ཀརྨ་པ།
༸དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་བོད་ལུགས་ལྟར་དགུང་གྲངས་ ༤༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི།
སྒྲུབ་བརྒྱུད་བསྟན་པའི་མངའ་བདག་༸དཔལ་རྒྱལ་བའི་དབང་པོ་སངས་རྒྱས་ཀརྨ་པ་ཨོ་རྒྱན་འགྲོ་འདུལ་ཕྲིན་ལ་དབང་གི་རྡོ་རྗེ་མཆོག་བོད་ལུགས་ལྟར་དགུང་གྲངས་ ༤༢ དང་ཕྱི་ལུགས་ལྟར་དགུང་གྲངས་ ༤༡ ལ་ཕེབས་པའི་སྐུའི་འཁྲུངས་སྐར་ཉིན་གང་ཉིད་ཀྱི་གདན་ས་རུམ་བཏེག་དང་བཞུགས་སྟོད་གྲྭ་ཚང་གཙོས་པའི་ཕྱི་ནང་གི་དད་ལྡན་རྣམ་པས་རིན་པོ་ཆེ་མཆོག་གི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་རེད།
དེ་ཡང་བོད་ཟླ་ ༥ ཚེས་ ༡ སྟེ། ཕྱི་ཟླ་ ༦ ཕྱི་ཚེས་ ༡༦ ཉིན་འབྲས་ལྗོངས་ནང་དུ་རྟེན་གཞིས་བྱས་པའི་༸དཔལ་རྒྱལ་དབང་ཀརྨ་པ་གང་ཉིད་ཀྱི་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་དབུ་བཞུགས་ཐོག སྐུ་མགྲོན་གཙོ་བོར་འབྲས་ལྗོངས་མངའ་སྡེ་གཞུང་གི་སྤྱི་ཁྱབ་བློན་ཆེན་ Prem Singh Tamang པྲེམ་སིང་རྟ་མང་མཆོག་དང་དབུས་པའི་མངའ་སྡེ་གཞུང་གི་དགོན་གནས་བློན་ཆེན་བསོད་ནམས་བླ་མ་ལགས། མངའ་སྡེའི་གནད་ཡོད་སྐུ་མགྲོན་གཞན་ཁག་གཅིག་དང་སེར་སྐྱ་མང་ཚོགས་བཅས་ལྷན་ཞུགས་ཐོག་སྐུའི་འཁྲུངས་སྐར་སྲུང་བརྩི་ཞུས་འདུག
མཛད་སྒོའི་ཐོག་༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་དང་སྤྱི་ཁྱབ་བློན་ཆེན་མཆོག་ནས་༸རྒྱལ་དབང་མཆོག་གི་བཞུགས་ཁྲིར་མཎྜལ་རྟེན་གསུམ་འདེགས་འབུལ་ཞུས་ཡོད་པ་དང་འབྲེལ། ༸སྐྱབས་རྗེ་རྒྱལ་བའི་རྒྱལ་ཚབ་དྲུང་གོོ་ཤྲི་རིན་པོ་ཆེ་མཆོག་གིས་བཀའ་སློབ་གསུང་བཤད་ཁྲོད། ༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་ལ་སྐུའི་འཁྲུངས་སྐར་གྱི་འཚམས་འདྲི་ཞུས་པ་དང་འབྲེལ། སྐུ་ཚེ་ཞབས་པད་བརྟན་པ་དང་ཐུགས་བཞེད་ལྷུན་གྱིས་གྲུབ་པ་མ་ཟད། མྱུར་དུ་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་ཞབས་སོར་འཁོད་ཐུབ་པའི་ཐུགས་སྨོན་ཞུས་འདུག
