གྲོས་ཚོགས་འཐུས་མི་ ༦༣ གྱིས་བོད་ནང་གི་ངལ་རྩོལ་སྒྱུར་བཀོད་ཀྱི་ལས་གཞི་འཕྲལ་དུ་མཚམས་འཇོག་དགོས་པའི་ཞུ་སྐུལ།

ཨ་རིའི་རྒྱལ་ས་ Washington DC ཁུལ་དུ་ཡོད་པའི་ James Foundation ཐེབས་རྩ་ཁང་གིས་ཁ་སང་འདོན་སྤེལ་གནང་བའི་སྙན་ཐོ་ཞིག་གི་ནང་རྒྱ་ནག་གཞུང་གིས་ཤིན་ཅང་ལྟར་བོད་ནང་གི་ཞིང་འབྲོག་མང་ཚོགས་འབུམ་ལྔ་ཙམ་དམག་གི་རང་བཞིན་ལྡན་པའི་སྦྱོང་བརྡར་ལྟེ་གནས་ཁང་དུ་བཙན་ཁྲིད་ཀྱིས་ངལ་རྩོལ་སྒྱུར་བཀོད་བྱེད་བཞིན་པའི་གནས་ཚུལ་ཐོན་པ་ལྟར་ཨ་རི་དང་ཨིན་ཡུལ། ཡུ་རོབ་སྤྱི་མཐུན་རྒྱལ་ཁབ། དེ་བཞིན་ཨོ་སི་ཊོ་ལི་ཡ་སོགས་ཀྱི་གྲོས་ཚོགས་འཐུས་མི་ ༦༣ གྱིས་རྒྱ་ནག་གཞུང་གིས་བོད་མི་འབུམ་ལྔ་ཙམ་བཙན་དབང་གིས་ངལ་རྩོལ་བ་བྱས་བཅུག་པར་མཐའ་གཅིག་ཏུ་ངོ་རྒོལ་ཡོད་ཅེས་བསྒྲགས་གཏམ་སྤེལ་བ་དང་སྦྲགས། རྒྱ་ནག་གཞུང་གིས་གཏུམ་དྲག་གི་མནར་གཅོད་དང་བཙན་གནོན་གྱི་ལས་གཞི་དེ་འཕྲལ་དུ་མཚམས་འཇོག་དགོས་པ་མ་ཟད། བོད་མི་དེ་དག་གི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་གནང་དགོས་པ་སོགས་ཀྱི་དགོས་འདུན་དོན་ཚན་བཞི་ཆེད་བཏོན་གནང་འདུག James Foundation ཐེབས་རྩ་ཁང་གིས་ཕྱི་ལོ་ ༢༠༡༦ ནས་ ༢༠༢༠ བར་གྱི་རྒྱ་ནག་གཞུང་འབྲེལ་གསར་ཁང་ཁག་གིས་སྤེལ་བའི་གསར་འགྱུར་དང་བོད་ནང་གི་ས་གནས་རྒྱ་ནག་གཞུང་གི་ཡིག་ཆ་ཁག་ལ་ཉམས་ཞིབ་གནང་བའི་ཞིབ་འཇུག་སྙན་ཐོའི་ནང་གསལ་ལྟར་ན། རྒྱ་ནག་གཞུང་གིས་འདི་ལོའི་ཟླ་བ་བདུན་ཙམ་གྱི་ནང་དུ་བོད་ཀྱི་ཞིང་འབྲོག་མང་ཚོགས་འབུམ་ལྔ་ཙམ་རྒྱ་ནག་གཞུང་གི་དམག་གི་རང་བཞིན་ལྡན་པའི་སྦྱོང་བརྡར་ལྟེ་གནས་ཁང་དུ་ཁྲིད་ནས་སྦྱོང་བརྡར་སྤྲད་ཡོད་པ་དང་། དེའི་ཁོངས་ནས་བོད་མི་ཁྲི་ལྔ་ཙམ་བོད་ནང་ངལ་རྩོལ་ཆེད་བགོ་འགྲེམས་དང་། གཞན་སྟོང་ཕྲག་ཁ་ཤས་ཤིག་རྒྱ་ནག་གི་རས་ཀྱི་བཟོ་གྲྭ་ལ་སོགས་པའི་ས་ཞིང་འདེབས་ལས་ཀྱི་བཟོ་གྲྭ་དང་རྒྱ་ནག་གི་ས་གནས་གཞན་ཁག་ལ་ཆེད་གཏོང་བྱས་ཡོད་པ་རེད་འདུག