རྒྱལ་སྤྱི།

ཡོ་རོབ་ཀྱི་རྒྱལ་ཁབ་ Belgium ནང་རྟེན་གཞི་བྱས་པའི་ Le Soir གསར་ཁང་ནས་རྒྱ་ནག་གཞུང་འབྲེལ་གསར་ཁང་གི་དཔྱད་རྩོམ་རིགས་སྤེལ་བ་དང་སྦྲགས། རྒྱལ་སྤྱིའི་བོད་དོན་ལས་འགུལ་ཁང་གིས་གཙོས་པའི་གཞུང་འབྲེལ་མིན་པའི་ཚོགས་པ་ཁག་གཅིག་གིས་གསར་ཁང་དེས་རྒྱ་ནག་གི་འཁྱོག་བཤད་དྲིལ་བསྒྲགས་སྤེལ་རྒྱུ་འཕྲལ་མར་མཚམས་འཇོག་བྱེད་དགོས་པའི་ཞུ་སྐུལ་གནང་འདུགཁ་སང་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་དྲྭ་གནས་ཐོག་གནས་ཚུལ་སྤེལ་བར་ Le Soir ཞེས་པའི་གསར་ཁང་དེས་ཕྱི་ལོ་ ༢༠༡༨ ཟླ་ ༡༡ ཚེས་ ༢༩ ཉིན་རྒྱ་ནག་གི་གཞུང་འབྲེལ་ Xinhua གསར་ཁང་ནས་སྤེལ་བའི་ Focus Belgian- China ཞེས་བྷལ་ཇམ་དང་རྒྱ་ནག་གཉིས་ཀྱི་ཐོག་ཞེས་པའི་བརྗོད་གཞི་ཁྲོད་རྒྱ་ནག་གི་སྲིད་འཛིན་ཞི་ཅིན་ཕིང་གི་སྲིད་བྱུས་འོག་རྨང་གཞི་འཛུགས་སྐྲུན་ལ་སོགས་པ་ཡར་རྒྱས་བཏང་ཡོད་པར་ཤིས་ཚིག་ཕུལ་བའི་དཔྱད་རྩོམ་ཤོག་ལྷེ་གཉིས་ཅན་གྱི་འཁྱོག་བཤད་དྲིལ་བསྒྲགས་སྤེལ་ཡོད་པ་དང་འབྲེལ། ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གིས་གཙོས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནའ་འབྲེལ་ཚོགས་པ་དང་ཕ་རན་སི་ནང་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཚོགས་པ། རྒྱལ་ཚོགས་སུ་སྐུ་ཚབ་མེད་པའི་རྒྱལ་ཁབ་དང་མི་མང་གི་ཚོགས་པ། རྒྱལ་སྤྱིའི་ཡུ་གུར་ཚོགས་པ། བྷལ་ཇམ་གནས་བཞུགས་མི་མང་བཅས་ཐུན་མོང་ནས་ Le Soir གསར་ཁང་གི་སྤྱི་ཁྱབ་རྩོམ་སྒྲིག་པའི་འགན་འཛིན་དང་ངེས་སྟོན་པ་ Oliver De Raeymaeker ལ་རྒྱ་གཞུང་གི་འཁྱོག་བཤད་དྲིལ་བསྒྲགས་སྤེལ་རྒྱུ་མཚམས་འཇོག་བྱེད་དགོས་པའི་ཞུ་སྐུལ་གྱི་ཕྱག་ཡིག་ཕུལ་འདུག རྒྱལ་སྤྱིའི་བོད་དོན་ལས་འགུལ་ཁང་གི་ཡོ་རོབ་མཐུན་ཚོགས་ཀྱི་ངེས་སྟོན་པ་ Vincent Metten ལགས་ཀྱིས་རང་དབང་ཅན་གྱི་རྒྱལ་ཁབ་ནང་ཡོད་པའི་གསར་ཁང་ནས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་རྒྱ་ནག་དམར་ཤོག་གི་འཁྱོག་བཤད་དྲིལ་བསྒྲགས་སྤེལ་བར་ངོས་ལེན་གནང་རྒྱུ་མེད་པ་དང་། རང་དབང་ཅན་གྱི་གསར་ཁང་ Le Soir ཡིས་མུ་མཐུད་ནས་གསར་འགོད་ཀྱི་སྤུས་ཚད་གང་ལེགས་གནང་རྒྱུ་དང་། དེ་བཞིན་གསར་ཁང་རང་ཉིད་ཀྱི་ཁུངས་དག་རང་བཞིན་དང་མི་མང་ནས་ཡིད་ཆེས་འཕེར་བ་གནང་དགོས་ཚེ་མི་རིང་བར་རྒྱ་ནག་གཞུང་གི་ Xinhua གསར་ཁང་གི་དཔྱད་རྩོམ་རིགས་སྤེལ་རྒྱུ་མཚམས་འཇོག་གནང་གནད་ཡིན་པ་སོགས་གསུངས་འདུགརྩ་བའི་རྒྱལ་སྤྱིའི་གསར་ཁང་ཁག་ཏུ་རྒྱ་ནག་གི་འཁྱོག་བཤད་དྲིལ་བསྒྲགས་ཀྱི་དཔྱད་རྩོམ་སྤེལ་རྒྱུ་དེ་ཕྱི་ལོ་ ༡༩༩༢ ལོར་ཨ་རིའི་གསར་ཁང་ནས་སྤེལ་འགོ་བཙུགས་པ་དང། ད་ལྟའི་ཆར་དབྱིན་ཡུལ་གྱི་ Daily Telegraph དངཕ་རན་སིའི་ Li Figaro དེ་བཞིན་སི་པཱེན་གྱི་ El Pais གསར་ཁང་སོགས་ཀྱིས་ Xinhua དང་། China Daily ཡི་དཔྱད་རྩོམ་ཁག་སྤེལ་མུས་ཡིན་པ་རེད། དེའི་ཁྲོད་དེ་སྔ་འཇར་མ་ནི་གསར་ཁང་ཞིག་གིས་ China Watch ཞེས་པའི་སྡེ་ཚན་ནང་རྒྱ་གཞུང་གི་ China Daily ཞེས་པའི་དཔྱད་རྩོམ་ཁག་ཅིག་སྤེལ་ཡོད་པ་དེ་ལྟར་ཡང། རྒྱལ་སྤྱིའི་བོད་དོན་ལས་འགུལ་ཁང་གིས་དེ་འབྲེལ་མཚམས་འཇོག་དགོས་པའི་གནོན་ཤུགས་སྤྲད་རྐྱེན་ད་ཆ་དེ་ལྟར་གནང་གི་མེད་པ་རེད།

ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་འཛམ་གླིང་རྒྱལ་ཁབ་ ༩༠ ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ཞིབ་འཇུག་གནང་བའི་ལོ་འཁོར་སྙན་ཐོ་ཞིག་འདོན་སྤེལ་གནང་བའི་ནང་རྒྱ་གཞུང་གིས་བོད་མིའི་ཐོག་བཙན་གནོན་གྱི་བྱ་སྤྱོད་མུ་མཐུད་སྤེལ་བཞིན་ཡོད་པ་གསལ་བཏོན་གནང་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ལོ་འཁོར་སྙན་ཐོ་དེའི་རྒྱ་ནག་གི་ཚན་པ་ནང་གསེས་བོད་སྐོར་སྡེ་ཚན་ཟུར་བཀོད་གནང་འདུག་པ་དེའི་ནང་། རྒྱ་གཞུང་གིས་བོད་ནང་གི་བོད་མིའི་ཆོས་དད་དང་གཏམ་བརྗོད་རང་དབང་། འགྲུལ་བཞུད་རང་དབང་སོགས་ལ་དམ་དྲག་ཤུགས་ཆེ་བྱེད་མུས་ཡིན་པ་མ་ཟད། བོད་ཀྱི་ས་ཁུལ་ཁག་ཏུ་རྒྱ་གཞུང་གི་འགོ་ཁྲིད་མི་སྣས་ས་གནས་བོད་མིའི་ས་ཁང་བཙན་འཕྲོག་དང་གཏེར་ཁ་སྔོག་འདོན་ཚད་འགལ་གྱི་བྱ་སྤྱོད་སོགས་སྤེལ་བའི་ཁྲོད་བཙན་གནོན་གྱི་གནས་འབབ་འོག་བོད་མིའི་འགྲུལ་བསྐྱོད་ལ་ལྟ་རྟོག་ནན་པོ་བྱས་ཏེ་སྤྱི་ཚོགས་དྲྭ་རྒྱ་དང་ཁ་པར་ལ་ཞིབ་བཤེར་མུ་མཐུད་བྱེད་བཞིན་ཡོད་པ་སོགས་ཀྱི་གནས་སྟངས་དངོས་གསལ་བཏོན་གནང་འདུག