གསར་འགྱུར།

རེས་གཟའ་ལྷག་པ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་བླ་གཟའ་ཡིན་པ་དང་བསྟུན་རང་དབང་ཅན་གྱི་རྒྱལ་ཁབ་ཏུ་གནས་བཞུགས་བོད་མི་རྣམས་ནས་དེ་ཉིན་བོད་ཟས་མཆོད་རྒྱུ་དང་། བོད་ཆས་གྱོན་རྒྱུ། ཆོས་ཕྱོགས་ཀྱི་གནང་སྒོར་ཞུགས་པ། བོད་ཀྱི་ཐུན་མིན་རིག་གཞུང་གཅེས་འཛིན་དང་གོང་འཕེལ་སླད་བོད་མི་འདུ་འཛོམས་ཀྱིས་སྒོར་གཞས་འཁྲབ་རྒྱུ་སོགས་རྣམ་པ་འདྲ་མིན་སྒོ་ནས་ལྷག་དཀར་སྲུང་བརྩི་གནང་གི་ཡོད་པ་རེད།ད་ཆ་འཛམ་གླིང་གི་རྒྱལ་ཁབ་ ༢༠༠ ལྷག་ནང་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ ཁྱབ་གདལ་རྐྱེན་གྱིས་རྒྱལ་ཁབ་ཀྱི་དཔལ་འབྱོར་གཙོས་མང་ཚོགས་ཀྱི་འགྲོ་འདུག་སྤྱོད་གསུམ་ལ་ཤུགས་རྐྱེན་ཧ་ཅང་ཆེན་པོ་སྤྲད་པ་དང་སྦྲགས། རྒྱལ་སྤྱིའི་ཚོགས་སྡེ་ཁག་དང་རྒྱ་གཞུང་གི་གཉའ་གནོན་འོག་ལྷུང་བའི་མི་རིགས་རྣམས་ཀྱིས་རྒྱ་ནག་གཞུང་གིས་གཉན་རིམས་སྟངས་འཛིན་ཐད་སྐྱོན་བརྗོད་སོགས་གནང་མུས་ཡིན་པའི་ཁྲོད་འདིར་བོད་མི་སྒེར་པ་ཁག་ཅིག་གིས་གོ་སྐབས་དམ་འཛིན་གྱིས་དང་བླངས་ཐོག་རྒྱ་གཞུང་གི་བྱུས་ངན་ཅན་གྱི་སྲིད་བྱུས་དག་ཐེར་འདོན་དང་རྒྱལ་སྤྱིའི་ཁྲོད་བོད་ཀྱི་གནད་དོན་ལ་རྒྱབ་སྐྱོར་སྔར་ལྷག་གནང་སླད་ཞི་བའི་གོམ་བགྲོད་དང་རྒྱང་སྐྱོད་བང་འགྲན་སོགས་ཀྱི་ལས་འགུལ་རྣམ་པ་འདྲ་མིན་ཐོག་ནས་ལྷག་དཀར་གྱི་ཉིན་མོར་བོད་དོན་དྲིལ་བསྒྲགས་ཀྱི་ལས་འགུལ་སྤེལ་ཡོད་པ་རེད། དེའི་ཁོངས་ཆབ་སྲིད་བཙོན་ཟུར་བློ་བཟང་འབྱོར་ལྡན་ལགས་ཀྱིས་ཨོ་སི་ཊོ་ལི་ཡའི་གྲོང་ཁྱེར་སིཌ་ནི་ནང་འདི་ལོའི་ཟླ་ ༦ ཚེས་ ༡༠ ནས་དབུ་འཛུགས་ཀྱིས་རེས་གཟའ་ལྷག་པ་ནམ་ཡིན་ལ་རྒྱ་ནག་གཞུང་ཚབ་མདུན་དུ་བོད་ཀྱི་རྒྱལ་དར་བསྣམས་ཏེ་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་ཞུ་དགོས་པ་དང་རྒྱ་ནག་ནས་རྒྱལ་སྤྱིའི་ཁྲོད་ཏོག་དབྱིབས་གཉན་རིམས་ཁྱབ་གདལ་གྱི་འགན་ཁུར་དགོས་པ་བཟོ་དགོས་པར་མ་ཟད་དེ་བཞིན་རྒྱ་ནག་གི་ཅ་དངོས་ཉོ་ཚོང་གནང་རྒྱུ་མཚམས་འཇོག་དགོས་པ་བཅས་དགོས་འདུན་གསུམ་གྱི་ཐོག་ཁེར་རྐྱང་གི་ལས་འགུལ་སྤེལ་གྱི་ཡོད་པ་རེད།

དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས Ukraine གྱི་ EdCamp ཞེས་པའི་ཤེས་ཡོན་ཚོགས་པས་ཇི་ལྟར་གསོལ་འདེབས་ཞུས་པ་བཞིན་ Educating the Heart  འམ་སེམས་བཟང་གི་ཤེས་ཡོན་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་བ་དང་སྦྲགས། མགོན་པོ་༸གང་ཉིད་མཆོག་གིས་སྤྱི་ཚོགས་བདེ་སྐྱིད་དང་ཞི་བདེ་ལྡན་པ་ཞིག་བསྐྲུན་ཐབས་སུ་སེམས་བཟང་པོའི་ཐོག་ནས་ཕྱག་ལས་གནང་དགོས་གལ་ཡིན་པ་བཀའ་སྩལ་སོང་།  དེ་རིང་སྔ་དྲོ་ཆུ་ཚོད་ ༩ ནས་ ༡༠ བར་་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་གཟིམ་ཁང་ནས་དྲ་ལམ་བརྒྱུད་སེམས་བཟང་གི་ཤེས་ཡོན་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་བ་དང་འབྲེལ། འཛམ་གླིང་གི་སྐྱེ་འགྲོ་ཐམས་ཅད་ཐོག་མར་སྐྱེས་པ་ནས་ཨ་མའི་བྱམས་སྐྱོང་དང་བརྩེ་བའི་འོག་ནས་འཚར་ལོངས་དང་འཚོ་བ་ཞིག་ཆགས་ཀྱི་ཡོད་སྟབས། ཨ་མིའི་རང་བཞིན་ལྷན་སྐྱེས་དེ་བྱམས་བརྩེ་ཡིན་ཀྱང་དེ་སྔ་ལོ་རྒྱུས་ཁྲོད་དམག་འཁྲུག་སོགས་ཀྱི་རྐྱེན་གྱིས་ཕན་ཚུན་གསོད་རེས་དང་ང་དང་ཁོ་ཞེས་རིམ་པ་གཉིས་པའི་བསམ་བློ་དབང་གིས་རྩོད་རྙོག་མང་དག་ཅིག་བྱུང་ཡོད། ད་ཆ་ང་ཚོའི་ཆིག་སྒྲིལ་དང་འགྲོ་བ་མི་གཅིག་གྱུར་གྱི་འདུ་ཤེས་འཛིན་ཏེ་འཛམ་གླིང་སྤྱིར་སྨན་པའི་ཕྱག་ལས་གནང་དགོས་སྐོར་ལམ་སྟོན་མཛད་ཡོད། དེ་བཞིན་མགོན་པོ་༸གང་ཉིད་མཆོག་གིས་ཡོ་རོབ་མཐུན་ཚོགས་ཀྱི་གནང་ཕྱོགས་ལ་བསྔགས་བརྗོད་མཛད་པ་དང་སྦྲགས།  