སུད་སི་གྲོང་ཁྱེར་ཇི་ནི་ཝར་འཚོགས་བཞིན་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༨ ཐོག་ཨ་རི་དང་ཡོ་རོབ་མཐུན་ཚོགས་ཀྱིས་གཙོས་པའི་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གིས་རྒྱ་ནག་གཞུང་གིས་བོད་དང་ཤར་ཏུ་ཀི་སི་ཐན། ཧོང་ཀོང་བཅས་ཀྱི་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ལ་སྐྱོན་བརྗོད་ཀྱིས་བློ་འཚབ་རྣམ་པ་ཆེད་བཏོན་གནང་འདུག
མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་འཛམ་གླིང་རྒྱལ་ཁབ་ཁག་གི་འགྲོ་བ་མིའི་ཐོབ་ཐང་གི་གནས་བབ་ཐོག་ཐུགས་སྣང་དགོས་པའི་ཚོགས་དུས་དེའི་ཐོག་ཨ་རི་དང་འཇར་མི་ནི། ཌན་མག སུད་ཌན། ནི་ཐར་ལན་ཌི། སུད་སི། དེ་བཞིན་རྒྱལ་ཁབ་ ༢༦ ལས་གྲུབ་པའི་ཡོ་རོབ་མཐུན་ཚོགས་བཅས་ཀྱིས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་བྱ་སྤྱོད་ལ་སྐྱོན་བརྗོད་ཀྱིས་བློ་འཚབ་ཀྱི་རྣམ་པ་ཆེད་བཏོན་གནང་ཡོད་པ་རེད།
སྐབས་དེར་ཨ་མི་རི་ཀའི་གཞུང་སྐུ་ཚབ་ཀྱིས་རྒྱ་ནག་གཞུང་གིས་བོད་དང་ཤར་ཏུ་ཀི་སི་ཐན་གཙོས་ཁུལ་དེའི་ནང་གི་གྲངས་ཉུངས་མི་རིགས་ཐོག་དཔལ་འབྱོར་བཤུ་གཞོག་དང། འཆར་གཞི་ལྡན་པའི་ངང་རིག་གཞུང་རྩ་གཏོར་དང་མི་རིགས་དབྱེ་འབྱེད། ལྷག་པར་དུ་བོད་ནང་བོད་མིའི་འགྲོ་བ་མིའི་ཐོབ་ཐང་དང་སྐད་ཡིག་རང་དབང། ཆོས་དད་རང་དབང། རིག་གཞུང་དང་འབྲེལ་བའི་བྱེད་སྒོ་གཉེར་རྒྱུར་ཚད་མཐོའི་དམ་དྲག་བྱེད་བཞིན་ཡོད་པ། དེ་བཞིན་ཤར་ཏུར་ཀི་སི་ཐན་ནང་དུ་མི་རིགས་ལྡེབས་གསོད་མཚོན་པའི་འགྲོ་བ་མིའི་རིགས་ལ་ནག་ཉེས་ཚབས་ཆེན་གསོག་བཞིན་པའི་བྱ་སྤྱོད་ཁག་ལ་ལྷན་ཚོགས་ཐོག་ཐེར་འདོན་གྱིས་སྐྱོན་བརྗོད་ཤུགས་ཆེ་གནང་འདུག་པ་མ་ཟད། དེ་བཞིན་རྒྱ་གཞུང་གིས་ཧོང་ཀོང་ནང་གི་འགྲོ་བ་མིའི་ཐོབ་ཐང་ལས་འགུལ་བ་འཛིན་བཟུང་བཀག་ཉར་བྱས་པར་སྐྱོན་བརྗོད་དང་སྦྲགས་ཏེ་འཕྲལ་མར་གློད་བཀྲོལ་དགོས་པ་བརྗོད་འདུག
སྐབས་དེའི་ཕ་རན་སི་སྐུ་ཚབ་ཀྱིས་རྒྱལ་ཁབ་ ༢༦ ལས་གྲུབ་པའི་ཡོ་རོབ་མཐུན་ཚོགས་ཀྱི་ཚབ་ཞུས་ཏེ་ལྷན་ཚོགས་ཐོག་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ནི་ལྷན་ཚོགས་ནས་མུ་མཐུད་ཐུགས་སྣང་གནང་དགོས་པའི་གནས་བབ་རང་གནས་སུ་ཡོད་པ་དང། རྒྱ་ནག་གཞུང་གི་ངོས་ནས་རྒྱ་ནག་རྒྱལ་ནང་དང་རྒྱལ་སྤྱིའི་ཁྲིམས་སྒྲིག་གཞིར་བཟུང་བོད་དང་ཤར་ཏུར་སི་ཐན། དེ་བཞིན་ནང་སོག་གཙོས་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་སྲུང་སྐྱོབ་དང་གུས་བརྩི་ཞུ་དགོས་ཞེས་ནན་བརྗོད་གནང་འདུག
