བོད།

འཛམ་གླིང་མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་གི་དུས་བཀག་བསྐྱར་ཞིབ་ཐེངས་གསུམ་པའི་ཐོག་བལ་ཡུལ་གཞུང་ནས་ཡུལ་དེའི་ནང་གི་བོད་མིའི་ཐོབ་ཐང་སྲུང་སྐྱོབ་བྱ་རྒྱུའི་རྒྱལ་ཚོགས་ཀྱི་ལམ་སྟོན་གནང་དོན་ལྟར་ངོས་ལེན་གནང་མེད་པར་སྐྱོན་བརྗོད་གནང་འདུགདེ་རིང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་བལ་ཡུལ་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་དུས་བཀག་བསྐྱར་ཞིབ་མཇུག་སྒྲིལ་གནང་གི་ཡོད་པ་དང་བསྟུན་རྒྱལ་སྤྱིའི་འགྲོ་བ་མིའི་ཐོབ་ཐང་གི་མཐུན་ཚོགས་སམ་ International Federation for Human Rights དང་རྒྱལ་སྤྱིའི་བོད་དོན་ལས་འགུལ་ཁང་གཉིས་ཐུན་མོང་གིས་བསྒྲགས་གཏམ་ཞིག་སྤེལ་བར་འདི་ལོའི་ཕྱི་ཟླ་དང་པོའི་ནང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་བལ་ཡུལ་ནང་གི་འགྲོ་བ་མིའི་ཐོབ་ཐང་གནས་སྟངས་དང་འབྲེལ་བའི་དུས་བཀག་བསྐྱར་ཞིབ་ཐེངས་གསུམ་པ་དེ་གནང་སྐབས་སུ་རྒྱལ་ཚོགས་ཀྱི་ངོས་ནས་བལ་ཡུལ་གཞུང་ལ་ཡུལ་དེའི་བོད་མི་སྐྱབས་བཅོལ་བའི་ཐོབ་ཐང་སྲུང་སྐྱོབ་བྱ་རྒྱུའི་ལམ་སྟོན་ཁག་ཅིག་ཆེད་བཏོན་གནང་ཡོད་པ་དེ་ལྟར་ནའང་བལ་ཡུལ་གཞུང་ནས་རྒྱལ་ཚོགས་ཀྱི་ལམ་སྟོན་དེ་དག་ལ་ངོས་ལེན་གནང་མེད་པར་སྐྱོན་བརྗོད་གནང་འདུགབསྒྲགས་གཏམ་ནང་འཁོད་པར་བལ་ཡུལ་གཞུང་གིས་རྒྱ་ནག་གི་གནོན་ཤུགས་འོག་བོད་མིར་དམ་དྲག་ཤུགས་ཆེ་རུ་གཏོང་བཞིན་པའི་གནས་སྟངས་གསལ་འདོན་དང་འབྲེལ་ཏེ་བལ་ཡུལ་གཞུང་གིས་ད་བར་བལ་ཡུལ་ནང་གནས་སྡོད་བོད་མི་ཉིས་ཁྲི་ལྷག་ཡོད་པ་དེ་དག་ལ་ཐོ་འགོད་དང་བདེན་པ་ཁུངས་སྐྱེལ་ཐོག་ངོས་འཛིན་ཡིག་ཆ་མཁོ་སྤྲོད་གནང་རྒྱུ་མཚོན་པའི་ངོ་སྤྲོད་རྒྱབ་གཉེར་གནང་རྒྱུར་ཁས་ལེན་གནང་མེད་པ་དང་རྒྱུ་མཚན་འདིར་བརྟེན་བོད་མི་དེ་དག་ལ་ཡུལ་ཁྲིམས་ནང་གསལ་བའི་ཤེས་ཡོན་དང་ཕྱག་ལས། སྨན་པ་དང་གཞུང་གི་ཕྱག་ལས་སོགས་གནང་རྒྱུའི་ཐོབ་ཐང་མེད་པ་མ་ཟད། རྒྱལ་སྤྱིའི་ཁྲིམས་ལ་བརྩི་སྲུང་མེད་པར་བོད་ནས་བྲོས་བྱོལ་དུ་ཕེབས་མཁན་བོད་མི་རྣམས་ཕྱིར་རྒྱ་ནག་ལ་རྩིས་སྤྲོད་བྱེད་བཞིན་པ་དེས་ཁོང་ཚོའི་ཚེ་སྲོག་ལ་ཉེན་ཁ་ཆགས་ཀྱི་ཡོད་པ་དང་འདང་ངེས་མེད་པའི་ཁྲིམས་ཀྱི་གནས་བབས་འོག་མང་ཚོགས་རྣམས་ནག་ཉེས་ཀྱི་ཡུལ་དུ་བསྒྱུར་སླ་བ་དང་དེ་བཞིན་འགྲོ་བ་མིའི་ཐོབ་ཐང་བརྡལ་གཤིག་གཏོང་སླ་བ་ཆགས་ཀྱི་ཡོད་པར་ལུང་འདྲེན་གནང་སྟེ་ད་ཆ་ཡིག་ཆ་མ་འདང་བ་འདི་ནི་བོད་མི་སྐྱབས་བཅོལ་བར་འཕྲད་བཞིན་པའི་དཀའ་ངལ་དག་གི་རྩ་བ་དེ་ཆགས་ཀྱི་ཡོད་པར་མངོན་གསལ་གནང་འདུགསྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་སྡེ་ཚན་གྱི་འགན་ཁུར་བཞེས་མཁན་སྐུ་ཞབས་ Kai Muller ལགས་ཀྱིས་རྒྱལ་ཚོགས་ཀྱི་བལ་ཡུལ་གྱི་འགྲོ་བ་མིའི་ཐོབ་ཐང་གི་གནད་དོན་བསྐྱར་ཞིབ་སྐབས་སུ་རྒྱལ་ཚོགས་ཀྱིས་བཏོན་པའི་ལམ་སྟོན་གྱི་དོན་ཚན་ཁག་ལ་བལ་ཡུལ་གཞུང་ནས་ངོས་ལེན་མ་གནང་པ་དེ་རྒྱལ་སྤྱིའི་བོད་དོན་ལས་འགུལ་ཁང་ལ་བློ་འཚབ་ཆེན་པོ་བཟོས་ཡོད་སྐོར་གསུངས་ཏེ་བལ་ཡུལ་གཞུང་གིས་ངེས་པར་དུ་རྒྱལ་སྤྱིའི་ཁྲིམས་ལ་བརྩི་སྲུང་གིས་བལ་ཡུལ་ནང་ཡུན་རིང་བཞུགས་པའི་བོད་མི་དང་དེ་བཞིན་བོད་ནས་བྲོས་བྱོལ་དུ་ཕེབས་མཁན་བོད་མི་རྣམས་ཀྱི་ཚེ་སྲོག་སྐྱོབ་སླད་ཐབས་ལམ་འཚོལ་རྒྱུར་ཁས་ལེན་ཞུ་དགོས་པའི་འབོད་སྐུལ་གནང་འདུག དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་མཐུན་ཚོགས་ཀྱི་དྲུང་ཆེ་སྐུ་ཞབས་ Adilur Rahman Khan ལགས་ཀྱིས་རྒྱལ་ཚོགས་ཀྱི་ལམ་སྟོན་ནང་བལ་ཡུལ་གཞུང་གིས་བོད་མི་སྐྱབས་བཅོལ་བ་རྣམས་ཡུལ་དེར་བཞུགས་འཐུས་གནང་བར་བསྔགས་བརྗོད་གནང་ཡོད་ཀྱང་དེ་ཙམ་གྱིས་འདང་གི་མེད་ཅིང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་དོན་ལྟར་སྐྱབས་བཅོལ་བ་བཞུགས་འཇུག་པར་ངེས་པར་དུ་ཁོང་ཚོའི་བདེ་འཇགས་ཐོག་འགན་ལེན་བྱེད་དགོས་ཀྱི་ཡོད་པར་ནན་བརྗོད་གནང་བ་མ་ཟད་བལ་ཡུལ་གཞུང་གིས་ཛ་དྲག་ཐོག་ནས་གོམ་པ་མདུན་སྤོས་ཀྱིས་བོད་མི་རྣམས་ཀྱི་གཞི་རྩའི་ཐོབ་ཐང་ཁག་སྲུང་སྐྱོབ་དང་བརྩི་སྲུང་ཞུ་དགོས་སྐོར་གསུངས་འདུགགོང་ཞུས་ཚོགས་པ་གཉིས་ཀྱིས་སྤེལ་བའི་བསྒྲགས་གཏམ་ནང་བལ་ཡུལ་ནང་ཡོངས་གྲགས་ཐོག་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དགོངས་ཚུལ་གསུངས་པ་དང་ཡང་ན་བོད་རྒྱལ་ཁབ་མཚོན་པའི་དངོས་པོ་འགྲེམས་སྟོན་དང་ཆབ་སྲིད་ཀྱི་བྱེད་སྒོ་སྤེལ་མཁན་བོད་མི་དག་གང་བྱུང་དུ་འཛིན་བཟུང་དང་སུན་གཙེར་བཟོ་བཞིན་ཡོད་པ་མ་ཟད། བོད་མི་དག་ལ་ཆོས་ཕྱོགས་དང་ཆབ་སྲིད་ཀྱི་དུས་སྟོན་སྲུང་བརྩི་ཞུ་རྒྱུར་དམིགས་བསལ་དམ་དྲག་གིས་ད་ཆ་མང་ཚོགས་འདུ་འཛོམས་སོགས་ཀྱང་མུ་མཐུད་བཀག་སྡོམ་བྱེད་བཞིན་པར་ཆེས་བཏོད་གནང་འདུགརྒྱལ་ཚོགས་ཀྱིས་ཆེད་དུ་བཏོན་པའི་ལམ་སྟོན་དེས་བལ་ཡུལ་གཞུང་ལ་རྒྱལ་སྤྱིའི་ཁྲིམས་ལུགས་ལྟར་བོད་ནས་བྲོས་བྱོལ་དུ་ཕེབས་པའི་བོད་མི་རྣམས་བཙན་དབང་གིས་རྒྱ་གཞུང་གི་དབང་སྒྱུར་འོག་ ཕྱིར་ལོག་གནང་མི་ཆོག་པའི་རྩ་དོན་ལག་བསྟར་བྱེད་དགོས་པའི་སྐུལ་མ་བཏང་བ་དང་དེ་བཞིན་བལ་ཡུལ་གཞུང་གིས་བོད་མི་རྣམས་དང་ཡུལ་དེའི་གྲངས་ཉུང་མི་རིགས་རྣམས་ལ་རོགས་རམ་མི་གནང་བའི་རྩ་ཁྲིམས་ལ་བསྒྱུར་བཅོས་དགོས་པའི་སྐུལ་མ་གནང་ཡོད། འོན་ཀྱང་བལ་ཡུལ་གཞུང་གིས་ལམ་སྟོན་དེའི་ནང་ནས་ཁག་ཅིག་ངོས་ལེན་གནང་ཡོད་པ་དེ་དག་ལག་བསྟར་གནང་ཚེ་ད་ཆ་བལ་ཡུལ་ནང་བོད་མི་སྐྱབས་བཅོལ་བ་རྣམས་ལ་འཕྲད་བཞིན་པའི་འགྲོ་བ་མིའི་ཐོབ་ཐང་གི་དཀའ་ངལ་ཁག་ཅིག་ཉུང་དུ་འགྲོ་རྒྱུ་ཡིན་པར་འགྲེལ་བརྗོད་གནང་འདུག་པ་མ་ཟད། ལམ་སྟོན་བོད་མི་རྣམས་ཀྱི་གཏམ་བརྗོད་དང་ཞི་མཐུན་འདུ་འཛོམས་ཀྱི་རང་དབང་། གཞན་ཡང་གྲངས་ཉུང་མི་རིགས་ཀྱི་ཐོབ་ཐང་བཅས་སྲུང་སྐྱོབ་གནང་རྒྱུ་བཅས་ཚུད་ཡོད་པ་རེད། གཞི་རྩའི་བལ་ཡུལ་ནང་རྒྱ་ནག་གི་ཤུགས་རྐྱེན་ཆེ་ཆེར་སོང་བའི་རྗེས་སུ་བོད་མི་རྣམས་ནས་རྒྱ་ནག་ལ་ངོ་རྒོལ་གནང་རྒྱུའི་ལས་འགུལ་དག་ལ་བཀག་སྡོམ་བྱས་པ་དང་དེ་བཞིན་ཆོས་ལུགས་དང་རིག་གཞུང་དང་འབྲེལ་བའི་མཛད་སྒོ་ཁག་ལའང་བཀག་འགོག་བྱེད་ཀྱི་ཡོད་པ་རེད། སྤྱིར་དེང་སྐབས་བལ་ཡུལ་དུ་གནས་སྡོད་གནང་མཁན་བོད་མི་ཉིས་ཁྲི་ཙམ་ཡོད་པར་ཚོད་དཔག་གནང་བཞིན་ཡོད།

