དེ་རིང་ཕྱི་ལོ་ ༢༠༢༦ ཟླ་ ༩ ཚེས་ ༢༣ རེས་གཟའ་ལྷག་པའི་ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། སྲིད་སྐྱོང་སྤེན་པ་ཚེ་རིང་མཆོག་ནས་ Tibetan National Identity Preservation Week འམ་“བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་”ཞེས་ད་ནས་བཟུང་ལོ་ལྟར་ཕྱི་ཟླ་ ༩ པའི་ཟླ་མཇུག་གི་གཟའ་འཁོར་བཞི་པར་སྲུང་བརྩི་དགོས་པའི་ལས་འགུལ་དེ་ཉིད་དངོས་སུ་དབུ་འབྱེད་དང་འབྲེལ། བོད་མི་ཚང་མས་ལས་འགུལ་འདིར་ཐུགས་སྣང་གནང་བའི་ཐོག་དེའི་རྩ་འཛིན་དང་ལམ་སྟོན་ཡིག་ཆ་ནང་གསལ་གྱི་བྱེད་སྒོ་ཁག་ཁུར་ལེན་གནང་སྐྱོང་ཡོང་བའི་འབོད་སྐུལ་ཞུས་སོང་།
དེ་ཡང་སྲིད་སྐྱོང་སྤེན་པ་ཚེ་རིང་མཆོག་གིས་“བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་”ལས་འགུལ་དང་འབྲེལ་བའི་གསར་འགོད་གསལ་བསྒྲགས་ཁྲོད། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ཐོག ལོ་རེའི་ཕྱི་ཟླ་ ༩ པའི་བདུན་ཕྲག་བཞི་པ་དེ་“བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་”དུ་སྲུང་བརྩི་ཞུ་རྒྱུའི་ཐག་གཅོད་གནང་བ་བཞིན། དེ་རིང་ཕྱི་ལོ་ ༢༠༢༦ ཟླ་ ༩ ཚེས་ ༢༣ རེས་གཟའ་ལྷག་པ་ནས་བཟུང་ལས་འགུལ་དེ་ཉིད་སྤེལ་གཏན་འཁེལ་ཡོད་པ་དང་། ལས་འགུལ་དེའི་དམིགས་ཡུལ་ནི། རྒྱ་དམར་གཞུང་གིས་ཕྱི་ལོ་ ༢༠༢༦ ཟླ་ ༧ ཚེས་ ༡ ནས་ལག་བསྟར་འགོ་འཛུགས་བྱས་ཡོད་པའི་“མི་རིགས་མཐུན་སྒྲིལ་ཡར་ཐོན་སྐུལ་འདེད་ཀྱི་ཁྲིམས་ཡོག་”ཟེར་བ་དེའི་ནང་། ལོ་རེའི་ཕྱི་ཟླ་ ༩ པའི་བདུན་ཕྲག་བཞི་པ་དེ་མི་རིགས་མཐུན་སྒྲིལ་ཡར་ཐོན་དྲིལ་བསྒྲགས་ཀྱི་གཟའ་འཁོར་དུ་བརྩི་སྲུང་གིས། རྒྱལ་ཁབ་ཀྱིས་རྣམ་པ་མང་པོ་བརྒྱུད་དྲིལ་བསྒྲགས་སློབ་གསོའི་ལས་འགུལ་སྤེལ་དགོས་སྐོར་བཀོད་ཡོད་སྟབས། རྒྱ་དམར་གཞུང་གིས་བོད་མི་རིགས་རྩ་མེད་བཟོ་བའི་ཐབས་ལམ་སྣ་ཚོགས་དང་སྲིད་བྱུས་རིམ་པ་ལག་བསྟར་བྱས་དང་བྱེད་བཞིན་པ་སྤྱི་དང་། བྱེ་བྲག་ཏུ་ད་ཆ་མི་རིགས་རྩ་གཏོར་གྱི་སྲིད་བྱུས་ལ་ཁྲིམས་ཀྱི་འབག་གཡོགས་ནས་ལག་བསྟར་བྱེད་ཤུགས་ཆེ་རུ་བཏང་ཡོད་པ་དེ་ཚོར་ཁ་གཏད་དགོང་ལེན་བྱེད་པའི་ཆེད་དུ་ཡིན་པ་གསུངས་སོང་།
