རྒྱལ་སྤྱི།

རྒྱ་གར་གྱི་ NDTV བརྒྱུད་ལམ་གྱིས་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་དང་ཡུན་རིང་ནས་བོད་དོན་རྒྱབ་སྐྱོར་གནང་མཁན་སྐུ་ཞབས་ Richard Gere ལགས་སུ་བཅར་འདྲི་ཞུས་པའི་ཁྲོད་ཁོང་གིས་དེང་སྐབས་ཨུ་རུ་སུ་ལས་རྒྱ་ནག་རྒྱལ་ཁབ་དེ་ཉིད་ཉེན་འཚབ་ཆེ་ཤོས་ཆགས་ཡོད་པ་གསུངས་འདུགཁ་སང་ NDTV བརྒྱུད་ལམ་གྱིས་སྐུ་ཞབས་ Richard Gere ལགས་ལ་བཅར་འདྲི་ཞུས་པའི་ལས་རིམ་རྒྱང་སྲིང་གནང་བར་སྐུ་ཞབས་ Richard Gere ལགས་ཀྱིས་ད་བར་ཁོང་ནས་ཨ་རིའི་གྲོས་ཚོགས་དང་གཞུང་གི་ལས་ཁུངས་གང་དུ་ཕེབས་ཀྱང་ཚང་མས་རྒྱ་ནག་ལ་གདོང་ལེན་བྱེད་དགོས་ཞེས་ཞལ་གཅིག་གྲག་གི་ཐོག་ནས་གསུངས་སྐོར་དང་འབྲེལ། ཨ་རི་ཙམ་མིན་པར་རྒྱལ་སྤྱིའི་ཁྱོན་ཡོངས་ནས་དེང་སྐབས་ཉེན་འཚབ་ཆེ་ཤོས་ཀྱི་རྒྱལ་ཁབ་དེ་ཨུ་རུ་སུ་མ་ཡིན་པར་རྒྱ་ནག་ཡིན་པ་གསལ་པོ་ཤེས་ཀྱི་ཡོད་པ་གསུངས་འདུག ཁོང་གིས་དེ་སྔ་ཨ་རིའི་ Nixon གཞུང་འཛིན་སྐབས་ནས་རྒྱ་ནག་ནང་དུ་ཤེས་ཡོན་ཅན་གྱི་འབྱོར་འབྲིང་སྤྱི་ཚོགས་ཤིག་བསྐྲུན་ཐུབ་ཡོད་ན་དེས་རྒྱ་ནག་ནང་མང་གཙོ་བཅོས་བསྒྱུར་དང་རྒྱལ་སྤྱིའི་ཁྲིམས་ལ་བརྩི་སྲུང་ཞུ་མཁན་གྱི་མེ་སེར་བསྐྲུན་པ་དང་འབྲེལ་རྒྱ་ནག་དང་ལྷན་དུ་ཚོང་འབྲེལ་ཐོག་ནས་ཨ་སྒོར་ཐེར་འབུམ་མང་པོའི་ཚོང་གི་རེ་བ་བྱས་ཡོད་ཀྱང་། རྒྱ་ནག་དམར་པོའི་གཞུང་དེ་ཐོན་ཁུངས་རྒྱ་ཆེན་པོ་ཡོད་སྟབས་དེ་ལྟར་བྱུང་མེད་པར་མ་ཟད། རྒྱ་ནག་དེ་མེད་ན་མེད་ཐབས་མེད་པ་དང་། རྒྱ་ནག་ལ་གནོད་པའི་བྱ་འགུལ་སྤེལ་མི་རུང་བའི་འཁྲུལ་སྣང་ལྟ་བུ་ཞིག་བསྐྲུན་ཡོད། འོན་ཀྱང་ད་ཆ་ཚང་མས་རྒྱ་ནག་དེ་མེད་ན་མེད་ཐབས་མེད་པ་ཞིག་མ་ཡིན་པ་དང་། ང་ཚོར་དགོས་པ་ནི་རྒྱལ་སྤྱིའི་ཁྲིམས་ལ་བརྩི་སྲུང་ཞུ་མཁན་དང་འགྲོ་བ་མིའི་ཐོབ་ཐང་གི་རིན་ཐང་བརྩི་སྲུང་ཞུ་མཁན་གྱི་རྒྱལ་སྤྱིའི་མང་ཚོགས་དགོས་པ་དེ་གསལ་པོ་ཤེས་ཡོད་པ་གསུངས་འདུགདེ་བཞིན་ཁོང་གིས་དབང་ཆ་གཅིག་བསྡུས་རིང་ལུགས་ཀྱི་རྒྱ་ནག་གཞུང་དེས་སོ་སོའི་མང་ཚོགས་ཙམ་མ་ཟད་རྒྱལ་སྤྱིའི་ཁྱོན་དུ་ལོ་རྒྱུས་ཐོག་བོད་དེ་རྒྱ་ནག་གི་ཆ་ཤས་ཡིན་སྐོར་འཁྱོག་བཤད་བྱེད་བཞིན་པ་དེ་དག་མཐའ་གཅིག་ཏུ་ནོར་འཁྲུལ་ཡིན་པ་དང་། ཉེ་ཆར་ཨ་རིའི་གྲོས་ཚོགས་ནང་ཉན་ཞིབ་ལས་རིམ་ཚོགས་པར་རྒྱ་རིགས་མཁས་པ་རང་གིས་ལོ་རྒྱུས་ཐོག་བོད་དེ་རྒྱ་ནག་གི་ཆ་ཤས་ནམ་ཡང་མིན་པར་གསལ་བཏོན་གནང་བར་མ་ཟད་རྒྱ་ནག་དེ་ཉིད་ཉེ་བའི་དུས་སྐབས་ལ་མ་གཏོགས་སྤྱི་མཐུན་རྒྱལ་ཁབ་ཅིག་ཆགས་མེད་པ་དང་། ལོ་རྒྱུས་ཁྲོད་ལོ་ངོ་སྟོང་ཕྲག་མང་པོའི་ནང་སྐབས་གཅིག་ལ་བོད་ཀྱི་ Caspean མཚོ་བར་དུ་ཧ་ལམ་ཨེ་ཤ་ཡའི་གླིང་ཆེན་ཡོངས་རྫོག་དབང་བསྒྱུར་ཡོད་པ་དང་སྐབས་གཅིག་ལ་སོག་པོའི་མངའ་དབང་བཟུང་ཡོད་པ་སོགས་གསལ་ཡོད་ཀྱང་། རྒྱ་ནག་གི་ངོས་ནས་རང་ཉིད་སྟོབས་ཤུགས་ཆེན་པོ་ཡིན་པ་དང་ལོ་རྒྱུས་ཁྲོད་རྒྱ་ནག་གིས་ཨེ་ཤ་ཡ་ཡོངས་རྫོགས་དབང་བསྒྱུར་ཡོད་པ། དེ་བཞིན་བོད་དེ་ལོ་རྒྱུས་ཐོག་རྒྱ་ནག་གིས་བཏང་འཛིན་བྱས་ཡོད་པ་སོགས་ཀྱི་འཁྱོག་བཤད་འབའ་ཞིག་བྱས་ཡོད། ད་ཆ་རྒྱ་ནག་གིས་ཤར་ཏུ་ཀིས་ཐན་གྱི་ཡུ་གུར་མང་ཚོགས་ཐོག་དེ་ལྟ་བུའི་བྱ་སྤྱོད་སྤེལ་བཞིན་ཡོད་པ་དང་དེང་སྐབས་རྒྱ་ནག་གིས་ལོག་བཤད་ཤུགས་ཆེར་སྤེལ་རྐྱེན་རྒྱལ་སྤྱིའི་ཁྲོད་རྒྱ་ནག་དང་ལྷན་དུ་ཚོང་འབྲེལ་ལ་རྔམ་ནས་ཚོང་འབྲེལ་བྱེད་མཁན་ཚོས་རང་གིས་རང་ལ་དམ་དྲག་བྱེད་བཞིན་ཡོད་པ་སོགས་གསུངས་འདུགཁོང་གིས་ད་དུང་རྒྱ་ནག་གཞུང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་སྨད་དེ་སྐྱོན་བརྗོད་འདྲ་མིན་ཞུ་བཞིན་ཡོད་ཀྱང་། རྒྱ་ནག་གཞུང་གིས་སོ་སོའི་བྱས་པ་དེར་ཁྲིམས་དང་ལོ་རྒྱུས་ཀྱི་རྒྱབ་རྟེན་གང་ཡང་མེད་པ་ཤེས་ཀྱི་ཡོད་པ་དང་འབྲེལ་ཏེ། མང་ཚོགས་ཀྱི་སྐྱོན་བརྗོད་དང་དགོངས་པ་ཇི་ལྟར་བཞེས་ཀྱི་ཡོད་པར་དངངས་སྐྲག་ཡོད་པའི་ཁྲོད་རྒྱ་ནག་དེ་དམག་དང་ལྟ་སྲུང་འཕྲུལ་ཆས་ལ་འགྲོ་གྲོན་མང་ཤོས་གཏོང་མཁན་གྱི་རྒྱལ་ཁབ་ཅིག་ཡིན་པ་རེད། དེང་སྐབས་རྒྱལ་སྤྱིའི་ཁྲོད་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་དྲང་བདེན་དང་འཚེ་མེད་ཞི་བདེ་སོགས་ཀྱི་ལམ་སྟོན་མཛད་མཁན་ཞིག་ཡིན་པར་ངོས་འཛིན་ཞུས་པ་དང་འབྲེལ་ནས་མང་ཚོགས་ཀྱི་དགའ་མོས་དང་གུས་བརྩི་ཆེན་པོ་ཞུ་ཡུལ་ཞིག་ཏུ་གྱུར་ཡོད་པ་སུངས་འདུག དེ་བཞིན་མ་འོངས་པའི་༸རྒྱལ་བའི་༸སྐུའི་ཡང་སྲིད་ཀྱི་གནད་དོན་ཐོག་རྒྱ་ནག་གིས་བདག་དབང་རྩོད་བཞིན་པ་དང་འབྲེལ་ནས་བཅར་འདྲི་ཞུས་པར་ཁོང་གིས་དེ་སྔ་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གིས་དབང་བསྒྱུར་ཡོད་པའི་ས་ཁུལ་དུ་༸སྐུའི་ཡང་སྲིད་འཁྲུངས་རྒྱུ་མིན་སྐོར་བཀའ་གསལ་པོ་སྩལ་ཡོད་སྟབས། ཆོས་མེད་སྨྲ་བའི་རྒྱ་གཞུང་ལ་དེ་འབྲེལ་བདག་དབང་གང་ཡང་མེད་པར་བསྐྱར་ནན་གྱིས་གསུངས་ཡོད།རྩ་བའི་སྐུ་ཞབས་ Richard Gere ལགས་ཉེ་ཆར་བཞུགས་སྒར་དྷརྨ་སཱ་ལཱར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ དང་བོད་ལུགས་ལྟར་དགུང་གྲངས་ ༨༨ བདག་གིར་བཞད་པའི་༸སྐུའི་འཁྲུངས་སྐར་གྱི་མཛད་སྒོར་མཉམ་ཞུགས་གནང་ཕྱིར་རང་ལོ་ ༢༢ ཡིན་པའི་ཁོང་གི་བུ་རྒན་ཤོས་མཉམ་ཁྲིད་གནང་ཡོད་པ་རེད།ཁོང་གིས་༸སྐུའི་འཁྲུངས་སྐར་ཉིན་དང་རྗེས་སུ་གངས་སྐྱིད་སྲིད་སྐྱོང་ཚོགས་ཁང་དུ་བོད་མའི་སྒྲིག་འཛུགས་ཀྱི་མཛད་གཙོ་རྣམ་པ་གཙོས་ལས་ཁུངས་ཁག་གི་དྲུང་ཆེ་ཆུང་དང་སྲི་ཞུའི་ལས་བྱེད་རྣམས་ལ་བོད་དོན་སྐོར་གསུང་བཤད་གནང་ཡོད་པའི་ཁྲོད་བོད་མིའི་ངོས་ནས་བོད་དོན་འཐབ་རྩོད་ཐོག་༸གོང་ས་མཆོག་༸སྐུ་སྒེར་གཅིག་པོ་མ་ཡིན་པར་བོད་མི་མང་ཚོགས་ཀྱི་ངོས་ནས་འགན་མང་ཙམ་བཞེས་རྒྱུའི་དུས་ལ་སྤེབས་ཡོད་པ་གསུངས་ཡོད།

