ཆོས་ཚོགས་ཐེངས་ ༡༤ པ།

ཡོ་རོབ་ཁུལ་གྱི་བོད་བརྒྱུད་ནང་བསྟན་ཆོས་ཚོགས་ཀྱི་ཚོགས་འདུ་ཐེངས་གསུམ་པའི་ཐོག རྒྱ་གཞུང་གི་བཟོས་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་དང་འབྲེལ་བའི་ཁྲིམས་སྒྲིག་ཁག་ལ་ངོས་ལེན་མེད་སོགས་ཀྱི་སྤྱི་མོས་ཀྱི་གྲོས་ཆོད་བཞག་འདུག དེ་ཡང། ཟླ་བ་འདིའི་ཕྱི་ཚེས་༧་དང་༨་བཅས་ཉིན་གྲངས་གཉིས་རིང་། སྦེལ་ཇམ་བོད་ཀྱི་སྐུ་ཚབ་དོན་གཅོད་ཁང་གི་གོ་སྒྲིག་འོག ཁུལ་དེར་རྟེན་གཞི་བྱས་པའི་ཡོན་ཏན་གླིང་ཆོས་ཚོགས་སུ། ཡོ་རོབ་རྒྱལ་ཁབ་ཁག་༡༠་ནས། བོད་བརྒྱུད་ནང་བསྟན་གྱི་ཆོས་ཚོགས་༣༠ལྷག་གི་སྐུ་ཚབ་འཐུས་མི་༤༠ ཙམ་གྱི་འདུ་འཛོམས་ཐོག ཡོ་རོབ་ཁུལ་གྱི་བོད་བརྒྱུད་ནང་བསྟན་གྱི་ཆོས་ཚོགས་ཐེངས་གསུམ་པ་དེ་སྐོང་ཚོགས་བྱས་འདུག ཉིན་གྲངས་གཉིས་རིང་གི་ཚོགས་འདུའི་ཐོག ཚོགས་བཅར་བ་རྣམས་ནས་གཙོ་བོ་༸གོང་ས་མཆོག་གི་མ་འོངས་པའི་ཡང་སྲིད་གནད་དོན་གཙོས་པས། རྒྱ་གཞུང་གིས་ཐེ་བྱུས་བྱེད་བཞིན་པའི་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་ཕྱོགས་ཐོག་ལ་གོ་བསྡུར་གནང་འདུག ཁ་སང་ཚོགས་འདུ་མཇུག་སྒྲིལ་དང་འབྲེལ། འདི་ག་རླུང་འཕྲིན་ཁང་ནས། ཚོགས་འདུ་གོ་སྒྲིག་གནང་མཁན་སྦེལ་ཇམ་བོད་ཀྱི་སྐུ་ཚབ་དོན་གཅོད་བཀྲིས་ཕུན་ཚོགས་ལགས་སུ་བཀའ་འདྲི་ཞུས་སྐབས། ད་རེས་ཚོགས་འདུ་འདིའི་ཐོག་ཚོགས་བཅར་བ་རྣམས་ཀྱིས་སྤྱི་མོས་གྲོས་ཆོད་དོན་གསུམ་ཅན་ཞིག་བཞག་འདུག་པ་དང། དེ་ཡང། ཉེ་ཆར་བཞུགས་སྒར་དུ་བོད་ཀྱི་ཆོས་བརྒྱུད་ཁག་གི་ཚོགས་ཆེན་ཐེངས་༡༤པའི་ཐོག་བཞག་པའི་གྲོས་ཆོད་ཁག་ལ་བཀྲིན་ཆེ་ཞུ་རྒྱུ་དང་། རྒྱ་གཞུང་གི་བཟོས་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་དང་འབྲེལ་བའི་ཁྲིམས་སྒྲིག་ཁག་ལ་ངོས་ལེན་མེད་པ་དང་ངོ་རྒོལ་མཐའ་གཅིག་ཏུ་ཡོད་ཅེས་༸གོང་ས་མཆོག་གི་མ་འོངས་པའི་ཡང་སྲིད་དེ། སྔར་༢༠༡༡ ལོར་གང་ཉིད་མཆོག་ནས་མ་འོངས་ཡང་སྲིད་སྐོར་སྤེལ་བའི་གསལ་བསྒྲགས་གཞིར་བཟུང། སྐུའི་ཡང་སྲིད་ཐག་གཅོད་གནང་རྒྱུའི་༸སྐུ་དབང་རྒྱལ་བ་སྐུ་ཉིད་དང་དགའ་ལྡན་ཕོ་བྲང་ལ་མ་གཏོགས་གཞན་སུ་གང་ལའང་མེད་ཅེས་སྤྱི་མོས་གྱི་གྲོས་ཆོད་དོན་ཚན་གསུམ་ཅན་ཞིག་བཞག་འདུག རྩ་བའི་ཡོ་རོབ་ཁུལ་གྱི་བོད་བརྒྱུད་ནང་བསྟན་གྱི་ཆོས་ཚོགས་ཐེངས་དང་པོ་དང་གཉིས་པ་ནི། དེ་སྔ་༢༠༠༥དང། ༢༠༡༣བཅས་སུད་སི་ཁུལ་དུ་༸གོང་ས་མཆོག་གི་ཆིབ་བསྒྱུར་སྐབས་ཚོགས་གནང་ཡོད་པ་རེད་འདུག

