༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ཆེས་ཐོག་མའི་བོད་ཀྱི་བེུད་ཉིན་མོ་སྲུང་བརྩི་ཞུས་སོང་བ་དང་། མགོན་པོ་༸གང་ཉིད་མཆོག་གིས་སྐབས་དེར་བོད་ཀྱི་བེུད་ཚོས་འཛམ་བུ་གླིང་འདིའི་ཐོག་ལ་བྱམས་བརྩེའི་བསམ་བློ་དར་ཁྱབ་གཏོང་རྒྱུར་སྣེ་ཁྲིད་བྱ་དགོས་པ་མ་ཟད། བོད་ཀྱི་བེུད་གཙོས་པའི་བོད་རིགས་སེར་སྐྱ་མང་ཚོགས་ནས་ནང་པའི་གཞུང་ལུགས་ཁག་ལ་སློབ་གཉེར་གནང་དགོས་གལ་ཡིན་པར་ལམ་སྟོན་རྒྱ་ཆེ་མཛད་སོང་། དེ་རིང་ཟླ་ ༣ ཚེས་ ༡༢ ཉིན་མོ་འདི་ནི་དེ་སྔ་ཕྱི་ལོ་ ༡༩༥༩ ལོར་བོད་ནང་བུད་མེད་སྒེར་ལངས་ཐེངས་དང་པོ་གནང་སྟེ་ལོ་ངོ་ ༥༨ འཁོར་བའི་དུས་ཚིགས་དང་བསྟུན། བོད་མིའི་སྒྲིགས་འཛུགས་ཀྱིས་གོ་སྒྲིག་ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་མོ་དེ་བོད་ཀྱི་བེུད་ཉིན་མོ་ཞེས་གཞུང་འབྲེལ་ཐོག་ནས་སྲུང་བརྩི་ཞུས་སོང་། མཛད་སྒོའི་སྐུ་མགྲོན་གཙོ་བོར་༸གོང་ས་༸སྐྱབས་མགོན་ཆེན་པོ་མཆོག་དབུས་བཞུགས་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་དབུས་པའི་མང་གཙོའི་ཀ་བ་གསུམ་གྱི་མཛད་སྒོ་རྣམ་པ། གཞན་ཡང་ཕ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྦྲེལ་པོ་གཙོས་པའི་གྲོས་ཚོགས་འཐུས་མི་ཁག་ཅིག་དང་། ཨོ་སི་ཊོ་ལི་ཡ་དང་ཁེ་ན་ཌའི་གྲོས་ཚོགས་འཐུས་མི་ཁག་ཅིག གཉུག་མར་གནས་པ་དང་གློ་བུར་དུ་ལྷགས་པའི་ཕྱི་ནང་དད་ལྡན་སེར་སྐྱ་མང་ཚོགས་བཅས་ལྷན་འཛོམས་གནང་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་དེང་སྐབས་འཛམ་བུ་གླིང་འདིའི་ཐོག་ལ་འཕྲད་བཞིན་པའི་མུ་གེ་དང་དམག་འཁྲུག་སོགས་ཀྱི་དཀའ་ངལ་ཁག་སེལ་ཐབས་སུ་ཐབས་ལམ་བཟང་ཤོས་དེ་ནི་བྱམས་བརྩེའི་བསམ་བློ་གོང་མཐོར་གཏོང་རྒྱུ་ཡིན་པ་དང་། བྱམས་བརྩེ་དེ་འགྲོ་བ་མིའི་ལུས་ཀྱི་གྲུབ་ཆའི་ཆ་ནས་བེུད་མེད་རྣམས་ལ་ནུས་པ་ཆེ་བ་ཡོད་སྟབས། བེུད་རྣམས་ཀྱིས་འཛམ་བུ་གླིང་འདིའི་ཐོག་ལ་བྱམས་བརྩེའི་བསམ་བློ་དར་ཁྱབ་གཏོང་རྒྱུར་སྣེ་ཁྲིད་བྱ་དགོས་པར་བཀའ་བསྩལ་མཛད་སོང་། ༸གོང་ས་མཆོག་གིས་ད་དུང་གསུངས་པར་བོད་ནང་གི་བོད་མི་ཚོ་ལ་མཚོན་ན་ཆོས་དད་ཆེན་པོ་ཡོད་པ་ལྟར། བོད་ཀྱི་བླ་མ་གོང་མ་སོགས་ཀྱིས་མང་ཚོགས་རྣམས་ལ་ནང་ཆོས་སློབ་ཁྲིད་གནང་ཕྱོགས་དང་མང་ཚོགས་ཀྱི་ཆོས་ལ་སློབ་གཉེར་གནང་སྟངས་ཐོག་ལ་འཐུས་ཤོར་ཆེན་པོ་ཕྱིན་ཡོད་པ་བཀའ་བསྩལ་དང་སྦྲགས། བོད་གཞིས་ལུས་རྒྱ་ཆེ་མང་ཚོགས་རྣམས་ཀྱིས་དེ་སྔའི་ལུགས་སྲོལ་ཁོ་ན་ལྟར་མ་ཕྱིན་པར་ནང་ཆོས་ལ་སློབ་གཉེར་རྒྱ་གང་ཆེ་གནང་རྒྱུ་ཆེས་ལྕི་བ་ཡིན་པར་བཀའ་ནན་མཛད་ཡོད། ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་༸གང་ཉིད་ནས་དེ་སྔ་ནས་བཙུན་མ་ཚོས་ཕྱག་དཔེ་གཟིགས་དགོས་པའི་འབོད་སྐུལ་རིམ་པ་གནང་རྗེས། སྔར་ལོའི་ཕྱི་ཟླ་ ༡༢ ནང་བཙུན་མ་ཉི་ཤུ་ལ་ཆེས་ཐོག་མའི་དགེ་བཤེས་མའི་ཕྱག་འཁྱེར་བསྩལ་ཐུབ་བ་བྱུང་སྐོར་གསུངས་པ་དང་འབྲེལ། བཙུན་མ་རྣམས་ནས་མུ་མཐུད་ནང་ཆོས་ལ་སློབ་སྦྱོང་དང་། དགེ་བཤེས་མ་རྣམས་ནས་ཀྱང་ཕྱག་འཁྱེར་ཐོབ་སོང་བསམ་ནས་མ་བཞུགས་པར་བཙུན་མགོན་དང་སློབ་གྲྭ་ཁག་ཏུ་ནང་ཆོས་སློབ་ཁྲིད་སོགས་ཀྱི་ཐོག་ལ་ཐུགས་འཁུར་བཞེས་དགོས་པའི་བཀའ་སྩལ་ཡང་གནང་སོང་། བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་གིས་བོད་མི་རྣམས་སྐྱབས་བཅོལ་དུ་འགྱར་དགོས་བྱུང་བ་དེ་ནི་ཆབ་སྲིད་ཀྱི་གནས་སྟངས་ཤིག་ཡིན་པ་ལས། སྐྱེས་པ་དང་བེུད་སོགས་ཀྱི་དབྱེ་འབྱེད་དང་མིའི་ནུས་སྟོབས་ཞན་པའི་དབང་གིས་ཆགས་པ་ཞིག་མ་རེད་ཅེས་སོགས་གསུངས་ཡོད། བོད་མི་མང་སྤྱི་འཐུས་ལྷག་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཀྱང་བུད་མེད་རྣམས་ནས་སྤྱི་ཚོགས་ནང་ཆོས་དང་ཆབ་སྲིད། དཔལ་འབྱོར་དང་རིག་གནས་སོགས་ལས་གནས་གང་དུ་ཡང་ཞབས་འདེགས་ཞུ་ཐུབ་པ་གནང་དགོས་གལ་ཡིན་པ་སོགས་གསུངས་ཡོད། གཞན་ཡང་མཛད་སྐོར་སྐུ་མགྲོན་ཁོངས་སུ་ཡོད་པའི་ཕ་རན་སིའི་གྲོས་ཚོགས་འཐུས་མི་ andre gattonlin ལགས་དང་བཙན་བྱོལ་བོད་མིའི་འོས་བསྡུ་རྟོག་ཞིབ་ཚོགས་ཆུང་ནང་ཡོད་པའི་ཨོ་སི་ཊོ་ལི་ཡའི་གྲོས་ཚོགས་འཐུས་མི་ Lisa Singh ལགས་སོགས་ཀྱིས་ཀྱང་གསུང་བཤད་གནང་པ་མ་ཟད། བོད་མིའི་སྒྲིག་འཛུགས་ཀྱི་བུད་མེད་ཀྱི་ནུ་སྟོབས་གོང་སྤེལ་དང་འབྲེལ་བའི་ལས་གཞི་ཁག་དང་། ལྷག་པར་དུ་དེ་རིང་་བོད་ཀྱི་བེུད་ཉིན་མོ་ཞེས་གཞུང་འབྲེལ་གྱི་སྲུང་བརྩི་ཞུས་ཐུབ་པར་བསྔགས་བརྗོད་གནང་སོང་། ཁྱད་པར་དུ་ཨོ་སི་ཊོ་ལི་ཡའི་གྲོས་ཚོགས་འཐུས་མི་ Lisa Singh ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་བུད་མེད་ཀྱི་ཤེས་ཡོན་ཡར་རྒྱས་གཏོང་ཐབས་སོགས་ལ་༸སྐུ་ངལ་འཛེམས་ཀྱིས་ཐུགས་བཞེས་མཛད་པར་ཡི་རངས་བསྔགས་བརྗོད་དང་སྦྲགས། མགོན་པོ་༸གང་ཉིད་མཆོག་ནི་༸རྒྱལ་མཆོག་༸སྐུ་ཕྲེང་རིམ་བྱོན་ལས་བེུད་ཀྱི་རང་དབང་དང་ཐོབ་ཐང་ ཐོག་ལ་ཐུགས་འཁུར་བཞེས་མཁན་དང་པོ་དེ་རེད་ཅེས་ཆེ་བསྟོད་ཞུས་སོང་། གཞི་རྩའི་འདི་ལོ་ནས་དབུ་འཛུགས་ཀྱིས་བུད་མེད་སྒེར་ལངས་ཀྱི་ཉིན་མོ་དེ་བོད་ཀྱི་བེུད་ཉིན་མོ་ཞེས་སྲུང་བརྩི་ཞུ་རྒྱུ་དེ་ནི་ཉེ་ཆར་བོད་མིའི་སྒྲིགས་འཛུགས་ཀྱིས་གོ་སྒྲིག་འོག་བཞུགས་སྒར་དུ་ཚོགས་པའི་བོད་ཀྱི་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོའི་སྐབས་བཀའ་ཤག་ནས་ཐག་གཅོད་གནང་པ་ཞིག་ཆགས་ཀྱི་ཡོད་རེད།

