3rd Session

དེ་རིང་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་ཕྱི་ནང་གི་མང་ཚོགས་སྟོང་ཕྲག་མང་པོ་འདུ་འཛོམས་ཐོག་གཞུང་འབྲེལ་གྱི་མཛད་སྒོ་ཚོགས་པ་བརྒྱུད་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ དང་བོད་ལུགས་ལྟར་དགུང་གྲངས་ ༨༨ བདག་གིར་བཞད་པའི་༸སྐུའི་འཁྲུངས་སྐར་སྲུང་བརྩི་ཞུས་ཏེ་བཀའ་སྤྱི་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་མི་རིགས་ཀྱི་སླད་དུ་སྐུ་ངལ་མཛད་མེད་ཀྱིས་མཛད་པ་ཇི་སྙེད་ཅིག་བསྐྱངས་པ་དང་སྒོས་སུ་འཛམ་གླིང་ཁྱོན་ཡོངས་སུ་ཞི་བདེ་དང་བྱམས་བརྩེ་གོང་འཕེལ་སླད་མཛད་པ་རླབས་ཆེན་སྐྱོང་བའི་འོག་དེང་སྐབས་བཙན་བྱོལ་བོད་མིའི་སྤྱི་ཚོགས་འདི་འཛམ་གླིང་ཁྲོད་ཀྱི་སྐྱབས་བཅོལ་བའི་སྒྲིག་འཛུགས་གཟེངས་སུ་ཐོན་པ་ཞིག་བསྐྲུན་གནང་མཛད་པའི་བླ་ན་མེད་པའི་མཛད་འཕྲིན་ཁག་དྲན་གསོ་ཞུས་པ་དང་འབྲེལ། ༸གོང་ས་མཆོག་གི་ཐུགས་བསྐྱེད་ཆེན་པོ་བཞི་གཙོས་བཀའ་དགོངས་བཞིན་རྣམ་དཀར་དགེ་བའི་ལས་ལ་གཞོལ་ཞིང་། སྤྱི་དོན་ཐོག་ནུས་པ་མཉམ་སྤུངས་གནང་བའི་འབོད་སྐུལ་བསྐྱར་ནན་གནང་སོང་།དེ་རིང་སྔ་དྲོ་ཕྱག་ཚོད་ ༡༠ ཐོག་གཞུང་འབྲེལ་གྱི་༸སྐུའི་འཁྲུངས་སྐར་སྲུང་བརྩིའི་མཛད་སྒོ་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱང་གནང་སྟེ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་མི་རིགས་ཀྱི་ཆེད་དུ་ད་བར་སྐུ་ངལ་མཛད་མེད་ཀྱིས་སྐུ་ལས་བསྐྱོན་པའི་ཁྲོད་དེང་སྐབས་བཙན་བྱོལ་བོད་མིའི་སྤྱི་ཚོགས་འདི་རང་གི་ཆོས་དང་རིག་གཞུང་། སྐད་ཡིག་དང་བཅས་པ་མི་ཉམས་རྒྱུན་འཛིན་དང་ཉམས་པ་སླར་གསོ་གནང་སྟེ། འཛམ་གླིང་ཁྲོད་ཀྱི་སྐྱབས་བཅོལ་བའི་སྤྱི་ཚོགས་ཚགས་ཚུད་ཤོས་སུ་གྱུར་གནང་མཛད་ཡོད་པ་སོགས་༸སྐུའི་མཛད་རྗེས་ཁག་དྲན་གསོ་དང་འབྲེལ། རང་ཅག་ལས་ཀྱི་སྣེ་མོ་བ་རྣམས་དང་མང་ཚོགས་བཅས་ཐུན་མོང་གི་ངོས་ནས་སྤྱི་མཐུན་བསོད་ནམས་གསོག་པ་དང་༸རྒྱལ་བ་དགྱེས་པའི་མཆོད་སྤྲིན་དུ་༸གོང་ས་མཆོག་ཐུགས་འཚབ་དང་ཐུགས་སུན་འབྱུང་གཞིའི་གཏམ་བརྗོད་མཐའ་དག་རྒྱང་དུ་དོར་ཏེ། ཐུགས་བསྐྱེད་དམ་བཅའ་བཞི་གཙོ་གྱུར་ཐོག་བཀའ་དགོངས་བཞིན་རྣམ་དཀར་དགེ་བའི་ལས་ལ་གཞོལ་ཞིང་། སྤྱི་དོན་ཐོག་ནུས་པ་མཉམ་སྤུངས་ཡོང་བའི་འབོད་སྐུལ་དང་། སྐབས་ ༡༦ པའི་བཀའ་ཤག་གི་ངོས་ནས་ལས་དོན་བྱེད་སྒོ་མཐའ་དག་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གཞིར་བཟུང་འབད་བརྩོད་ཞུ་མུས་ཡིན་ཞིང་། མ་འོངས་པར་ཡང་༸མགོན་པོ་མཆོག་གི་དགོངས་གཞི་བསྒྲུབ་རྒྱུའི་དམ་བཅའ་བརྟན་པོ་ཡིན་ཞེས་སོགས་གསུངས་སོང་།དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྗེས་ཁག་ལ་ཆེ་བསྟོད་དང་འབྲེལ་དེ་རིང་གི་གོ་སྐབས་ཆེས་བཞེས་ཀྱིས་དུས་རབས་ཉེར་གཅིག་པའི་གནས་བབ་བཅས་ལ་བསམ་ཞིབ་ཀྱིས་རྒྱ་ནག་གི་དཔོན་རིགས་ཚོས་བོད་ཐོག་འཛིན་པའི་མཁྲེགས་བཟུང་ཅན་གྱི་སྲིད་བྱུས་ལ་བཟང་ཕྱོགས་ཀྱི་འགྱུར་བ་ཞིག་ངེས་པར་དུ་གཏོང་དགོས་པའི་དུས་ལ་བབ་ཡོད་པའི་སྐུལ་མ་གནང་སོང་།སྤྱིར་དེ་རིང་བསྐལ་བཟང་ཉིན་མོ་དེར་སྐུ་མགྲོན་གཙོ་བོར་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ Jai Ram Thakur མཆོག་ཆེད་ཕེབས་གནང་གཏན་ཁེལ་ཡོད་ཀྱང་དྲག་ཆར་ཁྲོད་ཐད་ཕུར་གནམ་གྲུ་ཕུར་མ་ཐུབ་པའི་རྐྱེན་གྱིས་མཛད་སྒོའི་ཐོག་ཕེབས་ཐུབ་མེད་སྟབས། ཁོང་གིས་དྲ་རྒྱ་བརྒྱུད་ནས་གསུང་འཕྲིན་ཞིག་སྩལ་ཏེ་མང་ཚོགས་ལ་༸རྒྱལ་བའི་༸སྐུའི་འཁྲུངས་སྐར་ཉིན་མོར་འཚམས་འདྲི་དང་རིང་མིན་དྷརྨ་སཱ་ལཱར་ཕེབས་ནས་༸གོང་ས་མཆོག་དང་ལྷན་མཇལ་འཕྲད་ཞུ་ཐབས་གནང་རྒྱུ་ཡིན་སྐོར་གསུངས་པ་དང་འབྲེལ། ང་ཚོ་ཚང་མས་༸གོང་ས་མཆོག་གི་བཀའ་སློབ་ཁག་གང་ཐུབ་ལག་བསྟར་ཞུས་ནས་མགོན་པོ་༸གང་ཉིད་མཆོག་གིས་འདོན་གནང་མཛད་པའི་ལམ་ཐོག་ཤར་སྐྱོད་གནང་དགོས་པའི་སྐུལ་མ་གནང་བར་མ་ཟད། དེ་རིང་ཁོང་གིས་ཞལ་པར་བརྒྱུད་ནས་༸གོང་ས་མཆོག་ལ་དགའ་བསུའི་འཚམས་འདྲི་ཞུས་སྐབས་མགོན་པོ་༸གང་ཉིད་གིས་ད་དུང་དགུང་ལོ་ ༢༥ ནས་ ༣༠ བར་བཞུགས་རྒྱུའི་ཞལ་བཞེས་མཛད་པ་བཞིན་བློན་ཆེན་མཆོག་གིས་ཀྱང་༸གོང་ས་མཆོག་༸སྐུ་ཚེ་བསྐལ་བརྒྱར་བརྟན་པའི་ཐུགས་སྨོན་ཞུ་བཞིན་ཡོད་སྐོར་གསུངས་སོང་།དེ་རིང་མཛད་སྒོའི་ཐོག་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་ཕེབས་ཐུབ་མེད་སྟབས་ཁོང་གི་ཚབ་ཏུ་མངའ་སྡེའི་ཤིང་ནགས་བློན་ཆེན་སྐུ་ཞབས་ Rakesh Pathania མཆོག་གིས་གསུང་བཤད་གནང་བར་༸གོང་ས་མཆོག་ཧི་མཱ་ཅལ་ནང་དུ་༸སྐུ་བཞུགས་མཛད་པ་དེ་ང་ཚོ་ཧི་མཱ་ཅལ་མང་ཚོགས་ཀྱི་བསོད་ནམས་ཡིན་པ་དང་དེ་རིང་སྲིད་སྐྱོང་མཆོག་གིས་བོད་མིའི་འཐབ་རྩོད་དང་༸གོང་ས་མཆོག་གི་མཛད་རྗེས་སྐོར་ངོ་སྤྲོད་གནང་བ་ལྟར་ཧི་མཱ་ཅལ་མངའ་སྡེའི་སློབ་གྲྭ་ཁག་གི་བསླབ་གཞིའི་ནང་དུ་གཏན་འཇོག་གནང་སྟེ་མང་ཚོགས་ལ་༸གོང་ས་མཆོག་གི་རླབས་ཆེན་གྱི་བློས་བཏང་དང་མཛད་འཕྲིན་སྐོར་གོ་རྟོགས་སྤེལ་རྒྱུ་ཡིན་པ་དང་། རྒྱ་གར་གཞུང་མང་ཡོངས་ནས་བོད་མིའི་རང་བཙན་འཐབ་རྩོད་ལ་དུས་རྟག་ཏུ་རྒྱབ་སྐྱོར་ཡོད་ཅེས་གསུངས་སོང་།དེ་བཞིན་དེ་རིང་གི་དམིགས་བསལ་སྐུ་མགོན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རྒྱལ་སྤྱིའི་གློག་བརྙན་འཁྲབ་བསྟོན་པ་གྲགས་ཅན་ Richard Gere