སཱི་ཤེས་ཡོན་སློབ་གསོ།

ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་རྒྱ་གར་བྱང་ཕྱོགས་ཁུལ་གྱི་སྔོན་འགྲོ་སློབ་གྲྭའི་དགེ་རྒན་ཁག་ཅིག་ལ་ SEE Learning འམ་སཱི་ཤེས་ཡོན་སློབ་གསོ་དང་འབྲེལ་བའི་ཟབ་སྦྱོང་གནང་བཞིན་ཡོད་པ་དང་དེ་རིང་ཉིན་མཐའ་མའི་ལས་རིམ་ཐོག་གསར་འགོད་པ་ཆེད་བཅར་ཞུས་སྐབས་ཟབ་སྦྱོང་སྦྱོང་ནང་མཉམ་ཞུགས་གནང་མཁན་སྔོན་འགྲོ་དགེ་རྒན་སྡེ་ཁག་གཅིག་གིས་དྲན་ཤེས་བསྟེན་པའི་སེམས་པ་ཞེས་པའི་བརྗོད་གཞིའི་ཐོག་གཏམ་བརྗོད་འཁྲབ་སྟོན་གནང་སོང་།སྐབས་དེར་མེས་དབོན་གཙུག་ལག་དཔེ་སྟོན་སློབ་གྲྭའི་སྔོན་འགྲོའི་དགེ་རྒན་སྒྲོལ་མ་དབྱངས་ཅན་ལགས་ཀྱིས་རྒྱུན་དུས་ཆོས་ལ་མ་བརྟེན་པར་བཟང་སྤྱོད་ཅེས་ཇི་ལྟར་འགྲེལ་དགོས་མིན་ཐད་ལ་དོགས་འདྲི་ཆེན་པོ་ཡོད་པ་ཐེངས་འདིའི་ཟབ་སྦྱོང་བརྒྱུད་གཙང་སེལ་དང་། ལྷག་པར་དུ་ SEE ཤེས་ཡོན་བསླབ་གཞི་དང་འབྲེལ་ནས་ལོ་ངོ་གསུམ་ནས་དྲུག་བར་གྱི་སློབ་ཕྲུག་ཚོར་ཐབས་མཁས་པོའི་ངང་སློབ་ཕྲུག་ལ་འབྲེལ་བ་བཏགས་ནས་རི་མོ་སོགས་ཀྱི་བརྒྱུད་སློབ་ཁྲིད་གནང་འཆར་ཡོད་པར་གསུངས་སོང་།དེ་བཞིན་མ་སུ་རི་བོད་ཁྱིམ་གྱི་དགེ་རྒན་རྣམ་རྒྱལ་སྒྲོལ་མ་ལགས་ཀྱིས་ཀྱང་ SEE ཤེས་ཡོན་སློབ་གསོ་དེ་སྔོན་འགྲོའི་སློབ་ཕྲུག་ཚོར་རི་མོའི་བརྒྱུད་ནས་ངོ་སྤྲོད་གནང་ཚེ་དེ་ཕན་ཐོགས་ཆེན་པོ་ཡོང་ངེས་ཡིན་པ་གསུངས་སོང་བ་མ་ཟད། བོད་ཁྱོམ་སློབ་གྲྭའི་དགེ་རྒན་ཕུར་བུ་སྒྲོལ་མ་ལགས་ཀྱིས་གཏམ་བརྗོད་བརྒྱུད་ངོ་སྤྲོད་གནང་ན་སློབ་གཉེར་བ་ཚོའི་བློ་ལ་འཇུག་པོ་ཡོང་གི་ཡོད་སྐོར་གསུངས་སོང་།ཟབ་སྦྱོང་གོ་སྒྲིག་གནང་མཁན་ཤེས་ཡོན་ལྷན་ཚོགས་ཡིག་ཚང་གི་འགན་འཛིན་དྲུང་འཕར་བསྟན་འཛིན་པདྨ་ལགས་ཀྱིས་ SEE