བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབྱིན་ཡུལ་གཞུང་ནས་རྒྱ་ནག་དང་ལྷན་བཀའ་བསྡུར་གནང་སྐབས་བོད་ཀྱི་གནད་དོན་དེ་མ་བརྗེད་པ་གནང་རོགས་ཞེས་གསུངས་འདུག
དེ་ཡང་སྲིད་སྐྱོང་བློ་བཟང་སེང་གེ་མཆོག་ཟླ་བ་སྔོན་མའི་ཚེས་ ༣༠ ནས་དབུ་འཛུགས་ཀྱིས་དབྱིན་ཡུལ་ནང་གཞུང་འབྲེལ་འཚམས་གཟིགས་གནང་དོན་ལྟར། ཁ་སང་སྲིད་སྐྱོང་མཆོག་ནས་ཡུལ་དེའི་ The Guardian གསར་ཤོག་ཐོག་དམིགས་བསལ་དཔྱད་རྩོམ་ཞིག་འདོན་སྤེལ་གནང་འདུག དེའི་ནང་དབྱིན་ཡུལ་རྒྱལ་ཁབ་དེ་ཡོ་རོབ་མཐུན་ཚོགས་ནས་ཕྱིར་འཐེན་གནང་རྗེས། དབྱིན་ཡུལ་གཞུང་གི་ངོས་ནས་རྒྱ་ནག་དང་དབྱིན་ཡུལ་དབར་གྱི་འབྲེལ་ལམ་ལ་བསྐྱར་ཞིབ་བྱ་རྒྱུའི་དུས་ལ་བབ་ཡོད་པ་དང་། དབྱིན་ཡུལ་གཞུང་ནས་འབྲེལ་ལམ་དེའི་ཁྲོད་ཕྱོགས་གཉིས་ཀྱི་ཚོང་འབྲེལ་དང་ཕྱི་འབྲེལ་གྱི་ཁེ་ཕན་སྲུང་སྐྱོབ་དང་དུས་མཉམ་བློ་མཐུན་གྱི་རྒྱལ་ཁབ་གཞན་དང་མཉམ་འབྲེལ་ཐོག་རྒྱ་རིགས་དང་བོད་རིགས་ཀྱི་ཐོབ་ཐང་ལ་བརྩི་བཀུར་གྱིས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལངས་ཕྱོགས་བརྟན་པོ་འཛིན་དགོས་པ་གསུངས་པ་དང་འབྲེལ་དབྱིན་ཡུལ་གཞུང་གིས་དུས་ནམ་ཞིག་རྒྱ་གཞུང་དང་ལྷན་དུ་བཀའ་བསྡུར་གནང་ཚེ་བོད་ཀྱི་གནད་དོན་དེ་མ་བརྗེད་པ་གནང་རོགས་ཞེས་གསུངས་འདུག
ལྷག་པར་དུ་སྲིད་སྐྱོང་མཆོག་གིས་དབྱིན་ཡུལ་ནི་མང་གཙོའི་ལམ་ལུགས་འཛིན་པའི་རྒྱལ་ཁབ་སྔ་ཤོས་ཀྱི་གྲས་ཤིག་ཡིན་པ་དང་སྔར་བོད་ས་རྒྱ་ལག་ཏུ་མ་ཤོར་གོང་སྟེ་ཕྱི་ལོ་ ༡༩༠༤ ནས་ ༡༩༤༧ བར་བོད་ནང་དབྱིན་ཇིའི་སྐུ་ཚབ་དོན་གཅོད་ཆེད་བཙུགས་གནང་པར་བརྟེན་འབྲེལ་ཡོད་ཞིག་ཀྱང་ཆགས་ཡོད་པ་མ་ཟད། དབྱིན་གཞུང་ནས་བོད་དེ་རང་བཙན་གཙང་མའི་རྒྱལ་ཁབ་གཅིག་ལ་ངོས་འཛིན་གནང་སྟེ་ལོ་ངོ་བརྒྱ་ཕྲག་གཅིག་ལྷག་ཕྱིན་ཡོད་པ་རེད། འོན་ཀྱང་ཕྱི་ལོ་ ༢༠༠༨ ལོར་སྲིད་བློན་མཆོག་གིས་བཞེངས་ཕྱོགས་དེར་འགྱུར་བ་བཏང་ནས་བོད་དེ་རྒྱ་ནག་གི་ཆ་ཤས་ཞིག་ཡིན་པར་ངོས་འཛིན་གནང་འགོ་བཙུགས་པ་དང་དབྱིན་ཡུལ་གཞུང་གིས་དུས་ནས་དུས་སུ་རྒྱ་ནག་དང་བསྟུན་མཁས་ཁོ་ནའི་སྲིད་བྱུས་ཤིག་འཛིན་དགོས་པ་ཆགས་ཡོད་སྐོར་གསུངས་པ་དང་ཆབས་ཅིག