རྒྱ་ནག

ཉེ་ཆར་རྒྱ་ནག་དབུས་དམར་ཤོག་ཚོགས་པའི་ཆབ་སྲིད་ལྷན་ཁང་གི་རྒྱུན་ལས་དང་རྒྱ་ནག་ཆབ་སྲིད་གྲོས་ཚོགས་ཀྱི་འགོ་གཙོ་ Wang Yang བོད་དབུས་ལྷོ་ཁ་དང་ལྷ་ས། མངའ་རིས་སོགས་ས་གནས་སུ་རྟོག་ཞིབ་ཀྱིས་སྐོར་སྐྱོད་བྱས་ཏེ་ཁ་བྲལ་རིང་ལུགས་པར་སྔར་ལྷག་གདོང་ལེན་ནན་པོ་བྱ་རྒྱུ་ཡིན་ཞེས་བརྗོད་འདུག རྒྱ་ནག་གཞུང་འབྲེལ་བརྒྱུད་ལམ་ཐོག་གནས་ཚུལ་སྤེལ་གསལ་ཝང་དབྱང་གིས་ཟླ་ ༨ ཚེས་ ༡༩ ནས་ ༢༡ བར་ལྷོ་ཁ་དང་ལྷ་ས། མངའ་རིས་སོགས་ས་གནས་ཁག་ཏུ་ལས་དོན་རྟོག་ཞིབ་ཆེད་དབུལ་སྐྱོར་གནས་སྤོས་བཀོད་སྒྲིག་ས་ཚིགས་དང་དབུལ་སྐྱོར་ཐོན་ལས་གླིང་ཁུལ། དབུལ་ཕོངས་ཁྱིམ་ཚང་དང་གྲོང་ཚོ་འཐུས་མི་ལྷན་ཁང་། དེ་བཞིན་ཆོས་ལུགས་བྱེད་སྒོ་སྤེལ་ཡུལ་སོགས་སུ་ཕྱིན་ནས་གནས་ཚུལ་རྒྱུས་ལོན་བྱས་པའི་ཁྲོད། དབུལ་སྒྲོལ་འགག་གཏོར་གྱི་གྲུབ་འབྲས་སྲ་བརྟན་དང་མཐོར་འདེགས་བྱེད་པའི་བཞུགས་མོལ་ཚོགས་འདུ་བསྐོང་ཚོགས་ཀྱིས་བོད་ཀྱི་དབུལ་སྒྲོལ་འགག་གཏོར་སོགས་ཀྱི་ལས་དོན་ཐད་གཟེངས་སུ་ཐོན་པའི་གྲུབ་འབྲས་ཐོབ་པར་གདེང་འཇོག་གང་ལེགས་བྱས་ཡོད་པ་སོགས་འགྲེལ་བརྗོད་བྱས་པ་མ་ཟད། ལྷག་དོན་བོད་ནི་ཏཱ་ལའི་ཚོགས་པ་དང་བློ་ཐག་ཉེ་བ་དང་ཁ་བྲལ་བའི་འཐབ་རྩོད་བྱེད་པའི་ཆེས་མདུན་ཕྱོགས་སུ་གནས་ཡོད་སྟབས། རྒྱ་གཞུང་གི་ངོས་ནས་དབུལ་སྒྲོལ་འགག་གཏོར་དང་ཆོས་ལུགས་ལས་དོན། ཁ་བྲལ་ལ་ངོ་རྒོལ་བྱེད་པའི་འཐབ་རྩོད་བཅས་གཅིག་གྱུར་གྱི་འཆར་འགོད་དང་ཕྱོགས་ཡོངས་ལ་ལྟ་རྟོག་བྱེད་པ། དེ་བཞིན་ཕན་ཚུན་སྐུལ་འདེད་གཏོང་དགོས་པ་དང་མི་རིགས་ཁག་གི་མང་ཚོགས་ནས་རྒྱ་གཞུང་གི་རེ་བའི་མྱོང་ཚོར་ངོ་མ་ཐོབ་ནས་རྒྱ་ནག་གི་བཀའ་ལ་ཉན་པ་དང་རྒྱ་ནག་གི་རྗེས་སུ་འབྲང་པའི་དད་སེམས་བརྟན་དུ་གཏོང་དགོས་པ་སོགས་བྱས་ཏེ་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་རང་འགུལ་དབང་ཆ་ཁོང་དུ་དམ་པོར་ཆུད་པ་བྱེད་དགོས་ཞེས་ནན་བཤད་བྱས་ཡོད་པ་རེད། འདི་ག་རླུང་འཕྲིན་ཁང་གིས་གནད་དོན་དེ་འབྲེལ་ཨོ་སི་ཊོ་ལི་ཡའི་དོན་ཁང་གི་རྒྱ་རིགས་འབྲེལ་མཐུད་པ་སྐལ་བཟང་རྒྱལ་མཚན་ལགས་སུ་བཅར་འདྲི་ཞུས་པར་ད་རེས་ཝང་དབྱང་གིས་བོད་རང་སྐྱོང་ལྗོངས་ཟེར་བ་དང་སྟོད་མངའ་རིས་ཀྱི་ས་ཁུལ་རྣམས་ཏཱ་ལའི་ཁ་བྲལ་རིང་ལུགས་ལ་འཐབ་རྩོད་ཀྱི་མདུན་ས་ཡིན་སྟབས་དེར་ལྷོད་ཡང་བྱ་རྒྱུ་མེད་པའི་གཏམ་བཤད་བྱས་པ་དེ་ནི་སྲིད་འཛིན་ཞི་ཅིན་ཕིང་གིས་སྣེ་ཁྲིད་པའི་རྒྱ་ནག་གི་འགོ་ཁྲིད་ཚོས་ད་བར་བོད་ནང་དོན་དམ་གྱི་སྲིད་བྱུས་ཤིག་འཛིན་མེད་པའི་ཁར་རྒྱ་ནག་གི་འགོ་ཁྲིད་རྣམས་བོད་ཀྱི་ས་གནས་ཁག་ཏུ་སྐོར་སྐྱོད་བྱས་དང་བྱེད་མུས་ཡིན་པ་དེ་རྒྱ་གཞུང་གིས་ཕྱི་ལོ་ ༢༠༢༠ ནང་ཚུད་ལ་དབུལ་ཕོངས་ཡོངས་རྫོགས་འབྱོར་ལྡན་སྒྲིལ་ཡོངས་གྱི་སྤྱི་ཚོགས་ནང་ཚུད་ཐབས་ཀྱི་དམིགས་ཡུལ་བསྒྲུབ་རྒྱུའི་ཆ་ཤས་ཤིག་ཆགས་ཀྱི་ཡོད་ཀྱང་། དོན་དངོས་རྒྱ་གཞུང་གིས་བོད་མི་ཚོ་དངུལ་སྤྲད་ནས་བསླུས་ཐབས་ཀྱི་སྲིད་བྱུས་འོག་རྒྱ་ནག་གི་འགོ་ཁྲིད་རིམ་པའི་མིང་དང་དེ་དག་སྲིད་བྱུས་ཤེས་ཐབས་བྱེད་བཞིན་ཡོད་པ་གསུངས་སོང་བ་དང་། ལྷག་དོན་རྒྱ་གཞུང་གིས་བོད་ནང་དཔལ་འབྱོར་གྱི་གནས་བབས་ཡར་རྒྱས་ཇི་ཙམ་བཏང་ཡང་བོད་མི་རྣམས་ལ་དེ་འབྲེལ་ཁེ་ཕན་གང་ཡང་མེད་སྟབས་བོད་ཀྱི་ས་ཁུལ་མང་དག་ཅིག་གི་ནང་བོད་མི་ཚོ་འཚོ་བའི་གནས་བབས་ཆེས་ཞན་པའི་ལུས་ཡོད་པ་མངོན་གསལ་གནང་སོང་།

ཨོ་སི་ཊོ་ལི་ཡ་གཞུང་གིས་འཛིན་སྐྱོང་གནང་བཞིན་པའི་སློབ་གྲྭ་ ༡༣ ནང་རྒྱ་ནག་གིས་མ་དངུལ་བཏང་ཐོག་ཁུང་ཙི་སློབ་གླིང་བརྒྱུད་རྒྱ་སྐད་དང་རྒྱ་ཡིག་སློབ་ཁྲིད་ཀྱི་ལས་འཆར་སྤེལ་བ་དེ་དག་ཕྱིར་བསྡུ་གནང་འདུག རྒྱ་ནག་གཞུང་གིས་ཕྱི་རྒྱལ་རྒྱལ་ཁབ་ཁག་ལས་དེ་སྔ་རྒྱ་ནག་དང་འབྲེལ་ལམ་ཡོད་པ་དེ་དག་སླར་སྲ་བརྟན་དང་གོང་མཐོར་གཏོང་དགོས་པ་དང་མེད་པ་རྣམས་ལ་འབྲེལ་ལམ་གསར་དུ་བཟོ་རྒྱུར་བསྙད་ནས་ཡུལ་གྲུ་དེ་དག་ཏུ་གཞུང་སྒེར་གང་རུང་ནས་གཉེར་བཞིན་པའི་སློབ་གྲྭ་དང་མཐོ་སློབ། དེ་བཞིན་གཙུག་ལག་སློབ་གཉེར་ཁང་འདྲ་མིན་ནང་དུ་རྒྱ་ནག་གི་ཁུང་ཙི་སློབ་གླིང་ཆེད་འཛུགས་བྱེད་བཞིན་ཡོད་པའི་ཁྲོད། ཉེ་བའི་ལོ་ཤས་ནས་ཨ་རི་དང་ཡོ་རོབ་རྒྱལ་ཁབ་གཙོས་པའི་རྒྱལ་ཁབ་མང་དག་ཅིག་གི་ནང་ལས་དོན་དེ་འཕྲལ་མར་མཚམས་འཇོག་གནང་བཞིན་པ་ལྟར་ཨོ་སི་ཊོ་ལི་ཡའི་ New South Wales མངའ་སྡེའི་གཞུང་གིས་གཉེར་བཞིན་པའི་ཁུལ་དེའི་ཤེས་ཡོན་ལྟེ་གནས་ཁང་ ༡༣ ནང་གི་ཁུང་ཙི་སློབ་གླིང་ཡོངས་རྫོགས་སྒོ་བརྒྱབ་འདུག ཁ་སང་ཨོ་སི་ཊོ་ལི་ཡའི་ནང་གི་གསར་ཁང་རྙིང་གྲས་ the sunday morning herald གསར་ཁང་གིས་གནས་ཚུལ་སྤེལ་བར་གཞིགས་ན།ཨོ་སི་ཊོ་ལི་ཡའི་ New South Wales