རྒྱལ་སྤྱི།

ཁ་སང་ཟླ་ ༥ ཚེས་ ༢༩ ཉིན་ཨ་རི་གྲོང་ཁྱེར་ལོས་ཨེན་ཇལ་དུ་ཡོད་པའི་རྒྱ་རིགས་མང་གཙོ་དོན་གཉེར་བ་རྣམས་ཀྱིས་ཆེད་འཛུགས་གནང་བའི་ Visual Artists Guild  ཞེས་པའི་མཐུན་ཚོཊ་ཀྱིས་བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་རང་དབང་ཐོབ་པར་ཆེ་བསྟོད་གཟེངས་རྟགས་ཤིག་ཕུལ་འདུག མཐུན་ཚོཊ་དེས་ལོ་ལྟར་དྲུག་བཞི་དོན་རྐྱེན་སྲུང་བརྩི་དང་འབྲེལ་སྨྲ་བརྗོད་རང་དབང་གི་ཐོབ་ཐང་རྩོད་ལེན་པ་རྣམས་ལ་ཆེ་བསྟོད་གཟེངས་རྟགས་འབུལ་ལམ་ཞུ་སྲོལ་ཡོད་པ་ལྟར། འདི་ལོའི་ཐེངས་ ༢༩ པའི་དྲུག་བཞི་དོན་རྐྱེན་སྲུང་བརྩི་དང་བསྟུན་འཇིགས་བྲལ་གློག་བརྙན་བཟོ་སྐྲུན་པ་བོད་མི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་། རྒྱ་རིགས་མང་གཙོའི་ལས་འགུལ་བ་ཀྲང་ལི་ལགས་དང་། རྒྱ་རིགས་ཁྲིམས་རྩོད་པ་ཝང་ཆོན་ཀྲང་གི་བཟའ་ཟླ་ལི་ཝུའེ་ཀྲུ་བཅས་རྒྱ་ནག་གི་བཙོན་ཁང་དུ་དཀའ་སྡུག་དུ་མ་མྱངས་མཐར་རང་དབང་ཐོབ་པ་ཁོང་གསུམ་ལ་སྨྲ་བརྗོད་རང་དབང་གི་ཆེ་བསྟོད་གཟེངས་རྟགས་ཤིག་ཕུལ་ཡོད་པ་རེད། དེ་སྔ་ཕྱི་ལོ་ ༢༠༡༣ ལོར་དོན་གྲུབ་དབང་ཆེན་ལགས་རྒྱ་གཞུང་གིས་བཙོན་འཇུག་འོག་ཏུ་སྡུག་སྦྱོང་མྱོང་བཞིན་སྐབས་ཚོགས་པ་དེས་དོན་གྲུབ་དབང་ཆེན་ལགས་སུ་སྨྲ་བརྗོད་རང་དབང་གི་གཟེངས་རྟགས་ཤིག་ཁོང་གི་སྐུ་ཟླ་ལྷ་མོ་མཚོའི་ཕྱག་ཏུ་ཕུལ་གནང་བ་དེ་མཛད་སྒོའི་ཐོག་ལྷ་མོ་མཚོ་ལགས་ཀྱིས་དོན་གྲུབ་དབང་ཆེན་ལགས་སུ་དངོས་སུ་འབུལ་ལམ་ཞུས་ཡོད་པ་མ་ཟད། དོན་གྲུབ་དབང་ཆེན་ལགས་ནས་བོད་ནང་ཀྱི་དཀའ་སྡུག་དང་འབྲེལ་བའི་གནས་སྟངས་ངོ་སྤྲོད་དང་འཇིགས་བྲལ་གྱི་གློག་བརྙན་གཟིགས་འབུལ་ཞུས་ཡོད་པ་རེད། སྐབས་དེར་ཚོགས་པ་དེའི་གཙོ་འཛིན་རྒྱ་རིགས་སྐུ་ཞབས་ཨེན་ལའོ་ལགས་གཙོས་ཁེ་ལི་ཕོ་ནི་ཡ་བོད་ཀྱི་གྲོགས་པོ་ཚོགས་པའི་ཚོགས་གཙོ། དོན་གྲུབ་དབང་ཆེན་ལགས་ཀྱི་ནང་མིར་རོགས་རམ་གནང་མཁན། ས་གནས་བོད་རིགས་བཅས་ཁྱོན་མི་གྲང་བརྒྱ་ལྷག་འདུ་འཛོམས་གནང་འདུག གཞི་རྩའི་བོད་མི་གློག་བརྙན་བཟོ་བསྐྲུན་པ་དོན་གྲུབ་དབང་ཆེན་ལགས་ཀྱིས་ཕྱི་ལོ་ ༢༠༠༨ ལོར་བོད་ནང་གི་བོད་མི་ཚོར་དངོས་སུ་ཐུག་འཕྲད་ཀྱིས་འཇིགས་བྲལ་ཞེས་པའི་གློག་བརྙན་ཞིག་བཟོ་སྐྲུན་གནང་རྗེས་རྒྱ་ནག་གཞུང་གིས་ཁོང་ལ་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་མིང་འོག་འཛིན་བཟུང་བྱས་ཏེ། ཕྱི་ལོ་ ༢༠༠༨ ནས་ ༢༠༡༤ བར་མི་ལོ་དྲུག་གི་རིང་བཙོན་འཇུག་ཁྲིམས་ཐག་བཅད་ཡོད་པ་དང་། ཕྱི་ལོ་ ༢༠༡༤ ལོ་མཇུག་ཏུ་ཁོང་བཙོན་གྲོལ་ཐོབ་ཡོད་ཀྱང་རྒྱ་གཞུང་གི་ལྟ་སྲུང་འོག་ལོ་གསུམ་རིང་ཆབ་སྲིད་ཀྱི་ཐོབ་ཐང་གང་ཡང་མེད་པར་གནས་དགོས་བྱུང་ཡོད་པ་རེད། ཕྱི་ལོ་ ༢༠༡༧ ཟླ་ ༡༢ ཚེས་ ༢༥ ཉིན་བོད་ནས་བྲོས་བྱོལ་གྱིས་ཨ་རིའི་ California མངའ་སྡེའི་ San Fransicco གྲོང་ཁྱེར་དུ་བདེ་འབྱོར་བྱུང་ཡོད་པ་རེད།

རྒྱ་ནག་ཏུ་གཞུང་འབྲེལ་འཚམས་གཟིགས་གནང་བཞིན་པའི་འཇར་མ་ནི་རྒྱལ་ཁབ་ཀྱི་སྲིད་བློན་ལྕམ་ Angela Merkel མཆོག་ནས་ཡུལ་དེའི་ནང་གི་འགྲོ་བ་མིའི་ཐོབ་ཐང་གི་གནད་དོན་གལ་ཆེ་འཛིན་བཞིན་པ་མངོན་གསལ་གནང་ཆེད་ཟླ་ ༥ ཚེས་ ༢༤ ཉིན་དུས་ཚོད་དམིགས་བསལ་བཀོད་སྒྲིག་མ་གནང་པར་རྒྱ་ནག་གི་བཙོན་ཁང་ཏུ་ཡོད་པའི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་སྐུ་ཞབས་ Wang Quanzhang ལགས་ཀྱི་ལྕམ་ Li Wenzu ལགས་དང་སྐུ་ཞབས་ Yu Wensheng ལགས་ཀྱི་ལྕམ་ Xu Yan ལགས་དང་ཐུག་འཕྲད་གནང་འདུག ཉི་ཧོང་གི་ The Asahi Shimbum གྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། ལྕམ་ Merkel མཆོག་ནས་འགྲོ་བ་མིའི་ཐོབ་ཐང་གི་ཁྲིམས་རྩོད་པའི་བཟའ་ཟླ་རྣམ་གཉིས་དང་མཇལ་འཕྲད་གནང་སྐབས་ཁོང་རྣམ་གཉིས་ནས་ལྕམ་ Merkel མཆོག་ལ་རང་ཉིད་ཀྱི་བཟའ་ཟླ་དང་ནང་མི་རྣམས་ཀྱི་གནས་སྟངས་ཐོག་ཐུགས་སྣང་གནང་བར་ཐུགས་རྗེ་ཆེ་ཞུས་པ་དང་འབྲེལ་རྒྱབ་སྐྱོར་གནང་སྐྱོང་ཡོང་བར་འབོད་སྐུལ་ཞུས་འདུག རྩ་བའི་ལོ་ན་ ༤༢ སོན་པའི་སྐུ་ཞབས་ Wang Quanzhang ལགས་ལ་མཚོན་ན་ཕྱི་ལོ་ ༢༠༡༥ ཟླ་ ༧ པའི་ནང་རྒྱ་གཞུང་གིས་ཡུལ་དེའི་ཁྲིམས་རྩོད་པ་རྣམས་ལ་དྲག་གནོན་ཤུགས་ཆེ་བྱས་པའི་ཁྲོད་རྒྱལ་ཁབ་མགོ་རྟིང་སློག་པའི་ཉེས་མིང་འོག་འཛིན་བཟུང་བྱས་པ་དང་། དེ་བཞིན་ལོ་ན་ ༥༠ ལ་སོན་པའི་སྐུ་ཞབས་ Yu Wensheng ལགས་ནི་ཕྱི་ལོ་ ༢༠༡༨ ཟླ་ ༡ པོའི་ནང་རྒྱ་ནག་ནང་ཆབ་སྲིད་བཅོས་བསྒྱུར་དགོས་པའི་བསྒྲགས་གཏམ་ཞིག་འགྲེམས་སྤེལ་གནང་རྐྱེན་འཛིན་བཟུང་བྱས་པ་དང་ཟླ་ ༤ པའི་ནང་རྒྱལ་ཁབ་མགོ་རྟིང་སློག་རྒྱུའི་དོགས་ཟོན་འོག་འཛིན་བཟུང་བྱས་ཡོད་པ་རེད། ད་རེས་ལྕམ་ Merkel མཆོག་ནས་རྒྱ་རིགས་ཁྲིམས་རྩོད་པ་རྣམ་གཉིས་ཀྱི་བཟའ་ཟླ་དང་ལྷན་ཐུག་འཕྲད་གནང་རྗེས། རྒྱལ་སྤྱིའི་ཁྲོད་དེ་སྔོན་རྒྱ་ནག་གི་དོ་དམ་འོག་འདས་གྲོངས་སུ་གྱུར་བའི་རྒྱ་ནག་གི་འགྲོ་བ་མིའི་ཐོབ་ཐང་གི་ལས་འགུལ་བ་དང་ནོ་སྦེལ་ཞི་བདེ་གཟེངས་རྟགས་བཞེས་མྱོང་མཁན་སྐུ་ཞབས་ Liu Xiaobo ལགས་ཀྱི་བཟའ་ཟླ་ལྕམ་ Liu Xia ལགས་སུ་བྱ་སྤྱོད་ཇི་ལྟར་སྤེལ་ཚུལ་ཐོག་ཐུགས་སྣང་ཆེན་པོ་གནང་གཞི་ཞིག་ཆགས་ཡོད་པ་རེད། གནས་ཚུལ་ཐོན་ཁག་ལ་གཞིགས་ན་ལྕམ་ Liu Xia ལགས་ཀྱི་འཕྲོད་བསྟེན་གྱི་གནས་བབ་ཇེ་སྡུག་ཏུ་ཕྱིན་ཡོད་པ་དང། ཁོང་གིས་རང་ཉིད་འཇར་མ་ནི་ལ་གཞིས་སྤོ་བྱ་རྒྱུའི་མངོན་འདོད་ཡོད་པ་གསལ་བཏོན་གནང་ཡོད་པ་རེད་འདུག གཞི་རྩའི་ལྕམ་ Merkel མཆོག་ནས་དེ་སྔ་རྒྱ་ནག་ཏུ་འཚམས་གཟིགས་སྐབས་ Liu Xia ལགས་དང་ཐུག་འཕྲད་གནང་མྱོང་ཡོད་པ་དང། ཁོང་གིས་ད་རེས་ཀྱི་འཚམས་གཟིགས་དེའི་ཁྲོད་རྒྱ་ནག་གི་སྲིད་འཛིན་ཞི་ཅིང་ཕིང་དང་སྲིད་བློན་ Li Keqiang གཉིས་དང་མཇལ་འཕྲད་གནང་ཡོད་ཀྱང་། Liu Xia ལགས་ཀྱི་གནད་དོན་སྐོར་གླེང་མོལ་གནང་ཡོད་མེད་གསལ་བཏོན་གང་ཡང་གནང་མི་འདུག འོན་ཀྱང་ཟླ་བ་འདིའི་ཚེས་ ༢༤ ཉིན་ཚོགས་པའི་གསར་འགོད་ལྷན་ཚོགས་ཐོག་གསར་འགོད་པས་རྒྱ་ནག་གི་སྲིད་བློན་ Le Keqiang ལ་ Liu Xia ལགས་ཀྱི་གནད་དོན་སྐོར་དྲིས་སྐབས་ Le Keqiang ཡིས་ང་ཚོས་འཇར་མ་ནི་དང་ལྷན་དུ་ཁྲིམས་ཀྱི་ཚད་གཞི་སྒོ་ནས་འགྲོ་བ་མིའི་ཐོབ་ཐང་གི་ལངས་ཕྱོགས་གཞིར་བཟུང་བཀའ་མོལ་གནང་རྒྱུ་དང་འབྲེལ། མི་སྒེར་གྱི་གནད་དོན་ཐོག་ཕན་ཚུན་དབར་གུས་བརྩི་དང་དཔུང་པ་མཉམ་གཤིགས་ཐོག་གྲོས་བསྡུར་ཞུ་རྒྱུ་ཡིན་ཞེས་བཤད་འདུག

ཁ་སང་རྒྱ་ནག་གཞུང་གིས་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་སུ་ལོ་༥ བཙོན་འཇུག་ཁྲིམས་ཐག་བཅད་པ་དེར་འཛམ་གླིང་ཡུལ་གྲུ་གང་སའི་གྲོས་ཚོགས་འཐུས་མི་དང་འགྲོ་བ་མིའི་ཐོབ་ཐང་གི་རྒྱལ་སྤྱིའི་ཚོགས་སྡེ་ཁག་བཅས་ནས་སྐྱོན་བརྗོད་ཤུགས་ཆེ་བྱས་མུས་ཁྲོད། ཨ་རིའི་ཕྱི་སྲིད་ལས་ཁུངས་ནས་རྒྱ་གཞུང་ལ་བཀྲིས་དབང་ཕྱུག་ལགས་འཕྲད་མར་གློད་བཀྲོལ་དགོས་པའི་འབོད་སྐུལ་ཞུས་འདུག དེ་ཡང་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལྕམ་ Heather Nauert ལགས་ཀྱིས་གསར་འགོད་བསྒྲགས་གཏམ་ཞིག་སྤེལ་ནས། བཀྲིས་དབང་ཕྱུག་ལགས་ཀྱིས་རང་གི་སྨྲ་བརྗོད་རང་དབང་ལོངས་སྤྱོད་པའི་ཐོག་རྒྱ་གཞུང་ལ་བོད་ཀྱི་སྐད་ཡིག་ཐོག་ཐུགས་ཁུར་བཞེས་དགོས་པའི་དགོས་འདུན་བཏོན་པ་དེར་ཁ་བྲལ་བའི་ཉེས་མིང་འོག་ལོ་ ༥ ཡི་ཁྲིམས་ཆད་སྐྱེལ་བ་དེར་ཧ་ཅང་བློ་ཕམ་ཡོད་གསུངས་ཏེ། རྒྱ་གཞུང་ལ་བཀྲིས་དབང་ཕྱུག་ལགས་གང་མགྱོགས་གློད་བཀྲོལ་དགོས་པ་དང་ལྷག་དོན་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་སྐད་ཡིག་བཅས་ངེས་པར་སྲུང་སྐྱོབ་བྱ་དགོས་པའི་རེ་འདུན་བཏོན་འདུག བཀྲིས་དབང་ཕྱུག་ལགས་སུ་ལོ་ལྔའི་བཙོན་འཇུག་ཁྲིམས་ཆད་སྐྱེལ་བའི་གནས་ཚུལ་དེ་ཐོན་མ་ཐག་ཁ་སང་ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་Antonio Panzeri ལགས་ནས་ཀྱང་། རྒྱ་གཞུང་གིས་བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས་ལ་དེ་འདྲའི་གདུག་རྩུབ་ཅན་གྱི་ཉེས་ཆད་སྐྱེལ་བ་དེར་ཐུགས་ཚབ་ཡོད་སྐོར་གསུངས་པ་དང་འབྲེལ། ཁོང་གིས་འཐབ་རྩོད་དེ་ནི་རྒྱ་ནག་གི་རྩ་ཁྲིམས་དང་མཐུན་པའི་གཞི་རིམ་འགྲོ་བ་མིའི་ཐོབ་ཐང་གི་ཆ་རྐྱེན་ཞིག་ཡིན་པས་དེར་རྒྱ་གཞུང་ནས་ཁ་བྲལ་གྱི་ཉེས་མིང་འོག་ཁྲིམས་ཐག་དེ་ལྟར་གཅད་རྒྱུ་མེད་པའི་ནན་བརྗོད་གནང་བ་མ་ཟད། ད་རེས་རྒྱ་གཞུང་གིས་བཀྲིས་དབང་ཕྱུག་ལགས་སུ་སྐྱེལ་བའི་ཉེས་ཆད་དེ་ནི་དྲང་བདེན་གྱི་ཐག་གཅོད་ཞིག་གཏན་ནས་ཆགས་ཀྱི་མེད་པ་མངོན་གསལ་གནང་སྟེ། རྒྱ་གཞུང་ངོས་ནས་གཞི་རིམ་གྱི་ལྟ་གྲུབ་ལ་བརྩི་སྲུང་གནང་ཐོག་བཀྲིས་དབང་ཕྱུག་ལགས་ཀྱི་ཁྲིམས་གཏུགས་ཁག་ལ་དྲང་བདེན་དང་ཕྱི་གསལ་ནང་གསལ། དེ་བཞིན་དོན་སྙིང་ལྡན་པ་ཞིག་ཡོང་བར་ཞུ་གཏུགས་རིམ་པའི་སྐབས་བསམ་བཞེས་བྱ་དགོས་པའི་འབོད་སྐུལ་ཞུས་འདུག དེ་དེ་བཞིན་རྒྱལ་སྤྱིའི་ཉེས་ཡང་ཚོགས་པའི་ངོས་ནས་ཀྱང་བཀྲིས་དབང་ཕྱུག་ལགས་ཀྱི་ཁྲིམས་ཆད་དེ་ནི་བསམ་ཡུལ་ལས་འདས་པའི་ཐག་གཅོད་ཞིག་ཡིན་པར་རྒྱ་གཞུང་ལ་ཡོངས་བསྒྲགས་སྐྱོན་བརྗོད་གནང་འདུག རྩ་བའི་འདི་ལོའི་ཕྱི་ཟླ་ ༡ པོའི་ཚེས་ ༤ ཉིན་ཡུ་ཤུ་འབྲིང་རིམ་མི་མང་ཁྲིམས་ཁང་ནང་དུ་བཀྲིས་དབང་ཕྱུག་ལགས་ཀྱི་གྱོད་གཞིའི་ཐད་ཁྲིམས་བཤེར་བྱས་ཡོད་ཀྱང་ཁ་སང་བར་དཔྱད་ཁྲ་གང་ཡང་མ་བཏང་བར་བཞག་ཡོད་པ་རེད། ཁོང་གི་ཁྲིམས་བཤེར་སྐབས་རྒྱ་ནག་རྒྱལ་ས་པེ་ཅིང་དུ་ཡོད་པའི་ཨ་རི་དང་ཁེ་ན་ཌ། ཨིན་ཡུལ། འཇར་མ་ནི། དེ་བཞིན་ཡུ་རོབ་མཐུན་ཚོགས་བཅས་ཀྱི་གཞུང་ཚབ་མི་སྣ་ཡུ་ཤུ་ཁྲིམས་ཁང་དུ་ཆེད་མངགས་བསྐྱོད་ཡོད་ཀྱང། ཁོང་རྣམས་ལ་ཁྲིམས་གཏུགས་སྐབས་ཁྲིམས་ཁང་ནང་བཞུགས་རྒྱུའི་ཆོག་མཆན་སྤྲད་མེད་པ་རེད། ཁ་སང་ཁོང་ལ་ལོ་ལྔའི་བཙོན་འཇུག་ཁྲིམས་ཆད་བཏང་བའི་གནས་ཚུལ་ཐོན་མ་ཐག་འཛམ་གླིང་ཡུལ་གྲུ་གང་སའི་གྲོས་ཚོགས་འཐུས་མི་དང་འགྲོ་བ་མིའི་ཐོབ་ཐང་གི་རྒྱལ་སྤྱིའི་ཚོགས་སྡེ་ཁག་ནས་སྐྱོན་བརྗོད་ཤུགས་ཆེ་བྱེད་མུས་ཡིན་པ་རེད།

ད་རིང་ཐེ་ཝན་གསར་ཁང་ནས་གནས་ཚུལ་སྤེལ་བ་ལྟར་ན། རྒྱ་གཞུང་གིས་གནོན་ཤུགས་འོག་ཐེ་ཝན་གྲོས་ཚོགས་འཐུས་མི་སྐུ་ཞབས་ Freddy lim ལགས་ཀྱི་སྐུ་ཚེའི་ལོ་རྒྱུས་ཁྲོད་ཁོང་གྲགས་ཅན་གྱི་གཞས་པ་ཞིག་ནས་རྒྱལ་ཁབ་ཀྱི་ཁྲིམས་བཟོ་ལྷན་ཚོགས་ཀྱི་ཚོགས་མི་ཞིག་ཏུ་བསྒྱུར་བའི་དངོས་བྱུང་གི་གློག་བརྙན་ Metal politics Taiwan ཅེས་པ་ཡུལ་དེར་གཟིགས་འབུལ་ཞུ་རྒྱུ་དཀའ་ངལ་འཕྲད་འདུག དེ་ཡང་གློག་བརྙན་དེའི་བཀོད་ཁྲིད་པ་སྐུ་ཞབས་ Macro Wilms ལགས་ཀྱིས་སྐུ་ཞབས་ Freddy ལགས་ནི་ཐེ་ཝན་རང་བཙན་དང་བོད་ཀྱི་གནད་དོན་བཅས་གཞི་རྩའི་འགྲོ་བ་མིའི་ཐོབ་ཐང་རྩོད་མཁན་གྱི་ལས་འགུལ་བ་ཞིག་ཡིན་པ་ཟད། རྒྱ་གར་དུ་༸གོང་ས་མཆོག་དང་མཇལ་མོལ་གནང་མྱོང་མཁན་ཞིག་ཡིན་སྟབས་རྒྱ་ནག་གཞུང་གིས་གནོན་ཤུགས་འོག་གློག་བརྙན་བཟོ་ལས་ཁང་གཞན་རྣམས་ནས་གཟིགས་འབུལ་ཞུ་ཐུབ་མེད་པ་ཞིག་ཡིན་པར་བརྗོད་འདུག