སྤྱི་མཐུན་ཚོགས་པའི་བསམ་བློ་དེ་རྒྱ་སྐྱེད་དང་འཕེལ་རྒྱས་གཏོང་དགོས་པ་དང་ལྷག་པར་དུ་ཨུ་རུ་སུ་ལྟ་བུའི་རྒྱལ་ཁབ་ཆེན་པོ་ནས་ཡོ་རོབ་མཐུན་ཚོགས་ནང་འཛུལ་ཞུགས་གནང་དགོས་པ་ལམ་སྟོན་སྩལ་བར་མ་ཟད། ༸གོང་ས་མཆོག་གི་ཐུགས་བསྐྱེད་ཆེན་པོ་བཞིའི་ངོ་སྤྲོད་དང་འབྲེལ།  བོད་མི་རྣམས་ནས་རྒྱ་གར་གྱི་གནའ་བོའི་རིག་གནས་ཀྱི་གཅེས་ནོར་དག་བདག་ཉར་གནང་ཡོད་པ་དང་ཆབས་ཅིག  རྒྱ་གར་གྱི་གནའ་བོའི་རིག་གནས་དེ་དག་ཁྲོད་ལ་སེམས་ཀྱི་རྣམ་གཞག་སྐོར་ལ་ཧ་ཅང་ཞིབ་རྒྱས་གསུངས་ཡོད་སྟབས་ད་ཆ་ང་ཚོས་ཕྱིའི་འཕྲོད་བསྟེན་ལ་དོ་སྣང་གནང་བ་བཞིན་ནང་སེམས་ཀྱི་འཕྲོད་བསྟེན་ཐོག་ལའང་དོ་སྣང་གནང་དགོས་གལ་ཡིན་པ་དང་། ཇི་ཙམ་གྱིས་ནང་སེམས་ཀྱི་འཕྲོད་བསྟེན་ཐད་དོ་སྣང་གནང་བ་དེ་ཙམ་གྱིས་སེམས་ལ་ཞི་བདེ་འཕེལ་ངེས་ཡིན་པར་བཀའ་སྩལ་ཡོད།   མགོན་པོ་༸གང་ཉིད་མཆོག་གི་བཀའ་སློབ་གྲུབ་མཚམས་སུ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་སྩལ་དོན་ལྟར་ཚོགས་བཅར་བས་ཆིག་སྒྲིལ་ཡོང་ཐབས་སུ་གང་གནང་དགོས་པ་དང་ནད་ཡམས་སོགས་དང་འབྲེལ་བའི་བརྗོད་གཞི་མང་དག་ཐོག་བཀའ་འདྲི་ཞུས་སོང་། ༸གོང་ས་མཆོག་གིས་སྐབས་དེར་ད་ལྟའི་ནད་ཡམས་ཀྱི་དུས་ཚིགས་འདིར་ང་ཚོས་སེམས་ཤུགས་མ་ཆགས་པར་གདོང་ལེན་གནང་དགོས་གལ་ཡིན་པ་དང་། སྤྱིར་ངལ་བ་གང་ཞིག་འཕྲད་ཚེ་དགོངས་པ་ཆེ་བཞེས་ཀྱིས་གདོང་ལེན་གནང་རྒྱུ་ལས་སེམས་ངལ་ཐོག་བཞུགས་རྒྱུ་མེད་པར་ལམ་སྟོན་བཀྲིན་ཆེ་བ་སྩལ་སོང་།༸གོང་ས་མཆོག་གིས་ཕྲུ་གུའི་ཤེས་ཡོན་དང་འབྲེལ་ཏེ་བཀའ་སྩལ་བར་གཞོན་སྐྱེས་ཚོ་ནི་མ་འོངས་ཀྱི་སོན་རྩ་ཡིན་པས་ང་ཚོས་ཁོ་ཚོར་ངེས་པར་དུ་གལ་ཆེར་ངོས་འཛིན་པའི་ཐོག་ནས་གསོ་སྐྱོང་དང་ལྷག་པར་དུ་ཤེས་ཡོན་སློབ་གསོའི་དམིགས་ཡུལ་གཙོ་བོ་ཞིག་ནི་ཞི་བདེ་དང་བདེ་སྐྱིད་ལྡན་པའི་སྤྱི་ཚོགས་ཤིག་བསྐྲུན་ཐབས་ཡིན་པར་བརྟེན་དེའི་ཕྱིར་སེམས་བཟང་པོའི་ཐོག་ནས་ཕྱག་ལས་གནང་གནད་ཡིན་པར་བཀའ་སྩལ་ཡོད།གཞི་རྩའི་ད་ལན་ EdCamp ཞེས་པའི་ཤེས་ཡོན་ཚོགས་པ་དེ་ཨེ་མོ་རིའི་གཙུག་ལག་སློབ་གཉེར་ཁང་གི་སྰི་ཤེས་ཡོན་ལམ་ལུགས་སྦྱོང་བརྡར་གྱི་ཡུ་ཀེ་རེན་ནང་གི་ཟླ་གྲོགས་ཚོགས་པར་གྱུར་ཡོད་པ་ཞིག་རེད་འདུག སྤྱིར་ད་ཆ་གཉན་རིམས་ཁྱབ་གདལ་ཁྲོད་མགོན་པོ་༸གང་ཉིད་མཆོག་གིས་བཀའ་ཆོས་དང་བཀའ་སློབ་ཀྱི་མཛད་འཆར་ཁག་དྲྭ་ཐོག་བརྒྱུད་སྩོལ་མུས་ཡིན་པ་རེད། ཟླ་བ་འདིའི་ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་རྒྱལ་སྤྱིའི་ལྟེ་གནས་ཁང་དང་ཀུན་ཁྱབ་འགན་ཁུར་ཐེབས་རྩ་ཁང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར་སྙིང་རྗེ་དང་འཚེ་མེད་ཞི་བ་དང་འབྲེལ་བའི་རྒྱ་གར་གྱི་རིག་གཞུང་རྒྱུན་འཛིན་བྱེད་ཕྱོགས་སྐོར་ལ་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་བཀའ་སློབ་དངདྲི་བར་བཀའ་ལན་སྩལ་རྒྱུ་དང་། དེ་བཞིན་ཟླ་ ༡༡ ཚེས་ ༥ ནས་ ༧ ཉིན་གྲངས་གསུམ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རཱ་ཤི་ཡའི་དད་ལྡན་ཆོས་ཞུ་བས་ཇི་ལྟར་གསོལ་བ་བཏབ་པ་ལྟར་རྒྱ་གར་གྱི་སྔ་དྲོའི་ཆུ་ཚོད་ ༩ ནས་ ༡༠ པ་བར་དུ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཆོས་འབྲེལ་བཀའ་དྲིན་སྩལ་གཏན་ཁེལ་ཡོད་པར་མ་ཟད། དེ་བཞིན་ཚེས་ ༡༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨོ་སི་ཁྲི་ལི་ཡའི་སི་ནེ་གཙུག་ལག་མཐོ་སློབ་ཀྱི་ཀླད་པ་དང་སེམས་ཀྱི་ཞིབ་འཇུག་ཁང་གི་སློབ་དཔོན་ Ian Hickie ལྷན་དུ་རྒྱ་གར་གྱི་སྔ་དྲོ་ཆུ་ཚོད་ ༩ ནས་ ༡༠ བར་བགྲོ་གླེང་དང་དྲི་བ་དྲིས་ལན་སྩལ་རྒྱུ། ཚེས་ ༢༥ ཉིན་འཇར་མན་གྱི་ Potsdam དུ་ཡོད་པའི་ཨན་སི་ཌན་གྱི་གླེང་སྟེགས་ཞེས་པས་གསོལ་འདེབས་གོ་སྒྲིག་ཞུས་པ་ལྟར་ནང་ཆོས་དང་ཚན་རིག