ཧིན་སྒོར་ས་ཡ་ ༢༥༤༢ ལྷག་ཙམ་གྱི་སྔོན་རྩིས་གཏན་འབེབས་དང་འབྲེལ་གྲོས་ཚོགས་ཚོགས་འདུས་གསུམ་པ་མཇུག་སྒྲིལ།

ཁ་སང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་མཐའ་མའི་ལས་རིམ་ཐོག་གྲོས་ཚོགས་ནས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༢་༢༠༢༣ ལོའི་སྔོན་རྩིས་འགྲོ་གྲོན་ཁྱོན་ཧིན་སྒོར་ས་ཡ་ ༢༥༤༢་༢༡ ཙམ་གཏན་འབེབས་གནང་བ་དང་འབྲེལ་ནས་གྲོས་ཚོགས་མཇུག་སྒྲིལ་གནང་སོང་། ཉེ་སྔོན་འཛིན་སྐྱོང་བཀའ་ཤག་གིས་ལས་ཉིན་དང་པོའི་ཐོག་ཧིན་སྒོར་ས་ཡ་ ༢༥༣༥་༡༤ ཡི་སྔོན་རྩིས་འཆར་འབུལ་ཞུས་པའི་ཐོག་ཆབ་སྲིད་ལས་འགུལ་སྤེལ་རྒྱུ་དང་རུ་སོག་སྐུ་ཚབ་དོན་གཅོད་ལས་ཁུངས་ཀྱི་འགྲོ་གྲོན་གཉིས་ལ་སྤར་ཆ་ཕྲན་བུ་དང་གཅོག་ཆ་གང་ཡང་མེད་པར་གཏན་འབེབས་གནང་སོང་། ཁ་སང་སྔ་དྲོའི་ལས་རིམ་ནང་ལས་ཁུངས་གོ་རིམ་བཞིན་སྔོན་རྩིས་ཐོག་བགྲོ་གླེང་དང་ལན་འདེབས་གསལ་བཤད། དེ་བཞིན་གངས་ལྗོངས་དཔལ་འབྱོར་ཞབས་ཞུ་ཁང་དང་སྣར་ཐང་དཔར་ཁང་སྒོ་བརྒྱབ་རྒྱུ་མིན་པ་བཅས་ཀྱི་གནད་དོན་ཐོག་གཞུང་འབྲེལ་གྲོས་ཆོད་ཡིག་ཆ་ཁག་ཅིག་གཏན་འབེབས་གནང་བ་དང་།  དེ་བཞིན་ཉེ་སྔོན་བཀའ་ཤག་གི་གསལ་བཤད་ཐོག་བགྲོ་གླེང་ཟིན་པར་སྲིད་སྐྱོང་མཆོག་གིས་ལན་འདེབས་གསལ་བཤད་གནང་ཟིན་རྗེས། གྲོས་ཚོགས་ནས་རྩིས་ལོ་ ༢༠༢༢་༢༠༢༣ ལོའི་སྔོན་རྩིས་འགྲོ་གྲོན་གཏན་འབེབས་སོགས་ཀྱི་ལས་རིམ་ཡོངས་སུ་གྲུབ་པ་དང་འབྲེལ་ཏེ། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པ་མཇུག་སྒྲིལ་གནང་ཡོད། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་མཇུག་བསྡོམས་གསུང་བཤད་ནང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཕྱི་ལོ་ ༢༠༢༢ ཟླ་ ༣ ཚེས་ ༣༠ རེས་གཟའ་ལྷག་པ་ཉིན་བོད་ཁམས་སྐྱེ་རྒུ་མདོ་རུ་དམག་སྒར་གྱི་ཉེ་འགྲམ་དུ་བོད་མི་ཞིག་གིས་རང་ལུས་མེར་སྲེག་བཏང་བའི་གནད་དོན་བྱུང་འདུག དེ་བཞིན་གྲོས་ཚོགས་ཚོགས་དུས་གཉིས་པའི་སྐབས་ཏེ་ཕྱི་ཟླ་...