ལགས་༸གོང་ས་༸སྐྱབས་མགོན་ཆེན་པོ་མཆོག་ལྟ་བུའི་སྐྱེས་ཆེན་དམ་པ་ཞིག་བོད་མིའི་ལྷན་དུ་ཡོད་པ་འདི་ནི་ཧ་ཅང་གི་བསྐལ་བཟང་ཡིན་པ་དང་། ༸གོང་ས་མཆོག་དགུང་གྲངས་ ༡༡༣ འམ་ ༡༥༠ བར་དུ་བཞུགས་སྲིད་ཀྱང་༸གོང་ས་མཆོག་མེད་པའི་དུས་སྐབས་ལ་བོད་མི་རྣམས་ཕན་ཚུན་མཉམ་རུབ་ཐོག་ནས་བོད་ཀྱི་རང་དབང་དང་བདེན་པའི་འཐབ་རྩོད་ཀྱི་འགན་ཁུར་དགོས་ཞེས་གསུངས་སོང་།དེ་བཞིན་དེ་རིང་༸རྒྱལ་བའི་༸སྐུའི་འཁྲུངས་སྐར་དང་བསྟུན་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་དབུ་ཁྲིད་རྒན་གྲས་ Indresh Kumar ལགས་ཀྱིས་༸གོང་ས་མཆོག་གི་༸སྐུའི་འཁྲུངས་སྐར་ལ་དྲན་རྟེན་ཆེད་ཕྱག་རྟགས་ཤིག་སྐུར་ཡོད་པ་དེ་མཛད་སྒོའི་ཐོག་ཆེད་ཕེབས་གནང་བའི་རྒྱ་གར་ BJP ཆབ་སྲིད་ཚོགས་པའི་དབུ་ཁྲིད་སྐུ་ཚབ་ Vijay Jolly མཆོག་གིས་སྲིད་སྐྱོང་མཆོག་ལ་ཕུལ་སོང་།དེ་རིང་བཞུགས་སྒར་དྷརྨ་སཱ་ལཱ་གཙོས་བོད་མི་གནས་སྡོད་ས་གནས་གང་སར་དགའ་སྤྲོའི་རྣམ་པའི་ཐོག་ནས་༸སྐུའི་འཁྲུངས་སྐར་སྲུང་བརྩི་ཞུ་བཞིན་པའི་ཁྲོད་དྷ་སར་གཞུང་འབྲེལ་མཛད་སྒོའི་ཐོག་མང་ཚོགས་ལ་རྟེན་འབྲེལ་ཚུལ་དུ་མངར་ཟས་ཞལ་གྲངས་ ༡༡༣ འགོད་འགྲེམས་གནང་བ་དང་། ཉིན་དགུང་ཞལ་ལག་གོ་སྒྲིག་སོགས་བརྒྱུད་ནས་ཉིན་མོ་དེ་སྲུང་བརྩི་ཞུས་ཡོད་པར་མ་ཟད། ཕྱི་དྲོ་ཕྱག་ཚོད་ ༥ བར་བོད་ཀྱི་ཐུན་མོང་མ་ཡིན་པའི་རྐང་བྲོ་གླུང་གཞས་སོགས་གོ་སྒྲིག་གནང་འདུག

ཁ་སང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་མཐའ་མའི་ལས་རིམ་ཐོག་གྲོས་ཚོགས་ནས་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༢་༢༠༢༣ ལོའི་སྔོན་རྩིས་འགྲོ་གྲོན་ཁྱོན་ཧིན་སྒོར་ས་ཡ་ ༢༥༤༢་༢༡ ཙམ་གཏན་འབེབས་གནང་བ་དང་འབྲེལ་ནས་གྲོས་ཚོགས་མཇུག་སྒྲིལ་གནང་སོང་། ཉེ་སྔོན་འཛིན་སྐྱོང་བཀའ་ཤག་གིས་ལས་ཉིན་དང་པོའི་ཐོག་ཧིན་སྒོར་ས་ཡ་ ༢༥༣༥་༡༤ ཡི་སྔོན་རྩིས་འཆར་འབུལ་ཞུས་པའི་ཐོག་ཆབ་སྲིད་ལས་འགུལ་སྤེལ་རྒྱུ་དང་རུ་སོག་སྐུ་ཚབ་དོན་གཅོད་ལས་ཁུངས་ཀྱི་འགྲོ་གྲོན་གཉིས་ལ་སྤར་ཆ་ཕྲན་བུ་དང་གཅོག་ཆ་གང་ཡང་མེད་པར་གཏན་འབེབས་གནང་སོང་། ཁ་སང་སྔ་དྲོའི་ལས་རིམ་ནང་ལས་ཁུངས་གོ་རིམ་བཞིན་སྔོན་རྩིས་ཐོག་བགྲོ་གླེང་དང་ལན་འདེབས་གསལ་བཤད། དེ་བཞིན་གངས་ལྗོངས་དཔལ་འབྱོར་ཞབས་ཞུ་ཁང་དང་སྣར་ཐང་དཔར་ཁང་སྒོ་བརྒྱབ་རྒྱུ་མིན་པ་བཅས་ཀྱི་གནད་དོན་ཐོག་གཞུང་འབྲེལ་གྲོས་ཆོད་ཡིག་ཆ་ཁག་ཅིག་གཏན་འབེབས་གནང་བ་དང་།  དེ་བཞིན་ཉེ་སྔོན་བཀའ་ཤག་གི་གསལ་བཤད་ཐོག་བགྲོ་གླེང་ཟིན་པར་སྲིད་སྐྱོང་མཆོག་གིས་ལན་འདེབས་གསལ་བཤད་གནང་ཟིན་རྗེས། གྲོས་ཚོགས་ནས་རྩིས་ལོ་ ༢༠༢༢་༢༠༢༣ ལོའི་སྔོན་རྩིས་འགྲོ་གྲོན་གཏན་འབེབས་སོགས་ཀྱི་ལས་རིམ་ཡོངས་སུ་གྲུབ་པ་དང་འབྲེལ་ཏེ། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པ་མཇུག་སྒྲིལ་གནང་ཡོད། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་མཇུག་བསྡོམས་གསུང་བཤད་ནང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཕྱི་ལོ་ ༢༠༢༢ ཟླ་ ༣ ཚེས་ ༣༠ རེས་གཟའ་ལྷག་པ་ཉིན་བོད་ཁམས་སྐྱེ་རྒུ་མདོ་རུ་དམག་སྒར་གྱི་ཉེ་འགྲམ་དུ་བོད་མི་ཞིག་གིས་རང་ལུས་མེར་སྲེག་བཏང་བའི་གནད་དོན་བྱུང་འདུག དེ་བཞིན་གྲོས་ཚོགས་ཚོགས་དུས་གཉིས་པའི་སྐབས་ཏེ་ཕྱི་ཟླ་ ༢ ཚེས་ ༢༥ ཉིན་གཞས་པ་ཚེ་དབང་ནོར་བུ་ལགས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་བའི་གནས་སྟངས་བར་ང་ཚོས་མྱ་ངན་གུས་འདུད་ཀྱི་གྲོས་འཆར་ཞིག་འཁྱེར་ཡོད་པའི་གནད་དོན་ལུང་འདྲེན་དང་སྦྲགས། ཁོང་རྣམ་པས་བོད་བསྟན་སྲིད་ཀྱི་ཆེད་དུ་བློས་བཏང་ཆེན་པོ་གནང་ཡོད་སྟབས་ང་ཚོས་ཁོང་རྣམ་པའི་བློས་བཏང་དེ་དག་དོན་དང་ལྡན་པ་ཡོང་བར་ཤོག་ཅེས་དང་། ལྷག་དོན་སོ་སོའི་ངོས་ནས་བོད་སྲིད་ཀྱི་ཆེད་དུ་ལྷག་བསམ་འཇུག་པ་ཆེར་སྐྱེད་ཀྱི་ཐོག་ནས་ཞབས་འདེགས་ཞུ་ཐུབ་དགོས་རྒྱུའི་ཆོད་སེམས་དང་དམ་བཅའ་ལེན་ཐུབ་པ་ཡིན་ན་མྱ་ངན་གུས་འདུད་ཀྱི་གྲོས་ཆོད་ཡིན་ནའང་འདྲ་གདུང་སེམས་མཉམ་སྐྱེ་ཡིན་ནའང་འདྲ་དོན་དང་ལྡན་པ་ཆགས་ངེས་ཡིན་པ་གསུངས་ཡོད།གྲོས་ཚོགས་ཀྱི་ལས་རིམ་ཐོག་ནས་ཆེས་ཐོག་མར་བོད་ནང་གི་ཁོར་ཡུག་ཛ་དྲག་གནས་སྟངས་ཐོག་གཞུང་འབྲེལ་གྲོས་ཆོད་གྲོས་འཆར་ཞིག་བསྣམས་ཡོད་པ་དང་གྲོས་ཆོད་དོན་ཚན་ལྔ་གྲོས་ཚོགས་ར་བར་སྤྱི་མོས་ཐོག་བཞག་ཐུབ་པ་བྱུང་བ་དེ་ལ་དམིགས་བསལ་དགའ་ཚོར་ཆེན་པོ་བྱུང་ཞེས་གསུངས་པ་དང་ཆབས་ཅིག ཁོར་ཡུག་ཐོག་ཉམས་ཞིབ་ཚད་ལྡན་མེད་པ་དང་ལྷག་པར་ཞིབ་འཇུག་གནང་སྟངས་ལ་མ་འདང་བའི་ཆ་དེ་འདྲ་བྱུང་ཡོད་པས་ཡིག་ཆ་བཟོ་བའི་སྐབས་དཀའ་ངལ་འཕྲད་བརྟེན་སླད་མར་བོད་ཀྱི་ཁོར་ཡུག་དང་འབྲེལ་བའི་ཞིབ་འཇུག་ཚད་ལྡན་ཡོང་ཐུབས་སུ་འབད་བརྩོན་ཞུ་གལ་ཡིན་སྐོར་གསུངས་སོང་།དེ་བཞིན་ཐེངས་འདིའི་གྲོས་ཚོགས་ཐོག་དཔལ་འབྱོར་བཀའ་བློན་མཆོག་གིས་བོད་མིའི་སྒྲིག་འཛུགས་དབུས་དང་ཁྱབ་ཁོངས་ལས་ཁུངས་ཁག་གི་འདས་པའི་ལོ་ངོ་ ༢༠ རིང་གི་མ་དངུལ་གནས་བབ་དང་འབྲེལ་བའི་སྙན་ཐོ་ཞིག་བསྣམས་ཡོད་པ་དང་འབྲེལ། དེའི་ཐོག་ནས་བོད་མིའི་སྒྲིག་འཛུགས་ཀྱི་དཔལ་འབྱོར་གནས་བབ་གང་ཙམ་གསལ་པོ་ཆགས་སོང་བསམ་གྱི་ཡོད་ཅེས་གསུངས་པ་དང་། དེ་བཞིན་དེ་ཚོའི་ཐོག་ནས་གྲོས་ཚོགས་ར་བའི་ནང་བློ་སྐྱེད་འཐོབ་རྒྱུ་ཞིག་དང་ལྷག་པར་རྒྱ་ཆེ་མང་ཚོགས་ཀྱི་ཐོག་ནས་ཐུགས་སྣང་གནང་མཁན་ཡིན་ན་ཏན་ཏན་ཐུགས་ཕན་གསོ་སོང་བསམ་གྱི་ཡོད་ཅེས་སོགས་ཀྱི་གསུང་བཤད་གནང་ཡོད། གཞི་རྩའི་ཐེངས་འདིའི་སྔོན་རྩིས་གྲོས་ཚོགས་དེ་ཟླ་ ༣ ཚེས་ ༢༡ ནས་དབུ་འཛུགས་གནང་ཡོད་པ་དང་། ཁ་སང་སྲིད་སྐྱོང་སྤེན་པ་ཚེ་རིང་མཆོག་གིས་གྲོས་ཚོགས་སུ་སྤྱི་འཐུས་མང་པོ་ཞིག་གིས་ཆ་ཤས་བཞེས་ཏེ་བཀའ་འདྲི་ཞུས་པ་ཁག་ལ་ལན་འདེབས་གསལ་བཤད་གནང་བའི་ཁྲོད། ཐེངས་འདིའི་གྲོས་ཚོགས་ཐོག་སྤྱི་འཐུས་རྣམ་པས་ལྷག་བསམ་རྣམ་དག་གི་ཐོག་ནས་ཆ་ཤས་བཞེས་པ་མ་ཟད་ཐུགས་ཁུར་ཆེ་བཞེས་གནང་བར་ཐུགས་རྗེ་ཆེ་ཞེས་གསུངས་པ་དང་སྦྲགས། མ་འོངས་ཟླ་བ་དྲུག་གི་རྗེས་སུ་བསྐྱར་དུ་མཇལ་སྐབས་འཛིན་སྐྱོང་གི་ལས་དོན་བྱེད་ཕྱོགས་ལ་ལེགས་སྤེལ་ཉེས་འགོག་གི་ལམ་སྟོན་གནང་རོགས་ཞེས་དང་ཉེས་སྐྱོན་གང་བྱུང་བར་དགོངས་སེལ་ཞུ་རྒྱུ་དང་སླར་མི་ཡོང་བར་འབད་བརྩོན་གནང་བ་བརྒྱུད་གྲོས་ཚོགས་ཀྱི་ལས་དོན་རྣམས་ལ་མིག་དཔེ་འོས་པ་ཞིག་བཟོས་ནས་མང་ཚོགས་ཀྱི་ངོས་ནས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་པོར་ཡིད་ཆེས་གནང་བའི་རེ་བ་དང་སྨོན་འདུན་ཡོད་ཅེས་གསུངས་ཡོད།

དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་བཅུ་པའམ་མཐའ་མའི་ཐོག་སྤྱི་འཐུས་རྣམ་པས་མང་མོས་ཐོག་དེ་སྔ་བཀའ་ཤག་སྐབས་གོང་མས་བཙུགས་པའི་གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་རྟོག་ཞིབ་སླད་གྲོས་ཚོགས་ཀྱི་ཚོགས་ཆུང་ཞིག་འཛུགས་རྒྱུའི་གྲོས་ཆོད་གཏན་འབེབས་གནང་སོང་། གྲོས་ཚོགས་ཀྱི་ཚོགས་དུས་གཉིས་པའི་ཐོག་སྲིད་སྐྱོང་དང་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གི་དཔལ་འབྱོར་གྱི་གནས་སྟངས་ལ་བལྟས་ན་གཡང་མ་གཏོགས་མཐོང་གི་མེད་སྟབས་མ་འོངས་པར་ཁུངས་འཁྱོལ་རྒྱུ་ཁག་པོ་ཞིག་ཏུ་གཟིགས་ཀྱི་ཡོད་པར་འགྲེལ་བརྗོད་དང་འབྲེལ། ལས་གཞི་དེ་མུ་མཐུད་ནས་མཇུག་སྐྱོང་གནང་རྒྱུར་གྲོས་ཚོགས་ནས་ཚོགས་ཆུང་ཞིག་ཆེད་འཛུགས་ཀྱིས་ཞིབ་འཇུག་མཐིལ་ཕྱིན་པ་གནང་སྟེ་ལམ་སྟོན་གནང་ཚེ་ལས་གཞི་མཇུག་སྐྱོང་ཞུ་རྒྱུ་ཡིན་ཞེས་གསུངས་ཡོད་པ་ལྟར་གྲོས་ཚོགས་ཚོགས་དུས་གཉིས་པ་དང་གསུམ་པའི་ཐོག་སྤྱི་འཐུས་རྣམ་པས་གང་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ཐད་ལ་དོགས་འདྲི་དང་དགོངས་འཆར་མང་དག་ཅིག་གནང་ཡོད་པ་དང་། དེ་རིང་སྤྱི་འཐུས་རྒྱུན་ལས་ནས་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ལ་རྟོག་ཞིབ་སླད་ཞིབ་འཇུག་ཚོགས་ཆུང་འཛུགས་རྒྱུའི་གཞུང་འབྲེལ་གྲོས་ཆོད་གྲོས་འཆར་ཕེབས་དོན་བཞིན་མང་མོས་ཐོག་ནས་གཏན་འབེབས་གནང་སོང་། གཞུང་འབྲེལ་གྲོས་ཆོད་ནང་ཚོགས་གཙོ་སྦྲེལ་པོས་ཚོགས་མི་ལྔ་ལས་གྲུབ་པའི་ཚོགས་ཆུང་ཞིག་བསྐོ་འཛུགས་དང་ཚོགས་ཆུང་ནས་གནས་ཡུལ་གཞུང་གི་ཁྲིམས་ལུགས་དང་མ་འཛུགས་བྱ་ཕྱོགས། ད་ལྟའི་གནས་བབ། མ་འོངས་དམིགས་ཡུལ་གཞིར་བཟུང་ཡོང་ཐུབ་མིན་གྱི་སྙན་ཐོ་ཁ་གསལ་ཞིག་འདོན་སྤེལ་ཐུབ་པ་དགོས་རྒྱུ་མ་ཟད། གྲུབ་དོན་སྙན་ཐོ་དེ་སྐབས་ ༡༧ པའི་གྲོས་ཚོགས་ཚོགས་དུས་ ༤ པའི་གོང་སྤྱི་འཐུས་ཚོགས་དྲུང་ལས་ཁུངས་སུ་འབུལ་ཐུབ་པ་དགོས་རྒྱུ། ཚོགས་ཆུང་གི་སྙན་ཐོ་གཞིར་བཟུང་གྲོས་ཚོགས་ནས་ཐག་གཅོད་ཁ་གསལ་ཞིག་མ་འབྱུང་བར་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན་རྣམས་མུ་མཐུད་གནང་དགོས་པ་བཅས་འཁོད་ཡོད་པ་རེད། སྐབས་དེར་སྤྱི་འཐུས་རྣམ་པས་ཞིབ་འཇུག་ཚོགས་ཆུང་ནང་སྐད་ཡིག་དང་དཔལ་འབྱོར་རིག་པའི་ཐད་རྒྱུས་མངའ་ཡོད་མཁན་རེ་ཟུང་དང་ཆེད་ལས་མཁས་པའི་མི་སྣ་གླ་དགོས་སྐོར། དེ་བཞིན་ཞིབ་འཇུག་གནང་སྐབས་གངས་ལྗོངས་དཔལ་འབྱོར་ཞབས་ཞུ་ཁང་གི་འབྲེལ་ཡོད་ལས་བྱེད་ཚོའི་ལྟ་ཚུལ་སོགས་ཕྱོགས་ཡོངས་ཀྱི་གནད་དོན་ལ་རྟོག་ཞིབ་གནང་གལ་ཡིན་པར་གསུང་མཁན་བྱུང་བ་མ་ཟད།  སྤྱི་འཐུས་གཅིག་གིས་སྲིད་སྐྱོང་མཆོག་ནས་གངས་ལྗོངས་ཞབས་ཞུ་ཁང་མུ་མཐུད་གནས་པར་ཐུགས་འདོད་གནང་གི་མེད་པ་གསལ་པོ་ཡིན་པ་དང་ཕྱོགས་གང་ནས་བལྟས་ཀྱང་གཡང་མཐོང་གི་འདུག་ཅེས་གསུངས་པ་ལྟར། ཨུ་ཚུགས་ཐོག་ནས་ཚོགས་ཆུང་ཆེད་འཛུགས་གནང་དང་མ་གནང་གང་ཡང་གཟིགས་ཀྱི་མེད་པ་སོགས་ཀྱི་དགོངས་ཚུལ་གནང་ཡོད། སྐབས་དེར་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྐུ་ཞབས་སྤེན་པ་ཚེ་རིང་མཆོག་གིས་ཞིབ་འཇུག་ཚོགས་ཆུང་དེ་སྔོན་གླེང་ནང་འཁོད་པ་ལྟར་སྤྱི་འཐུས་ལྷན་ཚོགས་ཀྱི་ཚོགས་ཆུང་ཞེས་གསལ་བ་ལྟར་ཚོགས་ཆུང་དེ་སྤྱི་འཐུས་ལྷན་ཚོགས་རང་གི་ཚོགས་ཆུང་ཆེད་འཛུགས་གནང་ཐུབ་ཚེ་དགེ་མཚན་དང་ཚོགས་ཆུང་ནས་མཁས་པའི་དྲུང་ནས་སློབ་སྟོན་ཞུ་ཆོག་སྐོར་གསུངས་ཡོད་ཀྱང་། ཚོགས་གཙོ་མཆོག་གིས་ཚོགས་ཆུང་ནང་སྤྱི་འཐུས་ཁོ་ན་མིན་པར་ཆེད་ལས་པ་སོགས་ཡོད་ན་ཆོག་པར་འགྲེལ་བརྗོད་གནང་བ་དང་གྲོས་ཆོད་དེར་མང་མོས་ཀྱིས་གཏན་འབེབས་གནང་ཡོད། གཞན་ཡང་ཐེངས་འདིའི་གྲོས་ཚོགས་ཐོག་དཔལ་འབྱོར་བཀའ་བློན་གྱི་སྔོན་རྩིས་གསུང་བཤད་ནང་ཕྱི་དྲིལ་ལས་ཁུགས་ཁྱབ་ཁོངས་སྣར་ཐང་དཔར་ཁང་འདས་པའི་ལོ་ཤས་ནས་བྱུང་སོང་ཁ་མ་འདུམ་པའི་གནས་སྟངས་སོགས་ཀྱི་རྐྱེན་པས་སྒོ་བརྒྱུབ་རྒྱུ་སྐོར་གསལ་བ་ལྟར་སྤྱི་འཐུས་རྣམ་པས་དོགས་འདྲི་དང་བགྲོ་གླེང་ཤུགས་ཆེ་གནང་བ་བཞིན། དེ་རིང་གྲོས་ཚོགས་ཀྱི་ལས་ཉིན་མཐའ་མའི་ཐོག་སྣར་ཐང་དཔར་ཁང་དང་འབྲེལ་གཞུང་འབྲེལ་གྲོས་ཆོད་གྲོས་འཆར་ཕེབས་ཡོད་པ་དང་། སླད་མར་སྣར་ཐང་དཔར་ཁང་གི་ལས་དོན་ཡར་རྒྱས་ཚགས་ཚུད་དུ་བཏང་ནས་རྒྱུན་གནས་ཐུབ་དགོས་པ་དེ་ལོ་རྒྱུས་དང་ལས་དོན་དངོས་ཀྱི་ཐོག་ནས་དགོས་མཁོ་གལ་ཆེར་གྱུར་ཡོད་སྟབས། སྣར་ཐང་དཔར་ཁང་དེ་ཉིད་སྒོ་བརྒྱབ་མི་