གསར་འགྱུར།

སུད་སི་ནང་གནས་སྡོད་རང་ལོ་ ༤༥ སོན་པའི་ཚེ་རིང་དབང་འདུས་ལགས་ཀྱིས་རྒྱབ་ཏུ་ཉལ་ཆས་བླུགས་པའི་ལྟོ་ཆས་དང་ལག་ཏུ་བོད་རྒྱལ་ཁབ་ཆེན་པོའི་རྒྱལ་དར། དེ་བཞིན་རྒྱབ་ཏུ་འཛམ་གླིང་གཞུང་མང་ནས་རྒྱ་ནག་གི་དངོས་ཟོག་ཉོ་ཚོང་མཚམས་འཇོག་དགོས་ཞེས་འབོད་ཚིག་འཁོད་པའི་ཤོག་སྦྱང་འཕྱང་ནས་སུད་སི་ནང་བོད་དོན་ཞི་བའི་གོམ་བགྲོད་གནང་བཞིན་འདུག ཚེ་རིང་དབང་འདུས་ལགས་ཀྱིས་སུད་སི་ནང་བོད་དོན་ཞི་བའི་གོམ་བགྲོད་ལས་འགུལ་དེ་ཟླ་བ་འདིའི་ཚེས་ ༢༧ ཉིན་རེས་གཟའ་ལྷག་པ་དང་བསྟུན་རང་ཉིད་ཀྱི་གནས་ཡུལ་སུད་སི་ས་གནས་ Winterthur ནས་དབུ་འཛུགས་གནང་འདུག་ཅིང་། ལས་འགུལ་དེ་གཙོ་བོ་ཉེ་བའི་ཆར་རྒྱ་ནག་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཁྱབ་གདལ་དང་རྒྱ་གཞུང་གིས་རྫུན་བཟོ་ཧམ་བཤད་ཁྲོད་འཛམ་གླིང་མང་ཚོགས་ཧ་ཅང་མང་པོའི་ཚེ་སྲོག་ཤོར་བཞིན་པའི་གཉན་འཕྲང་གི་དུས་སྐབས་འདིར་འཛམ་གླིང་གཞུང་མང་ལ་རྒྱ་གཞུང་གིས་གདོང་རིས་ངོ་མ་གསལ་བཏོན་དང་། དེ་ལྟ་བུའི་ནག་ཉེས་ཀྱི་འགན་ཡོངས་རྫོགས་རྒྱ་ནག་གཞུང་ནས་འཁྱེར་བཅུག་དགོས་པ། ཕྱིའི་རྒྱལ་ཁབ་ཀྱི་གཞུང་མང་ལ་རྒྱ་ནག་གི་དངོས་ཟོག་ཉེ་ཚོང་མཚམས་འཇོག་དང་རྒྱ་གཞུང་དང་འབྲེལ་ཐག་གཅོད་རོགས་ཞེས་ཞུ་འབོད་གནང་རྒྱུ་མ་ཟད། ལྷག་དོན་ས་གནས་མང་ཚོགས་ཁྲོད་ལ་བོད་ནང་གི་བོད་མིའི་རང་དབང་གི་གནས་སྟངས་གཙོས་པའི་དངོས་ཡོད་གནས་ཚུལ་ཁག་ངོ་སྤྲོད་གནང་རྒྱུ་བཅས་ལ་ཆེད་དམིགས་ཀྱིས་ཐེངས་འདིའི་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་ཡོད་པ་རེད་འདུགསྤྱིར་སུད་སི་ནང་དུ་གནས་སྡོད་བོད་དོན་ཞི་བའི་གོམ་བགྲོད་ལས་འགུལ་སྤེལ་མཁན་བོད་མི་ཚེ་རིང་དབང་འདུས་ལགས་ཆ་མཚོན་ན་ཐེངས་འདིའི་ཞི་བའི་གོམ་བགྲོད་ཀྱི་ལས་འགུལ་སྤེལ་བ་ཙམ་མ་ཟད་དེ་སྔོན་ཁོང་ནས་སུད་སི་གྲོང་ཁྱེར་ཛུ་རིག་ནས་འཇར་མི་ནི་གྲོང་ཁྱེར་ Frankfurt བར་བོད་རང་དབང་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་བ་དང་། དེ་བཞིན་སུད་སི་རྒྱལ་ས་ bern ནས་ཇི་ནི་ཝ་བར་གྱི་བོད་དོན་གོམ་བགྲོད་ལས་འགུལ་བཅས་ཀྱི་ནང་མཉམ་ཞུགས་གནང་མྱོང་ཡོད་པ་ཞིག་ཡིན་པ་རེད།ལས་འགུལ་དེ་བརྒྱུད་ནས་སུད་སི་དང་རྒྱལ་སྤྱིའི་གཞུང་མང་ནས་ད་བར་རྒྱ་ནག་ལས་ཁྱབ་གདལ་བྱུང་བའི་ནད་ཡམས་རྐྱེན་པས་ད་བར་རྒྱལ་སྤྱིའི་ཁྲོད་མང་ཚོགས་དུ་མའི་ཚེ་སྲོག་ཤོར་དང་ཤོར་མུས་ཡིན་པ་ལྟར། སུད་སི་གཞུང་མང་ཚོས་ཀྱང་རྒྱ་ནག་གི་དངོས་ཟོག་ཉེ་ཚོང་གནང་རྒྱུ་མེད་པ་དང་ལྷག་དོན་རྒྱ་གཞུང་གིས་རྒྱ་ནག་ཝུ་ཧན་ནས་ཁྱབ་གདལ་སོང་བའི་ཏོག་དབྱིབས་གཉན་རིམས་རྐྱེན་པས་གོ་ལའི་ཁྱོན་ཡོངས་སུ་འགྲོ་བ་མི་སྟོང་ཕྲག་མང་པོའི་ཚེ་ཤོར་བའི་འགན་ཡོངས་རྫོགས་རྒྱ་གཞུང་རང་ནས་འཁུར་འཇུག་དགོས་ཞེས་འབོད་སྐུལ་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ནས་དབུ་འཛུགས་ཀྱིས་ཉིན་གཉིས་ཀྱི་རིང་ལ་བསྐྱང་རྒྱུའི་འཕགས་པ་ཐུགས་རྗེ་ཆེན་པོའི་དབང་ཆེན་གྱི་བཀའ་དབང་སྟ་གོན་དབུ་འཛུགས་དང་འབྲེལ། འཕགས་པ་ཐུགས་རྗེ་ཆེན་པོའི་བཀའ་དབང་འདི་འཐོབ་རྒྱུ་ཡོད་ཅེས་བཀའ་བསྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ནང་གི་དད་ལྡན་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་འདེབས་དོན་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༥ ཚེས་ ༢༩ ཉིན་འཕགས་པ་ཐུགས་རྗེ་ཆེན་པོའི་དབང་ཆེན་གྱི་སྟ་གོན་བཀའ་དྲིན་དབུ་འཛུགས་མཛད་པའི་སྐབས་དྲྭ་ཐོག་ནས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་དགའ་ལྡན་ཁྲི་ཟུར་རིན་པོ་ཆེ་མཆོག དེ་བཞིན་ཤར་བྱང་ཆོས་རྗེ་རིན་པོ་ཆེ་རྣམ་གཉིས་མཆོག་དང་དགོན་སྡེ་གྲྭ་ཚང་ཁག་གི་མཁན་བླ་སྤྲུལ་རྣམ་པ་བཅས། གཞན་ཡང་ཕྱི་ནང་གི་དད་ལྡན་སེར་སྐྱ་མང་ཚོགས་ཁྲི་ཚོ་བརྒལ་བས་བཀའ་དབང་ཞུས་ཡོད་པ་རེད།འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཎ་དྲལ་རྟེན་གསུམ་འདེགས་འབུལ་ཞུས་ཡོད་པ་རེད།སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་ཆོས་ཞུ་བ་ཚོར་དད་དམ་གཡོ་བ་མེད་པར་དྲྭ་ཐོག་བརྒྱུད་དེ་འཕགས་པ་ཐུགས་རྗེ་ཆེན་པོའི་བཀའ་དབང་ཞུ་ཚེ་དེ་ལྟར་འཐོབ་རྒྱུ་ཡོད་པ་དང་དེ་མིན་རྣལ་འབྱོར་བླ་མེད་ཀྱི་བཀའ་དབང་དེ་དག་དམིགས་བསལ་ཡིན་སྐོར་ལམ་སྟོན་བསྩལ་སོང་།དེ་བཞིན་༸གོང་ས་མཆོག་གིས་མགོན་པོ་༸གང་ཉིད་མཆོག་གིས་༸སྐུའི་ཐུགས་བསྐྱེད་དམ་བཅའ་བཞི་པོ་ངོ་སྤྲོད་མཛད་དེ་དང་པོ་འགྲོ་བ་མི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པར་བཀའ་བསྩལ་བ་དང་འབྲེལ་ནས་ཨ་རིའི་མི་ནི་སོ་ཊའི་ནང་ཉེན་རྟོག་པས་མི་རིགས་དཀར་ནག་དབྱེ་འབྱེད་ཀྱིས་མི་རིགས་ནག་པོར་གཉའ་གནོན་ཚད་མེད་གཏོང་བཞིན་པའི་བརྙན་པར་གཟིགས་སྐོར་དང་འབྲེལ་ཏེ་དེ་ལྟར་མི་རིགས་དཀར་ནག་དང་ཆོས་ལུགས་ཀྱི་འཐེན་འཁྱེར་བྱེད་རྒྱུ་མེད་པར་ལམ་སྟོན་མཛད་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་འཕགས་པ་སྤྱན་རས་གཟིགས་དང་བོད་གངས་ཅན་ལྗོངས་ཀྱི་བོད་མིའི་དབར་ཐུན་མོང་མ་ཡིན་པའི་ལས་ཀྱི་འབྲེལ་བ་ཡོད་སྐོར་བཀའ་བསྩལ་བ་དང་འབྲེལ། བོད་ལ་དུས་ལོག་བྱུང་སྐབས་ཇོ་བོ་ཝ་ཏི་བཟང་པོ་བལ་ཡུལ་ནས་དྷ་སར་གདན་ཞུ་གནང་ཡོད་པ་ལྟར། འཕགས་པ་ཝ་ཏི་བཟང་པོ་ནི་འཕགས་པ་སྤྱན་རས་གཟིགས་ཀྱི་སྣང་བརྙན་ཐུན་མིན་ཞིག་ཡིན་སྐོར་བཀའ་བསྩལ་བ་དང་ཆབས་ཅིག་ཏུ་འདས་པའི་ལོ་ངོ་ ༦༠ ནང་ཇོ་བོ་ཝ་ཏི་བཟང་པོའི་དཀོན་གཉེར་དེ་མགོན་པོ་༸གང་ཉིད་མཆོག་གིས་མཛད་སྐོར་བཀའ་བསྩལ་དང་། ༸གོང་ས་མཆོག་ནས་ཉིན་ལྟར་ཇོ་བོ་ཝ་ཏི་བཟང་པོའི་སྐུ་མདུན་དུ་ཐུགས་སྨོན་མཛད་སྐབས་ཞལ་རས་ལ་འགྱུར་བ་འགྲོ་བར་གཟིགས་ཚུལ་བྱུང་ཞེས་བཀའ་བསྩལ་བ་མ་ཟད། ལྷག་དོན་མགོན་པོ་༸གང་ཉིད་མཆོག་ནི་འཕགས་པ་སྤྱན་རས་གཟིགས་ཀྱི་མགྲོན་གཉེར་ཞིག་ཡིན་ཞེས་བཀའ་བསྩལ་ཡོད།༸གོང་ས་མཆོག་གི་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བསྩལ་གྲུབ་པའི་རྗེས་སུ་ཆོས་ཞུ་བ་ཚོར་དགེ་བསྙེན་དང་བྱང་ཆུབ་སེམས་པའི་སྡོམ་པ་འབོག་ཆོག་བསྩལ་བ་དང་འབྲེལ། རང་དོན་དང་གཞན་དོན། འཕྲལ་གྱི་ཚོགས་བསགས་སྒྲིབ་བྱང་། དེ་བཞིན་སེམས་ལ་སྤོབས་པ་དང་སྤྲོ་བ་འཕེལ་བར་ཧ་ཅང་གི་གནད་འགག་ཆེན་པོ་ཡིན་པས་བྱང་ཆུབ་ཀྱི་སེམས་ལས་ལྷག་པ་མེད་ཅེས་ལམ་སྟོན་མཛད་ཡོད།ལྷག་དོན་དེ་རིང་གི་ཆོས་འབྲེལ་མཇུག་ཏུ་༸གོང་ས་མཆོག་གིས་ཁྱེད་རང་ཚོས་དོ་ནུབ་རྨི་ལམ་བརྟག་དགོས་པར་བརྟེན་ཁྱེད་རང་ཚོ་མ་ཉལ་གོང་ལ་འཕགས་པ་སྤྱན་རས་གཟིགས་ཀྱི་མཚན་སྔགས་མ་ཎི་ཡིག་དྲུག་དང་རྟ་མགྲིན་གཟུངས་སྔགས། དེ་བཞིན་སྟོང་པ་ཉིད་ཀྱི་ལྟ་བར་བསམ་བློ་གཏོང་དགོས་ཞེས་བཀའ་ནན་བསྩལ་བ་དང་། ཆབས་ཅིག་ཏུ་ཐུགས་བརྩེ་ཆེན་པོས་ཁྱེད་རང་ཚོ་བློ་བདེ་པོ་བྱོས་ཨ་ཞེས་བཀའ་བསྩལ་ཡོད།གཞི་རྩའི་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་འདེབས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྩེ་ཆེན་པོའི་ཐོག་ནས་དེ་རིང་ཕྱི་ཚེས་ ༢༩ ཉིན་བཀའ་དབང་གི་སྟ་གོན་དང་སང་ཚེས་ ༣༠ ཉིན་དྲྭ་ལམ་ཐད་གཏོང་བརྒྱུད་བཀའ་དབང་གི་དངོས་གཞི་བཅས་བཀའ་ཆོས་དེ་བོད་དབྱིན་རྒྱ་གསུམ་གྱིས་སྐད་ཡིག་གཙོས་པའི་ཁྱོན་སྐད་རིགས་འདྲ་མིན་བཅུ་བཞིའི་ཐོག་གསུང་སྒྱུར་གནང་གི་ཡོད་པ་དང་། དེ་རིང་བཀའ་དབང་གི་སྟ་གོན་སྐབས་ཕྱི་ནང་གི་དད་ལྡན་མང་ཚོགས་ས་ཡ་གཅིག་དང་འབུམ་བདུན་ལྷག་གིས་གསན་གཟིགས་དང་བཀའ་དབང་ཞུས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་སྒེར་ཡིག་ཚང་༸དཔལ་ལྡན་དགའ་ལྡན་ཕོ་བྲང་གིས་དྲྭ་ལམ་ནས་དབང་བསྐུར་ཐོབ་མིན་དང་བརྒྱུད་པར་སེལ་ཞུགས་མིན། གསང་སྔགས་ཁྲོམ་བསྒྲགས་རུང་མིན་སོགས་དང་འབྲེལ་བའི་གསལ་བཤད་སྤེལ་འདུགདེའང་བར་སྐབས་འཇིག་རྟེན་ཁྱོན་ཡོངས་སུ་རིམས་ནད་ཀྱི་དབང་གིས་འདུ་འཛོམས་བྱེད་ཐབས་མེད་སྟབས་དད་ལྡན་མང་པོས་དྲྭ་ལམ་བརྒྱུད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཞལ་མཇལ་གསུང་ཐོས་དང་། འཕགས་མཆོག་ཐུགས་རྗེ་ཆེན་པོའི་བཀའ་དབང་གནང་སྩོལ་ཡོང་བའི་གསོལ་འདེབས་ནན་ཞུའི་ངོར་ཞལ་བཞེས་བཀའ་དྲིན་ཐོབ་པ་དེ་ལྟར་ཡང་། དྲྭ་ལམ་ནས་དབང་བསྐུར་ཐོབ་མིན་དང་། བརྒྱུད་པར་སེལ་ཞུགས་མིན། གསང་སྔགས་ཁྲོམ་བསྒྲགས་རུང་མིན་སོགས་དྭོགས་འདྲི་སྣ་ཚོགས་ཤིག་འདུག་པར་གསལ་བཤད་མདོར་བསྡུས་ཤིག་ཞུ་རྒྱུར། སྤྱིར་གནའ་བོའི་དུས་སུ་མིག་དང་རྣ་བའི་མངོན་ཤེས་ཐོབ་པའི་གང་ཟག་རྣམས་ཀྱིས་གྲངས་མེད་འཇིག་རྟེན་ཁམས་ཀྱི་ཕ་རོལ་ནས་ཆོས་འཆད་ཉན་དང་། དེ་ལ་བརྟེན་ནས་ས་ལམ་གྱི་འབྲས་བུ་བརྙེས་པའི་བྱུང་བ་མདོ་ལས་གསལ་བར་གསུངས་པ་དེ་དག་སྒྲ་ཇི་བཞིན་པར་ཀུན་གྱིས་འདོད་བཞིན་པ་ལྟར། དེང་རབས་འཕྲུལ་ལས་དྲྭ་རྒྱ་དང་བརྙན་འཕྲིན་སོགས་ཀྱང་རང་བྱུང་འབྱུང་ཁམས་ལ་གནས་པའི་རྫས་ནུས་སྦྱོར་སྤྱད་ལས་བྱུང་བས། དེ་ལ་བརྟེན་པའི་མཐོང་ཐོས་ཀྱི་ཤེས་པའང་བསླུ་མེད་ཚད་མའི་བློར་འདོད་པ་ལ་སྐྱོན་གང་ཡང་མེད་པས་དྲྭ་ལམ་བརྒྱུད་ཆོས་བཀའ་སྩལ་རིགས་སློབ་མས་ཐོབ་མིན་ལ་དྭོགས་པ་བྱེད་དགོས་མ་མཆིས། སྤྱིར་རྒྱུད་སྡེ་དང་འཕགས་བོད་ཀྱི་དཀྱིལ་ཆོག་དགོངས་འགྲེལ་ཚད་མ་རྣམས་ནས་དབང་གི་རྣམ་གཞག་སྐོར། གང་གིས་དབང་སྐུར་བ་རྡོ་རྗེ་སློབ་དཔོན་གྱི་མཚན་ཉིད། གང་དུ་དབང་བསྐུར་བ་དཀྱིལ་འཁོར་གྱི་རྣམ་གཞག གང་ལ་དབང་བསྐུར་བའི་སློབ་མའི་མཚན་ཉིད། གང་སྐུར་བའི་དབང་གི་ཆོ་གའི་རིམ་པ་བཅས་ཆེས་ཞིབ་པར་གསུངས་ཡོད། དེ་དག་ལས་སློབ་དཔོན་དང་སློབ་མ་མཚམས་གཅིག་ཏུ་ཡོད་དགོས་པར་གསུངས་པ་གཅིག་ཀྱང་མི་སྣང་། དབང་གི་དགོས་པ་ནི་སློབ་མའི་རྒྱུད་ལ་སྐུ་བཞིའི་ས་བོན་ཐེབས་ངེས་སུ་འཇོག་ཅིང་། ཡི་དམ་དེ་དང་དེའི་བསྙེན་སྒྲུབ་ལས་གསུམ་ལ་དབང་བར་བྱས་པ་ཡིན་ཞིང་། དབང་གི་ངོ་བོ་ནི་རྒྱུད་སྡེ་རང་རང་གི་ལམ་དང་མཐུན་པའི་རྟོགས་པའི་ཡོན་ཏན་ཁྱད་པར་བ་རེ་རྒྱུད་ལ་མ་མཐར་ཡང་མོས་པ་ཡིད་བྱེད་ཀྱི་ཚུལ་དུ་བསྐྱེད་པར་བྱེད་པ་དེ་ཡིན་ལ། དེ་ཡང་སློབ་དཔོན་གྱིས་ཆོ་གའི་ཚིག་རིས་ལྟར་བརྡ་ལེགས་པར་སྤྲད་པ་ན། སློབ་མས་དེ་བཞིན་དམིགས་རྣམ་བསྐྱངས་ཏེ་དྲི་མ་གང་དག་པ་དང་། ནུས་པ་གང་འཇོག་པ། ལམ་གང་བསྒོམ་པ་ལ་དབང་བར་བྱས་པ་རྣམས་ཡིད་ལ་གསལ་ངེས་བྱུང་ན་དབང་ངེས་པར་དུ་ཐོབ། དབང་རྫས་བུམ་ཆུ་སོགས་ནི་དབང་གི་ངོ་བོ་དེ་དག་བསྐྱེད་པའི་གྲོགས་སུ་གྱུར་པ་ལས་མེད་མི་རུང་གི་རྒྱུ་མིན། ཉན་ཐོས་ཀྱི་ཐེག་པར་ལུང་འབོགས་པ་གཙོ་བོ་ཡིན་ཞིང་། དེ་ལའང་འདུལ་བ་ལུང་གཞིར། ལུང་ནོད་པར་སློབ་མ་ཐོས་པའི་ཉེ་སྐོར་ལས་མཐོང་བའི་ཉེ་སྐོར་དུ་ཡོད་དགོས་པར་མ་གསུངས། སྤྱིར་དམ་ཆོས་འདུལ་བའི་ལས་ཀྱི་ཆོ་ག་རྣམས་མངོན་སུམ་དུ་དགོས་པ་ཤ་སྟག་ཡིན་མོད། དགག་དགོས་ཁྱད་པར་བའི་དབང་གིས་བུ་མོ་ཆོས་སྦྱིན་མ་སྟོན་པ་རང་ཉིད་ཀྱིས་འཕྲིན་གྱི་སྒོ་ནས་ད་ཆོག་ཉེས་མེད་ཕུན་ཚོགས་ཀྱིས་བསྙེན་པར་རྫོགས་པར་མཛད་ཡོད། མདོ་དཀོན་བརྩེགས་ལས་སངས་རྒྱས་ཀྱིས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་སངས་རྒྱས་ཀྱི་གསུང་དབྱངས་ཀྱིས་གོ་བར་མཛད་དེ་’ཆོས་སྟོན་ནས་འབྲས་བུ་ལ་བཀོད་པར་གསུངས་ཤིང་། བྱང་སེམས་ཀྱི་སྡོམ་པ་ཡང་རྟེན་གྱི་དྲུང་ནས་ཐོབ་པ་ཀུན་ལ་གྲགས་ཤིང་གྲུབ་པ་ལྟར་རོ།། སྔགས་ཀྱི་ཐེག་པར་ཆོས་ཀྱི་ཆེ་བ་འདོན་སླད་སྐབས་རེ་སློབ་མའི་གྲངས་བཅད་གནང་བ་དང་། ཡང་སྐབས་རེ་ཁྲོམ་དབང་གི་ཕྱག་སྲོལ་སྔར་ནས་ཡོད་དེ། ཤམ་བྷ་ལར་དུས་ཀྱི་འཁོར་ལོ་ཁྲོམ་ཆོས་སུ་གནང་བ་དང་། སློབ་དཔོན་རིན་པོ་ཆེས་ཨོ་རྒྱན་ཡུལ་གྱི་རྒྱལ་འབངས་ཀུན་བཏུལ་ནས་བཀའ་དབང་ཁྲོམ་ཆོས་སུ་མཛད་པ། འཇིགས་མེད་གླིང་པ་དང་། ཀཿཐོག་རིག་འཛིན་ཚེ་དབང་ནོར་བུ། གཏེར་བདག་གླིང་པ་སོགས་ཚད་ཐུབ་དུ་མས་ཁྲོམ་དབང་བསྐུར་བ་རང་རང་གི་རྣམ་ཐར་དུ་གསལ། གྲངས་ཚད་ཙམ་གྱིས་དབང་སྐུར་ཆོག་མི་ཆོག་གི་ས་མཚམས་འཛིན་ན་རྒྱུད་སྨིན་པའི་སློབ་མ་ཚད་ལྡན་སྟོང་ཕྲག་སོགས་དུས་གཅིག་ཏུ་འབྱུང་མི་ཆོག་པའམ་བྱུང་ཡང་དེ་དག་གི་དོན་བྱ་མི་རུང་བར་འགྱུར་བས་སྟོན་པའི་དགོངས་པ་དེ་ལྟ་བུའི་གུ་དོག་ཅན་ཞིག་ཡིན་ག་ལ་རིགས། རྣལ་འབྱོར་གྱི་དབང་ཕྱུག་མི་ལ་བཞད་པའི་རྡོ་རྗེའི་རྣམ་ཐར་དུ་དབང་བསྐུར་བར་སེམས་བསྐྱེད་བཟང་པོ་དང་། ཆོ་ག་ཚང་བ་དང་། བསྐྱེད་རིམ་གསལ་བ་བརྟན་པ་དང་། ལྷ་སྐོན་ཚད་དུ་སྐྱོལ་བ་དང་། དེ་རྣམས་ཡོད་ན་དག་དེས་ཆོག་སྟེ། ཞེས་དང་། ཤི་བོ་ལ་དབང་བསྐུར་བ་ཡང་རྣམ་ཐར་དེ་ཉིད་དུ་བྱུང་བས་དགག་དགོས་དབང་གིས་ཕྱག་ལེན་ཡངས་དོག་ཅི་རིགས་པར་བྱུང་ངོ་། མདོར་ན། རྡོ་རྗེ་སློབ་དཔོན་དང་སློབ་མ་མཚན་ཉིད་ཚང་བ་གཞིར་བཅས། དྲྭ་ལམ་ནས་སྐུ་མངོན་སུམ་པ་ལྟ་བུའི་མདུན་དུ། སློབ་དཔོན་གྱིས་རང་གིས་དམིགས་འོག་ཏུ་བཅུག་པའི་སློབ་མ་དད་ཅན་རྣམས་ལ་དབང་བརྡ་འཕྲོད་ངེས་སུ་བསྐུར་ན་དབང་བསྐུར་བར་ཐོབ་སྟེ། དབང་གི་དགོས་པ་དེས་རྫོགས་པས་སོ། དེ་ལྟ་བུའི་སྒོ་ནས་དབང་ཞུ་ན་དྲྭ་ལམ་ནས་ཀྱང་བརྒྱུད་པ་ཚད་ལྡན་ཐོབ་ངེས་ཏེ། རྨི་ལམ་གྱི་སྣང་བའམ་དག་སྣང་དུ་བྱུང་བའི་བྱིན་རླབས་ཉེ་བརྒྱུད་ཀྱི་ཆོས་ཚན་དང་། ལོ་ངོ་བརྒྱ་ཕྲག་དུ་མའི་རྗེས་གཏེར་ནས་སྟོན་པའི་ཆོས་རྣམས་ལའང་ཆོས་མགོ་སྟོན་པ་ལ་ཐུག་པའི་བརྒྱུད་པ་ཚད་མར་གྱུར་པ་ཀུན་གྱིས་ཁས་ལེན་གནང་བཞིན་པ་ཡིན་པས་དྭོགས་གཞིར་བྱ་དགོས་མ་མཆིས་སོ།། འོན་ཀྱང་བླ་མ་ལ་དད་གུས་མེད་པའི་སྐྱེ་བོ་རྣམས་ནི་དབང་གྲལ་དུ་འཚང་རུང་དབང་མི་ཐོབ་པར་ངེས་པས་དེ་དོན་དགོངས་འཇགས་ཞུ་ཞེས་༸དཔལ་དགའ་ལྡན་ཕོ་བྲང་ཡིག་ཚང་གིས་ཕྱི་ལོ་ ༢༠༢༠ ཟླ་ ༥ ཚེས་ ༢༩ ལ་ཞེས་གསལ་བཤད་ཀྱི་བཀའ་ཡིག་བསྩལ་འདུག

ཉེ་ལམ་སྤྱི་ཟུར་སྤྲུལ་སྐུ་ཨ་རྒྱན་སྟོབས་རྒྱལ་གྱིས་༸གོང་ས་མཆོག་ལ་མཚན་སྨད་ཞུས་པའི་གནད་དོན་དང་འབྲེལ་ཏེ་༸གོང་ས་མཆོག་ལ་མཚན་སྨད་ཞུ་མཁན་སུ་ཡིན་ཡང་ངོ་རྒོལ་མཐའ་གཅིག་ཏུ་ཡོད་པ་དང་དེ་བཞིན་སྲིད་སྐྱོང་དང་བཀའ་ཤག་གི་བཞེངས་ཕྱོགས་གང་ཡིན་གསལ་བཤད་གནང་འདུགབོད་མིའི་སྒྲིག་འཛུགས་ཀྱི་སྒྲ་བརྙན་གཏད་གཏོད་ལས་རིམ་བརྒྱུད་ཁ་སང་སྲིད་སྐྱོང་བློ་བཟང་སེང་གེ་མཆོག་གིས་༸གོ་ས་མཆོག་ལ་མཚན་སྨད་ཞུ་མཁན་ལ་ངོ་རྒོལ་མཐའ་གཅིག་ཏུ་ཡོད་པ་དང་སྲིད་སྐྱོང་དང་བཀའ་ཤག་གི་བཞེངས་ཕྱོགས་དེ་སྔ་ཡོད་པ་བཞིན་ད་ལྟའང་གནས་ཡོད་པ་དང་མ་འོངས་པར་ཡང་མུ་མཐུད་གནས་རྒྱུ་ཡིན་པ། འདི་ལོ་བཀའ་ཤག་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་ལྟར། ༸གོང་ས་མཆོག་གིས་དགུང་ལོ་ ༡༦ ནས་བཟུང་སྟེ་ད་བར་ བོད་ཆོས་སྲིད་གཉིས་ཀྱི་དབུ་ཁྲིད་ཀྱི་ཐུགས་འགན་བཞེས་གནང་བ། མགོན་པོ་གང་ཉིད་ཀྱི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་མགོ་ཁྱག་ཁྱག་བྱ་རྒྱུ་བྱུང་ཡོད་སྐོར་དྲན་བསྐུལ་གནང་བ་དང་སྦྲགས། ༸གོང་ས་མཆོག་ནི་བསྟན་པ་དར་སྤེལ་གནང་མཁན་ཞིག་ལས་བསྟན་པ་བཤིག་མཁན་ཞིག་རྩ་བ་ནས་མིན་པ་སོགས་གསུངས་པ་མ་ཟད། ད་ལན་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་ཞུས་པ་དེར་ཧ་ལས་པའི་བློ་ཕམ་ཡོད་པ་དང་། མཐའ་གཅིག་ཏུ་ངོ་རྒོལ། མོས་མཐུན་རྩ་བ་ཉིད་ནས་མེད་པ་མ་ཟད། ལྷག་དོན་ཨོ་རྒྱན་སྟོབས་རྒྱལ་ནས་ཀྱང་༸གོང་ས་མཆོག་གི་བཀའ་དྲིན་བསམ་ཤེས་བྱེད་པའི་ཐོག་ནས་བཟོད་གསོལ་ཞུ་དགོས་པ་གསུངས་འདུགརྩ་བའི་ཐེངས་འདིའི་གནད་དོན་དང་འབྲེལ་བོད་མི་མང་ཚོགས་ནས་ཡིག་ངག་གཉིས་ཐོག་བློ་ཕམ་དང་ངོ་རྒོལ་གྱི་རྣམ་པ་ཤུགས་ཆེ་ཆེད་བཏོན་གནང་བཞིན་པ་མ་ཟད། སྐུ་བཅར་རྣམ་རྒྱལ་གྲྭ་ཚང་།  སྟོད་རྒྱུད་གྲྭ་ཚང། རྒྱལ་སྤྱིའི་དགེ་ལྡན་ལྷན་ཚོགས། གཞུང་ཞབས་ཟུར་པ། སྤྱི་འཐུས་ཚོགས་གཙོ་ཟུར་པ་སོགས་ཚོགས་སྒེར་ཀུན་ནས་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་༸གོང་ས་མཆོག་ལ་མཚན་སྨད་ཞུས་པར་ངོ་རྒོལ་གྱི་རྣམ་པ་ཤུགས་ཆེད་བཏོན་གན་ངབ་མ་ཟད། དེའི་ཐོག་ཆོས་རིག་བཀའ་བློན་གྱིས་གསལ་བཤད་ཅིག་ཕེབས་ཡོད་པ་དེས་སྤྱི་ཟུར་ཁོང་གིས་་༸གོང་ས་མཆོག་ལ་མཚན་སྨད་ཞུས་པར་ངོ་རྒོལ་བྱེད་རྒྱུ་ལས་ལྡོག་ཏེ་ཁོང་ལ་དག་འབུད་བྱ་ཐབས་བྱེད་བཞིན་པར་སྐྱོན་བརྗོད་ཤུགས་ཆེ་གནང་བ་དང་འབྲེལ་ཏེ། མང་པོ་ཞིག་ནས་བཀའ་ཤག་ལ་ཐད་ཀར་ཕྱག་བྲིས་ཕུལ་བ་བརྒྱུད་ཆོས་རིག་བཀའ་བློན་ལས་གནས་ནས་དགོངས་པ་ཞུ་དགོས་པའི་དགོས་འདུན་གནང་མཁན་ཡང་མང་དག་ཅིག་ཡོང་བཞིན་ཡོད་པ་རེད། གང་ལྟར་ད་ལྟའི་ཆར་ཐད་ཀར་ཕྱག་བྲིས་ཕུལ་བ་དང་། བསྒྲགས་གཏམ་སྤེལ་བ། དེ་བཞིན་དྲྭ་རྒྱའི་བརྒྱུད་ལམ་སོགས་ཀྱི་ཐོག་སྤྲུལ་སྐུ་ཨོ་རྒྱན་སྟོབས་རྒྱལ་ལ་སྐྱོན་བརྗོད་དང་ངོ་རྒོལ་གྱི་རྣམ་པ་ཤུགས་ཆེན་པོ་འདོན་བཞིན་པའི་ཁྲོད། ཁག་ཅིག་གིས་སྙིང་རྗེ་བསྒོམ་ཐོག་གནད་དོན་དེར་གཟིགས་ཕྱོགས་མཁན་ཡང་འདུག དཔེར་ན་དེ་རིང་༸གོང་ས་མཆོག་གི་དྲྭ་ཐོག་བཀའ་ཆོས་དེ་ཞུ་བར་ཆེད་མངགས་ལ་དྭགས་བྱང་ཐང་ས་ཁུལ་ནས་རྒྱལ་ས་གླེ་རུ་དྲྭ་རྒྱའི་ཆ་རྐྱེན་སོགས་ལེགས་པར་དགོངས་ཏེ་ཕེབས་པའི་བོད་མི་རྒན་གྲས་ཤིག་གིས་སྤྲུལ་སྐུ་ཨུ་རྒྱན་སྟོབས་རྒྱལ་གྱིས་༸གོང་ས་མཆོག་ལ་མཚན་སྨད་ཞུས་པའི་གནད་དོན་དེ་ཐོས་སྐབས་སྤྲུལ་མིང་པ་ཁོང་ལ་སྙིང་རྗེ་ཚད་མེད་སྐྱེས་པའི་ཚོར་བ་བྱུང་ཞེས་གསུངས་པ་ད་ཆ་སྤྱི་ཚོགས་དྲྭ་ལམ་ཁག་ཏུ་ཁྱབ་སྤེལ་འགྲོ་བཞིན་འདུག