སྙན་ཐོའི་ནང་ད་དུང་བོད་མི་ཆབ་སྲིད་བཙོན་ཟུར་ཚེ་མགོན་རྒྱལ་ལ་ལོ་གསུམ་བཙོན་འཇུག་དང་བོད་མི་སྐད་ཡིག་སྲུང་སྐྱོབ་པ་བཀྲིས་དབང་ཕྱུག་ལགས་ལོ་ལྔ་བཙོན་འཇུག་གི་ཁྲིམས་བཅད་ཡོད་པ་དེ་ཡང་གཞི་མེད་ཀྱི་སྐྱོན་འཛུགས་བྱས་ཏེ་ཁྲིམས་ཆད་བཏང་སྐོར་སྐྱོན་བརྗོད་བྱས་པ་དང་འབྲེལ། སྔ་ལོ་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གི་དྲུང་ནས་གསུང་ཆོས་ཞུས་བར་བཅར་བའི་བོད་ནང་གི་བོད་མི་བརྒྱ་ཕྲག་ཁ་ཤས་ལ་རྒྱ་གཞུང་གིས་ཕྱིར་ལོག་དགོས་པའི་བཙན་བཀའ་བཏང་བ་དང་། གལ་ཏེ་དུས་བཅད་ནང་ཕྱིར་ལོག་མ་གནང་ཚེ་ཉེས་ཆད་གཏོང་རྒྱུའི་འཇིགས་སྐུལ་བྱས་པ་དང་བོད་ཀྱི་དགོན་སྡེ་དང་སློབ་གྲྭ་ཁག་གི་ནང་ཆབ་སྲིད་ཀྱི་སློབ་གསོའི་ལས་འགུལ་སྤེལ་ཤུགས་ཆེ་རུ་བཏང་བ་སོགས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ནི་མུ་མཐུད་ནས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པ་མངོན་གསལ་གནང་འདུག ཚོགས་པའི་གཙོ་འཛིན་སྐུ་ཞབས་ Kenneth Roth ལགས་ཀྱིས་ཁ་སང་སྙན་ཐོ་དེ་འདོན་སྤེལ་གནང་སྐབས་སུ་རྒྱ་གཞུང་གིས་ཤིན་ཅང་གི་ཡུ་གུར་མི་རིགས་ས་ཡ་བརྒལ་བར་བཀག་ཉར་བྱེད་བཞིན་པའི་གནས་ཚུལ་དེ་ནི་འཛམ་གླིང་ཁྱོན་ནས་དོ་སྣང་མ་གནང་བའི་གནད་དོན་ཆེ་གྲས་ཤིག་ཆགས་ཡོད་པར་འགྲེལ་བརྗོད་དང་ཨ་རི་དང་དབྱིན་ཡུལ་གཙོ་གྱུར་ནུབ་ཕྱོགས་རྒྱལ་ཁབ་ཙམ་མིན་པར་རྒྱལ་ཁབ་ཆུང་གྲས་དང་ལྷག་དོན་ OIC ལྟ་བུ་ཁ་ཆེའི་ཚོགས་སྡེ་ཁག་ནས་ཀྱང་གནད་དོན་དེའི་ཐོག་དོ་སྣང་གནང་རྒྱུར་རེ་བ་གནང་བཞིན་ཡོད་པ་གསུངས་འདུག གཞི་རྩའི་སྐུ་ཞབས་ Kenneth Roth ཡིས་ཁ་སང་རེས་གཟའ་ཕུར་བུ་ཉིན་ཚོགས་པའི་ལོ་རེའི་སྙན་ཐོ་དེ་འདོན་སྤེལ་གནང་བའི་སྔོན་གླེང་ནང་ཚོགས་པ་དེའི་ངོས་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གི་གནས་སྟངས་ལ་ཞིབ་འཇུག་གནང་པའི་ཁྲོད་འདས་ལོའི་ནང་འཛམ་གླིང་རྒྱལ་ཁབ་མང་པོ་ཞིག་གི་ནང་སྲིད་དབང་སྒེར་གཅོད་སྲིད་གཞུང་ཁག་ལ་མང་ཚོགས་ནས་འགོག་རྒོལ་བྱས་པའི་རྣམ་པ་འབུར་ཐོན་བྱུང་ཡོད་པར་མངོན་གསལ་དང་འགོག་རྒོལ་ལས་འགུལ་དེ་དག་ལ་བཟང་ཕྱོགས་ཀྱི་གནས་ཚུལ་མང་པོ་བྱུང་བ་མ་ཟད། རྒྱལ་སྤྱིའི་ཁྱོན་དུ་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་ནུས་ཤུགས་གསར་པ་ཞིག་ཀྱང་འཐོན་བཞིན་ཡོད་པ་གསུངས་འདུག

ཉེ་ཆར་ཟླ་བ་སྔོན་མའི་ཚེས་ ༡༩ ཉིན་ཨ་རིའི་སྲིད་མཛིན་མཆོག་གི་མཚན་རྟགས་བཀོད་པ་དང་སྦྲགས་ནས་ཨ་རིའི་གཞུང་གི་ངོས་ནས་ Reciprocal Access to Tibet Act ཞེས་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་གཞི་གཏན་འབེབས་བྱེད་སྐབས་རྒྱ་ནག་གཞུང་གིས་དགག་པ་ཤུགས་ཆེར་བསྐྱོན་པ་དང། ཁྲིམས་གཞི་གཏན་འབེབས་ཀྱི་སྔོན་ཚུད་དུ་༸གོང་ས་མཆོག་གིས་སྐུ་པར་ལ་དམ་དྲག་དང། ༸གོང་ས་མཆོག་ལ་མཚན་སྨད་ཀྱི་བྱ་སྤྱོད་སྤེལ་རྒྱུ་ཤུགས་ཆེ་རུ་བཏང་བ་སོགས་བྱས་ནས། ད་ལན་ཨ་རིའི་གཞུང་མང་གཉིས་ནས་བོད་དོན་རྒྱབ་སྐྱོར་གྱི་རྣམ་པ་ཤུགས་ཆེར་བསྟན་པར་རྒྱ་ནག་གཞུང་ལ་བློ་འཚབ་ཆེན་པོ་སྐྱེ་བཞིན་ཡོད་པ་གསལ་པོ་མངོན་རྒྱུ་ཡོད་པ་གསུངས་འདུག དེ་ཡང་ཁ་སང་ཚེས་ ༧ ཉིན་ཨ་རིའི་ནང་དུ་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་དྲ་གནས་ཐོག  ཨ་རིའི་གཞུང་གི་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་གཞི་གཏན་འབེབས་བྱས་པའི་སྔ་རྗེས་སུ་རྒྱ་ནག་གཞུང་གིས་བྱ་སྤྱོད་སྤེལ་ཕྱོགས་རིམ་པའི་སྙན་ཐོ་ཞིག་འདོན་སྤེལ་བྱས་པ་བརྒྱུད་ནས། རྒྱ་ནག་གཞུང་བློ་འཚབ་ཆེན་པོ་སྐྱེ་བཞིན་པ་གསལ་སྟོན་གནང་འདུག དེའང་ཚེས་ ༡༩ ཉིན་ཨ་རིའི་སྲིད་འཛིན་གྱིས་མཚན་རྟགས་བཀོད་དེ་ཁྲིམས་གཞི་གསར་པ་དེ་གཏན་འབེབས་བྱས་པའི་ཉིན་གཅིག་རྗེས།  རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ Hua Chunyin གྱིས་རྒྱ་གཞུང་ངོས་ནས་ཨ་རིའི་ཁྲིམས་གཞི་གསར་པ་དེར་དགག་པ་མཐའ་གཅིག་ཏུ་ཡོད་པ་དང་། དེའང་ཁྲིམས་གཞི་དེས་བོད་མི་ཁ་བྲལ་བ་ཚོར་བརྡ་ལན་ནོར་བ་ཞིག་འགྲོ་རྒྱུ་ཡིན་སྐོར་བརྗོད་ཡོད་པ་རེད།  ལྷག་པར་དུ་ཟླ་བ་སྔོན་མའི་ཚེས་ ༡༢ གཡས་གཡོན་ནས་རྒྱལ་སྤྱིའི་བརྒྱུད་ལམ་ཐོག་ཨ་རིའི་ཁྲིམས་གཞི་གསར་པ་དང་འབྲེལ་བའི་གནས་ཚུལ་རིམ་པ་ཐོན་པ་དང་དུས་མཚུངས་སུ། རྒྱ་ནག་གཞུང་འབྲེལ་བརྒྱུད་ལམ་ཁག་གི་ཐོག་ལ། ༸གོང་ས་མཆོག་གི་བརྒྱུད་སྐུལ་འོག་ཕྱི་ལོ་ ༢༠༠༨ ལོའི་བོད་ནང་གི་ས་བྱི་ཞི་རྒོལ་ཆེན་མོའི་སྒེར་ལངས་དང་བོད་མིའི་རང་ལུས་མེར་བསྲེགས་ཀྱི་ལས་འགུལ་བྱུང་བའི་འཁྱོག་བཤད་དྲིལ་བསྒྲགས་ཀྱི་གནས་ཚུལ་སྤེལ་རྒྱུ་མང་དུ་ཕྱིན་པའི་ཁྲོད།  Global Times བརྒྱུད་ལམ་གྱིས་དྲ་གནས་ཐོག་ཨ་རིའི་ཁྲིམས་གཞི་གསར་པ་གཏན་འབེབས་བྱས་པའི་གནས་ཚུལ་སྤེལ་བའི་ནང་དུ་༸གོང་ས་མཆོག་གི་མཚན་ཆེད་མངགས་བསྟན་ཏེ་སྐྱོན་བརྗོད་བྱས་པ་མ་ཟད། གནས་ཚུལ་དེར་མཆན་བསྐྱོན་མཁན་གྱི་ཁོངས་སུ།  དུས་རྒྱུན་༸གོང་ས་མཆོག་ལ་སྐྱོན་བརྗོད་ཤུགས་ཆེར་བྱེད་མཁན་གཙོ་བོ་གཅིག་གིས་ཨ་རིའི་ཁྲིམས་གཞི་གསར་པས། བོད་ནང་དུ་འགྲུལ་བསྐྱོད་བཀག་སྡོམ་བྱེད་མཁན་དཔོན་རིགས་ཚོར་ཤུགས་རྐྱེན་ཇི་ཐེབས་སྐོར་བློ་འཚབ་ཡོད་པར་བསྟན་པའི་གནད་དོན་བྱུང་ཡོད་པ་ཐེར་འདོན་གནང་འདུག དེའི་ཁྲོད་རྒྱ་ནག་འཐབ་ཕྱོགས་གཅིག་གྱུར་ལས་ཁུངས་ཀྱི་གཙོ་འཛིན་གཞོན་པ་ཟུར་པ། Zhu Weiqun ཡིས་བོད་གཅིག་སྒྲིལ་གྱི་ཆེད་དུ་ང་ཚོས་༸གོང་ས་མཆོག་ལ་སྐྱོན་བརྗོད་བྱེད་པར་ཧ་ལས་རྒྱུ་གང་ཡང་མེད་པ་དང་། ལྷག་པར་དུ་ཏཱ་ལའི་ཁ་བྲལ་རུ་ཚོགས་ནས་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་ཏུ། རྒྱ་ནག་ཐོག་གནོན་ཤུགས་ཆེ་རུ་གཏོང་་བཞིན་པའི་གོ་སྐབས་འཛིན་སྲིད་པ་ལྟར། མང་ཚོགས་ལ་ཏཱ་ལའི་བླ་མའི་བྱ་སྤྱོད་སྐོར་གོ་རྟོགས་སྤེལ་རྒྱུ་གལ་ཆེན་པོ་ཡིན་སྐོར་བརྗོད་པ་ལུང་འདྲེན་བྱས་འདུག སྙན་ཐོའི་ནང་ད་དུང། རྒྱ་གཞུང་གི་ཨ་རིའི་ཁྲིམས་གཞི་གཏན་འབེབས་ལ་ཡ་ལན་སྤྲོད་ཕྱོགས་དང་། བོད་ཀྱི་ས་ཁུལ་གང་སར་༸གོང་ས་མཆོག་གི་སྐུ་པར་ལ་དམ་དྲག་གིས་སྔོག་བཤེར་བྱས་པ་བརྒྱུད། སྐུ་པར་གཞུང་བཞེས་སོགས་ཀྱི་ལས་དོན་ཤུགས་ཆེ་རུ་བཏང་བ་དང་། ལྷག་པར་དུ་ཀན་ལྷོ་ཁུལ་དུ་རྒྱ་གཞུང་གི་རྒྱ་སྒོར་ས་ཡ་བཞི་ཙམ་འགྲོ་གྲོན་བཏང་སྟེ། བོད་མི་གནས་སྡོད་ས་ཁུལ་དུ་བོད་ཀྱི་ཐུན་མོང་མ་ཡིན་པའི་ཐང་ཀའི་གཟུགས་དབྱིབས་སུ་མའོ་ཙེ་ཏུང་གི་འདྲ་པར་ཆེན་པོ་ཞིག་བཀོད་དེ་འགྲེམས་སྤེལ་བྱས་ཡོད་པའི་གནད་དོན་ལུང་འདྲེན་དང་སྦྲགས་ནས།  རྒྱ་ནག་དམར་པོའི་གཞུང་བཟུང་ནས་ལོ་ ༧༠ འཁོར་བའི་དུས་དྲན་སྲུང་བརྩི་བྱེད་ཆེད་དུ་ཡིན་པར་བསྒྲགས་ཡོད་ནའང་། དོན་དངོས་སུ་རྒྱ་ནག་དམར་པོས་བོད་དོན་ཐོག་ཤུགས་རྐྱེན་ཆེ་རུ་བཏང་སྟེ། རྒྱ་ནག་གི་ཁྱད་ཆོས་ལྡན་པའི་བོད་དང་བོད་རྒྱུད་ནང་བསྟན་བཟོ་ཐབས་བྱས་པ་ཞིག་ཡིན་སྐོར་གསུངས་འདུག ལས་དོན་དེ་དག་ལམ་ལྷོང་དེ་ཙམ་མ་བྱུང་ཚེ།  ༢༠༡༩ ལོའི་སྟོང་ལོ་གསར་པའི་རྒྱ་ནག་གི་དུས་ཆེན་འདྲ་མིན་ཐོག་༸གོང་ས་མཆོག་ལ་མཚན་སྨད་ཞུ་རྒྱུའི་ལས་འཆར་བསྒྲིགས་ཡོད་པ་སོགས་ཀྱི་མཚོན་པའི་སྔ་རྗེས་ཀྱི་བྱེད་ཕྱོགས་མང་དག་ཅིག་ཀྱང་ལུང་འདྲེན་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་ངོས་ནས་ད་དུང་། རྒྱ་གཞུང་གི་དེ་སྔ་བོད་རང་སྐྱོང་ཟེར་བའི་ས་ཁུལ་དང་བསྡུར་ན། ༸གོང་ས་མཆོག་གི་སྐུ་པར་སོགས་ལ་དམ་དྲག་ཉུང་བ་ཡོད་པའི་ས་ཁུལ་དང་། ལྷག་པར་དུ་རང་ལུས་མེར་བསྲེགས་ཀྱི་དོན་རྐྱེན་མང་བ་བྱུང་སའི་ཨ་མདོ་དང་ཁམས་ཀྱི་ས་ཁུལ་དུ།  དེང་སྐབས་རིམ་པའི་༸གོང་ས་མཆོག་གི་སྐུ་པར་ལ་དམ་དྲག་བྱེད་འགོ་བཙུགས་ཡོད་པ་སོགས་དང་། དེ་བཞིན་ཕྱི་ལོ་ ༢༠༡༣ ལོར་རྒྱ་གཞུང་གི་ས་བགོས་བྱས་པའི་མཚོ་སྔོན་ཞིང་ཆེན།  ཚོ་ལྷོ་ས་ཁུལ་དང་། ༢༠༡༤ ལོར་བོད་དཀར་མཛེས་ཁུལ་དང་། ཆབ་མདོ་ཁུལ། དེ་བཞིན་ ༢༠༡༥ ལོར་དཀར་མཛེས་ཁུལ་གྱི་ཉག་རོང་ས་ཁུལ། དེ་བཞིན་འདི་ལོ་ཡུ་ཤུལ་ས་ཁུལ་གྱི་གཙོས་པའི་ས་ཁུལ་ཁག་ཅིག་གི་ནང་དུ།  ཏཱ་ལའི་ཁ་བྲལ་རུ་ཚོགས་ལ་གདོང་ལེན་བྱེད་དགོས་པ་དང་། ༸གོང་ས་མཆོག་གི་སྐུ་པར་ལ་དམ་དྲག་བྱེད་ཤུགས་ཆེ་རུ་བཏང་བ་དང་བསྟུན།  རྒྱ་གཞུང་གིས་བོད་མིའི་ཆོས་དང་རིག་གཞུང་ལ་དམ་དྲག་དང་གནོན་བཙིར་གྱི་ལས་དོན་ཤུགས་ཆེ་རུ་སྤེལ་བཞིན་ཡོད་པ་གསལ་པོ་མངོན་རྒྱུ་ཡོད་པ་ཡང་ཐེར་འདོན་གནང་འདུག

