༸གོང་ས་མཆོག་ལ་ཞི་བདེའི་ཆེ་བསྟོད་ཀྱི་གཟེངས་རྟགས་ཤིག་ཕུལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་ ༡༥ ནས་ཡོ་རོབ་ Italy འི་ལྷོ་ཕྱོགས་ Sicily མངའ་ཁུལ་གྱི་གྲོང་ཁྱེར་ཁག་ཅིག་གི་ནང་ལ་མང་ཚོགས་ལ་བཀའ་སློབ་སོགས་ཀྱི་མཛད་འཕྲིན་ཁག་ཅིག་སྐྱོང་བཞིན་ཡོད་པ་དང་། ཁ་སང་མགོན་པོ་༸གང་ཉིད་མཆོག་ནས་ཁུལ་དེའི་ Messina གྲོང་སྡེའི་ནང་ཆིབས་བསྒྱུར་བཀའ་དྲིན་བསྐྱངས་ཏེ་ཁུལ་དེར་རྟེན་གཞི་བྱས་པའི་ Vittorio Emanuele Theatre ཞེས་པའི་ཚོགས་ཁང་དུ་ས་གནས་མང་ཚོགས་རྣམས་ལ་བྱམས་བརྩེ་དང་རྟེན་འབྲེལ་ལྟ་གྲུབ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་ཡོད་པ་རེད།

སྐབས་དེར་མགོན་པོ་༸གང་ཉིད་མཆོག་ནས་བཀའ་སློབ་དངོས་གཞི་དབུ་འཛུགས་མ་མཛད་པའི་གོང་དུ་ Messina གྲོང་སྡེའི་སྤྱི་ཁྱབ་སྐུ་ཞབས་ Renato Accorinti ལགས་དང་གྲོང་སྡེའི་ཡི་ཤུ་བླ་མ་ Giovanni Accolla ལགས་རྣམ་གཉིས་ནས་ད་རེས་འཛམ་བུ་གླིང་འདིའི་ཐོག་གི་ཞི་བདེ་དང་བྱམས་བརྩེའི་བདག་ཉིད་ཆེན་པོ་༸གོང་ས་༸སྐྱབས་མགོན་ཆེན་པོ་མཆོག་གྲོང་སྡེ་ནང་དངོས་སུ་གདན་ཞུ་ཕུལ་ཐུབ་པར་དགའ་ཚོར་ཆེན་པོ་བྱུང་ཞེས་དང་། ལྷག་པར་དུམགོན་པོ་༸གང་ཉིད་མཆོག་ནས་ད་བར་རྒྱལ་སྤྱིའི་ཐོག་ཞི་བདེ་དང་བྱམས་རྩེ། དེ་བཞིན་ཆོས་ལུགས་མཐུན་འབྲེལ་དང་དྲང་བདེན། འཚེ་བ་མེད་པ་སོགས་ཀྱི་ཐད་ལ་མཛད་འགན་ཆེ་གནང་བཞིན་པར་ཆེ་བསྟོད་ཀྱི་ཚུལ་དུ་གྲོང་ཁྱེར་དེའི་ Builder of Peace ཞེས་པའི་ཞི་བདེའི་གཟེངས་རྟགས་ཤིག་ཕུལ་འདུག

གཞི་རྩའི་ཐེངས་འདིའི་༸གོང་ས་༸སྐྱབས་མགོན་ཆེན་པོ་མཆོག་གི་ཨི་ཊ་ལི་ནང་གི་ཆིབས་སྒྱུར་དེ་རྐང་ Messina གྲོང་སྡེའི་སྤྱི་ཁྱབ་སྐུ་ཞབས་ Renato Accorinti ལགས་ཀྱིས་གོ་སྒྲིག་ཞུས་པ་ཞིག་ཡིན་པ་དང་། མགོན་པོ་༸གང་ཉིད་མཆོག་ནས་ཚེས་ ༡༦ ཉིན་ཁུལ་དེའི་ Taormina གྲོང་ཁྱེར་ནང་རྟེན་གཞི་བྱས་པའི་ Greek Theater དུ་ཞི་བདེ་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བཀའ་དྲིན་སྩལ་སྐབས་མེསི་ན་གྲོང་ཁྱེར་ཨ་མས་ཆེ་བསྟོད་ཀྱི་གཟེངས་རྟགས་ཤིག་ཀྱང་ཕུལ་ཡོད་པ་རེད།

༸གོང་ས་མཆོག་གིས་ཁ་སང་མེ་སི་ན་གྲོང་སྡེའི་ས་གནས་མང་ཚོགས་རྣམས་ལ་བྱམས་བརྩེ་དང་རྟེན་འབྲེལ་ལྟ་གྲུབ་ཐོག་བཀའ་སློབ་སྩལ་སྐབས་གཙོ་བོ་མགོན་པོ་མཆོག་གི་ཐུགས་བསྐྱེད་དམ་བཅའ་གསུམ་ལས་འགྲོ་བ་མི་གཅིག་འགྱུར་གྱི་འདུ་ཤེས་ཐོག་ནས་བྱམས་བརྩེའི་བསམ་པ་གོང་མཐོར་གཏོང་རྒྱུ་དང་། ཆོས་ལུགས་མཐུན་འབྲེལ་གྱི་ཐོག་བཀའ་སྩལ་ཡོད་པ་དང་། དེ་ཡང་༸གོང་ས་མཆོག་གིས་བྱམས་བརྩེ་ནི་འགྲོ་བ་མིའི་བདེ་སྐྱིད་ཀྱི་རྩ་བ་ཡིན་སྟབས། ང་ཚོས་རང་ཉིད་ཀྱི་དགའ་ཉེ་ཁོ་ན་ཙམ་མིན་པར་གཞན་ཕན་གྱི་བསམ་པ་ཀུན་ནས་བླངས་ཏེ་རང་ཉིད་ཀྱི་དགྲ་བོ་གཙོས་པའི་འགྲོ་བ་སྤྱི་ལ་གཅིག་མཚུངས་ཐོག་བྱམས་བརྩེས་བསྐྱང་དགོས་པར་ལམ་སྟོན་སོགས་མཛད་འདུག