དགོས་པར་དཔར་སྐྲུན་ལས་རིགས་དང་འབྲེལ་བའི་ཆེད་ལས་མི་སྣ་གསོ་སྐྱོང་དང་ཕྱོགས་ཡོངས་ནས་ལས་དོན་ཚགས་ཚུད་ཡོང་ཐབས་དགོས་ཞེས་གསལ་ཡོད་པ་དེ་མང་མོས་ཀྱིས་གཏན་འབེབས་གནང་ཡོད།སྤྱི་འཐུས་ཁག་ཅིག་ནས་སྣར་ཐང་དཔར་ཁང་དང་འབྲེལ་བའི་གྲོས་ཆོད་དེར་དགག་པ་གནང་སོང་བ་དེ་ལྟར་ནའང་ལ་ལས་དཔར་ཁང་གི་མིང་དེ་གལ་ཆེན་པོ་ཆགས་ཡོད་སྐོར་གསུངས་པ་མ་ཟད། གཞན་ཁག་ཅིག་གིས་སྣར་ཐང་དཔར་ཁང་སྒོ་བརྒྱབ་པ་ཡིན་ན་དཔར་སྐྲུན་གྱི་ལས་གཞི་ཁག་ཕྱི་ཕྱོགས་ལ་སྤྲད་དགོས་པར་བརྟེན་འགྲོ་གྲོན་ལའང་དགོངས་པ་བཞེས་དགོས་སྐོར་སོགས་ཀྱི་དགོངས་ཚུལ་ཕུལ་ཡོད། ཐེངས་འདིའི་གྲོས་ཚོགས་སུ་བཀའ་ཤག་གི་ངོས་ནས་དེ་སྔོན་སྤྱི་འཐུས་ལྷན་ཚོགས་དང་དེའི་རྒྱུན་ལས་ཚུགས་མ་ཐུབ་པའི་གནས་སྟངས་བྱུང་བའི་དུས་ཡུན་ནང་ཚོགས་དྲུང་ལས་ཁུངས་བརྒྱུད་བར་བརྒལ་བཀའ་འཁྲོལ་ཞུ་ཕྱོགས་དང་འབྲེལ་བའི་གནད་དོན་ལ་དོགས་འདྲི་ཕེབས་ཡོད་པ་ལྟར། དེ་རིང་བཀའ་ཤག་གིས་བར་བརྒལ་བཀའ་འཁྲོལ་ཐད་གཞུང་འབྲེལ་གྲོས་ཆོད་གྲོས་འཆར་བསྣམས་ཡོད་པ་དང་། དེའི་ནང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་དང་དེའི་རྒྱུན་ལས་ཚུགས་མ་ཐུབ་པའི་གནས་སྟངས་བྱུང་བའི་དུས་ཡུན་ནང་ཚོགས་དྲུང་ལས་ཁུངས་བརྒྱུད་བར་བརྒལ་བཀའ་འཁྲོལ་ཞུས་ཟིན་པའི་བྱུང་ཧིན་སྒོར་ ༢༧༠།༣༥༦།༦༨༣ དང་སོང་ཧིན་སྒོར་ ༢༠༣།༩༥༥།༢༢༩ གྲོས་ཚོགས་སུ་སྙན་སེང་བྱུང་བ་བཞིན་བཀའ་འཁྲོལ་ཐོབ་པར་ངོས་འཛིན་བྱ་རྒྱུའི་གྲོས་ཆོད་གྲོས་འཆར་བཏོན་པར་སྤྱི་འཐུས་ཁག་གཅིག་ནས་སྤྱི་འཐུས་རྒྱུན་ལས་མེད་པའི་སྐབས་བར་བརྒལ་བཀའ་འཁྲོལ་ཞུས་ཡིན་ཟེར་བ་དེ་ཁྲིམས་མཐུན་ཞིག་ལ་ངོས་འཛིན་གནང་གི་མེད་ཅེས་དགག་པ་གནང་མཁན་བྱུང་ཡང་གྲོས་ཆོད་དེ་མང་མོས་ཀྱིས་གཏན་འབེབས་གནང་སོང་། པར་བདག་དབང་བོད་མིའི་སྒྲིག་འཛུགས།

དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་གསུམ་པའི་ཉིན་མཐའ་མའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གཞུང་འབྲེལ་གསལ་བཤད་ཐོག་ཕེབས་པའི་སྤྱི་འཐུས་རྣམ་པའི་དོགས་འདྲི་ཁག་ལ་ལན་འདེབས་གནང་ཡོད། སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་བརྒྱད་པའི་ཐོག་གྲོས་ཚོགས་འཐུས་མི་རྣམས་ནས་སྲིད་སྐྱོང་མཆོག་གིས་གྲོས་ཚོགས་སུ་ཕུལ་བའི་སྐབས་ ༡༦ པའི་བཀའ་བཤག་གི་གཞུང་འབྲེལ་གསལ་བཤད་ལས་རྒྱ་ནག་གི་སྲིད་འཛིན་གྱི་མིང་ཐོག་ལ་བོད་ནང་གི་ཛ་དྲག་གནས་སྟངས་སྐོར་གྱི་དྲན་ཐོ་ཡིག་ཆ་ཞིག་འབུལ་རྒྱུའི་གྲ་སྒྲིག་གནང་ཡོད་ཀྱང་། གནས་སྐབས་རིང་ཕྱིར་འཐེན་ཞུས་ནས་དུས་སྟབས་འགྲིག་པ་ཞིག་འབྱུང་ཚེ་འབུལ་འཆར་ཡོད་ཅེས་གསལ་བ་ལྟར་སྤྱི་འཐུས་མི་ཉུང་བ་ཞིག་ནས་དྲན་ཐོ་ཡིག་ཆ་དེ་རྒྱ་ནག་ལ་མ་ཕུལ་བའི་སྔོན་ལ་གྲོས་ཚོགས་སུ་འབུལ་ལམ་ཞུ་དགོས་པ་དང་ནང་དོན་གང་དག་བཀོད་ཡོད་མེད་སོགས་ཀྱི་བཀའ་འདྲི་ཞུས་ཡོད་པ་ལྟར། དེ་རིང་སྲིད་སྐྱོང་མཆོག་གིས་ལན་འདེབས་གསལ་བཤད་གནང་སྐབས་སྐབས་ ༡༦ པའི་བཀའ་ཤག་གི་ངོས་ནས་བོད་རྒྱའི་གནད་དོན་སེལ་ཆེད་གྲོས་མོལ་འམ་འབྲེལ་མོལ་གནང་རྒྱུའི་འདོད་པ་ཡོད་པ་དང་། བོད་རྒྱའི་དཀའ་རྙོག་ནི་ཞི་བའི་སྒོ་ནས་སེལ་དགོས་པར་གསལ་སྟོན་གནང་སྟེ། རྒྱ་ནག་གི་འགོ་ཁྲིད་ལ་དྲན་ཐོ་ཡིག་ཆ་འབུལ་འཆར་ཡོད་པ་དེ་ནི། རྒྱ་ནག་གཞུང་གིས་ད་བར་བོད་ནང་སྲིད་བྱུས་འཛིན་ཕྱོགས་དང་དེ་དག་ལ་འགྱུར་བ་གང་དག་བཏང་ཡོད་པ་ཐེར་འདོན་གྱིས་སྲིད་བྱུས་དེ་དག་གིས་བོད་མི་ཙམ་མ་ཚད་པར་རྒྱ་ནག་གཞུང་ལ་ཡང་ཕན་ཐོགས་གང་ཡང་མེད་པར་གསལ་སྟོན་དང་། སྲིད་བྱུས་དེ་དག་མཚམས་འཇོག་དགོས་པ་དང་དེ་ལྟར་མ་འབྱུང་ཚེ་སྲིད་བྱུས་དེ་དག་ལ་འགྱུར་བ་གཏང་དགོས་པ་བཅས་རྒྱ་ནག་གཞུང་ལ་གོ་བརྡ་སྤྲད་ཕྱིར་ཡིན་ཞེས་གསུངས་པ་དང་འབྲེལ། དེའང་དེ་སྔ་བོད་མིའི་ཕྱོགས་ནས་རྒྱ་ནག་ལ་ཕུལ་བའི་བསམ་འཆར་ཡིག་ཆ་སོགས་དང་འབྲེལ་བ་གང་ཡང་མེད་སྐོར་གསལ་བཤད་གནང་སོང་། ཁོང་གིས་དྲན་ཐོ་ཡིག་ཆ་དེ་རྒྱ་ནག་གི་འགོ་ཁྲིད་ལ་མ་ཕུལ་བའི་སྔོན་ལ་གྲོས་ཚོགས་སུ་འབུལ་ལམ་ཞུ་དགོས་པ་དང་ནང་དོན་གང་བཀོད་ཡོད་མེད་སོགས་དང་འབྲེལ་བའི་དྲི་བ་དང་འབྲེལ་ཏེ་དྲན་ཐོ་དེ་གཏན་འབེབས་ཀྱིས་རྒྱ་ནག་གི་འགོ་ཁྲིད་ལ་མ་ཕུལ་གོང་དུ་བཀའ་ཤག་ལ་སྙན་སེང་ཞུ་རྒྱུ་དང་། སྤྱིར་གསང་རྒྱ་སོགས་ཀྱི་གནད་དོན་ལ་གཞིགས་ཏེ་གནད་དོན་ཁག་ཅིག་གྲོས་ཚོགས་སུ་འབུལ་ལམ་ཞུ་སྲོལ་མེད་པ་དེ་ལྟར་ཡང་། མ་འོངས་པར་རྒྱ་ནག་དང་ལྷན་དུ་ཞི་མོལ་འམ་གྲོས་མོལ་ཡོང་རྒྱུའི་རེ་བ་ཡོད་པའི་དུས་ཤིག་དང་འབབ་ས་གཅིག་ལ་བསླེབས་ཚེ། གྲོས་ཚོགས་ལ་གོ་བསྡུར་ཞུ་རྒྱུ་ཡིན་ཞེས་གསུངས་ཡོད། དེ་བཞིན་སྤྱི་འཐུས་ཁག་ཅིག་ནས་དབུ་མའི་ལམ་གྱི་སྲིད་བྱུས་ལ་འགྱུར་བ་གཏོང་རྒྱུ་ཡིན་མིན་གྱི་ཐོག་ལ་བཀའ་འདྲི་ཞུས་པར་སྲིད་སྐྱོང་མཆོག་གིས་དབུ་མའི་ལམ་གྱི་སྲིད་བྱུས་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་པ་བླ་ན་མེད་པ་དང་། གྲོས་ཚོགས་ཀྱིས་གཏན་ལ་ཕབ་པའི་སྲིད་བྱུས་ཤིག་ཡིན་སྟབས། བཀའ་ཤག་ལ་འགྱུར་བ་གཏོང་རྒྱུའི་དབང་ཚད་མེད་སྐོར་གསུངས་པ་དང་འབྲེལ། ད་ལྟའི་བཀའ་ཤག་གི་ངོས་ནས་དབུ་མའི་ལམ་གྱི་སྲིད་བྱུས་ལ་འགྱུར་བ་གཏོང་རྒྱུའི་དགོངས་པ་རྩ་བ་མེད་ཀྱང་། མ་འོངས་པར་ཐབས་བྱུས་ལ་འགྱུར་བ་དགོས་མིན་ཐོག་དགོངས་བཞེས་རྒྱུ་ཡིན་པར་གསུངས་ཡོད། དེ་བཞིན་སྲིད་སྐྱོང་མཆོག་གིས་སྤྱི་འཐུས་ཁག་ཅིག་ནས་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་རྒྱུའི་གདེང་ཚོད་ཇི་ཙམ་ཡོད་མེད་ཀྱི་བཀའ་འདྲི་ཞུས་པ་དང་འབྲེལ་ནས་ཁོང་སྐུ་ཉིད་ནས་དེ་སྔ་སྲིད་སྐྱོང་གི་འོས་མིར་བཞེངས་སྐབས་སུ་༸གོང་ས་མཆོག་རྒྱ་ནག་ལ་གདན་འདྲེན་ཞུ་ཐབས་ཞུ་རྒྱུ་ཡིན་སྐོར་གསུངས་ཡོད་པ་དང་། མགོན་པོ་༸གང་ཉིད་མཆོག་རྒྱ་ནག་ལ་གདན་འདྲེན་ཞུས་པའི་ཐོག་ནས་བོད་ཀྱི་གནད་དོན་སེལ་བར་ Roadmap འམ་ལམ་ཁ་ཞིག་འཐོན་གྱི་རེད་ཅེས་གསུངས་པ་ལུང་འདྲེན་དང་ཆབས་ཅིག སྤྱིར་བོད་ནང་གི་བོད་མི་ཚོའི་མངོན་འདོད་བཞིན་༸གོང་ས་མཆོག་བོད་ལ་གདན་འདྲེན་ཞུ་རྒྱུའི་ཐོག་འབད་རྩོན་གང་ཐུབ་ཞུ་རྒྱུ་ཡིན་ཞེས་གསུངས་སོང་། ད་ལྟའི་འཛམ་གླིང་གི་ཆབ་སྲིད་ཀྱི་འགྱུར་འགྲོས་དང་ལྷག་པར་ཧོང་ཀོང་ནང་གི་གནས་སྟངས་ཁྲོད་བོད་ལ་རེ་བ་གང་གཟིགས་ཀྱི་ཡོད་མེད་ཐོག་བཀའ་འདྲི་ཕེབས་པར་ལན་འདེབས་དང་འབྲེལ། ད་ལྟའི་རྒྱལ་སྤྱིའི་གནས་བབ་དང་རྒྱ་ནག་གི་འགོ་ཁྲིད་ཚོའི་བྱེད་ཕྱོགས་ལ་རེ་བ་གཟིགས་རྒྱུ་ཁག་པོ་ཆགས་ཡོད་ཀྱང་། རེ་བ་ཞུ་རྒྱུ་མ་གཏོགས་འདམ་ག་མེད་སྟབས་དེའི་ཐོག་མདུན་སྐྱོད་གནང་རྒྱུ་ཡིན་སྐོར་གསུངས་ཡོད།

ཉེ་ཆར་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ཐོག་ལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་འོས་མི་འདེམས་སྒྲུག་ཚོགས་ཆུང་ནས་ཐབས་ཤེས་ཡོད་རྒུ་གནང་ཡོད་ཀྱང་བཅའ་ཁྲིམས་དོན་ཚན་ ༦༣ པའི་ནང་གསལ་བའི་འོས་ཆོས་ཡོངས་སུ་ཚང་བའི་ཁྲིམས་ཞིབ་པ་ཆེ་བའི་འོས་མི་ཐོབ་མེད་པའི་གནས་སྟངས་སྙན་སེང་ཞུས་པ་དང་འབྲེལ། གྲོས་ཚོགས་ཀྱི་ཚོགས་དུས་གསུམ་པའི་ཐོག་ལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་གྲོས་ཚོགས་སུ་ཕེབས་ཡོད་པ་རེད།   འཛིན་སྐྱོང་བཀའ་ཤག་གིས་བསྣམས་པའི་ཁྲིམས་འཆར་ནང་ལ་ད་ཡོད་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣ པའི་དགོངས་དོན་ལྟར་ཁྲིམས་ཞིབ་པ་ཆེ་བའི་འོས་མི་ཐོབ་མེད་སྟབས་དོན་ཚན་དེའི་ནང་གསེས་གཉིས་པའི་ག་པ། ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་ནི་ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བའམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན། འོན་ཀྱང་བཅའ་ཁྲིམས་འདི་ཉིད་ལག་ལེན་འགོ་འཛུགས་བྱས་པ་ནས་བཟུང་ལོ་སུམ་ཅུའི་རིང་ཁྲིམས་ཞིབ་པ་ཆེ་བ་དང༌ཁྲིམས་ཞིབ་པ་གཞན་གཉིས་བཅས་བསྐོ་གཞག་དགོས་རིགས་ནང་གསེས་འདིའི་ཆ་རྐྱེན་ཁག་ལ་བསྟུན་གནང་མི་དགོས་ཞེས་ལོ་ ༣༠ དེ་ ༣༣ ལ་བསྐྱར་བཅོས་བསྣམས་ཡོད་པ་རེད།འོན་ཀྱང་དེ་རིང་སྤྱི་འཐུས་རྣམ་པས་བཙན་བྱོལ་བོད་མིའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་གཏན་འབེབས་ཀྱི་ལས་རིམ་ཐོག་ཕེབས་སྐབས་སྤྱི་འཐུས་ཁག་ཅིག་ནས་ད་ཡོད་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་གཉིས་དེ་སྔ་གྲོས་ཚོགས་ནས་འཕོ་འགྱུར་བཏང་ཟིན་པའི་གནད་དོན་ཁག་སོགས་གསུངས་ཏེ་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ལ་རྒྱབ་སྐྱོར་མེད་སྐོར་གསུང་མཁན་བྱུང་ཡོད་ལ། ཁག་ཅིག་ནས་ཁྲིམས་འཆར་བསྐྱར་བཅོས་དེ་ནི་མ་འོངས་པར་ཁྲིམས་ཞིབ་པ་བསྐོ་གཞག་དང་འབྲེལ་བ་ཡོད་པ་ལས་ཁྲིམས་པ་འཕོ་འགྱུར་དང་འབྲེལ་བའི་གྲོས་ཚོགས་ཀྱི་ཡིག་ཆ་ཨང་ ༣༩ པ་དང་འབྲེལ་བ་གང་ཡང་མེད་པ་སོགས་གསུངས་ནས་ཁྲིམས་འཆར་དེར་རྒྱབ་སྐྱོར་ཡོད་པར་གསུངས་སོང་།སྐབས་དེའི་བགྲོ་གླེང་ཁྲོད་ཕྱོགས་ཡོངས་ནས་གྲོས་ཚོགས་ཀྱི་ཡིག་ཆ་ཨང་ ༣༩ པའི་ཐོག་གླེང་གནང་མཁན་མི་ཉུང་བ་ཞིག་བྱུང་མཚམས་སུ་སྤྱི་འཐུས་ཁག་ཅིག་ནས་ལས་རིམ་རྣམ་གཞག་བསྟུད་མར་ཆེད་འདོན་གནང་བ་མ་ཟད། ཁག་ཅིག་ནས་ཚོགས་གཙོ་མཆོག་ནས་བགྲོ་གླེང་གི་གོ་སྐབས་གནང་མིན་ཐད་ཐག་གཅོད་གནང་སྟེ་ཐད་ཀར་བཅའ་ཁྲིམས་བསྐྱར་བཅོས་ཐོག་ཕེབས་དགོས་པའི་དགོངས་ཚུལ་གསུངས་པ་ལྟར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ལས་རིམ་ཐོག་ཕེབས་སྐབས་རྒྱབ་སྐྱོར་གནང་མཁན་ངོ་ཡོད་སྤྱི་འཐུས་ ༢༡ ལས་མ་བྱུང་བའི་རྐྱེན་གྱིས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་གཏན་འབེབས་གནང་ཐུབ་མེད་པ་རེད།ཁྲིམས་འཆར་དེ་གཏན་འབེབས་མ་ཐུབ་པའི་དབང་གིས་སྔར་ལོའི་ཕྱི་ཟླ་ ༡༡ ནང་ལ་ལས་ཡུན་གཙང་ནས་རྒས་ཡོལ་དུ་ཕེབས་ཟིན་པ་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་གོ་ཡུལ་མུ་མཐུད་བསྐང་མ་ཐུབ་པའི་གནས་སྟངས་ཆགས་ཀྱི་ཡོད་པ་རེད།དེ་རིང་གྲོས་ཚོགས་སུ་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་བཅུ་དྲུག་དང་བཅུ་བདུན། བཅུ་དགུ་བཅས་དང་འབྲེལ་བའི་གཞུང་འབྲེལ་སྒྲིག་གཞི་བསྐྱར་བཅོས་གཏན་འབེབས་ཀྱི་ལས་རིམ་ཐོག་ཕེབས་སྐབས་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་བཅུ་དགུ་པ། དམིགས་བསལ་བསྐོ་གཞག་གི་ནང་གསེས་ལྔ་པར་ཉེ་བའི་ཁྲིམས་ལུགས་རབ་འབྱམས་པ་ཐོན་པའི་ཆེས་མཐོའི་ཁྲིམས་ཞིབ་ཁང་གི་རིམ་པ་འོག་མའི་ཁྲིམས་ཞིབ་པ་དང་། ཁྲིམས་དྲུང་། ཆེས་མཐོའི་ཁྲིམས་ཞིབ་ཁང་གི་ཡུལ་ཁྲིམས་དཔྱད་ཞིབ་པ་བཅས་ཀྱི་ཁྲིམས་དོན་ལས་བྱེད་གསར་བསྐོ་དང་འབྲེལ་བའི་སྒྲིག་གཞི་གསར་འཇུག་ལ་གྲོས་ཚོགས་ནས་དགོས་ངེས་ཀྱི་རྒྱབ་སྐྱོར་མ་ཐོབ་པར་བརྟེན་གཏན་འབེབས་ཐུབ་མེད།   