རྒྱ་ནག་གཞུང་གིས་ཧོང་ཀོང་མང་ཚོགས་ཀྱི་རང་དབང་ལ་རྡོག་རོལ་དང་ལྷག་པར་ཉེ་ལམ་ཁུལ་དེའི་ནང་གི་ Apple Daily ཞེས་པའི་གསར་ཁང་བཙན་དབང་གི་སྒོ་རྒྱག་ཏུ་བཅུག་པའི་གནད་དོན་དང་འབྲེལ། དེ་རིང་ཡུ་རོབ་གྲོས་ཚོགས་ནང་འདི་ལོའི་རྒྱ་ནག་གི་དགུན་དུས་ཨོ་རྩལ་འགྲན་ཚོགས་ལ་འཛུལ་ཞུགས་བྱེད་རྒྱུ་མིན་པ་དང་། དེ་བཞིན་ཧོང་ཀོང་གི་འབྲེལ་ཡོད་ཆེས་མཐོ་དཔོན་རིགས་ཁག་ཅིག་ལ་ཁུལ་དེའི་སྤྱི་ཚོགས་རང་དབང་ལ་དོ་ཕོག་བཏང་བའི་ཉེས་མིང་འོག་ཡུ་རོབ་ཁུལ་དུ་འགྲོ་སྐྱོད་བཀག་འགོག་དགོས་པའི་གྲོས་ཆོད་ཞིག་འཇོག་རྒྱུ་རེད་འདུགདེ་ཡང་ལྷོ་རྒྱ་ནག་གི་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བར་གཞིགས་ན། ཡུ་རོབ་ཀྱི་གྲོས་ཚོགས་དབུས་སུ་ཁ་སང་དང་ཁ་ཉིན་ཉིན་གཉིས་ཀྱི་རིང་ལ་གྲོས་ཆོད་གྲོས་འཆར་དེའི་མ་ཟིན་གྲ་སྒྲིག་གནང་ཡོད་པ་དང་། ཡུ་རོབ་ཀྱི་མཐུན་ཚོགས་དང་ཡུ་རོབ་སྤྱི་མཐུན་ལྷན་ཚོགས་སུ་འབུལ་འཆར་ཡོད་པའི་གྲོས་ཆོད་གྲོས་འཆར་དེ་མང་མོས་ཀྱི་གཏན་འབེབས་ཐུབ་པའི་ཚོད་དཔག་གནང་བཞིན་འདུག ལྷོ་རྒྱ་ནག་གི་ཞོགས་པའི་ཆ་འཕྲིན་གྱིས་མཐོང་བའི་གྲོས་འཆར་གྱི་མ་ཟིན་ནང་དུ།  ཡུ་རོབ་གྲོས་ཚོགས་ཀྱིས་ཡུ་རོབ་མཐུན་ཚོགས་ལ་ཞུ་སྐུལ་གྱིས་ཧོང་ཀོང་གི་མཐོ་རིམ་དཔོན་རིགས་ཁག་གཅིག་ཡུ་རོབ་ཏུ་འགྲོ་སྐྱོད་བཀག་སྡོམ་གྱི་ཐོ་གཞུང་གཏན་འབེབས་གནང་བའི་ནང་དུ། ཧོང་ཀོང་གི་གྲོང་ཁྱེར་སྤྱི་ཁྱབ་པ། Carrie Lam Cheng  དང་། ཁྲིམས་ཁང་གི་དྲུང་ཆེ། Teresa Cheng དང་གཞན་ཡང་བདེ་འཇགས་དྲུང་ཆེ་ Chris Tang དང་ཉེན་རྟོག་ཁང་གི་འགོ་གཙོ་ཟུར་བ། Stephen Lo དང་སྤྱི་ཁྱབ་དྲུང་ཆེ་ John Lee Ka-chiu་སོགས་ཀྱི་མཚོན་པའི་མི་དྲུག་གི་མཚན་གཞུང་བཀོད་ཡོད་པ་མ་ཟད། དེ་བཞིན་ཧོང་ཀོང་གི་བདེ་འཇགས་ཁྲིམས་གཞི་དང་འབྲེལ་བའི་ Zheng Yanxiong ཟེར་བ་དང་།  Xia Baolong དང་ Zhang Xiaoming ཟེར་བ་སོགས་རྒྱ་ནག་གི་དཔོན་རིགས་ཁག་ཅིག་གི་ཀྱང་ཡུ་རོབ་ཁུལ་དུ་འགྲོ་སྐྱོད་བཀག་སྡོམ་གྱི་ཐོ་གཞུང་དུ་གསལ་ཡོད་པར་ཡོངས་གྲགས་གནང་འདུག ཐེངས་འདིའི་ཡུ་རོབ་གྲོས་ཚོགས་ཀྱི་གྲོས་འཆར་གྱི་མ་ཡིག་གི་ནང་དུ་དབྱིན་ཡུལ་དང་ཨོ་གླིང་། དེ་བཞིན་ཁ་ན་ཊ་སོགས་ཀྱིས་ཧོང་ཀོང་ནང་གི་མང་གཙོ་དོན་གཉེར་བ་སོགས་ཀྱི་མྱུར་སྐྱོབ་ཀྱིས་ཁུལ་སོ་སོའི་རྒྱལ་ཁོངས་སུ་ལེན་རྒྱུ་སོགས་ཀྱི་མཚོན་པའི་དོན་ཚན་ ༢༨ འཁོད་ཡོད་པ་དང་། གྲོས་འཆར་དེ་བརྒྱུད་ནས། རྒྱ་ནག་གི་ནང་དུ་དངོས་བདེན་གྱི་འགྲོ་བ་མིའི་ཐོབ་ཐང་གི་གནས་བབ་ཡར་རྒྱས་གོང་འཕེལ་དུ་མ་ཕྱིན་བར་དུ།   ཡུ་རོབ་ཁུལ་གྱི་ཕྱི་འབྲེལ་གྱི་དཔོན་རིགས་དང་གཞུང་འབྲེལ་གྱི་སྐུ་ཚབ་རྣམས་ཀྱིས་རྒྱ་ནག་གི་ཨོ་རྩལ་འགྲན་ཚོགས་ཀྱི་གདན་ཞུ་ཁག་རྩིས་མེད་ཀྱིས་རྒྱ་ནག་ཏུ་བཅར་རྒྱུ་མིན་པར་གསལ་ཡོད་འདུགཐེངས་འདིའི་ཡུ་རོབ་གྲོས་ཚོགས་ཀྱི་གཞུང་འབྲེལ་གྱི་གྲོས་འཆར་དང་འབྲེལ་ནས་འཇར་མན་གྲོས་ཚོགས་ཀྱི་ཚོགས་མི་སྐུ་ཞབས་ Engin Eroglu ལགས་ཀྱིས། ཡུ་རོབ་གྲོས་ཚོགས་ཀྱི་གྲོས་འཆར་དེ་བརྒྱུད་ནས་ཡུ་རོབ་གྲོས་ཚོགས་ཀྱིས་ལངས་ཕྱོགས་གསལ་བོ་འཛིན་དགོས་བར་སྐུལ་མ་གནང་བ་དང་ལྷན་དུ། རྒྱ་ནག་གི་ཁུལ་དེའི་དབང་བསྒྱུར་གྱི་འོག་ཏུ་ཡོད་པའི་བོད་མི་རིགས་དང་ནང་སོག་མི་རིགས་ལ་དྲག་གནོན་བྱེད་བཞིན་པ་དང་། དེ་བཞིན་ཡུ་གུར་མི་རིགས་རྣམས་ངལ་རྩོལ་བསྒྱུར་བཀོལ་བྱེད་བཞིན་པ། དེ་བཞིན་ཀོང་ཧོང་མི་རིགས་ཀྱི་གཞི་རྩའི་ཐོབ་ཐང་འཕྲོག་བཞིན་པ་སོགས་དང་འབྲེལ་ནས། རྒྱ་ནག་ཏུ་རྒྱལ་སྤྱིར་ཆེ་མཐོང་ཡོད་པའི་ཨོ་རྩལ་འགྲན་ཚོགས་དེ་བསྡུ་རུ་འཇུག་ཐབས་མེད་པ་དང་། ཡུ་རོབ་ཀྱི་ངོས་ནས་ཨོ་རྩལ་འགྲན་ཚོགས་དེ་རྒྱ་ནག་གི་སྲིད་འཛིན་ཞི་ཅིན་ཕང་གི་དྲིལ་བསྒྲགས་ཀྱི་དམིགས་འདུན་སྒྲུབ་ཐབས་སུ་བེད་སྤྱོད་བྱེད་དུ་འཇུག་ཐབས་བྲལ་བའི་སྐྱོན་བརྗོད་དྲག་པོ་གནང་འདུག གསར་ཁང་གིས་གནས་ཚུལ་སྤེལ་བའི་ནང་དུ། ཐེངས་འདིའི་ཡུ་རོབ་གྲོས་ཚོགས་ཀྱི་གྲོས་འཆར་དེ་ནི་གཙོ་བོ་རྒྱ་ནག་གིས་ཧོང་ཀོང་ནང་གི་འགྲོ་བ་མིའི་ཐོབ་ཐང་ལ་བརྡལ་བཤིག་གཏོང་བཞིན་པ་དང་། དེ་བཞིན་ཁུལ་དེར་མང་ཚོགས་ཀྱི་སྨྲ་བརྗོད་རང་དབང་དང་གསར་ཁང་ཁག་གི་རང་དབང་ལ་དོ་ཕོག་ཆེན་པོ་གཏོང་བཞིན་པ་དེར་སེམས་འཚབ་ཡོད་པའི་རྣམ་པ་སྟོན་ཐབས་ལ་དམིགས་པ་ཞིག་ཡིན་པར་འགྲེལ་བརྗོད་ཀྱིས། གྲོས་འཆར་དེ་བརྒྱུད་ནས་མཉམ་འབྲེལ་རྒྱལ་ཚོགས་ལ་ཧོང་ཀང་གི་ནང་དུ་ལྟ་རྟོག་གི་དམིགས་བསལ་གྱི་སྐུ་ཚབ་ཅིག་བསྐོ་བཞག་ཡོང་བར་ཤུགས་སྣོན་གྱི་འབོད་སྐུལ་དང་། དེ་བཞིན་ཟླ་བ་ ༧ པའི་ཚེས་ ༡ ཉིན་ནི་ཀོང་ཧོང་ལ་རྒྱབ་སྐྱོར་གྱི་ཉི་མར་གཏན་འབེབས་ཡོང་ཐབས་ལ་དམིགས་པ་ཞིག་ཡིན་སྐོར་གྱི་སྡོམ་བརྒྱབས་འདུགཡང་དེའི་བར་ན་ཁ་སང་དབྱིན་ཡུལ་གྱི་གྲོས་ཚོགས་ཀྱི་དབུས་སུ། དབྱིལ་ཡུལ་གྱི་གྲོས་ཚོགས་འཐུས་མི་སྐུ་ཞབས་ Tim Loughton