གནད་དོན་དེ་དང་འབྲེལ་ Inter-Parliamentary Alliance on China ཞེས་པའི་གྲོས་ཚོགས་འཐུས་མི་གྲངས་ ༦༣ ནས་རྒྱ་ནག་གཞུང་གིས་བོད་མི་འབུམ་ལྔ་ཙམ་བཙན་དབང་གིས་ངལ་རྩོལ་བ་བྱས་བཅུག་པར་མཐའ་གཅིག་ཏུ་ངོ་རྒོལ་ཡོད་ཅེས་བསྒྲགས་གཏམ་སྤེལ་བ་དང་འབྲེལ། རྒྱ་ནག་གི་བྱེད་སྟངས་དེ་ནི་ཤིན་ཅང་ནང་གི་ཡུ་གུར་མང་ཚོགས་ས་ཡ་གཅིག་འགལ་བར་ངལ་རྩོལ་སྒྱུར་བཀོད་བྱས་པའི་ལས་གཞི་དང་གཅིག་མཚུངས་ཡིན་པ་དང་། རྒྱལ་སྤྱིའི་ཚོགས་སྡེ་ཁག་གིས་ ཤིན་ཅང་ནང་གི་གནད་དོན་དེའི་ཐོག་རྒྱ་གཞུང་ལ་སྐྱོན་བརྗོད་དྲག་པོ་ཇི་ཙམ་གནང་མིན་ལ་བལྟོས་མེད་ད་རེས་སླར་ཡང་བོད་ནང་འདི་ལྟ་བུའི་ལས་གཞི་སྤེལ་བཞིན་པའི་སྙན་ཐོ་དེར་གཞིགས་ན། རྒྱ་ནག་གཞུང་གིས་དེ་གའི་མང་ཚོགས་ཀྱི་གཞི་རྩའི་འགྲོ་བ་མིའི་ཐོབ་ཐང་དང་རྒྱལ་སྤྱིའི་སེམས་ཚོར་ཁག་སྣང་མེད་དུ་འཇོག་བཞིན་ཡོད་པ་གསལ་པོ་རེད་ཅེས་གསུངས་འདུག

གྲོས་ཚོགས་འཐུས་མི་དེ་དག་གིས་ད་དུང་དོ་བདག་སོ་སོའི་གནས་ཡུལ་གཞུང་ལ་དགོས་འདུན་དོན་ཚན་ཁག་ཅིག་བཏོན་པའི་ནང་དུ་བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་མཁན་ནམ་ངལ་རྩོལ་བ་རྣམས་ཀྱི་གནད་དོན་ཐོག་ངན་པ་ལག་འབྲེལ་ཡོད་མཁན་རྒྱ་ནག་གི་དཔོན་རིགས་ཚོར་ Global Magnitsky Act ཞེས་པའི་རྒྱལ་སྤྱིའི་ཁྲིམས་ཀྱི་འོག་ནས་ཉེས་ཆད་འགེལ་དགོས་པ་དང་། ཕྱི་ལོ་ ༢༠༡༨ ལོར་གཏན་འབེབས་གནང་བའི་ Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ད་ལྟའི་བོད་ནང་གི་ངལ་རྩོལ་སྒྱུར་བཀོད་ཀྱི་གནས་སྟངས་དང་འབྲེལ་ནས་རྒྱལ་སྤྱིའི་རང་བཞིན་ལྡན་པའི་ཞིབ་འཇུག་གནང་དགོས་པ། དེ་བཞིན་ཡུལ་སོ་སོའི་ཚོང་ལས་ཆེ་གྲས་ཁག་ལ་དམིགས་བསལ་ལམ་སྟོན་གནང་སྟེ་བོད་ནང་གི་ངལ་རྩོལ་སྒྱུར་བཀོད་ལས་མཆེད་པའི་དངོས་ཟོག་རིགས་ཉོ་ཚོང་མཚམས་འཇོག་དགོས་པ། རྒྱལ་ཚོགས་ཀྱིས་ངལ་རྩོལ་བའི་གནས་སྟངས་ཐད་ཉམས་ཞིབ་གནང་རྒྱུའི་སླད་དུ་ཆེད་ལས་མི་སྣ་བསྐོ་གཞག་གནང་ནས་ཞིབ་འཇུག་མཐིལ་ཕྱིན་པ་གནང་དགོས་པ་སོགས་ཀྱི་ཞུ་སྐུལ་གནང་འདུག

ད་ལན་གྲོས་ཚོགས་འཐུས་མི་ ༦༣ དེ་དག་གིས་རྒྱ་ནག་གཞུང་གི་བྱ་སྤྱོད་ལ་རྒྱལ་སྤྱིའི་རང་བཞིན་ལྡན་པའི་ཞིབ་འཇུག་གནང་དགོས་པ་སོགས་ཀྱི་དགོས་འདུན་ཆེད་བཏོན་གནང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཐུགས་རྗེ་ཆེ་ཞུས་པ་དང་འབྲེལ།གྲོས་ཚོགས་འཐུས་མི་རྣམས་ནས་བོད་མིའི་གཞི་རྩའི་རང་དབང་དང་དྲང་བདེན་ལ་རྒྱབ་སྐྱོར་གནང་བ་དེས་རྒྱ་ནག་དམར་ཤོག་ཚོགས་པའི་འོག་མནར་སྤྱོད་མྱོང་བཞིན་པའི་གཞིས་ལུས་བོད་མི་རྣམས་ལ་བརྡ་ལན་བཟང་པོ་ཞིག་སྤྲད་ཡོད་ཅེས་གསུངས་འདུག་པ་དང་། འཛམ་གླིང་རྒྱལ་ཁབ་ཁག་ལ་རྒྱ་ནག་གི་གདུག་རྩུབ་ཅན་གྱི་བྱ་སྤྱོད་ལ་ངོ་རྒོལ་གནང་དགོས་པའི་འབོད་སྐུལ་དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་ངོས་ནས་རྒྱ་ནག་གཞུང་གིས་བོད་དང་། ཤར་ཏུར་ཀི་སི་ཐན། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་སྐོར་དམིགས་བསལ་གྱི་འདྲི་ཞིབ་ཚོགས་ཆུང་འཛུགས་དགོས་པའི་དུས་ལ་བབས་ཡོད་པར་གསུངས་འདུག