མངའ་སྡེའི་སྤྱི་ཁྱབ་བློན་ཆེན་མཆོག་གིས་༸རྒྱལ་དབང་མཆོག་གི་འཁྲུངས་སྐར་དང་བསྟུན་ནས་དྲ་ཐོག་ཏུ། ད་རེས་འཁྲུངས་སྐར་ཉིན་གང་ཉིད་ཀྱི་གདན་ས་རུམ་བཏེག་ཏུ་༸སྐྱབས་རྗེ་རྒྱལ་ཚབ་དྲུང་གོོ་ཤྲི་སྐུ་ཕྲེང་ ༡༢ པ་དབུ་བཞུགས་ཐོག་བཅར་རྒྱུ་བྱུང་བ་དགའ་ཚོར་དང་བསོད་ནམས་ཆེན་པོ་བྱུང་ཞེས་གསུངས་བ་དང་འབྲེལ། སྐྱེས་འགྲོ་སྤྱིའི་བདེ་ཐབས་དང་འཛམ་གླིང་ཞི་བདེའི་ཆེད་དུ་༸རྒྱལ་དབང་མཆོག་སྐུ་ཚེ་ཞབས་པད་བརྟན་པ་དང་། སྐུའི་འཕྲོད་བཞེས་བཟང་པོ་ཡོང་བ། དེ་བཞིན་ཆོས་ཕྱོགས་ཀྱི་མཛད་པ་རྒྱུན་མཐུད་འགེགས་མེད་ཡོང་བའི་སྨོན་འདུན་ཞུས་འདུག
མཛད་སྒོའི་ཐོག་གཞན་ཡང་འབྲས་ལྗོངས་མངའ་སྡེ་དགོས་གནས་དྲུང་ཆེ་ཟུར་པ་ཚེ་མཆོག་གླིང་རིན་པོ་ཆེ་མཆོག་དང་། མངའ་སྡེའི་ཆེས་མཐོའི་ཁྲིམས་དཔོན་ཟུར་པ་བསོད་ནམས་ཕུན་ཚོགས་ལགས་བཅས་ཀྱང་ཕེབས་ཡོད་ཅིང་། ཉིན་རྒྱབ་སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་དང་འབྲེལ་ནས་དད་ལྡན་མང་ཚོགས་རྣམ་པས་རིག་གཞུང་འཁྲབ་སྟོན་སོགས་ཀྱི་མཛད་རིམ་ཁག་གཅིག་གཉེར་ཡོད་པ་རེད་འདུག
ཕྱོགས་མཚུངས་ཁ་སང་བཞུགས་སྒར་གྱི་ཉེ་འདབས་སུ་རྟེན་གཞིས་བྱས་པའི་སྟོད་རྒྱུད་གྲྭ་ཚང་དུ་མཁན་བླ་འདུས་སྤྱི་ཡོངས་ནས་༸དཔལ་རྒྱལ་དབང་ཀརྨ་པ་ཨོ་རྒྱན་ཕྲིན་ལས་རྡོ་རྗེ་རིན་པོ་ཆེ་མཆོག་གིས་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་པ་མ་ཟད། དད་ལྡན་དང་དགོན་སྡེ་ཁག་འདྲ་མིན་ནང་གང་ཉིད་ཀྱི་འཁྲུངས་སྐར་སྲུང་བརྩི་ཞུས་ཡོད་པ་རེད།
འབྲས་ལྗོངས་ནང་དུ་རྟེན་གཞིས་བྱས་པའི་གདན་ས་རུམ་བཏེག་དགོན་པའི་བཤད་གྲྭའི་མཁན་པོ་སྐལ་བཟང་ཉི་མ་ལགས་སུ་བཀའ་འདྲི་ཞུས་པར་ཁོང་གིས། འབྲས་ལྗོངས་དབུས་གཞུང་ནས་རྒྱ་གར་དབུས་གཞུང་དང་ལྷན་དུ་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་རྒྱ་གར་ནང་དུ་གདན་འདྲེན་ཞུ་རྒྱུ་ཐད་བཀའ་མོལ་གནང་དང་གནང་བཞིན་ཡོད་པ་མ་ཟད། ས་གནས་མང་ཚོགས་དང་གང་ཉིད་ལ་དད་དམ་ཡོད་མཁན་རྣམ་པས་དེ་མཚུངས་ཀྱི་རེ་བ་ཆེན་པོ་གནང་བཞིན་ཡོད་སྟབས། མྱུར་དུ་རྒྱ་གར་དུ་ཞབས་སོར་འཁོད་པའི་རེ་བ་ཞུ་བཞིན་ཡོད་བཅས་འགྲེལ་བརྗོད་གནང་སོང་།