མ་ཟད། རྒྱ་དམར་གཞུང་གིས་ཁྲིམས་ཡིག་དེ་ལས་གཞན་ད་དུང་། “རྒྱལ་ཁབ་སྤྱི་སྤྱོད་སྐད་ཡིག་གི་ཁྲིམས་ཡིག་”ཟེར་བ་ཞིག་ལ་ཕྱི་ལོ་ ༢༠༢༥ ཟླ་ ༡༢ ཚེས་ ༢༧ ཉིན་བསྐྱར་བཅོས་བྱས་པ་དེའི་ནང་། སྔོན་འགྲོ་ནས་མཐོ་སློབ་བར་རྒྱ་སྐད་ཐོག་སློབ་འཁྲིད་བྱ་རྒྱུ་དང་། གཞུང་གི་ལས་ཁུངས་དང་མི་མང་འདུ་ས་ཡོངས་སུ་རྒྱ་སྐད་གཅོ་བོར་སྤྱོད་དགོས་པ་མ་ཟད། ལོ་བསྟར་ཆགས་སུ་ཕྱི་ཟླ་ ༩ པའི་བདུན་ཕྲག་གསུམ་པ་དེ་རྒྱལ་ཁབ་སྤྱི་སྤྱོད་སྐད་ཡིག་ཁྱབ་གདལ་དར་སྤེལ་དྲིལ་བསྒྲགས་ཀྱི་གཟའ་འཁོར་དུ་གཏན་འབེབས་བྱས་ཏེ་ལག་ལེན་བསྟར་བཞིན་ཡོད་པར་བརྟེན། ཕྱི་ལོ་ ༢༠༢༧ ཟླ་ ༨ ཚེས་ ༢༡ ཉིན། བཀའ་ཤག་གིས་བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་བརྩི་སྲུང་ཞུ་རྒྱུའི་ཡོངས་ཁྱབ་གསལ་བསྒྲགས་སྤེལ་བའི་ནང་། ཁྲིམས་ཡིག་དེ་རིགས་ལ་ཁ་གཏད་གཅོག་སྟངས་ཀྱི་ཐབས་ཇུས་ཁག་ཅིག་བཏོན་ཟིན་པ་བཞིན། སྐུ་ཚབ་དོན་གཅོད་དང་། ས་གནས་འགོ་འཛིན་སོ་སོའི་འགན་ཁུར་འོག །བོད་མི་སྒེར་དང་། ་ཁྱིམ་ཚང་། སློབ་གྲྭ །ཚོགས་སྐྱིད། ལས་འགུལ་བ། བོད་དོན་རྒྱབ་སྐྱོར་བ་བཅས་ཡོངས་སུ་རྫོགས་པ་གདུང་ཤུགས་གཅིག་བསྒྲིལ་གྱིས། གསལ་བསྒྲགས་ནང་གསལ་གྱི་འགན་ཁུར་བྱེད་སྒོ་རྣམས་འཐུས་གཙང་བསྒྲུབས་ཏེ། གཞིས་ལུས་སྤུན་ཟླ་རྣམས་ལ་བྱ་སྤྱོད་དངོས་ཀྱི་ཐོག་ནས་གདུང་སེམས་མཉམ་བསྐྱེད་བྱེད་ཐུབ་པའི་འབོད་སྐུལ་ཞུ་བཞིན་ཡོད་པ་གསུངས་སོང་།
ལྷག་པར་དུ་བཀའ་ཤག་གི་ངོས་ནས་བོད་ཀྱི་སྐད་ཡིག་གཅེས་སྲུང་གི་རྩ་འཛིན་དང་ལམ་སྟོན་ཡིག་ཆ་ཞིག་གཏན་འབེབས་བྱས་ཡོད་པ་དེ། བརྙན་ཐུང་བརྒྱུད་ནས་ཀྱང་ངོ་སྤྲོད་བྱས་ཡོད་སྟབས། ཚང་མས་ཐུགས་སྣང་གནང་བའི་ཐོག་ཡིག་ཆ་ནང་གསལ་གྱི་བྱེད་སྒོ་ཁག་ཁུར་ལེན་གནང་སྐྱོང་ཡོང་བའི