དེ་རིང་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་ཁུལ་དེར་རྟེན་གཞི་བྱས་པའི་ Teatro Massimo ཞེས་པའི་ཚོགས་ཁང་དུ་མང་ཚོགས་སྟོང་ཕྲག་བརྒལ་བར་ཤེས་ཡོན་དང་བདེ་སྐྱིད་ཅེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་ཡོད་པ་དང་། གྲོང་སྡེའི་སྤྱི་ཁྱབ་མཆོག་ནས་མགོན་པོ་༸གང་ཉིད་མཆོག་ལ་ཆེ་བསྟོད་ཀྱི་གཟེངས་རྟགས་ཤིག་ཕུལ་ཡོད་པ་མ་ཟད། ལྷག་པར་དུ་གྲོང་ཁྱེར་དེའི་ཉེ་འགྲམ་དུ་ཡོད་པའི་གྲོང་སྡེ་ Isola delle Femmine དང་། Ventimiglia di Sicilia གཉིས་ཀྱི་གྲོང་སྡེའི་སྤྱི་ཁྱབ་པ་ལས་རིམ་དེའི་ཐོག་དངོས་སུ་བཅར་ནས་༸གོང་ས་མཆོག་ལ་གྲོང་སྡེ་དེ་གཉིས་ཀྱི་ཆེ་བསྟོད་མི་སེར་གྱི་མཚན་གནས་ཕུལ་ཡོད་པ་རེད།

རྩ་བའི་དེ་རིང་གི་བཀའ་སློབ་ཁྲོད་དུ་མགོན་པོ་༸གང་ཉིད་མཆོག་ནས་འགྲོ་བ་མི་རྣམས་ནས་ང་དང་ཁོ་ཞེས་རིམ་པ་གཉིས་པའི་དབྱེ་བ་རྣམས་དོར་ནས་འགྲོ་བ་མི་རྣམས་གཅིག་འགྱུར་གྱི་བསམ་པ་གོང་མཐོར་གཏོང་རྒྱུ་གལ་ཆེན་པོ་ཡིན་པ་དང་། ལྷག་པར་དུ་ཤེས་ཡོན་གྱི་གནས་ཚད་ཡར་རྒྱས་ཆེན་པོ་འགྲོ་བཞིན་པའུ་དུས་དུས་སྐབས་འདིར་འདས་ཟིན་པའི་དམག་འཁྲུག་གི་བསམ་བློ་མེད་པའི་ཐོག་གྲོས་མོལ་དང་ཞི་བདེ་ལྡན་པའི་དུས་རབས་ཤིག་བསྐྲུན་རྒྱུ་གལ་ཆེ་ཡིན་པའི་ལམ་སྟོན་མཛད་འདུག

དེ་བཞིན་ཁུལ་དེར་ཡོད་པའི་སྐྱབས་བཅོལ་བའི་སློབ་མ་མང་པོ་ནས་མཉམ་བཞུགས་གནང་པ་དང་འབྲེལ། མགོན་པོ་༸གང་ཉིད་མཆོག་ནས་ Palermo གྲོང་སྡེའི་ངོས་ནས་སྐྱབས་བཅོལ་བ་ཚོར་རོགས་རམ་གནང་བཞིན་པ་དེ་ནི་འགྲོ་བ་མིའི་རིང་ཐང་གོང་འཕེལ་བཏང་པ་དང་གཅིག་མཚུངས་རེད་ཅེས་བསྔགས་བརྗོད་མཛད་འདུག་པ་མ་ཟད། སློབ་མ་དེ་དག་ལ་ཤེས་ཡོན་གྱི་མཐུན་འགྱུར་བསྐྲུན་ཐོག་ཁོང་རྣམས་རང་ཉིད་ཀྱི་རྒྱལ་ཁབ་ནང་ཕྱིར་ལོག་གྱིས་རང་དབང་བསྐྱར་གསོ་ཐུབ་པ་གནང་གལ་ཡིན་པ་སོགས་ཀྱི་ལམ་སྟོན་མཛད་འདུག

མཛད་འཆར་ལྟར་ན། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་ཁུལ་དེའི་ནང་བཀའ་སློབ་ཀྱི་མཛད་འཕྲིན་ཁག་གྲུབ་རྗེས་ཉིན་རྒྱབ་ཏུ་མཁའ་ལམ་བརྒྱུད་ཡུལ་དེའི་ Tuscany མངའ་ཁུལ་གྱི་ Florence གྲོང་ཁྱེར་ནང་ལ་ཆིབས་བསྒྱུར་མཛད་ཀྱི་ཡོད་པ་དང་། སང་ཉིན་མགོན་པོ་༸གང་ཉིད་མཆོག་ནས་ཁུར་དེར་རྟེན་གཞི་བྱས་པའི་ Mandela Forum པའི་ཚོགས་ཁང་དུ་ཤེས་ཡོན་གྱི་ཐོག་ནས་ཞི་བདེ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་གྱི་ཡོད་པ་རེད།