ཁ་སང་ཨ་རིར་རྟེན་གཞི་བྱས་པའི་  ABC གསར་ཁང་གིས་བརྙན་ལམ་བརྒྱུད་ནས་༸གོང་ས་སྐྱབས་མགོན་རིན་པོ་ཆེ་མཆོག་ལ་ཏོག་དབྱིབས་རིམས་ནད་ཀྱི་དུས་སྐབས་དང་འབྲེལ་བའི་བཀའ་འདྲི་ཁག་ཅིག་ཞུས་པའི་བཀའ་ལན་དུ།   མགོན་པོ་གང་གིས་ད་ལྟའི་ཆར་འཛམ་གླིང་གི་ས་ཕྱོགས་གང་སར་རིམས་ནད་ཀྱི་རྐྱེན་གྱིས་མི་མང་པོ་ཞིག་ཟུར་བཀག་གི་ངང་གནས་ཡོད་སྟབས།   མི་མང་གིས་དུས་སྐབས་འདིར་སྒོམ་རྒྱག་ཐུབ་ན་ལེགས་ཚུལ་གྱི་ལམ་སྟོན་གནང་སྟེ། དང་ཐོག་སྐར་ཆ་གཅིག་ནས་འགོ་འཛུགས་ཀྱི་ཡོད་ནའང་། རིམ་བཞིན་སྐར་མ་ལྔ་ནས་བཅུའི་བར་སྤར་དགོས་བའི་ལམ་སྟོན་མཛད་འདུག དེ་བཞིན་མགོན་པོ་གང་གིས།  མི་མང་གིས་དུས་རྒྱུན་རང་གཅེས་འཛིན་གྱི་བློ་དེ་དོར་ནས་བྱམས་སྙིང་རྗེ་ལག་ལེན་དུ་བསྟར་བ་བརྒྱུད་ནས་ཕན་ཚུན་ལ་རོགས་འདེགས་གནང་སྟེ་སྤྱི་ཚོགས་གསར་འཛུགས་གནང་དགོས་བའི་ལམ་སྟོན་མཛད་དེ། གཞན་ལ་ཕན་སེམས་སྐྲུན་པ་དེ་ནི་དོན་དུ་རང་ལ་ཕན་སེམས་སྐྲུན་པ་དང་གཅིག་མཚུངས་ཡིན་ལུགས་བཀའ་གནང་བ་དང་འབྲེལ།  རང་གཅིག་པོར་ཕན་སེམས་སྐྲུན་འདོད་ཀྱི་བློ་དེ་ནི་གུ་དོག་པའི་བླུན་རྟགས་ཤིག་ཡིན་པ་མ་ཟད། མིག་རྒྱང་ཐུང་བའི་བྱ་བ་ཞིག་ཡིན་པར་བཀའ་འགྲེལ་གྱིས།  རང་ཉིད་ལ་ཅི་ཙམ་གཅེས་བར་འདོད་པ་དེ་ཙམ་གྱིས་གཞན་ལ་བདག་གཅེས་མཛད་རྒྱུའི་ལམ་སྟོན་གནང་འདུག དེ་བཞིན་མགོན་པོ་གང་གིས་ཁ་སང་དེ་རིང་གི་རིམས་ནད་ཁྱབ་བརྡལ་གྱི་དུས་སྐབས་འདིར་སྐུ་སྒེར་གྱི་སྐབས་བབ་ཀྱི་གནས་སྟངས་ཀྱི་ཐད་ནས་བཀའ་གནང་སྐབས།  གང་ཉིད་ཀྱིས་དུས་རྒྱུན་ནས་མང་ཚོགས་ལ་གསུངས་ཆོས་མང་པོ་སྩོལ་གྱི་ཡོད་ནའང་། ད་ཆ་རིམས་ནད་ཀྱི་རྐྱེན་གྱིས་སྐུ་སྒེར་ལ་སྲུང་སྐྱོབས་སླད་ཟླ་ངོ་ཁ་ཤས་ཀྱི་རིང་ལ་ཁེར་རྐྱང་དུ་བཞུགས་ཡོད་སྟབས་གསུངས་ཆོས་གནང་རྒྱུའི་གོ་སྐབས་མ་བྱུང་བར་བཀའ་གནང་བ་དང་འབྲེལ།  གང་ཉིད་ཀྱིས་དུས་རྒྱུན་ནས་ཕྱག་ཚོད་གཅིག་ནས་གཉིས་ཙམ་གྱི་རིང་་བརྙན་འཕྲིན་ལ་གཟིགས་ཀྱི་ཡོད་པ་དང་། མཚམས་ལན་རེར་དཔེ་ཀློག་མཛད་ཀྱིན་ཡོད་ཚུལ་། དེ་བཞིན་ཉིན་ལྟར་ཕྱག་ཚོད་བཞི་ནས་ལྔ་ཡི་བར་དུ་སྒོམ་སྒྲུབ་མཛད་ཀྱི་ཡོད་པར་བཀའ་གནང་འདུག དེ་བཞིན་སྐབས་འགར་སྲོག་ཆགས་ཀྱི་བརྙན་མང་པོར་གཟིགས་བཞིན་ཡོད་པར་བཀའ་གནང་བ་དང་འབྲེལ། སྲོག་ཆགས་ཀྱི་བརྙན་དེ་དག་ནི་ཁོང་ཉིད་ཐུགས་གསོ་གནང་རྒྱུའི་འབྱུང་ཁུངས་ལྟ་བུ་ཞིག་ཡིན་པའི་བཀའ་འགྲེལ་གནང་སྟེ། སྟག་གཟིག་སོགས་ལ་གཟིགས་སྐབས་ཅུང་མི་བདེ་བའི་ཚོར་བ་བྱུང་གི་ཡོད་ནའང་། རི་དྭགས་ཤ་བ་སོགས་ཀྱི་མཚོན་པའི་རིགས་མཐུན་གྱི་སེམས་ཅན་གཞན་རྣམས་ནི་རང་བཞིན་གྱིས་ཞི་བདེ་བག་ཕེབས་ཀྱི་ངང་གནས་བཞིན་ཡོད་སྟབས་དེར་གཟིགས་རྒྱུར་ཐུགས་མཉེས་བོ་གནང་གི་ཡོད་པར་བཀའ་གནང་འདུག དེ་བཞིན་ཐེངས་འདིའི་རིམས་ནད་དང་འབྲེལ་རྒྱ་ནག་གི་གནས་སྟངས་སྐོར་ལ་བཀའ་ལན་མཛད་སྐབས། མགོན་པོ་གང་གིས་དུས་རྒྱུན་ནས་རྒྱ་ནག་གི་མི་གྲངས་ཐེར་འབུམ་གཅིག་གི་བདེ་རྩར་སྨོན་ལམ་སྐྱོན་བཞིན་ཡོད་པར་བཀའ་གནང་སྟེ།  རྒྱ་རིགས་དེ་དག་ལ་རང་དབང་མང་ཙམ་ཡོད་པའི་ཐོག་ནས་ཆོས་ལུགས་སློབ་གཉེར་ལག་བསྟར་གནང་ཐུབ་པར་ཐུགས་སྨོན་གནང་གི་ཡོད་པ་དང་། དེ་ཡིང་ཁོང་ལ་འཆམ་མཐུན་གྱི་སེམས་ཚོར་ཤིག་སྐྲུན་གྱི་ཡོད་པ་ཡང་བཀའ་གནང་སྟེ། ཐེངས་འདིའི་རིམས་ནད་ཀྱི་རྐྱེན་གྱིས་འགྲོ་བ་མིའི་རང་བཞིན་གྱི་གཤིས་རྒྱུད་ལ་འགྱུར་བ་འགྲོ་སྲིད་པའི་ལམ་སྟོན་མཛད་འདུག དེ་བཞིན་ཁོང་གིས། ཨ་རིའི་སྲིད་འཛིན་ Trump ཡིས་ America First ཞེས་པའི་ཨ་རིར་གཙོ་བོ་འཛིན་དགོས་བའི་ལང་ཕྱོགས་དེས་རིན་པོ་ཆེ་ཁོང་གི་ཐུགས་ཅུང་མི་བདེ་བ་ཞིག་བཟོས་ཡོད་པར་བཀའ་གནང་སྟེ། རྒྱལ་དབང་གང་ཉིད་ཀྱིས་དུས་རྒྱུན་ནས་ཨ་རི་ནི་རང་དབང་གི་རྒྱལ་ཁབ་རྣམས་ཀྱི་སྣ་འདྲེན་གྱི་རྒྱལ་ཁབ་ཅིག་ལ་ངོས་འཛིན་གནང་སྟེ།  སྤྱི་ཚོགས་དང་དཔལ་འབྱོར་གྱི་གནས་བབ་ལ་མ་བལྟས་པར་རྒྱལ་ཁབ་གཞན་ལ་ཕན་སེམས་སྐྲུན་པའི་རྒྱལ་ཁབ་ཅིག་ལ་ཐུགས་རེ་གནང་གི་ཡོད་ཅེས་བཀའ་གནང་བ་དང་འབྲེལ། གལ་ཏེ་ཁྱེད་ཀྱི་ཨ་རི་ཁོ་ནར་བསམ་བློ་བཏང་སྟེ། རང་ཉིད་གཞན་ལས་ཐ་དད་དུ་བཀར་བ་ཡིན་ན།  མཚམས་མཚམས་རང་ཉིད་ཁེར་རྐྱང་ཡིན་པའི་ཚོར་བ་འབྱུང་སྲིད་པའི་ལམ་སྟོན་གནང་བ་དང་འབྲེལ། འགྲོ་བ་མི་ནི་སྤྱི་ཚོགས་སེམས་ཅན་ཡིན་ཞིག་ཡིན་སྟབས།  ཕན་ཚུན་གཅིག་ལ་གཅིག་བརྟེན་ཡིན་པ་རེད། ད་ནི་ང་ཚོས་འགྲོ་བའི་མིའི་གཅིག་གྱུར་གྱི་འདུ་ཤེས་ལ་ཐུགས་བསམ་བཞེས་ཏེ། ཕན་ཚུན་ཐག་ཉེ་བར་བཅར་དགོས་པའི་དུས་ལ་བབ་ཡོད་ཅེས་ལམ་སྟོན་མཛད་འདུག གཞི་རྩའི་ཐེངས་འདིའི་ཏོག་དབྱིབས་རིམས་ནད་ཁྲོད་ཀྱི་མགོན་པོ་གང་གི་དམིགས་བསལ་གྱི་བཅར་འདྲི་འདི་ནི། ཨ་རིར་རྟེན་གཞི་བྱས་པའི་ University of Wisconsin ཞེས་པའི་གཙུག་ལག་སློབ་ཁག་གི་སེམས་ཀྱི་འཕྲོད་བསྟེན་ལྟེ་གནས་བརྒྱུད་ནས་གོ་སྒྲིག་གནང་བ་ཞིག་ཡིན་པ་དང་། བཅར་འདྲི་འདིའི་བརྙན་ཆ་ཚང་དེ་རིང་ཨ་རིའི་ནང་གི་དགོང་མོའི་ཕྱག་ཚོད་༡༢ སྟེང་  ABC གསར་ཁང་གི་ Nightline ཞེས་པའི་དྲ་བརྙན་ཐོག་རྒྱང་སྲིང་ཞུ་རྒྱུ་རེད།  

སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་དྲྭ་ལམ་བརྒྱུད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་མཚན་སྨད་ཞུས་པའི་གནད་དོན་དང་འབྲེལ། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གསལ་བཤད་དོན་ཚན་གསུམ་ཞིག་སྤེལ་ཡོད་པའི་ཐོག་ལ་མང་ཚོགས་ཁྲོད་བློ་ཕམ་ཆེན་པོས་སྐྱོན་བརྗོད་ཤུགས་ཆེར་བྱེད་བཞིན་པ་ལྟར། དེ་རིང་ཆོས་རིག་བཀའ་བློན་མཆོག་གིས་གསལ་བཤད་གཞན་ཞིག་སྤེལ་ཏེ། ཁོང་གིས་ཁ་ཉིན་སྤེལ་བའི་གསལ་བཤད་ཡི་གེ་དེར་ཞིབ་བལྟས་བྱེད་སྐབས་མང་ཚོགས་ལ་དགོངས་ཚོར་བྱུང་བར་ཐུགས་ཁག་གཏན་ནས་མི་འདུག་པར་འགྲེལ་བརྗོད་ཀྱིས།  ཆ་རྐྱེན་གང་ཡང་མེད་པར་སྙིང་ནས་བཟོད་གསོལ་ཞུ་རྒྱུ་དང། དེའི་སླད་རང་ཉིད་བཀའ་བློན་གྱི་ལས་གནས་ནས་དགོངས་ཞུ་བྱ་དགོས་གྱུར་ཀྱང་ངེས་པར་དུ་བྱུ་རྒྱུ་ཡིན་པར་གསུངས་འདུག གཞི་རྩའི་ཆོས་རིག་བཀའ་བློན་མཆོག་གིས་ཉེ་སྔོན་ཕྱི་ཚེས་ ༢༦ ཉིན་སྤེལ་བའི་གསལ་བསྒྲགས་དེའི་ནང་དུ་གཙོ་བོ་དོན་ཚན་གསུམ་བཀོད་ཡོད་པའི་ནང་ནས། གླེང་བརྗོད་ཀྱི་ཚུལ་དུ་བཀོད་པའི་དོན་ཚན་དང་པོ་དེའི་ནང་དུ། སྤྲུལ་སྐུ་ཨོ་རྒྱན་སྟོབས་རྒྱལ་ལགས་ནི་ནམ་རྒྱུན་རང་ནས་གཟིགས་ཚོར་ཇི་བྱུང་འཛེམ་ཟོན་མེད་པར་གསུང་མཁན་ཞིག་དང་རང་ལ་ཐུགས་ཚོར་གང་བྱུང་བ་རྣམས་ཞལ་ནས་ཐལ་བ་ཞིག་ཡིན་པ་ལས་རྒྱབ་ལྗོངས་ཀྱི་དམིགས་ཡུལ་གཞན་ཞིག་ཡོད་པར་ཡིད་ཆེས་མེད་ཀྱང་། དེར་བརྟེན་མང་ཚོགས་ཁྲོད་དོན་མེད་བློ་ཕམ་དང་བསམ་ཚུལ་མི་ཉུང་བ་ཞིག་ཡོང་གཞིར་གྱུར་བར་འགྲེལ་བརྗོད་གནང་ཡོད་པ་རེད། དེ་དོན་མང་ཚོགས་ཁྲོད་ནས་བཀའ་བློན་གྱི་གསལ་བཤད་འདི་བརྒྱུད་ནས་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་ལ་ངོ་རྒོལ་བྱེད་རྒྱུ་ལས་ལྡོག་སྟེ། དག་འབུད་བྱས་པའི་ཚོར་བ་ཤུགས་ཆེན་བྱུང་བ་དང་འབྲེལ་ནས་སྐྱོན་བརྗོད་བྱེད་མཁན་མང་དག་ཅིག་བྱུང་ཡོད་པ་རེད། དེ་རིང་ཆོས་རིག་ལས་ཁུངས་ཀྱི་ངོ་དེབ་དྲ་ལམ་བརྒྱུད་ཆོས་རིག་བཀའ་བློན་མཆོག་གིས་བཟོད་གསོལ་གྱི་ཕྱག་བྲིས་ཤིག་སྤེལ་འདུག་པའི་ནང་དུ། སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་ལགས་ཀྱིས་༸གོང་ས་མཆོག་ལ་ཚབས་ཆེའི་མཚན་སྨད་ཞུས་པར། ཁོང་ནས་སྐབས་འཕྲལ་གླེང་གཞི་ཆོས་ཕྱོགས་ཀྱི་གནད་དོན་དེའི་ཐོག་བྲེལ་སྟབས་ཀྱིས་གསལ་བཤད་དོན་ཚན་གསུམ་ཅན་ཞིག་སྤེལ་ཡོད་པ་དང། དེའི་དོན་ཚན་ཕྱི་མ་གཉིས་གསལ་བཤད་དངོས་དང་། དོན་ཚན་དང་པོ་སྔོན་གླེང་མཚམས་སྦྱོར་གྱི་ཚུལ་དུ་བཀོད་ཡོད་སྐོར་དང་འབྲེལ། གསལ་བཤད་གཟིགས་མཁན་ཕལ་མོ་ཆེས་དོན་ཚན་དང་པོ་དེའི་ཐོག་དགོངས་ཚོར་ཆེན་པོ་བྱུང་ཡོད་ཚོད་འདུག་ཅིང་། དེར་ད་ལྟ་ཞིབ་བལྟ་གནང་སྐབས་དགོངས་ཚོར་བྱུང་བར་ཐུགས་ཁག་གཏན་ནས་བྱུང་མི་འདུག་ཅེས་གསུངས་པ་དང་འབྲེལ། ཁོང་ནས་ཆ་རྐྱེན་གང་ཡང་མེད་པར་སྙིང་ནས་བཟོད་གསོལ་ཞུ་རྒྱུ་དང་། དེའི་སླད་རང་ཉིད་བཀའ་བློན་གྱི་ལས་གནས་ནས་དགོངས་ཞུ་བྱ་དགོས་གྱུར་ཀྱང་ངེས་པར་བྱ་རྒྱུ་ཡིན་པ། དེ་དོན་ཚང་མར་ཐུགས་ཡིད་གཙང་དྭངས་ཡོང་སླད་གནས་ཚུལ་དེ་ཆགས་སྟངས་བཅོས་ལྷད་རྩ་བ་ནས་མེད་པའི་གསལ་བཤད་གནང་འདུག ཁོང་གི་ད་དུང། དེ་སྔོན་གྱི་གསལ་བཤད་དེའི་ནང་གི་ཚིགས་བརྗོད་འབྲི་འགོད་སྐབས། བྲེལ་འཚུབ་སོགས་ཀྱི་དབང་གིས་དགོས་ངེས་བསམ་ཞིབ་མ་ཐུབ་པར་སྤྱིར་བཏང་འགྲོ་ལུགས་ལྟར་ཤོར་འདུག་པ་དང་། ཕ་རོལ་གྱི་གང་ཟག་དེའང་གལ་ཆེའི་ཆོས་བརྒྱུད་ཅིག་གི་བླ་མ་རྒན་གྲས་ཤིག་ཡིན་པར། ཁྲོ་བའི་ལན་དུ་ཁྲོ་བ་དང་ཚིག་རྩུབ་ཀྱི་ལན་དུ་ཚིག་རྩུབ་བྱ་མི་རུང་བའི་བསླབ་བྱ་ཉམས་བསྟར་ཞུས་ཁུལ་བྱས་པ་མ་གཏོགས། ཁོང་ནས་མཚན་སྨད་ཞུ་མཁན་ངག་ཟག་ལ་སྐྱོབ་ཐབས་དང་དག་འབུད་བྱ་ཐབས་ཀྱི་བསམ་བློ་དང་ཀུན་སློང་རྩ་བ་ནས་མིན་པའི་གསལ་བཤད་དང་འབྲེལ། གནད་དོན་དེ་ནི་ཁོང་སྐུ་ཉིད་ལ་ཀླུང་རྟ་རྒུད་པའི་བར་ཆད་ཀྱི་ཆོ་འཕྲུལ་བྱུང་བ་ལྟ་བུ་ཞིག་ཏུ་ཚོར་བཞིན་ཡོད་པ་སོགས་གསུངས་འདུག རྩ་བའི་ཉེ་སྔོན་གནད་དོན་དེ་ཐོག་མར་བྱུང་བའི་རྗེས་སུ། ད་ལྟའི་ཆར་སྤྱི་ཚོགས་ཁྲོད་མུ་ཐུད་སྤྱི་ཟུར་ཁོང་གི་གསུངས་པར་ངོ་རྒོལ་གྱི་རྣམ་པ་ཤུགས་ཆེན་སྟོན་མཁན་མང་པོ་ཡོད་པའི་ཁྲོད། ཁ་སང་བཀའ་ཤག་གི་གསལ་བསྒྲགས་ཤིག་སྤེལ་བ་བརྒྱུད། སྤྱི་ཟུར་གང་ཟག་དེས་༸གོང་ས་མཆོག་ལ་མཚན་སྨད་ཞུས་པ་དེར་བོད་མིའི་སྒྲིག་འཛུགས་བཀའ་ཤག་ལ་བློ་ཕམ་ཚད་མེད་དང་བྱ་སྤྱོད་དེ་ནོར་འཁྲུལ་དུ་ངོས་འཛིན་ཞུ་བཞིན་ཡོད་པར་བསྒྲགས་ཡོད་པ་མ་ཟད།  བཙན་བྱོལ་བོད་མིའི་ཚོགས་སྐྱིད་འདྲ་མིན་དང་སྒེར་བཅས་ནས་བསྒྲགས་གཏམ་སྤེལ་བ་དང་། སྤྱི་ཚོགས་དྲ་ལམ་སོགས་བརྒྱུད་ནས་སྤྱི་ཟུར་གང་ཟག་དེར་སྐྱོན་བརྗོད་དང་ངོ་རྒོལ་གྱི་རྣམ་པ་ཤུགས་ཆེན་སྟོན་བཞིན་འདུག དེ་དོན་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ནས་བརྒྱུད་ལམ་ཐོག་སྤྱི་ཟུར་སྤྲུལ་སྐུ་ཨོ་རྒྱན་སྟབས་རྒྱལ་ལགས་ཀྱིས་༸གོང་ས་མཆོག་ལ་མཚན་སྨད་ཞུས་པ་དེ་རྩ་བ་ནས་འགྲིག་གི་མེད་པ་དང་།  ཧ་ཅང་གི་བློ་ཕམ་ཆེན་པོ་བྱུང་ཡོད་སྐོར་དང་འབྲེལ། བོད་མི་ཡོངས་རྫོགས་༸གོང་ས་མཆོག་གིས་བཀའ་དྲིན་བྱིན་རླབས་འོག་འཚོ་བཞིན་ཡོད་པ་ལྟར། འདི་ལོ་ལྷག་པར་དུ་༸གོང་ས་སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་འདྲེན་གྱི་ལོར་སྲུང་བརྩི་གནང་བཞིན་པ་དྲན་སྐུལ་དང་འབྲེལ། སྤྱིར་ཟུར་ཁོང་གིས་༸གོང་ས་མཆོག་དང་བོད་མི་མང་ཚོགས་བཟོད་གསོལ་ཞུ་དགོས་པར་གསུངས་འདུག དེ་བཞིན་ད་ལན་གྱི་གནས་སྟངས་འདིའི་ཁྲོད། སྤྱི་འཐུས་ཁག་ཅིག་ནས་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་ལ་ངོ་རྒོལ་བསྒྲགས་གཏམ་སྤེལ་བ་དང་། ཁག་ཅིག་གིས་བཀའ་ཤག་ལ་སྙན་ཞུ་ཕུལ་ཏེ་ཆོས་རིགས་བཀའ་བློན་ཁོང་ལས་གནས་ནས་དགོངས་པ་ཞུ་དགོས་པའི་དགོས་འདུན་བཏོན་གནང་འདུག   དེ་བཞིན་དགེ་ལུགས་སྤྱི་འཐུས་ནས་སྐྱབས་མགོན་རིན་པོ་ཆེ་མཆོག་གིས་དྲ་རྒྱ་བརྒྱུད་དབང་བསྩལ་བ་འདི་གསང་སྔགས་ཁྲོམ་བསྒྲགས་ཆགས་ཀྱི་མེད་པ་ཁུངས་སྐྱེལ་དག་འབུད་དང་སྦྲགས་སྤྱིར་ཟུར་གང་ཟག་དེའི་གནང་ཕྱོགས་ལ་ངོ་རྒོལ་གནང་འདུག་པ་དང་།  ལྷག་པར་དུ་༸གོང་ས་མཆོག་གི་དཀའ་དབང་བསྩལ་བར་དད་པ་དམ་ཚིགས་ཡོད་པ་མ་གཏོགས་གཞན་རྣམས་ནས་གསན་དགོས་པའི་བཙན་ཤེད་སོགས་གང་ཡང་གནང་མེད་པ་ནན་བརྗོད་གནང་འདུག