ལགས་ཀྱིས་དབྱིན་ཡུལ་གྱི་གྲོས་ཚོགས་ཀྱིས་རྒྱ་ནག་གིས་བོད་ནང་དང་ཤིན་ཅང་གི་ནང་དུ་འགྲོ་བ་མིའི་ཐོབ་ཐང་རྡོག་རོལ་དང་མི་རིགས་རྩ་གཏོར་གཏོང་གི་ཡོད་པའི་ཐད་ནས་ངོས་འཛིན་བྱས་པ་བརྟེན་ནས་དབྱིན་ཡུལ་གྱི་གྲོས་ཚོགས་ཀྱི་འཐུས་མི་ལྔ་རྒྱ་ནག་ཏུ་བསྐྱོད་རྒྱུར་བཀག་སྡོམ་བྱས་ཡོད་པ་ལུང་འདྲེན་གནང་སྟེ། ཞི་ཅིན་ཕང་གིས་ཉེ་ཆར་རང་ཕྱི་ལོག་གི་སྟོབས་ཤུགས་གང་ཞིག་གིས་རྒྱ་ནག་ལ་གནོད་ཤུགས་སྤྲོད་ཐབས་བྱས་པ་ཡིན་ན། དེ་དག་ཡོད་ཚད་རྒྱ་ནག་གི་ལྕགས་རི་རིང་མོའི་གྱང་ངོས་སུ་མགོ་བོ་རྡུང་རྒྱུ་ཡིན་པའི་ཉེན་བརྡ་བཏང་བར་བལྟས་ན་ད་དུང་ཤིན་ཅང་དང་བོད་ནང་དུ་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པར་ཁས་ལེན་བྱེད་ཀྱི་མེད་དུས། རྒྱ་ནག་གིས་ཇི་སྲིད་རྒྱལ་སྤྱིའི་ཁྲིམས་སྒྲིག་ལ་བརྩི་སྲུང་མ་བྱས་བར་དུ། དབྱིན་ཡུལ་གྱི་ཕྱི་འབྲེལ་དཔོན་རིགས་རྣམས་ཀྱིས་རྒྱ་ནག་གི་སང་ལོའི་དགུན་དུས་ཀྱི་ཨོ་རྩལ་ལ་འཛུལ་ཞུགས་བྱེད་རྒྱུ་མཚམས་འཇོག་དགོས་བའི་གྲོས་ཆོད་ཅིག་འཇོག་དགོས་བའི་ཞུ་སྐུལ་གནང་འདུག གཞི་རྩའི་རྒྱ་ནག་གི་ནང་དུ་སང་ལོའི་དགུན་དུས་སུ་ཨོ་རྩལ་འགྲན་ཚོགས་བསྡུ་རྒྱུའི་ཐག་གཅོད་དེར། བོད་མི་རྣམས་ཀྱི་སྣེ་ཁྲིད་པའི་ཐོག  ཡུ་གུར་ཁ་ཆེ་མི་རིགས་དང་ནང་སོག་མི་རིགས། དེ་བཞིན་ཐེ་ཝན་དང་ཧོང་ཀོང་སོགས་ཀྱི་མཚོན་པའི་རྒྱལ་སྤྱིའི་ཚོགས་སྡེ་༡༨༠ ལྷག་གིས་མཉམ་རུབ་ཀྱིས་ལས་འགུལ་སྤེལ་ཏེ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་འགྲོ་བཞིན་པའི་དུས་སྐབས་འདིར་རྒྱལ་སྤྱིའི་ཨོ་རྩལ་འགྲན་ཚོགས་ཀྱིས་རྒྱ་ནག་ཏུ་འགྲན་ཚོགས་དེ་བསྡུ་རྒྱུའི་ཐོབ་ཐང་སྤྲོད་ཐབས་མེད་པའི་ལས་འགུལ་སྣ་མང་སྤེལ་ཡོད་པ་དང་། ད་ཆ་རྒྱལ་སྤྱིའི་སྲིད་གྲོས་ཚོགས་རིམ་པའི་ནང་དུ་ཡང་རྒྱ་ནག་ནང་གི་སང་ལོའི་དགུན་དུས་ཀྱི་ཨོ་རྩལ་ལ་འཛུལ་ཞུགས་བྱེད་རྒྱུ་ཕྱིར་འཐེན་དགོས་བའི་གླེང་སློང་རིམ་པ་བྱུང་བཞིན་པ་རེད་འདུག

བོད་རང་སྐྱོང་ལྗོངས་ཟེར་བའི་ཁོངས་གཞིས་རྩེ་གྲོང་ཁྱེར་དིང་རི་རྫོང་རྒྱལ་ནོར་བྲག་ནག་གྲོང་ཚོའི་ནང་རྟེན་གཞི་བྱས་པའི་བཀྲ་ཤིས་སྟེང་འགྲོ་དགོན་པའི་དགེ་འདུན་པ་བཞི་ཁྲིམས་འགལ་གྱི་དོགས་གཞི་འོག་འཛིན་བཟུང་གིས་ལོ་ ༢༠ བར་གྱི་བཙོན་འཇུག་གི་ཁྲིམས་ཐག་བཅད་ཡོད་པའི་གནས་ཚུལ་ཐོན་འདུགཁ་སང་༸རྒྱལ་བའི་༸སྐུའི་འཁྲུངས་སྐར་ཉིན་མོ་དང་བསྟུན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཤོག་གྲངས་ ༦༡ ཅན་ཞིག་རྒྱ་ནག་གཞུང་གིས་སྟེང་འགྲོ་དགོན་པའི་ཐོག་ཆེས་དྲག་གནོན་དང་དམ་དྲག་བྱས་ཡོད་སྐོར་སྙན་ཐོ་ཞིག་འདོན་སྤེལ་གནང་འདུག་པ་དང་སྙན་ཐོ་དེའི་ནང་སྟེང་འགྲོ་དགོན་གྱི་དགེ་འདུན་པ་ཆོས་རྒྱལ་དབང་པོ་ཞེས་པ་ཞིག་གི་ལག་རྡོག་ཁ་པར་ལྷ་སའི་ཉེན་རྟོག་པར་རག་སོན་བྱུང་ནས་ཁ་པར་བརྒྱུད་ཆོས་རྒྱལ་དབང་པོ་ལགས་ཀྱིས་བལ་ཡུལ་དུ་གནས་བཞུགས་དགེ་འདུན་པ་ཞིག་ལ་འཕྲིན་སོགས་བསྐུར་བ་དང་ལྷག་པར་ ༢༠༡༥ ལོར་བལ་ཡུལ་གྱི་ས་འགུལ་དང་འབྲེལ་ཞལ་འདེབས་ཕུལ་བའི་གནས་ཚུལ་ཤེས་རྟོགས་བྱུང་སྟེ། ཕྱི་ལོ་ ༢༠༢༠ ལོར་ཁ་ཁུ་སིམ་པོའི་ཐོག་ཆོས་རྒྱལ་དབང་པོ་ལགས་དང་བློ་བཟང་སྦྱིན་པ། ནོར་བུ་དོན་གྲུབ། ངག་དབང་ཡེ་ཤེས་ལགས་བཅས་སུ་ལོ་ ༢༠ དང་ ༡༩། ༡༧། དེ་བཞིན་ལོ་ ༥ བཅས་ཀྱི་ཁྲིམས་ཐག་བཅད་ཡོད་འདུག ཁོང་རྣམས་གསང་བའི་ཁྲིམས་ཐག་མ་བཅད་གོང་ལོ་གཅིག་ལྷག་གི་རིང་གཞིས་ཀ་རྩེའི་ཉེ་འདབས་སུ་ཡོད་པའི་བཙོན་ཞིག་ཏུ་བཀག་སྐྱིལ་བྱས་ཡོད་པ་འཁོད་འདུག གཞི་རྩའི་ཆོས་རྒྱལ་དབང་པོ་ལགས་ཕྱི་ལོ་ ༢༠༡༩ ལོའི་ཟླ་ ༨ ཟླ་མཇུག་དང་ཟླ་ ༩ མགོ་སྟོད་དུ་ལྷ་སར་ཕེབས་པ་དང་སྐབས་དེར་ཁོང་གི་ཁ་པར་ཇ་ཁང་ཞིག་གི་ནང་ལུས་ནས་མཐར་ཉེན་རྟོག་པའི་ལག་པར་རག་འདུག ཉེན་རྟོག་པས་ཁོང་གི་ཁ་པར་བརྒྱུད་གནས་ཚུལ་དེ་དག་ཤེས་རྟོགས་རྗེས་ཆེད་མངགས་ལྷ་ས་ནས་བྲག་ནག་གྲོང་ཚོར་ཡོང་ནས་གྲོང་ཚོའི་ཁང་ཁྱིམ་དང་སྟེང་འགྲོ་དགོན་པ་བསྔོགས་བཤེར་བྱས་པ་མ་ཟད་ཆོས་རྒྱལ་དབང་པོ་ལགས་འཛིན་བཟུང་གིས་འདྲི་རྩད་དང་ཉེས་རྡུང་བཏང་ཡོད་པ་རེད་འདུག ད་དུང་བརྒྱུད་རིམ་དེའི་ཁྲོད་ཉེན་རྟོག་པས་དགེ་འདུན་པ་ ༢༠ ལྷག་འཛིན་བཟུང་གིས་ཁག་ཅིག་ཟླ་བ་འགའ་ཤས་རིང་བཀག་སྐྱིལ་འོག་བཞག་ནས་ཉེས་རྡུང་བཏང་བ་མ་ཟད་དེའི་ཁྲོད་དགེ་འདུན་པ་བློ་བཟང་བཟོད་པ་ཞེས་པ་ཞིག་གིས་རྒྱ་ནག་གི་བྱེད་ཕྱོགས་སྡུག་པོ་དེར་ངོ་རྒོལ་དང་སྦྲགས་རང་སྲོག་བཅད་པ་ཡང་བྱུང་སྐོར་འཁོད་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ Sophie Richardson ལགས་ཀྱིས་རྒྱ་གཞུང་གིས་ད་ལན་དགེ་འདུན་པ་བཞིར་ཁྲིམས་ཆད་བཀེལ་ལུགས་དེས་བོད་ནང་གི་བོད་མིའི་ཚོའི་ཐོག་ཏུ་སྤེལ་བའི་དམ་དྲག་གི་གནས་སྟངས་གསལ་བཏོན་བྱེད་ཀྱི་ཡོད་སྐོར་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྤྱིར་ཕྱི་ཕྱོགས་སུ་འཕྲིན་སོགས་བཏང་བ་དང་འགྲོ་བ་མིའི་བདེ་རྩའི་སླད་ཞལ་འདེབས་གནང་བ་ནི་རྒྱ་ནག་གི་ཁྲིམས་དང་འགལ་གྱི་མེད་པ་དང་ལྷག་པར་ད་རེས་དགེ་འདུན་པ་རྣམ་པར་བཙོན་འཇུག་གི་གནད་དོན་ནི་རྒྱ་གཞུང་གིས་ཁྲིམས་མེད་ལུགས་མེད་ཀྱིས་འཛིན་བཟུང་དང་བོད་ནང་བོད་མིའི་ཚོའི་དྲ་ཐོག་བརྒྱུད་བཀའ་མོལ་གནང་བར་དམ་དྲག་ཤུགས་ཆེ་བྱེད་ཀྱི་ཡོད་པ་མངོན་གསལ་ཆགས་ཡོད་ཅེས་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་གཞུང་ནས་དགེ་འདུན་པ་ཁོང་རྣམས་དེ་མ་ཐག་གློད་བཀྲོལ་དང་རྒྱལ་ཚོགས་དང་རྒྱལ་སྤྱིའི་ཁྲོད་རྒྱལ་ཁབ་རྣམ་པས་རྒྱ་གཞུང་ནས་བོད་མི་ཚོའི་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་དགོས་པའི་གནོན་ཤུགས་སྤྲོད་དགོས་པའི་འབོད་སྐུལ་དང་ལྷག་པར་དུ་རྒྱལ་ཚོགས་ནས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་སླད་རང་དབང་ཅན་གྱི་ཚོགས་ཆུང་ཆེད་འཛུགས་དགོས་པ་མ་ཟད་ལོ་འཁོར་སྙན་ཐོ་འདོན་སྤེལ་དགོས་པའི་དགོས་འདུན་བཏོན་འདུག སྤྱིར་ཉེན་རྟོག་པས་ཆོས་རྒྱལ་དབང་པོ་ལགས་ཀྱིས་ཁ་པར་བསྔོགས་བཤེར་སྐབས་ཕྱི་ཕྱོགས་ཀྱི་ཁ་པར་ཨང་གྲངས་དང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་དང་། དེ་བཞིན་རྒྱ་གར་དང་བལ་ཡུལ་གཉིས་སུ་ཡོད་པའི་དིང་རི་ནས་ཡིན་པའི་བོད་མི་དང་འཕྲིན་སོགས་བརྗེ་རེས་གནང་བ་ཤེས་རྟོགས་བྱུང་འདུག