མངའ་སྡེའི་ཤེས་ཡོན་ཚན་པས་རྒྱ་ནག་གི་ཁུང་ཙི་སློབ་གླིང་གིས་ཡུལ་དེའི་ཤེས་ཡོན་སློབ་གསོར་ཇི་ལྟར་གནོན་ཤུགས་སྤྲད་མིན་ཐོག་ཉམས་ཞིབ་གནང་སྐབས་ད་ལྟའི་ཆར་དངོས་སུ་ཤུགས་རྐྱེན་སྤྲད་པའི་དཔང་རྟགས་ཁུངས་བཙན་རག་མེད་ཀྱང་། ལས་འཆར་དེའི་བརྒྱུད་ཆབ་སྲིད་ཀྱི་ཐོག་ནས་ཤེས་ཡོན་སློབ་གསོའི་ནང་མ་འོངས་པར་ཤུགས་རྐྱེན་ངེས་ཅན་ཞིག་སྤྲད་ཉེན་ཡོད་པ་ར་སྤྲོད་བྱུང་ཡོད་པ་དང་། ལྷག་དོན་New South Wales མངའ་སྡེའི་ཤེས་ཡོན་ཚན་པ་དེ་ནི་རྒྱ་ནག་གཞུང་གི་མ་དངུལ་རོགས་རམ་བརྒྱུད་དེ་གའི་ཤེས་ཡོན་གྱི་ལྟེ་གནས་ཁང་ཁག་གི་ནང་ཁུང་རྩི་སློབ་གླིང་འཛུགས་མཁན་གཞུང་འབྲེལ་གྱི་ཚན་པ་གཅིག་པོ་དེ་ཆགས་ཡོད་སྟབས་དེ་ནི་བློ་འཚབ་བྱ་གཞི་ཞིག་ཆགས་ཡོད་པ་གསུངས་འདུག New South Wales མངའ་སྡེའི་ཤེས་ཡོན་ཚན་པས་ཉམས་ཞིབ་ཁྲོད་ད་དུང་ཨོ་གླིང་གཞུང་གིས་གཉེར་བའི་ཤེས་ཡོན་ལྟེ་གནས་སུ་ཕྱིའི་རྒྱལ་ཁབ་གྱི་གཞུང་འབྲེལ་མི་སྣ་ཆེད་འཛུགས་བྱས་པའི་གནད་དོན་དེར་སེམས་འཚབ་གནང་དགོས་པ་ཞིག་དང་། རང་གི་རྒྱལ་ནང་མང་ཚོགས་ལ་དྲག་གནོན་བྱེད་མཁན་དབང་ཆ་གཅིག་བསྡུས་རིང་ལུགས་ཀྱི་གཞུང་ཞིག་གི་མི་སྣས་མང་གཙོའི་རྒྱལ་ཁབ་ཅིག་གི་གཞུང་འབྲེལ་ཚན་པར་ཆེད་འཛུགས་བྱས་པ་ནི་དེ་བས་ཀྱང་བློ་འཚབ་གནང་གཞི་ལས་མ་འདས་ཞེས་གསུངས་འདུག དཔྱད་ཞིབ་ཁྲོད་གཞན་ཡང་ཨོ་གླིང་གཞུང་གིས་གཉེར་བཞིན་པའི་ཤེས་ཡོན་ལྟེ་གནས་ཁང་གི་འགན་འཛིན་ལྷན་ཚོགས་ཀྱི་ཚོགས་མིའི་ཁོངས་སུ་རྒྱ་ནག་གི་ངོ་ཚབ་མང་དག་ཅིག་ཡོད་པར་བརྟེན་ཕྱིའི་གནོན་ཤུགས་མངོན་སུམ་དུ་མཐོང་རྒྱུ་ཡོད་པ་མ་ཟད། རྒྱ་ནག་གི་ Hanban བརྒྱུད་ནས་ NSW ཤེས་ཡོན་ལྟེ་གནས་ཁང་གི་སློབ་གྲྭ་དང་ལས་བྱེད་བགྲེསས་པའི་གསོལ་ཕོགས་བཅས་ཀྱི་ཆེད་དཔལ་འབྱོར་གྱི་མཐུན་རྐྱེན་སྦྱོར་བཞིན་པ་དེའི་རྐྱེན་གྱིས་སློབ་གྲྭའི་ངོས་ནས་སྐབས་རེར་གནད་དོན་ཁ་ཤས་ཐོག་རྒྱ་ནག་ནས་གང་བཤད་ལས་དེ་མིན་སྣང་མེད་དུ་སྐྱུར་པའི་ཉེན་ཁ་ཆེན་པོ་ཡོད་པར་ངེས་ཤེས་རྙེད་ཐུབ་ཡོད་སྐོར་གསུངས་འདུག་པ་དང་ཆབས་ཅིག Hanban ནས་བཏང་འཛིན་བྱེད་བཞིན་པར་བརྟེན་ཨོ་གླིང་གཞུང་གི་ངོས་ནས་ཤེས་ཡོན་ལྟེ་གནས་ཁང་དུ་སྐབས་རེར་དགེ་རྒན་བསྐོ་གཞག་གནང་རྒྱུ་ཡང་དཀའ་ངལ་ཆེན་པོ་འཕྲད་མུས་ཡིན་པ་མངོན་གསལ་གནང་འདུག New South Wales མངའ་སྡེའི་ཤེས་ཡོན་ཚན་པའི་ཞིབ་དཔྱད་གནང་འབྲས་སུ་དགོངས་འཆར་དོན་ཚན་དྲུག་ཅན་ཞིག་ཕུལ་བ་ལྟར་དེར་ངོས་བཞེས་དང་མ་འོངས་པར་ཕྱིའི་གཞུང་དང་ཚོགས་སྡེ་གང་རུང་ནས་ཐད་བྱུས་གང་བྱེད་ལ་བཏང་འཛིན་གྱི་ལམ་སྟོན་སྒྲིག་གཞི་གཏན་འེབས་དང་། དེ་འབྲེལ་ཚོགས་ཆུང་ཆེད་འཛུགས་ཀྱིས་འདི་ལོའི་ལོ་མཇུག་ཏུ་གནང་ཟིན་པ་དགོས་ལུགས་གསུངས་འདུག གཞི་རྩའི་ཨོ་གླིང་གཞུང་གི་ཤེས་ཡོན་ལྟེ་གནས་ཁང་དེའི་ངོས་ནས་ཁུང་ཙི་སློབ་གླིང་དང་འབྲེལ་བའི་ཞིབ་དཔྱད་ཀྱི་ལས་འཆར་དེ་སྔ་ལོའི་ཕྱི་ཟླ་ ༥ ནང་དབུ་འཛུགས་གནང་ཡོད་པ་དང་། རེས་གཟའ་པ་སངས་ཉིན་རིང་མིན་ཕྱི་ཟླ་ ༡༢ ནང་ Hanban དང་གྲོས་མཐུན་གྱི་དུས་ཚེས་ཟིན་སྐབས་དངོས་སུ་ལས་འཆར་དེ་བཀག་སྡོམ་བྱ་རྒྱུ་གསལ་བསྒྲགས་ཞུ་རྒྱུ་དང་། ལྟེ་གནས་ཁང་གི་ལས་བྱེད་ཚོས་དུས་ཡུན་དེའི་བར་དུ་སློབ་ཁྲིད་ཀྱི་ལས་དོན་དེ་དག་བཏང་འཛིན་གནང་ངེས་ཡིན་པ་གསུངས་འདུག ཨོ་སི་ཊོ་ལི་ཡའི་ NSW ཤེས་ཡོན་ལྟེ་གནས་ཁང་གི་དྲུང་ཆེ་སྐུ་ཞབས་ Mark Scott ལགས་ཀྱིས་ཁོང་གི་ཚན་པ་དེའི་ཁུང་རྩི་སློབ་གླིང་གི་ལས་དོན་ལ་ཉམས་ཞིབ་ཀྱི་དགོངས་འཆར་དོན་ཚན་ཡོངས་རྫོགས་ཁས་ལེན་ཞུས་པ་དང་འབྲེལ་གནད་དོན་དེའི་ཐོག་ལག་བསྟར་གནང་མགོ་བཙུགས་ཡོད་པ་དང་། NSW མངའ་སྡེའི་ཤེས་ཡོན་ལྟེ་གནས་ཁང་གིས་འགྲོ་གྲོན་ཨ་སྒོར་ས་ཡ་ ༡༌༢ བཏང་ནས་དེའི་ཁྱབ་ཁོངས་གཞི་རིམ་སློབ་གྲྭ་བཞི་དང་མཐོ་སློབ་དགུའི་ནང་རྒྱ་ཡིག་སློབ་ཁྲིད་ཀྱི་ལས་གཞི་གཞན་ཞིག་སྤེལ་རྒྱུ་ཡིན་པ་གསུངསའདུག NSW ཤེས་ཡོན་ལྟེ་གནས་ཁང་གི་ཤེས་རིག་བློན་ཆེན་ལྕམ་སྐུ་ Sarah Mitchell ལགས་ཀྱིས་ཀྱང་ལྟེ་གནས་ཁང་གི་ངོས་ནས་ཐག་གཅོད་གནང་ཁག་ལ་རྒྱབ་སྐྱོར་གནང་བ་དང་འབྲེལ། ད་ལྟའི་ཆར་རྒྱ་གཞུང་གི་ཁུང་ཙི་སློབ་གླིང་ལག་བསྟར་བརྒྱུད་ནས་དངོས་སུ་ཤུགས་རྐྱེན་ཇི་སྤྲད་དཔང་རྟགས་ཁུངས་བཙན་རག་མེད་ཀྱང་། ལས་འཆར་དེའི་བརྒྱུད་ཆབ་སྲིད་ཀྱི་ཐོག་ནས་ཤེས་ཡོན་སློབ་གསོའི་ནང་སླད་མར་དབང་སྒྱུར་གྱི་ཤུགས་རྐྱེན་ངེས་ཅན་ཞིག་ཡོང་གི་ཡོད་པ་མངོན་གསལ་རེད་ཅེས་གསུངས་འདུག གཞི་རྩའི་སྔ་ལོ་ ༢༠༡༨ ལོར་ཨ་རི་ནང་རྒྱ་ནག་གི་ཁུང་ཙི་སློབ་གླིང་ ༩༠ ཙམ་ཡོད་ཀྱང་ཉེ་བའི་ལོ་ཤས་ནས་བཟུང་རྒྱལ་སྤྱིའི་སྟེང་རྒྱ་ནག་གི་ཁུང་ཙི་སློབ་གླིང་དང་འབྲེལ་ཐག་གཅོད་དགོས་པའི་ཞུ་གཏུག་དང་ངོ་རྒོལ་དུ་མ་གནང་ཡོད་པ་དང་། འདི་ལོ་ནང་ཨ་རིའི་གཙུག་ལག་སློབ་གཉེར་ཁང་གསུམ་ནས་ཁུ་ཙི་སློབ་གླིང་དང་འབྲེལ་བ་ཡོངས་སུ་མཚམས་འཇོག་བྱས་ཡོད་པ་རེད། བོད་རང་བཙན་སློབ་ཕྲུག་ཚོགས་པ་གཙོ་གྱུར་བོད་དོན་རྒྱབ་སྐྱོར་ཚོགས་པ་ཚོས་ཁུང་ཙི་སློབ་གླིང་དེས་ཤེས་ཡོན་རང་དབང་ལ་དོ་ཕོག་གཏོང་བཞིན་པར་སྐྱོན་བརྗོད་ཀྱིས་དྲིལ་བསྒྲགས་དང་གོ་རྟོགས་ཀྱི་ལས་འགུལ་མང་པོ་སྤེལ་དང་སྤེལ་མུས་ཁྲོད་ད་ཆ་ཨ་རི་དང་ཡོ་རོབ་སོགས་སུ་ཁུང་ཙི་སློབ་གླིང་གི་བསྟི་གནས་ཁང་མང་དག་ཅིག་སྒོ་རྒྱག་བཞིན་ཡོད་པ་དང། ཐེངས་འདིིར་ NSW མངའ་སྡེའི་ཤེས་ཡོན་ལྟེ་གནས་ཁང་ཁག་གི་ཁུང་རྩི་སློབ་གླིང་སྒོ་རྒྱག་རྒྱུའི་ཐག་གཅོད་དེ་ཡོངས་བསྒྲགས་བྱུང་བར་Australia འི་བོད་དོན་ལས་འགུལ་ཁང་གིས་དགའ་བསུ་ཞུས་པ་དང་འབྲེལ་ཚོགས་པ་དེའི་ངོས་ནས་འདས་པའི་ལོ་གཅིག་གི་གོང་ནས་གནད་དེའི་ཐོག་ལས་འགུལ་རིམ་པ་སྤེལ་བར་རྒྱལ་ཁ་ཐོབ་ཡོད་པར་འགྲེལ་བརྗོད་གནང་འདུག

UNPO ཞེས་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པའི་ཚོགས་མི་འཛམ་གླིང་ཡུ་གུར་ལྷན་ཚོགས་ཀྱིས་རྒྱ་ནག་ཏུ་འཚོགས་ལ་ཉེ་བའི་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་འགྲན་བསྡུར་དང་བསྟུན་རྒྱ་ནག་གཞུང་གིས་ཡུ་གུར་མི་མང་གི་འགྲོ་བ་མིའི་ཐོབ་ཐང་ལ་གུས་བརྩི་དགོས་པ་དང་ཡང་ན་ཕྱི་ལོ་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་གཙོ་གཉེར་གྱི་བདག་དབང་བཞག་དགོས་པའི་དྲྭ་ཐོག་ཞུ་གཏུག་གི་ལས་འགུལ་ཞིག་དབུ་འཛུགས་གནང་བ་དང་འབྲེལ། རྒྱལ་སྤྱིའི་ཨོ་རྩེད་ལྷན་ཚོགས་ཀྱི་ངོས་ནས་ཨོ་རྩེད་གཙོ་གཉེར་བྱེད་མཁན་རྒྱལ་ཁབ་གང་རུང་དེས་ཨོ་རྩེད་གྱི་བཅའ་ཁྲིམས་སྒྲིག་དོན་ཁས་ལེན་དང་སྒྲིག་གཞིའི་འབྲུ་དོན་དག་དང་མཐུན་པའི་ཐོག་ནས་གནང་མིན་འགན་དབང་འཐུང་ཚང་བཞེས་དགོས་གལ་ཡིན་པའི་ཞུ་སྐུལ་གནང་འདུག འཛམ་གླིང་གི་ལས་འགུལ་བ་ཚོས་མཉམ་འབྲེལ་གྱིས་སྤེལ་བའི་ #Norightsnogames2022 ཞེས་པའི་དྲྭ་ཐོག་ཞུ་གཏུག་གི་ལས་འགུལ་དེ་བརྒྱུད་རྒྱ་གཞུང་གི་ངོས་ནས་ཡུ་གུར་མང་ཚོགས་དང་ཊར་ཀིའི་ཁ་ཆེ་གྲངས་ཉུང་མི་རིགས་ས་ཡ་གཅིག་བརྒལ་བ་ཡུ་གུར་ས་གནས་སུ་བཀག་བསྐྱིལ་བྱས་པའི་ལས་དོན་འཕྲལ་མར་མཚམས་འཇོག་གིས་བཀག་བསྐྱིལ་ཁང་སྒོ་བརྒྱབ་དགོས་པ་དང་། ཡུ་གུར་མང་ཚོགས་ཀྱི་ཐོབ་ཐང་ལ་གུས་བརྩི་ཞུ་དགོས་པའི་ཞུ་སྐུལ་གནང་བ་མ་ཟད། གལ་ཏེ་རྒྱ་གཞུང་གིས་རྒྱལ་སྤྱིའི་རྩ་ཁྲིམས་དང་ཡོངས་སུ་འགལ་བའི་ལས་དོན་དེ་མཚམས་འཇོག་མ་བྱེད་ཚེ་རྒྱ་ནག་ལ་ཕྱི་ལོ་ ༢༠༢༢ ལོའི་དགུན་དུས་ཨོ་རྩེད་གོ་སྒྲིག་ཞུ་རྒྱུའི་འོས་འགན་ཚང་མེད་པར་སྐྱོན་བརྗོད་གནང་འདུག ལྷག་པར་དུ་རྒྱལ་སྤྱིའི་ཨོ་རྩེད་ལྷན་ཚོགས་ཀྱི་གཞི་རྩའི་བཅའ་ཁྲིམས་ཀྱི་དོན་གནད་ཆེ་ཤོས་གཅིག་ནི་སྤྱི་ཚོགས་སུ་ཞི་བདེ་བག་ཕེབས་ཀྱི་ཁོར་ཡུག་བསྐྲུན་པ་བརྒྱུད་ནས་འགྲོ་བ་མིའི་གཞི་རྩའི་རིན་ཐང་གོང་འཕེལ་གནང་རྒྱུ་ཞེས་བཀོད་ཡོད་ཀྱང་། རྒྱ་ནག་གཞུང་གིས་རྒྱལ་ནང་དུ་ཡུ་གུར་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་དེས་རྒྱལ་སྤྱིའི་ཨོ་རྩེད་ལྷན་ཚོགས་ཀྱི་བཅའ་ཁྲིམས་དང་དངོས་འགལ་གྱུར་ཡོད་པ་གསུངས་འདུག དེ་བཞིན་རྒྱལ་སྤྱིའི་ཨོ་རྩེད་གོ་སྒྲིག་གི་གཙོ་གཉེར་བྱེད་པར་ཉེར་བ་མཁོ་བའི་ཆ་རྐྱེན་གཙོ་བོ་ནི་རྒྱལ་ཁབ་གང་ཡིན་ལ་ལྟོས་མེད་དེ་དག་གི་ཆབ་འབངས་ཡིན་ནོ་ཅོག་གི་གཞི་རྩའི་འགྲོ་བ་མིའི་ཐོབ་ཐང་ལ་སྲུང་སྐྱོབ་ཀྱི་ལས་འགན་འཐུས་ཚང་བསྒྲུབ་དགོས་པ་དང་། གལ་ཏེ་རྒྱལ་ཁབ་གང་རུང་དེས་རྒྱ་ནག་ལྟ་བུར་འགྲོ་བ་མིའི་ཐོབ་ཐང་གདལ་བཤིག་དང་རྩིས་མེད་རྡོག་རོལ་གཏང་མཁན་ཞིག་ཡིན་ཚེ་དེར་ཨོ་རྩེད་གཙོ་གཉེར་གྱི་འོས་བབ་མེད་སྐོར་གསུངས་འདུག འཛམ་གླིང་ཡུ་གུར་ལྷན་ཚོགས་ཀྱིས་ད་དུང་ཕྱི་ལོ་ ༢༠༢༢ ལོའི་ཨོ་རྩེད་འགྲན་བསྡུར་འཚོགས་ལ་ཉེ་བའི་ཉིན་གྲངས་ ༩༠༠ ཙམ་ཡོད་པའི་དུས་འདིར་གདམ་ག་གཉིས་དེ་མུར་ལྷག་ཡོད་པ་དང་། དེའང་རྒྱ་ནག་གཞུང་གིས་ཡུ་གུར་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་དང་བཀག་བསྐྱིལ་ཁང་ཕྱིར་བསྡུ་བྱེད་རྒྱུ་དང་། ཡང་ན་རྒྱལ་སྤྱིའི་ཨོ་རྩེད་ལྷན་ཚོགས་ཀྱིས་དེ་གའི་གཞི་རྩའི་བཅའ་ཁྲིམས་ཀྱི་སྒྲིག་དོན་ལྟར་རྒྱ་ནག་གཞུང་ནས་ཨོ་རྩེད་གཙོ་གཉེར་གྱི་བདག་དབང་འཕྲོག་དགོས་པ་དེ་རེད་ཅེས་གསུངས་འདུག ལྷག་པར་དུ་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པའི་ངོས་ནས་ཀྱང་ད་ཐེངས་ཀྱི་ལས་འགུལ་ལ་རྒྱབ་སྐྱོར་དང་སྦྲགས། རྒྱ་ནག་གཞུང་ལ་བཀག་བསྐྱིལ་ཁང་དེ་དག་སྒོ་བརྒྱབ་ཏེ་ཡུ་གུར་མང་ཚོགས་ལ་དྲག་གནོན་མཚམས་འཇོག་དགོས་པ་དང་། རྒྱལ་སྤྱིའི་ཨོ་རྩེད་ལྷན་ཚོགས་ཀྱིས་འགྲོ་བ་མིའི་ཐོབ་ཐང་གོང་འཕེལ་དང་འབྲེལ་བའི་བཅའ་ཁྲིམས་ཀྱི་འབྲུ་དོན་དག་ལ་བརྩི་བཀུར་ཞུ་དགོས་གལ་ཡིན་པ་མངོན་གསལ་གནང་བ་དང་ཆབས་ཅིག