རྒྱལ་སྤྱི།

བོད་ནང་གི་འགྲོ་བ་མིའི་ཐོབ་ཐང་དང་ཆབ་སྲིད་བཙོན་པའི་གནད་དོན་སོགས་ཀྱི་ཐད་ལ་བསྟུད་མར་གླེང་སློང་དང་སྦྲགས་བོད་དོན་ལ་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ཨ་རིའི་གྲོས་ཚོགས་ཀྱི་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོར་བསྐོ་གཞག་གནང་འདུགསྐབས་ ༡༡༦ པའི་ཨ་རིའི་གྲོས་ཚོགས་ཀྱི་ཚོགས་ཆུང་ཁག་གི་ཚོགས་གཙོ་སྦྲེལ་པོས་དབུས་པའི་ཚོགས་མི་རྣམ་པ་གསར་འདེམས་ཀྱི་ལས་གཞི་ཁག་འགྲོ་བཞིན་ཡོད་པ་ལྟར། ཁ་སང་ཕྱི་ཚེས་ ༡༧ ཉིན་གྲོས་ཚོགས་ཀྱི་ཚོགས་གཙོ་ལྕམ་ Nancy Pelosi མཆོག་གིས་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་ཨ་རིའི་གྲོས་ཚོགས་ཀྱི་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོར་བསྐོ་གཞག་བྱུང་བ་ཡོངས་བསྒྲགས་གནང་ཡོད་པ་རེད།སྐབས་དེར་སྐུ་ཞབས་ Jim McGovern ལགས་ནས་ཚོགས་ཆུང་དེའི་ཚོགས་གཙོའི་འགན་ཁུར་དང་བཞེས་དང་སྦྲགས། ཨ་རིའི་ངོས་ནས་ཕྱི་འབྲེལ་གྱི་སྲིད་བྱུས་ཁྲོད་འགྲོ་བ་མིའི་ཐོབ་ཐང་གི་གནད་དོན་དེ་གལ་འགངས་ཆེ་ཤོས་ཤིག་ཏུ་ངོས་བཞེས་ཀྱིས་རྒྱལ་སྤྱིའི་མང་ཚོགས་རྣམས་ལ་ཨ་རི་གཞུང་ནས་གཞི་རྩའི་འགྲོ་བ་མིའི་ཐོབ་ཐང་སྤྱི་དང་ལྷག་པར་དུ་རང་ཉིད་ཀྱི་རིག་གཞུང་གཅེས་འཛིན་དང་ཆོས་དད་ཀྱི་རང་དབང་། སྨྲ་བརྗོད་དང་འདུ་འཛོམས་ཀྱི་རང་དབང་སོགས་སྲུང་སྐྱོང་ཞུ་སླད་དུས་རྟག་ཏུ་རྒྱབ་སྐྱོར་གྱི་གྲ་སྒྲིག་ཨང་སར་ཡོད་པའི་ཡིད་ཆེས་བསྐྲུན་ཐུབ་དགོས་གནད་ཡིན་པ་གསུངས་འདུགཁོང་གིས་རྒྱ་ནག་གཞུང་གི་དྲག་པོའི་སྲིད་བྱུས་འོག་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་གནས་སྟངས་དང་། བོད་མིའི་ཆོས་དད་རང་དབང་ལ་ཚོད་འཛིན་གྱིས་ཆབ་སྲིད་སློབ་གསོ་སྤེལ་བཞིན་པའི་གནས་སྟངས། དེ་བཞིན་རྒྱ་ནག་གཞུང་གིས་རྒྱལ་སྤྱིའི་ཐོག་རང་ཉིད་ཀྱི་དབང་ཆ་གཅིག་བསྡུས་རིང་ལུགས་ཀྱི་ལྟ་སྤྱོད་སྤེལ་བཞིན་པའི་གནས་སྟངས་སོགས་ལ་ཨ་རིའི་ངོས་ནས་མཐོང་བཞིན་དུ་མིག་ལོང་བ་ལྟ་བུ་བྱས་ནས་བཞུགས་ན་འགྲིག་ཐབས་མེད་སྐོར་གསུངས་པ་དང་ཆབས་ཅིག ཁོང་གིས་ཚོགས་གཙོའི་ལས་ཡུན་འདིའི་རིང་ལ་ཚོགས་གཞོན་གྲོས་ཚོགས་འཐུས་མི་སྐུ་ཞབས་ Marco Rubio ལགས་ཀྱིས་གཙོས་པའི་འབྲེལ་ཡོད་ཚོ་དང་ལྷན་དུ་རྒྱ་ནག་དེ་རང་ཉིད་སོ་སོའི་བྱ་སྤྱོད་ཐོག་ལ་འགན་ཁུར་ཡོད་པ་ཞིག་བཟོ་རྒྱུ་ཡིན་ཞེས་ནན་པོ་གསུངས་ཡོད་པ་རེད།དེ་བཞིན་སྐབས་དེར་ཚོགས་གཞོན་སྐུ་ཞབས་ Marco Rubio ལགས་ནས་ཀྱང་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་རྒྱ་ནག་གི་དྲག་པོའི་སྲིད་བྱུས་འོག་དཀའ་སྡུག་མྱོང་བཞིན་པའི་རྒྱ་རིགས་གཙོ་གྱུར་བོད་མི་དང་། ཡུ་གུར་བ། དེ་བཞིན་ཁྲིམས་རྩོད་པ་དང་གསར་འགོད་པ་སོགས་ཀྱི་རང་དབང་སྲུང་སྐྱོབ་ཐད་མུ་མཐུད་ཤུགས་སྣོན་གནང་རྒྱུ་ཡིན་ཞེས་གསུངས་ཡོད། རྩ་བའི་ཨ་རིའི་གྲོས་ཚོགས་ཀྱི་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་དེ་རྒྱ་ནག་གཞུང་གི་ལས་དོན་རྣམས་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་འཛིན་ཁག་དང་མཐུན་པ་གནང་གི་ཡོད་མེད་དང་། ལྷག་པར་དུ་རྒྱ་ནག་དེ་ཁྲིམས་ཀྱི་དབང་སྒྱུར་ལྡན་པའི་རྒྱལ་ཁབ་ཅིག་ཆགས་རྒྱུ་སོགས་ལ་དམིགས་ཏེ་ཕྱི་ལོ་ ༢༠༠༠ ལོར་ཨ་རིའི་གྲོས་ཚོགས་སུ་གསར་འཛུགས་གནང་བ་ཞིག་ཡིན་པ་དང་། ཚོགས་ཆུང་དེས་ལོ་ལྟར་ཡུལ་དེའི་གྲོས་ཚོགས་སུ་རྒྱ་ནག་དང་འབྲེལ་བའི་ཉན་ཞིབ་ཀྱི་ལས་རིམ་དང་། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྤྱི་ཡོངས་ཐོག་ལ་ལོ་འཁོར་སྙན་ཐོ་སོགས་འདོན་སྤེལ་གནང་གི་ཡོད་པ་རེད། ད་རེས་ཚོགས་ཆུང་གི་ཚོགས་གཙོར་བསྐོ་གཞག་བྱུང་བ་སྐུ་ཞབས་ Jim McGovern ལགས་ནི་དེ་སྔ་རྒྱལ་སྤྱིའི་ཁྱོན་ཡོངས་ཀྱི་ནང་ལ་གཞི་རྩའི་འགྲོ་བ་མིའི་ཐོབ་ཐང་གི་གནས་དོན་ཐོག་ཕྱག་ལས་གནང་མཁན་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་གནང་མྱོང་ཡོད་པ་དང་། ཁོང་ནས་ཕྱི་ལོ་ ༢༠༠༥ ལོར་ཚོགས་གཙོ་ལྕམ་ Nancy Pelosi མཆོག་དང་ལྷན་དུ་བོད་ནང་འཚམས་གཟིགས་ལ་ཕེབས་མཁན་ཨ་རིའི་གྲོས་ཚོགས་འཐུས་མིའི་རུ་ཁག་ནང་ལྷན་ཞུགས་གནང་ཡོད་པ་མ་ཟད། རྒྱུན་དུ་ཨ་རིའི་གྲོས་ཚོགས་དང་རྒྱལ་སྤྱིའི་སྡིངས་ཆའི་ཐོག་༸ཀུན་གཟིགས་པཎ་ཆེན་རིན་པོ་ཆེ་མཆོག་གིས་གཙོས་པའོ་བོད་པའི་ཆབ་སྲིད་བཙོན་པ་གློད་བཀྲོལ་ཡོང་ཐབས་སུ་ཕྱག་ལས་གནང་མཁན་དང་། བོད་དོན་ལ་རྒྱབ་སྐྱོར་གནང་མཁན་གཙོ་གྲས་ཤིག་ཡིན་པ་མ་ཟད་༸གོང་ས་མཆོག་ལ་ཆེས་དད་གུས་དང་ཡིད་སྨོན་ཞུ་མཁན་ཨ་རིའི་གྲོས་ཚོགས་འཐུས་མི་ཞིག་ཡིན་པ་རེད།

