སུད་སི་གྲོང་ཁྱེར་ཇི་ནི་ཝར་འཚོགས་བཞིན་པའི་རྒྱལ་ཚོགས་ཀྱི་འགྲོ་བ་མིའིི་ཐོབ་ཐང་ལྷན་ཚོགས་ཐེངས་ ༤༦ ཐོག་ཨ་རིས་གཙོས་པའི་རྒྱལ་ཚོགས་ཀྱི་ཚོགས་མི་རྒྱལ་ཁབ་ ༡༣ གྱིས་རྒྱ་ནག་གཞུང་གིས་བོད་དང་ཤར་ཏུ་ཀིས་ཐན། ཧོང་ནང་གི་མང་ཚོགས་ཀྱི་འགྲོ་བ་མིའི་ཐོབ་ཐང་རྡོག་རྡོལ་གཏོང་བཞིན་པའི་གནས་སྟངས་གླེང་སློང་གནང་བ་དང་བློ་འཚབ་ཀྱིས་སྐྱོན་བརྗོད་གནང་འདུག
སྐབས་དེར་ལྷན་ཚོགས་ཐོག་ཨ་རིས་གཙོས་པའི་ཡོ་རོབ་རྒྱལ་ཁབ་ཨོ་སི་ཀྲིཡ་དང་ཅེཀ་སྤྱི་མཐུན་རྒྱལ་ཁབ། ཌན་མག ཕིན་ལན་ཌི། འཇར་མན། ནི་ཐར་ལན་ཌི་བཅས་ཀྱི་སྐུ་ཚབ་ཀྱིས་རྒྱ་ནག་གཞུང་གིས་བོད་དང་ཤར་ཏུར་ཀིས་ཐན་ནང་གི་མང་ཚོགསཀྱི་ཆོས་དད་རང་དབང་དང་སྨྲ་བརྗོད་རང་དབང། དེ་བཞིན་འདུ་འཛོམས་དང་འགྲོ་སྐྱོད་རང་དབང་ཐོག་ཆེས་དམ་དྲག་དང་། འཆར་གཞི་དང་ལྡན་པའི་རྡོག་རོལ་འཚབས་ཆེ་གཏོང་བཞིན་པར་སེམས་འཚབ་དང་སྦྲགས་ཏེ་སྐྱོན་བརྗོད་གནང་འདུག་པར་མ་ཟད། རྒྱ་ནག་གཞུང་གི་ངོས་ནས་གྲངས་ཉུང་མི་རིགས་ཚོོའི་འགྲོ་བ་མིའི་ཐོབ་ཐང་ལ་གུས་བརྩི་ཞུས་པའི་ཐོག་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ཚོགས་གཙོ་གཙོས་རང་དབང་ཅན་གྱི་ཞིབ་འཇུག་སྡེ་ཚན་ཞིག་བོད་དང་ཤར་ཏུར་ཀིས་ཐན་ནང་གི་གནས་སྟངས་ལ་དོན་འབྲས་སོན་པའི་རྟོག་ཞིབ་སླད་ཆེད་བསྐྱོད་ཀྱི་ཆོག་མཆན་སྤྲོད་དགོས་པར་ནན་སྐུལ་གནང་འདུག
ལྷག་པར་དུ་ལྷན་ཚོགས་ཐོག་ཁེ་ན་ཌའི་སྐུ་ཚབ་ཀྱིས་ཉེ་ཆར་རྒྱ་ནག་གཞུང་གི་བཙོན་ཁང་ནང་སྡུག་སྦྱོང་འོག་འདས་གྲོངས་སུ་ཕྱིན་པའི་བོད་མི་ཆབ་སྲིད་བཙོན་པའི་གནད་དོན་ཐོག་སེམས་འཚབ་ཀྱི་རྣམ་པ་སྟོན་པ་དང། འཇར་མ་ནི་དང་ཕིན་ལེནཊ་སྐུ་ཚབ་ཀྱིས་ཀྱང་རྒྱ་ནག་གཞུང་གི་ངོས་ནས་བོད་གཙོས་པའི་ཁུལ་དེའི་གྲངས་ཉུང་མི་རིགས་ཚོའི་འགྲོ་བ་མིའི་ཐོབ་ཐང་སྲུང་སྐྱོབ་དང་གོང་འཕེལ་ཐོག་མང་ཚོགས་ལ་ཐོབ་ཐང་དང་རང་དབང་ཆ་ཚང་བ་ཞིག་ལོངས་སུ་སྤྱོད་འཇུག་དགོས་ཞེས་ནན་སྐུལ་གནང་བ་དང། དེ་བཞིན་རྒྱ་གཞུང་གིས་དྲག་གནོན་དང་མི་རིགས་དབྱེ་འབྱེད་བརྒྱུད་གྲངས་ཉུང་མི་རིགས་གཙང་སེལ་བྱེད་བཞིན་པའི་བྱ་སྤྱོད་ལ་བློ་འཚབ་ཡོད་པ་དང་། ཁུལ་དེའི་ནང་འཛིན་བཟུང་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་ཚོ་གློད་བཀྲོལ་དགོས་པའི་འབོད་སྐུལ་གནང་ཡོད་པ་རེད། 
སྐབས་དེར་དབྱིན་ཡུལ་དང་སུ་ཌན། ཉི་ཧོང། ཕར་རན་སི། དེ་བཞིན་ཨེ་སི་ཏོ་ནིཡ་བཅས་རྒྱལ་ཁབ་ལྔས་བོད་ཅེས་མིང་འབོད་གནང་མེད་ཀྱང། རྒྱ་ནག་སྤྱི་དང་ལྷག་པར་དུ་རྒྱ་གཞུང་གིས་ཤར་ཏུ་ཀིས་ཐན་དང་ཧོང་ཀོང། གྲངས་ཉུང་མི་རིགས་ཚོའི་འགྲོ་བ་མིའི་ཐོབ་ཐང་རྡོག་རོལ་དང་དྲག་གནོན། འགྲོ་བ་མིའི་ཐོབ་ཐང་སྲུང་སྐྱོབ་གནང་མཁན་དང་གསར་འགོད་པ་ཚོ་འཛིན་བཟུང་བཀག་བསྐྱིལ་བྱེད་བཞིན་པའི་གནད་དོན་སོགས་གླེང་སླེང་གིས་སེམས་འཚབ་གནང་བར་མ་ཟད། རྒྱ་ནག་གཞུང་གིས་རྒྱལ་སྤྱིའི་གྲོས་མཐུན་དང་གཞི་རྩའི་ཐོབ་ཐང་ལ་བརྩི་སྲུང་དགོས་པའི་ནན་སྐུལ་ཡང་གནང་ཡོད།
ཁ་སང་རྒྱལ་ཚོགས་ཀྱི་ལྷན་ཚོགས་ཐོག་འཛམ་གླིང་ཡུལ་གྲུ་ཁག་གི་འགྲོ་བ་མིའི་ཐོབ་ཐང་ཐོག་ཐུགས་སྣང་ཞེས་པའི་ཚོགས་འདུར་འཇར་མ་ནི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ Kai Mueller ལགས་ཀྱིས་ Helsinki Foundation for Human Rights ཞེས་པའི་གཞུང་འབྲེལ་མིན་པའི་མཚན་ཐོག་ནས་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁུལ་དུ་ལག་ཤེས་སྦྱོང་བརྡར་གི་མིང་བྱང་འོག་གྲོང་སེབ་ཁུལ་གྱི་བོད་མི་ས་ཡ་གཅིག་ལྷག་ལ་གླ་ཕོགས་ཆེས་དམའ་བའི་ཐོག་དམག་གི་སྦྱོང་བརྡར་སྤྲོད་བཞིན་པ་དང་། དེ་བཞིན་བོད་དང་རྒྱ་ནག་གི་བཟོ་གྲྭར་ཨར་ལས་སོགས་ཀྱི་ནང་ངལ་རྩོལ་དུ་བཏང་ནས་ཐབས་བྱུས་དང་ལྡན་པའི་ངང་བོད་མི་རིགས་ཀྱི་ནང་ཆོས་དང་འབྲེལ་བའི་བསམ་བློའི་འདུ་ཤེས་བསྒྱུར་བཅོས་གཏོང་བཞིན་ཡོད་པ་སོགས་ཀྱི་གནད་དོན་ཁག་གཅིག་རྒྱལ་ཚོགས་ལ་སྙན་སེང་ཞུས་འདུག
སྐབས་དེར་སུད་སི་སྐུ་ཚབ་དོན་ཁང་གི་རྒྱལ་ཚོགས་འབྲེལ་མཐུད་པ་སྐལ་ལྡན་མཚོ་མོ་ལགས་ཀྱིས་ Society For Threaten People ཞེས་པའི་གཞུང་འབྲེལ་མིན་པའི་ཚོགས་པའི་མིང་ཐོག་ནས་བོད་ནང་གི་གནས་སྟངས་རྒྱལ་ཚོགས་ལ་སྙན་སེང་ཞུས་པ་དང་འབྲེལ། རྒྱ་ནག་ནས་ཐོག་མར་མཆེད་པའི་ཏོག་དབྱིབས་ནད་ཡམས་ཁྱབ་གདལ་ཆེས་ཆེར་འགྲོ་བཞིན་པའི་གནས་སྟངས་འོག་རྒྱ་ནག་གཞུང་གིས་བོད་ནང་ལྡབ་འགྱུར་གྱི་དམ་དྲག་ཆེ་རུ་བཏང་ཡོད་པ་དང། རྒྱ་ནག་གཞུང་གིས་བོད་ནང་གི་བོད་མི་ཚོར་༸གོང་ས་མཆོག་གི་༸སྐུ་པར་ཉར་རྒྱུར་དམ་དྲག་བྱེད་བཞིན་པར་མ་ཟད་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ་པ་ཚོར་ཆབ་སྲིད་ཉེས་མིང་སྐྱེལ་བ་དང། བོད་སྐད་ཀྱི་ཤེས་ཡོན་སློབ་གསོ་རྒྱ་སྐད་དུ་བཅོས་པ་དང། དེ་བཞིན་དབུལ་བྲལ་འགག་སྒྲོལ་གྱི་མིང་བྱང་འོག་འབྲོག་པ་རྣམས་བཙན་དབང་གིས་གཞི་སྤོས་བཅུག་ཡོད་པ་སོགས་ལ་བརྟེན་ནས་ཕྱི་ལོ་༢༠༠༩ ནས་ད་བར་བོད་མི་ ༡༥༥ ཡིས་རྒྱ་གཞུང་ལ་ཞི་རྒོལ་གྱི་རང་ལུས་མེར་བསྲེགས་གནང་བའི་གནས་སྟངས་བྱུང་ཡོད་ཅེས་སྙན་སེང་ཞུས་ཡོད།དེ་བཞིན་ཁོང་རྣམ་པ་གཉིས་ཀྱིས་ལྷན་ཚོགས་བརྒྱུད་རྒྱ་ནག་གཞུང་གིས་བོད་ནང་བོད་མིའི་ཐོག་དྲག་གནོན་གྱི་སྲིད་བྱུས་སྤེལ་ཁག་མཚམས་འཇོག་དགོས་པ་དང་། རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་མཆོག་རྒྱ་ནག་ཏུ་འཚམས་གཟིགས་སྐབས་བོད་ཀྱི་ས་ཁུལ་དུ་ངེས་པར་དུ་ཕེབས་དགོས་པ་དང། དེ་བཞིན་རྒྱལ་ཚོགས་ཀྱི་ཁྱད་ལས་རྟོག་ཞིབ་སྡེ་ཚན་དང་ཆེས་མཐོའི་འགྲོ་བ་མིའི་ཐོབ་ཐང་གཙོ་འཛིན་བཅས་རང་དབང་ཐོག་ས་གནས་ཐོག་གི་གནས་སྟངས་རྟོག་ཞིབ་ཆེད་རྒྱ་གཞུང་ནས་མགྲོན་འབོད་ཞུ་དགོས་པའི་རེ་འདུན་ཡང་ཆེད་བཏོན་གནང་འདུག
