གཞོན་སྐྱེས།

སྤྱི་ཚོགས་དྲ་ལམ་དར་ཁྱབ་དང་ཤུགས་རྐྱེན་ཆེ་བའི་དུས་སྐབས་དང་བསྟུན་དབྱིན་ཡུལ་བོད་རིགས་ཚོགས་པས་གཞིས་བཞུགས་བོད་མི་ཚོས་བོད་ཀྱི་ཆོས་དང་སྐད་ཡིག རིག་གཞུང་བཅས་པ་སྲུང་སྐྱོབ་གནང་སླད་འཚེ་མེད་ཞི་བའི་ཐབས་བྱུས་ལྡན་པའི་ངང་རྒྱ་གཞུང་ལ་གདོང་ལེན་གྱི་ལས་འགུལ་སྣ་མང་སྤེལ་བཞིན་པའི་༸རྒྱལ་བའི་༸སྐུའི་བླ་གཟའ་སྟེ་ལྷག་དཀར་གྱི་ལས་འགུལ་ལ་གདུང་སེམས་མཉམ་བསྐྱེད་ཞུས་པ་འབྲེལ་ཏེ་སྤྱི་ཚོགས་དྲ་ལམ་བརྒྱུད་ལྷག་དཀར་གྱི་ལེ་ཚན་ཞེས་པའི་ལས་འགུལ་སྤེལ་དབུ་འཛུགས་གནང་ཡོད་པ་རེད། དབྱིན་ཡུལ་བོད་རིགས་ཚོགས་པའི་རིག་གཞུང་འགན་འཛིན་ཟླ་བ་ཚེ་རིང་ལགས་ཀྱིས་དྲ་ཐོག་ནས་ཟླ་རེ་རེའི་རེས་གཟའ་ལྷག་པར་ལྷག་དཀར་ལེ་ཚན་ཞེས་པའི་གནང་སྒོ་འདི་ནི་གཙོ་བོ་དབྱིན་ཡུལ་བོད་རིགས་ཚོགས་པས་རང་རེའི་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་བོད་པའི་གླུ་བ་དང་རིག་རྩལ་འདྲ་མིན་ཤེས་མཁན་གྱི་སྒྱུ་རྩལ་བ་ཚོར་རང་ཉིད་ཀྱི་ཐུན་མིན་རིག་རྩལ་ངོམ་རྒྱུའི་སྡིངས་ཆ་བསྐྲུན་རྒྱུ་དང་བོད་དོན་ཆབ་སྲིད་ལས་འགུལ་བ། སྤྱི་ཚོགས་ལ་སྨན་པའི་གཞན་ཕན་གྱི་དང་བླངས་ཞབས་ཞུའི་ལས་དོན་གཉེར་མཁན་སོགས་ལས་རིགས་དང་འཚོ་བའི་རྒྱབ་ལྗོངས་མི་འདྲ་བའི་མི་སྣ་ངོ་སྤྲོད་གནང་བ་བརྒྱུད་ནས་བོད་པའི་གཞོན་སྐྱེས་གཙོ་བོར་གྱུར་པའི་མང་ཚོགས་དག་ལ་མིག་ལྟོས་དང་ཀུན་སློང་སྤེལ་བར་ཆེད་དམིགས་ཀྱིས་གོ་སྒྲིག་གནང་བ་ཞི་ཡིན་པར་གསུངས་སོང་།དབྱིན་ཡུལ་བོད་རིགས་ཚོག་ས་པའི་ངོས་ནས་ཐེངས་འདིའི་དྲ་ཐོག་གི་ལྷག་དཀར་ལེ་ཚན་དེ་ ཟླ་ ༡༡ ཚེས་ ༡༡ རེས་གཟའ་ལྷག་པའི་ཉིན་ཐོག་མར་དབྱིན་ཡུལ་དུ་གནས་འཁོད་བོད་རིགས་སྒྱུ་རྩལ་བ་ཚོར་གོ་སྐབས་གནང་བའི་ཐོག་ནས་དབུ་འཛུགས་གནང་འདུག་ཅིང། རིམ་བཞིན་རྒྱ་བལ་འབྲུག་གསུམ་དང་ཕྱིའི་ཡུལ་གྲུ་ཁག་ཏུ་གནས་སྡོད་བོད་མི་སྒྱུ་རྩལ་བ་ཚོ་མགྲོན་འབོད་གནང་རྒྱུ་རེད་འདུག སྐབས་དེའི་ལྷག་དཀར་ལེ་ཚན་ཐོག་མའི་ནང་དབྱིན་ཡུལ་ཏུ་གནས་སྡོད་ལོ་ཆུང་བོུ་བསྟན་འཛིན་ཆོས་ཉིད་ལགས་དང་བསྟན་འཛིན་ཆོས་སྐྱིད་ལགས་གཅེན་གཅུང་གཉིས་ཀྱིས་དྲ་ཐོག་བརྒྱུད་ཆེས་ཐོག་མའི་མཉམ་ཞུགས་ཀྱིས་མང་ཚོགས་ལ་བོད་ཀྱི་རོལ་ཆ་དང་ལྷན་དུ་བོད་གཞས་འདྲ་མིན་ཕྱོགས་སྒྲིག་ཞུས་པ་ཞིག་གཟིགས་འབུལ་ཞུས་ཡོད་པ་ལྟར་མང་ཚོགས་ཁྲོད་ནས་དྲ་ཐོག་གི་ལྷག་དཀར་ལས་འགུལ་དེར་དགའ་བསུ་དང་བསྔགས་བརྗོད། དེ་བཞིན་གསན་གཟིགས་དང་དགའ་རྟགས་གནང་མཁན་དུ་མ་བྱུང་ཡོད་པ་རེད། རྩ་བའི་དབྱིན་ཡུལ་བོད་རིགས་ཚོགས་པའི་ཁྱབ་ཁོངས་ལ་བོད་རིགས་ཁྱོན་ ༡༢༠༠ ཙམ་ཡོད་པ་དང་བོད་རིགས་ཚོགས་པས་དྲ་ཐོག་བརྒྱུད་༸རྒྱལ་བའི་༸སྐུའི་བླ་གཟའ་སྲུང་བརྩི་ཞུ་སླད་ལྷག་དཀར་ལས་འགུལ་སྤེལ་བ་འདི་ཆེས་ཐོག་མ་མིན་པར་རྣམ་ཀུན་ནས་རེས་གཟའ་ལྷག་པར་ཉིན་ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་ཀྱི་མདུན་དུ་བོད་དོན་ཞི་བའི་ལས་འགུལ་རྣམ་པ་འདྲ་མིན་ཐོག་ནས་སྤེལ་གྱི་ཡོད་པ་རེད།

