སུད་སི་གྲོང་ཁྱེར་ཇི་ནི་ཝར་འཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༩ ཐོག་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གིས་རྒྱ་ནག་གཞུང་ནས་བོད་དང་ཤར་ཏུར་སི་ཐན་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་ཐོག་ རྡོག་རོལ་ཆེས་ཆེར་གཏོང་བཞིན་པ་ཐེར་འདོན་གནང་སྟེ་སེམས་འཚབ་གནང་བ་མ་ཟད་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་གུས་བརྩི་ཞུས་དགོས་ཞེས་བརྗོད་འདུག
ཁ་སང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་འཛམ་གླིང་རྒྱལ་ཁབ་ཁག་ནང་གི་འགྲོ་བ་མིའི་ཐོབ་ཐང་གི་གནས་བབས་ཐོག་ལྷན་ཚོགས་ནས་ཐུགས་སྣང་དགོས་པའི་ཚོགས་དུས་ཐོག་དབྱིན་ཡུལ་དང་འཇར་མི་ནི། སུད་སི། ཌན་མག ནི་ཐར་ལན་ཌི། སུད་ཌན། དེ་བཞིན་ཕ་རན་སི་བཅས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབས་ཇེ་ཞན་ཇེ་སྡུག་ཏུ་འགྲོ་བཞིན་པ་ལས་ཡར་རྒྱས་ཀྱི་རྣམ་པ་གང་ཡང་མེད་པ་དང། རྒྱ་ནག་གཞུང་ནས་བོད་གཙོས་པའི་མངའ་འོག་གི་གྲངས་ཉུང་མི་རིགས་ཁག་གི་སྤྱི་དམངས་རང་དབང་ཐོག་སྔར་ལས་དམ་དྲག་ཚོད་འཛིན་ཆེ་བ་དང་། འཆར་གཞི་དང་ལྡན་པའི་ངང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་པ་མ་ཟད། དེ་བཞིན་ཁུལ་དེའི་ནང་འགྲོ་བ་མིའི་ཐོབ་ཐང་སྲུང་སྐྱོབ་པ་དང་གསར་འགོད་པ་སོགས་ཀྱི་སྨྲ་བརྗོད་རང་དབང་རྩོད་ལེན་གནང་མཁན་ཁག་ལ་དམིགས་བསལ་གྱིས་དྲག་གནོན་དང་འགྲོ་བ་མིའི་ཐོབ་ཐང་རྡོག་རོལ་མུ་མཐུད་ནས་གཏོང་བཞིན་ཡོད་པ་སོགས་ཐེར་འདོན་གནང་བ་དང་ཆབས་ཅིག་ཏུ་ད་ལྟའི་ཆར་རྒྱ་ནག་གི་མངའ་འོག་ཏུ་ཡོད་པའི་བོད་དང་ཤར་ཏུར་སི་ཐན། ཧོང་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་ལྷན་ཚོགས་ཀྱི་ངོས་ནས་ཐུགས་སྣང་གནང་དགོས་པའི་གཞེན་སྐུལ་ཞུས་ཡོད།
དབྱིན་ཡུལ་སྐུ་ཚབ་ལྷན་ཚོགས་ཐོག་རྒྱ་ནག་གཞུང་གིས་བོད་ནང་དུ་གཏན་སློབ་ཟུར་འཛུགས་ཀྱིས་བོད་མིའི་ངོ་བོ་དང་འབྲེལ་བའི་ཆོས་དང་རིག་གཞུང། སྐད་ཡིག་བཅས་པ་རྩ་མེད་བཟོ་རྒྱུའི་ལས་གཞི་སྤེལ་བཞིན་པ་མངོན་གསལ་གནང་བ་དང་འབྲེལ། ད་ལྟའི་ཆར་བོད་ཀྱི་གནད་དོན་ནི་རྒྱལ་སྤྱིའི་ཐོག་སྔར་བཞིན་དོ་ཁུར་གནང་ཡུལ་རང་སོར་གནས་ཡོད་པ་དང། ལྷན་ཚོགས་ཐོག་ཨ་རི་དང་ཡོ་རོབ་མཐུན་ཚོགས། ཨོ་སི་ཀྲོ་ལི་ཡ། ནོར་ཝེ། ཕྷིན་ལེནཊ་བཅས་ནས་བོད་ཅེས་མིང་དངོས་སུ་མངོན་གསལ་མ་གནང་ཡང་། རྒྱལ་ཁབ་དེ་དག་ནས་རྒྱ་ནག་གཞུང་གིས་ཡུ་གུར་མཚོན་པའི་གྲངས་ཉུང་མི་རིགས་གཞན་ཁག་གི་ཐོག་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་ཡོད་