༸གོང་ས་མཆོག་ལ་བོད་མིས་ཡིད་ཆེས་སྲ་བརྟན་ཡོད་པར་རྒྱ་གཞུང་གིས་དཔུང་སྟོབས་སྤྱད་པའམ། དངུལ་སྤྲད་དེ་འགྱུར་བ་རྩ་བ་ནས་གཏོང་ཐབས་མེད།

  དེ་རིང་ཕྱི་ཟླ་ ༡༢ ཕྱི་ཚེས་ ༡༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ྋགོང་ས་ྋསྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་པར་གྲགས་པའི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ཧྲིལ་པོ་ ༢༦ འཁོར་བའི་གཞུང་འབྲེལ་མཛད་སྒོ་འཚོགས་ཡོད་པ་དང། མཛད་སྒོའི་ཐོག་སྐུ་མགྲོན་གཙོ་བོ་མངའ་སྡེའི་བློན་ཆེན་ཟུར་པ་དང་ད་ལྟའི་གྲོས་ཚོགས་འཐུས་མི་ལྕམ་སྐུ་ Sarveen Chaudhary མཆོག བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་རྣམ་གཉིས་དབུས། གཞུང་གི་མཛད་གཙོ་རྣམ་པ་དང། ཕྱི་ནང་གི་གནད་ཡོད་སྐུ་མགྲོན་ཁག་ཅིག  དེ་བཞིན་མང་ཚོགས་བཅས་ལྷན་འཛོམས་ཐོག་སྲུང་བརྩི་ཞུས་གནང་ཡོད་པ་རེད། འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ནས་མཛད་སྒོའི་དེའི་ཐོག་ནས་༸གོང་ས་མཆོག་ལ་གུས་ཕྱག་སྔོན་དུ་བཏང་སྟེ། མགོན་པོ་༸གང་ཉིད་མཆོག་གིས་བོད་ཀྱི་བདེན་མཐའ་གསལ་ཐབས་སུ་འཚེ་མེད་ཞི་བའི་ཐབས་ལམ་ཁོ་ནར་བརྟེན་པ་དང། འཛམ་གླིང་ཆོས་ལུགས་མཐུན་སྒྲིལ་དང་ཡ་རབས་བཟང་སྤྱོད། རང་བྱུང་ཁོར་ཡུག་སྲུང་སྐྱོབ་སོགས་ལ་སྨན་པའི་མཛད་བཟང་བསྐྱངས་པར་༡༩༨༩ལོར་འཛམ་གླིང་ནང་སྙན་གྲགས་ཆེ་བ་འི་ནོ་སྦེལ་ཞི་བདེའི་གཟེངས་འབུལ་བཞེས་མཛད་པ་དེ་ལ་བརྟེན་ནས་གཟེངས་ཀྱི་རིན་ཐང་དང་ཆེ་མཐོང་སྔར་ལྷག་གོང་མཐོར་སོང་ཡོད་པ་ཆེ་བསྟོད་དང་། ཁྱད་པར་དུ་༸གང་ཉིད་མཆོག་གིས་ཞི་བདེ་དང་བཟོད་བསྲན། དེ་བཞིན་བྱམས་སྙིང་རྗེའི་ལམ་སྟོན་བཀའ་སློབ་སོགས་ཀྱི་མཛད་འཕྲིན་ལ་རང་ཅག་གངས་ཅན་པ་རྣམས་དགའ་སྤེབས་བྱ་འོས་པ་ཞིག་ཡིན་པའི་༸རྒྱལ་བའི་བཀྲིན་རྗེས་དྲན་ཞུས་གནང་ཡོད། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཉེ་ཆར་བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཁྲན་ཆུང་གོའུ་ཡིས་བོད་རིགས་ལས་བྱེད་པ་ལྐོག་ཏུ་ཆོས་དད་བྱེད་མཁན་དང་”ཏཱ་ལའི་རུ་ཚོགས་”ཀྱི་རྗེས་འཇུག་པ་ངོ་རྟགས་བཟུང་སྟེ་ཚབས་ཆེའི་ཉེས་པ་གཏོང་དགོས་བཤད་ཡོད། ཡང་རྒྱ་ནག་གཞུང་འཛིན་མི་སྣ་ཀྲུའུ་ཝེ་ཆུན་གྱིས་ྋགོང་ས་ྋསྐྱབས་མགོན་ཆེན་པོ་མཆོག་གི་ཡང་སྲིད་སྐོར་ཐག་གཅོད་བྱེད་དབང་རྒྱ་ནག་གཞུང་ལ་ཡོད་ཚུལ་ཧམ་བཤད་བྱས་ཀྱང།  ཆོས་དང་སྐྱེ་བ་སྔ་ཕྱི་ཁས་མི་ལེན་མཁན་ཞིག་གིས་ཧམ་བཤད་བྱས་པར་རྒྱལ་སྤྱིའི་བློ་ལྡན་སུས་ཀྱང་ཆ་འཇོག་མི་གནང་པ་མ་ཟད།  ྋགོང་ས་མཆོག་གི་༸སྐུའི་ཡང་སྲིད་ཐད་ྋགོང་ས་མཆོག་༸གང་ཉིད་ལས་གཞན་སུ་ལའང་ཐག་གཅོད་བྱེད་རྒྱུའི་འགན་དབང་མེད་པ་དང།  ལྷག་དོན་ྋགོང་ས་མཆོག་ལ་བོད་མིས་ཡིད་ཆེས་སྲ་བརྟན་ཡོད་པ་དེར་རྒྱ་གཞུང་གིས་དཔུང་སྟོབས་དང་དངུལ་སོགས་ཀྱིས་འགྱུར་བཅོས་གང་ཡང་གཏོང་ཐབས་མེད་པ་རེད་ཅེས་གསུངས་ཡོད་པ་རེད།  ཁོང་གིང་ད་དུང།...