བྱམས་བརྩེ་བཅས་ཀྱི་སྐོར་ལ་སྔ་དྲོ་ཆུ་ཚོད་ ༡༠ ནས་ ༡༡ བར་བཀའ་སློབ་དང་དྲི་བར་བཀའ་ལན་སྩལ་རྒྱུ་རེད་འདུག ཕྱི་ཟླ་ ༡༢ ཚེས་ ༣ ནས་ ༥ བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སོག་པོའི་དད་ལྡན་ཚོས་ཇི་ལྟར་གསོལ་བ་བཏབ་པ་ལྟར་བཀའ་སློབ་ལམ་སྟོན་དང་ཆོས་འབྲེལ་བཀའ་དྲིན་སྩལ་རྒྱུ་ཡིན་པ་དང་། དེ་ཡང་ཚེས་ ༣ ཉིན་སྔ་དྲོ་ཆུ་ཚོད་ ༩ ནས་ ༡༠༌༣༠ བར་དུ་སོག་པོའི་གཞོན་སྐྱེས་ཚོར་ནང་ཆོས་དང་ཚན་རིག་གི་སྐོར་བཀའ་སློབ་དང་དྲི་བར་བཀའ་ལན་སྩལ་རྒྱུ་དང་དེ་རྗེས་ཚེས་ ༤  དང་ ༥ ཉིན་གཉིས་རིང་སྔ་དྲོ་ཆུ་ཚོད་ ༩ ནས་ ༡༠༌༣༠ ནཱ་ལེནྡྲའི་པཎ་གྲུབ་བཅུ་བདུན་གྱི་གསོལ་འདེབས་དང་༸རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་བཀའ་དྲིན་སྩལ་གཏན་ཁེལ་ཡོད་པ་རེད།

རྒྱ་གར་བྱང་ཤར་ནུབ་སྦེང་གྷལ་མངའ་སྡེའི་ Darjeeling གྲོང་ཁྱེར་ནང་དུ་སྨན་ཞབས་པའི་ཕྱག་ལས་གནང་བཞིན་པའི་བོད་རིགས་བེུད་ལྷ་མོ་དབྱངས་འཛོམ་ལགས་ལ་རྒྱལ་སྤྱིའི་ Rotary ཚོགས་པའི་རྡོ་རྗེ་གླིང་སྡེ་ཚན་གྱིས་ལས་རིག་ཞབས་ཞུའི་གཟེངས་རྟགས་འབུལ་བཞེས་གནང་འདུག

བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་ཚན་པའི་ངོས་ནས། བོད་པའི་སྤྱི་ཚོགས་ཀྱི་ནང་དུ་བུད་མེད་ཀྱི་གཙོ་བྱས་པའི་ཕོ་མོ་ཡོངས་ལ་ཆགས་སྲེད་རྩུབ་སྤྱོད་འགོག་ཐབས་སྲིད་བྱུས་སམ། ལམ་སྟོན་སྟོན་གྱི་དཔེ་དེབ་ཅིག་གསར་དུ་བརྩམས་ཏེ། བཞུགས་སྒར་གྱི་དབུས་བུད་མེད་ལྷན་ཚོགས་དང་དུས་རྒྱུན་ནས་བུད་མེད་ཀྱི་ཐོབ་ཐང་རྩོད་ལེན་གནང་མཁན་ཁག་ཅིག་ལ་ཐེངས་འདིའི་དཔེ་དེབ་དེའི་བརྗོད་བྱ་ཁག་ངོ་སྤྲོད་ཀྱི་ལས་རིམ་ཞིག་འཚོགས་བཞིན་འདུག གསར་འགོད་པས་བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་ཚན་པའི་ལས་བྱེད་ཚེ་རིང་སྐྱིད་ལགས་སུ་ཐེངས་འདིར་དཔར་སྐྲུན་གནང་བའི་ཆགས་སྲེད་ཀྱི་རྩུབ་སྤྱོད་འགོག་ཐབས་ཀྱི་དཔེ་དེབ་དེའི་བརྗོད་བྱ་ཆེ་ཁག་གི་སྐོར་ལ་བཀའ་འདྲི་ཞུས་པར་ཁོང་གིས། བརྗོད་བྱ་ཆེ་ཁག་ནི། རང་རེའི་བོད་པའི་སྤྱི་ཚོགས་ཀྱི་ནང་དུ། བཙན་གཡེམ་དང་དྲག་སྤྱོད། དེ་བཞིན་ཆགས་སྲེད་ཀྱི་རྩུབ་སྤྱོད་སོགས་ཡོང་གི་ཡོད་དུས། ཐེངས་འདིའི་དཔེ་ཀྱི་ནང་དུ། གཙོ་བོ་རྒྱ་གར་ནང་གི་བོད་མིའི་གཞིས་ཆགས་ཁག་དང་སློབ་གྲྭ་ཁག་གི་གཙོ་བྱས་པའི་བོད་མི་འདུས་སྡོད་ཀྱི་ས་ཁུལ་ཁག་ཏུ་ཚོགས་པ་གསར་འཛུགས་བྱས་ཏེ་དྲག་སྤྱོད་ཀྱི་རིགས་འགོག་ཐབས་དང་། དེ་བཞིན་ཁྲིམས་ཐོག་ནས་བོད་མི་རྣམས་ཀྱིས་རང་ཉིད་ལ་འཕྲད་བཞིན་པའི་རྩུབ་སྤྱོད་ཀྱི་དཀའ་ངལ་རིགས་ལ་གདོང་ལེན་བྱེད་ཕྱོགས་ཀྱི་ལམ་སྟོན་དང་འབྲེལ་མཐུད་སོགས་འཁོད་ཡོད་པར་ངོ་སྤྲོད་གནང་ཡོད།དེ་བཞིན་ཁོང་གིས། བོད་མིའི་སྒྲིག་འཛུགས་ཀྱི་བུད་ནུས་སྟོབས་ཚན་གོང་སྤེལ་ཚན་པའི་་ལས་གཞིའི་འོག བོད་ཀྱི་བུད་མེད་རོགས་རམ་འབྲེལ་མཐུད་ལས་ཁུངས་ཞེས་པ་ཞིག་ཀྱང་གསར་འཛུགས་བྱས་ཡོད་པ་མ་ཟད། སྡེ་ཚན་དེའི་ངོས་ནས་བོད་པའི་སྤྱི་ཚོགས་ཀྱི་ནང་དུ་བུད་མེད་ལ་རྩིབ་སྤྱོད་རིགས་ག་རེ་འཕྲད་པ་ཡིན་ནའང་། རྒྱ་གར་གྱུ་ཡུལ་ཁྲིམས་དང་མཐུན་པའི་ངོས་ནས་ཉེན་རྟོག་པར་ཡར་ཞུ་དང་ཁྲིམས་ཁང་ལ་ཞུ་གཏུག་སོགས་ཀྱི་ལས་གཞི་གཉེར་བཞིན་ཡོད་སྐོར་ཡང་ངོ་སྤྲོད་གནང་ཡོད། གསར་འགོད་པས་ཁོང་ལ་ཉེ་སྔོན་ནས་བོད་ཀྱི་བུད་མེད་ཀྱི་རོགས་རམ་འབྲེལ་མཐུད་ཀྱི་སྦྱར་ཡིག་དེ་སྤྱི་ཚོགས་དྲ་ལམ་དུ་བཀྲམས་ཟིན་པ་ཞིག་ཡིན་སྟབས། ད་ལྟའི་བར་དུ་ཆགས་སྲེད་ཀྱི་དཀའ་ངལ་འཕྲལ་ནས་འབྲེལ་མཐུད་ཁང་ལ་ཡར་ཞུ་བྱེད་མཁན་བྱུང་ཡོད་མེད་སྐོར་ནས་བཀའ་འདྲི་ཞུས་པར་ཁོང་གིས། ད་ལྟའི་བར་དུ་བུད་མེད་བཅུ་གྲངས་ཤིག་གིས་འབྲེལ་