གཉན་རིམས།

བོད་མིའི་སྒྲིག་འཛུགས་ཀྱི་ COVID19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༣ པའི་ཐོག་སྔོན་ཁབ་གཉིས་ཀ་བཞེས་ཟིན་ཀྱང་ལྷོད་ཡེངས་མེད་པར་སྔོན་འགོག་གི་གནང་སྒོ་ཁག་མུ་མཐུད་གནང་དགོས་པའི་གཞེན་སྐུལ་གནང་སོང་།དེ་རིང་གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་ཀྱིས་ཐུགས་སྣང་ལམ་སྟོན་དང་འབྲེལ་ཏེ་འདས་པའི་དུས་ཡུན་ནས་ཏོག་དབྱིབས་གཉན་རིམས་ཁྱབ་གདལ་ཕྱིན་པའི་རྐྱེན་གྱིས་རང་རེའི་མང་ཚོགས་ཀྱི་འགྲོ་འདུག་སྤྱོད་གསུམ་ལ་ངལ་བ་ཆེས་ཆེར་འཕྲད་ཡོད་པ་དང་ལྷག་དོན་ཉེ་ལམ་རྒྱ་གར་དང་བལ་ཡུལ་གཉིས་ཀྱི་ནང་ནད་རླབས་གཉིས་པའི་རྗེས་སུ་གནས་སྟངས་ཅུང་ཇེ་བཟང་དུ་ཕྱིན་པའི་ཚོར་སྣང་དང་ཉམས་མྱོང་ཞིག་བྱུང་ཡོད་ཀྱང་། འདས་པའི་བདུན་ཕྲག་གཅིག་གཉིས་ཀྱི་ནང་བོད་མིའི་གནས་ཡུལ་ས་གནས་ཁག་ཅིག་ཏུ་ཏོག་དབྱིབས་གཉན་རིམས་ཕོག་མཁན་གྱི་གྲངས་འབོར་ཇེ་མང་དུ་འགྲོ་བཞིན་འདུག་སྟབས། བོད་མི་ཚོས་སོ་སོའི་འཕྲོད་བསྟེན་དང་ནང་མི། དེ་བཞིན་བོད་མི་རིགས་ལ་དགོངས་པ་བཞེས་ཏེ་ནད་ཡམས་ལ་སྣང་མེད་དུ་མ་གཏང་བ་དང་། ང་ཚོས་གཉན་རིམས་ཁྱབ་གདལ་བྱུང་བ་ནས་བཟུང་ད་བར་མཉམ་རུབ་ཐོག་ནས་གདོང་ལེན་གནང་བ་ལྟར་མུ་མཐུད་དེ་ལྟར་གནང་རོགས་ཞེས་གཞེན་སྐུལ་གནང་ཡོད།སྔོན་ཁབ་དང་འབྲེལ་དྲུང་འཕར་བྱམས་པ་ཕུན་ཚོགས་ལགས་ཀྱིས་ད་ལྟ་ས་གནས་ཁག་ལ་སྔོན་ཁབ་ཀྱི་ལས་གཞི་འགྲོ་བཞིན་ཡོད་པས་སྔོན་ཁབ་གཉིས་པ་བཞེས་མེད་པ་ཚོས་ངེས་པར་དུ་བཞེས་རྒྱུ་དང་ལྷག་དོན་སྔོན་ཁབ་གཉིས་ཀ་བཞེས་ཟིན་ཀྱང་ཁག་ཅིག་ལ་ནད་གཞི་ལྕི་མོ་ཕོག་པའི་གནས་སྟངས་ཡང་ཡོང་གི་ཡོད་སྟབས། སྔོན་ཁབ་གཉིས་ཀ་བཞེས་ཟིན་ཀྱང་ལྷོད་ཡེངས་མེད་པར་སྔོན་འགོག་གི་གནང་སྒོ་ཁག་མུ་མཐུད་གནང་དགོས་པའི་གཞེན་སྐུལ་གནང་ཡོད། བོད་མིའི་འདུས་སྡོད་ཁག་ཏུ་ཏོག་དབྱིབས་གཉན་རིམས་ཀྱི་གནས་སྟངས་དང་འབྲེལ་ནས་གཟའ་འཁོར་འདིའི་ནང་བོད་མི་ ༥༥ ལ་ཏོག་དབྱིབས་ནད་དུག་ཕོག་པ་དང་དེ་དག་གི་ཁོངས་སུ་དགུང་ལོ་བགྲེས་ཤོས་དགུང་ལོ་ ༩༣ དང་ལོ་ན་ཆུང་ཤོས་ལོ་ ༧ ཅན་གྱི་ཕྲུ་གུ་ཆགས་ཀྱི་ཡོད་པ་མ་ཟད་བདུན་ཕྲག་འདིའི་ནང་བོད་མི་གཉིས་འདས་གྲོངས་སུ་གྱུར་འདུག ད་བར་རྒྱ་གར་དང་བལ་ཡུལ་གཉིས་སུ་ཏོག་དབྱིབས་སྔོན་ཁབ་གྱི་ལས་དོན་དང་འབྲེལ་ཏེ་རྒྱ་གར་ནང་དུ་བཙན་བྱོལ་བོད་མིའི་མི་འབོར་ལ་གཞིགས་ཏེ་དགུང་ལོ་ ༡༨ ཡན་གྱི་བོད་རིགས་བརྒྱ་ཆ་ ༩༡།༣༣ ལ་སྔོན་ཁབ་བརྒྱབས་ཟིན་པ་དང་བལ་ཡུལ་ནང་བོད་རིགས་བརྒྱ་ཆ་ ༤༥།༣༨ ལ་སྔོན་ཁབ་བརྒྱབ་པ་ཡོད་པ་རེད།སྨན་པ་ཚེ་རིང་མཚམས་གཅོད་ལགས་ཀྱིས་སྤྱིར་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ནང་གསལ་ལྟར་ན་རྒྱལ་ཁབ་སུ་རུང་ཞིག་གི་ནང་དུ་ཏོག་དབྱིབས་གཉན་རིམས་ཕོག་པའི་བརྒྱ་ཆ་...

