བོད།

དེ་རིང་།  FCCC ཞེས་པའི་རྒྱ་ནག་ནང་གི་ཕྱི་རྒྱལ་གྱི་གསར་འགོད་མཐུན་ཚོགས་ཀྱིས་ལོ་འཁོར་གྱི་སྙན་ཐོ་བཏོན་པའི་ནང་དུ།  རྒྱ་ནག་གཞུང་གིས་སྔར་ལོའི་ནང་དུ།  ཡུལ་དེའི་ནང་གི་ཕྱི་རྒྱལ་གྱི་གསར་འགོད་པར་སྟངས་འཛིན་དམ་དྲག་བྱེད་ཤུགས་ཆེ་རུ་སོང་ཡོད་པ་ལས།   ཡར་རྒྱས་ཀྱི་རྣམ་པ་གཅིག་ཀྱང་མེད་པར་ཡོངས་གྲགས་གནང་འདུག ཚོགས་པའི་ངོས་ནས་སྙན་ཐོ་དེའི་ནང་དུ་རྒྱ་ནག་ནང་ཕྱག་ལས་གནང་བཞིན་པའི་དེ་གའི་ཚོགས་མི་ ༡༡༤ ཙམ་ལ་འདྲི་གཅོད་གནང་ཡོད་པ་དང་། སྙན་ཐོ་ནང་རྒྱ་ནག་ངོས་ནས་ཕྱི་ཕྱོགས་ཀྱི་གསར་འགོད་པས་སྲིད་གཞུང་གི་སྟངས་འཛིན་ལས་བརྒལ་བའི་གསར་འགྱུར་སྤེལ་བ་ཡིན་ན།  གཅིག་ནས་རྒྱ་ནག་ནས་ཕྱིར་ཕུད་གཏོང་རྒྱུའི་ཉེན་བརྡ་གཏོང་བཞིན་པ་དང་། ཕྱོགས་གཞན་ཞིག་ནས་ཕྱི་སྐྱོད་ཀྱི་མཐོང་མཆན་ལག་འཁྱེར་ཕྱིར་འགྱངས་བྱེད་རྒྱུ་མིན་པའི་འཇིགས་སྐུལ་བྱེད་བཞིན་པ་མངོན་གསལ་གནང་བ་མ་ཟད། གནད་དོན་འདི་རིགས་མ་འོངས་པར་དེ་བས་མང་དུ་འགྲོ་ཉེན་ཡོད་པའི་ཉེན་བརྡ་བཏང་འདུག གཞན་ཡང་སྙན་ཐོ་དེའི་ནང་དུ། རྒྱ་ནག་གི་ནང་དུ་ཡོད་པའི་ཕྱི་ཕྱོགས་ཀྱི་གསར་འགོད་པ་རྣམས་ལ། རྒྱ་ནག་གི་སྟངས་འཛིན་ལས་བརྒལ་བའི་ཚོར་རྣོ་བའི་དོན་རྐྱེན་གྱི་སྒང་ལ་གསར་འགོད་སྤེལ་བ་ཡིན་ན།  མཇུག་འབྲས་ངན་པ་རང་སྟེང་དུ་འབབ་པ་དང་།  དེ་བཞིན།  རྒྱ་ནག་གི་དཔོན་རིགས་ཁག་ཅིག་གིས་རྒྱ་རིགས་མང་ཚོགས་ལ་ཕྱི་ཕྱོགས་ཀྱི་གསར་འགོད་པ་དང་ལྷན་དུ་སྐད་ཆ་བཤད་མི་ཆོག་པའི་ཉེན་བརྡ་བཏང་ཡོད་པ་ཡང་ཕྱིར་བསྒྲགས་གནང་འདུག གོང་གི་གནས་ཚུལ་དེ་དང་འབྲེལ་ནས། ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་དེ་གའི་ Twitter དྲ་གནས་ཐོག་འགྲེལ་བརྗོད་གནང་དོན་ལྟར་ན། སྤྱིར་བོད་དུ་གསར་འགོད་པ་སྐྱོད་རྒྱུར་སྔོན་ཚུད་ནས་གཞུང་གི་བཀའ་ཁྲོལ་ཞུ་དགོས་པས་རྒྱ་ནག་གི་ས་ཁུལ་གཅིག་རང་དེ་ཆགས་ཡོད་པ་མ་ཟད། ཡང་སྒོས་ཐེངས་འདིའི་སྙན་ཐོ་ནང་གསལ་བ་བཞིན། འདས་ལོའི་ནང་བོད་ཀྱི་ས་ཁུལ་དུ་སྐྱོད་པའི་ཕྱི་རྒྱལ་གྱི་གསར་འགོད་པ་བཅུའི་ཁོངས་ནས་དགུ་ལ་ས་གནས་གཞུང་གིས་དམ་དྲག་བཀག་སྡོམ་བྱས་ཡོད་པ་བཅས་ལ་གཞིགས་ན། ཐེངས་འདིའི་གསར་འགོད་མཐུན་ཚོགས་ཀྱིས་བཏོན་པའི་རྒྱ་ནག་ནག་ནང་གི་གསར་འགོད་རང་དབང་གི་སྙན་ཐོ་དེ་ཡིས།  ཕྱི་རྒྱལ་གྱི་གསར་འགོད་པ་སུ་ཞིག་བོད་ནང་དུ་འགྲོ་སྐྱོད་བྱེད་རྒྱུའི་ལམ་ཁ་མེད་པ་དེ་དྲན་གསོ་བྱས་ཡོད་པར་གསུངས་འདུག སྙན་ཐོ་དེའི་ནང་གཞན་ཡང་།  བཅར་འདྲི་ཞུ་སའི་ཕྱི་རྒྱལ་གྱི་གསར་འགོད་པ་ཡོངས་ནས་ཕྱེད་ཙམ་ལ་ལོ་གཅིག་གི་ནང་དུ་རྒྱ་ནག་འགོ་ཁྲིད་དང་ཉེན་རྟོག་པས་ཐེ་ཇུས་ཀྱིས་དཀའ་ངལ་འཕྲད་ཡོད་པ་ལུང་འདྲེན་དང་འབྲེལ།   སྲིད་གཞུང་གི་བྱུས་གཏོགས་དང་བརྙས་བཅོས། དེ་བཞིན་རྩིབ་སྤྱོད་སོགས་སྤེལ་ནས་གསར་འགོད་རང་དབང་ལ་རྡོག་རོལ་གཏོང་བཞིན་པ་ཐེར་འདོན་གནང་བ་མ་ཟད།  ཕྱི་རྒྱལ་གྱི་གསར་འགོད་པ་དེ་དག་ལ་ཕྱག་རོག་གནང་མཁན་གྱི་རྒྱ་རིགས་གསར་འགོད་པ་རྣམས་ཀྱི་ནང་མིར་ཉེན་བརྡ་བཏང་སྟེ་ཉེན་རྟོག་པས་རྩད་གཅོད་ནན་མོ་བྱེད་བཞིན་པ་ཡང་མངོན་གསལ་གནང་འདུག དེ་བཞིན་རྒྱ་ནག་གིས་ད་ཆ་གསར་འགོད་པ་རྣམས་ཀྱིས་བཀག་སྡོམ་བྱས་ཡོད་པའི་དྲ་རྒྱ་འཚོལ་བྱེད་ཀྱི་མ་ལག   VPNs ཞེས་པ་དེ་འཕྲུལ་ལས་ཀྱི་ཐོག་ནས་སྟངས་འཛིན་ནན་མོ་བྱ་བཞིན་ཡོད་པ་དང་།  གཞན་ཡང་ཕྱི་ཕྱོགས་ཀྱི་གསར་འགོད་པ་རྣམས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིང་གི་སྐོར་གསར་འགྱུར་དང་རྩོམ་ཡིག་ཏུ་སྤེལ་བ་རྣམས་ལ་འཇིགས་སྐུལ་གྱིས། ཁོ་ཡི་མིང་ངེས་བར་དུ་མ་རྩོམ་ནས་ཕྱིར་འཐེན་བྱེད་ཐབས་བྱས་ཏེ།  ས་གནས་སོ་སོའི་གསར་འགྱུར་ཁང་རྣམས་ལ་ཤུགས་རྐྱེན་སྤྲོད་ཀྱི་ཡོད་པ་ཡང་ཡོངས་གྲགས་གནང་བ་དང་།  རྒྱ་ནག་གི་ནང་དུ་རྟེན་གཞི་བྱས་པའི་གསར་འགོད་པ་ཁག་ཅིག་ཧོང་ཀོང་དུ་ཆེད་སྐྱོད་ཀྱིས་ཧོང་ཀོང་མི་མང་གི་ངོ་རྒོལ་གྱི་སྐོར་ནས་གསར་འགྱུར་སྤེལ་བ་རྣམས།  རྒྱ་ནག་གི་འགྲོ་འོང་ཞིབ་བཤེར་ཁང་ནས་བཀག་སྡོམ་བྱས་པ་མ་ཟད། དུས་ཡུན་རིང་པོར་འདྲི་གཅོད་ཚ་ནན་བྱས་ཏེ། ལག་འཁྱེར་ཁ་པར་དང་གློག་ཀླད་སོགས་ལ་ཞིབ་བཤེར་བྱས་ཡོད་པར་འཁོད་འདུག རྩ་བའི་སྲིད་འཛིན་ཞི་ཅིན་ཕིང་གིས་སྤྱི་ལོ་ ༢༠༡༣ ལོ་ནས་སྲིད་དབང་བཟུང་བ་ནས། ད་བར་དུ་ཕྱི་ལོག་གི་གསར་འགོད་པ་༩ རྒྱ་ནག་སྲིད་གཞུང་གི་ཉེན་བརྡའི་འོག་ནས་ཕྱིར་ཕུད་བཏང་ཡོད་པ་ཤེས་རྟོགས་བྱུང་ཡོད་པ་དང་།  སྒོས་སུ་སྤྱི་ལོ་༢༠༡༩ ལོར།  