མཐུད་ཁང་ལ་གནས་ཚུལ་ཡར་ཞུ་བྱས་ཡོད་ལུགས་ངོ་སྤྲོད་ཀྱིས། དེ་དག་ལས་མང་ཆེ་བ་བཟའ་ཚང་བར་གྱི་ཁྱིམ་གྱི་རྩུབ་སྤྱོད་ཀྱི་རིགས་ཡིན་པ་དང་། ཡང་འགའ་ཤས་ཀྱིས་རང་ཉིད་ལ་འཕྲད་བཞིན་པའི་དཀའ་ངལ་གྱི་ཐད་ནས་དོགས་འདྲི་བྱས་ཡོད་པ་སོགས་ཡིན་ལུགས་མངོན་གསལ་གྱིས། བོད་ཀྱི་བུད་མེད་རྣམས་ཀྱིས་ངོ་ཚ་མི་དགོས་བའི་ཐོག་ནས་མུ་མཐུད་དུ་འབྲེལ་མཐུད་ཁང་ལ་འབྲེལ་གཏུག་བྱེད་རྒྱུ་གལ་ཆེན་ཡིན་སྐོར་གསུངས་སོང་། དེ་དང་འབྲེལ་ནས་ཁོང་གིས། གཞི་རྩའི་བོད་ཀྱི་བུད་མེད་རོགས་རམ་འབྲེལ་མཐུད་ལས་ཁུངས་ཀྱི་ཁྱབ་བསྒྲགས་ཀྱི་ནང་དུ་བུད་མེད་ལ་རྩུབ་སྤྱོད་འཕྲད་རིགས་ལ་རོགས་རམ་བྱེད་རྒྱུའི་གནད་དོན་འཁོད་ཡོད་ནའང་། ཐེངས་འདིའི་སྲིད་བྱུས་རང་བཞིན་གྱི་དཔེ་དེབ་ཀྱི་ནང་དུ་བུད་མེད་ཙམ་མིན་པར། སྐྱེས་བ་ཕོ་རྣམས་ལ་ཡང་ཆགས་སྲེད་རྩུབ་སྤྱོད་ཀྱི་རིགས་ཀྱི་དཀའ་ངལ་འགོག་ཐབས་ཀྱི་སྐོར་ནས་ལམ་སྟོན་བྱས་ཡོད་ལུགས་ངོ་སྤྲོད་གནང་སོང་། གཞི་རྩའི་བོད་མིའི་སྒྲིག་འཛུགས་ཀྱི་བུད་མེད་ནུས་སྟོབས་གོང་སྤེལ་ཚན་པ་དེ་ནི་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་ཁོངས་སུ་གསར་འཛུགས་བྱས་པ་ཞིག་ཡིན་པ་དང་། ཐེངས་འདིའི་སྲིད་བྱུས་རང་བཞིན་གྱི་དཔེ་དེབ་དེ་ནི་ ༢༠༡༨ ལོ་ནས་འགོ་འཛུགས་ཀྱིས་བོད་མིའི་སྒྲིག་འཛུགས་ཀྱི་སྐུ་ཚབ་དང་། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། གཞན་ཡང་རྒྱ་གར་གྱི་སྤྱི་ཚོགས་ནང་གི་ཆེད་མཁས་མི་སྣ་སོགས་ཆེད་སྐོང་གིས་ཐེངས་གཉིས་ལ་ཚོགས་འདུ་ཚོགས་ནས་གྲོས་བསྡུར་རིམ་པ་བྱས་པའི་གྲུབ་དོན་དུ་ཉེ་ཆར་རང་དཔར་སྐྲུན་བྱས་པ་ཞིག་ཆགས་ཀྱི་ཡོད་པ་རེད།

རྒྱ་གར་དབུས་ས་གཉིས་ཀྱི་སྒོ་རྒྱ་དམ་དྲག་ལྷོད་ཡངས་ཐེངས་ ༥ པའི་ལམ་སྟོན་ལྟར། འཛིན་རིམ་བཅུ་པ་དང་བཅུ་གཉིས་རྒྱ་གར་རྒྱལ་ཡོངས་ཀྱི་ཡིག་རྒྱུགས་ནང་མཉམ་ཞུགས་གནང་དགོས་པའི་རྐྱེན་གྱིས་བོད་ཕྲུག་ཁྱིམ་སྡེའི་ཁྱབ་ཁོངས་སྦེལ་ཀོབ་བོད་ཁྱིམ་ཕུད་གཞན་ཁྱབ་ཁོངས་ཁག་གི་འཛིན་རིམ་བཅུ་པ་དང་བཅིུས། དེ་བཞིན་སཾ་བྷོཊ་ཁྱབ་ཁོངས་ཀྱི་འཛིན་རིམ་བཅུ་པ་དང་བཅིུས་རྣམས་ཕྱི་ཟླ་ ༡༡ འགོ་སྟོད་དུ་འཛིན་གྲྭ་དངོས་སུ་འཚོགས་རྒྱུ་རེད་འདུག དེ་ཡང་ཕྱི་ཟླ་ ༡༠ ཚེས་ ༡༦ ཉིན་བོད་ཁྱིམ་སྤྱི་ཁྱབ་ཡིག་ཚང་ནས་གསལ་བསྒྲགས་སྤེལ་བའི་ནང་གསལ་ལྟར་ན། ཕྱི་ཟླ་ ༡༠ ཚེས་ ༡༣ ཉིན་བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་དབུས་པའི་ཉེ་འཁོར་བོད་ཁྱིམ་གྱི་ངེས་སྟོན་པ་དང་། སློབ་སྤྱི་ལྷན་ཚོགས་སྐབས་བོད་ཕྲུག་ཀྱི་ཤེས་ཡོན་དང་ཡང་སྒོས་འཛིན་རིམ་བཅུ་པ་དང་བཅིུས་གཉིས་ཀྱི་གནད་དོན་དང་འབྲེལ་ནས། རྒྱ་གར་དབུས་ས་གཉིས་ཀྱི་ལམ་སྟོན་དང་། བོད་ཕྲུག་ཚོའི་ཕ་མ་རྣམས་ཀྱི་མོས་མཐུན་ཡོད་མེད་ཀྱི་དགོངས་འཆར་སོགས་ལ་གཞིགས་ཏེ་བོད་ཁྱིམ་སྤྱི་ཁྱབ་ཡིག་ཚང་ནས་བཀའ་ཁྲོལ་གནང་བའི་ཐོག་འཛིན་རིམ་བཅུ་པ་དང་བཅིུས་གཉིས་རྒྱ་གར་རྒྱལ་ཡོངས་ཀྱི་ཡིག་རྒྱུགས་ལ་མཉམ་ཞུགས་གནང་དགོས་པའི་རྐྱེན་གྱིས་བོད་ཕྲུག་ཁྱིམ་སྡེའི་ཁྱབ་ཁོངས་སྦེལ་ཀོབ་བོད་ཁྱིམ་ཕུད་གཞན་རྣམས་ཕྱི་ཟླ་ ༡༡ པའི་ཚེས་ ༢ ནས་འཛིན་གྲྭ་དངོས་སུ་འཚོགས་རྒྱུའི་གསལ་བསྒྲགས་གནང་འདུགགསལ་བསྒྲགས་དེའི་ནང་ད་དུང་སློབ་ཕྲུག་རྣམས་ཕྱི་ཟླ་ ༡༠ ཚེས་ ༢༦ ནས་ ༣༡ བར་དུ་ཕ་མའི་འགན་ཡིག་མཉམ་འཁྱེར་གྱི་སྒོ་ནས་སློབ་གྲྭར་ངོ་བཅར་ཞུ་དགོས་པ་དང་། སློབ་ཕྲུག་རྣམས་སློབ་གྲྭར་འབྱོར་རིམ་བཞིན་ཉིན་གྲངས་ ༡༤ རིང་འགོག་དབྱེ་ཟུར་འཇོག་ཁང་དུ་འཇོག་རྒྱུ་ཙམ་མ་ཟད། སློབ་གྲྭར་འབྱོར་ཐོ་བཀོད་པ་ནས་བཟུང་སློབ་ཕྲུག་སུ་ཡང་ས་མཚམས་ནས་ཕྱིར་ཐོན་མི་ཆོག་པ་དང་། ཅི་སྟེ་དེ་ལྟར་བྱུང་ཚེ་འགོག་དབྱེ་ཟུར་འཇོག་སོགས་ཕྱག་བསྟར་ཞུ་རྒྱུ་དང་། སློབ་གྲྭར་མ་བཏང་བའི་བོད་ཕྲུག་ཚོའི་ཤེས་ཡོན་གྱི་ཐད་ལ་འགན་ཡོངས་རྫོགས་ཕ་མས་བཞེས་དགོས་པ་བཀོད་འདུག འདི་ག་རླུང་འཕྲིན་ཁང་གིས་གནད་དོན་འདི་དང་འབྲེལ་ནས་བོད་ཕྲུག་ཁྱིམ་སྡེའི་སྤྱི་ཁྱབ་ཤེས་ཡོན་འགན་འཛིན་བསོད་ནམས་སྲིད་གཅོད་ལགས་སུ་ཞལ་པར་བརྒྱུད་བཀའ་འདྲི་ཁག་ཅིག་ཞུ་སྐབས་ཕྱི་ཟླ་གསུམ་པའི་ཟླ་མཇུག་ནས་ནད་དུག་ཀྱིས་རྐྱེན་པའི་སློ་གྲྭ་སྒོ་རྒྱག་དགོས་བྱུང་རུང་ད་བར་དྲྭ་ཐོག་གི་འཛིན་གྲྭ་འཐུས་སྒོ་ཚང་བ་ཞིག་ཚོགས་ཡོད་ནའང། དྲྭ་རྒྱ་མེད་སའི་ས་ཁུག་ལུང་ཁུག་ལ་ཡོད་པའི་འཛིན་བཅུ་པ་དང་བཅིུས་ཀྱི་སློབ་མར་དམིགས་ནས་འཛིན་གྲྭ་ཚུགས་ཐུབ་ན་བསམ་པའི་དགོངས་པ་བཞིན་ཕྲུ་གུའི་ཕ་མ་དང་ལྷན་དུ་གྲོས་བསྡུར་གནང་ནས་མཐར་ཕྱི་ཟླ་ ༡༠ ཚེས་ ༡༣ ཉིན་བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་དབུས་པའི་ཉེ་འཁོར་བོད་ཁྱིམ་གྱི་ངེས་སྟོན་པ་དང་། སློབ་སྤྱི་རྣམས་ལྷན་འཛོམས་ཀྱི་སྒོ་ནས་ཚོགས་འདུ་ཞིག་སྐོང་ཚོགས་གནང་ཡོད་པ་དང་སྐབས་དེར་གྲོས་བསྡུར་བྱུང་བ་ཁག་འགྲེལ་བརྗོད་གནང་དོན། དེ་བཞིན་འདི་ག་རླུང་འཕྲིན་ཁང་གིས་ཞལ་པར་བརྒྱུད་སཾ་བྷོ་ཊའི་སྤྱི་ཁྱབ་འགན་འཛིན་ཚེ་རིང་དོན་གྲུབ་ལགས་སུ་ཁྱབ་ཁོངས་སློབ་གྲྭ་ཁག་གི་འཛིན་གྲྭ་དབུ་འཛུགས་གནང་ཕྱོགས་ཀྱི་ཐད་ལ་བཀའ་འདྲ་ཞུ་སྐབས་ཉེ་ལམ་ཕྱི་ཚེས་ ༡༢ ཉིན་ཞལ་པར་གྱི་བརྒྱུད་དེ་ཁྱབ་ཁོངས་སློབ་སྤྱི་ཁག་དང་ཚོགས་འདུ་ཞིག་སྐོང་ཚོགས་གནང་སྐབས་འཛིན་རིམ་བཅུ་པ་དང་བཅིུས་གཉིས་ཀྱིས་འཛིན་གྲྭ་དེ་བཞིན་ཕྱི་ཟླ་བཅིུག་པའི་འགོ་སྟོད་ནས་ཚོགས་རྒྱུའི་ཐག་གཅོད་བྱུང་ཡོད་པ་དང་། གཞི་རིམ་བར་མ་དང་གོང་མའི་དགེ་རྒན་རྣམས་ཕྱི་ཟླ་བཅུ་པའི་ཟླ་མཇུག་ཏུ་ལས་བཅར་ཞུ་རྒྱུའི་གསལ་བསྒྲགས་གནང་རྒྱུ་ཡིན་པ་གསུངས་སོང་། ཕྱོགས་མཚུངས་བཙན་བྱོལ་བོད་མིའི་ཤེས་ཡོན་ལྟེ་གནས་ཆེ་གྲས་གཅིག་སྟེ་མ་སུ་རི་བོད་ཁྱིམ་གྱི་འགན་འཛིན་ཀརྨ་ཆུང་བདག་ལགས་སུ་ཞལ་པར་བརྒྱུད་དེ་གའི་ཁྱབ་ཁོངས་ཀྱི་སློབ་གྲྭ་ཁག་དང་། ལྷག་པར་དུ་འཛིན་རིམ་བཅུ་པ་དང་བཅུ་གཉིས་ཀྱི་འཛིན་གྲྭ་འཚོགས་རྒྱུའི་ཐད་ལ་གྲ་སྒྲིག་ཇི་ལྟར་གནང་བཞིན་ཡོད་མེད་ཀྱི་སྐོར་ལ་བཀའ་འདྲི་ཞུ་སྐབས། འཛིན་གྲྭ་དངོས་སུ་འཚོགས་རྒྱུའི་འཆར་གཞི་སྒྲིག་ཟིན་པ་མ་ཟད། ཕྲུ་གུའི་ཕ་མ་དག་ལའང་འབྲེལ་བ་ཞུ་བཞིན་ཡོད་པ་ལས་དངོས་སུ་འཛིན་གྲྭ་འཚོགས་རྒྱུའི་ཟླ་དུས་ཚེས་གྲངས་ཐག་གཅོད་དང་གསལ་བསྒྲགས་གནང་མེད་པ་ངོ་སྤྲོད་གནང་སོང་། གཞི་རྩའི་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ ༡༩ དེའི་རྐྱེན་གྱིས་འཛམ་གླིང་ཡུལ་གྲུ་ཁག་གི་སློབ་གྲྭ་སྒོ་རྒྱབ་པ་ལྟར་བཙན་བྱོལ་བོད་མིའི་ཤེས་ཡོན་ལྟེ་གནས་ཁག་གིས་ཀྱང་བོད་ཕྲུག་ཚོའི་འཕྲོད་བསྟེན་ལ་དམིགས་ཏེ་སློབ་གྲྭ་ཁག་སྒོ་རྒྱབ་ཡོད་ཀྱང་། བོད་ཕྲུག་ཚོའི་ཤེས་ཡོན་གལ་ཆེར་ལ་དམིགས་ནས་དྲྭ་ཐོག་ནས་འཛིན་གྲྭ་འཚོགས་རྒྱུ་གཙོས་དྲྭ་རྒྱ་མེད་སའི་ས་ཁུག་ལུང་ཁུག་ཁག་ལ་ནང་ལས་དང་སྦྱོང་ཚན་སོགས་ཕུལ་ཡོད་པ་རེད།

ཁ་ཉིན་རེས་གཟའ་ཉི་མའི་ཉིན་ NewZealand འོས་བསྡུའི་ཆེན་མོའི་མཐའ་མའི་གྲུབ་འབྲས་གསལ་བསྒྲགས་སྤེལ་བའི་ཐོག ཕྱི་ལོ་ ༢༠༡༧ ནས་ ༢༠༢༠ བར་ཡུལ་དེའི་སྲིད་བློན་གྱི་འགན་ཁུར་བཞེས་བཞིན་པའི་ལྕམ་ Jacinda Ardern མཆོག་གི་སྣེ་ཁྲིད་པའི་ངལ་རྩོལ་ཚོགས་པར། འོས་བསྡུའི་ནང་ཚད་མཐོའི་མང་མོས་ཀྱི་རྒྱལ་ཁ་ཐོབ་པའི་གནས་ཚུལ་ཐོན་མ་ཐག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ལྕམ་ Jacinda མཆོག་ལ་འོས་བསྡུའི་ནང་སླར་ཡང་རྒྱལ་ཁ་ཐོབ་པར་དགའ་བསུའི་འཚམས་འདྲི་མཛད་འདུག