རྒྱལ་མཚམས་མེད་པའི་གསར་འགོད་པའི་ཚོགས་པས་འཛམ་གླིང་ཁྲོད་གསར་འགོད་རང་དབང་གི་གནས་སྟངས་དང་འབྲེལ་བའི་འདི་ལོའི་སྙན་ཐོ་ཞིག་འདོན་སྤེལ་གནང་བའི་ནང་དེང་སྐབས་རྒྱ་ནག་ཏུ་སྲིད་འཛིན་ཞི་ཅིན་ཕིང་གིས་སྣེ་ཁྲིད་འོག དེང་དུས་ཀྱི་ཚད་མཐོའི་འཕྲུལ་ཆས་སྤྱོད་པའི་ཐོག་ནས་གསར་འགྱུར་དང་གསར་འགོད་པར་དམ་དྲག་ནན་པོ་བྱས་པ་མ་ཟད། མང་ཚོགས་ཐོག་ལྟ་སྲུང་སོགས་སྔར་ལྷག་བྱས་ནས་རྒྱལ་སྤྱིའི་ཁྱོན་ལ་རྒྱ་ནག་གི་ཤུགས་རྐྱེན་ཡོད་པའི་བརྒྱུད་ལམ་གྱི་འགྲོ་ལུགས་སྤེལ་ཐབས་བྱེད་བཞིན་ཡོད་པ་མངོན་གསལ་གནང་འདུག ཉེ་ཆར་ Reporters Without Borders ཞེས་རྒྱལ་མཚམས་མེད་པའི་གསར་འགོད་པའི་ཚོགས་པས་འཛམ་གླིང་ཁྲོད་གསར་འགོད་རང་དབང་གི་གནས་སྟངས་དང་འབྲེལ་བའི་ལོ་འཁོར་སྙན་ཐོ་འདོན་སྤེལ་གནང་བའི་ནང་འཛམ་གླིང་རྒྱལ་ཁབ་ ༡༨༠ ནང་གི་གསར་འགོད་རང་དབང་གི་གནས་སྟངས་ལ་རྟོག་ཞིབ་གནང་བ་ལས་སྤྱིར་འཛམ་གླིང་སྤྱི་ཡོངས་ནང་གསར་འགོད་པར་དོགས་ཟོན་གྱི་གནས་སྟངས་ཁྲོད་གསར་འགོད་པའི་ཐོག་ལ་འཚེ་བ་བྱེད་བཞིན་པའི་གནད་དོན་འབྱུང་བཞིན་པའི་འཇིགས་སྣང་གི་གནས་སྟངས་ཆགས་ཡོད་པ་དང། གསར་འགོད་པ་རྣམས་འཇིགས་སྣང་མེད་པའི་ཐོག་ནས་རང་དབང་ངང་ཕྱག་ལས་གནང་ཐུབ་ཡུལ་རྒྱལ་ཁབ་ཀྱི་གྲངས་ཐོ་ལོ་ལོ་རེ་བཞིན་ཇེ་ཉུང་དུ་འགྲོ་བཞིན་ཡོད་པ་མ་ཟད། དེ་བཞིན་དབང་ཆ་གཅིག་སྡུད་རིང་ལུགས་ཀྱི་གཞུང་འཛིན་རྣམས་ནས་གསར་འགོད་ལས་རིགས་ཐོག་དམ་དྲག་དང་ལྟ་སྲུང་སྔར་བཞིན་མུ་མཐུད་བྱེད་བཞིན་ཡོད་པ་མངོན་གསལ་གནང་འདུག སྙན་ཐོ་དེར་གཞིགས་ན་སྤྱིར་འཛམ་གླིང་རྒྱལ་ཁབ་ ༡༨༠ ཁོངས་ནས་ Norway དང་ Finland དེ་བཞིན་ Sweden དང་ Netherlands སོགས་ལ་གསར་འགོད་རང་དབང་གི་གནས་སྟངས་ཡག་པོ་ཡོད་པའི་རྒྱལ་ཁབ་བརྒྱ་ཆ་ ༨ ལས་མེད་པ་དང་རྒྱལ་ཁབ་བརྒྱ་ཆ་ ༡༦ ནང་དུ་གནས་སྟངས་འདོད་བློ་ཚིམ་ཙམ་ཡོད་པ། རྒྱལ་ཁབ་བརྒྱ་ཆ་ ༣༧ ནང་དུ་གནས་སྟངས་ཕྲན་བུ་དཀའ་ངལ་ཡོད་པ། དེ་བཞིན་རྒྱལ་ཁབ་བརྒྱ་ཆ་ ༢༩ ནང་དུ་གནས་སྟངས་དཀའ་ངལ་ཡོད་པ་མ་ཟད་ལྷག་དོན་རྒྱ་ནག་དང་བྱང་ཀོ་རི་ཡ། དེ་བཞིན་ Turkmenistan དང་ Etirea སོགས་རྒྱལ་ཁབ་བརྒྱ་ ༡༡ ནང་དུ་གསར་འགོད་རང་དབང་གི་གནས་སྟངས་ཆེས་ཞན་པོ་ཡོད་པ་ཐེར་འདོན་གནང་འདུག དེའི་ཁྲོད་རྒྱ་ནག་ནང་དེང་དུས་འཕྲུལ་ཆས་བེད་སྤྱོད་ཤུགས་ཆེ་བཏང་ནས་སྲིད་འཛིན་ཞི་ཅིན་ཕིང་གིས་གནས་ཚུལ་དང་གསར་འགོད་པར་དམ་དྲག་དང་མི་སེར་རྣམས་ལ་ལྟ་སྲུང་ནན་པོ་ཡོད་པའི་སྤྱི་ཚོགས་ཀྱི་ཁོར་ཡུག་ཞིག་བསྐྲུན་ཡོད་པ་མ་ཟད། ཁོ་པས་ New World Media Order ཞེས་འཛམ་གླིང་ཁྲོད་རྒྱ་ནག་གི་ཤུགས་རྐྱེན་ལྡན་པའི་དམ་དྲག་གི་ལམ་ལུགས་དེ་དར་སྤེལ་བྱེད་བཞིན་ཡོད་པ་ཆེས་མངོན་གསལ་གནང་ཡོད། རྒྱ་ནག་ནང་གི་གཞུང་སྒེར་བརྒྱུད་ལམ་ཆ་ཚང་རྒྱ་ནག་དམར་ཤོག་ཚོགས་པས་བཏང་འཛིན་ནན་པོ་བྱས་ནས་བཞག་ཡོད་པ་དང། རྒྱ་ནག་ནང་ཕྱག་ལས་གནང་བཞིན་པའི་ཕྱི་རྒྱལ་གྱི་གསར་འགོད་པ་རྣམས་ལ་འགོག་རྐྱེན་སྔར་ལྷག་བཟོ་བཞིན་པའི་ཁྲོད་ད་ལྟའི་ཆར་གསར་འགོད་པ་ ༦༠ ལྷག་བཀག་ཉར་འོག་ཏུ་སྲོག་ཉེན་འཕྲད་མུས་ཡིན་པ་རེད། ནོ་སྦེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་དང་དེ་བཞིན་གཞུང་དང་ལྟ་སྤྱོད་མི་མཐུན་མཁན་རྩོམ་པ་པོ་ Yang Tongyan ལགས་གཉིས་ཕྱི་ལོ་ ༢༠༡༧ ལོར་བཙོན་ཁང་དུ་སྨན་བཅོས་ལྟ་སྐྱོང་མེད་སྟབས་འབྲས་ནད་ཀྱི་རྐྱེན་པས་འདས་གྲོངས་སུ་གྱུར་ཡོད་པ་སོགས་ཆེས་ཛ་དྲག་གི་གནས་སྟངས་ཡོད་པ་ཐེར་འདོན་གནང་ཡོད། རྒྱལ་མཚམས་མེད་པའི་གསར་འགོད་པའི་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་ Christophe Deloire ལགས་ཀྱིས་ཆབ་སྲིད་ཀྱི་རྩོད་རྙོག་ཁྲོད་གསར་འགོད་པ་རྣམས་ཁག་དཀྲི་བྱ་ཡུལ་དུ་སྤྱོད་ཀྱི་ཡོད་ན་མང་ཚོགས་རྣམས་ཉེན་ཁར་ལྷུང་ཡོད་སྐོར་གསུངས་པ་དང་འབྲེལ། རང་དབང་གི་རིན་ཐང་ཤེས་མཁན་གྱི་མི་སྣ་རྣམས་ནས་དངངས་སྐྲག་དང་འཇིགས་སྐུལ་གྱི་འགྲོ་ལུགས་དེ་མཚམས་འཇོག་བྱེད་དགོས་པའི་གནད་དོན་ཞིག་ལ་ངོས་འཛིན་གནང་དགོས་གནད་ཡིན་པ་གསུངས་འདུག

ཌེན་མག་རྒྱལ་ཁབ་ཀྱི་རྒྱལ་ས་ Copenhagen གྱི་གཅན་གཟན་ཁང་གི་ནང་དུ་རྒྱ་ནག་གི་དོམ་ཁྲ་གཉིས་བཞག་པར་བརྟེན་མི་མང་གི་ནང་བསམ་ཚུལ་མང་དག་ཅིག་བྱུང་ནས་ཌེན་མག་སྲིད་གཞུང་གིས་རྒྱ་ནག་དང་ལྷན་དུ་འབྲེལ་བ་བྱས་པ་དེ་ནི་འོས་འཚམས་མིན་པར་སྐྱོན་བརྗོད་གནང་འདུག ཁ་སང་ཁུལ་དེའི་ས་གནས་གསར་ཁང་ཞིག་གིས་ཡུལ་དངོས་ཀྱི་གནད་དོན་ཐོག་གནས་ཚུལ་བཀོད་པར་ཁུལ་དེའི་བོད་དོན་རྒྱབ་སྐྱོར་རུ་ཁག་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབས་ཡར་རྒྱས་གཏོང་རྒྱུར་ཆོད་སེམས་བརྟན་པོ་ཡོད་པར་བརྗོད་དེ་རྒྱ་ནག་གིས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པ་སྟབས་ཌེན་མག་སྲིད་གཞུང་ནས་རྒྱ་ནག་དང་ལྷན་དུ་མཉམ་འབྲེལ་བྱེད་ཐབས་མེད་པའི་སྐྱོན་བརྗོད་གནང་འདུག སྐབས་དེར་རྒྱ་ནག་གི་དོམ་ཁྲ་གཉིས་པོ་དེ་དག་གཅན་གཟན་ཁང་དུ་བཞག་ན་འགྲིག་མིན་ཐོག་ཡུལ་དངོས་ཀྱི་མི་ ༡༡༡༥ ལྷག་ལ་འོས་ཤོག་འཕེན་དུ་བཅུག་སྐབས་འོས་མི་དེ་དག་ལས་བརྒྱ་ཆ་ ༤༩༌༤ ཡིས་རྒྱ་ནག་གི་དོམ་ཁྲ་དེ་གཉིས་རྒྱལ་ནང་དུ་ནང་འདྲེན་བྱས་ན་འགྲིག་པའི་རྣམ་འགྱུར་བསྟན་ཡོད་པ་དང་། བརྒྱ་ཆ་ ༣༠༌༤ ཡིས་དོམ་ཁྲ་དེ་གཉིས་རྒྱལ་ནང་དུ་ནང་འདྲེན་བྱེད་མི་འོས་པའི་རྒོལ་ལན་གནང་ཡོད་པ་རེད། ཆེད་མཁས་པ་ཞིག་གིས་རྩ་བའི་རྒྱ་ནག་གིས་དོམ་ཁྲ་དེ་ Denmark རྒྱལ་ཁབ་ལ་ལེགས་སྐྱེས་ཚུལ་དུ་སྤྲད་ཡོད་ཀྱང་ Copenhagen གྱི་གཅན་གཟན་ཁང་གིས་དོམ་ཁྲ་དེའི་མཐུན་འགྱུར་གྱི་ཆེད་དུ་ལོ་རེར་ཨ་སྒོར་ས་ཡ་གཅིག་རེ་སྤྲོད་དགོས་པ་དང་། དེ་བཞིན་དོམ་ཁྲ་དེ་གཉེར་སྐྱོང་ཁང་ཞིག་འཛུགས་བསྐྲུན་བྱས་ན་ཡང་ཨ་སྒོར་ས་ཡ་སུམ་ཅུའི་འགྲོ་གྲོན་གཏོང་དགོས་ཀྱི་ཡོད་པ་རེད་འདུག དེ་བཞིན་རྒྱ་ནག་གི་ནང་དུའང་ལོ་གཅིག་ལ་ཨ་སྒོར་ཁྲི་ལྔ་བཅུ་ཙམ་གཏོང་གི་ཡོད་པ་འཁོད་པར་བརྟེན་དོམ་ཁྲར་བདག་སྐྱོང་བྱེད་རྒྱུ་དེ་ལས་སླ་པོ་ཞིག་མ་རེད་ཅེས་བརྗོད་འདུག