རྒྱ་ནག་གི་ནང་དུ་གསར་འགོད་པ་རྣམས་ལ་ཟླ་བ་དྲུག་དང་དྲུག་ལས་ཉུང་བའི་མཐོང་མཆན་ལས་རག་མེད་པ་མ་ཟད།  ༢༠༢༠ ལོའི་ལོ་འགོ་འདིར།  གསར་འགོད་པ་ ༢ ལ་ཟླ་བ་ ༡ གི་མཐོང་མཆན་ལས་རག་མེད་པ་གསལ་བོ་ཆགས་ཡོད་པ་རེད།    དེ་བཞིན་སྔར་ལོ་ནས་བཟུང་ཤིན་ཅིང་གི་ཁུལ་དུ་དྲག་གནོན་གྱིས་མི་སེར་ས་ཡ་གཅིག་བཀག་སྐྱིལ་བྱས་ཡོད་པའི་ཐད་ནས།  གསར་འགོད་པ་མང་པོ་དངོས་སུ་ཁུལ་གནས་ཚུལ་རྒྱུས་ལོན་བྱེད་དུ་སོང་ཡོད་ནའང་།  མང་ཆེ་བ་ལམ་ཁ་བཀག་ཟིན་པ་དང་། འགྲིམ་འགྲུལ་གྱི་དོན་རྐྱེན་བྱུང་ཡོད་པ་སོགས་ཀྱི་ཁག་གཡོགས་འོག་ཁུལ་དེར་བཏང་མེད་པ་རེད།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་རྒྱ་ནག་ནང་ཕེབས་འཆར་ཡོད་པ་ལྟར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ལྕམ་སྐུ་མཆོག་བོད་ནང་དུ་ངེས་ཕེབས་གནང་སྐྱོང་ཡོང་བའི་རེ་སྐུལ་ཞུས་འདུག འདི་ལོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་གིས་རྒྱལ་ཚོགས་ཀྱི་ལྷན་ཚོགས་ཐེངས་ ༤༣ པའི་སྐབས་སུ་ཁོང་ལ་རྒྱ་ནག་གཞུང་གིས་ཡུལ་དེའི་ནང་དུ་ཕེབས་གནང་ཡོང་བའི་མགྲོན་བརྡ་གནང་ཡོད་པ་ཡོངས་ཁྱབ་གནང་ཡོད་པར་མ་ཟད། ཁོང་གིས་ང་ཚོའི་ངོས་ནས་རྒྱ་ནག་ནང་དུ་འགྲོ་བ་མིའི་ཐོབ་ཐང་གི་གནས་སྟངས་ཇི་ལྟར་ཡོད་མེད་ཐོག་གཏིང་ཟབ་ཀྱི་ཞིབ་འཇུག་བྱ་རྒྱུར་སྒུག་ཆོག་གི་རེད་ཅེས་གསུངས་ཡོད་པ་རེད། བོད་མིའི་སྒྲིག་འཛུགས་ཀྱི་ཨིན་ཡིག་དྲྭ་རྒྱའི་ཐོག་སྲིད་སྐྱོང་བློ་བཟང་སེང་གེ་མཆོག་གིས་ད་རེས་སྐོར་བསྐྱོད་དེ་ནི་དུས་ཀྱི་དགོས་མཁོ་ཞིག་ཆགས་ཡོད་པ་དང་། ལྕམ་སྐུ་ Michelle Bachelet མཆོག་ཐེངས་འདིའི་སྐོར་སྐྱོད་དང་འབྲེལ་ཏེ་བོད་ནང་ལ་མ་ཕེབས་ཚེ་རྒྱ་ནག་ནང་དུ་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཇི་ལྟར་ཡོད་མེད་ཐོག་གཏིང་ཟབ་ཀྱི་ཞིབ་འཇུག་གནང་ཐབས་བྲལ་བར་མ་ཟད། བོད་ནང་དུ་བཞུགས་པའི་གཞིས་ལུས་རྒྱ་ཆེ་མང་ཚོགས་རྣམས་ཀྱིས་འདས་པའི་མི་ལོ་ ༦༠ རིང་ལ་རྒྱ་གཞུང་གིས་ཁྲིམས་འགལ་གྱི་ཐོག་ནས་བོད་དུ་བཙན་འཛུལ་གྱིས་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་ཀྱིས་མནར་སྤྱོད་ཚབས་ཆེན་བཏང་བའི་བྱ་སྤྱོད་དག་ལ་གདོང་ལེན་གནང་ཡོད་སྐོར་གསུངས་འདུག དེ་བཞིན་སྲིད་སྐྱོང་མཆོག་གིས་རྒྱ་ནག་གཞུང་གིས་བོད་མི་དག་ལ་མི་སྤྱོད་ལས་འདས་པའི་མནར་གཅོད་བཏང་བར་བརྟེན་ནས་ཕྱི་ལོ་ ༢༠༠༩ ལོ་ནས་བོད་མི་ ༡༤༥ ནས་བོད་བསྟན་སྲིད་སྤྱིའི་སླད་དུ་སྐུ་ལུས་ཞུགས་འབུལ་གནང་བའི་གནས་སྟངས་སོགས་གསུངས་པ་དང་ཆབས་ཅིག མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Bachelet མཆོག་བོད་ནང་དུ་ངེས་ཕེབས་གནང་སྐྱོང་ཡོང་བའི་རེ་སྐུལ་ཞུས་པ་དང་འབྲེལ་ཏེ་སྐུ་ཉིད་མཆོག་བོད་དུ་མ་ཕེབས་ཚེ་བོད་ནང་དུ་གཞིས་ལུས་བོད་མི་རྣམས་རྟག་ཏུ་འཇིགས་སྣང་ངང་འཚོ་བཞིན་ཡོད་པ་དང་དེ་བཞིན་རྒྱ་གཞུང་གི་དོགས་ཟོན་འོག་གནས་པའི་དངོས་ཡོད་ཀྱི་གནས་སྟངས་ཁག་རྟོགས་ཐུབ་རྒྱུ་མེད་པར་གསུངས་འདུག དེ་སྔ་ཕྱི་ལོ་ ༡༩༩༨ ལོར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འགན་འཛིན་བོད་དུ་ཕེབས་ཡོད་པ་ལས་འདས་པའི་ལོ་ངོ་ ༢༢ རིང་ལ་རྒྱ་ནག་གི་བཀག་སྡོམ་འོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་བོད་དུ་སྐོར་བསྐྱོད་གནང་མྱོང་མེད་པ་དང་། གལ་ཏེ་རྒྱ་གཞུང་གིས་ད་རེས་ལྕམ་སྐུ་ Michelle Bachelet མཆོག་བོད་ཕེབས་རྒྱུའི་ཆོག་མཆན་སྤྲད་ཚེ་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འགན་འཛིན་ཞིག་བོད་ནང་དུ་སྐོར་བསྐྱོད་ལ་ཕེབས་པ་ཐེངས་གཉིས་པ་དེ་ཆགས་ཀྱི་ཡོད་པ་རེད་ཅེས་སོགས་གསུངས་པ་དང་སྦྲགས། རྒྱ་གཞུང་གི་ངོས་ནས་རྒྱལ་ཚོགས་ཀྱི་འགྲོ་བ་མིའི་ཐོངབ་ཐང་གི་འབྲེལ་ཡོད་མི་སྣ་ཁག་ལ་འགྲོ་སྐྱོད་ཐད་ལ་བཀག་སྡོམ་བྱས་ཡོད་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་སྐུ་ཞབས་ Zeid Raad Al Hussein མཆོག་གིས་ཀྱང་རྒྱ་གཞུང་གི་ངོས་ནས་བོད་མི་དང་ཤིན་ཅང་གི་མང་ཚོགས་རྣམས་ཀྱི་འགྲོ་སྐྱོད་ལ་བཀག་སྡོམ་གནང་རྒྱུ་མེད་པའི་འབོད་སྐུལ་གནང་ཡོད་སྐོར་ལུང་འདྲེན་གནང་འདུག གཞན་ཡང་སྲིད་སྐྱོང་མཆོག་གིས་ཤིན་ཅང་ནང་གི་ཡུ་གུར་བའི་འགྲོ་བ་མིའི་ཐོབ་ཐང་གི་གནས་སྟངས་ཇི་ཡིན་གསལ་པོ་ཤེས་པའི་ཆེད་དུ་ཞིབ་འཇུག་གནང་བར་བོད་ནང་ད་བར་བྱུང་བའི་གནས་སྟངས་ཁག་ལ་ཞིབ་འཇུག་གནང་དགོས་གལ་ཡིན་པ་དང་། བོད་ནང་དུ་འཕྲད་བཞིན་པའི་དཀའ་ངལ་གང་ཡིན་པ་དེ་དག་མ་སེལ་བར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་འཕེལ་རྒྱས་སུ་གཏོང་བར་དགོངས་པ་དེ་ནི་སྟོང་བསམ་རེད་ཅེས་གསུངས་འདུག