སྐུ་ཞབས་ Freddy ལགས་ཀྱི་སྐུ་ཚེའི་ལོ་རྒྱུས་དང་འབྲེལ་བའི་དངོས་བྱུང་གློག་བརྙན་དེ་རྒྱ་ནག་གཞུང་གི་གནོན་ཤུགས་འོག་ཐེ་ཝན་གྱི་གློག་བརྙན་བཟོ་ལས་ཁང་གཞན་རྣམས་ཀྱིས་གཟིགས་འབུལ་ཞུ་ཐུབ་མེད་ནའང་ད་རིང་ཕྱི་ཟླ་ ༥ ཚེས་ ༢༡ ཉིན་ཐེ་ཝན་གྱི་རྒྱལ་ས་ Taipei ནང་དུ་ཚོགས་བཞིན་པའི་2018 Urban Nomad film fest གློག་བརྙན་དུས་སྟོན་གྱི་ཐོག་རྒྱ་གཞུང་གིས་གནོན་ཤུགས་ལ་མ་འཛེམས་པར་གློག་བརྙན་དེའི་བཀོད་སྒྲིག་པ་སྐུ་ཞབས་ Macro Wilms ལགས་ནས་ཉིན་གཉིས་ཀྱི་རིང་གཟིགས་འབུལ་ཞུ་རྒྱུ་ཡིན་པ་རེད་འདུག རྩ་བའི་ཐེ་ཝན་གྱི་གཞས་པ་གྲགས་ཅན་གྲོས་ཚོགས་འཐུས་མི་སྐུ་ཞབས་ Freddy lim ལགས་ནི་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་མཁན་ཡིན་པ་མ་ཟད། ད་ཆ་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡང་ཡིན་པ་རེད། སྐུ་ཞབས་ Freddy ལགས་ནི་བོད་ཀྱི་རྩ་དོན་ལ་དོན་གཉེར་ཆེན་པོ་གནང་མཁན་ཞིག་ཡིན་པ་དང་། ༸གོང་ས་མཆོག་དང་མཇལ་འཕྲད་ཐེངས་ཁ་ཤས་གནང་མྱོང་ཡོད་པ་རེད།

སུད་སི་ཇི་ནི་ཝ་གྲོང་ཁྱེར་ནང་མི་རིགས་དབྱེ་འབྱེད་ཀྱི་རྣམ་པ་འདྲ་མིན་རྩ་འགོག་དང་འབྲེལ་བའི་ལྷན་ཚོགས་ཐེངས་༩༥ སྐོང་ཚོགས་གནང་བ་དང་འབྲེལ་བལ་ཡུལ་ནང་གི་བོད་མིའི་གནས་སྟངས་ཐོག་སེམས་འཚབ་གནང་འདུག དེ་ཡང་རྒྱལ་ཚོགས་ཀྱི་མི་རིགས་དབྱེ་འབྱེད་རྩ་འགོག་དང་འབྲེལ་བའི་ལྷན་ཚོགས་དེ་བཞིན་ཟླ་བ་སྔོན་མའི་ཚེས་༢༣ ནས་ཕྱི་ཟླ་༥ཚེས་༡༡ བར་ཁྱོན་ཉིན་གྲངས་༢༠རིང་ཚོགས་འདུག་པ་དང་སྐབས་དེར་ཚོགས་མི་གྲངས་བཅོ་བརྒྱད་ལས་གྲུབ་པའི་རྒྱལ་ཚོགས་ཀྱི་མི་རིགས་དབྱེ་འབྱེད་ཚོགས་ཆུང་ནས་བལ་ཡུལ་དང་Mauritania དང་ Kyrgyzstan དེ་བཞིན་ Peru དང་ Saudi Arabia གཞན་ཡང་ Sweden བཅས་རྒྱལ་ཁབ་ཁག་ཅིག་གི་སྐྱབས་བཅོལ་གནས་སྟངས་ཀྱི་སྙན་ཐོར་ཞིབ་འཇུག་བྱས་ཡོད་པའི་ཁྲོད། བལ་ཡུལ་ནང་གི་སྐྱབས་བཅོལ་བོད་མིའི་གནས་སྟངས་ཐོག་སེམས་འཚབ་ཀྱིས་ཡུལ་དེའི་སྲིད་གཞུང་ངོས་ནས་རྒྱལ་ཚོགས་ཀྱི་གཏན་འབེབས་གནང་བའི་སྐྱབས་བཅོལ་བའི་འབྲུ་དོན་ཁག་ལ་བརྩི་བཀུར་ཞུས་ཐོག་བལ་ཡུལ་ནང་ཡོད་པའི་བོད་མི་རྣམས་ཀྱི་གནས་སྟངས་ཡར་རྒྱས་དང་ཁོང་རྣམ་པར་ཁྲིམས་མཐུན་གྱི་ཡིག་ཆ་སྤྲོད་དགོས་པ་མ་ཟད། བོད་མི་སྐྱབས་བཅོལ་བ་རྣམས་སྲུང་སྐྱོབ་བྱེད་དགོས་པའི་སྲིད་བྱུས་གཏན་འབེབས་གནང་དགོས་པའི་འབོད་སྐུལ་ཞུས་འདུག

རྒྱ་གར་གྱི་རྒྱལ་ས་ལྡི་ལིའི་ནང་རྒྱལ་ཁབ་བཅུ་གཉིས་ཙམ་གྱི་ཚོགས་མི་ལྷན་ཞུགས་ཐོག་ནས་ཨེ་ཤི་ཡའི་ནང་རང་དབང་དང་མང་གཙོ་ཞི་བདེ་བཅས་གོང་འཕེལ་ཡོང་ཐབས་ཀྱི་རྒྱལ་སྤྱིའི་རང་བཞིན་ལྡན་པའི་ལྷན་ཚོགས་ཞིག་དེ་རིང་ནས་དབུ་འཛུགས་གནང་སོང་བ་དང་། ལྡི་ལི་གསར་པའི་ IIC རྒྱལ་སྤྱིའི་ལྟེ་གནས་ཁང་དུ་ཚོགས་བཞིན་པའི་རྒྱལ་སྤྱའི་ལྷན་ཚོགས་དེ་བོད་ཀྱི་གཞོན་ནུ་ལྷན་ཚོགས་ནས་གོ་སྒྲིག་ཞུས་པ་ཞིག་རེད་འདུག ཐེངས་འདིའི་ལྷན་ཚོགས་ནང་ཨེ་ཤི་ཡའི་ཁུལ་གྱི་ཐེ་ཝན་དང་། ནང་སོག ཧོང་ཀོང་། ཝིཏྲ་ནམ། འབར་མ། ཐའི་ལེནཊ། ལྷོ་ཀོ་རི་ཡ། ཕི་ལི་པིན། ཉི་ཧོང་། བལ་ཡུལ་དང་། རྒྱ་གར། བོད་བཅས་ཀྱི་རྒྱལ་ཁབ་སོ་སོའི་ཚོགས་མི་ཁག་གཅིག་ནས་ལྷན་ཞུགས་གནང་འདུག་པ་མ་ཟད། ཚོགས་བཅར་བ་དེ་དག་ཕལ་ཆེ་བ་རྒྱུན་ལྡན་མི་མང་དཀྱུས་མའི་བདེ་དོན་དང་ཐད་ཀར་འབྲེལ་བ་ཡོད་པའི་ཆབ་སྲིད་ཀྱི་ལས་འགུལ་བ་དང་། ཁྲིམས་རྩོད་པ། གསར་འགོད་པ་དང། མཁས་དབང་སོགས་རེད་འདུག བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་བསྟན་འཛིན་འཇིགས་མེད་ལགས་ཀྱིས་འགྲེལ་བརྗོད་ག ནང་བ་ལྟར་ན། ད་རེས་ཀྱི་རྒྱལ་སྤྱིའི་རང་བཞིན་ལྡན་པའི་ལྷན་ཚོགས་དེ་སྐབས་ ༤༥ པའི་གཞོན་ནུའི་འགན་འཛིན་ལྷན་ཚོགས་ཀྱི་གྲོས་ཆོད་གཞི་བཟུང་གི་གོ་སྒྲིག་ཞུས་པའི་རྒྱལ་སྤྱིའི་ལྷན་ཚོགས་ཞིག་ཡིན་ནའང་། ད་རེས་ཀྱི་ལྷན་ཚོགས་དེའི་བརྒྱུད་བོད་ཀྱི་གཞོན་ནུ་ལྷན་ཚོགས་ངོས་ནས་ཨེ་ཤི་ཡའི་རྒྱལ་ཁབ་ཚོར་རྒྱ་ནག་ཕྱོགས་ནས་སྤྲོད་བཞིན་པའི་དཀའ་ངལ་ཁག་ལ་མཉམ་རུབ་ཀྱི་ནུས་པའི་ཐོག་ནས་གདོང་ལེན་བྱེད་ཕྱོགས་ཀྱི་གྲོས་བསྡུར་གནང་རྒྱུ་ཡིན་པ་སོགས་ཀྱི་འགྲེལ་བརྗོད་གནང་གི་འདུག

ཨ་རི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་དེ་རིང་ Access Denied: Chinas enforced isolation of Tibet, and the case for reciprocity ཞེས་པའི་སྙན་ཐོ་ཞིག་འདོན་སྤེལ་གནང་བའི་ནང་རྒྱ་གཞུང་གིས་རྒྱལ་སྤྱིའི་གཞུང་ཚོགས་ཁག་དང་གསར་འགོད་མི་སྣ་བོད་དུ་བསྐྱོད་རྒྱུར་དམ་དྲག་གིས་བོད་དེ་བཙན་དབང་ཐོག་ཕྱི་ལ་སྒོ་མོ་བརྒྱབ་ནས་བཞག་ཡོད་པ་ཐེར་བཏོན་དང་སྦྲགས། རྒྱལ་སྤྱིའི་གཞུང་ཚོགས་ཁག་གི་ངོས་ནས་བོད་ཐོག་ལངས་ཕྱོགས་ཤུགས་ཆེ་རུ་འཛིན་ནས་རྒྱ་ནག་ཐོག་ Reciprocity འམ་ཕན་ཚུན་འགྲུལ་བསྐྱོད་རང་དབང་གཅིག་མཚུངས་སྤྲོད་དགོས་པའི་གནད་དོན་ཐད་ལ་གནོན་ཤུགས་སྤྲོད་དགོས་པ་གསུངས་འདུག རྒྱལ་སྤྱིའི་བོད་དོན་ལས་འགུལ་ཁང་གི་ Access Denied ཞེས་པའི་ཤོག་གྲངས་ ༥༠ ཅན་གྱི་སྙན་ཐོ་འདོན་སྤེལ་གནང་བའི་ནང་ཉེ་ཆར་ལོ་འདིའི་ཕྱི་ཟླ་ ༢ པའི་ནང་བོད་མིའི་ལོ་གསར་གྱི་དུས་ཚིགས་དང་བསྟུན། ཨ་རིའི་ NewYorkTimes གསར་ཁང་གི་གསར་འགོད་པ་གཉིས་བོད་ཤར་ཕྱོགས་ཁུལ་རྫོང་གསར་དགོན་པར་བོད་མིའི་ལོ་གསར་གཏོང་སྲོལ་སྐོར་གནས་ཚུལ་སྤེལ་བར་བསྐྱོད་སྐབས་རྒྱ་གཞུང་གི་ཉེན་རྟོག་མི་སྣས་ཁོང་གཉིས་ལ་འདྲི་རྩད་ཆེད་བཙན་ཁྲིད་བྱས་རྗེས་ཆུ་ཚོད་ ༡༧ རིང་བཀག་ཉར་བྱས་ཡོད་པའི་གནད་དོན་མངོན་གསལ་དང་སྦྲགས། དེས་རྒྱ་གཞུང་གིས་བོད་ཐོག་དམ་དྲག་ཇི་ཙམ་བྱེད་བཞིན་ཡོད་པ་དང་། རྒྱལ་སྤྱིའི་ཁྲོད་བོད་ཀྱི་གནད་དོན་སྐོར་རྒྱ་ནག་གཞུང་གིས་གང་བཤད་པ་དེར་ངོས་ལེན་ཐོབ་ཐབས་ཀྱི་སྲིད་བྱུས་ཅི་འདྲ་ཞིག་སྤེལ་མུས་ཡིན་པའི་དཔེ་ཚོན་གསར་ཤོས་ཤིག་ཡིན་པ་གསུངས་འདུག དེ་བཞིན་ཕྱི་ལོ་ ༢༠༠༨ ལོར་བོད་མིའི་ས་བྱི་ཞི་རྒོལ་ཆེན་མོའི་སྒེར་ལངས་ཀྱི་གནད་དོན་བྱུང་རྗེས་རྒྱ་གཞུང་གིས་སྟངས་འཛིན་ནན་པོའི་འོག་རྒྱལ་སྤྱིའི་གཞུང་ཚོགས་ཁག་དང་གསར་འགོད་མི་སྣ་ཁག་ཅིག་བོད་ཀྱི་རྒྱལ་ས་ལྷ་ས་དང་། ལ་ལ་ཞིག་མདོ་སྨད་བླ་བྲང་བཀྲིས་འཁྱིལ་དུ་བསྐྱོད་བཅུག་ནས་རྒྱ་ནག་གཞུང་འབྲེལ་བརྒྱུད་ལམ་ཐོག་གནས་ཚུལ་སྤེལ་ཐོག་བོད་ནང་བོད་མི་རེ་བཟུང་གིས་ཟིང་འཕྲུག་བླངས་པ་མ་གཏོགས་གནས་སྟངས་ཞི་འཇམ་ཡོད་པ་དང། བོད་མི་རྣམས་བདེ་སྐྱིད་ཀྱི་ཚོར་བར་རོལ་བཞིན་པའི་རྣམ་པ་གསལ་ཐབས་ཀྱི་ཐབས་བྱུས་སྤེལ་ཡོད་པ་དེ་ལྟར་ཡང་། སྐབས་དེར་ལྷ་སའི་ཇོ་ཁང་དང་། བླ་བྲང་བཀྲིས་འཁྱིལ་དུ་དགེ་འདུན་པ་ཁག་ཅིག་གིས་རྒྱལ་སྤྱིའི་གསར་འགོད་པའི་མདུན་སར་རྒྱ་གཞུང་གི་རྫུན་གཏམ་ར་སྤྲོད་བྱེད་དེ་བོད་ནང་བོད་མིར་རང་དབང་མེད་པ་དང་། བོད་མི་དམར་གསོད་གཏོང་བཞིན་པའི་དངོས་ཡོད་གནས་སྟངས་བཤད་རྐྱེན་རྒྱ་གཞུང་གིས་ཕྱི་ལོ་ ༢༠༡༣ བར་བོད་ནང་རྒྱལ་སྤྱིའི་གཞུང་ཚོགས་ཁག་དང་གསར་འགོད་པ་བསྐྱོད་རྒྱུར་བཀག་སྡོམ་བྱས་པ་མ་ཟད། ཕྱི་ལོ་ ༢༠༡༣ ལོ་ནས་བཟུང་སླར་རྒྱ་གཞུང་གིས་རྒྱལ་སྤྱིའི་མི་སྣ་དང་གསར་འགོད་པ་རེ་བཟུང་བོད་ནང་བསྐྱོད་བཅུག་ནས་བོད་ནང་གི་གནས་སྟངས་བཟང་པོ་ཡོད་པ་མངོན་ཐབས་བྱེད་བཞིན་པ་དེས་འཁྱོག་བཤད་སྤེལ་རྒྱུའི་ལག་ཆ་ལྟ་བུར་བེད་སྤྱོད་གཏོང་མུས་ཡིན་པ་མངོན་གསལ་གནང་འདུག ལྷག་པར་དུ་ཞི་ཅིང་ཕིང་གིས་སྣེ་ཁྲིད་འོག་རྒྱ་ནག་དེ་རྒྱལ་སྤྱིའི་སྟོབས་ཤུགས་ཅན་ཞིག་ཏུ་འགྱུར་རྒྱུའི་སྲིད་བྱུས་འོག་རྒྱ་ནག་ཙམ་མ་ཟད་ཕྱི་ཕྱོགས་ཀྱི་བརྒྱུད་ལམ་ཁག་ཏུའང་རྒྱ་ནག་གི་འཁྱོག་བཤད་དྲིལ་བསྒྲགས་སྤེལ་ཤུགས་ཆེ་རུ་བཏང་ནས་རྒྱལ་སྤྱིའི་ཁྲོད་རྒྱ་ནག་གཞུང་གིས་གང་བཤད་པ་དེར་ངོས་ལེན་ཐོབ་ཐབས་བྱེད་བཞིན་སྐོར་ཐེར་བཏོན་དང་འབྲེལ། རྒྱ་གཞུང་གིས་ཕྱིའི་རྣམ་པར་བོད་དེ་སྒོ་མོ་ཕྱེ་ནས་བཞག་ཡོད་པ་ཆེད་བཏོན་སླད་ཡིན་པ་གསུངས་འདུག ལྷག་དོན་བོད་རང་སྐྱོང་ལྗོངས་ཀྱི་རྒྱ་ནག་ལས་བྱེད་གཙོས་པའི་རྒྱ་ནག་གི་དཔོན་རིགས་མང་དག་ཞིག་ཕྱིའི་རྒྱལ་ཁབ་ནང་དུ་ཆེད་གཏོང་གིས་འཁྱོག་བཤད་དེ་དག་མེད་པ་བཟོ་ཐབས་ཡིན་པར་གསལ་བཏོན་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་སྐུ་ཞབས་ Matteo Meccaci ལགས་ཀྱིས་རྒྱ་ནག་གི་དཔོན་རིགས་རྣམས་ནུབ་ཕྱོགས་མང་གཙོའི་རྒྱལ་ཁབ་ཁག་ཏུ་བསྐྱོད་པ་དེ་རྒྱ་ནག་གི་འཁྱོག་བཤད་སྤེལ་བར་དམ་དྲག་རིགས་དམིགས་བསལ་གང་ཡང་བྱེད་ཀྱི་མེད་པ་དེ་ལྟར་ཡང་། རྒྱ་གཞུང་གི་འགོ་ཁྲིད་རྣམས་ནས་རྒྱལ་སྤྱིའི་རྟོག་ཞིབ་མི་སྣ་དང་གསར་འགོད་པ་རེ་བཟུང་གཞུང་གི་སྟངས་འཛིན་ནན་པོའི་འོག་བོད་ནང་བསྐྱོད་མ་བཅུག་པ་མ་གཏོགས་རང་དབང་ལྡན་པའི་རྟོག་ཞིབ་མི་སྣ་བོད་དུ་བསྐྱོད་བཅུག་གི་མེད་པའི་ཁྲོད། བོད་དེ་དོན་དངོས་ཐོག་ཕྱི་ལ་སྒོ་མོ་བརྒྱབ་ནས་ཁེར་རྐྱང་བཞག་ཐབས་བྱེད་བཞིན་ཡོད་སྟབས། དེང་སྐབས་ཨེ་ཤ་ཡའི་གླིང་ཆེན་གྱི་ཕྱི་ཕྱོགས་ལའང་རྒྱ་ནག་གི་དཔལ་འབྱོར་དང་དམག་གི་སྟོབས་ཤུགས་འཕེལ་རྒྱས་ལ་གདོང་ལེན་གནང་བཞིན་པའི་ཨ་རི་གཙོས་པའི་རྒྱལ་སྤྱིའི་སྤྱི་ཚོགས་ལ་རྒྱ་ནག་ཐོག་འགྲོ་བ་མིའི་ཐོབ་ཐང་གི་གནད་དོན་ལ་ཨ་རི་དང་རྒྱལ་སྤྱིའི་སྤྱི་ཚོགས་ཀྱི་ལངས་ཕྱོགས་དང་མཐུན་པ་གནང་དགོས་པའི་གནོན་ཤུགས་སྤྲད་རྒྱུ་དེ་བས་གལ་ཆེ་བ་ཆགས་ཡོད་པ་དང་། ལྷག་པར་དུ་བོད་ཀྱི་ས་ཁམས་དང་ཆབ་སྲིད་ཀྱི་གནད་འགག་ལ་གཞིགས་པའི་རྒྱལ་སྤྱིའི་ཆབ་སྲིད་ཁྲོད་བོད་ཐོག་དོ་སྣང་ཆེ་བ་བྱེད་དགོས་ངེས་ཡིན་པའི་དུས་ཚིགས་དང་བསྟུན། ཉེ་ཆར་ཕ་རན་སི་དང་འཇར་མ་ནི་སོགས་ཡུ་རོབ་རྒྱལ་ཁབ་ཁག་ཅིག་གི་འགོ་ཁྲིད་རྣམས་ནས་རྒྱ་ནག་ལ་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ནང་སོ་སོའི་གཞུང་འབྲེལ་མི་སྣ་ཕར་ཚུར་འགྲུལ་བསྐྱོད་སོགས་ཀྱི་རང་དབང་འདྲ་མཉམ་ཡོད་པ་མ་གཏོགས་དེ་མིན་འབྲེལ་ལམ་བཞག་རྒྱུ་ཁག་པོ་ཡིན་པའི་ཁ་གསལ་འགྲེལ་བརྗོད་གནང་བཞིན་ཡོད་པ་དང་། ཨ་རི་གཞུང་གི་ངོས་ནས་ཀྱང་རྒྱ་ནག་ལ་ཕན་ཚུན་གཞུང་འབྲེལ་མི་སྣ་འགྲུལ་བསྐྱོད་ཀྱི་རང་དབང་གཅིག་མཚུངས་སྤྲོད་དགོས་པ་དང་། དེ་ལྟར་མ་སྤྲད་ཚེ་ཨ་རིའི་མི་སྣ་བོད་ནང་བསྐྱོད་རྒྱུར་དམ་དྲག་བྱེད་མཁན་རྒྱ་ནག་གི་དཔོན་རིགས་ཚོ་ལའང་དེ་མཚུངས་དམ་དྲག་བྱེད་དགོས་པའི་རེ་འབོད་གནང་འདུག