དེ་རིང་ཕྱི་ཟླ་ ༡༡ པའི་ཚེས་ ༩ ཉིན་ནས་་བཟུང་། ཟླ་འདིའི་ཚེས་༡༢ བོར་བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གིས་སྤྱི་ལོ་ ༢༠༡༥ ནས་བཟུང་གོ་སྒྲིག་ཞུ་བཞིན་པའི་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་དྲུག་པ་དེ་དྲྭ་རྒྱ་བརྒྱུད་ནས་དབུ་འཛུགས་གནང་སོང་།

དེ་རིང་སྔ་དྲོ་ཕྱག་ཚོད་བཅུ་བའི་ཐོག བོད་མིའི་བླ་ན་མེད་དབུ་ཁྲིད་སྤྱི་ནོར་༸གོང་ས་སྐྱབས་མགོན་རིན་པོ་ཆེ་མཆོག་གིས་དྲ་ལམ་བརྒྱུད་ནས། ཨ་རི་དང་ཨོ་གླིང་། དབྱིན་ཡུལ་དང་ཉི་ཧོང་སོགས་ཀྱི་མཚོན་པའི་རྒྱལ་ཁབ་མང་དག་ཅིག་གི་སློབ་དཔོན་ཆེན་མོ་དང་དགེ་རྒན་མང་པོ་ཞིག་ལ་དེང་རབས་ཀྱི་ཤེས་ཡོན་ལམ་ལུགས་ནང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་དགོས་གལ་སྐོར་ལ་བཀའ་སློབ་བསྩལ་སོང་།

དེ་རིང་ཟླ་ ༩ ཚེས་ ༧ ཉིན་གྱི་སྔ་དྲོ་ཆུ་ཚོད་ ༡༠ ཐོག་བཞུགས་སྒར་དྷ་སྟེང་བོད་ཁྱིམ་གྱི་ཞི་བདེ་ཚོགས་ཁང་དུ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་བོད་མིའི་མདུན་ལམ་སློབ་སྟོན་ཁང་གིས་གོ་སྒྲིག་འོག་བོད་མིའི་སྒྲིག་འཛུགས་ནང་སྲིད་ལས་ཁུངས་དྲུང་ཆེ་དཔེ་ཟུར་དབང་འདུས་ཚེ་རིང་ལགས་དང་ཐུབ་བསྟན་རིག་འཛིན་ལགས། དེ་བཞིན་བོད་མིའི་མདུན་ལམ་སློབ་སྟོན་ཁང་གི་འགན་འཛིན་དབུས་པའི་ལས་བྱེད་དང་མཉམ་ཞུགས་བ་བཅས་ལྷན་འཛོམས་ཐོག་ན་གཞོན་ནུས་སྟོབས་གོང་འཕེལ་གྱི་ཟབ་སྦྱོང་ཐེངས་དང་པོ་དབུ་འཛུགས་གནང་སོང་། ཐེངས་འདིའི་ཟབ་སྦྱོང་ཐོག་བཞུགས་སྒར་གཙོ་གྱུར་བོད་མི་གནས་ཡུལ་ས་གནས་འདྲ་མིན་ནས་བོད་པའི་གཞོན་སྐྱེས་ ༢༠ ཙམ་ནས་མཉམ་ཞུགས་གནང་འདུག གཞོན་སྐྱེས་དེ་དག་གིས་ཐེངས་འདིའི་ཟབ་སྦྱོང་བརྒྱུད་མ་འོངས་པའི་མི་ཚེ་ནང་རང་ཉིད་ནས་སློབ་སྦྱོང་གནང་བའི་རྒྱབ་ལྗོངས་དང་དོ་དབྱིངས་ཡོད་པའི་ལས་གནས་ཡོད་རིགས་ཐོག་མདུན་སྐྱོད་གནང་ཐུབ་པའི་ཐུགས་རེ་གནང་གི་འདུག ན་གཞོན་ནུས་སྟོབས་གོང་འཕེལ་གྱི་ཟབ་སྦྱོང་དབུ་འབྱེད་སྐབས་ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་ཀྱིས་དེང་གི་འཛམ་གླིང་ཐོག་རང་ཉིད་ནས་སློབ་སྦྱོང་དང་ཕྱག་ལས་སོགས་གང་གནང་ཡང་གནང་ཐུབ་ངེས་ཡིན་པ་དང་། ལྷག་པར་དུ་མི་ཚེ་ནང་ཕྱག་ལས་གནང་སྐབས་ངེས་པར་དུ་ཤེས་ཡོན་གྱི་གནས་ཚད་ངེས་ཅན་ཞིག་དགོས་པ་མ་ཟད་སོ་སོའི་དགའ་མོས་ཡོད་པའི་ལས་རིགས་གང་ཡིན་པ་དེར་སེམས་ཞུམ་པ་མེད་པའི་ཐོག་ནས་གནང་དགོས་གནད་ཡིན་པ་ལམ་སྟོན་གནང་ཡོད། གཞི་རྩའི་ཐེངས་འདིའི་ཟབ་སྦྱོང་འདི་འདས་པའི་ལོ་དུས་ནང་བོད་མིའི་མདུན་ལམ་སློབ་སྟོན་ཁང་གི་མདུན་ལམ་སློབ་སྟོན་པ་དང་ལས་བྱེད་རྣམ་པ་བོད་པའི་གཞིས་ཆགས་ཁག་ཏུ་མདུན་ལམ་སློབ་སྟོན་དང་འབྲེལ་བའི་སྐོར་སྐྱོད་གནང་སྐབས་ས་གནས་སུ་དེ་མུར་བཞུགས་བཞིན་པའི་བོད་པའི་གཞོན་སྐྱེས་རྣམས་ནས་ན་གཞོན་ནུས་སྟོབས་དང་འབྲེལ་བའི་ཟབ་སྦྱོང་ཞིག་དགོས་གལ་གྱི་དགོངས་འཆར་མི་ཉུང་བ་ཕུལ་དོན་ལྟར་གོ་སྒྲིག་གནང་བ་ཞིག་ཆགས་ཀྱི་ཡོད་པ་དང་། མི་ཚེ་ནང་འཆར་གཞི་བཀོད་སྒྲིག་གནང་སྟངས་སོགས་ཀྱི་ཐོག་སློབ་སྟོན་གནང་མཁན་རྒྱ་གར་གྱི་གྲོང་ཁྱེར་ Banglore ནས་གདན་ཞུ་གནང་བ་སྐུ་ཞབས་ Nalin Singh ལགས་དང་སྐུ་ཞབས་ Sunil Girdhar ལགས་གཉིས་ནས་གཞོན་སྐྱེས་ཚོ་རང་ཉིད་ཀྱི་རྩལ་གང་ཡོད་པ་ཤེས་ཐབས་དང་། ལས་དོན་ཁྲོད་འཆར་གཞི་བཀོད་སྟངས་སོགས་སློབ་སྟོན་གནང་རྒྱུ་མ་ཟད། གཞོན་སྐྱེས་ཕན་ཚུན་དབར་གླེང་མོལ་བརྒྱུད་ཉམས་མྱོང་བརྗེ་རེས། དེ་བཞིན་ཉིན་ལྟར་གཞོན་སྐྱེས་དང་འབྲེལ་བའི་བརྗོད་གཞི་འདྲ་མིན་ཐོག་གསུང་བཤད་གནང་རྒྱུ་སོགས་ཀྱི་མཛད་རིམ་འདུག

རྒྱལ་ས་ལྡི་ལིའི་ནང་རྟེན་གཞི་བྱས་པའི་རྒྱ་གར་གི་སྙན་གྲགས་ཆེ་བའི་ JNU འམ་ནེཧ་རུ་གཙུག་ལག་སློབ་གཉེར་ཁང་དུ་ཁ་སང་དང་དེ་རིང་བཅས་ཉིན་གྲངས་གཉིས་ཀྱི་རིང་བཙན་བྱོལ་ནང་གི་བོད་རིགས་གཞོན་སྐྱེས་ཚོར་འཕྲད་བཞིན་པའི་དཀའ་ངལ་ལ་གདོང་ལེན་གནང་ཕྱོགས་དང་འབྲེལ་བའི་ཟབ་སྦྱོང་ཞིག་ཚོགས་ཀྱི་ཡོད་པ་དང་། ནེཧ་རུ་གཙུག་ལག་སློབ་གཉེར་ཁང་གི་བོད་ཀྱི་གླེང་སྟེགས་དང་དབྱིན་ཇིའི་རྒྱལ་ས་ལོན་ཊོན་གྱི་ Westminister  གཙུག་ལག་སློབ་གྲྭ་ཐུན་མོང་ནས་གོ་སྒྲིག་ཞུས་པའི་ཟབ་སྦྱོང་ཐོག་རྒྱ་གར་ནང་ཡོད་པའི་བོད་རིགས་གཞོན་སྐྱེས་སྤྱི་དང་ལྷག་དོན་བཙན་བྱོལ་བོད་མིར་ཁྲིམས་ཀྱི་དཀའ་ངལ་དང་འགྲོ་བ་མིའི་ཐོབ་ཐང་གི་དཀའ་ངལ།   ཤེས་ཡོན། བོད་པའི་ཚོགས་པ་ཁག་ལ་བཙན་བྱོལ་བ་ཡིན་པའི་ཆ་ནས་འཕྲད་བཞིན་པའི་དཀའ་ངལ་སོགས་ཀྱི་བརྗོད་གཞི་འདྲ་མིན་ཐོག་གྲོས་བསྡུར་གནང་གི་ཡོད་པ་རེད།    ཟབ་སྦྱོང་འདིའི་ཐོག་ཚོགས་བཅར་བ་ཙམ་མ་གཏོགས་གཞན་ཕྱི་མི་སུ་གང་ཡང་ཕེབས་ཆོག་གི་མེད་ནའང་། རྒྱ་གར་གྱི་ས་ཕྱོགས་གང་ས་ནས་ཕེབས་པའི་སློབ་ཕྲུག་དང་མཐོ་རིམ་སློབ་གྲྭའི་སློབ་མ། བོད་མི་ལས་འགུལ་བ། དེ་བཞིན་ལས་བྱེད་དང་ཉམས་ཞིབ་པ་སོགས་ཁྱོན་ཚོགས་བཅར་བ་མི་གྲངས་ ༦༠ ལྷག་ཡོད་པ་དང་། ཚོགས་བཅར་བ་དེ་དག་དབར་བཙན་བྱོལ་བ་ཞིག་ཡིན་པའི་ཆ་ནས་སློབ་ཕྲུག་ཞིག་ལ་མཐོ་རིམ་སློབ་གྲྭ་ཁག་ཏུ་སློབ་འཇུག་སྐབས་འཕྲད་པའི་དཀའ་ངལ་དང་། སློབ་ཡོན་གྱི་དཀའ་ངལ་སོགས་དཀའ་ངལ་མང་དག་ཅིག་ལ་གདོང་ལེན་གནང་དགོས་སྟབས། ད་རེས་ཚོགས་བཅར་ཚོས་ངལ་བ་འདྲ་མིན་འཕྲད་བཞིན་པ་རྣམས་མཉམ་སྤུངས་ཀྱིས་ཐུན་མོང་གི་དཀའ་ངལ་ཞིག་ལ་ངོས་འཛིན་ཐུབ་ཐབས་དང་། དེ་འབྲེལ་དཀའ་ངལ་དེ་དག་ལ་གདོང་ལེན་གནང་ཕྱོགས་ཀྱི་ཐབས་ལམ་སོགས་ཀྱི་སྐོར་བཀའ་བསྡུར་གནང་གི་འདུག