བོད་མིའི་སྒྲིག་འཛུགས།

དེ་རིང་ཕྱི་ཚེས་ ༡༥ ཉིན་གྱི་སྔ་དྲོ་ཚོུད་ ༩ ཐོག་བཞུགས་སྒར་བོད་མིའི་སྒྲིག་འཛུགས་ཀྱི་ཚོགས་ཁང་གསར་པའི་ནང་དུ་དམིགས་བསལ་སྐུ་མགྲོན་རྒྱ་གར་གྱི་ RSS རྒྱལ་ཞེན་ཚོགས་པའི་དབུ་ཁྲིད་དང་འཕགས་བོད་འབྲེལ་མཐུད་ཚོགས་པའི་སློབ་སྟོན་པ་སྐུ་ཞབས་ Indresh Kumar ལགས། སྐུ་མགྲོན་ཧིན་བོད་འཛའ་འབྲེལ་ཚོགས་པའི་ཚོགས་པའི་ཚོགས་གཙོ་སྐུ་ཞབས་ Anand Kumar ལགས་ཀྱིས་གཙོས་པའི་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ R.K.Khrimey ལགས། ཚོགས་གཞོན་སྐུ་ཞབས་ Sunder Kumar ལགས། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་བཅས་དབུ་བཞུགས་ཐོག་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་དབུ་འཛུགས་གནང་སོང་།རྒྱ་གར་རྒྱལ་ཡོངས་ནས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་གྱི་མཛད་སྒོའི་ཐོག་སྐུ་ཞབས་ Anand Kumar ལགས་དང་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ R.K.Khrimey ལགས་རྣམ་གཉིས་ཀྱིས་གཙོས་པའི་རྒྱ་གར་གྱི་སྐུ་མགྲོན་རྣམས་ཀྱིས་རྒྱལ་སྤྱིའི་ཁྱོན་ལ་རྒྱ་ནག་སྟོབས་ཤུགས་ཉིན་རེ་བཞིན་ཇེ་ཆེར་འགྲོ་བཞིན་ཡོད་པ་མ་ཟད་རྒྱ་ནག་གིས་བོད་ལ་བཙན་འཛུལ་བྱས་ནས་ལོ་ངོ་ ༦༠ འཁོར་གྱི་ཡོད་པར་བརྟེན་བོད་ཀྱི་གནད་དོན་དང་འབྲེལ་བའི་འཐབ་རྩོད་ཀྱི་ལས་འགུལ་རྒྱུན་གནས་ཐུབ་པ་གནང་དགོས་གལ་ཡིན་པ་དང་། བོད་རྒྱའི་དཀའ་རྙོག་དེ་གང་མགྱོགས་སེལ་བར་རྒྱ་གར་གཞུང་མང་གཉིས་ཀྱིས་འགན་གཙོ་བཞེས་གནང་ཚེ་དེས་བོད་མི་ཙམ་མ་ཟད་རྒྱ་གར་ལའང་དགེ་མཚན་ཆེན་པོ་ཡོད་པ་གསུངས་སོང་།ལྷག་དོན་༸གོང་ས་མཆོག་གིས་དབུས་བོད་མི་རྣམས་རྒྱ་གར་དུ་སྐུ་མགྲོན་གྱི་ངོ་བོ་ཐོག་ནས་སྣེ་ལེན་ཞུས་པ་ལྟར་རྒྱ་གར་གཞུང་མང་གཉིས་ནས་ནམ་ཞིག་བོད་མི་དག་རང་ཡུལ་དུ་ཕྱིར་ཕེབས་སྐབས་ཕེབས་སྐྱེལ་གཟབ་རྒྱས་ཞུ་རྒྱུའི་འོས་འགན་ཡོད་པ་སོགས་གསུངས་ཡོད།སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་མི་ཚོའི་སེམས་ནང་ལ་བོད་མིའི་བདེན་དོན་སླད་དུ་རྒྱ་གར་གཞུང་མང་གཉིས་ལས་ལྷག་པའི་བཀའ་དྲིན་ཆེ་བ་གཞན་རྒྱལ་ཁབ་སུའང་མེད་པ་འགྲེལ་བརྗོད་དང་འབྲེལ། འཛམ་གླིང་གི་རྒྱལ་ཁབ་ཚང་མའི་ནང་ལ་རྒྱ་ནག་གི་གནོན་ཤུགས་རྐྱེན་པས་ཁོང་གིས་སྲིད་སྐྱོང་གི་ལས་གནས་བཞེས་པའི་ཐོག་མའི་ལོ་བཞི་ལྔ་ཙམ་གྱི་རིང་རྒྱ་ནག་གིས་འགོག་རྐྱེན་ལ་བརྟེན་ནས་རྒྱལ་སྤྱིའི་ཁྲོད་བོད་དོན་གླེང་རྒྱུའི་གླེང་སྟེགས་ཉུང་དུ་ཕྱིན་ཡོད་པ་དེ་ལྟར་ཡང། ད་སྐབས་ཨོ་སི་ཊོ་ལི་ཡ་གཙོས་ རྒྱལ་སྤྱིའི་རྒྱལ་ཁབ་མང་དག་ཅིག་ནང་རྒྱ་ནག་གི་ཚོང་འབྲེལ་དང་མཉམ་དུ་རིམ་བཞིན་རྒྱལ་ཁབ་སོ་སོའི་ཆབ་སྲིད་དང་ཤེས་ཡོན་སྡེ་ཚན་བཅས་ཀྱི་ཐོག་རྒྱ་ནག་གི་གནོན་ཤུགས་བརྒྱུད་བདེ་འཇགས་ལའང་བརྡབ་གསིག་ཆེན་པོ་འགྲོ་བཞིན་པ་གསལ་པོ་ཆགས་བ་མ་ཟད་དེ་འབྲེལ་བགྲོ་གླེང་ཡང་ཤུགས་ཆེན་ཡོང་གི་ཡོད་སྟབས། འདས་པའི་ལོ་ངོ་གཉིས་གསུམ་ནས་གནས་སྟངས་ལ་འགྱུར་བ་འགྲོ་བཞིན་ཡོད་པ་དང་། རྒྱ་གར་གཞུང་མང་གཉིས་ནས་ཀྱང་དེའི་ཐོག་ཐུགས་སྣང་དང་བགྲོ་གླེང་གནང་རྒྱུ་གལ་ཆེན་པོ་ཡིན་པ་འགྲེལ་བརྗོད་གནང་སོང་།འདི་ག་རླུང་འཕྲིན་ཁང་གི་གསར་འགོས་པས་བོད་མིའི་སྒྲིག་འཛུགས་ཀྱི་འཕགས་བོད་འབྲེལ་མཐུན་ཁང་གི་འབྲེལ་མཐུད་པ་དཔལ་འབྱོར་ལགས་སུ་ཐེངས་འདིའི་ཚོགས་ཆེན་དང་འབྲེལ་བའི་ཐོག་བཅར་འདྲི་ཁག་གཅིག་ཞུ་སྐབས་ཁོང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་གཙོས་པའི་བོད་དེ་རྒྱ་གར་ལ་ཇི་ཙམ་གནད་ཆེ་ཡིན་སྐོར། བོད་ཀྱི་ཁོར་ཡུག རྒྱ་གར་གཞུང་མང་ནས་བོད་ཐོག་རྒྱབ་སྐྱོར་གནང་ཐབས། དེ་བཞིན་ལྔ་དང་ལྔ་བཅུའི་འཆར་སྣང་སོགས་ཀྱི་གནད་དོན་ལྔའི་ཐོག་གླེང་སློང་གནང་གི་ཡོད་པ་གསུངས་སོང་།དེ་བཞིན་ཨ་རུ་ནཱ་ཅལ་མངའ་སྡེའི་ནང་འཕགས་བོད་རོགས་སྐྱོར་ཚོགས་པའི་ཚོགས་གཙོ་སྐུ་ཞབས་ལྷུན་གྲུབ་ཆོས་བཟང་ལགས་སུ་རྣམ་ཀུན་ཁུལ་དེར་བོད་དོན་དང་འབྲེལ་བའི་ཕྱག་ལས་གང་དང་གང་གནང་གི་ཡོད་མེད་ཐད་ལ་བཅར་འདྲི་ཞུས་པར་ཁོང་གིས་སྔར་བྱུང་མྱོང་མེད་པའི་བོད་མིའི་རང་དབང་སྒེར་ལངས་སྲུང་བརྩི་ཞུས་ཐུབ་ཡོད་པ་མ་ཟད། ལྷག་དོན་རྒྱ་གར་དབུས་གཞུང་ལ་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་སྤྱི་དམངས་ཀྱི་ཆེས་མཐོའི་གཟེངས་རྟགས་ Bharat Ratna འབུལ་ལམ་ཞུ་དགོས་པའི་རེ་སྐུལ་གྱི་མཚན་རྟགས་བསྡུ་རུབ་གནང་བཞིན་ཡོད་སྐོར་གསུངས་སོང་།གཞི་རྩའི་ཐེངས་འདིའི་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་དྲུག་པ་འདི་རྐང་རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མས་གོ་སྒྲིག་ཞུས་པ་ཞིག་ཆགས་ཀྱི་ཡོད་པ་དང་། ལྷན་ཚོགས་ཐོག་ཚོགས་བཅར་བ་མི་གྲངས་ ༡༨༠ ནས་ ༢༠༠ བར་མཉམ་ཞུགས་གནང་ཡོད་པ་ལྟར། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་ལྷན་ཚོགས་སྐབས་རྒྱབ་གཉེར་བསམ་འཆར་ཁག་གཞིར་བཞག་སྟེ་འབྱུང་འགྱུར་བོད་དོན་ལས་འགུལ་ཚགས་ཚུད་ཇི་ལྟར་སྤེལ་དགོས་པའི་གོ་བསྡུར་གནང་གི་འདུག