གཞི་རྩའི་༸རྒྱལ་དབང་མཆོག་གི་སྐུའི་འཁྲུངས་སྐར་དང་འབྲེལ་ནས་དཔལ་ཀརྨ་པའི་སྤྱི་ལས་ཁང་ནས་ཕྱི་ལོ་ ༢༠༢༢ ཟླ་ ༥ ཚེས་ ༡༦ ཉིན་གསལ་བསྒྲགས་སྤེལ་དོན་ལྟར། ༸རྒྱལ་དབང་མཆོག་གི་གཞུང་འབྲེལ་འཁྲུངས་སྐར་དུས་ཆེན་བྱེས་སུ་དེ་སྔ་ཕན་ཆད་སྤྱི་ཟླ་ ༦ ཚེས་ ༢༦ ཉིན་སྲུང་བརྩི་ཞུ་སྲོལ་ཡོད་ཀྱང་། འཁྲུངས་ཚེས་འཁྲུལ་མེད་དེ་བོད་ཟླ་ ༥ ཚེས་ ༡ ཡིན་པ་དང་། གདན་ས་མཚུར་ཕུར་འཁྲུངས་ཚེས་དེ་རང་གི་ཐོག་ཏུ་འཁྲུངས་སྐར་བརྩི་སྲོལ་དེ་༸སྐྱབས་རྗེ་སྒྲུབ་དཔོན་བདེ་ཆེན་སྐུ་གོང་མའི་སྐབས་ནས་ཡོད་བཞིན་པ་ལྟར། བོད་ཟླ་ ༥ ཚེས་ ༡ ཉིན་༸རྒྱལ་དབང་མཆོག་གི་སྐུའི་འཁྲུངས་སྐར་སྲུང་བརྩི་ཞུ་རྒྱུ་ཐད་བོད་ཕྱི་ནང་ཐམས་ཅད་གཅིག་གྱུར་གྱིས་ཕྱག་བསྟར་གནང་བའི་སྐུལ་འདེབས་ཞུས་ཡོད།
༸རྒྱལ་དབང་ཀརྨ་པ་མཆོག་གིས་༸གོང་ས་མཆོག་གི་ཐུགས་དགོངས་མཐའ་དག་འཕྲལ་དང་མྱུར་དུ་སྒྲུབ་དགོས་པ་ལས། ཕྱིར་བཤོལ་དང་ལྷོད་གཡེང་བྱེད་པའི་དུས་ཚོད་མེད་ཅེས་བཀའ་གནང་འདུག
༸རྒྱལ་དབང་ཀརྨ་པ་མཆོག་གིས་༸གོང་ས་མཆོག་གི་ཐུགས་དགོངས་མཐའ་དག་འཕྲལ་དང་མྱུར་དུ་སྒྲུབ་དགོས་པ་ལས། ཕྱིར་བཤོལ་དང་ལྷོད་གཡེང་བྱེད་པའི་དུས་ཚོད་མེད་ཅེས་བཀའ་གནང་འདུག
༸སྐྱབས་རྗེ་ཡོངས་འཛིན་ཁྲ་འགུ་རིན་པོ་ཆེ་མཆོག་དགོངས་པ་ཆོས་དབྱིངས་སུ་གཤེགས་པའི་ཡིད་སྐྱོའི་གནས་ཚུལ་ཐོན་འདུག
༸སྐྱབས་རྗེ་ཡོངས་འཛིན་ཁྲ་འགུ་རིན་པོ་ཆེ་མཆོག་དགོངས་པ་ཆོས་དབྱིངས་སུ་གཤེགས་པའི་ཡིད་སྐྱོའི་གནས་ཚུལ་བྱུང་འདུག
དཔལ་༸རྒྱལ་དབང་ཀརྨ་པ་མཆོག་གིས་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་འདས་གྲོངས་སུ་གྱུར་བར་ཐུགས་གསོ་མཛད་འདུག
དཔལ་༸རྒྱལ་དབང་ཀརྨ་པ་མཆོག་གིས་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་པདྨ་ཚེ་བརྟན་ལགས་འདས་གྲོངས་སུ་གྱུར་བར་ཐུགས་གསོ་མཛད་འདུག