གཟའ་འཁོར་འདིའི་ནང་བཙན་བྱོལ་བོད་མིའི་འདུས་སྡོད་ས་ཁུལ་ཁག་ཏུ་ཏོག་དབྱིབས་ནད་གཞི་ཕོག་མཁན་ཇེ་མང་དུ་འགྲོ་བཞིན་པ་དང་དེའི་ཁོངས་ད་ལྟའི་ཆར་སྦེལ་ཀོབ་བོད་མིའི་གཞིས་ཆགས་ནང་ནད་གཞི་ཕོག་མཁན་གྲངས་འབོར་མང་ཤོས་དེ་ཆགས་ཀྱི་འདུགཁ་སང་བོད་མིའི་སྒྲིག་འཛུགས་ཀྱི་ཏོག་དབྱིབས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༡ སྤེལ་བའི་ཐོག་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་ལོ་གཅིག་དང་ཕྱེད་ཀ་ལྷག་ཙམ་གྱི་རིང་འཛམ་གླིང་ཁྱོན་ལ་གཉན་རིམས་ཁྱབ་གདལ་ཤུགས་ཆེར་ཕྱིན་པར་བརྟེན་ཨ་རི་དེ་གཉན་རིམས་ཕོག་མཁན་གྱི་གྲངས་འབོར་མཐོ་ཤོས་དང་པོ་དང་རྒྱ་གར་དེ་བཞིན་གཉན་རིམས་ཕོག་མཁན་གྱི་གྲངས་འབོར་མཐོ་ཤོས་གཉིས་པ་ཆགས་ཡོད་པ་མ་ཟད། ད་ཆ་རྒྱ་གར་ནང་ཉིན་གཅིག་ནང་ལ་ནད་གཞི་གསར་པ་འགོས་པ་མི་གྲངས་སྟོང་ཕྲག་ ༣༠ ནས་ ༤༠ ཡས་མས་ཆགས་ཡོད་པ་དང་དེའི་ནང་ནས་རྒྱ་གར་ལྷོ་ཕྱོགས་མངའ་སྡེ་ Kerala དང་ Maharashtra དེ་བཞིན་ཉེ་ཆར་ཧི་མཱ་ཅལ་གཙོས་བྱང་ཤར་མངའ་སྡེ་ཁག་ཅིག་ནང་གཉན་རིམས་ ༡༩ ཡི་གཉན་སྲིན་གྱི་ངོ་བོ་འགྱུར་ལྡོག་འགྲོ་བ་ Delta  Variant ཞེས་པ་དེའི་རྐྱེན་གྱིས་འགོས་ཁྱབ་ཆེས་མྱུར་བ་ཡོད་སྟབས། བོད་མི་མང་ཚོགས་ཀྱི་ངོས་ནས་ངེས་པར་དུ་སྨན་ཁབ་རྒྱག་རྒྱུ་གནད་འགག་ཆེན་པོ་ཡིན་པར་ལམ་སྟོན་གནང་འདུགདེ་བཞིན་བདུན་ཕྲག་འདིའི་ནང་བོད་མིའི་འདུས་སྡོད་ཁག་གི་ཏོག་དབྱིབས་གནས་སྟངས་དང་འབྲེལ་ནས་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདི་ཁོ་ནར་རྒྱ་གར་དང་བལ་ཡུལ་གཉིས་སུ་བོད་མི་ ༢༣༢ ལ་གསར་དུ་ཏོག་དབྱིབས་ནད་དུག་ཕོག་པ་དང་འདི་ནི་བདུན་ཕྲག་སྔོན་མ་དང་བསྡུར་ན་ནད་པ་ ༥༤ མང་དུ་སོང་ཡོད་ཅེས་གསུངས་ཏེ་བོད་པ་ཚོས་རང་ལ་ནད་རྟགས་ཐོན་པའི་དུས་སུ་ནང་མི་སྤུན་མཆེད་དང་བཅས་པར་བདེ་ཐབས་སླད་རང་ཉིད་ཟུར་བཀག་ཐོག་བཞུགས་དགོས་པ་དང་ད་ཆ་རྒྱ་གར་ནང་ནད་ཡམས་ཕོག་མཁན་བརྒྱ་ཆ་ ༤༠ ནས་...