ཨ་རིའི་སྐུ་ཚབ་དོན་གཅོད་ཟུར་པ་ཚོགས་ཟུར་སྤེན་པ་ཚེ་རིང་ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་བརྒྱུད་འཛིན་སྐྱོང་བཀའ་ཤག་གིས་ཁོང་ལ་མ་ཉེས་ཁག་གཡོགས་གནང་བའི་ཁ་མཆུ་ཨང་ ༢༠ པའི་གནད་དོན་གཏན་འབེབས་ཀྱི་ཉན་ཞིབ་སང་ཉིན་གནང་གཏན་ཁེལ་འདུགདེའང་ཟླ་བ་འདིའི་ཚེས་ ༥ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ་ཆེས་མཐོའི་ཁྲིམས་ཞིབ་པ་ཆེ་བ་མཆོག་གཙོས་པའི་ཁྲིམས་ཞིབ་པ་རྣམ་པ་དབུ་བཞུགས་དང་། ཞུ་སྦྱོར་བ་སྤེན་པ་ཚེ་རིང་ལགས་དང་ཁོང་གི་ཁྲིམས་རྩོད་པ་རྣམ་རྒྱལ་ཚེ་སྐྱིད་ལགས། དེ་བཞིན་རྩོད་ལན་པ་སྲིད་སྐྱོང་བློ་བཟང་སེང་གེ་མཆོག་གི་ཁྲིམས་རྩོད་པ་སྤྱི་འཐུས་བློ་བཟང་གྲགས་པ་ལགས་ལྷན་ཞུགས་ཐོག་མ་ཉེས་ཁག་གཡོགས་དང་འབྲེལ་བའི་ཁ་མཆུ་ཨང་ ༢༠ པའི་ཐོག་ཉན་ཞིབ་ཐོག་མ་དེ་དབུ་འཛུགས་དང་འབྲེལ། བཀའ་ཤག་གིས་དོན་གཅོད་སྤེན་པ་ཚེ་རིང་ལགས་འཕོ་འགྱུར་གཏོང་དགོས་པའི་རྒྱུ་མཚན་དོན་ཚན་ ༡༠ སྤེལ་བའི་གནད་དོན་ཁག་གི་ཐད་འདྲི་ཞིབ་གནང་སྐབས། རྩོད་ལན་པའི་ཁྲིམས་རྩོད་པ་བློ་བཟང་གྲགས་པ་ལགས་ཀྱིས་གྱོད་གཞིའི་གནད་དོན་ཁག་གི་ནང་གསེས་དོན་ཚན་ཁག་གཅིག་གི་ཐོག་ལེན་འདེབས་ཁ་གསལ་དང་དྲང་བདེན་གྱི་ཁྲིམས་བཤེར་ཡོང་ཆེད་ཁ་མཆུ་དེ་ལོ་འདིའི་ཕྱི་ཟླ་ ༩ ཚེས་ ༥ བར་ཟླ་བ་གསུམ་གྱི་རིང་ཕར་འགྱངས་ཡོང་བའི་འབོད་སྐུལ་ཞུས་ཡོད་པ་རེད།འོན་ཀྱང་དེ་རིང་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གིས་གསལ་སྒྲགས་སྤེལ་བའི་ནང་། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་དོན་ཚན་ ༤༠ གཞིར་བཟུང་ཁ་མཆུ་འདིའི་གནད་དོན་གཏན་འབེབས་ཀྱི་ཉན་ཞིབ་སང་ཕྱི་ཟླ་ ༦ ཚེས་ ༡༥ རེས་གཟའ་སྤེན་པའི་ཕྱི་དྲོ་ཚོུད་ ༢.༣༠ ཐོག་གནང་གཏན་ཁེལ་ཡོད་པ་ཡོངས་ཁྱབ་གསལ་བསྒྲགས་གནང་འདུག གཞི་རྩའི་དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་ནས་ཕྱི་ལོ་ ༢༠༡༧ ཟླ་ ༡༡ ཚེས་ ༧ ཉིན་སྐབས་དེའི་བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་ལགས་ལས་གནས་ནས་འཕོ་འགྱུར་དང་འབྲེལ་རྗེས་སུ་དོན་ཚན་བཅུ་ཅན་གྱི་གསལ་བཤད་ཅིག་འདོན་སྤེལ་གནང་སྟེ་དོན་གཅོད་སྤེན་པ་ཚེ་རིང་ལགས་ཀྱིས་བཀའ་ཤག་གི་ཐུགས་རེ་བཞིན་ལས་དོན་གནང་མ་ཐུབ་པ་དང་། ཡིད་ཆེས་བློས་འགེལ་མི་ཐུབ་པ། དེ་བཞིན་འཛིན་སྐྱོང་ལ་བྱ་སྤུ་གནོན་གྱི་གོ་རིམ་ལ་ལྟོས་མེད་གནང་ཡོད་པ་བཅས་ཀྱི་རྒྱུ་མཚན་ལ་བརྟེན་ནས་ཐག་གཅོད་དེ་ལྟར་གནང་དགོས་བྱུང་ཡོད་པ་གསལ་བཤད་གནང་ཡོད་པ་རེད། སྐུ་ཞབས་སྤེན་པ་ཚེ་རིང་ལགས་ཀྱིས་སྐབས་དེར་དོན་གཅོད་འཕོ་འགྱུར་ཐོག་འཛིན་སྐྱོང་གི་ཐག་གཅོད་ལ་ངོས་ལེན་ཞུས་ཡོད་པ་དེ་ལྟར་ཡང་ཁོང་གི་ལས་དོན་ལ་འཐུས་ཤོར་ཕྱིན་པ་སོགས་ཀྱི་གནད་དོན་ཁག་ལ་ངོས་ལེན་རྩ་བ་ནས་ཞུ་ཐབས་མེད་པའི་འགྲེལ་བརྗོད་དང་འབྲེལ། ཕྱི་ལོ་ ༢༠༡༨ ཟླ་ ༥ ཚེས་ ༡༨ ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུག་གནང་ཡོད་པ་རེད།      

བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་ཐོག་ཕྱི་ཟླ་ ༥ ཚེས་ ༣༡ ནས་བཞུགས་སྒར་དྷ་སྟེང་བོད་ཁྱིམ་གྱི་རྩེད་ཐང་དུ་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་འགྲན་བསྡུར་ཐེངས་ ༢༥ པ་གནང་བཞིན་ཡོད་པ་ལྟར། ཁ་སང་ཕྱི་ཚེས་ ༡༡ ཉིན་རྒྱབ་ཚོུད་ ༣༌༣༠ ཙམ་ལ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་དམིགས་བསལ་སྐུ་མགྲོན་དྷ་རྨ་ས་ལའི་གྲོང་སྡེ་བློན་ཆེན་སྐུ་ཞབས་ Devinder Singh Jaggi མཆོག་དབུ་བཞུགས་ཐོག་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་འགྲན་བསྡུར་ཐེངས་ ༢༥ པའི་མཐའ་མའི་རྩེད་འགྲན་དེ་མོན་གྷོ་འདོད་རྒུ་གླིང་རུ་ཁག་དང་དོན་གྲུབ་གླིང་རུ་ཁག་གཉིས་དབར་གནང་ཡོད།སྐབས་དེར་མོན་གྷོ་འདོད་རྒུ་གླིང་རུ་ཁག་དང་ Clement Town དོན་གྲུབ་གླིང་རུ་ཁག་གཉིས་ནས་ཐོག་མའི་རྩེད་འགྲན་གྱི་སྐར་མ་ ༩༠ ནང་སྤོ་ལོ་རེ་རེ་བླུགས་ཏེ་གཅིག་པ་ཆགས་སྟབས། སླར་སྐར་མ་ཉི་ཤུ་མུ་མཐུད་རྩེད་འགྲན་གནང་ཡང་ཕྱོགས་གཉིས་ཀ་ནས་སྤོལ་ལོ་གཅིག་ཀྱང་བླུགས་མ་ཐུབ་པར་བརྟེན་གཅིག་མཚུངས་རང་སོར་གནས་ཡོད་པ་དང་། ཕྱོགས་གཉིས་ཀྱི་མཐའ་མའི་ཐག་གཅོད་དེ་མདུན་བཀག་མེད་པའི་རྡོག་རྡེག་ཐོག་ནས་ཐག་གནང་དགོས་བྱུང་ཡོད་པ་རེད།མདུན་བཀག་མེད་པའི་རྡོག་རྡེག་སྐབས་སུ་དོན་གྲུབ་གླིང་རུ་ཁག་ནས་སྤོལ་གཉིས་དང་མོན་གྷོ་འདོད་རྒུ་གླིང་རུ་ཁག་ནས་སྤོལ་བཞི་བླུགས་ཡོད་སྟབས་མོན་གྷོ་འདོད་རྒུ་གླིང་རུ་ཁག་ལ་ ༢༠༡༩ ལོའི་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་རྒྱལ་ཁ་ཐོབ་སོང་།དེ་བཞིན་མཐའ་མའི་རྩེད་འགྲན་ཁྲོད་ཕམ་ཁ་བྱུང་ཏེ་ཨ་གཉིས་པ་སོན་པ་དོན་གྲུབ་གླིང་རུ་ཁག་གི་རུ་དཔོན་བསྟན་འཛིན་དོན་གྲུབ་ལགས་སུ་བཅར་འདྲི་ཞུས་པར་ད་རེས་རྒྱལ་ཁ་ཕམ་ཡང་ལོ་རྗེས་མར་དཀའ་ལས་ལྡབ་ལོག་གསུམ་ལས་མང་བ་བརྒྱབ་ནས་ཡོང་གི་ཡིན་ཞེས་གསུངས་སོང་། ཐེངས་འདིའི་རྩེད་འགྲན་ཁྲོདཨང་དང་པོ་སོན་པར་ཧིན་སྒོར་ ༡༢༠༠༠༠ དང་གསེར་གྱི་བུམ་པ། ཨང་གཉིས་པར་ཧིན་སྒོར་ ༡༠༠༠༠༠ ཨང་གསུམ་པ་དང་བཞི་པར་ཧིན་སྒོར་ ༢༥༠༠༠ རེ་དང་། རྩེད་འགྲན་འདིའི་ཁྲོད་ Quarter Final ཞེས་མཐའ་མའི་འགྲན་བསྡུར་རིམ་པ་དང་པོའི་བར་སླེབས་པའི་རུ་ཁག་གཞན་བཞིར་ཧིན་སྒོར་ཆིག་ཁྲི་རེ་བྱ་དགའ་གནང་ཡོད་པ་རེད།གཞི་རྩེའི་ཐེངས་འདིའི་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་འགྲན་བསྡུར་ཐེངས་ ༢༥ པའི་ནང་རྒྱ་གར་གྱི་ས་གནས་ཁག་བཅུ་བདུན་གཙོ་གྱུར་བལ་ཡུལ་དང་བྱང་ཨ་རི། དེ་བཞིན་བྱིན་ཡུལ་བཅས་ནས་བོད་པའི་རྐང་རྩེད་སྤོ་ལོའི་རུ་ཁག་ ༢༣ ནས་མཉམ་ཞུགས་གནང་ཡོད་པ་དང་། ད་རེས་ཀྱི་རྩེད་འགྲན་ཁྲོད་རྐང་སྤོལ་རྩེད་མོ་བ་ཡག་ཤོས་ཀྱི་བྱ་དགའ་དེ་མོན་གྷོ་འདོད་རྒུ་གླིང་རུ་ཁག་གི་བསྟན་འཛིན་སྨོན་ལམ་ལགས་དང་། སྤོ་ལོ་མང་ཤོས་བླུགས་མཁན་གྱི་བྱ་དགའ་དེ་དོན་གྲུབ་གླིང་རུ་ཁག་གི་བསྟན་པ་ལྷུན་གྲུབ་ལགས། དེ་བཞིན་སྒོ་རགས་པ་ཡག་ཤོས་ཀྱི་བྱ་དགའ་དེ་མོན་གྷོ་འདོད་རྒུ་གླིང་རུ་ཁག་གི་བསྟན་འཛིན་བསམ་གྲུབ་ལགས་དང་། ལོ་ཆུང་འབུར་ཐོན་གྱི་བྱ་དགའ་དེ་བོད་ཁྱིན་སློབ་ཕྲུག་རུ་ཁག་གི་བསྟན་འཛིན་སྟོབས་རྒྱལ་ལགས། རྩེད་མོ་མཐུན་ཤོས་རྩེད་མཁན་གྱི་བྱ་དགའ་དེ་Hyderabad རྐང་སྤོལ་རུ་ཁག་བཅས་ལ་ཐོབ་ཡོད་པ་རེད། རྩ་བའི་ཁ་སང་མཐའ་མའི་རྩེད་འགྲན་དངོས་གཞི་དབུ་འཛུགས་མ་གནང་གོང་དུ་ གོ་པཱལ་པུར་བོད་ཁྱིམ་དང་དྷ་སྟེང་བོད་ཁྱིམ་གྱི་ལོ་ངོ་ ༡༤ མན་གྱི་བུ་མོའི་རྐང་རྩེད་སྤོ་ལོའོ་རུ་ཁག་དབར་མཛའ་མཐུན་གྱི་འགྲན་བསྡུར་གནང་གྲུབ་མཚམས་སུ་སྲིད་སྐྱོང་མཆོག་ནས་༸རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་འགྲན་བསྡུར་འདི་ཐོག་མར་དབུ་འཛུགས་གནང་ནས་འདི་ལོ་མི་ལོ་ ༢༥ འཁོར་བ་ནི་རླབས་ཆེན་གྱི་བྱས་རྗེས་ཤིག་ཡིན་པ་སོགས་འགྲེལ་བརྗོད་དང་སྦྲགས། ད་བར་རྩེད་རིགས་འདིའི་ཐོག་ཕྱག་ལས་གནང་མཁན་ཡོངས་ལ་བསྔགས་བརྗོད་གནང་བ་མ་ཟད། ལོ་རྗེས་མ་རྩེད་འགྲན་ཐེངས་ ༢༦ པ་ Clement Town དོན་གྲུབ་གླིང་གཞིས་སྒར་དུ་གནང་སྐབས་རུ་ཁག་གང་མང་ནས་མཉམ་ཞུགས་གནང་རོགས་ཞེས་འབོད་སྐུལ་གནང་ཡོད།

ཕྱི་ཟླ་ ༦ ཚེས་ ༧ ཉིན་ཨ་རི་ནང་གི་གྲོང་ཁྱེར་ Madison དུ་དབུས་བོད་མིའི་སྒྲིག་བདེ་སྲུང་བཀའ་བློན་ཟུར་པ་མདོ་སྔགས་བསྟན་འཛིན་མཆོག་སྙུང་གཞི་བཞེས་རྐྱེན་སྨན་བཅོས་དང་རིམ་གྲོ་སོགས་གནང་ཡང་དྲག་སྐྱེད་མེད་པར་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་བསྟུན། དེ་རིང་ཉིན་དགུང་ཚོུད་ ༡༢༌༠༠ ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱིས་གོ་སྒྲིག་འོག་བཀའ་ཤག་གི་ཚོགས་ཁང་གསར་པའི་ནང་གནས་ཆུང་སྒྲ་དབྱངས་གླིང་གི་དགེ་འདུན་པ་ཁག་ཅིག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུ་ལས་བྱེད་ཡོངས་ནས་བཀའ་ཟུར་དམ་པ་མཆོག་ལ་མྱ་ངན་གུས་བཏུད་ཞུ་ཕྱིར་ལྷན་འཛོམས་ཀྱིས་བསྔོ་སྨོན་གསུང་འདོན་གནང་བ་མ་ཟད། དེ་རིང་གི་ཉིན་མོར་དབུས་ལས་ཁུངས་ཁག་ནས་ལས་མཚམས་བཞག་ཡོད་པ་རེད། སྐབས་དེར་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་སྐུ་གཤེགས་དམ་པ་བཀའ་ཟུར་མདོ་སྔགས་བསྟན་འཛིན་མཆོག་དགོངས་པ་རྫོགས་པར་བོད་མིའི་སྒྲིག་འཛུགས་ཀྱི་ངོས་ནས་མྱ་ངན་གུས་བཏུད་དང་། བར་དོའི་དངངས་སྐྲག་གང་ཡང་མེད་པར་སངས་རྒྱས་ཀྱི་གོ་འཕང་མགྱོགས་མྱུར་ཐོབ་པའི་སྨོན་ལམ་ཡོད་ཅེས་གསུངས་པ་དང་སྦྲགས། དམ་པ་ཁོང་གི་ཤུལ་ལུས་སྐུ་འཁོར་ནང་མི་ཉེ་འབྲེལ་རྣམས་ལ་བོད་མིའི་སྒྲིག་འཛུགས་ཀྱི་ངོས་ནས་ཐུགས་གསོ་གནང་སོང་།གཞི་རྩའི་བོད་མིའི་སྒྲིག་འཛུགས་བདེ་སྲུང་བཀའ་ཟུར་མདོ་སྔགས་བསྟན་འཛིན་མཆོག་ནི་ཕྱི་ལོ་ ༡༩༤༠ ལོར་ལྷ་སར་སྐུ་འཁྲུངས་ཡོད་པ་དང་། ཕྱི་ལོ་ ༡༩༥༩ ལོར་རྒྱ་དམར་པོས་བཙན་གནོན་འོག་བོད་ལ་དུས་གྱུར་ཆེན་པོ་བྱུང་རྐྱེན་༸གོང་ས་མཆོག་གི་སྐུ་སྲུང་ཁོངས་སུ་རང་དམག་རུ་ཤོག་གཉིས་དང་བཅས་བཙན་བྱོལ་རྒྱ་གར་དུ་ཕེབས་ཡོད་པ་རེད། ཕྱི་ལོ་ ༡༩༦༢ ཟླ་ ༢ ཚེས་ ༢༧ ཉིན་ནས་གཞུང་ཞབས་སུ་ཞུགས་པ་དང་། ཐོག་མར་ཨོ་རི་ས་གནས་འགོ་འཛིན་གནང་། དེ་ནས་རིམ་བཞིན་དྲུང་ཆེ་དང་ཆེས་མཐོའི་ཁྲིམས་ཞིབ་པ་གཞན། དེ་བཞིན་བདེ་སྲུང་བཀའ་བློན་སོགས་ཀྱི་ཐུགས་འགན་བཞེས་མྱོང་ཡོད་པ་རེད།

ཁེ་ན་ཌའི་གྲོས་ཚོགས་གོང་མའི་ཕྱི་འབྲེལ་དང་རྒྱལ་སྤྱིའི་ཚོང་འབྲེལ་ལས་དོན་ཚོགས་ཆུང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གདན་ཞུས་ཀྱིས་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་ཞེས་པའི་བརྗོད་གཞིའི་ཐོག་བོད་དོན་ཉན་ཞིབ་ཀྱི་ལས་རིམ་ཞིག་ཚོགས་ཡོད་དང་། སྐབས་དེར་སྲིད་སྐྱོང་མཆོག་གིས་རྒྱ་གཞུང་ནས་བོད་མིས་རྩོད་པའི་དབུ་མའི་ལམ་གྱི་སྲིད་བྱུས་ལ་ཡིད་ཆེས་མ་འདང་བའི་རྐྱེན་གྱིས་བོད་རྒྱའི་གྲོས་མོལ་ལ་དོ་ཕོག་གཏོང་བཞིན་ཡོད་པ་གསུངས་འདུག ཁ་སང་ཕྱི་ཚེས་ ༦ ཉིན་ཁེ་ན་ཌ་གྲོས་ཚོགས་གོང་མའི་འཐུས་མི་དང་བོད་དོན་ལ་རྒྱབ་སྐྱོར་གནང་མཁན་སྐུ་ཞབས་ Thanh Hai Ngo  ལགས་དང་ཁེ་ན་ཌ་བོད་དོན་རྒྱབ་སྐྱོར་ཚོགས་པ་གཉིས་ཟུང་འབྲེལ་གྱིས་ཉན་ཞིབ་ལས་རིམ་དེ་གོ་སྒྲིག་གནང་བ་ཞིག་ཡིན་པ་དང་།  