ཁ་སང་ཚེས་ ༡༣ ཉིན་ཨ་རིའི་གྲོས་ཚོགས་འོག་མར་ཡུན་རིང་ནས་བོད་དོན་རྒྱབ་སྐྱོར་གནང་མཁན་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ JimMcgovern ལགས་དང་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་སྤྱི་མཐུན་ཚོགས་པའི་སྣེ་ཁྲིད་པ་གྲོས་ཚོགས་འཐུས་མི་སྐུ་ཞབས་ Michael McCaul ལགས་རྣམ་གཉིས་ཀྱིས་ Promoting a Resolution to the Tibet-China Conflict Act ཞེས་གྲོས་ཚོགས་ཀྱི་ཆབ་སྲིད་ཚོགས་པ་དབྱེ་མེད་ཀྱིས་རྒྱབ་སྐྱོར་ཡོད་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ཞེས་པ་ཞིག་འདོན་སྤེལ་གནང་འདུགཁྲིམས་འཆར་ནང་རྒྱལ་སྤྱིའི་ཁྲིམས་འོག་ནས་བོད་ཀྱི་གནད་དོན་དེ་དུས་ད་ལྟའང་ཐག་གཅོད་མ་ཟིན་པར་ལུས་ཡོད་པ་དང་བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་ངོས་འཛིན། དེ་བཞིན་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་འབྲེལ་མོལ་བསྐྱར་གསོ་མ་གནང་བ་དེ་རྒྱ་ནག་གི་ནོར་འཁྲུལ་ཞིག་ཡིན་པ་དང་། རྒྱ་ནག་གི་ལོ་རྒྱུས་ཁྲོད་བོད་ཐོག་བདག་དབང་ཡོད་སྐོར་བརྗོད་བཞིན་པ་དེ་འཁྱོག་བཤད་འབའ་ཞིག་ཡིན་པ་སོགས་འཁོད་འདུག ཁྲིམས་འཆར་དེས་ཨ་རི་སྲིད་གཞུང་གི་བཞེངས་ཕྱོགས་མངོན་གསལ་གནང་བའི་ཐོག་ནས་ཨ་རིའི་བོད་དོན་དམིགས་བསལ་འབྲེལ་མཐུད་པར་རྒྱ་ནག་གིས་བོད་དང་བོད་དོན། ༸གོང་ས་མཆོག་དང་བོད་མིའི་སྒྲིག་འཛུགས་བཅས་ལ་འཁྱོག་བཤད་སྤེལ་བཞིན་པར་གདོང་ལེན་གྱི་ནུས་པ་ཤུགས་ཆེ་རུ་གཏང་རྒྱུ་ཡིན་པ་དང་། བོད་ཅེས་པ་བོད་རང་སྐྱོང་ལྗོངས་ཟེར་བ་ཁོ་ན་མ་ཡིན་པར། ཀན་སུའུ་དང་ཟི་ཁྲོན། མཚོ་སྔོན་དང་ཡུན་ནན་ཞིང་ཆེན་ཁག་གི་ནང་འཆར་འགོད་བྱས་པའི་བོད་ཀྱི་ས་ཁུལ་ཁག་ཀྱང་དེ་མཚུངས་ཡིན་པ་མངོན་གསལ་གནང་རྒྱུ་ཡིན་པ་འཁོད་འདུག ཁ་སང་གྲོས་ཚོགས་ནང་ཁྲིམས་འཆར་འདོན་སྤེལ་གྱི་ལས་རིམ་གྲུབ་མ་ཐག་ཏུ་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་དང་རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་ཚོགས་གཙོ་བུ་ཆུང་ཚེ་རིང་ལགས་རྣམ་གཉིས་ཀྱིས་བོད་དོན་ཁྲིམས་འཆར་དེར་དགའ་བསུ་དང་འབྲེལ་བའི་བརྙན་ཐུང་ཞིག་འདོན་སྤེལ་གནང་སྟེ། གཏམ་བཟང་དེ་ཡོངས་གྲགས་གནང་འདུག་པར་ཁོང་གཉིས་ནས་ཨ་རིའི་གྲོས་ཚོགས་འོག་མ་དང་སྒོས་ཁྲིམས་འཆར་འདོན་སྤེལ་གནང་མཁན་གྲོས་ཚོགས་འཐུས་མི་སྐུ་ཞབས་ JimMcgovern ལགས་དང་གྲོས་ཚོགས་འཐུས་མི་སྐུ་ཞབས་ Michael McCaul ལགས་རྣམ་གཉིས་ལ་ཐུགས་རྗེ་ཆེ་ཞུས་པ་དང་འབྲེལ། གྲོས་ཚོགས་སུ་ཁྲིམས་འཆར་དེ་ལྟ་བུ་འདོན་སྤེལ་གནང་བ་ནི་ཨ་རིའི་ངོས་ནས་བོད་དོན་རྒྱབ་སྐྱོར་ཐད་མུ་མཐུད་ནས་མདུན་སྐྱོད་དང་རྒྱབ་སྐྱོར་ཤུགས་ཆེ་རུ་ཕྱིན་པ་ཞིག་མཚོན་གྱི་ཡོད་པ་དང་། ཁྲིམས་འཆར་འདིའི་ཐོག་ནས་རྒྱ་ནག་གིས་བོད་བཙན་བཟུང་བྱས་ཏེ་ཁྲིམས་ཀྱི་ཐོག་ནས་བོད་ཀྱི་བདག་དབང་རྩོད་བཞིན་ཡོད་ཀྱང་། ལོ་རྒྱུས་ཐོག་ནས་རྒྱ་ནག་ལ་བོད་ཀྱི་བདག་དབང་མེད་པ་དང་བོད་རྒྱའི་དཀའ་རྙོག་སེལ་མ་ཐུབ་པ་དེ་མུར་ལུས་ཡོད་སྟབས། རྒྱ་ནག་གཞུང་གི་ངོས་ནས་བོད་མི་དང་ལྷན་དུ་འབྲེལ་མོལ་བསྐྱར་གསོ་བརྒྱུད་དེ་བོད་རྒྱའི་དཀའ་རྙོག་མ་སེལ་བར་དུ་རྒྱ་ནག་ལ་བོད་ཀྱི་བདག་དབང་གང་ཡང་མེད་ཅེས་མངོན་གསལ་གནང་གི་ཡོད་པ་གསུངས་འདུག ཁ་སང་གྲོས་ཚོགས་སུ་ཁྲིམས་འཆར་འདོན་སྤེལ་གནང་བ་དང་འབྲེལ་ཏེ། སྐུ་ཞབས་ Jim Mcgovern ལགས་ཀྱིས་ཨ་རིའི་གྲོས་ཚོགས་ཀྱི་ངོས་ནས་དུས་རྟག་ཏུ་བོད་རྒྱའི་དཀའ་རྙོག་དེ་ཞི་བའི་ཐོག་ནས་སེལ་ཐུབ་རྒྱུར་རྒྱབ་སྐྱོར་གནང་མཁན་ཞིག་ཡིན་པ་དང་། ཨ་རི་གཞུང་གི་ངོས་ནས་རྒྱ་ནག་གི་དཔོན་རིགས་རྣམས་ལ་ཆ་རྐྱེན་གང་ཡང་མེད་པར་བོད་རྒྱ་འབྲེལ་མོལ་བྱེད་དགོས་པའི་སྐུལ་མ་ཡང་ཡང་གནང་ཡོད་པ་དེ་ལྟར་ནའང་། ད་བར་རྒྱ་ནག་གི་ངོས་ནས་༸གོང་ས་མཆོག་ལ་སྐྱོན་བརྗོད་ཁོ་ན་བྱས་པར་བརྟེན་གྲུབ་འབྲས་སོན་མེད་སྐོར་དང་འབྲེལ། ཨ་རིའི་གྲོས་ཚོགས་འོག་མའི་ཆབ་སྲིད་ཚོགས་པ་དབྱེ་མེད་ཀྱིས་རྒྱལ་སྤྱིའི་ཁྲིམས་ལ་བརྩི་སྲུང་དང་རྒྱ་ནག་གི་འཁྱོག་བཤད་ལ་གདོང་ལེན་གནང་སྟེ། ཨ་རི་གཞུང་གི་སྲིད་བྱུས་སྲ་བརྟན་བཟོས་ནས་བོད་རྒྱ་ཕྱོགས་གཉིས་དབར་འབྲེལ་མོལ་གནང་སྟེ་ཕུགས་རྒྱང་རིང་པོའི་ཐབས་ལམ་འཚོལ་བར་དམིགས་བཞིན་ཡོད་ཅེས་གསུངས་འདུག དེ་བཞིན་གྲོས་ཚོགས་འཐུས་མི་སྐུ་ཞབས་ Michael McCaul ལགས་ཀྱིས་རྒྱ་ནག་གིས་ཕྱི་ལོ་ ༡༩༥༠ ལོར་བོད་ལ་བཙན་འཛུལ་བྱས་ནས་ད་བར་དྲག་གནོན་གྱི་སྲིད་བྱུས་སྤེལ་བ་བརྒྱུད་བོད་ཐོག་ཁྲིམས་འགལ་གྱི་བདག་དབང་རྩོད་པ་དང་། བོད་མིའི་འགྲོ་བ་མིའི་ཐོབ་ཐང་བརྩི་མེད་བཏང་བའི་གནད་དོན་ཡོད་པ་དང་། རྒྱ་ནག་གིས་བོད་མིའི་རང་དབང་འཕྲོག་ནས་ལོ་རྒྱུས་ལོག་བཤད་བྱས་ཁག་གིས་ཨ་རིའི་རྒྱལ་སྲུང་དང་བཟང་ཕྱོགས་ཀྱི་རིན་ཐང་ལ་ཉེན་འཚབ་བཟོ་བཞིན་ཡོད་སྐོར་གསུངས་པ་དང་ཆབས་ཅིག ད་རེས་ཀྱི་ཁྲིམས་འཆར་དེས་བོད་མི་རྣམས་ལ་མ་འོངས་ཕུགས་བསམ་ལ་ཐག་གཅོད་གནང་རྒྱུ། རྒྱ་ནག་ལ་བོད་ཀྱི་བདག་དབང་ཡོད་པའི་འཁྱོག་བཤད་ལ་གདོང་ལེན་གནང་ཐུབ་པ་ཞིག་ངེས་པར་དུ་བཟོ་གནང་རྒྱུ་ཡིན་པ་གསུངས་འདུགཁོང་གིས་ད་དུང་ད་རེས་སྐུ་ཞབས་ McCaul ཁོང་ནས་ Jim Mcgovern ལགས་དང་ལྷན་དུ་བོད་མི་རྣམས་ཀྱི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་གྱི་ཁྲིམས་འཆར་ཆེད་བཏོན་གནང་ཐུབ་པར་དགའ་ཚོར་ཆེན་པོ་བྱུང་ཞེས་དང་། ཁྲིམས་འཆར་འདིས་ཨ་རིའི་ངོས་ནས་བོད་མི་རྣམས་ནམ་ཡང་བརྗེད་ཐབས་མེད་པ་དང་། བོད་ཐོག་རྒྱ་ནག་གི་འཁྱོག་བཤད་ལ་གདོང་ལེན་མུ་མཐུད་གནང་རྒྱུ་ཡིན་པའི་བརྡ་ལན་ཞིག་གནང་བཞིན་ཡོད་པ་གསུངས་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཁྲིམས་འཆར་དེར་རྒྱབ་སྐྱོར་དང་འབྲེལ་ཏེ་རྒྱ་ནག་གིས་བོད་ཀྱི་བདག་དབང་རྩོད་བཞིན་པ་ལ་ལོ་རྒྱུས་ཀྱི་རྒྱབ་རྟེན་གང་ཡང་མེད་པ་དང་། རྒྱལ་སྤྱིའི་གཞུང་དམངས་གཉིས་ནས་དེ་བས་ཀྱང་རྒྱབ་སྐྱོར་མེད་པར་མ་ཟད། རྒྱ་ནག་གིས་རྒྱལ་སྤྱིའི་རྒྱལ་ཁབ་རྣམས་ལ་བོད་དེ་རྒྱ་ནག་གི་ཆ་ཤས་ཡིན་ཞེས་ནན་བཤད་བྱེད་འཇུག་བཞིན་ཡོད་པ་དེ་ལས་ཁྲིམས་ཐོག་ནས་རྒྱ་ནག་ལ་བོད་ཀྱི་བདག་དབང་མེད་པ་མངོན་གསལ་བྱེད་ཀྱི་ཡོད་པ་གསུངས་འདུག ཁྲིམས་འཆར་འདིས་ཨ་རི་གཞུང་གིས་བོད་རྒྱ་འབྲེལ་མོལ་ཡོང་ཐབས་ཀྱི་བྱ་འགུལ་ལ་ནུས་ཤུགས་ཆེ་རུ་གཏང་རྒྱུ་དང་བོད་མི་རྣམས་ལ་རང་གི་རྒྱལ་ཁབ་ཐོག་རང་ཐག་རང་གཅོད་ཀྱི་ཐོབ་ཐང་གནང་ངེས་ཡིན་པ་གསུངས་ཏེ། ཁྲིམས་འཆར་འདོན་མཁན་གྲོས་ཚོགས་འཐུས་མི་གཉིས་ལ་ཐུགས་རྗེ་ཆེ་ཞུས་འདུགདེ་བཞིན་ཉེ་ཆར་ཨ་རི་ནང་ཚོགས་པའི་རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐོག ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག་གིས་ཨ་རི་གྲོས་ཚོགས་ཀྱི་ཆབ་སྲིད་ཚོགས་པ་དབྱེ་མེད་ཀྱི་རྒྱབ་སྐྱོར་ཡོད་པའི་ཁྲིམས་འཆར་དེས་བོད་ཀྱི་ལོ་རྒྱུས་མངོན་གསལ་གནང་རྒྱུ་ཡིན་པ་དང་། བོད་ཀྱི་དཀའ་རྙོག་དེ་ཞི་བའི་ངང་ནས་སེལ་རྒྱུར་ཕན་ཐོགས་ཡོད་སྐོར་གསུངས་ཡོད། ཉེ་ཆར་ཟླ་བ་སྔོན་མར་ཨ་རིའི་གྲོས་ཚོགས་ནང་བོད་ཀྱི་ལོ་རྒྱུས་བདེན་དཔང་གི་ཉན་ཞིབ་ལས་རིམ་ཐོག་རྒྱལ་སྤྱིའི་རྩོད་རྙོག་འདུམ་འགྲིག་གི་ལས་དོན་གནང་མཁན་དང་བོད་རིག་པའི་མཁས་པ་ Michael Van Walt ལགས་དང་་རྒྱ་རིགས་ལོ་རྒྱུས་རིག་པའི་སློབ་དཔོན་དང་ཉམས་ཞིབ་པ་ Hon-Shiang Lau ལགས་བཅས་ཀྱིས་ལོ་རྒྱུས་ཐོག་ནས་རྒྱ་ནག་ལ་བོད་ཀྱི་བདག་དབང་མེད་པ་ཆེས་གསལ་བཏོན་གནང་ཡོད་པ་རེད།

ཁེ་ན་ཌའི་ཊོ་རོན་ཊོ་གྲོང་ཁྱེར་ནང་བསྟན་འཛིན་ནོར་བུ་ཟེར་བས་རང་ལོ་ ༢༨ ལ་སོན་པའི་བུ་མོ་ཉི་མ་སྒྲོལ་མ་ལགས་ལ་མེ་བརྒྱབ་རྐྱེན་ཁོ་མོ་ཉེ་ལམ་འདས་གྲོངས་སུ་སོང་བའི་གནས་ཚུལ་བྱུང་བ་ལྟར་ད་ཆ་སྤྱི་ཚོགས་དྲྭ་ལམ་ཐོག་བོད་མི་མང་དག་ཅིག་ནས་གནས་ཚུལ་དེའི་ཐོག་བློ་འཚབ་ཤུགས་ཆེ་དང་ཁོང་གི་ཤུལ་ལུས་ནང་མི་ཚོར་གདུང་སེམས་མཉམ་བསྐྱེད་ཞུས་པ་དང་ཆབས་ཅིག བེུད་ལ་དྲག་སྤྱོད་དང་བསམ་བློའི་འཕྲོད་བསྟེན་དང་འབྲེལ་བའི་གནད་དོན་ཐོག་དོ་སྣང་དང་བགྲོ་གླེང་མང་ཙམ་དགོས་པའི་བསམ་ཚུལ་འདོན་མཁན་མང་དག་ཅིག་འདུགཉེ་ལམ་ཕྱི་ཟླ་ ༦ ཚེས་ ༡༧ ཉིན་གྱི་ཉིན་དགུང་ཕྱག་ཚོད་ ༡༢་༢༥ ཡོལ་ཙམ་ལ་ཊོ་རོན་ཊོའི་ཀིཔ་གླིང་རླངས་འཁོར་འབབ་ཚུགས་སུ་ཉི་མ་སྒྲོལ་མ་ལགས་སུ་མེ་སྐྱོན་གྱི་དོན་རྐྱེན་བྱུང་འཕྲལ་དུ་མྱུར་སྐྱོབ་པས་ཁོང་ Sunnybrook Health Sciences Centre ཞེས་པའི་སྨན་ཁང་དུ་མྱུར་ཁྲིད་ཀྱིས་སྨན་བཅོས་བྱས་ཀྱང་ཕན་འབྲས་མ་བྱུང་བར་ཟླ་བ་འདིའི་ཚེས་ ༥ ཉིན་རྐྱེན་འདས་གྲོངས་སུ་སོང་བའི་ཡིད་སྐྱོ་བའི་གནས་ཚུལ་བྱུང་ཡོད་པ་རེད།དོན་རྐྱེན་དེ་བྱུང་འཕྲལ་ས་གནས་ཉེན་རྟོག་པས་རང་ལོ་ ༣༣ ཡིན་པའི་བསྟན་འཛིན་ནོར་བུ་ཞེས་པ་དེ་འཛིན་བཟུང་གིས་ཁྲིམས་འགལ་གྱི་བྱ་སྤྱོད་དེར་ཉེས་ཆད་དང་ཡོང་འགྱུར་ཕྱི་ཟླ་ ༧ ཚེས་ ༡༨ ཉིན་ཁྲིམས་ཁང་དུ་ཁྲིམས་ཆད་གཏང་རྒྱུ་ཡིན་པ་དང་། ཊོ་རོན་ཊོ་ཉེན་རྟོག་པའི་མགྲིན་ཚབ་པས་གནས་ཚུལ་དེ་མི་གསོད་གནས་ཚུལ་རྟོག་ཞིབ་པ་ Homicide Unit ཞེས་པར་རྩིས་སྤྲོད་བྱས་ཡོད་པ་བཞིན་རིམ་པས་ཁོང་རྣམས་ཀྱིས་ཐག་གཅོད་གནང་གི་ཡོད་སྐོར་གསུངས་པ་ལས། ད་ལྟའི་ཆར་བསྟན་འཛིན་ནོར་བུ་ཞེས་པ་དེའི་རྒྱབ་ལྗོངས་ལོ་རྒྱུས་སོགས་ཀྱི་སྐོར་ལ་གནས་ཚུལ་ཁ་གསལ་གང་ཡང་བཀོད་མི་འདུགཨོན་ཊ་རོ་ས་གནས་བོད་ཀྱི་བུད་མེད་ཚོགས་པ་ནས་ཕྱི་ཟླ་ ༧ ཚེས་ ༧ ཉིན་བསྒྲགས་གཏམ་ཞིག་སྤེལ་ཡོད་པའི་ནང་། དོན་རྐྱེན་དེའི་ཁྲོད་ཤུལ་ལུས་ནང་མི་དང་དགའ་ཉེ་ཚང་མར་གདུང་སེམས་མཉམ་བསྐྱེད་ཞུས་པ་མ་ཟད། དེ་ལྟ་བུའི་རྩུབ་སྤྱོད་ནི་ཆེས་མི་འོས་པ་ཞིག་ཡིན་པ་དང་། གནད་དོན་དེའི་རྐྱེན་པས་ང་ཚོའི་སྤྱི་ཚོགས་ནང་ཕོ་མོའི་དབྱེ་འབྱེད་དང་དྲག་སྤྱོད་འགོག་ཐབས་ཐད་སློབ་སྟོན་གནང་དགོས་པའི་ཐོག་སྤྱི་ཚོགས་ནང་བུད་མེད་ལ་དྲག་སྤྱོད་དང་རྩུབ་སྤྱོད་སོགས་འགོག་པར་ནུས་པ་མཉམ་སྤུངས་ཐོག་ནས་ལས་དོན་གནང་དགོས་པར་གཞེན་སྐུལ་གནང་འདུག དེ་བཞིན་ཨོན་ཊ་རོ་ས་གནས་བོད་ཀྱི་བུད་མེད་ཚོགས་པ་ནས་ཤེས་ཡོན་དང་སྣེ་ཁྲིད། དེ་བཞིན་སྤྱི་ཚོགས་ཀྱི་བྱེད་སྒོ་སོགས་ཀྱི་བརྒྱུད་ནས་ཕོ་མོ་དབྱེ་འབྱེད་ཀྱི་གནད་དོན་འགོག་ཐབས་བྱ་རྒྱུ་ཡིན་པ་ཆོད་སེམས་བརྟན་པོ་ཡོད་ཅེས་གསུངས་འདུགཁེ་ན་ཌའི་ཨོན་ཊ་རོ་མངའ་སྡེའི་གྲོས་ཚོགས་འཐུས་མི་བུ་འཁྲིད་དཀར་པོ་ཆེ་ལགས་ཀྱིས་ཀྱང་རང་གི་ངོ་དེབ་ཐོག་བསྒྲགས་གཏམ་སྤེལ་བའི་ནང་འདས་པོ་དེ་ཉིད་ལ་བསྔོ་སྨོན་དང་ཤུལ་ལུས་ནང་མིར་གདུང་སེམས་མཉམ་བསྐྱེད་ཞུས་པ་དང་འབྲེལ། ད་ལྟའི་ཆར་ཉེན་རྟོག་པས་ཕྱིར་བསྒྲགས་བྱས་པ་ལས་གཞན་པའི་གནས་ཚུལ་ཞིབ་ཕྲ་རྟོགས་དཀའ་རུང་། ཉི་མ་སྒྲོལ་མ་ལགས་རྐྱེན་འདས་སུ་ཕྱིན་པ་དེས་བེུད་ལ་དྲག་སྤྱོད་དང་བསམ་བློའི་འཕྲོད་བསྟེན་དང་འབྲེལ་བའི་དཀའ་ངལ་ཐོག་སེམས་འཚབ་ཞིག་ཡོད་སྐོར་གསུངས་འདུག སྤྱིར་སྤྱི་ཚོགས་ནང་དབྱེ་འབྱེད་ནང་ཚུད་པའི་མི་རིགས་དང་ཕྱིའི་རྒྱལ་ཁབ་ནས་གཞིས་སྤོ་བྱས་པའི་མི་རིགས་ཁྲོད་བསམ་བློའི་འཕྲོད་བསྟེན་དང་འབྲེལ་བའི་དཀའ་ངལ་ཧ་ཅང་ཆེན་པོ་ཡོད་པས་དེ་དག་ལ་རྒྱབ་སྐྱོར་དང་ལྟ་རྟོག་བྱེད་དགོས་གལ་ཡིན་པ་དང་། ཁོང་གྲོས་ཚོགས་འཐུས་མི་ཞིག་ཡིན་པའི་ཆ་ནས་ཀྱང་གནད་དོན་དེའི་ཐོག་དོ་སྣང་མུ་མཐུད་གནང་རྒྱུ་ཡིན་སྐོར་གསུངས་འདུགགཞི་རྩའི་ཊོ་རོན་ཊོ་ཉེན་རྟོག་པའི་མགྲིན་ཚབ་པ་ Alex Li ལགས་ཀྱིས་དོན་རྐྱེན་དེ་མ་བྱུང་གོང་ཁོང་གཉིས་དབར་ལབ་གླེང་བྱུང་ཡོད་སྐོར་འགྲེལ་བརྗོད་གནང་ཡོད་ཀྱང་། ཕྱིས་སུ་རྟོག་ཞིབ་བརྒྱུད་ཁོང་གཉིས་དབར་འབྲེལ་བ་གང་ཡང་མེད་པའི་གནས་ཚུལ་ར་སྤྲོད་བྱུང་ཡོད་ཚུལ་འཁོད་འདུག གནས་ཚུལ་དེ་བཙན་བྱོལ་བོད་མིའི་ཁྲོད་དུ་ཁྱབ་བསྒྲགས་ཇེ་ཆེར་འགྲོ་བཞིན་པ་དང་བསྟུན། སྤྱི་ཚོགས་དྲྭ་རྒྱའི་ནང་བོད་མི་ཁག་གཅིག་གིས་དེ་ལྟ་བུའི་གནས་ཚུལ་དེ་ཡོང་དགོས་པའི་རྒྱབ་ལྗོངས་དང་རྒྱུ་མཚན། ལྷག་པར་བེུད་ཐོག་རྩུབ་སྤྱོད་དང་བསམ་བློའི་འཕྲོད་བསྟེན་སྐོར་ལ་ཡོངས་གྲགས་ཀྱིས་གྲོས་བསྡུར་དང་བགྲོ་གླེང་མང་ཙམ་དགོས་པའི་བསམ་ཚུལ་ཤུགས་ཆེར་འདོན་བཞིན་ཡོད་པ་མ་ཟད། བོད་མིའི་སྒྲིག་འཛུགས་ཀྱི་ངོས་ནས་ཀྱང་དོ་སྣང་དགོས་པའི་དགོས་འདུན་གནང་མཁན་ཡང་འདུག ཤེས་རྟོགས་བྱུང་བར་རེས་གཟའ་པ་སངས་ཉིན་འདས་པོ་ཁོང་གི་སྐུ་ཕུང་བཞུགས་འབུལ་གནང་གི་ཡོད་པ་དང་ཨོན་ཊ་རོ་བོད་རིགས་ཚོགས་པའི་ངོས་ནས་བོད་མི་ཡོངས་ལ་དེ་འབྲེལ་ཐུགས་སྨོན་གནང་བའི་འབོད་སྐུལ་ཞུས་འདུག

རྒྱ་གར་གྱི་སྲིད་བློན་ན་རེནྡྲ་མོ་དི་་མཆོག་དང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་རྣམ་གཉིས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པར་རྒྱ་ནག་གིས་སྐྱོན་བརྗོད་བྱས་འདུག རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་རྒྱུན་ལྡན་ལྟར་བསྐོང་ཚོགས་བྱས་པའི་གསར་འགོད་གསལ་བསྒྲགས་ཐོག་བོད་དང་འབྲེལ་བའི་གནད་དོན་རྣམས་རྒྱ་ནག་རྒྱལ་ནང་གི་གནད་དོན་ཡིན་པ་དང་ཕྱི་ཕྱོགས་ནས་ཐེ་བྱུས་གནང་བར་ངོས་ལེན་མེད་སྟབས། རྒྱ་ནག་ནས་ཕྱི་ཕྱོགས་ཀྱི་དབུ་ཁྲིད་དང་༸གོང་ས་མཆོག་དབར་འབྲེལ་བ་ཡོངས་ལ་དགག་པ་ཡོད་ཅེས་བཤད་འདུག ཁོ་པས་ད་དུང་རྒྱ་གར་ཕྱོགས་ནས་རྒྱ་ནག་ལ་བོད་དོན་ཐོག་ཀྱི་བཞེངས་ཕྱོགས་ཁས་ལེན་གནང་བ་ལྟར་དོན་ལ་གནས་དགོས་པ་དང་བོད་དོན་དང་འབྲེལ་བའི་གནད་དོན་སྤྱོད་ནས་རྒྱ་ནག་ནང་མོལ་གྱི་གནད་དོན་ལ་ཐེ་བྱུས་གནང་མཚམས་འཇོག་དགོས་ཞེས་སྐྱོན་བརྗོད་གནང་འདུགགཞི་རྩའི་སྲིད་བློན་མོ་དི་མཆོག་ནས་༸རྒྱལ་བ་རིན་པོ་ཆེའི་༸སྐུའི་འཁྲུངས་སྐར་ལ་ཞལ་པར་བརྒྱུད་འཚམས་འདྲི་ཞུས་པ་དང་ཆབས་ཅིག་མགོན་པོ་༸གང་ཉིད་མཆོག་༸སྐུ་ཚེ་ཞབས་པད་བརྟན་པ་དང་༸སྐུ་ཁམས་གསལ་ཐང་ཡོང་བའི་སྨོན་འདུན་ཞུས་ཡོད་པ་ Twitter དྲ་གནས་ཐོག་བཀོད་ཡོད་པ་དང་འབྲེལ་ཏེ། རྒྱ་གར་གྱི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Arindam Bagchi ལགས་ཀྱིས་རྒྱ་ནག་ལ་སྲིད་བློན་མོ་དི་མཆོག་གིས་འདས་ལོར་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་ཡོད་པ་དང་།  རྒྱ་གར་གཞུང་གི་ངོས་ནས་ཀྱང་༸གོང་ས་མཆོག་སྐུ་མགྲོན་གལ་ཆེ་ཞིག་དང་ཆོས་ཕྱོགས་ཀྱི་དབུ་ཁྲིད་རླབས་ཆེན་ཞིག་ལ་ངོས་འཛིན་ཞུས་ཏེ་སྣེ་ལེན་ཞུ་རྒྱུ་ནི་མུ་མཐུད་ནས་ལག་བསྟར་གནང་བཞིན་པའི་སྲིད་བྱུས་ཞིག་ཡིན་པ་གསུངས་འདུག ལྷག་པར་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་ནི་རྒྱ་གར་ཙམ་མ་ཟད་ཕྱི་རྒྱལ་ཡུལ་གྲུ་ཁག་ཏུ་གནས་བཞུགས་༸གོང་ས་མཆོག་ལ་དད་གུས་ཡོད་མཁན་རྣམས་ནས་སྲུང་བརྩི་ཞུས་དང་ཞུ་བཞིན་ཡོད་པ་ལྟར་སྲིད་བློན་མོ་དི་མཆོག་གིས་༸སྐུའི་འཁྲུངས་སྐར་འཚམས་འདྲི་ཞུས་པ་དེའང་གཅིག་མཚུངས་ཡིན་པ་གསུངས་འདུགརྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་གིས་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་པར་སྐྱོན་བརྗོད་བྱས་ཏེ་༸གོང་ས་མཆོག་ནི་ཡུན་རིང་ནས་བོད་དེ་རྒྱ་ནག་དང་ཁ་བྲལ་ཐབས་གནང་བཞིན་ཡོད་སྟབས། ཨ་རིའི་ངོས་ནས་རྒྱ་ནག་ནང་མོལ་གྱི་གནད་དོན་ལ་གུས་བརྩི་ཞུས་ཏེ་༸གོང་ས་མཆོག་དང་འབྲེལ་བ་ཞུ་མཚམས་འཇོག་དགོས་པ་དང་འཛམ་གླིང་སྤྱིར་བརྡ་ལན་ནོར་བ་གཏོང་རྒྱུ་མཚམས་འཇོགས་དགོས་ཞེས་རེ་སྐུལ་ཞུས་འདུག