རྒྱ་ནག་གིས་ ༢༠༢༢ ནང་ཚུད་ལ་དེ་ལྟར་མ་བྱེད་ཚེ་ཨོ་རྩེད་གཙོ་གཉེར་བྱེད་དབང་མེད་པ་ནན་བརྗོད་གནང་ཡོད་པ་རེད། གཞི་རྩའི་རྒྱ་ནག་གཞུང་གིས་འདས་པའི་ལོ་ཤས་ནས་ཡུ་གུར་གྲངས་ཉུང་མི་རིགས་ཐོག་མི་སྤྱོད་ལས་འདས་པའི་དྲག་གནོན་དང་གནའ་གནོན་གྱི་སྲིད་བྱུས་སྤེལ་བཞིན་པར་རྒྱལ་སྤྱིའི་ཁྱོན་ནས་དེར་སྐྱོན་བརྗོད་དང་སྲིད་བྱུས་དེ་འཕྲལ་མར་མཚམས་འཇོག་དགོས་པའི་ཞུ་སྐུལ་དང་ལས་འགུལ་རྣམ་པ་འདྲ་མིན་སྤེལ་ཡོད་ཀྱང་། Saudi Arabia དང་། Pakistan གཙོས་པའི་ཁ་ཆེའི་རྒྱལ་ཁབ་སོ་བདུན་ལྷག་གིས་སྲིད་འཛིན་ཞི་ཅིང་ཕིང་གི་གཞུང་ལ་རྒྱབ་སྐྱོར་བྱས་ཡོད་པ་རེད། དེ་རིང་ Bloomberg གསར་ཁང་གིས་གནས་ཚུལ་སྤེལ་བར་གཞིགས་ན། དེ་སྔ་ཕྱི་ཟླ་ ༧ པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ Coly Seck ལགས་ཀྱི་མཚན་ཐོག་ཏུ་ཕྱག་བྲིས་ཤིག་ཕུལ་ཏེ་རྒྱ་ནག་གི་འགྲོ་བ་མིའི་ཐོབ་ཐང་ཐོག་ལ་རྒྱབ་སྐྱོར་གྱི་མིང་རྟགས་བཀོད་མཁན་ཁ་ཆེའི་ཡུལ་གྲུ་དེ་དག་ཁོངས་སུ་ཡོད་པ་ Qatar གཞུང་གི་སྐུ་ཚབ་ནས་ད་ཆ་ཕྱག་བྲིས་དེ་ནས་མཚན་རྟགས་ཕྱིར་འཐེན་གནང་འདུག རྒྱལ་ཚོགས་སུ་ཡོད་པའི་ Qatar རྒྱལ་ཁབ་ཀྱི་གཞུང་ཚབ་ Ali Al Mansouri ལགས་ཀྱིས་གསུངས་པར་ཁོང་རྣམས་ཀྱིས་དེ་སྔ་ཐག་གཅོད་གནང་བ་དེས་ Qater ཕྱི་སྲིད་ལས་དོན་ལ་དོགས་གཞི་འགྲོ་སྲིད་པ་དང་ཁོང་རྣམས་ད་ཆ་བར་གནས་བསྡད་རྒྱུ་མ་ཟད། ཁོང་རྣམ་པའི་ངོས་ནས་དགོས་ངེས་ཀྱི་རོགས་རམ་ཞུ་དགོས་ཚེ་དེ་ལྟར་ཞུ་ངེས་ཡིན་པ་གསུངས་འདུག རྩ་བའི་རྒྱལ་སྤྱིའི་བོད་དོན་འབྲེལ་མཐུད་ལས་ཁང་ངོས་ནས་ཀྱང་བོད་ནང་གི་འགྲོ་བ་མིའི་ཐོབ་ཐང་གི་དངོས་ཡོད་གནས་སྟངས་མཚོན་པའི་འགུལ་རིས་བརྙན་ཐུང་བརྒྱུད་རྒྱ་ནག་ཏུ་འཚོགས་རྒྱུའི་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་འགྲན་བསྡུར་ལ་ཟུར་ཟ་དང་། དེ་སྔ་རྒྱ་ནག་གཞུང་གིས་ ༢༠༠༨ ལོའི་ཨོ་རྩེད་འགྲན་བསྡུར་སྐབས་ཁུལ་དེའི་ནང་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་འགྲོ་བར་ཁས་ལེན་བྱས་པ་དང་། དེ་བཞིན་ཨོ་རྩེད་ཀྱི་ཚོགས་མི་རྒྱལ་ཁབ་ཁག་ནས་རེ་བ་དང་ཡིད་ཆེས་གནང་བ་ལྟར་རྒྱ་ནག་ཏུ་བཟང་ཕྱོགས་ཀྱི་འགྱུར་བ་གང་ཡང་ཕྱིན་མེད་པ་མངོན་གསལ་གནང་བ་མ་ཟད། རྒྱ་ནག་ནང་འགྲོ་བ་མིའི་ཐོབ་ཐང་གི་གནས་བབས་དེ་ཆེས་ཞན་པོ་ཡོད་པ་དང་ལྷག་དོན་རྒྱལ་སྤྱིའི་ཨོ་ལམ་པིག་ཚོགས་ཆུང་ལ་དེ་སྔའི་ཚོགས་ཆུང་གི་གྲོས་ཆོད་དང་ཆ་རྐྱེན་ནང་གསལ་བཞིན་ད་བར་རྒྱ་གཞུང་ནས་དོན་འཁྱོལ་ལག་བསྟར་ཇི་བྱེད་ཁ་གསལ་དགོས་པར་རེ་འདུན་ཆེད་བཏོན་གནང་ཐོག་རྒྱ་ནག་ལ་ཨོ་རྩེད་གོ་སྒྲིག་གཙོ་གཉེར་གྱི་བདག་དབང་མེད་པར་སྐྱོན་བརྗོད་གནང་ཡོད་པ་རེད།

ཁ་སང་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བཀྲིས་ཆོས་སྒྲོན་ལགས་ཀྱིས་རྒྱ་གཞུང་ནས་བོད་པའི་བཙུན་མ་ཚོར་མནར་གཅོད་དང་བཙན་གཡེམ་བྱེད་བཞིན་ཡོད་སྐོར་དཔྱད་རྩོམ་ཞིག་སྤེལ་འདུག་པ་དང་། ཁོང་གིས་གཙོ་བོ་དེ་སྔ་རྒྱ་གཞུང་གིས་བཙན་དབང་ཐོག་ཕྱིར་འབུད་བཏང་བའི་ཡ་ཆེན་སྒར་གྱི་གྲྭ་བཙུན་ ༣༥༠༠ ཙམ་ད་ཆ་རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དཔལ་ཡུལ་རྫོང་དུ་ཡོད་པའི་བཀག་བསྐྱིལ་ཁང་དུ་བཀག་ཉར་བྱས་ཡོད་པ་དང་། དེ་ནི་རྒྱ་གཞུང་གིས་བོད་མི་དང་ཡུ་གུར་གྱི་གྲངས་ཉུང་མི་རིགས་རྣམས་ལ་བཙན་གནོན་བྱེད་བཞིན་པའི་རྣམ་པ་གཞན་ཞིག་ཡིན་པར་གསལ་འདོན་གནང་བ་མ་ཟད། ལྷག་དོན་རྒྱ་ནག་དམར་ཤོག་ཚོགས་པས་དམར་ཤོག་རིང་ལུགས་དང་ལྟ་གྲུབ་ཀྱི་བློ་སྐྱེད་སྦྱོར་བརྡར་སོགས་བརྒྱུད་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྣམས་རྒྱ་ནག་གི་ཁྱད་ཆོད་ལྡན་པའི་ངོ་བོར་བཟོ་ཐབས་བྱེད་བཞིན་པ་ལྟར་རྒྱ་གཞུང་གིས་ཆེད་འཛུགས་བྱས་པའི་བཀག་སྐྱིལ་ཁང་དུ་ཡོད་པའི་གྲྭ་བཙུན་རྣམ་པར་རྒྱལ་གཅེས་ཆོས་གཅེས་ཀྱི་སློབ་གསོ་སྤྲོད་དེ་བཙན་གིས་དམག་སྦྱོང་སྤྲོད་བཞིན་གུང་ཁྲན་ལ་བསྟོད་གླུ་དང་རྒྱ་ནག་གི་རྒྱལ་གླུ་སོགས་སྦྱོང་དགོས་ཀྱི་ཡོད་པ་དང་། གལ་ཏེ་དེ་དག་ལ་དང་ལེན་མ་ཞུ་ཚེ་གྲྭ་བཙུན་རྣམས་གཅར་རྡུང་དང་མནར་གཅོད་མྱོང་དགོས་པ། ལྷག་དོན་ཕོ་མོའི་དབྱེ་བའི་ཐོག་ནས་བཙུན་མ་ཁག་གཅིག་ལ་རྩུབ་སྤྱོད་དང་འབྲེལ་བའི་དཀའ་ངལ་ཆེན་པོ་འཕྲད་ཡོད་པ་མངོན་གསལ་གནང་འདུག རླུང་འཕྲིན་ཁང་གིས་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བཀྲིས་ཆོས་སྒྲོན་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་དེ་སྔ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོང་ཞུས་གནད་དོན་དེ་འབྲེལ་གསར་འགྱུར་ཞིག་སྤེལ་ཡོད་པར་གཞི་བཟུང་བ་ཞིག་ཡིན་པ་དང་། ནག་ཆུ་ས་ཁུལ་སོག་རྫོང་ནང་ཡོད་པའི་རྒྱ་ནག་གི་ཆབ་སྲིད་སློབ་གསོའི་ལྟེ་གནས་ཁང་དུ་བཀག་ཉར་འོག་ཡོད་པའི་བཙུན་མ་ཚོར་རྒྱ་གཞུང་གིས་བཙོན་སྲུང་མི་སྣས་བཙན་གཡེམ་བྱས་པའི་གནས་ཚུལ་ཕྱིར་འགྱར་བྱུང་ཡོད་པ་ལུང་འདྲེན་གནང་བ་དང་ཆབས་ཅིག་ཏུ་གནས་ཚུལ་དེ་རིགས་མ་འོངས་པར་ཡ་ཆེན་སྒར་གྱི་བཙུན་མ་ཚོར་འཕྲད་སྲིད་པར་བློ་འཚབ་ཡོད་ཅེས་གསུངས་སོང་།