ཁེ་ཉིན། ཕྱི་ལོ་༢༠༢༠ ཟླ་ ༡༠ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༨ ཙམ་ལ་ལོ་ངོ་མང་ཤོས་སུ་རྒྱ་ནག་གི་བཙོན་ཁང་དུ་བཞུག་མཁན། བོད་ཀྱི་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོ་ལགས། དགུང་ལོ་ ༩༡ ཐོག་སུད་སིའི་ས་གནས་ Turbenthal ཞེས་པའི་རྒས་གསོ་ཁང་དུ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་དང་། བོད་མིའི་སྙིང་སྟོབས་དང་དཔའ་ངར་གྱི་མཚོན་རྟགས་ལྟ་བུའི་ཆབ་སྲིད་བཙོན་ཟུར་ཁོང་སྐུ་ཚེ་འཕེན་པ་རྫོགས་པ་དང་འབྲེལ་ནས། འཛམ་གླིང་གི་ས་ཕྱོགས་གང་སར་གནས་བའི་བོད་ཀྱི་ཚོགས་པ་སྐྱིད་སྡུག་དང་མི་སྒེར་མང་པོ་ཞིག་གིས་དམ་པ་གང་ཉིད་དགོངས་པ་རྫོགས་པར་གདུང་སེམས་མཉམ་སྐྱེད་ཀྱི་ཐུགས་སྨོན་སྐྱབས་འཇུག་ཞུ་བཞིན་འདུག

བོད་མིའི་སྒྲིག་འཛུགས་ཀྱི་དྲྭ་གནས་སུ་གནས་ཚུལ་བཀོད་པ་ལྟར་ན། ཁ་སང་ཟླ་༡༠ ཚེས་ ༡༥ ཉིན་ཨ་རིའི་ཕྱི་སྲིད་ལྷན་ཁང་གིས་གཞུང་འབྲེལ་ཐོག་ཐེངས་དང་པོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་ཨ་རིའི་ཕྱི་སྲིད་ལྷན་ཁང་གི་སྤྱི་ཁྱབ་ལས་ཁུངས་ Harry S. Truman building ནང་མགྲོན་འབོད་གནང་སྟེ་བོད་མིའི་སྒྲིག་འཛུགས་དང་ཨ་རིའི་དབར་གྱི་འབྲེལ་ལམ་ཡར་རྒྱས་གོང་འཕེལ་གྱི་ཐད་ནས་གླེང་མོལ་བྱུང་ཡོད་པར་འཁོད་འདུགཁ་སང་གི་མགྲོན་འབོད་ཀྱི་སྐབས་སུ། སྲིད་སྐྱོང་མཆོག་གིས་ཁེ་ཉིན་ཨ་རི་གཞུང་གིས་བསྐོ་བཞག་གནང་བའི་ཨ་རིའི་བོད་དོན་དམིགས་བསལ་འབྲེལ་མཐུད་པ་གསར་པ་སྐུ་ཞབས་ Robert A. Destro  མཆོག་ལ་ཐུག་འཕྲད་གནང་སྟེ། སྐུ་ཞབས་ཁོང་བོད་དོན་གྱི་དམིགས་བསལ་སྐུ་ཚབ་ཏུ་བསྐོ་བཞག་གནང་བར་དགའ་བསུ་ཞུས་པ་དང་འབྲེལ། སྐུ་ཞབས་ཁོང་གིས་དབུ་མའི་ལམ་བརྒྱུད་ནས་བོད་རྒྱ་འབྲེལ་མོལ་ལ་ཤུགས་སྣོན་རྒྱག་དགོས་བའི་འབོད་སྐུལ་དང་མཉམ་དུ། ད་ཆ་རྒྱ་ནག་གིས་འཕགས་བོད་ས་མཚམས་སུ་དཀའ་རྙོག་སློང་བཞིན་པའི་གནས་ཚུལ་ཡར་ཞུ་བྱས་ཏེ། གང་མགྱོགས་སྐུ་ཚབ་ཁོང་བཞུགས་སྒར་རྡ་སར་ཆེད་ཕེབས་གནང་རྒྱུར་རེ་བ་ཞུས་པ་ལྟར། དམིགས་བསལ་སྐུ་ཚབ་མཆོག་གིས་ཀྱང་ཁོང་གིས་མ་འོངས་བར་སྲིད་སྐྱོང་དང་མཉམ་འབྲེལ་གྱིས་བོད་དོན་གྱི་ཐད་ནས་ཕྱག་ལས་གནང་རྒྱུ་ཡིན་པའི་ལན་འདེབས་གནང་འདུག དེ་བཞིན་སྐབས་དེར་སྲིད་སྐྱོང་མཆོག་གིས། ཨ་རིའི་སྲིད་གཞུང་གིས་འདི་ལོར་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་དགོས་བའི་གལ་གནད་འགྲེལ་བརྗོད་ཀྱིས། རྒྱ་ནག་གི་དབང་བསྒྱུར་འོག  ད་ལྟའི་ཆར་བོད་ནང་གི་གནས་སྟངས་སྤྱི་ཡོངས་ནས་ཇེ་ཞན་ཇེ་སྡུག་ཏུ་འགྲོ་བཞིན་པ་མ་ཟད། འདི་ལོའི་ཟླ་བ་དགུ་བའི་ནང་རྒྱ་ནག་གིས་ཤིན་ཅང་གི་ནང་དུ་ལག་བསྟར་བྱེད་བཞིན་པ་ལྟར་བོད་ཁུལ་དུ་ཡང་ལས་རིགས་སྦྱོང་བརྡར་ལྟེ་གནས་ཁང་བཙུགས་ནས་བོད་མི་རྣམས་བཀག་སྐྱིལ་བྱེད་བཞིན་པ་མངོན་གསལ་གནང་བ་དང་འབྲེལ། ཨ་རིའི་སྲིད་གཞུང་གིས་བོད་དོན་རྒྱབ་སྐྱོར་བྱས་པ་དེ་ནི་མ་འོངས་བའི་བོད་པའི་སྲིད་སྐྱོང་རྣམས་ལ་ཡང་ལམ་ཁ་གསར་བ་ཞིག་སྐྲུན་ཡོད་པ་ལྟར། བོད་མི་རྣམས་ཀྱིས་མུ་མཐུད་ནས་ཨ་རིའི་སྲིད་གཞུང་དང་བོད་མིའི་སྒྲིག་འཛུགས་གཉིས་ཀྱི་བར་དུ་འབྲེལ་མོལ་མང་དུ་ཡོང་རྒྱུར་ཤུགས་སྣོན་བྱེད་རྒྱུ་ཡིན་པར་གསུངས་འདུགརྩ་བའི་ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་Bloomberg གསར་ཁང་གིས་གནས་ཚུལ་སྤེལ་བ་ལྟར་ན།  ཨ་རི་གཞུང་གིས་བོད་དོན་དམིགས་བསལ་འབྲེལ་མཐུད་པ་གསར་པ་བསྐོ་བཞག་གནང་བའི་སྐོར་གྱི་གནས་ཚུལ་ཕྱི་ལ་ཐོན་མ་ཐག  རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་Zhao Lijian གྱིས་ཨ་རི་གཞུང་གིས་བོད་དོན་དམིགས་བསལ་འབྲེལ་མཐུད་པ་སྐུ་ཞབས་ Robert A. Destro