ཤེས་ཡོན་སློབ་གསོའི་བསླབ་གཞི་གཙོ་བོ་བྱམས་སྙིང་རྗེ་ཡིན་སྟབས། མ་འོངས་པར་མི་གང་འདྲ་ཞིག་ཆགས་མིན་ཆུང་དུས་ནས་རྨང་གཞི་གང་བཏིང་མིན་ལ་རག་ལས་པར་སོང་སྔོན་འགྲོའི་དགེ་རྒན་རྣམས་ལ་ཆེད་དམིགས་ཀྱིས་ཟབ་སྦྱོང་གོ་སྒྲིག་ཞུས་སྐོར་གསུངས་སོང་།དགེ་ལགས་རྣམ་གསུམ་གྱིས་འགྲོ་བ་མི་ཞིག་ཡིན་པའི་ཆ་ནས་དཀའ་ངལ་མང་པོ་མྱང་བཞིན་པ་དེར་གདོང་ལེན་ཇི་ལྟར་གནང་དགོས་མིན་དང་རང་ཉིས་ཀྱི་སེམས་འཁྲུལ་སྐབས་སུ་འཁྲུལ་པ་ཞི་བར་བློ་བསྐྱེད་ཆེན་པོ་བྱུང་བར་འགྲེལ་བརྗོད་གནང་ཡོད།ཉིན་གསུམ་གྱི་སྔོན་འགྲོའི་དགེ་རྒན་རྣམ་པའི་ཟབ་སྦྱོང་དེ་ཤེས་རིག་ལས་ཁུངས་ཀྱིས་གོ་སྒྲིག་འོག་ཆོས་ལུགས་ལ་མ་བརྟེན་པའི་བཟང་སྤྱོད་དང་འབྲེལ་ནས་སཱི་ཤེས་ཡོན་སློབ་གསོའི་སྐོར་ཆགས་ཀྱི་ཡོད་པ་མ་ཟད། ཟབ་སྦྱོང་ཐོག་རྒྱ་གར་བྱང་ཕྱོགས་ནས་བོད་ཁྱིམ་དང་མ་སུ་རི། སཾ་བྷོཊ་སོགས་ཀྱི་ཁྱབ་ཁོངས་སློབ་གྲྭ་ཁག་ ༡༧ ནས་དགེ་རྒན་ ༤༦ མཉམ་ཞུགས་གནང་ཡོད་པ་མ་ཟད། ཟབ་ཁྲིད་གནང་མཁན་ཁོངས་སུ་ཨ་རི་ཨེ་མོ་རིའི་སཱི་ཤེས་ཡོན་གསོའི་རྒྱལ་སྤྱིའི་འབྲེལ་མཐུད་པ་བརྩོན་འགྲུས་བསམ་འཕེལ་ལགས་ཀྱིས་དྲྭ་ཐོག་ནས་ཟབ་ཁྲིད་གནང་བ་དང་། དེ་བཞིན་ས་རཱ་མཐོ་སློབ་ཀྱི་ལྟ་གྲུབ་སློབ་དཔོན་དགེ་བཤེས་བསྟན་འཛིན་ཚེ་ལེགས་ལགས་དང་ལྟ་གྲུབ་སློབ་དཔོན་བསྟན་འཛིན་དམ་ཆོས་ལགས། དེ་བཞིན་ཤེས་རིག་ལས་ཁུངས་ཀྱི་ཤེས་ཡོན་ལྷན་ཚོགས་ཡིག་ཚང་གི་འགན་འཛིན་དྲུང་འཕར་བསྟན་འཛིན་པདྨ་ལགས་བཅས་ནས་ཟབ་སྦྱོང་གནང་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་རྒྱལ་ས་ལྡི་ལི་ནང་གི་མཛད་འཆར་མཐའ་མ་ཨ་རིའི་གཏོང་ཕོད་ཅན་གྱི་སྤྱི་ཚོགས་ཞབས་ཞུ་བ་སྐུ་ཞབས་ Bobby Sager ལགས་ཀྱིས་སྣེ་ཁྲིད་པའི་གཞོན་སྐྱེས་གོ་ལའི་འགོ་ཁྲིད་མི་སྣ་ ༤༧ ཙམ་ལ་མཇལ་ཁ་དང་བཀའ་སློབ་བཀའ་དྲིན་བསྩལ་ཡོད་པ་རེད།སྐུ་ཞབས་ Bobby Sager ལགས་ཀྱིས་ལོ་ ༡༩ ཙམ་གྱི་གོང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷན་ཨ་རིའི་ Los Angeles གྲོང་ཁྱེར་ནང་མཇལ་འཕྲད་ཐོག་མར་དེ་ཞུས་ཡོད་པ་དང་། ལྷན་རྒྱས་ཀྱི་མཇལ་མོལ་དེའི་སྐབས་༸གོང་ས་མཆོག་གིས་བཀའ་སློབ་ལམ་སྟོན་ཕེབས་པ་བཞིན་ཁོང་གིས་འདས་པའི་མི་ལོ་ ༡༩ རིང་བོད་པའི་དགོན་སྡེ་ཁག་ཏུ་ཚན་རིག་སློབ་ཁྲིད་ཀྱི་ལས་གཞི་ཐོག་ལ་མཐུན་འགྱུར་རོགས་རམ་གནང་མུས་ཡིན་པ་རེད།མཛད་སྒོའི་ཐོག༸གོང་ས་མཆོག་གིས་ད་རེས་ངོས་རང་འགྲོ་བ་མིའི་རྨང་གཞིའི་བདེ་སྐྱིད་བསྐྲུན་ཐབས་ཐོག་ཕྱག་ལས་གནང་མཁན་ཚོགས་ཆུང་དང་མཇལ་མོལ་གྱི་གོ་སྐབས་བྱུང་བར་དགའ་ཚོར་ཆེན་པོ་བྱུང་ཞེས་བཀའ་བསྩལ་བ་དང་སྦྲགས། ཁ་སང་ངོས་ནས་ཞུས་ཟིན་པ་ལྟར་འཛམ་གླིང་འདིའི་ཐོག་གི་དངོས་པོ་གང་ཡིན་རུང་བཟང་ངན་ལ་མ་བལྟོས་པར་རང་བཞིན་གྱིས་འགྱུར་ལྡོག་འགྲོ་ཡི་ཡོད་པ་རེད། དངོས་པོ་རྣམས་ཀྱི་འགྱུར་ལྡོག་ཇི་ལྟར་འགྲོ་མིན་ལ་ལྟོས་མེད་ང་ཚོས་རང་ཉིད་ཀྱི་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་དོན་སྙིང་ལྡན་པ་ཞིག་སྤྱོད་དགོས་གལ་ཡིན་པ་དང་། ང་ཚོའི་ཆོས་རབ་ཏུ་རྣམ་འབྱེད་ཀྱི་ཤེས་རབ་དེ་གཏོར་རྒོལ་གྱི་དབང་ཤུགས་འོག་ཏུ་མ་འགྲོ་བ་བྱེད་དགོས་པ་མ་ཟད། ལྷག་པར་དུ་ཆོས་རྣམས་ཀྱི་བདེན་པའི་གཞིའི་ལུགས་རྟོགས་པར་སྤྱོད་དགོས་གནད་ཡིན་པ་ལྟར། དེ་ལྟར་མ་གནང་ཚེ་ཕྱོགས་གཅིག་གི་གཤིས་ལུགས་ལས་རྟོགས་དཀའ་བའི་གནས་ཡིན་སྟབས། ང་ཚོའི་བསམ་བློ་བརྟན་པོ་བཞག་ཚེ་ཆོས་ཀུན་གྱི་གནས་ལུགས་ཡོངས་རྫོགས་རྟོགས་ཐུབ་པ་སོགས་ལམ་སྟོན་བཀྲིན་བསྩལ་འདུག༸གོང་ས་མཆོག་གིས་ཐུགས་བསྐྱེད་དམ་བཅའ་བཞི་ཡོད་པ་ལས་དང་པོ་འགྲོ་བ་མི་གཅིག་གྱུར་གྱི་དགོངས་བཞེས་དང་འབྲེལ་ནས་མགོན་པོ་༸གང་ཉིད་མཆོག་ནས་རྣམ་ཀུན་ཏུ་སའི་གོ་ལ་ཐོག་མི་ཐེར་འབུམ་ ༧...