བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་བྱང་ཨ་མི་རི་ཀའི་ནང་དུ་གཞུང་འབྲེལ་འཚམས་གཟིགས་གནང་བཞིན་པ་ལྟར། ཁ་སང་སྲིད་སྐྱོང་མཆོག་ནས་ཨ་རིའི་ནིའུ་ཡོག་དང་ནིའུ་ཇར་སི་བོད་རིགས་སྤྱི་འཐུན་ཚོགས་པའི་ཚོགས་ཁང་ནང་ས་གནས་བོད་མི་རྣམས་ལ་བཀའ་ཤག་སྐབས་ ༡༦ པའི་ཆབ་སྲིད་དང་སྤྱི་ཚོགས་བདེ་དོན་སོགས་ཀྱི་ལས་དོན་བྱེད་ཕྱོགས་ཁག་ངོ་སྤྲོད་དང་སྦྲགས། ས་གནས་མི་མང་གི་དྲི་བ་ཁག་ལ་ལན་འདེབས་གསལ་བཤད་སོགས་གནང་འདུག
སྲིད་སྐྱོང་མཆོག་ནས་གསུང་བཤད་ཀྱི་ཐོག་མར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་བོད་ཀྱི་འཐབ་རྩོད་དང་། བོད་མིའི་སྤྱི་ཚོགས་ཀྱི་འཕེལ་རིམ་ཁྲོད་བསྐྱངས་པའི་མཛད་རྗེས་ཁག་ཅིག་དྲན་གསོ་དང་སྦྲགས། ད་ཆ་ང་ཚོའི་སྤྱི་ཚོགས་ནང་ཁག་ཅིག་གིས་སོ་སོའི་འདོད་པ་དང་མ་མཐུན་པ་ཡིན་ན་༸གོང་ས་མཆོག་གི་བཀའ་སློབ་ལ་ཡ་མེད་པའི་རྣམ་པ་དང་། ལྷག་པར་དུ་༸གོང་ས་མཆོག་ལ་མཚན་སྨད་ཞུས་པ་དང་། སྤྱི་ཚོགས་ནང་ལ་གང་བྱུང་བཤད་བསྡད་མཁན་རིགས་ཐོན་བཞིན་པ་རྣམས་ནས་ངེས་པར་དུ་བསམ་བློ་གཏང་རྒྱུ་གནད་འགག་ཆེན་པོ་ཡིན་པ་ལས། གལ་སྲིད་དེ་ལྟར་མུ་མཐུད་གནང་ཞུགས་པ་ཡིན་ན་མ་འོངས་པའི་ལོ་རྒྱུས་ནང་ལ་ནག་ཉེས་ཅན་ཞིག་ཆགས་ཀྱི་རེད་ཅེས་གསུངས་ཡོད།
དེ་བཞིན་སྲིད་སྐྱོང་མཆོག་ནས་ཆབ་སྲིད་ཀྱི་གནད་དོན་དང་འབྲེལ་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱའི་དཀའ་རྙོག་སེལ་མ་ཐུབ་བར་དུ་བོད་འདི་རྒྱ་ནག་གི་ཆ་ཤས་རེད་ཞེས་པ་དེར་ངོས་ལེན་བྱེད་ཐུབ་ཐབས་མེད་པ་འགྲེལ་བརྗོད་དང་སྦྲགས། ད་ལྟའི་གནས་སྐབས་སུ་རྒྱ་ནག་གི་སྲིད་བྱུས་དང་བྱེད་བབ་ཁག་ལ་བལྟས་ན་བོད་རྒྱ་གྲོས་མོལ་ཞིག་ཡོང་གི་རེད་བསམ་པའི་རེ་བ་ཆེན་པོ་མི་འདུག་ཀྱང་། ད་ལྟའི་ཡུ་ཀེ་རེན་གྱི་གནད་དོན་ལས་འཕྲོས་ཏེ་འབྱུང་འགྱུར་ཟླ་བ་གསུམ་ཙམ་གྱི་ནང་ལ་འཛམ་གླིང་གི་གནས་སྟངས་འགྱུར་བ་དང་། ཨ་རུ་སུའི་གནས་བབ། ལྷག་པར་དུ་རྒྱ་ནག་གི་བྱེད་སྟངས་དང་། རྒྱལ་སྤྱིའི་ངོས་ནས་རྒྱ་ནག་ལ་ལྟ་སྟངས་སོགས་ཀྱི་གནས་སྟངས་ཁྲོད་བོད་ལ་གོ་སྐབས་ཇི་ཡོད་དང་། གོ་སྐབས་བྱུང་བའི་སྐབས་སུ་དམ་འཛིན་བྱེད་ཐུབ་པ་ཞིག་བཟོ་རྒྱུ་ནི་བཀའ་ཤག་སྐབས་ ༡༦ པའི་བསམ་བློ་ཡིན་ཞེས་གསུངས་ཡོད།