ཁ་སང་སྐུའི་འཁྲུངས་སྐར་ཉིན་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་དེ་གའི་ཊྲི་ཊར་དྲ་གནས་སུ་མགོན་པོ་གང་ཉིད་ལ་འཚམས་འདྲི་ཞུས་པ་དང་ལྷན་དུ། འགྲོ་བ་ཐམས་ཅད་མགོན་པོ་གང་གི་བྱམས་སྙིང་རྗེ་དང་འཚེ་མེད་ཞི་བ། དེ་བཞིན་ཁོར་ཡུག་ལ་བདག་གཅེས་སོགས་ཀྱི་དགོངས་གཞིས་སེམས་སྐུལ་ཐེབས་པའི་སྨོན་འདུན་དང་སྦྲགས་ནས། ཨ་རིའི་ངོས་ནས་བོད་མི་རྣམས་ཀྱི་ཞི་བདེ་དང་རང་དབང་འཚོལ་སྙེགས་དེ་ལེགས་འགྲུབ་ཡོང་བར་རོགས་འདེགས་བྱེད་རྒྱུ་ཡིན་པར་བསྒྲགས་འདུག དེ་བཞིན་ཚོགས་ཆུང་ངོས་ནས་སྐུའི་འཁྲུངས་སྐར་ཉིན་མོ་དང་བསྟུན་དེ་སྔ་རྒྱ་ནག་གིས་བོད་ནང་དུ་བོད་མི་རྣམས་ཀྱིས་སྐུའི་གྱ་སྟོན་གྱི་འཁྲུངས་སྐར་སྲུང་བརྩི་བྱས་པར་ཉེས་འདོགས་ཀྱིས་འཛིན་བཟུང་བཙོན་འཇུག་བྱས་པའི་བོད་མི་བོན་ཁོ་སྐྱིད་ལགས་དང་། ཚུལ་ཁྲིམས་ལགས། འབྲུག་སྒྲ་ལགས།  བློ་བཟང་དགེ་འཕེལ་ལགས། དེ་བཞིན་བློ་བཟང་མཁས་གྲུབ་དང་བློ་གྲོས་སོགས་ཀྱི་ཆབ་སྲིད་བཙོན་པ་དྲུག་པོ་གང་མགྱོགས་གློད་གྲོལ་གཏོང་དགོས་བའི་ཞུ་སྐུལ་གནང་འདུག རྩ་བའི་བོད་མི་དྲུག་པོ་དེ་དག་ཕྱི་ལོ་ ༢༠༡༥ ལོར་རྒྱ་ནག་གིས་མགོན་པོ་གང་གི་སྐུའི་གྱ་སྟོན་སྲུང་བརྩི་བྱས་པའི་ཉེས་མིང་འོག་འཛིན་བཟུང་གིས་ཝུན་ཁྲེན་བཙོན་ཁང་དུ་བཙོན་འཇུག་བྱས་པ་ཞིག་ཡིན་པ་དང་། འདི་གའི་གསར་ཁང་ལ་༢༠༡༦ ལོར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་གྲྭ་བློ་བཟང་ཡེ་ཤེས་ལགས་ཀྱིས་གནས་ཚུལ་མཁོ་སྤྲོད་གནང་བར་གཞིགས་ན། བཙོན་འཇུག་བྱས་པའི་བོད་མི་དེ་དག་ལས་རང་ལོ་ ༥༠ ཡིན་པའི་རྔ་བ་ཀིརྟི་དགོན་པའི་གྲྭ་འབྲུག་སྒྲ་ལགས་ལ་ལོ་ ༡༤ ཁྲིམས་ཐག་བཅད་འདུག་པ་དང་། རང་ལོ་ ༤༤ སོན་པའི་གྲྭ་བློ་བཟང་མཁས་གྲུབ་ལགས་ལ་ལོ་ ༡༣ ། རང་ལོ་ ༢༩ ཡིན་པའི་གྲྭ་བློ་བཟང་དགེ་འཕེལ་ལགས་ལ་ལོ་༡༢། རང་ལོ་ ༤༡ སོན་པའི་གྲྭ་བློ་གྲོས་ལགས་ལ་ལོ་ ༩ དང་རང་ལོ་ ༤༨ ཡིན་པའི་རྔ་བ་ཁུལ་གྱི་བེུད་བོན་ཁོ་སྐྱིད་ལགས་ལ་ལོ་ ༧ བཅས་ཀྱི་ཁྲིམས་ཐག་བཅད་ཡོད་པ་རེད།སྤྱིར་དེ་ལྟ་བུའི་དམ་དྲག་ལ་ལྟོས་མེད་བོད་ནང་གི་བོད་མི་རྣམས་ཀྱིས་༸གོང་ས་མཆོག་ལ་དད་གུས་གཡོལ་བ་མེད་པར་ལོ་ལྟར་སྐུའི་འཁྲུངས་སྐར་སྐབས་མངོན་གསལ་མ་ཡིན་པའི་སྒོ་ནས་རྣམ་པ་འདྲ་མིན་ཐོག་ཉིན་མོ་སྲུང་བརྩི་ཞུ་བཞིན་པ་ལྟར། ཁ་ས་སྤྱི་ཚོགས་དྲ་རྒྱ་ཁག་ཏུ་སྐུའི་འཁྲུངས་སྐར་དང་འབྲེལ་བའི་གནས་ཚུལ་ཁག་ཅིག་ཐོན་པའི་ཁོངས་སུ་གཞིས་ལུས་བོད་མི་རྣམས་ཀྱིས་རྒྱ་ནག་གི་དམ་དྲག་ལ་ལྟོས་མེད་ཀྱི་ཐོག་ནས་མགོན་པོ་གང་གི་ཞལ་རིས་ཡོངས་སུ་མི་མཐོང་བའི་སྐུ་པར་ཕྱེད་ཀའམ། ཡང་ན་སྐུ་མདུན་གྱི་ཞབས་སོགས་ཀྱི་པར་དང་། དེ་བཞིན་སྤྱར་རས་གཟིགས་སོགས་ཀྱི་སྐུ་པར་སྐད་འཕྲིན་གྱི་འཕྲིན་སྟེགས་སུ་སྤེལ་ཏེ་མགོན་པོ་གང་གིས་འཁྲུངས་སྐར་སྐབས་སུ་བསྩལ་བའི་བཀའ་སློབ་ཀྱི་དུམ་བུ་རེ་བཞག་ནས་སྐུའི་འཁྲུངས་སྐར་ལ་འཚམས་འདྲི་ཞུས་བ་སོགས་ཀྱི་རྣམ་པ་འདྲ་མིན་གྱི་སྒོ་ནས་སྐུའི་འཁྲུངས་སྐར་སྲུང་བརྩི་གནང་འདུགམ་ཟད་སྤྱི་ཚོགས་དྲ་ལམ་ཏུ་སྐུའི་འཁྲུངས་སྐར་སྲུང་བརྩིའི་རྣམ་པ་གཞན་ཞིག་ཐོན་པའི་བརྙན་པར་ཞིག་གི་ནང་དུ། ལྷ་སའི་སྐོར་ལམ་གྱི་ཁུལ་དུ་སྤོ་བོ་ཞིག་གིས་རང་གི་སྟོད་གོས་ཀྱི་རྒྱབ་ཏུ་ཨང་རྟགས་ ༨༦ འཁོད་དེ། དེའི་ཡང་སྟེང་དུ་བོད་མིའི་རིག་གཞུང་གིས་གཅེས་ནོར་ཏུ་བརྩི་བའི་ནོར་བུའི་མཚོན་རྟགས་ཅན་གྱི་སྟོད་གོས་ཤིག་མནབས་ནས་ཕྱག་གཡས་བར་འཁར་རྒྱུགས་ཐོགས་ཤིང་ཕྱག་གཡོན་པར་མ་ཎ་ནི་ཕྲེང་བ་ཐོགས་ནས་སྐོར་བར་ཕེབས་བཞིན་པའི་བརྙན་པར་ཞིག་ཁྱབ་སྤེལ་ཆེས་ཆེར་འགྲོ་བཞིན་འདུག བོད་བཞུགས་རྩོམ་པ་ཚེ་རིང་འོད་ཟེར་ལགས་ཀྱིས་བརྙན་པར་དེ་ནི་ལྷ་སའི་ཇོ་ཁང་གི་མདུན་དུ་མིན་པར། ར་མོ་ཆེ་གཙུག་ལག་ཁང་གི་མདུན་ཐང་དུ་ཡིན་སྲིད་པ་ལས།  ལྷ་སའི་བར་སྐོར་ནི་ད་ཆ་རྒྱ་ནག་གི་ཡུལ་སྐོར་ལྟེ་གནས་ཤིག་ཏུ་ཆགས་ཡོད་པར་འགྲེལ་བརྗོད་གནང་འདུགའདི་བཞིན་འདི་གའི་གསར་འགོད་པས་བོད་ནང་དུ་འབྲེལ་བ་བྱས་སྐབས་འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་ལོ་བརྒྱ་འཁོར་བ་དང་བསྟུན་ནས་བོད་མཚོ་སྔོན་གྱི་ཁུལ་དུ་ཡང་སྔར་ལས་དམ་དྲག་ཇེ་ཆེར་ཕྱིན་ཡོད་པ་དང་འབྲེལ་ནས། བོད་མི་རྣམས་ཀྱིས་དུས་རྒྱུན་ནས་སྐུའི་འཁྲུངས་སྐར་ཉིན་རང་ཁྱིམ་ནས་མར་མེ་སྒྲོན་ཏེ་ཞལ་འདོན་གསོག་སྒྲུབ་སོགས་གནང་གི་ཡོད་པར་འགྲེལ་བརྗོད་གནང་སོང་།གཞི་རྩའི་འདི་ལོར་རྒྱ་ནག་གི་རིམས་ནད་དང་འབྲེལ་ནས་རང་བཞུང་བཀའ་དྲུང་ཡིག་ཚང་གིས་རྒྱ་གར་གྱི་ཡུལ་ཁྲིམས་གཞིར་བཟུང་གིས་བོད་མི་རྣམས་ཀྱིས་སྔར་སྲོལ་བཞིན་མང་ཚོགས་འདུ་འཛོམས་རང་བཞིན་གྱིས་འཁྲུངས་སྐར་སྲུང་བརྩི་མི་གནང་བར་རང་ཁྱིམ་ནས་དགའ་སྐྱིད་ལ་རོལ་རྒྱུའི་སྐུལ་མ་གནང་བ་ལྟར། མང་ཚོགས་ཀྱིས་ཀྱང་རང་ཁྱིམ་དང་ཡང་ན་ཤིང་ནགས་ཀྱི་ཁྲོད་དང་མགོན་པོ་གང་གི་སྐུ་པར་སྒྲིག་ཤོམ་གནང་སྟེ་སྐུའི་འཁྲུངས་སྐར་གྱི་སྤྲི་གོར་བགོ་འགྲེམས་བྱེད་པ།  དེ་བཞིན་སྤྱི་ཚོགས་དྲ་ལམ་སོགས་སུ་ཡང་མགོན་པོ་གང་ལ་ཆེད་བསྟོད་ཀྱི་གླུ་གཞས་ཕྱོགས་བསྒྲིགས་སོགས་ཀྱི་ལམ་ནས་སྐུའི་འཁྲུངས་སྐར་སྲུང་བརྩི་གནང་བའི་རྣམ་པ་ཅི་རིགས་མཐོང་རྒྱུ་འདུགཁ་སང་མགོན་པོ་གང་གིས་སྐུའི་འཁྲུངས་སྐར་དང་སྟབས་བསྟུན་གྱིས་བཀའ་སློབ་སྩལ་བའི་ནང་དུ། མགོན་པོ་གང་ཉིད་ཀྱིས་སྐུ་ཚེ་ཧྲིལ་པོར་འགྲོ་བ་སྤྱི་དང་ཁོར་ཡུག་སྲུང་སྐྱོབ་ཀྱི་སླད་ཞབས་ཞུ་མཛད་རྒྱུ་དང་། དེ་བཞིན་རྒྱ་གར་དུ་བྲོས་བྱོལ་ལ་ཕེབས་ཀྱང་རང་དབང་ལུང་པའི་རང་དབང་རྣམས་སྤྱད་ནས་རྒྱ་གར་གྱི་གནའ་བོའི་རིག་གནས་དང་ཆོས་ལུགས་མཐུན་སྒྲིལ་སོགས་གོང་སྤེལ་མཛད་བཞིན་པ་དེ་ནི་༸སྐུའི་འཁྲུངས་སྐར་གྱི་ཕྱག་རྟགས་ཤིག་ཡིན་ཞེས་བཀའ་སྩལ་བ་དང་ལྷན་དུ་མཛའ་གྲོགས་རྣམ་པ་གཙོས་རྗེས་འབྲང་བ་རྣམས་ཀྱིས་ཀྱང་འཚེ་མེད་ཞི་བ་དང་སྙིང་རྗེ་གཉིས་རང་ཉིད་ཀྱི་མི་ཚེའི་མཐའ་མཇུག་གི་བར་དུ་ཕྱག་བསྟར་གནང་རྒྱུའི་ཐུགས་རེ་ཡོད་ཅེས་བཀའ་སྩལ་ཡོད་པ་རེད།