ཉེ་ཆར་ཕྱི་ཟླ་ ༡༢ ཚེས་ ༣༡ ཉིན་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་ Asia Reassurance Initiative Act ཞེས་རྒྱ་གར་རྒྱ་མཚོ་དང་ཞི་བདེའི་རྒྱ་མཚོའི་བར་གྱི་ཞི་བདེ་སྲུང་སྐྱོབ་ཤུགས་ཆེ་རུ་གཏང་དགོས་པ་ནི་ཨ་རིའི་བདེ་འཇགས་སྲུང་སྐྱོབ་ལ་ཐད་ཀར་འབྲེལ་བ་ཡོད་པ་དང་། ཨ་རིས་རྒྱ་གར་ལ་ཕྱི་འབྲེལ་དང་དཔལ་འབྱོར། བདེ་འཇགས་སྲུང་སྐྱོབ་བཅས་ཀྱི་འབྲེལ་བ་ཤུགས་ཆེ་རུ་གཏང་རྒྱུའི་ཁྲིམས་འཆར་མཚན་རྟགས་བསྐྱོན་ནས་ཁྲིམས་གཞི་ཆགས་འདུག རྩ་བའི་ Indopacific ས་ཁུལ་ནང་རྒྱ་གར་རྒྱ་མཚོ་དང་ལྷོ་ཕྱོགས་རྒྱ་ནག་རྒྱ་མཚོ་ཐེ་བའི་ནུབ་ཕྱོགས་དང་དབུས་ཕྱོགས་ཞི་བདེ་རྒྱ་མཚོའི་རྒྱལ་ཁབ་ཁག་བཅས་མངའ་ཁུལ་དེའི་ཁོངས་སུ་འཛམ་གླིང་གི་ས་ཁོངས་ཕྱེད་ཀ་ཙམ་དང་འཛམ་གླིང་མི་འབོར་ཁྱོན་བསྡོམས་པའི་ཕྱེད་ཀ་ཙམ་གནས་སྡོད་བྱེད་མུས་ཡིན་པ་མ་ཟད། རྒྱལ་སྤྱིའི་ཚོང་འབྲེལ་གྱི་དངོས་ཟོག་གསུམ་ཆ་གཅིག་ས་ཁུལ་དེའི་བརྒྱུད་ནས་འོར་འདྲེན་བྱེད་ཀྱི་ཡོད་པ་དང་། རྒྱ་གར་རྒྱ་མཚོ་དང་ཞི་བདེ་རྒྱ་མཚོ་བརྒྱུད་ཞི་བདེ་དང་སྲུང་སྐྱོབ་ཤུགས་ཆེ་རུ་གཏང་རྒྱུ་དེ་ཨ་རིའི་བདེ་འཇགས་སྲུང་སྐྱོབ་དང་ཐད་ཀར་འབྲེལ་བ་ཡོད་པར་ངོས་འཛིན་གནང་སྟེ་རྒྱ་གར་དང་ཨ་རི་གཉིས་ཀྱི་ཕྱི་འབྲེལ་ཐབས་བྱུས་དང་དཔལ་འབྱོར། བདེ་འཇགས་སྲུང་སྐྱོབ་བཅས་ཀྱི་ཐོག་ལ་འབྲེལ་ལམ་ཤུགས་ཆེན་པོ་གནང་དགོས་གལ་ཡིན་པར་ངོས་འཛིན་འདུག སྲིད་འཛིན་མཆོག་གི་མཚན་རྟགས་བསྐྱོན་པའི་ཁྲིམས་གཞི་དེའི་བརྒྱུད་ཨ་རིས་རྒྱ་གར་དང་མཉམ་དུ་འབྲེལ་ལམ་ཤུགས་ཆེར་གནང་རྒྱུ་དང་རྒྱ་ནག་གི་ལྷོ་ཕྱོགས་རྒྱ་ནག་རྒྱ་མཚོ། རྒྱ་གར་རྒྱ་མཚོའི་ནང་རྒྱལ་སྤྱིའི་ཁྲིམས་གཞིར་བརྩི་མེད་ཀྱིས་ལག་བསྟར་སྤེལ་མུས་ཁག་མཚམས་འཇོག་དགོས་པ་འཁོད་འདུག ལྷག་པར་དུ་ཁྲིམས་གཞི་ Indo Pacific བརྒྱུད་མང་གཙོ་འཕེལ་རྒྱས་གཏང་རྒྱུ་དང་འབྲེལ་བའི་ནང་གསེས་དོན་ཚན་ཁག་ཏུ་ཨ་རིའི་གཞུང་གི་ངོས་ནས་ཕྱི་ལོ་ ༢༠༡༩ ནས་ ༢༠༢༣ བར་ས་ཁུལ་དེའི་ནང་མང་གཙོ་གོང་འཕེལ་དང་སྤྱི་ཚོགས་སྲ་བརྟན། འགྲོ་བ་མིའི་ཐོབ་ཐང་། ཁྲིམས་ཀྱི་དབང་སྒྱུར། དེ་བཞིན་འགན་ཁུར་བླངས་ནས་ཕྱི་གསལ་ནང་གསལ་ཡོང་བར་ལོ་རེར་ཨ་སྒོར་ས་ཡ་ ༢༡༠ འགྲོ་གྲོན་གཏང་རྒྱུ་ཡིན་པ་དང་། དེའི་ཁོངས་ནས་ཁག་ཅིག་རྒྱ་ནག་ནང་མང་གཙོ་དང་འགྲོ་བ་མིའི་ཐོབ་ཐང་། དེ་བཞིན་ཁྲིམས་ཀྱི་དབང་སྒྱུར་གོང་འཕེལ་གཏང་ཕྱིར་ཨ་རིའི་གཞུང་ནས་ལས་འཆར་ཁག་གི་ཐོག་འགྲོ་གྲོན་གནང་རྒྱུ་ཡིན་པ་དང་། རྒྱ་དཀར་ནག དེ་བཞིན་བལ་ཡུལ་གསུམ་གྱི་ནང་གནས་སྡོད་བོད་མི་ཚོས་ཆོས་དང་རིག་གཞུང་། ཁོར་ཡུག་སྲུང་སྐྱོབ། ཤེས་ཡོན་བཅས་ཀྱི་ཐོག་ཕྱག་ལས་གནང་མཁན་གཞུང་འབྲེལ་མ་ཡིན་པའི་ཚོགས་པ་ཁག་གི་ཐོག་འགྲོ་གྲོན་གཏང་རྒྱུ་ཡིན་པ་མངོན་གསལ་ཐོག་ནས་བོད་ཅེས་གསལ་སྟོན་གནང་བ་འཁོད་ཡོད་པ་རེད། རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རིའི་ཁྲིམས་གཞི་གསར་པའི་སྐོར་གནས་ཚུལ་སྤེལ་བ་དང་སྦྲགས། ཨ་རིའི་གྲོས་ཚོགས་དང་གཞུང་གི་ངོས་ནས་ཁྲིམས་གཞི་གཏན་འབེབས་གནང་བར་དགའ་བསུ་ཞུས་འདུག ལས་འགུལ་ཁང་གི་གཙོ་འཛིན་སྐུ་ཞབས་ Matteo Meccaci ལགས་ཀྱིས་ཁྲིམས་གཞི་དེའི་བརྒྱུད་བོད་དེ་བཞིན་སྟོབས་ཤུགས་ཀྱི་ཆབ་སྲིད་དང་རིག་གཞུང་དབར་ལ་འཐབ་རྩོད་ཀྱི་ས་ཁུལ་ཡིན་པས་ཨ་རིར་གནད་ཆེའི་ས་ཁུལ་ཆགས་ཡོད་པ་མངོན་གསལ་གནང་བ་མ་ཟད་ཁྲིམས་ཀྱི་དབང་སྒྱུར་དང་གཞི་རྩའི་ཐོབ་ཐང་ལ་བརྩི་སྲུང་ཞུས་པའི་བོད་བྱུང་ཚེ་རྒྱ་གར་རྒྱ་མཚོ་དང་ཞི་བདེ་རྒྱ་མཚོའི་ས་ཁུལ་དུ་ཞི་བདེ་བག་ཕེབས་ཡོང་བར་ཕན་ཐོགས་ཆེན་པོ་ཡོང་ངེས་ཡིན་པ་གསུངས་འདུག རྩ་བའི་རེས་གཟའ་ཟླ་བའི་ཉིན་ཨ་རིའི་སྲིད་འཛིན་གྱིས་མཚན་རྟགས་བསྐྱོན་པའི་ཁྲིམས་གཞི་དེ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Cory Gardner ལགས་དང་ Ed Markey ལགས་གཉིས་ཀྱིས་དབུས་པའི་གྲོས་ཚོགས་འཐུས་མི་སྐུ་ཞབས་ Marco Rubio ལགས་དང་ Ben Cardin ལགས་བཅས་ནས་འདི་ལོའི་ཕྱི་ཟླ་ ༤ ནང་ཐོག་མར་ངོ་སྤྲོད་གནང་བའི་ཁྲིམས་གཞི་ཡིན་པ་རེད།

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་སྲིད་འཛིན་ Donal Trump མཆོག་ནས་བོད་ནང་འདྲ་མཉམ་འགྲུལ་བསྐྱོད་ཆོག་པའི་ཁྲིམས་འཆར་ལ་མཚན་རྟགས་བསྐྱོན་ཏེ་དངོས་སུ་ཁྲིམས་ལ་གཏན་འབེབས་གནང་བར་ཐུགས་རྗེ་ཆེ་ཞུས་པ་དང་འབྲེལ། ཁྲིམས་དེའི་ཐོག་ནས་རྒྱ་གཞུང་ལ་ཆབ་སྲིད་ཀྱི་བརྡ་ལན་དང་བོད་མིར་རེ་བའི་བརྡ་ལན་སྤྲད་པ་ཞིག་རེད་ཅེས་གསུངས་འདུག ཁ་སང་ཕྱི་ཟླ་ ༡༢ ཚེས་ ༡༩ དགོང་དྲོར་ཨ་རིའི་སྲིད་འཛིན་ཕོ་བྲང་གིས་སྤྱི་བསྒྲགས་ཤིག་སྤེལ་ཏེ་ཉེ་ཆར་ཨ་རིའི་གྲོས་ཚོགས་གོང་འོག་གཉིས་ནས་ Rciprocal Acess to Tibet Act