རྒྱ་ནག

འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་ནག་གིས་ཐབས་བརྒྱ་ཇུས་སྟོང་གིས་ཁུང་རྩི་ཤེས་ཡོན་ལྟེ་གནས་ཆེད་འཛུགས་ཀྱིས་ཕྱི་ཕྱོགས་སུ་རྒྱ་ནག་གི་གནོད་ཤུགས་ཁྱབ་སྤེལ་དང་ཤེས་ཡོན་གྱི་རང་དབང་ཉམ་དམས་སུ་གཏོང་བཞིན་ཡོད་པ་གསལ་འདོན་དང་སྦྲགས། ཕྱི་ཕྱོགས་ཀྱི་མཐོ་སློབ་དང་གཙུག་ལག་སློབ་ཆེན་སོགས་ཀྱིས་ལག་བསྟར་བྱེད་དགོས་པའི་སྒྲིག་ཡིག་དོན་ཚན་བཅུ་གཉིས་ཅན་ཞིག་ཁྱབ་བསྒྲགས་ཀྱིས་རྒྱ་ནག་གི་གནོད་ཤུགས་ལ་བཀག་འགོག་བྱེད་དགོས་བའི་འབོད་བརྡ་བཏང་འདུག ཨ་རིའི་ནིའུ་ཡོག་གྲོང་ཁྱེར་དུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་དྲྭ་གནས་ཐོག་གསར་འགོད་གསལ་བསྒྲགས་ཤིག་སྤེལ་ནས་སྒྲིག་ཡིག་དོན་ཚན་བཅུ་གཉིས་ཅན་དེ་ཡོངས་བསྒྲགས་གནང་ཡོད་པ་དང་། ཚོགས་པའི་རྒྱ་ནག་ལྟ་ཞིབ་སྡེ་ཚན་གྱི་འགན་འཛིན་ལྕམ་ Sophie Richardson ལགས་ཀྱིས་གསར་འགོད་གསལ་བསྒྲགས་དེའི་ནང་མཐོ་སློབ་སློབ་ཁག་དང་གཙུག་ལག་སློབ་སློབ་ཆེན་སོགས་ཀྱིས་མཉམ་འབྲེལ་ཐོག་རྒྱ་ནག་གི་སུན་གཙེར་དང་ཞིབ་བཤེར་གྱི་ཁ་གཏད་དུ་ལངས་ནས་ཕྱི་རྒྱལ་གྱི་སློབ་གྲྭ་ཁག་གི་ཁོངས་སུ་རྒྱ་ནག་གི་གནོད་ཤུགས་དང་ཤེས་ཡོན་གྱི་རང་དབང་ལ་ཞིབ་བཤེར་གནང་བཞིན་པ་དེ་བཀག་འགོག་གནང་དགོས་བའི་སྐུལ་མ་གནང་འདུག  རྩ་བའི་ཕྱི་ལོག་གི་ཤེས་ཡོན་ལྟེ་གནས་དག་གིས་ལག་བསྟར་བྱེད་དགོས་པའི་རྒྱ་ནག་གི་གནོད་ཤུགས་བཀག་འགོག་གི་དོན་ཚན་བཅུ་གཉིས་ཅན་གྱི་སྒྲིག་ཡིག་དེ་ཕྱི་ལོ་ ༢༠༡༥ ནས་ ༢༠༡༨ བར་ཨོ་གླིང་དང་ཨ་རི། དེ་བཞིན་ཁེ་ན་ཌ། ཕ་རན་སི་བཅས་མཚོན་པའི་ཕྱིའི་རྒྱལ་ཁབ་ཀྱི་གཙུག་ལག་སློབ་གྲྭའི་ཆེད་མཁས་པ་དང་སློབ་མ་སོགས་ལ་ཆེད་དུ་བཅར་འདྲི་ཞུས་པ་བརྒྱུད་ནས་གཏན་འབེབས་གནང་བ་ཞིག་ཡིན་པ་དང་། བཅར་འདྲི་དེ་དག་བརྒྱུད་རྒྱ་ནག་སྲིད་གཞུང་གིས་ཕྱི་ཕྱོགས་ཀྱི་ཤེས་ཡོན་ལྟེ་གནས་འདྲ་མིན་ནང་གི་རྒྱ་རིགས་སློབ་མ་དག་ལ་བཏང་འཛིན་ནན་པོ་བྱས་ཏེ་ཞིབ་བཤེར་བྱེད་བཞིན་པ་ཤེས་རྟོགས་བྱུང་བ་མ་ཟད། རྒྱ་ནག་གི་མགྲིན་ཚབ་པ་དག་གིས་གཙུག་ལག་སློབ་ཆེན་འདྲ་མིན་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་གནང་རྒྱུའི་མཛད་འཆར་ལའང་བཀག་འགོག་བྱེད་བཞིན་ཡོད་པ་མངོན་གསལ་གནང་ཡོད་པ་རེད། ཕྱི་ལོག་ཏུ་ཡོད་པའི་རྒྱ་རིགས་སློབ་མ་ཁག་གིས་རྒྱ་ནག་སྲིད་གཞུང་དང་འབྲེལ་བའི་སྐད་ཆ་ཕྱི་ལོག་ཏུ་བཤད་པ་ཡིན་ན་རྒྱལ་ནང་དུ་ཡོད་པའི་ནང་མི་དག་ལ་འཇིགས་སྐུལ་བྱེད་བཞིན་ཡོད་པའི་གནས་ཚུལ་དང་། དེ་བཞིན་ཕྱི་ལོག་གི་རྒྱ་རིགས་མཁས་དབང་རྣམས་ཀྱིས་ཀྱང་རྒྱ་ནག་སྲིད་གཞུང་ལ་སྐྱོན་བརྗོད་སོགས་ཀྱི་གཏམ་བཤད་གནང་ཚེ་ཐད་ཀར་སྲིད་གཞུང་ནས་འཇིགས་སྐུལ་བྱེད་བཞིན་པའི་གནས་ཚུལ་མང་པོ་ཤེས་རྟོགས་བྱུང་བ་མ་ཟད། དབྱིན་ཡུལ་གྱི་གཙུག་ལག་སློབ་ཆེན་གཉིས་ནང་ནམ་རྒྱུན་ནས་རྒྱ་ནག་ལ་སྐྱོབ་བརྗོད་གནང་བཞིན་པའི་མཁས་དབང་གི་གཏམ་བཤད་གནང་རྒྱུ་ཕྱིར་འཐེན་བྱས་ཡོད་པ་སོགས་རྒྱ་ནག་གི་གནོད་ཤུགས་ཇེ་ཆེར་འགྲོ་བཞིན་པ་མངོན་གསལ་གནང་འདུག འགྲོ་བ་མིའི་ཐོབ་ཐང་ཚོགས་པས་ཐེངས་འདིར་འདོན་སྤེལ་གནང་བའི་དོན་ཚན་བཅུ་གཉིས་ཅན་གྱི་སྒྲིག་ཡིག་དེའི་ནང་ཕྱི་ཕྱོགས་ཀྱི་ཤེས་ཡོན་ལྟེ་གནས་ཁང་ནས་སློབ་ཆེན་གཞན་དང་མཉམ་འབྲེལ་ཐོག་རྒྱ་ནག་གི་སྤྱི་ཚོགས་ལ་ཞིབ་འཇུག་གི་ཁོར་ཡུག་རྒྱ་སྐྱེད་བྱས་ཏེ་སློབ་ཆེན་དུ་རྒྱ་ནག་གི་ཁུང་རྩི་སློབ་གཉེར་གྱི་ཡན་ལག་འཛུགས་རྒྱུར་བཀག་འགོག་གནང་དགོས་པ། སློབ་ཆེན་ནང་རྒྱ་གཞུང་གིས་དམ་དྲག་དང་སུན་གཙེར། འཇིགས་སྐུལ་སོགས་ཀྱི་གནས་ཚུལ་ཡོངས་རྫོགས་ཐོ་འགོད་གསལ་པོ་གནང་ནས་ལོ་འཁོར་སྙན་ཐོ་འདོན་སྤེལ་གནང་དགོས་པ། སློབ་མ་རྣམས་ལ་དེ་འདྲའི་དཀའ་ངལ་རིགས་འཕྲད་སྐབས་མིང་གསལ་མ་ཡིན་པའི་སྒོ་ནས་འབྲེལ་གཏུགས་གནང་ཡུལ་སྐུ་ཚབ་བསྐོ་གཞག་སོགས་ཀྱི་སྒྲིག་གཞི་གཏན་འབེབས་དགོས་པ། རྒྱ་ནག་ནང་ཞིབ་འཇུག་གནང་མཁན་སློབ་མ་དང་མཁས་དབང་རྣམས་ལ་གཞུང་གི་དམ་དྲག་སོགས་ཀྱི་དཀའ་ངལ་འཕྲད་སྐབས་ཞིབ་འཇུག་གི་དུས་ཚོད་འཕར་འགྱང་དང་རང་ཉིད་ཀྱི་མིང་སྤྱོད་མི་དགོས་པ་བཅས་ཀྱི་སྒྲིག་གཞི་ཆག་ཡང་གཏོང་དགོས་པ། སློབ་གྲྭའི་ཁོར་ཡུག་ཏུ་རྒྱ་ནག་གི་གནོད་ཤུགས་ཡོད་མེད་ལ་ལྟོས་མེད་རང་དབང་གི་གཏམ་བཤད་པ་དག་གནད་ཞུ་བྱས་ནས་སྤྱི་ཡོངས་ཀྱི་སློབ་སྦྱོང་གི་ཁོར་ཡུག་ལ་རང་དབང་བསྐྲུན་རྒྱུ། རྒྱ་གཞུང་ནས་རག་སོན་བྱུང་བའི་དངུལ་དང་འབྲེལ་ཡོད་ལས་གཞི་བཅས་ཀྱི་སྐོར་ལ་ཕྱི་གསལ་ནང་གསལ་དགོས་པ་དང་། རྒྱ་རིགས་སློབ་མ་དང་མཁས་དབང་མཐུན་ཚོགས་གཙོ་གྱུར་རྒྱ་ནག་གི་གཞུང་ཚབ་ཁང་དང་གཞུང་འབྲེལ་ཚན་པ་ཁག་གྱི་རྒྱབ་སྐྱོར་ཡོད་པའི་སློབ་ཆེན་སོ་སོའི་ནང་གི་ཚོགས་པ་ཁག་ལ་ཞིབ་འཇུག་ནན་པོ་ཡོད་པ་སོགས་འགྲེལ་བརྗོད་གནང་འདུག