འདི་ལོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༡ འཁོར་གྱི་ཡོད་པ་དང་བསྟུན། མགོན་པོ་༸གང་ཉིད་མཆོག་གིས་༸སྐུ་ཉིད་ལ་ཞི་བདེའི་གཟེངས་རྟགས་ཐོབ་སླད་སྐབས་དེ་དུས་སུ་ཕྱག་རོགས་གནང་མཁན་ཀུན་ལ་བཀའ་དྲིན་ཞེས་བཀའ་སྩལ་འདུག
རིང་མིན་ཟླ་ ༡༢ ཚེས་ ༡༠ ཉིན་མོ་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༡ འཁོར་བ་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་གནང་བའི་དུས་དྲན་མཉམ་འཛོམས་འཁེལ་གྱི་ཡོད་པ་རེད། ཁ་སང་ཐེ་ཝན་ནང་བོད་ཀྱི་སྐུ་ཚབ་དོན་གཅོད་ཁང་གིས་ལམ་སྟོན་དང་ཁུལ་དེར་རྟེན་གཞི་བྱས་པའི་དགའ་ལྡན་ཤར་བརྩེ་ཆོས་ཚོགས་དང་བོད་རིགས་ཚོགས་པ་བཅས་ཀྱིས་གོ་སྒྲིག་གནང་སྟེ་ཡུལ་དེའི་ཚོགས་ཁང་ཆེན་མོ་ཞིག་ཏུ་ཆོས་ལུགས་འདྲ་མིན་གྱི་རིག་གཞུང་འཁྲབ་སྟོན་དང་བོད་ཀྱི་ལོ་རྒྱུས་ངོ་སྤྲོད་ཀྱི་འགྲེམས་སྟོན་བརྒྱུད་དུས་ཆེན་དེ་སྔ་སྣུར་གྱིས་སྲུང་བརྩི་ཞུས་འདུག
སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་དད་ལྡན་མང་ཚོགས་ལ་དགའ་བསུའི་འཚམས་འདྲི་དང་འབྲེལ་ནས་མགོན་པོ་༸གང་ཉིད་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༡ འཁོར་བའི་དུས་དྲན་ཐོག་གསུང་འཕྲིན་ཞིག་སྩལ་འདུག་པའི་ནང་། མགོན་པོ་༸གང་ཉིད་མཆོག་ནི་ནང་པའི་དགེ་སློང་དཀྱུས་མ་ཞིག་ཡིན་པ་དང་མགོན་པོ་༸གང་ཉིད་མཆོག་ལ་ནོ་སྦེལ་ཞི་བདེའི་གཟེངས་རྟགས་ཐོབ་པ་དེ་ནི་འཛམ་གླིང་ཐོག་གཞན་ཕན་བསྒྲུབ་རྒྱུའི་ཆ་རྐྱེན་ཞིག་ཆགས་ཡོད་པར་མ་ཟད། ཞི་བདེའི་གཟེངས་རྟགས་བཞེས་མྱོང་མཁན་སྙན་གྲགས་ཅན་གྱི་མི་སྣ་གཞན་དང་འབྲེལ་ལམ་མཛད་རྒྱུའི་གོ་སྐབས་མང་པོ་ཐོབ་པ་བརྒྱུད་ཐུགས་བསྐྱེད་གསར་པ་དུ་མ་འཁྲུངས་ཡོད་པར་བཀའ་སྩལ་དང་ཆབས་ཅིག མགོན་པོ་༸གང་ཉིད་མཆོག་ལ་གཟེང་རྟགས་དེ་ཐོབ་སླད་ཕྱག་རོགས་གནང་མཁན་གྱི་ཚོགས་སྒེར་ཀུན་ལ་བཀའ་དྲིན་ཆེ་ཞེས་བཀའ་སྩལ་མཛད་འདུག
ཁ་སང་ཐེ་ཝན་ནང་ཆོས་ལུགས་འདྲ་མིན་གྱི་རིག་གཞུང་འཁྲབ་སྟོན་གནང་བ་དང་དེ་རིང་ཁུལ་དེར་རྟེན་གཞི་བྱས་པའི་བོད་རིགས་ཚོགས་པས་གོ་སྒྲིག་གནང་སྟེ་ས་གནས་ཀྱི་སློབ་ཆེན་ཞིག་ནས་གཟའ་འཁོར་གཅིག་གི་རིང་བོད་ཀྱི་འདས་མ་ད་གསུམ་གྱི་གནས་བབ་འཁོད་པའི་པར་རིས་འགྲེམས་སྟོན་དང་བོད་པའི་གློག་བརྙན་གཟིགས་འབུལ། དེ་བཞིན་བོད་ཀྱི་ཆོས་དང་རིག་གཞུང་། སྒྱུ་རྩལ་དང་བཅས་པ་ས་གནས་མང་ཚོགས་ཁྲོད་ངོ་སྤྲོད་ཞུ་ཕྱིར་འགྲེམས་སྟོན་ཀྱི་ལས་རིམ་ཞིག་ཀྱང་གཉེར་བཞིན་འདུག
རྩ་བའི་བོད་མིའི་སྒྲིག་འཛུགས་ཀྱི་ཕྱི་ལོ་ ༢༠༢༠ ལོ་འདི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་པ་ལྟར། ཁ་སང་ཐེ་ཝན་ནང་ཆོས་ལུགས་འདྲ་མིན་གྱི་རིག་གཞུང་འཁྲབ་སྟོན་གནང་བ་བརྒྱུད་མགོན་པོ་༸གང་ཉིད་མཆོག་ལ་ནོ་སྦེལ་གཟེངས་རྟགས་འབུལ་བཞེས་མཛད་ནས་མི་ལོ་ ༣༡ འཁོར་བའི་དུས་ཆེན་སྲུང་བརྩི་ཞུས་པ་དེ་ནི་མགོན་པོ་༸གང་ཉིད་མཆོག་གི་༸སྐུའི་ཐུགས་བསྐྱེད་དམ་བཅའ་བཞིའི་ནང་ནས་གཙོ་བོ་ཆོས་ལུགས་མཐུན་འབྲེལ་གཞི་རྩར་བཟུང་ནས་གོ་སྒྲིག་ཞུས་པ་ཞིག་ཆགས་ཀྱི་འདུག
