ཁ་སང་ཨ་རིའི་གྲོས་ཚོགས་གོང་མར་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ Jeff Markley ལགས་དང་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་ Bill Haggerty ལགས། དེ་བཞིན་སྐུ་ཞབས་ John Cornyn ལགས་བཅས་གསུམ་གྱིས་ Reaffirming the state of Arunachal Pradesh as Indian Territory and condemning the People’s Republic of China’s provocations in South Asia ཞེས་པའི་གྲོས་ཆོད་གྲོས་འཆར་བསྣམས་པ་དང་འབྲེལ་ཨ་རུ་ནཱ་ཅལ་རྒྱ་གར་གྱི་ཁ་བྲལ་ཐབས་མེད་པའི་ས་ཁུལ་ཡིན་པ་དང་། རྒྱ་ནག་གིས་འཕགས་བོད་ས་མཚམས་ཁུལ་དུ་དཔུང་འཇུག་གི་བྱ་སྤྱོད་སྤེལ་བཞིན་པར་སྐྱོན་བརྗོད་གནང་འདུག
དེ་རིང་ Hidustan Times གསར་ཁང་གིས་གནས་ཚུལ་སྤེལ་བར་ཁ་སང་ཨ་རིའི་གྲོས་ཚོགས་གོང་མའི་ནང་རྒྱ་དཀར་ནག་གཉིས་ཀྱི་གནད་དོན་ཐོག་གྲོས་ཆོད་ཆེས་ཐོག་མ་ཆེད་བཏོན་གནང་བར་ཨ་རིའི་ངོས་ནས་རྒྱ་དཀར་ནག་གཉིས་དབར་རྩོད་རྙོག་ཡོད་པའི་རྒྱ་གར་བྱང་ཤར་ཨ་རུ་ནཱ་ཅལ་གྱི་ས་ཁུལ་རྣམས་རྒྱ་གར་གྱི་ཁ་བྲལ་ཐབས་མེད་པའི་ས་ཁུལ་ཡིན་པའི་བཞེངས་ཕྱོགས་ཁ་གསལ་དགོས་པ་དང་འབྲེལ། རྒྱ་གར་གྱི་ས་ཁོངས་བདག་དབང་ལ་རྒྱབ་སྐྱོར་གནང་དགོས་པ། ས་མཚམས་ས་ཁུལ་དུ་གྲོང་ཚོ་གསར་བསྐྲུན། ཨ་རུ་ནཱ་ཅལ་གྱི་གྲོང་ཁྱེར་ཁག་གཅིག་ལ་རྒྱ་ཡིག་ཐོག་མིང་གསར་པ་བཏགས་པའི་ས་ཁྲ་འདོན་སྤེལ་བྱས་པ། དེ་བཞིན་འབྲུག་གི་ས་ཁུལ་དུའང་བཙན་འཛུལ་བྱེད་བཞིན་པ་བཅས་ངན་བྱུས་རྣམས་ལ་སྐྱོན་བརྗོད་ནན་པོ་གནང་འདུག
རྒྱ་གར་གྱི་ངོས་ནས་ས་མཚམས་ཁུལ་དུ་འབྲེལ་གཏུག་དང་རྒྱང་སྲིང་གཙོས་སྲུང་སྐྱོབ་དང་འབྲེལ་བའི་འཛུགས་བསྐྲུན་ལས་གཞི་རྒྱ་སྐྱེད་བཏང་བ་དང་། བཅའ་དངོས་ཉོ་ཚོང་གི་བརྒྱུད་རིམ་བཟང་དུ་བཏང་བ། དེ་བཞིན་འཕྲོད་བསྟེན་གཙོས་སྡེ་ཚན་གཞན་གྱི་ནང་དུ་ཐེ་ཝན་དང་འབྲེལ་ལམ་ཤུགས་ཆེ་རུ་བཏང་བ་སོགས་རྒྱ་ནག་གི་བདེ་འཇགས་ཀྱི་ཉེན་ཚབས་ལ་ཁ་གཏད་ཀྱི་ལས་དོན་སྤེལ་ཕྱོགས་ལ་བསྔགས་བརྗོད་དང་སྦྲགས། ཨ་རི་དང་རྒྱ་གར་ཕྱོགས་གཉིས་ཀྱིས་རྒྱ་གར་དང་ཞི་བདེ་རྒྱ་མཚོའི་ཁུལ་དུ་རང་དབང་དང་འཛུགས་བསྐྲུན་ཡར་རྒྱས་ཀྱི་ཁོར་ཡུག་བསྐྲུན་རྒྱུ་སོགས་ལ་མཐུན་འབྲེལ་ཤུགས་ཆེ་རུ་བཏང་བ་གཙོས་རྒྱ་ནག་ལ་གདོང་ལེན་ལས་གཞིའི་མ་དངུལ་ཞེས་པའི་འོག་ཨ་རིའི་ཕྱི་སྲིད་ལས་ཁུངས་དང་ USAID བཅས་བརྒྱུད་ནས་རྒྱ་གར་གྱི་ས་མཚམས་ས་ཁུལ་དུ་སྲུང་སྐྱོབ་དང་འཛུགས་བསྐྲུན་ལས་གཞིར་རོགས་སྐྱོར་ཤུགས་ཆེ་བྱས་ནས་ཨ་རི་དང་བློ་མཐུན་པའི་རྒྱལ་ཁབ་རྣམས་ལ་ཡང་དེ་ལྟར་གནང་དགོས་པའི་སྐུལ་མ་གནང་རྒྱུ་ཡིན་སྐོར་གསུངས་འདུག
ཨ་རིའི་གྲོས་ཚོགས་གོང་མར་གྲོས་ཆོད་ཆེད་བཏོན་གནང་མཁན་ཁོངས་ནས་སྐུ་ཞབས་ Jeff Merkley ལགས་ལ་མཚོན་ན་ CECC ཞེས་པའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཡིན་པ་དང་། སྐུ་ཞབས་ Bill Haggerty ལགས་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་མི་ཡིན་པ། དེ་བཞིན་ John Cornyn ལགས་གྲོས་ཚོགས་ཀྱི་རྒྱ་གར་སྡེ་ཚན་གསར་འཛུགས་གནང་མཁན་དང་ད་ལྟའི་ཚོགས་གཙོ་ཡང་ཡིན་པ་རེད།
སྤྱིར་ད་བར་ཨ་རིའི་གཞུང་གི་ངོས་ནས་ཨ་རུ་ནཱ་ཅལ་དེ་རྒྱ་གར་གྱི་ཆ་ཤས་སུ་ངོས་འཛིན་གནང་བཞིན་ཡོད་པ་དང་། ཕྱི་ལོ་ ༢༠༢༠ ལོའི་གྷལ་ཝན་ས་ཁུལ་དུ་རྒྱ་ནག་གི་དཔུང་འཇུག་གི་བྱ་སྤྱོད་ལ་ཨ་རིའི་གྲོས་ཚོགས་འོག་མར་སྐྱོན་བརྗོད་ཀྱི་གྲོས་ཆོད་འགོད་འབུལ་ཞུས་ཡོད་ཀྱང་། ད་བར་གྲོས་ཚོགས་གོང་མའི་ནང་ཨ་རུ་ནཱ་ཅལ་གྱི་བདག་དབང་དང་རྒྱ་ནག་གི་དཔུང་འཇུག་གི་བྱ་སྤྱོད་སྐོར་ཞིབ་ཕྲ་འཁོད་པའི་གྲོས་ཆོད་ཆེད་བཏོན་གནང་བ་ཆེས་ཐོག་མ་དེ་ཆགས་ཡོད།