གཞན་ཡང་ལས་བྱེད་འདེམས་བསྐོ་ལྷན་ཁང་གི་སྒྲི་གཞི་དོན་ཚན་བཅུ་བདུན་པ། ཞབས་གཡར་དང་ཆོད་དོན་བསྐོ་གཞག་ཞེས་པའི་ཁོངས་སུ་བསྐོ་གཞག་གནང་བའི་ཆོད་གན་ལས་བྱེད་ཁག་ལོ་བཞིའི་མཚམས་སུ་བསྐྱར་བསྐོ་ཐེངས་གཅིག་གནང་རྒྱུའི་བསྐྱར་བཅོས་སྒྲིག་གཞི་དེ་དགོས་ངེས་ཀྱི་རྒྱབ་སྐྱོར་མ་ཐོབ་སྟབས་གཏན་འབེབས་ཐུབ་མེད་པ་དང་། དོན་ཚན་དྲུག་པ་ལས་བྱེད་གནས་སྤར་དང་བཀོད་སྒྲིག འཕོ་ལེན་ཞེས་པའི་ནང་གསེས་བརྒྱ་པ་གསར་འཇུག་དང་། དོན་ཚན་བཅུ་དགུ་པ་དམིགས་བསལ་བསྐོ་གཞག་གི་ནང་གསེས་གསུམ་པ་དང་བཞི་པའི་བསྐྱར་བཅོས་ལ་སྒྲིག་གཞི་དང་། ནང་གསེས་དྲུག་པ་ལས་ཁུངས་ཁག་ཏུ་ཁྱད་ལས་ཀྱི་ལས་རིགས་གཏན་འཇགས་སུ་དགོས་མཁོ་ཡོད་པའི་ལས་དོན་ངེས་ཅན་ཞིག་གི་སླད་དུ་ཁྱད་ལས་པ་བསྐོ་གཞག་གནང་རྒྱུའི་གསར་འཇུག་སྒྲིག་གཞི་བཅས་ལ་དགོས་ངེས་སྤྱི་འཐུས་ཀྱི་རྒྱབ་སྐྱོར་ཐོག་གཏན་འབེབས་ཐུབ་ཡོད།   སྒྲིག་གཞི་དོན་ཚན་བཅུ་དགུ་པ་དམིགས་བསལ་བསྐོ་གཞག་གི་ནང་གསེས་བཞི་པ་བསྐྱར་བཅོས་གནང་བའི་ནང་དེ་སྔ་བཀའ་ཤག་ནས་དམིགས་བསལ་ལས་བྱེད་ ༡༨ བསྐོ་གཞག་གནང་ཆོག་པ་དེ་བསྒྱུར་བཅོས་གནང་སྟེ་སྐུ་ཚབ་དོན་གཅོད་ཁང་ཁག་ཏུ་རྒྱ་རིགས་འབྲེལ་མཐུད་པ་དང་ལྟ་གྲུབ་དགེ་རྒན་གྱི་ས་མིག་ཏུ་ལས་བྱེད་བསྐོ་གཞག་དགོས་གལ་འབྱུང་ཚེ། བཀའ་ཤག་གིས་རྒྱབ་གཉེར་ཐོག་ཟུང་དྲུང་མན་གྱི་གནས་རིམ་དུ་ལོ་ལྔའི་རིང་ལས་བྱེད་དགུ་ལས་མི་མང་བ་བསྐོ་གཞག་ཆོག་པ་བཟོས་ཡོད།

སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་ ༨ དང་ ༩ ཐོག་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྔོན་རྩིས་གཏན་འབེབས་དང་འབྲེལ་ནས་ཆོས་རིག་ལས་ཁུངས་ཀྱི་ལས་དོན་བྱེད་ཕྱོགས་ཐད་ལ་བགྲོ་གླེང་ལྷུག་པོ་གནང་བའི་ཁྲོད་ཆོས་རིག་བཀའ་བློན་སྤེན་པ་ཚེ་རིང་མཆོག་གིས་གཞུང་ཆེན་རིགས་གཅིག་རྐང་འཛིན་གྱི་སྒྲིག་གཞི་བསྐྱར་བཅོས་དང་དགོངས་ཚུལ་ཕྱོགས་སྒྲིག་གནང་སྟེ་ཆོས་བརྒྱུད་ཁག་གི་སྤྱི་འཐུས་རྣམ་པ་གདན་ཞུ་ཐོག་གོ་བསྡུར་ལམ་ནས་འབད་བརྩོན་གནང་རྒྱུ་ཡིན་ཞེས་གསུངས་སོང་། དེ་རིང་གི་ཚོགས་ཐུན་གསུམ་པའི་ཐོག་གཞུང་ཆེན་རིགས་གཅིག་རྐང་འཛིན་གྱི་གནད་དོན་དང་འབྲེལ་ནས་སྤྱི་འཐུས་ཁག་ཅིག་གིས་ད་བར་ཉམས་ཞིབ་པ་ག་ཚོད་ཙམ་མཐར་སོན་པ་བྱུང་ཡོད་པ་དང་། གཞུང་ཆེན་རིགས་གཅིག་རྐང་འཛིན་གྱི་སྒྲིག་གཞིར་བསྐྱར་བཟོས་གནང་དགོས་ཞེས་གསུངས་དོན་ལྟར། ཆོས་རིག་བཀའ་བློན་མཆོག་གིས་ད་བར་རིགས་གཅིག་རྐང་འཛིན་སྐབས་གཉིས་དང་སྐབས་རེ་རེར་ཉམས་ཞིབ་པ་བཅུ་རེ་འཐོན་པ་ངོ་སྤྲོད་དང་སྦྲགས། མཐར་སོན་པའི་ཉམས་ཞིབ་པ་དགེ་བཤེས་ཁག་ཅིག་གིས་སྒྲིག་གཞི་བསྐྱར་བཅོས་དང་ཁ་སྣོན་དགོས་པ་སོགས་ཀྱི་དགོངས་ཚུལ་ཕེབས་དོན་བཞིན་ཁོང་རྣམ་པའི་དགོངས་ཚུལ་དང་གྲོས་ཚོགས་ཀྱི་དགོངས་ཚུལ་ཆ་ཚང་སྤུངས་ནས་ཕྱོགས་སྒྲིག་གནང་སྟེ་ཆོས་བརྒྱུད་ཁག་གི་སྤྱི་འཐུས་རྣམ་པ་གདན་ཞུ་ཐོག་གོ་བསྡུར་ལམ་ནས་འབད་བརྩོན་གནང་རྒྱུ་ཡིན་ཞེས་གསུངས་ཡོད། དེ་བཞིན་སྤྱི་འཐུས་གཞན་ཞིག་གིས་རིགས་གཅིག་རྐང་འཛིན་གནང་མཁན་ཚོས་ཆོས་བརྒྱུད་བྱེ་བྲག་པ་གཅིག་གི་ཐོག་ལ་ཉམས་ཞིབ་གནང་རྒྱུ་མིན་པར་ཆོས་བརྒྱུད་ཚང་མའི་ཐད་ལ་ཉམས་ཞིབ་གནང་མཁན་ཞིག་འབྱུང་ཚེ་ཞེས་པ་དང་འབྲེལ་ཏེ། ཆོས་རིག་བཀའ་བློན་མཆོག་གིས་ཀྱང་ཉམས་ཞིབ་བྱེད་སྟངས་དང་འབྲེལ་ནས་རང་ལུགས་ཙམ་མིན་པར་གཞན་ལུགས་དང་ལྷག་པར་དུ་ཆོས་ལུགས་གཞན་ཚོའི་ལྟ་གྲུབ་སོགས་ལ་ཉམས་ཞིབ་གནང་ཐུབ་ཚེ་རིགས་གཅིག་རྐང་འཛིན་པ་དོན་སྨིན་སོན་པ་ཞིག་ཆགས་རྒྱུ་ཙམ་མ་ཟད། ཚན་རིག་པ་ཚོ་དང་ལྷན་དུ་བཀའ་མོལ་གནང་ཐུབ་རྒྱུ་དེ་ནི་༸གོང་ས་མཆོག་གི་དགོངས་པ་ཡིན་པ་ལྟར། དེ་ལྟ་བུའི་གནས་སྟངས་ཤིག་ཡོང་བར་དུས་ཚོད་ངེས་ཅན་ཞིག་འགོར་གྱི་ཡོད་སྟབས་འབད་བརྩོན་དང་མཐུན་འགྱུར་གང་དགོས་གནང་རྒྱུ་ཡིན་ཞེས་གསུངས་སོང་། དེ་བཞིན་སྤྱི་འཐུས་གཞན་ཞིག་གིས་བོད་ཕྱི་ནང་གཉིས་སུ་གནས་བཞུགས་བོད་མི་ཚོའི་ངོས་ནས་ཤེས་འདོད་ཡོད་པའི་གནས་ཚུལ་གཅིག་ནི་༸དཔལ་རྒྱལ་དབང་ཀརྨ་པ་མཆོག་གི་གནས་སྟངས་ཡིན་སྟབས། རིན་པོ་ཆེ་མཆོག་གི་ད་ལྟའི་གནས་སྟངས་གང་འདྲ་ཆགས་ཡོད་དམ་ཞེས་བཀའ་འདྲི་ཞུས་པར་ཆོས་རིག་བཀའ་བློན་མཆོག་གིས་ད་ལྟའི་བཀའ་ཤག་གི་ངོས་ནས་ཀརྨ་པ་རིན་པོ་ཆེ་མཆོག་གི་གནད་དོན་དང་འབྲེལ་ནས་བང་ཆེན་གྱི་ངོ་བོའི་ཐོག་ནས་རྒྱ་གར་གཞུང་དང་རིན་པོ་ཆེའི་དགོངས་པ་གཞིར་བཟུང་ཞབས་ཕྱི་ཞུ་རྒྱུའི་འདུན་པ་ཡོད་སྐོར་དང་འབྲེལ་ནས་རྒྱ་གར་གཞུང་གི་མཐོ་རིམ་དཔོན་རིགས་དང་རིན་པོ་ཆེ་མཆོག་གཉིས་ཀར་མཇལ་མོལ་ཞུ་རྒྱུ་ཡིན་གསུངས་པ་དང་འབྲེལ། དེ་སྔ་རྒྱ་གར་གཞུང་གི་བདེ་འཇགས་ལས་ཁུངས་བརྒྱུད་སྐུ་ངལ་འཕྲད་བཞིན་པ་ལྟར་རྒྱ་གར་གྱི་ནུབ་བྷེང་གྷལ་དང་སྒང་ཏོག་ནང་ཆིབས་བསྒྱུར་གནང་ཐུབ་ཀྱི་མེད་པའི་སྐུ་ངལ་དེ་ད་ཆ་འགྱུར་བ་ཕྱིན་ཟིན་ཡོད་སྐོར་དང་། རྒྱ་གར་གཞུང་ནས་གནད་དོན་གལ་ཆེ་བ་གཞན་ཁག་ཅིག་ལ་རོགས་འདེགས་གནང་ཐུབ་ཚེ་རིན་པོ་ཆེ་མཆོག་རྒྱ་གར་ལ་གདན་འདྲེན་ཞུ་རྒྱུར་འགོག་རྐྱེན་འཕྲད་རྒྱུ་མིན་པར་གསུངས་སོང་། གཞན་ཡང་ཆོས་རིག་ལས་ཁུངས་དང་འབྲེལ་ནས་སྤྱི་ཚོགས་དྲྭ་རྒྱའི་ཐོག་༸གོང་ས་མཆོག་དང་བླ་ཆེན་ཁག་ལ་འཚེ་མེད་ཞུ་མཁན་ཚོར་ཆོས་རིག་དང་བདེ་སྲུང་ལས་ཁུངས་གཉིས་ནས་འགན་འཐུས་ཚང་བཞེས་དགོས་སྐོར་གསུངས་དོན་ལྟར་ཆོས་རིག་བཀའ་བློན་མཆོག་གིས་འཚེ་མེད་ཞུ་མཁན་གྱི་མི་སྣ་དེ་དག་ལ་འབྲེལ་བ་ཞུས་ཏེ་མཚམས་འཇོག་དགོས་པར་གསུང་རྒྱུ་ཡིན་ཞེས་གསུངས་ཡོད།ཆོས་རིག་ལས་ཁུངས་ཀྱི་སྔོན་རྩིས་གཏན་འབེབས་གནང་ཟིན་པའི་རྗེས་སུ་འཕྲོད་བསྟེན་ལས་ཁུངས་ཀྱི་སྔོན་རྩིས་ཐོག་བགྲོ་གླེང་གནང་བ་མ་ཟད། ཤེས་རིག་དང་ནང་སྲིད་བཅས་ཀྱི་སྔོན་རྩིས་གཏན་འབེབས་གནང་ཡོད། ཆེ་མཐོའི་ཁྲིམས་ཞིབ་ཁང་གི་སྔོན་རྩིས་དང་འབྲེལ་ནས་ངེས་ཅན་གཏན་འབེབས་གནང་སྐབས་ད་ལྟའི་ཁྲིམས་ཞིབ་པ་གཉིས་ཀྱི་གནད་དོན་དང་འབྲེལ་ནས་སྔོན་རྩིས་གཏན་འབེབས་གནང་མ་ཐུབ་པར་སྒོ་ཕྱེ་ནས་བཞག་པ་དེར་དེ་རིང་མུ་མཐུད་གཏན་འབེབ་གནང་སྐབས། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་ལགས་ཀྱིས་ད་ལྟའི་ཁྲིམས་ཞིབ་པ་གཉིས་ཁྲིམས་འགལ་དང་ཁྲིམས་འགལ་ཐོག་ནས་གླ་ཕོགས་སྤྲད་ན་འགྲིག་གི་མེད་ཅེས་དེ་སྔ་བཤད་པ་ལྟར་རང་སོར་ཡིན་ཞེས་གསུངས་ཏེ། གྲོས་ཚོགས་ནས་ཕྱིར་ཐོན་གནང་ཡོད་པ་མ་ཟད། སྤྱི་འཐུས་གཞན་ཁག་ཅིག་ཀྱང་ཕྱིར་ཐོན་གནང་རྐྱེན་ཆེས་མཐོའི་ཁྲིམས་ཞིབ་ཁང་གི་སྔོན་རྩིས་དེ་མང་མོས་སྒོ་ནས་གཏན་འབེབས་གནང་སོང་ལ། སྔོན་རྩིས་གཏན་འབེབ་གྲུབ་མཚམས་སུ་སླར་ལས་ཁུངས་ཁག་གི་ལས་དོན་ཐོག་མུ་མཐུད་བགྲོ་གླེང་གནང་ཡོད།

དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་བརྒྱད་པའི་ཐོག་གྲོས་ཚོགས་འཐུས་མི་རྣམས་ནས་སྲིད་སྐྱོང་མཆོག་གིས་གྲོས་ཚོགས་སུ་ཕུལ་བའི་སྐབས་ ༡༦ པའི་བཀའ་བཤག་གི་གཞུང་འབྲེལ་གསལ་བཤད་ལས་རྒྱ་ནག་གི་སྲིད་འཛིན་གྱི་མིང་ཐོག་ལ་བོད་ནང་གི་ཛ་དྲག་གནས་སྟངས་སྐོར་གྱི་དྲན་ཐོ་ཡིག་ཆ་ཞིག་འབུལ་རྒྱུའི་གྲ་སྒྲིག་གནང་ཡོད་ཀྱང་།གནས་སྐབས་རིང་ཕྱིར་འཐེན་ཞུས་ནས་དུས་སྟབས་འགྲིག་པ་ཞིག་འབྱུང་ཚེ་འབུལ་འཆར་ཡོད་ཅེས་གསལ་བ་ལྟར་སྤྱི་འཐུས་མི་ཉུང་བ་ཞིག་ནས་དྲན་ཐོ་ཡིག་ཆ་དེ་རྒྱ་ནག་ལ་མ་ཕུལ་བའི་སྔོན་ལ་གྲོས་ཚོགས་སུ་འབུལ་ལམ་ཞུ་དགོས་པ་དང་ནང་དོན་གང་དག་བཀོད་ཡོད་མེད་སོགས་ཀྱི་བཀའ་འདྲི་ནན་པོ་ཞུས་སོང་། སྔ་དྲོའི་ཚོགས་དུས་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་དགོངས་དོན་ལྟར་བཀའ་ཤག་གི་གཞུང་འབྲེལ་གསལ་བཤད་གྲོས་ཚོགས་སུ་སྙན་སྒྲོན་ཞུས་པའི་ནང་དོན་ཚན་གཙོ་བོ་བོད་དོན་བདེན་མཐའ་གསལ་ཐབས་དང་། བཙན་བྱོལ་བོད་མིའི་སྤྱི་ཚོགས་བདེ་དོན་སྐོར་ཆགས་ཡོད་པ་དང་། བོད་དོན་བདེན་མཐའ་གསལ་ཐབས་སུ་བཀའ་ཤག་སྐབས་ ༡༦ པའི་ངོས་ནས་དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱའི་དཀའ་རྙོག་སེལ་ཐབས་སུ་མུ་མཐུད་ནས་འབད་བརྩོན་ཞུ་རྒྱུ་ཡིན་པར་གསུངས་ཡོད། དེ་བཞིན་དོན་ཚན་དེའི་ཁོངས་སུ་རྒྱ་ནག་གཞུང་ནས་བོད་ནང་གི་སྔོན་འགྲོ་སློབ་གྲྭ་ནས་མཐོ་སློབ་བར་དུ་རྒྱ་སྐད་ཁྱབ་སྤེལ་གྱི་དམིགས་ཚད་འོག་ནས་བོད་ཀྱི་སྐད་ཡིག་སློབ་གཉེར་གྱི་གོ་སྐབས་འཕྲོག་བཞིན་པ་དང་། བོད་བརྒྱུད་ནང་བསྟན་ཀྲུང་གོ་ཅན་དུ་བསྒྱུར་རྒྱུ་ཟེར་བའི་སྲིད་བྱུས་འོག་བོད་བརྒྱུད་ནང་བསྟན་གྱི་བྱུང་འཕེལ་ལོ་རྒྱུས་ལ་འཁྱོག་བཤད་དང་བླ་སྤྲུལ་ཡང་སྲིད་ལ་ཕྱོགས་ཡོངས་ནས་སྟངས་འཛིན་བྱེད་བཞིན་པ་ཁག་མངོན་གསལ་གནང་སྟེ་རྒྱ་ནག་གི་སྲིད་བྱུས་དེ་དག་རྐང་བོད་མི་གཙོས་གྲངས་ཉུང་མི་རིགས་རྣམས་རྒྱ་རིགས་ཅན་དུ་བསྒྱུར་རྒྱུ་དང་སྲིད་བྱུས་དེ་དག་རྒྱ་ནག་རང་ཉིད་ཀྱི་རྩ་ཁྲིམས་དོན་ཚན་ཁག་དང་འགལ་ཡོད་པ་སོགས་འགྲེལ་བརྗོད་གནང་འདུག རྒྱ་ནག་གི་བྱེད་བབ་ཁག་བཟློག་ཐབས་སུ་མང་ཚོགས་ཀྱི་འགན་དབང་བསྐུར་བའི་མཛད་གཙོ་རྣམ་པ་ཚོས་དབུ་འཛུགས་ཏེ་བོད་མིའི་སྟོབས་ཤུགས་དང་ཆིག་སྒྲིལ་གྱི་ནུས་པ་མཉམ་སྤུངས་གནང་གལ་དང་། རང་དབང་ལ་དགའ་བའི་རྒྱལ་ཁབ་ཁག་གི་གཞུང་མང་ལ་འཆར་གཞི་དང་དམིགས་འབེན་ཡོད་པའི་ཐོག་ནས་འབྲེལ་བ་གནང་ཤུགས་ཆེ་རུ་གཏོང་རྒྱུ། དེ་བཞིན་འཛིན་སྐྱོང་བཀའ་ཤག་ནས་བོད་ཀྱི་ཐུན་མོང་མ་ཡིན་པའི་རིག་གཞུང་གི་ཁྱད་ཆོས་ལ་བརྟེན་ནས་བོད་དོན་དྲིལ་བསྒྲགས་ཀྱི་ལས་འགུལ་སྤེལ་རྒྱུའི་འཆར་གཞི་ཡོད་པ་མ་ཟད། འདས་པའི་ལས་ཡུན་རིང་གཏན་འཇགས་ཐབས་བྱུས་ཚོགས་ཆུང་ཟུར་འཛུགས་བྱས་ནས་ལས་དོན་ཁག་ཅིག་གནང་བཞིན་པའི་གནས་བབ་དང་། ལྷག་པར་དུ་རྒྱ་ནག་གི་སྲིད་འཛིན་གྱི་མིང་ཐོག་ལ་བོད་ནང་གི་ཛ་དྲག་གནས་སྟངས་སྐོར་གྱི་དྲན་ཐོ་ཡིག་ཆ་ཞིག་འབུལ་རྒྱུའི་གྲ་སྒྲིག་བྱས་ཡོད་ཀྱང་གནས་སྐབས་རིང་ཕྱིར་འཐེན་ཞུས་ནས་དུས་སྟབས་འགྲིག་པ་ཞིག་འབྱུང་ཚེ་འབུལ་འཆར་ཡོད་ཅེས་སོགས་འཁོད་ཡོད་པ་རེད། སྤྱི་འཐུས་རྣམ་པས་བཀའ་ཤག་གི་གསལ་བཤད་ཐོག་བགྲོ་གླེང་གི་ཆ་ཤས་བཞེས་སྐབས་སྤྱི་འཐུས་མི་ཉུང་བ་ཞིག་ནས་བཀའ་ཤག་གིས་གསལ་བཤད་ཁྲོད་དུ་རྒྱ་ནག་གི་སྲིད་འཛིན་གྱི་མིང་ཐོག་ལ་བོད་ནང་གི་ཛ་དྲག་གནས་སྟངས་སྐོར་གྱི་དྲན་ཐོ་ཡིག་ཆ་ཞིག་འབུལ་རྒྱུའི་གྲ་སྒྲིག་གནང་ཡོད་སྐོར་འཁོད་པ་དང་འབྲེལ་ཏེ། དྲན་ཐོ་ཡིག་ཆ་དེ་རྒྱ་ནག་ལ་མ་ཕུལ་བའི་སྔོན་ལ་གྲོས་ཚོགས་སུ་འབུལ་ལམ་ཞུ་དགོས་པ་དང་ནང་དོན་གང་དག་བཀོད་ཡོད་མེད་སོགས་ཀྱི་བཀའ་འདྲི་ཁག་ཅིག་གནང་སོང་། དེ་བཞིན་ཁག་ཅིག་ནས་ད་རེས་བཀའ་ཤག་གི་གསལ་བཤད་ཁྲོད་དུ་དང་བླངས་ཞུ་གཏུག་བ་རྣམ་པས་བོད་མིའི་སྒྲིག་འཛུགས་ཀྱི་ལངས་ཕྱོགས་འགྲེལ་བརྗོད་གནང་རྗེས་སྒེར་གྱི་ལངས་ཕྱོགས་ཞུ་ས་ཡོད་པ་གང་ཞིག་དེར་འགལ་ཟླར་མཐོང་གི་མེད་ཅེས་གསུངས་པར་ཡི་རང་ཞུ་མཁན་བྱུང་སོང་བ་མ་ཟད། ཁག་ཅིག་ནས་བོད་མིའི་སྒྲིག་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་དང་འགལ་ཟླ་ཆགས་མིན་དང་དབུ་མའི་ལམ་ལ་རེ་བ་ག་ཚོད་ཡོད་དམ་ཞེས་སོགས་ཀྱི་བཀའ་འདྲི་ཞུས་ཡོད།    