སང་ཉིན་གོ་ལའི་ཉིན་མོ་དང་བསྟུན་ཅེཀ་སྤྱི་མཐུན་རྒྱལ་ཁབ་ཀྱི་བོད་དོན་རྒྱབ་སྐྱོར་ཚོགས་པ་དང་། རྒྱལ་སྤྱིའི་བོད་དོན་ལས་འགུལ་ཁང་། བོད་ཀྱི་སྲིད་བྱུས་ཉམས་ཞིབ་ཁང་། ཡུ་རེག་ཉམས་ཞིབ་བསྟི་གནས་ཁང་བཅས་ཐུན་མོང་གི་གོ་སྒྲིག་འོག་དེ་རིང་ནས་ཉིན་གྲངས་གསུམ་རིང་བཞུགས་སྒར་ནོར་བུ་གསོལ་མགྲོན་ཁང་དུ་ Dialogue for Our Future ཞེས་པའི་ཁོར་ཡུག་ལྷན་ཚོགས་ཤིག་འཚོགས་གཏན་ཁེལ་ཡོད་པ་དང་། ཁ་སང་དགོང་མོར་ཚོགས་འདུར་མཉམ་ཞུགས་གནང་མཁན་གྱི་ཁོར་ཡུག་ལས་འགུལ་བ་དང་ཚན་རིག་པ། ཁྱད་ལས་པ་བཅས་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཅས་ལྷན་དུ་མཇལ་མོལ་གནང་ཡོད་པ་རེད།
ཐེངས་འདིའི་ཁོར་ཡུག་ལྷན་ཚོགས་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་རྒྱལ་སྤྱིའི་ས་གནས་གང་སར་ནས་ཁོར་ཡུག་དང་འབྲེལ་བའི་ཆེད་ལས་པ་བཅིུག་ཙམ་གྱིས་གོ་ལའི་གནམ་གཤིས་འགྱུར་ལྡོག་དང་འབྲེལ་བའི་ངལ་བ་འཕྲད་ཁག་སེལ་ཐབས་དང་། འཛམ་གླིང་གི་སྣེ་མོ་གསུམ་པར་གྲགས་པའི་བོད་མཐོ་སྒང་གི་གལ་གནད་བཅས་ཀྱི་ཐོག་གསུང་བཤད་གནང་གི་ཡོད་པ་མ་ཟད། ལྷག་དོན་རྒྱ་གར་བྱང་ཕྱོགས་ལ་དྭགས་ནས་ཡིན་པའི་ཁོར་ཡུག་ལས་འགུལ་བ་གྲགས་ཅན་སྐུ་ཞབས་བསོད་ནམས་དབང་ཕྱུག་ལགས་ལ་དྭགས་འཁར་དོང་ལར་ཆེད་བསྐྱོད་ཀྱིས་མྱུར་ཚད་མཐོ་པོའི་ཐོག་ནས་བཞུར་བཞིན་པའི་འཁྱགས་རོམ་གྱི་ཆ་ཤས་ཤིག་བསྣམས་ཡོད་པ་ལྟར་སང་སྔ་དྲོར་ཁོང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་འཁར་དོང་ལའི་འཁྱགས་རོམ་གྱི་ཆ་ཤས་དེ་སྤྱན་འབུལ་ཞུ་རྒྱུ་རེད་འདུག
དེ་རིང་ཕྱི་དྲོ་ནས་དབུ་འཛུགས་གནང་རྒྱུའི་ཉིན་གྲངས་གསུམ་རིང་གི་ལྷན་ཚོགས་ཀྱི་དབུ་འབྱེད་མཛད་སྒོ་ཐོག Kenya ནས་ཡིན་པའི་ཁོར་ཡུག་ལས་འགུལ་བ་གྲགས་ཅན་ Elizabeth Wathuti ལགས་ནས་དབུ་འབྱེད་གསུང་བཤད་དང་། དེ་བཞིན་Mountain Resiliency ཞེས་ཁོར་ཡུག་སྲུང་སྐྱོབ་དང་འབྲེལ་བའི་ཡར་ཐོན་ཚོང་ལས་གསར་འཛུགས་གནང་མཁན་ཨ་རིར་གནས་བཞུགས་ཚེས་བཅུ་སྒྲོལ་མ་ལགས། རྩོམ་པ་པོ་གྲགས་ཅན་ Kim Stanley Robinson བོད་ཀྱི་སྲིད་བྱུས་ཉམས་ཞིབ་ཁང་གི་ཁོར་ཡུག་ཚན་པའི་འགན་འཛིན་འཛམ་ལྷ་བསྟན་པ་རྒྱལ་མཚན་ལགས། ཅེཀ་སྤྱི་མཐུན་རྒྱལ་ཁབ་ཀྱི་ཁོར་ཡོག་བློན་ཆེན་ཟུར་པ་ Martin Bursik ལགས། ཁོར་ཡུག་ལས་འགུལ་བ་ Manshi Asher ལགས་སོགས་ནས་གཏམ་བཤད་གནང་གི་འདུག 
སང་ཉིན་སྔ་དྲོར་ཁོར་ཡུག་ལྷན་ཚོགས་ཀྱི་ཚོགས་བཅར་བ་ཡོངས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གཟིམ་ཆུང་མཇལ་ཁ་དང་བཀའ་སློབ་བསྩལ་གྱི་ཡོད་པ་ལྟར་བསོད་ནམས་དབང་ཕྱུག་ལགས་ལ་དྭགས་འཁར་དོང་ལར་ཆེད་བསྐྱོད་ཀྱིས་མྱུར་ཚད་མཐོ་པོའི་ཐོག་ནས་བཞུར་བཞིན་པའི་ ice block འམ་འཁྱགས་རོམ་གྱི་ཆ་ཤས་ཤིག་བསྣམས་ཡོད་པ་དེ་༸གོང་ས་༸སྐྱབས་མགོན་ཆེན་པོ་མཆོག་ལ་སྤྱན་འབུལ་ཞུ་གྱི་ཡོད་པ་དང་། ཁོང་དང་ཁོང་གི་ཕྱག་རོགས་རྣམ་པ་དེ་རིང་ཇམྨུ་ནས་ Electric car འམ་གློག་གི་འཕྲུལ་འཁོར་བརྒྱུད་བཞུགས་སྒར་དུ་བཅར་གྱི་ཡོད་པ་རེད།