༸གོང་ས་མཆོག་གིས་ལོ་ངོ་སྟོང་ཕྲག་རིང་གི་བོད་ཀྱི་ཐོུང་མ་ཡིན་པའི་ཆོས་རིག་དང་སྐད་ཡིག་གི་གལ་གནད། དེ་བཞིན་བོད་མིའི་མི་རབས་གཞོན་པའི་ལས་འགན་སྐོར་ལ་བཀའ་སློབ་བཀྲིན་བསྩལ་སོང་། དེ་རིང་ཟླ་ ༣ ཚེས་ ༩ ཉིན་སྔ་ཐོག་ཚོུད་ ༨།༣༠ སྟེང་བཞུགས་སྒར་ཉེ་འཁྲིས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ ༢༡ འཁོར་བ་དང་༸རྒྱལ་བའི་འཁྲུངས་རབས་ཀྱི་ཞལ་ཐང་ ༢༥ གསར་བཞེངས་ལེགས་གྲུབ་བྱུང་བའི་དགའ་སྟོན་མཛད་སྒོའི་སྐུ་མགྲོན་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་བཞུགས་གཙོས།  བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། དེ་བཞིན་ཕྱི་ནང་གི་སྐུ་མགྲོན་བཅས་ལྷན་འཛོམས་ཀྱིས་ལྟེ་གནས་ཁང་དབུ་བརྙེས་པའི་དགའ་སྟོན་མཛད་སྒོ་ཚོགས་ཡོད་པ་རེད། དེའང་མགོན་པོ་མཆོག་བཞུགས་ཁྲིར་༸ཞབས་སོར་འཁོད་བསྟུན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་མཆོག་གིས་མཎྜལ་རྟེན་གསུམ་འདེགས་འབུལ་དང་སྦྲགས། དགའ་སྟོན་མཛད་སྒོའི་ཐོག་མར་སྤྱི་ཁྱབ་འགན་འཛིན་བདེ་ཆེན་རྣམ་རྒྱལ་ལགས་ནས་ལྟེ་གནས་ཁང་དེ་ ༡༩༩༥ ལོར་གསར་འཛུགས་གནང་པ་ནས་རིམ་བཞིན་རྒྱ་བསྐྱེད་ཀྱིས་སྔ་ཕྱིའི་བརྒྱུད་རིམ་སོགས་ལས་བསྡོམས་སྙིང་བསྡུས་ཤིག་ལྷ་སྙན་སྒྲོན་འབུལ་ཞུས་ཡོད། དེ་རིང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ ༢༡ འཁོར་བའི་ཉིན་འཛིན་སྐྱོང་སྡེ་ཚན་ཆེ་ཆུང་གྲངས་ ༣༥ ཡོད་པ་དེ་དག་ལག་ཤེས་སྒྱུ་རྩལ་ཁྱབ་ཁོངས་དང་། ཤེས་ཡོན། རིག་གཞུང་ཁྱབ་ཁོངས། དཔལ་འབྱོར་འདུ་འགོད་ཁྱབ་ཁོངས། སྤྱི་ཚོགས་བདེ་དོན་ཁྱབ་ཁོངས་བཅས་ཁྱབ་ཁོངས་བཞིར་འདུས་ཏེ་ཁྱོན་མི་གྲགས་ ༥༠༠ ཙམ་ཡོད་པ་རེད་འདུག ཚོགས་པའི་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་མཆོག་ནས་༸གོང་ས་མཆོག་གིས་དབུས་པའི་སྐུ་མགྲོན་རྣམ་པར་གུས་འཚམས་སྔོན་དུ་འགྲོ་བའི་ཐོག་ནས་དེ་རིང་གི་དུས་ཚིགས་དང་བསྟུན་༸གོང་ས་མཆོག་༸སྐུ་ཚེ་༸ཞབས་པད་བསྐལ་བརྒྱར་བརྟན་པའི་གསོལ་འདེབས་སྨོན་ལམ་དང་འབྲེལ་ ༢༠༠༣ ལོ་ནས་འགོ་འཛུགས་པའི་༸རྒྱལ་བའི་འཁྲུངས་རབས་ཀྱི་ཞལ་ཐང་ ༢༥ བཞེངས་སྐྲུན་ལེགས་གྲུབ་བྱུང་ཡོད་པ་དེ་མགོན་པོ་༸གང་ཉིད་མཆོག་ལ་འབུལ་ལམ་ཞུས་སོང་། སྐབས་དེར་༸གོང་ས་མཆོག་གིས་བཀའ་བསྩལ་གནང་དོན། ༸གང་ཉིད་མཆོག་གིས་ཐོག་མར་དེ་རིང་གི་མཛད་སྒོ་འདིའི་ཐོག་ནས་ནོར་བོད་ཀྱི་རིག་གཞུང་གཅེས་སྐྱོང་ཁང་གི་འགོ་ལས་སློབ་མ་ཡོངས་ནས་ད་བར་བོད་ཀྱི་རིག་གཞུང་ཉམས་པ་སོར་ཆུད་དང་མི་ཉམས་རྒྱུན་འཛིན་གྱི་ལས་དོན་ཐོག་ཧུར་ཐག་གནང་པར་བསྔགས་བརྗོད་མཛད་པ་དང་སྦྲགས། ད་བར་བོད་མི་བཙན་བྱོལ་བ་རྣམས་བཙན་བྱོལ་གཞན་དང་མི་འདྲ་བ་ཆགས་ཡོད་པ་དེ་ནི་གཙོ་བོ་བོད་ཀྱི་ཆོས་དང་རིག་གཞུང་ལ་བརྟེན་ནས་ཡིན་པ་དང་། དེ་རིང་སང་ཉིན་འཛམ་གླིང་འདིའི་ནང་བོད་ཀྱི་ཆོས་རིག་གིས་ལེགས་སྐྱེས་གང་འཚམ་ཕུལ་ཡོད་པ་དེའི་ཁྲོད་སྒྲིག་འཛུགས་འདིས་ཀྱང་ཞབས་འདེབས་གང་ཙམ་ཞུས་ཡོད་སྐོར་བཀའ་བསྩལ་ཡོད། ཁྱད་པར་དུ་མགོན་པོ་༸གང་ཉིད་མཆོག་གིས་དེ་སྔ་ ༡༩༥༩ ལོར་༸རྒྱལ་བའི་༸སྐུ་ཚེར་ཉེན་ཁ་གཟིགས་རྐྱེན་བཙན་བྱོལ་དུ་མ་ཕེབས་ཀ་མེད་བྱུང་ནས་ཕྱིས་སུ་བཙན་བྱོལ་དུ་ཕེབས་མ་ཐག་བོད་ཀྱི་ཐོུང་མ་ཡིན་པའི་ཆོས་རིག་དང་སྐད་ཡིག་བཅས་མི་ཉམས་རྒྱུན་འཁྱོངས་ཡོང་སླད་ཐོག་མར་གཞིས་ཆགས་དང་སློབ་གྲྭ དེ་ནས་ཆོས་སྒར་སོགས་རིང་པོར་མ་འགོར་བར་ཟུར་བཙུགས་མཛད་པ་མ་ཟད། དེ་ནས་རིམ་པ་གཉིས་པའི་ཚུལ་དུ་འདས་པའི་ལོ་ ༣༠ ཙམ་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་པ་ཙམ་མ་ཡིན་པར་བོད་ཀྱི་ཆོས་རིག་སྤྱི་དང་སྒོས་སུ་སེམས་ཁམས་རིག་པ་དང་ཚད་མ་རིག་པ། དེ་བཞིན་ལྟ་གྲུབ་སྐོར་དེ་དག་གིས་སེམས་ཀྱི་དཀའ་ངལ་འཕྲད་བཞིན་པའི་དུས་རབས་འདིར་འཛམ་གླིང་སྤྱི་ལ་དགོས་མཁོའི་ཕན་པ་ཇི་ལྟར་བསྒྲུབ་ཐུབ་པའི་ཐད་ལ་དགོངས་བཞེས་གནང་བཞིན་ཡོད་པ་བཀའ་བསྩལ་བ་དང་ཆབས་ཅིག ང་ཚོ་མི་རབས་རྫོགས་འགྲོ་གི་ཡོད་ནའང་ཆོས་རིག་དང་སྐད་ཡིག་སྲུབ་སྐྱོབ་ཀྱི་ལས་འགན་མུ་མཐུད་རྒྱུ་གལ་ཆེ་ཡིན་པའི་ལམ་སྟོན་རྒྱ་ཆེ་བསྩལ་ཡོད་པ་རེད། ལྷག་པར་དུ་མགོན་པོ་༸གང་ཉིད་མཆོག་གིས་རང་དབང་ལུང་པའི་ནང་གི་བོད་མི་ཚོས་རང་མི་རིགས་རིག་གཞུང་བདག་པོ་ཐུབ་ཚེ་འདི་ནི་བོད་མིའི་མི་གོ་ཆོད་པ་གཅིག་དང་བཙན་བྱོལ་ནང་བསྡད་ནས་སྡོད་གོ་ཆོད་པ་ཞིག་ཡིན་སྐོར་སོགས་ཀྱི་ལམ་སྟོན་བསྩལ་སོང་།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གི་འགོ་ཁྲིད་རྣམས་ལ་འགྲོ་བ་མིའི་ལྷན་སྐྱེས་ཀྱི་རྣམ་དཔྱོད་མི་འདུག་ཅེས་བཀའ་བསྩལ་འདུག