གཞི་རྩའི་སྲིད་བློན་མོ་དི་མཆོག་གིས་དེ་སྔའི་བཞེངས་ཕྱོགས་དང་མི་འདྲ་བར་སྔ་ལོར་མགོན་པོ་༸གང་ཉིད་མཆོག་ལ་ཞལ་པར་ཕུལ་ཏེ་༸སྐུའི་འཁྲུངས་སྐར་གྱི་འཚམས་འདྲི་ཞུས་ཡོད་པ་མ་ཟད་དེའི་སྐོར་ Twitter དྲ་གནས་ཐོག་ཡོངས་གྲགས་གནང་ཡོད་པ། རྒྱ་གར་གྱི་དཔྱད་ཞིབ་པ་ཁག་ཅིག་གིས་སྲིད་བློན་མཆོག་ལ་བསྔགས་བརྗོད་དང་འབྲེལ། སྲིད་བློན་མཆོག་གི་གནང་སྟངས་དེ་རིམ་པས་སྲོལ་ལྟ་བུ་ཞིག་ལ་གྱུར་ཡོད་པ་དེ་ནི་བཟང་ཕྱོགས་ཀྱི་རྣམ་པ་ཞིག་ལ་ངོས་འཛིན་གནང་ཡོད། རྩ་བའི་རྒྱ་དཀར་ནག་གཉིས་དབར་ཕྱི་ལོ་ ༢༠༢༠ ལོར་འཕགས་བོད་མཐའ་མཚམས་ཀྱི་རྩོད་རྙོག་བྱུང་ནས་ཕྱོགས་གཉིས་ཀྱི་འབྲེལ་ལམ་ལ་དོ་ཕོག་གང་ཙམ་ཐེབས་ཡོད་པ་རེད། ཁ་སང་ཨིན་ཌོ་ནི་ཤ་ཡའི་བྷ་ལི་ནང་ཚོགས་པའི་ G20 ཡི་ཕྱི་སྲིད་བློན་ཆེན་ཚོགས་འདུར་རྒྱ་ནག་གི་ཕྱི་སྲིད་བློན་ཆེན་ Wang Yi དང་རྒྱ་གར་གྱི་ཕྱི་སྲིད་བློན་ཆེན་ Jaishankar གཉིས་ཐུག་འཕྲད་ཀྱིས་ཆུ་ཚོད་གཅིག་ཙམ་རིང་ཚོགས་འདུ་ཚོགས་ཡོད་པ་དང་། རྒྱ་ནག་ཕྱི་སྲིད་ལས་ཁུངས་ཀྱིས་གསར་འགོད་བསྒྲགས་གཏམ་སྤེལ་བ་དེ་འབྲེལ་ Xinhua གསར་ཁང་གིས་གནས་ཚུལ་བཀོད་པའི་ནང་Wang Yi ཡིས་Jaishankar ལ་རྒྱ་དཀར་ནག་གཉིས་ནས་འདི་ལོ་ཟླ་བ་ ༣ ནས་རྩིས་ཏེ་ཕྱོགས་གཉིས་ཀྱི་མི་མཐུན་པའི་གནད་དོན་ལ་ཕན་ཚུན་དབར་གོ་བསྡུར་གྱིས་ད་ཆ་ཕྱོགས་གཉིས་ཀྱི་འབྲེལ་ལམ་དེ་ཡར་རྒྱས་ཀྱི་རྣམ་པ་ཡོད་པ་བཤད་པ་མ་ཟད་རྒྱལ་ཁབ་གཉིས་ཀྱི་འབྲེལ་ལམ་ཇེ་བཟང་དང་མ་འོངས་འབྲེལ་ལམ་ལེགས་པོ་ཡོང་བར་མཉམ་འབྲེལ་གནང་དགོས་སྐོར་སོགས་བཤད་པ་བཀོད་འདུག་ཀྱང་།  བརྒྱུད་ལམ་ཁག་ཏུ་འཕགས་བོད་མཐའ་མཚམས་སུ་ཡོད་པའི་དམག་མི་ཕྱིར་འཐེན་ཐད་གང་ཡང་བཤད་མེད་པ་གསལ་འདུག  འོན་ཀྱང་རྒྱ་གར་ཕྱི་སྲིད་ལས་ཁུངས་ནས་འདོན་སྤེལ་གནང་བའི་སྤྱི་བསྒྲགས་ནང་ཕྱི་སྲིད་བློན་ཆེན་ Jaishankar མཆོག་ནས་ Wang Yi ལ་ལ་དྭགས་ཕྱོགས་ཀྱི་འཕགས་བོད་མཐའ་མཚམས་ཀྱི་རྩོད་རྙོག་གཙོས་གནད་དོན་ལྷག་མ་ཁག་ཅིག་ཡོད་པ་དེ་དག་གང་མགྱོགས་གསེལ་དགོས་སྐོར་གསུངས་པ་བཀོད་འདུག

རྒྱལ་སྤྱིའི་བོད་དོན་ལས་འགུལ་ཁང་དང་ Czech བོད་དོན་རྒྱབ་སྐྱོར་ཚོགས་པ་ཟུང་སྦྲེལ་གྱིས་ཅེཀ་སྤྱི་མཐུན་རྒྱལ་ཁབ་ཀྱིས་ཡུ་རོབ་མཐུན་ཚོགས་ཀྱི་ཚོགས་གཙོའི་ལས་ཡུན་ཁྲོད་བོད་དང་རྒྱ་ནག་ཐོག་སྲིད་བྱུས་གསར་པ་གཏན་འབེབས་དགོས་པའི་ཞུ་གཏུག་གནང་འདུགཕྱི་ཟླ་ ༧ ཚེས་ ༡ ཉིན་ནས་བཟུང་ཟླ་བ་དྲུག་གི་རིང་ཅེཀ་སྤྱི་མཐུན་རྒྱལ་ཁབ་ནས་ཡུ་རོབ་མཐུན་ཚོགས་ཀྱི་ཚོགས་གཙོའི་ལས་འགན་དབུ་འཛུགས་གནང་གི་ཡོད་པ་དང་འབྲེལ། ཚོགས་པ་དེ་དག་གཉིས་ཀྱིས་ཅེཀ་སྤྱི་མཐུན་རྒྱལ་ཁབ་ཀྱི་གཞུང་ལ་ཞུ་ཡིག་ཤོག་གྲངས་བརྒྱད་ཅན་ཞིག་ཕུལ་ཏེ་ཡུ་རོབ་མཐུན་ཚོགས་ནས་འགྲོ་བ་མིའི་ཐོབ་ཐང་གི་གནད་དོན་གཞི་རྩར་བཟུང་སྟེ་རྒྱ་ནག་ཐོག་སྲིད་བྱུས་གསར་པ་ཞིག་གཏན་འབེབས་གནང་དགོས་སྐོར་གསུངས་པ་དང་ཆབས་ཅིག ཡུལ་བབ་སྲིད་བྱུས་གྱི་གནས་སྟངས་ལ་བརྟེན་ནས་བོད་རྒྱའི་གནད་དོན་ཐོག་སྲིད་བྱུས་དང་བཞེངས་ཕྱོགས་གསར་པ་གཏན་འབེབས་གནང་དགོས་པ་སོགས་དོན་ཚན་ལྔ་ཅན་ཞུ་གཏུག་གནང་འདུག དོན་ཚན་ལྔ་པོ་རྣམས་ནི། ཡུ་རོབ་མཐུན་ཚོགས་ནས་རྒྱལ་སྤྱིའི་ཁྲིམས་དང་རྒྱལ་སྤྱིའི་ཁྲིམས་མཐུན་གནས་བབ་འོག་བོད་དོན་ཐོག་སྲིད་བྱུས་དང་བཞེངས་ཕྱོགས་གསར་པ་གཏན་འབེབས་དགོས་པ་དང་བོད་ནང་རྒྱ་ནག་གཞུང་སྒེར་ཅི་རིགས་ནས་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་རྣམས་ལ་སྲིད་དོན་ཉེས་ཆད་བཀལ་དགོས་པ། དེ་བཞིན་ཡོ་རོབ་མཐུན་ཚོགས་ཀྱིས་རྒྱ་ནག་དང་ལྷན་དུ་བཞག་པའི་ Investment Agreement མ་འཛུགས་ཀྱི་གྲོས་མཐུན་བརྒྱུད་ནས་རྒྱ་ནག་གིས་ International Labour Organisation’s Convention རྒྱལ་སྤྱིའི་ངལ་རྩོལ་ཚོགས་པའི་ཁྲིམས་ལ་རྩིས་སྲུང་དགོས་པ་བཟོ་རྒྱུ། བོད་རྒྱའི་དཀའ་རྙོག་སེལ་བའི་ལས་དོན་ཐོག་འབད་བརྩོན་གནང་དགོས་པར་མ་ཟད་ལྷག་པར་དུ་བོད་མི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་གནད་དོན་ཐད་རྒྱ་ནག་གཞུང་ལ་ཐེ་བྱུས་གང་ཡང་མེད་པའི་སྤྱི་བསྒྲགས་ཤིག་ངེས་གནང་དགོས་པ་བཅས་ཀྱི་ཞུ་སྐུལ་གནང་ཡོད།རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་མཐུན་ཚོགས་ཀྱི་འབྲེལ་མཐུད་པ་སྐུ་ཞབས་ Vincent Metten ལགས་ཀྱིས་ཅེཀ་མི་མང་རྣམས་དམར་ཤོག་སྲིད་དབང་གི་དྲག་གནོན་འོག་གནས་པའི་མྱོང་ཚོར་ཡོད་པ་དང་འབྲེལ། འཛམ་གླིང་ས་ཕྱོགས་གང་དུ་རང་དབང་མེད་པ་དེར་གདུང་སེམས་མཉམ་བསྐྱེད་ཞུ་དགོས་པ་དང་། ལྷག་པར་དུ་ད་ལྟའི་ཆར་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་གོང་སྤེལ་ཆེད་ཡུ་རོབ་མཐུན་ཚོགས་ནས་མཉམ་འབྲེལ་གྱི་གོང་བུ་གཅིག་ལ་འདྲིལ་ནས་ཕྱག་ལས་གཏིང་ཚུགས་པ་ཞིག་གནང་གལ་ཡིན་པ་གསུངས་ཡོད། གཞི་རྩའི་ཞུ་ཡིག་དེ་ཅེཀ་སྲིད་བྱུས་ཉམས་ཞིབ་ཁང་གཉིས་ཀྱིས་ལྷན་དུ་བཀའ་བསྡུར་གནང་སྟེ་ཕྱི་ཟླ་ ༦ ཚེས་ ༢༧ དང་ ༢༨ བཅས་སུ་རིམ་བཞིན་ཅེཀ་ཕྱི་སྲིད་བློན་ཆེན་དང་གྲོས་ཚོགས་འཐུས་མི་ཁག་གཅིག དེ་བཞིན་བོད་དོན་རྒྱབ་སྐྱོར་ཚོགས་པ་ཁག་ལ་སྤྱན་འབུལ་ཞུས་པ་ཞིག་ཆགས་ཀྱི་ཡོད། དེའི་ནང་བོད་དེ་རྒྱ་ནག་གི་ཆ་ཤས་ནམ་ཡང་མིན་པ་མ་ཟད་བོད་ནང་གི་རང་དབང་དང་འཐབ་རྩོད་ཆེད་ད་བར་བོད་མི་ ༡༦༠ ལྷག་གིས་སྐུ་ལུས་ཞུགས་འབུལ་གནང་ཡོད་པ་སོགས་ཀྱི་གནད་དོན་ཞིབ་རྒྱས་བཀོད་འདུག