ཞེས་བོད་ནང་འདྲ་མཉམ་འགྲུལ་བསྐྱོད་ཆོག་པའི་ཁྲིམས་འཆར་སྤྱི་མོས་ཐོག་ནས་གཏན་འབེབས་གནང་བ་དེར་ཨ་རིའི་སྲིད་འཛིན་མཆོག་ནས་རྒྱབ་སྐྱོར་མཚན་རྟགས་བསྐྱོན་ཐོག་དངོས་སུ་ཁྲིམས་ལུགས་ལ་གཏན་འབེབས་གནང་ཡོད་པར་ཡོངས་བསྒྲགས་གནང་ཡོད་པ་རེད། ཁྲིམས་འཆར་དེ་དངོས་སུ་གཏན་འབེབས་བྱུང་རྗེས་དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་བློ་བཟང་སེང་གེ་མཆོག་ནས་བོད་མི་ས་ཡ་དྲུག་གི་སྐུ་ཚབ་གནང་སྟེ་བོད་ཀྱི་བརྙན་འཕྲིན་བརྒྱུད་ཨ་རིའི་གཞུང་ལ་ཐུགས་རྗེ་ཆེ་ཞུའི་འཚམས་འདྲི་གནང་འདུག་པ་དང་། སྲིད་སྐྱོང་མཆོག་གིས་ཁྲིམས་འཆར་དེ་ནི་ལོ་རྒྱུས་རང་བཞིན་ལྡན་པ་དང་བོད་དོན་དང་འབྲེལ་བའི་ཁྲིམས་འཆར་གལ་ཆེ་ཤོས་གཉིས་པ་ཆགས་ཀྱི་ཡོད་པ་ངོ་སྤྲོད་དང་སྦྲགས། ད་ལན་ཁྲིམས་འཆར་དེ་དངོས་སུ་ཁྲིམས་ལ་གཏན་འབེབས་གནང་ཐུབ་པ་དེས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་མཁན་རྒྱ་རིགས་ལས་བྱེད་རྣམས་ལ་རང་གི་ནོར་འཁྲུལ་བྱས་པའི་འགན་དེ་རང་གིས་འཁྱེར་དགོས་པ་ཞིག་བཟོས་པ་མ་ཟད། སྲིད་འཛིན་ Trump མཆོག་གིས་སྣེ་ཁྲིད་གནང་བཞིན་པའི་ད་ལྟའི་ཨ་རིའི་གཞུང་ནས་ཀྱང་བོད་དོན་ལ་རྒྱབ་སྐྱོར་ཡོད་པའི་རྣམ་པ་མངོན་གསལ་གནང་ཡོད་སྟབས། ཁྲིམས་དེ་བརྒྱུད་རྒྱ་གཞུང་ལ་ཆབ་སྲིད་ཀྱི་བརྡ་ལན་ཤུགས་ཆེ་ཞིག་སྤྲད་པ་དང་ཆབས་ཅིག གཞིས་བཞུགས་བོད་མི་རྣམས་ལ་རེ་བའི་བརྡ་ལན་བཟང་པོ་ཞིག་ཀྱང་གནང་ཐུབ་པ་བྱུང་ཡོད་ཅེས་གསུངས་འདུག ཁྲིམས་འཆར་དེ་ཁྲིམས་མཐུན་གཏན་འབེབས་ཡོང་ཐབས་སུ་དངོས་ཤུགས་བརྒྱུད་གསུམ་ནས་ཕྱག་ལས་གནང་མཁན་གཙོ་གྲས་ཁོངས་སུ་ཡོད་པ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ Matteo Mecacci ལགས་ཀྱིས་ད་ལན་ཨ་རིའི་གཞུང་ནས་དོན་ཕན་ལྡན་པ་དང་གསར་གཏོད་རང་བཞིན་ཅན་གྱི་ཁྲིམས་ལུགས་ཤིག་དངོས་སུ་གཏན་འབེབས་གནང་ཐུབ་པ་དེས་རྒྱ་གཞུང་ནས་ད་བར་ཨ་རིའི་མི་སེར་དང་བོད་མི་རྣམས་ལ་དབྱེ་འབྱེད་བྱས་པའི་མཇུག་འབྲས་རྣམས་ད་ཆ་རྒྱ་གཞུང་རང་ཉིད་ཀྱིས་དངོས་སུ་མྱོང་རྒྱུ་ཡིན་པའི་བརྡ་ལན་ཁ་གསལ་ཞིག་གནང་ཡོད་པ་མ་ཟད། རྒྱལ་ཁབ་གཞན་ཚོས་ཀྱང་ལམ་ཁ་དེའི་ཐོག་མདུན་བསྐྱོད་བྱ་རྒྱུར་མེ་ལྕེ་སྤར་ཡོད་པར་ནན་བརྗོད་གནང་འདུག རྩ་བའི་ཁྲིམས་འཆར་དེ་སྤྱི་མོས་ཀྱིས་གཏན་འབེབས་གནང་བར་རྒྱ་གཞུང་གིས་དེར་མཐའ་གཅིག་ཏུ་ངོ་རྒོལ་བྱས་པ་དང་འབྲེལ། ཨ་རིའི་སྲིད་འཛིན་མཆོག་ལ་ཁྲིམས་འཆར་དེར་མཚན་རྟགས་བསྐྱོན་རྒྱུ་མེད་པར་འབོད་སྐུལ་ཞུས་པ་མ་ཟད། ཁྲིམས་འཆར་དེ་དངོས་ཡོད་གནས་སྟངས་དང་མ་འཚམས་པ་དང་ལྷག་དོན་རྒྱ་ནག་ནང་སྲིད་ཀྱི་གནད་དོན་ལ་ཐེ་བྱུས་བྱས་པ་ཞིག་ཡིན་ཚུལ་བརྗོད་དེ་ཨ་རིའི་གཞུང་ལ་སྐྱོན་བརྗོད་ཤུགས་ཆེ་བྱས་པ་ལྟར། རྒྱལ་སྤྱིའི་བོད་དོན་ལས་འགུལ་ཁང་ནས་རྒྱ་གཞུང་གི་འཁྱོག་བཤད་ལ་དགག་པ་གནང་སྟེ་དོན་དངོས་ཐོག་གཞན་གྱི་ནང་སྲིད་ལ་ཐེ་བྱུས་བྱེད་མཁན་ནི་རྒྱ་གཞུང་རང་ཉིད་ཡིན་པར་ནན་བརྗོད་གནང་ཡོད་པ་རེད། རྒྱ་གཞུང་གིས་གནོན་ཤུགས་དང་སྐྱོན་བརྗོད་བྱས་དང་བྱེད་མུས་ལ་ལྟོས་མེད་ཁྲིམས་འཆར་དེར་ཨ་རིའི་གྲོས་ཚོགས་གོང་འོག་གཉིས་ནས་གཏན་འབེབས་གནང་རྗེས་ཁ་སང་ཨ་རིའི་སྲིད་འཛིན་མཆོག་གིས་དངོས་སུ་ཁྲིམས་དེར་མཚན་རྟགས་བསྐྱོན་གནང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་བོད་མི་དང་བོད་དོན་རྒྱབ་སྐྱོར་བ་ཡོངས་ནས་ཨ་རིའི་གྲོས་ཚོགས་འཐུས་མི་གཙོ་གྱུར་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་ཀུན་ལ་འཚམས་འདྲི་དང་ཐུགས་རྗེ་ཞུས་ཡོད་པ་རེད།

ཉེ་སྔོན་ཨ་རིའི་གྲོས་ཚོགས་གོང་འོག་གཉིས་ནས་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་དེ་སྤྱི་མོས་ཀྱིས་གཏན་འབེབས་གནང་བ་དང་འབྲེལ། རྒྱ་གཞུང་གིས་ཨ་རིའི་སྲིད་འཛིན་མཆོག་ལ་ཁྲིམས་འཆར་དེའི་ཐོག་རྒྱབ་སྐྱོར་གྱི་མཚན་རྟགས་བསྐྱོན་རྒྱུ་མེད་པའི་འབོད་སྐུལ་ཞུས་འདུག ཁ་སང་རྒྱ་ནག་གི་ Xinhua གསར་ཁང་གིས་གནས་ཚུལ་སྤེལ་བར་ཁ་སང་ཚེས་ ༡༤ ཉིན་རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ LuKang ཡིས་འཆར་ཅན་གྱི་གསར་འགོད་ལྷན་ཚོགས་ཐོག་ཁྲིམས་འཆར་དེ་དངོས་ཡོད་གནས་སྟངས་དང་མ་འཚམས་པ་མ་ཟད། རྒྱ་ནག་ནང་སྲིད་ཀྱི་གནད་དོན་ལ་ཐེ་བྱུས་དང་རྒྱལ་སྤྱིའི་འབྲེལ་ལམ་གྱི་སྒྲོམ་གཞི་དང་མི་མཐུན་པ་ཞིག་ཡིན་སྟབས། རྒྱ་གཞུང་ནས་བོད་ནང་རང་དབང་འདྲ་མཉམ་འགྲུལ་བཞུད་ཆོག་པའི་ཁྲིམས་འཆར་དེར་མཐའ་གཅིག་ཏུ་ངོ་རྒོལ་ཡོད་པ་ལྟར་ཨ་རིའི་འབྲེལ་ཡོད་ཚོར་བརྡ་ལན་ཁ་གསལ་ཞིག་སྤྲད་ཡོད་པར་བརྗོད་འདུགལྷག་པར་དུ་ LuKang