མ་ཟད་སྤྱི་ཚོགས་བདེ་དོན་དང་འབྲེལ་ད་ལྟའི་བཀའ་ཤག་ནས་བོད་མི་གནས་ཡུལ་གྱི་ས་གནས་ཁག་གི་གནས་སྟངས་དངོས་སུ་རྒྱུས་ལོན་ཞུས་ཏེ་ཡོང་རྒྱུའི་ཕྱི་ཟླ་བདུན་པ་ཙམ་གྱི་ནང་ལ་བོད་མིའི་དགོས་མཁོ་དང་འཚམས་པའི་མ་འོངས་ལོ་གསུམ་གྱི་འཆར་གཞི་ཞིག་སྒྲིག་ཐབས་གནང་བཞིན་ཡོད་པ་དང་། བོད་མིའི་སྒྲིག་འཛུགས་ཀྱི་སྲིད་ཞུ་ལས་བྱེད་རྣམས་ཀྱི་ནུས་པ་གོང་མཐོར་སླད་སྲིད་སྐྱོང་དབུས་པའི་བཀའ་བློན་རྣམ་པའི་འཚམས་གཟིགས་སྐབས་སུ་འབྲེལ་ཡོད་ལས་བྱེད་རེར་མཉམ་དུ་ཁྲིད་བཞིན་ཡོད་པ་དང་། སྒྲིག་འཛུགས་ཀྱི་ལས་དོན་ཁག་ཤོག་བུ་མེད་པའི་དྲ་ཐོག་འཛིན་སྐྱོང་ཐོག་སྐྱོད་བཞིན་པ་སོགས་ངོ་སྤྲོད་གནང་འདུག
སྐབས་དེར་སྲིད་སྐྱོང་མཆོག་གི་གསུང་བཤད་གནང་གྲུབ་མཚམས་སུ་མི་མང་ཁག་ཅིག་ནས་སྲིད་སྐྱོང་མཆོག་ལ་བཀའ་འདྲི་ཁག་ཅིག་ཞུས་སོང་བ་དང་། དེའི་ཁྲོད་མི་ཉུང་བ་ཞིག་གིས་ཚོར་བ་རྣོ་པོའི་ཐོག་ཉེ་ཆར་སྲིད་སྐྱོང་མཆོག་ནས་ཨ་རིའི་རྒྱལ་ས་ Washington DC ནང་གི་འཚམས་གཟིགས་སྐབས་སུ་ཨེ་ཤེ་ཡ་རང་དབང་རླུང་འཕྲིན་ཁང་གི་བཅར་འདྲིའི་ཐོག་བོད་རང་བཙན་ཡིན་པའི་གནས་བབ་དང་། ད་ལྟ་བོད་རྒྱ་ནག་གི་ཆ་ཤས་ཆགས་བསྡད་ཡོད་པ་ཞེས་གསུངས་པའི་གནད་དོན་ཐད་འདྲི་རྩད་གནང་བར་སྲིད་སྐྱོང་མཆོག་ནས་ལན་འདེབས་གསལ་བཤད་གནང་ཡོད།
གཞི་རྩའི་སྲིད་སྐྱོང་མཆོག་གྲོང་ཁྱེར་ནེའུ་ཡོག་ནང་མ་ཕེབས་གོང་ཨ་རིའི་གྲོང་ཁྱེར་ Philadelphia ནང་དུ་ཕེབས་ཏེ་ས་གནས་བོད་མི་མང་ཚོགས་རྣམས་དང་ཐུག་འཕྲད་ཀྱིས་གསུང་བཤད་གནང་འདུག་ལ། གྲོང་ཁྱེར་ནེའུ་ཡོག་ནང་མི་མང་ལ་གསུང་བཤད་ཙམ་མ་ཟད། ས་གནས་སུ་ཡོད་པའི་རྒྱ་རིགས་ཤེས་ལྡན་མི་སྣ་ཁག་ཅིག་དང་ལྷན་དུ་ཚོགས་འདུ་དང་། བོད་པའི་གཞོན་སྐྱེས་ཚོ་དང་ཟུར་དུ་ཚོགས་འདུ་ཚོགས་པ་དང་། བཀའ་ཤག་སྐབས་ ༡༦ གི་བོད་དོན་དང་བླངས་ཞུ་གཏུགས་ལས་འགུལ་སྐོར་ངོ་སྤྲོད་སོགས་གནང་འདུག
སྲིད་སྐྱོང་མཆོག་དེ་རིང་ཨ་རི་ནང་གི་གཞུང་འབྲེལ་འཚམས་གཟིགས་ཐེངས་དང་པོ་དེ་གྲུབ་སྟེ་ Canada ནང་ལ་འཚམས་གཟིགས་སུ་ཕེབས་ཀྱི་ཡོད་པ་དང་། ཐེངས་འདིའི་ཨ་རི་ནང་གི་བདུན་ཕྲག་གཅིག་ཙམ་གྱི་གཞུང་འབྲེལ་འཚམས་གཟིགས་ཁྲོད་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གཙོས་པའི་གྲོས་ཚོགས་འཐུས་མི་དང་། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ Uzra Zeya མཆོག ཨ་རིའི་རྒྱལ་ཡོངས་བདེ་འཇགས་ལྷན་ཚོགས་ཀྱི་རྒྱ་གར་དང་ཞི་བདེ་རྒྱ་མཚོའི་གནད་དོན་ཐོག་གི་འབྲེལ་མཐུད་པ་དང་པོ་སྐུ་ཞབས་ Kurt Campbell མཆོག་སོགས་གཞུང་འབྲེལ་གནད་ཡོད་མི་སྣ་མི་ཉུང་བ་ཞིག་དང་མཇལ་འཕྲད་གནང་ཡོད།
