འོས་བསྡུ་ལས་ཁང་གིས་མང་ཚོགས་ནས་སྔོན་འགྲོ་ལས་ལྷག་པ་དངོས་གཞི་ནང་ཆ་ཤས་བླང་རོགས་གསུངས་པ།

བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་ ༡༦ པའི་བོད་མི་མང་སྤྱི་འཐུས་རྣམ་པའི་དངོས་གཞི་འོས་བསྡུའི་སྐབས་རང་ལོ་ ༡༨ ཡན་སོན་པ་རྣམས་ནས་འོས་ཤོག་འཕང་ཐུབ་ཆེད། སྤྱི་ཁྱབ་འོས་བསྡུ་ལས་ཁང་ནས་དམིགས་བསལ་དགོངས་བཞེས་གནང་སྟེ། དེ་སྔ་དེབ་སྐྱེལ་ཞུ་མེད་མཁན་ཚོར་ཟླ་བ་འདིའི་ཕྱི་ཚེས ༢༠ ནང་ཚུད་དེབ་སྐྱེལ་ཞུ་དགོས་པའི་གོ་སྐབས་གཉིས་པ་ཞིག་གནང་ཡོད་པ་ལྟར། ད་ཆ་དེབ་སྐྱེལ་ཞུ་ཚེས་ཀྱི་དུས་བཀག་རྫོགས་ལ་ཉེ་བའི་མཚམས་འདིར་དབུས་འོས་བསྡུ་ལས་ཁང་ནས་མང་ཚོགས་ལ་སྔོན་འགྲོ་ལས་ལྷག་པ་དངོས་གཞི་ནང་ཆ་ཤས་མང་བ་བླང་ཐུབ་ཆེད་དེབ་སྐྱེལ་མ་ཞུ་མཁན་ཚོས་ངེས་པར་དུ་དེབ་སྐྱེལ་གནང་རོགས་ཞེས་གསུངས་ཀྱི་འདུག འདི་ག་རླུང་འཕྲིན་ཁང་གིས་སྤྱི་ཁྱབ་འོས་བསྡུའི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་སུ་བཅར་འདྲི་ཞུས་པར། ཁོང་གིས་མང་ཚོགས་ཚོས་ཕྱི་ཟླ་ ༢ ཚེས་ ༢༠ ནང་ཚུད་ལ་ངེས་པར་དུ་དེབ་སྐྱེལ་ཞུ་ཟིན་པ་དགོས་གལ་ཡིན་པ་གསུངས་པ་དང་སྦྲགས། དེ་སྔ་དེབ་སྐྱེལ་ཞུ་མེད་མཁན་ཚོས་ད་ཆ་དེབ་སྐྱེལ་ཞུ་ཚེས་ཀྱི་དུས་བཀག་རྫོགས་ལ་ཉེ་སྟབས། དབུས་འོས་བསྡུ་ལས་ཁང་ནས་དམིགས་བསལ་དགོངས་བཞེས་གནང་དོན་ལྟར། རྒྱ་ཆེ་མང་ཚོགས་ཚོས་ཀྱང་ངེས་པར་དུ་དོ་སྣང་གནང་ནས་དངོས་གཞི་འོས་བསྡུའི་ནང་སྔར་ལྷག་ཆ་ཤས་བླང་རོགས་ཞེས་འབོད་བསྐུལ་གནང་ཡོད། ད་དུང་ཁོང་གིས་ས་གནས་འོས་བསྡུའི་འགན་འཛིན་ཚོས་ད་ལན་དངོས་གཞི་སྐབས་ས་གནས་སོ་སོའི་ནང་གསར་དུ་དེབ་སྐྱེལ་གནང་མཁན་ཚོའི་གྲངས་ཐོ་ཁག་ཕྱི་ཟླ་ ༢ ཚེས ༢༨ འགྱངས་མེད་ཐོག་དབུས་འོས་བསྡུ་ལས་ཁང་དུ་འབུལ་འབྱོར་ཟིན་དགོས་གལ་ཡིན་པ་གསུངས་སོང། དེ་བཞིན་བཞུགས་སྒར་ས་གནས་འགོ་འཛིན་ཚེ་རིང་ལྷ་མོ་ལགས་ཀྱིས་གསུངས་པར། རྡ་རམ་ས་ལར་དེབ་སྐྱེལ་གོ་སྐབས་གཉིས་པ་གནང་པ་འདིའི་ཁྲོད་མང་ཚོགས་ ༣༠༠...