ཉན་ཞིབ་ལས་རིམ་ཐོག་སྲིད་སྐྱོང་མཆོག་དང་ཁེ་ན་ཌའི་རྒྱལ་སྤྱིའི་ཉེས་ཡངས་ཚོགས་པའི་སྤྱི་ཁྱབ་དྲུང་ཆེ་སྐུ་ཞབས་ Alex Neve ལགས།   དེ་བཞིན་ཁེ་ན་ཌའི་ཕྱི་འབྲེལ་དང་ཚོང་འབྲེལ་ལས་ཁང་གི་རྒྱ་ནག་ཚན་པའི་སྤྱི་ཁྱབ་ངེས་སྟོན་པ་སྐུ་ཞབས་ Shawn Steil ལགས་སོགས་ནས་མཉམ་ཞུགས་གནང་འདུག  སྲིད་སྐྱོང་མཆོག་གིས་འདི་ལོ་ཕྱི་ལོ་ ༡༩༥༩ ལོར་བོད་ནང་གསུམ་བཅུའི་སྒེར་ལངས་བྱུང་ནས་ལོ་ངོ་ ༦༠ དང་དེ་བཞིན་པེ་ཅིང་དུ་གནམ་སྡེ་སྒོར་མོ་ཆེའི་ཐང་ཆེན་དུ་རྒྱ་རིགས་སློབ་ཕྲུག་ཚོས་རྒྱ་གཞུང་ལ་ཞི་རྒོལ་གནང་ནས་ལོ་ངོ་ ༣༠ འཁོར་བ་དྲན་གསོ་དང་སྦྲགས། རྒྱ་གཞུང་གིས་དྲག་གནོན་དང་དམ་དྲག་ཆེས་ཤུགས་ཆེ་བྱེད་བཞིན་པའི་གནས་བབ་འོག་དེའི་མངའ་ཁོངས་སུ་ཡོད་པའི་མི་རིགས་ཀྱི་འགྲོ་བ་མིའི་ཐོབ་ཐང་ལ་དོ་ཕོག་འཚབ་ཆེན་གཏོང་བཞིན་པ་དང་། རང་དབང་ཁང་པའི་སྙན་ཐོ་ལས་བོད་དེ་འཛམ་གླིང་ནང་ཆེས་རང་དབང་མེད་པའི་རྒྱལ་ཁབ་ཨང་གཉིས་པར་ཐེར་འདོན་གནང་བར་འགྲེལ་བརྗོད་གནང་འདུག ཉེ་ལམ་ཁེ་ན་ཌའི་གྲོས་ཚོགས་གོང་མའི་འཐུས་མི་སྐུ་ཞབས་ Thanh Hai Ngo ལགས་ནས་ཁེ་ན་ཌའི་གྲོས་ཚོགས་གོང་མའི་ནང་ཁེ་ན་ཌའི་གཞུང་ནས་བོད་མིའི་དབུ་མའི་ལམ་གྱི་སྲིད་བྱུས་ལ་མངོན་གསལ་གྱིས་རྒྱབ་སྐྱོར་གནང་དགོས་པའི་གྲོས་ཆོད་ཆེད་བཏོན་དང་། ཁེ་ན་ཌ་ཆབ་སྲིད་མི་སྣ་བོད་ནང་འདྲ་མཉམ་དང་རང་དབང་ཐོག་ནས་འགྲུལ་སྐྱོད་ཆོག་པའི་ཁྲིམས་གཞི་གཏན་འབེབས་དགོས་པའི་འབོད་སྐུལ་ཞུས་པར་ཡི་རང་བསྔགས་བརྗོད་ཞུས་འདུག དེ་བཞིན་ལས་དོན་ཚོགས་ཆུང་གི་འཐུས་མི་ཚོའི་བཀའ་འདྲི་ཁག་ལ་ལན་འདེབས་གནང་བའི་ཁྲོད་སྲིད་སྐྱོང་མཆོག་གིས་བོད་མི་ནས་མིང་དོན་མཚུངས་པའི་རང་སྲིད་རང་སྐྱོང་གི་ཁེ་དབང་རྩོད་པ་དེ་ནི་རྒྱ་ནག་ནས་ཧོང་ཀོང་ལ་སྤྲོད་པའི་གནས་བབ་ལས་རྒྱ་ཁྱབ་ཆུང་བ་ཞིག་ཡིན་ཀྱང་། བོད་མིས་རྩོད་པའི་དབུ་མའི་ལམ་གྱི་སྲིད་བྱུས་ལ་ཡིད་ཆེས་མ་འདང་བའི་རྐྱེན་གྱིས་བོད་རྒྱའི་གྲོས་མོལ་ལ་དོ་ཕོག་གཏོང་བཞིན་ཡོད་པ་གསུངས་འདུག འདས་པའི་དུས་ཡུན་ནང་རྒྱ་གཞུང་གིས་བོད་བརྒྱུད་ནང་བསྟན་གྱི་དགོན་པ་བརྒྱ་ཆ་ ༩༠ ལྷག་དང་ནང་པའི་གསུང་རབ་དང་མཆོད་རྫས་གཏོར་བཤིག རྒྱ་ནག་གི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྲིད་བྱུས་འོག་བོད་མིར་དྲག་གནོན་ཚད་མེད་གཏོང་བཞིན་ཡོད་སྟབས། བོད་ཀྱི་གནད་དོན་དེ་རྒྱལ་སྤྱིའི་རྒྱལ་ཁབ་གཞན་ཁག་གི་མང་གཙོ་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་མིན་གྱི་ཚོད་ལྟ་གནང་ཡུལ་ཞིག་ཏུ་གྱུར་ཡོད་པ་གསུངས་འདུག་པ་མ་ཟད། རྒྱལ་སྤྱིའི་ཁྲོད་དམར་ཤོག་ཚོགས་པ་གསར་འཛུགས་བྱེད་མཁན་རྒྱ་རིགས་ནས་ཁོང་ས་གནས་གང་དུ་ཕེབས་ཀྱང་ངོ་རྒོལ་དང་བར་ཆད་གཏོང་རྒྱུའི་གནས་སྟངས་ཇེ་མང་དུ་སོང་སྐོར་དང་། ཁེ་ན་ཌ་ས་གནས་སུ་བོད་རིགས་ཚོགས་པ་རྫུན་བཟོ་དང་རྒྱའི་འཁྱོག་བཤད་དྲིལ་བསྒྲགས་བྱེད་བཞིན་ཡོད་པ་ངོ་སྤྲོད་དང་འབྲེལ། ཁེ་ན་ཌ་གཞུང་ནས་བོད་དོན་ལ་རྒྱབ་སྐྱོར་དང་བོད་དོན་གྱི་གནད་དོན་དེ་གལ་ཆེར་ངོས་འཛིན་གནང་བར་ཐུགས་རྗེ་ཆེ་ཞེས་གསུངས་འདུག སྐུ་ཞབས་ Alex Neve  ལགས་ཀྱིས་ཁེ་ན་ཌ་གཞུང་ནས་ཁེ་ན་ཌ་བོད་དོན་རྒྱབ་སྐྱོར་ཚོགས་པའི་སྙན་ཐོ་ཕུལ་བའི་ནང་ཁེ་ན་ཌ་དང་རྒྱ་ནག་གཉིས་དབར་གྱི་ཚོང་འབྲེལ་ཁྲོད་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། སྒོས་ཚོང་འབྲེལ་ཁྲོད་བོད་མིར་གྱོང་གུད་ག་ཚོད་རག་སྐོར་འཁོད་ཡོད་པས་དེའི་ཐད་བསྐྱར་ཞིབ་གནང་རྒྱུར་འབོད་སྐུལ་གནང་བ་དང་སྦྲགས་ཏེ། ཁེ་ན་ཌའི་སྲིད་དོན་པ་དང་གཞུང་འབྲེལ་མི་སྣ་སོགས་བོད་ནང་འདྲ་མཉམ་ཐོག་འགྲུལ་སྐྱོད་གནང་རྒྱུ་གཙོས་པའི་གནད་དོན་བཅུ་ལུང་འདྲེན་དང་། ཁེ་ན་ཌ་གནས་བཞུགས་བོད་མིར་རྒྱ་གཞུང་གི་མི་སྣ་ནས་སྡིགས་ར་དང་སུན་གཙེར་བཟོ་མུས་སོགས་ལ་ཞིབ་དཔྱད་གནང་དགོས་པའི་འབོད་སྐུལ་གནང་འདུགལས་དོན་ཚོགས་ཆུང་གི་ཚོགས་གཙོ་དང་གྲོས་ཚོགས་གོང་མའི་འཐུས་མི་ལྕམ་ Raynell Andreychuk ལགས་ཀྱིས་རྒྱ་ནག་གཞུང་གི་འགོ་ཁྲིད་ཁག་གི་བྱ་སྤྱོད་དེ་རང་ཉིད་རང་གི་འགན་ཁུར་ཐུབ་པ་བཟོ་ཐབས་གཅིག་ནི་ཁེ་ན་ཌས་ Magnitsky Act གྲོས་འཆར་འགོད་འབུལ་གནང་བ་བརྒྱུད་ནས་ཡོང་སྲིད་པ་གསུངས་འདུག ཁོང་གིས་སྲིད་སྐྱོང་མཆོག་གིས་ད་རེས་བོད་ཀྱི་ད་ལྟའི་འགྲོ་བ་མིའི་ཐོབ་ཐང་གི་གནས་སྟངས་ཀྱི་གནད་དོན་ཡོངས་ཁེ་ན་ཌ་གཞུང་དང་རྒྱ་ནག་དབར་གྲོས་མོལ་ཡོང་སྐབས་དགོས་ངེས་ཅན་གྱི་གནད་དོན་དང་། ལྷག་པར་དུ་སྲིད་སྐྱོང་མཆོག་ནས་ཞལ་གསང་པོ་དང་བང་རིམ་འགྲིག་པོའི་ཐོག་ནས་བོད་ཀྱི་གནད་དོན་འགྲེལ་བརྗོད་གནང་བར་བསྔགས་བརྗོད་གནང་འདུག    