ཨ་རིའི་གྲོང་ཁྱེར་ནིའུ་ཡོག་ཏུ་བཀའ་བརྒྱུད་སྨོན་ལམ་ཐེངས་བཞི་པ་ཚོགས་པ།
ཟླ་བ་འདིའི་ཕྱི་ཚེས་ ༡༨ ནས་ ༢༠ བར་ཉིན་གྲངས་གསུམ་གྱི་རིང་ལ་ཟླ་སྣང་ཐེབས་རྩའི་གོ་སྒྲིག་འོག་བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཕུན་ཚོགས་སྡེ་བཞིའི་ཚོགས་ཁང་ནང་བཀའ་བརྒྱུད་སྨོན་ལམ་ཐེངས་བཞི་པ་ཚོགས་འདུག༸སྐྱབས་རྗེ་སྤ་རི་རིན་པོ་ཆེ་མཆོག་དང་གནས་སྣང་བླ་མ་ཚེ་དབང་རིན་པོ་ཆེ་རྣམ་གཉིས་སྨོན་ལམ་ཆེ་མོའི་ཚོགས་མགོན་དུ་ཆིབས་བསྒྱུར་བསྐྱངས་ཡོད་པ་དང་། སྨོན་ལམ་མཛད་སྒོའི་ཐོག་སྐུ་མགྲོན་གཙོ་བོ་བྱང་ཨ་རིའི་སྐུ་ཚབ་དོན་གཅོད་ཁང་གི་འཐུས་ཚབ་བོད་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་དང་། དམིགས་བསལ་སྐུ་མགྲོན་སྒྲུབ་བརྒྱུད་བསྟན་པའི་སྲོག་ཤིང་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་གི་སྐུ་མཆེད་སྲིང་མོ་རྗེ་བཙུན་དངོས་གྲུབ་དཔལ་འཛོམས་ལགས། བཀའ་ཟུར་དང་། དོན་ཟུར། གཞུང་འབྲེལ་མིན་པའི་ཚོགས་པ་ཆེ་ཁག་གི་སྐུ་ཚབ། མི་མང་བཅས་ལྷན་ཞུགས་གནང་ཡོད།མཛད་རིམ་གྱི་ཐོག་མར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ༸དཔལ་རྒྱལ་བ་ཀརྨ་པ་རིན་པོ་ཆེ་མཆོག་གི་སྐུ་པར་བཞུགས་ཁྲིར་གདན་ཞུ་དང་། སྐུ་མགྲོན་རྣམ་པས་མཎྜལ་རྟེན་གསུམ་འདེགས་འབུལ། དེ་བཞིན་ཕུན་ཚོགས་སྡེ་བཞི་ཚོགས་ཁང་གི་མདུན་དུ་ཤུག་པ་འདེབས་འཛུགས་སོགས་གནང་འདུགརྩ་བའི་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་གིས་ཁོར་ཡུག་གི་གལ་གནད་དང་དེར་སྲུང་སྐྱོབ་བྱ་དགོས་པའི་བཀའ་སློབ་ལམ་སྟོན་ཡང་ཡང་ཕེབས་དོན་བཞིན། ཐེངས་འདིའི་སྨོན་ལམ་སྐབས་ཟས་སྣོད་སོགས་ཡོངས་རྫོགས་ཁོར་ཡུག་ལ་མི་གནོད་པའི་ཡོ་བྱད་རྣམས་སྤྱོད་ཡོད་པ་རེད།སྐབས་དེར་སྨོན་ལམ་གོ་སྒྲིག་ཚོགས་ཆུང་གི་ཚོགས་གཞོན་སྨན་པ་ཀུན་དགའ་ལགས་ཀྱིས་སྨོན་ལམ་དེའི་དགོས་དམིགས་གསལ་བཤད་ཞུས་དོན་བཞིན་བཀའ་བརྒྱུད་སྨོན་ལམ་ཐེངས་བཞི་པ་འདི་ཉིད་ད་ལྟའི་ཆར་བོད་ཕྱི་ནང་གཉིས་ཀར་ཏོག་དབྱིབས་ནད་ཡམས་ཀྱི་དཀའ་ངལ་མུ་མཐུད་འཕྲད་བཞིན་པ་རྣམས་མྱུར་དུ་ཞི་བ་དང་། འཛམ་གླིང་ཞི་བདེ་ཡོང་བ། ལྷག་པར་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་ཆོས་བརྒྱུད་རིས་མེད་ཀྱི་བླ་ཆེན་རྣམ་པའི་སྐུ་ཚེ་ཡུན་དུ་བརྟན་ཅིང་། ཐུགས་ཀྱི་བཞེད་དགོངས་མཐའ་དག་ལྷུན་གྱི་འགྲུབ་པའི་ཐུགས་སྨོན་གནང་ཆེད་ཡིན་པར་གསུངས་འདུགཁ་སང་རེས་གཟའ་ཉི་མའི་ཉིན་རྒྱབ་བཀའ་བརྒྱུད་སྨོན་ལམ་གྱི་ཐུན་མོང་མ་ཡིན་པའི་རྗེ་བཙུན་མི་ལ་རས་པའི་ཚོགས་མཆོད་དང་། དེ་བཞིན་མར་མེའི་སྨོན་ལམ་གསུང་འདོན་དང་། གླུའི་མཆོད་པ་བཅས་འབུལ་བའི་ལམ་ནས་ཐེངས་འདིའི་སྨོན་ལམ་དེ་ཉིད་མཇུག་སྒྲིལ་གནང་འདུག་པ་དང་ལོ་རྗེས་མའི་ཟླ་ ༡ ཚེས་ ༢༩ ནས་ཟླ་ ༢ ཚེས་ ༥ བར་༸དཔལ་རྒྱལ་དབང་ཀརྨ་པ་མཆོག་དབུ་བཞུགས་ཐོག་དྲ་ལམ་བརྒྱུད་ཀར་དགོན་ཐམས་ཅད་ནས་བཀའ་བརྒྱུད་སྨོན་ལམ་འཕར་མ་ཞིག་འཚོག་རྒྱུ་ཡིན་པ་རེད།
ཀམ་ཚང་མཐུན་འབྲེལ་གནང་གནད་ལ་གཟིགས་ཏེ་༸ཞྭ་དམར་རིན་པོ་ཆེའི་ཡང་སྲིད་ལ་ཐུགས་བརྩོན་གནང་བཞིན་ཡོད་པ།
རྒྱ་གར་མངའ་སྡེ་བྷི་ཧཱར་གྱི་གྷ་ཡ་རྫོང་དུ་ཆགས་པའི་གནས་མཆོག་རྡོ་རྗེ་གདན་གྱི་གཏེར་སྒར་དགོན་གྱི་ཚོགས་རར་ཚོགས་པའི་བཀའ་བརྒྱུད་སྨོན་ལམ་ཆེན་མོ་ཐེངས་ ༣༧ པ་ཁ་སང་ཕྱི་ཚེས་ ༩ ཉིན་མཇུག་སྒྲིལ་གནང་བ་དང་བསྟུན་སྒྲུབ་བརྒྱུད་བསྟན་པའི་གསལ་བྱེད་༸དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་ཡོངས་ཁྱབ་གསུང་འཕྲིན་ཞིག་བསྩལ་ཏེ་བཀའ་བརྒྱུད་བསྟན་པའི་སྲོག་ཤིང་ཞྭ་དམར་རིན་པོ་ཆེ་མཆོག་གི་༸སྐུའི་ཡང་སྲིད་དང་འབྲེལ་ནས་རིན་པོ་ཆེ་མཆོག་ནས་ཐུགས་བརྩོན་གནང་དོན་ནི་ཀམ་ཚང་ནང་ཕན་ཚུན་དབར་མཐུན་འབྲེལ་ཡོང་རྒྱུའི་གནད་འགག་ཅིག་ལ་གཟིགས་གནང་གི་ཡོད་པར་བཀའ་བསྩལ་འདུག༸དཔལ་རྒྱལ་བ་ཀརྨ་པ་མཆོག་གིས་བསྩལ་བའི་གསུང་འཕྲིན་ནང་བཀའ་བརྒྱུད་སྨོན་ལམ་ཆེན་མོ་ཐེངས་ ༣༧ པ་དེ་ལེགས་གྲུབ་བྱུང་བར་བཀྲིས་ཤིས་བདེ་ལེགས་ཀྱི་འཚམས་འདྲི་གནང་བ་དང་སྦྲགས། རིན་པོ་མཆེ་མཆོག་ཕྱི་རྒྱལ་དུ་༸སྐུ་བཞུགས་གནང་བའི་རིང་དོན་གནད་གཉིས་ཀྱི་ཐོག་ཐུགས་བརྩོན་གནང་བཞིན་ཡོད་སྐོར་གསུངས་ཏེ་དང་ཐོག་དྭགས་པོའི་ཐར་རྒྱན་གྱི་འགྲེལ་ཆེན་ཞིག་ཕྱོགས་བསྒྲིག་གནང་རྒྱུ་ཡིན་སྐོར་དང་། གཉིས་པ་རིན་པོ་ཆེ་མཆོག་ཕྱི་རྒྱལ་ལ་༸སྐུ་བཞུགས་གནང་བའི་རིང་༸རྒྱལ་དབང་ཀརྨ་པ་མཐའ་ཡས་རྡོ་རྗེ་མཆོག་དང་མཇལ་འཕྲད་གནང་རྒྱུ་སྟབས་བདེ་བ་ཡོད་པ་བཀའ་བསྩལ་བ་དང་འབྲེལ། ད་བར་༸རྒྱལ་བ་མཐའ་ཡས་རྡོ་རྗེ་མཆོག་དང་མཇལ་འཕྲད་ཐེངས་གཉིས་བྱུང་ཡོད་པ་གསུངས་ནས་མཇལ་འཕྲད་གཉིས་པའི་སྐབས་༸དཔལ་ཞྭ་དམར་རིན་པོ་ཆེའི་ཡང་སྲིད་ཕེབས་ཕྱོགས་དང་། ལྷག་པར་དུ་རིན་པོ་ཆེ་རྣམ་གཉིས་ནས་ཟུང་འབྲེལ་ཐོག་མ་འོངས་པར་བཀའ་བརྒྱུད་བསྟན་པའི་སྲོག་ཤིང་ཞྭ་དམར་རིན་པོ་ཆེ་མཆོག་གི་༸སྐུའི་ཡང་སྲིད་དེ་ནོར་བ་དང་འཁྲུལ་བ་མེད་པ་མ་ཟད། ངའི་ཕྱོགས་དང་ཁོང་ཚོའི་ཕྱོགས་ཞེས་མ་ཡིན་པར་གཅིག་འགྱུར་གྱི་ངོས་འཛིན་ཐུབ་པ་ཞིག་དགོས་གལ་ཆེ་བ་ནི་བསྟན་པ་སྤྱི་དང་བྱེ་བྲག་ཚང་མར་ཁ་ཚ་དགོས་གཏུགས་ཤིག་ཆགས་ཡོད་སྟབས་༸རྒྱལ་བ་མཐའ་ཡས་རྡོ་རྗེ་མཆོག་དང་མཉམ་དུ་ངོས་འཛིན་དང་རྩད་གཅོད་ཞུ་རྒྱུ་ཡིན་ཞེས་དམ་བཅའ་དང་ཆོད་སེམས་མཚོན་ཕྱིར་ཞབས་བརྟན་གསོལ་འདེབས་ཤིག་ཀྱང་ལྗགས་རྩོམ་གནང་ཡོད་སྐོར་དང་། ༸དཔལ་ཞྭ་དམར་རིན་པོ་ཆེ་མཆོག་གི་༸སྐུའི་ཡང་སྲིད་དང་འབྲེལ་ནས་རིན་པོ་ཆེ་མཆོག་ནས་ཐུགས་བརྩོན་གནང་དོན་ནི་ཀམ་ཚང་ནང་ཕན་ཚུན་དབར་མཐུན་འབྲེལ་ཡོང་རྒྱུའི་གནད་འགག་ཅིག་ལ་གཟིགས་གནང་གི་ཡོད་པར་བཀའ་བསྩལ་ཡོད་པ་རེད།
སྐར་མ་ཉེར་གཅིག་ལྷག་ཡོད་པའི་གསུང་འཕྲིན་དེའི་ནང་སྨོན་ལམ་ཆེན་མོ་ཐོག་༸སྐྱབས་རྗེ་མི་འགྱུར་རིན་པོ་ཆེ་མཆོག་དང་གསང་བའི་བདག་པོ་༸རྒྱལ་ཚབ་གཽ་ཤྲི་ཆེན་པོ་མཆོག་གི་སྐུ་མདུན་ནས་མང་ཚོགས་ནས་བཀའ་ཁྲིད་ཉན་རྒྱུ་བྱུང་བ་སྐལ་བ་བཟང་པོ་ཞིག་ཡིན་པར་བཀའ་བསྩལ་བ་དང་འབྲེལ། བླ་མ་མ་བརྗེད་པར་གསོལ་བ་