རྩ་བའི་ James Foundation ཐེབས་རྩ་ཁང་གིས་ཐེངས་འདིའི་སྙན་ཐོའི་ནང་རྒྱ་ནག་གཞུང་གིས་བོད་མི་ཞིང་འབྲོག་རྣམས་དམག་གི་རང་བཞིན་ལྡན་པའི་སྦྱོང་བརྡར་ལྟེ་གནས་ཁང་དུ་ཆེད་གཏོང་བྱ་རྒྱུ་དེ་རྒྱུན་ལྡན་གྱི་བྱ་སྤྱོད་ཅིག་ཡིན་རུང་ཕྱི་ལོ་ ༢༠༡༦ ནས་བཟུང་ལས་གཞི་དེ་ཇེ་ཆེར་བཏང་སྟེ་སྦྱོང་བརྡར་ཁང་གསར་པ་ཁག་ཅིག་འཛུགས་སྐྲུན་བྱས་ཡོད་པ་མ་ཟད། རྫོང་ཆེ་ཆུང་ལ་གཞིགས་ཏེ་ས་གནས་སོ་སོའི་འབྲེལ་ཡོད་ལས་ཁུངས་ནས་སྦྱོང་བརྡར་དེ་དག་སླད་བོད་མི་ཇི་ཙམ་བཏང་དགོས་པའི་ཚད་འཛིན་བཟོས་ཡོད་པ་དང་། སྙན་ཐོ་དེའི་སླད་ཞིབ་འཇུག་གནང་མཁན་གཙོ་གྲས་བོད་དང་ཤིན་ཅང་གི་ཐོག་ཏུ་རང་དབང་གི་སྒོ་ནས་ཉམས་ཞིབ་གནང་མཁན་ Adrian Zenz ལགས་ཀྱིས་རྒྱ་ནག་གཞུང་གི་ལས་གཞི་དེ་ནི་རིག་གནས་གསར་བརྗེའི་རྗེས་སུ་བོད་ཀྱི་ཐུན་མོང་མ་ཡིན་པའི་སྲོལ་རྒྱུན་གྱི་འཚོ་བ་ལ་འཆར་གཞི་ལྡན་པའི་སྒོ་ནས་གཏོར་བཅོམ་བྱ་རྒྱུའི་དམིགས་ཡུལ་ཞིག་ཆགས་ཀྱི་ཡོད་པ་མ་ཟད། རྒྱ་ནག་གཞུང་གི་ངལ་རྩོལ་བ་རྣམས་དབུལ་ཕོངས་ཀྱི་ངལ་བ་ལས་དགྲོལ་རྒྱུ་དང་རྒྱལ་ཁབ་འཛུགས་སྐྲུན་སླད་དུ་ཚོང་ལས་ལྟེ་གནས་ཁག་ཏུ་གཏོང་བཞིན་ཡོད་སྐོར་བརྗོད་བཞིན་ཡོད་ཀྱང་། བོད་རིགས་དང་ཡུ་གུར་བ་རྣམས་ངལ་རྩོལ་སླད་དུ་ཆེད་གཏོང་བྱས་པ་ནི་མི་རིགས་དེ་དག་གི་ལྟ་གྲུབ་བརྗེ་བར་དམིགས་བཀར་བྱས་པ་ཞིག་རེད་ཅེས་བརྗོད་ཡོད་པ་རེད། འོན་ཀྱང་རྒྱ་ནག་ཕྱི་སྲིད་ལྷན་ཁང་གིས་སྙན་ཐོ་དེ་ཁུངས་ལུང་མེད་པ་དང་བོད་གཙོས་རྒྱ་ནག་གི་ཁུལ་དུ་བཙན་སྐུལ་གྱི་ངལ་རྩོལ་བ་ཞིག་གཏན་ནས་མེད་ཚུལ་བརྗོད་འདུག་པ་མ་ཟད། རྒྱ་ནག་ནི་ཁྲིམས་ཀྱིས་སྐྱོང་བའི་རྒྱལ་ཁབ་ཅིག་ཡིན་སྟབས་ངལ་རྩོལ་བ་ཚོར་ཁྲིམས་མཐུན་གྱི་སྒོ་ནས་གླ་ཕོགས་སྤྲོད་ཀྱི་ཡོད་སྐོར་བརྗོད་དེ་རྒྱལ་སྤྱིའི་ཚོགས་སྡེ་ཁག་ནས་གུས་བརྩི་ལྡན་པའི་ཐོག་ལེགས་ཉེས་དབྱེ་འབྱེད་ཐུབ་རྒྱུའི་རེ་བ་དང་། གཞན་གྱི་བསླུ་ཁྲིད་འོག་མི་ཚུད་པའི་རེ་བ་ཡོད་སྐོར་བརྗོད་འདུག