མཆོག་བསྐོ་གཞག་གནང་བ་དེ་ཆབ་སྲིད་ཀྱི་གཡོ་ཇུས་ཤིག་དང་རྒྱ་ནག་གི་ནང་སྲིད་ལ་ཐེ་ཇུས། དེ་བཞིན་བོད་ནང་བརྟན་བརླིང་མེད་པར་གཏོང་ཆེད་བཟོས་པ་ཞིག་ཡིན་པར་བསྙད་ནས་སྐྱོན་བརྗོད་བྱས་ཡོད་པ་རེད། བོད་མིའི་སྒྲིག་འཛུགས་ཀྱི་དྲྭ་གནས་སུ་འཁོད་པ་ལྟར་ན། ཕྱི་ལོ་ ༢༠༡༡ ཟླ་ ༩ ནང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་སྲིད་སྐྱོང་དམ་འབུལ་གནང་མ་ཐག་བོད་མིའི་སྒྲིག་འཛུགས་ཀྱི་བཀའ་ཤག་གིས་གཞུང་འབྲེལ་ཐོག་ཨ་རིའི་སྐུ་ཚབ་དོན་གཅོད་ཁང་ལ་ཡི་གེ་བཏང་སྟེ་་སྲིད་སྐྱོང་མཆོག་ཨ་རིའི་ཕྱི་སྲིལ་ལྷན་ཁང་ལ་བཅར་ཐུབ་མིན་སྐོར་འབྲེལ་བ་གནང་བ་ལྟར།  ད་ཆ་ལོ་དགུའི་རྗེས་ཨ་རིའི་ཕྱི་སྲིད་ལྷན་ཁང་གིས་རང་དབང་ལྡན་པའི་རྒྱལ་ཁབ་ཁག་གི་འགོ་ཁྲིད་ཚོ་དང་གཅིག་མཚུངས་ལྟར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཨ་རིའི་ཕྱི་སྲིད་ལྷན་ཁང་ནང་ཐུག་འཕྲད་གནང་བ་དེ་ནི་འཐབ་ཇུས་ཀྱི་གལ་གནད་ཆེན་པོ་ཞིག་ཡིན་པར་འཁོད་འདུག གཞི་རྩའི་སྲིད་སྐྱོང་མཆོག་གིས་ཕྱི་ལོ་ ༢༠༡༡ ནས་ ༢༠༡༨ བར་གཞུང་འབྲེལ་མིན་པའི་ཐོག་ཨ་རིའི་ཕྱི་སྲིད་ལྷན་ཁང་གི་ལས་བྱེད་མི་སྣ་ཚོར་ཟ་ཁང་ཁག་གི་ནང་ཐུག་འཕྲད་གནང་ཡོད་ཀྱང་ཐུག་འཕྲད་སྐོར་གྱི་གནས་ཚུལ་གསང་ཉར་བྱས་ཡོད་པ་མ་ཟད། པར་ཡང་ལེན་དུ་བཅུག་མེད་ནའང་། ད་ཆ་སྲིད་སྐྱོང་མཆོག་དངོས་སུ་ཨ་རིའི་ཕྱི་སྲིད་ལས་ཁུངས་སུ་གདན་འདྲེན་བྱས་པ་དེ་ནི་ཐོག་དང་པོ་ཆགས་ཡོད་པ་རེད།ཐེངས་འདིའི་སྲིད་སྐྱོང་མཆོག་གི་མགྲོན་འབོད་དང་བསྟུན་ནས། ཨ་རིའི་དོན་གཅོད་ཁང་གིས་དོན་གཅོད་པ། དངོས་གྲུབ་ཚེ་རིང་ལགས་ཀྱིས།  ཨ་རིའི་སྲིད་གཞུང་གི་ལས་ཁུངས་མ་འདྲ་བ་གཞན་དགུ་བརྒྱུད་ནས་ཐེངས་འདིའི་མཇལ་འཕྲད་དེ་གྲུབ་པ་ཞིག་ཡིན་པར་ལུང་འདྲེན་གྱིས།  མཇལ་འཕྲད་འདི་ནི་ཨ་རིའི་སྲིད་གཞུང་གིས་བོད་མིའི་སྒྲིག་འཛུགས་འདི་ཞི་བདེའི་ལམ་ལ་ཕྱོགས་བཞིན་པར་ཡིད་ཆེ་འཕེར་བའི་རྟགས་མཚན་ཞིག་ཡིན་པར་བསྒྲགས་ཏེ། ཨ་རིའི་བོད་དོན་དམིགས་བསལ་འབྲེལ་མཐུད་སྐུ་ཚབ་མཆོག་དང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གཉིས་ཀྱིས་ཐེངས་འདིའི་མཇལ་འཕྲད་དེར་ཤུགས་སྣོན་བྱས་པར་བཀའ་དྲིན་ཆེ་ཞུས་འདུག རྩ་བའི་ཐེངས་འདིར་སྲིད་སྐྱོང་མཆོག་གིས་ཨ་རིའི་མི་འབོར་དང་སྐྱབས་བཅོལ། གཞིས་སྤོ་ལས་དོན་ཚན་པའི་དྲུང་ཆེ་ལས་རོགས་གཞོན་པ་  Richard Albright མཆོག་དང་། དྲུང་ཆེ་ལས་རོགས་གཞོན་པ་ Carol Thompson O’Connell མཆོག་དང་ཐུག་འཕྲད་གནང་ཡོད་པ་མ་ཟད། ཨ་རིའི་ཕོ་བྲང་དཀར་པོའི་ལས་བྱེད་རྒན་པ་ཁག་ཅིག་ལའང་ཐུག་འཕྲད་གནང་འདུག

བོད་ནང་ས་ཁུལ་དང་ཞིང་ཆེན་རིམ་པའི་ལས་གནས་ཁག་ལ་བོད་མིའི་སྐུ་ཚབ་ཡོད་པ་དེ་ལྟར་ཡང་བོད་མི་དེ་དག་ལ་གོ་གནས་མཐོ་བ་དང་དབང་ཆ་ཡོད་པའི་ལས་གནས་རག་པ་དེ་ཙམ་མེད་པའི་སྙན་ཐོ་ཞིག་འདོན་སྤེལ་གནང་འདུག ཨ་རིའི་རྒྱལ་ས་ཝ་ཤིང་ཌོན་ཌི་སི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གིས་དབྱེ་བའི་བོད་རང་སྐྱོང་ལྗོངས་ཟེར་བ་དང་སོ་ཁྲོན། མཚོ་སྔོན། ཀན་སུ། ཡུ་ནན་བཅས་ཀྱི་ཞིང་ཆེན་དང་རྫོང་རིམ་པའི་ཚོགས་པ་ཁག་དང་སྲིད་གཞུང་། དེ་བཞིན་དམག་དཔུང་གི་ལས་གནས་སོགས་གནད་ཆེ་བའི་གོ་གནས་ཡོད་མཁན་གྱི་གྲངས་ཐོ་ཕྱོགས་སྒྲིག་གིས་ Position without Power – Tibetan Representation in the Chinese Administrative System ཞེས་རྒྱ་ནག་སྲིད་གཞུང་གི་ལམ་ལུགས་ནང་བོད་མིར་དབང་ཆ་མེད་པའི་ལས་གནས་སུ་བསྐོ་གཞག་ཞེས་པའི་སྙན་ཐོ་ཞིག་འདོན་སྤེལ་གནང་འདུག