དེའི་བར་ན ཁ་སང་ཕྱི་ཚེས་ ༢ ཉིན་ཨོ་སི་ཊོ་ལི་ཡར་ཡོད་པའི་ ASPI སྲིད་བྱུས་ཉམས་ཞིབ་ཁང་གིས་ཤིན་ཅང་གི་ཡུ་གུར་བའི་སྐོར་ལ་སྙན་ཐོ་ཞིག་བཏོན་པར་གཞིགས་ཚེ་རྒྱ་ནག་གཞུང་གིས་ཤིན་ཅང་ནང་ཡུ་གུར་བ་ས་ཡ་མང་བརྒལ་བ་བཀག་བསྐྱིལ་བྱེད་བཞིན་པའི་ཁོངས་ནས་མི་གྲངས་ཁྲི་བརྒྱད་ལྷག་རྒྱ་ནག་གི་ས་ཁུལ་གཞན་དུ་ཡོད་པའི་བཟོ་གྲྭ་ཁག་ཏུ་ངལ་རྩོལ་སྒྱུར་བཀོད་གཏོང་བཞིན་ཡོད་པ་རེད་འདུག ད་ལྟའི་ཆར་ཤིན་ཅང་ནང་གི་ཡུ་གུར་མང་ཚོགས་དེ་དག་གི་གནས་སྟངས་གང་ཡིན་ལ་བལྟ་ཚེ་ཁོང་རྣམས་ལ་བཙན་དབང་གིས་ངལ་རྩོལ་སྒྱུར་བཀོད་བྱེད་དི་འཇུག་པའི་གནས་སྟངས་ཤིག་ཆགས་ཀྱི་འདུག་པར་མ་ཟད། ཡུ་གུར་བ་དེ་རྣམས་ནཱའེ་ཀི། གྷེཔ། སེམ་སྔག།སོ་ནི་སོགས་རྒྱལ་སྤྱིའི་བཟོ་ཚོང་ཁང་གྲགས་ཅན་ ༨༣ ལྷག་ལ་ཆ་བགོས་ཀྱིས་ངལ་རྩོལ་ཆེད་གཏོང་བཞིན་ཡོད་པ་རེད་འདུག འོན་ཀྱང་རྒྱ་ནག་གཞུང་གི་ངོས་ནས་ད་ལྟའི་ཆར་གནས་སྟངས་དེ་ལ་ངོས་ལེན་རྩ་བ་ནས་བྱེད་མི་འདུག དེ་བཞིན་རྒྱ་ནག་གི་བཟོ་གྲྭ་དེ་དག་ཏུ་ཡོད་པའི་ཡུ་གུར་བ་དང་གྲངས་ཉུང་མི་རིགས་ཀྱི་མང་ཚོགས་བཙན་དབང་གི་ཐོག་ནས་ངལ་རྩོལ་དུ་བཀོལ་པ་དང་། དེ་དག་རྣམས་ལོགས་སུ་ཚོམས་ཁང་ལྟ་བུར་བཞག་ནས་རྒྱ་ཡིག་ལ་སློབ་སྦྱོང་དང་བསམ་བློ་བཅོས་བསྒྱུར་གྱི་སློབ་གསོ་སྤྲོད་བཞིན་ཡོད་པར་མ་ཟད་ཆོས་ལུགས་ཀྱི་གནང་སྒོ་ཁག་ལ་ཞུགས་རྒྱུར་བཀག་སྡོམ་བྱེད་མུས་ཡིན་པ་བཀོད་འདུག

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་རྒྱ་ནག་ནང་ཕེབས་འཆར་ཡོད་པ་ལྟར་རྒྱལ་སྤྱིའི་བོད་དོན་ལས་འགུལ་ཁང་གིས་ཁོང་མོར་བོད་ནང་གི་འགྲོ་བ་མིའི་ཐོབ་ཐང་སྐོར་ལ་དངོས་སུ་གཟིགས་ཞིབ་གནང་དགོས་པའི་འབོད་སྐུལ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་གིས་ཁ་སྔོན་གནས་ཚུལ་སྤེལ་བར་འདི་ལོར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ Michelle Bachelet མཆོག་གིས་རྒྱ་ནག་གི་བཙན་གནོན་འོག་ཡོད་པའི་ཤིན་ཅང་ཡུ་གུར་མི་རིགས་རང་སྐྱོང་ཁུལ་སོགས་ཀྱི་ནང་གཞུང་འབྲེལ་སྐོར་བསྐྱོད་གནང་འཆར་ཡོད་སྟབས། རྒྱལ་སྤྱིའི་བོད་དོན་ལས་འགུལ་ཁང་གིས་ལྕམ་སྐུ་ལགས་ཀྱི་ཐེངས་འདིའི་སྐོར་སྐྱོད་དང་འབྲེལ་ཏེ་བོད་ནང་ལའང་ཕེབས་ཐབས་གནང་སྟེ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་རྒྱ་ནག་གི་འགོ་ཁྲིད་དང་མཉམ་དུ་གླེང་སློང་གནང་དགོས་པའི་འབོད་སྐུལ་ཞུས་འདུག རྒྱལ་སྤྱིའི་བོད་དོན་ལས་འགུལ་ཁང་གི་འབོད་སྐུལ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་མཆོག་གིས་རྒྱ་ནག་ནང་སྐོར་བསྐྱོད་གནང་རྒྱུ་ཡིན་པར་འཚམས་འདྲི་དང་སྦྲགས། རྒྱ་ནག་གཞུང་གིས་བཙན་འཛུལ་བྱས་པའི་བོད་ནི་ལོ་རྒྱུས་ཐོག་ནས་རང་བཙན་གཙང་མའི་རྒྱལ་ཁབ་ཅིག་ཡིན་ཞིང་། རྒྱ་ནག་གཞུང་གིས་ད་བར་བོད་ནང་མཉམ་འབྲེལ་རྒྱལ་ཚོགས་དང་ཕྱིའི་རྒྱལ་ཁབ་ཁག་གི་གཞུང་འབྲེལ་སྐུ་ཚབ་རྣམས་བོད་ནང་གི་གནས་སྟངས་རྒྱུས་ལོན་ཆེད་གཏོང་གི་མེད་པ་དང་། བོད་ནི་འཛམ་གླིང་གི་ཆེས་ཁེར་རྐྱང་དང་རྒྱལ་སྤྱིའི་གསར་འགོད་པ་ཚོ་བོད་ནང་བསྐྱོད་རྒྱུ་ནི་བྱང་ཀོ་རི་ཡ་ལས་ལྷག་པའི་བཀག་སྡོམ་ཆེ་བ་ཡོད་པར་བརྗོད་འདུག རྒྱལ་སྤྱིའི་བོད་དོན་ལས་འགུལ་ཁང་གི་རྒྱལ་ཚོགས་ནང་གི་ཁྲིམས་དོན་ཞུ་གཏུག་འགན་འཛིན་སྐུ་ཞབས་ Kai Mueller མཆོག་གིས་རྒྱ་ནག་གཞུང་གིས་དུས་རྒྱུན་ནས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་དང་སྟངས་འཛིན་དོ་དོམ་ནན་པོ་བྱེད་ཀྱི་ཡོད་པ་དང་སྦྲགས། བོད་ནི་རྒྱ་ནག་གི་སྲིད་དབང་སྒེར་གཅོད་འོག་ཏུ་དབྱེ་འབྱེད་རང་བཞིན་ལྡན་པའི་སྲིད་བྱུས་ལག་བསྟར་བྱེད་ས་ཞིག་ཆགས་ཡོད་པར་མངོན་གསལ་གནང་འདུག བོད་མིའི་ཆོས་དང་རིག་གཞུང་ལ་རྒྱ་ནག་གིས་སྟངས་འཛིན་ནན་པོ་བྱེད་བཞིན་ཡོད་པར་གསུངས་པ་དང་ལྷན་དེ་རིང་གི་ཤིན་ཅང་གི་དྲག་གནོན་ནི་རྒྱ་ནག་གིས་བོད་ནང་ལག་བསྟར་བྱས་པའི་གྲུབ་དོན་ཞིག་ཡིན་པར་ལུང་འདྲེན་གྱིས་ལྕམ་ Bachelet