ཁུལ་དེའི་མི་མང་པོ་ཞིག་གིས་རྒྱ་ནག་གི་དོམ་ཁྲ་གཅན་གཟན་ཁང་དུ་ནང་འདྲེན་བྱེད་པ་ནི་ཆབ་སྲིད་ཀྱི་གནད་དོན་དང་འབྲེལ་བ་མེད་པ་ཞིག་ཡིན་པར་མ་ཟད།  རྒྱལ་ཁབ་གཉིས་དབར་གྱི་ཚོང་ལས་ཀྱི་འབྲེལ་ལམ་ཡག་ཏུ་འགྲོ་སྲིད་པ་ཞིག་ཡིན་པར་བརྗོད་ཡོད་ཀྱང་བོད་དོན་རྒྱབ་སྐྱོར་བ་རྣམས་ཀྱིས་བོད་ཀྱི་རྒྱལ་དར་བསྣམས་ནས་རྒྱ་ནག་གི་དོམ་ཁྲ་དེ་གཉིས་ཌེན་མག་གི་ནང་དུ་འཇོག་ཐབས་མེད་པར་ངོ་རྒོལ་གནང་འདུག རྩ་བའི་རྒྱ་ནག་ལ་ཆ་མཚོན་ན་ Denmark རྒྱལ་ཁབ་ནི་ནུབ་ཕྱོགས་རྒྱལ་ཁབ་ཁག་ནས་རྒྱ་ནག་དང་ལྷན་དུ་འབྲེལ་ལམ་ཐོག་མ་འཛུགས་མཁན་གྱི་རྒྱལ་ཁབ་ཅིག་ཆགས་ཡོད་པ་རེད། འོན་ཀྱང་དོམ་ཁྲ་ནི་རྒྱ་ནག་རྒྱལ་ཁབ་ཀྱི་ཚབ་མཚོན་སེམས་ཅན་དེ་ཡིན་པར་བརྟེན། དོམ་ཁྲ་ནང་འདྲེན་གྱི་གནད་དོན་དེ་ནི་རང་བཞིན་གྱི་ཆབ་སྲིད་ཀྱི་གནད་དོན་ཞིག་ཆགས་ཡོད་སྟབས་བོད་དོན་རྒྱབ་སྐྱོར་བ་རྣམས་ཀྱིས་གདན་དོན་དེར་ངོ་རྒོལ་གནང་ཡོད་པ་རེད།  དེ་སྔོན་ ༢༠༡༧ ལོར་ཡང་སྲིད་འཛིན་ཞི་ཅིན་ཕིང་གིས་འཇར་མ་ནི་ལ་མཇལ་འཕྲད་ཀྱི་སྐབས་སུ་ཡང་དོམ་ཁྲ་གཉིས་ཕུལ་ཡོད་པ་རེད། སྐབས་དེར་བོད་པ་དང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་ནག་གིས་དོམ་ཁྲ་དེ་བེད་སྤྱོད་བཏང་ནས་ཕྱི་འབྲེལ་གྱི་སྟོབས་ཤུགས་རྒྱ་སྐྱེད་གཏོང་ཐབས་ཀྱི་སྲིད་བྱུས་དེར་ངོ་རྒོལ་གནང་ཡོད།

ཁ་སང་ཟླ་ ༤ ཚེས་ ༩ ཉིན་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཨེ་ཤ་ཡ་དང་ཞི་བདེ་རྒྱ་མཚོ་སྡེ་ཚན་གྱིས་གོ་སྒྲིག་ཐོག་ཡུལ་དེའི་གྲོས་ཚོགས་ནང་འགྲོ་བ་མིའི་ཐོབ་ཐང་དང་། མང་གཙོ། ཁྲིམས་ཀྱི་དབང་སྒྱུར་བཅས་དང་འབྲེལ་བོད་དང་བྷར་མ། ཤིན་ཅང་སོགས་ཀྱི་གནད་དོན་ཐད་ཉན་ཞིབ་ཀྱི་ལས་རིམ་ཞིག་ཚོགས་ཡོད་པ་རེད།ལས་རིམ་ཐོག་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཨེ་ཤ་ཡ་དང་ཞི་བདེ་རྒྱ་མཚོ་སྡེ་ཚན་གྱི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Cory Gard་ner ལགས། གྲོས་ཚོགས་འཐུས་མི་སྐུ་ཞབས་ Edward Markey ལགས་དང་སྐུ་ཞབས་ Chris Coons ལགས་ཀྱིས་གཙོས་པའི་གནད་ཡོད་མི་སྣ་གཞན་ཁག་གཅིག རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་ལགས་ཀྱིས་དབུས་པའི་ལས་བྱེད་རྣམ་པ་དང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། དེ་བཞིན་བྷར་མའི་འགྲོ་བ་མིའི་ཐོབ་ཐང་འཐབ་རྩོད་པ་ Tun Khin ལགས་དང་ཡུ་གུར་ལས་འགུལ་ཚོགས་པའི་ཚོགས་གཙོ་ Rushan Abbas ལགས་བཅས་ལྷན་ཞུགས་གནང་འདུགསྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཞོན་བུ་ཆུང་ཚེ་རིང་ལགས་ཀྱིས་དེ་སྔ་ཕྱི་ལོ་ ༢༠༡༡ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུའི་ཡང་སྲིད་ཀྱི་གནད་དོན་ཐོག་བསྩལ་བའི་གསུང་འཕྲིན་དེ་ཨ་རིའི་གྲོས་ཚོགས་ཚོགས་ཆུང་ལ་ཕུལ་བ་དང་ཆབས་ཅིག འདས་པའི་མི་ལོ་ ༦༠ རིང་ལ་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་རྩ་མེད་གཏོང་ཐབས་ཀྱི་སྲིད་བྱུས་འདྲ་མིན་ལག་བསྟར་བྱས་ཡོད་པ་དང་། ལྷག་དོན་དུས་ནས་དུས་སུ་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་ཐེས་བྱུས་བྱས་ཏེ་རྒྱ་ནག་རང་ཉིད་ཀྱི་ཆབ་སྲིད་ཁེ་ཕན་སྒྲུབ་ཐབས་བྱེད་བཞིན་པ་སོགས་གསལ་འདོན་གནང་ཡོད་པ་རེད། ཨ་འི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཨེ་ཤ་ཡ་དང་ཞི་བདེ་རྒྱ་མཚོ་སྡེ་ཚན་གྱི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Cory Gardner ལགས་ཀྱིས་ཨ་རིས་རྒྱ་ནག་གཞུང་གིས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ཐེས་བྱུས་བྱེད་བཞིན་པར་མོས་མཐུན་མེད་པར་འགག་པ་གནང་གི་ཡོད་པ་མ་ཟད། ཨ་རིའི་གྲོས་ཚོགས་ནས་༸སྐུའི་ཡང་སྲིད་ཀྱི་གནད་དོན་རྣམས་དེ་སྔ་ཕྱི་ལོ་ ༢༠༡༡ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུའི་ཡང་སྲིད་ཀྱི་གནད་དོན་ཐོག་བསྩལ་བའི་གསུང་འཕྲིན་དེ་ལ་གཞི་རྩ་བཟུང་རྒྱུ་ཡིན་ཞེས་གསུངས་དང་འབྲེལ། གལ་སྲིད་མ་འོངས་པར་རྒྱ་ནག་གིས་༸སྐུའི་ཡང་སྲིད་ངོས་འཛིན་ཞུས་ཚེ་དེ་ལ་ཨ་རིའི་གྲོས་ཚོགས་ནས་ངོས་བཞེས་རྩ་བ་ནས་ཞུ་མི་སྲིད་ཅེས་གསུངས་འདུག བུ་ཆུང་ཚེ་རིང་ལགས་ཀྱིས་ད་དུང་རྒྱ་ནག་གཞུང་གིས་ ༡༩༥༩ ལོར་བོད་ཧམ་བཟུང་བྱས་པའི་གནས་སྟངས་དང་། ༸གོང་ས་མཆོག་གིས་དབུས་པའི་བོད་མི་རྣམས་བཙན་བྱོལ་དུ་ཕེབས་སྐབས་ཀྱི་གནས་སྟངས། དེ་བཞིན་རིམ་པས་༸གོང་ས་མཆོག་གིས་དབུ་ཁྲིད་ལམ་སྟོན་འོག་བོད་མིའི་སྒྲིག་འཛུགས་འདི་བཞིན་མང་གཙོའི་ལམ་ལུགས་ཚད་ལྡན་ཞིག་གི་ཐོག་ཤར་སྐྱོད་གནང་བཞིན་པ་སོགས་འདས་པའི་ལོ་ངོ་ ༦༠ རིང་གི་བོད་མིའི་གནས་སྟངས་ཕྱོགས་བསྡུས་ངོ་སྤྲོད་གནང་འདུག་པ་དང་། འདས་ལོར་རྒྱ་ནག་གཞུང་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་དང་། ཆོས་དད་རང་དབང་ལ་དམ་དྲག དེ་བཞིན་བོད་ཀྱི་ཁོར་ཡུག་གཏོག་བཤིག་སོགས་བརྒྱུད་ནས་ཨེ་ཤ་ཡའི་རང་བྱུང་ཁོར་ཡུལ་སྤྱི་ལ་གནོད་འཚེ་ཆེན་པོ་བཟོ་བཞིན་པ་སོགས་འགྲེལ་བརྗོད་གནང་ཡོད་པ་རེད། ལྷག་དོན་ཨ་རིའི་གྲོས་ཚོགས་དང་སྲིད་གཞུང་གི་ངོོས་ནས་ཨ་རིའི་ཕྱི་སྲིད་ལས་དོན་ཚོགས་ཆུང་གི་ཨེ་ཤ་ཡ་དང་ཞི་བདེ་རྒྱ་མཚོ་སྡེ་ཚན་གྱི་ལས་དོན་ཁྲོད་བོད་ཀྱི་གནད་དོན་གཙོ་ཆེར་ངོས་འཛིན་ཞུ་དགོས་པ་དང་། ཕྱི་ལོ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 