སྙན་ཐོའི་ནང་རྒྱ་ནག་གཞུང་གིས་བོད་ནང་གི་ས་ཁུལ་ཡོད་དོ་ཅོག་གི་བོད་མི་རྣམས་ནས་སྲིད་གཞུང་གི་ལས་དོན་ནང་མཉམ་ཞུགས་སླད་ཐོབ་ཐང་ཡོད་པར་མ་ཟད་སྒོས་རྒྱ་ནག་གིས་དབང་སྒྱུར་འོག་ཡོད་པའི་མི་རིགས་རྣམས་ནས་ད་ཆ་སྲིད་གཞུང་གི་ལས་གནས་གལ་ཆེ་ཁག་ཏུ་ཕྱག་ལས་གནང་གི་ཡོད་ཅེས་བརྗོད་པ་དེ་ལྟར་ཡང་། བོད་སྤྱི་ཡོངས་ནང་དབང་ཆ་ཡོད་པ་དང་ལས་གནས་གལ་ཆེ་དག་གི་ཁྲོད་བོད་མི་སྐུ་ཚབ་མེད་པར་ཐེར་འདོན་གནང་འདུག སྙན་ཐོའི་ནང་བོད་ནང་གི་ས་ཁུལ་རིམ་པ་དང་ཞིང་ཆེན་ཁག་གི་ཚོགས་པ་ཁག་ཏུ་བོད་མི་མིན་པ་འབའ་ཞིག་གིས་ལས་གནས་དེ་དག་བཟུང་ཡོད་པ་དང་། ས་ཁུལ་རིམ་པ་ཁག་ ༡༧ དང་རྫོང་རིམ་པ་ ༢ ཡོད་པ་དེ་དག་ཁྲོད་བཞི་ཙམ་གྱི་ཚོགས་པའི་དྲུང་ཆེ་བོད་མི་ཡིན་པ་མ་གཏོགས་དེ་མིན་འགོ་ཁྲིད་གཞན་ཆ་ཚང་རྒྱ་རིགས་ཡིན་པ་མངོན་གསལ་གནང་འདུག ད་ཆ་བོད་མི་སུ་ཞིག་ཀྱང་ཞིང་ཆེན་རིམ་པའི་ནང་གོ་གནས་མཐོ་བའི་ལས་གནས་ཁྲོད་མེད་པར་མ་ཟད། ད་བར་བོད་མི་སུ་ཞིག་ཀྱང་བོད་རང་སྐྱོང་ལྗོངས་ཟེར་བའི་ནང་དམར་ཤོག་ཚོགས་པའི་དྲུང་ཆེའི་ལས་གནས་གོ་སྐབས་རག་མེད་སྐོར་བཀོད་འདུག ལྷག་པར་དུ་བོད་རང་སྐྱོང་ལྗོངས་ཀྱི་ས་ཁུལ་རིམ་པ་དང་གྲོང་ཁྱེར་ ༧ ཁྲོད་ལྷ་ས་དང་གཞིས་ཀ་རྩེ་གཉིས་ནང་གི་ཚོགས་པའི་དྲུང་ཆེ་བོད་མི་ཡིན་པ་མ་གཏོགས་གཞན་ལྔ་རྣམས་ཀྱི་དྲུང་ཆེ་དེ་རྒྱ་རིགས་ཡིན་པ་དང་། དེ་བཞིན་མཚོ་སྔོན་ནང་གི་ས་ཁུལ་རིམ་པ་དྲུག་ཁྲོད་མཚོ་བྱང་དང་མཚོ་ལྷོ་གཉིས་ཀྱི་དྲུང་ཆེ་བོད་མི་དང་། གཞན་གསུམ་གྱི་ནང་རྒྱ་རིགས་ཀྱིས་འགོ་ཁྲིད་ཀྱི་ཡོད་པ་དང་། སི་ཁྲོན་དང་ཀན་སུ་དེ་བཞིན་ཡུ་ནན་བཅས་ཀྱི་ས་ཁུལ་དང་རྫོང་རིམ་པ་ཁག་གི་འགོ་ཁྲིད་བོད་མི་མིན་སྐོར་སོགས་བཀོད་ཡོད་པ་རེད།རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་གིས་ཆེད་དུ་མངགས་བོད་ནང་གི་གལ་ཆེའི་ལས་གནས་ཁྲོད་བོད་མི་རྣམས་ལ་གོ་སྐབས་མ་སྤྲད་པ་དེས་རྒྱ་གཞུང་གི་ཆབ་སྲིད་ཀྱི་དམིགས་ཡུལ་བསྒྲུབ་ཐབས་ཡིན་པར་འགྲེལ་བརྗོད་གནང་འདུག་པ་དང་། རྒྱ་གཞུང་གིས་བོད་མི་རྣམས་གོ་གནས་མཐོ་བ་དང་དབང་ཆ་ཡོད་པའི་ལས་གནས་སུ་བསྐོ་གཞག་མ་གནང་བ་དེས་བོད་མིར་ཡིད་ཆེས་བློ་འགེལ་མ་ཐུབ་པ་དང་བོད་མིའི་ཐོག་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་ཡོད་པ་རེད་ཅེས་མངོན་གསལ་གནང་ཡོད། རྒྱ་ནག་གི་འགོ་ཁྲིད་ཐད་ཞིབ་འཇུག་གནང་མཁན་ Cheng Li ཡིས་རྒྱ་ནག་གི་འགོ་ཁྲིད་རྣམ་པས་བོད་མི་གཙོས་དེ་གའི་དབང་སྒྱུར་འོག་ཡོད་པའི་མི་རིགས་རྣམས་ལ་སྲིད་གཞུང་གི་ལས་གནས་ཁྲོད་གོ་སྐབས་སྤྲད་པ་ཡིན་ན་རྒྱ་གཞུང་གིས་འཁྱོག་བཤད་ལས་དོན་སྤེལ་བར་རོགས་འདེགས་དང་རྒྱའི་དབང་སྒྱུར་འོག་ཡོད་པའི་མི་རིགས་དག་ལ་དམར་ཤོག་གི་ལམ་ལུགས་ནང་ལས་ཀའི་གོ་སྐབས་རག་གི་ཡོད་པའི་རྣམ་པ་ཞིག་མངོན་ཐབས་ཡིན་པར་མ་ཟད། ད་ཆ་དེ་འབྲེལ་གྱི་ལས་གནས་ཐོབ་པ་ཉུང་ཤས་ལས་མེད་པ་རྣམས་ཀྱང་རྒྱ་གཞུང་གི་ལྟ་གྲུབ་ལས་མི་འགལ་བའི་བྱ་སྤྱོད་སོགས་སྤེལ་དགོས་པ་དང་། དམ་བཅའ་དང་ཞིབ་འཇུག་རིམ་པ་མང་པོ་འགྲོ་བའི་ཐོག་ནས་གོ་གནས་རག་ཡོད་སྐོར་གསུངས་འདུག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས་ད་རེས་ཀྱི་སྙན་ཐོ་འདི་བརྒྱུད་ནས་བོད་ནང་གི་བོད་མིར་དབྱེ་འབྱེད་ཤུགས་ཆེ་བྱེད་བཞིན་ངལ་བ་འཕྲད་ཀྱི་ཡོད་པ་ཁ་གསལ་ཆགས་པ་དང་། ལྷག་པར་དུ་རྒྱ་གཞུང་གིས་བོད་མིར་སོ་སོའི་གཞུང་འཛིན་རྒྱུའི་ཐོབ་ཐང་འཕྲོག་པ་དེས་བོད་ནང་གི་བོད་མི་རྣམས་རང་ཡུལ་དུ་མི་སེར་གཉིས་པ་ལྟ་བུའི་གནས་སྟངས་ཆགས་ཡོད་པར་གསུངས་འདུག ཉེ་ལམ་བོད་རང་སྐྱོང་ལྗོངས་ཟེར་བའི་ཚོགས་གཙོ་བོད་མི་ཆེ་དགྲ་ལྷས་གསར་འགོད་པར་བོད་ནང་གི་ཞིང་འབྲོག་ཚོ་ངལ་རྩོལ་བསྒྱུར་བཀོད་ཁང་ནང་བཙན་དབང་གིས་བཏང་བའི་གནད་དོན་དེར་ངོས་ལེན་ཞུས་མེད་པ་དེས་རྒྱ་གཞུང་གི་དམ་དྲག་དང་སྟངས་འཛིན་མངོན་གྱི་ཡོད་པ་གསུངས་འདུག