རྩ་བའི་རྒྱ་ནག་གཞུང་གིས་ཨ་རི་དང་ཁེ་ན་ཌ། ཨོ་སི་ཊོ་ལི་ཡ་སོགས་ཕྱི་རྒྱལ་ཡུལ་གྲུ་འདྲ་མིན་ནང་གི་གཙུག་སློབ་གཉེར་ཁང་མང་པོ་ཞིག་ཏུ་ཁུང་རྩི་སློབ་གླིང་ཞེས་པ་ཆེད་འཛུགས་བརྒྱུད་རྒྱ་སྐད་དང་རྒྱ་ཡིག་སློབ་ཁྲིད་བྱེད་ཚུལ་གྱི་མིང་ཐོག་ནས་དོན་དངོས་སུ་སློབ་གླེང་དེ་དག་གི་ཤེས་ཡོན་སློབ་གསོའི་རང་དབང་ལ་ཐེ་གཏོགས་དང་འབྲེལ་རྒྱ་ནག་དམར་ཤོག་གི་ལྟ་སྤྱོད་གོང་འཕེལ་དང་རྒྱལ་སྤྱིའི་ཁྲོད་རྒྱ་ནག་ལ་ལྟ་ཕྱོགས་འགྱུར་བ་གཏོང་ཐབས་བྱེད་བཞིན་པ་ལྟར། འདས་པའི་ལོ་ཤས་ནས་དེའི་ཐོག་བློ་འཚབ་དང་བཅས་ཨ་རིའི་  Chicago དང་ Massachusetts དེ་བཞིན་ Boston བཅས་ཀྱི་གཙུག་ལག་སློབ་གཉེར་ཁང་མང་པོར་ཁུང་རྩི་སློབ་གླིང་གི་ཡན་ལག་ཁག་སྒོ་བརྒྱབས་ཟིན་པའི་གནས་ཚུལ་བྱུང་ཡོད་པ་རེད། བཞུགས་སྒར་དྷ་རྨ་ས་ལར་འཚོགས་བཞིན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་སུའང་རྒྱ་ནག་གི་ཁུང་རྩི་སློབ་གླིང་གི་སྐོར་ནས་བགྲོ་གླེང་གནང་ནས་རྒྱལ་སྤྱིའི་སྟེང་རྒྱ་ནག་གི་གནོད་ཤུགས་ཆུང་དུ་གཏོང་རྒྱུར་ཤུགས་སྣོན་རྒྱག་དགོས་པའི་གླེང་སློང་བྱུང་ཡོད་པ་རེད།

ཇི་ནི་ཝའི་ནང་འཚོགས་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ པ་དང་བསྟུན་རྒྱ་གཞུང་གིས་འདས་པའི་ལོ་ངོ་དྲུག་ཅུའི་ནང་བོད་དུ་ཐབས་བརྒྱ་ཇུས་གཏོང་གིས་བོད་མིའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ཁག་མཚམས་འཇོག་དགོས་པའི་ཞི་བའི་སྐད་འབོད་ཀྱི་ལས་འགུལ་སྤེལ་སོང་།དེ་རིང་ཟླ་ ༣ ཚེས་ ༢༢ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༤༠ པའི་ཉིན་མཐའ་མ་དང་བསྟུན་སུད་སི་དང་ལིག་ཏེན་སིཊཡན་བོད་རིགས་མི་མང་གིས་གོ་སྒྲིག་འོག་ཇི་ནི་ཝའི་རྒྱལ་ཚོགས་མདུན་གྱི་ལས་འགུལ་ཐང་ཆེན་དུ་སུད་སི་ནང་གི་ས་གནས་ཁག་འདྲ་མིན་གི་བོད་མི་མང་ཚོགས་དང་བོད་མིའི་གཞུང་འབྲེལ་མིན་པའི་ཚོགས་པ་ཁག དེ་བཞིན་བོད་དོན་རྒྱབ་སྐྱོར་བ་རྣམས་འདུ་འཛོམས་ཀྱིས་རྒྱལ་གཅེས་པ་འདས་གསོན་རྣམས་ལ་མྱ་ངན་གུས་འདུད་ཀྱི་གདུང་སེམས་མཉམ་བསྐྱེད་ཞུས་པ་དང་འབྲེལ། ལས་འགུལ་བ་རྣམས་ཀྱིས་ལག་ཏུ་བོད་ཀྱི་རྒྱལ་དར་དང་རྒྱ་གཞུང་ནས་བོད་དུ་འགྲོ་བ་མིའི་ཐོབ་རྡོག་རོལ་དང་བོད་མི་དམར་གསོད་ཀྱི་སྲིད་བྱུས་མཚམས་འཇོག་དགོས་པ་དང་། ༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གིས་གཙོས་པའི་ཆབ་སྲིདབཙོན་པ་རྣམས་གློད་བཀྲོལ་དགོས་པ། དེ་བཞིན་རྒྱལ་ཚོགས་ནས་བོད་མིར་དྲང་བདེན་གནང་དགོས་པའི་དགོས་འདུན་དང་ངོ་རྒོལ་གྱི་ལས་འགུལ་སྤེལ་སོང་།སྐབས་དེར་སུད་སི་དང་ལིག་ཏེན་སིཊཡན་བོད་རིགས་མི་མང་གི་ཚོགས་གཙོ་ནོར་བུ་མཚམས་རྡོ་ལགས་ཀྱིས་རྒྱ་གཞུང་གིས་བོད་ནང་བཙན་འཛུལ་བྱས་པ་ནས་བཟུང་འདས་པའི་ལོ་ངོ་ ༦༠ ནང་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་བཏང་ཡོད་པ་པ་དང་། བོད་མིའི་ཐོབ་ཐང་གི་ཆེད་རྒྱབ་སྐྱོར་གནང་བ་འདི་ནི་རྒྱལ་སྤྱིའི་གཞི་རྩའི་འགྲོ་བ་མིའི་ཐོབ་ཐང་གི་རྩ་དོན་ལ་རྒྱབ་སྐྱོར་གནང་བ་དང་གཅིག་མཚུངས་རེད་ཅེས་གསུངས་ཡོད།ལས་འགུལ་འདིའི་ཁྲོད་རྒྱལ་ཚོགས་སུ་ཞུ་སྙན་ཞིག་ཕུལ་སོང་བ་དང་། དེའི་ནང་རྒྱ་གཞུང་གིས་འདས་པའི་ལོ་ངོ་དྲུག་ཅུའི་རིང་བོད་ནང་ཐབས་བརྒྱ་ཇུས་གཏོང་གིས་བོད་མིའི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ཁག་མཚམས་འཇོག་དགོས་པ་དང་རྒྱ་གཞུང་ནས་བོད་རྒྱ་འབྲེལ་མོལ་བསྐྱར་གསོ་གནང་དགོས་པ། རྒྱ་གཞུང་གིས་འདི་ལོའི་དུས་བཀག་བསྐྱར་ཞིབ་ཐོག་རྒྱལ་ཚོགས་ལ་བཟང་ཕྱོགས་ཀྱི་རྣམ་པ་གང་ཡང་བཏོན་མེད་སྐོར་སོགས་དོན་ཚན་གསུམ་ཅན་གྱི་ཞུ་སྙན་ཞིག་ཇི་ནི་ཝའི་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་ལྕམ་སྐུ་ Michelle Bachelet ལགས་ཀྱི་མཚན་ཐོག་ཏུ་ཕུལ་ཡོད་པ་རེད། རྩ་བའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ པ་དེ་རིང་མཇུག་སྒྲིལ་གནང་ཡོད་པ་དང་། ཐེངས་འདིའི་ལྷན་ཚོགས་ཐོག་རྒྱལ་སྤྱིའི་རྒྱལ་ཁབ་ཁག་དང་། དེ་བཞིན་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ཁག་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་སྐོར་རྒྱལ་ཚོགས་སུ་བསྐྱར་ནན་གྱིས་སྙན་གསེང་དང་། རྒྱ་ནག་གི་དུས་བཀག་བསྐྱར་ཞིབ་ཐོག་ཆ་ཤས་བཞེས་ཕྱོགས་ལ་སྐྱོན་བརྗོད། དེ་བཞིན་རྒྱལ་ཚོགས་ནས་བོད་ནང་དམིགས་བསལ་རྟོག་ཞིབ་མིསྣ་ཆེད་གཏོང་གནང་རྒྱུ། བོད་རྒྱ་འབྲེལ་མོལ་བསྐྱར་མཐུད་ཡོང་རྒྱུར་རྒྱ་གཞུང་ལ་ཕྱོགས་གང་ས་ནས་ཤུགས་སྣོན་གནང་གནད་ཡིན་པའི་རེ་འདུན་ཤུགས་ཆེ་གནང་ཡོད་པ་རེད།

ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ Thanh Hai Ngo ལགས་ཀྱིས་ཡུལ་དེའི་གྲོས་ཚོགས་གོང་མའི་ནང་བོད་རྒྱ་འབྲེལ་མོལ་བསྐྱར་གསོ་དང་བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་གྲོས་ཆོད་གྲོས་འཆར་ཆེད་བཏོན་གནང་འདུག དེ་ཡང་ Canada Tibet Committee འམ་ཁེ་ན་ཌ་བོད་དོན་རྒྱབ་སྐྱོར་ཚོགས་པས་ཁ་སང་ཁེ་ན་ཌ་གྲོས་ཚོགས་གོང་མའི་ནང་ Ontario ས་གནས་ཀྱི་རྙིང་ཞེན་ཚོགས་པའི་གྲོས་ཚོགས་འཐུས་མི་སྐུ་ཞབས་ Thanh Hai Ngo ལགས་ཀྱིས་ཁེ་ན་ཌ་གཞུང་ལ་འབོད་སྐུལ་གྱི་གྲོས་འཆར་ཞིག་བསྣམས་ཏེ་བོད་ལ་མིང་དོན་མཚུངས་པའི་རང་སྲིད་རང་སྐྱོང་དགོས་པ་དང་། གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཞག་བོད་རྒྱ་འབྲེལ་མོལ་བསྐྱར་གསོ་དགོས་པ། བོད་མིའི་སྐད་ཡིག་དང་རིག་གཞུང་། འགྲུལ་སྐྱོད། བསམ་བློ། ཆོས་དད་རང་དབང་ལ་གུས་བརྩི། དེ་བཞིན་བོད་མི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་དགོས་པ་དང་བོད་མི་གང་བྱུང་དུ་འཛིན་བཟུང་མཚམས་འཇོག་དགོས་པ། ལྷག་པར་དུ་ཁེ་ན་ཌའི་མི་སེར་རྣམས་ལ་བོད་ནང་བཀག་སྡོམ་མེད་པར་འདྲ་མཉམ་འགྲུལ་སྐྱོད་ཀྱི་རང་དབང་དགོས་པའི་གནད་དོན་བཅས་ཀྱི་ཐོག་ཁེ་ན་ཌ་གཞུང་གིས་རྒྱབ་སྐྱོར་ཡོད་པའི་ཐོག་ནས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་རེ་སྐུལ་གནང་འདུག རྩ་བའི་སྐུ་ཞབས་ Thanh Hai Ngo ལགས་ནི་འགྲོ་བ་མིའི་ཐོབ་ཐང་གི་གནད་དོན་ཐོག་ཐུགས་ཁུར་ཆེ་བཞེས་གནང་མཁན་ཞིག་དང་ལོ་མང་ནས་བོད་དོན་རྒྱབ་སྐྱོར་གནང་མཁན་ཞིག་ཡིན་པ་རེད། ཁོང་ནས་དེ་སྔ་ཕྱི་ལོ་ ༢༠༡༧ ལོར་ཡུལ་དེའི་སྲིད་བློན་ Trudeau མཆོག་རྒྱ་ནག་ལ་གཞུང་འབྲེལ་འཚམས་གཟིགས་ཕེབས་བསྟུན། གྲོས་ཚོགས་འཐུས་མི་སྐུ་ཞབས་ Dennis Glen Patterson ལགས་ཀྱིས་སྣེ་ཁྲིད་འོག་ཁེ་ན་ཌའི་གྲོས་ཚོགས་འཐུས་མི་གཞན་ཁག་གཅིག་དང་ལྷན་དུ་༸ཀུན་གཟིགས་༸པཎ་ཆེན་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་མཆོག་དང། བོད་མི་སྐད་ཡིག་ལས་འགུལ་བ་བཀྲིས་དབང་ཕྱུག་ལགས། དེ་བཞིན་སྨན་པ་ཡེ་ཤེས་ཆོས་སྒྲོན་ལགས་གསུམ་གྱིས་དབུས་པའི་བོད་ནང་བོད་མི་ཆབ་སྲིད་བཙོན་པའི་གནས་སྟངས་ཐོག་རྟོག་ཞིབ་ཀྱི་ལས་དོན་དབུ་འཛུགས་གནང་མྱོང་ཡོད་པ་རེད།

ཉེ་ལམ་ལྷོ་ཨ་ཕི་རི་ཀའི་གྲོས་ཚོགས་སུ་ཁུལ་དེའི་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ Kevin Mileham མཆོག་གིས་ཚོར་ཤུགས་ཆེན་པོའི་ཐོག་ནས་རྒྱ་ནག་གི་སྐོར་གསུང་བཤད་གནང་སྐབས་བོད་ཀྱི་གནད་དོན་ཐོག་གླེང་སློང་གནང་བ་དང་འབྲེལ། ལྷོ་ཨ་ཕི་རི་ཀའི་རྒྱལ་ཁབ་ཀྱི་དཀའ་ངལ་དེ་ལྷོ་ཨ་ཕི་རི་ཀ་རང་གི་མི་རིགས་ཚོས་སེལ་དགོས་པ་ལས་དེ་འབྲེལ་རྒྱ་ནག་དམར་ཤོག་ཚོགས་པ་ལྟ་བུ་ནས་སེལ་རྒྱུ་མེད་ཅེས་གསུངས་སོང་། སྐུ་ཞབས་ Kevin མཆོག་གིས་གྲོས་ཚོགས་སུ་རྒྱ་ནག་ནི་ལོ་རྒྱུས་ལྡན་པའི་རྒྱལ་ཁབ་ཅིག་ཡིན་པ་དང། ང་ཚོོས་རྒྱ་ནག་ནས་སློབ་སྦྱོང་གནང་རྒྱུ་མང་པོ་ཡོད་ཀྱང། ངེས་པར་དུ་རྒྱ་ནག་དང་འབྲེལ་བ་ཡོད་པའི་རྒྱལ་ཁབ་དག་གི་འབྲེལ་ལམ་ཐད་ནོར་འཁྲུལ་གང་བྱུང་བ་དེར་ཐུགས་སྣང་གནང་དགོས་པ་དང་། འདས་པའི་ལོ་བཅུའི་ནང་རྒྱ་གཞུང་ནས་དབུལ་ཕོངས་མེད་པ་བཟོ་རྒྱུར་འབད་ཀྱང་། ཉེ་ཆར་ང་ཚོ་རྒྱ་ནག་གྲོང་གསེབ་ཁུལ་དུ་བསྐྱོད་སྐབས་མི་མང་པོ་ཞིག་དབུལ་ཕོངས་ཀྱི་གནས་བབས་ཐོག་གནས་ཡོད་པ་མཐོང་རྒྱུ་འདུག་པས་རྒྱ་ནག་ནང་དབུལ་ཕྱུག་དབར་བར་ཁྱད་ཆེན་པོ་ཡོད་པ་མངོན་གསལ་གནང་འདུག ཁོང་གིས་རྒྱ་གཞུང་གིས་ས་གནས་གང་སར་དམ་དྲག་ཇེ་ཆེར་བཏང་ནས་གདོང་རིས་ངོས་འཛིན་ཐུབ་པའི་འཕྲུལ་ཆས་དང།   ས་གནས་གང་སར་བསྐྱོད་མི་ཆོག་པའི་བཀག་སྡོམ། དེ་བཞིན་ཕྱི་རྒྱལ་གྱི་གཞུང་འབྲེལ་དང་གཞུང་འབྲེལ་མིན་པའི་མི་སེར་རྣམས་བོད་ནང་ཕེབས་སྐབས་རྒྱ་རིགས་ལམ་སྟོན་པ་གཅིག་ངེས་པར་དུ་མཉམ་དུ་བཏང་ཏེ་འགྲེལ་བརྗོད་གནང་ཡོད་པ་དང་རྒྱ་གཞུང་གིས་རྒྱའི་མངའ་ཁོངས་སུ་ཡོད་པའི་མི་རིགས་དག་གི་གཞུང་འཛིན་ལ་རང་སྐྱོང་ལྗོངས་ཟེར་ནས་མིང་བཏགས་ཀྱང་དོན་དངོས་ཐོག་རྒྱ་གཞུང་གིས་བཏང་འཛིན་བྱེད་ཀྱི་ཡོད་པ་དང་འབྲེལ། དེའི་ཁོངས་སུ་བོད་ཚུད་ཡོད་སྟབས་བོད་ལྟ་བུར་ཆ་མཚོན་ན་དེ་སྔ་རང་དབང་གཙང་མའི་རྒྱལ་ཁབ་ཅིག་ཡིན་པ་དང། ཕྱི་ལོ་ ༡༩༤༩༌༡༩༥༠ ལོར་རྒྱས་བོད་དུ་བཙན་འཛུལ་བྱས་ཡོད་སྐོར་དང། བོད་ཀྱི་རིག་གཞུང་། ངོ་བོ། དེ་བཞིན་འགྲོ་བ་མིའི་ཐོབ་ཐང་གི་གནས་བབས་སོགས་ལ་རྒྱལ་སྤྱིའི་ཚོགས་པ་ནས་བློ་ཚབ་གནང་དགོས་པ་ཞིག་ཆགས་ཡོད་པ་གསུངས་འདུག དེ་བཞིན་ལྷོ་ཨ་ཕི་རི་ཀའི་ངོས་ནས་རྒྱ་ནག་གིས་གནོན་ཤུགས་འོག་བོད་མིའི་བླ་ན་མེད་པའི་དབུ་ཁྱིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་༸ཞབས་སོར་འཁོད་པར་མཐོང་མཆན་ཕུལ་མེད་སྐོར་དང། ལྷོ་ཨ་ཕི་རི་ཀའི་རྒྱལ་ཁབ་ཀྱི་དཀའ་ངལ་དེ་ལྷོ་ཨ་ཕི་རི་ཀ་རང་གི་མི་རིགས་ཚོས་སེལ་དགོས་པ་ལས་དེ་འབྲེལ་རྒྱ་ནག་དམར་ཤོག་ཚོགས་པ་ལྟ་བུ་ནས་སེལ་རྒྱུ་མེད་ཅེས་གསུངས་སོང་། གཞི་རྩའི་རྒྱ་ནག་གཞུང་གིས་དཔལ་འབྱོར་གྱི་དབང་ཤུགས་འོག་དཔལ་འབྱོར་གྱི་དཀའ་ངལ་འོག་ལྷུང་བའི་རྒྱལ་ཁབ་མང་པོ་ཞིག་ནས་རྒྱ་ནག་དང་ལག་སྦྲེལ་བྱས་པ་དང།  ལྷོ་ཨ་ཕི་ར་ཀར་ཆ་མཚོན་ན་༸གོང་ས་མཆོག་ཁུལ་དེར་ཆིབས་བསྒྱུར་ཐེངས་གསུམ་བསྐྱངས་མྱོང་ཡོད་ཀྱང་། ཉེ་བའི་ལོ་ཤས་ནང་རྒྱ་གཞུང་གིས་གནོན་ཤུགས་འོག་༸གོང་ས་མཆོག་ཆིབས་བསྒྱུར་བསྐྱང་སླད་མཐོང་མཆན་ཕུལ་མེད་པ་རེད།

