བོད་མིའི་སྒྲིག་འཛུགས་ཀྱི་ COVID19 ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༣ པའི་ཐོག་སྔོན་ཁབ་གཉིས་ཀ་བཞེས་ཟིན་ཀྱང་ལྷོད་ཡེངས་མེད་པར་སྔོན་འགོག་གི་གནང་སྒོ་ཁག་མུ་མཐུད་གནང་དགོས་པའི་གཞེན་སྐུལ་གནང་སོང་།
དེ་རིང་གསར་འགོད་གསལ་བསྒྲགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་འཕར་བྱམས་པ་ཕུན་ཚོགས་ལགས་ཀྱིས་ཐུགས་སྣང་ལམ་སྟོན་དང་འབྲེལ་ཏེ་འདས་པའི་དུས་ཡུན་ནས་ཏོག་དབྱིབས་གཉན་རིམས་ཁྱབ་གདལ་ཕྱིན་པའི་རྐྱེན་གྱིས་རང་རེའི་མང་ཚོགས་ཀྱི་འགྲོ་འདུག་སྤྱོད་གསུམ་ལ་ངལ་བ་ཆེས་ཆེར་འཕྲད་ཡོད་པ་དང་ལྷག་དོན་ཉེ་ལམ་རྒྱ་གར་དང་བལ་ཡུལ་གཉིས་ཀྱི་ནང་ནད་རླབས་གཉིས་པའི་རྗེས་སུ་གནས་སྟངས་ཅུང་ཇེ་བཟང་དུ་ཕྱིན་པའི་ཚོར་སྣང་དང་ཉམས་མྱོང་ཞིག་བྱུང་ཡོད་ཀྱང་། འདས་པའི་བདུན་ཕྲག་གཅིག་གཉིས་ཀྱི་ནང་བོད་མིའི་གནས་ཡུལ་ས་གནས་ཁག་ཅིག་ཏུ་ཏོག་དབྱིབས་གཉན་རིམས་ཕོག་མཁན་གྱི་གྲངས་འབོར་ཇེ་མང་དུ་འགྲོ་བཞིན་འདུག་སྟབས། བོད་མི་ཚོས་སོ་སོའི་འཕྲོད་བསྟེན་དང་ནང་མི། དེ་བཞིན་བོད་མི་རིགས་ལ་དགོངས་པ་བཞེས་ཏེ་ནད་ཡམས་ལ་སྣང་མེད་དུ་མ་གཏང་བ་དང་། ང་ཚོས་གཉན་རིམས་ཁྱབ་གདལ་བྱུང་བ་ནས་བཟུང་ད་བར་མཉམ་རུབ་ཐོག་ནས་གདོང་ལེན་གནང་བ་ལྟར་མུ་མཐུད་དེ་ལྟར་གནང་རོགས་ཞེས་གཞེན་སྐུལ་གནང་ཡོད།
སྔོན་ཁབ་དང་འབྲེལ་དྲུང་འཕར་བྱམས་པ་ཕུན་ཚོགས་ལགས་ཀྱིས་ད་ལྟ་ས་གནས་ཁག་ལ་སྔོན་ཁབ་ཀྱི་ལས་གཞི་འགྲོ་བཞིན་ཡོད་པས་སྔོན་ཁབ་གཉིས་པ་བཞེས་མེད་པ་ཚོས་ངེས་པར་དུ་བཞེས་རྒྱུ་དང་ལྷག་དོན་སྔོན་ཁབ་གཉིས་ཀ་བཞེས་ཟིན་ཀྱང་ཁག་ཅིག་ལ་ནད་གཞི་ལྕི་མོ་ཕོག་པའི་གནས་སྟངས་ཡང་ཡོང་གི་ཡོད་སྟབས། སྔོན་ཁབ་གཉིས་ཀ་བཞེས་ཟིན་ཀྱང་ལྷོད་ཡེངས་མེད་པར་སྔོན་འགོག་གི་གནང་སྒོ་ཁག་མུ་མཐུད་གནང་དགོས་པའི་གཞེན་སྐུལ་གནང་ཡོད། 