མཆོག་གིས་ཐེངས་འདིའི་སྐོར་སྐྱོད་དང་ལྷན་རྒྱ་ནག་གིས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་བཙན་ཁྲིད་བྱས་པ་དང་བོད་ནང་གི་ཆོས་དད་རང་དབང་རྡོག་རོལ་གཏོང་བཞིན་པ། དེ་བཞིན་བོད་ཀྱི་སྐད་ཡིག་རང་དབང་འཐབ་རྩོད་པ་བཀྲ་ཤིས་དབང་ཕྱུག་ལགས་སོགས་ཀྱི་སྐོར་རྒྱ་གཞུང་གི་འགོ་ཁྲིད་དང་ལྷན་དུ་གླེང་སློང་གནང་དགོས་པའི་འབོད་སྐུལ་གནང་བར་མ་ཟད་བོད་ནི་རྒྱ་ནག་གི་སྟངས་འཛིན་ནན་པོ་བྱེད་སའི་ས་ཁུལ་ཞིག་ཆགས་ཡོད་པར་བརྟེན་བོད་ནང་གཟིགས་ཞིབ་གནང་ཐུབ་ཚེ་དངོས་ཡོད་གནས་ཚུལ་ལ་རྒྱུས་ལོན་བརྒྱུད་ནས་འགྲོ་བ་མིའི་ཐོབ་ཐང་ལ་སྲུང་སྐྱོབ་གནང་རྒྱུར་རོགས་འདེགས་ཆེན་པོ་ཞིག་ཡིན་པར་གསུངས་འདུག རྩ་བའི་ཕྱི་ལོ་ ༡༩༩༨ ནས་འདས་པའི་ལོ་ངོ་ ༢༢ རིང་ལ་རྒྱ་ནག་གི་བཀག་སྡོམ་འོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ཞིག་བོད་ནང་སྐོར་བསྐྱོད་གནང་མྱོང་མེད་པ་དང་། ལྕམ་སྐུ་ Bachelet མཆོག་ད་རེས་བོད་དུ་ཕེབས་ཐུབ་ན་དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་འགན་འཛིན་ཞིག་བོད་ནང་དུ་སྐོར་བསྐྱོད་ལ་ཕེབས་པ་ཐེངས་གཉིས་པ་དེ་ཆགས་ཀྱི་ཡོད་པ་རེད། འོན་ཀྱང་ཁོང་ནམ་ཞིག་ལ་རྒྱ་ནག་ཏུ་ཕེབས་འཆར་ཡོད་མེད་སོགས་ཀྱི་དུས་ཚོད་གཏན་འཁེལ་གསལ་པོ་མེད་པ་རེད།

ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་ Queens དཔེ་མཛོད་ཁང་ནས་ཉེ་ལམ་བོད་དང་བོད་མིའི་སྐོར་འཁྱོག་བཤད་དྲིལ་བསྒྲགས་ཀྱི་འགྲེམས་སྟོན་གཉེར་བཞིན་པར་བོད་མི་རྣམས་ཀྱིས་ངོ་རྒོལ་གནང་བར་བརྟེན་ཟླ་བ་སྔོན་མའི་ཚེས་ ༢༢ ཉིན་འགྲེམས་སྟོན་དེ་ཡོངས་སུ་ཕྱིར་འཐེན་གནང་འདུག ཁ་སྔོན་ཨ་རིའི་ Jackson Height Post ཞེས་པའི་གསར་ཁང་གིས་ Queens དཔེ་མཛོད་ཁང་གིས་གཞུང་འབྲེལ་གྱིས་གསལ་བསྒྲགས་ཤིག་གནང་བར་བོད་ནང་གི་བོད་མི་དང་བོད་མིའི་རིག་གཞུང་མཚོན་པའི་འགྲེམས་སྟོན་སྟེ་བོད་ནང་གི་ཉིན་གཅིག་གི་འཚོ་བ་ཞེས་པའི་བརྗོད་གཞི་ཅན་གྱི་འགྲེམས་སྟོན་དེ་ནི་རྒྱ་ནག་གཞུང་ཚབ་པ་དང་མཉམ་འབྲེལ་གྱིས་ཆེད་སྒྲིག་བྱས་པ་ཞིག་ཡིན་པར་ངོས་ལེན་གྱིས་ད་ནས་བཟུང་རྙོག་གླེང་ཆེ་བའི་འགྲེམས་སྟོན་དེ་ཕྱིར་བསྡུ་བྱེད་རྒྱུ་ཡིན་པར་བརྗོད་ཡོད་སྐོར་འཁོད་འདུག ཐེངས་འདིའི་རྒྱ་ནག་ནག་གི་དྲིལ་བསྒྲགས་རང་བཞིན་གྱི་བོད་དོན་འཁྱོག་བརྗོད་ཀྱི་འགྲེམས་སྟོན་དེར་བོད་མི་མང་པོས་ཉིན་ལྟར་ངོ་རྒོལ་སྐད་འབོད་གནང་ཡོད་པར་མ་ཟད། ས་གནས་ཀྱི་དཔོན་རིགས་ཚོ་དང་མཇལ་འཕྲད་ཀྱིས་རེ་ཞུ་ཞུས་པ་དང་དེ་བཞིན་དྲྭ་ལམ་ནས་དཔེ་མཛོད་ཁང་གིས་རྒྱ་ནག་གི་དྲིལ་བསྒྲགས་དེ་དག་གང་མགྱོགས་ཕྱིར་འཐེན་བྱེད་དགོས་པའི་མཚན་རྟགས་ ༤༦༠༠ བསྡུ་རུབ་ཀྱིས་རྒྱ་ནག་ལ་གནོད་ཤུགས་སྤྲད་ཡོད་སྟབས་ཕྱིར་འཐེན་བྱས་པ་ཞིག་ཆགས་ཀྱི་འདུག ལས་འགུལ་ལ་རྒྱལ་ཁ་ཐོབ་པའི་མཛད་སྒོའི་ཐོག་ཨ་རིའི་གྲོས་ཚོགས་འོག་མའི་འཐུས་མི་བོད་དོན་རྒྱབ་སྐྱོར་བ་སྐུ་ཞབས་ Tom Suozzi ལགས་ཀྱིས་ཐེངས་འདིར་ Queens དཔེ་མཛོད་ཁང་གིས་རྒྱ་ནག་གི་དྲིལ་བསྒྲགས་རང་བཞིན་གྱི་འགྲེམས་སྟོན་དེ་ཕྱིར་འཐེན་གནང་བ་ནི་རྒྱལ་ཁ་ཆེན་པོ་ཞིག་རེད། གང་ཡིན་ཟེར་ན་གནད་དོན་འདི་ལྟ་བུའི་ནང་དངུལ་དང་ཆབ་སྲིད་ཚུད་ཡོད། འོན་ཀྱང་མཐའ་མཇུག་བདེན་མཐའ་གསལ་བ་རེད། ང་ཚོས་དཔེ་མཛོད་ཁང་གི་འབྲེལ་ཡོད་མི་སྣས་འགྲེམས་སྟོན་དེ་མཚམས་འཇོག་བྱས་པར་ཐུགས་རྗེ་ཆེ་ཞུ་དགོས་པར་མ་ཟད་ལས་འགུལ་གོ་སྒྲིག་པ་དང་རྒྱབ་སྐྱོར་གནང་མཁན་ཀུན་ལ་ཐུགས་རྗེ་ཆེ་ཞུ་དགོས། འདི་ནི་བློ་འཚབ་སྐྱེ་གཞིའི་གནད་དོན་རེད། ཨ་རིའི་མི་མང་རྣམས་ཀྱིས་རྒྱ་ནག་གཞུང་གིས་བོད་མི་དང་ཡུ་གུར། ཧོང་ཀོང་ནང་གི་སློབ་མ་ཚུད་པའི་རང་གི་མི་སེར་ཚོར་ཇི་ལྟར་སྟངས་འཛིན་བྱེད་བཞིན་པ་ཤེས་དགོས། ང་ཚོ་འཛམ་གླིང་འདིའི་མི་རིགས་ཀུན་གྱི་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱེད་དགོས། ངས་མུ་མཐུད་ཁྱེད་ཚོའི་ཆེད་འཐབ་རྩོད་བྱ་རྒྱུ་ཡིན། བོད་མིས་རྒྱལ་ཁ་བླངས་པར་དགའ་བསུ་ཞུ་བཞིན་ཡོད་པའི་གཏམ་བཤད་བཅས་སྤེལ་འདུག  གསར་ཁང་གིས་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་གཏམ་བཤད་སྤེལ་བའི་དུམ་བུ་ཞིག་ལུང་འདྲེན་བྱས་པའི་ནང་རྒྱ་ནག་གཞུང་ཚབ་པས་ཐེངས་འདིར་རྒྱ་ནག་གི་འཁྱོག་བརྗོད་དྲིལ་བསྒྲགས་དེ་ཕྱིར་འཐེན་བྱས་པ་དེ་ནི་བོད་མིའི་ལས་འགུལ་དང་བདེན་པ་ནི་རྒྱ་ནག་གི་སྲིད་དབང་སྒེར་གཅོད་ཀྱི་དྲིལ་བསྒྲགས་ལས་སྟོབས་ཤུགས་ཆེ་བ་ཡོད་པ་མཚོན་གྱི་ཡོད་པར་གསུངས་ཡོད་སྐོར་དང་།  དེ་བཞིན་ད་དུང་ཁོང་གིས་ཐེངས་འདིའི་ལས་འགུལ་དེ་ནི་ Queens དཔེ་མཛོད་ཁང་གི་ངོས་ནས་རྒྱ་ནག་གཞུང་གིས་རྩ་འཛུགས་བྱས་པའི་དྲིལ་བསྒྲགས་རྣམས་ལ་གཟབ་གཟབ་བྱེད་དགོས་པའི་སློབ་ཚན་ཞིག་ཆགས་ཡོད་པར་མ་ཟད། ང་ཚོས་ངེས་པར་དུ་དཔེ་མཛོད་ཁང་དང་གཙུག་ལག་སློབ་ཆེན་ཁག དེ་བཞིན་ཤེས་ཡོན་ལྟེ་གནས་ཡོངས་ལ་ལྟ་རྟོག་གིས་གནས་ཚུལ་ཡོད་ཚད་ཕྱི་གསལ་ནང་གསལ་རག་ཐབས་ལ་རྒྱུན་སྐྱོང་གནང་དགོས་པའི་ཞུ་སྐུལ་གནང་ཡོད་པའང་འཁོད་འདུག