གཞན་ཡང་བཀའ་ཤག་གི་གསལ་བཤད་ཁྲོད་བཙན་བྱོལ་བོད་མིའི་སྤྱི་ཚོགས་ཀྱི་བདེ་དོན་དང་འབྲེལ་བོད་དོན་འཐབ་རྩོད་དང་སྤྱི་ཚོགས་བདེ་དོན་གྱི་རྨང་གཞི་ལྟ་བུར་འགྱུར་བའི་བོད་མིའི་སྒྲིག་འཛུགས་འདི་བཞིན་ཁྲིམས་ཀྱི་དབང་བསྒྱུར་ལྡན་དགོས་གལ་སྐོར་འགྲེལ་བརྗོད་དང་སྦྲགས། བར་ལམ་ནས་བཅའ་ཁྲིམས་འགྲེལ་བརྗོད་དང་འབྲེལ་བའི་དཀའ་ངལ་འཕྲད་པ་ཁག་ལ་གཞིགས་ཏེ་གྲོས་ཚོགས་ནས་ཁྲིམས་ཡིག་བསྐྱར་ཞིབ་ཚོགས་ཆུང་ཆེད་འཛུགས་དང་། དེ་བཞིན་འཛིན་སྐྱོང་གི་ངོས་ནས་ལས་བྱེད་ཀྱི་འཇོན་ནུས་བཞེངས་སྐྲུན་གནང་རྒྱུར་མཐུན་རྐྱེན་བསྐྲུན་རྒྱུ་དང་། ལས་གཞི་ཁག་ཚན་རིག་དང་མཐུན་པའི་འཆར་འགོད་ཐོག་མ་འོངས་ལོ་གསུམ་གྱི་ལས་འཆར་ཁག་སྔོན་ཚུད་ནས་བང་སྒྲིག་གནང་རྒྱུ་སོགས་མ་འོངས་ལས་འཆར་ཁག་ཅིག་དང་། འདས་པའི་ལས་དོན་ཇི་གྲུབ་སོགས་གསལ་འདོན་གནང་འདུག་པ་ཁག་གི་ཐོག་ལ་ཡང་སྤྱི་འཐུས་རྣམ་པས་བཀའ་དྲི་ཁག་ཅིག་ཞུས་སོང་བ་དང་། ད་རེས་སྤྱི་འཐུས་རྣམ་པས་བཀའ་འདྲི་ཞུས་ཁག་ལ་སྲིད་སྐྱོང་མཆོག་ནས་གྲོས་ཚོགས་ཀྱི་ལས་ཉིན་རྗེས་མར་ལན་འདེབས་གསལ་བཤད་གནང་རྒྱུ་ཡིན་པ་རེད།གཞི་རྩའི་དེ་རིང་གྲོས་ཚོགས་ནང་བཀའ་ཤག་གི་གསལ་བཤད་ལས་རིམ་སྔོན་ལ་ལས་བྱེད་འདེམས་བསྐོ་ལྷན་ཁང་གི་སྒྲི་གཞི་དོན་ཚན་བཅུ་དྲུག་དང་བཅུ་བདུན། བཅུ་དགུ་བཅས་དང་འབྲེལ་བའི་གཞུང་འབྲེལ་སྒྲིག་གཞི་བསྐྱར་བཅོས་ཁྲིམས་འཆར་གྲོས་ཚོགས་སུ་སྙན་སྒྲོན་དང་བགྲོ་གླེང་དབུ་འཛུགས་གནང་ཡོད་པ་དེ་དག་སང་སྔ་དྲོའི་ལས་རིམ་ཐོག་འཕྲོ་སྐྱོང་གནང་བའི་ཐོག་ནས་གཏན་འབེབས་གནང་རྒྱུ་ཡིན་པ་མ་ཟད། དེ་རིང་ཕྱི་དྲོའི་ཚོགས་དུས་འཕར་འགྱངས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་སྔོན་རྩིས་གཏན་འབེབས་ཀྱི་ལས་རིམ་ཐོག་ཕེབས་ཡོད།

དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་བདུན་པ་ཉིན་འཁྱོངས་བོད་མིའི་སྒྲིག་འཛུགས་ཀྱི་དབུས་དང་ཁྱབ་ཁོངས་ལས་ཁུངས་ཁག་གི་རྩིས་ལོ་ ༢༠༢༢་་༢༠༢༣ ལོའི་སྔོན་རྩིས་གཏན་འབེབས་ཀྱི་ལས་རིམ་ཐོག་བཏང་སོང་། སྐབས་དེར་ཕྱི་དྲིལ་ལས་ཁུངས་ཀྱི་ཁྱབ་ཁོངས་སྐུ་ཚབ་དོན་གཅོད་ཁག་གི་རྒྱུན་གྲོན་དང་དམིགས་བསལ། དེ་བཞིན་ཟུར་སྐོས་སོགས་ཀྱི་སྔོན་རྩོས་དགོས་དངུལ་གཏན་འབེབས་གནང་སྐབས་སྤྱི་འཐུས་ཁག་ཅིག་ནས་དེ་སྔ་སུད་སི་སྐུ་ཚབ་དོན་གཅོད་ལས་ཁུངས་དེ་ཁང་གླའི་ངོ་བོར་གནས་མི་དགོས་པར་བོད་མིའི་སྒྲིག་འཛུགས་ཉོ་འཆར་ཡོད་པའི་གནས་བབ་ཅི་ཆགས་དང་དོན་གཅོད་ལས་ཁུངས་སུ་རྒྱལ་ཚོགས་ལ་འབྲེལ་བ་གནང་མཁན་གྱི་ལས་བྱེད་གཅིག་དགོངས་པ་ཞུས་ཟིན་པའི་གནས་སྟངས་སོགས་ཀྱི་ཐད་བཀའ་འདྲི་ཁག་ཅིག་ཞུས་དོན་ལྟར་ཕྱི་དྲིལ་བཀའ་བློན་མཆོག་ནས་དེ་སྔ་བཀའ་ཤག་གོང་མའི་སྐབས་སུད་སི་དོན་གཅོད་ལས་ཁུངས་བོད་མིའི་སྒྲིག་འཛུགས་ནས་ཉོ་འཆར་ཡོད་ཀྱང་། ཞིབ་འཇུག་གནང་བའི་བརྒྱུད་རིམ་ཁྲོད་དོན་ཁང་གི་ས་གོང་ཆེན་པོ་ཆགས་ཡོད་སྟབས་ཉོ་ཐུབ་ཀྱི་མེད་པའི་གནས་སྟངས་གསལ་བཤད་གནང་ཡོད།   དེ་བཞིན་དཔལ་འབྱོར་བཀའ་བློན་མཆོག་གིས་སུད་དོན་གཅོད་ལས་ཁུངས་སུ་རྒྱལ་ཚོགས་ཀྱི་ལས་དོན་ཐོག་ཕྱག་ལས་གནང་མཁན་གྱི་ལས་བྱེད་གཅིག་དགོངས་པ་ཞུས་པའི་གནས་སྟངས་བྱུང་ཡོད་ཀྱང་ལས་དོན་གྱི་ངོ་བོའི་ཐོག་ལ་འཐུས་ཤོར་ཕྱིན་པར་གསལ་བཤད་གནང་ཡོད། དེ་བཞིན་སྤྱི་འཐུས་ཤིག་ནས་སྐུ་ཚབ་གཅོད་ལས་ཁུངས་ཁག་ཅིག་གི་ཁྱབ་ཁོངས་སུ་ཡོད་པའི་རྒྱ་རིགས་འབྲེལ་མཐུད་པའི་ལས་དོན་ལས་འཕྲོས་ཏེ་བོད་མིའི་སྒྲིག་འཛུགས་ནས་རྒྱ་རིགས་ཚོ་དང་འབྲེལ་བ་གནང་སྐབས་ཡིད་གཟབ་གནང་གལ་ཡིན་པའི་དགོངས་ཚུལ་གསུངས་སོང་ལ། དབྱིན་ཇིའི་རྒྱལ་ཁབ་དེ་ནི་བོད་ཀྱི་ལོ་རྒྱུ་བརྒྱུད་རིམ་ཐོག་གནད་ཆེ་ཞིག་ཆགས་ཡོད་སྟབས། དབྱིན་ཡུལ་དོན་གཅོད་ལས་ཁུངས་ནས་ས་གནས་སུ་བོད་དོན་དང་ཆབ་སྲིད་ཀྱི་ལས་འགུལ་གཞི་རྒྱ་ཆེ་རུ་གནང་གནད་ཆགས་ཡོད་པ་སོགས་ཀྱི་དགོངས་ཚུལ་ཕུལ་ཡོད་པ་རེད། ད་ལྟའི་ཡུཀ་རེན་ནང་གི་གནད་དོན་ལས་འཕྲོས་ཏེ་ཨུ་རུ་སུའི་དངུལ་གྱི་ཛ་ཐང་ལ་དོ་ཕོག་ཆེན་པོ་ཐེབས་བཞིན་ཡོད་པར་བརྟེན་ད་རེས་རུ་སོག་སྐུ་ཚབ་དོན་གཅོད་ལས་ཁུངས་ཀྱི་རྒྱུན་གྲོན་དེ་སྔའི་འཆར་འབུལ་ཐོག་བརྒྱ་ཆ་ལྔ་བཅུ་ཙམ་སྤར་ཆ་གནང་སྟེ་ཁྱོན་རྒྱུན་གྲོན་ཧིིན་སྒོར་ ༦༢༡༩༣༡༨ གཏན་འབེབས་གནང་དགོས་བྱུང་ཡོད། སྔོན་རྩོས་གཏན་འབེབས་ཀྱི་ལས་རིམ་ཁྲོད་ཕྱི་དྲིལ་ཁྱབ་ཁོངས་བོད་ཀྱི་སྲིད་བྱུས་ཉམས་ཞིབ་ཁང་དང་སྤྱི་ཁྱབ་རྩིས་ཞིབ་ལས་ཁང་དང་དེའི་ཡན་ལག་ལས་ཁུངས་སོགས་ཀྱི་སྔོན་རྩོས་འགྲོ་གྲོན་གཏན་འབེབས་གནང་ཡོད་པ་མ་ཟད། ལས་བྱེད་འདེམས་བསྐོ་ལྷན་ཁང་གི་སྔོན་རྩིས་གཏན་འབེབས་གནང་སྐབས་མ་འོངས་པར་འོས་བསྡུ་ལས་ཁང་དང་འདེམས་ལྷན་གཉིས་ཀྱི་འགན་འཛིན་གྱི་ལས་འགན་དེ་གང་ཟག་གཅིག་ནས་གནང་བཞིན་པ་དེར་བསྐྱར་བཅོས་གནང་སྟེ་འགན་འཛིན་ལོགས་སུ་བསྐོ་གཞག་དགོས་པའི་དགོངས་ཚུལ་གསུང་མཁན་བྱུང་སོང་། གཞི་རྩའི་དེ་རིང་གྲོས་ཚོགས་ཀྱི་ལས་ཉིན་ཆ་ཚང་ངམ་ཉིན་འཁྱོངས་སྔོན་རྩིས་གཏན་འབེབས་ཐོག་ཕེབས་ཡོད་པ་དང་། ཉིན་རྒྱབ་ཀྱི་ཚོགས་དུས་ཐོག་བོད་མིའི་སྒྲིག་འཛུགས་དང་བོད་པའི་སྤྱི་ཚོགས་ཀྱི་ལས་དོན་ཐོག་ཡུན་རིང་ནས་རྒྱབ་སྐྱོར་གནང་མཁན་འཇར་མ་ནི་ Friedrich Naumann Foundation for Freedom ཡི་ལྷོ་ཤར་ཨེ་ཤ་ཡའི་སྡེ་ཚན་གྱི་འགན་འཛིན་མཆོག་གྲོས་ཚོགས་ཀྱི་ཟུར་ཉན་དུ་ཕེབས་པར་དགའ་བསུ་ཞུས་ཡོད། པར་བདག་དབང་། སྤྱི་ལྷན་དང་བོད་མིའི་སྒྲིག་འཛུགས།

སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ཁ་སང་དང་དེ་རིང་གི་ལས་ཉིན་ཐོོག་བོད་མིའི་སྒྲིག་འཛུགས་ཤེས་རིགས་ལས་ཁུངས་ཀྱི་སྔོན་རྩིས་གཏན་འབེབས་དང་སྦྲགས་ཏེ།