དབྱིན་ཡུལ་ཐོག་འཛིན་པའི་སྲིད་བྱུས་དེའི་སྤྱོད་ཚིག་གི་ཆ་ནས་འགྱུར་བ་ཕྱིན་ཡོད་ཀྱང་། དབྱིན་ཡུལ་དང་བོད་དབར་ལོ་རྒྱུས་དང་རིག་གཞུང་གི་འབྲེལ་བ་དེ་དག་དོར་ཐབས་མེད་པའི་འབྲེལ་བ་ཞིག་རེད་ཅེས་ནན་བརྗོད་གནང་འདུག
དེ་བཞིན་སྲིད་སྐྱོང་བློ་བཟང་སེང་གེ་མཆོག་གིས་དབྱིན་གཞུང་གི་སྣེ་ཁྲིད་པ་ཚོས་རང་ཉིད་དང་བློ་མཐུན་པའི་རྒྱལ་ཁབ་གཞན་གྱི་གཞུང་འཛིན་རྣམ་པའི་དབར་ནུས་པ་མཉམ་སྤུངས་ཀྱིས་རྒྱ་གཞུང་ལ་ཁ་གཏན་བཅོག་དགོས་པ་རེད་ཅེས་གསུངས་འདུག ད་དུང་སྲིད་སྐྱོང་མཆོག་གིས་གསུངས་པར་གནད་དོན་དེ་ནི་ད་ལྟའི་དུས་སྐབས་འདིར་ཆེས་ཛ་དྲག་གི་གནས་སྟངས་ཤིག་ཡིན་པར་ངོས་བཞེས་གནང་དགོད་གལ་ཡིན་པ་དང་། ཁྱད་པར་དུ་རྒྱ་གཞུང་ལ་བོད་མིའི་སྐུ་ཚབ་དང་ལྷན་དུ་འབྲེལ་མོལ་བསྐྱར་གསོ་གནང་སྟེ་བོད་ཀྱི་གནད་དོན་སེལ་རྒྱུར་འབད་བརྩོན་དགོས་ཀྱི་རེད་ཅེས་འབོད་སྐུལ་ཞུས་འདུག
སྲིད་སྐྱོང་མཆོག་གིས་བོད་ནང་གི་ཛ་དྲག་གནས་སྟངས་སྐོར་དང་འབྲེལ་རྒྱ་གཞུང་གིས་བོད་ནང་དམག་མི་ཕོན་ཆེ་འགྲེམས་འཇོག་དང་གསང་བའི་ལྟ་སྲུང་། རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་འདྲ་མིན་སྤེལ་བའི་སྲིད་བྱུས་བརྒྱུད་མང་ཚོགས་ཐོག་སྟངས་འཛིན་ཤུགས་ཆེ་བྱེད་མུས་ཡིན་པ་མངོན་གསལ་གནང་པ་དང་སྦྲགས། བོད་དེ་ཨེ་ཤེ་ཡའི་ཆུ་རྒྱུན་ཡོངས་རྫོགས་ཀྱི་སྲོག་རྩ་དང་གོ་ལའི་གནམ་གཤིས་འགྱུར་ལྡོག་གི་ས་འགུལ་ལྟེ་གནས་ཤིག་ཡིན་སྟབས། མཐོ་སྒང་བོད་ཀྱི་ཁོར་ཡུག་སྲུང་སྐྱོབ་བྱ་རྒྱུ་ཐོག་དོན་དམ་གྱི་འགན་ཁུར་བཞེས་དགོས་པར་འབོད་སྐུལ་ཞུས་པ་མ་ཟད། ད་ཆ་རྒྱ་གཞུང་གིས་བོད་མིའི་ཆོས་དད་རང་དབང་ལ་བརྩི་མེད་རྡོག་རོལ་གཏོང་བཞིན་རྒྱལ་སྤྱིའི་ནང་ཆེས་སྙན་གྲགས་ཆེ་བའི་བོད་བརྒྱུད་ནང་བསྟན་སློབ་གཉེར་ཁང་གཙོ་གྲས་གསེར་རྟ་རྫོང་བླ་རུང་ལྔ་རིག་ནང་བསྟན་སློབ་གླིང་གཏོར་བཤིག་གི་ལས་གཞི་རྒྱ་ཆེ་སྤེལ་མུས་ཡིན་པ་མངོན་བཏོན་གནང་འདུག
