ཉེ་ཆར་ཟླ་བ་སྔོན་མའི་ཕྱི་ཚེས་ ༣༡ ཉིན་དྷ་ས་མེག་གྷན་གྱི་རི་ཁྲོད་དུ་རང་ལོ་ ༢༦ ཙམ་ཡིན་པ་བསོད་ནམས་འཕེལ་ཁོ་ཞུ་བ་བོད་པའི་ན་གཞོན་ཞིག་གིས་རང་སྲོག་བཅད་ཡོད་པ་དང་དེ་བཞིན་ཕ་རན་སིར་གནས་སྡོད་བོད་མི་ན་གཞོན་གཞན་ཞིག་གིས་ཁང་པ་ནས་མར་མཆོངས་ཏེ་རང་སྲོག་བཅད་པའི་གནས་ཚུལ་ཐོན་ཡོད་པ་རེད།དེ་རིང་གི་ལས་རིམ་ནང་ད་ཆ་ཕྱི་དངོས་པོའི་ཡར་རྒྱས་དང་སྤྱི་ཚོགས་ནང་གི་དཀའ་ངལ་འདྲ་མིན་ལ་བརྟེན་ནས་རང་སྲོག་གཅོད་མཁན་ཇེ་མང་དུ་འགྲོ་བཞིན་པ་དེ་ནི་འཛམ་གླིང་གི་དཀའ་ངལ་ཆེ་གྲས་ཤིག་ཆགས་ཡོད་པ་ལྟར། བཙན་བྱོལ་བོད་མིའི་སྤྱི་ཚོགས་ནང་དུའང་སེམས་ངལ་དྲག་པོ་དང་སེམས་གུ་དོག་པ་སོགས་ཀྱི་གནད་དོན་དབང་གིས་རང་སྲོག་བཅད་པའི་གནད་དོན་མི་ཉུང་བ་ཅིག་འབྱུང་བཞིན་ཡོད་པ་རེད།
དེ་རིང་རླུང་འཕྲིན་ཁང་གིས་བཞུགས་སྒར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་སུ་དལ་འབྱོར་མི་ལུགས་རིན་ཆེན་རྙེད་དཀའ་བ་ཇི་ལྟར་ཡིན་ཚུལ་དང་རང་སྲོག་བཅད་པའི་ཉེས་དམིགས་གང་དང་གང་ཡོད་པའི་ཐོག་བཀའ་འདྲི་ཁག་ཅིག་ཞུས་ཡོད། དེ་བཞིན་ཨ་རིའི་མི་ནི་སོ་ཊར་གནས་བཞུགས་སེམས་ཁམས་འཕྲོད་བསྟེན་སློབ་གསོ་བ་འབུམ་རམས་པ་ཀུན་དགའ་ནོར་འཛོམས་ལགས་ཀྱིས་རང་སྲོག་བཅད་རྒྱུའི་ཀུན་སློང་ཡོད་མཁན་རྣམས་ལ་ལམ་སྟོན་གནང་ཕྱོགས་དང་འབྲེལ་བའི་དམིགས་བསལ་ལས་ཕྱོགས་བསྒྲིགས་ཞུས་ཡོད།