དེའང་ཁ་སང་ཨ་མི་རི་ཀའི་ཨེཆ་བི་ཨོ་བརྙན་འཕྲིན་དགོད་བྲོའི་ལས་རིམ་མདོ་འཛིན་པ་དང་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག་ཐོག་བཤད་པ་རྒྱག་མཁན་གྲགས་ཅན་པ་སྐུ་ཞབས་ John Oliver ལགས་གཟའ་འཁོར་སྔོན་མའི་ནང་བཞུགས་སྒར་རྒྱལ་བའི་ཕོ་བྲང་དུ་ཆེད་བཅར་གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་ནག་དང་བོད་ནང་གི་གནས་སྟངས། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་མ་འོངས་པའི་༸སྐུའི་ཡང་སྲིད་གནས་དོན་སོགས་ཀྱི་ཐོག་ལ་དམིགས་བསལ་གྱི་བཀའ་འདྲི་ཁག་ཅིག་ཞུས་འདུག སྐབས་དེར་སྐུ་ཞབས་ John Oliver ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་ནག་གཞུང་གིས་དུས་རྟག་ཏུ་མགོན་པོ་༸གང་ཉིད་མཆོག་ལ་བདུད་སོགས་མཚན་སྨད་ཞུས་ཏེ་སྐྱོན་བརྗོད་ཤུགས་ཆེ་བྱེད་བཞིན་པར་དགོངས་ཚུལ་གང་ཡོད་བཀའ་འདྲི་ཞུས་པར། ༸གོང་ས་ཆོག་གིས་རྒྱ་གཞུང་གིས་མགོན་པོ་༸གང་ཉིད་མཆོག་ལ་བདུད་སོགས་སྐྱོན་བརྗོད་གང་བྱེད་ཀྱང་དེ་ནི་ཁོ་ཚོའི་རང་དབང་ཞིག་ཏུ་ངོས་འཛིན་ཞུ་བཞིན་ཡོད་པ་ལས། རྒྱ་ནག་གི་འགོ་ཁྲིད་གཙོས་པའི་རྒྱ་རིགས་རྣམས་ལ་འཁོན་འཛིན་གང་ཡང་མེད་ཅེས་བཀའ་ལན་སྩལ་བ་དང་ཆབས་ཅིག ༸གོང་ས་མཆོག་གིས་དུས་རྟག་ཏུ་རྒྱ་གཞུང་གི་དྲག་པོའི་ཐོག་ནས་སྐྱོན་བརྗོད་དང་ཁོང་ཁྲོ། དེ་བཞིན་བློ་དོགས། སོམ་ཉི་ཅན་གྱི་རྣམ་དཔྱོད་ལ་བཟོད་བསྲན་དང་བྱམས་སྙིང་རྗེའི་ཀུན་སློང་གི་ཐོག་ནས་གོདང་ལེན་མཛད་ཀྱི་ཡོད་ཅེས་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་ལ་མགོན་པོ་༸གང་ཉིད་མཆོག་གི་མ་འོངས་པའི་༸སྐུའི་ཡང་སྲིད་གདན་དོན་དང་འབྲེལ་བའི་མགོན་པོ་༸གང་ཉིད་མཆོག་གིས་དུས་ཀུན་ཏུ་འཛམ་བུ་གླིང་འདིའི་ཐོག་ཡོད་པའི་འགྲོ་བ་མི་ཐེར་འབུམ་བདུན་ལྷག་གི་བདེ་སྡུག་དང་། ཐོུང་མ་ཡིན་པའི་ནང་པའི་གཞུང་ལུགས་ཁག་སྲུང་སྐྱོབ་གནང་རྒྱུ་ལས་དེ་མིན་༸གང་ཉིད་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་ལ་ཐུགས་ཚབས་དེ་ཙམ་གནང་གི་མེད་ཅེས་བཀའ་བསྩལ་བ་མ་ཟད། རྒྱ་ནག་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་བྱས་པ་དང་། མ་འོངས་པར་༸སྐུའི་ཡང་སྲིད་དེ་རྒྱ་གཞུང་རང་ཉིད་ཀྱིས་ངོས་འཛིན་ཞུ་ཐབས་བྱེད་བཞིན་པ་དེ་ནི་གླེན་རྟགས་ཤིག་རེད་ཅེས་འགྲེལ་བརྗོད་དང་སྦྲགས་ཏེ་རྒྱ་གག་གི་འགོ་ཁྲིད་རྣམས་ལ་འགྲོ་བ་མིའི་ལྷན་སྐྱེས་ཀྱི་རྣམ་དཔྱོད་དེ་མི་འདུག་ཅེས་བཀའ་ནན་མཛད་འདུག སྐུ་ཞབས་ John Oliver ལགས་ཀྱིས་བོད་ནང་གི་གནས་སྟངས་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མིའི་རང་ལུས་མེར་སྲེག་གི་གནད་དོན་སྐོར་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་དུས་རྟག་ཏུ་རང་སྲེག་གི་གནད་དོན་ལ་རྒྱབ་སྐྱོར་དང་འགག་པ་གང་ཡང་མ་གནང་པར་བཏང་སྙོམས་སུ་བཞུགས་རྒྱུ་དེ་ཐབས་ལམ་བཟང་ཤོས་ཤིག་ཏུ་ངོས་འཛིན་ཞུ་བཞིན་ཡོད་ཅེས་བཀའ་ལན་བསྩལ་འདུག་པ་དང་། ལྷག་དོན་༸གོང་ས་མཆོག་གིས་རང་ལུས་མེར་སྲེག་གི་གནད་དོན་དེ་ནི་ཡིད་སྐྱོ་བའི་གནད་དོན་ཞིག་ཡིན་ཀྱང་།  གལ་སྲིད་མགོན་པོ་༸གང་ཉིད་མཆོག་ནས་བཀག་སྡོམ་གནང་ཚེ་རང་སྲེག་གནང་མཁན་དང་ཁོང་རྣམ་པའི་ཤུལ་ལུས་ནང་མི་ཚོས་༸གང་ཉིད་ཀྱི་བཀའ་དགོངས་དང་འགལ་བར་སེམས་ནས་བློ་ཕམ་ཡོང་ངེས་ཡིན་སྐོར་སོགས་བཀའ་ལན་བསྩལ་ཡོད་པ་རེད། གཞན་ཡང་༸གོང་ས་མཆོག་དང་པཎ་ཆེན་རིན་པོ་ཆེ་རྣམ་གཉིས་དབར་གྱི་འབྲེལ་བའི་སྐོར་ངོ་སྤྲོད་དང་འབྲེལ། རྒྱ་ནག་གཞུང་ནས་༸གོང་ས་མཆོག་གིས་ངོས་འཛིན་གནང་པའི་ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་འཛིན་བཟུང་བཙན་ཁྲིད་བྱས་པ་དང་། ད་ཆ་རིན་པོ་ཆེ་ཁོང་གང་དུ་བཞུགས་ཡོད་མེད་སོགས་ཞིབ་ཕྲའི་གནས་ཚུལ་གང་ཡང་མངོན་གསལ་མི་བྱེད་པར་རིན་པོ་ཆེ་མཆོག་བདེ་ཐང་ངང་ཆོས་ཕྱོགས་ཀྱི་སློབ་གཉེར་ཁག་གནང་བཞིན་ཡོད་སྐོར་འགྲེལ་བརྗོད་བྱེད་མུས་ཡིན་ཀྱང་།  རྒྱལ་མཚན་ནོར་བུ་པཎ་ཆེན་ལ་ངོས་འཛིན་བྱས་པ་དེ་ནི་རྒྱ་གཞུང་གིས་གང་བཤད་པ་དང་བྱ་སྤྱོད་གཉིས་ལ་འགལ་ཟླ་ཆེན་པོ་ཡོད་པའི་ཟུར་ཟ་དང་སྐྱོན་བརྗོད་ཀྱང་མཛད་འདུག གཞི་རྩའི་༸གོང་ས་མཆོག་ལ་བཀའ་འདྲི་ཞུས་པའི་བརྙན་འཕྲིན་དེའི་ནང་རྒྱ་གཞུང་གིས་བོད་ལ་བཙན་འཛུལ་བྱས་པ་ནས་བཟུང་བོད་ནང་ཆབ་སྲིད་ཀྱི་དམ་བསྒྲགས་དང་། གཞི་རིམ་མང་ཚོགས་ཀྱི་རང་དབང་ལ་བརྩི་མེད་རྡོག་རོལ་གཏོང་བཞིན་པའི་གནས་སྟངས། རྒྱ་ནག་གཞུང་གིས་ཨ་མི་རི་ཀའི་གཞས་མ་གྲགས་ཅན་ Lady Gaga ལགས་དང་གློག་བརྙན་འཁྲབ་བསྟོན་པ་གྲགས་ཅན་སྐུ་ཞབས་ Richard Gere ལགས་སོགས་རྒྱལ་སྤྱིའི་སྒྱུ་རྩལ་བ་ཁག་ཅིག་ནས་༸གོང་ས་མཆོག་དང་མཇལ་མོལ་ཞུས་པ་དང་། བོད་དོན་ལ་རྒྱབ་སྐྱོར་གནང་པར་བརྟེན་རྒྱ་ནག་ནང་བསྐྱོད་རྒྱུར་དམ་བསྒྲགས་བྱས་པའི་གནད་ཚུལ་སོགས་ཀྱང་འགྲེལ་བརྗོད་གནང་འདུག བཀའ་འདྲི་ཞུས་པའི་ལེ་ཚན་དེའི་མཇུག་ཏུ་སྐུ་ཞབས་ John Oliver ལགས་ནས་༸གོང་ས་མཆོག་དང་ཨ་རིའི་སྲིད་འཛིན་དམ་པ་སྐུ་ཞབས་ Franklin Roosevelt