པ་ཐེར་འདོན་གྱིས་སེམས་འཚབ་ཀྱི་རྣམ་པ་ཆེད་བཏོན་དང་སྦྲགས། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ངོས་ནས་ཤར་ཏུ་ཀི་སིཐན་ནང་གི་འགྲོ་བ་མིའི་ཐོབ་ཐང་སྐོར་སྙན་ཐོ་འཕྲལ་མར་འདོན་སྤེལ་བྱེད་དགོས་པ་དང། དེ་བཞིན་རིང་མིན་རྒྱལ་ཚོགས་ཀྱི་གཙོ་འཛིན་མཆོག་གི་རྒྱ་ནག་ནང་གི་འཚམས་གཟིགས་སྐབས་ཐེ་གཏོགས་གང་ཡང་མེད་པར་གནང་གལ་ཡིན་པར་གསུངས་ཡོད།
དེ་བཞིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དང་འབྲེལ་ཏེ་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་གྱི་ངོས་ནས་བོད་ནང་གི་འགྲོ་བ་མིའི་ཐོབ་ཐང་གནས་བབ་གླེང་སློང་གནང་བ་དང་ཆབས་ཅིག རྒྱ་གཞུང་གིས་བོད་ནང་གི་བོད་མིའི་ཆོས་དད་རང་དབང་དང་སྨྲ་བརྗོད་རང་དབང་ཐོག་དམ་དྲག་ཤུགས་ཆེ་བྱེད་བཞིན་པར་བློ་འཚབ་ཡོད་ཅེས་གསུངས་པ་མ་ཟད། དེ་བཞིན་རྒྱ་གཞུང་གི་ངོས་ནས་འཛིན་བཟུང་བཀག་ཉར་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་པ་དང། གསར་འགོད་པ། ཁྲིམས་རྩོད་པ་རྣམས་གློད་བཀྲོལ་དགོས་པའི་རེ་སྐུལ་ཞུས་ཡོད་པ་རེད།
དེ་བཞིན་རྒྱལ་ཁབ་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཐོག་རྒྱལ་ཚོགས་ནས་ཐུགས་སྣང་དགོས་ཞེས་ཚོགས་དུས་སྐབས་ཚོགས་མི་རྒྱལ་ཁབ་ ༦༤ ནས་སྐར་མ་གཉིས་ཀྱི་གཏམ་བཤད་ལས་རིམ་གྲུབ་རྗེས་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་སྲུང་སྐྱོབ་པ་ཁག་གིས་མུ་མཐུད་ནས་གཏམ་བཤད་སྤེལ་སྐབས་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ Melanie Blondelle ལགས་ཀྱིས་ Helsinki Foundation གཞུང་འབྲེལ་མིན་པའི་མཚན་ཐོག་ནས་རྒྱ་ནག་གཞུང་གིས་འཆར་གཞི་ལྡན་པའི་ཐོག་ནས་གཅིག་རྗེས་གཉིས་མཐུད་ཀྱིས་བོད་ནང་གི་བོད་མིའི་སྤྱི་ཚོགས་ཀྱི་ངོ་བོ་མཚོན་པའི་ཆོས་སྡེ་དང་ཤེས་རིག་ལྟེ་གནས་ཁག་ལ་ཆེད་དམིགས་ཀྱིས་རིམ་པས་རྩ་གཏོར་གཏོང་བཞིན་ཡོད་པ་དང། དེ་འབྲེལ་གནས་ཚུལ་ཕྱི་ཕྱོགས་སུ་མཁོ་སྤྲོད་བྱེད་མཁན་ཁག་འཛིན་བཟུང་བཀག་ཉར་བྱས་པ། བོད་ཕྲུག་ཚོ་བོད་པའི་ཆོས་རིག་དང་སྐད་ཡིག ཁོར་ཡུག་བཅས་ནས་ཐག་རིང་དུ་གཏོང་ཕྱིར་ས་གནས་རྒྱ་གཞུང་གིས་གཏན་འཇགས་སློབ་གྲྭ་གསར་འཛུགས་ཀྱི་ལས་གཞི་གཞི་རྒྱ་ཆེ་བ་སྤེལ་ཡོད་པ་དང། དེ་བཞིན་རྒྱ་གཞུང་གིས་འཛིན་བཟུང་བྱས་པའི་སྒོ་ཤེས་རབ་རྒྱ་མཚོ་ལགས་དང་རིན་ཆེན་ཚུལ་ཁྲིམས་ལགས་སོགས་ལ་སྨྲ་བརྗོད་རང་དབང་ལོངས་སུ་སྤྱོད་མཁན་བོད་མི་ཚོ་གང་བྱུང་དུ་འཛིན་བཟུང་བཀག་ཉར་དང་བཙོན་འཇུག་བྱེད་བཞིན་ཡོད་པ་སོགས་མངོན་གསལ་གྱི་སྙན་སེང་ཞུས་ཡོད།