འམ་ཨ་རིའི་བོད་ཐོག་འཛིན་པའི་སྲིད་བྱུས་ ༢༠༠༢ ཞེས་པ་དེར་བསྐྱར་ཞིབ་གནང་སྟེ་དོན་ཚན་ཁག་ངེས་པར་དུ་ལག་བསྟར་གནང་དགོས་པ། ཨ་རི་གཞུང་ནས་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་སྲིད་བྱུས་བརྟན་པོ་འཛིན་དགོས་པ། བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་ཆེད་འཛུགས་གནང་དགོས་པ། དེ་བཞིན་རྒྱ་ནག་གིས་བོད་ཀྱི་རྒྱུག་ཆུ་ཁག་བེད་སྤྱོད་ལོག་པར་གཏོང་བཞིན་པའི་ཤུགས་རྐྱེན་ཐོག་དམིགས་བསལ་གོ་རྟོགས་ཀྱི་ལས་འགུལ་སྤེལ་དགོས་པ་བཅས་ཞུ་སྐུལ་དོན་ཚན་ལྔ་ཆེད་བཏོན་གནང་འདུགདེ་བཞིན་ཉན་ཞིབ་ཀྱི་ལས་རིམ་ཐོག་ Burma འི་འགྲོ་བ་མིའི་ཐོབ་ཐང་འཐབ་རྩོད་པ་ Tun Khin ལགས་ནས་བྷར་མའི་ཁ་ཆེ་སྐྱབས་བཅོལ་བའི་གནས་སྟངས་སྐོར་དང་ཡུ་གུར་ལས་འགུལ་ཚོགས་པའི་ཚོགས་གཙོ་ Rushan Abbas ལགས་ནས་ཀྱང་རྒྱ་ནག་གཞུང་གིས་ཡུ་གུར་བ་སྟོང་ཕྲག་མང་པོ་འཛིན་བཟུང་བཀའ་ཉར་བྱས་ཏེ་ཆབ་སྲིད་ཀྱི་སློབ་གསོ་སྤྲོད་བཞིན་པའི་གནས་སྟངས་ལ་ཨ་རི་གཞུང་ནས་དམིགས་བསལ་དོ་སྣང་བྱེད་དགོས་པ་སོགས་གསུངས་ཡོད་པ་མ་ཟད། ཨ་རིའི་གྲོས་ཚོགས་འཐུས་མི་སྐུ་ཞབས་ Edward Markey ལགས་དང་སྐུ་ཞབས་ Chris Coons ལགས་ནས་བོད་གཙོས་པའི་ཨེ་ཤ་ཡའི་ས་གནས་ཁག་ཏུ་རྒྱ་གཞུང་གི་དམ་དྲག་དང་དྲག་པོའི་སྲིད་བྱུས་ལག་བསྟར་བྱེད་བཞིན་པར་ཨ་རིས་སེམས་འཚབ་གནང་མུས་ཡིན་པ་སོགས་གསུངས་འདུག

དེ་རིང་ཡོ་རོབ་རྒྱལ་ཁབ་སྦེལ་ཇམ་གྱི་རྒྱལ་ས་དང་ཡོ་རོབ་མཐུན་ཚོགས་ཀྱི་གྲོས་ཚོགས་གནས་ཡུལ་སྦར་སིལ་ནང་ཡུ་རོབ་མཐུན་ཚོགས་ཆེས་མཐོའི་དབུ་ཁྲིད་རྣམས་དང་རྒྱ་ནག་གི་སྲིད་བློན་ལི་ཁེ་ཆང་གཉིས་དབར་ཡོ་རོབ་མཐུན་ཚོགས་དང་རྒྱ་ནག་དབར་གྱི་ལོ་འཁོར་ལྷན་ཚོགས་ཐེངས་ ༢༡ པ་ཚོགས་ཡོད་པ་དང་། དུས་ཚིགས་དང་བསྟུན་དེ་རིང་སྦེལ་ཇམ་ཁུལ་དུ་ཡོད་པའི་བོད་མི་དང་ཡུ་གུར་བ། དེ་བཞིན་རྒྱལ་སྤྱིའི་གཞུང་འབྲེལ་མིན་པའི་ཚོགས་སྡེ་ཁག་ནས་ཡོ་རོབ་མཐུན་ཚོགས་ཀྱི་དབུ་ཁྲིད་རྣམས་ནས་ལྷན་ཚོགས་དེའི་ཐོག་རྒྱ་ནག་དང་ལྷན་དུ་བོད་དང་ཡུ་གུར་ནང་ཇེ་སྡུག་ཏུ་འགྲོ་བཞིན་པའི་འགྲོ་བ་མིའི་ཐོབ་ཐང་གི་གནད་དོན་གཙོ་བོར་བཟུང་བའི་ཐོག་གླེང་སློང་བྱེད་དགོས་པའི་ཞི་བའི་རྔམ་སྟོན་གྱི་ལས་འགུལ་སྤེལ་འདུག ཡོ་རོབ་མཐུན་ཚོགས་ཀྱི་ཚོགས་གཙོ་སྐུ་ཞབས་ Donald Tusk མཆོག་དང་ཡུ་རོབ་ཚོགས་ཆུང་གི་ཚོགས་གཙོ་སྐུ་ཞབས་ Jean-Claude Juncker ལགས་ཀྱིས་གཙོས་པའི་ཆེས་མཐོའི་དབུ་ཁྲིད་རྣམ་པ་དང་རྒྱ་ནག་གི་སྲིད་བློན་ལི་ཁེ་ཆང་དབར་གྱི་ལྷན་ཚོགས་དང་འབྲེལ་བའི་ལས་འགུལ་ཐོག་བོད་མི་ཙམ་མ་ཟད།  རྒྱ་ནག་གི་མངའ་འོག་ཏུ་ཡོད་པའི་ཡུ་གུར། རྒྱ་ནག་གནོན་ཤུགས་འོག་ཡོད་པའི་ཝེ་ཏི་ནམ་དང་ཕི་ལི་པི་ནོ། ཨི་ཊོ་ཨེ་ཤེ་ཡ་བཅས་རྒྱལ་ཁབ་ཁག་གི་མི་རིགས་དང། དེ་བཞིན་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་དང་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་སོགས་རྒྱལ་སྤྱིའི་གཞུང་འབྲེལ་མིན་པའི་ཚོགས་ཁག་བཅས་ལས་འགུལ་ནང་མཉམ་ཞུགས་གནང་འདུག དེ་དང་ཕྱོགས་མཚུངས་ཐེངས་འདིའི་ལྷན་ཚོགས་མ་འཚོགས་སྔོན་ཟླ་ ༤ ཚེས་ ༤ ཉིན་ UNPO ཞེས་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང་དང། རྒྱལ་སྤྱིའི་ཉེས་ཡངས་ཚོགས་པ་དང། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ། རྒྱལ་སྤྱིའི་ཡུ་གུར་ཚོགས་པ་སོགས་གཞུང་འབྲེལ་མིན་ཚོགས་པ་ཁག་མཉམ་འབྲེལ་གྱིས་ཕྱོགས་གཉིས་པོའི་ལྷན་ཚོགས་ཐོག་ཡོ་རོབ་མཐུན་ཚོགས་ཀྱི་ཚོགས་གཙོ་ Donald Tusk མཆོག་ནས་ལྷན་ཚོགས་ཐོག་འགྲོ་བ་མིའི་ཐོབ་ཐང་གི་གནད་དོན་གགཙོ་བོར་བཟུང་ནས་རྒྱ་ནག་དང་ལྷན་དུ་གླེང་སློང་གནང་དགོས་པའི་སྤྱིར་བསྒྲགས་ཤིག་ཀྱང་སྤེལ་ཡོད་པ་མ་ཟད། ལྷན་ཚོགས་འདི་ནི་ཡོ་རོབ་མཐུན་ཚོགས་ནས་རྒྱ་ནག་གི་འགོ་ཁྲིད་ཚོར་མང་ཚོགས་ཀྱི་གཞི་རྩའི་ཐོབ་ཐང་ཐོག་གླེང་སློང་གནང་རྒྱུའི་གོ་སྐབས་གལ་ཆེ་ཤོས་ཤིག་ཡིན་པ་དང། གལ་ཏེ་ད་རེས་ཀྱི་གོ་སྐབས་འདིའི་ཐོག་ནས་མང་ཚོགས་ཀྱི་བདེ་སྡུག་གླེང་སློང་གནང་མ་ཐུབ་ཚེ་ཡོ་རོབ་མཐུན་ཚོགས་ཀྱིས་རྒྱ་ནག་མངའ་འོག་ཏུ་འགྲོ་བ་མིའི་ཐོབ་ཐོང་རྩོད་ལེན་གནང་མཁན་ཚོའི་མངོན་འདོད་སྣང་མེད་དུ་བཞད་པ་དང་མགོ་སྐོར་བཏང་བ་དང་གཅིག་མཚུངས་ཆགས་སྐོར་གསུངས་འདུགརྩ་བའི་ཐེངས་འདིའི་ཕྱོགས་གཉིས་པོའི་ཆེས་མཐོའི་ལྷན་ཚོགས་འདིར་ཨ་རི་གཙོས་པའི་རྒྱལ་སྤྱིའི་གཞུང་དང་བརྒྱུད་ལམ་ཁག་ནས་དོ་སྣང་ཆེན་པོ་བྱེད་བཞིན་འདུག་པ་དང། འདས་པའི་ལོ་ཤས་ནང་རྒྱ་ནག་ནས་ཡོ་རོབ་མཐུན་ཚོགས་དང་རྒྱལ་སྤྱིའི་ཚོང་དོན་སྒྲིག་འཛུགས་ཀྱི་འབྲུ་དོན་མང་པོ་ཞིག་དོན་འཁྱོལ་ལག་བསྟར་བྱས་མེད་པ་མ་ཟད། ཡོ་རོབ་ཚོང་གཉེར་ཁང་ཁག་རྒྱ་ནག་ནང་དུ་འདྲ་མཉམ་གྱི་ཚོང་གཉེར་བྱེད་རྒྱུར་བཀག་འགོག་བྱེད་བཞིན་ཡོད་པ་དང། ལྷག་པར་དུ་རྒྱ་གཞུང་གི་རྒྱབ་རྟེན་འོག་རྒྱ་ནག་འཕྲུལ་རིགས་ལ་སོགས་པའི་ཚོང་ལས་ཁང་མང་པོ་ཞིག་ཡོ་རོབ་རྒྱལ་ཁབ་ཁག་གི་དཔལ་འབྱོར་ཁྲོམ་རའི་ནང་དུ་འཛུལ་ཞུགས་ཀྱིས་ཡོ་རོབ་ཀྱི་ཁྲོམ་རའི་དཔལ་འབྱོར་ལ་དབང་སྒྱུར་བྱེད་བཞིན་ཡོད་སྐོར་སོགས་ཀྱི་ཐོག་ཟླ་བ་སྔོན་མའི་ནང་ཡོ་རོབ་གྲོས་ཚོགས་སུ་ཚོགས་མིའི་རྒྱལ་ཁབ་ཁག་ནས་སེམས་འཚབ་དང་འབྲེལ་ཏེ་ཡོ་རོབ་མཐུན་ཚོགས་ཀྱི་ངོས་ནས་རྒྱ་ནག་ཐོག་འཛིན་པའི་སྲིད་བྱུས་ལ་འགྱུར་བ་གཏོང་དགོས་པའི་ཐབས་བྱུས་ཀྱི་གྲོས་འཆར་དོན་ཚན་བཅུ་ཅན་ཞིག་ཀྱང་ཆེད་བཏོན་གནང་ཡོད་པ་རེད།རྒྱ་ནག་དེ་བཞིན་ཡོ་རོབ་མཐུན་ཚོགས་ཀྱི་ཚོང་འབྲེལ་བྱ་ཡུལ་གྱི་རྒྱལ་ཁབ་ཙམ་མ་ཡིན་པར་ཡོ་རོབ་མཐུན་ཚོགས་ཀྱི་དཔལ་འབྱོར་དང་ཚོང་གི་ཐོག་ནས་ཁ་གཏད་རྒྱལ་ཁབ་ཅིག་ལ་ངོས་འཛིན་བྱེད་དགོས་པར་བཤད་ཡོད་པ་རེད། ད་རེས་ཡོ་རོབ་ཀྱི་ངོས་ནས་རྒྱ་ནག་ཕྱོགས་ལ་འགྱུར་བ་བཏང་བ་ཆེས་ཐོག་མ་དེ་ཆགས་ཀྱི་ཡོད། རླུང་འཕྲིན་ཁང་ནས་ཡོ་རོབ་དང་རྒྱ་ནག་གཉིས་དབར་གྱི་ལྷན་ཚོགས་དང་འབྲེལ་ནས་སྦར་སིལ་སྐུ་ཚབ་དོན་གཅོད་བཀྲིས་ཕུན་ཚོགས་ལགས་སུ་གཟིགས་ཚུལ་ཇི་བྱུང་ཐོག་བཀའ་འདྲི་ཞུས་པར་བར་སྐབས་ནས་ཨ་མི་རི་ཀའི་ངོས་ནས་རང་ཉིད་ཀྱི་ཁེ་ཕན་མ་གཏོགས་འཛམ་གླིང་རང་དབང་དང་མང་གཙོའི་རྒྱལ་ཁག་གི་འགོ་ཁྲིད་ནས་ རྒྱལ་སྤྱིའི་ཐོག་འགོ་ཁྲིད་རྒྱུའི་ལས་རིམ་མཚམས་འཇོག་བྱས་ཡོད་པར་བརྟེན། འཛམ་གླིང་ནང་གི་རང་དབང་ལུང་པ་དང་མང་གཙོའི་རྒྱལ་ཁབ་མང་པོ་ཞིག་ནས་ཡོ་རོབ་མཐུན་ཚོགས་ཀྱི་ངོས་ནས་དེ་དག་འགོ་ཁྲིད་བྱ་རྒྱུའི་རེ་བ་ཞིག་བྱེད་བཞིན་ཡོད་སྟབས། ད་ལྟའི་ཆར་ཡོ་རོབ་མཐུན་ཚོགས་ཀྱི་བཞེངས་ཕྱོགས་བརྟན་པོ་ཞིག་འཛིན་དགོས་གལ་ཆགས་ཡོད་པ་གསུངས་སོང་།དེ་རིང་བརྒྱུད་ལམ་ཁག་ཅིག་ཏུ་གནད་དོན་དབྱེ་ཞིབ་པ་ཚོས་ཕྱོགས་གཉིས་པོའི་གྲོས་མོལ་གྱི་ལྷན་ཚོགས་འདིར་ཚོད་དཔག་གནང་བར་ལྷན་ཚོགས་ཀྱི་སྔ་རོལ་དུ་ཡོ་རོབ་མཐུན་ཚོགས་ནས་རྒྱ་ནག་ཐོག་འཛིན་པའི་སྲིད་བྱུས་ཀྱི་ཟིན་བྲིས་སྤྲད་ཡོད་ཀྱང་རྒྱ་ནག་གཞུང་གིས་ཟིན་བྲིས་དེའི་ནང་རྒྱ་ནག་དང་མ་མཐུན་པའི་དོན་ཚན་མང་པོ་ཞིག་ཕྱིར་འཐེན་བྱས་ཡོད་སྟབས་ལྷན་ཚོགས་ཀྱི་མཇུག་ཏུ་ཕྱོགས་གཉིས་དབར་ལ་དོན་ཕན་ལྡན་པའི་གྲུབ་འབྲས་ཤིག་ཐོན་རྒྱུ་མེད་སྐོར་ཚོད་དཔག་གནང་བཞིན་འདུག ལྷག་པ་ར་དུ་ད་ལན་ཡོ་རོབ་མཐུན་ཚོགས་ནས་རྒྱ་ནག་ཐོག་འཛིན་པའི་སྲིད་བྱུས་ལ་འགྱུར་དགོས་པའི་གྲོས་འཆར་ཐོག་རྒྱབ་སྐྱོར་ཤུགས་ཆེ་གནང་མཁན་ཡོ་རོབ་མཐུན་ཚོགས་ཀྱི་ཚོགས་མིའི་རྒྱལ་ཁབ་ཕ་རན་སི་དང་འཇར་མ་ནི། དེ་བཞིན་དབྱིན་ཡུལ་བཅས་རེད་འདུག ཁོང་རྣམས་ནས་རྒྱ་ནག་གྱི་འགྱུར་བ་ལ་བརྟེན་ནས་རང་ཉིད་ཀྱི་ཕྱོགས་ལ་འགྱུར་བ་གཏོང་རྒྱུ་མིན་སྐོར་བརྗོད་འདུག ཐེངས་འདིའི་ཡོ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་ཐོག་ཡོ་རོབ་མཐུན་ཚོགས་ནས་རྒྱ་ནག་དང་ལྷན་དུ་གཙོ་ཡོ་རོབ་མཐུན་ཚོགས་རྒྱལ་ཁབ་ཁག་གི་ཚོང་ལས་ཁང་ཁག་འདྲ་མཉམ་གྱི་ཐོག་ནས་རྒྱ་ནག་ནང་དུ་ཚོང་གཉེར་རྒྱུའི་ཐོབ་ཐང་དགོས་པ་དང། རྒྱ་ནག་གི་ཉེན་འཚབ་ཆེ་བའི་ G5  དྲྭའི་བརྒྱུད་ལམ་གྱི་བདེ་འཇགས་སྐོར་གླེང་མོལ་བྱ་རྒྱུ་ཡིན་པ་དང། བརྒྱུད་ལམ་ཁག་ཏུ་ཐོན་པར་གཞིགས་ན་ཐེངས་འདིའི་ལྷན་ཚོགས་ཐོག་ཕྱོགས་གཉིས་དབར་ལ་ཨ་སྒོར་ཐེར་འབུམ་གཅིག་ལྷག་གི་ཚོགས་འབྲེལ་གྱི་གྲོས་མོལ་གནང་གི་ཡོད་པ་རེད་འདུག

རིང་མིན་ཟླ་ ༤ ཚེས་ ༩ ཉིན་ཡོ་རོབ་གྲོང་ཁྱེར་ Brussels ནང་དུ་ཡོ་རོབ་མཐུན་ཚོགས་དང་རྒྱ་ནག་གཉིས་དབར་ཆེས་མཐོའི་ལྷན་ཚོགས་ཤིག་འཚོགས་ལ་ཉེ་བ་དང་བསྟུན། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་ནས་རྒྱལ་ཁབ་གཉིས་དབར་གྱི་ཆེས་མཐོའི་ལྷན་ཚོགས་ཐོག་མཐུན་ཚོགས་ཀྱི་འགོ་ཁྲིད་ནས་རྒྱ་ནག་ནང་ཆེས་ཇེ་སྡུག་ཏུ་འགྲོ་བཞིན་པའི་འགྲོ་བ་མིའི་ཐོབ་ཐང་གི་གནས་སྟངས་ཐོག་གནོན་ཤུགས་སྤྲོད་དགོས་ཞེས་གསུངས་འདུག ཁ་སང་ཚེས་ ༤ ཉིན་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་དྲྭ་གནས་ཐོག་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་དང་། རྒྱལ་སྤྱིའི་ཉེས་ཡངས་ཚོགས་པ། དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་གནའ་འབྲེལ་ཚོགས་པ། རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཁང་། རྒྱལ་སྤྱིའི་བོད་དོན་ལས་འགུལ་བཅས་ཚོགས་པ་ལྔ་པོ་མཉམ་སྦྲེལ་གྱིས་ཡོ་རོབ་མཐུན་ཚོགས་ཀྱི་འགོ་ཁྲིད་ནས་རྒྱ་ནག་ནང་ཆེས་ཇེ་སྡུག་ཏུ་འགྲོ་བཞིན་པའི་འགྲོ་བ་མིའི་ཐོབ་ཐང་གི་གནད་དོན་དག་ཛ་དྲག་གི་ཐོག་ནས་གླེང་དགོས་པའི་ཞུ་སྐུལ་གྱི་གསར་འགོད་གསལ་བསྒྲགས་གནང་ཡོད་པ་རེད། ཡོ་རོབ་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ངེས་སྟོན་པ་ལྕམ་ Lotte leicht ལགས་ཀྱིས་ལྷན་ཚོགས་དེ་ནི་ཡོ་རོབ་མཐུན་ཚོགས་ལ་རྒྱ་ནག་གི་འགོ་ཁྲིད་ཚོ་དང་ལྷན་དུ་འགྲོ་བ་མིའི་ཐོབ་ཐང་གི་གནད་དོན་གླེང་སློང་གནང་རྒྱུའི་གོ་སྐབས་གལ་ཆེན་ཞིག་ཡིན་པ་དང་འབྲེལ། ཡོ་རོབ་མཐུན་ཚོགས་དང་དེ་གའི་ཚོགས་མི་ནས་ཡོངས་བསྒྲགས་ཐོག་འགྲོ་བ་མིའི་ཐོབ་ཐང་གི་ལས་འགུལ་བ་ཚོར་རྒྱབ་སྐྱོར་གནང་གི་ཡིན་ཞེས་གུངས་ཡོད་པ་ལྟར། མཐུན་ཚོགས་ནས་དེ་སྔ་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཁས་ལེན་དམ་བཅའ་གནང་བ་ལག་ལེན་དོན་འཁྱོལ་ཡོང་མིན་ད་རེས་དངོས་སུ་མངོན་རྒྱུ་ཡིན་པ་གསུངས་འདུག རྒྱལ་སྤྱིའི་འགྲོ་བ་མིའི་ཐོབ་ཐང་ཞབས་ཞུ་ཁང་གི་ངེས་སྟོན་པ་སྐུ་ཞབས་ Phil Lynch