གནས་ཚུལ་ཤེས་རྟོགས་བྱུང་བར་གཞིགས་ན། ཉིན་གྲངས་གཉིས་ཀྱི་ཟབ་སྦྱོང་ཐོག་བོད་རིགས་གཞོན་སྐྱེས་རྣམས་ལ་རྒྱ་གར་གྱི་འགྲོ་བ་མིའི་ཐོབ་ཐང་ཚོགས་པ་དང་། ཤེས་ཡོན་དང་འབྲེལ་བའི་བོད་ཕྲུག་ཁྱིམ་སྡེ། སཾ་བྷོ་ཊ་སློབ་སོགས་ཀྱི་སློབ་ཁག་གི་འགན་འཛིན།  སྤྱི་ཚོགས་ཞབས་ཞུ་བ་དང་དེ་བཞིན་ལས་འགུལ་སོགས་ནས་ཟབ་ཁྲིད་གནང་གི་ཡོད་པ་ལྟར་གཞོན་སྐྱེས་ཕན་ཚུན་དབར་དགོངས་ཚུལ་བརྗེ་རེས་གནང་གི་ཡོད་པ་རེད།

དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཆེད་བཆར་ཞུས་པའི་ཨ་རིའི་ Kivunim ཤེས་ཡོན་ལྟེ་གནས་ཁང་གི་ Jewish མི་རིགས་ཀྱི་དགེ་སློབ་དྲུག་ཅུ་ལྷག་ལ་མཇལ་ཁ་དང་བཀའ་སློབ་བཀའ་དྲིན་བསྩལ་ཡོད་པ་རེད།སྐབས་དེར་མགོན་པོ་༸གང་ཉིད་མཆོག་གིས་དགེ་ལས་སློབ་མ་རྣམས་ད་རེས་འདིར་ཆེད་མངགས་༸གང་ཉིད་མཆོག་གི་ལོ་ངོ་དྲུག་ཅུ་ལྷག་གི་རིང་བཞུགས་གནས་དྷ་རྨ་ས་ལར་ཆེད་བཅར་གནང་བར་དགའ་བསུའི་འཚམས་འདྲི་དང་སྦྲགས། འཛམས་གླིང་ཐོག་ཡོད་པའི་འགྲོ་བ་མི་ཐེར་འབུམ་བདུན་ལྷག་ཡོད་པ་རྣམས་ཨ་མའི་ནུ་གསོའི་བྱམས་སྐྱོང་འོག་འཚར་ལོངས་བྱུང་བ་འབའ་ཞིག་ཡིན་སྟབས་ཇིའུ་ཤ་དང་ཡི་ཤུ། ཁ་ཆེ། ནང་པ། དེ་བཞིན་ཧིཾ་དུ་སོགས་ཀྱི་དབྱེ་འབྱེད་དེ་དག་དགོས་མེད་རེད་ཅེས་བཀའ་བསྩལ་ཡོད། ལྷག་པར་དུ་མགོན་པོ་༸གང་ཉིད་མཆོག་ནས་ང་ཚོ་འགྲོ་བ་མིའི་འཚར་ལོངས་ཁྲོད་ལ་གཞན་གྱི་བྱམས་སྐྱོང་དང་བརྩེ་བ་འདོད་མཁན་ཤ་སྟག་ཡིན་པས་རྒྱུན་དུ་རང་ཉིད་ལ་བདེ་བ་འདོད་པ་ལྟར་འགྲོ་བ་གཞན་ལའང་བྱམས་སྐྱོང་དང་བརྩེ་བའི་ཐོག་ནས་སྐྱོང་དགོས་གལ་ཡིན་པ་དང་། རྣམ་ཀུན་ནས་ཁོང་ཁྲོའི་གཞན་དབང་དུ་སོང་ཚེ་གཞན་ལ་ཕན་རྒྱུ་མེད་པ་མ་ཟད། རང་ཉིད་ཀྱི་ལུས་པོའི་བདེ་ཐ་ངལའང་གནོད་ངེས་ཡིན་པ་སོགས་ངོ་སྤྲོད་མཛད་པ་དང་ཆབས་ཅིག ཕྱི་ལུས་པོའི་འཕྲོད་བསྟེན་ཐོག་དོ་སྣང་གནང་བ་བཞིན་ནང་སེམས་ཀྱི་འཕྲོད་བསྟེན་ཐོག་དེ་མཚུངས་དོ་སྣང་གནང་སྟེ་བྱམས་བརྩེའི་བསམ་བློ་གོང་འཕེལ་གཏོང་གནད་ཡིན་པར་ལམ་སྟོན་བསྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་ནས་༸སྐུ་ཉིད་མཆོག་གི་ཐུགས་བསྐྱེད་དམ་བཅའ་གསུམ་ལས་འཕྲོས་ནས་འཛམ་གླིང་འདིའི་ཐོག་ཡོད་པའི་ཆོས་ལུགས་སོ་སོར་ལྟ་གྲུབ་མི་འདྲ་བ་ཡོད་ཀྱང་གཞི་རྩའི་བསླབ་བྱ་གཙོ་བོ་བྱམས་བརྩེ་གསུང་མཁན་གཅིག་མཚུངས་ཡིན་སྐོར་བཀའ་བསྩལ་བ་དང་ཆབས་ཅིག དེང་སྐབས་Afganistan དང་ Syria སོགས་ཀྱི་ནང་ཁ་ཆེའི་ཆོས་ལུགས་གཅིག་མཚུངས་ཡིན་པ་དེ་ལྟར་ཡང་ Sunni and Shia