ཁ་སང་ཟླ་ ༣ ཚེས་ ༡༨ ཉིན་ Reuters  གསར་ཁང་གིས་༸གོང་ས་མཆོག་ལ་༸སྐུའི་ཡང་སྲིད་དང་འབྲེལ་བའི་བཅར་འདྲི་ཞུས་པའི་ཐོག་༸གོང་ས་མཆོག་གིས་མགོན་པོ་༸གང་ཉིད་མཆོག་རྒྱ་གར་དུ་མི་ལོ་དྲུག་ཅུ་ལྷག་གི་རིང་བཞུགས་མྱོང་ཡོད་སྟབས་༸སྐུའི་ཡང་སྲིད་དེ་རྒྱ་གར་རང་དབང་ལུང་པར་འཁྲུངས་སྲིད་སྐོར་བཀའ་ལན་བསྩལ་བ་མ་ཟད། རྒྱ་ནག་གིས་ཡང་སྲིད་ཅིག་འདེམས་སྲིད་པའི་དབང་དུ་བཏང་ཡང་དེ་ལ་མི་མང་ནས་གུས་བརྩི་དང་ཆ་འཇོག་ཞུ་མི་སྲིད་པའི་བཀའ་ལན་མཛད་འདུག༸གོང་ས་མཆོག་གིས་རྒྱ་ནག་གི་ངོས་ནས་༸སྐུའི་ཡང་སྲིད་ཀྱི་གནད་དོན་དེ་དོན་གནད་ཅིག་ཏུ་ངོས་འཛིན་བཞིན་ཡོད་པ་མ་ཟད། དེའི་ཐོག་༸གང་ཉིད་མཆོག་ལས་ལྷག་པའི་སེམས་ཁྲལ་བྱེད་བཞིན་ཡོད་སྐོར་བཀའ་བསྩལ་བ་དང་འབྲེལ། མ་འོངས་པར་༸སྐུའི་ཡང་སྲིད་དེ་རང་དབང་གི་རྒྱལ་ཁབ་ནས་གཅིག་དང་རྒྱ་ནག་སྲིད་གཞུང་གིས་གཅིག་གཏན་འབེབས་བྱུང་བ་ཡིན་ན། མི་མང་གི་ངོས་ནས་རྒྱ་ནག་གིས་བདམས་པའི་ཡང་སྲིད་དེར་གུས་བརྩི་ཞུ་ཐབས་མེད་སྟབས། རྒྱ་ནག་ལ་དཀའ་ངལ་འཕར་མ་ཞིག་ཆགས་ངེས་ཡིན་པར་བཀའ་འགྲེལ་དང་ལྷན་ཞལ་འཛུམ་དང་བཅས་དེ་ལྟ་བུའི་གནས་སྟངས་ཤིག་ཤར་སྲིད་པ་རེད་ཅེས་བཀའ་ལན་བསྩལ་འདུགགཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔ་ཕྱི་ལོ་ ༢༠༡༡ ལོར་ཚོགས་པའི་ཆོས་ཚོགས་ཐེངས་ ༡༡ པའི་ཐོག་མ་འོངས་པར་མགོན་པོ་༸གང་ཉིད་མཆོག་༸རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་ཕེབས་སྐབས་ཆོས་བརྒྱུད་ཁག་གི་བླ་ཆེན་རྣམ་པ་དང༌། བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་༸རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐུགས་ཐག་གཅད་རྒྱུ་ཡིན་པ་དང་། གལ་ཏེ་༸རྒྱལ་དབང་སྐུ་ཕྲེང་རྒྱུན་མཐུད་དགོས་པ་དང༌། སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་གནང་དགོས་པའི་དུས་སྐབས་ཤིག་ཤར་ཚེ་དེའི་གནང་སྒོའི་འགན་ཁུར་གཙོ་བོ་ཏཱ་ལའི་བླ་མ་༸སྐུ་སྒེར་གྱི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང༌། ཁོང་རྣམས་ཀྱིས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ༸རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་ངོས་འཛིན་སྔར་སྲོལ་བཞིན་གནང་དགོས་པ་མ་ཟད། མགོན་པོ་༸གང་ཉིད་མཆོག་གིས་ཀྱང་གནང་ཕྱོགས་དེ་དག་ལ་ལམ་སྟོན་གསལ་བཀོད་ཀྱི་ཕྱག་ཡིག་བསྩལ་རྒྱུ་ཡིན་ཞིང༌། ཚུལ་མཐུན་རྩད་གཅོད་ངོས་འཛིན་བྱུང་བའི་ཡང་སྤྲུལ་ཞིག་ལས་གཞན་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པས་མཚོན་སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༸རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་ཞུ་མི་དགོས་པའི་ལམ་སྟོན་གསལ་པོ་བསྩལ་ཡོད་པ་རེད།ཐེངས་འདིའི་ Reuters  གསར་ཁང་གིས་བཅར་འདྲིའི་སྐབས་སུའང་༸གོང་ས་མཆོག་གིས་ཏཱ་ལའི་བླ་མའི་ཡང་སྲིད་དགོས་མིན་དེ་ནི་འདི་ལོའི་ལོ་མཇུག་ཙམ་ལ་ཆོས་བརྒྱུད་ཁག་གི་བླ་ཆེན་ཚོགས་ཆེན་ཐོག་ནས་ཐུགས་ཐག་གཅད་རྒྱུ་ཡིན་པ་དང་འབྲེལ། བོད་མི་སྤྱི་བོ་གནམ་བསྟན་ཡོངས་ཀྱིས་༸རྒྱལ་དབང་སྐུ་ཕྲེང་མུ་མཐུད་མཇུག་སྐྱོང་དགོས་པ་ཞིག་ལ་དགོངས་ཚེ་༸དཔལ་ལྡན་དགའ་ལྡན་ཕོ་བྲང་གི་ལྟེ་གནས་དེ་ད་དུང་གནས་སྲིད་པ་ཞིག་རེད། དེ་འབྲེལ་༸སྐུའི་ཡང་སྲིད་སྐུ་ཕྲེང་བཅོ་ལྔ་པ་བྱོན་པ་ཡིན་ནའང་ཁོང་ལ་ཆབ་སྲིད་ཀྱི་སྐུ་དབང་གང་ཡང་མེད་པར་བཀའ་བསྩལ་ནན་པོ་ཕེབས་འདུག༸གོང་ས་མཆོག་ལ་བོད་ནང་དུ་ཕེབས་འདོད་ཡོད་དམ་ཞེས་བཀའ་འདྲི་ཞུས་པར་མགོན་པོ་མཆོག་གིས་རྒྱ་ནག་གཞུང་གིས་༸གང་ཉིད་མཆོག་བོད་དུ་ཕྱིར་ཕེབས་སུ་བཅུག་ཚེ་རྒྱ་ནག་གི་གཙུག་ལག་སློབ་ཆེན་ཁག་ཏུ་ཆེད་ཕེབས་ཀྱིས་དཀར་རྩིས་རིག་པ་དང་། ཀླད་རྩ་རིག་པ། དེ་བཞིན་རྡུལ་ཕྲན་གྱི་རྣམ་གཞག་དང་སེམས་ཁམས་རིག་པའི་ཐོག་ལ་བཀའ་སློབ་བསྩལ་འདུན་ཡོད་པར་བཀའ་བསྩལ་ཡོད་པ་དེ་ལྟར་ཡང་། རྒྱ་ནག་དམར་ཤོག་གི་གཞུང་ལ་འགྱུར་བ་ཞིག་མ་ཕྱིན་བར་དུ་མགོན་པོ་༸གང་ཉིད་མཆོག་ཡུལ་དེར་ཕེབས་འདོད་མེད་ཅེས་བཀའ་ལན་མཛད་ཡོད། ༸གོང་ས་མཆོག་གིས་རྩ་བའི་རྒྱ་ནག་ནི་གདོད་མའི་རླབས་ཆེན་གྱི་རྒྱལ་ཁབ་ཅིག་ཡིན་ཀྱང་ཆབ་སྲིད་ཀྱི་ལམ་ལུགས་དེ་དབང་ཆ་གཅིག་སྡུད་ཀྱི་ལམ་ལུགས་འོག་ཡོད་པར་བརྟེན་མི་མང་ལ་རང་དབང་ཅི་མང་མེད་པར་བཀའ་བསྩལ་ནས་མགོན་པོ་༸གང་ཉིད་མཆོག་ད་དུང་རྒྱ་གར་དུ་བཞུགས་འདོད་ཡོད་པ་བཀའ་བསྩལ་བ་ཆབས་ཅིག བོད་མིའི་སྟོབས་ཤུགས་དེ་བདེན་པ་ལ་གཞིིར་བཅོལ་ཡོད་པ་དང་རྒྱ་ནག་གི་སྟོབས་ཤུགས་དེ་གོ་མཚོན་ལ་གཞིར་བཅོལ་བས་གནས་སྐབས་སུ་རྒྱ་ནག་གོ་མཚོན་གྱི་སྟོབས་ཤུགས་དེ་ཐག་ཆོད་པོ་ཡོད་ཀྱང་ཕུགས་རྒྱང་རིང་པོར་དགོངས་ཚེ་བདེན་པ་སྟོབས་ཤུགས་ཆེ་བ་ཡོད་པ་བཀའ་ལན་བསྩལ་འདུག གཞན་ཡང་༸གོང་ས་མཆོག་གིས་གཞུང་འབྲེལ་གྱི་བོད་རྒྱ་འབྲེལ་ལམ་དེ་ཕྱི་ལོ་ ༢༠༡༠ ལོ་ནས་བཟུང་ཆད་ཡོད་པ་དང་། པེ་ཅིང་སྲིད་གཞུང་ནས་རྒས་ཡོལ་དུ་ཕྱིན་པའི་ལས་བྱེད་ཟུར་པ་དང་། རྒྱ་ནག་སྲིད་གཞུང་དང་འབྲེལ་ཡོད་ཀྱི་ཚོང་པ་དེ་འདྲ་དུས་རྒྱུན་ནས་ཁོང་ལ་མཇལ་བཅར་ཞུ་བར་ཡོང་བཞིན་པ་མ་ཟད། ད་ཆ་བོད་ཕྱི་ནང་གཉིས་ཀྱི་འབྲེལ་ལམ་དེ་སྔར་ལས་དམ་ཟབ་ཏུ་འགྲོ་བཞིན་ཡོད་པར་བཀའ་བསྩལ་འདུག Reuters གསར་ཁང་གིས་༸གོང་མཆོག་བོད་མཐོ་སྒང་མཚོ་སྔོན་གྱི་གྲོང་གསེབ་ཅིག་ཏུ་འཁྲུངས་པའི་ལོ་རྒྱུས་ལུང་འདྲེན་གྱིས་ཉེ་སྔོན་གསར་ཁང་གི་ལས་མི་ཞིག་༸གང་ཉིད་མཆོག་འཁྲུངས་ཡུལ་སྟག་འཚེར་དུ་གཟིགས་སྐོར་སོང་ནའང་། རྒྱ་ནག་གི་གོ་མཚོན་ཐོགས་པའི་དམག་མིས་ལམ་ཁ་བཀག་ཡོད་པ་མ་ཟད་ཕྱི་ལོག་གི་མི་སྟག་འཚེར་ནང་གཏོང་གི་མེད་པའི་བཙན་བཀའ་བཏང་བར་བརྟེན་ཡུལ་དངོས་སུ་འགྲོ་ཐབས་མ་བྱུང་བའི་གནས་ཚུལ་གསལ་བཤད་ཞུས་འདུག

སུད་སི་གྲོང་ཁྱེར་ཇི་ནི་ཝ་ནང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ པ་འཚོགས་པའི་ཐོག་རྒྱལ་སྤྱིའི་གཞུང་འབྲེལ་མིན་པའི་ཚོགས་ཁག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་དུས་བཀག་བསྐྱར་ཞིབ་ཀྱི་གྲུབ་དོན་སྙན་ཐོར་འདོད་བློ་མ་ཁེངས་པའི་རྣམ་འགྱུར་ཤུགས་ཆེ་བཏོན་ཡོད་པ་རེད།སུད་སི་གྲོང་ཁྱེར་ཇི་ནི་ཝ་ནང་རྟེན་གཞི་བྱས་པའི་རྒྱལ་ཚོགས་སུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༠ པའི་ཚོགས་འདུའི་ཐོག་རྒྱ་ནག་ནང་གི་འགྲོ་བ་མིའི་ཐོབ་ཐང་གི་དུས་བཀག་བསྐྱར་ཞིབ་ཟིན་པའི་གྲུབ་དོན་སྙན་ཐོར་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་དང་རྒྱལ་ཁབ་ཁག་གི་དགོངས་འཆར་དང་བགྲོ་གླེང་གི་ཚོགས་དུས་སྐབསསུ་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པ་དང། Helsinki Foundation དང་།  Society  for Threaten People སོགས་རྒྱལ་སྤྱིིའི་གཞུང་འབྲེལ་མིན་པའི་ཚོགས་ཁག་གིས་འདོད་བློ་མ་ཁེངས་པའི་རྣམ་འགྱུར་ཆེད་བཏོན་གནང་སོང། སྐབས་དེར་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་པའི་སྐུ་ཚབ་སྐུ་ཞབས་ John Fisher ལགས་ཀྱིས་ད་ལན་རྒྱ་ནག་གཞུང་གིས་དུས་བཀག་བསྐྱར་ཞིབ་ཐོག་ཆ་ཤས་དེ་ཙམ་ལེན་པདང། རྒྱ་ནག་རང་ཉིད་ཀྱི་སྙན་ཐོར་རྒྱལ་ཁབ་གཞན་གྱི་རྒྱབ་སྐྱོར་མུ་མཐུན་ཐོབ་རྒྱུར་འབད་བརྩོན་གང་ཐུབ་བྱས་ཡོད་པར་བསྔགས་བརྗོད་ཡོད་ཅེས་དུས་བཀག་བསྐྱར་ཞིབ་ཀྱི་སྙན་ཐོར་ཟུར་ཟ་གནང་བ་མ་ཟད། དེ་བཞིན་གཞུང་འབྲེལ་མིན་པའི་ཚོགས་པའི་སྐུ་ཚབ་ཁག་གིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཡག་པོ་ཡོད་ལུགས་ཆེ་བསྟོད་ཞུས་ཡོད་པ་ལུང་འདྲེན་དང་འབྲེལ་ཏེ། དོན་དངོས་ཐོག་རྒྱ་ནག་ནང་གཞུང་གི་ལངས་ཕྱོགས་དང་སྲིད་བྱུས་ལ་མོས་མཐུན་མེད་མཁན་ཚོར་དྲག་གནོན་ལག་བསྟར་བྱེད་མུས་ཡིན་སྐོར་གསུངས་སོང་།ཁོང་གིས་རྒྱ་ནག་གཞུང་གིས་ནོར་སྦེལ་ཞི་བདེའི་གཟེངས་རྟགས་བཞེས་མཁན་སྐུ་ཞབས་ལེའུ་ཞའོ་པའོ་ལགས་དང། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེས་མཚོན་པའི་ད་བར་རྒྱ་གཞུང་གི་དྲག་གནོན་འོག་འདས་གྲོངས་ཕྱིན་པ་འགྲོ་བ་མིའི་ཐོབ་ཐང་རྩོད་ལེན་པའི་ཐོག་རྒྱལ་ཚོགས་ལ་བཟང་ཕྱོགས་ཀྱི་ཡ་ལན་གང་ཡང་སྤྲད་མེད་སྐོར་ལུང་འདྲེན་དང་སྦྲགས། སྲིད་འཛིན་ཞི་ཅིན་ཕིང་གིས་འགོ་ཁྲིད་འོག་རྒྱ་ནག་ནང་ཁྲིམས་ཀྱིས་མང་ཚོགས་ལ་སྲུང་སྐྱོབ་དང་ཁེ་ཕན་བསྐྲུན་རྒྱུ་ལས་ལྡོག་ནས་མང་ཚོགས་ཐོག་དྲག་གནོན་དང་དམ་དྲག་བྱེད་བཞིན་ཡོད་པར་སྐྱོན་བརྗོད་ནན་པོ་གནང་ཡོད། རྒྱལ་སྤྱིའི་བོད་དོན་ལས་འགུལ་ཁང་གི་སྐུ་ཞབས་ KaiMuller ལགས་ཀྱིས་རྒྱལ་སྤྱིའི་གཞུང་འབྲེལ་མིན་པའི་ཚོགས་པ་ Helsinki Foundation མཚན་ཐོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་དུས་བཀག་བསྐྱར་ཞིབ་ཀྱི་སྙན་ཐོར་བོད་ནང་གི་བོད་མི་ཚོར་རང་དབང་ཐོག་ནས་ཆ་ཤས་བླང་རྒྱུའི་གོ་སྐབས་ཐོབ་མེད་མ་ཟད། ཁུལ་དེའི་ནང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་བ་དང་མང་ཚོགས་ཚོའི་བསམ་ཚུལ་ཁག་རྒྱ་ནག་གཞུང་གི་སྙན་ཐོའི་ནང་བཅུག་མེད་པར་ཐེར་འདོན་གནང་བ་དང། ལྷག་པར་དུ་རྒྱ་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་རྡོག་རོལ་གཏོང་བཞིན་པའི་གནས་སྟངས་འདིར་རྒྱ་གཞུང་ནས་བཟང་ཕྱོགས་ཀྱི་འགྱུར་བ་གཏང་རྒྱུའི་མདུན་པ་མེད་པར་བློ་འཚབ་ཡོད་ཅེས་སྙན་སེང་ཞུས་པ་དང་ཆབས་ཅིག