བཞུགས་སྒར་དྷ་རྨ་ས་ལ་ནས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བར་བོད་དོན་གོ་རྟོགས་ཀྱི་རྐང་འཁོར་སྐོར་བསྐྱོད་གནང་མཁན་རྒྱ་གར་བོད་དོན་རྒྱབ་སྐྱོར་བ་སྐུ་ཞབས་ Sandesh Meshram འམ་བོད་མིང་དུ་སྐུ་ཞབས་བསམ་གཏན་ཡེ་ཤེས་ལགས་དེ་རིང་ཕྱི་ཚེས་ ༢༡ ཉིན་བོད་མིའི་གཞིས་སྒར་མོན་གྷོ་འདོད་རྒུ་གླིང་དུ་བོད་དོན་གོ་རྟོགས་ཀྱི་རྐང་འཁོར་སྐོར་བསྐྱོད་ལས་འགུལ་མཇུག་སྒྲིལ་གནང་འདུག གསར་འགོད་པས་དེ་རིང་སྔ་དྲོ་སྐུ་ཞབས་བསམ་གཏན་ཡེ་ཤེས་ལགས་སུ་ལས་འགུལ་སྤྱི་ཡོངས་དང་འབྲེལ་བའི་བཀའ་འདྲི་ཁག་ཅིག་ཞུས་པར་ཁོང་གིས་འདས་པའི་ཟླ་བ་གཉིས་ལྷག་ཙམ་གྱི་རིང་མངའ་སྡེ་འདྲ་མིན་ ༡༢ ལྷག་དང་གྲོང་ཁྱེར་མང་དག་ཅིག་ནང་སྤྱི་ལེ་ ༧༣༠༠ ལྷག་རྐང་འཁོར་སྐོར་སྐྱོད་གནང་སྟེ་རྒྱ་གར་གྱི་ས་གནས་གྲོས་འཐུས་དང་མང་ཚོགས། དེ་བཞིན་རྒྱ་གར་གྱི་མཐོ་རིམ་སློབ་གཉེར་ཁང་ཁག་ཅིག བོད་པའི་མཐོ་སློབ་དང་སློབ་གྲྭ་སོགས་ལའང་བོད་དང་འབྲེལ་བའི་གསུང་བཤད་གནང་ཡོད་སྐོར་གསུངས་སོང་བ་དང་། རྒྱ་གར་གྱི་གཞོན་སྐྱེས་ཚོས་ཀྱང་བོད་དོན་ཏོག་ཐུགས་སྣང་ཆེན་པོ་གནང་གི་ཡོད་སྐོར་གསུངས་སོང་། དེ་བཞིན་ཁོང་གིས་དེ་རིང་ལས་འགུལ་མཇུག་སྒྲིལ་དང་འབྲེལ་མྱོང་ཚོར་ཇི་བྱུང་ཐོག་བཀའ་འདྲི་ཞུས་པར་ཁོང་གིས་བོད་དོན་དང་འབྲེལ་བའི་རྐང་འཁོར་སྐོར་བསྐྱོད་ཀྱི་ལས་འགུལ་ཡོངས་སུ་ལེགས་གྲུབ་བྱུང་བ་མ་ཟད་བོད་ཀྱི་གྲོགས་ཕོ་མོ་ཚོ་དང་དེ་བཞིན་མི་རབས་རྒན་པ་རྣམས་དང་ཐུག་འཕྲད་བྱུང་བར་དགའ་ཚོར་ཆེན་པོ་བྱུང་ཞེས་གསུངས་སོང་བ་དང་སྦྲགས། ཁོང་གིས་བོད་མི་ཚོས་རང་དབང་ལུང་པའི་ནང་བོད་མིའི་རང་དབང་སྒེར་ལངས་ཉིན་མོ་ཁོ་ན་ཙམ་མིན་པར་ལོ་འཁོར་མོའི་རིང་ལ་བོད་དོན་གྱི་ལས་འགུལ་ཆེ་ཆུང་ལ་བལྟོས་མེད་བསྟུད་མར་སྤེལ་དགོས་གལ་ཡིན་པའི་ལམ་སྟོན་གནང་གི་འདུག གཞན་ཡང་ཁོང་གིས་བོད་ཀྱི་གཞོན་སྐྱེས་ཚོའི་ངོས་ནས་རང་མི་རིགས་ཀྱི་ཐུན་མིན་ཆོས་རིག་དང་ལེགས་བྱང་བཅས་པ་མི་ཉམས་རྒྱུན་འཛིན་དང་དེ་དག་སྲུང་སྐྱོབ་བྱེད་དགོས་གལ་ཡིན་པའི་འབོད་སྐུལ་གནང་སོང་། དེ་བཞིན་རྒྱལ་ས་ལྡི་ལིར་རྟེན་གཞི་བྱས་པའི་འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་འཇིགས་མེད་ཚུལ་ཁྲིམས་ལགས་སུ་དེ་རིང་མཛད་སྒོ་དང་འབྲེལ་བའི་སྤྱི་ཡོངས་ཐོག་ལ་བཀའ་འདྲི་ཁག་ཅིག་ཞུས་པར་ཁོང་གིས་ཁ་སང་གསར་འགོད་ལྷན་ཚོགས་གནང་ཡོད་པ་དང་དེ་རིང་ལས་འགུལ་མཇུག་སྒྲིལ་དང་འབྲེལ་བའི་མཛད་སྒོ་དེ་ཚགས་ཚུད་ལེགས་གྲུབ་བྱུང་ཡོད་པར་ངོ་སྤྲོད་གནང་ཡོད། རྩ་བའི་བོད་དོན་ཆེད་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་མཁན་སྐུ་ཞབས་ Sandesh Meshram ལགས་ཁོང་ད་ལྟའི་ཆར་ Nagpur བོད་དོན་རྒྱབ་སྐྱོར་ནང་མའི་ས་གནས་འབྲེལ་མཐུད་པའི་འགན་ཁུར་བཞེས་བཞིན་ཡོད་པ་དང་། འདས་པའི་ལོ་ངོ་ ༤༠ ཙམ་ནས་བོད་དོན་ལ་ཚོར་ཤུགས་ཆེན་པོས་རྒྱབ་སྐྱོར་གནང་མཁན་རྒྱ་གར་ཡུལ་མི་ཞིག་ཡིན་པ་རེད། བསམ་གཏན་ཡེ་ཤེས་ལགས་ནས་ཐོག་མར་ཕྱི་ལོ་ ༡༩༩༦ ལོར་བཞུགས་སྒར་དྷ་རྨ་ས་ལ་ནས་ལྡི་ལི་བར་ཞི་བའི་གོམ་བགྲོད་ཀྱི་ལས་འགུལ་ནང་མཉམ་ཞུགས་གནང་འདུག་པ་མ་ཟད། ད་བར་བོད་དོན་དྲིལ་བསྒྲགས་དང་འབྲེལ་བའི་རྐང་འཁོར་སྐོར་བསྐྱོད་ཐེངས་གསུམ་གནང་མྱོང་ཡོད་པར་མ་ཟད། ད་རེས་རྐང་འཁོར་སྐོར་སྐྱོད་ཐེངས་བཞི་པ་འདི་འདས་ལོ་ཟླ་ ༡༢ ཚེས་ ༡ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་ནས་  Janjagaran Cycle Yatra “Free Tibet, Save India” འམ་བོད་ཀྱི་རང་དབང་དང་རྒྱ་གར་གྱི་བདེ་འཇགས་ཞེས་པའི་བརྗོད་ཚིག་འོག་དབུ་འཛུགས་ཀྱིས་རྒྱ་གར་གྱི་མངའ་སྡེ་ཆེ་ཁག་ ༡༢ ནང་ཕྱི་ལེ་ ༧༣༠༠ ལྷག་བརྒྱུད་དེ་རྒྱ་གར་ལྷོ་ཕྱོགས་བོད་མིའི་གཞིས་སྒར་མོན་གྷོ་འདོད་རྒུ་གླིང་དུ་བོད་མིའི་རང་དབང་སྒེར་ལངས་ཉིན་མོ་སྟེ་ཕྱི་ལོ་ ༢༠༢༠ ཕྱི་ཟླ་ ༣ ཚེས་ ༡༠ ཉིན་མཇུག་སྒྲིལ་གནང་གཏན་ཁེལ་ཡོད་ཀྱང་། ཉེ་སྔོན་ཁོང་ལ་གློ་བུར་དུ་ནད་མནར་རྐྱེན་པས་དེ་རིང་ཟླ་ ༢ ཚེས་ ༢༡ ཉིན་ལས་འགུལ་དེ་ལེགས་གྲུབ་གནང་ཡོད་པ་རེད།