ལྷག་པར་དུ་ཁོང་གིས་ལྷན་ཚོགས་དེའི་ཐོག་ནས་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གི་ངོས་ནས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གྱི་བྱ་སྤྱོད་སྤེལ་མཚམས་འཇོག་དགོས་པར་ནན་སྐུལ་ཡོང་བའི་འབོད་སྐུལ་ཞུས་པ་མ་ཟད་ད་བར་རྒྱ་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་རྡོག་རོལ་བཏང་བའི་བྱ་སྤྱོད་ཁག་གི་འགན་ཁུར་དགོས་པ་ཞིག་བཟོ་དགོས་པའི་རེ་འདུན་ཡང་ཞུས་འདུག
ཁ་སང་ད་དུང་ཡང་སུད་སི་དོན་ཁང་གི་འབྲེལ་ཡོད་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས་རྒྱལ་ཁབ་གཞན་གྱི་དབང་བསྒྱུར་འོག་ལྷུང་བའི་གྲངས་ཉུང་མི་རིགས་རྣམས་ཀྱི་སྲུང་སྐྱོབ་སླད་དུ་རྒྱལ་སྤྱིའི་ཚོགས་པ་ Society for Threaten People ཞེས་པའི་རྒྱལ་ཚོགས་ཀྱི་གཞུང་འབྲེལ་མིན་མཚན་ཐོག་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་བབ་སྙན་སེང་ཞུས་ཡོད་པ་དང་། སྐབས་དེར་ཁོང་ནས་རྒྱལ་ཚོགས་ཀྱི་ལྷན་ཚོགས་ཐེངས་ ༤༩ པ་མ་འཚོགས་པའི་ཉིན་གསུམ་གྱི་སྔ་རོལ་དུ་བོད་ཀྱི་རྒྱལ་ས་ལྷ་སར་རང་ལོ་ ༢༥ སོན་པའི་བོད་པའི་གཞས་པ་གྲགས་ཅམ་ཚེ་དབང་ནོར་བུ་ལགས་ཀྱིས་རྒྱ་གཞུང་གི་དྲག་པོའི་སྲིད་བྱུས་ལ་ངོ་རྒོལ་ཆེད་རང་ལུས་མེར་བསྲེགས་བཏང་ཡོད་པ་གཙོས་ད་བར་བོད་ནང་བོད་མི་ ༡༥༦ གིས་རང་ལུས་མེར་བསྲེགས་བཏང་ཡོད་སྐོར་སྙན་སེང་ཞུས་པ་མ་ཟད། དེ་བཞིན་རྒྱ་གཞུང་གིས་བོད་མིའི་ཆོས་དང་རིག་གཞུང་སྲུང་སྐྱོབ་བྱེད་མཁན་ཐོག་དྲག་གནོན་བྱས་དང་བྱེད་བཞིན་ཡོད་པ་དང། ལྷག་པར་དུ་རྒྱ་གཞུང་གིས་འཛིན་བཟུང་བཙོན་འཇུག་བྱས་པའི་བོད་མིའི་ཆབ་སྲིད་བཙོན་པ་སྒོ་ཤེས་རབ་རྒྱ་མཚོ་ལགས། ཨ་ཉག་སེང་སྒྲ་ལགས། དེ་བཞིན་རྡོ་རྗེ་བཀྲིས་ལགས་བཅས་ཀྱིས་གནད་དོན་ཐོག་ལྷན་ཚོགས་ནས་ཞིབ་འཇུག་ནན་པོ་གནང་དགོས་པའི་འབོད་སྐུལ་ཞུས་འདུག
དེ་བཞིན་ཁོང་གིས་རྒྱལ་ཚོགས་ཀྱི་གཙོ་འཛིན་མཆོག་ནས་རིང་མིན་རྒྱ་ནག་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་འཚམས་གཟིགས་དེ་འཐུས་ཚང་ཞིག་ཡོང་བར་བོད་ནང་ཕེབས་དགོས་པ་དང། ལྷན་ཚོགས་ཀྱི་ངོས་ནས་གཙོ་འཛིན་མཆོག་གིས་འཚམས་གཟིགས་དེའི་སྐབས་བོད་ནང་འགོག་རྐྱེན་མེད་པར་ཆེད་ཕེབས་ཡོང་བར་ཤུགས་གནོན་སྤྲོད་སྐྱོང་ཡོང་བའི་འབོད་སྐུལ་ཞུས་པ་མ་ཟད། རྒྱ་གཞུང་ནས་བོད་ནང་མི་རིགས་མཉམ་བསྲེས་ཀྱི་སྲིད་བྱུས་བརྒྱུད་བོད་མིའི་ངོ་བོ་དང་རིག་གཞུང་རྩ་མེད་ཀྱི་བྱ་སྤྱོད་སྤེལ་ཁག་འཕྲལ་མར་མཚམས་འཇོག་དགོས་པར་ལྷན་ཚོགས་ཀྱིས་རྒྱ་གཞུང་ལ་གནོན་ཤུགས་སྤྲོད་སྐྱོང་བའི་འབོད་སྐུལ་ཞུས་ཡོད།