ཉེ་ལམ་རྒྱ་གཞུང་ནས་འདོན་སྤེལ་བྱས་པའི་ཧོང་ཀོང་བདེ་འཇགས་ཀྱི་ཁྲིམས་འཆར་གསར་པ་དེར་ད་ཆ་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་ཐོག་ཁྲིམས་འཆར་དེ་དངོས་སུ་གཏན་འབེབས་བྱུང་འདུགདེ་ཡང་དེ་རིང་Hongkong Free Express གཙོས་པའི་བརྒྱུད་ལམ་གཞན་ཁག་ནས་ཐོན་པའི་གནས་ཚུལ་ལ་གཞིགས་ན།  རྒྱ་ནག་གཞུང་ནས་འདོན་སྤེལ་བྱས་པའི་ཧོང་ཀོང་བདེ་འཇགས་ཀྱི་ཁྲིམས་འཆར་དེར་ད་ཆ་རྒྱ་ནག་གི་རྒྱལ་ས་པེ་ཅིན་དུ་ཚོགས་བཞིན་པའི་རྒྱ་ནག་མི་དམངས་འཐུས་མི་ཚོགས་ཆེན་ཐོག་སྐུ་ཚབ་གཅིག་ནས་དེར་དགག་པ་དང་།  དེ་བཞིན་དྲུག་ནས་འོས་བླུག་མེད་པ་དང་།  དེ་མིན་འཐུས་མི་ ༢༨༠༠ ལྷག་ནས་ཁྲིམས་འཆར་དེར་རྒྱབ་སྐྱོར་གྱིས་དངོས་སུ་གཏན་འབེབས་བྱུང་འདུག ཁྲིམས་འཆར་དེའི་ཐོག་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་རྒྱུན་ལས་ལྷན་ཚོགས་ནས་ཟླ་བ་རྗེས་མར་ཁྲིམས་འཆར་དེ་ཁྲིམས་སྒྲིག་འཆར་འགོད་ཐད་ལ་ཚོགས་འདུ་ཚོགས་རྒྱུ་དང་།  ཡང་སྒོས་པེ་ཅིན་ནས་དེ་འབྲེལ་གྱི་ལས་དོན་དག་གང་མགྱོགས་བྱེད་དགོས་པའི་བཀོད་ཁྱབ་བཏང་ཡོད་པ་རེད་འདུགགཞི་རྩའི་ཧོང་ཀོང་གི་གནད་དོན་དང་འབྲེལ་བོད་རང་བཙན་སློབ་ཕྲུག་ཚོགས་པའི་སྤྱི་ཚོགས་དྲྭ་ལམ་ཐོག་དབྱིན་ཡུལ་དང་།  ཉི་ཧོང་།  ཨ་རི། རྒྱ་གར།  ཁེ་ན་ཌ།  ཧྥ་རན་སི་བཅས་ཀྱི་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་དང་།   དེ་བཞོན་ལྷོ་སོག་པོ་དང་རྒྱ་རིགས་སློབ་ཕྲུག་ལས་འགུལ་བ།    རྒྱལ་སྤྱིའི་ཡུ་གུར་ཚོ ཚོགས་སོགས་ཀྱི་ལས་འགུལ་བ་བཅས་ནས་ཧོང་ཀོང་ལ་རྒྱབ་སྐྱོར་གྱིས་བརྡ་ལན་སྤྲད་པའི་བརྙན་ཐུང་ཞིག་བཟོས་འདུག་པ་དང་།  བརྙན་ཐུང་དེའི་ནང་ལས་འགུལ་བ་རྣམ་པས། ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཧ་ཅང་ཇེ་སྡུག་ཏུ་འགྲོ་བཞིན་པ་མ་ཟད།  ད་ཆ་རྒྱ་ནག་གིས་ཧོང་ཀོང་གི་གནད་དོན་དང་འབྲེལ་ཁྲིམས་འཆར་གསར་པ་བཏོན་པ་དེས་ཧོང་ཀོང་གི་རང་དབང་ཉེབ་ཚབ་ཅན་དུ་བསྒྱུར་ཡོད་པ་དང་།  ཧོང་ཀོང་མང་ཚོགས་ཀྱིས་གཞུང་ལ་ངོ་རྒོལ་ཁྲོད་མང་གཙོའི་ལས་འགུལ་བ་མང་དག་ཅིག་འཛིན་བཟུང་བྱས་ཡོད་པ་གསུངས་འདུག    ལྷག་པར་དུ་ད་ཆ་ཏོག་དབྱིབས་གཉན་རིམས་ཁྲོད་ང་ཚོས་གནས་ཚུལ་མཁྱེན་རྟོགས་བྱུང་བ་ཞིག་ནི།  རྒྱ་ནག་གཞུང་གིས་བཙན་འཛུལ་དང་།  དྲག་གནོན་དེ་བཞིན་དམ་དྲག་གི་བྱ་སྤྱོད་དག་གིས་འཛམ་བུ་གླིང་སྤྱི་ཡོངས་ལ་གནོད་འཚེ་བྱེད་ཀྱི་ཡོད་པ་དང་ཆབས་ཅིག་ད་ལྟའི་ཧོང་ཀོང་གི་གནས་སྟངས་འདིར་རྒྱལ་སྤྱིའི་ཚོགས་པ་ཡོངས་ནས་རྒྱབ་སྐྱོར་དང་གདུང་སེམས་མཉམ་སྐྱེད་གནང་དགོས་སྐོར་གསུངས་འདུགགཞི་རྩའི་ཧོང་ཀོང་གི་རྒྱལ་ཁབ་བདེ་འཇགས་ཀྱི་ཁྲིམས་འཆར་གསར་པ་བཏོན་མ་ཐག་ཧོང་ཀོང་མང་ཚོགས་བརྒྱ་ཕྲག་ཁག་ཅིག་འདུ་འཛོམས་ཀྱིས་ཁ་སང་བསྐྱར་དུ་རྒྱ་གཞུང་ལ་ངོ་རྒོལ་གནང་བ་དང་།  ངོ་རྒོལ་དེའི་ཁྲོད་ཉེན་རྟོག་པས་ལས་འགུལ་བ་ ༣༠༠ ཙམ་ཞིག་འཛིན་བཟུང་བྱས་འདུག  གཞན་ཡང་གནད་དོན་དེ་འབྲེལ་དེ་རིང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་ཁོང་གིས་ཨ་རིའི་གྲོས་ཚོགས་ལ་ཧོང་ཀོང་དེ་ད་ནས་བཟུང་རྒྱ་ནག་གི་རང་སྐྱོང་ས་ཁུལ་ཞིག་མིན་པ་དང་།  ཨ་རིས་ཧོང་ཀོང་མང་ཚོགས་ལ་རྒྱབ་སྐྱོར་ཡོད་ཅེས་སྤྱི་ཚོགས་དྲ་ལམ་དུ་གསུངས་འདུག   དེ་བཞིན་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གཙོས་པའི་ཨོ་སི་ཀྲོ་ལི་ཡའི་བོད་དོན་ལྷན་ཁང་དང་།  བོད་དོན་དང་འབྲེལ་ལས་འགུལ་སྤེལ་མཁན་གྱི་ཚོགས་པ་ ༡༠༠ ལྷག་ཙམ་གྱིས་སྤྱི་མོས་ཐོག་ང་ཚོ་ཧོང་ཀོང་མཉམ་དུ་ཡོད་ཅེས་བརྗོད་པའི་ཐོག་བསྒྲགས་གཏམ་ཞིག་སྤེལ་འདུག་པ་དང་།  བསྒྲགས་གཏམ་དེའི་ནང་།  པེ་ཅིན་ནས་འདོན་སྤེལ་བྱས་པའི་ཁྲིམས་འཆར་གསར་པ་དེ་བརྒྱུད་རྒྱ་ནག་ནས་ཧོང་ཀོང་ཡོངས་སུ་དབང་བསྒྱུར་ཐབས་བྱེད་ཀྱི་ཡོད་པས།  གལ་ཏེ་ཁྲིམས་འཆར་དེ་ཁྲིམས་ལ་གཏན་འབེབས་བྱས་ན་དེས་ཧོང་ཀོང་གི་རང་དབང་རྡོག་རོལ་གཏོང་རྒྱུ་ཡིན་པ་མ་ཟད།  ཁྲིམས་འཆར་དེའི་ནང་རྒྱལ་ཁབ་མགོ་རྟིང་སློག་རྒྱུ་དང་།  རང་རྒྱལ་ལ་ངོ་རྒོལ་གྱིས་བྱ་སྤྱོད་ཡོངས་བཀག་སྡོམ་བྱེད་རྒྱུ་ཡིན་པ་འཁོད་ཡོད་པས།   ཚིག་དེ་དག་རྣམ་ཀུན་ནས་རྒྱ་གཞུང་གིས་བོད་དང་།  ཤར་ཏུར་ཀི་སི་ཏན།  དེ་བཞིན་ལྷོ་སོག་དང་། རྒྱ་ནག་སྐམ་ས་ཆེན་པོའི་ནང་བེད་སྤྱོད་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་དམ་དྲག་བྱེད་ཀྱི་ཡོད་པ་གསུངས་འདུག