རྒྱལ་སྤྱིའི་ཆོས་དད་རང་དབང་ལྷན་ཚོགས་ཐེངས་གཉིས་པ་ཨ་རིའི་རྒྱལ་ས་ཝ་ཤིན་ཊོན་ཌི་སི་ནང་གི་ Renaissance Hotel ནང་འཚོགས་བཞིན་ཡོད་པ་རེད། ལྷན་ཚོགས་འདི་ཕྱི་ཟླ་ ༦ ཚེས་ ༢༨ ནས་དབུ་འཛུགས་ཀྱིས་ཚེས་ ༣༠ བར་ཉིན་གྲངས་གསུམ་རིང་འཚོགས་བཞིན་ཡོད་པ་དང་ལྷན་ཚོགས་ཀྱི་མཛད་སྒོར་ལྷན་ཚོགས་ཀྱི་ཚོགས་གཙོ་ཨ་རིའི་རྒྱལ་སྤྱིའི་ཆོས་དད་རང་དབང་གི་ཆེས་མཐོའི་སྐུ་ཚབ་ཟུར་པ་སྐུ་ཞབས་ Sam BrownBack མཆོག་གིས་གསུང་བཤད་གནང་བར་དུས་རབས་འདིའི་ནང་དཀའ་ངལ་ཆེ་ཤོས་འཕྲད་པའི་མི་རྣམས་རང་རང་སོ་སོའི་ཡིད་ཆེས་དང་དད་པར་རང་དབང་མེད་པའི་ཁར་གཞན་གྱིས་དམ་བསྒྲགས་བྱས་པ་དེ་ཆགས་ཀྱི་ཡོད་པ་དང་། དེ་ནི་འགྲོ་བ་མིའི་ཐོབ་ཐང་རྡོག་རོལ་ཆེས་ཆེར་བཏང་བ་ཞིག་ཡིན་སྐོར་བཤད་པར་མ་ཟད། རྒྱ་ནག་གིས་གནད་དོན་དེའི་རྐྱེན་གྱིས་མི་རྣམས་འཛིན་བཟུང་གིས་ངལ་རྩོལ་བསྒྱུར་བཀོད་ཁང་དུ་བཞག་མུས་ཡིན་པ་ནན་བརྗོད་གནང་འདུག ཨ་རིར་གནས་བཞུགས་ Indiana མངའ་སྡེའི་ Blomington ས་གནས་སུ་༸གོང་ས་༸སྐྱབས་མགོན་ཆེན་པོ་མཆོག་གིས་བསྐོ་བཞག་མཛད་པའི་བོད་སོག་རིག་གཞུང་བསྟི་གནས་ཁང་གི་འགན་འཛིན་སྐུ་འབུམ་དགོན་པའི་མཁན་ཟུར་ཨ་ཀྱ་རིན་པོ་ཆེ་མཆོག་གིས་རྒྱ་ནག་གཞུང་གིས་བོད་ནང་ཆོས་དད་རང་དབང་རྡོག་རོལ་བཏང་བ་དང་འབྲེལ་བའི་གསུང་བཤད་གནང་རྒྱུ་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ Nancy Pelosi མཆོག ཨ་རིའི་ཕྱི་སྲིད་དྲུང་ཆེ་ཟུར་པ་སྐུ་ཞབས་ Michael R. Pompeo མཆོག་དང་སྐུ་ཞབས་  Enes Kantre Freedom  ལགས་གཙོས་རྒྱལ་སྤྱིའི་གནད་ཡོད་ཆབ་སྲིད་མི་སྣ་དང་། ཆོས་ལུགས་ཁག་གི་དབུ་ཁྲིད་དང་སྐུ་ཚབ། དེ་བཞིན་ཆོས་ལུགས་ཀྱི་ལས་འགུལ་བ་བཅས་ཁྱོན་གསུང་བཤད་པ་ ༢༤༠ མཉམ་ཞུགས་གནང་ཡོད། རྩ་བའི་ཆོས་དད་རང་དབང་ལྷན་ཚོགས་ཀྱི་དགོས་དམིགས་གཙོ་བོ་ནི་རྒྱལ་ཚོགས་ཀྱིས་གཏན་འབེབས་གནང་བའི་ཡོངས་ཁྱབ་འགྲོ་བ་མིའི་ཐོབ་ཐང་རྩ་ཁྲིམས་ཀྱི་འབྲུ་དོན་ཁག་ལ་རྩིས་སྲུང་དགོས་པ་དང་། ཆོས་ལུགས་དང་ཚོགས་པ་ཆེ་ཁག་རྣམས་ལྷན་འཛོམས་ཀྱིས་མཉམ་འབྲེལ་ཐོག་ནས་འཛམ་གླིང་ནང་ཆོས་དད་རང་དབང་གི་ནུས་པ་རྒྱ་བསྐྱེད་དང་། འཛམ་གླིང་མི་མང་རྣམས་ལ་ཆོས་དད་རང་དབང་གི་གོ་རྟོགས་སྤེལ་རྒྱུ། རྒྱལ་སྤྱིའི་ནང་ཆབ་སྲིད་ཀྱི་རྒྱབ་བརྟེན་གཏིང་ཚུགས་པ་བཟོ་བའི་ཐོག་ནས་ཆོས་དད་རང་དབང་སྲུང་སྐྱོབ་གནང་རྒྱུ་ཡིན་པ་རེད། གཞི་རྩའི་ཐེངས་འདིའི་ལྷན་ཚོགས་ནང་ཚོགས་ཐེངས་ ༤༠ ཡོད་པ་དང་ཚོགས་པ་དང་ཚོང་གི་སྡེ་ཁག་ ༦༠ ནས་མཉམ་འབྲེལ་གྱིས་མཐུན་འགྱུར་གནང་ཡོད་པ་རེད། དེ་བཞིན་རྒྱལ་སྤྱིའི་ཆོས་དད་རང་དབང་ཐེངས་དང་པོ་དེ་ཕྱི་ལོ་ ༢༠༢༡ ཟླ་ ༧ ནང་ཨ་རིའི་རྒྱལ་ས་ཝ་ཤིན་ཊོན་ཌི་སི་ནང་ཚོགས་ཡོད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་མིའི་བསམ་བློ་འདྲ་མིན་ལ་བརྟེན་ནས་ཆོས་ལུགས་རྣམས་བྱུང་ཡོད་པ་དང་། ཆོས་དད་རང་དབང་ནི་བམས་བློའི་རང་དབང་ཞིག་ཡིན་པ་གསུངས་ཡོད། དེ་བཞིན་ཆོས་ལུགས་ཚང་མས་བྱམས་པ་དང་སྙིང་རྗེ་སོགས་བཟང་པོའི་ཡོན་ཏན་ནམ་ལམ་ཡང་དག་པར་བསླབ་ཀྱི་ཡོད་སྟབས་གང་ཟག་ཕན་ཚུན་དབར་འཆམ་མཐུན་དགོས་གལ་སོགས་ལམ་སྟོན་བཀའ་སློབ་བཀའ་དྲིན་ཆེ་བ་མཛད་ཡོད།

ཁ་སང་ཡུ་རོབ་རྒྱལ་ཁབ་ Germany ཀྱི་ Elmau གྲོང་ཁྱེར་ནང་འདི་ལོའི་ G7 ལྷན་ཚོགས་ཀྱི་དབུ་ཁྲིད་རྣམ་པའི་ཉིན་གྲངས་གསུམ་རིང་གི་ཚོགས་འདུ་མཇུག་སྒྲིལ་དང་འབྲེལ་ཏེ་བསྒྲགས་གཏམ་ཞིག་འདོན་སྤེལ་གནང་བར་རྒྱ་ནག་སྤྱིའི་འགྲོ་བ་མིའི་ཐོབ་ཐང་གི་གནས་སྟངས་དང་སྒོས་སུ་བོད་དང་ཤིན་ཅང་ནང་བཙན་དབང་གིས་ངལ་རྩོལ་གྱི་ལས་འགུལ་སྤེལ་བའི་གནད་དོན་ཐོག་བློ་འཚབ་ཡོད་པའི་རྣམ་པ་མངོན་གསལ་གནང་བ་དང་སྦྲགས། རྒྱ་གཞུང་གིས་བོད་དང་ཤིན་ཅང་གཙོས་རྒྱ་ནག་མང་ཚོགས་ཀྱི་གཞི་རྩའི་ཐོབ་ཐང་དང་རྒྱལ་སྤྱིའི་འགྲོ་བ་མིའི་ཐོབ་ཐང་བཅས་ལ་གུས་བརྩི་ཞུ་དགོས་པའི་དགོས་འདུན་བཏོན་པར་མ་ཟད་ལྷན་ཚོགས་ཀྱིས་ཀྱང་གོ་ལའི་བཟང་ཕྱོགས་ཀྱི་རིན་ཐང་གོང་འཕེལ་ཐོག་མུ་མཐུད་ཕྱག་ལས་གནང་ངེས་ཡིན་པ་གསུངས་འདུགཁ་སང་ G7 ལྷན་ཚོགས་ཀྱིས་ཤོག་གྲངས་ ༢༨ ཅན་གྱི་གསར་འགོད་བསྒྲགས་གཏམ་ཞིག་འདོན་སྤེལ་གནང་སྟེ་དེང་སྐབས་འཛམ་གླིང་ཁྲོད་འགལ་ཟླ་དང་ཟང་ཟིང་གི་ཉེན་ཁ་ཆེ་རུ་འགྲོ་བཞིན་སྐབས་འདིར་ G7 ལྷན་ཚོགས་ཀྱིས་ནུས་པ་མཉམ་སྤུངས་ཐོག་མཐུན་ཕྱོགས་རྒྱལ་ཁབ་རྣམས་དང་ལྷན་དུ་རྒྱལ་སྤྱིའི་འགྲོ་བ་མིའི་ཐོབ་ཐང་དང་མང་གཙོའི་རིན་ཐང་སྲུང་སྐྱོབ་གནང་རྒྱུའི་ཆོད་སེམས་གཏན་པོ་ཡོད་པ་མངོན་གསལ་གནང་བ་དང་ཆབས་ཅིག