ཀོ་ལོམ་བྷི་ཡར་བོད་ཀྱི་རིག་གཞུང་གཟའ་འཁོར་ཆེས་ཐོག་མ་གོ་སྒྲིག

ཨ་རིའི་ཀོ་ལོམ་བྷི་ཡའི་རྒྱལ་ས་བྷོ་གྷོ་ཊ་ Bogota ཁུལ་དུ་ Yamantaka Buddhist Center (FPMT) ཆོས་ཚོགས་ཀྱི་གོ་སྒྲིག་འོག་ཟླ་ ༡༢ ཚེས་ ༡༠ ནས་ ༡༧ བར་ Tibet Culture Week ཞེས་བོད་ཀྱི་རིག་གཞུང་གཟའ་འཁོར་གྱི་ལས་རིམ་ཞིག་དྲ་རྒྱ་བརྒྱུད་འཚོགས་བཞིན་འདུགTibet Culture Week དེ་ཕྱི་ཟླ་ ༡༢ ཚེས་ ༡༠ ཉིན་མོ་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ འཁོར་བ་དང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན་བོད་མིའི་གློག་བརྙན་བཟོ་སྐྲུན་པ་བསོད་ནམས་ཨན་ཇ་ཚང་ལགས་ཀྱིས་བཟོ་སྐྲུན་ཞུས་པའི་ Little Tibet ཞེས་པ་གློག་བརྙན་ཞིག་གཟིགས་འབུལ་ཞུས་པ་དང་འབྲེལ་དབུ་འཛུགས་གནང་འདུག

དེ་རྗེས་ཕྱི་ཚེས་ ༡༡ ནས་གནངས་ཕྱི་ཚེས་ ༡༧ བར་འཛུལ་ཞུགས་པ་རྣམས་ལ་བོད་ཀྱི་སྐད་ཡིག་ཐད་ཟབ་ཁྲིད་དང་བོད་ཟས་མོག་མོག་བཟོ་སྟངས་སྐོར། དེ་བཞིན་ཕ་མ་དང་བུ་ཕྲུག་བར་འབྲེལ་བ་བཟང་པོ་ཉར་ཕྱོགས། སྒོམ་སྒྲུབ་སོགས་བོད་པའི་རིག་གཞུང་ཐོག་ངོ་སྤྲོད་དང་གོ་བསྡུར་གྱི་ལས་རིམ་ཁག་ཅིག་བང་སྒྲིག་འདུགགཏམ་བཤད་གནང་མཁན་ཁོངས་སུ་བོད་མི་མང་སྤྱི་འཐུས་ལྷན་ཚོགས་ཀྱི་ཡོ་རོབ་སྤྱི་འཐུས་སྐུ་ཞབས་ཐུབ་བསྟན་དབང་ཆེན་ལགས་དང་༸གོང་ས་མཆོག་གི་༸སྐུའི་སིཔེ་ནིཤ་གསུང་སྒྱུར་བ་བཙུན་མ་བསྟན་འཛིན་སྒྲོལ་དཀར་ལགས། དེ་བཞིན་གློག་བརྙན་བཟོ་སྐྲུན་པ་བསོད་ནམས་ཨན་ཇ་ཚང་དང་ Yamantaka Buddhist Center ཆོས་ཚོགས་ཀྱི་དགེ་རྒན་དགེ་བཤེས་བློ་བཟང་ཀུན་མཁྱེན་ལགས་གཙོས་བོད་ཀྱི་ཆོས་དང་རིག་གཞུང་ལ་རྒྱུས་མངའ་ཡོད་མཁན་རྣམས་གདན་ཞུ་གནང་འདུག

གསར་འགོད་པས་ཆོས་ཚོགས་ཀྱི་དགེ་རྒན་དང་ཁུལ་དེར་གནས་སྡོད་གནང་མཁན་བོད་མི་གཅིག་པོ་དགེ་བཤེས་བློ་བཟང་ཀུན་མཁྱེན་ལགས་སུ་བཀའ་འདྲི་ཞུས་པར་བོད་ཀྱི་རིག་གཞུང་གཟའ་འཁོར་དེ་ཆོས་ཚོགས་ཀྱི་ཚོགས་མི་རྣམས་ཀྱིས་བོད་ཀྱི་རིག་གཞུང་གལ་ཆེར་ངོས་འཛིན་ཞུས་ཏེ་གོ་སྒྲིག་ཞུས་པ་ཞིག་ཡིན་པར་གསུངས་སོང་།

གཞི་རྩའི་ FPMT འམ་ FOUNDATION FOR THE PRESERVATION OF THE MAHAYANA TRADITION  ཞེས་ཆོས་ཚོགས་དེ་ཕྱི་ལོ་ ༡༩༧༥ ལོར་བླ་མ་ཐུབ་བསྟན་ཡེ་ཤེས་མཆོག་དང་བླ་མ་ཐུབ་བསྟན་བཟོད་པ་རིན་པོ་ཆེ་མཆོག་རྣམ་གཉིས་ཀྱིས་ཆེད་འཛུགས་གནང་བ་ཞིག་དང་། Yamantaka Buddhist Center དེ་ FPMT ཡི་ཆོས་ཚོགས་འཛམ་གླིང་ཡུལ་གྲུ་གང་སར་ཡོད་པའི་ནང་ནས་གཅིག་ཆགས་ཀྱི་ཡོད་པ་རེད།  ཆོས་ཚོགས་དེར་སྒོམ་སྒྲུབ་དང་ནང་པའི་ལྟ་གྲུབ། བོད་བརྒྱུད་ནང་བསྟན་སོགས་སློབ་ཁྲིད་གནང་གི་ཡོད་པ་རེད།