རྒྱ་གར་ལྷོ་ཕྱོགས་གཞིས་ཆགས་ཁག་གི་ནང་དུ་ཏོག་དབྱིབས་ནད་པའི་ཁ་གྲངས་དེ་ཇེ་ཉུང་དུ་སོང་བ་མ་ཟད་ཉེ་ལམ་སྦེལ་ཀོབ་བོད་མིའི་གཞིས་ཆགས་ནང་ནད་པ་ ༡༨༠ ལྷག་འཕར་ཏེ་བོད་མི་མང་ཚོགས་ཁྲོད་སེམས་འཚབ་ཆེན་པོ་གནང་ཡུལ་ཞིག་ཏུ་གྱུར་ཡོད་ཀྱང་ད་ཆ་གཞིས་ཆགས་ནང་གཉན་རིམས་ཕོག་མཁན་ ༢༢ ལས་མི་འདུགགསར་འགོད་པས་ཞལ་པར་བརྒྱུད་གཞིས་ཆགས་ཁག་གི་སྨན་པ་དང་ས་གནས་འགོ་འཛིན་ཁག་ཅིག་ལས་གནས་ཚུལ་རྒྱུས་ལོན་ཞུས་པར་ཧོན་སུར་རབ་རྒྱས་གླིང་གི་ཕན་བདེ་སྨན་ཁང་གི་སྨན་ཞབས་པ་སྒྲོལ་དཀར་ལགས་ཀྱིས་ད་ལྟའི་ཆར་གཞིས་ཆགས་ནང་ནད་པ་གཅིག་ཀྱང་མེད་པར་གསུངས་སོང་། དེ་བཞིན་སྦེལ་ཀོབ་བོད་མིའི་གཞིས་ཆགས་ལྟ་བུར་མཚོན་ན་ད་ལྟ་ནད་དེ་ཕོག་མཁན་མི་ ༢༢ འདུག་ཀྱང་ཁོང་རྣམ་པའི་གནས་སྟངས་ཛ་དྲག་གང་ཡང་མེད་པ་དང་། མོན་གྷོ་འདོད་རྒུ་གླིང་གཞིས་ཆགས་ལ་ནད་པའི་ཁ་གྲངས་ ༡༥ དང་ཀོ་ལེ་གྷལ་གཞིས་ཆགས་ལ་ནད་ ༧ མ་གཏོགས་མི་འདུགགཞི་རྩའི་རྒྱ་གར་ཁྱོན་ཡོངས་ལ་ཏོག་དབྱིབས་གཉན་རིམས་ཕོག་པའི་ཁ་གྲངས་དེ་ཉིན་རེ་བཞིན་ཆག་བཞིན་པའི་སྐབས་འདིར་ཀ་ན་ཊ་ཀ་མངའ་སྡེའི་བློན་ཆེན་གྱི་བཀའ་འཁྲོལ་འོག་མཐོ་སློབ་ཕྱིར་བཤོལ་གནང་བ་རྣམས་སླར་ཡང་འཚོགས་རྒྱུ་དང་། སློབ་ཕྲུག་སྔོན་ཁབ་དང་པོ་ཐོབ་མཁན་རྣམས་མཐོ་སློབ་ཏུ་ཕེབས་ཆོག་གི་འདུག

བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་གིས་ད་བར་གཞིས་སྒར་ཁག་གི་བོད་མིར་ཏོག་དབྱིབས་སྔོན་ཁབ་ཐོབ་པར་མཐུན་འགྱུར་རྒྱབ་སྐྱོར་དང་སྦྱིན་བདག་གནང་མཁན་དགོན་སྡེ་ཁག་དང་ཚོགས་སྒེར་སྒྲིག་འཛུགས་ཡོངས་ལ་ཐུགས་རྗེ་ཆེ་ཞུས་པ་དང་འབྲེལ། རྒྱ་གར་ནང་ད་དུང་ཡང་བོད་མི་བརྒྱ་ཆ་ ༢༩ ཙམ་དང་བལ་ཡུལ་ནང་བརྒྱ་ཆ་ ༧༨ ལྷག་ཙམ་ལ་སྔོན་ཁབ་ཐོབ་མེད་སྐོར་གསུསང་སོང་། གསར་འགོད་གསལ་བསྒྲགས་ཐེངས་ ༦༤ སྤེལ་སྐབས་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཀྱིས་སྤྱིར་འདི་ལོའི་ཟླ་ ༡ ཚེས་ ༡༦ ནས་བཟུང་རྒྱ་གར་གྱི་ནང་དུ་ཏོག་དབྱིབས་གཉན་རིམས་ཀྱི་འགོག་ཁབ་བརྒྱབ་ཡོད་པ་ལྟར་བོད་མིའི་སྤྱི་ཚོགས་ནང་དུའང་སྔོན་ཁབ་དེ་ཐོབ་ཐབས་ཀྱི་ལས་དོན་ཆེས་ཆེར་སྤེལ་བའི་ངང་ནན་མདུན་སྐྱོད་གནང་བཞིན་ཡོད་པར་འགྲེལ་བརྗོད་དང་སྦྲགས། ད་ལྟའི་ཆར་རྒྱ་གར་ནང་གི་བོད་མིའི་གཞིས་སྒར་ཁག་ཏུ་སྔོན་ཁབ་རིམ་པ་དང་པོ་ཐོབ་ཟིན་པ་མི་གྲངས་ ༢༡༣༧༠ དང་སྔོན་ཁབ་རིམ་པ་གཉིས་ཀ་བརྒྱབ་ཟིན་པ་མི་གྲངས་ ༡༤༠༩༦ ཆགས་ཀྱི་ཡོད་སྐོར་གསུངས་པ་མ་ཟད་བལ་ཡུལ་ནང་ལ་མཚོན་ན་ད་བར་ཁྱོན་བོད་མི་ ༣༥༣ ལ་སྔོན་ཁབ་རིམ་པ་གཉིས་ཀ་བརྒྱབ་ཟིན་པ་དང་དེ་བཞིན་ ༡༠༨༤ ལ་སྔོན་ཁབ་རིམ་པ་དང་པོ་བརྒྱབ་ཟིན་ཡོད་ཀྱང་། ད་དུང་རྒྱ་བལ་གཉིས་ཀྱི་ནང་སྔོན་ཁབ་མ་ཐོབ་པའི་གྲངས་འབོར་དེ་ ༢༠༦༨༥...

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ Archbishop of Canterbury འམ་དབྱིན་ཇིའི་ཡི་ཤུའི་ཆོས་དཔོན་ཟུར་པ་ Rowan Williams གཙོས་དབུས་པའི་རྒྱལ་སྤྱིའི་ཆོས་ལུགས་ཀྱི་དབུ་ཁྲིད་ཁག་ཅིག་གིས་ G7 ཞེས་པའི་རྒྱལ་སྤྱིའི་སྟོབས་ཆེན་གྱི་རྒྱལ་ཁབ་བདུན་ལ་དེང་སྐབས་ཏོག་དབྱིབས་རིམས་ནད་སྔོན་ཁབ་བགོ་འགྲེམས་ཆ་སྙོམས་མེད་པ་དེ་མཚམས་འཇོག་གནང་དགོས་པའི་ཞུ་ཡིག་ཅིག་ཕུལ་འདུགདེ་རིང་ནས་དབྱིན་ཡུལ་དུ་སྟོབས་ཆེན་རྒྱལ་ཁབ་བདུན་གྱི་ཆེས་མཐོའི་ལྷན་ཚོགས་དེ་འཚོགས་ཀྱི་ཡོད་པ་དང་བསྟུན་མགོན་པོ་༸གང་ཉིད་མཆོག་གིས་དབུས་བའི་ཆོས་ལུགས་ཀྱི་དབུ་ཁྲིད་ཁག་ཅིག་གིས་དབུ་ཁྲིད་མཛད་པ་བརྒྱུད་དབྱིན་ཡུལ་གྱི་སྲིད་འཛིན་ Boris Johnson མཆོག་གིས་གཙོས་པའི་སྟོབས་ཆེན་རྒྱལ་ཁབ་ཁག་གི་དབུ་ཁྲིད་ཚོར་ཞུ་ཡིག་ཅིག་ཕུལ་བའི་ནང་དུ་སྟོབས་ཆེན་གྱི་རྒྱལ་ཁབ་དེ་དག་གིས་རིམས་ནད་སྔོན་ཁབ་ཀྱི་བདག་དབང་ཚོང་བསྒྱུར་གྱི་གནས་བབ་དེ་ཕྱིར་བསྡུ་གནང་སྟེ་འཛམ་གླིང་ནང་གི་དཔལ་འབྱོར་གྱི་ཡོངས་འབབ་ཆེས་ཞན་པའི་རྒྱལ་ཁབ་ཁག་གི་ནང་དུ་རིམས་ནད་སྔོན་ཁབ་བགོ་འགྲེམས་ཀྱི་མཐུན་རྐྱེན་སྐྲུན་པར་ཤུགས་སྣོན་གནང་དགོས་རར་ཐུགས་བརྩོན་མཛད་འདུག བཀའ་ཡིག་དེའི་ནང་དུ་དེང་གི་སྤྱི་ཚོགས་ཀྱི་ནང་འཛམ་གླིང་འཕྲོད་བསྟེན་ལྷན་ཚོགས་ཀྱིས་རྒྱལ་སྤྱིའི་སྤྱི་ཚོགས་ཁྲོད་ཏོག་དབྱིབས་རིམས་ནད་སྔོན་འགོག་གནང་རྒྱུར་འགོག་ཁབ་འགྲེམས་སྤེལ་གནང་བར་བསྔགས་བརྗོད་དང་སྦྲགས་ཏེ། ད་ཆ་རྒྱལ་སྤྱིའི་ཁྲོད་རིམས་ནད་འགོག་ཁབ་ཀྱི་བརྒྱུད་རིམ་ཁྲོད་དུ་རྒྱལ་ཁབ་ཕན་ཚུན་དབར་དབུལ་ཕྱུག་གི་ཧེ་བག་ཉིན་རེ་ནས་ཇེ་ཆེར་འགྲོ་བཞིན་ཡོད་པར་བཀའ་སྩལ་བ་དང་ད་ལྟའི་བར་འགོག་ཁབ་ས་ཡ་ ༩༠༠ ལྷག་བགོ་འགྲེམས་ཀྱི་ཁྲོད་དཔལ་འབྱོར་ཡོང་འབབ་མཐོ་བའི་རྒྱལ་ཁབ་ཁག་ཏུ་བརྒྱ་ཆ་ ༨༣ ལྷག་རག་ཡོད་ཀྱང་། འཚོ་བའི་ཡོང་འབབ་ཞན་པའི་དབུལ་ཕོངས་ཀྱི་རྒྱལ་ཁབ་ཁག་གི་ནང་འགོག་ཁབ་བརྒྱ་ཆ་ ༡ ལས་ཉུང་བ་ལས་རག་མེད་ཅེས་བཀའ་སྩལ་ཏེ། ད་ཆ་སྟོབས་ཆེན་རྒྱལ་ཁབ་ཁག་གིས་དབུ་ཁྲིད་པའི་ཐོག་ནས་དབུལ་ཕོངས་ཀྱི་རྒྱལ་ཁབ་ཁག་གི་ནང་དུ་འགོག་ཁབ་མང་ཙམ་མཁོ་འདོན་གནང་དགོས་པའི་ཞུ་སྐུལ་གནང་འདུག འཛམ་གླིང་གི་འབྱོར་ལྡན་ཡར་ཐོན་ཅན་གྱི་རྒྱལ་ཁབ་བདུན་གྱི་ཁོངས་སུ་ཨ་མི་རི་ཀ་དང་ཕ་རན་སི། འཇར་མན། དབྱིན་ཇི། ཁེ་ན་ཌ། ཨི་ཊ་ལི།...

ཁ་སང་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་སྔོན་འགོག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༥༦ པ་སྤེལ་བ་དང་སྦྲགས་བོད་མིའི་འདུས་སྡོད་ཀྱི་ས་ཁུལ་ཁག་ཏུ་སྨན་པ་དང་སྨན་ཞབས་པའི་དང་བླངས་ཕྱག་རོགས་གནང་རོགས་ཞེས་འབོད་སྐུལ་གནང་སོང་།གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་གྲུབ་ལགས་ཀྱིས་རྒྱ་གར་ནང་ནད་རླབས་གཉིས་པའི་དུས་ཚིགས་སུ་ཉིན་རེར་ནད་གཞི་ཕོག་མཁན་ཇེ་མང་དུ་འགྲོ་མུས་ཁྲོད་འདིར་རྒྱ་གར་དུ་གནས་བཞུགས་བོད་མིའི་མི་འབོར་འབུམ་གཅིག་ཙམ་མེད་སྟབས་བོད་མིའི་སྤྱི་ཚོགས་ཁྲོད་ནད་ཡམས་ཁྱབ་གདལ་ཤུགས་ཆེ་མི་འགྲོ་སླད་མང་ཚོགས་ནས་འགན་རང་འཁུར་གྱིས་ནད་ཡམས་ལས་མཐར་ཐབས་དང་སྔོན་འགོག་གི་ཐབས་ལམ་ཁག་མུ་མཐུད་བསྟེན་དགོས་པའི་གཞེན་སྐུལ་ནན་པོ་གནང་སོང་། དེ་བཞིན་དྲུང་ཆེ་མཆོག་གིས་ད་ལྟའི་ཆར་རྒྱལ་ས་ལྡི་ལི་གཙོས་ཀར་ན་ཊ་ཀ་དང་། ཆ་ཏིས་གྷར། མ་ཧཱ་རཤཊྚ་སོགས་མངའ་སྡེ་བཅུ་ཙམ་ནང་ནད་གཞི་ལྗིད་པོ་ཆགས་ཡོད་པ་དང་ཆབས་ཅིག  བོད་མིའི་འདུས་སྡོད་ས་གནས་དྷརྨ་ས་ལ་དང་། ཝཱ་རཱ་ཎ་སཱི། ལྡེ་ར་ལྡུན།  ཧུན་སུར། དེ་བཞིན་ཨུ་རི་ས་བཅས་ནད་པ་མང་པོ་ཐོན་སའི་ས་ཁུལ་ཆགས་ཡོད་པར་གསུངས་སོང་། ནད་ཡམས་ཀྱི་ཛ་དྲག་དུས་སྐབས་སུ་ས་གནས་ཁག་ཅིག་ལ་སྨན་པ་དང་སྨན་ཞབས་པ་འདང་ངེས་མེད་པའི་དཀའ་ངལ་རིམ་པ་འཕྲད་བཞིན་འདུག་པ་དང་། ལྷག་པར་དུ་དེའི་ཁྲོད་ད་ཆ་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་སྨན་ཞབས་པའི་ཕྱག་ལས་གནང་མཁན་དགོས་མཁོ་ཆེ་བར་བརྟེན་ཟླ་བ་གཅིག་གཉིས་ནང་བོད་རིགས་སྨན་པ་རྣམས་སྤྱི་ཚོགས་ཞབས་ཞུ་ཆེད་དུ་དང་བླངས་ཕྱག་རོགས་གནང་རོགས་ཞེས་འབོད་སྐུལ་གནང་བ་དང་སྦྲགས། དེ་ལྟར་གནང་བློ་མཆིས་རིགས་ཚོས་འབྲེལ་བ་གནང་རོགས་ཞེས་གསུངས་སོང་། རྩ་བའི་གཟའ་འཁོར་འདིའི་ནང་བོད་མིའི་འདུས་སྡོད་ཁག་ཏུ་ཏོག་དབྱིབས་ནད་གཞི་ཕོག་མཁན་ ༢༦༠ དང་དེའི་ཁོངས་ལོ་ན་བགྲེས་ཤོས་དེ་ ༩༠ དང་ཆུང་ཤོས་དེ་ལོ་ ༢ སོན་པའི་བྱིས་པ་རེད་འདུག ཚོགས་ཆུང་གི་འབྲེལ་མཐུད་པ་གསོ་རིག་སྨན་པ་ཚེ་རིང་མཚམས་གཅོད་ལགས་ཀྱིས་གཟའ་འཁོར་འདིའི་ནང་ནད་ཡམས་རྐྱེན་གྱིས་སྐྱེས་པ་རང་ལོ་ ༧༥ སོན་པར་ནད་རྟགས་ཡོད་པ་གང་ཞིག་ལ་ཁྲག་ཤེད་ནད་གཞི་ཡོད་པ་དང་། དེ་བཞིན་སྐྱེས་པ་རང་ལོ་ ༦༦ སོན་པ་གང་ཞིག་ལ་ཏོག་དབྱིབས་ ༡༩ འི་ནད་རྟགས་ཆ་ཚང་མངོན་པ་གཉིས་ཀྱི་ཚེ་སྲོག་ཤོར་ཡོད་སྐོར་གསུངས་སོང་། ལྷག་པར་དུ་ད་རེས་ནད་གཞི་ཕོག་པའི་ཁོངས་ལོ་ན་ ༦༠ ཡན་གྱི་མི་གྲངས་...

རྒྱ་གར་ནང་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་ ༡༩ ནད་གཞི་ཕོག་མཁན་ཉིན་རེ་བཞིན་ཇེ་མང་དུ་འགྲོ་བའི་ཁྲོད་འདིར་ཀངྒ་ར་རྫོང་ནས་མཚན་མོ་དང་དེ་བཞིན་རེས་གཟའ་སྤེན་པ་དང་ཉི་མ་ནམ་ཡིན་ལ་ཕྱིར་བསྐྱོད་མི་ཆོག་པའི་བཀའ་རྒྱ་བསྡམ་སོང་།ད་ཆ་རྒྱ་གར་ནང་ཏོག་དབྱིབས་གཉན་རིམས་ཀྱི་ Second Wave འམ་ཚ་རླབས་གཉིས་པ་འཕེལ་བཞིན་པའི་དུས་སྐབས་འདིར་མངའ་སྡེ་སོ་སོ་ནས་གནས་སྟངས་ལ་གཞིགས་ཏེ་ནད་ཡམས་སྔོན་འགོག་བཀག་སྡོམ་སླད་ཐེམ་སྤང་གི་བཀའ་རྒྱ་སོགས་གསལ་བསྒྲགས་གནང་ཡོད་པ་ལྟར། འདས་པའི་ཉིན་ཤས་ནས་ཀངྒ་ར་རྫོང་ཁོངས་སུའང་ནད་གཞི་དེ་ཕོག་མཁན་ཇེ་མང་དུ་འགྲོ་བའི་རྐྱེན་གྱིས་ཁ་སང་ཕྱི་དྲོ་ཀངྒ་ར་རྫོང་དཔོན་སྐུ་ཞབས་ Rajesh Kumar Prajapati ལགས་ཀྱིས་གསར་འགོད་གསལ་བསྒྲགས་བསྐྱངས་པར་ཁ་སང་ནས་དབུ་འཛུགས་ཀྱིས་དགོང་མོ་ཚོུད་ ༨ ནས་སྔ་དྲོ་ཕྱག་ཚོད་ ༦ བར་དང་། དེ་བཞིན་རེས་གཟའ་སྤེན་པ་དང་ཉི་མ་ནམ་ཡིན་ལ་ཕྱིར་བསྐྱོད་མི་ཆོག་པའི་བཀའ་རྒྱ་བསྡམ་སོང་། གཞན་ཡང་སྐབས་དེར་རྫོང་དཔོན་གྱིས་གཞུང་སྒེར་གྱི་ལས་ཁུངས་ཁག་གི་ལས་བྱེད་རྣམས་བརྒྱ་ཆ་ ༥༠ ཐོག་ནས་ལས་བཞུགས་ཞུ་རྒྱུ་དང་། ལྷག་པར་དུ་ཀུམ་བྷ་དུས་སྟོན་དང་གནས་མཇལ་ལ་ཕེབས་མཁན།  དེ་བཞིན་ནད་གཞི་འགོས་ཁྱབ་ཆེ་བའི་མངའ་སྡེ་རྒྱལ་ས་ལྡི་ལིས་གཙོས་པའི་པན་ཇབ། ཨུཏྟྲ་པྲ་དེ་ཤ། གུ་ཇརྚ། རཱ་ཇིས་ཐན། དེ་བཞིན་མ་ཧཱ་རཱཤྚ་སོགས་ནས་ཡོང་མཁན་ཚོ་ཉིན་གྲངས་བདུན་རིང་ཟུར་བཀག་དུ་བཞུགས་རྒྱུ་དང་དེ་རྗེས་...