ཨ་རིའི་ནིའུ་ཡོག་གྲོང་ཁྱེར་ནང་རྟེན་གཞི་བྱས་པའི་ Queens དཔེ་མཛོད་ཁང་ནས་ཉེ་ལམ་བོད་དང་བོད་མིའི་སྐོར་འཁྱོག་བཤད་དྲིལ་བསྒྲགས་ཀྱི་འགྲེམས་སྟོན་གཉེར་བཞིན་པར་བོད་མི་རྣམས་ཀྱིས་ངོ་རྒོལ་གནང་ནས་ད་ཆ་བདུན་ཕྲག་གཅིག་ཙམ་འགྲོ་མུས་ཁྲོད་འདིར་ཁ་ཉིན་བོད་རང་བཙན་སློབ་ཕྲུག་ཚོགས་པའི་རྒྱུན་ལས་ཁག་གཅིག་ནས་ནིའུ་ཡོག་གྲོང་ཁྱེར་ལྷན་ཁང་ཁག་གི་འགན་འཛིན་ཚང་འཛོམས་ཐོག་བོད་དོན་གླེང་སློང་གིས་དེ་འབྲེལ་འགྲེམས་སྟོན་མཚམས་འཇོག་དགོས་པའི་ཞུ་སྐུལ་གནང་འདུག ཟླ་བ་འདིའི་ཚེས་ ༢༠ ཉིན་ Queens ས་ཁུལ་གྱི་ Forest Hills  མི་མང་སྤྱི་ཁང་ནང་ནིའུ་ཡོག་གྲོང་ཁྱེར་སྤྱི་ཁྱབ་པ་སྐུ་ཞབས་ Bill de Blasio ལགས་དབུ་བཞུགས་ཐོག་གྲོང་ཁྱེར་དེའི་ལྷན་ཁང་ཁག་གི་འགན་འཛིན་རྣམ་པ་དང་ལས་བྱེད་བཅས་མི་གྲངས་བཞི་བརྒྱ་ཙམ་འདུ་འཛོམས་གནང་བའི་ཚོགས་འདུ་ཐོག་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་གཙོས་ལས་བྱེད་གསུམ་ནས་མཉམ་ཞུགས་གནང་ཡོད་པ་དང་། སྐབས་དེར་ཚོགས་པ་དེའི་རྒྱུན་ལས་ཚོགས་མི་རིན་ཆེན་རྣམ་རྒྱལ་ལགས་ཀྱིས་ཨ་རིའི་ Queens Elmhurst དཔེ་མཛོད་ཁང་ནས་རྒྱ་ནག་གཞུང་གི་དྲིལ་བསྒྲགས་ལོག་པ་བྱས་ནས་བོད་དོན་པར་རིས་འགྲེམས་སྟོན་བྱེད་བཞིན་པའི་གནད་དོན་སྐོར་གླེང་སློང་གནང་སྟེ་འགྲེམས་སྟོན་དེ་དེ་མ་ཐག་ཏུ་ཕྱིར་འཐེན་གནང་དགོས་པའི་དགོས་འདུན་གྱི་ཞུ་སྙན་ཞིག་ཀྱང་ཕུལ་བར་ནིའུ་ཡོག་གྲོང་ཁྱེར་སྤྱི་ཁྱབ་པ་སྐུ་ཞབས་ Bill de ལགས་ཀྱིས་བོད་པར་སྡུག་བསྔལ་མྱོང་པ་བཞིན་ལྟར་གཞན་སུས་ཀྱང་དེ་ལྟར་མྱངས་མྱོང་མེད་པ་དང་ཁོང་ནས་གནད་དོན་དེའི་སྐོར་གསན་རྒྱུ་བྱུང་མེད་པ་དང་། ད་ཆ་དེ་འབྲེལ་ཐོག་དམིགས་བསལ་དོ་སྣང་གནང་གི་ཡིན་ཞེས་གསུངས་འདུག་པར་མ་ཟད། ཁོང་ནི་རྒྱ་ནག་གཞུང་གིས་མི་མང་ཐོག་དྲག་གནོན་བྱེད་བཞིན་པ་དང་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་བྱ་སྤྱོད་ཐད་ལ་སྐྱོན་བརྗོད་ཤུགས་ཆེ་གནང་མཁན་ཞིག་ཡིན་སྟབས། ང་ཚོའི་དཔེ་མཛོད་ཁང་གང་རུང་ཞིག་གིས་རྒྱ་ནག་གི་ལྟ་སྤྱོད་དྲིལ་བསྒྲགས་བྱེད་དགོས་པའི་རྒྱུ་མཚན་མཐོང་གི་མི་འདུག དེས་ན་གནད་དོན་དེའི་ཐད་གྲོང་ཁྱེར་སྤྱི་ཁྱབ་གཞོན་པ་དང་བཀའ་མོལ་གནང་རྒྱུའི་ཞལ་བཞེས་གནང་འདུག རྩ་བའི་འདས་པའི་གཟའ་འཁོར་གཅིག་ལྷག་ནས་བོད་རང་བཙན་སློབ་ཕྲུག་ཚོགས་པ་དང་ས་གནས་གཞོན་ནུ་ལྷན་ཚོགས། ས་གནས་བོད་རིགས་སྤྱི་མཐུན་ཚོགས་པ། མདོ་ཁམས་ཆུ་བཞི་སྒང་དྲུག་གི་སྐུ་ཚབ་རྣམ་པ་སོགས་མཉམ་སྦྲེལ་གྱིས་ Queens  དཔེ་མཛོང་ཁང་གི་འཁྱོག་བཤད་དྲིལ་བསྒྲགས་ཀྱི་འགྲེམས་སྟོན་དེར་ངོ་རྒོལ་གྱིས་འགྲེམས་སྟོན་ཁང་གི་ཕྱི་ཕྱོགས་སུ་བོད་ནང་གི་དངོས་ཡོད་གནས་སྟངས་མཚོན་ཐབས་དང་བོད་མིས་རང་ལུས་མེར་བསྲེགས་གནང་བའི་སྐུ་པར་སོགས་སྒྲིག་གཤོམ་གནང་སྟེ་མང་ཚོགས་ཁྲོད་རྒྱ་གཞུང་གིས་གཉེར་བཞིན་པའི་འགྲེམས་སྟོན་དེ་རྫུན་གཏམ་ཁོ་ན་ཡིན་པ་གསལ་འདོན་གྱིས་ངོ་རྒོལ་ལས་འགུལ་དང་མཚན་རྟགས་བསྡུ་རུབ་བཅས་མུ་མཐུད་གནང་མུས་ཡིན་པར་མ་ཟད། བོད་མིའི་སྐུ་ཚབ་ཚབ་རྣམ་པ་དང་དཔེ་མཛོད་ཁང་གི་འབྲེལ་ཡོད་ལས་བྱེད་དབར་ཐུག་འཕྲད་ཀྱིས་འགྲེམས་སྟོན་དེ་ཕྱིར་འཐེན་བྱེད་དགོས་པའི་གྲོས་བསྡུར་གནང་ཡོད་ཀྱང་ད་བར་ Queens  འགྲེམས་སྟོན་ཁང་ནས་དེ་འབྲེལ་གྱི་འགྲེམས་སྟོན་ཕྱིར་འཐེན་གནང་རྒྱུར་ངོས་ལེན་གནང་མེད་པར་མུ་མཐུད་གཉེར་བཞིན་པ་རེད། ཤེས་རྟོགས་བྱུང་བར་གཞིགས་ན། བོད་དོན་འཁྱོག་བཤད་ཀྱི་འགྲེམས་སྟོན་དེ་ནིའུ་ཡོག་ནང་རྟེན་གཞི་བྱས་པའི་རྒྱ་ནག་གཞུང་ཚབ་ལས་ཁུངས་ནས་རྒྱབ་སྐྱོར་བྱས་པ་དང་དེ་ཕྱི་ཟླ་དྲུག་པ་བར་ Elmhurst ཡི་ Queens དཔེ་མཛོད་ཁང་ཙམ་མིན་པར་དཔེ་མཛོད་ཁང་གཞན་བརྒྱད་ཀྱི་ནང་དེ་ལྟར་སྤེལ་རྒྱུའི་འཆར་གཞི་ཡོད་པ་དང་། འགྲེམས་སྟོན་དེ་དེང་རབས་ཀྱི་རྒྱ་ནག་ཅེས་པའི་འགྲེམས་སྟོན་གྱི་ཆ་ཤས་ཡིན་པ་དང་དེའི་བརྗོད་གཞི་ནི་བོད་ནང་གི་དུས་རྒྱུན་གྱི་འཚོ་བ་ཞེས་པ་དེ་རེད་འདུག