རྒྱ་གཞུང་གིས་བྱ་སྤྱོད་དེ་བོད་མི་ཙམ་མིན་པར་རྒྱལ་སྤྱིའི་ཁྲིམས་དང་། ལྷག་པར་དུ་རྒྱལ་ཚོགས་ཀྱི་ཁྲིམས་སྒྲིག་གི་རིན་ཐང་མེད་པ་བཟོ་ཡི་ཡོད་ཅེས་ནན་གསུངས་གནང་སོང། རྒྱལ་སྤྱིའི་ཚོགས་སྡེ་ཁག་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཞན་པའི་སྙན་ཐོ་རིམ་པ་ཆེད་བཏོན་གནང་ཡོད་པ་དང། ཕྱི་ལོ་ ༢༠༠༩ ལོ་ནས་ད་བར་བོད་ནང་བོད་མི་ ༡༥༠ ལྷག་གིས་རྒྱ་ནག་གིས་བོད་མི་ཐོག་འཛིན་པའི་སྲིད་བྱུས་ལ་ངོ་རྒོལ་གྱིས་བོད་མིར་ཆོས་དང་རིག་གཞུང་། སྐད་ཡིག་སོགས་ཀྱི་རང་དབང་དགོས་པའི་དགོས་འདུན་བཏོན་ཡོད་ཀྱང། རྒྱ་ནག་གཞུང་གིས་དེ་དག་ངོས་ལེན་བྱ་རྒྱུ་ལས་ལྡོག་ཏེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང། ཐེངས་འདིའི་དུས་བཀག་བསྐྱར་ཞིབ་འགྲོ་ལུགས། དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་རྩ་དོན་བཅས་ལ་ཁ་གཏད་བཅོག་གི་ཡོད་ཅེས་གསུངས་སོང་།ཚོགས་འདུ་འདིའི་ཐོག་སླར་ཡང་རྒྱ་ནག་གཞུང་གིས་རྒྱལ་ཚོགས་ཀྱི་དམིགས་བསལ་རྟོག་ཞིབ་ཚོགས་པ་བོད་ནང་བསྐྱོད་རྒྱུར་འདོད་པ་མེད་པའི་རྣམ་པ་ཆེད་བཏོན་བྱས་ཡོད་སྟབས། རྒྱལ་ཚོགས་ཀྱི་ངོས་ནས་བོད་གཙོས་པའི་རྒྱ་ནག་མངའ་འོག་གི་འགྲོ་བ་མིའི་ཐོབ་ཐང་གནས་སྟངས་ཞན་པའི་ས་ཁུལ་དུ་རྒྱལ་ཚོགས་ཀྱི་རྟོག་ཞིབ་མི་སྣ་ཆེད་སྐྱོད་ཐུབ་རྒྱུར་ཤུགས་གནོན་བརྒྱབ་དགོས་པའི་འབོད་སྐུལ་ཞུས་ཡོད་པ་རེད། ལྷན་ཚོགས་ཐོག་ Society  for Threaten People ཚོགས་པའི་མཚན་ཐོག་ནས་སུད་སི་དོན་ཁང་གི་འབྲེལ་ཡོད་ལས་བྱེད་དཀོན་མཆོག་གཡག་ལྷ་ལགས་ཀྱིས་དེ་སྔོན་རྒྱ་ནག་གི་དུས་བཀག་བསྐྱར་ཞིབ་སྐབས་སུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སྙན་ཐོ་རྒྱལ་ཚོགས་སུ་ཕུལ་བར་ཐོག་མར་ངེས་ལེན་གྱིས་རྒྱལ་ཚོགས་ཀྱི་དྲྭ་ཐོག་ཏུ་བཞག་ཡོད་ཀྱང། ཕྱིས་སུ་བོད་དོན་དང་འབྲེལ་བའི་སྙན་ཐོག་ཕྱིར་ཐེན་གནང་བའི་གནད་དོན་དང་འབྲེལ་རྒྱལ་ཚོགས་སུ་གླེང་སློང་གནང་ནས་རྒྱལ་ཚོགས་ཀྱི་འགྲོ་ལུགས་ནང་འཁོད་པ་བཞིན་མ་འོངས་པར་ཚོགས་སྡེ་ཁག་ནས་རྒྱལ་ཚོགས་སུ་སྙན་ཐོ་དབུལ་རྒྱུ་བརྒྱུད་ལམ་ཁག་ཁ་གསལ་དགོས་སྐོར་གསུངས་ཡོད།

བོད་མི་རྣམས་བཙན་བྱོལ་དུ་འབྱོར་ནས་འདི་ལོ་ལོ་༦༠ འཁོར་གྱི་ཡོད་པའི་དུས་ཚིགས་དང་བསྟུན་དགའ་ལྡན་ཕོ་བྲང་གི་དྲུང་ཆེ་མཆོག་གིས་རྒྱ་ནག་གཞུང་གིས་བསམ་བཞིན་དུ་༸གོང་ས་མཆོག་གིས་རང་བཙན་རྩོད་ཀྱི་ཡོད་པའི་བསྙོན་འཛུགས་བྱེད་བཞིན་ཡོད་པར་སྐྱོན་བརྗོད་གནང་བ་ཙམ་མ་ཟད། གལ་ཏེ་རྒྱ་ནག་གཞུང་གིས་བོད་ནང་བརྟན་བརླིང་དང་། བོད་ཀྱི་གནད་དོན་སེལ་རྒྱུའི་དགོངས་པ་བཞེས་ཀྱིན་ཡོད་ན།   ༸གོང་ས་མཆོག་སྐུ་འཚོ་བཞུགས་སྐབས་གོ་སྐབས་དེ་དམ་འཛིན་བྱེད་དགོས་ཀྱི་ཡོད་པའི་འགྲེལ་བརྗོད་གནང་སོང་། དེའང་འདི་ལོ་ནི་རྒྱ་ནག་དམར་པོའི་གཞུང་གིས་བོད་ལ་དབང་བསྒྱུར་བྱས་པ་དང་སྦྲགས་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ ༦༠ འཁོར་བའི་ལོ་ཚིགས་ཤིག་ཆགས་ཀྱི་ཡོད་ཀྱང། རྒྱ་ནག་གཞུང་དང་ལྷག་པར་བོད་རང་སྐྱོང་ལྗོངས་ས་གནས་གཞུང་ནས་ལོ་ཚིགས་དེ་ནི་རྒྱ་ནག་གིས་བོད་ལ་མང་གཙོའི་བཅོས་བསྒྱུར་བྱས་ནས་ལོ་ ༦༠ འཁོར་བའི་དུས་དྲན་དུ་སྲུང་བརྩི་ཞུས་པ་མ་ཟད། བོད་ལྗོངས་ཉིན་རེའི་གསར་ཤོག་ཐོག་ཟླ་བ་འདིའི་ཚེས་ ༩ ནས་ ༡༤ བར་ལྗོངས་ཡོངས་ཀྱི་མི་རིགས་དང་ལས་རིགས་ཁག་གི་མི་སྣས་ཏཱ་ལའི་སྐུ་ཕྲེང་ ༡༤ པ་ལོག་སྤྱོད་ཀྱི་ངོ་བོར་ངོས་འཛིན་གསལ་པོ་བྱེད་དགོས་པའི་སྐོར་གྱི་དཔྱད་གཏམ་རིམ་པ་ལྔ་ཙམ་བཏོན་གནང་འདུག དཔྱད་གཏམ་དེ་དག་ནང་གཙོ་བོ་༸གོང་ས་མཆོག་ནི་བོད་རང་བཙན་ལྐོག་གཡོ་བཤམ་མཁན་ཁ་བྲལ་རིང་ལུགས་ཀྱི་ཆབ་སྲིད་ཤོག་ཁག་གི་འགོ་གཙོ་དང་། ཀྲུང་གོར་ངོ་རྒོལ་བྱེད་མཁན་གྱི་རྒྱལ་སྤྱིའི་ཕྱོགས་གཏོགས་ཀྱི་ལག་ཆ་འཁྲུལ་མེད། བོད་དུ་སྤྱི་ཚོགས་ཟང་ཟིང་བཟོ་མཁན་སྤྱིའི་འབྱུང་རྩ། བོད་བརྒྱུད་ནང་བསྟན་ཆོས་ལུགས་ཀྱི་རྒྱུན་ལྡན་སྒྲིག་སྲོལ་འཛུགས་རྒྱུར་འགོག་རྐྱེན་བཟོ་མཁན་ཆེ་ཤོས། དེ་བཞིན་ཆོས་ལུགས་ཀྱི་ཕྱི་གོས་གྱོན་པའི་བོད་ཕུང་ཆོས་གནོད་ཀྱི་སྲིད་ཚོང་བ་ཡིན་ཚུལ་བཅས་དོན་ཚན་གཙོ་བོ་ལྔའི་ཐོག་ནས་བསྙོན་འཛུགས་བྱས་པ་མ་ཟད། ༸གོང་ས་མཆོག་གིས་ད་བར་ལོ་ངོ་ ༦༠ ནང་བོད་རང་བཙན་གྱི་ལས་འགུལ་སྤེལ་མཚམས་འཇོག་མྱོང་མེད་པ་དང་། བོད་རང་བཙན་ལ་དམིགས་ནས་བོད་ཆེན་པོ་དང་ཚད་མཐོའི་རང་སྐྱོང་དབུ་མའི་ལམ་སོགས་ཁ་ལ་ཁྱེར་ནས་ཁ་བྲལ་རིང་ལུགས་ཀྱི་རྩ་འཛིན་འདོན་གྱི་ཡོད་ཚུལ་བརྗོད་འདུག