ཞེས་པའི་རྣམ་དབྱེ་ཐོག་ནས་དཀའ་རྙོག་དང་། Egypt གཙོ་གྱུར་རྒྱལ་ཁབ་ཁག་གཅིག་ཏུ་ཡི་ཤུ་དང་ཁ་ཆེའི་དབར་འཁྲུག་རྩོད་བྱུང་བ་མ་ཟད། ཆོས་ཀྱི་མིང་ཐོག་ནས་འཁྲུག་རྩོད་དང་མི་བསད་ཁྲད་སྦྱོར་འཚབ་ཆེན་འབྱུང་བཞིན་པ་དེ་ནི་བློ་ཕམ་གྱི་གནས་སྟངས་ཤིག་ཡིན་པར་བཀའ་བསྩལ་ཡོད།མགོན་པོ་༸གང་ཉིད་མཆོག་ནས་བོད་ཀྱི་ཐུན་མོང་མ་ཡིན་པའི་སྐད་ཡིག་དང་རིག་གཞུང་། དེ་བཞིན་ནཱ་ལེནྡཱའི་རིག་གནས་དེ་དག་མི་ཉམས་རྒྱུན་འཛིན་དང་སླར་གསོ་མཛད་བཞིན་ཡོད་པ་དང་། བོད་ཀྱི་རང་བྱུང་ཁོར་ཡུག་སྲུང་སྐྱོབ་ཐོག་དམིགས་བསལ་གྱི་མཛད་འཁུར་བཞེས་བཞིན་ཡོད་པ་སོགས་བཀའ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་བསྩལ་གྲུབ་མཚམས་སུ་སློབ་མ་ཁག་ཅིག་ནས་མགོན་པོ་མཆོག་ལ་སྐྱབས་བཅོལ་ནང་ཕེབས་པའི་རྗེས་སུ་ཤུགས་རྐྱེན་ཆེ་ཤོས་གང་བྱུང་ཡོད་མེད་པ་དང་། དྲྭ་རྒྱའི་དུས་སྐབས་འདིར་སེམས་པ་རྩེ་གཅིག་ཏུ་གནས་ཐབས་ཇི་ལྟར་བྱེད་དགོས་པ་སོགས་དང་འབྲེལ་བའི་བཀའ་འདྲི་དགོངས་སྐོར་ཞུས་ཡོད་པ་རེད། སྐབས་དེར་མགོན་པོ་༸གང་ཉིད་མཆོག་གིས་བོད་ཀྱི་རིག་གཞུང་ཐོག་ནས་ཤུགས་རྐྱེན་ཆེན་པོ་ཐེབས་ཡོད་པ་དང་བོད་པའི་ནང་ཆོས་ལས་ཚན་རིག་དང་ལྟ་གྲུབ་གཉིས་ཀྱི་ཐོག་ནས་རྒྱལ་སྤྱིའི་ཚན་རིག་མཁས་པ་དུ་མའི་ལྷན་དུ་གྲོས་བསྡུར་གནང་ནས་ཕྱོགས་གཉིས་ཀར་ཕན་ཐོགས་ཆེན་པོ་བྱུང་ཡོད་པ་མ་ཟད་ཤེས་ཡོན་སྡེ་ཁག་ཏུ་སློབ་ཚན་གྱི་ངོ་བོར་སློབ་ཁྲིད་གནང་ཐུབ་ཚེ་དགེ་མཚན་ཆེན་པོ་ལྡན་ཡོད་པ་སོགས་བཀའ་ལན་མཛད་ཡོད།གཞི་རྩའི་ Kivunim ཤེས་ཡོན་ལྟེ་གནས་ཁང་ནས་འདས་པའི་ལོ་ངོ་ ༣༠ ཙམ་གྱི་གོང་ནས་ཤེས་ཡོན་ལྟེ་གནས་ཁང་དེའི་སློབ་མ་ཁག་གཅིག་སློབ་གྲྭའི་གུང་གསེང་དང་བསྟུན་བཞུགས་སྒར་གཙོས་པའི་རྒྱ་གར་གྱི་ས་གནས་ཁག་ཅིག རིག་གཞུང་དང་འབྲེལ་བ་ཆེ་བའི་རྒྱལ་སྤྱིའི་ཡུལ་གྲུ་འདྲ་མིན་ནང་གི་ས་གནས་ཁག་གཅིག་ལ་ཆེད་བཅར་གནང་གི་ཡོད་པ་རེད། ས་གནས་དེ་དག་གི་ཡུལ་གོམས་གཤིས་ལུགས་དང་སྐད་ཡིག་ཐོག་སློབ་སྦྱོང་གནང་གི་ཡོད་པ་མ་ཟད། ཁོང་རྣམས་ནས་ད་རེས་བཞུགས་སྒར་དུ་ཉིན་གྲངས་ལྔ་ཙམ་རིང་བཞུགས་ཀྱི་ཡོད་པ་ལྟར་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་སྒོམ་གྲུབ་ཉམས་ལེན་དང་བོད་ཀྱི་རྒྱལ་རབས་སོགས་ལ་སློབ་གཉེར་གནང་གི་ཡོད་པ་རེད།

བཞུགས་སྒར་ཉེ་འདབས་སུ་རྟེན་གཞི་བྱས་པའི་དབུས་སྣེ་ལེན་ཁང་གི་འཛིན་སྐྱོང་སྦྱོང་བརྡར་ཁང་དུ་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་བཞི་པ་དབུ་འཛུགས་དང་སྦྲགས། སྲིད་སྐྱོང་མཆོག་གིས་ན་གཞོན་ཉམས་ཞིབ་པ་རྣམས་ནང་ཁུལ་གྱི་གནད་དོན་ཁོ་ནར་དབུ་འཁོར་ནས་མ་ཞུགས་པར་རྒྱ་ནག་དང་རྒྱལ་སྤྱིའི་སྡིང་ཆ་ལ་ཁ་ལྟས་ནས་ཕྱག་ལས་གནང་རྒྱུ་གལ་ཆེན་པོ་ཡིན་པ་གསུངས་སོང་། དེ་རིང་སྔ་དྲོ་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་ཞུས་པའི་བོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་བཞི་པ་དབུ་འཛུགས་གནང་ཡོད་པ་དང་། ཚོགས་འདུ་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་།   