ཉེ་སྔོན་ཟླ་བ་གཉིས་ལྷག་ཙམ་གྱི་གོང་ནས་ཧོང་ཀོང་མི་མང་གིས་ཞི་བའི་ལས་འགུལ་སྤེལ་བར་གདུང་སེམས་མཉམ་བསྐྱེད་ཀྱི་མར་མེ་ཁྲོམ་སྐོར་གནང་སོང་།  ཁ་སང་ཟླ་ ༨ ཚེས་ ༡༩ ཉིན་ཕྱི་དྲོ་ཚོུད་ ༦ ཐོག་བཞུགས་སྒར་དུ་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པས་རྐང་འགན་བཞེས་ཐོག་བཞུགས་སྒར་དུ་བོད་མི་གཙོས་པའི་ས་གནས་རྒྱ་གར་ཡུལ་མི་དང་ཕྱི་རྒྱལ་བ་བཅས་ཀྱིས་ཕྱག་ཏུ་སྒྲོན་མེ་བསྣམས་ནས་བྱང་ཆུབ་སེམས་མཆོག་གི་སྔོན་སྨོན་གསུང་འདོན་གནང་ཐོག་དྷ་ས་མེག་གྷན་ཁྲོམ་གཞུང་ནད་དབུ་འཛུགས་ཀྱིས་ཐེག་ཆེན་ཆོས་གླིང་གཙུག་ལག་ཁང་གི་ཉེ་འདབས་སུ་ཡོད་པའི་ཆོལ་གསུམ་བོད་ཀྱི་རྒྱལ་གཅེས་དཔའ་བོ་དཔའ་མོའི་རྗེས་དྲན་རྡོ་རིང་གི་མདུན་ཐང་བར་མར་མེ་ཁྲོམ་སྐོར་གནང་སོང་།   བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་ལས་འགུལ་དེ་དང་འབྲེལ་བའི་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་ཧོང་ཀོང་ནང་ཉེས་ཅན་པ་རྒྱ་ནག་སྐམ་ས་ཆེན་པའི་ཁྲིམས་ཁང་ལ་རྩིས་སྤྲོད་བྱེད་པའི་ཁྲིམས་འཆར་ཟེར་བ་དེ་གལ་ཏེ་ཁྲིམས་འཆར་དེ་ལམ་ལྷོང་ལྡན་པ་ཞིག་བྱུང་ཚེ་སླད་མར་ཧོང་ཀོང་གི་ཆབ་སྲིད་གནས་སྟངས་དང་འགྲོ་བ་མིའི་གཞི་རྩའི་ཐོབ་ཐང་ཁག་ཇེ་ཞན་ཇེ་སྡུག་ཏུ་འགྲི་རྒྱུ་ཡིན་པའི་བློ་འཚབ་ཆེན་པོ་བྱུང་བ་ལྟར་ཁྲིམས་འཆར་དེ་དག་ཕྱིར་འཐེན་བྱེད་དགོས་པའི་གནས་སྟངས་གྱུར་སྟབས། དེ་ནི་ཧོང་ཀོང་མི་མང་གི་ངོ་རྒོལ་ལས་འགུལ་ལ་ཐོབ་པའི་རླབས་ཆེན་གྱི་གྲུབ་འབྲས་ཤིག་རེད་ཅེས་གསུངས་འདུག ལྷག་དོན་འདི་ག་བོད་ཀྱི་དགུ་བཅུ་གསུམ་ལས་འགུལ་ཚོགས་པས་ཧོང་ཀོང་མི་མང་གི་ཞི་བའི་ལས་འགུལ་དང་ཁོ་ཚོའི་དྲང་བེན་གྱི་འཐབ་བརྩོད་ལ་རྒྱབ་སྐྱོར་ཞུ་རྒྱུ་དང་རྒྱ་ནག་གཞུང་གིས་ཐོག་མའི་ཁས་ལེན་དང་དམ་བཅའ་ཡིད་ལ་བཅངས་ནས་ཧོང་ཀོང་ནང་མང་གཙོ་ཡང་དག་པ་ཞིག་ལག་ལེན་བྱེད་དགོས་པ་མ་ཟད་ཧོང་ཀོང་མི་མང་གི་གཞི་རྩིའི་མངོན་འདོད་ཁག་ལ་བརྩི་སྲུང་ཞུ་དགོས་པའིའབོད་སྐུལ་ཞུ་བཞིན་ཡོད་པའང་ཆེད་བཀོད་གནང་འདུག སྐབས་དེར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ ལགས་ཀྱིས་གསར་འགོད་པར་ཧོང་ཀོང་ནང་གི་མི་མང་ཚོས་ཞི་བའི་ཐོག་ནས་རྒྱ་ནག་གི་གནོན་ཤུགས་སྤྲོད་བཞིན་པར་མི་འདོད་པའི་རྣམ་པ་ཆེད་བཏོན་གནང་བ་དེར་བོད་མི་ངོས་ནས་རྒྱབ་སྐྱོར་ཡོད་པ་གསུངས་སོང་། ད་དུང་ཁོང་གིས་ང་ཚོ་བོད་ཀྱི་བདེན་དོན་སེལ་བར་ང་ཚོ་ལྟ་བུའི་རྒྱ་ནག་གཞུང་གིས་བཙན་གནོན་འོག་ཏུ་དཀའ་སྡུག་མྱོང་བཞིན་པ་ཚོར་དཀའ་ངལ་འཕྲད་སྐབས་རྒྱབ་སྐྱོར་གནང་ཐུབ་ཚེ་ང་ཚོ་ལའང་གྲུབ་འབྲས་སོན་པར་ཕན་ཐོགས་ཆེན་པོ་ཡོད་སྐོར་གསུངས་སོང་། གཞི་རྩའི་འདས་པའི་ཟླ་ཤས་རིང་ཧོང་ཀོང་མང་ཚོགས་ནས་མི་མང་གི་འདུ་འཛོམས་ཆེ་ས་ཡོད་སའི་ས་ཁུལ་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་ཡོངས་ནས་ཕྱིར་འཐེན་དགོས་པ་དང་། ཧོང་ཀོང་གི་སྤྱི་ཁྱབ་ཀེ་རི་ལེམ་རང་གི་ལས་གནས་ནས་རྩ་དགོངས་ཞུ་དགོས་པ། དེ་བཞིན་ཧོང་ཀོང་གི་སྤྱི་ཁྱབ་མང་གཙོའི་ལམ་ལུགས་ཐོག་འདེམས་སྒྲུག་བྱེད་དགོས་པ་སོགས་དགོས་འདུན་ཆེད་བཏོང་གྱིས་ལས་འགུལ་རབ་དང་རིམ་པ་སྤེལ་བའི་ཁར། ཉེ་ལམ་དེ་འབྲེལ་ལས་འགུལ་ཞིག་ཧོང་ཀོང་གི་གནམ་ཐང་ནང་སྤེལ་ཡོད་པ་དང་། ལས་འགུལ་དེའི་ཁྲོད་ཉེན་རྟོག་པས་མིག་ཆུ་དུག་རླངས་སོགས་མཚོན་ཆ་སྤྱོད་ནས་ངོ་རྒོལ་བ་དང་ཉེན་རྟོག་པའི་དབར་འཁྲུག་རྩོད་ཤོར་བའི་གནས་སྟངས་ཆགས་ཡོད་པ་མ་ཟད། ཧོང་ཀོང་དང་རྒྱ་ནག་གཉིས་ཀྱི་ས་མཚམས་སུ་ཆགས་པའི་རྒྱ་ནག་གི་གྲོང་ཁྱེར་ Shenzhen ནང་རྒྱ་ནག་གི་དམག་མིའི་འགྲུལ་འཁོར་མང་དག་ཅིག་ཆེད་བསྐོང་གིས་ཧོང་ཀོང་མི་མང་ལས་འགུལ་བར་འཇིགས་སྐུལ་བྱས་པ་སོགས་ཀྱི་ཛ་དྲག་གནས་སྟངས་གྱུར་ཡོད་པ་ལྟར་རྒྱལ་སྤྱིའི་སྤྱི་ཚོགས་ནས་ཀྱང་རྒྱ་ནག་གིས་དྲག་གནོན་གྱི་སྲིད་བྱུས་སྤེལ་བཞིན་པར་སེམས་ཁུར་གནང་དང་གནང་མུས་ཡིན་པ་རེད།  