བོད་མིའི་འདུས་སྡོད་ཁག་ཏུ་ཏོག་དབྱིབས་གཉན་རིམས་ཀྱི་གནས་སྟངས་དང་འབྲེལ་ནས་གཟའ་འཁོར་འདིའི་ནང་བོད་མི་ ༥༥ ལ་ཏོག་དབྱིབས་ནད་དུག་ཕོག་པ་དང་དེ་དག་གི་ཁོངས་སུ་དགུང་ལོ་བགྲེས་ཤོས་དགུང་ལོ་ ༩༣ དང་ལོ་ན་ཆུང་ཤོས་ལོ་ ༧ ཅན་གྱི་ཕྲུ་གུ་ཆགས་ཀྱི་ཡོད་པ་མ་ཟད་བདུན་ཕྲག་འདིའི་ནང་བོད་མི་གཉིས་འདས་གྲོངས་སུ་གྱུར་འདུག ད་བར་རྒྱ་གར་དང་བལ་ཡུལ་གཉིས་སུ་ཏོག་དབྱིབས་སྔོན་ཁབ་གྱི་ལས་དོན་དང་འབྲེལ་ཏེ་རྒྱ་གར་ནང་དུ་བཙན་བྱོལ་བོད་མིའི་མི་འབོར་ལ་གཞིགས་ཏེ་དགུང་ལོ་ ༡༨ ཡན་གྱི་བོད་རིགས་བརྒྱ་ཆ་ ༩༡།༣༣ ལ་སྔོན་ཁབ་བརྒྱབས་ཟིན་པ་དང་བལ་ཡུལ་ནང་བོད་རིགས་བརྒྱ་ཆ་ ༤༥།༣༨ ལ་སྔོན་ཁབ་བརྒྱབ་པ་ཡོད་པ་རེད།
སྨན་པ་ཚེ་རིང་མཚམས་གཅོད་ལགས་ཀྱིས་སྤྱིར་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ནང་གསལ་ལྟར་ན་རྒྱལ་ཁབ་སུ་རུང་ཞིག་གི་ནང་དུ་ཏོག་དབྱིབས་གཉན་རིམས་ཕོག་པའི་བརྒྱ་ཆ་ ༣ ཡན་གྱུར་བའི་གནས་སྟངས་ཆགས་ཚེ་ཛ་དྲག་གི་རང་བཞིན་ལ་ངོས་འཛིན་གནང་བཞིན་ཡོད་ཀྱང་། ད་ལྟའི་ཆར་རྒྱ་གར་གྱི་གནས་བབ་ནི་བརྒྱ་ཆ་ ༡།༩ ཆགས་ཀྱི་ཡོད་སྟབས་ཛ་དྲག་དེ་ཙམ་མེད་པ་ཞིག་ཆགས་ཡོད། འོན་ཀྱང་ཆེད་ལས་མི་སྣ་ཚོས་ཕྱི་ཟླ་ ༨ པའི་ཟླ་མཇུག་ནས་ཕྱི་ཟླ་ ༡༠ ནང་ཚུད་ལ་ནད་རླབས་གསུམ་པ་དེ་ཁྱབ་གདལ་འགྲོ་རྒྱུའི་ཉེན་ཁ་ཡོད་པར་ངོས་འཛིན་གནང་བཞིན་ཡོད་པར་བརྟེན་དོ་བདག་ཚང་མས་སྔོན་འགོག་གི་ཐབས་ལམ་དང་འབྲེལ་བའི་གནང་སྒོ་ཁག་ལ་འགན་མཉམ་བཞེས་གནང་དགོས་པར་གསུངས་སོང་།
གཞི་རྩའི་འདས་པའི་ལོ་གཅིག་དང་ཕྱེད་ཀའི་ནང་འཛམ་གླིང་ཁྱོན་ཡོངས་སུ་ནད་པ་ས་ཡ་ཉིས་བརྒྱ་བརྒྱད་བྱུང་ཡོད་པའི་ཁོངས་ནས་ཨ་རི་མང་ཤོས་དང་། དེ་རྗེས་རྒྱ་གར་ཆགས་ཀྱི་ཡོད་པ་རེད། འདས་པའི་ཆུ་ཚོད་ ༢༤ ནང་རྒྱ་གར་ལ་ནད་པ་སྟོང་ཕྲག་སུམ་ཅུ་སོ་དྲུག་ལྷག་གསར་ཐོན་བྱུང་ཡོད། དེ་བཞིན་བཙན་བྱོལ་བོད་མིའི་གནས་སྟངས་ལ་གཞིགས་ཚེ་འདས་པའི་ལོ་གཅིག་གི་ནང་ནད་པ་དྲུག་སྟོང་ལྷག་དང་། དེ་དག་གི་ཁོངས་ལས་དྲག་སྐྱེད་བྱུང་བ་ལྔ་སྟོང་ལྷག་ཆགས་ཀྱི་ཡོད་པ་མ་ཟད། བོད་མི་ ༡༤༦ འདས་གྲོངས་སུ་གྱུར་ཡོད་པ་དང་། ད་ལྟའི་ཆར་ནད་ཀྱིས་མནར་བཞིན་པ་དེ་བོད་མི་ ༢༢༤ ཆགས་ཀྱི་ཡོད་པ་རེད།