རྒྱ་ནག་དམར་ཤོག་ཚོགས་པ་བཙུགས་ཏེ་ལོ་ངོ་བརྒྱ་འཁོར་བའི་དུས་སྐབས་དང་བསྟུན་ཨ་མི་རི་ཀའི་གྲོས་ཚོགས་འོག་མའི་འཐུས་མི་སྐུ་ཞབས་ Scott Perry ལགས་ཀྱིས་ཡུལ་དེའི་གྲོས་ཚོགས་ནང་དུ་བོད་དེ་རང་བཙན་གཙང་མའི་རྒྱལ་ཁབ་ཅིག་ཏུ་ངོས་འཛིན་གནང་དགོས་པའི་ཁྲིམས་འཆར་ཆེད་འདོན་གནང་འདུགདེ་ཡང་ཕྱི་ཚེས་ ༣༠ ཉིན་སྐུ་ཞབས་ Scott Perry ལགས་ཀྱིས་ཆེད་འདོན་གནང་བའི་ཁྲིམས་འཆར་དེའི་ནང་དེ་སྔ་ཕྱི་ལོ་ ༡༩༩༦ ལོར་ཨ་རིའི་ཚོང་འབྲེལ་གྱི་ཁྲིམས་ཡིག་ནང་བོད་དེ་རྒྱ་ནག་མི་དམངས་སྤྱི་འཐུན་རྒྱལ་ཁབ་དང་ཐ་དད་པའི་རྒྱལ་ཁབ་ཅིག་ཏུ་བཀོད་ཡོད་པ་མ་ཟད་ཨ་མི་རི་ཀའི་རྩིས་ལོ་ ༡༩༩༢ དང་ ༡༩༩༣ གྱི་ཕྱི་སྲིད་འབྲེལ་ལམ་ཁྲིམས་ཡིག་ནང་བོད་དེ་བཙན་དབང་གིས་དབང་སྒྱུར་བྱས་པའི་རྒྱལ་ཁབ་ཅིག་ཡིན་པར་ངོས་འཛིན་ཁ་གསལ་འཁོད་པ་ལུང་འདྲེན་གནང་བ་དང་སྦྲགས་ཏེ་ཨ་མི་རི་ཀའི་སྲིད་གཞུང་གི་ངོས་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཕྱི་ལོ་ ༡༩༥༡ ལོར་ཁྲིམས་འགལ་གྱིས་བོད་ནང་བཙན་འཛུལ་བྱས་པ་ལས་དེའི་སྔོན་ལ་བོད་དེ་རང་བཙན་གཙང་མའི་རྒྱལ་ཁབ་ཅིག་ཡིན་པར་ངོས་འཛིན་གནང་དགོས་པ་དང་། དེ་ཡང་རྒྱ་ནག་གིས་བརྗོད་བཞིན་པའི་བོད་ཟེར་བའི་ས་ཁུལ་ཙམ་མིན་པར་བོད་ཆོལ་ཁ་གསུམ་ཁྱོན་ཡོངས་ཀྱི་ས་ཁུལ་ཡོངས་རྫོགས་ཚུད་པའི་བོད་ཅེས་པ་དེར་ངོས་འཛིན་བྱེད་དགོས་ཞེས་འཁོད་འདུག ཁྲིམས་འཆར་དེར་ཨ་རི་སྲིད་གཞུང་ནས་རྒྱ་ནག་དམར་ཤོག་ཚོགས་པས་ཁྲིམས་འགལ་ཐོག་བོད་བཙན་བཟུང་བྱས་པ་ལ་དངོས་ཤུགས་བརྒྱུད་གསུམ་ནས་རྒྱབ་སྐྱོར་བྱེད་མཁན་ཚོར་ཉེས་ཆད་འགེལ་དགོས་པ་མ་ཟད་བོད་མིའི་སྒྲིག་འཛུག་འདི་བཞིན་བོད་ཀྱི་ཁྲིམས་མཐུན་གྱི་གཞུང་གཅིག་པུ་དེ་ཡིན་པར་ངོས་ལེན་དང་སྦྲགས། ཨ་རིའི་སྲིད་འཛིན་སྐུ་ཞབས་ Joe Biden མཆོག་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཁྲིམས་འཆར་འདི་གཏན་འབེབས་གནང་བའི་ལོ་གཅིག་གི་ནང་ཚུད་ཨ་རིར་གཞུང་འབྲེལ་རྒྱལ་དོན་འཚམས་གཟིགས་སུ་གདན་ཞུ་གནང་དགོས་པ་གསལ་འདུགཁ་ཉིན་སྐུ་ཞབས་ Scott Perry ལགས་ནས་བོད་དེ་རང་བཙན་གཙང་མའི་རྒྱལ་ཁབ་ཅིག་ཏུ་ངོས་འཛིན་གནང་དགོས་པའི་ཁྲིམས་འཆར་གྲོས་ཚོགས་སུ་ཆེད་འདོན་གནང་སྐབས་གྲོས་ཚོགས་འཐུས་མི་སྐུ་ཞབས་ Thomas Tiffany ལགས་དང་ Scott DesJarlais ལགས་རྣམ་གཉིས་ཀྱིས་རྒྱབ་སྐྱོར་གནང་ཡོད་པ་དང་།ད་ལྟའི་ཆར་ཁྲིམས་འཆར་དེ་ཨ་མི་རི་ཀའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་ལ་ཕུལ་འདུག གཞི་རྩའི་གྲོས་ཚོགས་འོག་མའི་འཐུས་མི་སྐུ་ཞབས་ Scott Perry ལགས་ནས་འདས་ལོའི་ཕྱི་ཟླ་ལྔ་པའི་ནང་ལ་ཡུལ་དེའི་གྲོས་ཚོགས་སུ་ཨ་རིའི་ངོས་ནས་བོད་རང་སྐྱོང་ལྗོངས་ཟེར་བ་དེ་རང་བཙན་གྱི་རྒྱལ་ཁབ་ཅིག་ཏུ་ངོས་འཛིན་བྱེད་དགོས་པའི་ཁྲིམས་འཆར་ཞིག་བཏོན་ཡོད་པ་དང་སྐབས་དེར་བོད་མིའི་གཞུང་འབྲེལ་མ་ཡིན་པའི་ཚོགས་པ་ཆེས་གྲས་ཁག་ཅིག་ནས་ཁྲིམས་འཆར་དེར་བསྐྱར་བཅོས་དང་སྦྲགས་བོད་རང་སྐྱོང་ལྗོངས་ཙམ་མ་ཡིན་པར་བོད་ཆོལ་ཁ་གསུམ་ཆ་ཚང་ཚུད་དགོས་པའི་སྙན་ཞུ་ཕུལ་ཡོད་པ་རེད། སྐུ་ཞབས་ Scott Perry ལགས་ཀྱིས་ད་རེས་བོད་དོན་དང་འབྲེལ་ཁྲིམས་འཆར་གསར་པ་ཞིག་ཆེད་འདོན་གནང་བ་མ་ཟད་དེ་སྔ་ཨ་རིའི་གྲོས་ཚོགས་གོང་འོག་གཉིས་ནས་བོད་དོན་རྒྱབ་སྐྱོར་གྱི་སྲིད་བྱུས་ ༢༠༠༢ གཙོས་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་བ་རྣམས་ངེས་པར་དུ་ལག་བསྟར་གནང་དགོས་པའི་ཞུ་སྐུལ་གནང་མཁན་གྱི་གྲོས་ཚོགས་འཐུས་མི་ཞིག་ཆགས་ཀྱི་ཡོད་པ་རེད།

འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་མི་ལོ་བརྒྱ་འཁོར་བའི་དུས་དྲན་དང་། དེ་བཞིན་རྒྱ་ནག་གིས་བོད་ས་དབང་བསྒྱུར་བྱས་ནས་མི་ལོ་བདུན་ཅུ་འཁོར་བའི་དུས་ཚིགས་གཉིས་དང་འབྲེལ། རྒྱ་ནག་གིས་བོད་དབུས་ཁུལ་གྱི་གཙོ་བྱས་པའི་བོད་ས་སྤྱི་ཡོངས་ལ་དམ་དྲག་སྔར་ལྷག་བྱེད་མུས་ཁྲོད། ཁ་སང་རྒྱ་ནག་གིས་ཕོ་བྲང་པོ་ཏ་ལའི་མདུན་དུ་རྒྱ་ནག་དམར་ཤོག་གཞུང་ཚུགས་ནས་མི་ལོ་བརྒྱ་འཁོར་བར་སྤྲོ་སེམས་ཁོལ་བའི་ངང་ནས་རྟེན་འབྲེལ་ཞུ་ཞེས་འཕྲེད་དར་ཆེན་པོ་ཞིག་སྦྱར་བ་མ་ཟད། བོད་མི་རྣམས་མཆོད་མཇལ་དུ་བསྐྱོད་རྒྱུར་ཡང་དམ་དྲག་ཤུགས་ཆེར་བྱེད་བཞིན་འདུག དེའང་མདང་དགོང་སྤྱི་ཚོགས་དྲ་ལམ་དུ་པོ་ཏ་ལའི་མདུན་ཐང་ནས་སྐྱོན་པའི་བརྙན་ཞིག་ཁྱབ་སྤེལ་ཆེས་ཆེར་འགྲོ་བཞིན་པའི་ནང་དུ། མཆོད་མཇལ་ལ་ཕེབས་བཞིན་པའི་བོད་པའི་བུད་མེད་ཅིག་གིས་ཚོར་ཤུགས་དྲག་པོའི་ཐོག་ནས་ངུ་འབོད་དང་བཅས། པོ་ཏ་ལའི་གཡས་གཡོན་ཡོངས་རྫོགས་རྒྱ་མིས་ཁེངས་པ་དང་། བོད་མི་རྣམས་ཕྱག་སྐོར་ལ་འགྲོ་རྒྱུར་ཡང་དམ་དྲག་བྱས་པའི་གནས་སྟངས་ཕྱིར་བསྒྲགས་བྱས་པ་མ་ཟད། པོ་ཏ་ལའི་གྱང་ངོས་སུ་རྒྱ་ནག་དམར་ཤོག་གཞུང་ཚུགས་ནས་མི་ལོ་བརྒྱ་འཁོར་བར་རྟེན་འབྲེལ་གྱི་སྦྱར་ཡིག་བཤམ་སྟོན་བྱས་པ་ཕྱིར་མངོན་དང་འབྲེལ་ད་ཆ་བོད་ཁུལ་དེ་རྒྱ་ནག་ལྟ་བུར་འགྱུར་བཞིན་པར་འ་ཆད་འུ་ཐུག་ཀྱིས་སེམས་ཀྱི་སྡུག་གསལ་སྟོན་གནང་འདུག རྩ་བའི་རྒྱ་ནག་གིས་ཏོག་དབྱིབས་ནད་དུག་ལ་ཁ་གཡར་ནས་འདི་ལོའི་ས་ག་ཟླ་བའི་སྐབས་བོད་མི་རྣམས་ཕོ་བྲང་པོ་ཏའི་ཁུལ་དུ་མཆོད་མཇལ་དང་ཕྱི་སྐོར་ལ་ཕེབས་རྒྱུར་དམ་དྲག་བྱས་པ་མ་ཟད། མཆོད་མཇལ་གྱི་དུས་ཚོད་སྔ་དྲོ་ཚོུད་ ༩ ནས་ ༢ བར་མ་གཏོགས་མེད་པའི་ཚད་འཛིན་བཟོས་ཀྱང་། ཕྱོགས་གཞན་ནས་ཡུལ་སྐོར་སྤྲོ་འཆམ་པ་རྣམས་པོ་ཏ་ལར་མུ་མཐུད་བསྐྱོད་བཅུག་ཏེ་ད་ཆ་རྒྱ་ནག་གི་དུས་སྟོན་བསླེབ་ལ་ཉེ་བ་དང་བསྟུན་ནས་ཕོ་བྲང་པོ་ཏ་ལའི་ཁུལ་དུ་རྒྱ་ནག་ཧན་མི་རིགས་ཀྱི་ཡུལ་སྐོར་སྤྲོ་འཆམ་པ་སྔར་ལས་ཇེ་མང་དུ་འགྲོ་བཞིན་པ་རེད་འདུག