དབྱིན་ཡུལ་ནང་གནས་སྡོད་བོད་མི་ཚོས་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ལས་འགུལ་ནང་མཉམ་ཞུགས་ཀྱིས་ཧོ་ཀོང་མང་ཚོགས་ཀྱི་ལས་འགུལ་དང་མངོན་འདོད་ལ་རྒྱབ་སྐྱོར་གྱི་གདུང་སེམས་མཉམ་བསྐྱེད་ཞུས་འདུག སྤྱིར་འདི་ལོ་ཧོང་ཀོང་སྤྱི་ཁྱབ་ཀེ་རི་ལེམ་གྱིས་ཧོང་ཀོང་ནས་རྒྱ་ནག་སྐམ་ས་ཆེན་པོ་དང་ལྷན་དུ་ཉེས་ཅན་རྩིས་སྤྲོད་ཀྱི་ཁྲིམས་འཆར་འདོན་ནས་ད་བར་འདས་པའི་ཟླ་བ་གཉིས་ལྷག་གི་རིང་ལ་ཧོང་ཀོང་མི་མང་ས་ཡ་མང་པོས་པེ་ཅིང་གཞུང་དང་ཧོང་ཀོང་ད་ཡོད་གཞུང་འཛིན་ལ་ངོ་རྒོལ་གྱི་ལས་འགུལ་རྒྱུན་མི་མི་ཆད་པ་སྤེལ་བཞིན་པ་དང་། ཧོང་ཀོང་གི་ཉེན་རྟོག་པ་ཚོས་མི་མང་ངོ་རྒོལ་གནང་མཁན་ཚོར་དྲག་གནོན་དང་འཛིན་བཟུང་སོགས་བྱེད་འགོ་བཙུགས་ཏེ་ད་ཆ་ཉིན་རེ་བཞིན་ཧོང་ཀོང་ནང་གནས་སྟངས་ཆེས་ཛ་དྲག་ཏུ་འགྱུར་བཞིན་ཡོད་པ་རེད། ཟླ་ ༨ ཚེས་ ༡༦ ནས་ ༡༩ བར་འཛམ་གླིང་ས་ཕྱོགས་གང་སར་གནས་སྡོད་ཧོང་ཀོང་མང་ཚོགས་དང་ཧོང་ཀོང་ལ་རྒྱབ་སྐྱོར་གནང་མཁན་མི་མང་ནས་ GLOBAL: Solidarity with HK Rally ཞེས་རྒྱལ་སྤྱིའི་ཁྱོན་ཀྱི་རྒྱལ་ཁབ་ ༣༠ ལྷག་གི་ནང་ཧོང་ཀོང་མང་ཚོགས་ཀྱི་ལས་འགུལ་ལ་གདུང་སེམས་མཉམ་བསྐྱེད་ཀྱི་རྔམ་སྟོན་གཞི་རྒྱ་ཆེ་བའི་ལས་འགུལ་སྤེལ་འགོ་བརྩམས་ཡོད་པ་དང་། ཕྱི་ཚེས་ ༡༧ ཉིན་དབྱིན་ཡུལ་གྱི་རྒྱལ་ལོན་ཊན་དུ་སྤེལ་བའི་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ལས་འགུལ་ནང་ཁུལ་དེར་གནས་སྡོད་བོད་མི་ཚོས་མཉམ་ཞུགས་ཀྱིས་བོད་མི་ཚོ་ཧོང་ཀོང་མང་ཚོགས་དང་མཉམ་དུ་ཡོད་ཅེས་དང་། ཧོང་ཀོང་མང་ཚོགས་ལ་གཉའ་གནོན་མཚམས་འཇོག་དགོས་ཞེས་པའི་ཕྲད་དར་དང་ཤོག་སྦྱང་སོགས་ཀྱི་སྟེང་ལ་དགོས་འདོན་ཆེད་བཀོད་ཀྱིས་རྔམ་སྟོན་ཁྲོམ་སྐོར་དང་ཧོང་མང་ཚོགས་ཀྱི་ཞི་རྒོལ་ལ་གདུང་སེམས་མཉམ་བསྐྱེད་ཞུས་འདུག སྐབས་དེའི་མང་ཚོགས་ཆིག་སྟོང་ལྷག་འདུ་འཛོམས་བྱུང་བའི་ལས་འགུལ་དེ་ལོན་ཊན་རྒྱལ་ས་ Trafalgar Square ཞེས་མང་ཚོགས་འདུ་འཛོམས་ཆེ་བའི་ཐང་ཆེན་ནས་དབྱིན་ཡུལ་སྲིད་བློན་བཞུགས་གནས་དང་། དེ་བཞིན་དབྱིན་ཡུལ་གྲོས་ཚོགས་ཐང་ཆེན་བར་རིམ་པས་ལས་འགུལ་སྤེལ་འདུག་ཅིང་། སྐབས་དེར་ཧོང་ཀོང་མང་ཚོགས་ཀྱི་གདུང་སེམས་མཉམ་བསྐྱེད་ཀྱི་ལས་འགུལ་ལ་གདོང་ལེན་གྱི་ཚུལ་དུ་རྒྱ་ནག་གཞུང་ཚབ་ཁང་ནས་རྒྱ་རིགས་སློབ་ཕྲུག་ངོ་རྒོལ་བ་གྲ་སྒྲིག་གིས་ལས་འགུལ་ཡང་སྤེལ་འདུག རྩ་བའི་རྒྱལ་སྤྱིའི་ཧོང་ཀོང་གདུང་སེམས་མཉམ་བསྐྱེད་ཀྱི་ལས་འགུལ་དེ་ཡོ་རོབ་རྒྱལ་ཁབ་འཇར་མི་ནི་དང་ཕ་རན་སི། དེ་བཞིན་ཌེན་མཀ བྱང་ཨ་རི། ཨོ་སི་ཊོ་ལི་ཡ། ཨེ་ཤ་ཡ་བཅས་ཀྱི་རྒྱལ་ཁབ་ཁག་ ༣༠ ལྷག་གི་ནང་དུའང་ལས་འགུལ་གྱི་རྣམ་པ་འདྲ་མིན་བརྒྱུད་ནས་ཧོང་ཀོང་མང་ཚོགས་ལ་གདུང་སེམས་མཉམ་བསྐྱེད་ཞུས་ཡོད་པ་རེད།

རྒྱ་གཞུང་གིས་དེ་སྔ་ཨ་མདོ་རྔ་པ་ནས་དགེ་འདུན་པ་གསུམ་འཛིན་བཟུང་བཙན་ཁྲིད་བྱས་པའི་གནས་ཚུལ་ད་ལྟ་གཞི་ནས་ཕྱིར་གྱར་བྱུང་འདུག་ཀྱང་། ཁོང་གསུམ་ད་ཆ་ས་གནས་གང་དུ་ཡོད་མེད་དང་གནས་སྟངས་ཇི་ཆགས་སོགས་ཤེས་རྟོགས་གང་ཡང་མེད་པར་གྱུར་འདུག རང་ལོ་ ༣༧ ཙམ་ཡིན་པའི་རྔ་པ་ཀིརྟི་དགོན་གྱི་གྲྭ་བློ་བཟང་ཐབས་མཁས་ལགས་སྔ་ལོར་རྒྱ་གཞུང་གིས་རྒྱུ་མཚན་གང་ཡིན་གསལ་བཤད་མེད་པར་འཛིན་བཟུང་བཙན་ཁྲིད་བྱས་ཏེ་ཉེ་ཆར་ཕྱི་ཟླ་ ༧ ཚེས་ ༣༠ ཡས་མས་ཤིག་ལ་ལོ་བཞིའི་བཙོན་འཇུག་ཁྲིམས་ཐག་བཅད་ཡོད་ཀྱང་། ས་གནས་མང་ཚོགས་ནས་ཁོང་ཅིའི་ཕྱིར་འཛིན་བཟུང་བྱས་ཡོད་མེད་དང་ས་གནས་གང་དུ་ཡོད་མེད་སོགས་ཞིབ་ཕྲའི་གནས་ཚུལ་ཤེས་རྟོགས་བྱུང་མི་འདུག དེ་བཞིན་རང་ལོ་ ༣༢ ཡིན་པ་རྔ་པ་སྤྲོ་ཚིགས་དགོན་པའི་གྲྭ་ཐུབ་པ་ལགས་ཕྱི་ལོ་ ༢༠༡༧ ལོའི་ལོ་མཇུག་ཏུ་རྒྱ་གཞུང་གི་ཉེན་རྟོག་པས་མཚན་མོ་རང་ཤག་ནས་གློ་བུར་དུ་འཛིན་བཟུང་བཙན་ཁྲིད་བྱས་ཡོད་པ་དང་ད་ལྟ་བར་ཁོང་གི་གནས་སྟངས་ཇི་ཆགས་ཤེས་རྟོགས་གང་ཡང་མེད་པར་གྱུར་ཡོད་པ་རེད། གཞན་ཡང་རང་ལོ་ ༣༦ ཙམ་ཡིན་པ་རྔ་པ་ཀིརྟི་དགོན་པའི་གྲྭ་བློ་བཟང་རྡོ་རྗེ་ལགས་རྒྱ་གཞུང་གིས་མཚན་མོ་རང་ཉིད་ཀྱི་ཤག་ནས་འཛིན་བཟུང་བཙན་ཁྲིད་བྱས་ཏེ་ད་བར་ས་གནས་གང་དུ་ཡོད་མེད་ཀྱི་གནས་ཚུལ་ཞིབ་ཕྲ་ཤེས་རྟོགས་མེད་པར་གྱུར་ཡོད་པ་རེད། གཞི་རྩའི་རྒྱ་གཞུང་གིས་ད་ལན་རྔ་པ་ནས་འཛིན་བཟུང་བཙོན་འཇུག་བྱས་པའི་ཁོངས་ནས་གྲྭ་བློ་བཟང་ཐབས་མཁས་ལགས་ནི་ལྷ་སྡེ་གོང་མའི་བློ་ཁོའི་བུ་ཡིན་ཞིང་། ཆུང་དུས་ནས་རྔ་པ་ཀིརྟི་དགོན་པར་གྲྭ་ཞུགས་གནང་བ་དང་ནང་བསྟན་གཞོན་ནུའི་རིག་སློབ་ཁང་གི་སྐབས་གསུམ་པའི་མཐར་ཕྱིན་སློབ་པ་ཞིག་ཡིན་པ་མ་ཟད། དེ་ནས་ཁོང་མཚན་ཉིད་གྲྭ་ཚང་དུ་གཞུང་ཆེན་སློབ་སྦྱོང་གིས་དེང་སྐབས་དབུ་མའི་འཛིན་གྲྭར་སླེབས་ཡོད་པ་རེད་འདུག དེ་བཞིན་གྲྭ་ཐུབ་པ་ལགས་ནི་སྤྲོ་ཚིགས་ཐང་བ་མའི་མགར་བ་ཚང་གི་བུ་ཡིན་པ་དང་ཁོང་ཆུང་དུས་ནས་སྤྲོ་ཚིགས་དགོན་པར་ཆོས་ཞུགས་གནང་སྟེ་ ༢༠༠༨ ཕྱི་ཟླ་ ༣ ཚེས་ ༡༦ ཉིན་སྤྲོ་ཚིགས་ཡུལ་ཚོའི་ཐོག་ནས་ངོ་རྒོལ་སྐད་འབོད་དང་རྒྱའི་དར་དམར་མེར་སྲེག་གནང་བའི་ཉེས་མིང་གཡོག་ནས་ལོ་གཅིག་དང་ཟླ་བ་དྲུག་ལ་ངལ་རྩོལ་སྒྱུར་བཀོལ་གྱི་མིང་ཐོག་ནས་བཙོན་འཇུག་བྱས་ཡོད་པ་མ་ཟད། ཁོང་གི་ཕ་སྐལ་བཟང་ལགས་ཀྱང་དེ་སྔ་ཕྱི་ལོ་ ༢༠༡༡ ལོར་ངོ་རྒོལ་སྐད་འབོད་གནང་རྐྱེན་འཛིན་བཟུང་གིས་བཙོན་འཇུག་གནང་མྱོང་ཡོད་པ་རེད་འདུག དེ་དང་ཆབས་ཅིག་རྔ་པ་ཀིརྟི་དགོན་པའི་གྲྭ་བློ་བཟང་རྡོ་རྗེ་ལགས་ནི་རྔ་བ་རྫོང་ཕྱུགས་ལས་འགབ་མའི་ཕ་སངས་རིས་ཀྱི་བུ་ཡིན་པ་དང་ཕྱི་ལོ་ ༢༠༡༡ ལོར་འཛིན་བཟུང་གིས་ལོ་གསུམ་གི་བཙོན་འཇུག་ཁྲིམས་ཐག་བཅད་མྱོང་ཡོད་པའི་ཆབ་སྲིད་བཙོན་ཟུར་ཞིག་ཡིན་པ་རེད།