འདི་ག་རླུང་འཕྲིན་ཁང་ནས་དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྔ་བ་ཚེ་རྒྱམ་ལགས་སུ་དེའི་སྐོར་བཀའ་འདྲི་ཞུ་སྐབས། ཁོང་གིས་སྤྱིར་དཔྱད་གཏམ་དེ་དག་གི་ནང་དོན་ཡོངས་རྫོགས་བསྐྱར་ཟློས་ཤ་སྟག་ཡིན་པ་དང་། དེའང་བོད་ཀྱི་གསུམ་བཅུའི་དུས་དྲན་དང་ས་བྱི་ལོའི་ཞི་རྒོལ་ཆེན་མོའི་དུས་དྲན་སོགས་ཚོར་རྣོ་བའི་དུས་ཚིགས་ཁག་དང་བསྟུན་བོད་རང་སྐྱོང་ལྗོངས་ཀྱི་མང་ཚོགས་ལ་དམིགས་པ་ཞིག་ཡིན་སྐོར་འགྲེལ་བརྗོད་གནང་བ་དང་འབྲེལ། རྒྱ་གཞུང་གིས་དཔོན་རིགས་ཚོས་བོད་མིར་དྲག་གནོན་བྱས་པ་དེ་ལུགས་མཐུན་ཆགས་པའི་ཆེད་བསམ་བཞིན་དུ་༸གོང་ས་མཆོག་གིས་རང་བཙན་རྩོད་ཀྱི་ཡོད་པའི་བསྙོན་འཛུགས་བྱེད་ཀྱི་ཡོད་པའི་འགྲེལ་བརྗོད་གནང་སོང་། ཁོང་གིས་ད་དུང་སྤྱིར་བཙན་བྱོལ་བོད་མིའི་སྤྱི་ཚོགས་ནང་བོད་རང་བཙན་ལ་རྒྱབ་སྐྱོར་དང་བོད་རང་བཙན་གྱི་ལས་འགུལ་སྤེལ་མཁན་མང་དག་ཅིག་ཡོད་པ་དེ་ནི་མང་གཙོའི་སྤྱི་ཚོགས་ནང་ཡོང་ཆོག་པ་ཞིག་ཡིན་པ་དང་། ༸གོང་ས་མཆོག་ནས་ཀྱང་དེར་དུས་ནམ་ཡང་བཀག་སྡོམ་གནང་གི་མེད་པ་དེ་ལྟར་ཡང་། བོད་རང་བཙན་རྩོད་མཁན་དེ་དག་གི་རྒྱབ་ན་༸གོང་ས་མཆོག་ཡོད་སྐོར་བརྗོད་ན་འགྲིག་གི་མེད་སྐོར་གསུངས་བ་དང་ཆབས་ཅིག གནད་དོན་དེ་ལས་འཕྲོས་ཏེ་ཉེ་ལམ་རྩོམ་པ་པོ་འཇམ་དབྱངས་ནོར་བུ་ལགས་ཀྱིས་བོད་ཀྱི་གསུམ་བཅུའི་དུས་དྲན་སྐབས་གཏམ་བཤད་ཅིག་གནང་བའི་ཐོག་ལ་གསལ་བཤད་གནང་ཡོད་པ་རེད།དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས་ཀྱིས་ད་དུང་རྒྱ་ནག་གིས་བོད་ལ་དབང་བསྒྱུར་བྱས་པ་དང་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་༦༠ འཁོར་བའི་གལ་ཆེའི་དུས་ཚིགས་དང་བསྟུན། རྒྱ་ནག་གཞུང་ནས་༸གོང་ས་མཆོག་གི་ཐུགས་དགོངས་དང་ལྷག་བསམ་ལ་བདག་གཅེས་བྱེད་དགོས་པ་དང་། ༸གོང་ས་མཆོག་ལ་བསྙོན་འཛུགས་སོགས་ཕན་ཚུན་སྐྱོན་བརྗོད་བྱ་རྒྱུ་ཕར་བཞག་སྟེ་མགོན་པོ་གང་ཉིད་སྐུ་འཚོ་བཞུགས་ཡོད་པའི་གོ་སྐབས་དེ་དམ་འཛིན་གནང་དགོས་ཀྱི་ཡོད་པའི་ཞུ་སྐུལ་ནན་པོ་གནང་སོང་།    

ཁ་ཉིན་ཟླ་ ༣ ཚེས་ ༡༣ ཉིན་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཁང་ནས་ལྷན་ཁང་དེའི་སྲིད་དོན་དམ་དྲག་བཀའ་ཆད་ཀྱི་གྲོས་འགོ་ཨང་ ༡༢༦༧ ལག་བསྟར་བརྒྱུད་ Pakistan ནང་ཡོད་པའི་དྲག་སྤྱོད་པ་ Masood Azhar ཞེས་པ་དེ་རྒྱལ་སྤྱིའི་དྲག་སྤྱོད་པ་ཞིག་ཏུ་ངོས་འཛིན་གྱིས་ཉེས་ཆད་ཁག་ཅིག་གཏང་རྒྱུ་བྱས་ཡོད་ཀྱང་། སྐབས་དེར་རྒྱལ་ཚོགས་ཀྱི་བདེ་འཇགས་ལྷན་ཁང་གི་གཏན་འཇགས་ཚོགས་མི་རྒྱལ་ཁབ་རྒྱ་ནག་ནས་གྲོས་གཞི་དེ་ངོས་ལེན་མ་ཞུས་པར་དྲག་སྤྱོད་པ་ Masood Azhar ཞེས་པར་རྒྱབ་སྐོར་བྱས་ཡོད་པ་རེད། རྒྱ་ནག་གི་ Masood Azhar ལ་རྒྱབ་སྐྱོར་བྱེད་དོན་ལས་འཕྲོས་ནས་ཁ་སང་པ་ཀི་སི་ཏན་གྱི་གསར་འགོད་པ་རྒན་གྲས་ Hamid Mir ཡིས་འཕྲུལ་སྒྲ་ཐོག་རྒྱ་ནག་གིས་ Masood Azhar དང་འབྲེལ་བའི་རྒྱལ་ཚོགས་ཀྱི་བདེ་འཇགས་ལྷན་ཁང་གི་གྲོས་གཞི་ལ་ངོ་ལན་ཞུས་མེད་པའི་རྒྱུ་མཚན་གསལ་པོ་རེད། རྒྱ་གར་གྱིས་རྒྱ་ནག་གི་དགྲ་བོ་༸གོང་ས་ཏཱ་ལའི་བླ་མ་མཆོག་ལ་ལོ་ངོ་བཅུ་ཕྲག་མང་པོའི་རིང་ནས་འཚོ་སྣོན་སྦྱོར་བཞིན་པས་རེད་ཅེས་དང་། ༸གོང་ས་མཆོག་དྲག་སྤྱོད་པ་ Masood Azhar དང་མཚུངས་བསྡུར་བྱས་ཡོད། ཁོང་གིས་མཚུངས་བསྡུར་བྱས་པའི་བརྗོད་བྱའི་ཐད་ནས་རྒྱ་གར་གྱི་གནད་ཡོད་མི་སྣ་དང་གསར་འགོད་པ། དེ་བཞིན་མང་ཚོགས་བཅས་ཀྱིས་སེམས་ཚོར་ཆེན་པོས་པ་ཀི་སི་ཏན་གྱི་གསར་འགོད་པ་ Hamid Mir ཡིས་འཛམ་གླིང་ཞི་བདེའི་དེད་དཔོན་ཞིག་འཇིགས་སྐུལ་བ་དང་མཚུངས་བསྡུར་བྱས་པ་དེས་པ་ཀི་སི་ཏན་རྒྱལ་ཁབ་ཀྱི་རང་མདོག་ངོ་མ་དེ་བཏོན་ཡོད་པ་མ་ཟད་གསར་འགོད་པ་ཞིག་ནས་དེ་ལྟར་བྱས་པ་དེ་འུ་ཐུག་ཐབས་ཟད་དང་། གོད་བྲོ་བའི་བྱེད་སྟངས་ཤིག་རེད་ཅེས་སྐྱོན་བརྗོད་དང་ཁ་རྡུང་ནན་པོ་བཏང་འདུག རྒྱ་གར་གྱི་ཆེས་མཐོའི་གཟེངས་རྟགས་ Padma Bhushan བཞེས་མྱོང་མཁན་སྐུ་ཞབས་ David Frawley ལགས་ཀྱིས་རྒྱ་ནག་གིས་ཞི་བདེ་ལ་དགའ་བ་༸གོང་ས་མཆོག་དང་བོད་མིའི་ཐོག་དྲག་གནོན་དང་། དྲག་སྤྱོད་ལ་དགའ་བ་ Masood Azhar ལ་རྒྱབ་སྐྱོར་བྱེད་བཞིན་པ་དེ་ནི་རྒྱ་ནག་གི་བཅོས་མའི་ཐབས་བྱུས་ཤིག་རེད་ཅེས་གསུངས་འདུག དེ་བཞིན་ NDTV གསར་ཁང་གི་གསར་འགོད་པ་རྒན་པ་ Vikram Chandra ལགས་ཀྱིས་རང་ཉིད་ཀྱི་འཕྲུལ་སྒྲ་འམ་ Tweeter ཐོག་ང་ཚོ་རྒྱ་གར་གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱབ་སྐྱོར་ཞུ་བཞིན་པ་དེར་སྤོབས་པ་ཆེན་པོ་ཡོད། པ་ཀི་སི་ཏན་གྱི་འཇིགས་སྐུལ་བ་ Masood Azhar ལ་རྒྱབ་སྐྱོར་བྱེད་བཞིན་དེ་ནི་རྒྱལ་སྤྱིའི་ཐོག་ངོ་ཚ་དགོས་པའི་གནས་གཤིས་ལས་མ་འདས་པ་སོགས་གསུངས་འདུག དེ་རིང་བཞུགས་སྒར་དུ་གཞུང་འབྲེལ་གསར་འགོད་ལྷན་ཚོགས་ཐོག་གསར་འགོད་པ་ཞིག་གིས་གནད་དོན་དེ་དང་འབྲེལ་ བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལ་བཀའ་འདྲི་ཞུས་པར་ཁོང་གིས་པ་ཀི་སི་ཏན་གྱི་གསར་འགོད་པས་མཚུངང་བསྡུར་བྱས་པ་དེ་ནི་དོན་མེད་བྱབ་ཆུང་གི་བྱ་སྤྱོད་ཅིག་རེད་ཅེས་གསུངས་ཡོད།

