སྐལ་བཟང་ཚེ་རིང་ལགས་ཀྱི་གཟུགས་གཞིའི་གནས་སྟངས་ཛ་དྲག་ཏུ་གྱུར་ཡོད་པ།

ལྷ་ས་སྟོད་ལུང་བདེ་ཆེན་རྫོང་གྱི་བོད་མི་ཆབ་སྲིད་བཙོན་པ་སྐལ་བཟང་ཚེ་རིང་ལགས་ཀྱི་སྐུ་གཟུགས་ཀྱི་གནས་སྟངས་ཛ་དྲག་ཏུ་གྱུར་ཡོད་པ་རེད་འདུག སྐལ་བཟང་ཚེ་རིང་ལགས་ནི་དེ་སྔ་ཕྱི་ལོ་༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོའི་ལས་འགུལ་ནང་མཉམ་ཞུགས་པའི་རྐྱེན་ལྷ་ས་སྟོད་ལུང་རྫོང་ཉེན་རྟོག་པས་ཁོང་འཛིན་བཟུང་བྱས་ཡོད་པ་རེད། དེ་ནས་ཁོང་ལ་ལོ་བདུན་གྱི་བཙོན་འཇུག་ཁྲིམས་ཐག་བཅད་དེ་ལྷ་སའི་ཉེ་འཁྲིས་ཆུ་ཤུར་རྫོང་གི་བཙོན་ཁང་དུ་བཙོན་འཇུག་བྱས་པ་མ་ཟད། བཙོན་ཁང་ནང་ཁོང་ལ་གཅར་རྡུང་དྲག་པོ་ཚད་མེད་བཏང་ནས་སྔ་ལོ་ ༢༠༡༥ ཟླ་ ༧ ཚེས་༡༩ ཉིན་བཙོན་གྲོལ་བཏང་ཡོད་རེད། བཙོན་གྲོལ་ཐོབ་རྗེས་ལྷ་ས་དང་དེའི་ཉེ་འཁྲིས་ཀྱི་སྨན་ཁང་ཁག་ལ་སྔ་རྗེས་སུ་བསྟེན་གཏུགས་བྱས་ཀྱང་། ནད་གཞི་ལ་དྲག་སྐྱེད་མ་བྱུང་བས་ད་ཆ་ཁོང་སྨན་བཅོས་ཆེད་རྒྱ་ནག་ཟི་ཁྲོན་གྱི་ཁྲིན་ཏུའུ་གྲོང་ཁྱེར་དུ་མུ་མཐུད་སྨན་བཅོས་གནང་མུས་ཡིན་ནའང། ཁོང་གི་ཚེ་སྲོག་ལ་ཉེན་ཁ་ཆེན་པོ་འཕྲད་བཞིན་ཡོད་པའི་གནས་ཚུལ་ཐོན་བཞིན་འདུག ད་ལྟའི་ཆར་སྟོད་ལུང་བདེ་ཆེན་རྫོང་གྱི་བོད་མི་ཆབ་སྲིད་བཙོན་པ་སྐལ་བཟང་ཚེ་རིང་ལགས་ཀྱི་སྐོར་ལ་གནས་ཚུལ་དེ་ཙམ་ལས་ཞིབ་ཕྲ་ཤེས་རྟོགས་དཀའ་བར་གྱུར་འདུག