ཟླ་བ་འདིའི་ཕྱི་ཚེས་ ༢ ནས་ ༧ བར་ཡོ་རོབ་སུད་སི་གྲོང་ཁྱེར་ Geneva ནང་རྒྱལ་ཚོགས་ཀྱི་ IPCC ཞེས་ཁོར་ཡུག་ཐོག་རྒྱལ་སྤྱིའི་རྒྱལ་ཁབ་རྣམ་པའི་སྐུ་ཚབ་ཀྱི་བཞུགས་མོལ་ལྷན་ཚོགས་ཐེངས་ ༥༠ པ་དེ་ཚོགས་ཡོད་པ་དང་། ལྷན་ཚོགས་གྲུབ་མཚམས་སུ་རྒྱལ་ཚོགས་ཀྱི་ཚོགས་ཆུང་གིས་ Climate Change and the Land ཞེས་གནམ་གཤིས་འགྱུར་ལྡོག་དང་ས་གཞི་ཞེས་པའི་སྙན་ཐོ་ཞིག་ཡོངས་བསྒྲགས་འདོན་སྤེལ་གནང་ཡོད་པ་རེད། རྒྱལ་ཚོགས་ཀྱི་ཚོགས་ཆུང་དེའི་སྙན་ཐོ་དེ་ནི་རྒྱལ་སྤྱིའི་རྒྱལ་ཁབ་ ༥༢ ཀྱི་ཚན་རིག་མཁས་པ་ ༡༠༧ ནས་འཛམ་གླིང་གི་ས་གནས་འདྲ་མིན་ནང་གི་གནམ་གཤིས་འགྱུར་ལྡོག་དང་ས་གཞི་འགྱུར་བ། སྐྱེ་ལྡན་སྲོག་ཆག་ཀྱི་འཚོ་བ་དང་འགྱུར་གྲོས་སོགས་ཐོག་དཔྱད་ཞིབ་གནང་བའི་གྲུབ་དོན་ ༧༠༠༠ ཙམ་ལ་གཞིར་བཅོལ་ཏེ་ཕྱོགས་སྒྲིག་གནང་བ་ཞིག་དང་། སྙན་ཐོའི་ནང་འཛམ་གླིང་གི་སྣེ་མོ་གསུམ་པར་གྲགས་པ་བོད་ཀྱི་རང་བྱུང་གནམ་གཤིས་གནས་སྟངས་དང་འབྲེལ། བོད་ནང་གི་འཁྱགས་རོམ་བཞུར་ཚད་དང་། རྩྭ་ཐང་གི་གནས་བབས་ལ་འགྱུར་བ་འགྲོ་སྟངས་སོགས་ལ་གཞིགས་ན། བོད་ཀྱི་ས་གཞི་ཁག་གི་རང་བྱུང་ནུས་པ་རྣམས་ཉམས་ཉེས་ཆེན་པོ་འགྲོ་བཞིན་ཡོད་པ་དང་། ལྷག་པར་དུ་བོད་ནང་གི་རང་བྱུང་རྩྭ་ཐང་རྣམས་ལོ་ལྟར་བརྒྱ་ཆ་གཉིས་ལྷག་རྩ་མེད་ཧྲེང་ངེར་འགྱུར་བཞིན་པ་བཀོད་འདུག ལྷག་པར་དུ་སྙན་ཐོ་དེའི་ནང་བོད་མཐོ་སྒང་དེ་བཞིན་འཛམ་གླིང་གནམ་གཤིས་འགྱུར་ལྡོག་གི་ལྟེ་གནས་ཡིན་པ་དང་། ལྟེ་གནས་འདི་ད་ཆ་འཛམ་གླིང་གི་ས་གནས་གཞན་ལས་ལྡབས་གཉིས་ཀྱི་ཚ་དྲོད་མང་བ་རྒྱས་ཏེ་འཁྱགས་རོམ་དང་གངས་ཆུ་རྣམས་སྔར་ལྷག་བཞུ་བཞིན་ཡོད་ཀྱང་། རྒྱ་ནག་གཞུང་ནས་བོད་མཐོ་སྒང་གི་ཛ་དྲག་གནམ་གཤིས་གནས་སྟངས་སྲུང་སྐྱོབ་གནང་རྒྱུའི་ཐོག་གླེང་སློང་དང་ལས་གཞི་གང་ཡང་སླེལ་མེད་བའི་ཁར། བོད་ཀྱི་ཁོར་ཡུག་གནས་སྟངས་ལ་དོན་ཕོག་འགྲོ་གཞིའི་སྲིད་བྱུས་མི་ཉུང་བ་ཞིག་ལག་བསྟར་བྱེད་བཞིན་པ་ཐེར་འདོན་དང་སྦྲགས། རྒྱ་ནག་གི་བོད་ཐོག་ལག་བསྟར་བྱེད་བཞིན་པའི་སྲིད་བྱུས་དེ་དག་གིས་བོད་ཀྱིི་རང་བྱུང་གནམ་གཤིས་གནས་སྟངས་ཛ་དྲག་ཏུ་གཏོང་མུས་ཡིན་པ་གསུངས་འདུག སྙན་ཐོའི་ནང་བོད་ཀྱི་གནམ་གཤིས་གནས་སྟངས་ཐོག་ཉམས་ཞིབ་གནང་མྱོང་མཁན་ Colorado གཙུག་ལག་སློབ་གཉེར་ཁང་གི་སློབ་དཔོན་ Emily Yeh ལགས་ནས་རྒྱ་ནག་གཞུང་གིས་བོད་པའི་འབྲོག་པ་གནས་སྡོད་གནང་ས་དང་། མི་མང་སྒེར་གྱི་རྩྭ་ཐང་མང་པོ་ཞིག་བསྡུ་རུབ་བྱས་པ་མ་ཟད། ལྷག་པར་དུ་རྒྱ་གཞུང་གི་ལག་བསྟར་བྱེད་བཞིན་པའི་འབྲོག་པ་གཞིས་སྤོས་ཀྱི་སྲིད་བྱུས་དེ་དག་གིས་འབྲོག་པའི་སྲོལ་རྒྱུན་འཚོ་ཐབས་ལ་གནོད་པ་དང་རང་བྱུང་རྩ་ཐང་གི་ཐོན་ཁུངས་ལ་དོ་ཕོག་བཏང་པའི་བརྒྱུད། སྤྱི་ཡོངས་བོད་ཀྱི་གནམ་གཤིས་ཛ་དྲག་ཏུ་འགྱུར་བཅུག་གི་ཡོད་པ་གསུངས་འདུག རྒྱལ་ཚོགས་ཀྱི་རྒྱལ་སྤྱིའི་སྐུ་ཚབ་རྣམ་པས་འདོན་སྤེལ་གནང་པའི་གནམ་གཤིས་འགྱུར་ལྡོག་དང་འབྲེལ་བའི་སྙན་ཐོ་དང་འབྲེལ། རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཞབས་ KaiMuller ལགས་ཀྱིས། ཐེངས་འདིའི་སྙན་ཐོ་ནས་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་འབྲོག་པ་གཞིས་སྤོས་ཀྱི་སྲིད་བྱུས་གཙོས་བོད་མི་སྒེར་གྱི་ས་གཞི་འདུ་རུབ་བྱེད་བཞིན་པའི་སྲིད་བྱུས་རྣམས་ལ་ངེས་པར་དུ་གདོང་ལེན་བྱ་དགོས་པ་ཞིག་མངོན་གསལ་བྱུང་ཡོད་སྟབས། རྒྱལ་སྤྱིའི་མང་ཚོགས་ནས་རྒྱ་ནག་ལ་གནད་དོན་དེ་འབྲེལ་ཐོག་རྒྱུན་དུ་གླེང་སློང་དང་གནོན་ཤུགས་སྤྲོད་དགོས་ཀྱོ་རེད་ཅེས་གསུངས་འདུག

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་འདི་ལོའི་ཕྱི་ཟླ་གཉིས་པའི་ནང་དུ་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་ས་གནས་སྲིད་གཞུང་གི་དྲྭ་རྒྱའི་དམ་དྲག་དང་འབྲེལ་བའི་བརྡ་ཁྱབ་སྐོར་དང་འབྲེལ། བོད་ནང་གི་ས་གནས་སྲིད་གཞུང་གིས་རྒྱ་ནག་རྒྱལ་ཁབ་ཀྱི་རྩ་ཁྲིམས་དང་འགལ་བའི་བརྡ་ཁྱབ་བཏང་ནས་མང་ཚོགས་ཀྱི་སྨྲ་བརྗོད་རང་དབང་ལ་དམ་དྲག་ཤུགས་ཆེ་བྱེད་བཞིན་ཡོད་པ་གསུངས་སོང་། ཁ་སང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་དྲྭ་རྒྱར་གནས་ཚུལ་སྤེལ་བར་འདི་ལོའི་ཕྱི་ཟླ་ ༢ ཚེས་ ༢༨ ཉིན་བོད་རང་སྐྱོང་ལྗོངས་ཟེར་བའི་དྲྭ་འཕྲིན་གཞུང་ལས་ཁང་དང་སྤྱི་བདེ་ལས་ཁུངས། དེ་བཞིན་ལྗོངས་འཕྲིན་གཏོང་དོ་དམ་ལས་ཁུངས་བཅས་གསུམ་གྱི་མཉམ་རུབ་ཐོག་བརྡ་ཁྱབ་ཞིག་སྤེལ་ཏེ་བརྡ་ཁྱབ་དེ་ཉིན་དེ་རང་ནས་དངོས་སུ་ལག་བསྟར་བྱེད་དགོས་པའི་སྐུལ་འདེད་བྱས་ཡོད་པ་འཁོད་འདུག བརྡ་ཁྱབ་དེའི་ནང་བོད་རང་སྐྱོང་ལྗོངས་སྲིད་གཞུང་གིས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་ཉེས་ཁྲིམས། འཇིགས་སྐུལ་རིང་ལུགས་ལ་ངོ་རྒོལ་གྱི་བཅའ་ཁྲིམས། ཉེས་དོན་གཏུག་བཤེར་བཅའ་ཁྲིམས། དྲྭ་རྒྱའི་བདེ་འཇགས་བཅའ་ཁྲིམས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་སྒྲིག་ཁག་ ༥ དང་། དེ་བཞིན་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་མཉམ་འབྲེལ་དྲྭ་རྒྱའི་བདེ་འཇགས་སྐོར་གྱི་གཏན་འདེབས་ཟེར་བ་སོགས་ཚུད་ཡོད་པ་དང་བརྡ་ཁྱབ་དེར་མང་ཚོགས་ནས་ལག་ཐོགས་ཁ་པར་དང་གློག་ལས་སོགས་ཡོ་བྱད་སྤྱི་རིགས་ཀྱི་ཐོག་ནས་གནས་འཚོལ་བསྡུ་དང་སྒྲིག་བཟོ། ཕབ་ལེན། གསོག་ཉར། ཁྱབ་སྤེལ། བརྒྱུད་སྐུར་བྱེད་པ་སོགས་གཏན་འགོག་དང་། དེ་བཞིན་དམར་པོའི་གཞུང་དང་སྲིད་གཞུང་གི་བོད་སྐྱོང་སྲིད་ཇུས་ཟེར་བ་བཅས་ལ་སྐྱོན་བརྗོད་དང་འབྲེལ་བའི་གནས་ཚུལ་སྤེལ་བ། དྲྭ་ཐོག་ཏུ་དངུལ་གཏོང་ལེན་དང་གློག་རྡུལ་དངུལ་འཛིན་། དངུལ་འཛིན་བྱང་བུ། འཕྲིན་ཕྲན་སོགས་དྲ་རྒྱའི་དངུལ་རྩའི་ཐོན་རྗེས་བེད་སྤྱད་ནས་མི་རིགས་ཁ་བྲལ་བའི་སྟོབས་ཤུགས་དང་ཆོས་ལུགས་ཐལ་སྐྱོད་ཀྱི་སྟོབས་ཤུགས། གཏུམ་སྤྱོད་འཇིགས་སྐུལ་བའི་སྟོབས་ཤུགས་དང་འབྲེལ་བའི་མི་སྣ་དང་སྒྲིག་འཛུགས་སྤྱི་རིགས་དང་འབྲེལ་བ་བྱེད་རྒྱུར་དམ་དྲག་དང་དེ་དག་ནག་ཉེས་ཀྱི་ངོ་བོར་བསྒྱུར་འདུག དེ་བཞིན་རྒྱ་ནག་ཕྱི་ཕྱོགས་ཀྱི་མི་སྣ་དང་སྒྲིག་འཛུགས་བཅས་ལ་རྒྱལ་ཁབ་ཀྱི་ཆབ་སྲིད་དང་དཔལ་འབྱོར། སྤྱི་ཚོགས། དམག་དོན། རིག་གནས། ཆོས་ལུགས་སོགས་ཡོངས་རྫོགས་དང་འབྲེལ་བའི་རྒྱལ་ཁབ་ཀྱི་གསང་བའམ་གསར་འཕྲིན་བརྒྱུད་གཏོང་གནང་བར་དམ་དྲག་དང་དེའི་ཁོངས་སུ་མི་རིགས་དབར་གྱི་འབྲེལ་བ་དང་མི་རིགས་འགལ་ཟླ་བཟོ་བ། ཆོས་དད་མི་འདྲ་བ་དང་ཆོས་དད་གཅིག་གི་གྲུབ་མཐའ་མི་འདྲ་བའི་དད་ལྡན་པའི་དབར་ལ་འཁོན་འཛིན་དང་། ཁ་གཏད། གཏོང་གཏུག་སོགས་ཀྱི་དཀྲུག་ཤིང་རྒྱག་པ་སོགས་བཏོན་འདུག ལྷག་དོན་དྲྭ་རྒྱའི་འཕྲིན་གཏོང་ཡོ་བྱད་བེད་སྤྱོད་མཁན་ཚོས་སྤྱི་ཕན་དང་ཁོར་ཡུག་སྲུང་སྐྱོབ་། སློབ་གསོ། སྨན་བཅོས། དབུལ་སྐྱོར་སོགས་ལ་ཁ་གཡར་ཏེ་ཚོགས་པ་འཛུགས་པའམ་ཁྲིམས་འགལ་གྱི་རྩ་འཛུགས་ནང་ཞུགས་སོགས་ཀྱི་གནད་དོན་བཀོད་ཡོད་པ་མ་ཟད། ཁྲིམས་འགལ་ཉེས་གསོག་ཐེར་འདོན་གྱི་བྱ་དགའ་མཐོ་ཤོས་རྒྱ་སྒོར་འབུམ་གསུམ་སྤྲད་རྒྱུ་ཡིན་ལུགས་སོགས་ཆེད་བཀོད་བྱས་ཡོད་པ་རེད། དེའང་རྒྱུ་གཞུང་གིས་སྔ་ལོའི་ཕྱི་ཟླ་ ༡ པོའི་ནང་སྤེལ་བའི་ནག་སེལ་གཤེད་བཅོམ་གྱི་བརྡ་ཁྱབ་དང་བསྡུར་ན་འདི་ལོའི་བརྡ་ཁྱབ་ནང་དུ་སྤྱིར་གནད་དོན་ཁག་གཅིག་སྔ་ལོ་དང་གཅིག་མཚུངས་འཁོད་ཡོད་ཐོག་ཉེས་གསོག་གི་གནད་དོན་འཕར་མ་མང་པོ་ཁ་སྣོན་གྱིས་བཅུག་ནས་དམ་དྲག་ཤུགས་ཆེ་བ་བྱེད་བཞིན་པ་མངོན་རྒྱུ་ཡོད་པ་དང་། དེའི་ཁྲོད་སྲིད་གཞུང་ལ་ཉེས་ཅན་པ་རྩིས་སྤྲོད་བྱེད་མཁན་རྣམས་ལ་བྱ་དགའ་མཐོ་ཤོས་ཀྱང་སྔ་ལོའི་འབུམ་ ༡ ནས་སྤར་ཏེ་འབུམ་ ༣ བཟོས་ཡོད་པ་ཐེར་འདོན་དང་འབྲེལ། རྒྱ་གཞུང་གིས་དྲག་གནོན་སྲིད་བྱུས་ལ་རྐྱོན་བརྗོད་དང་། གཞུང་དང་ལྟ་སྤྱོད་མི་མཐུན་མཁན་ཞི་བའི་ལས་འགུལ་བ་ཚོར་སྡུག་སྦྱོང་བཏང་འཛིན་བྱེད་ཐབས་སུ་དབང་འཛིན་དཔོན་རིགས་ཚོས་གསལ་ཁ་ཅི་ཡང་མེད་པའི་ཁྲིམས་འགལ་སྲུང་སྐྱོང་ཟེར་བ་དེ་ཆབ་སྲིད་ཀྱི་ལག་ཆར་སྤྱོད་བཞིན་ཡོད་པ་དང་། སྤྱི་ཚོགས་དོ་དམ་གྱི་ཐབས་བྱུས་ཟེར་བའི་མིང་བྱང་འོག་ཏུ་རྒྱ་གཞུང་གིས་མང་ཚོགས་སྲིད་གཞུང་གི་མྱུར་མར་བསྒྱུར་སྟེ།བོད་མི་ཚོར་ཕན་ཚུན་གྱི་གནས་ཚུལ་ཡོད་ཚད་འབྲེལ་ཡོད་སྡེ་ཁག་ལ་ལྐོག་ཞུ་བྱེད་དགོས་པའི་སྐུལ་འདེད་གཏོང་མུས་ཡིན་པ་དང་། འདི་ནི་གཞུང་གིས་ཉེས་རྟོགས་ཀྱི་དབང་ཤུགས་སྤྱད་དེ་བོད་ནང་ལ་དྲག་གནོན་བྱེད་བཞིན་པའི་དཔེ་མཚོན་འཁྲུལ་མེད་ཅིག་ཡིན་པ་གསུངས་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་དེ་འབྲེལ་གསུངས་པར་སྤྱིར་རྒྱ་ནག་གཞུང་གི་བརྡ་ཁྱབ་འདི་རིགས་སྤེལ་དགོས་དོན་ནི་རྒྱ་གཞུང་གིས་སྔ་ལོའི་ལོ་མགོར་རྒྱ་ནག་རྒྱལ་ཡོངས་ནང་ནག་སེལ་གཤེད་བཅོམ་གྱི་ལས་འགུལ་སྤེལ་བ་དེ་བོད་ནང་ལམ་ལྷོང་ལྡན་པ་ཞིག་ཡོང་ཆེད་དུ་ཡིན་པ་དང་། རང་སྐྱོང་ལྗོངས་སྲིད་གཞུང་གིས་བརྡ་ཁྱབ་འདི་རིགས་སྤེལ་བ་བརྒྱུད་ནས་བོད་ས་གནས་སྲིད་གཞུང་གིས་རྒྱ་ནག་རྒྱལ་ཁབ་ཀྱི་རྩ་ཁྲིམས་དང་འགལ་བརྡ་ཁྱབ་བཏང་སྟེ་མང་ཚོགས་ཀྱི་སྨྲ་བརྗོད་རང་དབང་ལ་དམ་དྲག་བྱེད་བཞིན་ཡོད་པ་གསུངས་སོང་།