མདང་དགོང་གི་ཕོ་བྲང་པོ་ཏ་ལའི་མདུན་ཐང་གི་ཡུལ་དངོས་ཀྱི་བརྙན་དེ་སྤྱི་ཚོགས་དྲ་ལམ་དུ་ཁྱབ་སྤེལ་བྱུང་བ་དང་བསྟུན། བོད་མི་རྣམས་ཀྱིས་བློ་ཕམ་ཆེན་པོ་དང་བཅས་རྒྱ་ནག་གི་གཞུང་མང་ནས་དམར་ཤོག་ཚོགས་པ་ཚུགས་ནས་ལོ་བརྒྱ་འཁོར་བའི་དུས་དྲན་ལ་རྟེན་འབྲེལ་ཞུ་བཞིན་ཡོད་ཀྱང་། བོད་ནང་གི་བོད་མི་རྣམས་དཀའ་སྡུག་ཚད་མེད་མྱངས་དང་མྱོང་བཞིན་ཡོད་སྐོར་འགྲེལ་བརྗོད་གནང་བ་མ་ཟད། ལྷ་སའི་ནང་གི་བརྙན་དེ་ལེན་མཁན་བུད་མེད་དེའི་གནས་སྟངས་ཅི་ཆགས་ལ་ཐུགས་འཚབ་ཆེན་པོ་གནང་བཞིན་པ་རེད་འདུག འདི་གའི་གསར་འགོད་པས་བཞུགས་སྒར་དུ་རྟེན་གཞིི་བྱས་པའི་བོད་གནས་ལྟ་ཞིབ་ཁང་གི་འགན་འཛིན་དབང་ལྡན་སྐྱབས་ལགས་སུ་བརྙན་ནང་གསལ་བའི་ལྷ་སའི་གནས་སྟངས་སྐོར་ལ་བཀའ་འདྲི་ཞུ་སྐབས། འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་ལོ་བརྒྱ་འཁོར་བ་དང་། རྒྱ་ནག་གིས་བོད་ས་དབང་བསྒྱུར་བྱས་ནས་ལོ་བདུན་ཅུ་འཁོར་བའི་དུས་ཚིགས་དང་འབྲེལ་ནས། རྒྱ་ནག་གིས་སྔར་ལོ་ནས་བོད་ཁུལ་གྱི་དགོན་པ་གྲྭ་ཚང་དང་སློབ་གྲྭ དེ་བཞིན་བོད་མིའི་སྤྱི་ཚོགས་གང་སར་དྲིལ་བསྒྲགས་ཀྱི་ལས་རིགས་སྣ་མང་ཞིག་གཉེར་བཞིན་པ་ལུང་འདྲེན་གནང་བ་དང་སྦྲགས། ད་ཆ་རྒྱ་ནག་གིས་བོད་མི་རྣམས་མཆོད་མཇལ་དང་བསང་གསོལ་སོགས་ཀྱི་མཚོན་པའི་འདུ་འཛོམས་ཀྱི་རིགས་ལ་བཀག་སྡོམ་བྱེད་ཤུགས་ཆེ་རུ་གཏོང་བཞིན་པ་དེ་ཡིས། རྒྱ་ནག་གིས་བོད་མི་རྣམས་ཀྱིས་ས་བྱི་ལོའི་ཞི་རྒོལ་ལྟ་བུའི་རྔམ་སྟོན་ཁྲོམ་སྐོར་རིགས་ཡོང་བར་དོགས་ནས་ཕྱོགས་ཡོངས་ནས་སྔ་ས་ནས་དམ་དྲག་བྱེད་བཞིན་པ་ཞིག་ཡིན་སྐོར་ངོ་སྤྲོད་གནང་སོང་། གཞན་ཡང་ཁོང་གིས། རྒྱ་ནག་གིས་འདི་ལོའི་དམར་ཤོག་གཞུང་བཙུགས་ནས་ལོ་བརྒྱ་འཁོར་བའི་དུས་དྲན་དང་བསྟུན་ནས་བོད་ཁུལ་དུ་དྲིལ་བསྒྲགས་ཀྱི་རིགས་མང་པོ་སྤེལ་བཞིན་ཡོད་པའི་ཁོངས་ནས། ཁ་སང་གི་བརྙན་ལམ་གྱི་ཕོ་བྲང་པོ་ཏ་ལའི་སྟེང་དུ་འཕྲེད་དར་ཆེན་པོ་སྦྱར་ཡོད་པ་དེ་ཙམ་མིན་པར། བོད་ཁུལ་གྱི་དགོན་སྡེ་མང་པོའི་ནང་དུ་རྒྱ་ནག་གི་རྒྱལ་དར་སྒྲེང་འཛུགས་དང་རྒྱ་ནག་གི་དུས་སྟོན་ལ་དགའ་བསུ་ཡོད་པའི་ཚིག་སྦྱོར་འཁོད་པའི་འཕྲེད་དར་ཆེན་པོ་སྦྱར་བ་དང་། དེ་བཞིན་གྲྭ་མང་གི་ལག་ཏུ་ཡང་རྒྱ་ནག་གི་དྲིལ་བསྒྲགས་ཀྱི་འཕྲེད་དར་དེ་ཚོ་བཞག་ནས་པར་དང་བརྙན་བླངས་ནས་སྤྱི་ཚོགས་དྲ་ལམ་དུ་ཁྱབ་སྤེལ་བྱེད་བཞིན་ཡོད་པ་སོགས་ཀྱང་འགྲེལ་བརྗོད་གནང་ཡོད།  གཞི་རྩའི་རྒྱ་ནག་གིས་བོད་ཁུལ་དུ་འཛུགས་སྐྲུན་གྱི་ལས་གཞི་སྣ་མང་སྤེལ་བ་དང་ལྷན་དུ། རྒྱ་ནག་གི་ཧན་མི་རིགས་ས་ཡ་མང་པོ་བོད་ཁུལ་དུ་ཡུལ་སྐོར་སྤྲོ་འཆམ་ལ་ཡོང་བཞིན་ཡོད་པ་ལྟར། ཕྱི་ལོ་ ༢༠༡༩ ལོར་རྒྱ་ནག་གི་ཡུལ་སྐོར་བ་ས་ཡ་ ༤༠ ལྷག་བོད་ཁུལ་དུ་འབྱོར་ཡོད་པའི་གནས་ཚུལ་གསར་ལམ་ཁག་ཏུ་ཐོན་པ་ལྟར། ད་ཆ་བོད་མི་རྣམས་རང་ས་རང་ཡུལ་དུ་གྲངས་ཉུང་མི་རིགས་ཆགས་བཞིན་པ་མ་ཟད། རྒྱ་ནག་གི་སྲིད་བྱུས་འདྲ་མིན་གྱི་འོག་ཏུ་བོད་མིའི་ཆོས་དང་རིག་གཞུང་ལ་དོ་ཕོག་ཆེན་པོ་ཐེབས་བཞིན་ཡོད་པའི་ཐད་ནས། ཕྱི་ལོག་གི་ཉམས་ཞོབ་པ་རྣམས་ཀྱིས་བོད་ཁུལ་ནི་དུས་རབས་ཉེར་གཅིག་ནང་གི་མི་སེར་སྤེལ་ཡུལ་གྱི་ས་ཁུལ་ཞིག་ཆགས་ཡོད་པར་མངོན་གསལ་གནང་ཡོད་པ་རེད།

ཕྱི་ལོ་ ༢༠༡༩ ལོའི་ཕྱི་ཟླ་ ༧ ཚེས་ ༢༧ ཉིན་འཛིན་བཟུང་གིས་ད་བར་ལོ་ངོ་གཅིག་དང་ཕྱེད་ཀ་ལྷག་ཙམ་གྱི་རིང་གར་སོང་ཆ་མེད་དུ་གྱུར་བའི་གྲྭ་རིན་ཆེན་ཚུལ་ཁྲིམས་ལགས་ད་ཆ་སི་ཁྲོན་ཞིང་ཆེན་གྱི་ Mianyang བཙོན་ཁང་དུ་གཞན་ལ་འབྲེལ་ལམ་གནང་ས་མེད་པར་བཙོན་འཇུག་བྱས་ཡོད་པ་མངོན་གསལ་གནང་འདུགགྲྭ་རིན་ཆེན་ལགས་ཀྱི་ནང་མིས་ཁོང་གི་གནས་སྟངས་དང་ས་གནས་གང་དུ་ཡོད་མེད་སོགས་ཀྱི་ཐོག་ལ་འདྲི་རྩད་ལན་མང་བྱས་པའི་རྗེས་སུ་འདི་ལོའི་ཕྱི་ཟླ་ ༣ ཚེས་ ༢༣ ཉིན་རྔ་བ་ཁུལ་གྱི་མི་མང་བདེ་འཇགས་ལས་ཁུངས་ནས་གྲྭ་རིན་ཆེན་ཚུལ་ཁྲིམས་ལགས་སུ་ལོ་ངོ་བཞི་དང་ཕྱེད་ཀའི་བཙོན་འཇུག་གི་ཉེས་ཆད་ཕོག་ཡོད་སྐོར་གྱི་བརྡ་ཁྱབ་འབྱོར་ཡོད་པ་དང་། ད་ཆ་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ཁོང་ Mianyang བཙོན་ཁང་དུ་བཙོན་འཇུག་བྱས་ཡོད་པ་ཤེས་རྟོག་བྱུང་ཡོད་པ་དེ་ལྟར་ཡང་། ཁོང་ལ་ཁྲིམས་བཤེར་སོགས་བྱས་པའི་ཞིབ་ཕྲའི་གནས་ཚུལ་གང་ཡང་ཐོན་མེད་པ་རེད། སྤྱིར་རིན་ཆེན་ལགས་ཀྱི་གནས་སྟངས་དང་འབྲེལ་ནས་གཟའ་འཁོར་སྔོན་མའི་ནང་རྒྱལ་སྤྱིའི་ཉེས་ཡངས་ཚོགས་པས་རིན་ཆེན་ལགས་ཀྱི་གནས་བབ་གཙོས་ཁོང་གི་ནང་མི་དང་ཁྲིམས་རྩོད་པ་རྣམས་ཁོང་དང་ཐུག་འཕྲད་གནང་མི་ཆོག་པའི་ངལ་བ་འཕྲད་སྐོར་ལ་གླེང་སློང་རིམ་པ་གནང་ཡོད་པ་རེད། རྒྱལ་སྤྱིའི་བོད་དོན་ལས་འགུལ་ཁང་གིས་རྔ་བ་ཁུལ་གྱི་མི་མང་བདེ་འཇགས་ལས་ཁུངས་ནས་ཕྱི་ཟླ་གསུམ་པའི་ནང་ཁོང་གི་ནང་མི་འབོད་སྒུག་བྱེད་སྐབས་གྲྭ་རིན་ཆེན་ལགས་སུ་ཁ་བྲལ་གཏོང་ཐབས་ཀྱི་དོགས་སློང་འོག་ཉེས་འཛུགས་བྱས་ཡོད་པ་དང་། རིན་ཆེན་ལགས་ཀྱི་འཕྲོད་བསྟེན་གྱི་གནས་བབ་དང་ཉེས་ཆད་ཀྱི་གནས་བབ་སོགས་ཀྱི་སྐོར་ལ་བཀའ་མོལ་གནང་སླད་ཁོང་གི་པཱ་ལགས་དང་ནང་མིས་བཙོན་ཁང་དུ་ཆེད་བཅར་ཞུ་རྒྱུར་འབད་བརྩོན་དང་ཞུ་སྐུལ་ལན་མང་ཞུས་ཀྱང་ད་བར་དེ་ལྟར་བྱུང་མེད་པ་མ་ཟད། ཉེས་ཆད་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་བྱུང་མེད་སྟབས་ཁོང་གི་གནས་སྟངས་དེ་ཛ་དྲག་གི་རང་བཞིན་དུ་འགྱུར་བཞིན་ཡོད་པར་གསལ་བཏོན་གནང་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རི་ San Francisco ལ་རྟེན་གཞིར་བྱས་པའི་ Dui Hua Foundation