ཨུ་རུ་སུས་ཡུཀ་རེན་ཐོག་བཙན་འཛུལ་བྱས་པར་མཐའ་གཅིག་ཏུ་ངོ་རྒོལ་དང་སྦྲགས། ལྷན་ཚོགས་ཀྱི་ངོས་ནས་ཡུཀ་རེན་ལ་དཔལ་འབྱོར་དང་དམག་སོགས་གཞུང་འབྲེལ་ཐོག་ནས་རྒྱབ་སྐྱོར་གནང་རྒྱུར་མོས་མཐུན་གནང་སྟེ། ཡུཀ་རེན་རྒྱལ་ཁབ་ལ་རང་གི་ངོ་བོ་སྲུང་སྐྱོབ་དང་མ་འོངས་མང་གཙོའི་ཕུགས་བསམ་སྲ་བརྟན་བཟོ་བར་རྒྱབ་སྐྱོར་གང་ཐུབ་གནང་རྒྱུ་ཡིན་པ་དང་། འདི་ལོར་ལྷན་ཚོགས་ཀྱིས་ཡུཀ་རེན་ལ་ཨ་སྒོར་ཐེར་འབུམ་ ༢་༨ ཀྱི་ངལ་སེལ་རོགས་སྐྱོར་དང་ཨ་སྒོར་ཐེར་འབུམ་ ༢༩་༥ གཞུང་འབྲེལ་རོགས་སྐྱོར་གནང་གཏན་ཁེལ་ཡོད་པར་མ་ཟད་རྒྱལ་སྤྱིའི་འཛུགས་སྐྲུན་བསྐྱར་གསོའི་ལྷན་ཚོགས་ཀྱི་ལས་འཆར་འོག་ཡུཀ་རེན་རྒྱལ་ཁབ་བསྐྱར་གསོ་གནང་རྒྱུར་རྒྱབ་སྐྱོར་གནང་རྒྱུའི་ཆོད་སེམས་གཏན་པོ་ཡོད་པ་གསུངས་འདུགདེ་བཞིན་མཉམ་རུབ་ཀྱི་ནུས་པའི་ཐོག་ནས་དུས་ཚོད་ངེས་ཅན་ནང་དུ་ཨུ་རུ་སུའི་ཐོག་སྲིད་དོན་ཉེས་ཆད་འགེལ་རྒྱུ་དང་ཨ་སྒོར་ཐེར་འབུམ་ ༡༠༠ ལྷག་གི་འགྲོ་གྲོན་བཏང་བ་བརྒྱུད་ནས་ཨུ་རུ་སུའི་དཔལ་འབྱོར་དང་ཚོང་འབྲེལ། དེ་བཞིན་ཨུ་རུ་སུའི་ཟས་སྣ་རིགས་ཚོང་འབྲེལ་བཀག་སྡོམ་གྱི་ངན་བྱུས་ལ་གདོང་ལེན་གནང་རྒྱུ། དེ་བཞིན་གོ་ལའི་ཁོར་ཡུག་སྲུང་སྐྱོབ་དང་སྒོས་ཡར་རྒྱས་འགྲོ་བཞིན་པའི་རྒྱལ་ཁབ་ཁག་ལ་རྒྱབ་སྐྱོར་ཚུལ་དུ་རིང་མིན་ལོ་ལྔའི་ནང་ཚུད་ཨ་སྒོར་ཐེར་འབུམ་ ༦༠༠ ཙམ་གྱི་འཛུགས་སྐྲུན་ལས་གཞི་སྤེལ་རྒྱུ་དང་། ཏོག་དབྱིབས་གཉན་རིམས་སྔོན་འགོག་ཐད་ཕྱག་ལས་དང་མཐུན་འགྱུར་མུ་མཐུད་གནང་སྟེ་མདུན་བསྐྱོད་གནང་རྒྱུ་ཡིན་པ་གསུངས་འདུག རྒྱ་ནག་གིས་ལྷོ་རྒྱ་ནག་རྒྱ་མཚོའི་ས་ཁུལ་དུ་དྲག་ཤུགས་དང་བཙན་འཛུལ་གྱི་བྱ་སྤྱོད་དེ་དག་ཁྲིམས་འགལ་ཡིན་པར་སྐྱོན་བརྗོད་དང་སྦྲགས། རྒྱ་ནག་ལ་ས་ཁུལ་དེའི་བདེ་འཇགས་དང་འབྲེལ་བའི་རྒྱལ་སྤྱིའི་ཁྲིམས་སྒྲིག་ཁག་ལ་རྩིས་སྲུང་ཞུ་དགོས་པ་དང་དེ་བཞིན་རྒྱ་ནག་གིས་ཨིན་ཡུལ་དང་ལྷན་དུ་བཞག་པའི་ཧོང་ཀོང་རྩིས་སྤྲོད་ཀྱི་གྲོས་མཐུན་ལ་རྩིས་སྲུང་ཞུས་ཏེ་ཧོང་ཀོང་མང་ཚོགས་ཀྱི་གཞི་རྩའི་མང་གཙོའི་རང་དབང་ལ་གུས་རྩིས་ཞུ་དགོས་པ། ལྷག་པར་དུ་ལྷན་ཚོགས་ཀྱི་ངོས་ནས་བོད་དང་ཤིན་ཅང་ནང་དུ་བཙན་དབང་གིས་ངལ་རྩོལ་བསྒྱུར་བཀོད་ཀྱི་གནད་དོན་གཙོ་བོར་གྱུར་པའི་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ཐད་སེམས་འཚབ་ཆེས་ཆེར་ཡོད་སྐོར་དང་གསུངས་པ་དང་འབྲེལ། རྒྱ་ནག་གཞུང་ལ་མང་ཚོགས་ཀྱི་འགྲོ་བ་མིའི་ཐོབ་ཐང་དང་རང་དབང་ལ་རྩིས་སྲུང་ཞུ་དགོས་པ་གསུངས་འདུག

ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་ཆེན་ཐེངས་ ༥༠ འཚོགས་བཞིན་པ་དང་བསྟུན་རྒྱལ་ཚོགས་ལ་བོད་དོན་ཞུ་གཏུག་དང་ཞི་བའི་ངོ་རྒོལ་སྐད་འབོད་ཀྱི་ལས་འགུལ་སྤེལ་གནང་སོང་།ཁ་སང་ཕྱི་ཚེས་ ༢༤ ཉིན་འདི་ག་ཇི་ནི་ཝར་གནམ་གཤིས་གྲང་ངར་ཆེ་ཞིང་། ཆར་རླུང་དྲག་འཚུབ་ཆེ་བའི་ཁྲོད་སུད་སི་དང་ལིག་ཏེན་སིཊཡན་བོད་རིགས་མི་མང་གིས་སྣེ་ཁྲིད་དེ་ཇི་ནི་ཝའི་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཁང་གི་མདུན་ཐང་དུ་བོད་མི་དང་བོད་བོད་དོན་རྒྱབ་སྐྱོར་བ་རྣམས་འདུ་འཛོམས་གནང་སྟེ་རྒྱ་གཞུང་བཙན་གནོན་འོག་ཇེ་ཞན་ཇེ་སྡུག་ཏུ་འགྲོ་བཞིན་པའི་བོད་ནང་གི་འགྲོ་བ་མིའི་ཐོབ་ཐང་གནད་དོན་དང་གཞིས་བཞུགས་བོད་མིའི་དཀའ་སྡུག་མངོན་གསལ་གནང་ཕྱིར་ལས་འགུལ་བ་རྣམ་པས་ཕྱག་ཏུ་བོད་ཀྱི་རྒྱལ་དར་འཕྱར་ཞིང་། རྒྱ་ནག་གཞུང་ནས་བོད་ནང་འགྲོ་བ་མིའི་ཐོབ་ཐང་རྡོག་རོལ་མཚམས་འཇོག་བྱེད་དགོས་པ་སོགས་ཀྱི་འབོད་ཚིག་འཁོད་པའི་ཤོག་བྱང་བསྣམགས་ཏེ་ཞི་བའི་ངོ་རྒོལ་གནང་ཡོད།ལས་འགུལ་ཐོག་སུད་སི་བོད་ཀྱི་སྐུ་ཚབ་དོན་གཅོད་དང་སུད་སི་དང་ལིག་ཏེན་སིཊཡན་བོད་རིགས་མི་མང་། སུད་སི་ས་གནས་བེུད་ལྷན་ཚོགས། ཡོ་རོབ་བོད་རིགས་གཞོན་ནུ་མཐུན་ཚོགས། དེ་བཞིན་སུད་བོད་མཐུན་ཚོགས་བཅས་ཀྱི་སྐུ་ཚབ་ཚོས་རྒྱ་ནག་གཞུང་གིས་བོད་ནང་གི་བོད་མིའི་ཐོག་སྤེལ་བཞིན་པའི་དྲག་གནོན་ཅན་གྱི་སྲིད་བྱུས་ལ་སྐྱོན་བརྗོད་ཀྱི་གཏམ་བཤད་གནང་ཡོད་པ་རེད།ཐེངས་འདིའི་ལས་འགུལ་དང་འབྲེལ་ནས་རྒྱུན་ལྡན་ལྟར་སུད་སི་དང་ལིག་ཏེན་སིཊཡན་བོད་རིགས་མི་མང་གི་ངོས་ནས་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ Michelle Bachelet མཆོག་གི་མཚན་ཐོག་ལ་ཇེ་ཞན་ཇེ་སྡུག་ཏུ་འགྲོ་བཞིན་པའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ཞིབ་ཕྲ་གསལ་བའི་ཞུ་སྙན་ཞིག་ཕུལ་ཡོད་པར་མ་ཟད། ལྷག་པར་དུ་ཞུ་སྙན་ནང་ཁོང་རྣམས་ནས་གཙོ་འཛིན་མཆོག་གིས་ཉེ་ཆར་རྒྱ་ནག་ནང་གི་འཚམས་གཟིགས་དང་འབྲེལ་ཏེ་མང་ཚོགས་ཀྱི་རེ་བ་སྣང་མེད་དུ་བཏང་བ་དེས་རྒྱལ་ཚོགས་ཀྱི་གཞུང་འབྲེལ་མཚན་གནས་ལོག་པར་སྤྱོད་ཡོད་སྟབས་བོད་མི་གཙོས་རྒྱ་ནག་གི་བཙན་གནོན་འོག་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་བའི་མང་ཚོགས་རྣམས་ཧ་ཅང་བློ་ཕམ་བྱུང་ཡོད་པ་རེད། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༠ བརྒྱུད་ནས་ལྷན་ཚོགས་ཀྱི་ཚོགས་མི་རྒྱལ་ཁབ་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ལས་ཁུངས་གཉིས་མཉམ་རུབ་ཀྱིས་ད་བར་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བཏང་པའི་ནག་ཉེས་ཁག་འགན་ཁུར་ལྡན་པ་བཟོ་དགོས་པའི་ནན་བརྗོད་གནང་འདུག