དེ་བཞིན་ཡུ་རོབ་མཐུན་ཚོགས་ཀྱིས་མུ་མཐུད་རྒྱ་ནག་གཞུང་གིས་ཡུ་གུར་མི་རིགས་ཚུད་པའི་ཁུལ་དེའི་གྲངས་ཉུང་མི་རིགས་ཀྱི་ཁག་ལ་དམ་དྲག་དང་ལྟ་སྲུང། བཙན་དབང་གིས་ངལ་རྩོལ་བསྒྱུར་བཀོད། སྐྱེ་སྒོ་གཅོད་པ་དང་རྩུབ་སྤྱོད་ཀྱི་བྱ་སྤྱོད་སྤེལ་བ། དེ་བཞིན་སྨྲ་བརྗོད་རང་དབང་ལ་དམ་དྲག་གིས་གནས་ཚུལ་མཁོ་སྤྲོད་གནང་མཁན་དང་གསར་འགོད་པ་ཚོ་བཙན་ཁྲིད་ཀྱིས་བཀག་ཉར། གར་སོང་ཆ་མེད་དུ་གྱུར་བ། དེ་བཞིན་བཙོན་འཇུག་འོག་ཡོད་པ་ཚོའི་གནད་དོན་ལྷན་ཚོགས་ཐོག་གསལ་བཟོ་གནང་དགོས་པ་དང་འབྲེལ། རྒྱ་ནག་གཞུང་ནས་དེ་དག་ལ་ཁྲིམས་སྒྲིག་ལྟར་རང་དབང་ངང་ཁྲིམས་གཏུག་གནང་རྒྱུའི་རང་དབང་སྤྲོད་དགོས་པ་བརྗོད་ཡོད།
དེ་བཞིན་སྐབས་དེར་སུད་སི་སྐུ་ཚབ་ནས་རྒྱ་ནག་གཞུང་གིས་བོད་དང་ཤར་ཏུ་ཀི་སི་ཐན་གཙོས་ཁུལ་དེའི་གྲངས་ཉུངས་མི་རིགས་ཐོག་མུ་མཐུད་ནས་བཙན་ཁྲིད་བཀག་ཉར་བྱེད་བཞིན་པའི་བྱ་སྤྱོད་ལ་སྐྱོན་བརྗོད་ཤུགས་ཆེ་བྱས་འདུག་པ་མ་ཟད། རྒྱ་ནག་གཞུང་གིས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུས་ཏེ་བཙན་ཁྲིད་བཀག་ཉར་བྱས་པ་རྣམས་གློད་བཀྲོལ་དགོས་པར་ནན་བརྗོད་དང་། དེ་བཞིན་ནི་ཐར་ལན་ཌི་དང་། སུད་ཌན། ཌན་མག འཇར་མི་ནི་བཅས་ཁག་གི་སྐུ་ཚབ་ཚོས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ནི་ཡར་རྒྱས་གང་ཡང་ཕྱིན་མེད་པའི་ཁར་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པས་རྒྱ་ནག་གཞུང་གིས་འཆར་གཞི་དང་ལྡན་པའི་ངང་བོད་དང་ཤར་ཏུར་ཀི་སི་ཐན་གཙོས་ཁུལ་དེའི་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་ནི་ཧ་ཅང་གི་སེམས་འཚབ་བྱ་ཡུལ་ཞིག་ཡིན་པ་མ་ཟད་འགྲོ་བ་མིའི་ཐོབ་ཐང་ལྷན་ཚོགས་ཀྱི་ངོས་ནས་ཐུགས་སྣང་དགོས་པར་ནན་བརྗོད་ཀྱང་གནང་འདུག
ལྷན་ཚོགས་དེའི་ཐོག་དེ་བཞིན་ཚོགས་མི་རྒྱལ་ཁབ་ཨོ་སི་ཀྲོ་ལི་ཡ་དང་ཕི་ལན་ཊ། ནོར་ཝེ། དབྱིན་ཡུལ་བཅས་ཀྱི་སྐུ་ཚབ་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་གླེང་སྐབས་སུ་བོད་ཅེས་མིང་འབོད་མ་གནང་ཡང་། རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་བབ་གླེང་སློང་གནང་འདུག་པ་མ་ཟད། དེ་བཞིན་རྒྱ་ནག་གཞུང་ནས་མང་ཚོགས་ཀྱི་འགྲོ་བ་མིའི་ཐོབ་ཐང་ལ་གུས་བརྩི་ཞུ་དགོས་པ་དང་རྒྱལ་ཚོགས་ཀྱི་གཙོ་འཛིན་མཆོག་རྒྱ་ནག་ཏུ་དོན་དམ་པའི་རྟོག་ཞིབ་ཆེད་ཕེབས་འཇུག་དགོས་པའང་གསུངས་ཡོད།
