་དེ་མེད་པ་བཟོ་ཐབས་མེད་སྟབས། ཆབ་སྲིད་ཀྱི་ཐོག་ནས་ཕུགས་རྒྱང་རིང་པོའི་བསམ་བློ་བཏང་སྟེ་རྒྱ་ནག་ལ་ཉི་ཧོང་དང་བྷར་མ། རྒྱ་གར་བཅས་ཁྱིམ་མཚེས་རྒྱལ་ཁབ་ཚོ་དང་ལྷན་དུ་ཞི་བདེ་མཉམ་གནས་བྱེད་དགོས་པའི་གནས་སྟངས་ཤིག་ཀྱང་ཆགས་ཡོད་སྐོར་བཀའ་སྩལ་བ་དང་འབྲེལ། མིའི་བསམ་བློ་གཏོང་ཕྱོགས་དེ་དུས་ཚོད་ལ་དཔག་པའི་འགྱུར་བ་ཐེབས་བཞིན་ཡོད་སྟབས་རྒྱ་ནག་ལའང་དེ་ལྟར་འགྱུར་བ་ཐེབས་སྲིད་པ་རེད་ཅེས་བཀའ་སྩལ་ཡོད།