ཟླ་བ་འདིའི་ཕྱི་ཚེས་ ༡༣ ནས་ཇི་ནི་ཝར་འཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༥༠ འཚོགས་བཞིན་པའི་ཐོག་བོད་མིའི་སྐུ་ཚབ་ནས་བོད་ནང་རྒྱ་ནག་གཞུང་གིས་བོད་མིའི་ངོ་བོ་རྩ་མེད་བཟོ་ཐབས་སུ་རྒྱ་མི་རིགས་ཀྱི་མེ་སེར་སྤེལ་ཡུལ་ལམ་ལུགས་ཀྱི་བཅའ་སྡོད་སློབ་གྲྭ་ཆེད་འཛུགས་བྱེད་བཞིན་པའི་ཛ་དྲག་གནད་དོན་ལྷན་ཚོགས་སུ་སྙན་སེང་ཞུས་ཏེ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་རྒྱལ་ཚོགས་ཀྱི་དམིགས་བསལ་ཁེ་ལས་རྟོག་ཞིབ་ཚོགས་ཆུང་བཅས་ནས་རྒྱ་གཞུང་གིས་བོད་མི་རིགས་རྩ་མེད་བཟོ་བར་དམིགས་པའི་བཅའ་སྡོད་སློབ་གྲྭ་ཆེད་འཛུགས་ཀྱི་ལས་གཞི་འཕྲལ་མར་འཚམས་འཇོག་དགོས་པའི་དགོས་འདུན་བཏོན་འདུགཁ་སང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཤེས་ཡོན་སློབ་གསོ་རང་དབང་དང་འབྲེལ་བའི་ཚོགས་དུས་ཐོག་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཞབས་ Vincent Metten ལགས་དང་སུད་སི་བོད་ཀྱི་སྐུ་ཚབ་དོན་གཅོད་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་གཉིས་ཀྱིས་རྒྱ་གཞུང་གིས་བོད་ནང་གི་བོད་མིའི་ཐོག་སྤེལ་བཞིན་པའི་མི་སེར་སྤེལ་ཡུལ་གྱི་ཤེས་ཡོན་སློབ་གསོའི་སྐོར་སྙན་སེང་ཞུས་ཡོད་པ་རེད།སྐབས་དེར་སྐུ་ཞབས་ Vincent ལགས་ཀྱིས་ Helsinki Foundation for Human Rights ཞེས་པའི་རྒྱལ་སྤྱིའི་གཞུང་འབྲེལ་མིན་པའི་ཚོགས་པའི་མིང་ཐོག་ནས་ད་ཆ་རྒྱ་ནག་གི་སྲིད་འཛིན་ཞི་ཅིན་ཕིང་གི་འགོ་ཁྲིད་འོག་བོད་ནང་ལོ་ན་ ༤ ཡན་བོད་ཕྲུག་འབུམ་གཅིག་ལྷག་བཙན་དབང་གིས་རང་ཁྱིམ་ནས་བཙན་ཁྲིད་བྱས་ཏེ་རྒྱ་ཡིག་ཁོ་ནའི་ཤེས་ཡོན་སློབ་གསོ་སྤེལ་ཆེད་ས་གནས་སུ་གཞུང་གི་བཅའ་སྡོད་སློབ་གྲྭར་བཅུག་ནས་རང་ཁྱིམ་ནས་ཁ་བྲལ་དུ་བཏང་བའི་བོད་ཕྲུག་ཚོར་རྒྱ་ནག་གི་ཆབ་སྲིད་ཤེས་ཡོན་སློབ་གསོ་སྤྲོད་བཞིན་ཡོད་པར་མ་ཟད། རྒྱ་གཞུང་གིས་གཉེར་བའི་བཅའ་སྡོད་སློབ་གྲྭར་རང་ཉིད་ཀྱི་བུ་ཕྲུག་མ་བརྫང་མཁན་བོད་པའི་ཕ་མ་ཚོར་རྒྱ་གཞུང་གིས་གཞུང་གི་མིང་ཐོ་ནག་པོར་བཅུག་ནས་དཔལ་འབྱོར་ཉེས་ཆད་གཏོང་བཞིན་ཡོད་སྐོར་སོགས་ལྷན་ཚོགས་སུ་སྙན་སེང་ཞུས་པ་དང་འབྲེལ། རིམ་པས་བོད་ཀྱི་སྐད་ཡིག་དང་རིག་གཞུང། དེ་བཞིན་བོད་མི་རིགས་ཀྱི་ངོ་བོ་རྩ་མེད་བཟོ་བཞིན་ཡོད་པ་གསུངས་འདུགསྐལ་ལྡན་མཚོ་མོ་ལགས་ཀྱིས་ Society for Threatened Peoples ཞེས་པའི་མིང་ཐོག་ནས་རྒྱ་ནག་གཞུང་གིས་འཆར་གཞི་དང་ལྡན་པའི་ངང་བོད་ནང་གི་བོད་ཕྲུག་ཚོར་རང་མི་རིགས་ཀྱི་སྐད་ཡིག་ལ་སློབ་སྦྱོང་བྱ་རྒྱུའི་སློབ་གསོའི་རང་དབང་ལ་རྩིས་མེད་རྡོག་རོལ་བཏང་སྟེ་ཤེས་ཡོན་སློབ་གསོ་དེ་ད་ཆ་རྒྱ་གཞུང་གི་ཆབ་སྲིད་བསམ་བློ་རྒྱ་བསྐྱེད་དང་སྟངས་འཛིན་བྱ་རྒྱུའི་ལག་ཆར་སྤྱོད་བཞིན་ཡོད་པ་སྙན་སེང་ཞུས་འདུག ད་ཆ་བོད་ནང་གི་ན་ཆུང་བྱིས་པ་དང་བོད་རིགས་གཞོན་སྐྱེས་ཚོ་ནི་ཞི་ཅིན་ཕིང་གིས་ཧན་མི་རིགས་དང་འབྲེལ་བའི་ཤེས་ཡོན་སློབ་གསོའི་ལས་འགུལ་གྱི་དམིགས་འབེན་དུ་གྱུར་ཡོད་ཅེས་གསུངས་འདུགསྐུ་ཞབས་ Vincent ལགས་ཀྱིས་བོད་ནང་དུ་རྒྱ་ནག་གཞུང་གིས་ལག་བསྟར་བྱེད་བཞིན་པའི་བཅའ་སྡོད་སློབ་གྲྭའི་སྲིད་བྱུས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་གྲོས་མཐུན་ནང་གསལ་མི་རིགས་ཀྱི་དབྱེ་འབྱེད་དང། དཔལ་འབྱོར། སྤྱི་ཚོགས། རིག་གཞུང་ཐོབ་ཐང། དེ་བཞིན་ཕྲུ་གུའི་ཐོབ་ཐང་བཅས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་གྲོས་མཐུན་མང་དག་ཅིག་དང་ཡོངས་སུ་འགལ་ཡོད་པར་མ་ཟད། རྒྱ་ནག་རང་ཉིད་ཀྱི་རྩ་ཁྲིམས་ལས་ཀྱང་འགལ་ཡོད་པ་རེད་ཅེས་གསུངས་ཏེ། ལྷན་ཚོགས་བརྒྱུད་ནས་ཁོང་རྣམ་གཉིས་ཀྱིས་རྒྱལ་ཚོགས་ཀྱི་ཚོགས་མི་རྒྱལ་ཁབ་དང། འགྲོ་བ་མིའི་ཐོབ་ཐང་ལྷན་ཚོགས། རྒྱལ་ཚོགས་ཁེ་ལས་དམིགས་བསལ་རྟོག་ཞིབ་ཚོགས་ཆུང་བཅས་ཀྱིས་རྒྱ་གཞུང་གིས་ད་ཆ་བོད་མི་རིགས་རྩ་མེད་བཟོ་བར་དམིགས་པའི་བཅའ་སྡོད་སློབ་གྲྭའི་ལས་གཞི་སྤེལ་བཞིན་ཡོད་པ་ཁག་འཕྲལ་མར་མཚམས་འཇོག་བྱེད་འཇུག་དགོས་པའི་དགོས་འདུན་བཏོན་འདུག ལྷན་ཚོགས་ཐོག་ད་དུང་རྒྱ་ནག་གཞུང་གིས་བོད་ནང་བོད་མིའི་སྐད་ཡིག རིག་གཞུང་། བོད་མི་རིགས་ཀྱི་ངོ་བོ་སྲུང་སྐྱོབ་བྱེད་མཁན་བོད་མི་རྩོམ་པ་པོ་དང་ཤེས་ཡོན་ཅན། གླུ་བ། སློབ་ཕྲུག་སོགས་ཀྱི་ཐོག་དྲག་གནོན་གྱི་སྲིད་བྱུས་སྤེལ་བ། འཛིན་བཟུང། དེ་བཞིན་བཀག་ཉར་བྱེད་བཞིན་ཡོད་སྐོར་སོགས་ལྷན་ཚོགས་ཐོག་སྙན་སེང་ཞུས་པ་དང་འབྲེལ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་རྒྱལ་ཚོགས་ཀྱི་དམིགས་བསས་ཁེ་ལས་རྟོག་ཞིབ་ཚོགས་ཆུང་བཅས་ནས་དེ་དང་འབྲེལ་བའི་གང་གནང་འཆར་ཡོད་དམ་ཞེས་དང། དེ་བཞིན་བོད་ནང་གི་བོད་ཕྲུག་ཚོར་འདྲ་མཉམ་གྱི་གུས་བརྩི་ཡོད་པའི་ཐོག་ནས་བོད་པའི་སྐད་ཡིག་སློབ་རྒྱུའི་ཐོབ་ཐང་ཇི་ལྟར་བསྐྲུན་ཐུབ་བམ་ཞེས་ལྷན་ཚོགས་ཐོག་འདྲི་རྩད་ཀྱང་གནང་འདུག