ལགས་ཀྱིས་ཡོ་རོབ་མཐུན་ཚོགས་ནས་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་ཀྱིས་གཙོས་པའི་ཡུ་གུར་མི་རིགས་ཀྱི་རང་དབང་འཐབ་རྩོད་པ་ཨི་ཧམ་ཊོ་ཐི་ལགས་དང་། འགྲོ་བ་མིའི་ཐོབ་ཐང་གི་ཁྲིམས་རྩོད་པ་ Wang Quanzhang ལགས་དང་། 64Tianwang གསར་ཁང་གསར་འཛུགས་གནང་མཁན་ Huang Qi  ལགས་སོགས་ཀྱི་བློ་ཁོག་ལ་ཡི་རངས་བསྔགས་བརྗོད་གནང་ཐོག་ཁོང་རྣམས་འཕྲལ་མར་གློད་བཀྲོལ་དགོས་པའི་རེ་སྐུལ་ཞུས་འདུག རྒྱལ་སྤྱིའི་ཉེས་ཡངས་ཚོགས་པའི་ཤར་ཨེ་ཤ་ཡའི་ཉམས་ཞིབ་ཁང་གི་ངེས་སྟོན་པ་ལྕམ་ Roseanne Rife ལགས་ཀྱིས་ཡོ་རོབ་མཐུན་ཚོགས་ཀྱི་འགོ་ཁྲིད་རྣམས་ནས་ད་བར་རྒྱ་ནག་ནང་གི་འགྲོ་བ་མིའི་ཐོབ་ཐང་རྡོག་རོལ་དུ་འགྲོ་བཞིན་པ་མཚམས་འཇོག་སླད་ལས་དོན་ཤུགས་ཆེ་གང་ཡང་སྤེལ་གནང་མེད་སྟབས། མཐུན་ཚོགས་ནས་དེ་འབྲེལ་གནས་སྟངས་གོང་མཐོར་སླད་རྒྱ་ནག་གི་འགོ་ཁྲིད་ཚོ་དང་ལྷན་དུ་ཆེས་ཛ་དྲག་གི་རྣམ་པའི་ཐོག་ནས་གླེང་སློང་གནང་དགོས་པ་གསུངས་འདུག བསྒྲགས་གཏམ་དེའི་ནང་ཉེ་ལམ་གྲུབ་ཟིན་པའི་ཡོ་རོབ་མཐུན་ཚོགས་དང་རྒྱ་ནག་དབར་གྱི་གྲོས་མོལ་ཐེངས་ ༣༧ པའི་སྐབས་རྒྱ་ནག་གི་འགྲོ་བ་མིའི་ཐོབ་ཐང་གི་གནད་དོན་ཐད་གླེང་སློང་བྱུང་ཡང་དེ་སླར་ཡང་ཛ་དྲག་དང་ཐུགས་ཚབས་ཆེན་པོའི་སྒོ་ནས་གླེང་དགོས་པ་དང་ཆབས་ཅིག་ཏུ་ཤིན་ཅང་ནང་ཆབ་སྲིད་སློབ་གསོ་བསྟི་གནས་ཁང་བཙུགས་པ་རྣམས་སྒོ་བརྒྱབ་དགོས་པ་དང་ལྷག་དོན་རྒྱ་གཞུང་དང་ལྟ་སྤྱོད་མི་མཐུན་མཁན་གྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པ་གསུངས་ཡོད་པ་རེད། དེ་བཞིན་ཚོགས་པ་དེ་དག་གིས་ལྷན་ཚོགས་དེ་མ་འཚོགས་བར་ཡོ་རོབ་མཐུན་ཚོགས་ཀྱི་འགོ་ཁྲིད་དང་རྒྱ་གཞུང་གི་འགོ་ཁྲིད་བར་ཚོགས་འདུ་སྐབས་སུ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་གླེང་སློང་བྱེད་རྒྱུའི་གོ་སྐབས་མང་པོ་ཡོད་ཀྱང་། ཡོ་རོབ་མཐུན་ཚོགས་ཀྱི་ཕྱི་འབྲེལ་དང་བདེ་འཇགས་ལྷན་ཁང་གི་གཙོ་འཛིན་གཞོན་པ་ལྕམ་ Federica Mogherini ལགས་དང་ཕ་རན་སི་སྲིད་འཛིན་སྐུ་ཞབས་  Emmanuel Macron མཆོག དེ་བཞིན་འཇར་མ་ནི་སྲིད་བློན་ལྕམ་ Angela Merkel མཆོག ཡོ་རོབ་ཚོགས་ཆུང་གི་ཚོགས་གཙོ་སྐུ་ཞབས་ Jean-Claude Juncker ལགས་བཅས་ནས་དེ་ལྟར་གླེང་སློང་གནང་མེད་པ་གསུངས་འདུག གཞི་རྩའི་ཟླ་བ་ ༣ ཚེས་ ༡༣ ཉིན་ཚོགས་པ་ལྔས་ཡོ་རོབ་མཐུན་ཚོགས་དང་མཐུན་ཚོགས་ཀྱི་ཕྱི་སྲིད་སྐུ་ཚབ་རྣམས་ལ་ཞུ་སྙན་ཞིག་ཕུལ་འདུག་པ་དང་། ཞུ་སྙན་དེའི་ནང་རྒྱ་གཞུང་གིས་ཊར་ཀི་ཁ་ཆེ་ཚོར་དོགས་སྲུང་ནན་པོ་བྱེད་བཞིན་པ་དང་དེ་དག་ལ་མི་སྤྱོད་ལས་འདས་པའི་མནར་གཅོད་གཏོང་བའི་སྐོར་དང་། བོད་ནང་བོད་མིར་ཆབ་སྲིད་སློབ་གསོ་སྤྲོད་རྒྱུ། ཞི་རྒོལ་གནང་མཁན་ཚོ་བཙོན་འཇུག་བྱས་པ་མ་ཟད་གར་སོང་ཆ་མེད་དུ་གྱུར་བ་སོགས་ཀྱི་གནད་དོན་ཞིབ་ཕྲ་ཕུལ་ཡོད་པ་དང་། ལྷག་པར་དུ་རྒྱལ་སྤྱིའི་རྩ་ཁྲིམས་ལ་སྣང་མེད་གཏོང་བའི་སྒོ་ནས་རྒྱལ་སྤྱིའི་སྟེང་དུ་རྒྱ་གཞུང་གིས་ཚོགས་སྡེ་ཁག་དང་གཙུག་ལག་སློབ་ཁང་སོགས་ལ་ཤུགས་རྐྱེན་ངན་པ་སྤྲོད་བཞིན་པའི་གནད་དོན་འཁོད་པའི་ཞུ་སྙན་ཡང་ཕུལ་འདུག གཞན་ཡང་རྒྱལ་སྤྱིའི་ཡུ་གུར་ཚོགས་པ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གནའ་འབྲེལ་ཚོགས་པ།དེ་བཞིན་ UNPO ཞེས་རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པ། བྷེལ་ཇམ་དུ་གནས་བཞུགས་བོད་མི་དང་ཡུ་གུར་ཚོགས་པ། རྒྱལ་སྤྱིའི་བོད་དོན་ལས་འགུལ་ཁང་སོགས་མཉམ་སྦྲེལ་ཐོག་ཡོ་རོབ་མཐུན་ཚོགས་དང་རྒྱ་ནག་གཉིས་དབར་གྱི་ལྷན་ཚོགས་སྐབས་ཞི་བའི་རྔམ་སྟོན་གནང་རྒྱུའི་གསར་འགོད་གསལ་བསྒྲགས་ཤིག་གནང་ནས་ཡོ་རོབ་མཐུན་ཚོགས་ཀྱི་ངོས་ནས་རྒྱ་གཞུང་གིས་བོད་མི་གཙོས་པའི་ཡུ་གུར་མི་རིགས་དང་། ཐ་ན་རང་རྒྱལ་ཁབ་ཀྱི་མི་སེར་རྣམ་པའི་ཐོག་བྱ་སྤྱོད་སྤེལ་སྟངས་དེ་དག་ཐེར་འདོན་བྱེད་དགོས་པ་དང་སྒོས་རྒྱ་གཞུང་ནས་དེའི་མངའ་ཁོངས་སུ་ཡོད་པའི་མང་ཚོགས་ནས་རང་ཉིད་ཀྱི་རིག་གཞུང་དང་། སྐད་ཡིག དེ་བཞིན་རང་དབང་སྒོ་ནས་ཆོས་ལུགས་ལོངས་སུ་སྤྱོད་པར་གུས་བརྩི་ཞུ་དགོས་པ་མ་ཟད། བོད་མི་དང་ཡུ་གུར་ཐོག་དྲག་གནོན་བྱས་པ་དེ་དག་མཚམས་འཇོག་དང་ཆབ་སྲིད་བཙོན་པ་རྣམས་འཕྲལ་མར་གློད་བཀྲོལ་དགོས་པའི་དགོས་འདུན་ཆེད་བཏོན་གནང་འདུག

ཕྱི་ཟླ་ ༤ ཚེས་ ༡ དང་ ༢ བཅས་ཉིན་གྲངས་གཉིས་ཀྱི་རིང་ཡོ་རོབ་ Brussels གྲོང་ཁྱེར་ནང་ཡོ་རོབ་མཐུན་ཚོགས་དང་རྒྱ་ནག་དབར་གྱི་འགྲོ་བ་མིའི་ཐོབ་ཐང་གི་གྲོས་མོལ་ཐེངས་ ༣༧ པ་དེ་ཚོགས་པ་དང་སྦྲགས། ཡོ་རོབ་མཐུན་ཚོགས་ཀྱིས་བོད་དང་ཤིན་ཅང་གི་འགྲོ་བ་མིའི་ཐོབ་ཐང་གི་གནས་སྟངས་གླེང་སློང་དང་བོད་ཀྱི་ཆབ་སྲིད་བཙོན་པ་གཙོ་གྱུར་ཡུ་གུར་དང་རྒྱ་རིགས་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་རྣམས་ཀྱི་མཚན་མངོན་གསལ་གྱིས་དེ་དག་གློད་བཀྲོལ་གཏོང་དགོས་པའི་ཞུ་སྐུལ་གནང་འདུག ཁ་སང་ཚེས་ ༢ ཉིན་ཡོ་རོབ་མཐུན་ཚོགས་ཀྱིས་གསར་འགོད་བསྒྲགས་གཏམ་ཞིག་སྤེལ་བའི་ནང་ཉིན་གཉིས་ཀྱི་རིང་གྲོས་མོལ་གནང་བ་བརྒྱུད་ཡོ་རོབ་མཐུན་ཚོགས་དང་རྒྱ་ནག་དབར་བྱིས་པའི་ཐོབ་ཐང་དང་། ཚོང་ལས། འགྲོ་བ་མིའི་ཐོབ་ཐང་། འཇིགས་སྐུལ་བ་འགོག་ཐབས་སོགས་ཀྱི་གནད་དོན་ཐད་གླེང་སློང་གནང་ཡོད་པ་བཀོད་འདུག  