འདི་ལོའི་བོད་མིའི་རང་དབང་སྒེར་ལངས་གནང་བའི་གསུམ་བཅུའི་དུས་དྲན་ཐེངས་ ༦༡ པ་སྲུང་བརྩི་ཞུ་ལ་ཉེ་བ་དང་འབྲེལ། དེའང་ཟླ་བ་འདིའི་ཕྱི་ཚེས་ ༡༢ ཉིན་ཐེ་ཝན་གྱི་རྒྱལ་ས་ Taipei ནང་རྟེན་གཞི་བྱས་པའི་ཡུལ་དེའི་གྲོས་ཚོགས་མདུན་དུ་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས་གནང་ཡོད་པ་དང་། ད་ལྟའི་ཆར་བོད་དོན་དྲིལ་བསྒྲགས་ཀྱི་ལས་འགུལ་དེའི་ནང་ཐེ་ཝན་མི་མང་དང་གཞོན་སྐྱེས་གཙོས་པའི་ཉི་ཧོང་མང་ཚོགས་བཅས་མཉམ་ཞུགས་གནང་མཁན་ཇེ་མང་དུ་འགྲོ་བཞིན་ཡོད་པ་རེད་འདུག དེའི་སྐོར་བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་དང་ལས་འགུལ་གོ་སྒྲིག་གནང་མཁན་སྐུ་ཞབས་བཀྲིས་ཚེ་རིང་ལགས་སུ་བཀའ་འདྲི་ཞུས་པར་ཁོང་གིས་ཉིན་མོར་རྐང་འཁོར་སྐོར་སྐྱོད་གནང་བ་དང་དགོང་མོར་བོད་དོན་དང་འབྲེལ་བའི་གསུང་བཤད་ཀྱི་ལས་རིམ་གཉེར་གྱི་ཡོད་པར་མ་ཟད་ས་གནས་གྲོས་ཚོགས་ཀྱི་འཐུས་མི་ཁག་ཅིག་དང་མཇལ་མོལ་ཡང་གནང་གི་ཡོད་པ་གསུངས་སོང་། དེ་བཞིན་ཁོང་གིས་ཐེངས་འདིའི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་ནང་མཉམ་ཞུགས་གནང་མཁན་ཐེ་ཝན་གྱི་མི་མང་གཙོས་པའི་གཞོན་སྐྱེས་དང་ཉི་ཧོང་གི་མང་ཚོགས་དོན་གཉེར་བ་བཅས་མང་དུ་འགྲོ་བཞིན་ཡོད་སྐོར་ངོ་སྤྲོད་གནང་སོང་བར་མ་ཟད། ལས་འགུལ་ནང་དངོས་སུ་དང་བླངས་ཐོག་ནས་མཉམ་ཞུགས་གནང་མཁན་ཚོའི་ངོས་ནས་བོད་དོན་ཐོག་རྒྱབ་སྐྱོར་གནང་བ་བརྒྱུད་ནས་རང་ཉིད་ཀྱི་རྒྱལ་ཁབ་ལ་དགའ་ཞེན་གྱི་བསམ་བློ་ཤུགས་ཆེ་ཡོང་བར་ཕན་ཐོགས་བྱུང་གི་ཡོད་པའི་མྱོང་ཚོར་གསུང་མཁན་ཡོད་སྐོར་གསུངས་སོང་། ཁོང་གིས་ནན་ཏན་དུ་གསུངས་པར་བོད་མིའི་ངོས་ནས་བོད་ཀྱི་གནམ་ལོ་གསར་བཞད་ཉིན་དགའ་སྤྲོའི་དཔལ་ལ་རོལ་རྒྱུ་དང་སྦྲགས། ང་ཚོ་འདིར་བཙན་བྱོལ་དུ་ཕེབས་དོན་གང་ཡིན་མ་བརྗེད་པར་ ་བོད་མིའི་རང་དབང་སྒེར་ལངས་གནང་བའི་གསུམ་བཅུའི་དུས་དྲན་ཐེངས་ ༦༡ པ་སྲུང་བརྩི་ཞུ་སླད་ད་ལྟ་ནས་སྟ་གོན་གནང་དགོས་གལ་ཡིན་པའི་གཞེན་སྐུལ་གནང་ཡོད། གཞི་རྩའི་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ལས་ཁང་གིས་བོད་མིའི་རང་དབང་སྒེར་ལངས་དང་བསྟུན་གོ་སྒྲིག་ཞུས་པའི་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་འདི་ཕྱི་ཟླ་ ༢ ཚེས་ ༡༢ རེས་གཟའ་ལྷག་པ་སྟེ་༸སྐུའི་བླ་གཟའ་ལྷག་དཀར་ཉིན་དབུ་འཛུགས་ཀྱིས་ཕྱི་ཟླ་ ༣ ཚེས་ ༡༠ བོད་མིའི་གསུམ་བཅུའི་དུས་དྲན་གྱི་ཉིན་མོའི་བར་གྱི་རེས་གཟའ་ལྷག་པ་ནམ་ཡིན་ལ་བསྟུད་མར་སྤེལ་གནང་གི་ཡོད་པ་དང་། བོད་མིའི་གསུམ་བཅུའི་དུས་དྲན་ཉིན་ལས་འགུལ་ལེགས་གྲུབ་ཀྱི་མཛད་སྒོ་དང་འབྲེལ་ཏེ་མཉམ་ཞུགས་གནང་མཁན་རྣམས་ལ་ཐུགས་རྗེ་ལེགས་གསོལ་གྱི་མཇལ་དར་འབུལ་ལམ་ཞུ་རྒྱུ་སོགས་གནང་རྒྱུ་རེད་འདུག

རྒྱལ་སྤྱིའི་དྲྭ་རྒྱ་བདེ་འཇགས་དང་འགྲོ་བ་མིའི་ཐོབ་ཐང་ལས་འགུལ་ཚོགས་པ་ ༡༢ ཀྱིས་རིང་མིན་འཚོགས་ལ་ཉེ་བའི་ཀུ་ཤུ་རྟགས་ཅན་གྱི་མ་རྩ་འཛུགས་མཁན་རྣམ་པའི་ལོ་འཁོར་ཚོགས་འདུ་དང་བསྟུན་ཚོང་ལས་ཁང་དེས་རྒྱ་ནག་དང་ངན་པ་ལག་སྦྲེལ་བྱེད་མཚམས་འཇོག་དགོས་པ་དང་། ངན་འབྲེལ་གྱི་ཤུགས་རྐྱེན་ཐེབས་ཡུལ་བོད་མི་དང་ཤིན་ཅང་། ཧོང་ཀོང་། ཐེ་ཝན། དེ་བཞིན་རྒྱ་མི་རིགས་སོགས་ཀྱི་འཐུས་ཚབ་མི་སྣ་དང་ལས་འགུལ་བ་རྣམ་པ་དང་ལྷན་ངལ་བ་ཇི་འཕྲད་གསན་འཇོག་གནང་དགོས་པའི་ཞུ་སྐུལ་གནང་འདུག དེ་ཡང་རིང་མིན་ཟླ་ ༢ ཚེས་ ༢༤ ཉིན་ཀུ་ཤུ་རྟགས་ཅན་ནང་མ་རྩ་འཛུགས་མཁན་རྣམས་ལྷན་འཛོམས་ཐོག་ཚོང་ལས་ཁང་དེའི་ལོ་འཁོར་ཚོགས་འདུ་ཞིག་འཚོགས་གཏན་ཁེལ་ཡོད་པ་དང་བསྟུན། ཟླ་ ༢ ཚེས་ ༡༣ ཉིན་བོད་དོན་ལས་འགུལ་བསྟི་གནས་ཁང་དང་རྒྱལ་སྤྱིའི་བོད་དོན་འབྲེལ་མཐུད་ཁང་། བོད་རང་བཙན་སློབ་ཕྲུག་ཚོགས་པ། བོད་རང་དབང་ཚོགས་པ། དེ་བཞིན་རྒྱལ་སྤྱིའི་ཡུ་གུར་ཚོགས་པ། ཐེ་ཝན་རང་དབང་ཚོགས་པ། Sum OF us  ཞེས་འགྲོ་བ་མིའི་ཐོབ་ཐང་དང་དྲང་བདེན་རྩོད་ལེན་གནང་མཁན་སོགས་ཀྱི་ཚོགས་པ་ ༡༢ མཉམ་སྦྲེལ་ཐོག་ཀུ་ཤུ་རྟགས་ཅན་ཚོང་ལས་ཁང་གི་མཉེན་ཆས་ཕབ་ལེན་གྱི་ཚོང་ལས་འགན་འཛིན་སྐུ་ཞབས་ Philip Schiller ལགས་ཀྱི་མཚན་ཐོག་ཏུ་ཞུ་སྙན་ཞིག་ཕུལ་འདུག ཞུ་སྙན་དེའི་ནང་ཚོགས་པ་དེ་དག་གིས་དེ་སྔོན་ཀུ་ཤུ་རྟགས་ཅན་གྱི་གཙོ་འཛིན་ Tim Cook ལགས་སུ་རྒྱ་གཞུང་གིས་བོད་དང་ཧོང་ཀོང་། ཐེ་ཝན་བཅས་ཀྱི་གཞི་རྩའི་འགྲོ་བ་མིའི་ཐོབ་ཐང་གཙོས་པའི་རང་དབང་ཁག་ལ་རྡོག་རོལ་ཚད་མེད་བཏང་བར་ཀུ་ཤུ་རྟགས་ཅན་གྱི་ངོས་ནས་རོགས་འདེགས་ཞུ་བཞིན་པར་སྐྱོན་བརྗོད་དང་འབྲེལ། གོང་དུ་མིང་སྨོས་ཡུལ་ལུང་དེ་དག་ལ་རྒྱ་ནག་གཞུང་ནས་སོ་ཉུལ་སླད་དུ་ཚོང་ལས་ཁང་དེས་ངན་པ་ལག་འབྲེལ་བྱེད་ཤུགས་ཆེ་རུ་སོང་རྐྱེན་གནས་ཚུལ་རྒྱུས་ལོན་རང་དབང་དང་། སྨྲ་བརྗོད་རང་དབང་སོགས་ལ་རྡོག་རོལ་ཤུགས་ཆེར་ཐེབས་བཞིན་ཡོད་སྟབས་རྒྱ་ནག་གཞུང་ལ་རོགས་འདེགས་དང་ངན་པ་ལག་འབྲེལ་བྱེད་འཚམས་འཕྲལ་དུ་འཇོག་དགོས་པའི་ཞུ་སྐུལ་ཐེངས་ཁ་ཤས་གནང་ཡོད་ཀྱང་ད་བར་ལན་འདེབས་གསལ་བཤད་གང་ཡང་བྱུང་མེད་སྐོར་འཁོད་འདུག ཕྱི་ལོ་ ༢༠༡༧ ལོར་ཀུ་ཤུ་རྟགས་ཅན་གྱི་མཉེན་ཆས་ ༡༠༠༠ ཙམ་ཞིག་རྒྱ་ནག་གི་མཉེན་ཆས་ཚོང་ལས་ཁང་ནས་ཕྱིར་འཐེན་གནང་རྐྱེན་བོད་གཙོས་ཤིན་ཅང་དང་རྒྱ་ནག ཧོང་ཀོང་བཅས་ཀྱི་ནང་གནས་ཚུལ་མཁོ་སྒྲུབ་བྱ་རྒྱུར་ཆེས་དམ་དྲག་དང་ལྷག་དོན་༸གོང་ས་མཆོག་གི་མཚན་དང་བོད་རང་བཙན། དེ་བཞིན་ཡུ་གུར་བའི་རང་དབང་དང་དྲུག་བཞི་དོན་རྐྱེན་སོགས་ཀྱི་ཐ་སྙད་ལ་དོག་ཟོན་ཆེན་པོ་གནང་དགོས་ཀྱི་ཡོད་པར་མ་ཟད། རྒྱ་ནག་ནང་ཀུ་ཤུ་རྟགས་ཅན་གྱི་ཁ་པར་སྤྱོད་མཁན་རྒྱ་རིགས་མང་ཚོགས་ཀྱི་གནས་ཚུལ་རྣམས་གསང་སྙུལ་བྱས་ཏེ་རྒྱ་ནག་གཞུང་ལ་མཁོ་སྤྲོད་བྱས་ཡོད་པ་སོགས་ཀྱང་ལུང་འདྲེན་གནང་འདུག བོད་གཙོས་པའི་ཤིན་ཅང་དང་རྒྱ་ནག ཧོང་ཀོང་བཅས་ཀྱི་སྐུ་ཚབ་དང་ལྷན་དཀའ་ངལ་ཇི་འཕྲད་གསན་འཇོག་གནང་དགོས་པ་དང་ཚོང་ལས་ཁང་གིས་དེ་སྔ་ཕྱིར་འཐེན་གནང་བའི་མཉེན་ཆས་རྣམས་རྒྱ་གཞུང་གི་ཁྲིམས་དང་མཐུན་པ་ཞིག་གང་འདྲ་ཡིན་མིན་དང་དེ་དག་ཁྲིམས་གཞི་གང་ཐོག་ནས་ཕྱིར་འཐེན་གནང་མིན་ཐད་གསལ་བཤད་དགོས་སྐོར་གསུངས་པར་མ་ཟད། བཟོ་ཚོང་ཁང་དེའི་འབྲུ་དོན་ལྟར་འགྲོ་བ་མིའི་སྨྲ་བརྗོད་རང་དབང་དང་སྒེར་གྱི་གསང་བ་བདག་སྲུང་གནང་རྒྱུ་དང་མཐུན་པའི་འགན་དབང་འཐུས་ཚང་བཞེས་དགོས་གལ་ཡིན་པའི་ཞུ་སྐུལ་གནང་འདུག

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་མཆེད་པའི་ཏོག་དབྱིབས་ནད་དུག་གསར་པའི་གློ་ཚད་དམ་ Corona virus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་དུ་མར་རིམ་བཞིན་ཁྱབ་བརྡལ་ཤུགས་ཆེར་སོང་བར་བརྟེན་རྒྱལ་སྤྱིའི་ཐོག་ཛ་དྲག་གི་རང་བཞིན་ལྡན་པའི་རིམས་ནད་ཅིག་ཏུ་ངོས་འཛིན་གནང་བཞིན་པའི་ཁྲོད་འདིར་བོད་ཆོལ་གསུམ་ལས་མདོ་སྟོད་ཁོངས་གཏོགས་རྟའུ་ཁུལ་དུ་ད་བར་ནད་གཞི་དེ་ཕོག་པའི་མི་གྲངས་ཁྱོན་ ༣༩ བྱུང་ཡོད་སྟབས། རྟའུ་ཡུལ་དགོན་སྤྱི་ནས་༸གོང་༸སྐྱབས་མགོན་ཆེན་པོ་མཆོག་ལ་བརྟག་ཞུ་ཞུས་པར་མགོན་པོ་༸གང་ཉིད་མཆོག་གིས་ཁ་སང་ཕྱི་ཚེས་ ༡༤ ཉིན་བརྟག་པ་བགྱིས་འབྲས་སུ་དམིགས་བསལ་ངན་དོག་ཆེ་བ་མེད་ཅེས་བཀའ་བསྩལ་འདུག དེའང་ད་ལྟའི་ཆར་བོད་ཀྱི་རྒྱལ་ས་ལྷ་ས་གཙོ་བོར་གྱུར་པའི་ས་གནས་ཁག་ཏུ་གློ་ཚད་རིམས་ནད་དེ་ཁྱབ་བརྡལ་ཡོང་བར་དོགས་ནས་བོད་མི་ཚོས་ཡིད་གཟབ་དང་འཕྲོད་བསྟེན་ལ་ཐུགས་སྣང་རྒྱ་གང་ཆེ་གནང་མུས་ཡིན་པ་དང་། རྒྱ་གཞུང་གི་འབྲེལ་ཡོད་ལས་བྱེད་ཚོས་ཀྱང་རིམས་ནད་དེེ་འགོས་པར་དོགས་ཏེ་གཞིས་བཞུགས་བོད་མི་དག་ལ་རང་ཉིད་ཀྱི་ནང་ནས་ཕྱི་ལ་བསྐྱོད་རྒྱུ་གཙོས་པའི་འགྲོ་འདུག་སྤྱོད་གསུམ་ལ་དམ་དྲག་ཆེས་ཆེར་བྱས་དང་བྱེད་བཞིན་ཡོད་པ་རེད། འོན་ཀྱང་མདོ་སྟོད་ཁོངས་གཏོགས་རྟའུ་ཁུལ་དུ་ད་བར་མི་གྲངས་ ༣༩ ལ་གློ་ཚད་གསར་པའི་རིམས་ནད་དེ་ཕོག་པར་བརྟེན་ནས་བོད་ནང་ནས་རིམས་ནད་ཕོག་པའི་གྲངས་འབོར་མང་ཤོས་ཀྱི་ས་ཚིགས་ཤིག་གྱུར་བར་བརྟེན། རྟའུ་ཡུལ་དགོན་སྤྱི་ནས་༸གོང་ས༌སྐྱབས་མགོན་ཆེན་པོ་མཆོག་ལ་དེ་འབྲེལ་བརྟག་ཞུ་གསོལ་འདེབས་ཞུས་པར་མགོན་པོ་༸གང་ཉིད་མཆོག་གིས་བརྟག་པར་བགྱིས་འབྲས་སུ་དམིགས་བསལ་ངན་དོག་ཆེ་བ་གང་ཡང་མ་ཤར་ཡང་སྤྱི་མཐུན་ལས་དབང་དང་འབྲེལ་བས་ཡུལ་སྤྱི་ནས་འཕྲོད་བསྟེན་སྔོན་འགོག་གཟབ་ནན་དང་། ༸རྗེ་བཙུན་སྒྲོལ་མའི་མཚན་སྔགས་དང་མ་ཎི་གང་འགྲོ་གསོག་དགོས་གལ་ཆེ་བ་མ་ཟད། ༸སྟོན་པའི་གསུང་གི་སྙིང་པོ་བྱང་ཆུབ་སེམས་དང་སྟོང་ཉིད་ཀྱི་ལྟ་བར་ཐོས་བསམ་སྒོམ་པ་ཅི་ཐུབ་གནང་ཚེ་ཚོགས་བསགས་དང་ལས་སྒྲིབ་སྦྱོང་བར་དེ་ལས་ལྷག་པའི་གནད་ཆེ་བ་མེད་ཅེས་ལམ་སྟོན་བཀའ་བསྩལ་མཛད་འདུག གཞི་རྩའི་༸གོང་ས་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཕྱི་ཟླ་ ༡ ཚེས་ ༢༩ ཉིན་ཐེ་ལན་ཌི་དང་ཝེ་ཏི་ནམ་གྱི་དད་ལྡན་ཁག་གཅིག་ལ་མཇལ་ཁ་བསྩལ་སྐབས་རྒྱ་ནག་ནང་གི་ནད་ཡམས་དེའི་ཆེད་ཐུགས་སྨོན་མཛད་པ་མ་ཟད། ནད་ཡམས་དེ་ཞི་བར་སྒྲོལ་མའི་གཟུངས་སྔགས་གསུང་འདོན་གནང་ཚེ་ཕན་ཕོགས་ཡོད་པར་ལམ་སྟོན་མཛད་ཡོད་པར་མ་ཟད། དེ་རྗེས་སླར་ཚེས་ ༣༠ ཉིན་༸མགོན་པོ་༸གང་ཉིད་མཆོག་གིས་བླ་ལྷའི་ཐུགས་དམ་དགོངས་དོན་ལྟར་ཐུབ་པའི་མཚན་སྔགས་དང་མ་ཎི་དུང་ཕྱུར།  སྒྲོལ་མའི་མཚན་སྔགས་ཡི་གེ་བཅུ་པ། བཀའ་འགྱུར་དག་སྒྲོག རྡོ་རྗེ་རྣམ་འཇོམས་མའི་སྒོ་ནས་རྟེན་ཁྲུས་ཡུལ་ཁྲུས་དང་། འདོད་ཁམས་བདག་མོའི་བསྐང་བ་དང་འབྲེལ་མ་མོའི་འཁྲུགས་སྐོང་། པདྨའི་མནོལ་བསངས་བཅས་འཕྲལ་དུ་བསྒྲུབ་དགོས་པ་དང་། གཟུང་སྔགས་ཁག་མང་ཚོགས་སོ་སོ་ནས་གནང་དགོས་པ། དེ་མིན་རྣམས་དགོན་སྡེ་དང་གྲོང་སྡེ་སྤྱི་ཚོགས་བཅས་ནས་རང་དོན་རང་གཅེས་ཀྱིས་འཕྲལ་དུ་བསྒྲུབ་གལ་ཆེ་བའི་འབོད་སྐུལ་མཛད་ཡོད་པ་རེད།