དམིགས་བསལ་སྐུ་མགྲོན་ཨ་མྱེས་རྨ་ཆེན་བོད་ཀྱི་རིག་གཞུང་བསྟི་གནས་ཁང་གི་འགན་འཛིན་མཁས་དབང་བཀྲ་ཤིས་ཚེ་རིང་ལགས་གཙོས། རྒྱ་གར་གྱི་མཐོ་སློབ་འདྲ་མིན་ནང་འབུམ་རམས་པའི་སློབ་གཉེར་གནང་བཞིན་པ་དང་། སྡེ་ཚན་འདྲ་མིན་ནང་ཉམས་ཞིབ་དང་འབྲེལ་བའི་ཕྱག་ལས་གནང་མཁན་གྱི་བོད་རིགས་ན་གཞོན་ཉམས་ཞིབ་པ་དང་ཚོགས་བཅར་བ་ཁྱོན་བརྒྱ་སྐོར་ཙམ་ཆེད་བཅར་གནང་འདུགབོད་ཀྱི་ན་གཞོན་ཉམས་ཞིབ་པའི་ཚོགས་འདུ་ཐེངས་བཞི་པ་འདི་དེ་རིང་ནས་འགོ་འཛུགས་ཀྱིས་ཕྱི་ཚེས་༢༤ བར་ཚོགས་ཀྱི་ཡོད་པ་དང་། ཚོགས་དུས་རིང་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་དང་རྒྱ་གར་གྱི་མཐོ་སློབ་འདྲ་མིན་ནང་འབུམ་རམས་པའི་སློབ་གཉེར་གནང་བཞིན་པའི་བོད་རིགས་ན་གཞོན་ཉམས་ཞིབ་པ་སུམ་ཅུ་ལྷག་ནས་ཡིག་འབྲུ་ཁྲི་བདུན་ལ་བསྐྱར་ཞིབ་བལྟས་པ་དང་། བོད་ཀྱི་ས་ཁུལ་དབྱེ་བགོས་ཀྱི་བྱུང་རིམ། བོད་མིའི་དད་མོས་ཀྱི་འདུ་ཤེས་དང་རང་བྱུང་ཁམས་ཀྱི་ཁོར་ཡུག་སྲུང་སྐྱོབ། གཞན་ཡང་བཀག་སྡོམ་འོག་བོད་ཀྱི་རྩོམ་རིག་གི་གནས་བབས་དང་། ཨ་རི་དང་རྒྱ་ནག་གི་འབྲེལ་བའི་ནང་བོད་ཀྱི་གནད་དོན་སོགས་བརྗོད་གཞི་འདྲ་མིན་ཐོག་ཉམས་ཞིབ་གནང་བས་སྐོར་གཏམ་བཤད་དང་གྲོས་བསྡུར་གནང་གི་ཡོད་པ་རེད། དེ་བཞིན་སྐབས་དེར་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་གིས་བར་སྐབས་ནས་རྒྱ་ནག་གཞུང་གིས་རྒྱལ་སྤྱིའི་སྡིང་ཆའི་སྟེང་ཉམས་ཞིབ་དང་འབྲེལ་བའི་ལས་དོན་ཐོག་འགྲོ་གྲོན་མང་པོ་བཏང་བཞིན་པ་མ་ཟད། ལྷག་པར་དུ་རྒྱ་གར་གཙོས་པའི་རྒྱལ་སྤྱིའི་གསར་ཁང་ཆེ་ཁག་གི་གསར་ཤོག་དང་དུས་དེབ་ཀྱི་ཤོག་གྲངས་ཁ་ཤས་ཉོས་ཏེ། རྒྱ་ནག་གཞུང་གིས་བོད་ཡར་རྒྱས་བཏང་བའི་བཏང་རབ་དང་། རྒྱ་ནག་རང་ཉིད་ཀྱི་བསམ་བློ་དང་མཐུན་པའི་དཔྱད་རྩོམ་འདྲ་མིན་སྤེལ་བཞིན་ཡོད་པ་སོགས་འགྲེལ་བརྗོད་དང་སྦྲགས། བོད་རིགས་ན་གཞོན་ཉམས་ཞིབ་པ་རྣམས་ནས་སོ་སོ་ནང་ཁུལ་གྱི་གནད་དོན་ཁོ་ནར་དབུ་འཁོར་ནས་མ་ཞུགས་པར་རྒྱ་ནག་དང་རྒྱལ་སྤྱིའི་སྡིང་ཆ་ལ་ཁ་ལྟས་ནས་ཕྱག་ལས་གནང་རྒྱུ་གལ་ཆེན་པོ་རེད་ཅེས་གསུངས་སོང་། སྲིད་སྐྱོང་མཆོག་ནས་ན་གཞོན་ཉམས་ཞིབ་པ་རྣམས་ནས་གོ་སྐབས་ནམ་བྱུང་ཐོག་རྒྱལ་སྤྱིའི་ཉམས་ཞིབ་འདུ་འཛོམས་འདྲ་མིན་ཐོག་མཉམ་ཞུགས་གནང་སྟེ་རང་གི་ཉམས་ཞིབ་གནང་བ་རྣམས་ཁྱབ་སྤེལ་གནང་རྒྱུ་དང་། ལྷག་པར་དུ་ཉམས་ཞིབ་པ་ཞིག་ཡིན་པའི་ཆ་ནས་རྒྱུན་དུ་དབྱིན་སྐད་བེད་སྤྱོད་བྱེད་ཀྱི་ཡོད་ཀྱང་། དེའི་ཐོག་བོད་ཡིག་དང་རྒྱ་ཡིག་ལ་སོགས་པའི་སྐད་ཡིག་གཞན་ཤེས་པ་ཡིན་ན་མ་འོངས་པར་གོ་སྐབས་བཟང་པོ་ཐོབ་རྒྱུ་སོགས་ཀྱི་དགེ་མཚན་ཡོད་པའི་ལམ་སྟོན་གནང་བ་དང་ཆབས་ཅིག་ཏུ་གཙོ་བོ་ཉམས་ཞིབ་པ་ཞིག་ཡིན་པའི་ཆ་ནས་རང་སོ་སོ་ལ་སྟངས་འཛིན་གནང་སྟེ་རྒྱུན་དུ་དཔྱད་གཏམ་རིགས་སྤེལ་དགོས་པ་དང།  