ཞེས་པའི་ཐེབས་རྩ་ཁང་གིས་རྒྱ་ནག་གཞུང་གིས་ཁྲིམས་ལུགས་སྐྱོང་སྟངས་དང་དཔྱད་ཁྲ་གཏོང་སྟངས་ཀྱི་སྐོར་ལ་ཉམས་ཞིབ་གནང་བའི་ཞིབ་འཇུག་སྙན་ཐོ་ཞིག་ལུང་འདྲེན་གནང་བར་བོད་དཀར་མཛེས་དང་རྔ་བ་ཁུལ་དུ་ཁྲིམས་ཐག་གཅོད་སྟངས་དེ་བཞིན་ཆེས་ཛ་དྲག་དང་ཉེན་ཁ་ཆེ་ཤོས་ཀྱི་ས་གནས་གཙོ་བོ་ཡིན་པར་གསལ་བཏོན་གནང་བ་དང་ས་ཁུལ་དེ་དག་ལ་ཆབ་སྲིད་དང་འབྲེལ་བའི་ཐོག་ལ་ཁྲིམས་ཀྱི་ཉེས་ཆད་ཆེན་པོ་འཕོག་ཉེན་ཡོད་པ་མ་ཟད། ཁ་བྲལ་རིང་ལུགས་སོགས་ཀྱི་ཉེས་མིང་དང་སྦྱར་ནས་ཉེས་འཛུགས་བྱེད་ཀྱི་ཡོད་པ་དང་། Dui Hua Foundation ཡིས་ཆབ་སྲིད་བཙོན་པའི་ཐོ་གཞུང་གི་སྐོར་ལ་གསལ་བཏོན་གནང་བར་དཀར་མཛེས་ཁུལ་དུ་རྒྱལ་ཁབ་བདེ་འཇགས་ཀྱི་གྱོད་གཞི་དང་འབྲེལ་ནས་གྱོད་གཞི་ ༢༨ ཁོངས་སུ་ ༢༦ དེ་ཁ་བྲལ་རིང་ལུགས་ཀྱི་ནག་ཉེས་འཛུགས་པའི་ཁྲིམས་ཆད་ཆགས་ཀྱི་ཡོད་པ་མ་ཟད་རྔ་བ་ཁུལ་དུའང་གྱོད་གཞི་ ༢༠ ཡི་ཁོངས་སུ་ ༡༣ ཁ་བྲལ་གྱི་ཉེས་འཛུགས་ཆགས་ཀྱི་ཡོད་སྐོར་བཀོད་ཡོད་པ་དང་། བརྒྱ་ཆར་གཞིགས་ན་ཆབ་སྲིད་ཀྱི་གནད་དོན་དང་འབྲེལ་ནས་བོད་རིགས་ཁོ་ནར་ཁ་བྲལ་གྱི་ཉེན་འཛུགས་བྱས་པ་བརྒྱ་ཆ་ ༦༠ ཆགས་ཀྱི་ཡོད་པར་ལུང་འདྲེན་གནང་འདུག Mianyang བཙོན་ཁང་དེ་སི་ཁྲོན་ཞིང་ཆེན་གྱི་རྒྱལ་ས་ཁྲེང་ཏུའི་ནང་དུ་ཡོད་པ་དང་བཙོན་ཁང་དེའི་ནང་བོད་ཤར་ཕྱོགས་ཁུལ་གྱི་བོད་མི་རྣམས་བཙོན་འཇུག་བྱེད་ས་དང་། དེ་སྔ་བོད་ཀྱི་ཆབ་སྲིད་བཙོན་པ་ཆོས་སྐྱིད་ལགས་བཙོན་ཁང་དེའི་ནང་མནར་གཅོད་མྱངས་ནས་ཕྱི་ལོ་ ༢༠༡༩ ཕྱི་ཟླ་ ༡ ནང་གློད་བཀྲོལ་བཏང་ཡོད་ཀྱང་། བཙོན་ཁང་ནང་གི་སྡུག་སྦྱོང་མནར་གཅོད་ཀྱི་རྐྱེན་གྱིས་ཕྱི་ལོ་ ༢༠༢༠ ལོར་འདས་གྲོངས་སུ་གྱུར་ཡོད་པ་བཀོད་འདུག

སྤྱི་ཚོགས་དྲ་ལམ་བརྒྱུད་འདི་གར་གནས་ཚུལ་བཏང་འབྱོར་བྱུང་བར་གཞིགས་ན། རྒྱ་ནག་དམར་ཤོག་གཞུང་གིས་འདི་ལོའི་ཟླ་བ་བཞི་བའི་ནང་བོད་རང་སྐྱོང་ལྗོངས་ཀྱི་ཏང་ཡོན་ལས་བྱེད་དམ་དམར་ཤོག་ཚོགས་མི་རྣམས་ལ་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་ཞེས་པ་ཞིག་བཀྲམས་པའི་ནང་དུ། སྤྱི་ཡོངས་ཀྱི་ཆོས་ལུགས་ཀྱི་བྱེད་སྒོ་ཡོངས་ལ་འབྲེལ་ཐག་བཅད་ནས་མར་ཁེ་སི་རིང་ལུགས་ཀྱི་དངོས་གཙོ་སྨྲ་བ་དང་ལྷ་མེད་སྨྲ་བ་མཐའ་འཁྱོངས་ལག་བསྟར་བྱེད་དགོས་བར་སྐུལ་མ་བཏང་འདུགརྩ་བའི་ཐེངས་འདིར་རྒྱ་ནག་གིས་སློབ་སྦྱོང་གི་ཡིག་ཆའི་ཆ་ཤས་འོག་བོད་རིགས་དམར་ཤོག་ཚོགས་མི་རྣམས་ལ་བཏང་བའི་ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་ཞེས་པ་དེ་ཀྲུང་གོའི་གུང་ཁྲན་ཏང་གི་སྒྲིག་ཡིག་དང་།  གནས་བབ་གསར་པའི་འོག་གི་ཏང་ནང་གི་ཆབ་སྲིད་འཚོ་བའི་སྐོར་གྱི་ཚད་གཞི་འགའ་ཞིག  དེ་བཞིན་ཀྲུང་གོའི་གུང་ཁྲན་ཏང་གི་ཏང་ཡོན་ལ་སློབ་གསོ་དང་དོ་དམ་བྱེད་པའི་ལས་ཀའི་སྲོལ་ཡིག་གི་ཁྲིམས་སྲོལ་གཞིར་བཟུང་། བོད་རང་སྐྱོང་ལྗོངས་ཟེར་བའི་དོན་དངོས་དང་ཟུང་འབྲེལ་བྱས་ནས་ཚོད་ལྟའི་ཚུལ་དུ་བཟོས་པ་ཞིག་ཡིན་ཚུལ་བསྒྲགས་འདུག ཆོས་ལ་དད་པ་མི་བྱེད་པའི་བྱ་སྤྱོད་ཚད་གཞི་དེ་དག་གི་ནང་དུ། བོད་རིགས་དམར་ཤོག་ཚོགས་མི་རྣམས་ཀྱིས། ཏཱ་ལ་སྐུ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཟེར་བ་དང་དབྱེ་མཚམས་གསལ་པོ་མཐའ་གཅིག་ཏུ་ཕྱེ་ནས་དར་ཆ་གསལ་སྟོན་གྱིས་ཏཱ་ལའི་རུ་ཚོགས་ཀྱིས་ཆོས་ལུགས་ལ་བརྟེན་ནས་བཟོས་པའི་ལྡོག་ཕྱོགས་ཀྱི་ཤུགས་རྐྱེན་ངན་པ་མེད་པ་བཟོ་དགོས་པ་མ་ཟད། ཕྱི་རྒྱལ་དུ་བསྐྱོད་དེ་ཏཱ་ལ་སྐུ་ཕྲེང་བཅུ་བཞི་པར་མཇལ་བའམ་ཡང་ན་ཏཱ་ལ་སྐུ་ཕྲེང་བཅུ་བཞི་པ་དང་ཏཱ་ལའི་རུ་ཚོགས་ཀྱིས་གཉེར་བའི་ཆོས་ཚོགས་དང་། ཆོས་ལུགས་བྱེད་སྒོ་སྤེལ་རིགས་ནང་ཞུགས་པར་དུས་ཐོག་ཏུ་བཀག་འགོག་བྱ་དགོས་པ། དེ་བཞིན་ཁྱིམ་ཚང་དུ་མཆོད་གཤོམ་མི་འཛུགས་པ་དང་། བག་སྟོན་དང་གཤིན་པོ་དུར་སྐྱེལ་གྱི་མཛད་སྒོ་སོགས་དམངས་སྲོལ་བྱེད་སྒོའི་སྐབས་ཆོས་ལུགས་མི་སྣ་གདན་དྲངས་ནས། ཆོས་ལུགས་ཀྱི་བྱེད་སྒོ་སྤེལ་བར་ངེས་པར་དུ་སྔོན་ནས་གོང་རིམ་ལ་སྙན་སེང་ཞུ་དགོས་པ། ལུས་ཐོག་ཏུ་ཆོས་ལུགས་ཀྱི་མཚོན་རྟགས་མི་བརྐོ་བ་སོགས་ཆོས་ལུགས་དང་ཡོངས་སུ་འབྲེལ་ཐག་གཅོད་དགོས་པའི་བཀའ་རྒྱ་བཏང་བ་མ་ཟད། ཕྱི་རུ་ཡོད་དུས་ཡིད་མི་ཆེས་ཀྱང་ནང་དུ་སླེབས་དུས་ཡིད་ཆེས་པ། ལས་གནས་སུ་ཡོད་དུས་ཡིད་མི་ཆེས་ཀྱང་ལས་འཁྱུར་ངལ་གསོ་བཞག་དུས་ཡིད་ཆེས་བ་བཅས་ཀྱི་བྱ་སྤྱོད་ལ་གཏན་འགོག་མཐའ་གཅིག་ཏུ་བྱ་དགོས་པའི་བཀའ་རྒྱ་བཏང་འདུག ད་དུང་བོད་རིགས་དམར་ཤོག་ཚོགས་མི་རྣམས་ཀྱིས་རྣམ་པ་ཅི་རིགས་ཀྱི་སྒོ་ནས་ཆོས་ལུགས་དང་འབྲེལ་ཐག་གཅོད་དགོས་བ་མ་ཟད། རང་འགུལ་ངང་དམར་ཤོག་གི་མཚན་རྟགས་འདོགས་པ་དང་། ཕྲེང་བ་དང་སྐུ་འདྲ་སོགས་ཆོས་ལུགས་ཀྱི་མཚོན་རྟགས་མི་འདོགས་པ། གྲྭ་བཙུན་རྣམས་གདན་དྲངས་ནས་མོ་འདེབས་སུ་འཇུག་རྒྱུ་དང་ཕྲུ་གུར་མིང་འདོགས་པ་བཅས་ལ་མཐའ་གཅིག་ཏུ་དགག་གཞག་ནན་མོ་བྱེད་དགོས་པ་མ་ཟད། ཁྲིམས་ལྟར་ནར་མ་སོན་པའི་བུ་ཕྲུག་རྣམས་དགོན་པ་གྲྭ་ཚང་དུ་ཆོས་སྒོར་ཞུགས་སུ་མི་འཇུག་པའི་ངན་སྐུལ་བྱས་འདུག དེ་བཞིན་བོད་ཁུལ་གྱི་སྲོལ་རྒྱུན་གྱི་ལམ་ལུགས་སྟེ། བག་སྟོན་དང་གཤིན་པོ་དུར་སྐྱེལ་གྱི་མཚོན་པའི་དམངས་སྲོལ་གྱི་ནང་དུ་ཆོས་ལུགས་ཀྱི་མི་སྣ་གདན་འདྲེན་ཞུ་རྒྱུ་མེད་པར། ཆོས་ལུགས་དང་འབྲེལ་བའི་བྱེད་སྒོར་འཛུལ་ཞུགས་བྱེད་དགོས་ན་ངེས་བར་དུ་རྒྱ་ནག་གི་གོང་རིམ་དཔོན་རིགས་ལ་ཡར་ཞུ་བྱེད་དགོས་བའི་བླངས་བྱ་བཏོན་ཏེ། ནང་མི་གཉེན་འབྲེལ་རྣམས་རྒྱ་གར་དུ་སྐྱོད་ནས་༸གོང་ས་མཆོག་ལ་མཇལ་བཅར་ཞུ་རྒྱུའི་བྱ་བ་ལ་དངོས་སུ་དགག་གཞག་གནང་དགོས་བ་དང་། མི་སུ་ཞིག་གིས་རེ་ཞུ་དེར་ངོས་ལེན་མ་བྱས་ཚེ་འཕྲལ་དུ་གོང་རིམ་ལ་གནས་ཚུལ་ཡར་ཞུ་བྱེད་དགོས་བ་སོགས་ཀྱི་རེ་སྐུལ་བྱས་འདུག  མ་ཟད་སྤྱི་ཚོགས་ཀྱི་ལས་དོན། དཔལ་འབྱོར། རིག་གནས། སྤྱི་ཚོགས་ཀྱི་བྱ་གཞག་བཅས་ལ་ཐེ་གཏོགས་མི་བྱེད་པ་དང་གནས་རི་དང་ལྷ་མཚོ་ལ་བརྟེན་ནས། རྒྱལ་ཁབ་ཀྱི་འཛུགས་སྐྲུན་རྣམ་གྲངས་ལ་འགོག་རྐྱེན་མི་བཟོ་བ་བྱེད་དགོས་པར་གསལ་འདུག གཞི་རྩའི་སྔར་ལོར་ལོར་འདི་ག་གསར་ཁང་ལ་བོད་ནས་གནས་ཚུལ་མཁོ་སྤྲོད་བྱས་པ་ལྟར་ན། བོད་ཁུལ་དུ་རྒྱ་ནག་གིས་ཆེད་དུ་དམར་ཤོག་གི་ཚོགས་མི་རྩ་འཛུགས་བྱེད་བཞིན་པ་དང་འབྲེལ་ནས།  མཚོ་སྔོན་པོའི་གཡས་གཡོན་དང་བྲག་དཀར་རྫོང་ཁོངས་སོགས་ཀྱི་ས་གནས་གང་སར་ཁོར་ཡུག་གཙང་བཟོ་ལ་ཁ་གཡར་ནས། གཞུང་ལམ་དང་ཐག་ཉེ་བའི་ཆོས་ལུགས་ཀྱི་མཚོན་བྱེད་དེ། མ་ཎི་རྡོ་བརྐོས་དང་དར་ལྕོག། དེ་བཞིན་བསང་ཁྲི་སོགས་གཙང་བཟོ་བྱེད་དགོས་བའི་བཀའ་བཏང་བ་ལྟར། བོད་རིགས་དམར་ཤོག་ཚོགས་མི་རྣམས་ཀྱིས་དངོས་སུ་གོང་རིམ་གྱི་བཀའ་རྒྱ་དེ་ལག་བསྟར་བྱས་ཏེ། མ་ཎི་རྡོ་བརྐོས་དང་དར་ལྕོག་སོགས་རྨང་ནས་རྩ་གཏོར་བྱས་ཡོད་པར་འགྲེལ་བརྗོད་བྱས་ཡོད།