ཁ་སང་ཨ་རིའི་གྲོས་ཚོགས་འོག་མའི་ནང་དུ། འོས་ཤོག་གཅིག་མ་གཏོགས་སྤྱི་མོས་ཀྱི་རྒྱབ་སྐྱོར་ཐོག་ནས་ Uyghur Human Rights Policy Act ཞེས་ཡུ་གུར་བའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཁྲིམས་ཆར་དེ་གཏན་འབེབས་གནང་འདུག དེ་ཡང་ཨ་རིའི་གྲོས་ཚོགས་གོང་མས་སྔ་ལོའི་ཕྱི་ཟླ་ ༩ པའི་ཚེས་ ༡༡ དང་དེའི་རྗེས་ཉེ་ཆར་ཟླ་བ་འདིའི་ཕྱི་ཚེས་ ༡༤ ཉིན་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཁྲིམས་འཆར་ལ་སྤྱི་མོས་ཀྱི་རྒྱབ་སྐྱོར་གནང་བའི་ཐོག་ནས་གཏན་འབེབས་གནང་བའི་རྗེས་སུ། ཁ་སང་གྲོས་ཚོགས་འོག་མའི་ནང་དུའང་འོས་ཤོག་གཅིག་མ་གཏོགས་སྤྱི་མོས་ཀྱི་རྒྱབ་སྐྱོར་ཐོག་ནས་ཁྲིམས་འཆར་དེ་གཏན་འབེབས་གནང་འདུག ཁྲིམས་འཆར་དེའི་ནང་དུ། ད་ལྟའི་ཤིན་ཅང་ནང་དུ་ཡུ་གུར་མང་ཚོགས་གཙོས་པའི་ཁ་ཆེ་མི་རིགས་གཞན་བཅས་མི་ས་ཡ་གཅིག་ལྷག་ངལ་རྩོལ་བསྒྱུར་བཀོད་ར་བའི་ནང་དུ་བཙོན་འཇུག་བྱེད་མུས་ཡིན་པ་སོགས་ཀྱི་དྲག་གནོན་འོག་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་ཁག་རྩིས་མེད་རྡོག་རོལ་གཏོང་མཁན་ཤིན་ཅང་གི་རྒྱ་ནག་དམར་ཤོག་ཚོགས་པའི་དྲུང་ཆེ་ Chen Quanguo གཙོ་བོར་གྱུར་བའི་རྒྱ་ནག་དཔོན་རིགས་རྣམས་ཨ་རིའི་ནང་དུ་ཡོང་མི་ཆོག་པའི་དམ་དྲག་དང་། ཤིན་ཅང་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་སྤྱིའི་ཐོག་ལ་ཞིབ་འཇུག་གིས་སྙན་མཐོ་རིམ་པ་འདོན་དགོས་པ། དེ་བཞིན་ FBI ཞེས་པའི་ཨ་རིའི་གཞུང་གི་ཞིབ་དཔྱོད་ཁང་གིས་ཡུལ་དེའི་ནང་དུ་ཡོད་པའི་ཡུ་གུར་མང་ཚོགས་ཐོག་རྒྱ་ནག་གཞུང་གིས་ལྟ་སྲུང་དང་གནོན་བཙུར་སོགས་ཀྱི་བརྙས་བཅོས་བྱེད་བཞིན་པ་དང། ཤིན་ཅང་ནང་དུ་མང་ཚོགས་ཐོག་ཁྲིམས་འགལ་གྱི་ལྟ་སྲུང་བྱེད་བཞིན་པ་དང་འབྲེལ་ཏེ།  ལྟ་སྲུང་ཡོ་ཆས་བཟོ་བསྐྲུན་དང་ཉོ་ཚོང་བཅས་ཀྱི་ཐོག་ལ་ཞིབ་འཇུག་གི་སྙན་ཐོ་འདོན་རྒྱུ། དེ་བཞིན་ཤིན་ཅང་ནང་དུ་ཚོང་ལས་གཉེར་བཞིན་པའི་ཨ་རིའི་ཚོང་ལས་ཁང་ཁག་གི་བཅའ་དངོས་བཟོ་སྐྲུན་ཁྲོད་མང་ཚོགས་ཀྱི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་གི་མེད་པ་ངེས་གཏན་བྱེད་དགོས་པ་སོགས་ཀྱི་གྲུབ་དོན་འཁོད་ཡོད་པ་རེད། དེ་རིང་སྲིད་འཛིན་ Trump མཆོག་གིས་ཁྲིམས་འཆར་དེར་མཚན་རྟགས་བཀོད་ཚེ། ཡུ་གུར་མང་ཚོགས་ཀྱི་གཉའ་གནོན་མྱོང་བཞིན་པའི་ཐོག་ལ་ཨ་རིའི་གཞུང་གིས་སེམས་འཚབ་ཡོད་པ་རྣམས་ཨ་རིའི་གཞུང་གིས་རྒྱ་ནག་ཐོག་འཛིན་པའི་སྲིད་བྱུས་ནང་དུ་འཁོད་རྒྱུ་ཡིན་པ་དང་འབྲེལ་ནས་ཨ་རི་གཞུང་གིས་ཡུ་གུར་མང་ཚོགས་ཐོག་དྲག་གནོན་བྱས་པར་རྒྱ་ནག་གཞུང་དང་དེ་དག་གི་དཔོན་རིགས་རྣམས་ལ་ཁྲིམས་ལྟར་གདོང་ལེན་གནང་རྒྱུའི་འགན་དབང་ཐོབ་རྒྱུ་ཡིན་པ་རེད། ཁ་སང་ཁྲིམས་འཆར་གཏན་འབེབས་དང་འབྲེལ། གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས། ད་རེས་གྲོས་ཚོགས་ནང་དུ་ཆབ་སྲིད་ཚོགས་པ་དབྱེ་བ་མེད་པའི་གྲོས་ཚོགས་འཐུས་མིའི་རྒྱབ་སྐྱོར་གནང་བའི་ཐོག་ནས་ཁྲིམས་ཆར་དེ་གཏན་འབེབས་གནང་བ་བརྒྱུད། རྒྱ་ནག་གཞུང་གིས་ཡུ་གུར་མང་ཚོགས་ཐོག་མི་སྤྱོད་ལས་འདས་པའི་དྲག་གནོན་བྱེད་བཞིན་པར་ཨ་རིའི་གྲོས་ཚོགས་ཀྱི་ངོ་རྒོལ་གྱི་ཇི་ཙམ་ཡོད་པ་གསལ་བསྟོན་གནང་ཡོད་གསུངས་འདུག ཁ་སང་ཨ་རིའི་གྲོས་ཚོགས་ཀྱིས་ཡུ་གུར་མང་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཁྲིམས་འཆར་གཏན་འབེབས་དང་འབྲེལ། དེ་རིང་ CECC ཞེས་པའི་ཨ་རིའི་གྲོས་ཚོགས་ཀྱི་རྒྱ་ནག་འཛིན་སྐྱོང་ཚོགས་ཆུང་། USCIRF ཞེས་པའི་ ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་བཅས་ནས་གྲོས་ཚོགས་ཀྱི་ཐག་གཅོད་དེར་དགའ་བསུའི་རྣམ་པ་ཤུགས་ཆེར་བསྟན་འདུག མཚམས་འཕྲིན་དེའི་བར་དུ། ཉེ་ཆར་བོད་རིགས་བསྟན་འཛིན་རྡོ་རྗེ་ལགས་ཀྱི་ལས་གནས་དུས་ཡུན་རྫོགས་ཏེ་འཕོ་འགྱུར་བྱུང་བ་དང་འབྲེལ། ཁ་སང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་ཡུ་གུར་མི་རིགས་ཡིན་པའི་སྐུ་ཞབས་ Nury Turkel ལགས་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གི་འགན་འཛིན་གྲས་སུ་བསྐོ་བཞག་གནང་  

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཚེས་ ༢༩ དང་ ༣༠ བཅས་ཉིན་གཉིས་ཀྱི་རིང་ཏོག་དབྱིབས་གཉན་རིམས་རྐྱེན་པས་ཁྱིམ་སྡོད་བཀའ་རྒྱའི་འོག་གནས་པའི་བོད་མི་གཙོས་བོད་བརྒྱུད་ནང་བསྟན་རརྗེས་འཇུག་རྣམས་ལ་སྤྱན་རས་གཟིགས་ཀྱི་བཀའ་དབང་བཀྲིན་བསྩལ་གཏན་འཁེལ་ཡོད་པའི་ཁྲོད་ཉེ་ལམ་བཞུགས་སྒར་དྷརྨ་ས་ལའི་ཉེ་འགྲམ་སྦིར་གཞིས་ཆགས་ནང་གནས་སྡོད་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་མགོན་པོ་༸གང་ཉིད་མཆོག་ནས་དྲྭ་ལམ་ཐད་གཏོང་བརྒྱུད་བཀའ་དབང་བསྩལ་རྒྱུ་དེ་ནི་གསང་སྔགས་ཁྲོམ་བསྒྲགས་གནང་བར་འགྲེལ་བརྗོད་དང་འབྲེལ་དེ་ནི་བསྟན་པ་བཤིག་པ་ཞིག་ལ་ངོས་འཛིན་བྱེད་ཀྱི་ཡོད་སྐོར་བརྗོད་རྗེས། བོད་མི་མང་ཚོགས་ཁྲོད་ནས་གནད་དོན་དེའི་ཐོག་བློ་འཚབ་དང་བཅས་ཁ་སང་ནས་བཟུང་སྤྱི་ཚོགས་དྲྭ་རྒྱའི་ཐོག་ཚོར་ཤུགས་ཆེན་པོས་སྤྲུལ་སྐུ་ཨོ་རྒྱན་སྟོབས་རྒྱལ་ལ་ངོ་རྒོལ་དང་། ༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་མཚན་སྙན་སྲུང་སྐྱོབ་ཞུ་དགོས་པ་ནི་དབུས་བོད་མིའི་སྒྲིག་འཛུགས་ཀྱི་ལས་འགན་གཙོ་བོ་ཞིག་ཡིན་པའི་བསམ་ཚུལ་ཤུགས་ཆེ་སྤེལ་མཁན་ཡོད་པ་རེད།བོད་མིའི་སྒྲིག་འཛུགས་བཀའ་ཤག་གིས་དེ་རིང་ཉིན་རྒྱབ་དེ་གའི་བོད་ཡིག་དྲྭ་གནས་ཐོག་གསལ་བསྒྲགས་ཤིག་སྤེལ་བར་སྤྲུལ་སྐུ་ཨོ་རྒྱན་སྟོབས་རྒྱལ་ནས་སྤྱི་ཚོགས་དྲྭ་ལམ་བརྒྱུད་༸གོང་ས་མཆོག་གིས་དྲྭ་བརྙན་བརྒྱུད་བཀའ་དབང་བསྩལ་རྒྱུ་དེ་དཔེར་བཟུང་ནས་བླ་ཆེན་རྣམ་པས་སྤྱི་ཚོགས་དྲྭ་ལམ་ཐོག་བཀའ་དབང་དང་བྱིན་རླབས་གནང་བ་དེ་དག་བསྟན་པ་ཉམས་པ་དང་བཤིག་པའི་རྒྱུ་རྐྱེན་དུ་འགྲོ་ཚུལ་དང་བཅས་མཚན་སྨད་ཞུས་པར་བོད་མིའི་སྒྲིག་འཛུགས་བཀའ་ཤག་ལ་བློ་ཕམ་ཚད་མེད་དང་བྱ་སྤྱོད་དེ་བཞིན་ནོར་འཁྲུལ་དུ་ངོས་འཛིན་ཞུ་ཡི་ཡོད་ཅེས་གསུངས་འདུག