རྒྱ་གཞུང་གིས་ཕྱི་ལོ་ ༢༠༢༠ ནང་བོད་མི་ན་གཞོན་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་བཏང་བའི་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་ལོ་གསུམ་གྱི་བཙོན་འཇུག་ཁྲིམས་ཐག་བཅད་པ་ཕྲུ་གུ་གསུམ་གྱི་ཨ་མ་ནོར་འཛིན་དབང་མོ་ལགས་སུ་གཅར་རྡུང་མནར་གཅོད་ཚད་མེད་བཏང་རྗེས་འདི་ལོའི་ཕྱི་ཟླ་ ༣ པའི་ནང་གློད་བཀྲོལ་གཏོང་དགོས་བྱུང་བ་དེ་ལྟར་ཡང་། ནོར་འཛིན་དབང་མོ་ལགས་གློད་བཀྲོལ་བཏང་རྗེས་ཁྲིན་ཏུའུ་དང་ཟི་ལིང་སོགས་སུ་སྨན་པར་བསྟེན་གཏུག་བྱས་ཀྱང་དྲག་སྐྱེད་ཡོང་བའི་རེ་བ་མེད་པ་ལྟ་བུར་གྱུར་ཡོད་འདུག
དེ་ཡང་ཁམས་ཡུལ་ཤུལ་ཁུལ་གྱི་ཆུ་དམར་ལེབ་རྫོང་ཆིག་སྒྲིལ་གྲོང་སྔོན་ལུང་སྡེ་བ་ནས་ཡིན་པའི་ནོར་འཛིན་དབང་མོ་ལགས་ཀྱི་འཕྲོད་བསྟེན་གནས་བབ་དང་འབྲེལ་ནས་བོད་ཀྱི་དུས་བབ་གསར་ཁང་གིས་གནས་ཚུལ་སྤེལ་དོན་ལྟར་ན། ཕྱི་ཟླ་ ༦ པའི་ཚེས་ ༡ ནས་ཁྲིན་ཏུའུ་གྲོང་ཁྱེར་གྱི་མི་མང་སྨན་ཁང་དུ་སྨན་པར་བསྟེན་ནས་ཉིན་བདུན་ཕྱིན་ཡོད་ཀྱང་ཕན་ཐོགས་བྱུང་མེད། དེ་ནས་སྐྱེ་རྒུ་མདོའི་མི་མང་སྨན་ཁང་དུ་ཉིན་གྲངས་ ༡༦ རིང་སྨན་བཅོས་བྱས་ཡོད་ནའང་དྲག་སྐྱེད་མ་བྱུང་བར་བརྟེན། སྨན་པའི་ལམ་སྟོན་བཞིན་འདས་པའི་ཉིན་གྲངས་ ༡༥ རིང་ཟི་ལིང་གྲོང་ཁྱེར་གྱི་སྨན་ཁང་ཆེ་གྲས་ཤིག་ཏུ་སྨན་བཅོས་བྱེད་མུས་ཡིན་ནའང་། དྲག་སྐྱེད་ཡོང་རྒྱུའི་རེ་བ་མེད་པ་ལྟ་བུ་གྱུར་ཡོད་པ་བཀོད་འདུག
རྩ་བའི་རྒྱ་གཞུང་གིས་རྒྱལ་ཁབ་ཀྱི་གསང་བ་ཕྱིར་གྱར་དང་། ཁ་བྲལ་རིང་ལུགས་ཀྱི་ངན་སྐུལ་བྱས་ཚུལ་སོགས་ཀྱི་མིང་བྱང་སྣ་ཚོགས་འོག་ནས་ད་བར་དུ་བོད་མི་སྟོང་ཕྲག་མང་པོ་བཙོན་འཇུག་ཁྲིམས་ཐག་བཅད་ཡོད་པ་མ་ཟད། བཙོན་ཁང་ནང་སྡུག་སྦྱོང་མནར་གཅོད་ཚད་མེད་བཏང་བའི་རྒྱུ་མཚན་གྱི་བོད་མི་གློ་བུར་འདས་གྲོངས་སུ་གྱུར་བ་དང་། འཆི་ཁར་རང་ཁྱིམ་དུ་བསྐྱལ་བ་སོགས་ཀྱི་གནད་དོན་བསྟུད་མར་བྱུང་དང་འབྱུང་བཞིན་པ་ལྟར། ནོར་འཛིན་དབང་མོ་ལགས་ཀྱང་ ༢༠༡༣ ལོའི་ཟླ་ ༥ པའི་ནང་ཆུ་དམར་ལེབ་རྫོང་ཆིག་སྒྲིལ་གྲོང་སྡེ་ནས་བོད་མི་ན་གཞོན་བསྟན་འཛིན་ཤེས་རབ་ལགས་ཀྱིས་རང་ལུས་མེར་བསྲེགས་གནང་བའི་གནད་དོན་ཕྱིར་བསྒྲགས་བྱས་པའི་ཉེས་མིང་འོག་ཆུ་དམར་ལེབ་རྫོང་མི་མང་ཁྲིམས་ཁང་གིས་གསང་བའི་ཁྲིམས་ར་ཚོགས་ཏེ་ཁོང་ལ་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ཟླ་བ་འདིའི་ཟླ་མཇུག་ཏུ་རྒྱ་ནག་གཞུང་གིས་སླར་ཡང་བོད་མི་བློ་ཚེས་ཞེས་པ་ཞིག་བརྒྱད་ཅུའི་འཁྲུངས་སྐར་བསུ་ཞེས་པའི་སྐད་འཕྲིན་ཚོགས་པ་ཞིག་བཙུགས་པའི་ཉེས་མིང་འོག་འཛིན་བཟུང་བཙན་ཁྲིད་བྱས་པའི་བརྒྱུད་ལམ་ཁག་ཏུ་གནས་ཚུལ་ཐོན་འདུག
ཁམས་དཀར་མཛེས་ཁུལ་སེར་ཤུལ་རྫོང་འབུམ་རྙིང་དགོན་རུ་མ་ནས་ཡིན་པ་བོད་མི་རང་ལོ་ ༥༧ ཅན་བློ་ཚེ་ལགས་ཀྱིས་བརྒྱད་ཅུའི་འཁྲུངས་སྐར་བསུ་ཞེས་བོད་ནང་གི་ས་ཁུལ་འདྲ་མིན་ནས་མཉམ་ཞུགས་གནང་མཁན་མི་གྲངས་ ༡༠༠ ལྷག་ཡོད་པའི་སྐད་འཕྲིན་ཚོགས་པ་བཙུགས་པར་ས་གནས་ཉེན་རྟོག་པས་ཁྲིམས་འགལ་གྱི་ལས་དོན་བྱས་ཡོད་སྐོར་ཟེར་ནས་འཛིན་བཟུང་བཙན་ཁྲིད་ཀྱིས་སེར་ཤུལ་རྫོང་ཐོག་ཏུ་ཁྲིད་དེ་ད་ལྟའི་ཆར་ཁོང་གི་གནས་སྟངས་སྐོར་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་མ་ཟད། ཉེན་རྟོག་པས་ཁོང་འཛིན་བཟུང་བྱེད་སྐབས་ས་གནས་ཡུལ་མི་མང་པོར་འདྲི་རྩད་དང་འཇིགས་སྐུལ་བྱས་ཡོད་པ་རེད་འདུག
གཞི་རྩའི་རྒྱ་ནག་གཞུང་གིས་ནག་ཚོགས་གཙང་སེལ་དང་ཟང་ཟིང་བཅོས་སྒྲིག་ཟེར་བར་ཁ་གཡར་ཏེ་བོད་ཀྱི་རྒྱལ་ས་ལྷ་ས་གཙོས་བོད་ཀྱི་ས་ཁུལ་གང་སར་དྲ་རྒྱ་དང་སྐད་འཕྲིན་བཅས་ལ་སྔར་ལྷག་དམ་བསྒྲགས་ཆེས་ཆེར་བྱས་པ་མ་ཟད། བོད་མི་མང་པོས་སྐད་འཕྲིན་ཚོགས་པར་བཀའ་མོལ་གནང་བར་ཁྲིམས་འགལ་དང་ནག་ཉེས་ལ་བརྩིས་ནས་ས་གནས་བོད་མི་མང་དག་ཅིག་འཛིན་བཟུང་བྱེད་བཞིན་ཡོད་པའི་གནས་ཚུལ་སྔ་རྗེས་སུ་ཐོན་ཡོད་པ་རེད།
ནོར་འཛིན་པར་དབང་བོད་ཀྱི་དུས་བབ།
བློ་ཚེ་པར་དབང་ཨེ་ཤི་ཡ་རང་དབང་རླུང་འཕྲིན་ཁང་།