་འབོད་སྐུལ་དང་། རང་རིགས་གཞོན་སྐྱེས་ཚོའི་ངོས་ནས་ཀྱང་བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་ལས་འགུལ་དེ་བདུན་ཕྲག་གཅིག་ལ་ཉམས་ལེན་བྱས་ནས་མ་བཞག་པར། རང་ཉིད་གཞིས་ལུས་སྤུན་ཟླ་ས་ཡ་བདུན་ལྷག་གི་མགྲིན་ཚབ་པ་ཡིན་པའི་འགན་ཁུར་མ་བརྗེད་པའི་ཐོག །བོད་དོན་བདེན་པའི་འཐབ་རྩོད་ལ་ནུས་པ་མཉམ་སྤུངས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐིགས་རེ་བཞིན། འཇིག་རྟེན་ཡོངས་ཀྱིས་དོན་ཆེན་ཁུར་དུ་འཁྱེར་ཐུབ་མཁན་གྱི་བོད་མི་ཞིག་ཆགས་རྒྱུའི་སྙིང་སྟོབས་སྐྱེད་དགོས་པའི་འབོད་སྐུལ་ཞུས་སོང་།
འདི་ག་རླུང་འཕྲིན་ཁང་གིས་དེ་རིང་བཀའ་ཤག་གི་ངོས་ནས་བོད་ཀྱི་སྐད་ཡིག་གཅེས་སྲུང་གི་རྩ་འཛིན་དང་ལམ་སྟོན་ཡིག་ཆ་ཞིག་གཏན་འབེབས་བྱས་ཡོད་པ་དེའི་སྐོར་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་སུ་བཅར་འདྲི་ཞུ་སྐབས་ཁོང་གིས། དེ་རིང་བོད་མིའི་སྒྲིག་འཛུགས་ཀྱིས་“བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་”ཞེས་པའི་ལས་འགུལ་དབུ་འཛུགས་དང་འབྲེལ། བོད་མི་ཁྱིམ་ཚང་དང་སློབ་གྲྭ །སྤྱི་ཚོགས་དང་བོད་མིའི་སྒྲིག་འཛུགས་བཅས་ཚང་མས་ལག་བསྟར་དགོས་པའི་དོན་ཚན་དྲུག་ཅན་གྱི་སྔོན་གླེང་ལྡན་པའི་བོད་ཀྱི་སྐད་ཡིག་གཅེས་སྲུང་གི་རྩ་འཛིན་དང་ལམ་སྟོན་ཡིག་ཆ་ཞིག་འདོན་སྤེལ་གནང་ཡོད་པ་དེའི་ནང་གཙོ་བོ། བོད་ཀྱི་སྐད་ཡིག་སློབ་གཉེར་དང་བཀོལ་སྤྱོད་ཀྱི་འགན་ཁུར་ཇི་ལྟར་བཞེས་དགོས་པའི་སྐོར་དང་། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་མུ་མཐུད་ལག་བསྟར་རྒྱུན་འཁྱོངས་བྱ་རྒྱུ་བཅས། བོད་མི་སྒེར་དང་། ཚོགས་སྐྱིད། སྒྲིག་འཛུགས་བཅས་ཡོངས་ནས་བོད་ཀྱི་སྐད་ཡིག་གི་རིན་ཐང་ལ་ངོས་འཛིན་ཐུབ་པའི་ཐོག་ནས་གཅེས་འཛིན་གྱི་འགན་ཁུར་གནང་བའི་ཐོག་རྒྱལ་སྤྱིའི་རྣ་ལམ་དུ་བོད་མིའི་བདེན་པའི་སྐད་སྒྲ་ཐོས་ཐུབ་པ་བྱེད་གལ་སྐོར་གསལ་ཡོད་པ་གསུངས་སོང་།