བཀའ་ཤག་གིས་ད་དུང་༸གོང་ས་༸སྐྱབས་མགོན་ཆེན་པོ་མཆོག་ནི་བོད་མི་ཙམ་མ་ཟད་འཛམ་གླིང་སྤྱི་དང་ལྷག་དོན་རྒྱ་ནག་སྐམ་ས་ཆེན་མོའི་ནང་བོད་བརྒྱུད་ནང་བསྟན་ལ་དོ་དབྱིངས་ཡོད་མཁན་ཚོའི་ངོས་ནས་གུས་བརྩི་ཆེན་པོ་ཞུ་ཡུལ་ཞིག་ཡོད་སྟབས་དེང་གཉན་འཕྲང་གི་དུས་དང་བསྟུན་དུས་ཀྱི་དགོས་མཁོ་ལ་ཆེད་དམིགས་ཀྱིས་ཐུགས་བརྩེ་ཆེན་པོས་ཕྱི་ནང་གི་དད་ལྡན་ཡོངས་ལ་བཀའ་དབང་དང་བྱིན་རླབས་བསྩལ་བར་སྙིང་དབུས་ནས་བཀྲིན་བླ་མེད་དུ་ཆེ་ཞེས་ཞུས་འདུག་པ་དང་འབྲེལ། སྒོ་རྒྱ་བསྡམས་པའི་དུས་འདིར་ཕྱི་ནང་གི་དད་ལྡན་སེར་སྐྱ་མང་ཚོགས་དང་བཀའ་ཤག་མཚན་འཁོད་ཞུ་སྙན་འབུལ་ལམ་ཞུས་པ་ལྟར་ས་ག་ཟླ་བའི་དུས་ཆེན་དང་བསྟུན་བཀའ་དབང་བཀྲིན་བསྩལ་རྒྱུའི་བཀའ་བཞེས་བཟང་པོ་སྨིན་བསྩལ་མཛད་པ་འདི་ནི་སྐལ་བཟང་གི་གོ་སྐབས་རིན་ཐང་བྲལ་བ་ཞིག་ཡིན་པ་གསུངས་འདུགརྩ་བའི་སྤྱི་ཟུར་སྤྲུལ་སྐུ་ཨོ་རྒྱན་སྟོབས་རྒྱལ་གྱི་བཀའ་མོལ་དེ་ནི་ཉེ་ལམ་ཁོང་གིས་སྤྱི་ཚོགས་དྲྭ་རྒྱའི་ཐོག་གཏེར་སྟོན་མཆོག་གྱུར་གླིང་པའི་མཛད་རྣམ་ངོ་སྤྲོད་དང་སྦྲགས་ཏེ་གསུངས་ཡོད་པ་ཞིག་དང་། དྲྭ་ལམ་ཐོག་བོད་མི་རྣམས་ནས་དེར་སྐྱོན་བརྗོད་ཤུགས་ཆེན་པོ་བྱས་པ་དང་། ཆབས་ཅིག་ཏུ་འཛིན་སྐྱོང་བཀའ་ཤག་དང་ཆོས་ལུགས་སྤྱི་འཐུས་རྣམས་ནས་ཞལ་བཙུམ་ཏེ་བཞུགས་ན་འགྲིག་གི་མེད་པར་འགྲེལ་བརྗོད་གནང་མཁན་བྱུང་བ་མ་ཟད། ཁ་སང་བོད་མིའི་སྒྲིག་འཛུགས་ཆོས་རིག་བཀའ་བློན་གྱི་མཚན་ཐོག་ནས་གནད་དོན་དེའི་ཐོག་གསལ་བཤད་ཅིག་སྤེལ་བའི་ནང་སྤྲུལ་སྐུ་ཨོ་རྒྱན་སྟོབས་རྒྱལ་ནི་ནམ་རྒྱུན་རང་ནས་གཟིགས་ཚོར་ཇི་བྱུང་འཛེམ་ཟོན་མེད་པར་གསུང་མཁན་ཞིག་དང་རང་ལ་ཐུགས་ཚོར་གང་བྱུང་བ་རྣམས་ཞལ་ནས་ཐལ་བ་ཞིག་ཡིན་པ་ལས་རྒྱབ་ལྗོངས་ཀྱི་དམིགས་ཡུལ་གཞན་ཞིག་ཡོད་པར་ཡིད་ཆེས་མེད་ཀྱང་། དེར་རྟེན་མང་ཚོགས་ཁྲོད་དོན་མེད་བློ་ཕམ་དང་བསམ་ཚུལ་མི་ཉུང་བ་ཞིག་ཡོང་གཞིར་གྱུར་བར་འགྲེལ་བརྗོད་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་དང་བླ་ཆེན་གཞན་སུ་དང་སུས་དྲྭ་བརྙན་བརྒྱུད་དབང་དང་བྱིན་རླབས་གནང་སྐབས་དྲྭ་ཐོག་ནས་ཉན་མཁན་དང་ལྟ་མཁན་ཚང་མར་དབང་དང་བྱིན་རླབས་ངོ་མ་ཐོབ་པར་དགོངས་མཁན་དང་གསུང་མཁན་ཕལ་ཆེར་སུའང་མེད། ཉན་མཁན་སོ་སོའི་དབང་པོ་དང་དད་པས་ལྕོགས་ན་བླ་མའི་ཐུགས་རྗེ་དང་ཆོས་ཀྱི་བག་ཆགས་གཉིས་ལ་བརྟེན་ནས་དབང་དངོས་གཞི་མ་ཐོབ་ཀྱང་བྱིན་རླབས་ཁྱད་པར་ཅན་རེ་འཇུག་ཐུབ་པར་ཐེ་ཚོམ་དང་རྩོད་མེད་ཡིན་པ་མ་ཟད། གསང་སྔགས་ཁྲོམ་བསྒྲགས་མི་བྱེད་པའི་གསང་སྔགས་ཀྱི་དམ་ཚིགས་ཡོད་པ་བདེན་ནའང་། དེ་དག་ཐད་དུས་རབས་མང་པོའི་སྔོན་རོལ་ནས་འགལ་འཛོལ་ཉམས་ཆག་ཅི་ཆད་སོང་བཞིན་ཡོད་པ་དང་དེ་ལ་བརྟེན་ནས་བསྟན་པ་ལ་གནོད་སྐྱོན་ཡང་ཅི་ཆེ་བྱུང་ཡོད་དེ་ལྟར་ཡང་དེ་དག་གི་ལེ་ཁག་དང་ཉེས་འགན་ཐབས་ཅད་༸གོང་ས་མཆོག་གིས་དབུས་པའི་ད་ལྟའི་བསྟན་བདག་རྣམ་པར་དཀྲི་རྒྱུ་ནི་ལོ་རྒྱུས་དང་རྒྱུ་མཚན་གནས་སྟངས་གང་ལ་གཞིགས་ཀྱང་འོས་འཚམས་ཤིག་རྩ་བ་ནས་མ་རེད་ཅེས་སོགས་འགྲེལ་བརྗོད་གནང་ཡོད་པ་རེད།ཆོས་རིག་བཀའ་བློན་མཆོག་གིས་གསལ་བཤད་དེ་སྤེལ་མ་ཐག་ཏུ་བོད་མི་རྣམས་ནས་གསལ་བཤད་དེ་ནི་༸གོང་ས་མཆོག་ལ་མཚན་སྨད་ཞུ་མཁན་སྤྲུལ་སྐུ་ཨོ་རྒྱན་སྟོབས་རྒྱལ་ལ་དག་འབུད་བྱེད་པ་བཞིན་དུ་ངོས་འཛིན་གྱིས་བོད་མིའི་སྒྲིག་འཛུགས་ཀྱི་གནང་ཕྱོགས་ལ་སྐྱོན་བརྗོད་ཤུགས་ཆེ་གནང་རྗེས། ཆོས་རིག་བཀའ་བློན་མཆོག་གིས་སླར་ཡང་ཆོས་རིག་ལས་ཁུངས་ཀྱི་ངོ་དེབ་ཐོག་གསལ་བསྒྲགས་འཕར་མ་ཞིག་སྤེལ་སྟེ་སྐུ་ཉིད་ནད་དགོངས་ཐོག་ཡོད་པ་དང་ད་རེས་ཆོས་ཕྱོགས་དང་འབྲེལ་བའི་གནས་ཚུལ་ཚབས་ཆེན་ཞིག་གློ་བུར་ཐོན་པ་དེ་སེམས་ཀྱིས་མ་བཟོད་པར་སྐབས་འབྲེལ་ཆོས་ཕྱོགས་ཀྱི་གླེང་གཞི་གང་ཡིན་དེ་ཁོ་ནའི་ཐོག་ལ་གསལ་བཤད་གནད་བསྡུས་ཤིག་ཆོས་རིག་བཀའ་བློན་གྱི་མཚན་ཐོག་ནས་སྤེལ་བ་ལས་དེ་འབྲེལ་གྱི་གནད་དོན་གཞན་གྱི་ཐོག་བཀའ་ཤག་ནས་ལན་འདེབས་གནང་ངེས་དང་། གསལ་བསྒྲགས་དང་པོ་དེ་ནི་ཆོས་རིག་བཀའ་བློན་སྒེར་གྱི་གསལ་བསྒྲགས་ཞིག་ཡིན་པར་འགྲེལ་བརྗོད་གནང་ཡོད་པ་རེད། དེའི་བར་ན་སྤྲུལ་སྐུ་ཨོ་རྒྱན་སྟོབས་རྒྱལ་གྱིས་ཆོས་རིག་བཀའ་བློན་མཆོག་གི་མཚན་ཐོག་ཁོ་པས་བཤད་པའི་སྐད་ཆ་དེ་དག་མི་གཞན་གྱིས་བཅད་གཏུབ་མང་པོ་བྱས་ནས་དྲྭ་རྒྱའི་བརྒྱུད་ལམ་ཁག་ཏུ་སྤེལ་བ་ཞིག་ཡིན་པ་དང་། རིང་མིན་༸གོང་ས་མཆོག་གིས་སྤྱན་རས་གཟིགས་ཀྱི་བཀའ་དབང་གི་སྟ་གོན་དང་དངོས་གཞི་བཅས་སོ་སོར་བསྩལ་བསྩལ་གཏན་འཁེལ་ཡོད་སྟབས་མ་འོངས་པར་དབང་གནང་མཁན་ཚོས་དེར་མིག་དཔེ་བལྟས་ན་རྒྱུད་སྡེ་ཁག་གི་དགོངས་དོན་དང་མི་མཐུན་པར་བསམ་ནས་བསམ་འཆར་ཙམ་ཞུས་པ་ཡིན་སྐོར་གསུངས་ཡོད་པ་རེད། གང་ལྟར་སྤྲུལ་སྐུ་ཨོ་རྒྱན་སྟོབས་རྒྱལ་གྱི་བཀའ་མོལ་དེར་བོད་མི་ཁག་ཅིག་གིས་སྐྱོན་བརྗོད་དང་བཅས་ཏེ་ཁོང་གིས་དབང་གི་ཆོ་ག་བསྩལ་ཕྱོགས་དང་འབྲེལ་བའི་སྐོར་བསམ་ཚུལ་མི་མཐུན་པ་བཤད་ཆོག་ཀྱང་། ༸གོང་ས་༸སྐྱབས་མགོན་ཆེན་པོ་མཆོག་ལ་བསྟན་བཤིག་ཞེས་མཚན་སྨད་ཞུས་པ་དེ་བློ་ཡུལ་ལ་མ་ཤོང་པ་ཞིག་ཏུ་འགྲེལ་བརྗོད་གནང་མཁན་ཡོད་པ་དང་། དེ་བཞིན་སེར་མོ་བ་མང་དག་ཅིག་གིས་སྒེར་སོ་སོའི་ཉམས་རྟོགས་ཀྱིས་དཔྱད་ནས་དྲྭ་ལམ་བརྒྱུད་དབང་བསྩལ་ན་ཆོག་པའི་དག་སེལ་གནང་མཁན་འབྱུང་བཞིན་པ་མ་ཟད། ཁག་ཅིག་གིས་དེ་སྔ་༸གོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་བསྩལ་སྐབས་སྔར་བཅོམ་ལྡན་འདས་ཞལ་བཞུགས་པའི་ཁ་ཐུག་ལ་འཕྲིན་གྱི་སྒོ་ནས་བསྙེན་པར་རྫོགས་ཆོག་པའི་བཀའ་སློབ་བསྩལ་བ་ལུང་འདྲེན་གྱིས་ཚོར་ཤུགས་ཆེན་པོས་ཁུངས་སྐྱེལ་གནང་མཁན་ཡོད་པ་དང་ཆབས་ཅིག ཕྱོགས་གཞན་ཞིག་ནས་བོད་མི་ཉུང་ཤས་ཤིག་གིས་ད་རེས་ཀྱི་གནད་དོན་དང་འབྲེལ་མང་གཙོའི་སྤྱི་ཚོགས་ནང་གི་འདྲ་མཉམ་གྱི་གནས་བབ་དང་སྨྲ་བརྗོད་རང་དབང་སྐོར་ལ་དྲི་བ་གནང་མཁན་ཡང་འདུག