རྒྱ་གར་གྱི་བདེ་སྲུང་བློན་ཆེན་སྐུ་ཞབས་Rajnath Singh མཆོག་གིས་རྒྱ་གར་ངོས་ནས་སྔར་ལོ་ལ་དྭགས་གྷལ་ཝན་ཁུལ་གྱི་ས་མཚམས་ཀྱི་རྩོད་རྙོག་ཁྲོད་ཚེ་སྲོག་ཤོར་བའི་རྒྱ་གར་གྱི་མཐའ་མཚམས་དམག་མི་རྣམ་པའི་བློས་གཏོང་དེ་ནམ་ཡང་བརྗེད་རྒྱུ་མིན་སྐོར་འགྲེལ་བརྗོད་དང་འབྲེལ། རྒྱ་གར་ལ་དམག་སྟོབས་ཆ་ནས་ཡུལ་འདིར་ཚུར་རྒོལ་བྱེད་མཁན་ཡོངས་ལ་གདོང་ལེན་བྱ་རྒྱའི་ནུས་པ་ཡོད་སྐོར་གསུངས་འདུགདེའང་རྒྱ་གར་གྱི་བརྒྱུད་ལམ་ཁག་ཏུ་ཐོན་པའི་གནས་ཚུལ་ནང་གསལ་ལྟར་ན། སྐུ་ཞབས་ Rajnath Singh མཆོག་རྒྱ་གར་གྱི་དམག་སྤྱི་ཆེན་མོ་ Gen. Manoj Mukund Naravane ལགས་དང་ལྷན་རྒྱ་གར་བྱང་ཕྱོགས་ལ་དྭགས་ཁུལ་དུ་གཞུང་འབྲེལ་གྱིས་ཆེད་ཕེབས་གནང་སྟེ་ཉིན་གསུམ་རིང་ལ་ས་ཁུལ་དེར་ཡོད་པའི་རྒྱ་གར་གྱི་མཐའ་དམག་གི་དཔོན་རིགས་རྣམས་དང་ཐུག་འཕྲད་ཀྱིས་ས་མཚམས་ཁུལ་གྱི་དམག་དོན་ཐད་གཟིགས་ཞིབ་གནང་བཞིན་ཡོད་པ་མ་ཟད། ཁོང་གིས་ཁ་སང་ལ་དྭགས་ཀྱི་དམག་མི་རྣམས་ལ་གཏམ་བཤད་གནང་བའི་སྐབས། གཞི་རྩའི་རྒྱ་གར་ནི་དུས་རྒྱུན་ནས་ཁྱིམ་མཚེས་རྒྱལ་ཁབ་ཁག་དང་ལྷན་དུ་དཀའ་ངལ་ཡོད་ཚད་གྲོས་མོལ་བརྒྱུད་ནས་སེལ་རྒྱུར་ཡིད་ཆེས་བྱེད་མཁན་ཞིག་ཡིན་རུང་། ཚུར་རྒོལ་བྱེད་མཁན་རིགས་ལ་བཟོད་བསྲན་བྱེད་ཐབས་བྲལ་བ་དང་། དམགས་སྟོབས་ཆ་ནས་རྒྱ་གར་ལ་ཚུར་རྒོལ་དེའི་རིགས་ལ་གདོང་ལེན་བྱ་རྒྱུའི་ནུས་པ་ཆ་ཚང་ཡོད་པ་གསུངས་འདུགདེ་བཞིན་ཁོང་གིས། རྒྱ་གར་གྱིས་ད་ལྟའི་བར་དུ་རྒྱལ་ཁབ་གཞན་སུ་ཞིག་ལ་ཡང་དཔུང་འཇུག་བྱེད་མ་མྱོང་ཞིང་གཞན་གྱི་ས་སོར་གང་ཙམ་ཡང་དབང་བསྒྱུར་བྱེད་མྱོང་མེད་པར་མངོན་གསལ་གྱིས། རྒྱ་གར་གྱིས་དུས་རྒྱུན་རྒྱལ་ཁབ་གཞན་ཞིག་ལས་རྣམ་པར་རྒྱལ་འདོད་ཀྱི་དམིགས་འབེན་བཅིངས་མྱོང་མེད་སྐོར་གསུངས་འདུག རྩ་བའི་རྒྱ་གར་གྱི་བདེ་སྲུད་བློན་ཆེན་མཆོག་གིས་ཐེངས་འདིའི་ལ་དྭགས་ཁུལ་གྱི་གཞུང་འབྲེལ་ཕྱོགས་བསྐྱོད་དང་འབྲེལ། ཁ་སང་རེས་གཟའ་ཟླ་བའི་ཉིན་དྲ་ལམ་ནས། མཐའ་མཚམས་ཀྱི་གཞུང་ལམ་འཛུགས་སྐྲུན་དོ་དམ་ལས་ཁུངས་ཀྱིས་གསར་རྒྱག་བྱས་པའི་ཟམ་ཆེན་ཁྱོན་ ༦༣ དབུ་འབྱེད་གནང་ཡོད་པ་དང་། དེའང་ལ་དྭགས་ནང་གི་ཟམ་ཆེན་ ༡༡ དང་། ཨ་རུ་ན་ཅལ་ནང་ ༢༩ ཨུ་ཊ་ར་ཁན་ཁུལ་དུ་ཟམ་ཆེན་ ༦ Jammu Kashmir ནང་ ༤ ཧི་མ་ཅལ་ནང་གསུམ། འབྲས་ལྗོངས་ནང་དྲུག གཞན་ཡང་ Manipur དང་ Nagaland ནང་གཅིག་རེ་བཅས་དབུ་འབྱེད་གནང་འདུག ཟམ་ཆེན་དེ་དག་གི་བཟོ་བསྐྲུན་འཆར་འགོད་པས་གསར་ལམ་ཁག་ལ། ཐེངས་འདིའི་ཟམ་ཆེན་དེ་དག་གིས་མཐའ་དམག་ཙམ་མ་ཡིན་པར་ས་གནས་ཡུལ་མི་དང་ཡུལ་སྐོར་སྤྲོ་འཆམ་པ་བཅས་ལ་ཕན་ནུས་ཆེན་པོ་ལྡན་རྒྱུ་ཡིན་པ་གསུང་ཡོད་པ་རེད་འདུག དེའི་བར་ན་ཟླ་འདིའི་ཚེས་༢༥ཡིན། རྒྱ་ནག་དམར་ཤོག་སྲིད་གཞུང་བཙུགས་ནས་མི་ལོ་ཧྲིལ་བོ་བརྒྱ་འཁོར་གྱི་ཡོད་པའི་རྒྱལ་སྟོན་དུས་ཆེན་དང་བསྟུན་ནས།  རྒྱ་ནག་སྲིད་གཞུང་གིས་ལྷ་ས་ནས་ཉིང་ཁྲི་བར་གྱི་ལྷ་ཉིང་ལྕགས་ལམ་དངོས་སུ་སྒོ་འབྱེད་ཀྱིས་བོད་ཁུལ་གྱི་ཆེས་ཐོག་མའི་གློག་རླངས་ཅན་གྱི་ཤུགས་འགྲེམས་མེ་འཁོར་ཐོག་མ་དེ་བོད་ཁུལ་དུ་ཆེད་གཏོང་བྱས་ཡོད་པ་རེད།ཐེངས་འདིའི་བོད་ཁུལ་གྱི་ལྷ་ཉིང་གི་མེ་འཁོར་ལྕགས་ལམ་དེར་ཕུག་ལམ་༤༩ དང་ཟམ་ཆེན་ ༡༢༡ ལྷག་གིས་གྲུབ་ཡོད་པ་མ་ཟད། ལྷ་ས་དང་ཉིང་ཁྲི་བར་དུ་སྤྱི་ལེ་ ༡༧༠༠ ལྷག་ཡོད་པའི་འགྲིམ་འགྲུལ་དེ་ཆུ་ཚོད་ ༤༨ ནས་ཆུ་ཚོད་ ༡༣ རིང་གི་འགྲུལ་ལམ་དུ་བཟོ་སྐྲུན་བྱས་ཡོད་པར་བསྒྲགས་འདུག རྒྱ་ནག་གི་གཞུང་འབྲེལ་གསར་ཁང་གིས་གནས་ཚུལ་སྤེལ་བ་ལྟར་ན། ལྷ་ཉིང་ལྕགས་ལམ་འདི་ཉིད་ལྷ་ས་དང་ལྷོ་ཁ། ཉིང་ཁྲི་བཅས་གྲོང་ཁྱེར་གསུམ་དུ་ཁྱབ་ཡོད་ཅིང་། ལམ་རྒྱུད་དུ་བོད་ལྗོངས་ཀྱི་མི་འབོར་སྟུག་པོའི་ས་ཁོངས་བརྒྱུད་དགོས་པ་དང་། ལྕགས་ལམ་ཤར་གཏོང་ཐུབ་པ་དེས་ལྷ་ས་དང་ལྷོ་ཁ། ཉིང་ཁྲི་བཅས་ཀྱི་བར་དུ་འགྲོ་སྐྱོད་བྱེད་པའི་དུས་ཚོད་སྔར་བས་ཇེ་ཐུང་དུ་གཏོང་རྒྱུ་ཡིན་པ་མ་ཟད། དངོས་ཟོག་སྐྱེལ་འདྲེན་སྔར་ལྷག་ཤུགས་ཆེར་གཏོང་རྒྱུ་ཡིན་སྐོར་འཁོད་འདུག ཐེངས་འདིའི་རྒྱ་ནག་གིས་ཤར་གཏོང་བྱས་པའི་ལྷ་ཉིང་གི་མེ་འཁོར་དེ་ནི་ལྷོ་བོད་ཁུལ་གྱི་ས་མཚམས་སུ་ཁེལ་གྱི་ཡོད་སྟབས། རྒྱ་གར་གྱི་བྱང་ཤར་གྱི་མངའ་སྡེ་འབྲས་ལྗོངས་དང་ས་ཐག་ཉེ་བའི་འཕགས་བོད་ཀྱི་མཐའ་མཚམས་ཁུལ་གྱི་གློག་རླངས་ཀྱི་མེ་འཁོར་དང་པོ་དེ་ཆགས་ཀྱི་ཡོད་པ་རེད་འདུགགཞི་རྩའི་སྔར་ལོའི་འཕགས་བོད་ས་མཚམས་ཀྱི་གྷལ་ཝན་ལུང་གཤོངས་སུ་རྒྱ་དཀར་ནག་གི་དམག་མིའི་བར་གདོང་ཐུག་བྱུང་སྟེ་ཕྱོགས་གཉིས་ཀྱི་མཐའ་དམག་ཤི་རྨས་ཐེབས་པའི་གནད་དོན་དང་འབྲེལ་ནས། ད་བར་ཕྱོགས་གཉིས་ཀྱི་དམག་དོན་སྐུ་ཚབ་བར་ལ་གྲོས་མོལ་ཐེངས་ ༡༡ བྱས་ཟིན་ནའང་ད་དུང་མཐའ་མཚམས་ཁག་གི་དམག་མི་རྣམས་ཡོངས་སུ་ཕྱིར་འཐེན་བྱེད་རྒྱུར་གྲོས་འཆམ་བྱུང་མེད་སྟབས། ད་ལྟའི་ཕྱོགས་གཉིས་ནས་འཕགས་བོད་མཐའ་མཚམས་ཁུལ་དུ་འཛུགས་སྐྲུན་གྱི་ལས་གཞིའི་རྣམ་གྲངས་ཤུགས་ཆེ་རུ་བཏང་སྟེ་ཕྱོགས་སོ་སོའི་མཐའ་དམག་གི་དཔུང་ཁག་ངོམ་བཞིན་པ་རེད་འདུག