Diwali འམ་རྒྱ་གར་གྱི་མཆོད་མེའི་ཕྲེང་བ་འབུལ་བའི་ཧིན་དྷུའི་ཆོས་ཕྱོགས་ཀྱི་དུས་ཆེན་སླེབས་ལ་ཉེ་མཚམས་འདིར། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དེ་རིང་བོད་མི་ཡོངས་ཀྱི་ཚབ་ཞུས་ནས་རྒྱ་གར་དམངས་ཚོགས་ཀུན་ལ་ Diwali དགའ་སྟོན་ཉིན་མོར་བཀྲ་ཤིས་པའི་འཚམས་འ
དྲི་གནང་པ་དང་། རྒྱ་གར་རྒྱལ་ཁབ་ཆེན་པོ་དེ་བཞིན་ནུས་སྟོབས་འཕེལ་ཞིང་། བརྟན་ལྷིང་བདེ་སྐྱིད་དང་ལྡན་པ་ཞིག་ཡོང་བའི་རེ་སྨོན་ཞུ་རྒྱུ་ཡིན་པ་གསུངས་གནང་སོང་།
འདི་ལོའི་ Diwali དུས་ཆེན་དེ་ནི་ཟླ་བ་འདིའི་ཕྱི་ཚེས་༣༠འི་ཉིན་འཁྱེལ་ཡོད་པ་ལྟར། ད་ཆ་རྒྱ་གར་བ་མང་ཆེ་བས་ཕྱི་ནང་གད་ཕྱིས་བྱེད་དེ་ཁྲོམ་ནས་མངར་ཟས་སོགས་ཉོ་ཆ་སྣ་ཚོགས་རྒྱག་བཞིན་པའི་དུས་སྐབས་ཡིན་པ་རེད། དུས་ཆེན་དངོས་གཞི་ཉིན་མོར་དད་ལྡན་པ་ཚོས་གོན་ཆས་སོགས་ལེགས་པར་སྤྲད་ནས་ལྷ་ཁང་དང་མཆོད་ཁང་། དེ་བཞིན་ཚོང་ཁང་སོགས་སུ་མཆོད་མེའི་ཕྲེང་བ་སྐར་ཚོགས་ས་ལ་རྒྱན་པ་ལྟར་དུས་ཚིགས་བརྩི་སྲུང་ཞུ་གནང་ཡོད་པ་རེད།
རྩ་བའི་ Diwali འམ་མཆོད་མེའི་ཕྲེང་བ་འབུལ་བའི་ཆོས་ཕྱོགས་ཀྱི་དུས་ཆེན་དེ་ནི་གཙོ་བོ་རྒྱ་གར་གྱི་ Ramayan གཏམ་རྒྱུད་ལས་སྐྱེས་བུ་དམ་པ་ Ram ལོ་ ༡༤རིང་ནགས་ཚལ་དུ་བཞུགས་གྲུབ་རྗེས་ Ayodhya ཕོ་བྲང་དུ་ཚུར་ཕེབས་སྐབས་འབངས་མང་ཚོགས་ནས་ Ram ལ་ཕེབས་བསུ་ཞུ་བའི་དགའ་སྟོན་ཉིན་མོ་ཞིག་ཏུ་ངོས་འཛིན་གནང་གི་ཡོད་པ་དང་། ཉིན་དེར་རྒྱ་གར་བ་མང་ཆེ་བས་ཚོང་ལོ་གསར་པ་འགོ་འཛུགས་དང་འབྲེལ། Lakshmi འམ་ལྷ་མོ་དཔལ་མོར་གསོལ་འདེབས་སྨོན་ལམ་དང་མཆོད་པ་ཕུལ་ཏེ་དུས་ཆེན་སྲུང་བརྩི་ཞུས་ཀྱི་ཡོད་པ་རེད་འདུག