གྲོས་མོལ་དེའི་ཐོག་རྒྱ་གཞུང་གི་སྐུ་ཚབ་ཀྱིས་རྒྱ་ནག་ནང་དཔལ་འབྱོར་ཡར་རྒྱས་འགྲོ་ལུགས་དང་། སྤྱི་ཚོགས་ཀྱི་ཐོབ་ཐང་། མང་ཚོགས་ཁྲོད་ལས་མེད་དང་དབུལ་ཕོངས་དཀའ་ངལ་གཙང་སེལ། སྤྱི་ཚོགས་སྲུང་སྐྱོབ་བཅས་ཀྱི་སྐོར་འགྲེལ་བརྗོད་བྱས་པ་དེ་ལྟར་ཡང། ཡོ་རོབ་མཐུན་ཚོགས་ཀྱིས་རྒྱ་གཞུང་ནས་དེ་འབྲེལ་ཆབ་སྲིད་དང་མང་ཚོགས་དཀྱུས་མའི་ཐོབ་ཐང་གོང་མཐོར་དང་རྒྱ་གཞུང་ནས་ཕྱི་ལོ་ ༡༩༩༨ ལོར་མང་ཚོགས་དང་ཆབ་སྲིད་ཀྱི་ཐོབ་ཐང་ཐད་རྒྱལ་སྤྱིའི་ཁྲིམས་ལ་མཚན་རྟགས་བཀོད་དོན་ལྟར་ངེས་པར་དུ་ལག་བསྟར་བྱེད་དགོས་པ་གསུངས་འདུག ཡོ་རོབ་མཐུན་ཚོགས་ནས་རྒྱ་གཞུང་གིས་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་།  ཁྲིམས་རྩོད་པ་འཛིན་བཟུང་བྱས་པ་རྣམས་ཀྱི་གནད་དོན་རེ་རེ་བཞིན་གླེང་སློང་གནང་ཐོག་དེ་དག་འཕྲལ་མར་གློད་བཀྲོལ་གཏོང་དགོས་པ་བརྗོད་འདུག་པ་མ་ཟད། ལྷག་དོན་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་དང་བོད་མིའི་ལས་འགུལ་བ་དང་ཆོས་ཕྱོགས་ཀྱི་མི་སྣ་བློ་བཟང་དར་རྒྱས་ལགས་རྣམ་གཉིས་ཀྱི་མཚན་འདོན་གནང་བ་དང་། དེ་བཞིན་ཡོ་རོབ་མི་སེར་ཡིན་པ་ Gui Minhai ལགས་དང་ཡུ་གུར་མི་སེར་ཨི་ལམ་ཀྲོ་ཐི་ལགས་གཙོ་གྱུར་ཆབ་སྲིད་བཙོན་པ་ ༦ གི་མཚན་འདོན་དང་། ཆོས་དད་དང་འབྲེལ་རྒྱ་རིགས་ཀྱི་ཡི་ཤུ་སློབ་དཔོན་ Zhang Shaojie ལགས་གཙོས་བཙོན་པ་གསུམ་དང་། འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་ཁྲིམས་རྩོད་པ་ Wang Quanzhang ལགས་གཙོས་བཙོན་པ་བདུན།  སྒོས་དེ་འབྲེལ་བཙོན་དུ་ཡོད་པའི་མི་ ༢༧ ལྷག་གི་མཚན་འདོན་གནང་ཐོག་དེ་དག་ལ་རང་གི་འདོད་མོས་བཞིན་ཁྲིམས་རྩོད་པ་བདམ་ཆོག་པའི་ཐོབ་ཐང་དང།  ནང་མི་སྤུན་མཆེད་དང་ཐུག་འཕྲད་གནང་རྒྱུ། དེ་བཞིན་སྨན་གཏུག་དང་སྨན་བཅོས་ཀྱི་མཐུན་རྐྱེན་སྦྱོར་དགོས་པ། བཙོན་ནང་དྲག་གནོན་དང་སྡུག་རྩུབ་མནར་གཅོད་ཐད་ཞིབ་འཇུག་གནང་དགོས་པའི་ཞུ་སྐུལ་གནང་བ་དང་ཆབས་ཅིག ད་ཆ་རྒྱ་ནག་གི་བཙོན་ནང་ཡོད་པའི་ཁེ་ན་ཌའི་མི་སེར་ཡིན་པ་ Michael Kovrig ལགས་དང་ Michael Spavor ལགས། དེ་བཞིན་ Robert Schellenberg ལགས་བཅས་ཀྱི་གནད་དོན་སླར་ཡང་གླེང་འདུག

ཉེ་སྔོན་ཕྱི་ཟླ་གསུམ་པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ སྐབས་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ལྷན་ཚོགས་དང་ཚོགས་ཞུགས་ཀྱི་སྐུ་ཚབ་མི་སྣ་སོགས་ལ་ཕྱོགས་ཡོངས་ནས་གནོན་ཤུགས་སྤྲད་ནས་རྒྱ་ནག་་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་དེར་གླེང་སློང་མི་ཡོང་བའི་ཐབས་ཤེས་བྱས་ཡོད་པ་མངོན་གསལ་གནང་ཡོད།ཁ་སང་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཉེ་སྔོན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་དེའི་ཐོག་རྒྱ་ནག་གིས་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཁག་གི་སྐུ་ཚབ་མི་སྣ་རྣམས་ལ་ཡི་གེ་ཞིག་ཕུལ་ཡོད་པ་ལྟ་ཞིབ་ཚོགས་པར་ལག་སོན་བྱུང་བ་དང་། དེ་བཞིན་ལྷན་ཚོགས་ཐོག་རྒྱ་གཞུང་གི་སྐུ་ཚབ་མི་སྣ་མང་པོ་ཆེད་བཅར་གྱིས་གནོད་ཤུསག་སྤྲད་དེ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབས་ཐད་སྐྱོན་བརྗོད་གནང་མི་ཆོག་པར་བསྔགས་བརྗོད་བྱེད་དགོས་བའི་ངན་སྐུལ་བྱས་ཡོད་པ་སོགས་མངོན་གསལ་གནང་འདུག རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གི་མི་སྣ་རྣམས་ལ་གནོན་ཤུགས་སྤྲོད་ཐབས་སུ་ཕུལ་བའི་ཡི་གེའི་ནང་རྒྱལ་ཚོགས་ཀྱི་ཚོགས་ཞུགས་སྐུ་ཚབ་རྣམས་ལ་ཕྱོགས་གཉིས་ཀྱི་རྒྱལ་ཁབ་ཀྱི་འབྲེལ་ལམ་དང་། དེ་བཞིན་ཕྱོགས་ཡོངས་ཀྱི་མཉམ་འབྲེལ་གཙོར་འཛིན་གྱི་ཐོག་ནས་དོ་ཕོག་འགྲོ་སྲིད་པ་དང།  ཁེ་ན་ཊ་དང་ཨ་རི་སོགས་ཀྱིས་ཕྱི་ཚེས་ ༡༣ ཉིན་རྒྱ་ནག་ནང་གི་ཡུ་གུར་མི་སེར་གྱི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་ཚོགས་འདུ་གཙོ་གྱུར་ལྷན་ཚོགས་སྤྱི་ཡོངས་ཐོག་འཛུལ་ཞུགས་དང་རྒྱབ་སྐྱོར་མི་བྱེད་པའི་ངན་སྐུལ་དང་ཉེན་བརྡ་བཏང་ཡོད་པ་གསལ་འདོན་བྱས་འདུགརྒྱལ་ཚོགས་ཀྱི་ཚོགས་མི་སྐུ་ཚབ་རྣམས་ལ་དོན་ཚན་དགུའི་ཐོག་ནས་སྤྲད་པའི་ཞུ་ཡིག་ནང་རྒྱལ་ཚོགས་ཀྱིས་ལས་བྱེད་པ་རྣམས་ནས་དེ་སྔོན་རྒྱ་ནག་གི་དུས་བཀག་བསྐྱར་ཞིབ་སྐབས་ཚོགས་པ་ཁག་གིས་ཕུལ་བའི་སྙན་ཐོ་རྣམས་ཕྱིར་བསྡུ་བྱེད་དགོས་པ། དེ་བཞིན་རྒྱལ་ཚོགས་ཀྱིས་ཚོགས་མི་རྣམས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བསྟོད་བསྔགས་གཏོང་དགོས་པ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་ཡུ་གུར་ས་ཁུལ་གྱི་པར་རིས་འགྲེམས་སྟོན་བྱས་ཏེ་ཡུ་གུར་མི་མང་རྒྱ་ནག་གི་སྲིད་གཞུང་གི་འོག་ཏུ་བདེ་སྐྱིད་ཀྱི་འཚོ་བར་རོལ་བཞིན་པ་མངོན་གསལ་བྱེད་ཐབས་སོགས་དངོས་ཤུགས་བརྒྱུད་གསུམ་གྱི་ཐོག་ནས་གནོན་ཤུགས་སྤྲད་པ་དག་ཐེར་འདོན་གནང་ཡོད་པ་རེད། འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ Geneva སྡེ་ཚན་གྱི་ངེས་སྟོན་པ་John Fisher