བོད་ཡིག

ཀ་ཁ་ག་ང་རྣམ་པར་རྒྱལ་འགྱུར་གཅིག་ཅེས་པའི་འབོད་སྒྲའི་ཐོག་བཞུགས་སྒར་རྡ་རམ་ས་ལ་ནས་ལ་དྭགས་བར་གོམ་བགྲོད་ལས་འགུལ་སྤེལ་མཁན་སྐལ་བཟང་མཐར་ཕྱིན་ལགས་དང་། ཟངས་དཀར་སྟོང་སྡེ་ནས་ཡིན་པའི་ལ་དྭགས་པའི་གཞོན་སྐྱེས་བསྟན་འཛིན་ཆོས་གྲགས་ལགས་རྣམ་གཉིས་ཁ་སང་ཕྱི་ཟླ་ ༨ པའི་ཚེས་ ༡༦ ཉིན་གྱི་ཞོགས་པ་ཆུ་ཚོད་ ༨།༣༠ ཐོག་ལ་དྭགས་བསོད་ནམས་གླིང་ལ་སྤྱི་ལས་ཁུངས་ཀྱི་མདུན་ཐང་དུ་བདེ་འབྱོར་བྱུང་ཞིང་། ལ་དྭགས་བོད་ཁྱིམ་སློབ་ཟུར་ཚོགས་པའི་སྣེ་ཁྲིད་འོག་བོད་མི་རྣམས་ནས་ཁོང་གཉིས་ལ་སྣེ་ལེན་གཟབ་རྒྱས་ཞུས་ཏེ་མཛད་རིམ་སྟབས་བདེ་ཞིག་གོ་སྒྲིག་ཞུས་འདུག དེ་ཡང་མཛད་སྒོའི་ཐོག་ལ་སྤྱི་ལས་ཁུངས་ཀྱི་ལས་དྲུང་བསྟན་འཛིན་ཀུན་བཟང་ལགས་དང་། ས་གནས་མང་གཙོ་ཀ་བ་གསུམ་གྱི་མཛད་གཙོ་རྣམས་པ། གཞུང་འབྲེལ་དང་གཞུང་འབྲེལ་མིན་པའི་སྐུ་ཚབ་ཁག གཞན་ཡང་མང་ཚོགས་ཁག་ཅིག་ནས་ཁོང་རྣམས་གཉིས་ལ་མཇལ་དར་སྒྲོན་འབུལ་གནང་སོང་། སྐབས་དེར་ས་གནས་འཐུས་མིའི་ཚོགས་གཙོ་དོན་གྲུབ་ཚེ་རིང་ལགས་ནས་གསུང་བཤད་གནང་བའི་ཁྲོད། རྒྱ་ནག་གི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་གྱི་ཁྲིམས་ཡིག་ཟེར་བ་དེ་ལག་བསྟར་བྱེད་འགོ་བཙུགས་པའི་ཉིན་རྗེས་མ་ཕྱི་ཟླ་ ༧ ཚེས་ ༢ ཉིན་བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས། ཨ་རི་ནིའུ་ཡོག་གྲོང་ཁྱེར་དུ་ཡོད་པའི་རྒྱལ་ཚོགས་ཀྱི་ལས་ཁུངས་ཀྱི་མདུན་དུ་བོད་དོན་ཆེད་སྐུ་ལུས་མེར་མཆོད་ཕུལ་རྗེས། སྐལ་བཟང་མཐར་ཕྱིན་ལགས་ཀྱིས་མ་སྐུལ་དྭངས་བླངས་ཐོག་དམ་པ་དེ་ཉིད་ལ་རྗེས་དྲན་དང་འབྲེལ། གཙོ་བོ་བོད་ཀྱི་སྐད་ཡིག་རྒྱུན་འཛིན་དང་སྲུང་སྐྱོབ་སླད་ཞི་བའི་གོམ་བགྲོད་གནང་བར་ཡི་རང་བསྔགས་བརྗོད་ཡོད་བཅས་གསུངས་སོང་། གཞན་ཡང་མང་ཚོགས་ཁག་ཅིག་ལ་སྐལ་བཟང་མཐར་ཕྱིན་ལགས་སུ་ལས་འགུལ་དེ་དང་འབྲེལ་ནས་བཀའ་འདྲི་ཞུས་སྐབས། ཁོང་གིས་གཞི་རྩའི་ཀ་ཁ་ག་ང་རྣམ་པར་རྒྱལ་གྱུར་གཅིག་ཅེས་པའི་ལས་འགུལ་སྤེལ་གོ་དོན་ནི། བོད་ཀྱི་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་རྒྱལ་ཁབ་དང་མི་རིགས། སྐད་ཡིག རིགས་གཞུང་གི་ཆེད་དུ་རང་སྲོག་བློས་བཏང་གནང་ཡོད་སྟབས། སོ་སོའི་ངོས་ནས་གང་ཐུབ་ཅི་ཐུབ་ཀྱིས་འདི་ལྟ་བུའི་ལས་འགུལ་ཞིག་མ་སྤེལ་ཐབས་མེད་ལྟ་བུའི་ཚོར་སྣང་ཞིག་བྱུང་ཡོད་པ་དང་། ལས་འགུལ་འདི་ནི་གཙོ་བ་དཔའ་བོ་བློ་དགའ་ལགས་ཀྱི་བློ་གཏོང་ལ་ཆེད་མཐོང་འབུལ་རྒྱུ་དང་། རྒྱ་ནག་གཞུང་གི་གདུག་རྩུབ་དང་ཁྲིམས་ཡིག་གསར་བཟོ་ལག་བསྟར་བྱེད་པ་དེར་དུས་དང་རྣམ་པ་ཀུན་དུ་ངོ་རྒོལ་མཚོན་བྱེད་ཡིན་པ་གསུངས་སོང་། དེ་བཞིན་ལས་འགུལ་འདིའི་ངོ་བོའི་ཐོག་ནས་ཀ་ཁ་ག་ང་རྣམ་པར་རྒྱལ་གྱུར་གཅིག་ཅེས་པ་ནི། བོད་མི་རིགས་ཀྱི་སྐད་ཡིག་མཚོན་གྱི་ཡོད་ཅིང་། འགའ་རེས་ནས་རང་བཙན་གྱི་འབོད་སྒྲ་མེད་པར་ཞི་བའི་འབོད་སྒྲ་འམ་སྐད་ཡིག་གི་ཐོག་ནས་ལས་འགུལ་སྤེལ་གོ་དོན་གང་ཡིན་ནམ་ཞེས་མང་ཚོགས་ནང་དགོངས་ཚུལ་ཡོང་གི་ཡོད་སྟབས། མང་གཙོའི་ལམ་ལུགས་ནང་དེ་ལྟ་བུའི་བསམ་ཚུལ་ཡོང་ཆོག་གི་ཡོད་ལ་དེ་ནི་མང་གཙོའི་ཁྱད་ཆོས་ཤིག་ཡིན་པ་དེ་ལྟར་ཡང་། ལས་འགུལ་གྱི་ངོ་བོ་གཙོ་བོ་ནི་བོད་ཀྱི་སྐད་ཡིག་ཀ་ཁ་ག་ང་རྣམ་པར་རྒྱལ་འགྱུར་གཅིག་ཅེས་པ་དེ་ཡིན་པ་འགྲེལ་བརྗོད་གནང་སོང་།

