རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཁྱད་ལས་ཚོགས་ཆུང་གིས་རྒྱ་ནག་གཞུང་གིས་རྒྱལ་ཚོགས་ལ་ཕུལ་བའི་ལན་འདེབས་སྙན་ཐོ་དེ་རྒྱལ་ཚོགས་ཀྱི་ཁྲིམས་སྒྲིག་འབྲུ་དོན་ལྟར་འདོད་བློ་ཁེངས་པ་ཞིག་བྱུང་མི་འདུག་ཅེས་བརྗོད་འདུག
ཕྱི་ལོ་ ༢༠༡༨ ལོར་རྒྱལ་ཚོགས་མི་རིགས་དབྱེ་འབྱེད་འགོག་ཐབས་ཚོགས་ཆུང་ནས་རྒྱལ་ཚོགས་ཀྱི་ཁྲིམས་སྒྲིག་འབྲུ་དོན་གཞི་བཟུང་རྒྱ་ནག་ནང་གི་མི་རིགས་དབྱེ་འབྱེད་ཀྱི་གནས་བབ་དང་འབྲེལ་བའི་དུས་བཀག་བསྐྱར་ཞིབ་གནང་ཡོད་ཅིང་། སྐབས་དེར་རྒྱ་ནག་གཞུང་གིས་གོང་གསལ་འབྲེལ་ཡོད་ཚོགས་ཆུང་ནས་དུས་བཀག་བསྐྱར་ཞིབ་དང་འབྲེལ་རྒྱ་ནག་ལ་སྤྲད་པའི་བསམ་འཆར་ལྟར་རྒྱལ་ཚོགས་ཀྱི་ཚོགས་ཆུང་ལ་ལན་འདེབས་སྙན་ཐོ་ཞིག་ཕུལ་ཡོད་པ་རེད།
འདི་ལོའི་ཕྱི་ཟླ་ ༨ ནང་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་ཚོགས་ཐེངས་ ༡༠༡ ཐོག་རྒྱ་ནག་གཞུང་གིས་རྒྱལ་ཚོགས་ཀྱི་གོང་གསལ་ཚོགས་ཆུང་ལ་སྤྲད་པའི་མཇུག་སྐྱོང་ལན་འདེབས་སྙན་ཐོར་བསྐྱར་ཞིབ་གནང་བའི་སྙན་ཐོ་ཞིག་ཟླ་ ༡༡ ཚེས་ ༢༤ ཉིན་ཡོངས་གྲགས་གནང་ཡོད་པ་དང་། རྒྱ་ནག་གཞུང་གིས་རྒྱལ་ཚོགས་ལ་ཕུལ་བའི་ལན་འདེབས་སྙན་ཐོ་དེ་རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཀྱི་ཁྲིམས་སྒྲིག་འབྲུ་དོན་གཞི་བཟུང་འདོད་བློ་ཁེངས་པ་བྱུང་མི་འདུག་ཅེས་བརྗོད་འདུག་པ་མ་ཟད། རྒྱ་གཞུང་ནས་སྙན་ཐོ་ཞིག་བསྐྱར་དུ་རྒྱལ་ཚོགས་ཀྱི་ཚོགས་ཆུང་ལ་རིང་མིན་ ༢༠༢༣ ཟླ་ ༡ པོའི་ནང་ཚུད་ལ་ཕུལ་ཟིན་དགོས་སྐོར་བརྗོད་འདུག
ད་ལན་རྒྱལ་ཚོགས་ཀྱི་ཚོགས་ཆུང་ནས་རྒྱ་ནག་ལ་དུས་བཀག་སྐྱར་ཞིབ་ལན་འདེབས་མཇུག་སྐྱོང་སྙན་ཐོར་དཔྱད་ཞིབ་གནང་སྟེ་སྤེལ་བའི་སྙན་ཐོ་དེའི་ནང་བོད་དོན་དང་འབྲེལ་བའི་ཚན་པར་རྒྱ་ཚོགས་ཀྱི་འབྲེལ་ཡོད་ཚོགས་ཆུང་གི་ངོས་ནས་རྒྱ་ནག་གཞུང་གིས་བོད་ནང་དུ་སྐད་གཉིས་སློབ་གསོ་སྲིད་བྱུས་ལག་བསྟར་བརྒྱུད་དེ་བོད་ཁུལ་གྱི་གཞི་རིམ་སློབ་གྲྭ་ཁག་ཏུ་བོད་ཀྱི་སྐད་ཡིག་ཚབ་ཏུ་རྒྱ་སྐད་གཙོ་བོར་འཛིན་པའི་སློབ་གསོ་སྤྲོད་བཞིན་པའི་གནད་དོན་དང་། རྒྱ་ནག་གཞུང་གིས་སྐད་ཡིག་རང་དབང་སྲུང་སྐྱོབ་ལས་འགུལ་བར་དྲག་གནོན་བྱེད་བཞིན་པའི་གནད་དོན་ཐོག་སེམས་འཚབ་ཀྱི་རྣམ་པ་བསྟན་པ་དང་འབྲེལ། རྒྱ་ནག་གཞུང་ནས་དམ་དྲག་དང་འཇིགས་སྐུལ་གང་ཡང་མེད་པར་མང་ཚོགས་ལ་ཤེས་ཡོན་སློབ་གསོའི་སྐོར་གླེང་སློང་གནང་རྒྱུའི་རང་དབང་སྤྲོད་དགོས་པར་མ་ཟད། སློབ་གྲྭ་ཁག་ཏུ་ཕ་སྐད་གཙོ་འཛིན་གྱི་སློབ་ཁྲིད་དང་འདང་ངེས་བཞིན་པའི་སློབ་གསོའི་ཆ་རྐྱེན་བསྐྲུན་དགོས་པར་ནན་བརྗོད་གནང་འདུག