ཡིས་བོད་དང་འབྲེལ་བའི་གནད་དོན་རྣམས་ཐད་ཀར་རྒྱ་ནག་རྒྱལ་ནང་གི་གནད་དོན་དང་འབྲེལ་བ་ཆགས་ཀྱི་ཡོད་སྟབས། དེའི་ཐད་རྒྱལ་ཁབ་སུ་གང་ལའང་ཐེ་བྱུས་བྱ་རྒྱུའི་དབང་ཆ་མེད་པའི་ཉེན་བརྡ་བཏང་བ་མ་ཟད། ཁྲིམས་འཆར་དེ་བརྒྱུད་ནས་རྒྱ་གཞུང་ལ་གཞི་མེད་སྐྱོན་འཛུགས་བྱས་པ་ནི་རྒྱ་ནག་གཞུང་མང་གཉིས་ཀས་ཁས་ལེན་བྱ་ཐབས་བྲལ་སྐོར་བཤད་འདུག དེ་བཞིན་ལུ་ཁང་གིས་ཕྱི་ལོ་ ༢༠༡༥ ལོ་ནས་བཟུང་ད་བར་བོད་ནང་ཨ་རིའི་ཆབ་སྲིད་མི་སྣས་གཙོས་པའི་ཨ་རིའི་མི་སེར་དང་ཕྱི་རྒྱལ་མི་རིགས་བཞི་ཁྲི་ཙམ་ལྟ་སྐོར་དུ་སླེབས་ཡོད་པ་ནི་དངོས་ཡོད་གནས་སྟངས་ཡིན་པ་དང་། ལྷག་དོན་ཕྱི་རྒྱལ་མི་རིགས་རྣམས་ནས་བོད་རང་སྐྱོང་ལྗོངས་ཁུལ་དུ་འགྲོ་རྒྱུའི་འདུན་པ་ཡོད་ཚེ་རྒྱུན་ལྡན་གྱི་ལམ་སྲོལ་ཐོག་ནས་ཆོག་མཆན་ཞུས་ན་འགྲིག་གི་ཡོད་པ་རེད། ཨ་རིའི་གཞུང་ལ་རྒྱལ་ཁབ་གཉིས་ཀྱི་འབྲེལ་བར་དོ་ཕོག་མི་འགྲོ་བའི་སླད་གོང་གི་ཁྲིམས་འཆར་དེ་དངོས་སུ་ཁྲིམས་ལ་གཏན་འབེབས་གནང་རྒྱུ་མེད་པར་འབོད་སྐུལ་ནན་པོ་ཞུས་འདུག ད་ལན་ཨ་མི་རི་ཀའི་གྲོས་ཚོགས་གོང་འོག་གཉིས་ནས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེར་འགག་བྱ་གང་ཡང་མེད་པར་སྤྱི་མོས་ཀྱིས་གཏན་འབེབས་གནང་བར་རྒྱ་ནག་གཞུང་གིས་མི་འདོད་པའི་རྣམ་འགྱུར་སྟོན་ཐོག་ཨ་རིའི་གཞུང་ལ་སྐྱོན་བརྗོད་ཤུགས་ཆེ་བྱས་ཡོད་རེད། རྩ་བའི་ཟླ་ ༡༢ ཚེས་ ༡༡ ཉིན་ཨ་རིའི་གྲོས་ཚོགས་གོང་མའི་འཐུས་མི་ཚོས་སྤྱི་མོས་ཀྱིས་བོད་དུ་རང་དབང་ཐོག་འགྲུལ་བསྐྱོད་ཆོག་པའི་ཁྲིམས་འཆར་གཏན་འབེབས་གནང་ཡོད་པ་དང་། ད་ཆ་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་ནས་ཁྲིམས་འཆར་དེར་མཚན་རྟགས་བསྐྱོན་བསྒྲུབས་ཚེ་དངོས་སུ་ཕྱག་བསྟར་གནང་ཆོག་གི་ཡོད་པ་རེད།

ཁ་སང་ཟླ་ ༡༢ ཚེས་ ༡༡ ཉིན་ཨ་རིའི་གྲོས་ཚོགས་གོང་མའི་འཐུས་མི་ཚོས་སྤྱི་མོས་ཐོག་ནས་བོད་དུ་རང་དབང་ཐོག་འགྲུལ་བསྐྱོད་ཆོག་པའི་ཁྲིམས་འཆར་ Reciprocal Access to Tibet Act ཞེས་པ་གཏན་འབེབས་གནང་འདུག་པ་དང་། ད་ལྟའི་ཆར་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་གིས་ཁྲིམས་འཆར་དེར་མཚན་རྟགས་འགོད་རྒྱུ་ལས་ལྷག་མེད་པ་རེད། ད་རེས་གཏན་འབེབས་གནང་བའི་ Reciprocal access to Tibet act ཞེས་བོད་ནང་འདྲ་མཉམ་འགྲུལ་བསྐྱོད་ཆོག་པའི་ཁྲིམས་འཆར་དེ་ཐོག་མར་ཨ་རིའི་གྲོས་ཚོགས་འཐུས་མི་སྐུ་ཞབས་ Jim McGovern ལགས་དང་ Randy Hultgren ལགས་རྣམ་གཉིས་ནས་ཡུལ་དེའི་གྲོས་ཚོགས་འོག་མ་དང་། གྲོས་ཚོགས་འཐུས་མི་སྐུ་ཞབས་ Marco Rubio ལགས་དང་ Tammy Baldwin ལགས་རྣམ་གཉིས་ནས་གྲོས་ཚོགས་གོང་མ་བཅས་སུ་འགོད་འབུལ་ཞུས་ཡོད་པ་དང་། ཁྲིམས་འཆར་དེ་ཨ་རིའི་ཆབ་སྲིད་ཚོགས་པ་གཉིས་ཀ་ལས་གྲུབ་པའི་གྲོས་ཚོགས་འཐུས་མི་ ༥༡ ལྷག་ནས་རྒྱབ་སྐྱོར་གནང་བ་ཞིག་ཡིན་པ་མ་ཟད། ཁྲིམས་འཆར་དེ་ཉེ་དུས་ཕྱི་ཟླ་ ༩ པའི་ནང་ཨ་མི་རི་ཀའི་གྲོས་ཚོགས་འོག་མའི་ནང་དུའང་མང་མོས་ཀྱིས་གཏན་འབེབས་གནང་རྗེས། ད་རེས་གྲོས་ཚོགས་གོང་མའི་ནང་སྤྱི་མོས་ཀྱིས་གཏན་འབེབས་གནང་ཡོད་པ་རེད། ཁྲིམས་འཆར་དེ་གཏན་འབེབས་བྱུང་མཚམས་སུ་ཁྲིམས་འཆར་དེར་རྒྱབ་སྐྱོར་གནང་མཁན་ཨ་མི་རི་ཀའི་གྲོས་ཚོགས་གོང་མའི་འཐུས་མི་སྐུ་ཞབས་ Robert Menendez ལགས་ནས་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་གཏན་འབེབས་བྱུང་བ་ནི་ཨ་རིའི་དྲང་བདེན་གྱི་རིན་ཐང་མཚོན་པ་ཙམ་མ་ཟད། དེ་སྔ་རྒྱ་ནག་གི་མི་སེར་རྣམས་རང་དབང་ཐོག་ནས་ཨ་རིར་འགྲོ་འོང་བྱེད་བཞིན་ཡོད་ཀྱང་། ཨ་རིའི་མི་སེར་རྣམས་རྒྱ་ནག་སྤྱི་དང་བོད་ཀྱི་ས་ཁུལ་ཁག་ཏུ་རང་དབང་ཐོག་འགྲོ་འོང་གནང་རྒྱུའི་ཐོབ་ཐང་སྤྲད་ཀྱི་མེད་སྟབས། ཁྲིམས་འཆར་དེས་ཨ་མི་རི་ཀའི་མི་སེར་རྣམས་རྒྱ་ནག་དང་བོད་དུ་རང་དབང་འདྲ་མཉམ་ཐོག་ནས་འགྲོ་འོང་གནང་ཐུབ་ཀྱི་རེད་ཅེས་གསུངས་འདུག དེ་བཞིན་ཁྲིམས་འཆར་འདི་གྲོས་ཚོགས་གོང་མའི་ནང་འགོད་འབུལ་ཞུ་མཁན་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ཀྱིས་རྒྱ་ནག་གཞུང་ནས་བོད་ནང་གི་བོད་མི་ཚོར་དམ་དྲག་དང་དྲག་གནོན་རིགས་བྱས་པ་ཙམ་མ་ཟད། དྲག་གནོན་དང་དམ་དྲག་འོག་ཡོད་པའི་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་ཐོག་ལ་ཕྱག་ལས་གནང་མཁན་ཚོ་ལའང་དམ་དྲག་བྱས་ཏེ་ཡུལ་དེའི་ནང་འགྲོ་བསྐྱོད་གནང་རྒྱུའི་ཐོབ་ཐང་སྤྲད་ཀྱི་མེད་པ་སོགས་འགྲེལ་བརྗོད་དང་སྦྲགས། ང་ཚོས་རྒྱ་ནག་གིས་ད་བར་ཨ་རིའི་གསར་འགོད་པ་དང་གཞུང་འབྲེལ་མི་སྣ། དེ་བཞིན་ཨ་རིའི་མི་སེར་ཡིན་པའི་བོད་པ་རྣམས་བོད་ནང་འགྲོ་བསྐྱོད་གནང་རྒྱུར་བཀག་སྡོམ་བྱེད་བཞིན་པའི་བྱ་སྤྱོད་དེ་དག་ངོས་ལེན་གནང་ཐབས་མེད་པ་དང་། ད་རེས་གཏན་འབེབས་ཟིན་པའི་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་དེར་ཨ་རིའི་སྲིད་འཛིན་མཆོག་ནས་གང་མགྱོགས་མཚན་རྟགས་བསྐྱོན་རྗེས་ཨ་རི་དང་རྒྱ་ནག་དབར་གྱི་འབྲེལ་བ་རྣམས་ཀྱང་འདྲ་མཉམ་ལྡན་པ་ཞིག་ཡོང་ངེས་ཡིན་པར་གསུངས་འདུག