རྒྱལ་ཚོགས་ཀྱི་གྲངས་ཉུང་མི་རིགས་ཀྱི་གནད་དོན་ཐད་ཀྱི་གླེང་སྟེགས་ཐོག་བོད་མིའི་སྐུ་ཚབ་ནས་གཏམ་བཤད།

ཕྱི་ལོ་ ༢༠༢༥ ལོའི་སྨོན་ལམ་མངོན་འགྱུར་མཛད་སྒོའི་ཐོག་མངོན་འགྱུར་བཞི་དབུ་འབྱེད།

ཉེ་ལམ་ཕྱི་ཟླ་ ༤ ཚེས་ ༣༠ ཉིན་མོ་དེ་བཞིན་བོད་ཀྱི་ཡིག་གཟུགས་ཉིན་མོ་ཁེལ་ཡོད་པ་དང་བསྟུན། བོད་ཕྱི་ནང་གཉིས་སུ་ཉིན་མོ་དེ་ཉིད་རྣམ་པ་འདྲ་མིན་སྒོ་ནས་སྲུང་བརྩི་གནང་བཞིན་པའི་ཁྲོད། རྒྱ་ནག་གི་གྲོང་ཁྱེར་ཁྲན་ཏུའུ་རུ་པདྨ་གསེར་སྨྱུག་རྟགས་མའི་སྐབས་གཉིས་པའི་ཡིག་གཟུགས་འགྲན་སྡུར་གཟེངས་བསྟོད་མཛད་སྒོ་འཚོགས་པའི་བརྒྱུད་ཉིན་མོ་དེ་སྲུང་བརྩི་གཟབ་རྒྱས་ཞུས་འདུག དེ་ཡང་ཡིག་གཟུགས་འགྲན་སྡུར་གྱི་མཛད་སྒོའི་ཐོག་བོད་མདོ་དབུས་ཁམས་གསུམ་གྱི་མཁས་དབང་དང་། དགེ་རྒན་ཆེན་མོ་མང་པོ་འཛོམས་ཡོད་པ་མ་ཟད། བོད་ཉ་རོང་རྫོང་ནས་ཡིན་པའི་དབྱུང་དྲུང་དཔལ་རྡོར་དང་བཀྲ་ཤིས་དཔལ་འབྱོར་གཉིས་ཀྱི་ཡིག་གཟུགས་བརྩམས་བྱ་ཉ་རོང་བྲོ་ཚིགས་སྣ་བའི་བདུད་བརྩི་ཞེས་པ་རིང་ཚད་མི་ཊར་ ༡༠༤༦.༩༦ ཡོད་པ་དེར་ The World Record Certification ཞེས་འཛམ་གླིང་ཟིན་ཐོ་དཔང་ཡིག་གི་ངོས་འཛིན་ཐོག་ཡིག་གཟུགས་བརྩམས་བྱའི་འཛམ་གླིང་གི་གཟེངས་མཐོར་བཀོད་འདུག མ་ཟད། པདྨ་མ་གསེར་སྨྱུག་རྟགས་མའི་ཡིག་གཟུགས་འགྲན་སྡུར་ཁྲོད། ཆབ་མདོ་བ་རྒན་བཀྲ་ཤིས་དོན་འགྲུབ་ལགས་དང་བསྟན་འཛིན་རྒྱ་མཚོ་ལགས་རྣམ་གཉིས་ལ་ཐེངས་འདིའི་འགྲན་སྡུར་ཁྲོད་ཨང་རིམ་དང་པོ་སོན་ཡོད་པ་དང་ཆབས་ཅིག ཨང་གཉིས་པ་ཐོབ་མཁན་གཉིས། གསུམ་པ་ཐོབ་མཁན་གསུམ། ཕུལ་བྱུང་བྱ་དགའ་ཐོབ་མཁན་བྱུང་ཡོད་པ་མ་ཟད། ཡིག་གཟུགས་འགྲན་སྡུར་འདིའི་ནང་མདོ་དབུས་ཁམས་གསུམ་གྱི་ཡིག་གཟུགས་ཆེད་མཁས་པ་གཞོན་སྐྱེས་མང་པོས་མཉམ་ཞུགས་གནང་ཡོད་འདུག

བྷན་གཙུག་ལག་སློབ་ཆེན་ལ་བོད་ཀྱི་སྐད་ཡིག་འཛིན་གྲྭ་མཚམས་འཇོག་བྱ་རྒྱུའི་ཐག་གཅོད་ཕྱིར་འཐེན་དགོས་པའི་ཞུ་སྐུལ།

རྒྱ་ནག་གི་དབང་བསྒྱུར་འོག་བོད་ཀྱི་སྐད་ཡིག་སྣ་མང་ཕུན་སུམ་ཚོགས་པ་དེ་ཉམས་རྒྱུའི་ཉེན་ཁ་ཡོད་པ་གསུངས་འདུག

ལ་དྭགས་བོད་མིས་བྷོ་ཊིའི་སྐད་ཡིག་ཉིན་མོ་སྲུང་བརྩི་ཞུས་པ།

ཨ་རིའི་སྲིད་འཛིན་བྷེ་ཊན་གྱི་གཞུང་འཛིན་གསར་བའི་ཕྱི་སྲིད་དྲུང་ཆེ་མཆོག་གིས་ཨ་རིའི་ངོས་ནས་བོད་དོན་ལ་ཤུགས་སྣོན་སྐྱོན་རྒྱུ་ཡིན་པའི་ཁས་ལེན་གནང་འདུག

རྒྱ་ནག་གཞུང་གིས་བོད་རང་སྐྱོང་ལྗོངས་ཀྱི་ཆ་འཕྲིན་དང་དྲ་རྒྱ་སྤྱད་དེ་རྒྱལ་ཁབ་ཁ་བྲལ་གཏོང་བ་དང་རྒྱལ་ཁབ་གཅིག་གྱུར་ལ་གཏོར་བཤིག་གཏོང་བའི་བྱེད་སྒོ་སྤེལ་མི་ཆོག་པའི་སྐོར་གྱི་བརྡ་ཁྱབ་ཅེས་པ་ཞིག་ཕྱིར་བསྒྲགས་ཀྱིས་བོད་མི་རྣམས་ཀྱིས་དྲ་རྒྱ་བེད་སྤྱོད་གཏོང་ཕྱོགས་ལ་དམ་དྲག་ཤུགས་ཆེར་གཏོང་རྒྱུའི་གསལ་བསྒྲགས་ཤིག་སྤེལ་འདུག