དེ་རིང་ཟླ་ ༥ ཚེས་ ༨ ཉིན་མོ་འདི་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་ཀྱི་སྐྱེས་སྐར་ཉིན་མོ་དང་བསྟུན་རྒྱལ་སྤྱིའི་ཉེས་ཡངས་ཚོགས་པས་རྒྱ་ནག་གཞུང་ལ་བོད་མིའི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་ལ་ཆ་རྐྱེན་གང་ཡང་མེད་པར་འཕྲལ་མར་གློད་བཀྲོལ་དགོས་པ་གསུངས་འདུག ཁ་སང་ཟླ་ ༥ ཚེས་ ༧ ཉིན་རྒྱལ་སྤྱིའི་ཉེས་ཡངས་ཚོགས་པའི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། བཀྲ་ཤིས་དབང་ཕྱུག་ལགས་རྒྱ་གཞུང་གིས་བཙོན་འཇུག་འོག་ད་རེས་སྐྱེས་སྐར་གྱི་ཉིན་མོ་ཐེངས་གསུམ་པ་དེ་འཁེལ་གྱི་ཡོད་པ་དང་བསྟུན། ཁོང་གིས་རྒྱ་གཞུང་གི་རྩ་ཁྲིམས་ནང་འཁོད་པའི་རང་མི་རིགས་ཀྱི་སྐད་ཡིག་རང་དབང་རྩོད་པར་རྒྱལ་ཁབ་ཀྱི་ཁ་བྲལ་བརྒྱུད་སྐུལ་བྱས་པའི་ནག་ཉེས་འོག་ལོ་གཉིས་ལྷག་བཙོན་འཇུག་བྱས་མཐར་འདི་ལོ་ཁྲིམས་གཏུགས་བྱས་ཟིན་ཡོད་ནའང་། ཁྲིམས་ཁང་ནས་དཔྱད་ཁྲ་གང་ཡང་བཏང་མེད་སྟབས་དེ་མུར་ལྷག་ཡོད་པ་དང་། ནག་ཉེས་དེའི་འོག་ཁོང་ལ་ལོ་ ༡༥ འི་བར་བཙོན་འཇུག་ཁྲིམས་ཆད་ཕོག་ཉེན་ཡོད་པའི་གནད་དོན་ལུང་འདྲེན་དང་སྦྲགས། བཀྲ་ཤིས་དབང་ཕྱུག་ལགས་འཛིན་བཟུང་བྱས་པ་དེས་བོད་མི་གཞན་ཚོར་རང་མི་རིགས་ཀྱི་སྐད་ཡིག་དང་རིག་གཞུང་། དེ་བཞིན་མི་རིགས་ཀྱི་ངོ་བོ་བཅས་འཐབ་རྩོད་ལ་བཀག་སྡོམ་བྱེད་ཐུབ་ཐབས་མེད་པ་དང་། རྒྱ་ནག་གཞུང་གིས་རྒྱལ་ཁབ་དང་མི་རིགས་ཆིག་སྒྲིལ་གྱི་སྲིད་བྱུས་ལ་ཁ་དཀྲིས་ཏེ་གྲངས་ཉུང་མི་རིགས་ཀྱི་བུ་ཕྲུག་རྣམས་ལ་བཙན་དབང་གིས་རྒྱ་སྐད་སློབ་རྒྱུའི་སྲིད་བྱུས་དེ་མཚམས་འཇོག་བྱེད་དགོས་པ་དང་། བཀྲ་ཤིས་དབང་ཕྱུག་ལགས་ལ་ཆ་རྐྱེན་གང་ཡང་མེད་པར་འཕྲལ་མར་གློད་བཀྲོལ་དགོས་པ་གསུངས་འདུག རྒྱལ་སྤྱིའི་ཉེས་ཡངས་ཚོགས་པས་བཀྲིས་དབང་ཕྱུག་ལགས་ཀྱི་གནད་དོན་ཞིབ་ཕྲ་ངོ་སྤྲོད་དང་སྦྲགས། རྒྱ་གཞུང་གིས་ Neidixizang ཞེས་པའི་ལས་གཞིའི་འོག་ལོ་ལྟར་བོད་ནང་གི་ལོ་ན་ ༡༡ ནས་ ༡༥ བར་གྱི་བོད་ཕྲུག་སློབ་མ་ཆིག་སྟོང་ལྷག་རྒྱ་ནག་གི་རྒྱལ་ས་པེ་ཅིང་གི་སློབ་གྲྭ་ཁག་ཏུ་བཙན་དབང་གིས་བསྐྱོད་བཅུག་པ་དང་། དེ་དག་ལ་རྒྱ་སྐད་གཙོ་བོ་བྱས་ནས་རྒྱ་ནག་གི་རྒྱལ་ཁབ་དང་རྒྱ་ནག་གི་རིག་གཞུང་། དེ་བཞིན་དམར་ཤོག་ཚོགས་པའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་སོགས་ཀྱི་སྐོར་སློབ་ཁྲིད་བྱ་རྒྱུའི་ལས་གཞི་ཁྲོད་བོད་ཕྲུག་རྣམས་ལ་བོད་ཀྱི་རིག་གཞུང་དང་རང་མི་རིགས་ཀྱི་ངོ་བོ་ལས་ཐག་རིང་དུ་གཏོང་ཐབས་བྱེད་བཞིན་པ་མ་ཟད་བོད་ནང་ཟུར་དུ་བོད་ཡིག་སློབ་སྦྱོང་གནང་ས་ཆེད་འཛུགས་གནང་མཁན་རྣམས་ལ་ཁ་བྲལ་གྱི་ཉེས་མིང་འོག་ཁྲིམས་ཆད་གཏོང་བཞིན་ཡོད་པ་སོགས་ཀྱི་གནད་དོན་མངོན་གསལ་གནང་འདུག རྩ་བའི་བཀྲིས་དབང་ཕྱུག་ལགས་ཀྱི་གནད་དོན་ཐོག་བོད་མི་དང་བོད་དོན་རྒྱབ་སྐྱོར་བ། དེ་བཞིན་མཉམ་འབྲེལ་རྒྱལ་ཚོགས་ཀྱིས་དབུས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་གིས་རྒྱ་གཞུང་ལ་སྐྱོན་བརྗོད་ཤུགས་ཆེ་བྱས་པ་མ་ཟད། བཀྲིས་དབང་ཕྱུག་ལགས་ཀྱིས་རྒྱ་ནག་གི་ཁྲིམས་དང་མཐུན་པའི་ཐོག་ནས་རང་མི་རིགས་ཀྱི་སྐད་ཡིག་ཐོག་འཐབ་རྩོད་གནང་བ་དེ་ནག་ཉེས་གང་ཡང་བསགས་མེད་སྟབས་ཁོང་འཕྲལ་དུ་གློད་བཀྲོལ་དགོས་པའི་འབོད་སྐུལ་རིམ་པ་གནང་ཡོད་པའི་ཁྲོད། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚན་པ་འདྲ་མིན་དྲུག་གི་མི་སྣས་ཡོངས་ཁྱབ་སྤྱི་བསྒྲགས་ཤིག་སྤེལ་བའི་ཐོག་བཀྲ་ཤིས་དབང་ཕྱུག་ལགས་སུ་ཉེས་འཛུགས་གནང་བ་ཁག་ཕྱིར་འཐེན་དགོས་སྐོར་གསུངས་པ་དང་འབྲེལ། རྒྱལ་སྤྱིའི་ཁྲིམས་ལུགས་དང་མཐུན་པའི་ཐོག་ནས་གློད་བཀྲོལ་གནང་དགོས་པའི་འབོད་སྐུལ་ཞུས་ཡོད་པ་རེད།