དེ་རིང་བཞུགས་སྒར་དུ་རྟེན་གཞི་བྱས་པའི་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་བྱང་ཨ་རིའི་སྐུ་ཚབ་དོན་གཅོད་ཟུར་པ་ཚོགས་ཟུར་སྤེན་པ་ཚེ་རིང་ལགས་ཀྱིས་སྲིད་སྐྱོང་བློ་བཟང་སེང་གེ་བརྒྱུད་འཛིན་སྐྱོང་བཀའ་ཤག་གིས་ཁོང་ལ་མ་ཉེས་ཁག་གཡོག་གནང་བའི་ཁ་མཆུ་ཨང་ ༢༠ ཐོག་ཁྲིམས་བཤེར་དབུ་འཛུགས་གནང་སོང་། དེ་རིང་སྔ་དྲོ་ཚོུད་ ༡༠ ཐོག་དབུ་འཛུགས་གནང་བའི་ཁ་མཆུ་ཨང་ ༢༠ པའི་གཏུག་བཤེར་ཐོག་གྱོད་ཡ་ཞུ་སྦྱོར་བ་སྤེན་པ་ཚེ་རིང་ལགས་ཀྱི་ཁྲིམས་རྩོད་སླད་ཆེས་མཐོའི་ཁྲིམས་ཞིབ་ཁང་གི་ས་གནས་ཁྲིམས་ཞིབ་པ་ཟུར་པ་རྣམ་རྒྱལ་ཚེ་སྐྱིད་ལགས་དང། དེ་བཞིན་གྱོད་ཡ་རྩོད་ལེན་པ་འཛིན་སྐྱོང་བཀའ་ཤག་གི་ཁྲིམས་རྩོད་སླད་བོད་མིའི་ཁྲིམས་ལུགས་རིག་པ་བའི་ཚོགས་པའི་འགན་འཛིན་བོད་མིང་མང་སྤྱི་འཐུས་བློ་བཟང་གྲགས་པ་ལགས་བཅས་ཕེབས་ཡོད་པ་དང་། ཁ་མཆུ་ཨང་ ༢༠ པའི་ཉིན་དང་པོའི་གཏུག་བཤེར་ཐོག་ཆེས་མཐོའི་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གཙོ་གྱུར་ཁྲིམས་ཞིབ་པ་རྣམ་པ་དང་ཁྲིམས་དྲུང་གཙོས་པའི་ཁྲིམས་ཞིབ་ཁང་གི་ལས་བྱེད་རྣམས། དེ་བཞིན་ཟུར་ཉན་དང་གསར་འགོད་པ་བཅས་ཚང་འཛོམས་ཀྱིས་གྱོད་གཞི་གསལ་བཟོའི་ལས་རིམ་ཐོག་ཕེབས་ཡོད་པ་རེད།སྐབས་དེར་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་བྱང་ཨ་རིའི་སྐུ་ཚབ་དོན་གཅོད་ཟུར་པ་སྤེན་པ་ཚེ་རིང་ལགས་ཀྱིས་བཀའ་ཤག་གིས་ཁོང་བྱང་ཨ་རིའི་སྐུ་ཚབ་དོན་གཅོད་ཀྱི་ལས་གནས་ནས་འཕོ་འགྱུར་གནང་སྐབས་ཁོང་ལ་མ་ཉེས་ཁག་གཡོག་གནང་ཡོད་ཚུལ་དང་འབྲེལ། ཕྱི་ལོ་ ༢༠༡༨ ཕྱི་ཟླ་ ༥ ཚེས་ ༡༨ ཉིན་དེའི་ཐོག་ཁྲིམས་གཏུག་གནང་བ་ནས་བཟུང་ད་བར་གྱི་བརྒྱུད་རིམ་ཁྲོད། བཙན་བྱོལ་བོད་མིའི་ཁྲིམས་ཞིབ་ཁང་གིས་སྤྱི་དམངས་གཏུག་བཤེར་འགྲོ་ལུགས་ཀྱི་འོག་ནས་ཐོག་མའི་བརྡ་ཐོ་གནང་བ་དང་། འཛིན་སྐྱོང་བཀའ་ཤག་གི་ངོས་ནས་དེ་རྗེས་ཆེས་མཐོའི་ཁྲིམས་ཞིབ་ཁང་ལ་ཕུལ་བའི་ཞུ་ལན་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རང་ཆེས་སུ་ཡོད་པའི་༸སྐུ་དབང་སྐོར་བཀོད་དེ་ཁ་མཆུ་དེ་ངོས་བཞེས་གནང་རྒྱུ་མེད་པའི་འབོད་སྐུལ་ཐེངས་ཁ་ཤས་གནང་བ་སོགས་ཀྱི་བརྒྱུད་རིམ་ཆ་ཚང་ངོ་སྤྲོད་གནང་སྟེ་ཐག་གཅོད་གཙོ་བོ་གཉིས་གནང་སོང་། དེའང་སྐུ་ཚབ་དོན་གཅོད་འཕོ་འགྱུར་གྱི་ལས་དོན་ཐད་༸སྐུ་དབང་ཡོངས་རྫོགས་འཛིན་སྐྱོང་བཀའ་ཤག་ལ་ཡོད་པ་བཞིན་གྱོད་ཡ་ཞུ་སྦྱོར་བ་དང་རྩོད་ལེན་པ་གཉིས་ཀ་ནས་དེར་རྩོད་མེད་ཐོག ད་ལན་གྱི་གྱོད་གཞི་དེ་བྱང་ཨ་རིའི་སྐུ་ཚབ་དོན་གཅོད་འཕོ་འགྱུར་ཐོག་མ་ཡིན་པར་གཙོ་བོ་མ་ཉེས་ཁག་གཡོག་རང་གི་གནད་དོན་ཞིག་ཡིན་པ་དང། ༸གོང་ས་མཆོག་གི་༸སྐུ་དབང་དང་ད་ལྟའི་མ་ཉེས་ཁག་གཡོག་གི་གྱོད་གཞི་གཉིས་པོ་དབར་འབྲེལ་བ་གང་ཡང་མེད་སྟབས་ཁ་མཆུ་འདིའི་ཁྲོད་༸གོང་ས་མཆོག་གི་མཚན་འབོད་གནང་སྟེ་ཞུ་འབྱོར་དང་ཞུ་ལན་ཕུལ་བ་ཐམས་ཅད་ངོས་ཞེས་གནང་རྒྱུ་མིན་པའི་གསལ་བསྒྲགས་བསྐྱངས་སོང་།ཁྲིམས་དཔོན་མཆོག་ནས་དེ་རྗེས་གྱོད་གཞི་གསལ་བཟོའི་ལས་རིམ་ཐོག་ཕེབས་ཏེ་ཞུ་སྦྱོར་བ་དང་རྩོད་ལན་པ་གཉིས་ཀའི་ཞུ་ཡིག་དང་ཞུ་ལེན་ཕུལ་བའི་གནད་དོན་རེ་རེ་སྒྲོག་སྦྱང་གིས་གནད་དོན་གསལ་བཟོ་དགོས་རིགས་ལ་རྩོད་ལེན་པས་གསལ་བཤད་ལན་འདེབས་བཅས་གནང་བ་དེ་ལྟར་ཡང་། ཉིན་རྒྱབ་ཀྱི་ལས་རིམ་ཐོག་རྩོད་ལན་པའི་ཁྲིམས་རྩོད་པ་བློ་བཟང་གྲགས་པ་ལགས་ནས་ཆེས་མཐོའི་ཁྲིམས་ཞིབ་ཁང་གི་ངོས་ནས་གྱོད་གཞིའི་གནད་དོན་ཁག་གི་ནང་གསེས་དོན་ཚན་ཁག་གཅིག་གི་ཐོག་གསལ་བཤད་ལན་འདེབས་དགོས་སྐོར་གསུངས་པ་རྣམས་ལ་ལེན་འདེབས་ཁ་གསལ་འགོད་འབུལ་ཞུ་རྒྱུ་དང་དྲང་ལྡན་གྱི་ཁྲིམས་བཤེར་ཡོང་ཆེད་ལོ་འདིའི་ཕྱི་ཟླ་ ༩ ཚེས་ ༥ སྟེ་ཟླ་བ་གསུམ་གྱི་དུས་ཚོད་འཕར་མ་གནང་དགོས་པའི་འབོད་སྐུལ་ཞུས་སོང་།སྐབས་དེར་ཞུ་སྦྱོར་བ་སྤེན་པ་ཚེ་རིང་ལགས་ཀྱིས་ཁོང་ནས་ཕྱི་ལོ་ ༢༠༡༨ ཟླ་ ༥ ཚེས་ ༡༨ ཉིན་ཁྲིམས་གཏུག་ཞུས་པ་ནས་བཟུང་རྩོད་ལན་པ་འཛིན་སྐྱོང་བཀའ་ཤག་གི་ངོས་ནས་དུས་ཚོད་འཕར་འགྱངས་ཐེངས་གཉིས་ཀྱི་འབོད་སྐུལ་གནང་བ་བཞིན་ཁྲིམས་ཞིབ་ཁང་ནས་བཀའ་འཁྲོལ་གནང་སྟེ་དེ་རིང་ཐོག་མའི་ཁྲིམས་བཤེར་དབུ་འཛུགས་གནང་བའི་བར་ལན་འདེབས་ཡིག་ཆ་འགོད་འབུལ་ཞུ་རྒྱུའི་སླད་ལོ་གཅིག་ཙམ་གྱི་དུས་ཚོད་ཐོབ་ཟིན་ཡོད་པ་དང་། བཀའ་ཤག་གིས་དེ་སྔ་ཞུ་སྦྱོར་བ་ཁོང་ལ་དོན་ཚན་བཅུའི་ཐོག་ནས་སྐྱོན་འཛུགས་གསལ་བསྒྲགས་སྤེལ་སྐབས་ནས་གནད་དོན་དེ་དག་ཐོག་ཞིབ་འཇུག་མཐིལ་ཕྱིན་པ་གནང་བ་ཞིག་ལ་ངོས་འཛིན་གནང་གི་ཡོད་པ་ལྟར་དུས་ཚོད་འཕར་མ་མི་དགོས་པར་གཟིགས་ཀྱི་ཡོད་པ་དང་། ལྷག་པར་དུ་ཁོང་གི་ཕྱི་གླིང་གི་བཤད་སྲོལ་ལྟར་ Justice Delayed is Justice Denied ཞེས་པ་ལུང་འདྲེན་དང་སྦྲགས། སྤྱི་ཚོགས་ཁྲོད་ལབ་གླེང་ཧ་ཅང་ཆེ་བའི་གནད་དོན་འདི་ལྟ་བུའི་ཐོག་ཐག་གཅོད་གང་མགྱོགས་གནང་དགོས་གལ་ཡིན་པ་དང། ལྷག་པར་དུ་སྔ་ལོའི་ཕྱི་ཟླ་ ༡༢ ཚེས་ ༧ ཉིན་ཆེས་མཐོའི་ཁྲིམས་ཞིབ་ཁང་གིས་བཀོད་ཁྱབ་བཏང་བའི་ནང་སྤྱི་མང་གཏུག་བཤེར་ཁྲིམས་སྒྲིག་གི་དོན་ཚན་ ༢༩ ནང་གསེས་ང་པ་དང་ཅ་པ་གཉིས་ཀྱི་འབྲུ་དོན་བཞིན་གནད་དོན་རེ་རེ་དང་ནང་གསེས་དོན་ཚན་རེ་རེ་ལ་ལན་འདེབས་ཐད་ཀར་དགོས་པའི་བཀོད་སྒྲིག་གནང་ཟིན་ཡོད་པ་སོགས་རྒྱུ་ཚན་མང་དག་ཅིག་གི་ཐོག་ནས་ད་ལྟ་ལན་འདེབས་གནང་རྒྱུའི་དུས་ཚོད་འཕར་འགྱངས་མི་དགོས་ལྟར་ཆེས་མཐོའི་ཁྲིམས་ཞིབ་ཁང་ནས་དང་ལེན་གནང་རྒྱུ་མེད་པའི་ཞུ་སྐུལ་གནང་སོང་།སྐབས་དེར་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་རྩོད་ལན་པའི་སྙན་ཞུ་ཕུལ་བ་ལྟར་དུས་ཚོད་འཕར་མ་གནང་དགོས་མིན་ཐད་ཁྲིམས་པའི་ལྷན་ཚོགས་ཚོགས་ནས་ཐག་གཅོད་གནང་རྒྱུ་ཡིན་སྐོར་གསུངས་པ་དང་འབྲེལ། དེ་རིང་གསལ་བཟོའི་ལས་རིམ་མུ་མཐུད་རྒྱུན་སྐྱོང་གནང་སོང་བ་དང་། དེ་རྗེས་བཙན་འབྱོལ་བོད་མིའི་བཅའ་ཁྲིམས་ཀྱི་སྤྱི་དམངས་གཏུག་བཤེར་ཁྲིམས་སྒྲིག་གི་དོན་ཚན་ ༤༣ གཞིར་བཟུང་དུས་ཚོད་གཞན་ཞིག་གི་ཐོག་གནད་དོན་གཏན་འབེབས་ཀྱི་བྱ་རིམ་དང་། ཞིབ་སྤྱོད་ཀྱི་བྱ་རིམ། མཐའ་མ་དེར་དཔྱད་ཁྲ་གསལ་བསྒྲགས་གནང་རྒྱུའི་བྱ་རིམ་རིམ་བཞིན་འགྲོ་རྒྱུ་ཡིན་པ་ལྟར་རིམ་བཞིན་བརྡ་ཐོའི་བརྒྱུད་ནས་ཁ་གསལ་ཡོང་རྒྱུ་ཡིན་པ་གསུངས་ཡོད།སྤྱིར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཉེ་ལམ་ཨ་རི་ཁུལ་དུ་གཞུང་འབྲེལ་ཕྱོགས་སྐྱོད་ཕེབས་པ་བཞིན་དེ་རིང་ཁ་མཆུ་ཨང་ ༢༠ པའི་ཁྲིམས་བཤེར་ཐོག་དངོས་སུ་ཕེབས་ཐུབ་མི་འདུག དེ་རིང་གི་ཁྲིམས་བཤེར་ལས་རིམ་གྲུབ་རྗེས་གསར་འགོད་པས་སྐུ་ཞབས་སྤེན་པ་ཚེ་རིང་ལགས་དང་ཁོང་གི་ཁྲིམས་རྩོད་པ་བཅས་ལ་བཀའ་འདྲི་ཞུས་པར་ལན་འདེབས་གང་ཡང་གནང་མེད་པ་དང་། འཛིན་སྐྱོང་བཀའ་ཤག་གི་ཁྲིམས་རྩོད་པ་བློ་བཟང་གྲགས་པ་ལགས་སུ་བཀའ་འདྲི་ཞུས་ཡོད།གཞི་རྩའི་དབུས་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག་ནས་ཕྱི་ལོ་ ༢༠༡༧ ཟླ་ ༡༡ ཚེས་ ༧ ཉིན་སྐབས་དེའི་བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་ལགས་ལས་གནས་ནས་འཕོ་འགྱུར་དང་འབྲེལ་ཁོང་གི་ཚབ་ཏུ་སྐབས་དེའི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་བསྐོ་གཞག་གནང་བ་མ་ཟད། སྤེན་པ་ཚེ་རིང་ལགས་ཀྱིས་ཕྱག་ལས་གནང་ཕྱོགས་དེ་བྱ་སྤུ་གནོན་གྱི་སྒྲིག་འཛུགས་བཞིན་ཚུལ་མཐུན་ཡོང་གི་མེད་པ་དང་འཐུས་ཤོར་འགྲོ་ཉེན་ཡོད་པ་བཅས་མཚོན་རྟགས་མང་པོ་བསྟན་ཡོད་པ་བཅས་ཀྱི་གསལ་བཤད་གནང་ཡོད་པ་རེད། འོན་ཀྱང་མང་ཚོགས་ཁྲོད་འཛིན་སྐྱོང་བཀའ་ཤག་གི་ངོས་ནས་གནད་དོན་དེའི་ཐོག་གསལ་བཤད་ཞིབ་ཕྲ་དགོས་པ་སོགས་ཀྱི་ལབ་གླེང་མང་དག་ཅིག་བྱུང་བ་དང་འབྲེལ། བཀའ་ཤག་གི་ངོས་ནས་མི་རིང་བར་དོན་ཚན་བཅུ་ཅན་གྱི་གསལ་བཤད་ཅིག་འདོན་སྤེལ་གནང་སྟེ་ཨ་རིའི་དོན་གཅོད་སྤེན་པ་ཚེ་རིང་ལགས་ཀྱིས་བཀའ་ཤག་གི་ཐུགས་རེ་བཞིན་ལས་དོན་གནང་མ་ཐུབ་པ་དང་། ཡིད་ཆེས་བློས་འགེལ་མི་ཐུབ་པ། དེ་བཞིན་འཛིན་སྐྱོང་ལ་བྱ་སྤུ་གནོན་གྱི་གོ་རིམ་ལ་ལྟོས་མེད་གནང་ཡོད་པ་བཅས་ཀྱི་རྒྱུ་མཚན་ལ་བརྟེན་ནས་ཐག་གཅོད་དེ་ལྟར་གནང་དགོས་བྱུང་ཡོད་པ་སོགས་རྒྱུ་མཚན་གཙོ་བོ་གསུམ་གྱི་ཐོག་ནས་གསལ་བཤད་གནང་ཡོད་པ་རེད། སྐུ་ཞབས་སྤེན་པ་ཚེ་རིང་ལགས་ཀྱིས་དོན་གཅོད་འཕོ་འགྱུར་ཐོག་འཛིན་སྐྱོང་གྱི་ཐག་གཅོད་ལ་ཁོང་ནས་ངོས་ལེན་ཞུས་ཡོད་པ་དེ་ལྟར་ཡང། ཁོང་གི་ལས་དོན་ལ་འཐུས་ཤོར་ཕྱིན་པ་སོགས་ཀྱི་གནད་དོན་ཁག་ལ་ངོས་ལེན་ཞུ་ཡི་མེད་པ་དང་། སྲིད་སྐྱོང་མཆོག་གིས་གྲོས་ཚོགས་དང་མང་ཚོགས་ཁྲོད་ཐག་གཅོད་དེ་ནི་ཁྲིམས་བཟོ་ལྷན་ཚོགས་ནས་བཀའ་ཤག་ལ་བསྐུར་བའི་སྐུ་དབང་གཞིར་བཞག་ཐག་གཅོད་གནང་བ་ཞིག་ཡིན་པ་དང། ཐག་གཅོད་དེ་ཁྲིམས་དང་མཐུན་པ་ཞིག་བྱུང་ཡོད་མེད་ཐག་གཅོད་གནང་བར་ཆེས་མཐོའི་ཁྲིམས་ཞིབ་ཁང་ལ་ཕེབས་རྒྱུ་མ་གཏོགས་ཐབས་ལམ་གཞན་མེད་པར་འགྲེལ་བརྗོད་གནང་ཡོད་པ་བཞིན། ཁོང་གིས་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ལ་ཁྲིམས་གཏུག་ཞུས་ཡོད་སྐོར་གསུངས་ཡོད་པ་རེད།

དེ་རིང་དབུས་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་དང་གཡུང་དྲུང་བོན་གྱི་གདན་ས་དཔལ་གཤེན་བསྟན་སྨན་རིའི་གླིང་གཉིས་ཀྱིས་གོ་སྒྲིག་ཞུས་དོན་ལྟར་དཔལ་གཤེན་བསྟན་སྨན་རིའི་གླིང་དུ་ཉིན་བཞིའི་རིང་གི་རིས་མེད་བགྲོ་གླེང་ཐེངས་བཞི་པ་དབུ་འབྱེད་གནང་སྟེ་མངོན་པ་མཛོད་ཀྱི་ཚིག་ལེའུར་བྱས་པ་དང་བོན་གཞུང་སྲིད་པའི་མཛོད་ཕུགས་ཞེས་པའི་བརྗོད་གཞིའི་ཐོག་བགྲོ་གླེང་གནང་སོང་།བགྲོ་གླེང་གི་ཚོགས་མགོན་དུ་དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་གི་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག་རྣམ་གཉིས་ཀྱིས་གཙོས་པའི་ས་དགེ་བཀའ་རྙིང་གི་འཐུས་ཚབ་མི་སྣ་དང་། གཡུང་དྲུང་བོན་དང་རྒྱལ་བ་ཇོ་ནང་པ་ཅབས་ཀྱི་སྐུ་ཚབ་རྣམས། དེ་བཞིན་སྨན་རིའི་གླིང་གི་དགེ་འདུན་པ་བཅས་ཀྱིས་བགྲོ་གླེང་ནང་ཤ་ཆས་བླངས་ཡོད་པ་རེད།དཔལ་གཤེན་བསྟན་སྨན་རིའི་གླིང་གི་ཟུང་དྲུང་བསོན་ནམས་རྒྱ་མཚོ་ལགས་ཀྱིས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་གནང་བ་དང་འབྲེལ། དཔལ་གཤེན་བསྟན་སྨན་རིའི་གླིང་གི་ལོ་རྒྱུས་སྙིང་བསྡུས་ངོ་སྤྲོད་གནང་སྟེ། བོད་ཀྱི་སྲིད་པ་ས་ཆགས་པ་ནས་བཟུང་གཡུང་དྲུང་བོན་གྱི་བསྟན་པ་དེ་བོད་དུ་ཡོད་ནའང་། རྒྱལ་བོའི་དབང་ཐང་ཆེ་ཆུང་གིས་ལོ་རྒྱུས་ཀྱི་དཀྱོགས་མཚམས་མང་པོ་བརྒྱུད་ཡོང་བ་ལྟར། དུས་རབས་ ༡༤ ནས་བཟུང་བོད་ཆོལ་ཁ་གསུམ་ གཅིག་གྱུར་གྱིས་ཁས་ལེན་པའི་བོན་གྱི་གདན་ས་སྨན་རིའི་གླིང་དབུ་བརྙེས་ནས་སྨན་རིའི་ཁྲི་འཛིན་སོ་གསུམ་གྱི་ ལོ་རྒྱུས་ཡོད་པ་བཞིན། དགེ་བའི་བཤེས་གཉེན་མང་པོས་བོད་ཕྱི་ནང་གཉིས་སུ་བསྟན་སྲིད་ཀྱི་ལས་དོན་ལ་མཛད་རྗེས་རླབས་ཆེན་བཞག་ཡོད་ཅེས་གསུངས་ཡོད།  དཔལ་གཤེན་བསྟན་སྨན་རིའི་གླིང་གི་དཔོན་སློབ་འཕྲིན་ལས་ཉི་མ་རིན་པོ་ཆེ་མཆོག་གིས་སྤྱི་ཡོངས་ཀྱི་ཆ་ནས་བོད་གཞིས་བྱེས་གཉིས་སུ་གྱེས་ཏེ་དཀའ་ངལ་མང་དུ་འཕྲད་བཞིན་ཡོད་ཀྱང་། ཕྱོགས་གཞན་ཞིག་ནས་རྐྱེན་ངན་གྲོགས་ཤར་ཞེས་པའི་དཔེ་ལྟར་སྤྱི་ནོར་༸གོང་ས་༸སྐྱབས་མགོན་རིན་པོ་ཆེ་མཆོག་གི་བཀའ་དྲིན་ཉག་གཅིག་ལ་བརྟེན་ནས་ སྔར་ལོ་རྒྱུས་ཀྱི་ཁྲོད་དུ་བྱུང་མ་མྱོང་བའི་ཆོས་བརྒྱུད་རིས་མེད་ཀྱི་བླ་སྤྲལ་དགེ་བའི་བཤེས་གཉེན་ཚང་མ་དུས་གཅིག་ལ་ཡུལ་གཅིག་ཏུ་འཛོམས་ནས་བགྲོ་གླེང་ལྷུག་པོ་གནང་སྟེ་ཕན་ཚུལ་དབར་ལྟ་བ་བརྗེ་ལེན་བྱེད་བཞིན་པའི་གནས་བབ་འདི་ནི་དགའ་འོས་པའི་དོན་བཟང་ཞིག་རེད་ཅེས་གསུངས་པ་དང་སྦྲགས། རང་ཉིད་ཀྱི་ཆོས་བརྒྱུད་ནས་གསུངས་པར་གཞིགས་ཏེ་ཉམས་ལེན་གནང་རྒྱུ་དང་དག་སྣང་དེ་ཕྱོགས་རིས་མེད་པའི་ཐོག་ནས་གནང་དགོས་གལ་ཡིན་པར་གསུངས་ཡོད།ཆོས་རིག་བཀའ་བློན་མཆོག་གིས་རིས་མེད་ཆོས་བརྒྱུད་ཀྱི་བགྲོ་གླེང་ཇི་ལྟར་འགོ་ཚུགས་པའི་སྐོར་ནས་ངོ་སྤྲོད་གནང་བ་དང་འབྲེལ། ༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་ཉེར་གཅིག་པའི་ནང་པ་ཞིག་བྱེད་དགོས་པར་བཀའ་སློབ་ཡང་ཡང་ཕེབས་པ་བཞིན་ཆོས་ཚོགས་ཁག་ནས་ཀྱང་བཤད་སྒྲུབ་གོང་འཕེལ་གཏོང་ཕྱོགས་ཀྱི་ཚོགས་འདུ་རིམ་པ་ཚོགས་པའི་གྲུབ་དོན་དུ་ཆོས་བརྒྱུད་རིས་མེད་ཀྱི་བགྲོ་གླེང་དེ་གལ་ཆེ་དོན་ཆེེར་བརྩིས་ཏེ་མཇུག་སྐྱོང་གནང་གི་ཡོད་སྟབས། རང་ལུགས་ཁོ་ན་སྲུང་རྒྱུ་ཙམ་མིན་པར་ཆོས་བརྒྱུད་གཞན་གྱི་གཞུང་ཆེན་ལ་སློབ་གཉེར་གནང་གནང་དགོས་གལ་ཆེན་ཡིན་པར་ལམ་སྟོན་གནང་སོང་།རྩ་བའི་རྒྱ་གར་བྱང་ཕྱོགས་ཧི་མཱ་ཅལ་གྱི་མངའ་ཁུལ་ཌོ་ལན་ཇི་རུ་ཕྱི་ལོ ༡༩༧༠ ལོར་དཔལ་གཤེན་བསྟན་སྨན་རིའི་གླིང་གི་གདན་ས་གསར་སྐྲུན་མཛད་ཅིང་། ཕྱི་ལོ་ ༡༩༧༧ ལོ་ནས་བཟུང་ཆོལ་གསུམ་བོད་མིའི་བོན་ཕྱོགས་ཀྱི་སློབ་ཚོགས་གསར་བསྡུ་བྱས་ཏེ་གནའ་བོའི་བོད་ཀྱི་ཆོས་ལུགས་ལ་གསན་བསམ་སློབ་གཉེར་གནང་ས་དང་མདོ་སྔགས་སེམས་གསུམ་གཙོས་པའི་ལྔ་ཟུང་རིག་པའི་གནས་ལ་སློབ་གཉེར་གནང་སའི་གདན་ས་གཙོ་བོ་ཞིག་ཆགས་ཡོད་པ་རེད།

ཨ་རི་གྲོང་ཁྱེར་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པས་ཕུན་ཚོགས་སྡེ་བཞི་སྤྱི་ཁང་ཉམས་གསོ་གནང་ནས་ཁ་སང་སྤྱི་ཁང་དང་སྤྱི་ཁང་གི་མདུན་དུ་ Tibet Way འམ་བོད་ཀྱི་རྒྱ་ལམ་ཞེས་པ་ཞིག་དབུ་འབྱེད་གནང་འདུག སྤྱི་ཁང་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་༸དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག དེ་བཞིན་ས་གནས་རྫོང་ཁག་ ༢༦ གི་འཐུས་ཚབ་སྐུ་ཞབས་ Jimmy Van Bramer ལགས། སྐྱབས་གནས་དགེ་འདུན་གྱི་སྡེ།  སྦྱིན་བདག་རྣམ་པ། བྱང་ཨ་རིའི་སྐུ་ཚབ་དོན་གཅོད་དངོས་སྒྲུབ་ཚེ་རིང་ལགས། བྱང་ཨ་རིའི་སྤྱི་འཐུས་རྣམ་གཉིས།  དེ་བཞིན་སྐྱིད་སྡུག་ཁག་གི་སྐུ་ཚབ་དང་མི་མང་སོགས་མཉམ་འཛོམས་གནང་འདུགསྐབས་དེར་༸དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་གིས་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་སྤྱི་ཁང་ཉམས་གསོ་ལེགས་གྲུབ་བྱུང་ནས་སྤྱི་ཁང་དེ་བེད་མེད་དུ་མི་འགྲོ་བར་སྤྱོད་ ་དགོས་པར་བཀའ་བསྩལ་དང་། ལྷག་པར་དུ་རིན་པོ་ཆེ་མཆོག་གིས་བོད་མིའི་ངོ་བོ་ཆོས་དང་རིག་གཞུང་དེ་དེང་གི་དུས་སུ་འཛམ་བུ་གླིང་སྤྱི་ཡོངས་ལ་དགོས་ངེས་ཅན་ཞིག་དང་རྒྱུ་མཚན་དེར་བརྟེན་ནུབ་ཕྱོགས་སུ་བཞུགས་པའི་བོད་མི་ནས་རང་གི་ཆོས་དང་རིག་གཞུང་མི་ཉམས་གོང་འཕེལ་དུ་གནང་དགོས་གལ་དང་།  ཆོས་དང་རིག་གཞུང་གི་རྩ་བ་དེ་སྐད་ཡིག་ཡིན་སྟབས་བོད་ཕྲུག་ཚོས་དེའི་ཐད་དོ་སྣང་ཆེ་བ་བྱེད་དགོས་པ་མ་ཟད། མཐར་བོད་མི་སྤྱི་ཡོངས་ནས་མཐུན་སྒྲིལ་དང་༸གོང་ས་མཆོག་གི་བཀའ་དགོངས་ཉག་ཅིག་བསྒྲུབ་པར་འབད་དགོས་གནད་ཡིན་པར་བཀའ་ནན་བསྩལ་འདུག སྲིད་སྐྱོང་མཆོག་གིས་རྒྱུན་ལས་རིམ་བྱོན་ནས་སྐུ་ངལ་འཛེམས་ཀྱིས་ཕྱག་ལས་གནང་ཐོག་སྤྱི་ཁང་ཉོས་རྒྱུ་དང་ཉམས་གསོ་གནང་བར་བསྔགས་བརྗོད་དང་སྦྲགས། དེ་བཞིན་མང་ཚོགས་ལ་ཉེ་ལམ་བོད་མིའི་སྒྲིག་འཛུགས་ནས་༸གོང་ས་མཆོག་ལ་ཡིག་ངག་གཉིས་ཐོག་ནས་༸སྐུ་ཉིད་ཀྱི་མཛད་འཕྲིན་ཉུང་འཕྲི་གནང་རྒྱུར་སྙན་གསེང་ཞུས་པ་བཞིན་དེ་འབྲེལ་བཀའ་བཞེས་བཟང་པོ་ཐོབ་སྐོར་དང་སྦྲགས། ད་ལྟ་ཚུན་ཆད་མགོན་པོ་༸གང་ཉིད་མཆོག་ནས་བོད་དོན་སླད་མཛད་འཕྲིན་བླ་མེད་བསྐྱངས་སྟབས། ད་ལྟའི་ཆར་དགུང་ནའི་བབ་ཀྱི་ཆ་ནས་༸གང་ཉིད་མཆོག་སྐུ་ངལ་གསོ་བཞུགས་མཛད་དགོས་གལ་དང་སྒོས་བོད་མིིའི་ངོས་ནས་ནང་ཁུལ་གྱི་གནད་དོན་ཙག་ཙིག་ལ་དབུ་འཁོར་ནས་མ་བཞུགས་པར་བོད་ཀྱི་རྩ་དོན་རྒྱལ་སྤྱིའི་སྡིངས་ཆའི་ཁྲོད་བོད་དོན་དྲིལ་བསྒྲགས་དང་རྒྱབ་སྐྱོར་མུ་མཐུད་ནས་ཐོབ་པར་ལས་དོན་གཉེར་གནང་དགོས་པ་དང་། བོད་མི་སྤྱི་བོ་གནམ་བསྟན་ཡོངས་ཆིག་སྒྲིལ་དང་ལྷག་པར་དུ་༸གོང་ས་མཆོག་གི་ཐུགས་གཞི་རིགས་ནམ་ཡང་གནང་བར་འབད་གནད་ཡིན་པར་གསུངས་འདུག