དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པའི་ལས་ཉིན་ ༧ པར་ཁྲིམས་བཟོའི་ལས་དོན་ཐོག་མུ་མཐུད་ཕེབས་ཏེ། བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་ཀྱི་རྩ་འཛིན་ཁྲིམས་ཡིག་དང་། བཙན་བྱོལ་བོད་མིའི་ཁྲིམས་ཞིབ་ཁང་གི་དཔང་རྟགས་རྩ་འཛིན་ཁྲིམས་ཡིག དེ་བཞིན་བཙན་བྱོལ་བོད་མིའི་ཁྲིམས་ཞིབ་ཁང་གི་ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག་བཅས་ཀྱི་ཁྲིམས་འཆར་སོ་སོའི་བརྗོད་པ་དང་པོའི་ཐོག་ཕེབས་སོང་།
རྩ་བའི་བཙན་བྱོལ་བོད་མིའི་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དེ་དག་ནི་ཕྱི་ལོ་ ༡༩༩༦ ལོར་སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་ཆོག་མཆན་བཀའ་འཁྲོལ་དང་འབྲེལ་གཏན་འབེབས་མཛད་པ་དང་། དུས་ནས་དུས་སུ་ཁྲིམས་ཞིབ་པ་རྣམས་ཀྱིས་མང་མོས་ཐོག་བསྐྱར་བཅོས་བསྣམས་པ་ཁག་ལ་༸གོང་ས་མཆོག་གིས་མཚན་རྟགས་བཀའ་ཁྲོལ་གནང་སྟེ། ལག་བསྟར་གནང་སྲོལ་ཡོད་པ་ཞིག་ཡིན་ནའང་། ཕྱི་ལོ་ ༢༠༡༡ ལོར་༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོས་གནང་བའི་རྗེས། བཅའ་ཁྲིམས་བསྐྱར་བཅོས་ཐེངས་ ༢༥ པ་དེ་གནང་བ་ནས་བཟུང་ཁྲིམས་ཞིབ་པ་རྣམ་པས་སྤྱི་མོས་ཀྱི་ཐོག་ནས་ཁྲིམས་ཡིག་དེ་དག་ལ་བསྐྱར་བཅོས་རིམ་པ་ཁ་ཤས་གནང་ཡོད། ལྷག་པར་ཕྱི་ལོ་ ༢༠༢༡ ལོར་ཆེས་མཐོའི་ཁྲིམས་ཞིབ་ཁང་གིས་ཁྲིམས་ཀྱི་ངོས་བཞེས་ཀྱི་གནད་དོན་འོག་ནས་སྤྱི་འཐུས་རྒྱུན་ལས་ལ་ཉེས་ཆེད་བཏང་བའི་གནད་དོན་དང་། དེ་འབྲེལ་ ༢༠༢༡ ལོར་གྲོས་ཚོགས་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གསུམ་འཕོ་འགྱུར་བཏང་བ་སོགས་ཀྱི་གནད་དོན་བྱུང་བའི་རྗེས་སུ། བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་ཀྱིས། ཁྲིམས་ཡིག་དེ་དག་བསྐྱར་བཅོས་སླད་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་སྤྱི་མོས་ཀྱི་ཐོག་ནས་འཆར་འབུལ་ཞུས་པར་བོད་མི་མང་སྤྱི་འཐུས་ལྷན་ཚོགས་ནས་བཀའ་འཁྲོལ་གཏན་འབེབས་གནང་དགོས་པ་ཞེས་འཁོད་ཡོད་པ་རེད།
དེ་རིང་གི་གྲོས་ཚོགས་སུ་སྤྱི་འཐུས་རྒྱུན་ལས་ནས་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་གསུམ་དང་འབྲེལ་བའི་ཁྲིམས་འཆར་བསྣམས་ཕེབས་པ་ལྟར། སྤྱི་འཐུས་རྒྱུན་ལས་རྣམས་ཀྱིས་གྲོས་ཚོགས་སུ་ཁྲིམས་འཆར་ཁག་སྙན་སྒྲོན་ཞུས་པའི་རྗེས་སུ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་གཞིར་བཟུང་། ཁྲིམས་ཡིག་འཆར་ཟིན་ནམ་སྒྲིག་གཞིའི་འཆར་ཟིན་གྲོས་གཞིར་ཚུད་ཟིན་འཕྲལ་འཆར་ཟིན་གྱི་ཚིག་དོན་ལ་གསལ་བཤད་དང༌། ཆ་རྐྱེན་སོ་སོའི་དགོས་པ་དང་དམིགས་ཡུལ་ཁྱབ་ཚད་བཅས་ཀྱི་སྐོར་འགྲེལ་བརྗོད་དང་འབྲེལ་བའི་བརྗོད་པ་དང་པོའི་ལས་རིམ་ཐོག་ཕེབས་ཡོད།
སྐབས་དེར་སྤྱི་འཐུས་ཁག་གཅིག་ནས་ཁྲིམས་འཆར་དེ་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་དང་མཐུན་མིན་སོགས་ཀྱི་དོགས་འདྲི་ཁག་གཅིག་ཕེབས་ཡོད་པ་ལྟར། ཚོགས་གཙོ་མཆོག་གིས་གསལ་བཤད་ཁྲོད་ཐེངས་འདིའི་གྲོས་ཚོགས་ཐོག་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་གསུམ་པོ་གཏན་འབེབས་བཀའ་འཁྲོལ་གནང་མ་ཐུབ་ཚེ། མ་འོངས་ཁྲིམས་ཞིབ་པ་རྣམས་ཀྱི་ཕྱག་ལས་གནང་སའི་ལམ་ཡོངས་རྫོགས་དགག་གི་ཡོད་སྟབས། དེ་ནི་ཧ་ཅང་གལ་ཆེན་པོ་ཆགས་ཀྱི་ཡོད་པ་གསུངས་ཡོད།
དེ་རིང་གི་ཚོགས་ཐེངས་གསུམ་རིང་ཁྲིམས་ཞིབ་ཁང་གི་ཁྲིམས་ཡིག་བསྐྱར་བཅོས་ཀྱི་ཁྲིམས་བཟོའི་ལས་དོན་ཐོག་ཕེབས་པའི་རྗེས་ཉིན་རྒྱབ་ཏུ་ཚོགས་ཐེངས་གཅིག་འཕར་མ་ཚོགས་ཏེ། བོད་མིའི་སྒྲིག་འཛུགས་ཀྱི་ལས་ཁུངས་གོ་རིམ་བཞིན་སྔོན་རྩིས་ཐོག་སྤྱི་ཡོངས་ཀྱི་བགྲོ་གླེང་དང་གཏན་འབེབས་ཀྱི་ལས་རིམ་མུ་མཐུད་འཕྲོ་སྐྱོང་གནང་བའི་ཁྲོད། ཕྱི་དྲིལ་ལས་ཁུངས་ཁྱབ་ཁོངས་སྐུ་ཚབ་དོན་ཁང་ཁག་གི་སྔོན་རྩིས་ཐོག་བགྲོ་གླེང་དང་གཏན་འབེབས་ཐོག་ཕེབས་ཡོད།