རྒྱལ་ཚོགས་དུས་སུ་དེ་འབྲེལ་ཐོག་བོད་དོན་ཞུ་གཏུག་གནང་མཁན་འབྲེལ་ཡོད་སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ང་ཚོའི་ངོས་ནས་ད་བར་རྒྱལ་ཚོགས་སུ་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་གནད་དོན་འདྲ་མིན་ཞུ་གཏུག་གནང་མུས་ཁྲོད་འདིར་ད་ལན་རྒྱལ་ཚོགས་ཀྱི་འབྲེལ་ཡོད་ཚོགས་ཆུང་གི་སྙན་ཐོར་བོད་ནང་གི་སྐད་ཡིག་རང་དབང་གི་གནས་བབ་གསལ་སྟོན་གནང་བ་དེས་བོད་དོན་ཞུ་གཏུག་གི་ལས་དོན་ལ་གྲུབ་འབྲས་ སོན་རྒྱུ་ཡོད་པ་མངོན་སྟབས་མ་འོངས་པར་མུ་མཐུད་འབད་རྩོན་ཞུ་དགོས་གལ་ཡིན་པ་གསུངས་ཡོད།
གཞན་ཡང་སྙན་ཐོར་རྒྱ་ནག་གཞུང་ནས་ཁུལ་དེའི་ནང་གི་གྲངས་ཉུང་མི་རིགས་ཀྱི་ཕྱི་སྐྱོད་རང་དབང་ལ་དོ་དམ་སྟངས་འཛིན་བྱ་སྤྱོད་མཚམས་འཇོག་དགོས་པར་ནན་སྐུལ་གནང་འདུག་པར་མ་ཟད། ཉེ་སྔོན་རྒྱ་ནག་གཞུང་གི་གཞུང་འབྲེལ་མིན་པའི་ཚོགས་པ་དང་འབྲེལ་བའི་ཁྲིམས་སྒྲིག་གཏན་འབེབས་འོག་ཕྱི་ནང་གི་གཞུང་འབྲེལ་མིན་པའི་ཚོགས་པ་མང་དག་ཅིག་སྒོ་རྒྱབ་བཅུག་པ་དང་འབྲེལ་ཡོད་མི་སྣ་གར་སོང་ཆ་མེད་བཏང་བ། བཙོན་འཇུག་དོ་དམ་བྱས་པའི་ གནད་དོན་ལུང་འདྲེན་གྱིས་ད་ལྟའི་རྒྱ་ནག་ནང་ཕྱིའི་རྒྱལ་ཁབ་ཀྱི་རང་དབང་ཅན་གྱི་གཞུང་འབྲེལ་མིན་པའི་ཚོགས་པ་ག་ཚོད་ཡོད་མེད་དང་། དེ་དག་གི་ལས་དོན་གནང་ཕྱོགས་བཅས་པ་ཞིབ་བཀོད་མཇུག་སྐྱོང་གི་སྙན་ཐོ་རྒྱལ་ཚོགས་ལ་ཕུལ་དགོས་པའི་སྐུལ་འདེད་ཀྱང་གནང་འདུག
རྩ་བའི་ཕྱི་ལོ་ ༢༠༡༨ ལོར་རྒྱལ་ཚོགས་ཀྱི་མི་རིགས་ཀྱི་དབྱེ་འགོག་ཐབས་ཚོགས་ཆུང་གཙོས་པའི་རྒྱལ་ཚོགས་ཀྱི་ཁྱད་ལས་ཚོགས་ཆུང་བཞི་མཉམ་འབྲེལ་གྱིས་རྒྱ་ནག་གཞུང་གིས་བོད་ནང་གི་བོད་མི་ཚོར་ཕྱི་སྐྱོད་ལག་འཁྱེར་སྤྲོད་རྒྱུར་འགོག་རྐྱེན་བཟོས་པ་ཐེར་འདོན་གནང་ཡོད་པ་དང་། སུད་སི་སྐུ་ཚབ་དོན་གཅོད་ཁང་གིས་རྒྱ་ནག་གཞུང་ནས་མི་རིགས་དབྱེ་འབྱེད་འགོག་ཐབས་དང་འབྲེལ་བའི་རྒྱལ་ཚོགས་ཀྱི་ཁྲིམས་སྒྲིག་འབྲུ་དོན་གཞི་བཟུང་དོན་འཁྱོལ་ལག་བསྟར་བྱེད་ཀྱི་མེད་པའི་སྙན་ཐོ་འདི་བཞིན་འབྲེལ་ཡོད་ཚོགས་ཆུང་ལ་ཕུལ་ཡོད་པ་རེད།