ཨ་རིའི་གྲོས་ཚོགས་གོང་མའི་ནང་མང་མོས་ཐོག་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་རྒྱུའི་སྲོལ་རྒྱུན་ལམ་ལུགས་ལ་རྒྱབ་སྐྱོར་གྱི་གྲོས་ཆོད་ཞིག་འཇོག་པ་དང་འབྲེལ་ཏེ་བོད་མི་ཚོར་རང་ཉིད་ཀྱི་ཆོས་ཕྱོགས་ཀྱི་དབུ་ཁྲིད་ངོས་འཛིན་ཞུ་རྒྱུའི་ཐོབ་ཐང་ཡོད་པ་ལས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཞུང་ཕྱོགས་ནས་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་གནང་སྒོ་ཐོག་ཐེ་བྱུས་བྱེད་བཞིན་པ་ནི་ནོར་འཁྲུལ་ཞིག་རེད་ཅེས་གསུངས་འདུག གྲོས་ཆོད་དེ་ནི་ཁ་སང་ཚེས་ ༢༥ ཉིན་མོ་སྟེ་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༢༩ ལ་ཕེབས་པའི་༸སྐུའི་འཁྲུངས་སྐར་དུས་ཚིགས་དང་བསྟུན། ཨ་རིའི་གྲོས་ཚོགས་འཐུས་མི་སྐུ་ཞབས་ Partrick leahy ལགས་ཀྱིས་ཁོང་གི་ཕྱག་རོགས་གྲོས་ཚོགས་འཐུས་མི་ Feinstein ལགས་ Curz ལགས། དེ་བཞིན་ Rubio ལགས་བཅས་ཀྱི་སྐུ་ཚབ་གནང་ནས་ངོ་སྤྲོད་གནང་འདུག བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། ད་ལན་ཨ་རིའི་གྲོས་ཚོགས་གོང་མའི་ནང་འཇོག་གནང་བའི་བོད་བརྒྱུད་ནང་བསྟན་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་ཀྱི་གྲོས་ཆོད་དེ་ནི་ཨ་རིའི་གྲོས་ཚོགས་ནས་བོད་མི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་ཐད་ལ་གྲོས་ཆོད་འཇོག་པ་ཆེས་ཐོག་མ་ཆགས་ཀྱི་འདུག་པ་དང་། ཨ་རིའི་གྲོས་ཚོགས་སུ་འཇོག་པའི་གྲོས་ཆོད་དེ་གཙོ་བོ་དེ་སྔ་ཕྱི་ལོ་ ༢༠༡༡ ལོར་༸གོང་ས་༸སྐྱབས་མགོན་ཆེན་པོ་མཆོག་གིས་༸སྐུའི་ཡང་སྲིད་སྐོར་བསྩལ་བའི་ཡོངས་ཁྱབ་བསྒྲགས་གཏམ་ལུང་འདྲེན་གནང་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་མགོན་པོ་༸གང་ཉིད་མཆོག་མ་འོངས་པར་༸རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་བླ་ཆེན་ཁག་དང༌། བོད་མི་གཙོས་པའི་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གནང་སྟེ་༸རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་ཀྱིས་ཐུགས་ཐག་གཅད་གནང་འཆར་ཡོད་པ་དང།  གལ་ཏེ་༸རྒྱལ་དབང་སྐུ་ཕྲེང་རྒྱུན་མཐུད་དགོས་པ་དང༌སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་གནང་དགོས་པའི་དུས་སྐབས་ཤིག་ཤར་ཚེ་དེའི་གནང་སྒོ་ཁག་གི་འགན་ཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་ལས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པ་གཙོས་པའི་སྲིད་དབང་འཛིན་པ་སུ་ཞིག་ནས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་གནང་མི་དགོས་པ་ཡིད་འཇགས་དགོས་པ་སོགས་བཀའ་བསྩལ་ཡོད་པ་རེད། ད་རེས་ཨ་རིའི་གྲོས་ཚོགས་སུ་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་ངོས་འཛིན་ཞུ་ཕྱོགས་ཀྱི་གྲོས་ཆོད་དེ་ལྟ་བུ་འཇོག་ཐུབ་པར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་འབྲེལ་ཡོད་གྲོས་ཚོགས་འཐུས་མི་རྣམ་པར་ཐུགས་རྗེ་ཆེ་ཞུས་པ་དང་འབྲེལ། གྲོས་ཆོད་དེ་ནི་བོད་མིའི་རང་དབང་དང་ཐོབ་ཐང་ལ་རྒྱབ་སྐྱོར་གྱི་རྣམ་པ་ཤུགས་ཆེ་མཚོན་གྱི་ཡོད་པ་མ་ཟད། གྲོས་ཆོད་དེའི་བརྒྱུད་རྒྱ་གཞུང་ལ་རྒྱ་ནག་གཙོས་པའི་རྒྱལ་སྤྱིའི་སྤྱི་ཚོགས་ལ་མིག་དཔེ་ཞིག་དང་བརྡ་ལན་ཤུགས་ཆེ་སྤྲད་ཡོད་པ་གསུངས་འདུག ལྷག་དོན་ཨ་རིའི་གྲོས་ཆོད་དེའི་ནང་ད་དུང་བོད་མིའི་གཞི་རྩའི་ཐོབ་ཐང་དང་རང་དབང་ལ་རྒྱབ་སྐྱོར་གནང་བ་དང་འབྲེལ། རྒྱ་ནག་ཏུ་ཡོད་པའི་ཨ་རིའི་གཞུང་ཚབ་པའི་ངོས་ནས་རྒྱ་གཞུང་གི་བཙོན་འཇུག་འོག་ཡོད་པའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་མཇལ་འཕྲད་ཞུ་དགོས་པའང་གསུངས་ཡོད་པ་རེད།