ལགས་ཀྱིས་རྒྱ་ནག་གིས་ལོ་ངོ་དུ་མའི་རིང་ལ་རྒྱལ་ཚོགས་ཀྱི་འགྲོ་བ་མིའི་ཐང་ཚོགས་པའི་རྩ་བའི་གྲུབ་ཆ་དེར་གནོན་སྐྱོན་བཟོས་ནས་ནུས་བ་ཇེ་ཞན་དུ་གཏོང་ཐབས་བྱེད་བཞིན་ཡོདཔ་གསལ་འདོན་གནང་ཡོད་པ་དང་། དེ་བཞིན་རྒྱ་ནག་གིས་ཡུ་གུར་མི་རིགས་ལ་དྲག་གནོན་བྱེད་བཞིན་པའི་གནས་སྟངས་དེར་རྒྱལ་སྤྱིའི་སྒང་ནས་གླེང་སློང་མང་པོ་འབྱུང་བཞིན་པར་བརྟེན་རྒྱ་ནག་སྲིད་གཞུང་ད་ཆ་འཇིགས་དངངས་ཀྱི་གནས་བབས་ཤིག་ཏུ་ལྷག་ཡོད་སྟབས་མང་ཚོགས་ཡོངས་དང་མི་སྒེར་སོགས་ཚང་མར་གནོན་ཤུགས་སྤྲད་ནས་རྒྱལ་སྤྱིའི་སྟེང་གནས་དོན་དེའི་ཐད་ཐེ་གཏོགས་མི་ཡོང་བའི་ཐབས་ཤེས་གཏོང་བཞིན་ཡོད་པར་བསྒྲགས་འདུགརྒྱ་ནག་གིས་ཐབས་བརྒྱ་ཇུས་སྟོང་གིས་ཡུ་གུར་མི་མང་གི་ཐོབ་ཐང་ལ་དྲག་གནོན་བྱེད་བཞིན་པར་སྐྱོན་བརྗོད་ཡོད་ཚད་འགོག་ཐབས་བྱེད་ཡོད་ཀྱང་ཉེ་ཆར་འགྲོ་བ་མིའི་ཐོབ་ཐང་ལྷན་ཚོགས་ཐོག་རྒྱལ་སྤྱིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་དང་། ལྷག་པར་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་གཙོས་ཆེད་མཁས་པ་རྣམས་ཀྱིས་རྒྱ་ནག་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་བབས་དེར་སྐྱོན་བརྗོད་དྲག་པོ་བྱེད་པ་དང་འབྲེལ། འཕྲལ་དུ་རང་དབང་ལྡན་པའི་རྟོག་ཞིབ་རུ་ཁག་རྣམས་བཀག་རྒྱ་མེད་པར་ཤིན་ཅང་ནང་ས་ཁུལ་དུ་བསྐྱོད་དུ་འཇུག་དགོས་པའི་འབོད་སྐུལ་གནང་ཡོད་པ་རེད། རིང་མིན་འཚོགས་ལ་ཉེ་བའི་ཕྱི་ཟླ་དྲུག་པའི་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༤༡ པའི་སྐབས་རྒྱལ་སྤྱིའི་སྲིད་གཞུང་ཡོངས་ཀྱིས་རྒྱ་ནག་གི་འགྲོ་བ་མིའིཐོབ་ཐང་གི་གནས་སྟངས་དེ་རྒྱལ་སྤྱིའི་ནང་ཚད་དང་ལྡན་པ་བཟོ་དགོས་བའི་ཞུ་སྐུལ་གནང་ཡོད་པ་གསུངས་འདུག

ཨ་རིར་རྟེན་གཞི་བྱས་པའི་བོད་དོན་ལས་འགུལ་ཁང་གིས་དབུ་ཁྲིད་པའི་ཐོག་ཟླ་ ༣ ཚེས་ ༢༥ དང་ ༢༦ བཅས་ཉིན་གཉིས་ཀྱི་རིང་བོད་དོན་ཞུ་གཏུགས་ཀྱི་ལས་འགུལ་ཞིག་སྤེལ་ཡོད་པ་ལྟར། ལས་འགུལ་དེའི་ནང་ཨ་རིའི་མངའ་སྡེ་ ༢༤ ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ་ ༡༥༠ ལྷག་འདུ་འཛོམས་བྱུང་བ་མ་ཟད་དྲྭ་ཐོག་ནས་འཛུལ་ཞུགས་གནང་མཁན་སྟོང་ཕྲག་ལྷག་བྱུང་འདུགཐེངས་འདིའི་ཞུ་གཏུགས་ཀྱི་ལས་འགུལ་དེའི་ཁྲོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཨ་རིའི་རྒྱལ་ཡོངས་གྲོས་ཚོགས་ཀྱི་འཐུས་མི་དང་འབྲེལ་ཡོད་ལས་བྱེད་བཅས་ལ་མཇའ་འཕྲད་ཞུས་ནས་གཙོ་བོ་དོན་ཚོན་གསུམ་ཅན་གྱི་དགོས་འདུན་ཞིག་ཆེད་བཏོན་ཐོག་ཨ་རིའི་གཞུང་ནས་བོད་དོན་ཐོག་རྒྱབ་སྐྱོར་མུ་མཐུད་ཡོང་བའི་ཞུ་སྐུལ་ནན་པོ་ཞུས་འདུག རེ་ཞུའི་དོན་ཚན་གསུམ་པོ་དེ་དག་ནི།  གྲོས་ཚོགས་འཐུས་མི་རྣམས་ནས་ཨ་རིའི་ཕྱི་འབྲེལ་གྱི་དྲུང་ཆེ་ Mike Pompeo མཆོག་གི་མཚན་ཐོག་ལ་རྒྱ་ནག་གི་དབང་འཛིན་གྱི་འོག་ཏུ་བོད་མི་རྣམས་ཀྱི་བདེ་རྩ་ལ་སེམས་ཁྲལ་ཡོད་པའི་ཞུ་ཡིག་ཅིག་ཕུལ་ནས་ན་ནིང་བོད་ནང་དུ་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་གནང་བ་དེ་དང་། དེ་བཞིན་ཕྱི་ལོ་ ༢༠༠༢ ལོར་གཏན་འབེབས་གནང་བའི་བོད་ཀྱི་སྲིད་བྱུས་ཀྱི་ཁྲིམས་གཞི་གཉིས་ཕྱག་བསྟར་དོ་ནན་གནང་དགོས་བའི་འབོད་སྐུལ་ཞུ་དགོས་པ་དང་། བོད་ནང་གི་བསམ་བློའི་རང་དབང་དང་ཆོས་ལུགས་དད་མོས་ཀྱི་རང་དབང་ལ་གཙིགས་འཛིན་གྱིས་བོད་ཀྱི་ཆབ་སྲིད་བཙོན་པ་དག་ལ་རྒྱབ་སྐྱོར་གནང་རྒྱུ། ཨ་རིའི་སྲིད་གཞུང་གི་ངོས་ནས་བོད་དོན་རྒྱབ་སྐྱོར་མཇུག་སྐྱོང་གིས་བོད་ཀྱི་གནད་དོན་དང་འབྲེལ་བའི་བྱ་གཞག་གི་ཆེད་དུ་རོགས་དངུལ་གནང་སྐྱོང་ཡོང་བའི་རེ་སྐུལ་བཅས་དོན་ཚན་གསུམ་གྱི་ཞུ་སྐུལ་གནང་འདུགལས་འགུལ་ནང་མཉམ་ཞུགས་གནང་མཁན་རྣམས་ཀྱིས་འགྲེལ་བརྗོད་གནང་བར་གཞིགས་ན་ཨ་རིའི་གྲོས་ཚོགས་ཀྱི་འཐུས་མི་དང་། འབྲེལ་ཡོད་ལས་བྱེད་བཅས་ཀྱིས་གདན་དོན་དེ་དག་ལ་ངོས་ལེན་ཡོད་པའི་རྣམ་འགྱུར་ཡག་པོ་བསྟན་པ་མ་ཟད་མ་འོངས་པར་ཡང་མུ་མཐུད་མཇུག་སྐྱོང་གནང་ངེས་ཡིན་པའི་བརྡ་ལན་གནང་ཡོད་པ་བཀོད་འདུགརྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་ཀྱིས་འདི་ལོའི་ཞུ་གཏུགས་ཀྱི་ལས་འགུལ་ནང་མཉམ་ཞུགས་གནང་མཁན་དེ་སྔ་ལས་མང་བ་བྱུང་ཡོད་པ་དང་དེའི་རྒྱུ་མཚན་གཙོ་བོ་ནི། ཨ་རིའི་ངོས་ནས་ལོ་ངོ་བཅོ་ལྔའི་རྗེས་སུ་ཉེ་ལམ་བོད་དོན་རྒྱབ་སྐྱོར་གྱི་ཁྲིམས་གཞི་གཏན་འབེབས་གནང་ཡོད་རྐྱེན་ཡིན་སྐོར་གསུངས་འདུག ཁོང་གིས་ད་དུང་བོད་དོན་ཞུ་གཏུགས་པ་རྣམས་ཕྱི་ཚེས་ ༢༥ ཉིན་ཨ་རིའི་རྒྱལ་སར་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་དུ་འདུ་འཛོམས་བྱུང་སྐབས་ཨ་རིའི་སྲིད་གཞུང་གི་ངོས་ནས་བོད་ནང་ཕར་འགྲོ་ཚུར་འོང་གི་ཁྲིམས་གཞི་གཏན་འབེབས་བྱུང་བའི་ཆ་ཤས་འོག་ཚེས་ ༢༥ ཉིན་དམིགས་བསལ་སྙན་ཐོ་འདོན་སྤེལ་གནང་ཡོད་པ་སྙན་གསེང་ཞུས་པ་མ་ཟད། སྙན་ཐོ་དེ་ནི་ཁྲིམས་གཞི་གཏན་འབེབས་བྱུང་བ་ནས་དོན་དམ་གྱིས་ཕྱག་བསྟར་གནང་ཕྱོགས་ཀྱི་གོམ་པ་དང་པོ་སྤོས་པ་ཞིག་རེད་ཅེས་གསུངས་འདུག ཁོང་གིས་འདས་པའི་ཟླ་ཤས་ཀྱི་ནང་དུ་བོད་དོན་རྒྱབ་སྐྱོར་གྱི་ཚ་རླབས་གསར་པ་ཞིག་འཕྱུར་བཞིན་པ་འགྲེལ་བརྗོད་གནང་དེ་འདི་ལོའི་བོད་དོན་ཞུ་གཏུགས་ཉིན་མོར་ཨ་རིའི་མངའ་སྡེ་སོ་སོ་ནས་ མཉམ་ཞུགས་ཧ་ཅང་མང་པོ་གནང་བར་བཀའ་དྲིན་རྗེས་དྲན་ཞུས་པ་དང་སྦྲགས། བོད་དོན་ཞུ་གཏུགས་འདི་ལྟ་བུ་བརྒྱུད་ནས་ཨ་རིའི་ནང་དུ་བོད་དོན་རྒྱབ་སྐྱོར་ཤུགས་ཆེར་འཕེལ་བཞིན་པར་བརྟེན་ ༢༠༡༩ ནང་སྔར་ལས་ལྷག་པའི་ལས་དོན་བསྒྲུབ་ཐུབ་པར་རམ་འདེགས་གནང་དགོས་བའི་རེ་སྐུལ་གནང་འདུག