ཨོ་སི་ཊོ་ལི་ཡའི་རྒྱལ་ས་ Canberra ནང་གནས་སྡོད་བོད་མི་ན་གཞོན་གཞན་ཕན་ལགས་ཀྱིས་ཁུལ་དེའི་ལོ་ན་བགྲེས་པ་རྣམས་ལ་ལྟ་རྟོག་ཞུ་སླད་ Home-care service Amala འམ་ཨ་མ་ལགས་ཞེས་པའི་ཞབས་ཞུ་ཁང་ཞིག་ཆེད་འཛུགས་གནང་འདུག
ཉེ་ཆར་ཕྱི་ཚེས་ ༢༥ ཉིན་ Canberra times གསར་ཁང་གིས་དྲ་གནས་ཐོག་གནས་ཚུལ་སྤེལ་བར་གཞིགས་ན། གཞན་ཕན་ལགས་ཀྱིས་ཁོང་ནས་དེ་སྔ་སྤྱི་ཚོགས་དྲ་ལམ་ཐོག་རྒས་གསོ་ཁང་གཅིག་གི་ནང་ལས་མི་རྣམས་ཀྱིས་རྒན་ཁོགས་རྣམས་ལ་གདུག་རྩུབ་དང་མི་རུང་བའི་བྱ་སྤྱོད་བྱས་པ་མང་དག་ཞིག་མཐོང་སྟབས། རང་ཉིད་ནས་དེ་འབྲེལ་དཀའ་ངལ་མི་ཡོང་བར་འབད་དགོས་པའི་དགོངས་པ་འཁོར་དོན་ལྟར་ཨ་མ་ལགས་ཞེས་པའི་ཞབས་ཞུ་ཁང་དེ་ཆེད་འཛུགས་གནང་རྒྱུར་སེམས་འགུལ་ཐེབས་སྐོར་གསུངས་འདུག ཁོང་གིས་དྲ་ལམ་ཐོག་ཡིད་སྐྱོའི་གནད་དོན་ཁག་གཅིག་མཐོང་ཚེ་བློ་ཕམ་བྱུང་བ་དང། སྤྱིར་བོད་པའི་རིག་གཞུང་ལས་ལོ་ན་བགྲེས་པ་རྣམས་ལ་གུས་བརྩི་དགོས་པ་བཤད་སྲོལ་ཡོད་པ་བཞིན། རྒན་བགྲེས་ལ་ཞབས་ཕྱི་ཞུ་སླད་གཞན་དང་མི་འདྲ་བའི་ བོད་མིར་ཐུན་མིན་ཁྱད་ཆོས་ཡོད་པ་དེས་སྤྱི་ཚོགས་ནང་ཁྱད་པར་བཟོ་ཐུབ་ངེས་ཡིན་པ་གསུངས་འདུག
གཞན་ཕན་ལགས་ཀྱིས་ནང་པའི་གཞུང་ནང་འགྲོ་བ་རིགས་དྲུག་སེམས་ཅན་ཐམས་ཅད་རང་ཉིད་ཀྱི་ཨ་མ་གནང་མྱོང་མེད་པ་མེད་སྐོར་གསུངས་ཡོད་སྟབས། ཚོགས་པའི་མིང་ལ་ཨ་མ་ལགས་ཞེས་བཏགས་པ་དང། ཚོགས་པས་བོད་པའི་གཤིས་རྒྱུད་བཟང་པོ་དེ་ Canberra ནང་འཁྱེར་ཐབས་བྱ་རྒྱུ་ཡིན་པ་གསུངས་ཡོད།
ཨ་མ་ལགས་ཞབས་ཞུ་ཁང་དེ་ཟླ་བ་སྔོན་མའི་ནང་ཆེད་འཛུགས་གནང་མ་ཐག་པ་ཞིག་ཡིན་ཀྱང་། Canberra ས་གནས་མི་མང་ནས་ཚོགས་པ་དེར་འབྲེལ་བ་གནང་མཁན་མང་དག་ཞིག་ཡོང་བཞིན་ཡོད་པ་དང། ཚོགས་པའི་ངོས་ནས་ད་ལྟའི་འཆར་ས་གནས་རྒན་ཁོགས་སྒེར་པ་ཁག་གཅིག་ལ་རང་སོ་སོའི་ཁྱིམ་དུ་ལྟ་རྟོག་གི་མཐུན་རྐྱེན་སྦྱོར་བཞིན་ཡོད་པ་ལྟར། རིམ་བཞིན་གཞུང་གི་འགུག་ཐོའི་ནང་ལུས་པའི་རྒན་ཁོགས་ཚོ་ལའང་ཞབས་ཞུ་གནང་རྒྱུར་བརྩོན་བཞིན་ཡོད་པ་རེད་འདུག