འཛམ་གླིང་ཤར་ནུབ་གང་སར་རྒྱ་ནག་ཝུ་ཧན་ནས་ཆེས་ཐོག་མར་མཆེད་པའི་ཏོག་དབྱིབས་ནད་ཡམས་ཀྱི་ཁྱབ་གདལ་ཆེས་ཆེར་འགྲོ་བཞིན་པའི་ཛ་དྲག་གི་གནས་སྟངས་ཁྲོད་འདིར་བཙན་བྱོལ་བོད་མིའི་གནས་ཡུལ་རྒྱ་གར་ནང་དུའང་ཁྱབ་བརྡལ་གྱི་གནས་སྟངས་ཛ་དྲག་ཏུ་འགྲོ་མུས་ཀྱི་ཁྲོད་རྒྱ་གར་བྱང་ཤར་ཡུ་པི་མངའ་སྡེར་རྟེན་གཞི་བྱས་པའི་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་སློབ་ཕུག་ ༢༩ ལ་གཉན་རིམས་ཕོག་འདུགཤེས་རྟོགས་བྱུང་བར་གཞིགས་ན། ད་ལྟའི་ཆར་སློབ་གཉེར་ཁང་དེའི་ཉམས་ཞིབ་པ་དང་ལོ་ཙཱ་བ་སློབ་དཔོན་རྒྱལ་མཚན་རྣམ་གྲོལ་ལགས་དམ་པ་ཁོང་གཉན་རིམས་ཕོག་པའི་རྐྱེན་གྱིས་འདས་གྲོངས་སུ་གྱུར་སྐོར་བརྗོད་ཀྱི་ཡོད་ཀྱང་། སློབ་དཔོན་ཁོང་ཏོག་དབྱིབས་གཉན་རིམས་ཕོག་པའི་དབང་གིས་འདས་གྲོངས་སུ་གྱུར་བའི་སྨན་དཔྱད་བརྟག་འབྲས་ཕྱག་སོན་བྱུང་མི་འདུག རླུང་འཕྲིན་ཁང་གིས་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་གཉན་རིམས་ལས་དོན་ཚོགས་ཆུང་གི་ཚོགས་མི་བཀྲིས་ཟླ་བ་ལགས་སུ་དེ་འབྲེལ་བཅར་འདྲི་ཞུས་པར་ཁོང་གིས་གཉན་རིམས་ཕོག་པའི་སློབ་གཉེར་བའི་ཁོངས་ནས་གསུམ་ལ་ནད་རྟགས་གསལ་པོ་ཐོན་པ་ལས་དེ་མིན་གཞན་རྣམས་ལ་དམིགས་བསལ་ངལ་བ་གང་ཡང་མེད་པ་གསུངས་སོང་བ་དང་ཆབས་ཅིག གཉན་རིམས་ཕོག་རྐྱེན་དེ་སློབ་གཉེར་ཁང་གི་འབྲེལ་ཡོད་ལས་བྱེད་བརྒྱུད་ནས་ཁྱབ་གདལ་བྱུང་བ་ལས་སློབ་ཕྲུག་བརྒྱུད་ནས་མིན་སྐོར་དེ་ལྟར་གསུངས་ཡོད། རྩ་བའི་འདས་པའི་བདུན་ཕྲག་ནང་གཉན་རིམས་ཕོག་མཁན་ཇེ་མང་དུ་འགྲོ་བཞིན་པ་ལྟར་བཙན་བྱོལ་བོད་མིའི་སྤྱི་ཚོགས་ནང་དུའང་གཉན་རིམས་ཕོག་མཁན་གྱི་གྲངས་འབོར་ཇེ་མང་དུ་འགྲོ་བ་མ་ཟད། རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་བོད་མིའི་གཞིས་སྒར་དུ་གཞིས་མི་མང་དག་ཅིག་ལ་གཉན་རིམས་ཕོག་ཡོད་པ་དང་། དེ་བཞིན་བགྲེས་སོང་ཞིག་ཀྱང་འདས་གྲོངས་སུ་གྱུར་བའི་གནས་ཚུལ་ཐོན་པ་བྱུང་ཡོད་སྟབས། རླུང་འཕྲིན་ཁང་གིས་དེ་རིང་ཧུན་སུར་རབ་རྒྱས་གླིང་བོད་མིའི་གཞིས་སྒར་གྱི་འགོ་འཛིན་ཐུབ་བསྟན་ཚེ་རིང་ལགས་སུ་གཞིས་སྒར་དུ་གཉན་རིམས་ཁྱབ་གདལ་དང་འབྲེལ་བའི་བཅར་འདྲི་ཞུས་པར་ཁོང་གིས་ད་ལྟའི་ཆར་བོད་མི་ ༡༨ ཙམ་ལ་ནད་གཞི་ཕོག་པ་ལས་དེ་མིན་དམིགས་བསལ་ངལ་བ་གང་ཡང་མེད་སྐོར་གསུངས་སོང་། གཞི་རྩའི་ད་བར་རྒྱ་བལ་གཉིས་ནང་ཁྱོན་བོད་མི་ ༡༨༣༧ ལ་གཉན་རིམས་ཕོག་ཡོད་པ་དང་དེའི་ཁོངས་དྲག་སྐྱེད་སོང་བ་ ༡༦༤༨ དང་འདས་གྲོངས་སོང་བ་ ༤༨ དེ་བཞིན་ནད་ཀྱིས་མནར་བཞིན་པ་ ༡༤༡ ཆགས་ཀྱི་ཡོད་པ་རེད།

ཁ་སང་རེས་གཟའ་ཉི་མའི་ཉིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་གིས་ཏོག་དབྱིབས་ ༡༩ གནས་སྟངས་ཛ་དྲག་ཏུ་འགྲོ་བཞིན་པའི་དུས་སྐབས་འདིར་མངའ་སྡེ་གཞན་ནས་ཧི་མཱ་ཅལ་ནང་ཕེབས་མཁན་རྣམས་ལ་ལམ་སྟོན་གསར་པ་གནང་འདུགརྒྱ་གར་གྱི་རྒྱལ་ས་ལྡིལི་དང་གུ་ཇུརཱ་ཊ། ཀ་ན་ཊ་ཀ། མ་ཧཱརྴ་ཊ། རཱ་ཇིསྠན། དེ་བཞིན་ཨུཏྟརཔྲེ་ཤ་བཅས་ནས་ཧི་མཱ་ཅལ་མངའ་སྡེ་ནང་ཕེབས་མཁན་ཚོས་ངེས་པར་དུ་ཆུ་ཚོད་ ༧༢ ལས་མ་བརྒལ་བའི་ RTPC Rreport འམ་ཏོག་དབྱིབས་ནད་དུག་མེད་པའི་བརྟག་དཔྱད་ཟིན་པའི་ཡིག་ཆ་དགོས་པའི་ལམ་སྟོན་གནང་འདུག་པ་དང་། ལམ་སྟོན་དེ་ཟླ་ ༤ ཚེས་ ༡༦ ནས་ཕྱག་བསྟར་གནང་རྒྱུ་ཡིན་པ་རེད་འདུག སྐུ་ཞབས་ Jai Ram Thakur མཆོག་གིས་དེང་གི་འཆར་རྒྱ་གར་རྒྱལ་ཡོངས་སུ་ཏོག་དབྱིབས་གཉེན་རིམས་ཁྱབ་བརྡལ་གྱི་མྱུར་ཚད་དེ་ཉིན་རེ་བཞིན་ཇེ་ཆེར་འགྲོ་བཞིན་པ་མ་ཟད་ཧི་མཱཅལ་མངའ་སྡེ་ནང་དུའང་འདས་པའི་ཉིན་གྲངས་ ༤༥ ནང་མི་གྲངས་ ༡༦༠༠༠ ལྷག་ལ་གཉན་རིམས་ཕོག་ཡོད་པ་དང་མི་གྲངས་ ༡༢༠ ལྷག་འདས་གྲོངས་སུ་གྱུར་ཡོད་སྐོར་གསུངས་པ་དང་ཆབས་ཅིག ཏོག་དབྱིབས་གཉན་རིམས་ཀྱི་རྦ་རླབས་གཉིས་པ་དེ་གཞོན་སྐྱེས་ཀྱི་ཁྲོད་དུ་ཁྱབ་གདལ་མྱུར་བ་གྲོ་བཞིན་པ་ནི་ཛ་དྲག་རང་བཞིན་ཞིག་ཡིན་སྟབས། ཕྱི་ཟླ་ ༤...