བཞུགས་སྒར་༸རྒྱལ་བའི་ཕོ་བྲང་དུ་འཛམ་གླིང་ཞི་བདེ་གོང་འཕེལ་དང་འབྲེལ་བའི་ལྷན་ཚོགས་ཐེངས་གཉིས་པ་ལེགས་གྲུབ་དང་སྦྲགས། ༸གོང་ས་མཆོག་གིས་རྒྱལ་ཁབ་ ༡༢ ནས་ཕེབ་ས་པའི་ཚོགས
་བཅར་བ་རྣམས་ལ་རང་རང་སོ་སོའི་ས་གནས་སུ་ཕར་བསྐྱོད་སྐབས་ཏཱ་ལའི་བླ་མའི་སེམས་ཤུགས་དེ་འཁྱེར་ནས་ལས་དོན་གཉེར་མུ་མཐུད་གཉེར་རོགས་ཞེས་བཀའ་བསྩལ་སོང་།
ཨ་རིའི་ཞི་བདེ་ལྟེ་གནས་ཁང་ནས་ཁ་སང་དང་དེ་རིང་བཅས་སུ་༸རྒྱལ་བའི་ཕོ་བྲང་དུ་༸གོང་ས་མཆོག་དང་ལྷན་རྒྱས་འཛམ་གླིང་འདིའི་ནང་དྲག་གནོན་དང་ཟིང་འཁྲུག་ཧ་ཅང་ཆེ་བའི་རྒྱལ་ཁབ་ཁག་ཅིག་གི་ནང་འཚེ་བ་མེད་པ་དང་ཞི་བདེ་གོང་འཕེལ་གྱི་ལས་དོན་གཉེར་བཞིན་པའི་ན་གཞོན་འགོ་ཁྲིད་ཁག་ཅིག་དབར་བགྲོ་གླེང་ཚོགས་འདུ་ཐེངས་གཉིས་པ་གོ་སྒྲིག་གནང་ཡོད་པ་རེད།
དེ་རིང་སྔ་ཐོག་ལྷན་ཚོགས་ཀྱི་ཚོགས་ཐུན་མཐའ་མའི་སྐབས་དེར་ཚོགས་བཅར་བ་ཁག་ཅིག་གིས་རང་ཉིད་སྐྱབས་བཅོལ་གྱི་གནས་བབ་འོག་ལ་འཕྲད་བཞིན་པའི་དཀའ་ངལ་སྐོར་ལ་སྙན་སེང་ཞུ
ས་པ་དང་། དེ་བཞིན་གནད་དོན་དེ་འབྲེལ་བཀའ་འདྲི་ཁ་ཤས་ཕུལ་སོང་བ་མ་ཟད། སྒོས་སུ་དྲག་གནོན་དང་ཟིང་འཁྲུག་ཆེ་བའི་ས་གནས་སུ་ཞི་བདེ་གོང་འཕེལ་དང་རྒྱུན་སྐྱོང་ཇི་ལྟར་གནང་ཚུལ་སོགས་ཀྱི་སྐོར་བཀའ་འདྲི་དགོངས་སྐོར་ཞུས་ཡོད་པ་རེད།
༸གོང་ས་མཆོག་གིས་འཛམ་གླིང་ཞི་བདེ་གོང་འཕེལ་དང་འབྲེལ་བའི་ཐོག་ཕྱག་ལས་དང་དོ་འཁུར་བཞེས་བཞིན་པའི་གཞོན་སྐྱེས་ཚོགས་བཅར་བའི་ལས་དོན་ལ་བསྔགས་བརྗོད་མཛད་པ་དང་སྦྲགས། ང་ཚོར་འཕྲད་བཞིན་པའི་དཀའ་ངལ་དེ་དག་འདས་པའི་ནོར་འཁྲུལ་ལས་བྱུང་བ་ཡིན་སྟབས། ནོར་འཁྲུལ་དེ་དག་གི་རྒྱུ་རྐྱེན་གང་ཡིན་ཤེས་ཐོག་མ་འོངས་པར་དེ་ལྟར་མི་ཡོང་བའི་འགོག་ཐབས་བྱ་རྒྱུ་ནི་ཤིན་ཏུ་གལ་གནད་ཡིན་ཞིང་། ལྷག་པར་དུ་༸གང་ཉིད་མཆོག་གིས་ཞི་བདེའི་ལྷན་ཚོགས་འདི་ལྟ་བུའི་ཚོགས