བོད་མིའི་བླ་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་གངས་སྐྱིད་ཚོགས་ཁང་གསར་པར་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་ཞུས་པའི་བཙན་བྱོལ་བོད་མིའི་ཆོས་ཚོགས་ཐེངས་ ༡༤ པའི་ཚོགས་དུས་ཉིན་མཐའ་མིའི་ཚོགས་མགོན་དུ་དབུ་བཞུགས་བཀའ་དྲིན་བསྐྱངས་ཏེ་ས་དགེ་བཀའ་རྙིང་རིས་མེད་ཀྱིས་མུ་མཐུད་བསླབ་པ་སློབ་གཉེར་ཐོག་ལ་ཧུར་སྐྱེད་གནང་དགོས་པའི་ལམ་སྟོན་མཛད་སོང་། དེ་རིང་ཟླ་ ༡༡ ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༩ པ་ཡོལ་ཙམ་ལ་མགོན་པོ་༸གང་ཉིད་མཆོག་ཆོས་ཚོགས་ཀྱི་ཚོགས་རིའི་སྡིངས་ཆའི་ཐོག་༸ཞབས་སོར་བདེ་བར་འཁོད་མཚམས་སུ་བོད་ཀྱི་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པས་དབུས་པའི་ཚོགས་བཅར་བ་ཡོངས་ལ་འཚམས་འདྲི་བསྩལ་གྲུབ་བསྟུན་ཆོས་རིག་བཀའ་བློན་གཡུ་ཐོག་ཀརྨ་དགེ་མཆོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜེལ་རྟེན་གསུམ་འདེགས་འབུལ་ཞུས་པ་དང་། དེ་བཞིན་རྟེན་འབྲེལ་མཚོན་བྱེད་གསོལ་ཇ་འབྲས་སིལ་འདེགས་འབུལ་ཞུ་ཐོག་མཛད་རིམ་ཁག་དབུ་འཛུགས་གནང་སོང་། སྐབས་དེར་༸གོང་ས་མཆོག་གིས་ནང་པ་སངས་རྒྱས་པའི་བསྟན་པ་ཐོག་མར་དར་འཕེལ་བྱུང་ཚུལ་ངོ་སྤྲོད་མཛད་པ་དང་སྦྲགས། སངས་རྒྱས་ཀྱི་བསྟན་པ་དེ་བོད་གངས་ཅན་ལྗོངས་ལ་དར་བ་ནས་བཟུང་སྐབས་དེའི་བོད་མི་ཚོས་གང་ཟག་དགོས་མཚན་དང་འབྲེལ་བའི་སྔགས་ཀྱི་ཆོ་གར་དོ་སྣང་ཆེན་པོ་བྱས་ཡོད་ཀྱང་། བསྟན་པ་སྤྱི་མཚན་དང་འབྲེལ་བའི་གཞུང་ཆེན་དག་ལ་བསླབ་པ་སློབ་གཉེར་གནང་སྟེ་གཟིགས་རྒྱུ་སོགས་ལ་དོ་སྣང་ཆུང་དྲག་པ་ལྟ་བུར་གྱུར་ཡོད་སྟབས། མགོན་པོ་༸གང་ཉིད་མཆོག་གིས་བོད་མི་རྣམས་བཙན་བྱོན་ནང་འབྱོར་རྗེས་ ༡༩༦༠ རེ་གྲངས་མཚམས་སུ་དགོན་སྡེ་ཁག་ཏུ་གཞུང་ཆེན་ཁག་ལ་སློབ་གཉེར་གནང་རྒྱུ་གལ་ཆེན་པོ་ཡིན་པའི་འབོད་སྐུལ་གནང་བ་ལྟར། ད་ཆ་དེ་སྔ་སྔགས་ཀྱི་ཆོ་ག་གཙོ་བོ་གནང་མཁན་གཙོ་གྱུར་དགོན་སྡེ་ཁག་མང་པོ་ཞིག་གིས་ཕྱག་དཔེ་གཟིགས་རྒྱུ་དབུ་འཛུགས་གནང་བ་མ་ཟད་བཙུན་མ་ཚོས་ཀྱང་གཞུང་ཆེན་ཁག་ལ་བསླབ་པ་སློབ་གཉེར་གནང་སྟེ་དགེ་བཤེས་མ་ཐོན་ཐུབ་པ་སོགས་ཀྱི་གནས་སྟངས་བཀའ་བསྩལ་བ་དང་ཆབས་ཅིག་ཏུ་དེང་གི་འཛམ་གླིང་ཐོག་བོད་མི་རྣམས་ཀྱིས་བདག་གཅེས་གནང་བའི་༸དཔལ་ནཱ་ལེནྡཱའི་ཆོས་བརྒྱུད་སྤྱི་དང་ཁྱད་པར་དུ་སེམས་ཁམས་རིག་པའི་རྣམ་གཞག་ཐོག་ལ་ཚན་རིག་མཁས་པ་དང་ཤེས་ཡོན་ཅན། དེ་བཞིན་ཆོས་དངོས་སུ་ཁས་ལེན་མི་བྱེད་མཁན་ཚོས་ཀྱང་དོ་སྣང་གནང་ཡུལ་གསར་པ་ཞིག་ཏུ་གྱུར་ཡོད་པ་བཀའ་བསྩལ་སོང་།  ལྷག་པར་དུ་༸གོང་ས་མཆོག་གིས་༸དཔལ་ནཱ་ལེནྡཱ་ནས་དར་པའི་སངས་རྒྱས་ཀྱི་ཆོས་འདི་ནི་ང་ཚོས་རིག་པའི་ཐོག་ནས་དཔྱད་རྒྱུ་ཡོད་པའི་ཐུན་མིན་གྱི་ཁྱད་ཆོས་ལྡན་ཡོད་པ་བཀའ་བསྩལ་བ་དང་སྦྲགས། རྒྱ་གར་གྱི་མཁན་ཆེན་ཞི་འཚོས་ལམ་སྟོན་མཛད་པ་ལྟར་དཔལ་ནཱ་ལེནྡཱའི་ཆོས་བརྒྱུད་དེ་བོད་བསྒྱུར་ཞུས་ཏེ་དེ་དག་ལ་བསླབ་པ་སློབ་གཉེར་གནང་བ་མ་ཟད་བོད་མི་ཚོས་ཆོས་བརྒྱུད་དེ་བདག་ཉར་འཐུས་སྒོ་བ་ཞིག་བྱས་ཡོད་པ་དང་། བྱེས་སུའང་ས་དགེ་བཀའ་རྙིང་རིས་མེད་ཀྱིས་སློབ་གཉེར་ཐོག་ལ་ཐུགས་སྣང་ཆེན་པོ་གནང་བར་ཡི་རང་བསྔགས་བརྗོད་མཛད་པ་མ་ཟད་ས་དགེ་བཀའ་རྙིང་རིས་མེད་ཀྱིས་མུ་མཐུད་དེ་དག་ལ་ཧུར་སྐྱེད་ཀྱིས་སློབ་གཉེར་གནང་དགོས་པ་དང་དེ་ཡང་སེམས་ཁམས་རིག་པ་གཙོ་བོར་གྱུར་པའི་ཚད་མ་རིག་པའི་རྣམ་གཞག་དེ་དག་ཤེས་ཡོན་གྱི་སྡེར་བཞག་ནས་སློབ་སྦྱོང་སྤྲོད་རྒྱུར་ཤུགས་སྣོན་རྒྱག་དགོས་གལ་ཡིན་པའི་ལམ་སྟོན་བཀྲིན་ཆེ་བ་བསྩལ་ཡོད། དེ་བཞིན་༸གོང་ས་མཆོག་གིས་ང་ཚོ་བོད་མི་རྣམས་བཙན་བྱོལ་བ་ཆགས་པ་དེ་ནི་རྐྱེན་ངན་གྲོགས་ཤར་ལྟ་བུར་གྱུར་ཡོད་པ་དང་གཞིས་ལུས་རྒྱ་ཆེ་མང་ཚོགས་ཚོས་ལྷག་བསམ་དང་སྙིང་སྟོབས་གཡོ་བ་མེད་པར་བཞུགས་པ་དེས་བཙན་བྱོལ་བོད་མི་རྣམས་ལ་སེམས་ཤུགས་འཕར་མ་ཞིག་བསྐྲུན་ཐུབ་པ་དང་། བཙན་བྱོལ་ནང་གི་བོད་མི་ཚོས་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་གནང་སྟེ་གཞིས་བཞུགས་བོད་མི་དག་ལ་སྤྲོ་བ་འཕེལ་ཐུབ་པ་ཞིག་བྱུང་ཡོད་སྐོར་བཀའ་བསྩལ་སོང་། རྩ་བའི་བཙན་བྱོན་བོད་མིའི་ཆོས་ཚོགས་ཐོག་ཐེངས་ ༡༤ པ་འདི་རེས་གཟའ་ལྷག་པ་ཉིན་དབུ་འཛུགས་གནང་སྟེ་དེ་རིང་བར་ཁྱོན་ཉིན་གྲངས་གསུམ་གྱི་རིང་ཚོགས་ཡོད་པ་དང་། ཚོགས་དུས་ཉིན་གཉིས་པའི་ཐོག་བོད་ཀྱི་དགོན་སྡེ་རྣམས་སུ་དུས་བསྟུན་བཤད་སྒྲུབ་ཆོས་སྤྱོད་རྒྱུན་འཛིན་དང་གོང་སྤེལ་གནང་ཕྱོགས། ཆོས་ལུགས་གཞན་དང་མཐུན་འབྲེལ་དང་མཉམ་ལས་ཡར་རྒྱས་གཏོང་ཕྱོགས། གཞུང་ཆེན་རིགས་གཅིག་རྐང་འཛིན་གྱི་ལས་གཞི་རྒྱུན་སྐྱོང་དང་གོང་སྤེལ་གནང་ཕྱོགས། དགོན་སྡེ་ཁག་གི་གྲྭ་བཙུན་རྣམ་ཀྱི་འཕྲོད་བསྟེན་ཐོག་གཟིགས་སྐྱོང་དང་འགན་འཁུར་གནང་ཕྱོགས་བཅས་གྲོས་གཞི་གཙོ་བོ་བཞི་དང་གནད་དོན་གཞན་བཅས་ཀྱི་ཐོག་གྲོས་ཆོད་དོན་ཚན་ ༣༢ གཏན་འབེབས་གནང་ཡོད་པ་མ་ཟད། ཁྱད་པར་དུ་ཆོས་ཚོགས་ཉིན་དང་པོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཕེབས་ཕྱོགས་དང་འབྲེལ་བའི་སྤྱི་མོས་ཀྱིས་གྲོས་ཆོད་དོན་ཚན་གསུམ་ཅན་ཞིག་གཏན་འབེབས་གནང་ཡོད་ཀྱང་། དེ་རིང་༸གོང་ས་མཆོག་གིས་མགོན་པོ་༸གང་ཉིད་མཆོག་གི་༸སྐུའི་ཡང་སྲིད་ཐད་ཁྱེད་རང་ཚོས་ཐུགས་སྣང་གནང་བར་ཐུགས་རྗེ་ཆེ་ཞེས་བཀའ་བསྩལ་བ་ལས་༸སྐུའི་ཡང་སྲིད་ཕེབས་ཕྱོགས་དང་འབྲེལ་བའི་དམིགས་བསལ་བཀའ་སློབ་གང་ཡང་བསྩལ་མེད་པ་རེད། དེ་རིང་སྔ་དྲོའི་མཛད་རིམ་གྲུབ་རྗེས་ཉིན་རྒྱབ་ཚོུད་ ༡ ཐོག་ཆོས་ཚོགས་ཐེངས་ ༡༤ པའི་མཇུག་སྡོམ་མཛད་སྒོ་ཚོགས་ཡོད་པ་དང་མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་ཐེངས་འདིའི་ཆོས་ཚོགས་ཐོག་བོད་ཀྱི་ཆོས་བརྒྱུད་ཁག་གི་བླ་ཆེན་བསྟན་བདག་རྣམ་པས་དབུས་པའི་སྐུ་ཚབ་དང་ཚོགས་བཅར་བ་རྣམས་མཉམ་འཛོམས་ཐུབ་པ་འདིས་ཆིག་སྒྲིག་གི་རྣམ་པ་མངོན་གསལ་གནང་ཐུབ་ཡོད་པ་དང་། ལྷག་པར་དུ་ཆོས་ཚོགས་ཐོག་༸གོང་ས་མཆོག་གི་༸སྐུའི་ཡང་སྲིད་དང་འབྲེལ་བའི་གྲོས་ཆོད་ཅིག་སྤྱི་མོས་ཀྱིས་གཏན་འབེབས་གནང་བར་བསྔགས་བརྗོད་སོགས་གནང་བ་དང་ཆབས་ཅིག ཆོས་ཚོགས་རིམ་ཚོགས་ཐོག་གྲོས་ཆོད་གཏན་འབེབས་གནང་ཁག་དང་ལྷག་པར་དུ་ཆོས་ཚོགས་ཐོག་༸གོང་ས་མཆོག་གི་བཀའ་སློབ་ལམ་སྟོན་ཇི་ཕེབས་ཁག་ཕྱག་བསྟར་གནང་གནད་ཡིན་པ་གསུངས་ཡོད།