ཡང་དེའི་བར་ན་ Australia འི་ Sydney གྲོང་ཁྱེར་དུ་ས་གནས་ཀྱི་ཚོགས་པ་ཞིག་ནས་ཁུལ་དེར་སྐྱབས་བཅོལ་དུ་འབྱོར་བའི་བོད་མི་ཁག་གཅིག་ལ་ཆུ་རྐྱལ་སློབ་ཁྲིད་ཀྱི་མཐུན་རྐྱེན་སྦྱར་ནས་བོད་མི་དེ་དག་ཨོ་སི་ཊོ་ལི་ཡའི་སྤྱི་ཚོགས་དང་རིག་གཞུང་ནང་མཉམ་གནས་ཐུབ་རྒྱུའི་གོ་སྐབས་ཤིག་སྐྲུན་བཞིན་ཡོད་པའི་གནས་ཚུལ་ཐོན་འདུག
དེའང་ Water skills for life ཞེས་པའི་ཁེ་ལས་མེད་པའི་ཚོགས་པ་ Sydney བྱང་ངོས་འམ་ Northern Beaches སུ་ཡོད་པའི་བོད་མི་ཆུ་རྐྱལ་བརྒྱབ་མི་ཐུབ་པ་གྲངས་འབོར་ ༦༣ ཡས་མས་ལ་ཆུ་རྐྱལ་སློབ་ཁྲིད་ཀྱི་ལས་འཆར་ཞིག་འགོ་འཛུགས་གནང་ཡོད་པ་དང། ཚོགས་པའི་འགན་འཛིན་ Tanya Carmont ལགས་ཀྱིས་ SBS གསར་ཁང་ལ་འགྲེལ་བརྗོད་གནང་དོན་ལྟར་ན། དེ་སྔ་ཁོང་ Northern Beaches ནང་ Warringah Aquatic Centre དུ་ཆུ་རྐྱལ་སློབ་ཁྲིད་སྐབས་བོད་མི་རྒན་གྲས་ཤིག་དང་ཐུག་འཕྲད་བྱུང་བ་དང་། སྐབས་དེར་ཁོང་གིས་ཨོ་སི་ཊོ་ལི་ཡའི་ནང་གསར་དུ་འབྱོར་མཁན་བོད་མི་མང་པོ་ཞིག་ཆུ་རྐྱལ་བརྒྱབ་མི་ཐུབ་པ་ཤེས་པ་མ་ཟད། ཆུ་རྐྱལ་གྱི་སློབ་ཁྲིད་ཆེད་བསྐྱོད་ཚེ་རིན་གོང་ཆེན་པོ་ཡིན་སྟབས། གསར་དུ་འབྱོར་བའི་བོད་མི་རྣམས་ནས་དེ་ལྟར་དངུལ་སྤྲད་ཐུབ་རྒྱུ་དཀའ་བར་བརྟེན་བོད་མི་རྣམས་ཀྱི་སླད་ཆུ་རྐྱལ་སློོབ་ཁྲིད་ཀྱི་ལས་འཆར་འགོ་འཛུགས་གནང་བར་འབད་སྐོར་གསུངས་འདུག
ཚོགས་པ་དེས་བོད་མི་ཆུ་རྐྱལ་བརྒྱབ་མི་ཐུབ་པ་རྣམས་ཀྱི་སླད་ཟླ་བ་ ༡༠ ནས་ ༡༢ བཅས་གཟའ་འཁོར་བཅུའི་རིང་ Dee Why གྲོང་མཐར་རུ་ཆུ་རྐྱལ་སློབ་ཁྲིད་ཀྱི་ལས་གཞི་སྤེལ་བཞིན་ཡོད་པ་དང། ལས་གཞི་དེའི་འོག་ཨོ་སི་ཊོ་ལི་ཡའི་ནང་གསར་དུ་ཕེབས་པའི་བོད་རིགས་རྣམས་ལ་རིན་མེད་ཐོག་ནས་སློབ་ཁྲིད་གནང་གི་འདུག དེ་བཞིན་ཁུལ་དེར་དེ་སྔ་ནས་འབྱོར་བ་རྣམས་ལས་གླ་ཨ་སྒོར་ ༢༠ མ་གཏོགས་ལེན་གྱི་མེད་པ་རེད་འདུག