གཞི་རྩའི་སྤྱི་ཁང་དབུ་འབྱེད་མ་གནང་གོང་ནིའུ་ཡོག་གི་ 32 Avenue དུ་ཡོད་པའི་རྒྱ་ལམ་ཞིག་ལ་ Tibet Way ཞེས་བོད་ཀྱི་རྒྱ་ལམ་ཞེས་མིང་བཏགས་ཡོད་པར་༸དཔལ་ས་སྐྱ་གོང་མ་ཁྲི་ཆེན་རིན་པོ་ཆེ་མཆོག་དང་སྲིད་སྐྱོང་མཆོག དེ་བཞིན་སྐུ་ཞབས་ Jimmy Van Bramer ལགས་བཅས་ནས་དབུ་འབྱེད་གནང་ཡོད་པ་རེད། དེ་བཞིན་སྐུ་ཞབས་ Jimmy Van Bramer ལགས་ཀྱིས་ནིའུ་ཡོག་དང་ནིའུ་འཇར་སིར་གནས་བཞུགས་བོད་མི་རྣམས་ཀྱི་སླད་སྤྱི་ཁང་ལེགས་གྲུབ་བྱུང་ཐུབ་པ་དང་།  དེ་བཞིན་རྒྱ་ལམ་ལ་ Tibet Way ཞེས་མིང་བཏགས་ཐུབ་པ་དེར་རང་ཉིད་གྲོང་ཁྱེར་ལྷན་ཚོགས་ཀྱི་ཚོགས་མི་ཡིན་པའི་ཆ་ནས་དགའ་ཚོར་བྱུང་བ་དང་། རང་ཉིད་ནི་བོད་དང་རྫོང་དེའི་ཁུལ་དུ་ཡོད་པའི་བོད་མིའི་སྤྱི་ཚོགས་ཀྱི་སྐུ་ཚབ་གནང་རྒྱུར་དུས་རྟག་ཏུ་དགའ་མཁན་ཞིག་ཡིན་ཞེས་གསུངས་ཡོད། ཕུན་ཚོགས་སྡེ་བཞིའི་སྤྱི་ཁང་ནང་སློབ་ཕྲུག་སླད་བོད་ཀྱི་སྐད་ཡིག་དང་རིག་གཞུང་སོགས་ཀྱི་འཛིན་ཁང་དང་།   ཐབ་ཚང་། དེ་བཞིན་ཚོགས་ཁང་ཡོད་པའི་སྤྱི་ཁང་དེར་ཁྱོན་ཨ་སྒོར་ས་ཡ་ ༡༠ ལྷག་འགྲོ་གྲོན་བཏང་ཡོད་པ་རེད།

རྒྱ་གར་གྱི་གྲོས་ཚོགས་འོག་མའི་རྒྱལ་ཡོངས་ཀྱི་འོས་བསྡུ་ཡོངས་སུ་གྲུབ་ནས་སྲིད་བློན་མོ་དི་མཆོག་གི་ཆབ་སྲིད་ཚོགས་པར་སླར་ཡང་རྒྱལ་ཁ་ཐོབ་པར་བརྟེན། དེ་རིང་ཕྱི་དྲོ་ཚོུད་ ༧ ཐོག་རྒྱ་གར་གྱི་སྲིད་འཛིན་ Ram Nath Kovind མཆོག་གི་ཕོ་བྲང་དུ་སྲིད་བློན་མོ་དི་མཆོག་གིས་སྐབས་གཉིས་པའི་སྲིད་བློན་གྱི་དམ་འབུལ་མཛད་སྒོ་འཚོགས་ཀྱི་ཡོད་པ་རེད། ཕྱི་ལོ་ ༢༠༡༤ ལོར་སྲིད་བློན་ Narendra Damodardas Modi མཆོག་གིས་ཐེངས་དང་པོའི་སྲིད་བློན་གྱི་དམ་འབུལ་བཞེས་སྐབས་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་མགྲོན་འབོད་གནང་ཡོད་ཀྱང། དེ་རིང་སྲིད་བློན་གྱི་དམ་འབུལ་མཛད་སྒོར་སྲིད་སྐྱོང་མཆོག་དང་གཞན་ཡང་ཐེ་ཝན་གྱི་སྐུ་ཚབ་གཅིག་ཀྱང་མགྲོན་འབོད་གནང་མེད་པ་དེ་ནི་རྒྱ་གར་གྱི་ངོས་ནས་རྒྱ་གཞུང་ལ་ཁོང་མི་ཁྲོ་བའི་ཕྱིར་དང་ཕྱོགས་གཉིས་དབར་གྱི་འབྲེལ་ལམ་བསྐྱར་གསོ་གནང་རྒྱུའི་ཐབས་ཤེས་ཤིག་རེད་ཅེས་གསུངས་འདུགདེ་རིང་རྒྱ་གར་གྱི་གསར་གནས་ DH deccan herald ཞེས་པས་ཕྱི་ལོ་ ༢༠༡༤ ལོར་སྲིད་བློན་མོ་དི་མཆོག་གི་ལས་ཁུར་དམ་འབུལ་གྱི་སྐབས་སུ་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་རྒྱ་གར་དུ་གནས་བཞུགས་ཐེ་ཝན་གྱི་གཞུང་ཚབ་པ་བཅས་མགྲོན་འབོད་གནང་སྟབས། རྒྱ་ནག་སྲིད་གཞུང་ནས་གནད་དོན་དེར་སྐྱོན་བརྗོད་བྱས་ནས་རྒྱ་གར་གཞུང་གིས་རྒྱ་ནག་གཅིག་གི་རྩ་འཛིན་གྱི་སྲིད་བྱུས་ལ་བརྩི་སྲུང་བྱེད་དགོས་པའི་སྐུལ་མ་ཡང་ཡང་བྱས་ཡོད་སྟབས། རྒྱ་གར་གྱིས་རྒྱ་ནག་ཁོང་མི་ཁྲོ་བའི་ཕྱིར་དུ་ཐེངས་འདིའི་མཛད་སྒོར་དབུས་བོད་མའི་སྒྲིག་འཛུགས་ཀྱི་སྐུ་ཚབ་པ་གཅིག་ཀྱང་མགྲོན་འབོད་གནང་མེད་ཚུལ་བཀོད་འདུག འདི་ག་རླུང་འཕྲིན་ཁང་གིས་བོད་མི་མང་སྤྱི་འཐུས་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་མཆོག་ལ་ རྒྱ་གར་གྱི་སྲིད་བློན་དམ་འབུལ་གྱི་མཛད་སྒོར་བོད་མིའི་སྐུ་ཚབ་མི་སྣ་མགྲོན་འབོད་གནང་མེད་པར་དགོངས་ཚུལ་གང་ཡོད་ཀྱི་ཐད་བཀའ་འདྲི་ཞུས་པར་ཁོང་གིས་སྐབས་སྔོན་མའི་སྲིད་བློན་དམ་འབུལ་དང་ཐེངས་འདིའི་དམ་འབུལ་གཉིས་ལ་མི་འདྲ་བའི་ཆ་མང་པོ་ཡོད་པར་ལུང་འདྲེན་དང་འབྲེལ་ཏེ་རྒྱ་གར་གྱིས་དགོས་པ་རྒྱུ་མཚན་ཞིག་གི་ཐོག་ནས་བོད་མིའི་སྐུ་ཚབ་གདན་འདྲེན་གནང་མེད་ཀྱང་། དེ་ནི་ཧང་སང་དགོས་པ་མིན་པ་མ་ཟད།   མ་འོངས་པའི་ཁྲོད་དུ་ཡང་གནས་ཚུལ་དེ་རྐྱེན་རྒྱ་གར་ནས་བོད་དོན་གྱི་ཐོག་ལ་འཛིན་པའི་སྲིད་བྱུས་ལ་འགྱུར་བ་གང་ཡང་འགྲོ་མི་སྲིད་པར་ངོ་སྤྲོད་གནང་སོང་།རྩ་བའི་ BJP ཆབ་སྲིད་ཚོགས་པས་སྣེ་ཁྲིད་པའི་གནའ་འབྲེལ་ཚོགས་པར་ཐེངས་འདིའི་འོས་བསྡུ་ཆེན་མོའི་ཁྲོད་གྲོས་ཚོགས་འོག་མའི་ས་མིག་ ༣༥༢ དང་དེའི་ཁོངས་ BJP ཆབ་སྲིད་ཚོགས་པ་ཁོ་ནར་ས་མིག་ ༣༠༣ བཅས་རྒྱལ་ཁ་ཆེན་པོ་ཐོབ་ཡོད་པ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་བློན་མཆོག་ལ་དམིགས་བསལ་འཚམས་འདྲིའི་གསུང་འཕྲིན་ཞིག་བསྩལ་བའི་ནང་འཛམ་གླིང་ཐོག་གི་མང་གཙོའི་རྒྱལ་ཁབ་ཆེ་ཤོས་རྒྱ་གར་འདི་ད་ཆ་རྒྱལ་སྤྱིའི་སྤྱི་ཚོགས་སྣེ་ཁྲིད་མཁན་གྱི་རྒྱལ་ཁབ་གཙོ་གྲས་ཤིག་ཆགས་པར་ཐུགས་ལ་དགྱེས་སྤོབས་ཆེན་པོ་བྱུང་ཞེས་དང་། ལྷག་པར་དུ་རྒྱ་གར་འདི་གནའ་བོའི་སྤྱི་ཚོགས་ཀྱི་དཔལ་ཡོན་ཕུན་སུམ་ཚོགས་པ་དར་ཡུལ་ཞིག་ཡིན་པ་མ་ཟད། བྱམས་པ་དང་སྙིང་རྗེ་གཞི་རྩར་བཟུང་པའི་ཐོག་འཚེ་བ་མེད་པའི་ལྟ་སྤྱོད་ཉམས་ལེན་གནང་བཞིན་ཡོད་པ་ནི་རྒྱལ་ཁབ་གཞན་དང་མི་འདྲ་བའི་ཐུན་མིན་གྱི་ཁྱད་ཆོས་ཁྱད་པར་བ་ཞིག་རེད་ཅེས་བཀའ་བསྩལ་ཡོད། དེ་རིང་ཕྱི་དྲོ་ཚོུད་ ༧ པའི་ཐོག་འཚོགས་རྒྱུའི་སྲིད་བློན་མོ་དི་མཆོག་གིས་དམ་འབུལ་མཛད་སྒོའི་ཐོག་བྷང་ལ་དེ་ཤ་དང་  Myanmar ཤྲི་ལངྐ།  Thailand  བལ་ཡུལ། འབྲུག་ཡུལ་སོགས་ཀྱི་དབུ་ཁྲིད་གཙོ་གྱུར་ཁྱོན་སྐུ་མགྲོན་ ༨༠༠༠ ཙམ་ཕེབས་པར་ཚོད་དཔག་གནང་གི་ཡོད་པ་རེད།