རྣམ་གཉིས་ཀྱི་མཛའ་གྲོགས་དྲན་གསོ་ཞུས་པ་དང་སྦྲགས། མགོན་པོ་༸གང་ཉིད་མཆོག་ལ་དེང་དུས་ཀྱི་ཕྱག་ཚོད་ཅིག་ཀྱང་འབུལ་ལམ་ཞུས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རིང་མིན་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ནང་ཆིབས་བསྒྱུར་མཛད་འཆར་ཡོད་པ་ལྟར། རྒྱ་ནག་གཞུང་གིས་ཁ་སང་སླར་ཡང་གནད་དོན་དེའི་ཐོག་རྒྱ་གར་ལ་ཉེན་བརྡ་བཏང་འདུག དེའང་དེ་རིང་རྒྱ་གར་གྱི་བརྒྱུད་ལམ་ཆེ་གྲས་མང་པོའི་ཐོག་གནས་ཚུལ་ཐོན་གསལ་ལྟར་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རིང་མིན་ཕྱི་ཟླ་ ༤ ཚེས་ ༤ ནས་ ༡༣ བར་ཨ་རུ་ནཱ་ཅལ་མངའ་སྡེར་ཆིབས་བསྒྱུར་རྒྱུའི་མཛད་འཆར་ཁག་ཅིག་ཐུགས་གཏན་འཁེལ་ཡོད་པ་དང། རྒྱ་ནག་གི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Geng Shuang ཡིས་ཁ་སང་རེས་གཟའ་པ་སངས་ཉིན་ཚོགས་པའི་གསར་འགོད་ལྷན་ཚོགས་ཤིག་གི་ཐོག ༸གོང་ས་མཆོག་མངའ་སྡེ་དེའི་ནང་ཆིབས་བསྒྱུར་མཛད་པ་ཡིན་ན། དེས་རྒྱ་དཀར་ནག་གཉིས་དབར་གྱི་འབྲེལ་ལམ་ལ་དོ་ཕོག་འགྲོ་སྲིད་པ་དང། རྒྱ་གར་དབུས་གཞུང་ནས་མགོན་པོ་༸གང་ཉིད་མཆོག་ལ་རྒྱ་ནག་དང་འགལ་ཟླ་བཟོ་གཞིའི་སྡིངས་ཆ་བསྐྲུན་རྒྱུ་མེད་སྐོར་སྐྱོན་བརྗོད་དང་སྦྲགས། ཏཱ་ལའི་རུ་ཚོགས་ཀྱིས་དུས་ཡུན་རིང་པོ་ནས་རྒྱ་ནག་ཁ་བྲལ་གྱི་ལས་འགུལ་སྣ་མང་སྤེལ་བ་མ་ཟད། རྒྱ་དཀར་ནག་གཉིས་ཀྱི་ས་མཚམས་དང་འབྲེལ་བའི་རྙོག་གླེང་བཟོས་ཡོད་སྐོར་སོགས་ཀྱང་ནན་བཤད་བྱས་འདུག འོན་ཀྱང་རྒྱ་ནག་ནས་ཉེན་བརྡ་བཏང་པར་ལྟོས་མེད་ཀྱིས་རྒྱ་གར་ཕྱི་སྲིད་ལས་ཁུངས་ཀྱི་མགྲིན་ཚབ་པས་གནད་དོན་དེའི་ཐོག་རྒྱ་གར་གཞུང་གི་འཛིན་པའི་སྲིད་བྱུས་དེ་ཡོངས་གྲགས་ཡིན་པ་དང། དེར་འགྱུར་བ་གང་ཡང་མེད་སྐོར་འགྲེལ་བརྗོད་གནང་འདུག རྒྱ་གར་ནང་སྲིད་བློན་ཆེན་གཞོན་པ་སྐུ་ཞབས་ Kiren Rijiju མཆོག་གིས་༸གོང་ས་མཆོག་མངའ་ཁུལ་དེའི་ནང་ཆོས་ལུགས་དབུ་ཁྲིད་ཀྱི་ངོ་བོ་ཐོག་ནས་ཆིབས་བསྒྱུར་གནང་གི་ཡོད་སྟབས་དེར་བཀའ་སྡོམ་གནང་དགོས་དོན་མེད་པ་དང། ཨ་རུ་ནཱ་ཅལ་མངའ་ཁུལ་གྱི་དད་ལྡན་མང་ཚོགས་རྣམས་ཀྱིས་༸གོང་ས་མཆོག་ཁུལ་དེར་ཆིབས་བསྒྱུར་མཛད་རྒྱུར་རེ་འདུན་ཤུགས་ཆེ་གནང་པར་བརྟེན་མགོན་པོ་༸གང་ཉིད་མཆོག་ཁུལ་དེའི་ཆིབས་བསྒྱུར་གནང་གི་ཡོད་པ་དང་། ཆིབས་བསྒྱུར་དེའི་སྐབས་སྐུ་ཞབས་ Kiren Rijiju མཆོག་གིས་གཙོས་པའི་རྒྱ་གར་དབུས་གཞུང་གི་སྐུ་ཚབ་ཁག་ཅིག་ནས་༸གང་ཉིད་མཆོག་དང་ལྷན་མཇལ་མོལ་ཞུ་རྒྱུ་ཡིན་པའི་འགྲེལ་བརྗོད་གནང་འདུག གཞི་རྩའི་༸གོང་ས་མཆོག་ཟླ་ ༤  པའི་ནང་ཨ་རུ་ནཱ་ཅལ་མངའ་སྡེར་ཆིབས་བསྒྱུར་མཛད་ཀྱི་ཡོད་པ་ནི་ཁུལ་དེར་ཆིབས་བསྒྱུར་བསྐྱང་ཐེངས་ ༢ ཆགས་ཀྱི་ཡོད་པ་དང་། དེ་སྔ་ ༢༠༠༩ ལོར་ད་ལྟའི་སྤྱི་ཁྱབ་བློན་ཆེན་པདྨ་འགྲོ་མཆོག་གི་ཡབ་དམ་པ་རྡོ་རྗེ་མཁའ་འགྲོ་མཆོག་མངའ་སྡེའི་སྤྱི་ཁྱབ་བློན་ཆེན་གནང་སྐབས་སུ་༸གོང་ས་མཆོག་ས་གནས་དེར་གདན་ཞུ་གནང་ཡོད་པ་རེད། ཉེ་ལམ་ཟླ་ ༡ ཚེས་ ༢༢ ཉིན་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས་རྟ་དབང་ནང་ཡོད་པའི་ཡིད་དགའ་ཆོས་འཛིན་དགོན་པར་ཆེད་ཕེབས་ཀྱིས་༸གང་ཉིད་མཆོག་གི་ཆིབས་བསྒྱུར་གྲ་སྒྲིག་དང་འབྲེལ་བའི་ལས་གཞི་ཁག་གི་ཐོག་ལ་དངོས་སུ་་གཟིགས་ཞིབ་གནང་པ་དང་འབྲེལ་དེར་དགོས་གལ་གྱི་དགོངས་འཆར་རིགས་ཕུལ་འདུག་པ་མ་ཟད། ཁུལ་དེར་མགོན་པོ་༸གང་ཉིད་མཆོག་གི་དབུ་འབྱེད་གནང་ཡུལ་ High Altitude རྩེད་ཐང་གི་ Rostrum སྡིངས་ཆ་གསར་པར་ཞིབ་འཇུག་ཆེད་བསྐྱོད་གནང་ཡོད་པ་རེད།

ཏཱ་ལའི་བླ་མའི་དགེ་རྩ་ཁང་གི་སློབ་ཡོན་ཐེངས་བདུན་པ་སྟེ་ཕྱི་ལོ་ ༢༠༡༧༌༌༢༠༡༨ ལོའི་སློབ་ཡོན་འབུལ་རྒྱུ་གསལ་བསྒྲགས་བསྐྱངས་འདུག  དེའང་ཨ་རིའི་ནང་རྟེན་གཞི་བྱས་པའི་ཏཱ་ལའི་བླ་མའི་དགེ་རྩ་ཁང་གིས་འདི་ག་རླུང་འཕྲིན་ཁང་ལ་གནས་ཚུལ་གནང་འབྱོར་བྱུང་བར་གཞིགས་ན། དགེ་རྩ་ཁང་གི་ངོས་ནས་འདི་ལོ་བྱང་ཨ་རི་དང་ཡུ་རོབ ཨོ་སི་ཊོ་ལི་ཡ་བཅས་སུ་གཙུག་ལག་རབ་འབྱམས་པ་དང༌། འབུམ་རམས་པའི་སློབ་སྦྱོང་གནང་འདོད་ཡོད་མཁན་བཙན་བྱོལ་བོད་མི་སྐྱབས་བཅོལ་བའི་སློབ་ཕྲུག་གྲངས་ ༡༠ ནས་ ༡༥ ཙམ་ལ་ཨ་སྒོར་ཁྲི་གཅིག་བར་གྱི་སློབ་ཡོན་ཕུལ་རྒྱུ་ཡིན་པ་དང། ཚང་སྙན་འབུལ་བློ་ཡོད་རིགས་རྣམས་ནས་ཕྱི་ལོ་ ༢༠༡༧ ཟླ་ ༤ ཚེས་ ༢༢ འགྱངས་མེད་དགོས་ངེས་ཡིག་ཆ་ཁག་མཉམ་སྦྱར་གྱིས་འཚང་སྙན་འགེངས་ཤོག་བཅས་དགེ་རྩ་ཁང་ལ་ངེས་འབུལ་དགོས་པའི་གསལ་བསྒྲགས་གནང་འདུག གཞི་རྩའི་ཏཱ་ལའི་བླ་མའི་དགེ་རྩའི་སློབ་ཡོན་གྱི་དམིགས་ཡུལ་གཙོ་བོ་ནི་བོད་རིགས་ན་གཞོན་སློབ་མ་སོ་སོའི་འདོད་མོས་ཀྱིས་ཁྱད་དུ་འཕགས་པའི་གཙུག་ལག་གི་ཤེས་ཡོན་གང་ཞིག་སྙེག་པར་རྒྱ་བསྐྱོར་གནང་པའི་ཐོག་ནས་ཤེས་ཡོན་ལྡན་པའི་བོད་མི་འཕེལ་རྒྱས་ཡོང་ཕྱིར་ཡིན་པ་དང། དགེ་རྩ་ཁང་གི་ངོས་ནས་དམིགས་བསལ་རྒྱ་གར་དང་བལ་ཡུལ་ནང་དུ་ཡོད་པའི་བོད་རིགས་སློབ་མ་ཚོས་སློབ་ཡོན་དེར་སྙན་ཞུ་འབུལ་རྒྱུའི་སྐུལ་མ་གནང་བཞིན་འདུག སློབ་ཡོན་ཞུ་ལེན་གྱི་དགོས་ངེས་ཆ་རྐྱེན་གང་ཡིན་ཞིབ་ཕྲའི་གནས་ཚུལ་ཤེས་རྟོགས་ཐུབ་སླད་ཏཱ་ལའི་བླ་མའི་དགེ་རྩ་ཁང་གི་དྲ་གནས་ dalailamatrust.org  ནང་གཟིགས་རྒྱུ་ཡོད་པ་དང། སློབ་ཡོན་དེའི་ཆེད་གཙོ་བོ་སློབ་མ་རྣམས་བོད་རིགས་ཡིན་དགོས་པ་དང། ཁོང་རྣམ་པས་ཡུ་རོབ་དང་ཨོ་སི་ཊོ་ལི་ཡ། བྱང་ཨ་རི་བཅས་ཀྱི་མཐོ་སློབ་ཁག་ཏུ་གཙུག་ལག་རབ་འབྱམས་པ་དང༌འབུམ་རམས་པའི་སློབ་སྦྱོང་གི་སློབ་འཇུག་ཟིན་པའམ་ཐོ་འགོད་གནང་པའི་ངོས་སྦྱོར་ཡིག་ཆ་ཡོད་དགོས་ཀྱི་འདུག ཡང་དེའི་བར་ན་ཁེ་ན་ཌ་བོད་ཕྲུག་ལས་འཆར་ཚོགས་པས་ཀྱང་འདི་ག་རླུང་འཕྲིན་ཁང་གི་བརྒྱུད་གསལ་བསྒྲགས་ཤིག་སྤེལ་སྟེ། བོད་དང་། རྒྱ་བལ་འབྲུག་གསུམ་དུ་འཚོ་གནས་བྱེད་པའི་བོད་ཕྲུག་ཉམ་ཐག་མཐོ་སློབ་ཁག་ཏུ་སློབ་སྦྱོང་གནང་བློ་ཡོད་རིགས་བོད་པའི་ན་གཞོན་སློབ་མ་ ༡༥ ལ་སློབ་ཡོན་རོགས་རམ་གསལ་སྒྲགས་གནང་ཡོད་པ་རེད། སྤྱིར་ཚོགས་པ་དེའི་ངོས་ནས་ཕྱི་ལོ་༢༠༠༢ ནས་སློབ་ཡོན་གྱི་ལས་གཞི་དེ་དབུ་འཛུགས་གནང་ཡོད་པ་དང། ཚོགས་པ་དེས་ཕྱི་ལོ་ ༢༠༡༧ ལོའི་ནང་འཛིན་རིམ་བཅིུས་ཀྱི་སྦྱང་འབྲས་བརྒྱ་ཆ་ ༧༥ ཡན་གྱི་སློབ་མ་དྲག་གྲས་གསུམ་ལ་ལོ་རེར་ཧིན་སྒོར་བདུན་ཁྲི་ལྔ་སྟོང་དང་། སློབ་མ་གཞན་རྣམས་ལ་སློབ་ཚན་དང་འགྲོ་གྲོན་ལ་གཞིགས་ཏེ་ཧིན་སྒོར་ལྔ་ཁྲི་ལྔ་སྟོང་ནས་དྲུག་ཁྲི་ལྔ་སྟོང་བར་གནང་རྒྱུའི་གསལ་བསྒྲགས་གནང་འདུག ཚང་སྙན་འབུལ་བློ་ཡོད་རིགས་རྣམས་ནས་ཕྱི་ལོ་ ༢༠༡༧ ཟླ་ ༦ ཚེས་ ༩  འགྱངས་མེད་དགོས་ངེས་ཡིག་ཆ་ཁག་དང་མཉམ་སྦྱར་གྱིས་འཚང་སྙན་འགེངས་ཤོག་བཅས་ངེས་འབུལ་དགོས་པའི་ཡོངས་ཁྱབ་གནང་བ་དང་སློབ་ཡོན་ཞུ་ལེན་གྱི་དགོས་ངེས་ཆ་རྐྱེན་གང་ཡིན་ཞིབ་ཕྲའི་གནས་ཚུལ་  tcpconline.ca  ནང་གཟིགས་རྒྱུ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བེུད་ཚོས་འཛམ་གླིང་ཞི་བདེར་སྣེ་ཁྲིད་ཀྱི་ནུས་པ་འདོན་སྤེལ་བྱ་རྒྱུར་ཤུགས་སྣོན་རྒྱག་དགོས་པ་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༧ ཕྱི་ཟླ་ ༢ ཚེས་ ༡༤ ནས་བོད་ཀྱི་ལོ་གསར་བར་དུ་༸སྐུའི་བཅད་རྒྱར་བཞུགས་གནང་མཛད་རྒྱུའི་གསལ་བསྒྲགས་ཤིག་སྤེལ་ཡོད་པ་ལྟར། ཁ་སང་ཚེས་ ༢༣ ཉིན་མགོན་པོ་༸གང་ཉིད་མཆོག་གིས་བཞུགས་སྒར་དུ་བོད་ཀྱི་བེུད་ནུས་སྟོབས་གོང་སྤེལ་ཚོགས་ཆེན་ཐེངས་དང་པོར་བཅར་མཁན་སྐུ་ཚབ་ ༣༠༠ ལྷག་ལ་དུས་ཡུན་ཆུད་ཚོད་གཅིག་ཙམ་རིང་ལ་དམིགས་བསལ་མཇལ་ཁ་དང་བཀའ་སློབ་བཀྲིན་བསྩལ་འདུག་པ་དང་། སྐབས་དེར་མགོན་པོ་༸གང་ཉིད་མཆོག་གིས་ཐོག་མར་ཚོགས་བཅར་བ་རྣམ་པར་ཐེངས་འདིའི་ཚོགས་ཆེན་ག་འདྲ་བྱུང་མིན་ཐད་བཀའ་འདྲི་གནང་པ་དང་སྦྲགས། གཙོ་བོ་དམིགས་ཡུལ་ངེས་ཅན་ཞིག་བསྒྲུབ་ཐབས་སླད་ཆེད་མངགས་འདིར་ལྷན་འཛོམས་གནང་པ་ཞིག་ཡིན་སྟབས། སྐད་ཆ་འདྲ་ཆགས་པོ་ཞིག་བཤད་ནས་འགྲིག་གི་མེད་པ་དང་། དུས་རྒྱུན་ལྡན་ནས་ལག་བསྟར་ཡག་པོ་བྱེད་རྒྱུར་འབད་བརྩོན་གནང་དགོས་ཀྱི་རེད་ཅེས་བཀའ་ནན་བསྩལ་འདུག ༸གོང་ས་མཆོག་གིས་ད་ལྟའི་ང་ཚོའི་འཛམ་གླིང་འདིའི་ཐོག་དཀའ་ངལ་དུ་མ་ཞིག་འཕྲད་བཞིན་པ་དེ་ནི་གཙོ་བོ་བྱམས་བརྩེ་མི་གདང་བ་དང་བྱམས་བརྩེ་དང་བྲལ་བའི་ལྷག་བསམ་མེད་པར་བརྟེན་ནས་བྱུང་གི་ཡོད་སྐོར་བཀའ་བསྩལ་དང་འབྲེལ། བེུད་ཚོར་རང་བཞིན་ལྷན་སྐྱེས་ཀྱི་བྱམས་དང་སྙིང་རྗེའི་ནུས་པ་ཆེ་བ་ཡོད་སྟབས། བེུད་ཚོས་དུས་རབས་ ༢༡ དེའི་ནང་འགོ་ཁྲིད་མང་ཙམ་གནང་ཐུབ་ན། འཛམ་གླིང་འདི་ཞི་བདེ་བསྐྲུན་རྒྱུར་ཕན་ཐོགས་ཆེན་པོ་ཡོད་པར་ཐུགས་རེ་མཛད་ཀྱི་ཡོད་པ་སོགས་བཀའ་བསྩལ་ཡོད། དེ་བཞིན་༸གོང་ས་༸སྐྱབས་མགོན་ཆེན་མཆོག་གིས་བོད་པའི་ཐུན་མོང་མ་ཡིན་པའི་རིག་གཞུང་དེས་བོད་མིའི་ངོ་བོ་སྲུང་སྐྱོབ་བྱེད་པ་ཙམ་མ་ཡིན་པར་འཛམ་གླིང་སྤྱི་ལ་ཕན་པ་བསྒྲུབ་རྒྱུའི་དུས་ཚོད་ཞིག་སླེབས་ཡོད་པ་བཀའ་བསྩལ་བ་དང་ཆབས་ཅིག ཕོ་མོ་འདྲ་མཉམ་དགོས་སྐོར་བཤད་པ་ཙམ་གྱིས་འགྲིག་གི་མེད་པས་དོན་དངོས་ཐོག་ཕོ་མོ་འདྲ་མཉམ་ཡོང་རྒྱུའི་ཆ་རྐྱེན་གཙོ་བོ་དེ་བྱམས་བརྩེས་ཟིན་པའི་ཤེས་ཡོན་ལ་ཐུག་ཡོད་པ་བཀའ་བསྩལ་འདུག མགོན་པོ་༸གང་ཉིད་མཆོག་གིས་ད་ཆ་བོད་པའི་ལོ་རྒྱུས་ཁྲོད་དགེ་བཤེས་མ་གཏོང་རྒྱུའི་ལམ་སྲོལ་གསར་པ་ཞིག་གཏན་འབེབས་བྱུང་དོན་བཞིན་ཉེ་དུས་སུ་དགེ་བཤེས་མ་ཐོན་མཁན་བོད་པའི་བཙུན་མ་ ༢༠ ཐམ་པ་བྱུང་ཡོད་པ་དེ་དག་ལས་དམིགས་དཔེ་བླངས་ཏེ། ཁྱིམ་པ་ཕོ་མོ་ཚོའི་ཁྲོད་དུའང་རིམ་བཞིན་རིགས་ལམ་གཙོ་བོར་གྱུར་པའི་གཞུང་ཆེན་བཀའ་པོད་ལྔའི་ཐོག་ལ་རིགས་གཅིག་རྐང་འཛིན་གྱི་སློབ་གཉེར་མཐིལ་ཕྱིན་གནང་དགོས་གལ་ཡིན་པ་ལམ་སྟོན་མཛད་ཡོད་པ་རེད། མཐར་༸གོང་ས་མཆོག་གིས་ད་ལན་བོད་མིའི་སྒྲིག་འཛུགས་བཀའ་ཤག་གི་ངོས་ནས་བོད་པའི་བེུད་ཀྱི་ཚོགས་ཆེན་དེ་འདྲ་བ་ཞིག་བསྐོང་ཚོགས་གནང་ཡོད་སྟབས། ད་རེས་ཚོགས་ཆེན་དེའི་བརྒྱུད་ལས་དོན་གསར་པ་གང་ཞིག་དབུ་འཛུགས་གནང་འཆར་ཡོད་པ་དེ་ཤོག་བུའི་སྟེང་འདྲ་ཆགས་ཆགས་བཞག་པ་ཙམ་མིན་པར།  ཁ་ཡོད་ལག་ཡོད་ཀྱི་ནུས་པ་ཐོན་པ་དང་ངོ་སོ་ཐོན་པ་ཡོང་རྒྱུར་ཚང་མས་ཤུགས་སྣོན་བསྐྱོན་དགོས་ཀྱི་རེད་ཅེས་ལམ་སྟོན་གྱི་བཀའ་སློབ་བཀྲིན་ཆེ་བ་བསྩལ་གནང་མཛད་ཡོད། རྩ་བའི་ད་རེས་བཞུགས་སྒར་དུ་ཚོགས་པའི་བོད་ཀྱི་བེུད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་དེའི་ཐོག་རྒྱ་གར་དང་བལ་ཡུལ། དེ་བཞིན་ཕྱི་རྒྱལ་བཅས་ཀྱི་ས་ཁུལ་མི་འདྲ་བ་ ༥༣ ནས་གཞུང་འབྲེལ་དང་གཞུང་འབྲེལ་མིན་པའི་སྡེ་ ཁག་དང་། མཐོ་སློབ་ཁག་ཏུ་སློབ་སྦྱོང་གནང་བཞིན་པའི་བེུད་སྐུ་ཚབ་ ༣༠༠ ཙམ་ལྷན་འཛོམས་གནང་ཡོད་པ་རེད། ཉིན་གསུམ་གྱི་ཚོགས་ཆེན་ཐོག་ཚོགས་བཅར་བ་རྣམས་ཚོགས་ཆུང་ཆ་བགོས་ཀྱིས་བོད་ཀྱི་བེུད་ནུས་སྟོབས་སྤེལ་བའི་སྲིད་བྱུས་ལ་བསྐྱར་ཞིབ་ཀྱིས་དོན་ཚན་བདུན་ཅན་ཐོག་གྲོས་བསྡུར་རིམ་པ་གནང་མཐར་སྲིད་བྱུས་དེ་ལག་བསྟར་གནང་ཕྱོགས་ཀྱི་བསམ་འཆར་ ༥༧ གཏན་འབེབས་གནང་པ་མ་ཟད། བོད་མིའི་སྒྲིག་འཛུགས་ཀྱི་ངོས་ནས་འདི་ལོ་ཕྱི་ཟླ་གསུམ་པའི་ཚེས་བཅིུས་ཉིན་ནས་དབུ་འཛུགས་ཀྱིས་ལོ་ལྟར་ཟླ་གསུམ་པའི་ཚེས་བཅིུས་ཉིན་མོ་དེ་བོད་ཀྱི་བེུད་ཉིན་མོར་གཞུང་འབྲེལ་གྱི་སྲུང་བརྩི་ཞུ་རྒྱུ་ཡིན་པ་ཡོངས་ཁྱབ་གནང་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གསར་ཁང་གྲགས་ཅན་ NDTV གསར་ཁང་གིས་ཆེད་དོན་བཀའ་འདྲིར་བཀའ་ལན་སྩལ་བའི་ཁྲོད། མགོན་པོ་༸གང་ཉིད་མཆོག་གིས་དེང་སང་འཛམ་གླིང་ནང་གི་དཀའ་ངལ་ཁག་ཅིག་ལ་གདོང་ལེན་དང་ཨ་རིའི་སྲིད་འཛིན་གསར་པའི་སྲིད་བྱུས་ཐོག་དགོངས་ཚུལ་ཇི་ཡོད་སོགས་གནད་དོན་ཁག་ཅིག་གི་སྐོར་བཀའ་ལན་བཀྲིན་བསྩལ་འདུག ལས་རིམ་དེ་ནི་ཁ་ཉིན་ཟླ་ ༡ ཚེས་ ༡༨ ཉིན་གསར་ཁང་དེའི་ Off the Cuff ཞེས་པའི་སྐར་མ་ ༤༠ རིང་བཀའ་འདྲིའི་ལས་རིམ་ཐོག་སྤྱི་ཁྱབ་རྩོམ་སྒྲིག་པ་སྐུ་ཞབས་ Shekhar Gupta ལགས་ཀྱིས་གཙོ་སྐྱོང་གནང་ཡོད་པ་དང་། སྐབས་དེར་ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་ཐེངས་འདིའི་ལས་རིམ་ཐོག་བསྐྱར་དུ་ཆིབས་བསྒྱུར་མཛད་པར་དགའ་བསུའི་འཚམས་འདྲི་ཞུས་པ་དང་སྦྲགས། ད་ལྟའི་དཀའ་རྙོག་ཅན་གྱི་འཛམ་གླིང་འདིའི་ཐོག་མགོན་པོ་༸གང་ཉིད་མཆོག་གིས་ཞི་བདེ་བག་ཕེབས་ངང་ཇི་ལྟར་གནང་བཞིན་ཡོད་སྐོར་བཀའ་འདྲི་ཞུས་པར་༸གོང་ས་མཆོག་གིས་མགོན་པོ་༸གང་ཉིད་མཆོག་དཔལ་ན་ལེནྡྲའི་ཆོས་བརྒྱུད་དྲི་མ་མེད་པའི་སློབ་མ་ཞིག་ཡིན་པའི་ཆ་ནས་དཀའ་ངལ་གང་ཞིག་འཕྲད་རུང་དེའི་རྒྱུ་རྐྱེན་ཁག་རྩད་གཅོད་ཀྱིས་རྣམ་དཔྱོད་བེད་སྤྱོད་གནང་དགོས་སྟབས། དཀའ་ངལ་དེ་དག་ལ་བརྟེན་ནས་མགོན་པོ་༸གང་ཉིད་ལ་འཕྲད་བཞིན་པའི་སུན་སྣང་གི་ཚོར་བ་རྣམས་རིམ་པས་ཉུང་དུ་འགྲོ་རྒྱུར་ཕན་ཐོགས་ཡོང་གི་འདུག་ཅེས་བཀའ་བསྩལ་འདུག གསར་འགོད་པ་སྐུ་ཞབས་ཤེ་ཁར་གུབ་ཏ་ལགས་ཀྱིས་ད་ལྟའི་འཛམ་གླིང་འདིའི་ནང་མང་གཙོའི་ལམ་ལུགས་ལས་སྲིད་དབང་སྒེར་འཛིན་གྱི་ལམ་ལུགས་དེ་དར་སྤེལ་ཤུགས་ཆེ་རུ་འགྲོ་བཞིན་པའི་གནད་དོན་ལ་༸གོང་ས་མཆོག་གི་ངོས་ནས་གཟིགས་ཚུལ་ཇི་ཡོད་བཀའ་འདྲི་ཞུས་པར་མགོན་པོ་མཆོག་གིས་ང་ཚོའི་འཛམ་གླིང་འདིའི་བདག་དབང་གཙོ་བོ་མང་ཚོགས་ལ་ཡོད་པ་ལས། འགོ་ཁྲིད་གང་ཟག་སྒེར་གཅིག་གཉིས་ལ་མེད་སྐོར་བཀའ་ནན་སྩལ་བ་མ་ཟད། འགྲོ་བ་མིའི་རང་བཞིན་དེ་སྙིང་རྗེ་ཅན་དང་བསམ་ཤེས་ཅན་ཞིག་ཡིན་སྟབས། མགོན་པོ་མཆོག་གིས་དུས་ཀུན་ཏུ་འགྲོ་བ་མི་ལ་ཡིད་ཆེས་གནང་གི་ཡོད། འོན་ཀྱང་རྒྱལ་ཁབ་ཀྱི་འགོ་ཁྲིད་ཅེས་པ་རིམ་བཞིན་འཕོ་འགྱུར་འགྲོ་ངེས་ཡིན་པ་བཀའ་བསྩལ་འདུག སྤྱི་ཁྱབ་རྩོམ་སྒྲིག་པ་གུབ་ཏ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་ནག་དེ་རྒྱལ་སྤྱིའི་ཁྲོད་འགོ་ཁྲིད་བྱ་རྒྱུར་གྲ་སྒྲིག་འདུག་གམ་མི་འདུག་ཞེས་བཀའ་འདྲི་ཞུས་པར་༸གོང་ས་མཆོག་གིས་རྒྱ་ནག་དེ་ མི་འབོར་མང་ཤོས་ཡོད་པའི་རྒྱལ་ཁབ་ཅིག་ཡིན་པ་གང་ཞིག་ལ་མི་མང་རྣམས་རིག་གཞུང་ལྡན་པ་ཞིག་ཆགས་ཡོད་ཀྱང་། དོན་དངོས་ཐོག་རྒྱ་ནག་ནང་གི་ལམ་ལུགས་དེ་ད་ལྟ་ཡིན་ནའང་ཆེས་དམ་བསྒྲགས་ཤིག་ཏུ་ཆགས་པ་བཀའ་སྩལ་དང་སྦྲགས། རྒྱ་ནག་དེ་རྒྱ་མི་རིགས་ལ་བདག་གི་ཡོད་པ་ལས་རྒྱལ་ཁབ་དེའི་ཆབ་སྲིད་ཚོགས་པ་དང་དེ་བཞིན་གང་ཟག་མི་སྒེར་རེ་བཟུང་ལ་བདག་དབང་ཡོད་པ་ཞིག་མ་རེད་ཅེས་བཀའ་ལན་མཛད་ཡོད་པ་རེད། བཀའ་འདྲིའི་ལས་རིམ་དེའི་ཐོག་གསར་འགོད་པས་༸གོང་ས་མཆོག་ལ་ད་ལྟའི་ཨ་རིའི་སྲིད་འཛིན་གསར་པས་ཨ་རི་ནང་སྐྱབས་བཅོལ་ཡོང་རྒྱུར་བཀག་སྡོམ་བྱེད་བཞིན་པའི་གནད་དོན་ཐད་བཀའ་འདྲི་ཞུས་པའི་སྐབས་སུ་མགོན་པོ་མཆོག་གིས་སྲིད་འཛིན་ཌོ་ནལ་ཊམ་མཆོག་གིས་སྐྱབས་བཅོལ་ཐོག་འཛིན་པའི་སྲིད་བྱུས་དེར་ད་ཆ་སྤྱི་ཚོགས་ཁྲོད་ལ་ལབ་གླེང་གང་ཙམ་བྱུང་བཞིན་ཡོད་སྟབས། དེའི་ཐད་དམིགས་བསལ་གང་ཡང་གསུང་རྒྱུ་མེད་སྐོར་བཀའ་སྩལ་བ་དང་ཆབས་ཅིག སྲིད་འཛིན་ Donald trump མཆོག་གི་ལས་དོན་གང་འདྲ་གནང་མིན་ཐད་ང་ཚོའི་རིམ་བཞིན་ཤེས་ཀྱི་རེད་ཅེས་བཀའ་བསྩལ་འདུག དེ་བཞིན་སྐབས་དེར་གསར་འགོད་པས་༸གོང་ས་མཆོག་ལ་ད་ལྟའི་སྲིད་འཛིན་ཌོ་ནལ་ཊམ་མཆོག་ལ་དམིགས་བསལ་ལམ་སྟོན་གང་ཞིག་མཛད་རྒྱུ་ཡོད་མད་ཞེས་བཀའ་འདྲི་ཞུས་པར་མགོན་པོ་༸གང་ཉིད་མཆོག་གིས་མང་ཚོགས་ལ་གསུང་བཤད་དང་མི་སྣ་མཇལ་འཕྲད་བཅས་གནང་སྐབས་སྐབས་དེའི་ཁོར་ཡུག་གནས་བབ་ལ་གཞིགས་ཏེ་བཀའ་མོལ་གནང་པ་ལས། དམིགས་བསལ་གྱི་གྲ་སྒྲིག་གང་ཡང་གནང་སྲོལ་མེད་ཅེས་བཀའ་སྩལ་དང་འབྲེལ། མ་འོངས་པར་སྲིད་འཛིན་ Donal Trump མཆོག་དང་མཇལ་འཕྲད་བྱ་རྒྱུའི་གོ་སྐབས་ཐོབ་ཚེ་སྐབས་དེའི་གནས་བབ་ལ་གཞིགས་ཏེ་ཁོང་དང་ལྷན་བཀའ་མོལ་མཛད་རྒྱུ་ཡིན་ཅེས་བཀའ་བསྩལ་འདུག