གཞན་ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་གྲོས་ཚོགས་གོང་འོག་གཉིས་ནས་བོད་དུ་རང་དབང་ཐོག་འགྲུལ་བསྐྱོད་ཆོག་པའི་ཁྲིམས་འཆར་དེར་རྒྱབ་སྐྱོར་གྱིས་གཏན་འབེབས་གནང་བར་ཐུགས་རྗེ་ཆེ་ཞེས་ཞུས་པ་དང་ཆབ་ས་ཅིག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere ལགས་དང་ལས་འགུལ་ཁང་གི་ཚོགས་གཙོ་སྐུ་ཞབས་ Matteo Mecacci ལགས་རྣམ་གཉིས་ཀྱིས་ལམ་སྟོན་འོག་ཞུ་གཏུག་གི་ལས་འགུལ་སྤེལ་བའི་གྲུབ་འབྲས་སུ་ད་རེས་ཁྲིམས་འཆར་དེ་གཏན་འབེབས་བྱུང་བར་འགོ་ལས་ཀུན་ལའང་འཚམས་འདྲི་དང་ཐུགས་རྗེ་ཆེ་ཞེས་གསུངས་འདུག གཞི་རྩའི་བོད་ནང་འདྲ་མཉམ་ཐོག་འགྲུལ་བསྐྱོད་ཆོག་པའི་ཁྲིམས་འཆར་དེ་ཐོག་མར་ཨ་རིའི་གྲོས་ཚོགས་ནང་འགོད་འབུལ་ཟིན་པ་ནས་བཟུང་རྒྱལ་སྤྱིའི་བོད་དོན་ལས་འགུལ་གིས་རྐང་འགན་བཞེས་ཐོག་ཁྲིམས་འཆར་དེར་གྲོས་ཚོགས་འཐུས་མི་རྣམ་པའི་རྒྱབ་སྐྱོར་ཐོབ་ཐབས་སུ་ཞུ་གཏུག་གི་ལས་འགུལ་དང་། ལྷག་པར་དུ་ས་གནས་བོད་མིའི་ཁྲོད་ལ་ཁྲིམས་འཆར་དེའི་གལ་གནད་སོགས་དང་འབྲེལ་བའི་གོ་རྟོགས་ལས་འགུལ་རྒྱ་ཆེ་སྤེལ་ཡོད་པ་རེད།

ཁ་སང་ཟླ་ ༡༢ ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་། ལྷག་པར་དུ་རྒྱལ་ཚོགས་ནས་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་སྤེལ་ཏེ་ལོ་ངོ་ ༧༠ འཁོར་བའི་དུས་ཁྱད་དང་སྟབས་བསྟུན་ཡུ་རོབ་མཐུན་ཚོགས་རྒྱ་ནག་ཐོག་གི་སྐུ་ཚབ་ནས་རྒྱ་ནག་སྤྱི་དང་བོད། ཤིན་ཅང་སོགས་གྲངས་མི་རིགས་ཀྱི་ས་གནས་ཁག་ཏུ་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་ཡོངས་ཁྱབ་བསྒྲགས་གཏམ་ཞིག་སྤེལ་འདུག བསྒྲགས་གཏམ་དེའི་ནང་འདས་པའི་ལོ་དུས་ནང་རྒྱ་ནག་གཞུང་ནས་ཡུལ་དེའི་ནང་གི་དབུལ་ཕོངས་ཉུང་དུ་གཏང་རྒྱུ་དང་མི་མང་གི་འཚོ་གནས། དཔལ་འབྱོར་དང་འབྲེལ་བའི་ལས་གཞིའི་ཐོག་ཕྲན་བུ་ཡར་རྒྱས་ཕྱིན་པའི་རྣམ་པ་ཞིག་ཆེད་བཏོན་ཐུབ་ཡོད་ཀྱང་། རྒྱ་གཞུང་ནས་རང་ཉིད་ཀྱི་རྩ་ཁྲིམས་ནང་གསལ་བའི་འགྲོ་བ་མིའི་ཐོབ་ཐང་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ནང་འཁོད་པའི་གཞི་རྩའི་འགྲོ་བ་མིའི་ཐོབ་ཐང་ཁག་གཞི་རིམ་མང་ཚོགས་ནས་ལོངས་སུ་སྤྱོད་རྒྱུར་བཀག་སྡོམ་བྱེད་བཞིན་ཡོད་སྟབས། གཞི་རིམ་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་དེ་མུ་མཐུད་ཉམས་རྒུད་འགྲོ་བཞིན་འདུག་ཅེས་ཆེས་མངོན་གསལ་གནང་འདུགལོ་རེ་ནས་ལོ་རེ་བཞིན་རྒྱ་གཞུང་གི་བཙོན་ཁང་དུ་ཚེ་བཙོན་དང་སྲོག་ཁྲིམས་ཕོག་པ་སོགས་ཀྱི་ཉེས་ཆད་མྱོང་མཁན་གྱི་གྲངས་འབོར་མང་དུ་འགྲོ་བཞིན་པར་འགྲེལ་བརྗོད་གནང་བ་དང་འབྲེལ་ཏེ། རྒྱ་གཞུང་གིས་ཁྲིམས་ཐོག་གི་གནད་དོན་དེ་དག་ཕྱི་གསལ་ནང་གསལ་བྱེད་དགོས་པ་མ་ཟད། སྲོག་ཁྲིམས་གཅོད་རྒྱུའི་ཉེས་ཆད་དེ་ངེས་པར་དུ་རྩ་མེད་བཟོ་དགོས་སྐོར་གསུངས་འདུག རྒྱ་ནག་གཞུང་གིས་བོད་དང་ཤིན་ཅང་ནང་གི་མང་ཚོགས་ཀྱི་སྨྲ་བརྗོད་དང་ཆོས་དད་རང་དབང་། འདུ་འཛོམས། དེ་བཞིན་འགྲོ་འདུག་སྤྱོད་གསུམ་གྱི་ཐད་མུ་མཐུད་དམ་དྲག་ཤུགས་ཆེ་བྱེད་བཞིན་ཡོད་པ་མ་ཟད་ས་གནས་དེ་དག་ནང་དམིགས་བསལ་གྱི་ལྟ་སྲུང་ལས་གཞི་རྒྱ་སྐྱེད་བརྒྱུད་གཞི་རིམ་མི་མང་དོན་མེད་འཛིན་བཟུང་བཀག་ཉར་བྱས་པའི་གྲངས་འབོར་དེའང་ཇེ་མང་དུ་འགྲོ་བཞིན་པ་སོགས་མངོན་གསལ་གནང་ཡོད་པ་རེད། རྒྱ་ནག་གཞུང་གིས་རྒྱ་ནག་སྤྱི་དང་བོད། ཤིན་ཅང་སོགས་ཀྱི་ནང་འགྲོ་བ་མིའི་ཐོབ་ཐང་ལས་འགུལ་བ་དང་ཁྲིམས་རྩོད་པ། གཞི་རིམ་མང་ཚོགས་བཙོན་འཇུག་མཚམས་འཇོག་དགོས་པ་དང་། རྒྱ་གཞུང་གི་བཙོན་འཇུག་འོག་ཡོད་པ་བོད་ཀྱི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་དང་། ཡུ་གུར་མི་རིགས་ཀྱི་རང་དབང་འཐབ་རྩོད་པ་ Ilham Tohti ལགས། རྒྱ་རིགས་འགྲོ་བ་མིའི་ཐོབ་ཐང་ཁྲིམས་རྩོད་པ་ Wang Quanzhang