ཨ་རིའི་ངོས་ནས་བོད་དུ་རང་དབང་ཐོག་འགྲུལ་སྐྱོད་ཆོག་པའི་ཁྲིམས་གཞི་གཏན་འབེབས་གནང་ཡོད་པ་བཞིན་ཡོ་རོབ་སྤྱི་མཐུན་རྒྱལ་ཁབ་ཀྱི་ངོས་ནས་ཀྱང་རང་རྒྱལ་གྱི་རིན་ཐང་སེམས་ལ་བཟུང་བའི་ཐོག་ནས་རྒྱ་ནག་དང་མཉམ་དུ་ཕྱོགས་གཉིས་ཀྱི་འབྲེལ་ལམ་སྙོམས་སྒྲིག་བྱས་ཏེ་རྒྱ་ནག་གི་མི་སེར་རྣམས་ཡོ་རོབ་ནང་རང་དབང་ངང་ཡོང་ཆོག་གི་ཡོད་པ་ལྟར། ཡོ་རོབ་གྱི་མི་སེར་རྣམས་ཀྱང་བོད་རང་དབང་ཐོག་འགྲུལ་སྐྱོད་གནང་ཐུབ་པའི་གནས་བབས་ཤིག་བསྐྲུན་རྒྱུའི་དུས་ལ་བབས་ཡོད་པ་གསུངས་འདུག ཁ་སང་ཡོ་རོབ་ཀྱི་གསར་ལམ་དུ་གནས་ཚུལ་ཐོན་པར་ཡོ་རོབ་སྤྱི་མཐུན་རྒྱལ་ཁབ་ཀྱི་གྲོས་ཚོགས་འཐུས་མི་ཉི་ཤུ་ལྷག་གིས་གྲོས་གཞི་བཏོན་ཏེ་རྒྱ་ནག་གིས་ཡོ་རོབ་ཀྱི་མི་སེར་དང་གསར་འགོད་པ་སོགས་བོད་ནང་འགྲོ་རྒྱུར་བཀག་སྡོམ་བྱེད་བཞིན་པ་མ་ཟད་རྒྱ་ནག་གི་གཞུང་ཞབས་མི་སྣ་ཡོ་རོབ་རྒྱལ་ཁབ་ཁག་ཏུ་ཆེད་གཏོང་གིས་བོད་དོན་དང་འབྲེལ་བའི་གནས་ཚུལ་འདྲ་མིན་ཐོག་རྒྱ་གཞུང་གི་ལངས་ཕྱོགས་དང་འབྲེལ་བའི་འཁྱོག་བརྗོད་དྲིལ་བསྒྲགས་སྤེལ་བཞིན་ཡོད་སྟབས། ལོ་ངོ་དྲུག་ཅུ་ལྷག་གི་བོད་ནང་གི་དཀའ་སྡུག་གི་གནས་སྟངས་དེ་ཡོ་རོབ་ནང་ཤེས་རྟོགས་ཇེ་ཉུང་དུ་འགྲོ་བཞིན་པ་གསལ་འདོན་གནང་ནས་ཡོ་རོབ་སྤྱི་མཐུན་རྒྱལ་ཁབ་ཀྱིས་ཁྲིམས་གཞི་གཏན་འབེབས་ཀྱིས་བོད་རང་དབང་ངང་འགྲུལ་སྐྱོད་ཆོག་པའི་ཐག་གཅོད་གནང་རན་འདུག་ཅེས་གསུངས་ཡོད།གྲོས་ཚོགས་མི་འཐུས་མི་དག་གིས་རྒྱ་ནག་ལ་དོགས་འདྲི་བྱས་ཏེ་རྒྱ་ནག་གིས་ལོ་ངོ་དུ་མའི་རིང་ལ་བོད་དེ་ཁེར་རྐྱང་གིས་བཀག་སྡོམ་བྱས་ཡོད་པ་ནི་དྲི་བ་ཆེན་པོ་ཞིག་ཡིན་པ་དང་། གལ་ཏེ་རྒྱ་ནག་གིས་བོད་དུ་སྦས་གསང་བྱེད་དགོས་པའི་གནས་ཚུལ་གཅིག་ཀྱང་མེད་ཚེ་རྒྱ་ནག་གིས་ཅིའི་ཕྱིར་ཕྱི་རྒྱལ་བ་དག་བོད་ནང་རང་དབང་ཐོག་འགྲུལ་སྐྱོད་གནང་ནས་དངོས་ཡོད་གནས་ཚུལ་ལ་རྒྱུས་ལོན་གནང་རྒྱུར་བཀག་སྡོམ་བྱེད་ཀྱི་ཡོད་དམ་ཞེས་གསལ་འདོན་བྱས་པ་དང་ཆབས་ཅིག བོད་ནང་གི་འགྲོ་བ་མིའི་ཐོབ་ཐང་གནས་སྟངས་དེ་ཛ་དྲག་གི་ངོ་བོར་གནས་ཐོག་བོད་ནང་གི་སྐད་ཡིག་ལས་འགུལ་བ་བཀྲ་ཤིས་དབང་ཕྱུག་ལགས་ཀྱིས་ཕྱི་རྒྱལ་གྱི་གསར་ཁང་ལ་སྐད་ཆ་བཤད་པ་ཙམ་གྱིས་ཁ་བྲལ་བར་སྐུལ་སློང་གི་ཉེས་མིང་འོག་འཛིན་བཟུང་བྱས་ནས་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་ལུང་འདྲེན་གནང་འདུག ཡོ་རོབ་ནང་གནས་བཞུགས་བོད་རིགས་རྣམས་ལོ་ངོ་དུ་མའི་རིང་ལ་རང་ཉིད་ཀྱི་ཕ་མ་དང་ཐམཇལ་འཕྲད་གནང་མེད་ཀྱང་།  ཁོང་ཚོ་ཕྱིར་བོད་ནང་རང་གི་ནང་དུ་ལོག་རྒྱུར་རྒྱ་ནག་ནས་བཀག་སྡོམ་བྱེད་བཞིན་པ་གསལ་འདོན་གྱིས་རྒྱ་རིགས་རྣམས་ཀྱིས་རྒྱ་ནག་ཏུ་རང་དབང་ལ་བརྩི་བཀུར་བྱེད་ཀྱི་མེད་ནའང་། ཡོ་རོབ་རྒྱལ་ཁབ་ནང་རང་དབང་གི་ཐོབ་ཐང་ལོངས་སུ་སྤྱད་ནས་ཁེ་བཟང་སྒྲུབ་བཞིན་པ་ཐེར་འདོན་གནང་སྟེ་རྒྱ་ནག་གིས་བོད་མིར་དྲག་གནོན་དང་ཡོ་རོབ་མི་སེར་རྣམས་ལ་དབྱེ་འབྱེད་བྱེད་བཞིན་པ་ནི་མང་གཙོའི་རྒྱལ་ཁབ་ཁག་གིས་བཟོད་བསྲན་གནང་ཐབས་མེད་ཅེས་ཡོངས་ཁྱབ་གནང་འདུག རྒྱ་ནག་གིས་ཨ་རིའི་གྲོས་ཚོགས་གོང་འོག་གཉིས་ནས་གཏན་འབེབས་གནང་བའི་བོད་དུ་རང་དབང་ཐོག་འགྲོ་སྐྱོད་ཆོག་པའི་ཁྲིམས་གཞིར་ཡོངས་བསྒྲགས་ཀྱིས་སྐྱོན་བརྗོད་བྱས་ཡོད་ཀྱང་ད་ཆ་རྒྱ་ནག་སྲིད་གཞུང་གི་གསར་ཁང་ཞིག་གིས་ཕྱི་རྒྱལ་བ་རྣམས་བོད་ནང་འགྲོ་སྐྱོད་ཆོག་པའི་བརྒྱུད་ལམ་དེ་ཇེ་མགྱོགས་སུ་གཏོང་བཞིན་པར་བརྗོད་ཡོད་པ་ལྟར། ཁྲིམས་གཞི་གཏན་འབེབས་བྱས་པ་དེས་རྒྱ་ནག་ལ་ཤུགས་རྐྱེན་ཆེན་པོ་བསྐྲུན་ཡོད་པ་མངོན་གསལ་གནང་བ་དང་སྦྲགས། ཡོ་རོབ་སྤྱི་མཐུན་རྒྱལ་ཁབ་ཀྱིས་ཀྱང་ཨ་རིའི་ཁྲིམས་གཞི་དེ་ཡོ་རོབ་ནང་ལག་བསྟར་གྱིས་རྒྱ་ནག་དང་ཡོ་རོབ་རྒྱལ་ཁབ་གཉིས་ཀྱི་འབྲེལ་ལམ་ལ་ཕྱོགས་ཡོངས་ནས་སྙོམས་སྒྲིག་གནང་བའི་དུས་ལ་བབས་ཡོད་པར་བརྗོད་འདུག ཡོ་རོབ་སྤྱི་མཐུན་རྒྱལ་ཁབ་ཀྱིས་བོད་དུ་རང་དབང་ཐོག་འགྲོ་སྐྱོད་གནང་རྒྱུ་དེ་དངོས་ཡོད་ཀྱི་གོམ་པ་དང་པོ་ཡིན་པས་མདུན་བསྐྱོད་གནང་དགོས་པ་དང་། གལ་ཏེ་ཡོ་རོབ་ནས་གྲོས་གཞི་དེ་ལག་བསྟར་གནང་མ་ཐུབ་ཚེ་དེ་ནི་བོད་རིགས་མི་མང་གི་བདེན་དོན་ལ་སྲུང་སྐྱོབ་གནང་མ་ཐུབ་པ་ཞིག་ཡིན་པ་མ་ཟད། ཡོ་རོབ་སྤྱི་མཐུན་རྒྱལ་ཁབ་ཀྱི་མང་གཙོའི་ཐོབ་ཐང་དང་རང་དབང་ལའང་དོ་ཕོག་འགྲོ་ངེས་རེད་ཅེས་སྡོམ་ཚིག་བཀོད་འདུག