ཨ་མི་རི་ཀའི་ཁལ་ཕོ་ནི་ཡ་མངའ་སྡེའི་གྲོང་ཁྱེར་ SanDiego ནང་རྟེན་གཞི་བྱས་པའི་ཁལ་ཕོ་ནི་ཡ་གཙུག་ལག་སློབ་གཉེར་ཁང་གིས་རྒྱ་ནག་གཞུང་དང་ཁུལ་དེར་ཡོད་པའི་རྒྱ་རིགས་སློབ་མ་ཚོས་ངོ་རྒོལ་བྱས་པར་ལྟོད་མེས་ཀྱིས་བོད་མིའི་བླ་ན་མེད་པའོ་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་མཛད་སྒོར་གདན་ཞུ་གནང་རྒྱུ་ཡིན་ཅེས་གསུངས་འདུག རྩ་བའི་ཟླ་ ༢ ཚེས་ ༢ ཉིན་གཙུག་ལག་སློབ་གཉེར་ཁང་གི་རིགས་བདག་སྐུ་ཞབས་ Pradeep Khosla ལགས་དང་ཨ་རིའི་ནང་གི་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་མགྲིན་ཚབ་པ་གྲྭ་བསྟན་འཛིན་དོན་ལྡན་ལགས་རྣམ་གཉིས་ཀྱིས་རིང་མིན་འདི་ལོའི་ཟླ་ ༦ ཚེས་ ༡༧ ཉིན་ ༸གོང་ས་༸སྐྱབས་མགོན་ཆེན་པོ་མཆོག་གཙུག་ལག་སློབ་གཉེར་ཁང་གི་བསླབ་པ་མཐར་སོན་གྱི་མཛད་སྒོར་གདན་ཞུ་ཐོག་མགོན་པོ་༸གང་ཉིད་མཆོག་གིས་དགེ་ལས་སློབ་གཉེར་བ་ཡོངས་ལ་བཀའ་སློབ་བཀྲིན་བསྩལ་རྒྱུ་དང་། ཕྱི་ཚེས་ ༡༦ ཉིན་སློབ་གཉེར་ཁང་དེར་ཁུལ་དེའི་ས་གནས་མང་ཚོགས་ལ་བཀའ་སློབ་ བསྩལ་རྒྱུའི་མཛད་འཆར་ཁག་ཡོངས་བསྒྲགས་གནང་ཡོད་པ་ལྟར། ཕྱི་ཚེས་ ༣ ཉིན་སློབ་གཉེར་ཁང་དེའི་ནང་དུ་ཡོད་པའི་ CSSA ཞེས་པའི་རྒྱ་རིགས་སློབ་གཉེར་ཚོགས་པ་གཙོས་པའི་ས་གནས་རྒྱ་རིགས་སློབ་ཕྲུག་ཚོགས་པ་དང་རྒྱ་རིགས་ཚོང་པ་ཚོགས་པ་སོགས་ཟུང་འབྲེལ་གྱིས་སྤྱི་ཚོགས་འབྲེལ་མཐུད་སྐད་འཕྲིན་དང་ངོ་དེབ་སོགས་ཀྱི་ཐོག་བསྒྲགས་གཏམ་ཞིག་སྤེལ་ཏེ་སློབ་གཉེར་ཁང་དེའི་ནང་དུ་རྒྱ་ནག་གི་ལོ་རྒྱུས་དང་ཆབ་སྲིད། དེ་བཞིན་ཆེ་མཐོང་ལ་གནོད་པའི་གསུང་བཤད་རིགས་གནང་ཚེ་ཁོང་ཚོའི་སེམས་ཚོར་ལ་ཕོག་ཐུག་བྱུང་གི་ཡོད་སྐོར་སོགས་བརྗོད་འདུག གཙུག་ལག་སློབ་གཉེར་ཁང་ནས་༸གོང་ས་མཆོག་གདན་ཞུ་གནང་པ་དེར་མི་འདོད་པའི་རྣམ་པ་ཤུགས་ཆེ་དང་སྦྲགས། ཚོགས་པའི་ཚོགས་མི་ཚོས་མགོན་པོ་༸གང་ཉིད་མཆོག་གི་མཛད་འཆར་ཕྱིར་འཐེན་བྱ་དགོས་པ་སོགས་ཀྱི་ངོ་རྒོལ་ཡང་ཤུགས་ཆེ་བྱས་ཡོད་པ་རེད། འོང་ཀྱང་ཁ་ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པར་གཞིགས་ན། ཁལ་ཕོ་ནི་ཡ་གཙུག་ལག་སློབ་གཉེར་ཁང་གི་རིགས་བདག་སྐུ་ཞབས་ Pradeep Khosla ལགས་ཀྱིས་རྒྱ་རིགས་ཚོགས་པ་དེ་དག་གྱི་སྐུ་ཚབ་རྣམས་བསྐོང་སྟེ་ཐེངས་འདིའི་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཆར་ཁྲོད་མགོན་པོ་༸གང་ཉིད་མཆོག་ནས་ཆབ་སྲིད་དང་འབྲེལ་བའི་ཐ་སྙད། རང་དབང་རྩོད་ལེན་དང་ཆོས་ཕྱོགས་ཀྱི་དབུ་ཁྲིད་སོགས་སྤྱོད་དེ་བཀའ་སློབ་བསྩལ་རྒྱུ་མིན་པའི་ཐོག་གཙུག་ལག་སློབ་གཉེར་ཁང་གིས་རྐང་འགན་བཞེས་རྒྱུ་ཡིན་སྐོར་འགྲེལ་བརྗོད་དང་འབྲེལ། རྒྱ་རིགས་ཚོགས་པ་ཚོས་རེ་འདུན་ཕུལ་དོན་ལྟར་༸གོང་ས་མཆོག་གི་མཛད་འཆར་ཁག་ཕྱིར་འཐེན་གནང་རྒྱུ་མིན་ཞེས་གསུངས་འདུག ཀོ་ལམ་བྷི་ཡ་གཙུག་ལག་སློབ་གཉེར་ཁང་གི་བོད་རིག་པའི་མཁས་པ་སྐུ་ཞབས་ Robert Barnett ལགས་ཀྱིས་ཁལ་ཕོ་ནི་ཡ་གཙུག་ལག་སློབ་གཉེར་ཁང་གིས་རྒྱ་རིགས་ཚོགས་པ་ཁག་གི་རེ་འདུན་འོག་མགོ་བོ་མ་སྒུར་བ་དེ་ནི་གཟི་བརྗིད་ཅིག་རེད་ཅེས་བསྔགས་བརྗོད་གནང་པ་དང་འབྲེལ། དཀའ་རྙོག་དེ་དག་སེལ་ཐབས་སུ་ཐབས་ལམ་ཡག་ཤོས་དེ་ནི་གྲོས་མོལ་ཡིན་སྟབས། ཁལ་ཕོ་ནི་གཙུག་ལག་སློབ་གཉེར་ཁང་ནས་ད་རེས་༸གོང་ས་མཆོག་ཁུལ་དེར་ཆིབས་བསྒྱུར་བཀའ་དྲིན་མཛ་སྐབས་མགོན་པོ་༸གང་ཉིད་མཆོག་དང་རྒྱ་རིགས་སློབ་ཕྲུག་དབར་དམིགས་བསལ་གྱི་གྲོས་བསྡུར་ལས་རིམ་ཞིག་གོ་སྒྲིག་ཞུ་ཐུབ་ཚེ་དགེ་མཚན་ཆེན་པོ་ཡོད་པའི་དགོངས་ཚུལ་ཕུལ་གནང་འདུག རྩ་བའི་༸གོང་ས་སྐྱབས་མགོན་ཆེན་པོ་མཆོག་དེ་སྔ་ཕྱི་ལོ་ ༢༠༡༢ ལོར་གྲོང་ཁྱེར་དེའི་ནང་དུ་ཆིབས་བསྒྱུར་བཀའ་དྲིན་བསྐྱངས་སྐབས་གཙུག་ལག་སློབ་གཉེར་ཁང་གི་དགེ་ལས་སློབ་མ་དང་མང་ཚོགས་བཅས་ལ་རྒྱལ་སྤྱིའི་གནམ་གཤིས་འགྱུར་ལྡོག་སྐོར་བཀའ་སློབ་བསྩལ་བ་ལས། རང་དབང་འཐབ་རྩོད་དང་ཆོས་ཕྱོགས་ཀྱི་དབུ་ཁྲིད་སོགས་རྒྱ་རིགས་ཀྱི་སེམས་ཁམས་ལ་དོ་ཕོག་ཐེབས་གཞི་གང་ཡང་བཀའ་བསྩལ་གནང་མེད་པ་རེད། གཞི་རྩའི་རྒྱ་རིགས་ཚོགས་པ་དེ་དག་ནས་ཁུལ་དེའི་༸གོང་ས་མཆོག་གི་མཛད་འཆར་ཁག་ཕྱིར་འཐེན་དགོས་པའི་ངོ་རྒོལ་བྱས་པ་དེར། ཨ་རི་ནང་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་ནས། རྒྱ་རིག་སློབ་ཕྲུག་སྡེ་ཚན་གྱི་རྒྱ་ནག་གཞུང་ཚབ་ལྷན་དུ་འབྲེལ་བ་བྱེད་དེ་༸གོང་ས་མཆོག་གིས་བཀའ་སློབ་ལས་རིམ་ལ་དགག་པ་རྒྱབ་པ་དེ་ནི་ཨ་རིའི་ཤེས་ཡོན་རང་དབང་གི་ཐད་ལ་དྲི་བ་ཆེན་པོ་ཞིག་ཆགས་ཀྱི་ཡོད་སྐོར་འགྲེལ་བརྗོད་དང་སྦྲགས། རྒྱ་ནག་གཞུང་ནས་ཐབས་ལམ་འདྲ་མིན་བརྒྱུད་ཨ་རིའི་གཙུག་ལག་སློབ་གཉེར་ཁང་གི་ཤེས་ཡོན་དང་འབྲེལ་བའི་ཐག་གཅོད་ལ་ཐད་བྱུས་བྱེད་བཞིན་པའི་ཐད་ཨ་མི་རི་ཀའི་གཞུང་དམངས་ཡོངས་དང་གྲོས་ཚོགས་བཅས་ནས་དམིགས་གསལ་དོ་སྣང་གནང་དགོས་གལ་ཡིན་སྐོར་གསུངས་ཡོད་པ་རེད། ལྷག་པར་དུ་ཨ་རིའི་ Goergia གཙུག་ལག་སློབ་གཉེར་ཁང་དུ་སློབ་གཉེར་གནང་བཞིན་པའི་རྒྱ་རིག་སློབ་མ་ Yi Sulaiman Gu ལགས་ཀྱིས་ཡོངས་ཁྱབ་ཕྱག་བྲིས་ཞིག་སྤེལ་བའི་བརྒྱུད་ཁོང་རང་ཉིད་རྒྱ་རིགས་ཤིག་ཡིན་ཡང་༸གོང་ས་མཆོག་གི་བཀའ་སློབ་ལས་རིམ་ལ་དགའ་མོས་ཆེན་པོ་བྱེད་མཁན་ཞིག་ཡིན་ཅེས་ངོ་སྤྲོད་དང་འབྲེལ། CSSA ཞེས་པའི་རྒྱ་རིགས་སློབ་ཕྲུག་ཚོགས་པ་དེས་རྒྱ་རིགས་སློབ་མ་ཡོངས་ཀྱི་མིང་སྤྱོད་དེ་རྒྱ་ནག་གཞུང་ཚབ་ཁང་དང་ལག་འབྲེལ་གྱིས་གཙུག་ལག་སློབ་གཉེར་ཁང་གི་ལས་དོན་ལ་དགག་པ་བྱས་དེ་ནི་རྒྱ་ནག་གཞུང་གི་དམ་བསྒྲགས་ཀྱི་སྲིད་བྱུས་རྣམས་ཨ་རིའི་སློབ་གཉེར་ཁང་དུ་སླེབ་བཞིན་ཡོད་པ་སོགས་སྐྱོན་བརྗོད་ནན་པོ་གནང་འདུག རྒྱ་རིགས་སློབ་ཕྲུག་ཚོགས་པ་དེ་དག་རང་དབང་ཅན་གྱི་སློབ་ཕྲུག་ཚོགས་ཤིག་རྩ་བ་ནས་མིན་པ་དང། ཚོགས་པ་དེ་དག་གི་མགོ་ཁྲིད་དང་ལས་ཀ་བྱེད་མཁན་རྣམས་རྒྱ་ནག་གཞུང་ཚབ་ཁང་གི་བསྐོ་གཞག་བྱེད་ཀྱི་ཡོད་པ་མ་ཟད། ཁོང་ཚོས་རྒྱ་ནག་གཞུང་ཚབ་ཁང་གིས་གང་བཤད་པ་མ་གཏོགས་རང་ངོས་ནས་ཐག་གཅོད་བྱ་ཆོག་གི་མེད་པ་རེད་པ་འདུག རྩ་བའི་ཨ་རི་ནང་ལ་ཡོད་པའི་རྒྱ་རིགས་སློབ་མ་ཚོས་༸གོང་ས་མཆོག་གི་མཛད་འཆར་སོགས་ཀྱི་ཐོག་ལ་ངོ་རྒོལ་བྱེད་པ་ད་རེས་ཐེངས་དང་པོ་མ་ཡིན་པར། དེ་སྔ་ཨ་རའི་ཝ་ཤིང་ཊོན་གཙུག་ལག་སློབ་གཉེར་ཁང་གིས་མགོན་པོ་༸གང་ཉིད་མཆོག་ལ་ཆེས་མཐོའི་ཕྱག་འཁྱེར་འབུལ་བཞེས་མཛད་སྐབས་སུའང་ས་གནས་རྒྱ་རིགས་རྣམས་ཚོས་ངོ་རྒོལ་ཤུགས་ཆེ་བྱས་ཡོད་པ་རེད།

རྒྱ་ནག་གཞུང་གིས་སྔ་ལོའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨི་ཊ་ལིའི་གྲོང་འཁྱེར་མི་ལན་ནང་དུ་ཆིབས་བསྒྱུར་བཀའ་དྲིན་བསྐྱངས་པའི་མཛད་འཕྲིན་ཁག་བེད་སྤྱོད་ནས་རྒྱ་རིགས་ཚོང་པ་ཚོས་རྒྱལ་སྤྱིའི་ཐོག་སྙན་གྲགས་ཆེ་བའི་ཨི་ཊ་ལིའི་རྐང་སྤོལ་རུ་ཁག་ AC Milan ཞེས་པ་དེ་ཉོ་བར་དཀའ་རྙོག་བཟོ་བཞིན་འདུག ཁ་སང་ཟླ་ ༢ ཚེས་ ༡༤ ཉིན་ Bloomberg གསར་ཁང་གིས་གནས་ཚུལ་སྤེལ་བར་གཞིགས་ན། སྔ་ལོའི་ཟླ་བཅུ་པའི་ནང་ Milan གྲོང་ཁྱེར་གྱི་སྤྱི་ཁྱབ་སྐུ་ཞབས་ Giuseppe Sala ལགས་ཀྱིས་རྒྱ་གཞུང་གི་གནོན་ཤུགས་སོགས་ལ་མ་ལྟོས་པར་༸གོང་ས་མཆོག་ཁུལ་དེའི་ནང་ལ་གདན་ཞུ་གནང་པ་མ་ཟད། མགོན་པོ་༸གང་ཉིད་མཆོག་ལ་གྲོང་ཁྱེར་མི་ལན་གྱི་ཆེ་བསྟོད་མི་སེར་གྱི་ཕྱག་འཁྱེར་ཕུལ་ཡོད་སྟབས། རྒྱ་གཞུང་གིས་༸གོང་ས་མཆོག་ཨི་ཊ་ལི་ནང་ཆིབས་བསྒྱུར་གནང་པའི་གནད་དོན་དང་འབྲེལ་རྒྱ་རིགས་ཚོང་པ་ཚོས་ AC Milan རྐང་སྤོལ་རུ་ཁག་ཉོ་བར་དཀའ་རྙོག་བཟོ་བཞིན་ཡོད་པ་རེད། གཞི་རྩའི་སྐབས་དེར་༸གོང་ས་མཆོག་མི་ལན་གྲོང་ཁྱེར་ནང་ཆིབས་བསྒྱུར་བཀའ་དྲིན་བསྐྱངས་སྐབས་སུ་ རྒྱ་ནག་གཞུང་ཚབ་ཁང་གིས་མི་འདོད་པའི་རྣམ་འགྱུར་ཤུགས་ཆེ་བཏོན་པ་མ་ཟད། ཕྱོགས་གཉིས་ཀྱི་ཚོང་ འབྲེལ་ལ་མཇུག་འབྲས་ངན་པ་ཡོང་ངེས་ཡིན་སྐོར་གྱི་ཉེན་བརྡ་ཡང་བཏང་ཡོད་པ་རེད། ལྷག་པར་དུ་གནས་ཚུལ་དེའི་ནང་ལ་མིང་མི་མངོན་པའི་གང་ཟག་ཞིག་གིས་སྐབས་དེའི་རྒྱ་གཞུང་གི་ཉེན་བརྡ་དེར་བློ་དོགས་དང་སྦྲགས་ཏེ་གསུངས་པར་རྒྱ་ནག་གཞུང་གིས་བར་སྐབས་ཤིག་ནས་རྒྱ་རིགས་ཚོང་པ་རྣམས་ Italy སྤྱི་དང་ལྷག་པར་དུ་ Milan གྲོང་ཁྱེར་ནང་དཔལ་འབྱོར་སོགས་ཀྱི་མ་རྩ་འཛུགས་རྒྱུར་དམ་བསྒྲགས་ཤུགས་ཆེ་བྱེད་བཞིན་ཡོད་པ་མ་ཟད། ལྷག་དོན་ཨི་ཊ་ལི་དང་རྒྱ་ནག་དབར་ཚོང་དོན་སོགས་ཀྱི་སླད་ཆེད་འཛུགས་གནང་པའི་མ་དངུལ་གཏོང་ལེན་གན ང་སའི་བརྒྱུད་ལམ་ཁག་ཀྱང་བཀག་སྡོམ་བྱེད་བཞིན་ཡོད་སྐོར་སོགས་འགྲེལ་བརྗོད་གནང་འདུག དེར་བརྟེན་གསར་ཁང་དེའི་གསར་འགོད་པས་རྒྱ་ནག་གཞུང་ཚབ་ལས་ཁུངས་སུ་གནད་དོན་དེ་བདེན་རྫུན་གང་ཡིན་ཐད་བཅར་འདྲི་གནང་ཡང་རྒྱ་ནག་གཞུང་ཚབ་ཁང་ནས་བཟང་ངན་གྱི་བསལ་བཤད་གང་ཡང་བྱས་མེད་པ་རེད་འདུག གཞི་རྩའི་ཨེ་སི་མི་ལན་རྐང་རྩེད་སྤོ་ལོའི་རུ་ཁག་ཉོ་ཚོང་བྱ་རྒྱུ་དེ་ནི་༸གོང་ས་མཆོག་ཁུལ་དེའི་ནང་ལ་ཆིབས་བསྒྱུར་མ་གནང་པའི་གོང་ནས་ཕྱོགས་གཉིས་དབར་ཨ་སྒོར་ས་ཡ་ ༧༨༥ ཐོག་ཐག་ཆོད་ཟིན་པའི་གནད་དོན་ཞིག་ཡིན་པ་རེད། ད་ཆ་རྒྱ་ནག་གཞུང་གིས་མ་དངུལ་དེ་དག་རྒྱ་ནག་ནས་མི་ལན་ནང་གཏང་བར་བཀག་སྡོམ་བྱེད་བཞིན་ཡོད་སྟབས། རིང་མིན་ཕྱི་ཟླ་ ༣ ཚེས་ ༡ དང་ ༣ གཉིས་ལ་ད་ཡོད་རྐང་རྩེད་སྤོ་ལོའི་རུ་ཁག་གི་སྦྱིན་བདག་རྣམས་ལྷན་འཛོམས་གནང་སྟེ་མཐའ་མའི་ཐག་གཅོད་གནང་རྒྱུ་ཡིན་པ་རེད། རྩ་བའི་སྤྱི་ལོ་ ༡༨༩༩ ལོར་གསར་འཛུགས་གནང་པའི་ AC Milan རྐང་རྩེད་སྤོ་ལོའི་རུ་ཁག་དེ་ནི་རྒྱལ་སྤྱའི་ཐོག་མང་ཚོགས་དུ་མས་དགའ་མོས་ཆེན་པོ་གནང་སའི་རུ་ཁག་ཞིག་ཡིན་པ་དང་། རུ་ཁག་དེས་ད་བར་སྐད་གྲགས་ཆེ་བའི་རྒྱལ་སྤྱིའི་རྐང་རྩེད་སྤོ་ལོའི་གཟེངས་རྟགས་མང་དག་ཞིག་ཐོབ་མྱོང་ཡོད་པ་མ་ཟད། ད་ལྟའི་ཆར་མང་ཚོགས་ཀྱི་དགའ་མོས་ཆེན་པོ་བྱ་ས་ Champions League ཞེས་པའི་རྒྱལ་སྤྱིའི་རྩེད་འགྲན་གྱི་གཟེངས་རྟགས་མང་ཤོས་གཉིས་པ་ཐོབ་མྱོང་མཁན་གྱི་རུ་ཁག་ཞིག་ཀྱང་ཆགས་ཡོད།