དེ་ལྟར་གནང་ཚེ་རང་ཉིད་ཙམ་མ་ཟད་བོད་མིའི་སྒྲིག་འཛུགས་དང་བོད་དོན་ལ་ཡང་ཕན་ཐོག་ཆེན་པོ་བྱུང་ངེས་ཡིན་པ་གསུངས་ཡོད།

ཕྱི་ལོ་ ༢༠༡༨ ལོའི་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ལྷན་ཚོགས་ཀྱི་མཛའ་འབྲེལ་རིག་རྩལ་འདུ་འཛོམས་ཆེན་མོ་ཐེངས་ ༡༤ པ་དེ་བཞིན་འདི་ལོའི་ཕྱི་ཟླ་ ༩ པའི་ཟླ་མཇུག་གམ་ཡང་ན་ཕྱི་ཟླ་ ༡༠ པའི་མགོ་སྟོད་དུ་རྒྱ་གར་ལྷོ་ཕྱོགས་སྦེལ་སྐོབ་བོད་མིའི་གཞིས་ཆགས་སུ་ཚོགས་གཏན་འཁེལ་འདུག དེ་ཡང་དེ་རིང་སྔ་དྲོ་རྡ་ས་བོད་ཀྱི་གསོལ་མགྲོན་ཁང་གི་ཚོགས་ཁང་དུ་གསར་འགོད་ལྷན་ཚོགས་ཤིག་གི་ཐོག་འདུ་འཛོམས་ཆེན་མོའི་ཚོགས་དུས་དང་ས་ཚིག་གསལ་སྒྲགས་གནང་བ་དང་འབྲེལ། རྩ་བའི་ད་བར་ལོ་ ༡༣ རིང་ལོ་ལྟར་རྒྱ་གར་ལྷོ་ཕྱོགས་ Chennai གྲོང་ཁྱེར་ནང་གི་ TSAM སློབ་ཕྲུག་ཚོགས་པའི་ངོས་ནས་འདུ་འཛོམས་དེ་གོ་སྒྲིག་གནང་བཞིན་ཡོད་པ་དེ་ལྟར་ཡང་། དེང་སྐབས་ Chennai ནང་མཐོ་སློབ་གཉེར་བཞིན་པའི་སློབ་ཕྲུག་གི་གྲངས་འབོར་ཉུང་རུ་ཕྱིན་པ་དང་། དཔལ་འབྱོར་གྱི་དཀའ་ངལ་སོགས་ཀྱི་རྐྱེན་པས་སློབ་ཕྲུག་ཚོགས་པ་དེའི་ངོས་ནས་ད་ལོ་ལས་གཞི་དེ་གོ་སྒྲིག་གནང་ཐུབ་ཀྱི་མེད་སྟབས། རྒྱ་གར་ས་ཕྱོགས་འདྲ་མིན་གྱི་སློབ་ཕྲུག་ཚོགས་པ་རྣམས་ཀྱི་འཐུས་མི་ལས་གྲུབ་པའི་གོ་སྒྲིག་ཚོགས་ཆུང་ཞིག་གསར་བཛུགས་གནང་བའི་ཐོག་ནས་ལོ་འདིའི་ཚོགས་འདུ་དེ་གོ་སྒྲིག་གནང་བཞིན་པ་རེད་འདུག ལས་གཞི་རྒྱུན་ཆད་རྒྱུའི་ཉེན་ཚབ་ཀྱི་གནས་སྟངས་འགྱུར་བ་དང་བསྟུན། འདི་ལོའི་འདུ་འཛོམས་གོ་སྒྲིག་ཚོགས་ཆུང་གི་ངོས་ནས་བོད་པའི་སློབ་ཕྲུག་གི་ཕ་མ་དང་སྤྱི་ཚོགས་ཀྱི་ངོས་ནས་གཞོན་སྐྱེས་ཚོར་སྤྱི་ཚོགས་ཀྱི་ལས་དོན་ཐོག་འཁུར་མཉམ་ལེན་བྱ་རྒྱུའི་སྐུལ་སློང་མང་ཙམ་སྤེལ་དགོས་པ་དང་། བོད་པའི་ཚོགས་སྡེ་ཁག་དང་སྤྱི་ཚོགས་ཀྱི་ངོས་ནས་ད་བར་ལས་གཞི་དེའི་རིགས་ལ་རྒྱབ་སྐྱོར་མཐུན་འགྱུར་གནང་བ་བཞིན། ལས་གཞི་དེ་དག་གལ་ཆེའི་རང་བཞིན་ལ་གཟིགས་ཏེ་རྒྱབ་སྐྱོར་སྔར་ལྷག་གནང་དགོས་པའི་འབོད་སྐུལ་ཞུ་བཞིན་འདུག རྩ་བའི་ཐེངས་འདིའི་འདུ་འཛོམས་ཐོག་རྒྱ་གར་རྒྱལ་ཡོངས་ཀྱི་ས་གནས་གང་སར་ཡོད་པའི་བོད་པའི་སློབ་ཕྲུག་ཚོགས་པ་ ༡༡ ནས་སློབ་ཕྲུག་ཁྱོན་ ༣༠༠ ཙམ་ནས་མཉམ་ཞུགས་གནང་རྒྱུའི་རེ་བ་གནང་བཞིན་འདུག་པ་དང་། འདུ་འཛོམས་ལས་གཞི་དེའི་ཐོག་ས་གནས་འདྲ་མིན་གྱི་སློབ་ཕྲུག་ཕན་ཚུན་དབར་བགྲོ་གླེང་དང་ཡིག་རིགས་འགྲེམས་སྤེལ། ཚོགས་པ་སོ་སོའི་ངོ་སྤྲོད་ཀྱི་གློག་བརྙན་བཟོ་བསྐྲུན། གཞས་སྣ་འཁྲབ་སྟོན་དང་སིལ་པོལ་རྩེད་འགྲན་སོགས་གནང་རྒྱུ་རེད་འདུག  གོ་སྒྲིག་ཚོགས་ཆུང་ངོས་ནས་ལས་གཞི་དེའི་ཆེད་དུ་དངུལ་འབོར་འབུམ་ ༥ དང་ཁྲི་ ༦ ཙམ་གྱི་འགྲོ་གྲོན་ཚོད་དཔག་གནང་གི་འདུག་པ་དང་། ད་བར་བོད་པའི་གཞུང་འབྲེལ་མ་ཡིན་པའི་ཚོགས་པ་ ༥ དང་ཀིརྟི་དགེ་རྩ་ཚོགས་པ་བཅས་ནས་ཧིན་སྒོར་བདུན་ཁྲི་ལྔ་སྟོང་ཙམ་ཞིག་ཞལ་འདེབས་གནང་མཁན་བྱུང་འདུག

ཕྱི་རྒྱལ་དུ་གནས་བཞུགས་བོད་ཕྲུག་རྣམས་ལ་ཆེད་མངགས་བོད་ཀྱི་ཐུན་མོང་མ་ཡིན་པའི་རིག་གཞུང་དང་ཡུལ་གོམས་གཤིས་ལུགས་སོགས་བསླབ་ཆེད་བཞུགས་སྒར་དུ་རྟེན་གཞི་བྱས་པའི་རྡ་སྟེང་བོད་ཕྲུག་ཁྱིམ་སྡེར་ཟླ་བ་འདིའི་ཚེས་ ༢ ནས་འགོ་འཛུགས་ཀྱིས་དབྱར་ཁའི་སློབ་དུས་ཐེངས་ ༡༣ པ་འཚོགས་བཞིན་འདུག ཐེངས་འདིའི་དབྱར་ཁའི་སློབ་དུས་དེར་ཕྱི་རྒྱལ་ཡུལ་གྲུ་ཨ་མི་རི་ཀ་དང་། ཁེ་ན་ཌ། སུད་སི་སོགས་རྒྱལ་ཁབ་ཁག་དྲུག་ནས་བོད་པའི་སློབ་ཕྲུག་ ༨༠ ལྷག་ནས་མཉམ་ཞུགས་གནང་བ་དང་།  དབྱར་ཁའི་སློབ་དུས་རིང་སློབ་ཕྲུག་ཚོར་བོད་ཀྱི་སྐད་ཡིག་དང་རྒྱལ་རབས།  ནང་ཆོས། བཟང་སྤྱོད།  བོད་ཀྱི་རིག་གཞུང་དང་ཡུལ་གོམས་གཤིས་ལུགས།  དེ་བཞིན་ད་ལྟའི་བོད་ཀྱི་གནས་བབ།  བོད་ཁྱིམ་སློབ་གྲྭ་ཁག་ཏུ་སྐོར་བསྐྱོད་སོགས་ཀྱི་ལས་རིམ་ཁག་ཅིག་གོ་སྒྲིག་གནང་འདུག འདི་གའི་གསར་འགོད་པས་སློབ་དུས་དེའི་ནང་མཉམ་ཞུགས་གནང་མཁན་ཁག་ཅིག་ལ་བཀའ་འདྲི་ཞུས་པར་བོད་ཕྲུག་ཚོས་སློབ་དུས་དེར་ཡོང་དགོས་དོན་གཙོ་བོ་ནི་རང་ཉིད་སོ་སོ་བོད་པ་ཡིན་པའི་ཆ་ནས་བོད་ཀྱི་སྐད་ཡིག་དང་བོད་ཀྱི་རིག་གཞུང་ཐོག་བསླབ་པ་སློབ་གཉེར་བྱེད་དགོས་གལ་གཟིགས་ནས་ཡོང་བ་ཡིན་པ་དང་།  འགའ་རས་རང་བོད་པ་ཡིན་ཟེར་དུས་བོད་སྐད་ཐོག་བཀའ་མོལ་གནང་མ་ཐུབ་ན་ངོ་ཚ་བོ་ཆགས་ཀྱི་འདུག་པས་དེར་བརྟེན་དབྱར་ཁའི་སློབ་དུས་དེར་ཡོང་བ་ཡིན་པ་གསུངས་སོང་། རྩ་བའི་དབྱར་ཁའི་སློབ་དུས་དེ་བཀའ་ཟུར་རྗེ་བཙུན་པདྨ་མཆོག་གི་དགོངས་བཞེས་དང་ཕྱི་རྒྱལ་གནས་བཞུགས་བོད་ཕྲུག་ཚོའི་ཕ་མ་རྣམས་ཀྱིས་ཕྱིའི་རྒྱལ་ཁབ་ཏུ་རང་གི་ཕྲུ་གུ་རྣམས་རང་སྐད་དང་བྲལ་ནས་མི་རིགས་གཞན་གྱི་རིག་གཞུང་གི་ཤུགས་རྐྱེན་ལ་བརྟེན་ནས་བོད་པའི་རིག་གཞུང་ཉམས་ཀྱི་ཡོད་པས། དོན་གནད་དེར་གཟིགས་ནས་ཆེད་མངགས་བོད་ཀྱི་རིག་གཞུང་དང་ཡུལ་གོམས་གཤིས་ལུགས་སོགས་ལ་བསླབ་པ་སློབ་གཉེར་ཆེད་དབྱར་ཁའི་སློབ་དུས་བཙུགས་པ་རེད་འདུག  དབྱར་ཁའི་སློབ་དུས་དེ་ཟླ་བ་གཅིག་ལྷག་ཙམ་ཚོགས་ཀྱི་ཡོད་པ་དང་སློབ་དུས་དེར་བོད་ཕྲུག་མཉམ་ཞུགས་གནང་མཁན་ལོ་རེ་ནས་ཇེ་མང་དུ་འགྲོ་བཞིན་པ་རེད་འདུག