ལགས་བཅས་ཀྱིས་གཙོས་པའི་ཆབ་སྲིད་བཙོན་པ་རྣམས་གློག་བཀྲོལ་དགོས་པ། ཁོང་རྣམ་པའི་ནང་མི་སྤུན་མཆེད་ཚོར་སུན་གཙེར་རིགས་བཟོ་རྒྱུ་མཚམས་འཇོག་དགོས་སྐོར་གསུངས་འདུག རྒྱ་ནག་གཞུང་ནས་རྒྱལ་སྤྱིའི་གསར་འགོད་པ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམས་རྒྱ་ནག་དང་གྲངས་ཉུང་མི་རིགས་ཀྱི་ས་གནས་ཁག་ཏུ་རང་དབང་ཐོག་འགྲོ་བསྐྱོད་གནང་སྟེ་དངོས་ཡོད་གནས་ཚུལ་མཁོ་སྒྲུབ་གནང་བཅུག་དགོས་པའི་དགོས་འདུན་དང་སྦྲགས། ཡོ་རོབ་མཐུན་ཚོགས་ནས་དུས་རྟག་ཏུ་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ནང་འཁོད་པའི་གཞི་རྩའི་འགྲོ་བ་མིའི་ཐོབ་ཐང་གི་གནད་དོན་ཁག་གཙོ་བཟུང་གནང་ཐོག་རྒྱ་ནག་དང་ལྷན་དུ་ལས་དོན་ཅི་རིགས་མཉམ་ལས་གནང་རྒྱུའི་འདུན་པ་ཆེན་པོ་ཡོད་པ་ལྟར། རྒྱ་ནག་གིས་ཀྱང་རང་ཉིད་ནས་ཁས་ལེན་དང་མཚན་རྟགས་བཀོད་པའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ལ་བརྩི་སྲུང་དང་དོན་འཁྱོལ་གྱི་ལག་བསྟར་བྱེད་དགོས་པ་གསུངས་འདུག དེ་བཞིན་ཁ་སང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་ཨ་རིའི་ནིའུ་ཡོག་དང་ནིའུ་ཇར་སི་ས་གནས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་ཐོག་གྲོང་ཁྱེར་ New York ནང་རྟེན་གཞི་བྱས་པའི་རྒྱལ་སྤྱིའི་མཉམ་འབྲེལ་ཚོགས་ཀྱི་ལས་ཁུངས་ཨ་མའི་མདུན་སར་ས་གནས་གཞོན་ནུའི་རྒྱུན་ལས་དང་བོད་མི་ཁག་གཅིག་ཆེད་འཛོམས་ཐོག་བོད་རྒྱལ་ཁབ་ཆེན་པོའི་རྒྱལ་དར་འཕྱར་ཏེ། བོད་རྒྱལ་གླུ་བླངས་པ་དང་བོད་ལ་རང་དབང་དགོས། བོད་ནང་དམར་གསོད་ཀྱི་ལས་དོན་མཚམས་འཇོག་དགོས་པའི་ངོ་རྒོལ་སྐད་འབོད་གནང་འདུག

འཇར་མ་ནིའི་སྲིད་འཛིན་ཟུར་པ་སྐུ་ཞབས་ Christian Wulff མཆོག་དང་འཇར་མ་ནི་གཞུང་གི་ཁྲིམས་ཞིབ་པ་དང་བློན་ཆེན་ལྕམ་ Katarina Barley མཆོག ཁོར་ཡུག་བློན་ཆེན་ལྕམ་ Svenja Schulze མཆོག དེ་བཞིན་ཚོང་འབྲེལ་དང་འཛུགས་སྐྲུན་བློན་ཆེན་སྐུ་ཞབས་ Gerd Muller མཆོག་བཅས་གནད་ཡོད་མི་སྣ་མང་དག་ཅིག་དབུ་བཞུགས་ཡོད་པའི་མཛད་སྒོའི་ཐོག་ཡུན་རིང་ནས་བོད་དོན་རྒྱབ་སྐྱོར་གནང་མཁན་རྒྱལ་སྤྱིའི་གློག་བརྙན་འཁྲབ་སྟོན་པ་གྲགས་ཅན་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་ Richard Gere ལགས་ལ་ Germany Sustainability Award ཞེས་འཇར་མ་ནི་ཡུལ་དང་ཡུ་རོབ་ཁུལ་གྱི་གཟེངས་རྟགས་གྲགས་ཅན་དེ་འབུལ་བཞེས་གནང་འདུག གཟེངས་རྟགས་འདི་སྐུ་ཞབས་ Richard Gere ལགས་ཀྱིས་རང་ཉིད་ཀྱི་མཚན་སྙན་བེད་སྤྱོད་བརྒྱུད་བོད་མིའི་ཞི་བའི་འཐབ་རྩོད་ལ་རྒྱབ་སྐྱོར་དང་གཉན་ནད་རེག་དུག་གི་ནད་པར་རོགས་སྐྱོར་གྱི་ལས་གཞི་རྒྱ་ཆེ་སྤེལ་བར་ཆེ་བསྟོད་མཚོན་ཕྱིར་ཕུལ་བ་ཞིག་རེད་འདུགཉེ་སྔོན་ཟླ་ ༡༠ པའི་ནང་ German Sustainability གཟེངས་རྟགས་ཐེབས་རྩ་ཚོགས་པའི་དྲ་གནས་ཐོག་ལོ་འདིའི་གཟེངས་རྟགས་བཞེས་མཁན་རྣམས་ཀྱི་མཚན་གཞུང་འདོན་སྤེལ་གནང་བའི་ནང་བོད་དོན་རྒྱབ་སྐྱོར་བ་སྐུ་ཞབས་ Richard Gere ལགས་དང་ Africa ནང་གི་གཞས་མ་གྲགས་ཅན་ Angelique Kidjo ལགས། དེ་བཞིན་ Irish གཞས་པ་གྲགས་ཅན་ Rea Garvey ལགས་བཅས་གསུམ་གྱི་མཚན་བཀོད་གནང་ཡོད་པ་རེད།སྐབས་དེར་ཐེབས་རྩ་ཚོགས་པ་གསར་འཛུགས་གནང་མཁན་སྐུ་ཞབས་ Stefan Hausmann ལགས་ཀྱིས་གཟེངས་རྟགས་དེ་ཐོབ་མཁན་རྣམས་ཉིན་རེའི་བྱེད་སྒོའི་ནང་ Sustainability འམ་འཛམ་གླིང་རྒྱུན་འཛིན་ཐུབ་པར་ཕྱག་ལས་གནང་ཕྱོགས་ཐད་མིག་དཔེ་ལྟ་བུ་ཡིན་པ་དང་། ཁོང་རྣམས་ཀྱིས་རང་ཉིད་ཀྱི་མཚན་སྙན་ཡོད་པ་དེ་སྤྱི་ཚོགས་ལ་ཕན་པ་སྒྲུབ་པར་མེད་དུ་མི་རུང་བ་ཆགས་ཡོད་སྐོར་གསུངས་འདུག རྩ་བའི་ German Sustainability Award ཞེས་པ་དེ་ཕྱི་ལོ་ ༢༠༠༨ ལོར་གསར་འཛུགས་གནང་སྟེ་འདི་ལོ་ཐེངས་ ༡༡ པ་དེ་ཆགས་ཀྱི་ཡོད་པ་རེད། གཙོ་བོ་སྤྱི་ཚོགས་དང་ཁོར་ཡུག་གི་གནད་དོན་ཐད་འགན་ཁུར་གྱི་འདུ་ཤེས་གོང་འཕེལ་གནང་རྒྱུ་དང་དེའི་ཐོག་མིག་དཔེ་སྟོན་མཁན་རྣམས་ལ་ངོས་འཛིན་ཞུ་ཆེད་དུ་དབུ་འཛུགས་གནང་བ་ཞིག་ཡིན་པ་རེད། གཟེངས་རྟགས་དེར་འཇར་མི་ནི་གཞུང་གཙོ་གྱུར་ UNESCO དང་ UNICEF སོགས་གཞུང་འབྲེལ་མ་ཡིན་པའི་ཚོགས་པ་ཆེ་གྲས་འདྲ་མིན་ནས་རྒྱབ་སྐྱོར་ཡོད་པ་ལྟར། ཚོགས་པ་དེས་ལོ་ལྟར་བཞིན་གྲོང་ཁྱེར་དང་ཚོང་ལས་ཁང་། སྒེར་སོགས་གང་རུང་གིས་གོ་ལ་རྒྱུན་གནས་ཐུབ་ཐབས་ཐོག་ཕྱག་ལས་གནང་བར་ངོས་འཛིན་གྱིས་ཆེ་བསྟོད་གཟེངས་རྟགས་འབུལ་བཞེས་གནང་སྲོལ་ཡོད་པ་རེད།