འདེབས། གདམས་ངག་མ་བརྗེད་པར་ལག་ཏུ་ལོན། སེམས་ཅན་མ་བརྗེད་པར་གཞན་ཕན་སྒྲུབ་པ་ཡིན་ན་བླ་མ་ཡིན་ཡང་དེས་ཐུགས་དགོངས་རྫོགས་པ་དང་། རང་ཡིན་ཡང་དེས་སརྒྱས་ཐུབ་པ། དེ་བཞིན་སེམས་ཅན་གྱི་དྲིན་ལན་ཡང་དེས་འཇལ་ཐུབ་པ་ཞིག་ཡོང་ངེས་ཡིན་པར་ཐུགས་བརྩེ་ཆེན་པོས་ལམ་སྟོན་བཀྲིན་ཆེ་བ་མཛད་འདུག
དེ་བཞིན་རིན་པོ་ཆེ་མཆོག་གིས་ཉེ་ལམ་ཟླ་བ་བཞི་ཙམ་གྱི་རིང་ཨོ་སི་ཊོ་ལི་ཡ་ཁུལ་དུ་མེ་སྐྱོན་བྱུང་ནས་སྲོག་ཆགས་དུང་ཕྱུར་མང་པོའི་ཚེ་སྲོག་ཤོར་བ་དང་། ལྷག་པར་དུ་དེང་སྐབས་རྒྱ་ནག་ནང་དུ་གློ་ཚད་རིམས་ནད་ཚབས་ཆེ་ཞིག་ཕོག་སྟེ་མི་ ༦༠༠ ལྷག་འདས་གྲོངས་སུ་གྱུར་བ་དང་། ནད་པ་ཁྲི་ཕྲག་མང་པོ་ཉེན་ཁར་ལྷུང་རྐྱེན་གཙོ་བོ་ནི་རི་དྭགས་སེམས་ཅན་ལ་འཚེ་བ་བྱས་པ་ལས་བྱུང་བ་ཞིག་ཡིན་པར་བཤད་བཞིན་ཡོད་སྟབས། ང་ཚོའི་ངོས་ནས་དམར་ཟས་གང་ཐུབ་སྤངས་ཐབས་ལ་འབད་དགོས་པ་དང་། ལྷག་པར་དུ་རི་དྭགས་སེམས་ཅན་གྱི་ཤ་རྩ་བ་ནས་བཟའ་རྒྱུ་མེད་པར་ལམ་སྟོན་གནང་བ་མ་ཟད། སེམས་ཅན་གྱི་ཚེ་སྲོག་ལ་འཚེ་བའི་ལས་ཇི་ཙམ་བྱས་པ་དེ་ཚོད་ཀྱིས་སྔ་ཕྱི་མ་གཏོགས་རང་ཉིད་ལ་དཀའ་ངལ་འཕྲད་རྒྱུ་ཡིན་པ་བཤད་མ་དགོས་པ་ཞིག་རེད་ཅེས་བཀའ་བསྩལ་འདུག
རྩ་བའི་བཀའ་བརྒྱུད་སྨོན་ལམ་ཆེན་མོ་ཐེངས་ ༣༧ པ་འདི་ལོའི་ཕྱི་ཟླ་ ༡ ཚེས་ ༢༨ ནས་ཁ་སང་ཕྱི་ཚེས་ ༩ བར་ཚོགས་ཡོད་པ་དང་སྨོན་ལམ་ཐོག་༸སྐྱབས་རྗེ་རྒྱལ་ཚབ་བཀྭན་ཏིང་གཽ་ཤྲི་ཆེན་པོ་མཆོག་དང་། ཡོངས་དགེ་མི་འགྱུར་རིན་པོ་ཆེ་མཆོག འབོ་དཀར་རིན་པོ་ཆེ་མཆོག་སོགས་ཀྱི་མཁན་བླ་སྤྲུལ་དབུ་བཞུགས་ཐོག་དགེ་བཙུན་གཙོས་ཕྱི་ནང་ཡུལ་གྲུ་ཁག་ནས་ཕེབས་པའི་དད་ལྡན་མང་ཚོགས་སྟོང་ཕྲག་ཁ་ཤས་ཕེབས་ཡོད་པ་རེད།
ལོ་རྒྱུས་ལྟར་ན་བཀའ་བརྒྱུད་སྨོན་ལམ་ཆེན་མོ་དེ་༸རྒྱལ་དབང་ཀརྨ་པ་སྐུ་ཕྲེང་བདུན་པའི་སྐབས་ཐོག་མར་བྱུང་བ་ཞིག་ཡིན་པ་དང་བཙན་བྱོལ་དུ་ཕྱི་ལོ་ ༡༩༨༣ ལོར་༸སྐྱབས་རྗེ་ཀ་ལུ་རིན་པོ་ཆེ་མཆོག་དང་འབོ་དཀར་རིན་པོ་ཆེ་མཆོག་གིས་བསྐྱར་གསོ་གནང་བ་ཞིག་ཡིན་པ་རེད།