་མི་དང་ལས་དོན་རྒྱ་བསྐྱེད་ནས་ད་ལྟ་ལྟར་ལྷག་བསམ་དང་ཆོད་སེམས་བརྟན་པོའི་ཐོག་ནས་ European union ལྟ་བུའི་རྒྱལ་སྤྱིའི་རང་བཞིན་ལྡན་པའི་རྒྱ་ཆེ་བ་དང་ཁྱབ་ཆེ་བའི་ངོ་བོ་ཐོག་ནས་ཕྱག་ལས་གནང་རྒྱུར་འབད་བརྩོན་གནང་གལ་ཡིན་པ་ལམ་སྟོན་རྒྱ་ཆེ་བསྩལ་སོང་།
དེ་བཞིན་༸གོང་ས་མཆོག་གིས་༸གང་ཉིད་མཆོག་གི་དགོངས་པ་བཞེས་ཕྱོགས་སྐོར་དང་འབྲེལ། མཚམས་རེ་༸སྐུ་ཉིད་མཆོག་ནས་འགྲོ་བ་མི་ལ་འཕྲད་བཞིན་པའི་དཀའ་ངལ་སྐོར་ལ་དགོངས་པ་བཞེས་སྐབས་༸གང་ཉིད་མཆོག་འགྲོ་བ་མི་གཅིག་པ་ཡིན་སྟབས་གང་ཡང་བྱ་རྒྱུ་མེད་པ་གཟིགས་གནང་གི་ཡོད་ནའང་། འགྱུར་བ་དང་ལས་འགུལ་ཆེ
ན་པོ་ཞིག་ཡོང་བར་ཐོག་མ་གང་ཟག་གཅིག་གིས་འགོ་ཁྲིད་དགོས་སྟབས། ཚོགས་བཅར་བ་རྣམས་ལ་རང་རང་སོ་སོའི་ས་གནས་སུ་ཕར་བསྐྱོད་སྐབས་ཏཱ་ལའི་བླ་མའི་སེམས་ཤུགས་དེ་འཁྱེར་ནས་ལས་དོན་གཉེར་མུ་མཐུད་གཉེར་རོགས་ཞེས་བཀའ་བསྩལ་སོང་།
སྐབས་དེར་ཚོགས་བཅར་བ་ཞིག་གིས་འཛམ་གླིང་ནང་ཏཱ་ལའི་བླ་མ་མང་པོ་དགོས་ཀྱི་འདུག་ཅེས་གསུངས་ཡོད་པ་ལྟར། ༸གོང་ས་མཆོག་གིས་ལྷན་ཚོགས་སུ་བཅར་མཁན་ཁྱེད་རྣམ་པ་ཚོས་ཏཱ་ལའི་བླ་མའི་སེམས་ཤུགས་དེ་འཁྱེར་ནས་ལས་དོན་གཉེར་མུ་མཐུད་གཉེར་རོགས་ཞེས་འབོད་སྐུལ་བཅས་གནང་ཡོད།
གླིང་ཆེན་ Africa འི་ Nigeria ནས་ཡིན་པ་ Victoria ལགས་ཀྱིས་༸གོང་ས་མཆོག་ལ་ཁོ་མོ་སྔ་ལོའི་ཚོགས་འདུ་དང་པོར་བཅར་ནས་རྗེས་སུ་ས་གནས་ཀྱི་དགེ་རྒན་ ༢༠༠ ཙམ་ལ་༸གོང་ས་མཆོག་གི་ནང་སེམས་ཀྱི་ཞི་བདེ་བསྐྲུན་ཐབས་དང་དང་འཚེ་བ་མེད་པའི་སྐོར། དེ་བཞིན་ཤེས་ཡོན་གྱི་ལམ་ནས་བྱམས་བརྩེ་གོང་འཕེལ་བརྒྱུད་འཛམ་གླིང་བདེ་བསྐྲུན་ཐབས་སྐོར་ལ་ཟབ་སྦྱོང་གནང་ཡོད་པ་དང་། དགེ་རྒན་དེ་དག་གིས་སློབ་ཕྲུག་ ༥༠༠༠ ཡས་མས་ལ་ལམ་སྟོན་གནང་ཐུབ་པའི་དགེ་མཚན་ཆེན་པོ་བྱུང་སྐོར་སྙན་སེང་ཞུས་པ་དང་ཆབས་ཅིག ད་རེས་ཚོགས་འདུ་ཐེངས་གཉིས་པའི་ཐོག་སླར་བཅར་ཐུབ་པ་མ་ཟད་བློ་བསྐྱེད་ཆེན་པོ་ཐོབ་སོང་ཞེས་ཞུས་ཡོད་པ་རེད།
